https://www.sunstar.com.ph/

---

• Gapista sa fries, milk tea sa mayor
• Collector gamotor, natumba, naligsan
• Editoryal: Kaugmaon sa mamumuo
• Binghay: Way personalan
• Albor: Singot sa mamumuo
• Tambagi ko, Noy Kulas: Kustomer diay
• Pelikula ni Claudine i-shoot sa Cebu
• Dugang 10K ka bakuna sa Covid moabot
• Cebu City gidayeg sa DILG sa pagsanta sa Covid
• Mga pulis gipasidunggan sa LTO
• Police station sa Danao giinagurahan
• Sinas moretiro sa Mayo 8
• Pork sisig

Gapista sa fries, milk tea sa mayor Posted: 30 Apr 2021 06:37 AM PDT INGON sa nagpista ang buhatan ni Consolacion Mayor Joannes Alegado dihang gideliver ang daghang milk tea ug french fries nga tanan balor og P5,000 niadtong Martes, Abril 27, 2021. Nahibung si Alegado nga dunay gi-deliver sa iyang buhatan bisan wa siya mag-order. Mao diay, ang babaye nga nihatod nailad sa nagpatuo nga mayor ug nagpa-load pa og P5,000. Busa, si Alegado nipahimangno sa iyang mga konstituwente ug uban pang manindahay nga magmatngon sa mga mangingilad nga mogamit og ngan sa mga opisyal sa kagamhanan. Subay sa taho sa lokal nga kagamhanan, nahingangha si Alegado human gi-deliver sa iyang opisina ang 60 ka mga Milk Tea nga nagkantidad og P99 matag usa. Duna usay 20 ka putos sa french fries nga tag P50 matag usa ingon man load nga P5,000 diin sa kinatibuk-an di mo menos sa P10,000 ang mabayran. Gisaysay sa mayor pinaagi sa social media page sa lungsod, nga dunay usa ka tindera nga nag-deliver sa mga order sanglit ngan sa mayor ang gigamit pinaagi sa tawag. "Sumala ni Chloe (tinuod ng ngalan gipugngan), nitawag kaniya ang nagpaila nga si Mayor Joannes Alegado ug magpaload unta og P12,000 sa usa ka network ug laing P15,000 sa lain usab nga network ug mipasalig nga bayaran kuno sa LGU," asoy sa FB page. Nibalibad sa unang higayon ang biktima tungod kay dako ra ang kantidad sa iyang buot ipa-load. Apan tungod kay mayor ang gusto nga magpaload, niuyon siya nga mo load og P5,000. Una na nga nanawagan si Alegado sa Abril 27 nga i-verify ang tanan nga buot nga mo transact o mopalit sa tinda. "Ayaw gyud intawn mo palingla o padala niining mga salbahis.... warning gayud kung naay mag pa load ug mag order ninyo og dagko nga kantidad. Ayaw dayon mo og tuo. Kon posible please double check or verify," matod ni Alegado pinaagi sa Facebook post niini. Tungod niini, gipa-blotter ni Alegado sa kapulisan ang hitabo ug nimando sa kapulisan nga imbestigaran ang lain pang mga kaso sa pagpangilad sa lungsod. Kay naluoy si Alegado sa tindera, ang tanang milk tea ug fries iyang gipalit ug gipang-apod sa mga kawani. Apan ang load nga P5,000 wa niya bayri kay wa man kini moabot kaniya. Ang hepe sa Consolacion Police Station nga si Police Major Verniño Noserale nipadayag nga mangayo sila og abag sa Cybercrime Unit sa kapulisan aron ilang masubay ang maong mangingilad. "SOP jud ang pag verify sa identity ug authenticity sa ga-order pinaagi sa pangutana ug mga clarificatory questions sa caller or ug mahimo e-tawag dayun sa office sa nagpa-ilang official," sulti ni Noserale base sa Facebook page sa lungsod. This posting includes an audio/video/photo media file: Download Now

Collector gamotor, natumba, naligsan Posted: 30 Apr 2021 06:37 AM PDT USA ka collector namatay human nalatayan sa 10-wheeler truck sa may dan Hernan Cortes St., Barangay Tipolo, Mandaue City alas 9:26 sa buntag sa Biyernes, Abril 30, 2021. Gibasol ang wa pa mahuman nga imburnal sa aksidente nga nakapatay ni Dario Quiño, 50, taga Purok 5, Barangay Cubacub, Mandaue City. Samtang, giila ang driver sa 10-wheeler truck nga si Rogelio Latinig, 45, taga Sitio Riverside, Barangay Canduman, Mandaue City. Sigon ni Police Staff Sergeant Maximo Moneva, imbestigador, nga sa ilang inisyal nga imbestigasyon, ang motorsiklo ug truck nagsubay sa may dan Hernan Cortes paingon sa Barangay Banilad. Si Quiño anaa sa outer lane ug sa wala nga bahin ni Latinig. Matod ni Moneva nga hinay ra og padagan si Quiño ug Latinig. Gituohang samtang nagdagan ang duha, ni-brake si Quiño tungod kay adunay imburnal nga wa pa nahuman og construct sa daplin sa dan. Tungod kay bason ang dalan, nalamba siya hinungdan nga napasok siya ilawom sa 10-wheeler truck samtang iyang motorsiklo natumba sa kilid sa imburnal. Sa pakighinabi sa Superbalita Cebu kang Mark Letardo, usa sa mga nakasaksi sa panghitabo, sigon niya nga nag-una siya ni Quiño tungod kay paingon siya mo left turn. Samtang nagpaabot nga malibre ang pikas lane, nakita ni Letrado nga ni-overtake si Quiño ug nasabod ang iyang side mirror sa truck hinungdan nga wa na nakabalanse ug natumba kini sa ilawom sa truck og nalatayan sa katapusan nga ligid. Matod niya nga nakadungog sila nga adunay nagupok. Nangayo og pasaylo sa pamilya ni Quiño si Latinig tungod kay wa niya kini natuyo ug disgrasya lang ang nahitabo. Matod sa pag-umangkon ni Quiño nga si John Lee Luseño, nga nilabay lang siya sa lugar. Siya nahibulong nga nakaila siya sa motorsiklo nga natumba ug didto niya nakit-an iyang uyoan nga nagkulob na sa dalan. Sigon niya nga pag-abot sa ambulansyam paghikap sa responders ni Quiño, niagulo pa kini. (KFD) This posting includes an audio/video/photo media file: Download Now

Editoryal: Kaugmaon sa mamumuo Posted: 30 Apr 2021 05:57 AM PDT Karon, Mayo 1, gisaulog sa tibuok kalibotan ang Adlaw sa mga Mamumuo o Labor Day. Sa pagbalik-lantaw, niadtong Abril 8, 1908, ang Philippine Assembly nipalabang og balaud nga naghimo sa unang adlaw sa Mayo nga national holiday alang sa mga mamumuo. Duha ka rason kon nganong makahuluganon ug importante karong adlawa sa pulitikanhon ug relihiyusong bahin sa kasaulogan. Sa pulitika, kini nga petsa sa tuig nagsugod ang pwersa sa mamamumuo nga nakigbisog sa ilang katungod didto sa Uropa o proletariat nga pakigbisog. Isip relihiyuso, kini ang kapistahan sa patron sa mga mamumuo nga si St. Joseph the Worker. Ang mga mamumuo labing importante nga pwersa sa kalamboan. Ang huyang nga sektor sa pamuo timaan sa kakabus sa dapit. Bisan ning modernong panahon, ang mga virtual assistant o robotics di makahulip sa kalantip sa hunahuna sa matuod nga tawo. Ang mga mamumuo labing importanteng bahandi sa kompaniya, dili ang kuwarta. Apan subo nga pamalandungon nga dunay daghang kompaniya o establisemento ang miabuso sa mamumuo pinaagi sa ubos nga suweldo, way insaktong benepisyo ug dili maayo ang kalidad sa panarbaho o risgo. Gawas pa, dunay grupo nga nigamit sa mamumuo alang sa ilang pag-abante sa kaugalingong interes sa pulitika o idolohiya. Ug ning panahon sa pandemiya sa Covid-19, ang sektor sa pamuo maoy labing apektado sa pagpanaktak og trabaho o pagsira sa mga kompaniya. Daghang nawad-an og trabaho. Dunay hinabang ang kagamhanan apan dili igo ug dili makalahutay. Mas migrabe ang ilang kalisdanan. Unsay pandulngan sa mga mamumuo nga Pinoy? Dili nato matino. Apan daghang nanimpalad sa gawas sa nasod nga mokita taliwala sa kamingaw ug kahingawa. Dili na lang mobasol kang bisan kinsa gawas sa paghangad sa panabang ni St. Joseph the Worker. This posting includes an audio/video/photo media file: Download Now

Binghay: Way personalan Posted: 30 Apr 2021 05:57 AM PDT Daghan ang mi-react ug giganahan sa gihisgutang lindog niadtong niaging Sabado maong akong pun-an ug sumpayan paghisgot ang mga ginadili kon mogamit sa mga social media sama sa Facebook (FB), Twitter ug Instagram. Diay dugang nga mga maayong pamatasan kun etiquette kon mag-gamit ini: Way personalan. Ayaw dibdiba o ka konsinsya, kasuko o huna-huna og dautan kon dunay mabasahan nga sukwahi sa imong pagtuo o prinsipyo labi na kon di ka segurado nga ikaw maoy gitumbok ini kay abi pa lang nahangan ka, gawas kon kini tinuyo o gidiretso paghisgot og hugaw-hugaw ang imong ngalan ug pagkatawo. Kining ingon ani nga panaot o pakauwaw mahimong magamit nga ebidensiya batok sa nag-post kay gisibya o gimantala man kini sa kahanginan (online) unya mabasahan sa kadaghanan bisag asang su-ok sa kalibutan. Ayaw pagsegi og padala o forward anang mga chain letters sa inbox o messenger. Ayaw sab pagbuot-buot og "add" sa imong higala sa group account kon way pagtugot sa tagtungod. Og naay mangimbitar unya makig-amigo nimo, ayaw dayon dawata kon di nimo kini masusi labi na kon di familiar kay daghan kaayong mga mangingilad nga nag-atang lang kon kanus-a ka nila masud sa ilang bulsa. Daghan na kong mga higala nga nabiktima ini. Gani ang uban nailad ug nakawatan og dako-dako nga kantidad. Kon wala sa picture, ayaw pataka og tag. Ang uban mang-tag og tuyo para mangintriga ug magpasuya. Ayaw iladlad ug isiyagit imong mga personal nga problema ug kasuko sa social media kay di kini makatabang nimo. Mosamot hinuon kay daghan namang mangumentaryo ug mohuwis sa imong pagkatawo. Ayaw sab kaayo pasubrahi ang pag-share sa imong personal nga mga bahandi, kalihukan, awards o detalye sa imong pagkatawo kay maka-irita kini sa makabasa. Ang mahitabo, i-unfollow, i-unfriend o i-block na hinuon ka. Katapusan, ayaw pakiluoy og hangyo og suporta aron lang modaghan ang imong followers. Hinuon, ninduta imong mga ipang-post aron daghan ang ganahan ug mosunod nimo. This posting includes an audio/video/photo media file: Download Now

Albor: Singot sa mamumuo Posted: 30 Apr 2021 05:57 AM PDT Umento nga P18 pesos sa suholan gipatuman sa miaging tuig sa Regional Tripartite Wages and Productivity Board (RTWPB) nga gipangulohan sa Department of Labor and Employment (DOLE). Nahimo nang P404 ang minimum nga suholan matag adlaw sa Class A cities ug municipalities. Ang usbaw nga P18 gamay ra kaayo itandi sa petisyon nga gipangayo sa Cebu Labor Coalition, ALU-TUCP ug militanting pundok. Mata-pobre kadtong pamahayag sa National Economic Development Authority (NEDA) nga mabuhi sa P10,000 matag bulan ang pamilya nga dunay lima ka mga sakop kay P4,500 magasto sa bugas lamang, way labot sa sud-an, abangan, pagtungha, pletihan, kuryente ug tubig. Himaya sa mga mamumuo ang Tax Reform for Acceleration and Inclusion (TRAIN) Law (RA 10967) nga dili kuhaan og income tax ang sweldo, bonus ug ubang benipisyo. Himaya sab ang mando ni Presidente Rodrigo Duterte nga magpapas sa Contractualization Law. Hinuon, i-regulate kay dunay matang sa trabaho nga ikontrata maong gusto sa Presidente nga ipabisita ang labor-contracting-only pagbalansi sa interes sa mamumuo ug kompaniya. Kalbaryo ang kontraktwalisasyon. Makalihay ang kompaniya sa SSS, Pag-ibig, Philhealth, 13th month ug bonus. Presidential Decree 851 ni Pres. Ferdinand Marcos sa 1975 mandatory ang 13th month pay. Bisan ang empliyado nga gi-terminate makadawat gihapon. Ang bonus agad sa kasingkasing sa employer. Sa balaod, ang papahawaon magbayad ang kompaniya. Ang moluwat sa trabaho way madawat agad og dunay ipabalon. Pipila ka employer nahisama sa alimatok nga kusog mosupsop sa kabudlay sa mga anak sa singot. Dili magmalinawon ang industriya kon ang kompaniya dili mosabot sa pinitik sa pulso ug dili makatugkad sa lupad sa mga trabahante. Katabang sa panimalay magdawat og P2,500-P3,000 matag bulan, dunay SSS, Pag-ibig ug Philhealth ubos sa Kasambahay Law. Sa gobyerno gipatuman ang national minimum wage subay sa Salary Standardization Law sa 1.4M ka mga kawani ug opisyal. Usbaw sugod sa 2020 sa upat ka sunod-sunod nga tuig. Makadawat og midyear bonus, anniversary bonus, 13th month pay, collective negotiation agreement, service recognition incentive ug productivity enhancement incentive. Maong daghang nangandoy nga makatrabaho sa gobyerno. Kon wala ang mga mamumuo patay ang ekonomiya. (csa_1156@yahoo.com/09064648954) This posting includes an audio/video/photo media file: Download Now

Tambagi ko, Noy Kulas: Kustomer diay Posted: 30 Apr 2021 05:35 AM PDT Dear Noy kulas, Tawga lang ko sa ngan nga Mona. College level ra ko kay wa ko makahuman kay naglisod og support ang akong parents. Aron ko mabuhi, nisulod ko pagka GRO ug dinhi nako na meet ang akong husband karon. Iya unta kong gastuhan sa akong studies human siya makahibawo nga academically maayo ko. Dagko ko og grado ug naka deans list gani ko. Pero kapuyan na man ko mobalik og eskwela kay six years na kong naundang. Pila ra may estorya, nagminyo nga wa kahibawo ang iyang parents sa akong background. Housewife ra ko kay ganahan ko mag-atiman sa mga bata nga hands on. Karon nga pandemic, naay nasuroy sa amoa nga kauban sa akong bana nga iyang gipa-stay sa balay. Ang nakalain kay ako ning kustomer kaniadto ug dunay nahitabo namo twice. Karon, gusto unta siyang mohilabot nako but ni-resist ko. Wa na tuod siya magpuyo sa amoa, but nagsige siya og text ug chat nako nanghangyo. Maayo kaha ako siyang isumbong sa akong bana? Di kaha mag-away na hinuon sila? Unsa kahay maayo? MONA Mon, Sultihi ang imong bana parte sa iyang kauban nga duna moy kagahapon. Kana kay nakigminyo siya nimo, makasabot ra siya. Kay daghan baya sa GRO duna gyuy sexual nga kasinatian kay mao na man na ang sagad gusto sa mga nagdumala og bar. Apan ayaw tug-ani ang imong bana nga nanghagad ang imong amigo og sex aron di sila mag-away. Ingna lang nga ayaw na paanhaa sa inyong balay ug likayan nga makighigala na niini aron hingpit kang makalikay. Pag-ilis og numero ug I block aron di na ka masamok. Pag-ampo sab nga di modako ang imong problema. NOY KULAS e-mail: rojval69@yahoo.com This posting includes an audio/video/photo media file: Download Now

Pelikula ni Claudine i-shoot sa Cebu Posted: 30 Apr 2021 05:35 AM PDT Manila--Adunay online show ang nagbalita nga gipadaplin una ang comeback movie ni Claudine Barretto nga ang mag-produce mao ang Borrachio Films ni Atty. Ferdie Topacio. Apan fake news ang maong tsismis tungod kay plantsado na ang proyekto, kumpleto na ang script, actors ang director down to utilities og mas dako ang tsansa nga madayon kini tungod kay may mga mi-kurambus pa para madayon ang proyekto og ka tie up pa ang Viva Films. Pinaagi sa Facebook ni Anne Venancio, official PR sa Borrachio Films, nakita ko nga nag-live siya sa gipahigayong presscon ni Claudine Barretto sa opisina sa Erase Plancenta ni Louie Gamboa nga usa sa mga co-producers. Apil as co-producers mao ang negosyanteng si Richard Chuateco ug si Aida Patana. NOT INVITED Wala akong masuwat about Aida Patana tungod kay wala ako sa maong presscon basta ang alam ko lang usa siya sa mga producers. Pipila ka higayon nang nagpa-presscon si Aida sa Manila ilabi na sa pagsalmot niya sa mga pageant for married women pero never akong naimbitahan so bisan og nasayod akong Sugbuanon siya ug mahal ko ang mga Cebuano personalities and celebrities, pero never ko pa siyang nasuwat dinhi sa kulom ko sa Super B tungod kay unsay akong isuwat, wala ako sa mga napatawag niya, di ko siya na-interview. Basta ang giingon sa ako ni Anne, sa Cebu i-shoot ang pelikula nga of course initiative siguro ni Aida pero unta nasa presscon ako para may dugang detalye. MADAYON Diosko, may pa pa-andar pa ang mga kritiko nga si Claudine galit kuno kay Atty. Topacio pero aniay, naka-umang na diay ang project ug nag-agad na lang jud sila sa panahon nga unta padayon na sa pag-luag para puwede nang makapag-shooting sa Cebu. May title na ang pelikula ni Claudine pero ayaw pa nilang ipasulat ug posibleng ilisdan pa kini. Ang sure nga maka-uban ni Claudine sa pelikula mao sila si Gerald Santos ug Congressman Alfred Vargas. This posting includes an audio/video/photo media file: Download Now

Dugang 10K ka bakuna sa Covid moabot Posted: 30 Apr 2021 05:34 AM PDT KAPIN o kulang 10,000 ka doses sa Coronavac nga gama sa Sinovac madawat sa Cebu City gikan sa national government alang sa mga senior citizen sa Dakbayan sa Sugbo. Kini ang gipahibawo ni Bise Mayor Michael Rama, lead convenor sa Vaccine Advisory Board, kansang impormasyon iyang nakuha gikan kang Regional Director Jaime Bernadas sa Department of Health (DOH)-7. Si Rama nagkanayon nga inig balik sa pagpamakuna sugod sunod semana, gawas sa senior citizens, apil na usab sa ilang schedule ang mga individual nga adunay gihambin nga balatian aron sila malikay sa virus. Si Mayor Edgardo Labella una nang nipadayag nga nakighinabi siya kang Secretary Carlito Galvez, vaccine czar sa national government, niingon nga nangayo na siya og dugang doses sa bakuna alang sa katawhan sa siyudad. Ang mayor nangayo gumikan usab sa nagkadaghang senior citizens nga gustong magpabakuna base sa registration sa Cebu City Health Department. Si Dr. Jeffrey Ibones, pangulo sa Cebu City Health Department (CCHD), nagkanayon nga inig abot sa maong mga bakuna sa ilang kustodiya, i-schedule gilayon nila ang pagbalik sa vaccination ngadto sa mga senior citizen ug persons with commorbidities. Sa talaan sa CCHD, dili na mominos sa 20,000 ka mga lolo ug lola ang gustong magpabakuna, apan 4,600 pa ang ilang nahatagan og first dose, way labot sa libuan na ka mga medical frontliner nga maoy anaa sa tier 1 sa prioritization sa gobyerno. Ang Cebu City dili maglisod sa ilang vaccine rollout sanglit adunay hamugaway nga mga lugar diin magpabakuna ang katawhan. Kini naglakip sa Robinsons Galleria, University of Cebu (UC) Banilad campus, SM Seaside City ug ablihan sunod semana ang SM City Cebu. Nahunong ang pagpamakuna kay nahurot ang doses nga gitagana sa Cebu City. This posting includes an audio/video/photo media file: Download Now

Cebu City gidayeg sa DILG sa pagsanta sa Covid Posted: 30 Apr 2021 04:27 AM PDT Gidayeg sa Department of the Interior and Local Government (DILG) ang Cebu City Government sa maayo niini nga pagdumala sa pagpakigbatok sa coronavirus disease (Covid-19). Si Secretary Eduardo Año, sa DILG nipadala og suwat ngadto kang Mayor Edgardo Labella aron pormal nga ipaabot ang ilang komendasyon sa dakbayan nga usa ka higayon niana, nahimong sentro sa Covid-19 ang Cebu City. "With your leadership and through the help of the national government , Cebu City was able to mitigate the spread of the disease by restructuring the City's Emergency Operation sCenter ( EOC) ang implementing a centralized , coordinated, collaborated, synchronized and harmonized Covid-19 response strategy," padayag ni Año. Ang komendasyon sa kalihim sa DILG nagagumikan sa padayon nga pagkunhod sa aktibong mga kaso sa dakbayan sa Covid-19 gikan sa kapin sa 3,500 ka aktibong kaso niadtong Pebrero, karon aduna na lay 606 ka active cases nga padayong nagpaalim sa mga hospital, quarantine centers, barangay isolation centers (BIC) ug mga hospital. Si Labella, sa iyang bahin, wala nihakop sa kredito, inay iyang gipasalamatan ang mga tawo nga responsable sa pagkakontrolar sa pagkatap sa Covid-19 sa dakbayan. "My gratitude goes to the hardworking fellows in EOC and my fellow workers in government.Mapasalamaton sab ko especially sa atong mga frontliner ug Sugbuanon nga dako sab og natabang sa atong local Covid-19 response strategy, sama sa pagpatuman sa health protocols ug pagsunod sa directive sa EOC," ni Labella pa. Si Año nipadayag sa iyang suwat nga angay ipadayon sa Cebu City ang mga maayong gibuhat batok sa virus. "May it also continue to improve its operation and lend assistance to other local governments that need additional knowledge and ss in restructuring its onw EOC," dugang ni Año. This posting includes an audio/video/photo media file: Download Now

Mga pulis gipasidunggan sa LTO Posted: 30 Apr 2021 04:27 AM PDT ANG Land Transportation Office (LTO) 7 nipasidungog sa mga pulis nga nadestino sa lainlaing estasyon sa habagatang Sugbo nga nakatampo labot sa kaluwasan sa pagmaneho sa kadalanan. Ang Ronda District Office (RDO) nga nagsugod og serbisyo niadtong Nobiyembre 2020 maoy nagpasiugda aron mahatagan og importansiya ang ilang partisipasyon isip kaabag sa ahensiya alang sa implementasyon sa Republic Act 4136 o Land Transportation and Traffic Code. Si LTO 7 Regional Director Victor Caindec maoy nitunol ngadto sa top 3 police stations nga nasakop sa RDO nga gilangkoban sa Alegria Police Station, Ronda Police Station ug Moalboal Police Station niadtong Abril 28. Gawas sa mga estasyon nga gipasidunggan, giapil usab ang mga top performing PNP officers nga gipangulohan ni Police Corporal Marlon Gainsan ug Police Corporal Canesio Amatril Jr. sa Alegria Police Station ug Corporal Bit Voltaire Solima sa Ronda Police Station. Si Caindec nidayeg usab sa gipakitang labok ni Mhike Rollo, pangulo sa RDO, kinsa maoy nag-organize sa kalihukan aron maila ang ilang natampo para matabangan ang LTO. "We understand that we have very limited personnel in the region and our district offices in terms of augmentation for road safety, that is why we are thankful to the PNP for being one of the most active partners of LTO," padayag ni Caindec. Si Rollo, sa iyang bahin, nagkanayon nga gawas sa certificate of recognition, ang mga police station nga gipasidunggan nakadawat og computer set gikan ni Board Member Jerome Librando. Plano ni Rollo nga himuon nilang matag quarter ang kalihukan aron mapasidunggan ang mga tawo nga kanunay naglihok para sa kaayohan sa kadaghanan. Ang RDO adunay 11 ka munisipalidad nga iyang sakop nga gilangkoban sa Barili, Dumanjug, Ronda, Alcantara, Moalboal, Badian, Alegria, Malabuyoc, Ginatilan, Samboan ug Santander. Lakip sa nitambong sa gipahigayon nga kalihukan silang Cebu Provincial Police Office (CPPO), Provincial Director Police Colonel Engelbert Soriano uban ni Ronda Mayor Terrence Blanco. (PAC) This posting includes an audio/video/photo media file: Download Now

Police station sa Danao giinagurahan Posted: 30 Apr 2021 04:27 AM PDT MULTI-million nga balor sa bag-ong building sa Danao City Police Station hingpit nang na turn over sa lokal nga kagamhanan sa Siyudad sa Danao ngadto sa kapulisan. Gisunod dayon ang inagurasyon niini. Nitambong ang labing taas nga opisyal sa kapulisan sa nasud, Police General Debold Sinas, sa turnover ug inagurasyon sa bag-ong natapos nga multi-million peso nga tulo ka andanang building sa Danao City Police Station. Kini na ang labing dako nga police station sa nasud nga gigastohan sa lokal nga kagamhanan nga mobalor og P80 million nga way nagastong pundo ang PNP kay giabaga sa Siyudad ang galastuhan. Gipasalamatan ni Sinas si Mayor Ramonito Durano III sa abag nga gihatag niini sa kapulisan dungan sa awhag nga di magpanuko sa pagsumbong kon aduna siyay mga sakop nga badlungon. Mando niya sa babayeng hepe sa police station, Police Lieutenant Colonel Maria Theresa Macatangay, nga atimanon niini ang tibuok police station. Palamboon usab niya ang kapabilidad sa kapulisan sa Siyudad sa Danao pinaagi sa pagbutang og crime laboratory nga maoy hinungdan nga gidala niya ang usa sa mga opisyal sa Crime Lab sa Kampo Crame. Dugang ni Sinas nga dako ang iyang kalipay nga nahuman na ang mapasigarbo nga police station diin sa dihang siya pa ang director sa Police Regional Office 7, gisugdan ang pagtukod niini. Tungod sa maong kalamboan, makahatag kinig taas nga morale sa kapulisan nga magkugi sa ilang trabaho sanglit nindot man ang ilang police station. "Were happy and hopefully our police could pay back by doing right police work and police duties diri sa Danao City," matod ni Sinas. Kon aduna nay natukod nga labing dako nga police station apan nahulga usab ang buhatan sa Criminal Investigation and Detection Unit 7 ug Highway Patrol Group 7 nga naa nahimutang sa Camp Sotero Cabahug sa dalan Gorordo sa Cebu City. Kini human gibasura sa ni Gobernador Gwendolyn Garcia ang unang kasabutan sa PNP ug sa milabayng administrasyon sa Kapitolyo dihang mibalik kini sa pangatungdanan. Matod ni Sinas ug ni CIDG Director Police Major General Albert Ignatius Ferro nga huwaton una niya ang suwat sa Kapitolyo aron hangyuon nga ipabilin lang sila sa ilang naandan nga buhatan o ba kaha hatagan silag laing luna nga kabalhinan. Matod ni Ferro nga mohangyo sila kang Gobernador Gwendolyn Garcia nga kon mahimo diha lang sila sa ilang naandan nga opisina. Gisugdan na unta sa pag tukod ang building sa HPG nga nahimutang sa camp Sotero Cabahug, apan nauktaba kini tungod sa mando sa gobernador. (AYB) This posting includes an audio/video/photo media file: Download Now

Sinas moretiro sa Mayo 8 Posted: 30 Apr 2021 04:27 AM PDT Si Philippine National Police (PNP) chief General Debold Sinas nilibot sa tanang police regional offices lukop nasud agig panamilit sa di pa siya moretiro sa serbisyo sa Mayo 8, 2021 aron magpasalamat. Usa sa lisod nga mga hagit nga iyang naagian sa iyang karera isip pangulo sa kapulisan sa tibuok nasud ang pag-igo sa coronavirus pandemic. Si Sinas nahimong PNP chief sulod sa unom ka mga buwan. Sakop si Sinas sa Philippine Miltary Academy (PNA) Hinirang class of 1987. Sa dihang nahimo siyang direktor sa kapulisan sa Central Visayas, siya nainila sa tibuok nasud tungod sa iyang pamaagi sa liderato nga miusab sa tradisyonal nga pagpadagan sa usa ka kampo. Sa dihang gipangutana kon hatagan siyag extension ni Presidente Rodrigo Duterte sa pagpangulo sa PNP ug kinsa usab ang posibling sunod nga PNP chief, no comment lang ang iyang tubag. Matod niya bahala na si Duterte nga motudlo kon kinsa sa mga heneral ang sunod nga makupot sa renda sa kapulisan. NGANONG UWAHI Gipili niya nga ang Central Visayas ang kataposan niya nga bisitahon tungod kay dinhi siya nagsugod sa iyang karera pagka regional director sulod sa usa ka tuig ug unom ka buwan. Dinhi usab siya nahimong naila ni Duterte tungod sa bag-ong mga programa nga gipatuman ilabi na usab ang sub-sub nga kampanya batok sa illegal nga drugas ug kriminalidad kay iyang pinangga ang Sugbo. Daghang mga kriminal ang nangamatay, lakip na sa hut-ong sa mga rebeldeng New People's Army (NPA) sa Negros Oriental nga gi reklamo sa mga militante sanglit mga miyembro kini sa progresibong grupo. "Cebu because this is where nagsugod ug na ila-ila ko ni PRRD (Duterte). This is where my concept, my leadership, my style and Voltes 5 were introduced. Different kind of approach pero the same lang man na ba. Akoa lang gibuhatan ug kanang gi-personify lang nako nga naay makita ug naay madunggan ang mga pulis. Diri na una nga gi-practice ug implement nako," matod ni Sinas sa mga tigbalita sa Biyernes, Abril 30, 2021. Atol sa iyang pag balhin sa Metro Manila nahimong kontrobersyal ang paglingkod niya sa National Capital Regional Police Office (NCRPO) dul-an usa ka tuig na ang nakalabay tungod sa isyu sa manyanita taliwala sa pandemic nga miani og halapad nga pag saway. Apan daghan siyag kalampusan nga nahimo, usa na niini ang sub-sub nga kampanya batok sa illegal nga drugas diin binilyon ka pesos nga balor sa gituohang shabu ug ubang matang sa illegal nga drugas ang ilang nasakmit, lakip na ang pagkasikop sa mga top nga most wanted persons sama ni Ruben Ecleo Jr. Dugang ni Sinas nga human sa iyang retirement sa sunod buwan, mopahuway una siya uban sa iyang pamilya ug magpaabot kon unsa man ang sunod niya nga tahas nga himuon sa publiko. (AYB) This posting includes an audio/video/photo media file: Download Now

Pork sisig Posted: 30 Apr 2021 04:21 AM PDT Serves 7 to 8 Mga Sagol: Set A: 1 ka kilo sa aping ug dunggan sa baboy 3 ka mga dahon sa laurel 1 ka kutsarita sa peppercorns 4 ka tasa sa tubig 2 ka kutsara sa asin Set B: 5 ka buok dako nga puwa nga sibuyas bombay, gihiwa 200 gramos sa atay sa manok 4 ka kutsara sa calamansi juice 4 ka kutsara sa soy sauce 1/4 nga kutsarita sa asin 1/4 teaspoon cracked black pepper 7 ka buok sili nga labuyo (red chili pepper), gitagod Set C: 1 ka kutsarang butter, idugang matag serving (optional) Unsaon pag-andam: A. Sa usa ka dako nga kaldero, sagola ang tanang ingredients gikan sa Set A. Pabukala, kuhaa ang molutaw. Pahinayi ang kainit, taboni ug pabukala sulod sa 45 minutos ngadto sa usa ka oras hangtod nga madutlan na ang dunggan sa tinedor. Hauna gikan sa kainit ug i-drain og maayo, iyabo ang liquid. Isagol ang atay sa manok mga tulo ka minutos sa di pa mahuman ang pagluto sa baboy. Ipadaplin. B. Pabugnawa ang baboy, ug tagora ang karne ngadto sa gagmay. Isagol kini sa atay ug Set B ingredients. C. Sa pag-serve, butangi og butter ang sizzling plate ug tasa sa sisig sa ibabaw. This posting includes an audio/video/photo media file: Download Now

You are subscribed to email updates from https://www.sunstar.com.ph/. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States