Monday, May 31, 2021

https://www.sunstar.com.ph/

https://www.sunstar.com.ph/

Gihamok sa bagyong Dante

Posted: 31 May 2021 02:34 AM PDT

PIPILA ka lugar sa siyudad sa Davao ang gibaha Dominggo sa gabii, Mayo 30, tungod sa perte kakusog nga ulan dala sa Bagyong Dante.

Sa Bangkal sa siyudad sa Davao, anaa sa 65 ka pamilya ang gihikling tungod sa baha.

Mga nagpuyo sa Bulusan ug Taal, Bangkal, Barangay Talomo Proper namakwit padung sa Our Lady of Lourdes Parish gym tungod misaka na ang tubig baha sa ilang dapit.

Samtang sa Mintal, pipila sab ka indibiduwal ang gipang-rescue human

misud na ang tubig baha sa ilang panimalay.

Nagpahimangno ang awtoridad nga pabiling igmat tungod sa padayong pag-ulan nga dala ni Dante.

Gikan alas 12 sa udto, kagahapon, Mayo 31, ang Philippine Atmospheric, Geophysical and Astronomical Services Administration (Pagasa) nagpakanaug sa Yellow Warning Level alang sa Davao Oriental ug Surigao del Sur.

Dugang niini, gilauman ang pagbaha ug landslide sa mga lugar nga apektado sa way puas nga pag-ulan.

Samtang sa Davao de Oro, pipila ka mga lungsod ang nakasinati sab og pagbaha ug landslide tungod sa pagbunok sa kusog nga ulan.

Gibutyag ni Gerry Lancerda, tigdumala sa operation section sa Municipal Disaster Risk Reduction and Management Office (DRRMO-Maco), nga nahinabi sa Superbalita Davao pinaagi sa selpon kagahapon nga gawas sa nahitabong landslide sa Barangay Panoraon sa Mawab niadtong Dominggo, Mayo 30, duna say laing landslide nga nahitabo sa mga barangay sa Panamin, Mainit ug Little Panamin sa mao gihapong lungsod.

Samtang sa Barangay Panibasan sa samang lungsod gihapon nahitabo sab ang pagbaha partikular sa Purok 4 human miapaw ang tubig sa sapa sa maong dapit.

Hinuon, sumala ni Lancerda nga gawas sa gitahong bata nga naangol sa landslide sa Barangay Panoraon, wala nay laing nangaangol ug wala say nahitabong pagpamakwit.

Samtang sa Mawab, subling midahili ang yuta sa Km 69, Barangay Tuboran alas 6:00 sa buntag kon diin tulo sa unom ka mga linya sa highway dili maagian og sakyanan kay natabunan og mga yuta. Ang maong dapit giingong sagad dunay mahitabong landslide.

Hinuon gikanayon ni Sandy Pontillian, head sa operation section sa MDRRMO–Mawab nga nahinabi sab sa Superbalita alas 10:30 sa buntag kagahapon, Mayo 31, 2021, nga usa na lang ka linya sa highway ang natabunan og yuta sanglit nagpadayon ang gihimong clearing operation kung diin lima ka mga dump truck, 2 ka mga backhoe ug bulldozer ang gipadala sa lokal nga panggamhanan sa Mawab, uban sa tabang sa kagamhanang probinsyal aron mapadali ang paghinlo sa dalan.

Sa Compostela, pipila sab ka mga residente partikular sa Purok 3, Crossing Gabi, Crossing Indang ug Purok 2, National Highway pulos sakop sa Brgy. Poblacion ang nagping-it sa kahugaw sa tubig samtang mitunob sa tubig- baha sa kadalanan.

Hinuon, sama sa ubang lungsod wala gihapoy natalang mga bakwit sa Compostela.

This posting includes an audio/video/photo media file: Download Now

Mayor Sara modagan ba gayod?

Posted: 31 May 2021 02:33 AM PDT

DAGHAN karon ang nagtuo nga magpapili gayod si Davao City Mayor Sara Duterte-Carpio sa labing taas nga posisyon sa politika sa nasud.

Kini ang baruganan ug panglantaw sa usa ka senior citizen nga taga Barangay 25-C Poblacion, Davao City.

Sumala niya nga mopapili gyod si Mayor Inday pagka-presidente sa 2022 Presidential Elections diin ginahulat na lang niini ang mga kaalyado aron pinal gayod ang linyada.

"Yes, mopapili gyod na, ginahan-ay pa lang na nila karon, sama na sa iyang amahan, last hour na, pero si Mayor Inday, haduol pod na sa last hour," panglantaw ni Hermesio Roselio, 70 anyos, usa ka retired public school teacher.

Apan alang sa usa ka tindera og isda sa Bankerohan, Davao City, walay laing mokandidato pagka-presidente ang angayan sa maong posisyon.

"Wala gyoy lain, siya gyod ang para diha nga posisyon," ingon ni Merlyn Geralde, fish vendor ug taga Sto. Niño, Barangay 5-A, Bankerohan.

Mikatag sab ang hungihong nga si Bongbong Marcos ang mamahimong bise presidente niini sanglit nanggawas na sa social media ang hulagway ni Bongbong nga espesyal nga miduaw sa Davao City usa ka adlaw una ang adlaw'ng natawhan sa mayor.

Uban ni Bongbong ang igsuon niining si Senador Imee Marcos kinsa nakig-dinner sa mayor Sabado sa gabii sa Ecoland, Davao City.

Sa social media nagkatag na sab ang mga video sa pagpaila kang Mayor Sara uban sa ilang mga greetings sa birthday niini, kagahapon.

Migula sab ang usa ka mubo nga video ni Mayor Inday kinsa nagpasalamat sa tanan nga mitimbaya kaniya, video nga makadugang sa kadasig diin Makita nga ang kasingkasing niini, anaa sa tanang mga Pilipino.

Sa Cebu City, Mayo 29, nagpahigayon sab og motorcade ang mga grupo sa motorsiklo kinsa nag-awhag sa mayor nga modagan pagka-presidente sa nasud.

Ligdong sab ang pagtuo sa mga barangay kapitan sa Davao City nga modagan gayod sa pagka-presidente sa Mayor Inday, diin nauna nang gipanawagan sa mga kapitan pinaagi sa ilang gihimo nga Nationwide Caravan niadtong Marso 2021 nga gipangunahan ni Brgy. 23-C Kapitan Alimoden "Wating" Usman.

Apan sumala sa ulahing pamahayag sa Mayor, dili siya modagan sa pagka-presidente, apan sa sunod na human sa 2022 presidential elections.

Modagan man o dili si Mayor Inday, ang importante magkahiusa ang mga Pilipino alang sa kaayohan diha sa kalinaw ug ang pagbugno sa kasamtangan nga pandemya. (Jeepy P. Compio)

This posting includes an audio/video/photo media file: Download Now

Magsuong lider sa ALG nalit-ag

Posted: 31 May 2021 02:33 AM PDT

KIDAPAWAN CITY -- Balhog na sa selda sa kapulisan ug gitakdang ipresenta ngadto sa korte ang duha ka mga notadong lider sa Armed Lawless Group (ALG) human madakpi sa Joint Task Force Central alas 7 sa buntag Dominggo, Mayo 30.

Mga suspek giila nga sila Mentukan Bungay, 38, minyo, ug igsuon niini nga si Walo Bungay, 42, minyo, giingong nangulo sa Bungay Armed Lawless Group ug nagpuyo sa Barangay Bualan, Pikit, North Cotabato.

Gisaysay ni 602nd Brigade Commander Brigadier General Roberto Capulong nga gisulod sa puwersa sa JTFC ang kampo sa grupo ni Bungay sa Sitio Edzap, Barangay Lagundi sa nahisgutang lungsod.

Apan pasulod pa lang ang mga sundalo ug pulis sa nasampit nga lugar, gipabuthan na sila sa mga armadong sakop sa magsuong Bungay, hinungdan nga nahitabo ang binakbakay nga milungtad og unom ka oras.

Nadakpan ang magsuon samtang ang ilang mga alipores nakaiktad.

Narekober gikan sa ilang posisyon ang duha ka M16 Armalite rifles, usa ka kalibre .45 nga pistola, mga buhing bala, magazines, fatigue uniforms, bandoliers ug mga personal nga kagamitan.

Nasayran nga magsuon dunay warrant of arrest sa kaso nga pangilkil, multiple murder, kidnapping ug uban pa nga gitumbok nga nakig-alayon sa Bangsamoro Islamic Freedom Fighters. (Edgar E. Fuerzas)

This posting includes an audio/video/photo media file: Download Now

Roldan: Mayor Sara giindorso sa PDP Davao/Igacos

Posted: 31 May 2021 02:31 AM PDT

UNA sa tanan, atong timbayaon sa usa ka Malipayong Adlaw'ng Natawhan si Mayor Inday Sara Duterte-Carpio sa iyang pagsaulog sa ika-43 nga adlaw'ng natawhan kagahapon, Mayo 31. Unta Mayor mas daghan ka pang adlaw'ng natawhan sa umaabot.

Bulan na sa Hunyo. Sa kasagarang panahon nga wala pa ang Covid-19 nagkapuliki na ang tanan tungod sa pag-abli sa klase. Yagaw na unta ang atong mga eskuwelahan sa pagpanindot pinaagi sa "Brigada Eskwela" samtang mapuno ang palengke ug mga malls sa namalit og gamit ug sa pagpangandam sa pab-abri sa klase. Apan tungod kay duna may pandemya, sulod na lang kita sa balay.

Ang atong mga anak sa "online" o sa "modular classes" na lang intawon. Sa laktod nga pagkasulti, bisan wala nay pisikal nga klase, nangandam gihapon kita sa pag-abli sa klase karong tuiga.

Sama usab kini sa pagpangandam sa umaabot nga 2022 National Elections diin magapili kita'g pangulo sa nasud. Sa talaan sa Commission on Election, magsugod ang "filing of candidacy" sa nasudnong posisyon karong Oktubre.

Dinhi makita kung kinsa ang magaharong sa pagsaknit sa gahum.

Ang pangutana kay modaug na ba kaha karon ang oposisyon nga gitawag og "Yellow-han" o ang mga kandidato ba gihapon sa administrasyon ni PRody Duterte?

Busa isip pagpangandam, nagpagula niadtong Dominggo ang Partido Demokratiko Pilipino-Laban (PDP) Davao City Council ug Island Garden City of Samal (Igacos) Council ug "Joint Statement Supporting the Candidacy of Mayor Sara Duterte for President."

Nagkauyon ang duha ka konseho nga suportahan nila si Mayor Inday kung modagan kini pagka-presidente tungod kay ilang nakita nga siya lamang ang makapadayon sa gipundar nga maayong programang pangkalamboan sa nasud sa iyang amahan.

Batan-on pa kini ug sayod kitang taga-Davao sa estilo sa iyang pagdumala nga lahi sa iyang amahan.

Kanunay sab nga nag-una ang iyang pangalan sa mga surbey sa posibleng mosunod kang PRody bisan kon hugot kining gihimakak sa Mayor nga interesado siya nga modagan sa sunod eleksiyon.

Matud pa sa pamahayag nga daghang nahimo ang iyang amahan apan tungod kay limitado lamang ang iyang termino, nindot nga ipadayon ug palabwan pa kini unya ni Mayor Sara. Gipagawas kining pamahayag sa lokal nga PDP Councils sa Davao City ug Igacos tungod kay hangtud karon naglibog pa sila kung kinsa ang i-indorso nga kandidato pagka-presidente sa nasudnong pamunoan sa PDP-Laban.

Nasayod sila nga gitudlo ni Senador Koko Pimentel pagka-presidente sa PDP si Senador Manny Pacquiao nga nag-ambisyon usab nga modagan pagka-presidente sa nasud. Nitaas ang kilay sa daghang dagko ug karaang opisyales sa PDP kay di kuno sakto ang pamaagi sa pagpuli ni Sen. Pacquiao pagka-presidente ug sa ilang tan-aw dili pa hinog ang atong Pambansang Kamao sa maong puwesto.

Karong bag-o, nagkayagaw ang PDP-Laban sa kaulohan kay gi-almahan ni Sen. Manny ang panagtigom sa National Council nga gipatawag ni Energy Sec. Alfonso G. Cusi nga vice chairperson sa PDP sa Mayo 31 aron hisgutan ang mga isyu sa Partido ug kinsa ang sabakon niini pagka-presidente. Human sa eleksiyon sa 2016, mora'g wa nay imik ang PDP-Laban. Magkahiusa kaha sila?

This posting includes an audio/video/photo media file: Download Now

Atake sa NPA gikondena

Posted: 30 May 2021 06:13 AM PDT

MATI CITY, Davao Oriental -- Hugot ang pagkondena ni Mati City Mayor Michelle Nakpil Rabat sa natigayong pag-ambush sa military troops vehicle pasado alas 8 sa Dominggo sa buntag, Mayo 30, 2021.

Sa gipagula nga pamahayag sa mayor pinaagi sa City Information Office, hugot ang pagkondena niini sa nahitabo.

"Today's incident along the national highway in Sitio Tagawisan, Barangay Badas is unfortunate and we condemn such atrocious act by lawless armed group," sa pamahayag sa mayor.

Nasagmuyo sab kini sa pagkakulgot sa dagan sa transportasyon sanglit temporaryo nga gisirad-an ang national highway sud sa halos duha ka oras alang sa clearing operation sa crime scene.

Giingon sa mayor nga tataw nga di gyod maghatud og kalamboan sa usa ka siyudad ug sa katawhan kung magpadayon ang susamang hinimoan.

"Rest assured that the police and the military, with the support of the local government, are doing their best to prevent similar incident from happening again," ingon sa mayor.

Usa samdan sa bahin sa militar kinsa gidali og dala sa pinakaduol nga ospital diin ang biktimang sundalo naigo sa M203 nga gitiro sa gituohang New People's Army (NPA).

Sa impormasyon nga nakuha sa Superbalita Davao gikan sa awtoridad, nasayran nga milungtad sa 10-minutos nga sinukliay og mga bala militar batok NPA.

Wala pa sab gikataho nga dunay namatay sa grupo sa NPA sa nasampit nga engkuwentro.

"We appeal to the public to remain calm and vigilant. Daghang salamat ug amping kamong tanan," panapos ni Mayor Rabat.

This posting includes an audio/video/photo media file: Download Now

10 border checkpoints hugta'g bantay

Posted: 30 May 2021 06:12 AM PDT

HUGTAN pagbantay sa kapulisan ang napulo ka border checkpoint sa probinsiya sa North Cotabato batok sa mga non-essential travelers.

Kini may kabahin sa subling pagpatuman sa general community quarantine (GCQ) sa probinsiya sugod Dominggo, Mayo 30, hangtud Hunyo 30, 2021.

Gibutyag ni North Cotabato Provincial Police Office Deputy Director Lieutenant Colonel Bernardo Tayong nga dunay mga pulis, sundalo ug uban pa nga mga force multipliers ang magbantay sa mga border checkpoints sama sa Arakan, Banisilan, Carmen, Kabacan, Makilala, Midsayap, Pigcayawan ug Tulunan sa nahisgutang probinsiya.

Mga pulis mag-inspeksiyon sa negative reverse transcription-polymerase chain reaction (RT-PCR) result sa mga biyahero nga adunay importanteng tuyo; inspeksiyon sa mga sakyanan alang sa pagpaneguro nga napatuman ang minimum public health protocols; pag-check sa mga ID ug mga pertinenteng dokumento sa mga pasahero; mandatory visual inspection sa mga cargo vehicles ug uban pa.

Kon dunay moagi nga mga sakyanan nga gustong molahos paggawas sa probinsiya, kinahanglan nga ang sakay dili monaug o magpundo. Buot ipasabot, "no stopping within the area of Cotabato Province."

Dungan sa GCQ, ipatuman sab ang "no movements on Sunday" sa probinsiya diin mga frontliners lamang ang gitugotan nga mogawas.

Nanawagan si Tayong sa tanan nga sundon ang nakalatid sa Executive Order 29 sa kagamhanang probinsiyal aron nga dili madakpan ug dili makamulta kay alang man kini sa kaayohan sa tanang katawhan. (Edgar E. Fuerzas)

This posting includes an audio/video/photo media file: Download Now

51 nilapas protocols gisampolan

Posted: 30 May 2021 06:12 AM PDT

MAGSAYSAY, Davao del Sur -- 51 ka indibiduwal ang gisampolan sa kapulisan human padayong nagpakabuta-bungol sa bahad sa Municipal Inter-agency Task Force (MIATF) nga silotan ang dili motuman sa minimum health protocol batok sa coronavirus disease (Covid-19).

Naaktuhan ang mga suspek nga wa magsul-ob og face mask, nagtapok-tapok ug milapas sa curfew hours niadtong Sabado, Mayo 29.

Mga ginsakpan mismo sa Magsaysay Municipal Police Station ang nakasakop sa mga indibiduwal nga milapas sa mga sumbanan.

Bisan og naisyohan og citation ticket aron makamulta, gihatagan gihapon sa kapulisan og libreng face mask ang mga dinakpan aron makamatngon sa sunod higayon.

Si Captain Robert James Carumba, officer–in-charge sa kapulisan, nagpasidaan sa katawhan nga kinahanglang tumanon ang mga balaod sa MIATF aron di mokuyanap ang Covid-19 sa lungsod.

Nagbahad ang kapulisan nga padayon ang ilang hugot nga implementasyon sa pagsumpo sa kagaw mao angayang di kini balewalaon sa publiko. (Orlando B. Dinoy)

This posting includes an audio/video/photo media file: Download Now

Bakuna ipamugos sa gobyerno

Posted: 30 May 2021 06:09 AM PDT

TANGKUD na nga usa ka tuig una miabot ang unang bakuna sa atong nasud niadtong Pebrero 28 ning tuiga, ang Sinovac nga gikan sa China.

Apan niadtong wala pay bakuna nga miabot sa atong nasud, naputos sa atake ug pagsaway ang administrasyong Duterte, labi na ang congressman sa unang distrito sa Davao del Norte. Puwerte gyud niyang panghimaraut sa atong pangulo nga maoy naghimo niyang speaker nga kuno INUTIL ang administrasyon kay gilupig lang sa mga silingang nasud sa ASIA kay may mga bakuna na. Ambot og nabakunahan na ba siya?

Karon nga nagsunod-sunod na ang pagpangabot sa bakuna sa Covid-19, na-problema na pod ang atong gobyerno kay daghan naman pod hinuon sa atong mga kaigsuonan ang dili magpabakuna. Kini tungod kay dili man gyud kalikayan nga dunay pipila nga namatay sa dihang gibakunahan sila. Apan kadto lang aduna nay mga sakit nga gipamati, pero dili tanan.

Dili ka basta-basta bakunahan diha-diha, tulo ka doktor ang mo-interbyu sa imo, aron sukit-sukiton ka kon unsa gyud ang imong ubang gipamati. Ug kon dili gyud puwede, kay mokomplikit sa imong ubang sakit, dili ka gyud bakunahan. Kini maoy atong na-obserbahan.

Ngano ba nga daghan man nga mga kaigsuonan nato nga dili na hinuon magpabakuna karong panahona? Nga gisaway man gani nila ang atong gobyerno kay dugay nakapalit niini?Kining tanan gikan sa SOCIAL MEDIA.

Dili pa lang dugay migawas ang mga komento gikan sa mga VIROLOGIST ug SCIENTIST DOCTOR nga delikado kuno ang magpabakuna para sa Covid-19 kay duha lang ka tuig ang imong pagpakabuhi dinhi sa kalibutan ug mag-andam ang mga nasud nga nagpabakuna og CREAMATION kay pangdauban ang mga tawo nga matingob sa pagpangamatay.

Usa kini sa hinungdan nganong magbaton og pagduha-duha ang mga tawo sa pagpabakuna. Fake news ba kini o dili? Tingali naa na sa ato kon unsay atong kaugalingong desisyon, magpabakuna ka ba o dili? Ikaw ra usab ang magdesisyon kon fake news ba na o dili.

Sa tinuod lang sa Social Media mas daghan ang fake news kay ang bakuna karon gipamugos na sa atong gobyerno para sa atong kaayohan. Apan kon para sa inyo kadautan, ikaw ang matuman sa imong kaugalingon. Apan kon unsay mahitabo sa inyo, ayaw na basula ang atong gobyerno kay gihimo na nila ang ilang katungdanan.

Kon tinuod pod ang pamahayag ni kanhi Pfizer Chief Scientist Mike Yeedon ug Scientist Robert F. Kenedey Jr. nganong karon na lang ni sila nagsulti niini? Kay tungod ba nga wala na sila sa PFZIER?

Ug dugang pa, gikompirma ni Virologist Luc Montagnier nga duha ra gyud ka tuig ang imong pagpakabuhi sa kalibutan og magpabakuna ka. Busa, ikaw ang maghukom sa imong kaugalingon. Apan kon nagtuo ka nga fake news ni, hala pagpabakuna.

This posting includes an audio/video/photo media file: Download Now

at

No comments:

Post a Comment

Subscribe to: Post Comments (Atom)

End of Summer Sale ☀️😎

20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...