https://www.sunstar.com.ph/

---

• P500,000 danyos sa sunog sa Maguikay, Mandaue
• Sunog miigo sa Maguikay, Mandaue
• Ginang ‘gi-torture’ sa mga pulis
• Mambaling underpass gilunopan na sab
• Bag-ong ngan sa MCIA terminals gihangop
• Kapitan nga miibot sa solar lamp ikiha
• P174M nga proyekto ni Kong. Frasco alang sa Danao
• Durano: Pagpangaligo sa dagat sa Danao City gidili
• Editoryal: Wa pay nanubag
• Nalzaro: Penitensiya; mawala ang atong mga sala?
• Barrita: Biktima sa grabeng inhustisya
• Tambagi ko Noy Kulas: Gay siya
• Ciar: M-Talent malampuson luyo sa mga pagsuway
• Sugilanon: Ganti sa paghulat
• Balak: Sultihi ko sa imong kamingaw
• Balak: Pagbating daw puthaw
• Pacquiao-Crawford 95% nga madayon

P500,000 danyos sa sunog sa Maguikay, Mandaue Posted: 01 Apr 2021 01:05 AM PDT NIKABAT og P500,000 ang danyos sa nahitabong sunog sa M.L. Quezon St., Barangay Maguikay, Mandaue City alas 11:31 a.m. adlawng Huwebes, Abril 1, 2021. Matod ni Fire Officer 1 Denzel Espares, ang radio operator sa Mandaue City Fire Station (MCFS), nga naugdaw ang usa ka hardware ug partial nga nasunog ang duha ka balay. Wala pa masuta sa kabumberohan ang hinungdan sa maong sunog, gani nagpadayon pa ang imbestigasyon sa fire scene. Ganina, nadawat sa MCFS ang alarma alas 11:31 a.m. ug gipasaka kini ngadto sa second alarm alas 11:38 a.m. Gideklara nga under control ang sunog alas 11:53 a.m. Na-fire out ang maong sunog alas 3:25 p.m. (KFD) This posting includes an audio/video/photo media file: Download Now

Sunog miigo sa Maguikay, Mandaue Posted: 31 Mar 2021 10:58 PM PDT NASUNOG ang mga commercial ug mga residential nga mga estraktura sa may dan M.L. Quezon St., Barangay Maguikay, Mandaue City alas 11:31 a.m. sa adlawng Huwebes, Abril 1, 2021. Matod ni Fire Officer 1 Denzel Espares, ang radio operator sa Mandaue City Fire Station (MCFS), nga nadawat nila ang alarma alas 11:31 a.m. ug daling miresponde ang ilang mga kawani sa lugar. Gipasaka ngadto sa second alarm ang maong sunog alas 11:38 a.m. ug nakontrolar kini alas 11:53 a.m. Padayon pa ang overhauling ug ang imbestigasyon sa maong sunog. (KFD) This posting includes an audio/video/photo media file: Download Now

Ginang ‘gi-torture’ sa mga pulis Posted: 31 Mar 2021 07:01 AM PDT Laing reklamante nidangop sa Integrity Monitoring and Enhancement Group (IMEG) Visayas Field Unit batok sa mga sakop sa Drug Enforcement Unit (DEU) sa Sawang Calero Police Station kay giingong siya gi-torture human gidakop sa grupo ni Police Staff Sergeant Celso Colita. Si Colita usa sa 11 ka mga pulis sa Sawang Calero Police Station nga girelibuhan ni Police Brigadier General Ronnie Montejo human gireklamo sa babayeng ilang gidakop nga nilugos kaniya. Di pa igo, giingong gihulidap nila ni Colita ug mga kauban ang babaye, kinsa nidangop usab sa IMEG. Ning higayuna, usa ka 50 anyos nga negosyanteng babaye uban sa iyang bana nga architect, nidangop sa IMEG Visayas Field Office aron moreklamo sa iyang gidangatan sa mga kamot ni Colita. Matod ni Police Major Alejandro Batobalonos, pangu sa IMEG, nga niadtong Marso 26 sa gabii gisulod sa unom ka mga pulis ang balay ni alyas Marie sa M. Velez st., Barangay Guadalupe, Siyudad sa Sugbo. Gi search ang iyang balay ug gipasanginlan siya nga nalambigit sa illegal nga drugas. Apan kay way nakitang drugas, giingong gipangita kon asa gi butang ang kwarta. Giingong gipaablihan pa ang vault apan nipahibawo si Marie nga wa kini sulod kay naa ra sa bangko. Tungod kay way nadala, giingong gipangkuha ang ilang mga alahas ug mahalong mga cellular phone sa magtiayon. Gidala pa siya sa Sawang police station apan wa gisulod sa selda, sa kwarto sa luyo sa police station. Mao usab kini ang kwarto diin gidala ang maanyag nga babaye nga taga Tungkil, Minglanilla nga maoy unang nireklamo. TORTURE Dugang ni Batobalonos nga sa sulod sa sekretong lawak sa police station, gipugos siya sa pagpatug-an asa ang kwarta hangtod nga giingong gi torture siya sa mga pulis. Unom ka mga pulis ang iyang nailhan, ang upat kanila nalakip sa 11 ka mga pulis nga giparelibohan ni Montejo samtang ang laing duha naa ra sa police station. "Ang na identify niya nga naa ron anang eleven is four ang positively identified niya. Naa pay duha nga naa karon sa Sawang Calero nga identified sad niya," matod ni Batobalonos. Naghilak nga nitug-an si Marie sa mga sakop sa media kon giunsa siya sa mga pulis sa dihang gidala na siya sa police station. Matod niya nga gigapos siya nga binaklid ug gituok sa usa sa mga pulis aron patug-anon kon asa ang ilang kwarta. "Ila kong gikuha, gidala ko nila sa Station 6. Human ana gidala ko nila sa luyo. Naa man silay room didto nga gamay, nya gi torture ko nila. Gi-hold ko nila for four days, then naa koy mga pasa. Ila kong gilumsan, ila kong gibutangan og plastic bag," pasangil ni Marie. Gibuhian siya niadto lang Lunes, Marso 29, human migawas ang kamandoan gikan sa PRO 7 nga parelibohan sa katungdanan ang 11 ka mga personnel sa Sawang Calero apil ang hepe nga si Police Major Eduard Sanchez. Giangkon usab ni Marie ngadto kang Batobalonos nga managkaila sila sa anak sa kanhi bise gobernador sa lalawigan sa Sugbo nga usa sa gidudahan niya nga hinungdan nga ang mga pulis nidakop kaniya. Niangkon usab siya nga kaniadto tiggamitan siya sa illegal nga drugas. Apan wa na karon siya magbisyo sa illegal drugs sanglit nakatutuk na siya sa iyang negusyo nga pagpaabang og establishments sa Barangay Guadalupe. Kasong grave threats, robbery grave coercion, kalapasan sa anti-torture law ug arbitrary detention ang ipasaka sa IMEG batok sa unom ka mga pulis sa Lunes, Abril 5, 2021. (AYB) This posting includes an audio/video/photo media file: Download Now

Mambaling underpass gilunopan na sab Posted: 31 Mar 2021 07:00 AM PDT Gilunopan sa tubig ang multi-million peso underpass sa Barangay Mambaling-Basak San Nicolas gumikan sa grabeng pagbundak sa uwan kagahapon sa buntag, Marso 31, 2021. Gumikan niini, wa una paagii sa Cebu City Transportation Office (CCTO) ug Department of Public Works and Highways (DPWH)-7 ang underpass hinungdan nga naghuot ang mga sakyanan sa nga nakamugna og kahuot sa trapiko. Si Engr. Nonito Paylado sa DPWH 7 nagkanayon nga niandar ang upat ka pumps sa underpass, apan wa makaato og suyop sa tubig gumikan sa kakusog sa bul-og. Si Konsehal Jerry Guardo, chairman sa committee on infrastructure, nagkanayon nga alas 11 na sa buntag nihubas ang tubig ug una pa giablihan sa trapiko. Ang DPWH 7 nigasto og dul-an P700 milyones sa proyekto ubos sa paningkamot ni Kongresista Rodrigo Abellanosa nga gisugdan niadtong 2016 ug nahuman paglabay sa tulo ka tuig. Usa sa mga nahasol sa pagbaha mao si Land Transportation Office (LTO-7) Regional Director Victor Caindec, kinsa nagpuyo sa south district ug nipadayag sa iyang kadismaya. "Congratulations to the Mambaling canal! Wa na gyud intawn gibaha sa taas. Ninaog na gyud ang tubig sa ubos." (PAC) This posting includes an audio/video/photo media file: Download Now

Bag-ong ngan sa MCIA terminals gihangop Posted: 31 Mar 2021 06:58 AM PDT Gihangop sa mga opisyal sa dakbayan sa Lapu-Lapu ang pagpasar sa ikatulo ug katapusang pagbasa sa balaudnon nga mag-ilis sa pangalan sa duha ka terminals sa Mactan Cebu International Airport (MCIA) ngadto sa Lapu-Lapu Terminal 1 ug Lapu-Lapu Terminal 2. Ang naasoyng balaudnon gisang-at ni Kongresista Paz Radaza niadtong 2019 sa katuyoan nga matagaan og igong pahinungod ug pasidungog si Datu Lapulapu sa iyang nabuhat nga pagdepensa sa isla sa Mactan gikan sa mga mananakop nga mga Katsila. Matod ni Radaza nga mismong si Presidente Rodrigo Duterte ang nipadayag atol sa paglusad sa commemorative bill ni Datu Lapulapu niadtong Enero 18, ang kamahinungdanon sa paghatag og igong pahinungod sa bayani sama sa ubang bayani sa nasod. Ug ang paghingalan sa duha ka terminal sa tugpahanan sa dakbayan ngadto kang Lapulapu maoy usa ka nindot nga paghinungod ngadto sa bayani. Naaprobar ang balaodnon ni Radaza niadtong Marso 25. "I am very thankful to my colleagues in the House of Representative for supporting House Bill No. 8986 entitled an "Act renaming Terminals 1 and 2 of the Mactan Cebu International Airport after the brave and fearless chieftain, in commemoration of the Quincentennial Anniversary of the victory of Mactan," matod ni Radaza. Si Lapu-Lapu City Mayor Junard "Ahong" Chan sa iyang bahin nihangop usab sa pagkaaprobar sa maong balaudnon. Alang sa mayor, panahon na gayud nga adunay igong pahinungod ang bayaning si Lapulapu ug naatol usab ang pagka aprobar niini nga nagsingabot na ang ika 500 ka tuig nga kasumaran sa Kadaugan sa Mactan. Saulogon kini karong umaabot Abril 27 diin gikatakdang tambongan usab ni Duterte. "Pasalamat mi sa kining pasidungog nga gihatag sa atong siyudad sa Lapu-Lapu," matod ni Chan sa Superbalita Cebu. (GCM) This posting includes an audio/video/photo media file: Download Now

Kapitan nga miibot sa solar lamp ikiha Posted: 31 Mar 2021 06:57 AM PDT Nahimong kontrobersyal karon ang pagpatukod sa kagamhanan sa dakbayan sa Lapu-Lapu og poste alang sa solar street lights sa Barangay Caubian, isla sa Olango. Kini human nga usa ka video footage nagpakita nga ang usa ka poste gipatangtang ni Kapitan Jackson Matbagon ang nakaabot ni Lapu-Lapu City Mayor Junard 'Ahong' Chan nga wa gikahimuot niini. Base sa video nga nadawat sa mayor, si Matbagon nipasangil nga way permit ang pagpanaod sa mga poste alang sa solar street lamp sa yuta nga iyang gihulagway nga pribado, apan si Chan nihimakak niini ug miklaro nga ang tag-iya sa yuta diin gipabarog ang mga poste iya ni Vicenta ug Felipe Matbagon nga katiguwangang kabanay sa kapitan. Gibutyag ni Chan nga unom sa pito ka mga kabanay ni Vicenta ug Felipe pulos nisugot sa pagbutang sa poste sa solar lamp gawas sa amahan sa kapitan hinungdan nga dili na sila kinahanglan pa nga mangayo og permit sa barangay. Makita usab sa video nga mipasangil si Matbagon nga "pamolitika" ang proyekto sa kanhi kaatbang pagka kapitan sa iyang amahan apan gipasabot ni Chan nga wa kini kalabotan sa proyekto sanglit kini iya sa Siyudad, di sa kanhi kapitan. Tungod sa gihimo ni Matbagon, gitun-an na karon sa kagamhanan ang pagpasaka og kaso batok kaniya kalabot sa gihimo niining pagtangtang sa mga poste nga iya sa Siyuddad. Gibutyag ni Chan nga pasakaan usab nila og kaso si Matbagon sa pagpatukod og barangay hall sa usa ka pribadong luna diin ang tag-iya sa luna mireklamo kalabot niini hinungdan nga wa mahuman ang naasoyng proyekto sa pagkakaron. "Dili na intawon magkinahanglan og permit sa barangay (ang) proyekto sa local government Ang ako ba maoy gikinahanglan sa mga tawo,ngano ato man I sakripisyo ang kaayuhan tungod lang sa atong pamolitika," matod ni Chan. Si Matbagon, sa iyang habig. mipadayag nga katungod ni Chan ang pagpasaka og kaso batok kaniya apan miklaro nga putol ang video nga nadawat ni Chan. Wala gipakita sa video nga ang poste wala niya gipatangtang kon di iyang gipabalhin sa lugar diin kini mas gikinahangalan. Anaa usab sa iyang Barangay Mayor's Office (BMO) ang wala mataod nga pito ka solar street lamps ug wala sa barangay hall. Dili usab si Chan ang iyang pasabot nga "namolitika" kun dili ang BMO nga nidiritso lang og butang sa mga poste sa usa ka pribadong luna nga walay koordinasyon sa opisyal sa barangay. Nasayran nga ang pangulo sa BMO sa Caubian maoy kaatbang ni Matbagon pagka kapitan niadtong 2018. Giklaro ni Matbagon nga iyang gihangop ang pag apod-apod sa kagamhanan sa solar street lamp apan isip usab amahan sa barangay, pahibaw-on unta siya sa pagtrabaho niini sa gitahasan sa mayor nga mao ang iyang mga BMO. "Dili kay modiritso sila diri taod wala gani pahibawo namo (ang BMO) igo ra niingon nga nisugot ang mga tag-iya sa yuta unya naa bayay mga lugar nga mas gikinahanglan na. Ako wa koy problema gyud. Mapasalamaton ta anang mga solar nga ipang-apud-apod kay para na sa kaayohan sa tanan pero mag-coordinate... ang kapitan baya maoy amahan," pasabot ni Matbagon sa mga tigbalita. (GCM) This posting includes an audio/video/photo media file: Download Now

P174M nga proyekto ni Kong. Frasco alang sa Danao Posted: 31 Mar 2021 06:56 AM PDT Gihatagan ni Kongresista Vincent Franco 'Duke' Frasco og mokabat P174 milyunes nga proyekto ang Dakbayan sa Danao isip pagpadayon sa kutay sa giduso niya nga kausaban alang sa kinto distrito sa Lalawigan sa Sugbo. Niadtong Sabado, Marso 27, si Frasco kuyog nilang Bokal Red Duterte ug Mike Villamor niadto sa Barangay Danasan, kauban ang mga opisyal sa Department of Public Works and Highways 7 aron pagsusi sa nagpadayong kaugmaran sa Asturias-Liloan Road Opening Project. "The Asturias-Liloan Road Opening Project is historic and groundbreaking as it directly connects the eastern portion to the western portion of Cebu," matud ni Frasco. Dunay duha ka bahin ang proyekto nga mao ang Liloan-Danao ug Danao-Asturias sections. Ang Danao section nga unom ka kilometros molagbas sa bukirang bahin sa Barangay Danasan ug Cambubho. Ang Liloan section magsugod sa bukirang Barangay Mulao ug mosumpay sa sikbit nga Barangay Mulao sa Compostela, lahos sa Barangay Dapdap ug Tag-Ubi ug mosumpay sa Barangay Danasan sa Danao. Ang maong proyekto gigahinan og P168 milyones ubos sa 2020 General Appropriations Act diin si Frasco usa sa co-author isip vice-chairman sa House Appropriations Committee. Matod ni Frasco nga P23 milyones ang gigahin sab sa Compostela section ug nahuman na og laing P50 milyones ang gigahin sa Liloan section sa 2020 alang sa nagpadayong bridge project sa bukirang barangay sa Mulao nga magdugtong sa Liloan ug Compostela. Matod ni Frasco nga ang maong proyekto gikatakdang mahuman sa 2025 ug kini mosumpay sa Liloan-Consolacion-Mandaue Bypass Road paingon sa New International Port sa Consolacion. "Direct access to the west of Cebu will bring untold economic progress and massive benefit to the towns and city in the Fifth District of Cebu as it opens up a vital and necessary link for trade, commerce, and opportunities between the east and west," sumala ni Frasco. Kini makapaluag sab sa dagan sa trapiko sa kasamtangang mga dalan gikan sa amihanang bahin sa Lalawigan sa Sugbo paingon sa habagatan. Ang katawhan sa Liloan ug silingang mga lungsod sa sidlakang bahin sa lalawigan dili na moagi sa Transcentral Highway sa Dakbayan sa Sugbo ug sa Lugo Road sa Sogod kon motabok sa kasadpang bahin sa lalawigan. Ang pag-abli sa bag-ong dalan nga molatas sa kabukiran sa norte gilauman nga mohatag og kalamboan sa dapit. Gikan sa Barangay Danasan, ang Team Frasco nilahos sa Barangay Nangka alang sa paghatag sa personal nga donasyon ni Frasco balor og P400,000 nga solar-powered streetlights alang sa katawhan sa Barangay Nangka, Dakbayan sa Danao. Ang Team Frasco nilahos sa Barangay Sandayong Norte alang sa usa ka public consultation sa katawhan ug nangapud-apod og mga bitamina sa senior citizens. Ang Team Frasco nitugyan sa bag-ong giinstalar nga solar-powered streetlights sa national highway sa Danao sa Barangay Looc ug Maslog. Ang 69 ka solar-powered streetlights nga balor og P5.6 milyones nga giinstalar maghatag og luwas ug seguridad sa katawhan sa kadalanan sa Looc ug Maslog. (PR) This posting includes an audio/video/photo media file: Download Now

Durano: Pagpangaligo sa dagat sa Danao City gidili Posted: 31 Mar 2021 06:56 AM PDT Sa pagseguro nga walay magtapok nga hinungdan sa paspas nga pagtakod sa kagaw sa coronavirus disease 2019 (Covid-19), miluwat og kamandoan si Danao City Mayor Ramon Nito Durano nga mao ang Executive Order No. 07 S. 2021 sa pagsirado sa tanan nga mga pribado ug pampublikong dagat kaligoanan sa siyudad. Siradoan ang mountain ug beach resorts sugod karon, Abril 1, Huwebes Santo; Abril 2, Biyernes Santo; Abril 3, Sabado Santo; ug Abril 4, Dominggo sa Pagkabanhaw. Tugotan hinuon nga makaabli ang hotels, stay in resorts ug accommodations sa tanan nga nakapa-book na daan. Apan, dason ni Durano, kinahanglan gihapong mosunod sa minimum health standards. Ang mga pribadong swimming pools sa syudad mahimong makaabli apan alang lang sa mga stay-in guests, gikan sa alas 5:30 sa buntag hangtod alas 7:30 sa gabii. Gidili usab ang pag-party. Apan kon adunay espesyal nga kalihukan nga daan na nga na schedule sama sa wedding reception ug uban pa, tugotan ra kini. Gawas lang sa disco, inom-inum ug kalit nga papundok ang estriktong gidili sa dakbayan. Gipasabot sa mayor nga kining tanan gibuhat aron makontrolar ang pag sulbong unya sa mga kaso sa Covid-19 sa siyudad. Sa uwahing ihap sa mga kaso, nakatala ang siyudad og 31 ka active cases. Sukad sa pagsulbong sa sakit, niabot og 563 ang mga kaso, diin 497 na ang naka-recover apan 35 na ang nangamatay. (ANV) This posting includes an audio/video/photo media file: Download Now

Editoryal: Wa pay nanubag Posted: 31 Mar 2021 06:53 AM PDT Nag trending ang baha sa underpass sa Mambaling, Dakbayan sa Sugbo human sa makadiyot nga uwan sa Miyerkules, Marso 31, 2021. Kani nga problema sukad pa ni nahuman ang proyekto nga gigastuhan og mga P800 million sa kagamhanan. Mga alas 11 na sa buntag nakabalik ang trapiko sa pag-agi sa underpass human mapasuyopi sa Department of Public Works and Highways (DPWH) ang baha. Gisuwayan sa pagpasuyop sa upat ka mga makina ang tubig, apan wa makaato. Gipasiatab man gud nga kining mao nga imprastraktura kaya kaayong molamoy sa tubig, apan sukwahi man kaayo ang nahitabo. Namatud-an nga bisan sa kadiyot nga bunok sa uwan, maglunop lang dayon sa dapit. Duna nay mga solusyon nga giladlad ang DPWH aron masulbad ang pagbaha, apan ingon sa wa napatuman kay nagbalikbalik ang problema. Inay magamit sa tanang panahon, limitado kon magsige og bunok sa uwan kay mahimo mang sapa. Yuna pa, nganong wa pa may gibitay nga mga opisyal nga nagpaluyo sa pagduso aning mao nga proyekto nga klaro kaayo nga dunay apan? Nganong gipamugos man ni nga di man diay ni solusyon sa suliran sa trapiko, kon di nagdugang sa problema? Gidali pa ang pagtrabaho sa proyekto bisan sa mga kabalaka ug pagsaway nga di ni makasulbad sa suliran sa paghuot sa mga sakyanan. Kay gikinahanglan man nga dunay mga pagpalambo sa karsada ug drainage system sa sikbit nga mga dapit. Gani, ang underpass gibasol man sa pagbaha sa sikbit nga mga dapit nga kaniadto wa makasinati sa mao nga suliran. Apan way nanubag sa perdisyon sa kabtangan ug nahatag nga kahasol ngadto sa mga lumolupyo. Panahon na ron nga di lang sulti kutob, kinahanglan nga dunay gukdon ug patubagon sa pagtukod aning proyekto nga solusyon unta sa problema, apan problema na hinuon nga wa pay nakitang permanente nga solusyon. This posting includes an audio/video/photo media file: Download Now

Nalzaro: Penitensiya; mawala ang atong mga sala? Posted: 31 Mar 2021 06:52 AM PDT Ugmang adlawa Biyernes Santo, lain-lain lang nga mga eksina ang atong makita sa mga Romano Katoliko sa paghandum sa kamatayon sa atong gi-ila nga anak sa Diyos, Hesu Kristo. Mabungol ta sa pagbatbat sa Siete Palabras sa mga simbahan ug mga estasyonan sa radyo. Apil sa mga kalihukan ugmang adlawa nga maoy naandan nga buhaton sa uban mao ang pagsakripisyo pinaagi sa pagpasakit o paglatigo sa kaugalingon diha sa kadalanan sama sa gihimo ni Kristo niadtong iyang panahon. Daghang mga Kristiyanos ang migamit sa Bibliya aron aduna silay igong sukaranan ug basihanan o ma-justify kining pilila ka mga ritwal nga ilang pagahimoon sa Semana Santa. Sama aning flagellation o pagpasakit sa ilang kaugalingon sama sa pagbunal sa ilang likod panahon sa Biyenes Santo. Kay mao lagi kini ang nahi-aguman ni Hesu Kristo sa mga kamot sa mga Hudeyo nga misakit kaniya pinaagi sa pagpapas-an sa mabug-at nga Krus, milatigo kaniya dayon milansang sa Krus. Aduna silay interpretasyon niini pinasikad sa Bibliya nunot sa pangangkon ni San Pablo. 'I chastise my body refers to self-inflicted bodily scourging (1 Corinthians 9:27). Daghang mga prominente nga mga Christian nisagop aning maong ritwal. Daghan pang Christian nations sa Mediterranean countries sama sa Spain ug Italy ang nag-practice pa gihapon. Matod pa sa uban nga ang paghimo niini usa ka paagi nga malimpiyuhan ang imong kaugalingon sa mga sala nga imong nabuhat. Apan ang kadagkuan sa Simbahang Katoliko mi-discouraged o misalindot ning maong practice. Kay dili kini mao ang gi-ingon sa Bibliya nga atong sundon ang pagpasakit ni Kristo tungod sa pagtubos sa atong mga sala dinhi sa kalibutan. Pagano man gani, matod pa, kining maong ritwal. Si Hesus nagpasakit ug gisakit sa mga Hudeyo aron sa pagluwas sa atong mga sala. Dili kay kita ang mopasakit sa atong kaugalingon. Unya inig human sa pagpasakit sa imong kaugalingon, sigurado ka nga mawala na ang imong sala? Dili na mao ang paagi nga angay natong buhaton aron malimpiyuhan ang atong kaugalingon. Ang pagpangadyi ug paghinolsol ug pagsunod sa maayong dalan, pagpakitag maayong binuhatan sa atong isig katawo maoy magsalbar kanato sa pagkamakasasala.(bobbygnalzaro@gmail.com) This posting includes an audio/video/photo media file: Download Now

Barrita: Biktima sa grabeng inhustisya Posted: 31 Mar 2021 06:50 AM PDT Sa wa pa ang Covid-19 pandemic, gipa-drawing sa maestra ang iyang mga estudyante subay sa ilang mahuna-hunaan sa pag-eskapo ni San Jose ug Santa Maria dala ang batang Hesus ngadto sa Egypt. Dunay misumitir sa drawing nga giulohan og "Flight to Egypt." Naghulagway kini sa tulo ka tawo ug usa ka bata luwan sa usa ka eroplano. Gipangutana sa maestra kon kinsa ang ikatulo. Tubag sa estudyante, "Mao na Ma'am si "Pontius the pilot." Magsaulog ang kalibotang Kristohanon ugma sa Biyernes Santo, ang adlaw nga gilansang sa krus si Hesukristo. Sagad madungog nato ugma sa radyo ang "Siete Palabras," ang katapusang pito ka mga pulong ni Hesus samtang nagbitay siya sa krus. Dakong pagkabalit-ad ang nahitabo ni Hesukristo, kay siya nga maoy tuburan ug biawan sa hustisya, biktima na man hinuon sa grabe nga inhustisya. Gitaral si Hesus sa hukmanan, gihukman nga sad-an ug gisilotan sa kamatayon. Apan patas ba ang pagbista ni Hesus? Sumala pa sa British Broadcasting Corp. (BBC), kaduha bistaha si Hesukristo. Ang mga biblical scholars wa pa makaklaro kon unsa gyud ang kaso. Ang unang bista, gitikas ni Caiaphas. Siya maoy huwes, siya ra sab ang prosecutor. Ang ikaduhang bista atubangan ni Poncio Pilato, usa ka Romano nga goberndor sa Judea. Sa maong panahon, ang Herusalem ubos sa mga Romano. Human hukmi nga sad-an si Hesus ug gisilotan nga ilansang sa krus, nanghunaw si Pilato ug miingon nga wa na siya'y labot unsay mahitabo ni Hesus. Laing balit-ad mao nga samtang gikonbikto si Hesus didto sa mga makinaadmanon, giabsuwelto siya sa usa ka kawatan nga gilansang sab sa krus. Si Kristo gilansang sa krus sa taliwa sa duha ka kawatan. Ang usa ka katawan miingon ngadto kaniya, "Kon tinuod kang Diyos, dailos diha sa krus. Luwasa ang imong kaugalingon ug luwasa usab kami." Ang ikaduhang kawatan mibadlong sa maong kawatan, "Ayaw siya bugal-bugali kay wa siya'y sala sama kanato." Dayon misulti siya kang Hesus, "Ginoo, hinumdumi ako kon atua ka na sa imong paraiso." Ug mitubag si Hesus, "Karon karon dayon, nahiuban ka kanako sa paraiso." Aniay duha ka berso gikan sa Balaang Kasulatan mahitungod sa hustisya. "Give justice to the weak and the fatherless; maintain the right of the afflicted and the destitute," (Psalm 82:3). "Learn to do good; seek justice, correct oppression; bring justice to the fatherless, and please the widow's cause," (Isaiah 1:17). (edbarrita@gmail.com) This posting includes an audio/video/photo media file: Download Now

Tambagi ko Noy Kulas: Gay siya Posted: 31 Mar 2021 06:49 AM PDT Dear Noy Kulas, Patambag unta ko nimo sa akong problema kay naglibog na ko kon unsa ang akong buhaton. Tulo mi ka mga magsuon ug ako ra ang lalake ug naa sa tunga-tunga namong tulo. Sukad sa bata pa ko, feel nako nga babaye ang dakong part nako, pero aron di ko kataw-an mismo sa akong pamilya, ako ning gitago. Gusto na gyud sila nga magminyo ko kay mag 40 na ko next year, pero lainan ko nga manguyab ug magpatuo nga lalake kay part nako, babaye man gyud. Karon naglibog ko unsay akong buhaton. Actually ni-try na ko few times og relationship sa babaye but di man mo workout bisan giunsa nako kay dakong part nako homosexual ko. Di man gyud ko maibog og babaye. Hilasan ko bisan mo kiss. Mao ni magpatambag ko nimo, Noy, kay naglibog na ko unsa ang akong buhaton sa akong pamilya kay ako ra kuno makapasanay sa among apelyedo kay ako ray lalake sa amoa. Na pressure na ko karon. Daghang salamat kaayo, Noy Kulas. KALOY Kaloy, Dunay time sa atoang kinabuhi nga maglibog ta kay sa pagsulti sa tinuod, makapahimangod kita sa atong pamilya. Daghan baya ang mga closet gay sama nimo. Apan sakit man tingali, kon nakapabug-at sab nimo ni, mas maayo pang imong isulti kon unsay tinuod kay sa magtago o magtakuban ka. Tingali sa sinugdan, maglisod pagdawat ang imong pamilya nga maoy sagad nahitabo, apan eventually, nadawat ra. Daghan ang sama nimo nagtago, apan sa pagladlad nila, nakabadbad ra sila sa mga gapos. If you do something good or maayo ang imong disposition sa kinabuhi, ila ka ra nga madawat sa ngadto ngadto. Sagad mao ni ang mahitabo basta maayo ang dagan sa kinabuhi sa usa ka tawo. Naay mga bayot nga sa sinugdan naglisod pagdawat ang pamilya, apan kay naningkamot kini alang sa pagpalambo sa kinabuhi nadawat ra kini sa pamilya. NOY KULAS rojval69@yahoo.com ug kulassuper@sunstar.com.ph This posting includes an audio/video/photo media file: Download Now

Ciar: M-Talent malampuson luyo sa mga pagsuway Posted: 31 Mar 2021 06:48 AM PDT Nagbaha ang mga pahalipay nga nadawat sa M-Talent Events and Promotions sa ilang 9th Anniversary nga naglakip sa video greetings nilang Mandaue city Mayor Jonas Cortes ug Vice Mayor Glenn Bercede, IBP-Cebu city president Regal Oliva, aktor Daniel Matsunaga ug French Consul Michel Lhuillier. Ang selebrasyon gihimo sa private garden sa 350-hectare property ni Senyorito Michel sa Talamban niadtong Marso 25. Nag-angat usab niadto ang Mahal nga Adlaw dihang gibendisyonan ug gibuksan ang opisina sa M-Talent sa Ibabao, Mandaue city niadtong Marso 25, 2012 nga gitambungan sa mga sikat sa showbiz sama nilang Coco Martin, Valerie Concepcion, Bugoy Drilon, Liezl Garcia ug Daniel Padilla. "My room is full of saints," paambit ni Aida "Angging" Patana, ang CEO, president ug managing director sa M-Talent, kon nganong atol ni nga nag-angat ang Semana Santa. Kini dungan sa pagpakita sa Superbalita Laysho sa iyang lawak nga napuno sa mga rebulto sa mga santos nga tipik sa iyang debosyon. Si Patana 17 katuig na nga single mom sa iyang lima ka mga anak ug duna na sad siyay mga apo. Ang M-Talent ang nagpaluyo niadto sa mga dagkong concert sa Sugbo sama nilang David Pomeranz, Patti Austin, Bamboo, Parokya ni Edgar ug daghan pa kaayo. Sila ang labing unang pageant organizer nga nihatag og P1 million nga premyo atol sa ilang Miss M-Talent nga gipahigayon sa Waterfront Cebu City Hotel and Casino niadtong 2019. Naila usab ni sa pagkamatinabangon labi na kon dunay mga kalamidad labi na pagsugod sa Covid-19 diin nanghatag sila og kuwarta atol sa The Aida Patana Show sa online. Taliwa sa nasinati karong pandemya, ang M-Talent padayong nihimo og kasaysayan human nakadawat og suporta ang ilang unang isyu sa Socialite Magazine gikan sa mga inilang personalidad sama nilang Manila city Mayor Isko Moreno, Ms. Jinkee Pacquiao ug brodkaster Erwin Tulfo. Sa kadako sa ilang pagsalig sa M-Talent, si Patana ang gitudlo karon isip lider sa women's sector sa "Manny Pacquiao for President Movement" ug isip exclusive distributor sa mga souvenir item sa Malakanyang. Si Patana usab ang pambato sa Pilipinas sa umaabot nga Mrs. Universe 2021 ug Mrs. Tourism Ambassador 2021. Layo na gyud og naabtan ang kanhi probinsyana sa Ozamiz city nga nidayo lang sa Sugbo niadtong 1992 tungod sa kawad-on ug way bisan unsang koneksyon apan karon tan-awa! Wa gyuy imposible basta magkugi lang ug mosalig nga dunay Dios nga Makagagahum sa tanan. Aida "Angging" Patana, Ssssuper Ka! Ngano nakasud man ka sa Malakanyang? Nagsugod to pag-courtesy call nako after I won as Mrs. Philippines World 2019 first runner-up. And you know me, I'm very friendly. I met one of the staff who works there for 25 years nga maoy nitabang nako. Kanus-a ka sunod mo-compete? My two international pageants have been moved because of this pandemic. Mrs. Tourism Ambassador 2021 sa July na sa Malaysia. Ang Mrs. Universe 2021 sa November sa Korea. How did you meet Jinkee Pacquiao? Suod nako ang usa sa iyang mga designer. Ako siyang gikuhang cover sa Philippine Socialite Magazine ug nisugot dayon siya. Buotan kaayo. I met her 4 times na. Nakaadto na ko sa ilang balay sa GenSan. Senator Manny has also been very supportive like sa akong celebrity run in 2017 during our 5th anniversary. Tinuod molansar ka sunod tuig? Dunay mga offer kay fit daw sa akong personality. I love to serve people and I'm happy that Senyorito Michel is going to support me if ever. But sa pagkakaron sayo pa kaayo para estoryahan. My focus now is my upcoming pageant. Unsa man gyud ang "M" sa M-Talent? "M" stands for "Michel," who has been my mentor and my good friend for 13 years now. We are blessed to have him kay grabe kabuotan ug ka-humble. I named it after him as a show of appreciation. Ngano nagkaila man sad mo ni Mayor Isko? Amo siyang gikuhang endorser sa Michel's water products. Pero wala madayon ang among contract signing kay mao toy pag-start sa pandemic. Unsay pinakadakong project sa M-Talent? Para nako ang tanan nakong projects. I'm so honored and flattered that all our clients trusted us kay mangunay jud ko. Kana akong office sa Mandaue 20 years na na kay wala pay M-Talent namaligya nako maski unsa para mabuhi lang akong mga anak. Salamat sa Dios kay wa gyud ko niya pasagdi. Praise the Lord. This posting includes an audio/video/photo media file: Download Now

Sugilanon: Ganti sa paghulat Posted: 31 Mar 2021 06:48 AM PDT LAMBERTO G. CEBALLOS Ilaya, Cawayan, Dalaguete, Cebu Gilantaw ni Aurora ang lantap nga lawod sa halayong unahan. Lantong ang dagat ug hinay da ang dagan sa mga balod paingon sa baybayon diin sila mangapusgay ngadto sa mga gagmayng alon kon mahidasmag na sa naglaray nga mga bato. Usa ka tuig na kapin nga kada sayo sa buntag moanhi siya sa baybayon aron lantawon ang lawod, namasin nga makita ang sakayan ni Arturo nga nagpadulong sa baybayon sa ilang balangay sa Urok. Kanunay may manaligdig nga mga luha sa iyang kaapingan samtang maglingkod sa dakong bato ilawom sa punoan sa pagatpat ug nagpaabot sa pagbalik ni Arturo, iyang bana, nga naabtan og dakong unos sa lawod samtang nanagat, ug wala na kini mahiuli sa ila. May misangpit kaniya. "Tapusa na kanang imong pagpaabot kang Arturo, anak," matod ni tatay niya Takyo. "Kon wa siya tukba og iho, nalumos siya ug gipadpad sa isla sa Kaway nga patay na." "Apan, Tay, nagtuo kong mobalik siya sakay sa iyang sakayan," ni Aurora nga mibakho. "Nakit-an man ang iyang sakayan sa baybayon sa isla sa Kaway nga gusbat na og kasko ug guba na ang mga tarik. Busa, anak, hinugay na sa imong kaguol ug atubanga ang kamatuoran nga patay na si Arturo. Tala na, pauli na ta aron mamahaw," agda ni Takyo. Pagka sunod adlaw, kilumkilom na apan miadto si Aurora sa baybayon aron paglantaw sa lawod. "Arturo, mahal ko, pauli na. Padayunon ta ang atong pangandoy nga maghimong usa ka malipayong pamilya uban sa atong mga anak samtang buhi pa kita," hagawhaw ni Aurora. Unya sa kalit mihuros ang bugnaw nga hangin gikan sa lawod. Kalit midugdog nga ginuntan sa kilat. Ug mibunok ang kusog nga ulan. May unos sa lawod. "Anak, nabati ko sa radyo nga may nagsingabot nga bagyo. Moigo kini ning atong probinsiya. Pauli na!" matod ni Takyo nga nagkawo og takukong (lapad nga kalo nga hinimo sa uway ug dahon sa buli). Gitunol niya kang Aurora ang dala nga payong. Duol ra sa baybayon ang ilang balay. Paghiabot nila didto nag-ilis si Aurora og uga nga sinina. Unya nag-andam siya sa ilang panihapon. Ug dihang namahuway na sila sa ilang tagsa ka lawak nabati ni Aurora ang kusog nga hangin nga mihasmag sa ilang balay. Daw pagahikit-an niya ang sakayan ni Arturo nga gikusokuso sa hangin ug gihapak sa mga balod. Ug si Arturo intawon nangarisgar nga mikapyot sa iyang sakayan. Nianang pagka buntag milurang ang bagyo. Bisan bugnaw pa kaayo ang palibot tungod sa padayong paghuros sa hangin miadto na pod si Aurora sa baybayon. Paghiabot niya sa dakong bato ilawom sa pagatpat may nakit-an siyang usa ka tawo nga nagbuy-od sa baybayon. 'Si Arturo!' matod niya nga daw gidagaw, 'miuli na si Arturo!' Dali niyang giduol ang tawo nga nag-ubo sa baybayon. Giwaling niya ang lawas. Gidaitol niya ang iyang dunggan sa dughan sa tawo. Nagpitik pa ang kasingkasing. Dali siyang mibalik sa ilang balay ug gisultian si tatay niya bahin sa tawo. Gidala nila ang tawo sa ilang balay ug giilisan og uga nga mga sapot ug gipakaon. Nagpaila ang tawo nga siya si Armando, mananagat nga taga isla sa Kaway. Naatlan siya sa bagyo nianang miaging gabii samtang namasol. Maayo gani nakakapyot siya sa iyang sakayan. Apan kaganinang kaadlawon nahutdan siyag kusog ug gianod sa mga balod sa baybayon sa Urok. Gisaysayan pod ni Aurora si Armando bahin kang Arturo. Matod ni Armando nga may gidagsa nga tawo sa ilang isla tuig na kapin, apan duha na ka adlaw nga patay na kini ug gipalubong na lang sa kapitan sa barangay sa sam-ang sa isla. Paglabay sa usa ka bulan nahibaw-an ni Aurora nga ulitawo pa si Armando nga nagpabilin sa Urok. Nanagat kini inig kaadlawon ginamit ang mga himan ni Arturo sa panagat, lakip na ang sakayan ni Takyo. Inigka buntag mosugat si Aurora kaniya nga magbitbit og balde aron sudlan sa kuha niyang mga isda. Hangtod nagkasuod ang ilang mga kasingkasing. Wala na mopauli si Armando sa isla sa Kaway. Nagpabilin siya sa Urok ug gipakaslan si Aurora. Sa iyang bahin, nagpasalamat si Aurora sa Ginuo, kay gigantihan sa langit ang iyang paghulat kang Arturo. (KATAPUSAN) This posting includes an audio/video/photo media file: Download Now

Balak: Sultihi ko sa imong kamingaw Posted: 31 Mar 2021 06:48 AM PDT CARMELO D. LARIOSA Panadtaran, San Fernando, Cebu Dili ikalimod nga nanghuwam kag awit Sa imong pag-inusara sa takna sa kagabhion. Dili ikalimod nga ang sonata nakigduhawit Sa daghong sa mga balod sa baybayon. Hain man diay ang kiaykiay sa mga lusay Nga nailo sa mga gapnod nga naglaylay? Nasayod ko nga puti pa gihapon ang bunbon Nagpaabot sa atong mga tunob sa baybayon. Sultihi ko sa gilapdon sa imong kamingaw. Ang kamingaw dili luoran dili sama sa gitara Ning akong dughan nga nabugtoag kuwerdas Human sa daghang pagtuaw nga gitadlas. Apan may mga tigmo ang atong mga tunob Diha sa daplin sa baybayon sa kagahapon Nga angay tubagon inigkalaya sa panahon Bisag papason sa mga dapya sa mga balod. Dili ikalimod nga sa imo karong kamingaw May balak nga matagik aron ihalad sa gugma Sa kasingkasing nga dugay nang nagsubo Kay inayran sa gugma nga salingkapaw. This posting includes an audio/video/photo media file: Download Now

Balak: Pagbating daw puthaw Posted: 31 Mar 2021 06:46 AM PDT ALCEA MANINGO Cangyan, Carmen, Cebu Dihang kita nagkahigugmaay Misanag ang akong kalibutan Abi kog kitang duha motunhay Apan nausab imong balatian. Miingon ka kaniadto kanako Ang gugma mo way kausaban Mituo ko sa mga pulong mo Apan imo diayng gibiyaan. Wa ka lang baya masayod Sa gabii di ko makatulog Wa koy ganang mokaon Nga ikaw ang nakaingon. Kon sugo man sa akong palad Nga mahigugma ko pag-usab Unta siya dili pareha nimo Nga may dughang garbuso. Kon hain ka na man karon Unta nako ikaw mahinumdom Aron ang higayon mopukaw Sa pagbati mong daw puthaw. This posting includes an audio/video/photo media file: Download Now

Pacquiao-Crawford 95% nga madayon Posted: 31 Mar 2021 06:46 AM PDT Hangtod ning puntoha, wala pa'y tino kon kinsa ang sunod nga makontra ni Filipino boxing icon Manny Pacquiao apan ning bag-uhay lang, gitaho sa The Athletic nga ninghayag na ang negusasyon kabahin sa giplanong away tali sa Pambansang Kamao ng Pilipinas ug American Terrence Crawford. Usa ka tinubdan sa The Athletic ang mibutyag nga giplanong ipahigayon ang away karong Hunyo 5, 2021 sa Dubai. Dili kini maoy labing unang higayon nga napublikar ang kabahin sa negusasyon sa panagharong nila ni Pacquiao ug Crawford. Si Crawford, kinsa maoy World Boxing Organization (WBO) welterweight champion, nakasugat og mga pagsaway nga wala pa kini nakaharong og dekalidad nga kontra. Gumikan niini, nagtinguha kini nga makig-away kang Pacquiao, kinsa usa sa labing taas og kalidad nga boksidor sa tibuok kalibutan. Si Crawford nagtinguha nga mobiya sa iyang promoter nga si Top Rank boss Bob Arum gumikan kay wala kini nakahatag kaniya og away batok sa taas og kalibre nga boksidor sama ni Pacquiao. Gipasabot ni Arum, kinsa kanhi promoter ni Pacquiao, nga gihikay na niya ang panagharong nila ni Pacquiao ug Crawford sa sayo pa apan wala molampos ang negusasyon. "The money was there. It had been committed. It was a fight that was going to take place in a country in the Mid-East (Qatar). And then the Minister of Health in that country said 'you can't do it,' because I can't guarantee that we'll allow spectators," matod ni Arum nga napatik sa www.philboxing.com. Ning bag-uhay lang, gilab-as og balik ni Arum ang negusasyon kabahin sa away. Matod pa nga niuyon na ang fighting senator sa Pilipinas sa ganti nga $23.5 million aron makig-away siya kang Crawford, kinsa gituohang modawat og ganti nga two-thirds sa kantidad sa premyo ni Pacquiao. "I already said who I want {next}. I want Pacquiao," batbat ni Crawford, kinsa modawat sa labing dako niyang ganti kon madayon ang iyang gitinguhang away. "I want to revisit that fight. That was a fight that should've happened right now. But being that the pandemic happened, and they weren't going to allow fans in the Middle East, they had to put a hold to that. Everything was 95 percent done. We had a venue. The money was almost there. It wasn't quite there. That was the only thing we were waiting on." (ESL) This posting includes an audio/video/photo media file: Download Now

You are subscribed to email updates from https://www.sunstar.com.ph/. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States