Tuesday, March 23, 2021

https://www.sunstar.com.ph/

https://www.sunstar.com.ph/

Visita Iglesia di na itugot sa Archdiocese of Cebu

Posted: 22 Mar 2021 08:59 PM PDT

TUNGOD sa padayong pagsaka sa mga kaso sa coronavirus disease 2019 (Covid-19) sa Sugbo, nahukman sa Archdiocese of Cebu nga wa nay Visita Iglesia atol sa Semana Santa.

Atol sa Chrism Mass sa Cebu Metropolitan Cathedral sa alas 9 sa Martes sa buntag, Marso 23, 2021, si Cebu Archbisop Jose Palma nipahibawo sa kaparian nga way Visita Iglesia.

Ang hukom sa archdiocese gi-relay ni Fr. Mhar Balili ngadto kang Police Colonel Josefino Ligan, pangu sa Cebu City Police Office (CCPO).

Si Palma nipahibawo kapin sa usa ka semana ang nakalabay nga dunay Visita Iglesia.

Apan si Konsehal Joel Garganera, deputy chief implementer sa Cebu City Emergency Operations Center (EOC) nakurat niini tungod kay si Palma daan nang nisulti nga way Visita Iglesia atol sa ilang tigom tungod sa nagsakang mga kaso sa Covid-19.

Nagpasalamat si Ligan ning uwahing hukom sa Archdiocese of Cebu. (AYB)

This posting includes an audio/video/photo media file: Download Now

100 ka pamilya sa Tanke, Talisay nakadawat og pagkaon, PPE

Posted: 22 Mar 2021 08:46 PM PDT

MOKABAT sa 100 ka mga pamilya ang nahatagan og food packs ug personal protective equipment (PPE) sa Martes alas 6 sa buntag, Marso 23, 2021 sa sityo Magabay, Barangay Tanke, Dakbayan sa Talisay.

Mga sakop sa City of Talisay Police Station, City Advisory Council member ug mga opisyal sa barangay nanglimpyo usab gawas sa pagpanghatag ug pag house-to-house nga pagbisita.

Ang food packs ug PPE gi-sponsor ni Cyril Velasco, vice chairman sa City Advisory Council for Police Transformation and Development (CACPTD).

Ang programa nga gilusad nila ni Police Lt. Colonel Gerard Ace Pelare gihimo human sa ilang subsob nga anti-illegal drug campaign sa tapos sa miaging semana.

Tumong sa kapulisan ug Kagamhanan sa Dakbayan sa Talisay nga ilang makuha ang simpatiya sa mga lumolupyo batok sa illegal drugs.

Ang Barangay Tanke dunay grabeng suliran sa ilegal nga drugas itandi sa ubang mga dapit sa Dakbayan sa Talisay.

Ang sityo Magay usa sa pito ka mga sityo sa Tanke nga nasudlan sa illegal drugs.

Gawas niini, nauyonan usab sa kapulisan ug CACPTD nga magtuko og communal nga kasilyas alang sa mga residente, sama sa ilang natukod sa sityo Rattan sa miaging tuig. (AYB)

This posting includes an audio/video/photo media file: Download Now

Nanghatag og manok gipatay sa silingan

Posted: 22 Mar 2021 08:19 PM PDT

HAMTONG nga lalake gidunggab patay sa iyang silingan nga iyang gihatagan og karne sa manok alas 6 sa gabii sa Lunes, Marso 22, sa Purok Kalachuchi, Barangay Lanas, Dakbayan sa Naga, habagatang Sugbo.

Si Melquiades Aringay, 54, alias Ambo, ulitawo, patay nang niabot sa tambalanan tungod sa mga samad dinunggaban sa kalawasan samtang ang suspek giilang si Alberto Paran.

Si Police Staff Sgt. Raymund Romares sa Naga Police Station nga nahinabi sa Superbalita Cebu nagkanayon nga nga personal nga bangi ang motibo kay giingong gidunggab usab ni Aringay si Paran sa miaging tuig.

Sa wa pa ang pagpanunggab, si Paran gikataho nga hubog kay nag-inom uban sa nga higala samtang si Aringay hubog sab atol sa kremin.

Si Aringay niadto sa balay ni Paran, naghatod og hiniwa nga karne sa manok.

Human mahatag, nilakaw si Aringay, naglingkodlingkod sa usa ka payag.

Wa siya makabantay nga gisundan siya ni Paran ug gidiretso sa pagdungab makadaghang higayon.

Si Paran paspas nga nibiya sa dapit samtang si Aringay patay nang niabot sa tambalanan.

Matod pa ni Romares, nga wala nila isalikway ang posibilidad nga nanimalos si Paran kang Aringay human ni naka-survive sa pagdunggab sa biktima kaniya sa miaging tuig. (GPL)

This posting includes an audio/video/photo media file: Download Now

Babaye gisunog sa kanhi kapuyo, patay; suspek nasunog sab

Posted: 22 Mar 2021 07:55 PM PDT

Namatay ang usa ka babaye human gisunog sa iyang kanhi kapuyo samtang natulog sa Lunes sa gabii, Marso 22, sa sitio Crusher, Barangay Lawaan 3, dakbayan sa Talisay.

Ang sunog nakaangin pa og laing tulo ka mga balay.

Matod sa Talisay City Police nga ang suspek nakaangkon usab og 2nd degree burns human nakit-ang nagkayo usab paggawas sa balay.

Ang namatay giila nga si Baby Mae Agner, 29 samtang ang suspek iyang kanhi kapuyo nga si Dondon Labora.

Sa pakisusi sa kapulisan, ang biktima uban ang bag-ong hinigugma nga ginganlan og Jay Demana ug ang 11 anyos nga anak ni Agner nangatulog na.

Giingong unang nanunggab si Labora kang Agner. Nahitabo ang komosyon, nailog ni Demana ang kutsilyo gikan kang Labora.

Nakahigayon paggawas si Demana ug ang bata sa balay.

Mao na lay nakita sa mga silingan nga nasunog na ang balay.

Lakip sa naugdaw si Agner samtang nakaangkon og 2nd degree burns si Labora kinsa gidala sa tambalanan.

Wa pa masayri unsa ang kahimtang si Labora. (REV)

This posting includes an audio/video/photo media file: Download Now

Editoryal: ‘Gubat’ sa tubig

Posted: 22 Mar 2021 08:21 AM PDT

GISAULOG sa kalibutan ang World Water Day sa Lunes, Marso 22, 2021. Kon unsa ka importante ang supply sa pagkaon, ingon man usab ang tubig. Gani sa Dakbayan sa Sugbo, nahimo kining pulitikanhong isyu, labina sa Metro Cebu Water District (MCWD) human giilugan sa administrasyong Labella ug Rama ang mga pwesto sa board of directors.

Sa katuigan nga nanglabay, karon pa nahimong dakong pulitikanhong isyu ang BOD. Gihimong pulitikanhong isyu ang pagdumala sa MCWD kay giingong way nahimo sa pagpalambo sa supply sa tubig sa Metro Cebu. Nagkinahanglan og kausaban ang katawhan.

Sa pagkakaron, naa bay nahimo ang BOD nga nakapaluag sa kinabuhi sa mga Sugboanon pinaagi sa di na pagpaabot og buntagay sa pag-agas sa tubig? Duna na bay tubig ang mga gripo sa mga Sugboanong namuyo sa kabukiran? O ang suliran way kausaban hangtod karon?

Sukad sa paglingkod sa bag-ong namunoan, napun-an ba ang mga tinubdan sa tubig? Kon wala, hain na diay ang kausaban nga gipaabot sa mga Sugboanon?

Kon way nahimo ang BOD karon sa pagpaluag sa kahimtang sa mga Sugboanon, pareho ra diay ang karon ug kaniadto, mga bulay-og. Unta, wa na lang hilabti ang kanhi mga opisyal kon way nahatag nga alternatibo o maayong kausaban ang kasamtangang BOD karon kay di unta maduhig sa palpak ang administrasyong Labella.

Tinuod, lisod sulbaron ang problema sa supply sa tubig sa Metro, gawas kon ang Probinsya sa Sugbo mobubu og dakong puhonan, uban sa MCWD, sa pag-tap sa dagkong mga sapa sa lalawigan isip mas barato nga alternatibong supply sa tubig.

Karon man gud, ang MCWD nakatutok sa desalination plant isip alternatibong tinubdan sa supply sa tubig nga klaro kaayong di ma-afford sa ordinaryong mga Sugboanon, labina niadtong labing kabus.

Hinaut pa unta ning labing uwahing gubat sa korte tali sa karon ug miaging mga sakop sa BOD, di mahimong casualty ang mga Sugboanon.

This posting includes an audio/video/photo media file: Download Now

Nalzaro: New normal sa sabong

Posted: 22 Mar 2021 08:21 AM PDT

Gumikan kay dili na-makontrol sa kapulisan ang naghitak nga tigbakay, adunay plano ang pipila ka mga lokal nga opisyal, labi pa ang Gamefowl Commission nga buksan na ang mga buwangan. Apan gikinahanglan nga mosagop na usab sa new normal. Si Konsehal Raymund Garcia, chairman sa Gamefowl Commission, mirekomendar ngadto sa mayor nga buksan ang mga buwangan nga nag-operate sa dakbayan.

Hinuon sa rekomendasyon unya ni Konsihal Garcia ngadto ni Mayor Edgardo Labella, nga mosagop na kini sa new normal. Unsaon man? Atong masunod ang mga health protocol, labi pa sa social distancing, way audience. O wala na ang nga tawo nga mosugal sulod sa galleria. Ang team o tag-iya lang sa manok, kristo o kuyme ang tugutan nga makasulod sa roydahan. Ang mga motaya adto lang sa gawas ug moabay lang sa tag-iya sa manok. Aw, dili gihapon makakuwarta o panginabuhi sama sa mga masyador ug mga tag-iya og tindahan ug karenderya sa mga buwangan kay wala may tawo.

E-SABONG

Niadtong 1996, naumol sa IBM Marketing team ang pulong "E-business" o "Electronic Business." Usa kini ka matang sa negosyo o transaksiyon sa komersyo nga naglambigit sa sharing o pakigbinahinay pinaagi sa internet. Gamit kaayo kini karong panahona gumikan sa pandemiya. Karon online na ang pagpalit og pagkaon. Online na magpakunsulta ka og doktor. Online na mopalit ka bisag unsa. Pusta sa lotto ug pusta sa lumba sa kabayo. Pusta sa sabong online na usab. Ug mao ni katuyoan karon sa konsehal sa siyudad sa Sugbo nga atong buhaton. Wala na unyay dinaganay sa tigbakay kon ang tanan online na. So, ang mga sugarol og manok dili gihapon malingaw kay dili man gyud sila makapamasyada sulod sa buwangan.

Ang problema lang karon kay una, illegal pa ug wala pa itugot ang balaod kabahin sa E-Sabong. Pending pa ang balaod kabahin niini. Apan gihimo na kini sa uban. Wala lang dakpi. Ug Ikaduha--medyo lisod pang pamatud-an nga ang online sabong tinuod gyud nga makatabang sa mga kabus nga nanginabuhi sa mga buwangan. Kon dili klaro kini nga nagpuno sa bulsa sa daan nang datu kaayo nga mga bookies nga mao ang nagpadagan ning maong bisyo nga gikabuangan gyud sa mga Pilipino.

This posting includes an audio/video/photo media file: Download Now

Espinoza: Motuman ta aron di ta ibalik sa GCQ

Posted: 22 Mar 2021 08:20 AM PDT

DUNA bay dakong posibilidad nga ibalik sa general community quarantine (GCQ) ang Cebu, lakip ang tulo ka mga dakbayan--Cebu, Mandaue ug Lapu-Lapu--kon magpadayon og saka ang numbero sa mga natakdan sa Covid-19? Morag dili kalikayan nga mahibalik ta sa GCQ kon yaya ang pagpatuman sa health protocols ug ang kadaghanon kanato magpadayon nga gahi'g ulo.

Sugod Marso 22, 2021 hangtod sa Abril 4, 2021, ang Metro Manila lakip ang Probinsya sa Bulacan, Cavite, Laguna ug Rizal gibalik sa GCQ tungod sa kapin sa 7,000 nga natakdan sa Covid-19 sulod sa tulo ka adlaw. Ang Probinsya dunay 1,577 ka aktibo nga kaso, ang Cebu city 2,508, Mandaue 1,114 ug Lapu-Lapu 1,062, matod sa DOH-7 case bulletin niadtong Marso 21, 2021.

Dihang girekomendar ang Cebu nga ibalik sa GCQ basi sa usa ka survey kay misaka ang kaso sa mga naigo sa Covid-19, labina dinhi sa Dakbayan sa Sugbo, merebentar dayon si Cebu Gov. Gwen Garcia kay matod pa niya ang pobre mosamot ka pobre. Ubos sa GCQ ang mga negosyo nga gitawag nga non-essential, lakip na niini ang turismo, masirad-an man.

Di gyud mosugot si Gobernador Gwen mahibalik ang Cebu sa GCQ tungod kay iya na man nga gisugdan og abli ang turismo sa probinsya. Apan kon mahitabo gyud nga mosaka ang gidaghanon sa mga matakdan sa coronavirus unya morekomendar ang IATF ngadto ni Presidente Duterte nga ibalik sa GCQ ang tibuok Cebu, duna bay mahimo ang mga lokal nga opisyales sa pagpugong sa orden unya ni Presidente Duterte?

Ang mga opisyal sa barangay gitahasan na sa pagpatuman sa health protocols sa tarong nga pagsul-ob sa mask ug face shield ingon man social distancing kon naa sa publiko. Apan basi sa akong nakita, daghan man gihapon ang hambugero nga dili motuman sa husto nga pagsul-ob sa mask ug face shield.

Sa tiyangge sa Danao city niadtong Biyernes, dihang namalit ko'g isda, ang tanan nga mga naninda walay mask. Igo ra nga mipahiyom ang usa ka tindera nga akong gipangutana ngano wala siya magsul-ob og mask ug face shield. Ang lain tindera miingon nga mosul-ob siya sa mask igpauli sa ila. Susmaryosep!

Ang mga naninda og pagkaon, utanon ug uban pa sa kilid sa dalan H. Abellana, Mandaue city duna man tuoy mask, apan kutob ra sa ilang suwang ug walay face shield. Ingon ana sad ang mga naninda sa mga merkado sa barangay sa Cebu City. Ang ilang mask naa ra sa ilang suwang kay maglisod kuno sila og ginhawa dihang akong gisita.

Way usa ka Sugboanaon, labina sa mga negosyante, nga mosugot nga ibalik ta sa GCQ tungod kay naghinayhinay na man og bangon ang atong ekonomiya ug daghan na ang nakabalik sa ilang trabaho pag-abli sa mga non-essential nga industriya. Igo ba lang mobabag ang atong lokal nga opisyales kon ibalik sa GCQ ang tibuok Cebu, apan way kusganon nga gibuhat aron sa pagpatuman sa health protocols?

This posting includes an audio/video/photo media file: Download Now

Tambagi ko Noy Kulas: Estorya sa ex

Posted: 22 Mar 2021 08:16 AM PDT

Dear Noy Kulas,

Tagoa lang ko sa ngalan nga Gemma. Ang akong problema karon parte sa akong bana nga dunay duha ka mga anak sa wa pa mi magminyo.

Nakahibawo ko nga duna siyay anak sa iyang kanhi live in partner, yet nakigminyo ko niya kay love lagi nako kaayo. Adtong time wa pa sa akong huna-huna moabot ang possibility nga mopuyo ang iyang mga anak uban namo. Yes, naa na puyo namo ang mga bata kay ang inahan nitrabaho na sa Manila ug way laing mabinlan sa mga bata.

Sa sugod okay ra nako, but nagkadugay gilainan k okay ang mga inahan sa mga bata magsige na og tawag sa akong bana kay kuno para sa mga bata. Usahay dugay pa kaayo silang mag-estorya. Kinsa man nga asawa ang ganahan maminaw sa bana nga nakig-estorya sa ex? Tambagi ko please unsa ang akong buhaton. Sakto ba nga magselos ko sa iyang ex?

GEMMA

Gem

Di kalikayan ang pagselos kay natural kaayo na nga feeling, labina sa inyong sitwasyon karon. But ang nakaayo lang sab kay transparent ang imong bana sa ilang conversation, kana kon sa tanang panahon nga nag-estorya sila naa ang imong presensya.

Hangyoa lang siya nga di dugayon ang ilang panag-estorya ug concentrate lang sila sa mga bata. Di usab frequent and sultihi siya sa imong na-feel karon aron di siya magtuo nga okay ka lang kay sakto baya ka nga ma-concern sa frequent, taas nga estorya kay anha diha magsugod og balik og siga ang kayo. Maora na siya og nagpaypay sa nawong na untang kayo.

Ayaw lang usab ihikaw niya ang iyang pagka responsableng amahan sa ilang mga anak. Know how to truly love the kids.

NOY KULAS

This posting includes an audio/video/photo media file: Download Now

Mongaya: Quincentennial gisaulog

Posted: 22 Mar 2021 08:14 AM PDT

DAKONG lalis karon ngano daw gisaulog ang pag-abot ni Ferdinand Magellan ug kaubanan dinhi sa Pilipinas 500 ka tuig nga milabay?

Matod pa, nagsaulog kita sa 500 ka tuig sukad niabot sa atong yuta ang Kristiyanismo. Apan, nagkanayon sab ang wala makauyon, nga kining relihiyon gigamit lang sa mga kolonyalistang Katsila isip paris sa ilang mga armas aron kita himuong ulipon.

Sa laing bahin, mao kini ang higayon nga usa ka gamhanang conquistador nga si Magellan namatay dihang nisulong sa Mactan sa mga kamot sa mga Sugboanong gipangulohan ni Lapulapu.

Kon tan-awon nato sa mga mata sa mga langyaw gikan sa Uropa labi na sa mga Kristiyano, makaingon kita nga angay saulogon kay kini ang unang higayon nga ilang nadiskubrehan ang archipelago nga ginganlan gamit ang ngalan sa Hari sa Espanya niadtong panahona nga si King Philip.

Apan mao sab kini ang higayon nga atong napakgang ang unang pagsuway nga maulipon kita. Gani, atong napildi ang mga sundawo sa labing abante nga armadong kusog kaniadtong 1521. Tungod niini, nalangay og pipila ka dekada ang pag-ulipon kanato sa mga Katsila.

Alang sa mga historian, kining maong panghitabo tipik sa pagmatuod nga lingin gyud diay ang kalibutan. Nga mura kini og usa ka bola.

Sa wala pa mahitabo ang Magellan expedition, dakong pagtuo nga ang kalibotan patag. Sa ngilit niini, mahimong mahagbong ang mga barko. Niadtong tungora, ang paagi lang nga moabot sa Moluccas mao ang paglawig gikan sa Uropa padulong sa Sidlakan.

Gituohan kaniadto nga kon molawig padulong sa Kasadpan, di ka moabot sa Moluccas. Hinuon, moabot ka sa ngilit sa kalibotan ug mahagbong.

Apan wala motuo si Magellan niini. Ug tuyo sa iyang armada mao ang pagpruweba nga moabot gihapon sila sa Moluccas kon molawig padulong sa Kasadpan.

Tuod man, napruweba sa maong kalihokan ni Magellan nga sakto nga lingin ang kalibotan. Mao kini ang giingong unang circumnavigation sa kalibotan.

Alang kanako, kining tibuok panghitabo nalakip sa kasaysayan sa kalibotan. Di na lang kita maglalis unta. Tungod niining panghitabo sa miaging 500 ka tuig, naapil kita sa kasaulogan sa Quincentennial sa tibuok kalibotan. (DM sa @anol_cebu)

This posting includes an audio/video/photo media file: Download Now

300 ka balay maguba

Posted: 22 Mar 2021 08:13 AM PDT

KAPIN 300 ka mga balay ang apektado sa pagpadayon sa pagpalambo sa Kinalumsan River sa dakbayan sa Sugbo diin mapadak-an ug mapaladman aron malikayan ang baha.

Kini ang gipahibawo ni City Councilor Jerry Guardo, chairman sa committee on infrastructure sa konseho. Ang Department of Public Works and Highways (DPWH) 7 gikatakdang moisyu og resume to work order ngadto sa contractor sugod karong Marso 24, Miyerkules.

Ang maong proyekto nagkantidad og P554 milyones ilawom sa flood control project sa DPWH.

Lakip sa mga barangay nga makabenepisyo sa maong proyekto mao ang Mambaling ug Duljo Fatima.

Si Guardo nagkanayon nga apil sa maapektohan ang duha ka dagkong business establishment nga duol sa sapa apan iyang gipadayag mga ni-cooperate na ang management sa Gaisano ug Budget Builders para mapatuman ang proyekto.

Gipahibawo ni Guardo nga adunay siyam ka mga balay ang ilang unahon og hawan aron malibre ang three-meter easement sa Barangay Mambaling nga kansang tagtungod nahatahan na og bayad gikan sa City Govermment.

Ang Prevention Restoration Order Beautification Enhancement (Probe) ni Raquel Arce maoy gitahasan sa pagguba sa mga concrete ug light materials nga estruktura sugod karong Miyerkules.

Ang Division for the Welfare of the Urban Poor (DWUP) ni Simeon Romarate mao sab ang mopahigayon og socioeconomic survey aron maproseso ang bayad para sa parte sa ilang balay nga maapektohan.

Si Guardo nagkanayon nga bayaran sa City Government og labing ubos P24,000 ang matag balay nga maigo sa proyekto apan mahimo sab silang hagatan og relocation site kon ilang gustohon.

Ang DPWH 7 inabagan sa City Government niimplememtar sa kapin 1 ka bilyon nga flood control projects nga maoy magpabalik sa orihinal nga sukod sa kasapaan sa Dakbayan sa Sugbo nga inanay nang nikuyom gumikan sa illegal structures mga gitukod sa illegal settlers.

This posting includes an audio/video/photo media file: Download Now

P1B lugi sa mga negosyante sa Dakbayan sa Mandaue?

Posted: 22 Mar 2021 08:12 AM PDT

HUMAN sa usa ka tuig sa pandemya, nikabat na og bilyunes pesos ang naalkanse sa mga negosyo sa Dakbayan sa Mandaue subay sa pagbanabana sa Mandaue City Chamber of Commerce and Industry (MCCI).

Matod ni Steven Yu, presidente sa MCCI, dili siya makahatag og detalye nga numero sa alkanse.

Kasagarang feedback nga makuha nila gikan sa mga negosyante sa Mandaue mao nga dili pa maayo ang dagan sa negosyo, apan padayon gihapon nilang panghuptan ilang negosyo.

Ang Mandaue naila isip industrial city tungod sa kadaghang planta o pabrika sa dakbayan.

Bisan nagsugod ang pandemya, ang mga industriya usa sa mga wala nasira niadtong hugot pa ang estado sa quarantine sa dakbayan.

Bisan panga industrial city ang Mandaue, miingon si Yu nga gamay lang ang dagko nga mga industriya sa dakbayan ug ang 90 porsyento niini mao ang micro, small, medium enterprises (MSMEs).

Dako gyud nga pag-ubos ang nasinati sa mga negosyante labi nga niubos sab ang trapiko sa mga mamalitay sa pag-igo sa pandemiya, sigon ni Yu.

Mikunhod og 60 porsyento ang gidaghanon sa trapiko sa mamalitay gikan sa pre-Covid level gikan sa Enero hangtod Marso, sigon ni Yu.

Adunay gibanabana nga 16,000 nga negosyo ang narehistro sa Mandaue.

Gisulti ni Yu nga 4,000 ra ang wala magsira bisan pag-igo sa pandemya gikan sa Abril ngadto sa Mayo 2020 apan karon nag-anam-anam og pagbukas sa ilang negosyo.

Niini, gisulti ni Yu nga ang kadaghanan sa mga negosyo sa Mandaue gusto nga buksan na gyud ang ekonomiya aron sila makabawi sa ilang mga alkanse.

Sigon ni Yu nga gusto sa mga negosyante nga adunay suporta gikan sa gobyerno ug abagan gyud sila hangtod nga makabangon pagbalik ang ilang negosyo.

Ang suporta nga gipangita sa mga negosyante mao ang sa kaulohan nga patas-an ang financial stimulus sa mga nalugi nga mga negosyo, paspasan ang pagpamakuna sa mga katawhan, ang paghatag ug pagwagtang sa ubang mga bayronon sa mga negosyante.

Niingon sab si Yu nga ang gobyerno sa Pilipinas kinahanglan nga maghimo og mga pamaagi susama sa Estados Unidos sa Amerika ug sundon ang ilang mga pinansyal nga lakang nga ilang giimplementar aron maabagan ang mga negosyante sa nasod nga makabangon. (KFD)

This posting includes an audio/video/photo media file: Download Now

Sugat Kabanhawan sa Minglanilla ipahigayong virtual nga pasundayag

Posted: 22 Mar 2021 07:00 AM PDT

Ang inilang Sugat Kabanhawan Festival sa lungsod sa Minglanilla matag tapos sa Semana Santa, ipahigayon kini sa sunod buwan apan pinaagi na sa virtual nga pasundayag.

Si Minglanilla Mayor Elanito Peña nipahibalo sa iyang hukom kagahapon, Marso 22, human sa usa ka tuig nga pagsuspenso sa pista sukad sa 2020 tungod sa community quarantine restrictions.

"Actually dili gyud unta ni ma wala ang kalihukan namo sa kabanhawan pero karon tungod sa Covid kay aron mabati sa katawhan nga naa nag selebrar ta sa Sugat Kabanhawan Festival sa atong lungsod," matod ni Peña.

Apan subay sa uwahing lagda sa Inter Agency Task Force (IATF) gitugot na ang mga relihiyosong kalihukan sa mga lugar nga gipaubos sa modified general community quarantine (MGCQ) basta mahisubay sa health ug quarantine protocols.

Tungod kay limitado, inihap ra usab ang mahimong makasalmot sa programa.

Sama sa dancers, hosts, LGU officials, directors ug uban pang mga tawo nga may parte sa programa.

Kining tanan ipakita lang pinaagi sa live streaming.

Aron malikayan ang pagtakod sa sakit, gidili ang pagtapok sa mga barangay ug sa mga panimalay.

"Sauna naa gyuy dako nga kalingawan, kalihukan mga one week. Naay Sugat gyud, naay sayaw, naay stage ana pero karon adto ra sa complex mag video ra ipakita didto. Amo sad giimbitar si Gov. Gwen," matod ni Peña.

Samtang gipahibaw ni Jay Fernandez, ang information officer sa lungsod, nga nagpadayon na ang pagpangandam og rehearsals sa mga partisipante.

"Sa Saturday night Festival Queen, Sugat Kabanhawan inig Sunday sa kadlawon then inig hapon ang Sugat Kabanhawan Festival Dance Competition," matod ni Fernandez.

Aron masiguro nga mahimong hapsay ang kalihukan, gimandoan ang kapulisan sa lungsod sa pag-monitor sa palibot pagsiguro nga walay magtapok paagi nga malikay sa coronavirus disease 2019 (Covid-19).

Sa uwahing tala sa lungsod sa Marso 22, adunay 99 ka mga aktibong kaso. Sukad sa pag sulbong sa pandemiya may moabot sa 1,174 ang kompirmado sa sakit diin 1, 023 na niini ang naka-recover ug 52 ang namatay. (ANV)

This posting includes an audio/video/photo media file: Download Now

80 ka pamilya nakadawat og solar panel set

Posted: 22 Mar 2021 07:00 AM PDT

Nakapahimulos og libreng mga solar panel set sa kagamhanan sa dakbayan ang 80 ka mga pamilya sa Brgy. Coahagan sa isla sa Olango, Lapu-Lapu City niadtong Marso 21, 2021.Matod ni Lapu-Lapu City Mayor Junard Chan nga ang mga solar panel set adunay tulo ka tuig nga warranty aron masigurong wala nay gastoan ang mga molupyo sa pagpaayo niini.

Ang gipang-apud-apod nga solar panel set adunay battery, upat ka LED lights, ug smartphone connector diin mahimong maka-charge ug cellphone.

Gawas sa mga solar panel set, nanaud usab ang kagamhanan ug moabot sa 25 ka solar street lights sa kadalanan aron usab masigurong hayag ug luwas. (GCM)

This posting includes an audio/video/photo media file: Download Now

Giluba-patay sa iyang kauban

Posted: 22 Mar 2021 06:59 AM PDT

Usa ka handler sa manok patay human giluba sa iyang kauban gumikan sa selos sa Upper Pandan Brgy. Pandan, Dakbayan sa Bogo, alas 11:30 sa gabii niadtong Sabado, Marso 20, 2021.

Si Rommel Marquino, 26, ulitawo, handler sa manok, taga Bago City, Negros Occidental, dead-on-arrival sa tambalanan sa Bogo.

Ang biktima nakaangkog dakong samad dinungaban sa iyang walang dughan.

Si Daly Villaguarda, 39, minyo, construction worker ug nagpuyo sa maong dapit, nadakpan human sa hot pursuit operation sa Brgy. Bagtik, lungsod sa San Remegio. (GPL)

This posting includes an audio/video/photo media file: Download Now

PB mihangyong clearances ilibre sa unang aplikante

Posted: 22 Mar 2021 06:55 AM PDT

Nanawagan ang Provincial Board (PB) sa mga lokal nga kagamhanan sa probinsya ug national government agencies sa Sugbo sa pagtabang sa mga Sugboanon nga first time applicants nga mahimong sayon ang pag-apply og trabaho taliwa ning pandemya.

Kini pinaagi sa pag-waive sa bayad sa mga rekisitos nga lukaton gikan sa munisipyo ug barangay.

Mga rekisitos nga sama sa barangay clearance, National Bureau of Investigation (NBI) clearance , Community Tax Certificate, certificate of birth, certificate of marriage, police clearance ug uban pa angay ihatag nga libre sa first time applicants.

Si PB Member Glenn Anthony Soco sa sixto distrito sa lalawigan sa Sugbo nga maoy nangamahan ug niduso sa resolusyon nagkanayon nga nakita sa Hunta Probinsyal ang importansya sa trabaho ning panahon sa pandemya nga niresulta sa krisis sa nasud.

Matod ni Soco nga dili haom ang padayon nga pagpaningil og bayad sa mga Sugboanon nga mao pay nawad-an og trabaho tungod sa pandemya.

"Job seekers are constrained to comply and submit the necessary documents to would-be/prospective employers while new hires are required to complete requirements before they shall be admitted.... Needless to say, it is quite inconsiderate and even oppressive to compel displaced workers who are in pursuit of new employment to shell out at least a thousand pesos in order to comply and be given the option to land another job," gilatid sa resolusyon.

Dugang ni Soco nga kon padayon kini nga buhaton, mas mosaka ug modaghan ang mga Sugboanon nga wa gihapoy trabaho ug pangita.

"It is evident that a jobseeker without a few hundred pesos can never find a job for the primary reason that he/she cannot comply with the documentary requirements of the employer," gilatid sa resolusyon.

Gawas sa maong resolusyon, giduso usab ni Soco ang resolusyon nga nag-ulohan nga nag-awhag sa mga Public Employment Offices (Peso) nga mohingusog sa paghatag og dan nga daghan ang mahatagan og kahigayunan nga makatrabaho.

Ang duha ka mga resolusyon gipasar sa PB sa Marso 22, 2021 atol sa regular session niini.

Tinguha sa PB nga makabalik og makabangon pag-usab ang mga Sugboanon ning panahon sa kalisod ug krisis nga padayong gisagubang sa nasud. (ANV)

This posting includes an audio/video/photo media file: Download Now

500 ka tunghaan iduso sa face-to-face classes

Posted: 22 Mar 2021 06:52 AM PDT

Ang Department of Education (DepEd) morekomendar og face-to-face classes ngadto sa Malacañang nga salmotan sa 500 ka mga eskwelahan sa tibuok nasod nga maoy magsilbing mga pilot area.

Kini ang gipadayag ni Undersecretary for Administration Alain Pascua human gibalibaran ang ilang unang rekomendasyon nga mag pilot testing sa face-to-face classes sa 5,000 ka mga eskwelahan sa tibuok nasod atol sa EduAksyon press conference sa Lunes, Marso 22, 2021 nga nanukad sa Negros Oriental.

Iyang gitug-an nga sa ilang proposal, way labot ani ang mga eskwelahan gikan sa Metro Manila sanglit padayon pa nga daghan og mga kaso sa coronavirus disease (Covid-19) sa ilang mga local government unit (LGU).

"Ngayon, ipo-propose uli (namin) on smaller scale, 500 na lang (sa buong bansa) bawat region ay 50 (schools) na lang for pilot testing. Hindi pa napapasa o wala pang aksyon sa proposal na yan," padayag ni Pascua.

"Yong face-to-face kung DepEd ang tatanungin, talagang gusto ng DepEd na magkaroon talaga ng face -to- face interaction dahil yan yong pinaka effective talaga pagdating sa educational process," matod ni Pascua.

Adunay mga dapit sa nasod nga way bisan usa ka kaso sa Covid-19 o gamay ra kaayo.

Kasagaran niini naa sa hilit nga mga dapit, sama sa mga isla.

Si Regional Director Salustiano Jimenez sa DepEd 7 nagkanayon nga kinahanglan adunay pagtugot sa local government unit (LGU) ug Parents Teachers Association (PTA) para aduna silay tagsa-tagsa ka responsibilidad aron sa ingon mapugngan ang pagkatap sa Covid-19.

DILI PUGSON

Kalabot sa bakuna batok sa coronavirus disease (Covid-19), gipadayag ni Pascua nga voluntary ang pagpabakuna unya sa mga magtutudlo ug di pinugsanay.

"Our DepEd memorandum and position in DepEd, the inoculation or vaccination of teachers would be on voluntary basis though we emphasized to them that they have also moral obligation to the society," butyag ni Pascua.

Matod niya nga ikaupat sa priority list sa gobyerno ang pagbakuna sa gatusan ka libo ka mga magtutudlo.

Sa kasamtangan, giuna ang mga health care frontliner nga maoy top priority.

P700M CONNECTIVITY

Gipahibawo sa ni Pascua nga ipatuman sa DepEd karong tuiga ang second phase sa public education network aron mapakusgan ang internet.

Tuyo niini nga maabot sa internet ang labing layo nga eskwelahan sa Pilipinas aron matabangan ang mga bata sa ilang pagtuon niining panahon sa pandemya.

"This is about 700 million worth of connectivity program.We will be connecting the last mile school via satellite connection. We will provide the teachers and learners with internet," dugang ni Pascua.

Ang mga magtutudlo adunay 300 gigabite load sulod sa tulo ka buwan. Kon dili mahurot, makarga kini sa mosunod nga buwan para sa kusog mas taas nga access sa internet.

Gipahibawo usab ni Pascua nga adunay 50,000 ka mga tablets o laptop nga ihatag ngadto sa mga maestra nga maoy magtudlo sa labing lagyo nga eskwelahan sa nasod nga karon nagpadayon pa ang procurement.

This posting includes an audio/video/photo media file: Download Now

Martin: Rapper na-inspire sa pandemya

Posted: 22 Mar 2021 06:50 AM PDT

Gipailaila ang hiphop-rapper nga si Kokas o Herb Navarro sa tinuod nga kinabuhi nga taga-San Fernando, Cebu apan nagdako sa Sawang Calero.

Nawa siyag kadiyot sa sirkulasyon tungod kay nagtrabaho isip BS in Electronics Engineering graduate sa UV.

Pinaka-epic nga hiphop battle nga iyang naapilan ang "Whut It Do Reppin" niadtong 2010 apan karong pandemic nibalik siya ug gitukod ang "Team Mangtas." Nahimo sad siyang sakup sa "Lumadz" ug "6000goonz."

Usa sa iyang mga producer silang Hi-C and Dice sa "Dice and K9" nga nisikat niadto sa kantang "Itsumo." Lakip sa mga musical artist nga naghatag niyag inspirasyon karon ning iyang pagbalik mao silang Garvie, Phattscrap, Jerc Diggler, Doug of Southkings, Aikee Vestil ug John Tugot.

IPOKRITA

Kadtong gihimo ni Ivana Alawi nga nagpakaaron-ingnong makililimos ug nagpahilak-hilak pa kay naluoy kuno siya sa tiguwang nga nitabang niya usa ka minaot nga pasundayag sa iyang vlog.

Klarong iya rang gigamit ang tiguwang sa iyang vlog nga dunay 342 million total views sukad siya nag-YouTuber niadtong June 1 2018.

Basin wa mo kahibawo si Ivana Alawi ang No. 7 highest paid Filipino YouTuber sa Pilipinas nga mokita og P465,000 to P7.42 million kada buwan gikan sa paghimo niya og mga video.

EXPECTED NA

Di nako mahibong kon nganong grabe ang pagsaka karon sa kaso sa Covid.

Kay di ba gipahimangnoan na ta sa World Health Organization nga mas paspas makatakod ang bag-ong variant karon sa Covid? Ako na gani ning gisuwat dinhi niadtong Enero.

Ayaw lagi mo sigeg gawasgawas kon wala moy importanteng lakaw. Kay bisan kanang bakuna dili na garantiya nga makaluwas nato na sa virus. Madugay pa gyud ni kon di ta mokooperar.

BIRTHDAYS

Mga pahalipay sa usa sa atong mga pinalanggang suki sa Superbalita Laysho nga si Ms. Rosemarie Gaisano nga magsaulog sa iyang birthday karong Marso 25. Wish you good health always, Ma'am. Happiest birthday!

Nagpa-greet sad nato si Dodoy Teberio alyas "Tubig Queen ng Cebu" kay birthday sad niya karong adlawa, Marso 23. Mag-26 na kuno siya. Happy birthday nimo diha,`Doy! Bahalag ginagmay, Doy, basta kanunay.

This posting includes an audio/video/photo media file: Download Now

GMA Network mikuha og Platinum Award

Posted: 22 Mar 2021 06:49 AM PDT

Ang GMA Network nakadawat og Platinum Award for the TV Network Category atol sa 22nd Annual Reader's Digest Trusted Brands Awards.

Ang Platinum Award maoy labing taas nga pasidungog tali sa labing kasalingang brands sa Pilipinas nga shortlisted sa Reader's Digest sa tinuig nga kalihokan.

Lakip sa nakakuha sa pasidungog mao ang GMA News pillars Jessica Soho ug Mike Enriquez. Si Soho napili nga Most Trusted TV Host/Presenter alang sa News and Current Affairs category samtang si Enriquez isip Most Trusted Radio Presenter.

"Once more thank you to Reader's Digest for this award and the trust. This couldn't have come at a better time because things are really hard right now and we all could do with the extra push and inspiration. Thank you for going out of your way to give this out once more, despite all the restrictions and the pandemic. Congratulations to all the winners. God bless all of us," matod ni Soho atol sa virtual awarding ceremony.

Niadtong 2018, si Soho nakadawat siya sa ikawalo nga Most Trusted News Presenter award, diin naghimong unang Hall of Fame awardee sa maong kategoriya. Siya maoy host sa number one program sa nasod, "Kapuso Mo, Jessica Soho."

Si Enriquez nipadayag usab sa iyang pagpasalamat sa award.

"Thank you very much Reader's Digest Trusted Brand for this award as the "Most Trusted Radio Presenter" for 2020—a most cherished award. Thank you for the encouragement and inspiration to do even better, and thank you for recognizing our profession," matod niya sa pagdawat sa award.

Ang GMA News pillar anchors Saksi sa Dobol B sa Network's flagship AM radio station Super Radyo DZBB 594khz.

Si Enriquez kasamtangnang presidente sa RGMA. Sa TV, siya maoy co-anchors saNetwork's flagship newscast 24 Oras ug hosts sa public affairs program "Imbestigador."

Ang Reader's Digest,pinaagi sa Trusted Brand Survey, niila sa brands ug services, lakip sa personalities, consumers trust the most.

Tungod sa pandemic, ang awarding ceremonies gipahigayon nga virtual awards sa ilang website. (PR)

This posting includes an audio/video/photo media file: Download Now

Davao kampyon sa MPBL bubble

Posted: 22 Mar 2021 06:37 AM PDT

Naangkon sa Davao Occidental-Cocolife Tigers ang korona pinaagi sa overtime nga kadaugan batok sa San Juan-Go for Gold Knights, 89-88, niadtong Dominggo sa gabii, Marso 21, 2021 sa Game 4 nga maoy nagtiklop sa best-of-five championship series, 3-1, sa Maharlika Pilipinas Basketball League (MPBL) Lakan Cup sa Subic Bay Gymnasium.

Ang three-pointer sa beteranong si ex-PBA Mark Yee sa nahabiling 13.4 segundos maoy nakakapadaog sa Tigers, nga nakabawos sa Knights nga maoy nagpilde kanila sa championship series sa miaging Datu Cup.

"It's so much sweeter because we got it back from San Juan. We were so close last time and it was heartbreaking as an organization," matod ni Tigers head coach Don Dulay nga napatik sa www.abs-cbnnews.com.

Ang followup shot ni ex-PBA Larry Rodriguez gikan sa sipyat ni Jhonard Clarito maoy nakahatag sa Knights og 88-86 nga labaw sa nahabiling 1:07 minutos sa overtime.

Sa sunod nilang posisyon sa bola, ang Knights ningdikit na sa kapildihan dihang natawagan og offensive foul si Rodriguez sa nahabiling 27 ka mga segundos.

Human niini, gipaulbo na ni Yee ang iyang nakapadaog nga three-point bomb nga naghatag sa Tigers og 89-88 nga labaw sa himatyong mga segundos.

Aduna pa unta'y dakong kahigayunan ang Knights nga mailog ang kadaugan ug makapugos og deciding Game 5 apan tungod sa maayong depensa sa Tigers, wala sila nakamugna og puntos sa return play.

Si Yee, kinsa nagpakatap og 19 puntos ug 12 rebounds alang sa Tigers, maoy napiling Finals MVP.

Ang produkto sa University of the Visayas (UV) Green Lancers nga si Emman Calo maoy nangulo sa kadaugan pinaagi sa iyang 22 puntos samtang nidugang og 11 puntos matag usa sila si Joseph Terso ug Billy Robles.

Ang Knights gipangulohan ni Rodriguez pinaagi sa iyang 19 puntos samtang niamot og 18 puntos si Clarito.

Puntos matag usa:

Davao Occidental 89 - Calo 22, Yee 19, Terso 11, Robles 11, Mocon 9, Balagtas 8, Gaco 4, Saldua 3, Custodio 2, Albo 0, Ludovice 0.

San Juan 88 - Rodriguez 19, Clarito 18, Isit 14, Wilson 13, Wamar 7, Tajonera 6, Gabawan 4, Ayonayon 3, Aquino 2, Estrella 2, Pelayo 0, Reyes 0.

Quarterscores: 24-18, 40-31, 56-60, 80-80. 89-88. (ESL)

This posting includes an audio/video/photo media file: Download Now

Ancajas mas nagmadasigon

Posted: 22 Mar 2021 06:33 AM PDT

Nadugangan ang kadasig ni International Boxing Federation (IBF) super flyweight champion Filipino Jerwin Ancajas alang sa iyang pagdepensa batok kang mandatory challenger Mexican Jonathan Rodriguez karong Abril 2021 sa Amerika.

Kini human gipahibalo ni MP Promotions president Sean Gibbons nga ang kadaugan ni Ancajas ning awaya posibleng mahimo niyang tiket alang sa gipangandoy niyang away batok sa bisan asa kanila ni Srisaket Sor Rungvisai, Juan Francisco Estrada ug Roman "Chocolatito" Gonzalez.

Gipasabot ni Gibbons nga dako ang poruhan nga mahitabo kini hilabi na kon makapirma na og kontrata si Ancajas sa Premier Boxing Champions (PBC) ni Al Haymond.

"We have (with PBC) the 'Rat King' Rungvisai, we have Chocolatito and Estrada," batbat ni Gibbons nga napatik sa www.abs-cbnnews.com.

Si Ancajas gibuhian sa Top Rank ni Bob Arum gumikan kay naglisod ang TR paghan-ay og away alang kang Ancajas tungod sa mga isyu sa visa ning panahon sa pandemya. (ESL)

This posting includes an audio/video/photo media file: Download Now

Liloan jail daghan og kontrabando; jail officers imbestigahon

Posted: 21 Mar 2021 11:47 PM PDT

JAIL officers sa Liloan Police Station ipaubos sa imbestigasyon human makasakmit ang mga sakop sa Provincial Intelligence Unit sa Cebu Provincial Police Office og mga kontrabando atol sa greyhound operation niadtong Sabado sa kaadlawon, Marso 20, 2021.

Nilusad og kinalit nga greyhound operation ang PIU sa mga police station sa lalawigan sa Sugbo aron masiguro nga way kontrabando sa sulod.

Ang labing daghan nga nakuha nagagikan sa detention cell sa Liloan Police Station diin nakasakmit ang mga operatiba og 19 ka cellular phones, 11 ang keypad cellphones, walo ang smart phones.

Lakip sa nasakmit ang duha ka mga rim sa sigarilyo, cellphone charger, tattoo equipment, kwarta nga mo balor og P2,600, duha ka putos sa gituohang shabu ug mga drug paraphernalia.

Tungod niini, mimando si Police Colonel Alladin Collado,hepe sa CPPO, sa iyang investigation branch sa pag imbestigar sa mga jail officers sa maong police station nganong naka sulod ang mga kontrabando.

"I directed my investigation officer namin to conduct investigation on the matter at kung sino yung mga involved dito," matod ni Collado.

Dugang ni Collado nga responsibilidad sa mga jail officer nga tan-awon ang mga dala sa mga dalaw sa ilang tagsa-tagsa ka police stations aron way makalusot nga illegal nga butang.

Hugot nga gidili ang pagpasulod sa mga cellphones, sigarilyo ug bantayan og maayo nga way illegal nga drugas mapayuhot.

Kinahanglan siksikon sa mga police una ipasulod ang mga pagkaon sa mga persons deprived of liberty kun mga piniriso.

"The responsibility of the jailer is to see to it that all items should be checkes, it will serve as a warning to everybody. We are not tolerating this act na nag papabaya sila," dugang ni Collado.

Gihulagway ni Collado nga nag dasok na ang mga dinakpan sa mga police stations sa kalungsuran tungod kay hinay ang commitment order sa Cebu Provincial Detention and Rehabilitation Center (CPDRC) .

Tungod sa kadaghan sa mga nasakmit nga kontrabando, mohimog rotation si Collado sa mga jail officers sa matag police station aron malikayan ang familiarity sa mga binilanggo. (AYB)

This posting includes an audio/video/photo media file: Download Now

Gitipi tungod sa selos

Posted: 21 Mar 2021 08:17 AM PDT

USA ka handler sa manok ang patay human giluba sa iyang kauban gumikan sa selos alas 11:30 sa gabii Sabado, Marso 20, sa Upper Pandan Brgy. Pandan dakbayan sa Bogo.

Si Rommel Marquino, 26, ulitawo, handler sa manok, ug lumad nga taga Bago City Negros Occidental, dead-on-arrival (DOA) sa tambalanan sa Bogo.

Ang biktima nakaangkog dakong samad dinunggaban sa iyang walang dughan.

Si Daly Villaguarda, 39, minyo, construction worker ug handler og manok ug nagpuyo sa nahisgutang lugar, nadakpan Dominggo sa kaadlawon human sa hot pursuit operation didto sa Brgy. Bagtik, lungsod sa San Remegio.

Si Police Staff Sgt. Abel Nasataya, imbestigador sa Bogo City Police Station, nagkanayon nga ang biktima natulog na sa ilang baraks niadtong higayuna.

Ang suspek nga nagpuyo duol sa farm sa manokan gikatahong hubog.

Nahinanok na unta apan nakamata dihang mitaop ang kitchen knife sa iyang dughan.

Ang suspetsado nakasulod human nalimot ang biktima pagsira sa pultahan.

Apan nailhan ang suspetsado kay ang biktima nakalakaw pa kini 50 metros ngadto sa pikas barak sa iyang duha ka kauban ug nangayog panabang.

Gipukaw sa biktima iyang mga kauban gipahibalo niya nga gidunggab siya ni "Daly'.

Human niini, gidala nila sa tambalanan ang biktima apan DOA na.

Ang motibo kay selos kay nagtuo ang suspetsado nga dunay relasyon iyang asawa nga si Geraline, 25, ug ang biktima.

"Sige siyag selos sa biktima, Sir, mismo ang asawa ug ang ig-agaw nisulti bisan walay kamatuoran," dugang ni Nasataya.

Ang asawa ug mga ig-agaw nga babaye maoy tigguna sa mga sagbot sa farm.

Unya nasuod sab sila sa biktima nga gikasilo sa suspetsado ug nagselos.

Di ganahan nga ang iyang asawa makit-an nga mag-estorya sa biktima.

Ang mga ig-agaw ug asawa nanghimak nga dunay relasyon sukwahi sa gituohan sa suspek.

This posting includes an audio/video/photo media file: Download Now

Namaligya og fake RT-PCR test results gikiha na

Posted: 21 Mar 2021 08:10 AM PDT

ANG National Bureau of Investigation (NBI) 7 niadtong Biyernes, Marso 19, 2021, nikiha na batok sa usa ka Rogelio Nebres ug Rakim Busara, kinsa nasakpan niadtong Huwebes, Marso 18, sa pagbaligya sa mini nga Covid-19 RT-PCR test results sa puwerto sa dakbayan sa Sugbo.

Si Atty. Rennan Augustus Oliva, director sa NBI 7, nagkanayon nga ang kaso nga gipasaka sa Cebu City Prosecutors' Office naglakip sa estafa pinaagi sa falsification in relation to Articles 171 ug 172 ug 8 sa Revised Penal Code.

Matod niya, ang mga kaso lakip usab sa cybercrime human ang mga suspek ninggamit og computer technology sa paghimo sa krimen.

"Do not patronize kay kung kamo, makalusot mo inig larga, unya inig abot sa port of entry madakpan mo, makasuhan man mo og use of falsified documents. Ikaw may holder, ikaw ang presumed author ana," matod niya.

Ang NBI 7 niadtong Huwebes nihimo og entrapment operation sa Pier 1, Port of Cebu, human nakadawat og kasayoran gikan ni San Miguel, Bohol Mayor ug kanhi NBI Director Virgilio Mendez sa halapad nga pagpamaligya sa fake RT-PCR test results sa Cebu ports. (WBS)

This posting includes an audio/video/photo media file: Download Now

Editoryal: Kasaysayan

Posted: 21 Mar 2021 07:48 AM PDT

MAKAHULUGANON karong panahona sa paghandom sa pag-abot sa Kristiyanismo sa Sugbo sa nakalabay nga 500 ka tuig uban sa pag-abot sa kolonyalistang Espanyol sa pagpangulo ni Ferdinand Magellan.

Usa ka Spanish navy training ship Juan Sebastian de Elcano niabot sa pwerto sa Sugbo niadtong Sabado, Marso 20, nga kabahin sa kalihokan sa quincentennial year sa makasaysayanong paglibot ni Magellan sa kalibotan.

Atol sa hamubong seremonyas sa Cebu International Port (CIP), si Office of the Presidential Assistant for the Visayas (OPAV) Undersecretary Jonji Gonzales nihangop sa mga bisita apan nihiklin sa isyu bahin sa pagdiskubre ni Magellan sa nasod.

Sa unang higayon, gibutyag ni Gonzales ang baroganan sa National Quincentennial Committee (NQC) nga ang gisaulog karon mao ang 'Filipino way.' Insakto siya sa pag-ingon nga ang mga isla nga nailang 'perlas sa silangan' daan nang organisado. Bisan niadtong wala pa moabot ang mga Katsila, dugay nang dunay relasyon sa pamatigayon tali sa mga silingang kanasoran labina sa China.

Apan dili nato ikalimod ug dili mapadaplin sa hisgotanan nga nasakop kita sa Espanya sulod sa 300 ka tuig. Dugang pa, 50 ka tuig sa Estados Unidos ug pipila ka tuig sa Japan. Dako kaayo ang ilang impluwensiya sa atong kultura ug pamaaging Pinoy.

Ang Kristiyanismo maoy labing bug-at sa tanang impluwensiya sa mga Espanyol sa kinabuhi sa mga Pinoy, busa lisod mahulagway ang iyang pagkatawo human sagol kini sa managlahing kultura.

Daghang negatibo sa kasaysayan ubos sa mas abanteng nasod, apan sa pikas bahin, dili nato mabuwag ang Kristiyanismo sa pag-abot ni Magellan sa nasod. Ang Pinoy matuod sama sa halohalo sa lumad ug langyawng kultura.

Ang pabalik-lantaw sa kasaysayan kabahin sa kalamboan.

This posting includes an audio/video/photo media file: Download Now

Barrita: Herd immunity karong tuiga

Posted: 21 Mar 2021 07:47 AM PDT

TARGET sa gobyerno nga makab-ot sa Pilipinas ang gitawag nga herd immunity batok sa Covid-19 karong tuiga, uban ang panghinaut nga magsaulog ang mga Pilipino sa usa ka "better Christmas."

Si vaccine czar Carlito Galvez Jr. niingon nga makab-ot ang herd immunity kon mabakunahan ang 50 ngadto sa 70 ka milyon ka mga Pilipino. Ug mahitabo lang kini kon aduna nay "stable supply" sa mga bakuna batok sa Covid-19.

Kay wa pay stable supply sa bakuna, giuna pagbakuna ang health workers, matod niya. Kon duna nay stable supply sa bakuna, bakunahan ang upat ka milyon kada buwan sugod sa Abril. Kon imong kwentahon, sa usa ka tuig, 48 ka milyon ray mabakunahan.

* * *

Ang dakong pangutana karon mao kon hain na ang bakuna, sama sa pangutana ni Senador Panfilo "Ping" Lacson nga nag-ingon, "Nasaan ka bakuna?" Ang ubang mga nasod nakabakuna na hangtod sa katunga sa ilang populasyon.

Nakapangutana si Lacson nganong nadugay ang pagpamalit og bakuna sa gobyerno nga duna may P126.75 ka bilyon nga pundo alang niini. Dugang pa niya, "Unless some drastic and innovative steps are undertaken, we might all die waiting."

Sama sa estorya ni kanhi Senador Juan Flavier sa usa ka lalake didto sa Bicol nga gibuwagan sa uyab.

Nakahukom siyang magpaligis sa tren. Nihigda siya sa riles. Apan namatay na lang siya sa uhaw, gutom ug kainit sa pagpinaabot sa tren kay wa na diay mobiyahe ang tren padung sa Bicol niadtong panahona.

* * *

Hinuon ang bakuna batok sa Covid-19 di sama sa tren nga wa gyud moabot sa estorya ni Flavier, nga kanhi usa ka health secretary. Kay matod pa ni Galvez, ang gobyerno nakaseguro nga nga makapalit og 108 ka milyon ka doses sa mga bakuna gikan sa lain-laing manufacturers.

Apan kinahanglan nga kombinsihon ang kadaghanan nga magpabakuna sa panahon nga moabot na ang mga bakuna alang sa dili frontliners aron makab-ot ang herd immunity.

Hinumdumi, daghan gihapon ang mahadlok sa injection, mahadlok gani kon makakita lang og dagom.

This posting includes an audio/video/photo media file: Download Now

Nadela: Reunion ug ang gasa sa kaluoy

Posted: 21 Mar 2021 07:47 AM PDT

NITAMBONG ko og usa ka reunion nga gitambongan sa mga lumad nga taga Dumingag, Zamboanga del Sur nga nia na sa Sugbo manimuyo ug nanginabuhi. Gihimo kini tibuok adlaw niadtong Sabado, Marso 20, sa usa ka resort sa bukid. Nindot ang maong dapit kay gawas nga presko ang hangin, nag-umbaw sa mga dakbayan sa Sugbo, Mandaue, ug Lapu-Lapu, lungsod sa Cordova ug probinsya sa Bohol ang maong dapit.

Sa usa ka bahin sa programa, ang participants gihatagan og higayon nga makapaambit sa ilang mga kasinatian nganong napadpad sila sa Sugbo. Sila si Noling Caballero, Fredo Castillo ug Jimmy Duhaylungsod nihisgot giunsa nila pagsungasong ang kalisod sa ilang pagpanimpalad sa Sugbo sulod sa dugay nang katuigan. Si Noling nisulod pagka traffic enforcer sa Cebu City Transportation Office niadtong tuig 2000 hangtod karon human mabalhinbalhin sa nagkadaiyang trabaho. Si Fredo naminyo og taga City of Naga ug nagtukod og gamay nga tindahan.

Samtang si Jimmy nanginabuhi pinaagi sa pagpangasal og baboy. Matod niya, gikaloy-an siya sa Ginoo kay daghan na siya og suki kay gawas nga lami ang timpla, tinarong nga presyo nga way bunal sukwahi sa gibuhat sa uban ug way narik nga gikalagutan sa daghang biktima.

Ang ilang mga sugilanon way kalainan sa kasinatian sa ilang mga paisano. Ang uban pinaagi sa bulig sa masyong kapalaran, nakapahuman og paeskwela sa ilang mga anak. Ang uban nga professionals na, naghupot og mga dagkong katungdanan sa private ug government sector. Sama kang Brig. Gen. Mafe Bazar, deputy regional director for administration sa Police Regional Office (PRO) 7, nibiya sa Dumingag nga usa ka yanong tinun-an gikan sa yanong pamilya sa Upper Labding, Dumingag. Bawon ang kugi ug determinasyon sa Philippine Military Academy, siya nisangko ug human sa daghang pagsulay ug giyera nga naapilan sa dihang nigradwar ug nisud sa Philippine Constabulary, karon usa na siya sa mga haligi sa PRO 7.

Sa iyang mubo nga mensahe, iyang gidasig ang iyang mga paisano nga sa kanunay motuman sa balaod. Hinuon iyang gipasalig nga sa kanunay naa siya sa ilang kiliran kon ang ilang katungod mao nay abusohan. Tungod sa iyang gugma sa iyang tagi lungsod, sa hilom, siya maoy nangusog ug nitampo og dakong pahat aron mapahigayon ang maong reunion.

Si Ma'am DozyL Campomanes dela Peña sa Department of the Interior and Local Government (DILG) 7 nagsilbi nga kaabag ni Gen. Bazar sa maong misyon. Sa usa ka bahin sa programa, si Gerry Paglinawan nipaambit sa iyang organic products nga gitawag og Agriko ngadto sa iyang mga paisano. Human maapuri ang tanan, usa ka pahibalo ang iyang gihimo nga nakapaukay sa mga nanambong. Kini mao ang iyang pagpaila sa ilang paisano nga may tumor sa tuo nga mata. Si Ariel Magbanua Anoos bag-o lang naabot gikan sa Dumingag aron magpatambal. Way daghang langas, ang mga nanambong nag-iyahay og kuot aron masuportahan ang panginahanglan ni Ariel. Gamay ra ang P12,158 nga natampo sa reunion para sa iyang operasyon, kahilakon si Ariel nga nagpasalamat sa gasa sa kalooy, sanglit wa siya magdahum nga may mga tagi lungsod nga nagpabakabana sa iyang sitwasyon.

Pait kining gidangatan ni Ariel, kay namatay iyang asawa sa miaging Agusto tungod sa cancer sa atay, ug may lima pa siya ka anak nga buhion. Kadako og matabang kon magkatapok og mag-ilhanay ang mga paisano. Pipila sa akong mga nahimamat didto mao ang pamilyang Micaros, Mouelic, Jayag, Lanorias, Sabuero, Alia ug Santa Ana. Sa mga nilingkod nga officers, congratulations!

This posting includes an audio/video/photo media file: Download Now

Talk to Papa Joe: Napitikan

Posted: 21 Mar 2021 07:34 AM PDT

Dear Papa Joe,

Ako diay si Jimboy, 23 anyos, taga Naga City, Cebu.

Naa koy girlfriend. Mag six months na man mi unta. Karon nanghagad ko niya og date apan wa siya mosugot last Sunday kay mag-family outing kuno sila. So, ni okay ra sad ko. Karon nakit-an sa akong amigo nga hilig og motor ang picture sa akong uyab nga nag-angkas sa lain.

At first, wa ko motuo kay basin kapareho lang og hitsura. Apan pagdugay nakong tan-aw, kaila man ko sa sapatos ug t-shirt. Ako siyang gipangutana. Ni-deny man siya. Mao akong gi-sent ang picture. Wa na siya mo-communicate ug gi-block na ko. Unsa may buhaton ko?

JIMBOY

Jimboy,

Kon wa gyud siyay gugma nimo, wa tay mahims. Basin bata pa ang imong uyab ug ganahan og lingawlingaw. Mao nga kon siya na mismo ingana, aw dawata na lang. Naa pay daghan diha nga dili cheater.

Again, basin di sad ingana ka official inyong relasyon o basin gisugot ra sad ka niya sa usa ka rason. Mao nga dawata na lang ug move on. Kon ugaling mobalik siya, naa ra na nimo kay ang tawo masayop man ug di paman sad mo minyo.

PAPA JOE

(para sa inyong tampo ipadala lang sa papajoesuperb@gmail.com)

This posting includes an audio/video/photo media file: Download Now

Alerto batok NPA

Posted: 21 Mar 2021 07:01 AM PDT

TANANG police stations sa probinsya sa Sugbo nga nakaatubang sa Negros Island ang gipaalerto human sa engkwentro sa New Peoples Army (NPA) sa Camarines Norte niadtong Sabado, Marso 20, diin lima ang nakalas sa kapulisan.

Matod ni Police Colonel Alladin Collado, hepe sa Cebu Police Provincial Office (CCPO), iyang gimandoan ang iyang mga personnel nga pahugtan ang pagbantay sa ilang lugar ug dili angayan nga mokompiyansa.

Bisan pa man nga naa sa laing probinsya ang adunay presensya sa NPA apan wala sila molugak sa ilang seguridad aron dili masurprisa sa ilang kontra.

"Pinapa-remind natin yung mga chief of police natin na i-secure nila yung areas nila at 'yung mga high risk areas atsaka vital installations," matod ni Collado.

Personal nga gibisita ni Collado ang police stations sa ikapitong distrito sama sa Dumanjug hangtod na sa Moalboal ug Badian nga maoy dapit nga dayuhonon sa mga langyaw ug lokal nga turista.

Lakip sa gipaalerto ni Collado ang ubang police stations sama sa Aloguinsan, Pinamungajan, Toledo, Balamban, Asturias ug Tuburan.

Wala pa hinuon makadawat og report si Collado labot sa posibling pagpangatake sa NPA sa probinsya sa Sugbo apan wala sila mokompiyansa.

Nakig-alayon usab sila sa kapulisan sa Negros Oriental alang na sa hiniusang monitoring sa mga komunista.

Lima ka police ang nakalas ug duha ang naangil sa engkwentro sa Purok-6, Barangay Dumagmang, lungsod sa Labo Camarines Norte batok sa rebeldeng komunista. (AYB)

This posting includes an audio/video/photo media file: Download Now

Collado: Hugot nga seguridad sa pag-obserbar sa Semana Santa

Posted: 21 Mar 2021 06:59 AM PDT

HUGOT nga seguridad ang ipatuman sa kapulisan sa probinsya sa Sugbo sugod karon, Marso 22, hangtod na sa tibuok Semana Santa nunot sa pagpamauli na sa mga Sugboanon sa kalungsoran.

Matod ni Police Colonel Alladin Collado, pangulo sa Cebu Police Provincial Office (CPPO), magbutang sila og mga personnel sa nagkadaiyang pantalan ug bus terminals sa lalawigan sa Sugbo.

Iyang mando sa mga municipal police ug city police stations nga bantayan nila ang subdivisions panahon sa ting pamauli sa semana santa aron malikayan nga mabiktima sa akyat bahay.

Giila sa CPPO ang mga dapit nga dunay daghang subdivision sama sa dakbayan sa Talisay, Minglanilla, Consolacion, Liloan ug Compostela.

"I directed my personnel to patrol yung mga bahay-bahay lalo na yung mga malalaking subdivision, siyempre in coordination with the service provider," matod ni Collado.

Mopatuman usab silag subsob nga checkpoints sa nag-unang kadalanan sa mga lungsod isip kabahin sa Oplan Lakbay Alalay aron malikayan ang disgrasya sa kadalanan.

Mohatag silag assistance sa mga motorista sama sa pagpahimangno nga hinayhinay sa pagpadagan lakip na ang pagsul-ob ig crash helmet.

Samtang magpaabot pa usab si Collado sa ipagawas unya nga executive order ni Cebu Governor Gwendolyn Garcia labot sa mga relehiyusong kalihukan sa semana santa.

Una nang mipahibawo si Cebu Archbishop Jose Palma nga abli ang tanang simbahang Katoliko alang sa Visita Iglesia subay sa pagtuman sa minimum health standard.

Ang kapulisan sa probinsya sa Sugbo magpaabot usab sa ipatawag nga meeting uban sa kadagkoan sa simbahan ug sa gobernadora sa lalawigan sa Sugbo alang na sa mga lagda nga angay nga tumanon.

Bisan luag na ang quarantine protocols sa probinsya sa Sugbo apan giklaro ni Collado nga ila gihapon nga estriktong gipatuman ang lagda sa Inter-Agency Task Force sama sa pagpasul-ob sa face mask sa mga publikong lugar.

Lakip sa ilang gibantayan ang mga pantalan pinaagi sa pakig-alayon sa Philippine Coast Guard ug Philippine Ports Authority labot sa mga pasahero nga mosulod sa Sugbo.

Sama sa naandan, ilang pangitaan og mga papel nga lakip sa mando sa gobernador sama sa health certificate ug uban pa bisan wala na kinahanglana ang resulta sa swab test. (AYB)

This posting includes an audio/video/photo media file: Download Now

Biyahe sa fastcraft tali sa Cebu-Ormoc gipun-an

Posted: 21 Mar 2021 06:56 AM PDT

NAGDUGANG na og biyahe ang OceanJet fastcraft sa Ormoc padung sa Cebu ug vice versa sugod sa Marso 19, 2021, Biyernes.

Ang biyahe sa Ormoc padung sa Cebu, alas 9:30 sa buntag ug naa sab alas 5:00 sa hapon sa matag adlaw.

Samtang ang Cebu padung Ormoc, alas 6:00 sa buntag ug naa sab ala 1:30 sa hapon sa matag adlaw.

Sa mga mogikan sa Ormoc nga moadto sa Cebu, pagdala lang og health certificate ug identification (ID) card.

Adto una mo sa buhatan sa Coast Guard Ormoc sa di pa mo molukat og ticket.

Palihug sa pagsul-ob sa face mask ug face shield.

Gitugtan nga 50 porsiyento lang sa total seating capacity sa OceanJet ang mahimo makasakay tungod sa mando sa Department of Transportation (DOTr) aron mapatuman ang social distancing.

Ang plite sa tourist ug open air class mobalor og P900 ug P1,500 sa business class.

Gipanglantawan nga motabang sa pagpadali sa pagpahiuli sa ekonomiya. (JKDP)

This posting includes an audio/video/photo media file: Download Now

Midaug sa creative adoption corner

Posted: 21 Mar 2021 06:34 AM PDT

Sa pagtapos sa usa ka buwan nga kasaulogan sa Adoption Consciousness, ang Department of Social Welfare and Development (DSWD) Field Office VII nihatag og pasidungog sa creative adoption theme corner sa local government units (LGUs) ug offices sa DSWD 7.

Ang Color Your Station contest gisalmotan sa 25 ka LGUs sa Central Visayas nga mamugnaon sa ilang pagdayandayan sa interior ug exterior sa ilang local social welfare and development office ug ubang espasyo sa dakbayan ug municipal hall.

Ang lungsod sa Pilar, Cebu maoy nikuha sa first prize sa LGU category sa ilang creative ug artistic design.

Sumala ni Genevieve Sebios, municipal social welfare and development officer (MSWDO) sa Pilar, Cebu, ang iyang team nigamit sa recycled materials.

Matod niya, ang ilang Color Your Station naglakip sa IEC materials bahin sa illegal adoption.

Ang Balamban ug City of Naga mao ang ikaduha ug ikatulong dapit.

Ubang LGUs nga nangapil mao ang Santander, Lapu-Lapu City, Toledo City, Liloan, Talisay City, Moalboal, Barili, Asturias, Dumanjug ug Mandaue City.

Ang LGUs sa Jagna, San Miguel, Tagbilaran City, Dauis, Loon, Loay, Pilar, ug Lila sa Bohol ug Dumaguete City ug Guihulngan City sa Negros Oriental ug Municipality of Maria, ning-apil sa bangga.

Ang nagkalainlaing divisions ug units sa DSWD-7 ang nagpakita sa ilang pagkamamugnaon ug pagdesinyo sa adoption theme corner.

Ang Reception and Study Center for Children (RSCC) maoy nigawas nga mananaug sa 13 ka mga tampo.

Ang Social Welfare and Development (SWAD) Cebu ug ang Crisis Intervention Section (CIS) mao ang ikaduha ug ikatulong dapit.

Ubang tampo mao ang Area Vocational Rehabilitation Center (AVRC) II, Disaster Response Management Division (DRMD), Financial Management Division (FMD), Human Resource Management and Development Division (HRMDD), Home for Girls (HFG), Office of the Regional Director (ORD), Records and Archives Section, Regional Haven for Women, Recovery and Reintegration Program for Trafficked Persons (RRPTP), ug Social Pension. (PR)

This posting includes an audio/video/photo media file: Download Now

Akong kasinatian sa Covid vaccine sa laing nasod

Posted: 21 Mar 2021 06:31 AM PDT

USA ko sa mga magtutudlo nga nabakunahan sa Madrid, Spain, usa sa mga nasod nga grabeng naapektuhan sa coronavirus.

Tanang magtutudlo maoy gisunod og bakuna human sa mga tiguwang ug health workers.

Tulo ka mga bakuna ang gipangapud-apod sa Spain: Moderna, Pfizer ug AstraZeneca. Ang AstraZeneca maoy gipanghatag sa mga magtutudlo.

Nadawat nako akong first shot niadtong hapon sa Marso 13.

Akong medical profile

Adunay history sa sakit sa kasingkasing (hypertension) ang akong pamilya. Apan gawas niini, nagpabilin ko'ng himsog ug aktibo sab akong lifestyle sa edad nga 27 anyos. Pagkaon og sakto ug regular nga exercise matag weekend (running).

Wa koy allergies. Wa sab koy mga gimintinar nga tambal gawas sa akong giinom nga inadlaw nga multivitamins ug fiber pills alang sa digestion. Nabakunahan na sab ko batok sa Human papillomavirus (HPV) ug Hepatis B dinhi sa Madrid.

Sa wa pa ko gibakunahan

Hands-on ang kagamhanan sa Comunidad de Madrid sa ilang kampanya sa pagpamakuna batok Covid.

Sa wa pa magsugod ang klase niadtong Septiyembre 2020, ang tanang mga magtutudlo gipaubos og Covid antibody test. Negatibo ang akong resulta.

Laing Covid antibody test ang gihimo sab sa tunghaan nga akong gitrabahuan sayo ning Marso 2021. Naghuwat pa ko sa resulta.

Human gianunsyo sa kagamhanan sa Madrid nga sugdan na ang pagpamakuna sa mga magtutudlo sa uwahing bahin sa Pebrero, daling gikuha sa among school director ang among personal details.

Duha ka adlaw sa wa pa ang akong schedule, nakadawat kog text gikan sa kagamhanan kalabot sa akong schedule diin ako ning gikompirmar pinaagi sa pag-click sa link sa mensahe.

Atol sa pagbakuna

Kapin usa ka oras mi nga naglinya kaming mga madtutudlo sa Madrid nga nagpaabot alang sa among turno nga mabakunahan gawas sa Wanda Metropolitana Stadium.

Samtang naglinya ko, nitumar na ko daan og paracetamol base sa pahimangno sa kauban nakong mga magtutudlo sa tunghaan.

Ang naka-alegre kay human sa akong pagtumar, diha ra nako nabantayan nga expired na diay ang paracetamol nga akong nadala.

Sa wa pa mi pasudla sa stadium, gi-check una ang among ID number ug gipangutana una mi kon aduna mi gipamati nga mga kondisyon.

Paspas ang dagan sa pagpanusok sa bakuna.

Gani, atol sa akong turno, wa ko makabantay nga gi-indyeksyonan na diay ko sa dagum tungod kay gilinga mi sa laing facilitator nga nipahimangno namo nga butangan lang og ice ang bukton nga gi-injeksyonan kung mohubag.

Sa kinatibuk-an, ang proseso gikan sa pagsulod sa stadium hangtod sa pag-inject wa ra niabot og 10 minutos.

Human sa pag-inject, gihatagan mig papel diin nakabutang ang mga pahimangno in kaso kon adunay pamation human sa bakuna.

Giingon sab niini nga ang ikaduhang dosis sa AstraZeneca vaccine madawat mga 10 hangtod 12 ka semana human sa unang dosis.

1-6 oras human sa bakuna

Human sa akong bakuna, wa una mi pagawsa ug gipahuwat una mi sa waiting area mga 10 ngadto sa 15 minutos in kaso kon adunay mga reaksyon ang among lawas.

Wa ra koy gipamati gawas sa kauhaw ug kagutom.

Ug kon ang pakigkita sa imong ex human nimo gibuwagan kapin sa usa ka semana maoy usa sa mga adverse reaction sa bakuna, then mao na akong gibati.

Yes, marupok ko. Pero giuhaw lang gyud kog isog nga margarita niadtong gabhiona.

Di man ko ka-party uban sa akong mga higala tungod kay medyo ngulngol man ang gi-injeksyonan nga bukton nga normal nga reaksyon.

12 oras -- 1 ka adlaw human sa bakuna

Nindot ra akong tug. Sayo sab ko nimata; siguro tungod ni Tita margarita.

Nakamata sab kos akong kaugalingong katre.

Wa koy gipamati sa akong lawas. Kaluoy sa Ginuo wa ko hilanti, wa sab ko gipanugnaw.

Nianang buntaga, nigawas kos apartment ug nag-running ko kapin usa ka oras.

Sa naandan, maingon nako nga normal ra akong pagginhawa, akong lawas ilabi na akong heartbeat.

Padayong normal gihapon akong gipamati human sa duha ka adlaw.

Sa imong pagpabakuna, ayaw ra kaayo hunahunaa ang mga negatibo nga side effects niini, mas mayo nimong hunahunaon ang kaayuhan ug proteksyon nga mahatag niini sa imong sistema sa panglawas.

Kung single ka, pabakuna na aron maka-igat-igat na ta!

This posting includes an audio/video/photo media file: Download Now

Basil: Balay - bakasyonan Piolo super bongga

Posted: 21 Mar 2021 06:25 AM PDT

MANILA – Usa si Piolo Pascual sa mga artistang kahibawo mokupot og kwarta, yun bang tipong di jud mobuhi bisan og singko kung way kabilinggan.

Mahilig si Piolo sa real estates in fact, ang tibuok 7th floor sa Centro Plaza Condominium sa may Sct. Madrinian, napalit ni Piolo kaniadto pa in fact, may space for bible study para sa kaubanan niya sa showbiz kada Dominggo.

Samtang nanghingusog pa kanhi ang ABS-CBN sa kahanginan, gihinay-hinayan ni Piolo og patindog ang iyang vacation house sa Batangas

Dili lang usa kundi duha ang balay ni Piolo, usa sa ilawon duol sa beach ug usa sa bungtud diin matan-aw ang ang mga maanindot nga views, pati Lubang Island tataw na .

Although si Piolo, never nga gipanghambog ang iyang napundar nga duha ka balay, ni wala akong nakitang video si Piolo nga nag-house tour.

It was Vicki Belo nga unang nag-vlog sa bonggang mga balay ni Piolo.

May gym, og ang kwarto ni Piolo samin nga makita ang tibuok paligid.

Gipapa-uli na ni Piolo ang inahan from the US og siya ang kanunay nga tawo sa vacation houses ni Piolo kay gustung-gusto niya ang ambiance sa maong balay.

May unggoy pa nga binuhi si Piolo nga iyang gihigot sa dakong kahoy.

Bisan og sa video ni Vicki Belo ko lang nakita ang balay ni Piolo pero na feel ko ang dalang good vibes nini, hilom og gialigiran kini og nature, makawagtang jud sa stress. Mao sigurong bisan og edad-edaran na si Piolo pero young-looking pa gihapon siyang tan-awon, gumikan siguro sa good vibes nga naggikan sa iyang mga baklay.

Sa laing bahin, dili lang si Piolo ang mahilig aa real property kay ang aktres nga si Bea Alonzo gi- vlog ang iyang farm sa Zambales diin may mga tanom siyang mga mangga, kalamansi, may mga binuhing baka, native nga baboy, mga gansa og uban pa.

Sa maong farm na rin nagpuyo ang nanay ni Bea nga hilig jud ang farming noon pa man.

Sila si Piolo og Bea ang ehemplo sa mga artista nga kahibawng mo invest sa kwartang ilang gihaguan.

Ang ubang artista man gud pulos waldas gimik didto, gimik dinhi, sosyalan to the max, eh ni-abot ang pandemya, kaya ang ending nga-nga!

This posting includes an audio/video/photo media file: Download Now

Pagduma, kalidad nga edukasyon

Posted: 21 Mar 2021 06:24 AM PDT

ANG mga Sugbuanon mangita gyud og pamaagi sa pagbuntog bisan unsa pay kalisdanan nga moabot sa kinabuhi.

Ang pandemiya dili babag sa paghugpong ug panagtinabangay sa mga ginikanan, tinun-an, magtutudlo og uban pang mga hingtungdan sa Tal-ut National High School (TNHS), Carcar City Division aron sa paghatag og quality education sa atong kabataan.

Karong tuiga, mas niusbong pa ang pagpalambo sa tunghaan sa Tal-ut NHS nga gipangulohan sa maabtik, maanyag ug utokan nga si Danelyn P. Geraldizo. Ang tunghaan adunay duol 400 ka mga tinun-an ug 14 ka magtutudlo ug usa ka school head.

Sa miaging Brigada Eskwela, nahimong kampiyon ang Tal-ut NHS sa small school category og kini nagapadasig pa sa tanang hingtungdan aron ipadayon ang mga maanindot nga project development plans aron paghatag og quality education sa atong kabatan-onan sa school year 2020-2021.

Sa ngalan sa pipila, dunay RVL (Recorded Video Lesson) sa matag community learning center sa eskwelahan. Naa sa Danao 1, Danao 2, Valencia Proper, Upper Tal-ut, Lower Tal-ut, Bactus, og Bangko sulod sa Valencia, Carcar City Cebu. Mas gipalambo pa ang community learning centers sa Tal-ut NHS para mas mahimomg haom sa mga magtutungha ug sa mga magtutudlo. Duna say programa sama sa AMUMA (Assisstance and Monitoring of Underperforming to Maximize Abilities) nga ang tumong ug tuyo mao ang pagpa-reduce sa drop out, repetition, and failure rate pinaagi sa paghatag og lainlaing pagkat-on. Ikatulo, nay 'Computer Literacy Program nga gilusad niadtong miaging Marso 17, 2021 sa tunghaan.

Usa sa tumong sa Computer literacy Program ang paghatag og kaalam sa computer ngadtu sa mga ginikanan sa sulod sa duha ka bulan. Ang programa makatabang sa mga ginikanan sap pag kat on sa basic parts sa computer, MS-Office, Google, ug Facebook.

Nasayod ang tanan nga mao kini plataporma nga gigamit sa mga nagkalainlaing tulunghaan para ipadangat ang pagkat-on sa mga kabataan karong naa pa kita sa pandemya.

Sa pagkakaron, dunay 11 ka mga misalmot ug nipahimulos sa Computer Literacy program, apan padayon gihapon ang pagpanawat hangtod Marso 26, 2021. Mao giawhag pud ang mga ginikanan sa pag-apil niini. Ang 14 ka magtutudlo sa Tal-ut NHS ang mogiya sa maong programa.

Ang tunghaan sa Tal-ut NHS mituo nga kung ang ginikanan kabalo sa computer mas masabtan pa nila ang mga gikinahanglan sa ilang mga anak.

Dugang pa, mas dali ra nila anga pagtabang sa ilang anak sa online search, mas magiyahan ug mabantayan pa nila ang social activities sa ilang mga anak.

Ang Department of Education (DepEd) laptops maoy gamiton sa gi ingun nga programa. Pwede kini nila dalhon sa ilang community learning center kon asa nahimutang ang mga TV sets para sa RVL.

Sa laktod nga pagkasulti, ang Tal-ut NHS mituo nga kung magkahiusa ang mga ginikanan ug mga magtutudlo. Dayag nga update og pag upskill sa ilang mga kaugalingon mas mahatag gyud nato ang quality education sa kabatan-onan ug dili magmalampuson kon wala ang suporta sa kahitas-an sa Deped.

Mapasalamuton ang TNHS sa ilang SDS nga si Ronald G. Gutay ug sa uban pa niyang kaubanan sa DepEd Carcar City Division sa pagsuporta sa mga kalihokan sa tunghaan. Sigon pa sa panultihon ni PSDS Dr. Lani G. Leyson, "kung abtik ang leader, abtik pud ang mga nasakopan niini," murag domino effect ba.

Padayon kita sa pag-uswag! Bulhot Tal-ut. Sulong Edukalidad!

This posting includes an audio/video/photo media file: Download Now

Lakers gibihag sa Hawks

Posted: 21 Mar 2021 06:24 AM PDT

GIPAHIMUSLAN sa Atlanta Hawks ang pagkawala sa superstar nga si Lebron James aron lupigon ang Los Angeles Lakers, 99-94, didto sa Staples Center, Los Angeles kagahapon sa NBA regular season.

Si James mibiya sa ikaduhang hugna sa duwa tungod sa high right ankle sprain.

Sa pagkawala ni James wala kapugngi ang pagratsada sa Hawks, usa sa pinakainit nga teams karon sa NBA. Ubos sa bag-ong head coach nga si Nate McMillan, wala pa makatilaw og pilde ang Atlanta sulod sa uwahing walo ka duwa.

Naapil sa listahan sa walo ka teams nga ilang gibihag mao ang defending champion Lakers, Eastern reigning champion Miami Heat, Orlando Magic, 2019 champion Toronto Raptors, Sacramento Kings, Cleveland Cavaliers, Houston Rockets ug Oklahoma City Thunder.

Mipakatap og 27 puntos ug season-high nga 16 rebounds si John Collins aron pangulohan ang Hawks, samtang ang scorer nga si Trae Young miamot og 14 puntos ubanan sa 11 ka assists.

Si James mibiya sa duwa sa sayong bahin sa second quarter diin naglabaw gamay ang Hawks, 34-30. Didto na sa third quarter mipakita og grabeng pwersa ang Hawks pinaagi sa 12-0 run aron itali ang 64-53 nga labaw.

Ang bigman sa Hawks nga si Clint Capela midominar sa ilawom pinaagi sa iyang 16 ka rebounds, utso puntos ug usa ka block, samtang midugang si Danilo Gallinari og 18 puntos gikan sa bench.

Duha ka oras human migawas si James sa duwa, gianunsiyo sa Lakers management nga out indefinitely ang ilang beteranong forward.

Dako kinig epekto sa Lakers kay wala pa pud makabalik ang All-Star center nga si Anthony Davis tungod sa right calf injury niini.

Matod pa ni James sa iyang Twitter post nasakitan siya kay gusto niya makatabang sa iyang mga teammates sa maong duwa.

Napilo sa 36-anyos nga si James ang iyang ankle sa iyang pagtumba human misuway pag-ilog si Solomon Hill sa bola.

"I'm hurt inside and out right now. The road back from recovery begins now. Back soon like I never left," suwat ni James sa iyang Twitter account.

Si Montrezl Harrell mitapos nga adunay 23 puntos ug 11 ka rebounds alang sa Lakers, ug Dennis Schroder adunay 16 puntos, pito ka rebounds ug upat ka assists. (RSC)

This posting includes an audio/video/photo media file: Download Now

Pambato sa Tokyo Olympics

Posted: 21 Mar 2021 06:16 AM PDT

ANG tibuok kalibutan misaulog sa buwan sa Marso isip Women's Month agig pasidungog sa kababayen-an og sa ilang dakong kontribusyon sa atong komunidad.

Sa natad sa paugnat sa kusog daghang babae ang nakahatag og dungog sa Pilipinas, usa na niini ang Olympic silver medalist nga si Hidilyn Diaz.

Lumad nga taga Zamboanga City, si Diaz mitapos sa 20-year medal drought sa Pilipinas human siya midaog og silver medal sa women's 53kg division sa 2016 Rio Olympics niadtong sa Rio de Janeiro, Brazil.

Mosalmot si Diaz sa usa ka qualifying event didto sa Tashkent, Uzbekistan karong Abril 15 ngadto sa 25 aron pormal siyang mo-qualify sa Tokyo Olympics nga gitakda sa Hulyo 23 ngadto sa Agusto 8.

Bisan pa unsa ang resulta sa iyang kompetisyon sa Uzbekistan, sulod na siya Diaz sa Tokyo Olympics tungod sa ranking niini. Ang Summer Games ipahigayon kausa sa upat ka tuig. (RSC)

This posting includes an audio/video/photo media file: Download Now

at

No comments:

Post a Comment

Subscribe to: Post Comments (Atom)

End of Summer Sale ☀️😎

20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...

  • Breaking: Aaron Rodgers teases Jets return this season: 'Anything is possible'
    New York Jets quarterback Aaron Rodgers suffered a torn Achilles tendon in Monday's 22-16 overtime win vs. the Buffalo Bills. If you a...
  • End of Summer Sale ☀️😎
    20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...
  • Last Chance - Win over $1,800 in BLEUSALT
    Elevate your Wardrobe. Offer ends Midnight. ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏ ...