https://www.sunstar.com.ph/ |
- Nets yanong mibaling sa Celtics sa Game Two; 2-0 na sa serya
- Lakers mitabla sa series, 1-1; mo-host sa Suns sa Game Three
- Clippers giusban sa Mavericks sa Game Two; Dallas 2-0 na sa Western playoffs series
- Wala nga bukton ni VM Alegado nabali
- Pingris moretiro na human sa 16 ka tuig sa PBA
- Editoryal: Pagbakuna sa seniors
- Lonzon: China may gitagoan?
- Diputado: Tigom sa RPOC sa Dumaguete
- Donaire mideklarar sa iyang kaandam batok WBC champ Oubaali
- Talk to Papa Joe: Na-bored
- Vice commander sa NPA-Bohol, tipi
- Double swabbing ipatuman gihapon
| Nets yanong mibaling sa Celtics sa Game Two; 2-0 na sa serya Posted: 26 May 2021 01:10 AM PDT Natupngan ni Joe Harris ang playoff record sa Brooklyn Nets pinaagi sa iyang pito ka tres sa dihang ilang gilubong buhi ang Boston Celtics, 130-108, sa Game Two sa Eastern Conference playoffs, Miyerkules, Mayo 26, 2021. Sa maong kadaugan, si Kevin Durant mitali og 26 nga gidugangan og 25 ni James Harden ug ang Nets mipalig-on sa ilang bintaha sa series, 2-0. Motapon sa The Garden, homecourt sa Boston, ang Game 3 sa Sabado (Biyernes sa Amerika). Si Harris mikadlit og 25 puntos nga maoy iyang career-high. Sama sa Game One, ang Celtics way ikatugbang sa nag-aso-aso nga opensa sa Nets kinsa milupig kanila sa tanang departamento. Si Marcus Smart nangulo sa Boston nga may 19 puntos ug 17 usab ang nahimo ni Kemba Walker. Ang ilang leading scorer nga si Jason Tatum nalimitahan lang ngadto sa nuebe puntos ug igo lang kining nakaduwa og 21 minutos human matusloki ang iyang mata. Sa Game One, ang Nets hinay nga nakasugod ug nagkinahanglan pa og pipila ka minutos nga manginit ang iyang Big Three nga giangkuban nila ni Durant, Harden ug Kyrie Irving. Apan sa Game Two, daw og sa nahukasan ang tulo sa taya sa ilang abilidad aron ilubong ang Celtics. Si Kyrie Irving mipaksit og 15 puntis nga gilamasan og unom ka rebounds ug unom usab ka assists alang sa Nets kinsa sa kinatibuk-an mihipos og 17 ka tres sa usa ka duwa.(JBM)  This posting includes an audio/video/photo media file: Download Now |
| Lakers mitabla sa series, 1-1; mo-host sa Suns sa Game Three Posted: 26 May 2021 12:45 AM PDT Si Anthony Davis mitapi og 34 puntos, Dennis Schroder midugang og 24 aron pangulohan ang Lakers nga matabla ang ilang series ug sa samang higayon makuha ang homecourt advantage, 1-1. Ang tres ni Davis sa katapusang 2:15 segundos nga nahabilin sa duwa naghatag og 98-92 nga labaw sa Lakers nga mao usab ang nakapatay hamubong rally sa Suns. Si LeBron James mitapos sa duwa nga may 23 puntos ug siyam ka assists. Human sa 10-1 nga rally, ang Lakers nakaposte og 63-48 nga bintaha sa pagsugod sa third quarter. Ang tres ni James maoy nakapakomportable sa Los Angeles kinsa perming naglabaw sa kinatibuk-ang duwa. Dihay higayon nga hinayhinayng mikamang ang Suns. Si Cam Johnson mipabuto og duha ka tres sa uwahing bahin sa third quarter lakip ang buzzer-beater nga shot aron sikiton ang score, 79-72. Ang four-point play ni Jae Crowder maoy naghudlat sa Lakers, 84-83, 8:03 ang nahabilin sa fourth quarter ug ang hansak ni Deandre Ayton human sa iyang offensive rebound maoy naghatag sa unang labaw sa Suns, 88-86, sukad pagsugod sa duwa. Apan wa kini makapugong sa dihang nagkumboya i James ug Davis sa himatyong minutos. Si Devin Booker, mipabaha og 31 puntos, si Ayton milanit og 22 ug 10 ka rebounds. Gipahimuslan sa Lakers ang presensiya sa ilawom nila ni Andre Drummon, Davis, James ug Marc Gasol kinsa may gitas-on nga 6'9 o pataas, diin maoy lisod tugbangan sa Suns kinsa nagsalig lang ni Ayton. (JBM)  This posting includes an audio/video/photo media file: Download Now |
| Clippers giusban sa Mavericks sa Game Two; Dallas 2-0 na sa Western playoffs series Posted: 26 May 2021 12:09 AM PDT Giusban sa Dallas Mavericks ang Los Angeles Clippers diha mismo sa ilang korte (Staples Center), 127-121, sa Game Two sa ilang Western Conference best-of-seven playoffs, Miyerkules, Mayo 26, 2021. Sa naandan, ang gitawag og "Wander Boy" maoy mibida sa kadaugan human kini mikutlo og 39 puntos, samtang midugang si Tim Hardaway Jr. og 28 aron sakmiton ang 2-0 nga bintaha sa series. Motapon ang Game Three sa American Airlines Center, korte sa Dallas, sa Lunes (Dominggo sa Amerika). Midugang og 20 puntos si Kristap Porzingis ug 13 ang nahimo ni Maxi Kleber. Si Hardaway nakapugnit og unom ka tres nga maoy iyang career-high samtang laing lima gikan ni Doncic. Ang kadaugan sa Mavs nagbaliwala sa 41 puntos, 30 niini sa first half, ni Kawhi Leonard ug 28 usab ang nahimo ni Paul George nga milangkat usab og 12 ka rebounds. Sa tinguha nga malimitahan, gisentro sa depensa sa Clippers si Doncic kinsa maoy mipatay kanila sa Game One, apan ang All-Star pointguard nakakuha og igong suporta gikan sa iyang mga kauban. Ang Dallas mipabukad sa ilang labaw ngadto sa 13 puntos pinaagi sa tres ni Porzingis. Napahakan ang maong labaw human mipabuto og duha ka sunodsunod nga tres si Marcus Morris, 109-114. Apan pipila ka minutos ang nakalabay, si Morris na fouled out ug wa usab magdugay si Doncic ug Porzingis nagkumboya aron inaton og balik ang bintaha, 120-111. Dinhi naaninaw na ang kadaugan sa Dallas nga nagbutang sa peligrusong dapit sa Clippers, ang team nga mipalagpot sa Mavericks sa miaging season. (JBM)  This posting includes an audio/video/photo media file: Download Now |
| Wala nga bukton ni VM Alegado nabali Posted: 25 May 2021 08:56 PM PDT NABALIAN gyud diay sa iyang wala nga bukton si Consolacion Vice Mayor Teresa Alegado human niya natukod ang iyang kamot dihang siya na outbalance samtang nagsayaw atol sa usa ka kalihukan niadtong Sabado, Mayo 22, 2021 sa Tambuli Beach Resort, Barangay Maribago, Dakbayan sa Lapu-Lapu. Ang iyang anak nga si Consolacion Mayor Joannes Alegado nipahibawo nga tungod kay edaran na ang iyang inahan, huyang na ang bukog niini hinungdan nga nabali kini dihang nanukod sa dayong pagkatumba. "Hinay ra man baya ang iyang pagkatakilid apan medyo humok na iyang bukog kay may edad man siya. Mao na ang tinuod ug wala nay lain pa. Kini kasagaran mahitabo sa kadaghanan ug pwede ni bisan kinsa," matod sa mayor. Matod sa mayor nga dangog ang dance floor hinungdan nga na-slide ang iyang inahan samtang nagsayaw. Nagpasalamat si Mayor Joannes sa ilang mga higala nga nagpakabana ug nabalaka sa kahimtang sa iyang inahan. "Daghang salamat sa inyong tim-os nga concern ug pag care kaniya. Kini nakahatag gayud kaniya og igo nga kusog ug alibyo," matod sa mayor. Naguol hinuon siya nga bisan sa nahitabo sa iyang inahan, duna pay mga tawo nga nitamay ug "manamastamas manghimaraot, magbugalbugal ug magmapahitas-on ug maghimo og mga storya nga dili mao." Matod sa mayor nga nagpailob ang iyang inahan niini. Ang inahan ug anak nga mga opisyal sa Consolacion apil sa mga public official ug pulitiko nga ningtambong sa ika 10 nga anibersaryo sa Ako Bisaya party-list. Atol sa selebrasyon, si Kongresista Sonny Lagon niluwat sa iyang pagka representante sa Ako Bisaya ug nanumpa nga bag-ong sakop sa One Cebu Party. Mopuli kaniya ang iyang asawa nga si Daphne Lagon. Si Gobernador Gwendolyn 'Gwen' Garcia maoy nipapanumpa kang Kongresista Lagon ug uban pa nga nagpasilong sa One Cebu Party. Interesado si Lagon sa pagdagan isip representante sa 6th district sa lalawigan sa Sugbo nga naglangkob na lang sa mga lungsod sa Cordova ug Consolacion. Kay usa na man ka highly urbanized city ang Mandaue City sa Abril 15, 2019, duna na kiniy kaugalingong representante sa 19th congress busa mabuwag na sa 6th district. Sa unang higayon sa national elections sa 2022, magpili og representante sa lone district sa Mandaue City. (REV)  This posting includes an audio/video/photo media file: Download Now |
| Pingris moretiro na human sa 16 ka tuig sa PBA Posted: 25 May 2021 07:26 AM PDT ANG usa sa lig-ong haligi sa grandslam title sa Purefoods niadtong 2014 ang nakadesider nga moretiro na. Si Marc Pingris mianunsiyo sa iyang pagretiro sa PBA human sa 16 ka tuig ka mabuwakong karera. Si Pingris nga kanhi usab sakop sa Gilas Pilipinas, dako og papel sa paglangkat sa grand slam title sa team nga karon nagdala na sa ngan nga Magnolia nga miharos sa tulo ka sunodsunod nga conferences, pito na ka tuig ang nakalabay. Ang 39-anyos nga forward kinsa gitawag og "Pinoy Sakuragi" mipahibawo sa iyang pagretiro pinaagi sa iyang social platform gabii sa Martes, Mayo 25, 2021. "Sixteen years na din ako sa PBA pero alam ko na ngayon na ang tamang panahon para umpisahan ang bagong chapter ng buhay ko," matod pa ni Pingris sa post sa iyang Instagram account. Hinuon, wa pay siguro kon kuhaon ba kini isip usa sa coaching staff sa Magnolia. (JBM)  This posting includes an audio/video/photo media file: Download Now |
| Editoryal: Pagbakuna sa seniors Posted: 25 May 2021 06:45 AM PDT Atong awhagon ang senior citizens nga dili maglangay sa pagpabakuna batok sa Covid-19. Way laing tumong niini, kapanalipdan ang inyong panglawas. Isip senior citizens, ang immune system minus busa daling mataptan og sakit labi na sa virus nga kusog ug paspas motakod sama sa Covid-19 nga naghulga karon sa tibuok kalibotan. Dili mahadlok. Dili magpatuo sa negatibong istorya. Daghan nang nakapabakuna ug luwas. Libre kini sa kahagamhanan. Maayong atong pahimuslan, gawas pa, atong kuwarta ang gipamalit niini gikan sa buhis. Usa kini sa mga serbisyo ug responsilidad sa kagamhanan. Nganong nanawagan kita sa senior citizens o ang classified isip A2 priority sub group? Base sa Mayo 23, 2021 nga talaan sa Department of Health (DOH) Central Visayas, makaluluoy ang ilang paningkamot ug usik ang salapi nga gigahin sa programa human 6.5 percent lang sa total registered senior citizens sa rehiyon ang nagpabakuna. Subay sa taho ni Dr. Mary Jean Loreche, tigpamaba sa DOH 7, dunay 39,041 senior citizens sa unang dose sa ilang populasyon nga 604,444 sa rehiyon. Samtang 5,079 lang ang nakakompleto sa ilang bakuha, first ug second doses. Gamay pa ang nagpabakuna. Seguro ang ubang senior citrizens naniid pa. Hinaot nga dili maglangay; basin mauwahi na ug ang programa moirog na ngadto sa laing grupo sa komunidad. Dugang sa talaan sa DOH 7, ang A1 priority sub group (medical frontliners), gikan sa 131,781 total A1 priority population, dunay 96,140 medical frontliners ang nakadawat sa unang dose ug 50,272 kanila ang nakakompleto sa bakuna. Arang-arang kini nga sitwasyon. Nikabat sa 73 percent sa ilang populasyon. Ang hingpit o mayoriya nga nabakunahan nga populasyon maoy gilantanwan nga labing epekto sa pagkontrolar sa pandemiya ug ang pagdeklarar sa bag-ong normal. Magpakabana ug mokooperar alang sa kaayohan sa tanan.  This posting includes an audio/video/photo media file: Download Now |
| Posted: 25 May 2021 06:45 AM PDT Kinsay di magduda sa nasud sa China human wa pasudla sa Dakbayan sa Wuhan ang mga imbestigador sa World Health Organization (WHO) aron pagsusi sa Covid-19? Ang gihimo sa China sa pagbabag sa WHO nakapasamot sa pagduda nga mahimong tinuod ang mga pasangil nga gituyo sa paghimo ang virus. Di lang gud ang China ang gisusi sa WHO apil na ang mga nasud nga grabing naigo sa virus. Sa Wuhan nahimutang ang mga laboratory ug diin nagikan ang virus. Karon duna nay bag-ong mga bilyonaryo tungod sa Covid, usa niini ang naghimo og bakuna sa Sinovac. LAPAD NGA BAKONA Nindot ning pahibawo ni Cebu City Mayor Edgardo Labella sa paghimo og halapad nga pagpamakona sa katawhan karong Hunyo. Para nako, usa man sa nakadasig niini ang way kahadlok sa senior citizens nga nagpabakuna. Sa ato pa, ang pagsugod ra diay ang lisod. Sa wa pa ang pagpamakuna sa Cebu City, daghang dili gusto tungod sa kahadlok. Sa pagsugod, gamay lang sa senior citizens ang nagpabakuna, kalit lang misunod ang ubang tiguwang. Bentaha ang tawo nga mabakunahan kay duna nay proteksiyon batok sa Covid. GA KAPITAN SA ARGAO Labing minos 12 ka mga barangay kapitan sa Lungsod sa Argao ang nakigkita kang Cebu Gobernador Gwendolyn Garcia. Kini maoy gipahibawo ni 2nd District Provincial Board Member Tata Salvador sa interview sa Agila. Matod ni Salvador, iyang gikuyogan ang mga kapitan sa pakigtagbo sa opisina ni Garcia ug gipaabot ang ilang mga gikinahanglan. Dali nakatubag ang gobernador sa panginahanglan sa kapitan sama sa programa sa inprastrakura, panubig ug uban pa, dugang pahayag ni Salvador. Email: efrenlonzon71@gmail.com Text: 09235562777  This posting includes an audio/video/photo media file: Download Now |
| Diputado: Tigom sa RPOC sa Dumaguete Posted: 25 May 2021 06:45 AM PDT Daghan unta ang gusto motambong sa meeting sa Regional Peace and Order Council (RPOC) didto sa Dumaguete City niadtong Lunes, Mayo 24, 2021 diin si Presidente Rodrigo Roa Duterte (PRRD) maoy pinasidunggang dinapit. Apan hilabihan kalisod ang mga lagda sa Presidential Management Staff (PMS). Kinahanglan nga ala una sa hapon, anaa na sa sulod sa Silliman University gym para sa medical screening tests. Gawas pa niini, kinahanglan nga adunay ipakita nga RT-PCR nga negative ang resulta 48 hours sa dili pa ang Mayo 24. Aduna pay Health Declaration form and Rapid Screening form nga i-submit. Unya, gibandilyo gyod ang lagda nga tanang moapil sa maong meeting mag-sul-ob og mask ug face shield sa tanang panahon nga anaa sila sa sulod sa Silliman gym. Sa akong kasinatian sa Silliman gym, kon daghan ang mga tawo sa sulod unya mag-sul-ob ka og mask ug face shield, segurado gyod nga maglisod ka pagginhawa. Sa mga gipadad-an og invite, daghan ang mi-pass. * * * Buyno, masabtan sab nato ang kaistrikto sa PMS. Dili pwede nga i-expose si PRRD sa problema sa Covid-19 labi na kay "highest pointer" ra ba ang Negros Oriental ug Bohol sa Central Visayas sa gidaghanon sa Covid. Ang nakapait kay local transmission ra ba ang hinungdan niini. Buot ipasabot, nagwara-wara lang sa Dumaguete ug ubang lugar sa Negros Oriental ang kagaw sa Covid. Delikado gyod kon matakdan si PRRD sa kagaw nga nagsuroysuroy lang didto. Ug siyempre, apil na pod ang ubang mga opisyal nga gipadad-an og invite. Ngano pod kaha nga sa Dumaguete man ang RPOC-7 meeting nga mas maayo man unta og sa probinsiya sa Sugbo lang kini gihimo kay labing ubos ang gidaghanon sa Covid? Gani, namatud-an man sa health screening kaniadtong Lunes nga positive sa Covid ang mayor sa Dumaguete. * * * Kon ang usa ka leader mag-atras abante sa iyang mga desisyon, makasalig kaha ang mga tawo kaniya? Siyempre, lisod gyod nga saligan kay mag-usab usab man ang baroganan. Pananglit, karong adlawa moingon siya nga dili pwede. Unya pagka-sunod adlaw, moingon na sab siya nga pwede diay. Karong adlawa moingon siya nga pwede, unya pagkaugma, moingon na sab nga dili pwede. Ingnon dayon na siya nga "pag-sure oi." * * * Munamona gyod paningkamot sa usa ka politiko, labi na kay piniliay na sunod tuig. Gusto niya nga tanang proyekto sa kagamhanan moagi gyod sa iyang opisina unya atubangan sa mga tawo, angkonon niya nga nahimo ang maong proyekto o nadawat ang maong mga ayuda tungod sa iyang paningkamot. Gusto mo-epal ang maong politiko. Bisan unsa na lang iyang himuon basta matuman lang ang iyang gusto. Dihay usa ka opisyal nga gibalikas sa maong politiko kay ulahi na siya gipahibalo sa usa ka programa.  This posting includes an audio/video/photo media file: Download Now |
| Donaire mideklarar sa iyang kaandam batok WBC champ Oubaali Posted: 25 May 2021 06:41 AM PDT Nagpanikad ug mideklarar sa iyang kaandam si Nonito "The Filipino Flash" Donaire Jr. nga makigsinukliay og kumo batok ni World Boxing Council bantamweight champion Nordine Oubaali sa France karong semanaha. Ang Filipino-American fighter kinsa nakahupot og upat ka titulo sa managlahing division, gikatakdang moaway batok ni Oubaali karong Dominggo (Sabado sa America). Happy Monday! Y'all ready for fight week and Saturday? I know I am mao kini gi post ni Donaire ginamit ang hastags nga #AndTheNew #wbc #wbcchampion. Ang pakigsangka ni Oubaali maoy usa sa lakang sa plano nga iyang haruson ang tanang titulo sa bantamweight division aron mamahimong undisputed champion. Sa edad nga 38 anyos, sakaon man tuod ang iyang plano, apan nagtuo si Donaire nga iya kining mahimo. "I have a dream which is to be the undisputed bantamweight champion, and at 38 years old I think I am capable of doing it. The first step is on May 29 against Nordine Oubaali, a good fighter, but he's never faced an opponent like me, and then we are definitely going to pursue a rematch with (Naoya) Inoue and gather the rest of the belts," pabuhagay ni Donaire nga napatik sa Boxing Scene. (JBM)  This posting includes an audio/video/photo media file: Download Now |
| Posted: 25 May 2021 06:25 AM PDT Dear Papa Joe, Ako si Lisa, 19 years old ang pangedaron. Nagpuyo sa probinsiya sa Sugbo karon. Naka graduate kog Grade 12 pag start sa pandemic last year. Maong wala gyud ko nakaeskwela og college kay hinay ang internet connection sa among lugar if ever mag online class ko. Ganahan pod unta ko motrabaho para makatabang ko sa akong parents, pero lisod man pod kaayo mangitag trabaho ron. Naka feel na gyud kog boredom, kapoy na kaayog tambay. Wa pay nasayod og hangtud kanus-a pa ning pandemic. Right now banga na kaayo, usahay maka feel pa kog depression tungod kay usahay mayawyawan ko sa akong mama. Wala kuno koy gamit. Unsaon wala man sab koy kapaingnan. Lisod man pod moanhag syudad ron unya wala pa gyud koy kapuy-an diha. Abi nako og mag face to face classes na next June. Pero nabalitaan nako nga wala pa kuno gi allow sa gobyerno. Sayang kaayo nga magduha na ka tuig wala gyud koy nahimo. Palihug tambagi ko kay feeling depressed na kaayo ko. LISA Dear Lisa, Salamat sa imong pagsalig nako bisag ma consider kag millennial kid pero nituo pa gihapon ka nako. Abi nimo Lisa, dili kay ikaw lang ang naka experience og ingon ana karon. Daghan kaayo rong niingon nga na depress, nag panic and anxiety attack. The way I see sa imong problema, mas maayo gani ka kay duna kay mga parents. Natural ra man sa ginikanan nga makaingon og way gamit ilang anak pero dili buot pasabot nga wala naka gi love nila. Pailob lang sa kay kanang 19 years old bata pa kaayo na. Kon maka eskwela ka sunod tuig, okay ra man gihapon. Wala bitaw kay gibuhi ug dili pod na contest nga kinahanglan gyud kang ma una. Daghan ang wala ka eskwela karon. Daghan ang mga naproblema ron panahon sa pandemic, ma datu ug ma pobre, sikat or dili sikat, bata ug tiguwang, tanan naapektohan. Hinaut pang nituhop sa imong kahiladman akong tambag. Daghang salamat. Papa Joe (Sa mga naay problema, ipadala sa papajoesuperb@gmail.com)  This posting includes an audio/video/photo media file: Download Now |
| Vice commander sa NPA-Bohol, tipi Posted: 25 May 2021 06:24 AM PDT ANG usa sa lima nga napatay nga sakop sa rebeldeng pundok mao ang vice commander sa propaganda unit sa Bohol party committee sa New People's Army (NPA). Samtang usa ang angol sa habig sa kasundalohan atol sa kapin usa ka oras nga binakbakay Lungsod sa Bilar, Lalawigan sa Bohol niadtong Martes sa kaadlawon, Mayo 25, 2021. Ang engkuwentro nahitabo diin mga lumolupyo sa Barangay Cabacnitan, Bilar ang gipukaw sa buto-buto sa armas. Aang maong barangay kasikbit sa Lungsod sa Batuan nga giingong adunay mga presensya sa NPA. Matod ni Army Lieutenant Grace Remonde, information officer sa 47th Infantry Battalion sa Philippine Army nga nagbase sa Bohol, nakadawat og report gikan sa mga lumolupyo sa lugar nga adunay presensya sa mga armado. Nagpatrolya dayon sila ug pag-abot sa dapit ilang nasugatan ang gibana-bana 11 ka giingong sakop sa NPA nga pulos armado ug matod pa, kalit lang namusil sa mga sundawo. Nilanat og kapin sa usa ka oras ang binakbakay ug sa dihang niatras ang mga rebelde, napalgan sa mga sundalo ang lima ka patayng lawas. Base sa opisyal nga talaan gikan sa kapulisan sa Bohol usa sa namatay si Romeo Samorano Nabas alyas Marlon, Ponso, Rico. Si Nabas giila nga vice commander sa propaganda unit sa Bohol party committee. Ang ubang nakalas mao sila si Joseph Bautista alyas Bryan, Marvin Flores alyas Cris, Edeonila Nueta alyas Maria, Marra o Mia ug ang gihinganlan og Bucar. Nakuha gikan sa encounter site ang mga mosunod: duha ka M16 rifles; lima ka 45 caliber pistols; usa ka bandolier; tulo ka short magazines sa M16 nga adunay 30 rounds sa ammunition; unom ka cellular phones; usa ka laptop; usa ka granada; usa ka handheld radio, ug mga dokumento nga giingong adunay high intelligence value. "So far wala na but continue gihapon ang atoang clearing operation and ginabawal pa namo ang mga civilians and other mga kasikbit nga mga barangay nga mosulod sa area," matod pa ni Remonde. Gikataho nga kapin sa 50 ka pamilya sa maong lugar ang wa una pabalika sa ilang balay, tug-an ni Cabacnitan barangay kapitan Zosima Sumagang. (Uban sa taho ni Ted Ayeng)  This posting includes an audio/video/photo media file: Download Now |
| Double swabbing ipatuman gihapon Posted: 25 May 2021 06:22 AM PDT Magpabilin ang kamandoan nga double swabbing alang sa mga moabot nga Sughoanong overseas Filipino workers (OFW) ug returning overseas Filipinos (ROFs) sa Mactan Cebu International Airport (MCIA) samtang diretso nga pag-swab alang niadtong dili taga Sugbo. Kini bisan pa man sa impormasyon nga nadawat ni Cebu Govoernor Gwendolyn Garcia nga dunay duha ka mga kalihim nga nag planong mopasaka og kaso batok kaniya tungod sa matod pa pagsupak niya sa whole-of-nation approach sa Inter Agency Task Force (IATF), diin kinahanglan nga sa ikapitong adlaw pa ipaubos sa swab test ang mga mopauli nga OFWs ug ROFs samtang gi-isolate kini. Gipahibawo ni Garcia si Marinduque Gov. Presbitero Velasco Jr, presidente sa League of Provinces in the Philippines, nga si Department of Interior and Local Government (DILG) Secretary Eduardo Año maoy nipahibalo kalabot sa pagpasaka og kaso tungod kay misupak si Garcia sa IATF protocols. "He (Año) said IATF is firm that Resolution 114 should be strictly complied. They are worried about transmission of variants. He said Presidential Spokesman Harry Roque and Justice Secretary Meynard Guevarra are considering legal action against you," panugon ni Velasco ngadto ni Garcia. Subay sa Resolution 114 sa IATF ang tanan nga mga OFWs ug ROFs kinahanglan duha ka semana ikwarantina ug sa ika-7 ka adlaw sa pag-isolate una pa kini ipaubos sa swab test. Kon negatibo ang resulta, ipadayon ang pag-isolate sa facility aron makompleto ang 10 ka adlaw, mahuman ang kwarantinas sa pag-isolate sa panimalay sa upat ka adlaw. Apan base sa EO ni Garcia nga ang mga OFWs ug ROFs moabot sa Mactan Airport mopaubos sa RT-PCR test. Samtang naghuwat sa resulta, mopasilong una kini sa hotel isolation facilities sulod sa duha ka adlaw. Kon negatibo ang resulta ang OFWs ug ROFs nga dili taga Cebu, papaulion sa ilang LGU ug mosunod sa protocol sa ilang lugar. Samtang kadtong mga taga Probinsya sa Sugbo papaulion na sa ilang balay ug didto na mopadayon sa ilang pagkwarantina. Sa ika-pito nga adlaw iswab test pag-usab aron masiguro nga luwas sa Covid-19. Giklaro sa gobernador nga wa siya mosupak ug igo lang siya nihimo og paagi nga nipatuman gihapon sa kamanduan nga dili maghatag og kalisdanan sa OFWs ug ROFs. (ANV)  This posting includes an audio/video/photo media file: Download Now |
| You are subscribed to email updates from https://www.sunstar.com.ph/. To stop receiving these emails, you may unsubscribe now. | Email delivery powered by Google |
| Google, 1600 Amphitheatre Parkway, Mountain View, CA 94043, United States | |
No comments:
Post a Comment