https://www.sunstar.com.ph/

---

• Ormoc nagtukod og convention center; BMX race track, badminton court isunod
• 8 ka NPA patay sa engwentro
• Labella: vendors nga i-relocate di paabangon
• Peña patubagon sa DILG nganong nagpabakuna
• Mga BHW sa Cebu City gibakunahan
• P3.5M drugs nasakmit; taga Munti tinubdan
• Accreditation sa Hoops Dome gihuwat
• 9 ka balay daplin sa sapa giguba
• Editoryal: Lugaking regulasyon
• Nalzaro: Pahalipay o silot sa bakuna?
• Barrita: Income tax exemption sa mga seniors
• Tambagi ko Noy Kulas: Na in love sa bayot
• Ciar: Percival 'Valrock' Dinopol Rock n’ Roll sa Pandemya
• Sugilanon: Handumanan sa tam-is nga gugma
• Balak: Bagad sa mga butang
• Balak: Pureso aron di ka mapriso
• Parks dili i-ban sa PBA apan ...
• Nabakunahan na si Ancajas
• Milo padayon sa pag-umol og kampyon

Ormoc nagtukod og convention center; BMX race track, badminton court isunod Posted: 24 Mar 2021 06:12 PM PDT ORMOC City - Gipahigayon sa Marso 24, 2021, ang groundbreaking ceremony sa tukuron nga Ormoc City Convention Center sa 11 hektaryang luna sa Barangay Juaton ning siyudad. Gawas sa convention center, daghan usab nga pasilidad ang tukuron sa lokal nga kagamhanan sa mao nga luna uban sa tabang ni Cong. Lucy Torres - Gomez. Matod ni Mayor Richard Gomez, nagsugod ang maong proyekto sa dihang nakita usab ni Cong. Gomez ang potensyal sa dakbayan nga modawat og dagkong meeting ug mga bisita gikan sa nagkalain laing lugar. "We were expecting that more tourists will come inside Ormoc City and we were preparing for MICE (Meetings, Incentives, Conference Exhibition)," matod sa mayor. Gawas sa 11 hektaryang yuta nga napalit sa LGU-Ormoc, naghatag usab og pundo si Cong. Gomez para sa pag-pasemento sa karsada gikan sa highway padung sa convention center. Duna usay dugang pundo si Cong. Gomez para sa paghimo og BMX Race Track ug dadminton court. Giplanohan usab sa LGU-Ormoc ang paghimo og radial roads aron mas mapadali ang pagtaboktabok sa mga lumolupyo sa lain laing mga barangay. Pinaagi sa radial roads, ang mga tawo gikan sa Brgy. Juaton dali na nga makalahos sa Brgy. Dolores. Ang gikan sa Dayhagan makatabok na dayun sa Luna, samtang ang gikan sa Milagro makatabok na dayun sa Hibunaon. Gipasigarbo usab ni Mayor Gomez nga nagsugod na ang dugang kalambuan sa karsada sa Ormoc gikan sa San Pablo padung sa Valencia. "Definitely, the progress of Ormoc will begin from Brgy. San Pablo lahos na sa Valencia" matod sa mayor. Nagpadayon karon ang pagtukod sa bag-o nga Valencia Public Market. Nagpasalamat si Mayor Gomez sa mga miyembro sa konseho nga gipangulohan ni Vice Mayor Toto Locsin Jr. sa way duha-duha nga pag aprobar sa budget. (JKDP) This posting includes an audio/video/photo media file: Download Now

8 ka NPA patay sa engwentro Posted: 24 Mar 2021 06:14 AM PDT Walo ka mga sakop sa mga rebeldeng New People's Army (NPA) nakalas sa kapin tulo ka oras nga engkwentro tali sa mga sakop sa 62nd Infantry Battalion sa Philippine Army sa bukirang barangay sa dakbayan sa Guihulngan sa Martes sa hapon, Marso 23, 2021. Gibana-bana nga moabot og 40 ka mga sakop sa NPA naengkwentro sa 62nd Infantry Battalion sa sitio Agit, Barangay Trinidad, bukirang dapit sa dakbayan sa Guihulngan, Negros Oriental. Matod ni Army Major Cenon Pancito, information officer sa 3rd Infantry Division sa Philippine Army, nga nakadawat og impormasyon ang mga sundawo gikan sa mga residente nga adunay presensya sa mga NPA sa dapit. Sa ilang pagsusi, ilang nasugatan ang mga rebelde nga niresulta na dayon sa pinusilay. Paglabay sa tulo ka mga oras, ning-atras ang mga rebelde, apan sa gilusad nga manhunt operation, ilang nakaplagan ang walo ka mga lawas sa mga rebelde, lakip na ang onse ka mga tag-as nga kalibre sa armas. "Naa na tay na record nga walo ka lawas nga na recover nato sa mga fighter sa NPA, 11 ka high powered firearms which include unom ka m16 rifle, duha ka M14 rifle, usa ka M4 rifle, usa ka M60 machine gun, usa ka KG9 sub machine gun. Nakakuha sad tag land mine duha ka buok. Nakakuha pud tag mga wire, duha ka backpack ug mga dokumento," matod ni Pancito. Dugang niya nga tungod sa kadaghan sa tag-as nga kalibre sa armas nga nasakmit nga wala mohaom sa gidaghanon sa mga lawas nga na-recover, nagtuo sila nga aduna pay mga NPA nga posibling samdan o nakalas nga wala pa makit-i. Pasabot ni Pancito nga ang usa ka armas usa ka tawo ang magdala hinungdan nga nagtuo sila nga aduna pay mga kauban sa NPA nga naigo sa engkwentro. Nagpadayon sila sa paglutos sa mga rebeldeng komunista paingon sa mas bukid nga bahin sa barangay sa siyudad sa guihulngan ug sa mga silingan niining lungsod. Wala pa mailhi ang maong mga patayng lawas sa pagkutlo ning balita. Matod ni Pancito nga nakig alayon na sila sa kapulisan sa maong siyudad lakip na sa mga silingang lungsod niini nga isaka ang ilang alert status aron dili ma surpresa sa posibling pagpangatake sa NPA. Dako matod pa og posibilidad nga himuon kini sa mga komunista ilabi na nga nagsingabot ang ilang anibersaryo sa Marso 29. This posting includes an audio/video/photo media file: Download Now

Labella: vendors nga i-relocate di paabangon Posted: 24 Mar 2021 06:13 AM PDT Di kolektahan sa Cebu City Government sa renta o arkabala ang mga vendor nga i-relocate sa Unit-2 samtang magpadayon ang phase 1 sa modernization sa karaang Carbon market. Kini ang gipadayag ni Mayor Edgardo Labella atol sa iyang pagpamulong kagahapon, Marso 24, atol sa groundbreaking sa P5.5 bilyon nga pagpalambo sa kapin usa ka siglo na nga merkado publiko. Si Labella nagkanayon nga moisyu siya og executive order para sa maong katuyoan ug mangayo siya og suporta sa City Council nga gipangulohan ni Bise Mayor Michael Rama. Ang groundbreaking sa proyekto kaduha naoktaba, sanglit ang unang schedule niadto untang Marso 17 ug na-postpone ngadto sa Marso 23 gumikan sa concern sa mga vendors. Apan hingpit na kining nahatagan og solusyon hinungdan nga nadayon ang ceremonial nga pagsugod sa proyekto. Si Labella ug ang Megawide pinangulohan ni Louie Ferrer, executive director for development infrastructure, subli nga nipasalig atol sa ilang pagpamulong kagahapon nga walay vendors nga mawagtangan sa ilang panginabuhian. (PAC) This posting includes an audio/video/photo media file: Download Now

Peña patubagon sa DILG nganong nagpabakuna Posted: 24 Mar 2021 05:48 AM PDT Moluwat og show cause order ang Department of the Interior and Local Government (DILG) batok kang Minglanilla Mayor Elanito Pena tungod sa iyang pagpabakuna bisan kon siya di healthcare worker. Kini maoy gipahibaw ni DILG Undersecretary Epimaco Densing III human nga nakakuha ang mayor sa unang dose sa AstraZeneca vaccine. Unang gikompirmar sa mayor nga nabakunahan siya sa unang dose sa bakuna. Apan gipasabot ni Peña nga gikonsiderar niya ang kaugalingon nga "frontliner", ilabi na nga siya maoy nangulo sa taskforce pakigbatok sa coronavirus disease (Covid-19) sa lungsod. Sa Marso 24, niluwat og hiniusang pamahayag ang Kagamhanan sa Lungsod nga nagdepensa sa gibuhat sa mayor. Sukwahi sa unang pamahayag sa mayor nga nagsugod ang pagpamakuna sa lungsod sa Marso 23, gisaysay sa statement nga nagsugod pagpamakuna ang lungsod niadtong Marso 16 sa Minglanilla District Hospital. Gisunod usab pag-bakuna ang mga personnel sa Rural Health Unit (RHU), contact tracers, driver sa ambulansya ug security guards niadtong Marso 19. "While it is true that Mayor Lan got vaccinated together with the Barangay Health Workers and BHERT, the mayor got vaccinated later during the day and more than anything else, Mayor Lani did not purposely have himself inserted or prioritized in lieu of the Barangay Health Workers and frontliners," saysay sa statement. Samtang si Dr. Mary Jean Loreche, spokesperson sa Department of Health (DOH-7), nibutyag nga subay sa datos sa buhatan, duha ka mga hospital sa Minglanilla nakasugod na sa vaccination rollout niadtong Marso 17. Ang maong mga hospital mao ang San Lucas Hospital ug Baking Medical Center, dili ang Minglanilla District Hospital. (ANV) This posting includes an audio/video/photo media file: Download Now

Mga BHW sa Cebu City gibakunahan Posted: 24 Mar 2021 05:47 AM PDT Ang Cebu City Government nagsugod og pamakuna sa gatusan ka mga barangay health worker (BHW) batok sa coronavirus disease 2019 (Covid-19) nga nagagikan sa 80 ka mga barangay sa dakbayan. Si Razel Cuizon, Cebu City public information officer, nagkanayon nga gibahin sa duha ka mga venue ang mass vaccination para sa mga BHW. Apil sab sa gibakonahan ang mga health worker sa mga private clinic sa dakbayan. Ang mga BHW gikan sa south district didto gibakunahan sa Robinsons Galleria de Cebu samtang ang north district sa University of Cebu- Banilad campus. Matod pa ni Cuizon nga adunay 1,600 ka doses sa AstraZeneca vaccine ang giandam alang sa tulo ka adlaw nga pagpamakuna sa maong mga venue. (PAC) This posting includes an audio/video/photo media file: Download Now

P3.5M drugs nasakmit; taga Munti tinubdan Posted: 24 Mar 2021 05:46 AM PDT Kapin sa P3.5 milyunes nga balor sa ilegal nga drugas ang nasakmit sa Regional Drug Enforcement Unit (RDEU) sa Police Regional Office (PRO) 7 sa managlahing anti-drug operations sa siyudad sa Sugbo. Kasagaran sa ilang supply gikan sa kaulohan nga gipadagan sa usa ka binilango. Una sa Sitio Tagunol, Barangay Basak Pardo sa alas 4:30 sa hapon niadtong Martes, Marso 23. Nasikop ang duha ka babaye nga silang Edna Abarquez 40, nagpuyo sa dapit ug Marissa Abellanosa, 25, taga Sitio Galili, Barangay Duljo Fatima. Nakuha ang mga binulto nga 116.52 gramos nga shabu ug mobalor og kapinsa P792,336. Sunod nasikop sa Barangay Kamagayan ang giilang bigtime drug pusher ug bodegero sa ilegal nga drugas gikan sa kaulohan nga giila nga si Reuel Gacrama III alyas 'Ayok' nga nagpuyo sa maong dapit. Nakuha kang Gacrama ang 400 gramos nga shabu nga mokantidad ang tanan sa P2.7 milyunes, human sa kapin sa usa ika buwan nga pagpaniid sa kapulisan. (AYB) This posting includes an audio/video/photo media file: Download Now

Accreditation sa Hoops Dome gihuwat Posted: 24 Mar 2021 05:46 AM PDT Gibutyag ni Lapu-Lapu City Mayor Junard Chan nga naghuwat na lang sila sa approval sa Department of Health (DOH) 7 alang sa hingpit nga accreditation sa Hoops Dome isip isolation facility sa mga pasyente sa coronavirus disease 2019 (Covid-19). Kini human nga andam na ang ilang application aron isumiter sa ahensya. Ang Hoops Dome nagsilbi lang untang holding area sa magpositibo sa Covid nga dili una mabutang sa isolation facility sa dakbayan gumikan sa daghang nasud sa naasoyng pasilidad. Gibutyag sa mayor nga niadtong Marso 23, gisultian siya sa kadagkuan sa DOH-7 nga susama sa Noah Complex sa dakbayan sa Sugbo ang setup sa Hoops Dome. Ang kuwang ra mao ang pagpa-accredit niini sa DOH, dason sa mayor. Gipasabot ni Chan nga aduna na silay gipatumang kausaban sa Hoops Dome human sa kontrobersyal nga pagkamatay sa usa ka overseas Filipino worker (OFW) nga giataki sa sakit sa kasingkasing niadtong milabayng semana aron dili na masubli kini. Subling gihimug-atan ni Chan nga normal lang nga anaay pamation matag karon ug unya ang mga pasyente sa usa ka isolation facility sama sa kalibanga ug uban pa. Ang importante masigurong adunay makaatiman dayon sa mga pasyente hinungdan nga nagdugang na sila og personnel nga moatiman kanila. Gibutang na usab duol sa pultahan ang station sa mga personnel alang sa daling pagresponde. Aron dili na mahasol ang mga pasyente sa Hoops Dome, aduna nay gibutang nga tiglimpyo sa sulod. (GCM) This posting includes an audio/video/photo media file: Download Now

9 ka balay daplin sa sapa giguba Posted: 24 Mar 2021 05:44 AM PDT Gisugdan na og guba ang 9 gikan sa kapin 500 ka mga balay nga nagbarog daplin sa Kinalumsan river nga nilagbas sa Barangay Mambaling ug Duljo Fatima, dakbayan sa Sugbo Marso 24, 2021. Si Konsehal Jerry Guardo, chairman sa committee on infrastructure kinsa maoy gitahasan ni Mayor Edgardo Labella, nagkanayon nga boluntaryo nga niguba ang mga tag-iya aron sab ila pang mapahimuslan ang mga atop, kahoy ug ubang parte sa balay nga magamit pa. Si Samuel Colinar, senior citizens ug 40 anyos nang nagpuyo duol sa taytayan, nga nagsumpay sa N. Bacalso sa Mambaling, nagpasalamat sa dakbayan bisan pa kon siya ug mga silingan gipapahawa sanglit iyang gihulagway nga ang pag-restore sa sapa para sa kaayohan sa kinabag-an. Matod pa niya nga didtong lugara nanagko ug hingpit nga nakaeskwela ang iyang tulo ka mga anak diin ang usa, nagdumala na og hotel didto sa Bacolod City. Siya ug iyang mga silingan nakadawat og P24,000 nga financial assistance gikan sa Cebu City Government kansang kuwarta gi-download gikan sa Department of Public Works and Highways (DPWH)7. Si Guardo nagkanayon nga gawas sa illegal settlers, niuyon na usab ang tulo ka dagkong estabilisemento sa pag-atras sa ilang koral nga nilapas sa easement zone. Matod ni Guardo nga himuong 16 metros ang gilapdon sa Kinalumsan nga orihinal nga sukod diin sa pagkakaron anaa na lang kini sa 5 metros. Samtang sa duol na sa dagat o bukana sa suba, palapdan ug hiuong 30 metros gikan sa 26 metros. Ang pamilya kansang balay maguba dunay financial assistance o relocation site. (PAC) This posting includes an audio/video/photo media file: Download Now

Editoryal: Lugaking regulasyon Posted: 24 Mar 2021 05:43 AM PDT Daghan nang pribadong mga kompaniya ug local government units (LGU) ang nakigsabot sa mga kompaniya ug distributor sa mga anti Covid vaccine. Apan giingong gusto sa Department of Health nga moagi kanila ang tanan base sa usa ka draft sa administrative order nga gikasuko ni Senador Franklin Drilon. Matod sa senador nga kini nasukwahi sa nalatid sa Republic Act No. 11525 kun Covid-19 Vaccination Law. Makita ang kahinay sa dagan sa pagpamakuna. Naa pa guy sobra sa mga bakuna nga gitagana sa mga healthcare worker dinhi sa Central Visayas nga hangtod karon wa pa magamit. Sa miaging semana, wa pa kaabot og 50 porsyento ang nabakunahan sa mga medical frontliner nga maoy labing una untang madapatan. Nganong naingon ani man ang dagan sa pagpamakuna sa kagamhanan nga nisulod na sa ikatulong semana? Kon naglisod sa pagbakuna sa liboan, unsa na kaha sa 100 million ka mga tawo? Unsa kahay nahitabo kon sayo kaayong nahatod ang minilyon ka mga bakuna apan wa pa kaandam og iyang sistema? Nagkayamukat? Aron matabangan ang nasudnong kagamhanan, lugakan unta nila ang ilang pagdumala sa vaccination program, labina sa pribadong mga kompaniya nga gusto nang makabangon gikan sa pagkahagba tungod sa taas na kaayong mga quarantine. Dugay na silang gusto makabarog. Di ba usa lang ang yawe sa pagpabangon sa negusyo ug patigayon nga mao ang bakuna? Kon gusto ang kagamhanan og dali ug paspas nga pagpamakuna, lugakan niini ang mga rekisito ug pagdumala sa programa aron di magapos ang mga kamot sa pribadong sektor ug mga LGU. Namatud-an na man nga ang pribadong sektor mas maayo og sistema sa pagdumala kay sa kagamhanan. Angay pa ganing himuong sumbanan sa gobyerno ang mga lakang nga pagahimuon inay gapuson sa mga guideline ug regulasyon. Kon palpak sila sa pila lang ka libong bakuna, unsa na kaha kon minilyon na? This posting includes an audio/video/photo media file: Download Now

Nalzaro: Pahalipay o silot sa bakuna? Posted: 24 Mar 2021 05:42 AM PDT Miabot na ang nga bakuna ug giuna ang mga frontliner sa pagpatusok gumikan kay exposed man sila sa mga pasyente sa Covid-19. Apan bisan pa sa ilang medical background, daghan ang nagdumili sa pagpabakuna gumikan sa daghang rason. Una, gumikan sa vaccine, labi pa gyud ning gikan sa China. Ikaduha, gumikan sa ilang pangidaron ug mga sakit nga gihambin. Maayo sa America kay adunay stimulus package nga gihatag ang gobiyerno sa magpabakuna. Tiaw ba nimo kanang 1,400 US dollars ang ihatag sa tawo nga magpabakuna ug libreng pagpuyo sa apartment nga giabangan balig upat ka buwan. Unya dili pa ka ana? Dinhi sa ato, adunay local government units nga motanyag nga mohatag og incentives ngadto sa barangay kon makakuha og 70 percent sa mga lomulopyo nga magpabakuna. Morag suborno ba aron mainggangyo ang mga tawo nga magpabakuna. PAHALIPAY O SILOT? Kining termino nga "carrot and stick" usa ka "metaphor" nga nagpasabot og paggamit sa kombinasyon sa "ganti" ug "silot" aron sa pag impluwensiya sa usa ka behavior o kinaiya. Sama karon sa problema sa kahadlok ug panagana sa katawhan niining bakuna batok sa Covid 19. Nagpabilin nga daghan ang nagdumili pagpabakuna. Ang resultado niini mao nga mapakyas ang gobiyerno sa pagkab-ot sa "herd immunity" nga 70 porsiyento sa atong 110 milyones nga population sa tibuok nasud nga maoy makapaluwas sa katawhan gikan niining pandemya nga atong giatubang sa pagkakaron. So, unsa may saktong buhaton sa gobiyerno niadtong mamalibad? Tanyagan og kwarta aron madani? O gulaton og silot sama nga tangtangon sa trabaho ang empliyado nga dili magpabakuna? O prisohon ba kaha? Well, dinhi sa Pilipinas, duha ka talan-awon ang posibleng mahitabo. Kon datu ka o gamhanan, sayon ra ang pagbalibad ug dili magpahaylo sa kuwartang itanyag. Apan alang sa kinabag-an nato nga mga kabus, wa tay kapilian, dawat ke dawat na lang kon unsay ipatulon kanato sa gobiyerno bisan nasumpaki sa atong gibati ug kabubut-on. Kon sa medisina pa ni, bahalag pait, ato na lang gyud nga tunlon. (bobbygnalzaro@gmail.com) This posting includes an audio/video/photo media file: Download Now

Barrita: Income tax exemption sa mga seniors Posted: 24 Mar 2021 05:42 AM PDT Ang Korte Suprema, sa National Power Corporation v. Province of Albay (G.R. No. 87479, June 4, 1990), niingon, "Taxes are the lifeblood of the nation. Their primary purpose is to generate funds for the State to finance the needs of the citizenry and to advance the common weal." Ang buhis sama sa dugo nga naghatag kinabuhi sa usa ka nasod. Ang tumong niini mao ang pagtigum og pundo aron magasto alang sa panginahanglan sa mga lungsuranon ug alang sa tingusbawan sa kadaghanan. "Taxes are what we pay for civilized society. Without taxes, the government would be paralyzed for lack of the motive power to activate and operate it. It is the lifeblood of the government and so should be collected without unnecessary hindrance. (Commissioner of Internal Revenue v. Wyeth Suaco Laboratories, Inc., G.R. No. 76281, Sept. 30, 1991). Kinahanglan gyud nga kolektahon ang buhis kay mao kini ang atong gibayad alang sa usa ka sibilisadong katilingban. Di modagan ang makinarya sa gobyerno kon way buhis. Apan bisan pa niini, adunay mga tax exemption ubos sa atong Konstitusyon. Sama sa Section 28 (3), Article VI (The Legislative Department), 1987 Constitution, nga nagkanayon, "Charitable institutions, churches and parsonages or convents appurtenant thereto, mosques, non-profit cemeteries, and all lands, buildings, and improvements, actually, directly, and exclusively used for religious, charitable, or educational purposes shall be exempt from taxation." Ang Konstitusyon naghatag usab og gahom sa Kongreso sa pagpasar og balaod nga maghatag og tax exemption. Apan ang rikisito niini mao ang Section 28 (4), Article VI nga nagkanayon, "No law granting any tax exemption shall be passed without the concurrence of a majority of all the Members of the Congress." Nunot niini, si party list Rep. Rodolfo Ordanes, chairman sa House senior citizens committee, mipasaka sa House Bill No. 8832 nga maghatag og exemption sa mga senior citizens sa pagbayad og income tax aron makatigom para sa ilang pagretiro. Matod pa ni Ordanes, daghan sa mga senior citizens ang wa malingaw sa kinabuhing retirado tungod kay way natigum, resulta nga nagsaka nga presyo sa mga palaliton ug serbisyo. Ubos sa House Bill No. 8832, hatagan og income tax exemptions ang tanang Pilipino nga empleyado nga nagpangedaron og 60 anyos pataas. Di usab buhisan ang ilang holiday pay, overtime pay, night shift differential pay ug hazard pay. Ang maong balaudnon, ang Income Tax Exemption for Senior Citizens' Act, mag-amendar sa National Internal Revenue Code nga giamendar sa Republic Act No. 10963, ang Tax Reform for Acceleration and Inclusion Act. Matod pa ni Orlanes ang balaudnon mag-andam sa mga senior citizens sa mas komportable nga retirement kay ang mga senior citizens manginahanglan og P40,000 ngadto sa P60,000 matag buwan alang sa komportable nga retirement. Sumala sa Philippine Statistics Authority, 75 porsento sa mga senior citizens way pension ug 60 porsento sa dunay pension nagdawat og P5,000 kada buwan ug kuwatro porsento lang ang nagdawat og P30,000 pataas. (edbarrita@gmail.com) This posting includes an audio/video/photo media file: Download Now

Tambagi ko Noy Kulas: Na in love sa bayot Posted: 24 Mar 2021 05:38 AM PDT Dear Noy Kulas, Maayong adlaw! Tawga lang ko sa pangan nga Jack, 26, taga Cordova. Naa ko sa usa ka call center company nagtrabaho. Naa koy kauban nga bayot nga taguon lang nato sa ngan nga Mikaela. Suod mi niya kay kauban mi og duty. Grabe siya kagwapa ug di mailhan nga bayot siya kay bisan ang iyang tingog, babaye kaayo paminawon. Curve kaayo siya og lawas. Sa among kasuod, wa ko magdahom nga ma develop ang akong feeling niya. Mao to ako siyang gisultihan. Pwerte niyang katawa pagkahibawo niya, apan nisulti siya nako nga okay ra siya og relationship but di siya gusto og serious until mo undergo siya og sex change operation kay biyaan ra sab kuno unya siya. Pero ako serious kaayo ko niya. Karon lang, igo ra mi sa casual romance without sex pa. Noy, unsa kahay akong buhaton ani nga relasyon? Di kaha ko kataw-an nga na in love ko og bayot? Pero sure ko nga akong feeling true love. JACK Jack, Ang gugma di magpili basta imo ning na feel ni bisan kinsa. Talagsaon ra hinuon ang tinud-anay nga love sa same sex, especially sa mga lalake. Mas daghan ni sa mga babaye. Kon tinuod kang nahigugma, ayaw na panumbaling kon kataw-an ka ba o di. Segurado di na sila makasabot nimo. But imo man gud na nga feeling so, you don't need validation gikan sa ubang mga tawo. Ang makasabot ra sab nimo ang nakasuway o nakaagi na ana nga feeling. Unya kay imo man nang feeling, ayaw huna-hunaa ang perception sa uban if it makes you happy. Kay sa kaguol ra ba, ang uban igo ra nang mopikpik sa imong abaga. NOY KULAS rojval69@yahoo.com ug kulassuper@sunstar.com.ph This posting includes an audio/video/photo media file: Download Now

Ciar: Percival 'Valrock' Dinopol Rock n’ Roll sa Pandemya Posted: 24 Mar 2021 05:37 AM PDT Si Percival "Valrock" Dinopol ang usa sa mga founding member sa bandang Southwings nga nabantog sa ilang folk, rock and country music nga kuli na kaayong mabati sa mga bag-ong tubo. Siya usab ang founder sa "Music Made in Cebu" concert series nga nag-feature sa mga music icon sa Sugbo sama nilang Max Surban ug Junior Kilat. Naila usab si Valrock sa iyang mga fund-raising event diin lakip sa natabangan niini ang mga biktima sa Super Typhoon Yolanda ug ang mga pamilya sa duha ka Cebuano nga lakip sa nakalas sa SAF 44 (Special Air Force) sa Mamasapano niadtong 2015. Ang 51-anyos na karon nga singer-songwriter unang nikulit og pangan sa dihang nisikat ang iyang "Panaad" ug "Kumusta Inday" sa radyobisdak internet radio sa California niadtong 2007. Ang maong hit Visayan songs gikan sa ikaduhang album nga "Promiseland" sa bandang Southwings diin ang mga kauban niya iya ra sad mga igsuon nga silang Preston "The Stone" Dinopol (bass guitar) ug Paul Dinopol (lead guitar) ug higalang si Jaymer Punay (drummer). Nagsugod ang gugma ni Val sa pagtagik og awit sa high school sa dihang nahimo siyang contributing writer sa official student publication sa Abellana National School. Una niyang banda ang The Farmers niadtong 1988 sa ilang hometown sa Samboan. Apan wala ni molungtad hinungdan nga naghimo sila og kaugalingong banda nga mao ang Southwings niadtong 2000. Ang una nilang kantang "High Time" nga gi-compose sa iyang igsuong si Preston nahimong most requested song niadto sa Star FM. Gawas nga gitarista, nag-drummer usab si Val sa Southwings dihang nitukar sila sa "Yukbo: Ang Konsiyerto" niadtong 2003 ug 2005. Ang ilang drummer nga si Punay nisud pag-2006 na. Sila ang paboritong opening act sa mga dagkong event sa Sugbo sama sa Sinulog show ni Angel Locsin ug sa Masculados ug sa back-to-back Sinulog concert sa Rocksteddy ug True Faith. Sa wala pa ang pandemya lakip sa ilang regular gigs ang Handuraw, Kahayag ug Outpost. Apan bisan sa nasinating krisis karon sa kalibutan wala ni makapugong sa hilig ni Valrock sa rock n' roll. Kini human nga gikuha sad siyang DJ sa kabayanradio.com, usa ka online radio nga nagbase sa Switzerland. Rock n' roll usab ang peg ni Val sa iyang double job sa adlawan isip financial advisor sa usa ka insurance company ug online seller sa iyang Spanish-style sardines. Percival "Valrock" Dinopol, Ssssuper Ka! Unsang orasa imong online radio? Kon Sabado 8-11pm, sa Dominggo 5-8 pm. Folk, rock and country music ang format sa akong radio program. Aside sa akong pagka-musician, ambisyon nako mag-discjockey. Family of musicians gyud mo? Among papa maayo mokanta pero dili mogunit og instrument. Nakat-on mi sa amo rang paningkamot. Uso sa una mga plaka pa man unya among iyaan sigeg patukar mao toy naka-influenced namo hangtod pag-high school. Among tirada Air Supply, Asin, Prince & the Revolution Unsay imong mga repertoire? Mga kanta sa Eagles, like "Best of My Love" ug "Tequila Sunrise"; "One Night At A Time" ni George Strait; Beatles; BeeGees; Elvis Presley ug daghan pa labi na kon Southwings na ang motukar. Unsay mensahe sa imong kantang "Panaad?" Walay kinutobang gugma sa akong kapikas sa kinabuhi. Para sa ako wife gyud nang kantaha. Tulo among anak: ang eldest, 27, married already with daughter, naa nakoy 5 years old nga apo; second is 22 still in college; and third is 10, grade 4. Kumusta mo karong pandemic? Trabaho lang gihapon, wala ra man naundang kaluoy sa Dios. Akong wife sales coordinator sa tig-supply og roof tiles sa Mandaue. Pero ang among online radio wala pay income kay bag-o pa man. Pagkangalan lang nga na-DJ ko, payts na. Ang mga hilig man sad nakong music ang gipatukar. Nakatabang sad siya sa halin sa akong Spanish-style sardines sa online. Mga OFW listeners nga taga-Cebu maoy namalit. Akong motto kadtong kanta ni Tom Keifer sa hard rock band nga Cinderella: "As long as I got rock n' roll, I'm forever young." This posting includes an audio/video/photo media file: Download Now

Sugilanon: Handumanan sa tam-is nga gugma Posted: 24 Mar 2021 05:37 AM PDT JOHN TAM YBAÑEZ Gun-ob, Lapu-Lapu City, Cebu Alang nako ang Valentine's Day o Adlaw sa Kasingkasing sa matag Pebrero 14 maoy usa ka halandumong adlaw nga dili ko makalimtan kay dinhi ko matagamtami ang katam-is sa kinabuhi sa usa ka dalaga. Gani, mao kining adlawa nga gidaygan ko ni Ronie (nga usa nako ka klasmet sa Marigondon National High School) sa iyang gugma. Pareho kaming diha na niadto sa ikaupat nga ang-ang sa hayiskol. Hinuon, sayod akong may gitago siyang pagbati kanako apan wa ko lang tagda sanglit suod man kaming managhigala. Unya usa ka bisperas sa Adlaw sa Gugma giagni ko niya og paniudto sa sikat nga Catadman's Carenderia sa Lapu-Lapu. Nagdumili unta ko pag-uban kay sayod kong mahal ang mga pagkaon sa maong kan-anan. "Ayaw lang kabalaka, Beth, kay aduna koy kuwarta," ug aron pagpamatuod, iyang gikuot ang pitaka sa bulsa sa likod sa iyang karsones ug gipakita ang nag-akal nga papel de banko. "Dato ka man diay karon!" komedya ko kaniya. "Dili, uy," sawo niya. "May gamay lang negusyo ang akong parents." "Di kaha na nimo kinawat?" "Si Bebeth pod, uy! Kasakit ba nimong mangomedya!" Sa de-erkon nga lawak sa kan-anan kami nanulod ni Ronie. Daling miduol kanamo ang silbidora ug gitunol ang menu kang Ronie. Siya ang akong gipaorder. Tulo ka klase sa potahe ang iyang gipili. Miorder sab siyag mango juice ug beer. Wala madugay miabot ang among order. Gihinay-hinay ko pagdimdim ang akong juice samtang gitinubig lang pagyarok ni Ronie ang beer. Unya midugang pa siyag tulo ka botelya. "Maghubog ka diay, Ron? Ania ta dinhi aron mangaon ug dili aron maghubog-hubog!" nako pa nga gitubag lang niyag ikatawa. Daghan pag sobra sa pagkaon nga giorder ni Ronie. Namuwa na ang iyang nawong. Unya kalit kong nawad-an og gana sa pagkaon. "Mamauli na ta, Ronie, kay nalipong ko!" agda ko kaniya Iyang gihilot-hilot ang akong ulo labi na sa may tampihak. Apan wala mahanaw ang akong gibati hangtod nawala ko sa kalibutan. Ug naamguhan ko na lang nga didto na kami sa lawak sa ikaduhang andana sa karenderiya nga usa sab ka lodging house. Way puas ang iyang pagbanyos kanako og init-tubig gamit ang labakara. Mitimbakuwas ko pagbangon. "Nganong imo man kong gida dinhi?" kahilakon ko. "Ayaw kabalaka, Beth, kay dili dautan ang akong tuyo pagda nimo dinhi kay kon sa ospital tika dad-a tingalig adunay makakita ug magduda og di maayo. Pinangga kaayo tika." Bisan sa iyang pagpatin-aw misulod ko sa CR aron pagsuta kon tinuod bang wa mapusgay ang akong pagka bulak. Wala diay kini maunsaay, wala pa matandog! "Apan nakaseguro ka ba nga way nahibawo ning atong gibuhat? Madudahon ang mga mata sa tawo, Ronie!" giingnan ko si Ronie. "Anaa ra nila unsay ilang pagtuo kay wa silay labot. Kita ray nasayod sa atong gibuhat!" Nianang pagka ugma sa gabii dihay Valentine's Dance sa Marigondon National High School. Nagabhian kami si Ronie sa kalingawan ug dihang namauli na ang mga estudyante, nakahukom kami nga adto mamahuway sa lodging house sa itaas sa Catadman's Carenderia. Sa maong higayon gihangyo ko siyang dili lang moinom ug sa among pagpanghigda bisag unsa lay among gihisgutan labot sa among kaugmaon. Ug dihang nagkalawom na ang gabii, nahitabo gyud ang akong gipaabot. Gisalohan namo pagdimdim ang katam-is sa among gugma. Hinuon, gipangandaman ko kini kay mahal ko man si Ronie kinsa maoy nahimo kong kapikas sa kinabuhi. (KATAPUSAN) This posting includes an audio/video/photo media file: Download Now

Balak: Bagad sa mga butang Posted: 24 Mar 2021 05:37 AM PDT ALE INOC CANETE Poblacion, Cordova, Cebu Ang kahilom sa ataon nga kangitngit Mikuyanap sa lapyahan nga nahinanok. Ngano nga ang dagat motaob ug mohunas? Tungod ba kay bagad sa kinaiyahan Nga siya motaob ug mohunas, Dayon inighunas maghulat sa takna Sa iyang pagtaob? Ang yuta mapinanggaon nga momatuto Sa usa ka gamayng tanom sa iyang sabakan Aron kini molipang ug makasilbi sa katawhan. Ang kahoy malipay kon may mopasilong Sa kabugnaw sa iyang landong. Ang mga dahon magyapayapa sa kalipay Kon ang huyuhoy mohapuhap Sa ilang mga aping. Ang mga kahoy magpabiling lig-on Sa ilang gibarugan kon ang kulyada Mapungtanong mohasmag kanila. Ang adlaw sa udtong tutok Dili gyud angay nga tutukan Kay ang iyang kainit makabuta Sa imong mga mata. Ang papel nga nasulatan na sa kamatuoran Mahimong magunaw sa tubig Kay ang nahisulat human na mabasa. This posting includes an audio/video/photo media file: Download Now

Balak: Pureso aron di ka mapriso Posted: 24 Mar 2021 05:35 AM PDT FREDRICK F. GELBOLINGO 121 Prenza, Argao, Cebu Pureso aron di ka mapriso Paghimo og maayo Sa imong isigkatawo Dinhi sa atong katilingban Nga di mahisupak Sa batakang balaod Sa atong gobiyerno Bisag diin ka dapita magpuyo. Ay'g pagminaldito, ay'g tinunto Maoy sakto ug sikreto Nga tamdan nimo aron di ka Madakpan ug makalabuso. Padayon sa pagtinarong Pagka matinud-anon Pagka matinahuron Pagka matinabangon Pagka matinagdanon Aron mahimong takos Sa tanang katawhan Aron makab-ot natong tanan Ang atong gihandom – Ang kalibutan nga malinawon! This posting includes an audio/video/photo media file: Download Now

Parks dili i-ban sa PBA apan ... Posted: 24 Mar 2021 05:34 AM PDT Giklaro ni Philippine Basketball Association (PBA) commissioner Willie Marcial nga dili i-ban sa liga si Ray Parks Jr. gumikan sa desisyon niining dili una moduwa sa Talk N' Text (TNT) Tropang Giga sa sunod season aron makapahuway. Mao kini ang reaksyon ni Marcial human ningkatap sa social media ang mga hugonhugon nga gi-ban na sa PBA si Parks tungod sa gibuhat niini. "Wala. Hindi naman namin napag-uusapan sa board meeting 'yan," batbat ni Marcial nga napatik sa Tiebreaker Times. Ang tag-iya sa TNT nga si Manny Pangilinam ug team governor Ricky Vargas parehong mikuwestiyon sa rason ni Parks, kinsa miingon nga nakadesisyon siyang dili una moduwa alang sa iyang pamilya. Sa usa ka interbyu, gipaneguro ni Vargas nga wala'y team ang andam modawat ni Parks inig balik niini. Gipasabot ni Marcial nga wala siya'y kontrol kon magkasinabot ang Board of Governor's nga dili na dawaton si Parks. "'Yung Board of Governors natin, dikit silang lahat," matod ni Marcial. (ESL) This posting includes an audio/video/photo media file: Download Now

Nabakunahan na si Ancajas Posted: 24 Mar 2021 05:33 AM PDT Aduna na'y proteksyon si International Boxing Federation (IBF) super flyweight champion Filipino Jerwin Ancajas, dili proteksyon batok sa iyang umaabot nga kontra kon dili proteksyon batok sa Covid-19. Si Ancajas natusokan na sa premirong dose sa bakuna batok sa Covid-19 hasta ang tanang mga sakop sa Team Ancajas. "Kami nina Coach Joven, na-vaccine na po. Pfizer po 'yung vaccine," matod ni Ancajas nga napatik sa www.abs-cbnnews.com. Gipasabot niya nga wala siya'y gibating side effects. Si Ancajas gikatakdang modepensa sa iyang korona karong Abril 10, 2021 batok kang Mexican Jonathan Rodriguez sa Uncasville, Connecticut. (ESL) This posting includes an audio/video/photo media file: Download Now

Milo padayon sa pag-umol og kampyon Posted: 24 Mar 2021 05:32 AM PDT Aron pagdasig sa mga batan-on nga mosulod o mopadayon sa ilang sports activities, milusad og bag-ong programa ang Nestle Philippines nga gitawag og "Mula Noon Hanggang Ngayon, Tuloy ang Pagiging Champion." Ang maong sports advocacy gilusad pinaagi sa virtual press conference kagahapon kauban ang mga personnel sa Milo Philippines ug sports media sa Visayas ug Mindanao. Tungod kay usa man ang paugnat sa kusog sa mga naapektohan sa hulga sa pandemiya, buot sa Milo Philippines nga tabangan ang mga batan-on sa pagpadayon sa ilang hilig pinaagi sa mga alternative activities sama sa online training ug competition. Nagkanayon si Lester Castillo, assistant vice president sa Nestle Philippines, nga adunay duha ka mga henerasyon ang ilang gipili isip ambassador sa maong adbokasiya—ang mga role models kaniadto ug ang mga bag-ong sulbong nga mga atleta. Aron madasig ang mga bata nga mopadayon sa ilang pangandoy ug hilig sa sports adunay mga sports program nga buhaton online ang Milo Philippines. Ang ambassadors niining maong programa mao sila Japoy Lizardo (taekwondo) Allysa Valdez (volleyball), Chris Tiu (basketball), Carlos Yulo (gymnastics). Mao kini ang mga atleta nga nakahatag na og dungog sa Pilipinas. Alang sa sumosulbong nga mga atleta, gipili sa Milo ang Sarmiento siblings, Ysabel Martinez ug si Sofia Ildefonso, kinsa anak ni PBA legend Danny Ildefonso. Matod ni Castillo nga nindot kini nga dynamics kay duha man ka henerasyon sa mga atleta ang motabang sa mga batan-on nga mosulod sa sports o exercise. "Mahimo kita mag-exercise sa balay. Sama sa taekwondo ug gymnastics aduna tay online classes ana. Interactive ni siya ugadunay real-time intervention diin tudloan og proper form ang mga participants," padayag ni Castillo sa Tagalog. Sumpay pa niya nga pinaagi sa makapadasig nga mga estorya sa ambassador athletes, mas madasig ang mga batan-on mga mohimo og ilang kaugalingong career path. Ang sports makatabang na sa physical being sa bata, moabag pud kini sa character building. "In sports you learn character forming values which can be used later on life whether in sports or in job career," sigon niya. Anaa pud sa virtual press conference ang Olympian swimmer nga si Ral Rosario nga mao na karon ang Milo Swimtech organizer ug si 2019 Southeast Asian (SEA) Games medalist Sacho Ilustre. Sama sa ilang gibuhat sa miaging tuig, maglusad ang Milo og online competitions karong tuiga. Ang labing bag-o nila nga programa mao ang skateboarding diin makigtambayayong sila ni Cebuana skateboarder Margielyn Didal. "Expect more sports programs to come in. Ako personally I'm excited. Abangan natin ang skate program with Margielyn Didal," matod ni Castillo. Mahimong moapil ang batan-on sa mga sports program. Ang mga interesado pwedeng mobisita sa social media pages sa Milo Philippines. (RSC) This posting includes an audio/video/photo media file: Download Now

You are subscribed to email updates from https://www.sunstar.com.ph/. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States