Wednesday, June 23, 2021

https://www.sunstar.com.ph/

https://www.sunstar.com.ph/

12 ka tawo nanulis sa Toledo

Posted: 23 Jun 2021 06:28 AM PDT

Tulo ka mga balay gipangharos og tulis sa 12 ka mga tawo nga nagsakay og SUV sa alas 11 sa gabii sa Martes, Hunyo 23, 2021 sa Sitio Tipolo, Brgy.Bato, Dakbayan sa Toledo.

Way nahimo ang tulo ka mga babaye, duha kanila managsuon tungod sa kadaghan ug sa ilang kahadlok.

Mga biktima giilang sila si Marvie Candol Montederamos, 31, dunay kapuyo; Christine Brusas Amodia, 34, dunay kapuyo; ug iyang manghod nga si Sherilyn Delposo Amodia, 27, minyo.

Si Police Lieutenant Colonel Junnel Caadlawon, hepe sa Toledo Police Station nga nahinabi sa Superbalita Cebu, nagkanayon nga ang mga biktima nibutyag nga ang mga tulisan gilangkuban sa 10 ka mga lalake ug duha ka mga babaye nga pulos nagtaptap nga nisulod sa ilang tagsa ka balay.

Ang mga tulisan unang ningrumbo sa balay ni Montederamos, kinsa gimandoan nga mangabli dungan sa pagpanghulga ug giti-unan og armas.

Nadala ang P200 nga diha sa iyang shoulder bag.

Ang mga tulisan nisunod gilayon sa pag-adto sa tagsa ka balay sa managsuong Amodia.

Gimandoan sila ug gitiunan sa armas nga mangabli kay kon dili pamusilon sila.

Apan ang magsuong Amodia wala mangabli sa ilang tagsa ka mga balay hinungdan nga gipangbuak sa gikatahapang mga tulisan sa sliding glass window.

Dihang nakasulod, unang giablihan ang main door ug gi-ransack ang mga butang.

Nakuha gikan sa balay ni Christine ang upat ka cellphones, tulo ka tablets, wedding ring ug engagement ring nga dunay diamond gibana-banang balor og P50,000; bulawang kwentas balor og P16,000; buluwang singsing balor og P9,000; bulawang ariyos balor og P4,500 ug cash nga P120,000.

Gibunalan pa sa armas ang ulo ni Christine.

Nakuha gikan kang Sherilyn ang gold wedding ring balor og P6,000; 3 ka bulawang singsing balor og P14,500; bulawang bracelet balor og P5,000; ug bulawang kwentas balor og P9,500.

Ang tanan mobalor og di mominos P234,000.

Matod ni Caadlawon nga ang mga biktima ingon man mga saksi ningbutyag mga duha ka four-wheeled nga mga sakyanan ingon man tulo ka scooters ang gisakyan sa mga tulisan.

Paspas kini nga ningbiya paingon sa national highway.

Si Caadlawon, nagkanayon nga mangayo silag abag sa ubang units sa kapulisan aron masubay nila ang giagian sa mga tulisan.

This posting includes an audio/video/photo media file: Download Now

USC supak sa giplanong mga flyover

Posted: 23 Jun 2021 06:26 AM PDT

Ang University of San Carlos (USC) nisupak sa proposed nga flyover projects sa Department of Public Works and Highways (DPWH).

Ang The DPWH niduso sa pagtukod sa flyover subay sa N. Bacalso Ave., gikan sa Mambaling flyover padung ngadto sa eskina sa Leon Kilat St. nga dunay gitas-ong 1.26 kilometros.

Ang proposed flyover sag P. del Rosario St., gikan sa Osmeña Blvd. padung ngadto sa D. Jakosalem St. dunay gitas-ong 1.14 km.

Nangaging mga report nagkanayon nga ang mga karsada palapdan og 1.25 metros sa duha ka mga habig.

Sa usa ka position paper nga gipirmahan ni USC President Narciso Cellan, ang unibersidad namahayag nga ang proyekto dunay dakong impact sa iyang 70- anyos nang Arthus Dingman Building nga nahimutang sa P. Del Rosario St.

Sa 2010, ang edipisyo nalista sa isip Important Cultural Property (ICP) sa National Historical Commission of yue Philippines (NHCP) samtang ang USC mismo nagdala sa National Historical Landmark designation.

Matod sa USC nga ang gisugyot nga pagpalapad sa karsada di lang makaapekto sa edipisyo, apan mosampong usab kini sa maayong talan-awon, di na makaagi ang mga pedestrian ug gub-on ang tipik sa "historic fabric" sa edipisyo.

"Therefore, the project violates both local and international laws on heritage conservation and will only result in debasing its heritage value while showing disrespect to the structure's uniqueness in Cebu," matod sa USC sa iyang position paper. (WBS)

This posting includes an audio/video/photo media file: Download Now

Editoryal: Aron di maputol

Posted: 23 Jun 2021 06:25 AM PDT

Nahunong na sab ang pagpamakuna sa Siyudad sa Sugbo human mahurot ang bakuna sa Pfizer sa Miyerkules, Hunyo 22, 2021. Di kini unang higayon nga nahunong ang pagpamakuna kay nag-agad man sa supply gikan sa nasudnong buhatan.

Sa matag adlaw nga mabakante, liboan usab ka mga tawo ang maghuwat. Matag adlaw nga mahunong ang pagbakuna, mairog na sab ang mga adlaw aron unta makab-ot ang gitinguhang "herd immunity" sa mga Sugboanon.

Nagsalig ra ang mga local government unit, labina ang Dakbayan sa Sugbo, kon pilay ihatag sa nasudnong kagamhanan nga bakuna. Unya dali ra mang mahurot tungod kay sa urban centers sama sa Cebu City, daghan ang gustong mabakunahan, labina kon ang brand gikan sa Estados Unidos.

Usa sa labing maayong solusyon niini mao ang pagpalit og kaugalingong supply sa doses nga ihatag matag higayon nga mahurot ang supply nga doses sa nasudnong kagamhanan. Duna man untay gahin nga P400 million sa pagpalit og bakuna ang Cebu City, nganong di man kuhaan ang pundo aron dunay reserba nga magamit sa pagpamakuna.

Mismo si Mayor Edgardo Labella niingon nga usa ra ang dalan padulong sa economic recovery - ang bakuna. Sa economic recovery gikinahanglan ang kapaspas aron mahibalik na sa normal ang trabaho ug mopadayon na ang pagligid sa ekonomiya.

Bisan tuod moingon ang nasudnong kagamhanan nga usa sa mga prayoridad ang Dakbayan sa Sugbo, apan daghan usab ang mga dapit nga karibal niini sa bakuna. Nakita na kini sukad sa pagsugod sa vaccination rollout busa magkuwang kanunay ang supply.

Ang sulbad mao ang pagbaton og kaugalingong bakuna kay total, naa may igong kabutangan ang Siyudad sa supply. Kon mag-agad sa nasudnong kagamhanan nga utrong hinay, mas mohinay pag maayo ang recovery sa Sugbo. Naa may ikapalit, nganong di man mogasto?

This posting includes an audio/video/photo media file: Download Now

Nalzaro: Ipadakop ang dili pabakuna?

Posted: 23 Jun 2021 06:20 AM PDT

Dili pa lang dugay nisulti si Presidente Duterte nga puwedeng kasohan og murder o reckless imprudence resulting in homicide ang tawo nga responsable sa pagtakboy sa Covid 19 ngadto sa lain. Ambot nagkomedya ra ba ang Presidente kay nasayod man siya isip abogado ug kanhi piskal kon unsa ang mga elemento sa murder base sa Revised Penal Code. Gawas lang kon kini ug ang reckless imprudence iamendar.

Sa miaging gabii, nipagawas na usab og pamahayag ang Presidente nga iyang ipadakop ang dili gustong magpabakuna ug ipatusok sa sampot ang bakuna. "Ayaw ko ninyo og kasaypi, adunay krisis nga gi-atubang ang atong nasud. Adunay natural emergency. Ipadakop ta mo kon dili kamo magpabakuna ug anha itusok sa inyong sampot ang bakuna," matod niya sa sa iyang programa,"Talk To the Nation."

"Ayaw ko ninyo pugsa. Kon dili gyud mo magpabakuna, panglayas mo dinhi sa Pilipinas. Adto mo sa India o ba kaha sa Amerika. Pero mintras nga naa pa mo dinhi, puwede kang matakbuyan ug ikaw maoy magdala sa virus busa magpabakuna ka. Ayaw tong Ivermectin para sa baboy ang ipatusok nako nimo," dugang sa Presidente.

Sama sa iyang pamahayag nga kasong murder ipasaka batok sa "super spreader," naputong lang siguro ang Presidente human niya madawat ang reports nga daghan ang dili gustong nagpabakuna. Apan unsa ba ang iyang basihanan sa pagpadakop? Bisan si Department of Justice (DOJ) Sec. Menardo Guevarra mismo nagkanayon nga walay basihanan nga dakpon ang magdumili sa pagpabakuna kay wala pay balaod niini. Abi ba nako og wa ni pugsanay. Walay pugsanay, apan walay balibaray.

FACE SHIELD

Wala dangti og usa ka semana, mibalitok si Presidente Duterte sa una niyang baruganan nga dili na kinahanglan ang face shield gawas lang kon naa sulod sa hospital. Hinuon, wala kini personal nga gianunsiyo sa Presidente kon dili si Senate President Tito Sotto ang nagbutyag human sa ilang tigom ni Duterte. Apan human sa advise sa medical experts, gipahibawo niya nga ipadayon ang pagsul-ob og face shield sa gawas ug sulod sa building kay proteksiyon gihapon batok sa Covid. Matod pa sa taga LGBT, "maboang ko nimo, Bayot." (bobbygnalzaro@gmail.com)

This posting includes an audio/video/photo media file: Download Now

Barrita: Kwalipikasyon sa presidente

Posted: 23 Jun 2021 05:57 AM PDT

Nanimaho na ang 2022 national elections. Magpili na sab ang mga Pilipino og laing presidente. Ug kon si Presidente Rodrigo Duterte ang pangutan-on, wa pa siya'y nakit-an nga angay nga manununod kaniya, ang mosunod nga pangulo sa nasod.

Mao kini ang iyang tubag sa pangutana ni Pastor Apollo Quiboloy sa Kingdom of Jesus Christ sa dihang gipangutana siya bahin niini sa usa ka exclusive interview: "None, Pastor. Looking at the political horizon? Even you would know that. Nobody. I see nobody who is deserving."

Apan kay nahisulat man sa atong Batakang Balaod ang gitakdang panahon nga unom lang ka tuig ang termino sa presidente, kinahanglan nga mopili kita og laing presidente nga mopuli kaniya sa pag-abot sa gitakdang panahon. Bisan pa kon wa siya'y nakit-an nga angay nga mopuli kaniya.

Unsa man gyud diay ang kwalipikasyon sa usa ka kandidato sa pagkapresidente sa Pilipinas?

Ang Section 2, Article VII (Executive Department), 1987 Constitution, nagkanayon, "No persons may be elected President unless he is a natural-born citizen of the Philippines, a registered voter, able to read and write, at least forty years of age on the day of the election, and a resident of the Philippines for at least ten years immediately preceding such election."

Una, kinahanglan siya nga usa ka natural-born citizen of the Philippines.

Ang Section 2, Article IV, 1098 Constitution, nagkanayon, "Natural-born citizens are those who are citizens of the Philippines from birth without having to perform any act to acquire or perfect their Philippine citizenship. Those who elect Philippine citizenship in accordance with paragraph (3), Section 1 hereof shall be deemed natural-born citizens."

Ikaduha, kinahanglan siya nga usa ka rehistradong botante.

Ikatulo, kinahanglan siya nga makamaong mobasa ug mosuwat. Way gibutang nga educational qualification basta makabasa ug makasuwat. Giklaro ni kay bisan ang di makamaong mobasa ug mosuwat marehistro man nga botante ug makabotar ubos sa Section 1, Article V (Suffrage), 1987 Constitution.

Ika-upat, kinahanglan siya nga 40 anyos ang edad "on the day of the election." Mahimo nga 39 anyos pa siya sa pag-file sa iyang certificate of candidacy basta 40 anyos na siya sa adlaw sa eleksyon.

Ikalima, kinahanglan nga nagpuyo siya sa Pilipinas sulod sa 10 ka tuig sa di pa ang eleksyon. Matawag ka nga residente sa Pilipinas kon (1) naa ka magpuyo, (2) kon ang imong tuyo magpabilin ka diha sa pagpuyo – animus manendi ug (3) kon imong tuyo nga biyaan ang karaan nimong gipuy-an – animus non-revertendi.

Samtang gikinahanglan ang imong physical presence sa imong gipuy-an, mahimo kang temporaryong mobiya basta duna kay tuyo nga mobalik – animus revertendi ug wa nimo i-abandonar ang imong gipuy-an.

(edbarrita@gmail.com)

This posting includes an audio/video/photo media file: Download Now

Tambagi ko Noy Kulas: Gidudahan

Posted: 23 Jun 2021 05:55 AM PDT

Dear Noy Kulas,

Maayong adlaw nimo. Tawga lang ko sa pangan nga Mel, 36, taga Bohol, pero nia na ko sa Sugbo nagpuyo kay naa man ko dinhi nagtrabaho.

Kaniadto mouli ko sa amoa twice a month, pero karon kay pandemic man, wa na ko makauli sa amoa kay estrikto kaayo ang among LGU didto. Pero naproblema ko kay ang akong asawa nagduda na man hinuon nga naa koy lain diri. Di siya motuo nga gilisoran ko sa pag-uli tungod sa kaestrikto ug mahal kaayo ang RT-PCR test unya pila ray akong sweldo. Maayo na lang unta nga ilang magasto didto.

Karon di man gyud motuo ang akong asawa mao magsige na lang mi og away. Bisan unsaon nako pagpasabot di gyud siya motuo. Unsa may akong buhaton, Noy? Mouli na lang ko sa amoa ug di na mobalik diri sa Cebu aron way gubot? Pero mag-unsa man sab ko sa among probinsya nga wa may trabaho didto? Please tambagi ko.

MEL

Mel,

Uli na lang sa Bohol ug iutong ang gasto aron mokalma nang imong asawa. Mokalma ra na kon mouli ka sa inyoha. Ikaw lang sab ang sabot niya kay natural ra na nga reaksyon sa asawa nga dugay nang wa makakita sa iyang bana bisan constant ang inyong communication. Iya tingaling nakita nga kon nakauli ang uban, labina adtong Mayo nga ting-fiesta, nganong di man ikaw makauli?

Naandan ra na nga pagtuo sa asawa kay wa man siya makakita nga duna kay effort bisan kon ang imong gitan-aw ang financial aspect ug ang kalisod sa pag-uli ug pagbalik. Lahi-lahi ang inyong panglantaw. Pananghid sa kompaniya kon mahimo bang makabakasyon kag mga duha ka semana aron sulit ang imong pagpuyo una sa inyoha.

NOY KULAS

rojval69@yahoo.com

This posting includes an audio/video/photo media file: Download Now

J.P. Mendoa 'April Boy Regino ng Cebu'

Posted: 23 Jun 2021 05:54 AM PDT

Dili kaluha kundi siya ang nabantog nga ka-lookalike ug sing-alike sa OPM icon nga si anhing April Boy Regino.

Si J.P. Mendoza o Felipe Alicante Mendoza Jr. sa tinuod nga kinabuhi nagsugod sa iyang pag-impersonate sa iyang idol nga si April Boy atol sa kasikatan sa mga kanta niining "Paano Ang Puso Ko" ug "Di Ko Kayang Tanggapin" niadtong 1997.

"Ang unang nagbunyag nako og `April Boy Regino ng Cebu' ang Aksyon Radyo pag-guest nako sa ilang radio program. Dito talaga ako nag-start bago ako pumunta ng Maynila. Sumasali po ako sa mga April Boy lookalike at sing-alike contest hanggang sa may naka-discover sa akin na isang promoter," asoy sa 41-anyos nga Manila-based Cebuano singer sa Superbalita Laysho.

"Nag-front-act na ko sa concert sa Rivermaya then twice nako naka-perform sa Philippine Arena at four times na ko nag-concert sa Australia."

Apan si J.P. wala katiwas sa high school tungod kay wala siya mosugot nga ipaputol ang taas niyang buhok nga iyang gisunod sa uso sa buhok sa iyang idol.

"Wala ko dawata sa eskwelahan kay taas daw akong buhok. Ipaputol man wa ko mosugot."

Sa pagtaliwan ni April Boy niadtong Nobyembre 29 sa miaging tuig tungod sa kumplikasyon sa kidney mora sad og nahugno ang kalibutan ni J.P.

Apan matod niya nga karon usab siya nakabaton og kaisog ug kaikag aron i-record ang labing una niyang single nga giulohan og "Pusong Duwag" nga mogawas karong July ug gikatakdang maoy mohatag unya niya og bag-ong tatak sa OPM.

J.P. Mendoza, Ssssuper Ka!

Unsa mo kasuod ni April Boy?

Hindi naman kami sobrang close. Pero yung songs niya kasi parang soundtrack na rin ng buhay ko. Three times pa lang kaming nagkita. Una, noong Sept 10, 2013 sa concert niya sa Dalaguete Cebu. Ang pangalawa sa birthday niya. Ang pangatlo naman sa anniversary ng kanilang Idol Star Resto Bar sa Marikina.

Unsay dili nimo makalimtan ni April Boy?

Kadtong niingon siya nga, "kahit anong mangyari sisikat ka man o hindi, kailangan nakaapak pa rin ang mga paa mo sa lupa at manatiling magalang sa mga taong humahanga at nagmamahal sa `yo." Gihatagan pa ko niya og 2 caps nga may signature.

Asa man ka nag-perform karon?

Sa akong personal blog nga Idol JP Mendoza Fans Club. Ako ning gi-open pag-start sa pandemic. Duna sad koy duha ka bag-ong online show, ang "Angkla Ng Tahanan" every Thursday 9-10 pm with Jay Ng sa "J Brothers" and ma'am Michelle Jimenez ug may daily live din po ako sa Radio Filipino Music (RFM). Nag-online selling sad ko og beauty products sa Skin Talk. Laking epekto ng pandemic kasi dati lagi akong nasa event. Ngayon kailangan talagang kumayod at mag-sideline para mabuhay.

Dugay na ka sa Manila?

Mga 8 years na. Naa ko nagpuyo sa Pasig city. Ang kaliwat sa akong mama taga-Soton Pangdan, Naga, Cebu ug Argao usab ang akong papa. Duha akong anak pero naa sa akong ex-wife.

Asa ni available ang imong "Pusong Duwag?"

Sa tanang digital music stores karong July. Puwede sad sila makapalit nako og CD. Bisan wala na mauso ang CD pero naa gyuy mga OFW nga nihangyo nga bisan one song ra kuno ang sulod nga Pusong Duwag mopalit sila isip souvenir nila nako. Nagbaligya pud kog tshirt ug kalo nga naka-name nako. Kay ang kita ani ako sad ihatag sa akong "Tanging Hiling" community outreach program.

This posting includes an audio/video/photo media file: Download Now

Sugilanon: Anting-anting ni Kludyo

Posted: 23 Jun 2021 05:51 AM PDT

LAMBERTO G. CEBALLOS

Ilaya, Cawayan, Dalaguete, Cebu

Pulis si Cpl. Kludyo. Sakop siya sa CIDG. Nabaniog siya nga nakahupot og anting-anting dihang gikasangka nila ang pundok sa mga durugista nga gipangulohan ni Alias Demonyo, usa ka druglord, didto sa Ermita. Naigo siya apan wala siya mamatay. Ang bala sa kaaway nitapsing sa krus sa rosaryohang iyang gikuwentas ug ang krus nipilit sa iyang agtang. Nagkadugo ang iyang nawong tungod sa samad sa iyang agtang nga gitugdonan sa krus. Didto sa ospital gilugit sa doktor ang krus ug gitambalan ang agtang ni Kludyo. Paglabay sa tulo ka semana naalim ang iyang samad nga nagbilin og uwat sa iyang agtang nga pormag gamayng krus. Sukad niadto iyang namatikdan nga makakita siya sa dautang umaabot ug maghimo siyag lakang aron malikayan o masumpo ang dautang hitabo.

Usa ka higayon naghimo silag buy-bust operation didto sa Calamba. Si Kludyo nga nag-T-shirt lang maoy nagpaka-aron-ingnon nga mopalit og shabu. Dihang nagpaaingon na unta siya sa drug pusher mikidlap ang uwat sa krus sa iyang agtang ug misantop sa iyang hunahuna nga gilaang sab diay siya sa duha ka durugista nga kauban sa drug pusher nga nakahibawo nga si Kludyo usa ka paon lang. Pinaagi sa selpon gitawgan niya si Capt. Castro ug gisultian sa iyang nahibaw-an. Sakay sa police patrol car (nga wa mag-siren) dali da nga nahiabot si Capt. Castro ug tulo ka kauban sa nahimutangan ni Kludyo. Nakalitan ang mga drug pusher. Miibot sila sa ilang armas ug gitiruhan ang patrol car. Mibawos ang mga pulis ug dihang mihunong ang sinukliay sa mga bala ug buto-buto nanghay-ad ang tulo ka durugista sa yuta.

Dihay usa ka buntag samtang nagsakay si Kludyo sa iyang motorsiklo paingon sa estasyon sa kapulisan sa dakbayan, may nasundan siyang motorsiklo nga duha ang nagsakay ug nagsunod sa usa ka awtong itom. Kalit mikidlap ang uwat sa krus sa iyang agtang ug nahanduraw niya ang sunod nga hitabo: patyon sa riding-in-tandem ang nagsakay sa awtong itom. Unya nadunggan niya ang buto-buto sa armas depuygo. Nakita niya nga miurong ang awtong itom. Giibot niya ang iyang kargadang kalibre .45 ug gigukod ang mga kriminal. Dihang nahaduol na siya gitirohan siya sa backrider nga maoy gunman apan wa siya maigo. Mibawos siya ug naigo kini sa bukubuko. Misaliring ang motorsiklo sa mga kriminal. Miibot and drayber sa iyang armas, apan naunhan siya ni Kludyo. Gitawgan niya sa selpon si Capt. Castro. Sa pasiunang imbestigasyon sa CIDG, nasuta nga ang sakay sa awtong itom mao ang usa ka negusyanteng Koreano nga gustong likidahon sa karibal niya sa negusyo nga mga Koreano sab. Samdan ang Koreano ug ang iyang drayber. Gidala dayon sila sa ambulansiya ngadto sa ospital. Pagka sunod adlaw nagbansiwag ang ngalan ni Kludyo sa headline sa Superbalita: CPL. KLUDYO, MIPATAY SA DUHA KA KRIMINAL; KOREANONG NEGUSYANTE NADALA SA OSPITAL.

Daghan pang mga dautang panghitabo nga nakit-an ni Kludyo sa iyang hunahuna pinaagi sa iyang anting-anting. May usa ka babaye nga luguson unta sa iyang uyab sulod sa awto sa usa ka hilit nga dapit ug naagian ni Kludyo nga nagsakay sa iyang motorsiklo. Naluwas niya ang babaye ug gipusasan niya ang lalake. Diha poy usa ka dalagita nga iyang nalabyan samtang kini naglakaw sa unang Mandaue-Mactan Bridge. Kalit mikidlap ang uwat sa krus sa iyang agtang. Maghikog ang dalagita. Dali niya nga gibalikan ang dalagita nga mikatkat na sa barandilyas sa taytayan aron moambak sa dagat. Gikuptan niya ang mga bukton sa dalagita.

USA ka gabii samtang si Kludyo nagsakay sa iyang motorsiklo paingon sa ilang balay, kalit nga mibunok ang kusog nga uwan. Daw umbangol sa usa ka higante ang dalugdog nga miuliot sa iyang mga dalunggan. Ang kilat mitabas sa langit. Nakahangad siya. Mikilat pag-usab ug nabati niya nga ang hait nga tumoy sa kilat miigo sa uwat sa krus sa iyang agtang. Nalagpot siya gikan sa motorsiklo. Wala na siyay kinabuhi paghitugdon niya sa yuta. Wala makahatag kaniyag timailhan sa iyang kamatayon ang iyang anting-anting. (KATAPUSAN)

This posting includes an audio/video/photo media file: Download Now

Balak: Ang pagbati ko kanimo

Posted: 23 Jun 2021 05:51 AM PDT

JESSABELE G. BENTAZAL

Boljoon, Cebu

Ikaw kanako

Bulan sa nagkadaiyang aspeto

Nga gusto kong maangkon

Apan lisod kab-uton;

Atbang nga isla nga gi-ulang

Sa dakong lawod nga gusto kong

Padul-an apan lisod dugtungon;

Taytayan nga gidayan-dayanan

Sa bangaw nga gusto kong subayon

Apan lisod ipadayon.

Ikaw ang matag butang,

Lugar ug panahon nga akong

Kinaham ug gustong mahikap

Apan lisod kang angkunon.

Nia na baya ka diri sa akong dughan

Apan lisod lang gyud nga kita

Mahimong managsama og padulngan.

Dili man mahimong gamiton tika

Aron lang makompleto kining

Antolohiya sa akong mga pagbati.

Busa diha ka na lang usa sa imong suok

Sa umaabot padayon nga maghinuktok.

Pasagdi kong tapuson kining sugilanon

Uban ning pagbati nga walay paglaom.

This posting includes an audio/video/photo media file: Download Now

Balak: Kahimatngon

Posted: 23 Jun 2021 05:15 AM PDT

OLIVER P. FLORES

Sogod, Cebu

Igo lang unta nakong hawiran ang hangin

Apan naunsa ba nga hangtod ang mga agukoy

Sa baybayon mitamihid man kanako?

Nakaingon na lang ko nga maayo pa ang natulog

Nga kakugnan kay duna pay nagluob nga buntog.

Pastilan ning akong kinabuhi nagsalig lang

Sa palad sa kaluoy! Mora kog buang nga way

Distinasyon sa paglaag-laag.

Unsaon man gud kagang-kagang ang sakyanan

Nga akong gisakyan padulong sa gusto kong adtoan.

Aw, naa gyud ang pagka tapulan sa pag-ugmad

Sa lintunganay sa kaugmaon. Pila pa ba ka buok

Intawon ang ingon ani kanako?

Karon nga pandemya naghangad lang sa ayuda

Nga mahulog gikan sa langit. Sige lang gihapog

Apong sa gilistang mga numero nga nanggawas

Sa swertres iyawat nga makagurdo ug makadaog.

Na, misamot nuon katimawa kay kanunay buslot

Ang bulsa. Apan karon sa akong pagmata ning

Malinawon nga kabuntagon, nabatyagan ko na

Ang mga kamot sa paningkamot nga maoy

Husto nga akong hawiran aron magpadayon

Ang pagpitik sa pulso sa kaugmaran sa kinabuhi!

This posting includes an audio/video/photo media file: Download Now

140K kapin nabakunahan sa Cebu City

Posted: 23 Jun 2021 05:15 AM PDT

Niabot na og 140,269 ka mga individual sa dakbayan sa Sugbo ang nabakonahan batok sa coronavirus disease 2019 (Covid-19).

Base sa record sa Cebu Vaccination Statistics, anaa na sa 14.80% ang nakadawat og vaccine gikan sa kapin o kulang 900,000 ka mga tawo nga nag-edad og 18 anyos pataas gikan sa Cebu City.

Sa maong gidaghanon, 95,595 ang nakadawat sa first dose samtang 44,674 ka mga tawo nakakumpleto na sa ilang 2nd dose gamit ang Sinovac, AstraZeneca, Pfizer ug Sputnik.

Si Dr. Jeffrey Ibones, pangulo sa Cebu City Health Department, nagkanayon mga mobalik na usab sila karong adlawa, Hunyo 24 sa pagpamakuna ngadto sa ilang lima ka vaccination sites.

Kini human naabot ang 5,000 doses sa Sinovac kagahapon ug kon mahurot na usab karon o ugma gumikan sa kadaghan sa magpabakuna, i-suspend na usab nila ang pag-injection.

Nagsunod sa Cebu City nga labing daghan og nabakunahan mao ang Mandaue City (64,927), Lapu-Lapu City (28,370) ug Province of Cebu ( 87,293) kun 320,859 sa kinatibuk-ang Sugbo.

Ang 237,541 maoy nakadawat sa first dose samtang 83,318 ang nakakumpleto na sa 2nd doses kun fully vaccinated individuals base sa ilang data niadtong Hunyo 22.

This posting includes an audio/video/photo media file: Download Now

Task force sa EOC mosusi sa mga establisemento

Posted: 23 Jun 2021 05:12 AM PDT

Ang Cebu City Government niumol og Emergency Operations Center (EOC) Task Force para maoy maniid kon gisunod ba sa mga balay patigayon ang health protocol batok sa coronavirus disease 2019 (Covid-19).

Si Konsehal Joel Garganera, deputy chief implementer sa EOC, nagkanayon nga adunay 16 ka mga sakop ang EOC Task Force kinsa maoy molista sa mga kalapasan sa mga business establishment.

"We are not here to make things hard for them kay nasayod ta unsa kalisod ang panahon. Agi ra ni og abag kanila sanglit ang pagsunod sa mga protocol mao ra ang dalan nga maluwas ta aron dili ta mabalik sa kanhi quarantine status nga estrikto," padayag ni Garganera.

Sa usa ka semana nilang pag-monitor, dul-an na sa 10 ka mga business establishment ang naisyuhan og show cause order gikan sa City Goverment gumikan sa kalapasan sama sa wa pagpatuman sa social distancing, wa pagsul-ob og face mask.

Ang EOC Task Force maoy mo-monitor sa operation sa mga mall ug ubang business eatablishment panahon sa adlawan sanglit anaa ang Cebu City Police (CCPO) ug Prevention, Restoration, Order, Beautification, and Enhancement (Probe)panahon sa gabii. (PAC)

This posting includes an audio/video/photo media file: Download Now

P3.7B socialized housing sa Lapu

Posted: 23 Jun 2021 05:11 AM PDT

Matuman ang dugay na nga gipandandoy sa mga Oponganon nga makabaton og socialized housing alang sa mga kabus sa Dakbayan sa Lapu-Lapu.

Kini human nga nagpinirmahay na og joint venture agreement (JVA) ang kagamhanan ug Premium Mega Structures Inc. (PMI) sa pag-ugmad sa kapin sa 128 ka ektaryang luna sa Barangay Canjulao nga walay gasto ang kagamhanan.

Si Lapu-Lapu City Mayor Junard Chan maoy mipirma sa kasabotan sa habig sa kagamhanan ug si Francis Lloyd Chua, presidente sa sa PMI, sa habig sa kontraktor.

Ang seremonya sa pagpirma sa JVA gipahigayon sa Liberty Shrine sa Barangay Mactan kagahapon, Hunyo 23, ug gisunod dayon ang groundbreaking sa dapit human sa pinirmahay.

Moabot sa P3.7 bilyunes ang budget sa pagpatukod sa Lapu-Lapu City Socialized Housing and Urban Development Project.

Matod ni Chan, ang 25 ka ektarya sa 128 ka ektaryang luna gitagana sa socialized housing ug ang uban alang sa industrial ug commercial development

"This is another 'City' a little city because this 25-hectare, aduna siyay adjoining nga 103-hectare development, industrial, commercial, mixed ni siya nga mas daghan pa nga ilang mahimo panginabuhian sa maong area, mas bibo pa kaysa ilang gipuy-an ang ilang kabalhinan," matod ni Chan.

Gikatakdang mahuman ang socialized housing sa mosunod duha ka tuig ug makabenepisyo ang moabot sa 3,000 ka mga Oponganon.

Niadtong Mayo 2021 ang konseho sa dakbayan pinangulohan ni Bise Mayor Celsi Sitoy nipasar og resolusyon nga nagtugot kang Chan nga mosulod og kasabotan tali sa PMI.

Ang resolusyon nagkanayon nga si kanhi Presidente Gloria Macapagal Arroyo miluwat og proclamation no. 346 niadtong Marso 26, 2003 nga maghatag og moabot sa 25.24 ektaryang luna sa Canjulao alang sa socialized housing.

"At last, the most-awaited, long-time dream of the Oponganon, nga makabaton na sila og disenteng pagpuyo, ug na feel nila unsa sila ka importante," matod ni Konsehal Junrey Gestopa. (GCM)

This posting includes an audio/video/photo media file: Download Now

Programa sa Cebu City gilusad aron pagpuhag sa kurapsiyon sa traffic enforcers

Posted: 23 Jun 2021 05:09 AM PDT

Suportado ni Mayor Edgardo Labella ang paglusad sa programa nga "Itug-an sa OIC-Traffic" aron mawagtang o kaminosan ang pagpangilkil sa traffic enforcers ngadto sa traffic violators.

Ang officer in-charge (OIC) sa Cebu City Transportation Office nga si Lyntoni Alburo ug ang hepe sa Traffic Enforcement Unit (TEU) nga si Police Lt. Colonel Clark Arriola gusto nga dili na masubli ang gibuhat sa usa ka job order nga traffic enforcer nga nangayo og kwarta bugti sa traffic violation sa usa ka motorista.

"I am one with my fellow Cebuanos in this community effort and I am glad that the CCTO has come up with this initiative," padayag ni Labella.

"We do not want rotten eggs to compromise the hard work of traffic enforcers nga nagtinarong sa ilang trabaho," matod sa mayor base sa iyang Facebook page.

Sa nakalabay nga semana, ang traffic enforcer nga si Roger Cadutdut ang gi-entrap sa CIDG-7 gumikan sa pagpangilkil sa operatiba sa maong buhatan.

Sa wala pa gidakop Cadutdut, adunay nagmaneho og SUV nga iyang gikilkilan og P2,000 aron dili ma-impound ang iyang sakyanan.

Wala makauyon ang mayor sa gihimo sa enforces hinungdan nga iyang gidayeg ang programa sa pagsikop sa mga malapasong awtoridad.

Para sa mga adunay reklamo sa kurapsyon, mahimo ninyong i-text sa TEU sa Cebu City Police Office (CCPO) ug sa CCTO sa 0906-538-9631 or 0991-224-16-19 para mapahibawo ang mga awtoridad sa hitabo. (PAC)

This posting includes an audio/video/photo media file: Download Now

Kaso sa Covid-19 sa Mandaue misaka og gamay kada adlaw

Posted: 23 Jun 2021 05:04 AM PDT

Bisan sa padayong pagpamakuna, nakita nga dunay gamayng pagsaka sa kaso sa Covid-19 sa Dakbayan sa Mandaue ning Hunyo tungod sa kakompiyansa sa mga tawo nga mogawas nga wala mosunod sa insaktong health protocol.

Mao kini ang gibutyag ni August Lizer Malate, ang pangulo sa Mandaue City Emergency Operations Center (EOC).

Sa ilang datus sa Mayo 15-31, 2021 ang madungag nga kaso matag adlaw nag-average og walo.

Apan sa unang duha ka semana, natala nila nga 10 ang average nga kaso matag adlaw ug ang katapusang duha ka semana, naabot na kini sa 15 ka kaso.

Sa Vaccination Operations Center (VOC), natala nila niadtong Hunyo 10, nakabakuna og 30,282 ka indibiduwal alang sa first dose ug 4,708 ka tawo sa second dose.

Niadtong Hunyo 17, aduna na silay nabakunahan nga 35,429 alang sa first dose ug 4,778 alang sa second dose.

Gipasabot ni Malate ngadto sa katawhan nga bisan paman nga nagpadayon ug nagkadaghan na ang gibakunahan, dili gihapon mokomppyansa ug mutuman gihapon sa minimum health protocol.

Gani, nagpadayon gihapon ang pagsuroy ug pamadlong sa kapulisan ug sa mga barangay tanod sa mga indibidwal nga di motuman sa minimum health protocol. (KFD)

This posting includes an audio/video/photo media file: Download Now

Leksyunon si Donaire

Posted: 23 Jun 2021 04:01 AM PDT

Gipabuhagay ni Johnriel Casimero nga sama sa iyang umaabot nga kontrang kababayan nga si Nonito Donaire, tinguha sab niyang haruson paghakot ang world titles sa bantamweight division.

Sa interbyu sa bloodyelbow.com, nagkanayon ang gitawag nga 'Quadro Alas' nga nakapanimaho na siya sa iyang destiniya nga mahimong undisputed world champion.

Ang duha ka mga boksidor magbinukbokay karong Agusto 14, 2021 sa Carson, California alang sa talagsaong Pinoy vs. Pinoy unification bout.

Ning awaya, isugal ni Casimero ang iyang World Boxing Organization (WBO) bantamweight title alang sa World Boxing Council (WBC) belt sa gitawag og "Filipino Flash".

Gipasabot ni Casimero nga bisan supak siya sa ideya nga magkrus ang dalan sa duha ka mga Pinoy alang sa usa ka unification bout apan andam siyang mosagubang niini alang sa iyang pangandoy.

Nangayo og despensa si Casimero sa mga Pinoy nga kinahanglan niyang atbangon ang usa ka kababayan apan kinahanglan kini niyang buhaton hilabi na kay magsilbe kining pultahan aron makasulod siya sa pound-for-pound ranking.

Alang ni Casimero, angayang magmalipayon ang mga Pinoy ning ilang panagharong ni Donaire gumikan kay bisan kinsa makadaog, hayan dungog lang gihapon kini sa Pilipinas.

Gibutyag ni Casimero nga gihimo niyang pampadasig ang iyang kasinatian sa labing una niyang pagtaak sa Amerika. Niadtong higayuna, grabe ka bantugan si Donaire.

Matod ni Casimero nga misuway siya pagduol kang Donaire isip usa ka kababayang boksidor apan wala siya panumbalinga niini.

Karon nga usa na siya ka three-division world champion, batbat ni Casimero nga gusto niyang tudloan og leksyon si Donaire sa pag-snub kaniya.

Gipasabot ni Casimero nga niadtong higayuna, gusto unta siyang makig-sparring ni Donaire aron makakuha siya og leksyon apan nibalibad ang kampo ni Donaire.

Hinuon gitataw ni Casimero nga taas ang iyang respeto sa abilidad ni Donaire apan alang kaniya, iyaha nang panahon karon.

Kon molampos siya karong Agusto 14, asoy ni Casimero nga gusto niyang kontrahon sa laing unification bout ang gitawag og "Monster" nga si Japanese Naoya Inoue, ang tag-iya sa World Boxing Association (WBA) ug International Boxing Federation (IBF) bantamweight titles.

Tinguha ni Casimero nga siya maoy mobawos kang Inoue, kinsa nilupig kang Donaire sa usa ka unification bout niadtong Nobiyembre, 2019. (ESL)

This posting includes an audio/video/photo media file: Download Now

12 ka armadong mga tulisan misud sa 2 ka balay sa Toledo City

Posted: 22 Jun 2021 06:02 PM PDT

Duha ka mga balay sa Sityo Tipolo, Barangay Bato, Dakbayan sa Toledo gisulod sa labing minos 12 ka mga tulisan, duha kanila mga babaye, sa alas 11 sa gabii sa Martes, Hunyo 22, 2021.

Ang mga tulisan nagsakay og duha ka four-wheeled nga mga sakyanan ug tulo ka scooters, nakadala og labing minos P300,000 nga balor sa mga alahas, gadgets ug cash gikan sa tulo ka mga babaye.

Ang armadong mga tulisan nga pulos nagtaptap sa ilang mga nawong pinugsanay nga ningsulod sa mga balay pinaagi sa paghulga sa mga tag-iya.

Matod ni Police Lieutenant Colonel Junnel Caadlawon nga unang gisulod sa mga tulisan mao ang balay ni Marvie Candol, 31, dunay kapuyo.

Si Candol gipaabli sa mga tulisan sa pultahan sa iyang balay ug dihang nakasulod, gilabni ang iyang bag nga duna lay sulod nga P200.

Human niini, niadto ang mga tulisan sa pikas balay diin didto ang mga biktima nga sila si Christine Brusas Amodia, 34, dunay kapuyo ug si Sherilyn Delposo Amodia, 27, minyo.

Ila usab nga gipaabli ang mga biktima sa pultahan, apan wa mosugot, hinungdan nga gibuak sa usa sa mga tulisan ang bildong bentana aron makasulod.

Ilang nakuha ang mga cell phone, tablets, mga singsing, bracelet ug kwentas.

Human niini, daling nanibat ang mga tulisan subay sa national highway. (GPL)

This posting includes an audio/video/photo media file: Download Now

2 patay sa kilat samtang nanginhas

Posted: 22 Jun 2021 07:39 AM PDT

Mikalas og duha ka kinabuhi atol sa pagbundak inubanan sa kilat niadtong Martes, Hunyo 22, 2021 sa dihang duha ka lalaki nga nanginhas sa dagat sa may Pajara, Barangay Umapad, Mandaue City ang gikatahong naigo sa kilat.

Giila ang mga biktima nga sila si Rey Cuyam, 28, nag-abang sa Barangay Umapad ug lumad nga taga Bohol, ug si Erwin Hirasol, 33, taga-Barangay Mantuyong, Mandaue City.

Sa Facebook Live ni Glendo Demape, barangay personnel sa Umapad nga miresponde sila sa lugar human nakadawat og taho nga adunay naigo sa kilat sa maong lugar.

Nakita sab sa maong Live ang nagbuy-od na nga patayng lawas nila ni Cuyam ug Hirasol pipila ka metros gikan sa suba.

Matod ni Danilo Cuyam, ig-agaw ni Rey, nga lima sila nga nag-uban og panginhas apan pagngi-ob na sa langit nagsugod na ang kilat mihaw-as na siya uban ang duha nila ka mga kauban samtang si Rey ug si Hirasol nagpabilin.

Human sa kapin sa 30 minutos paghunong sa uwan, mibalik silang Danilo sa lugar aron pag-apas sa duha apan nahibulong na sila nga naghigda na kini sa dike sa sapa.

Sigon ni Demape nga nanginhas lang unta sila tungod wala silay trabaho niadtong adlawa.

Gikontak sab nilang Demape ang Scene of the Crime Operatives (Soco) aron pagkuha sa patayng lawas ug paghatod niini sa punerarya.

Naabot sab sa lugar ang kabanay ug ang asawa ni Cuyam diin wala sab siya makatuo sa nahitabo sa iyang bana.

Gikompirmar sab sa City Disaster Risk Reduction Management Office (CDRRMO) Buddy Ybañez ang maong insidente.

KUYAW

Gani, si Ybañez nagkanayon sa Superbalita Cebu, nga delikado ang pagkaligo og dagat kung adunay uwan labi na kung adunay kilat.

Matod niya nga dako kining risgo tungod sa panahon nga maigo ang tubig sa kilat sigurado nga makuryentehan ang naligo sa maong dapit.

Tungod sa maong panghitabo, makig-coordinate ang CDRRMO ngadto sa barangay labi na ngadto sa mga coastal barangays nga kung adunay thunderstorm o bisan uwan lang apilon og suroy ang kadagatan aron pagsiguro nga walay nangaligo.

Kon aduna silay makit-an, kinahanglan nga badlungon kini og pahaw-ason sa dagat aron paglikay sa disgrasya.

Gawas sa kilat, sigon ni Ybañez, angay sab nga bantayan ang pagsaka sa tubig labi na sa sapa ug sa baha, ug kung adunay kusog nga hangin kinahanglan nga magpalayo sa mga poste o kahoy aron malikayan ang disgrasya kon ugaling matumba kini.

This posting includes an audio/video/photo media file: Download Now

‘Kung ayaw magpabakuna ipaaresto kita’ - Duterte

Posted: 22 Jun 2021 07:39 AM PDT

Kadtong nagdumili nga magpabakuna batok sa coronavirus disease hayan ipadakop, kini maoy pasidaan ni Presidente Rodrigo Duterte

"Itong mga g*** na ayaw magpabakuna, and they are really the carriers. If they can travel from one place to another, carrying the virus and then contaminating other people. Kayong ayaw magpabakuna, ipabakuna ko 'yong itong sa bakuna ng baboy, 'yong Ivermectin.

"Don't get me wrong. There is a crisis being faced in this country. There is a national emergency. Kung ayaw mong magpabakuna, ipaaresto kita. At ang bakuna ay galing itusok ko sa puwet mo," tipik sa pamahayag sa presidente atol sa televised public address.

Gitahasan ni ang mga barangay opisyal sa paglista niadtong mga kuwalipikado nga mabakunahan apan nagdumili nga magpa-vaccine. (SunStar Philippines)

This posting includes an audio/video/photo media file: Download Now

EO ni Gwen ihikling lang una

Posted: 22 Jun 2021 07:34 AM PDT

Human sa 24 oras nga pagluwat sa Executive Order No. 23 ni Cebu Governor Gwendolyn Garcia sa Hunyo 21, 2021 kasamtangan nga ipadaplin una.

Pahibawo ni Garcia atol sa gihimong out of town live presser sa Martes, Hunyo 22.

Ang EO No. 23 nimando sa concerned agencies sa pagtuman sa "swab-upon-arrival policy" ug ang duha ngadto sa tulo ka adlaw nga pagkwarantina sa hotels sa mga mipauli nga overseas Filipino workers (OFWs) ug returning overseas Filipinos (ROFs) sa Sugbo.

Ang EO 23 mipasidan-an sa tanang ahensya nga mahimong pasakaan og kasong administratiba ug kriminal sama sa kidnapping ug illegal detention kon tumanon niini ang 10 ka adlaw nga kwarantina sa Inter Agency Task Force for the Management of Infectious Disease (IATF-MEID).

Sa labing uwahing pamahayag ni Garcia, na desisyonan niining isalikway una ang kamandoan sa probinsya subay sa pamahayag sa Presidente niadtong Lunes, Hunyo 21.

"This EO, I am now setting aside in deference to the President even as we look forward to the scheduled meeting this 28th of June with Secretary Duque and the same technical experts who had advised the President last night as regards to the need to implement IATF guidelines (in Cebu)," matod ni Garcia.

Apan taliwala sa paghikling sa EO No. 23 magpadayon ang "swab-upon-arrival" policy ngadto sa mga mangabot nga OFWs ug ROFs lakip na ang ikaduhang swabbing paglabay sa pito ka adlaw, matod pa ni Garcia.

Subay niini, nagpasalamat usab si Garcia sa pasalig ni Presidente Duterte sa mga mopauli nga mga overseas Filipinos nga abagahon na sa nasudnong kagamhanan ang bayrunon sa magkwarantina ngadto sa mga hotels.

"We hope that Secretary Duque and these technical experts will keep an open mind to come to Cebu observe what is happening in Cebu, to listen as well to the science and experience and actual ground reality that we shall present," matod ni Garcia.

IATF TUMANON

Ang hepe sa Bureau of Quarantine, Dr. Terence Anthony Bermejo, nipahibawo nga ang IATF's quarantine protocol ang ilang subayon alang sa mga manguli nga OFWs ug ROFs sa Sugbo.

Matod pa nga ang swab upon arrival policy sa probinsiya magsilbing dugang sa gipangayo nga RT-PCR test atol sa ikapit ka adlaw nga quarantine period.

"Actually mag hybrid na siya, kang Gov. Gwen ug sa IATF," pasabot ni Bermejo.

MOTAHOD NI GWEN

Samtang ang kapulisan sa Lalawigan sa Sugbo mosunod sa ordinansa sa Probinsiya sa Sugbo.

Matod ni Police Colonel Engelbert Soriano, ang hepe sa kapulisan sa lalawigan, nga ilang sundon kon unsa man ang nalatid sa ordinansa sa probinsya gawas lang kon adunay kamandoan ang korte nga nagdeklara nga illegal kini.

Ang kapulisan gitahasan nga mo-monitor sa mga OFW ug ROF nga nakapauli na sa ilang tagsa-tagsa ka mga panimay aron dili kini maka gawas-gawas samtang wala pa sila mapaubos sa ikaduhang swab test sulod sa ika pito ka adlaw.

TRI-CITIES

Ang Cebu City Government makigtambayayong sa duha ka local government unit, Lapu-Lapu ug Mandaue,, aron magkahiusa ang ilang polisiya may labot sa manguli nga OFWs ur ROFs.

Apan ang klaro mao ang pagpaubos sa quarantine didto sa mga hotel nga accredited sa DOH ug DOT diin ang OWWA maoy mobayad.

Si Konsehal Joel Garganera, deputy chief implementer sa EOC nagkanayon nga gusto sila nga magkahiusa ang polisiya sa Mandaue City ug Lapu-Lapu City labot sa pag-atiman nila sa mga OFW ug ROF ug pagsiguro adunay igong hotel rooms. (ANV, WBS, AYB, PAC)

This posting includes an audio/video/photo media file: Download Now

Pfizer nga bakuna miabot sa Leyte; Ormoc gidayeg sa IATF, DOH

Posted: 22 Jun 2021 07:34 AM PDT

Gipili sa National Inter-Agency Task Force (NIATF) for the Management of Emerging Infectious Diseases ug Department of Health (DOH) ang Ormoc City nga maoy hatagan sa inisyal nga doses sa Pfizer BioNTech vaccine sa mga lugar sa rehiyon 8.

Matod sa IATF, ilang nakita ang ka hapsay ug kanindot sa sistema sa vaccine roll out sa Dakbayan sa pagpangulo ni Mayor Richard Gomez.

Dugang pa sa DOH, sa tibuok region 8, ang Ormoc City lang usab ang dunay kapasidad nga mabutangan sa bakuna gikan sa Pfizer tungod sa dako nga cold chain facility niini sa Superdome diin gipamutang ang ubang bakuna sama sa AstraZeneca ug Sinovac.

Kagahapon, Martes, Hunyo 22, niabot sa DZR airport sa Tacloban City ang mga bakuna sa Pfizer ug gidritso tanan pagdala sa Ormoc City. Mokabat sa 1,170 doses ang inisyal nga gihatod sa Ormoc ug masundan pa sa mosunod nga mga semana.

Matod sa DOH, prayoridad nga mataagan niini ang pre-listed nga nga frontline health worker, senior citizens ug mga hingkod nga dunay mga gihambin nga sakit.

"The National IATF against Covid-19 vaccine cluster identified Ormoc City as pilot implementer of the Pfizer vaccine inoculation of the region in consideration of cold chain facility at Superdome and the presence of an adequate vaccination team," matod sa DOH.

SISTEMA SA ORMOC

Ang kada barangay dunay gipanghatag nga form sa kada pamilya diin gipasuwat ang tanan nga impormasyon ug gipangutana kon andam ba magpabakuna.

Gi-consolidate sa LGU Ormoc ang mga form gikan sa barangay. Gigamit ang mga mall, superdome ug mga barangay covered court sa vaccination roll out.

Dunay lima ka proseso nga agian sa vaccination area; 1. pre-orientation, 2. registration, 3. screening, 4. vaccination proper ug 5. observation area.

Base sa report sa City Health, niabot na sa 16,499 ka mga tawo ang nabakunahan hangtod sa Hunyo 18, 2021.

MAPASALAMATON

Si Gomez, sa iyang bahin, mapasalamaton naman sa pagdayeg sa IATF/DOH sa vaccine roll out sa Siyudad.

"They have seen our preparation and inoculation structure is well laid out. As our people have experienced in our ongoing vaccination that our system is flawless thus the confidence in the Pfizer roll out in Ormoc City," matod sa mayor.

Gipaabot nalang usab sa Siyudad ang 270,000 doses nga bakuna gikan sa AstraZeneca nga gipundohan ug gipalit mismo sa kagamhanan para sa tanan nga mga lumolupyo.

Ugmang adlawa, Miyerkules, Hunyo 23, sugdan ang inoculation sa Pfizer sa Superdome. (JKDP)

This posting includes an audio/video/photo media file: Download Now

Pamakuna sa Lapu-Lapu i-schedule na

Posted: 22 Jun 2021 07:33 AM PDT

Aron kalikayan kalikayan ang pagdasok sa mga magpabakuna sa mga vaccination site sa dakbayan sa Lapu-Lapu, i-schedule na ang oras sa pag-adto.

Kini ang gipahibawo ni James Sayson, deputy local vaccination operations officer sa kagamhanan.

Matod ni Sayson nga ilang nabantayan niadtong Biyernes, Hunyo 18, sagad sa mga tawo nga magpabakuna moadto sa alas 8 sa buntag ug ala 1 sa hapon gumikan kay nagdali nga makauli dayon.

Apan ilang nabantayan nga grabe na hinuon ang pagdasok sa mga tawo nga moresulta nga dili na masunod ang nakahan-ay nga mga lakang sa pagpamakuna. Delikado usab nga dili na masunod ang physical ug social distancing.

Gumikan niini, nadesisyonan sa kagamhanan nga inay ablihan ang vaccination site sa ganahan magpabakuna sa alas 8 sa buntag hangtod sa alas 5 sa hapon, ila kini ibahin-ibahin og schedule nga oras.

Adunay alas 8 hangtod sa alas 10 sa buntag. Adunay alas 10 hangtod sa alas 12 sa udto ug adunay ala 1 hangtod sa alas 3 sa hapon.

"Gi-adjust nato para di mag-abot ang influx sa tawo.Atong gi-divide og ka tulo. So, ma spread out gyud ang mga tawo, di na magdasok mao na mga adjustment atong gihimo sa nakita natong problema last Friday," pagpasabot ni Sayson.

Samtang aron usab han-ay ang pagpamakuna sa duha ka vaccination sites sa dakbayan, nga gitagan-an sa bakunang Pfizer, ang usa niini wala lang una nila gipaabot og 1,170 nga target matag adlaw.

Ang mga vaccination site mao ang Hoops Dome sa Brgy Gun-ob ug City Auditorium sa Brgy Poblacion.

Kini samtang nag familiarize pa sa sistema ang mga vaccination personnel aron usab di sila magkalibogay sa pagpamakuna, sumala ni Sayson.

Moabot 600 lang una ang gitaganang target sa City Auditorium samtang 1,170 sa Hoops Dome.

Sa mosunod mga adlaw, dugangan kini og tag 200 o 300 hangtod nga mamakuna na sila og 1,170 matag adlaw.

Sa maong dagan sa pagpamakuna, mahurot ang 11,000 nga bakunang Pfizer nga gitagana sa dakbayan gikan sa Departmemt Of Health DOH-7 sunod semana. (GCM)

This posting includes an audio/video/photo media file: Download Now

Bakuna sa Pfizer sa Cebu City nahurot na

Posted: 22 Jun 2021 07:29 AM PDT

Nahurot na ang 10,000 doses sa Pfizer nga bakuna sa Miyerkules, Hunyo 22, 2021 human sa lima ka adlaw nga pagpamakuna sa Siyudad sa Sugbo.

Matod ni Konsehal Dave Tumulak, kinsa maoy nag-monitor sa vaccination rollout sa dakbayan, dali nga nahurot ang bakunang Pfizer gumikan sa kadaghan sa gustong magpatusok sa mao nga brand.

Matod ni Tumulak nga nagsugwak ang mga tawo sa tulo ka mga vaccination site sama sa University of Cebu (UC) Banilad, University of Cebu (UC) Sambag 1 ug Robinsons Galleria, human gianunsyo nga niabot ang Phizer sa niaging semana.

Gumikan niini, suspendido na usab ang vaccination sa first dose sa Pfizer, sugod karong adlawa, Hunyo 23.

Apan dili angay nga mabalaka ang mga nakadawat sa 1st dose sa Pfizer sa nakalabay nga lima ka adlaw sa ilang pagpabakuna sanglit sigurado na nga adunay 2nd dose nga gitagana alang kanila paglabay sa 21 ka adlaw.

Matod ni Tumulak nga posible karong semanaha, aduna na say laing batch sa vaccine ang moabot para sa Cebu City.

Apan ang tanan magdepende sa Department of Health sanglit sila ang tugyanan gikan sa national. Ang Siyudad sa Sugbo nakabakuna na og 80,000 kapin ka mga tawo sukad gisugdan ang vaccination rollout sa Siyudad. (PAC)

This posting includes an audio/video/photo media file: Download Now

Editoryal: Dayalogo mas maayo

Posted: 22 Jun 2021 07:27 AM PDT

Human nangugat sa iyang gusto, kalit mikalma si Cebu Governor Gwendolyn Garcia sa standoff tali sa Malacañang bahin sa health protocol nga ipatuman sa Mactan Cebu International Airport (MCIA) alang sa overseas Filipino workers (OFWs) ug returning overseas Filipinos (ROFs).

Pipila ka oras human sa pamahayag ni Presidente Rodrigo Duterte nga pabor sa Inter-Agency Task Force for the Management of Emerging Infectious Diseases (IATF) kagahapon sa buntag, Hunyo 22, 2021, si Garcia nipadayag pagka hapon sa samang adlaw nga ihiklin una niya ang Executive Order (EO) 17 ug sundon sa MCIA ang gilatid sa IATF.

Nahadlok kaha si Garcia sa pamahayag ni Duterte nga isangon sa Department of Interior and Local Government (DILG) ang iyang kapalaran isip gobernador? Apan giklaro niya nga iyang paabuton una ang dayalogo tali sa IATF karong Lunes, Hunyo 28. Wala hingpit gipadaplin ang iyang EO 17.

Ang standoff nitumaw dihang niinsister si Gwen sa pagpatuman sa EO 17 bahin sa swab-upon-arrival policy ug nihulga nga pasakaan og kaso ang mga kawani sa MCIA nga dili mopatuman sa ordinansa sa Hunta sa Lalawigan. Samtang sa IATF, ang OFWs ug ROFs ipahiluna sa hotel ug adto na sa ikapito ka adlaw i-swab.

Nabingka. Napiit ang awtoridad sa MCIA. Nimugna og kalibog. Apan sa ulahing pamahayag sa gobernador, medyo nakaginhawa ang tanan sa MCIA, apan nag-antos una ang OFWs ug ROFs.

Maayong dunay dayalogo sa pagkab-ot sa win-win solution. Dili magpatas-anay og garbo. Daghang mapagan.

Kon buot hunahunaon, pareho silang kaalyado sa administrasyon. Kon masiak sa dayon ang ilang alyansa, ang oposisyon nagkatawa. Basin panahon na sab nila sa pagdumala. Si Duterte namiligro usab sa resbak.

This posting includes an audio/video/photo media file: Download Now

Lonzon: Sunog sa Ma. Cristina Extension

Posted: 22 Jun 2021 07:26 AM PDT

Duna lang koy ikasaway sa bombero nga niresponde sa sunog sa Ma. Cristina Extension sa Barangay Capitol Site, Cebu City kahahapon, Hunyo 22.

Nakasaksi ko sa sunog ug apil sa nakalimtan kay duol ra kaayo sa amo ug one block ra ang distansya.

Kon wa nako sinyasi ang drayber sa fire truck sa usa sa mga barangay, di unta mosud sa luyo nga bahin sa nasunogan ug didto magtapok sa atubangan.

Sayop pa gyud ang pag-parking sa driver sa fire truck kay diha sa tunga sa karsada ug di makaagi ang laing fire truck .

Kon wa ko magsige og singgit nga ipadaplin ug i-abante sa unahan aron makasud ang ubang bombero, hurot unta ang tanang balay.

Nakaingon ko nga kuwang sa training ang ubang bombero nga nadistino sa barangay. Sentido komon lang unta. Kon dunay sunog iapil ang luyo ug di magtapok sa atubangan sa nasunogan.

GOV. GARCIA

Di ba kaha hinuon si Cebu Governor Gwen, Garcia ang maapiki sa ordinansa sa sa Hunta Provincial sa Sugbo, nga ipatuman ang swab-test-upon-arrival?

Ilabi na nga iyang gihulga ang mga ahensya sa gobiyerno nga mipatuman ug misunod sa mga lagda sa IATF nga sa ikapito ka adlaw na i-swab (ang moabot nga overseas Filipino workers ug returning overseas Filipinos ).

Pasakaan niya og kaso ang mga sakop sa Department of Health, Bureau of Quarantine, Department of Tourism, Philippine National Police ug uban pa.

Naa may executive order si Presidente Rodrigo Duterte nga maoy gisunod sa Inter Agency Task Force (IATF)

Ug tungod sa gihimo sa gobernador, naay warning si Duterte sa pagsunod sa maong lagda. Delikado ang Presidente na iyang kaaway.

Kining gihimo ni Gwen sakripisyo sab gayud sa mga OFW nga maoy naapektahan sa hugot nga pamaagi nga gikonsiderar nga usa ka matang sa paglisudlisod.

Apan bug-at sab kaayo ang punto sa IATF kay misud na sa Pilipinas ang Delta Covid variant sa India nga mas delikado pa sa Covid-19 gikan sa China.

Matud sa World Health Organization (Who) kuyaw ang mag-positive sa Delta variant kay maospital man gayud. Kon dili madali, posibling moresulta sa kamatayon.

This posting includes an audio/video/photo media file: Download Now

Diputado: Plaka sa sakyanan

Posted: 22 Jun 2021 07:26 AM PDT

Nagsugod ang estorya sa dihang nasakpan ang sakyanan sa gobiyerno nga nag-gamit og plaka nga peke. Gidakop kini sa HPG human mireklamo ang usa ka mayor.

Tuod man, nahibaw-an nga ang plaka nga gigamit nakarehistro sa laing sakyanan nga atua sa laing probinsiya.

Unya imbes duha ka plaka gamiton, nahibaw-an sab nga usa ka plaka ray gigamit.

Matod pa sa abogado sa probinsiya, 'justified' ra kuno tong pag-gamit sa peke nga plaka kay legitimate man kuno ang ilang gibuhat nga operasyon.

Tungod kay justified man, gipabuhian sa abogado ang sakyanan. Gipatawag silang tanan sa usa ka meeting sa usa ka bokal og tuod man, gibalita na dayon nga resolved na ang maong problema.

Resolved, as in, nasolbad na?

* * *

Giunsa kaha to "pag-hilot" sa HPG ang ilang record nga aduna silay nadakpan nga sakyanan nga nag-gamit sa peke nga plaka unya ila ra pod nga gibuhian?

Unsa kahay ilang gibutang sa ilang record bahin sa maong kaso?

Mahimo diay nga buhian lang nila ang "body of the crime" bisan way order sa korte?

Mahimo diay nga mohukom lang ang abogado sa probinsiya kabahin sa illegal nga paggamit sa plaka nga justified kunohay unya pabuhian na dayon ang nadakpan nga sakyanan?

Mahimo diay nga "tayo-tayo" na lang ang balaod karon?

* * *

Nganong midako man ning isyoha ni?

Una, lisod palandungon nga i-justify lang ang pag-gamit sa peke nga plaka sa usa ka sakyanan sa gobierno.

Ikaduha, ang paggamit og peke nga plaka dakong supak sa balaod. Wala mag-ingon ang balaod nga mahimo ra nga i-justify depende sa katuyoan sa paggamit.

Ikatulo, mahimo diay nga sabotsabotan lang ang usa ka illegal nga kalihokan, dili na moagi sa husto nga proseso sumala sa balaod?

Ikaupat, kon mao na kini ang bag-o nga sistema sa HPG, nindot pod unta kon ibandilyo nila kini aron mahibaw-an sa mga katawhan, dili kay tagotagoan lang.

Ikalima, kon maayo o husto pa ang katuyoan sa nag-gamit sa sakyanan, nganong kinahanglan pa man mogamit og peke nga plaka?

Kanus-a magsugod ang pag-gamit sa maong peke nga plaka, sukad pa sa una?

* * *

Dihay panahon nga matod pa, usa ka sakyanan nga gi-isyo sa usa ka bokal sa probinsiya nadisgrasya.

Hilabihang gubaa gyod ang sakyanan.

Pag-abot sa mga kapolisan, wa na nila makit-i ang plaka sa maong sakyanan. Sama sa tagulilong nga nahanaw kini.

Unsa may punto niini?

Red plate ang gamit sa maong sakyanan, buot ipasabot, sakyanan kini sa gobierno.

Kon wa diha ang plaka, walay makasulti nga sakyanan kini sa gobierno. Gituyo pagtangtang ang plaka aron dili malambigit ang bokal sa maong disgrasya sa sakyanan.

Tuod man, nahilom ang maong panghitabo, di na mahibaw-an og asa na ang maong sakyanan.

Lain na nga sakyanan ang gigamit sa bokal karong mga panahona.

Bale, quits lang tong maong sakyanan.

Quits ra pod ang kwarta nga gigamit pagpalit sa maong sakyanan.

Ingon ana lang kasayon ang pagtago sa maong panghitabo.

Nahimo kini tungod kay missing in action ang plaka.

Mao kini hinungdan nga importante kaayo ang plaka sa usa ka sakyanan.

Pero kon dunay mga abogado parehas sa atong gihisgotan sa unahan, wa epek ang pag-gamit o di paggamit sa hustong plaka.

This posting includes an audio/video/photo media file: Download Now

Talk to Papa Joe: Buotang inahan

Posted: 22 Jun 2021 07:22 AM PDT

Dear Papa Joe,

Tawga lang kog Buotang Inahan, 32 years old, minyo pero buwag sa bana. Seaman diay akong bana ug mga 9 years na ming kasal, duna mi duha ka anak boy and girl.

Last nga naug sa akong bana mga months ago excited kaayo ko.Pwerte nakong pa gwapa, nagpa rebond ko, nagpa bleach, namalit og terno nga underwear ug nighties. Gisugat pa nako siya sa Manila unya nag outing kauban sa akong mga anak. Pero after one week, nadiskobrehan nakong naa diay siyay babaye. Nasakpan nako sa Messenger. Pwerte namong away unya nagbuwag gyud mi kay ako siyang gipapili, mas gipili niya iyang kabit.

Bisag sakit kaayo ako nalang ang ni give-up. Mga 5 months na siguro sukad sa among panagbuwag dihang nabalitaan nakong na Covid siya. Kagahapon ni pm siya nako nga inig kaayo niya mobalik kuno siya namo. Murag dili naman gyud nako madawat. Naka move-on nako ug murag feeling nako wa na koy love niya. Pero akong mga anak gusto pang magbalik mi para dili kuno mi broken family. Naglibog kaayo ko unsay akong buhaton. Palihug tambagi ko.

BUOTANG INAHAN

Dear Buotang Inahan,

First of all, klaroha sa imong bana unsa siya ka sinsero nga mobalik ninyo.Who knows basin naka realized siya sa iyang sala dihang na Covid siya.Feeling siguro niya gigabaan siya ninyo.

Wa man gyud perfect aning kalibutana. Masayop man ta tanan which is maoy angay nimong i-consider sa imong kaugalingon. Way dautan kon tagaan nimo siyag second chance, para lang sa inyong mga anak, anyway kon tinuod siyang na bag-o na buhaton niya tanan nga ma please ka and who knows mabalik pa diay imong love niya. Pag-ampo pod sa Ginuo nga ma enlightened ka.

Thank you and God bless.

PAPA JOE

(Kon duna moy problema, ipadala sa papajoesuperb@gmail.com)

This posting includes an audio/video/photo media file: Download Now

Basil: Ang panagkita ni Magdalena Fox ug Erika Embang

Posted: 22 Jun 2021 07:17 AM PDT

Manila--Sa mga may Tiktok account, siguro dumaan na sa For You Page ninyo ang mga videos ni Magdalena Fox, ang transgender nga usahay gwapa, usahay maot hahaha hilabi na kon iyang tangtangon ang iyang pustiso ug wig.

Sa kasamtangan, aduna na'y almost 4 million followers si Magdalena sa iyang Tiktok account. Sa iyang FB Page ubay-ubay na sad ang iyang followers.

Kaniadtong Sabado, nakikain ako sa handaan ni Sir Danny Mangahas, tag-iya sa Eurotv kay nag-celebrate siya og Father's Day. Usa sa mga nakikain mao si Magdalena Fox nga katatapos lang sa iyang programa sa Eurotv that time.

Biniro ko pa nga si Magdalena kung wala ba siya'y dalang kaldero nga may kan-on, tumawa lang siya. Nag-viral man gud ang iyang video diin nagdala siya og kaldero sa Jollibee.

Matod ko kang Magdalena, "nasa baba si Erika Embang (sa studio) at may programa na rin siya dito. Magkasunod kayo ng programa."

Na-excite si Magdalena ug matod niya, di muna siya aalis ug paabuton niyang matapos ang programa ni Erika Embang, ang "Sikat Noon, Sikat Ngayon" kauban si Quinn Carillo, Chin Roces, ug Lito de Guzman.

So, sa dihang nagkita na sila, ayon na...riot na. Abi nimo og dugay nang magkakilala.

Siguro modulot ang friendship nila ni Magdalena Fox ug Erika Embang kay magkikita sila kada Sabado sa Eurotv.

Kanhi wardrobe diay si Magdalena Fox sa ABS-CBN, usa siya sa naapektuhan sa pagsara sa maong estasyon. Mao diayng daghang blind item si Magdalena sa iyang show kay wardrobe lagi ug daghan siyang mga nasagap nga tsismis. Di naman maluluma kasi ang blind item.

Si Erika naman, dating nag-work sa Whitebird, usa ka gay bar sa Pasay before siya naging sikat nga vlogger.

Makita si Erika ug Magdalena sa akong Timmy Basil YouTube ug Dear Tito Timmy Page.

Daghan ang nag-comment nga nagkagwapa kuno karon si Erika Embang. Tama, nagta-transform si Erika kung ma-make-upan. Si Magdalena naman, pretty siya pero yun na nga , kung tangtangon na niya ang iyang wig ug ang pustiso, para na siyang si Popeye.

This posting includes an audio/video/photo media file: Download Now

Balay-Balay, Tubig-Tubig: Giunay sa silingan

Posted: 22 Jun 2021 07:17 AM PDT

Dear Atty. Joan,

Maayong adlaw, Atty. Joan, ug sa mga nagsunod sa inyong lindog.

Kabahin kini sa pait nga nasinati sa akong nuybe anyos nga batang babaye. Misumbong ang akong bata nga pugos nga gisulod sa iyaha ang kinatawo sa lalaking silingan namo.

Edaran na maong silingan ug minyo kini. Duna siyay lima ka anak.

Nahitabo kini niadtong kahaponon sa Sabado sa miaging semana didto sa bakanteng panimalay unahan sa among balay.

Natingala na man ko nga naghilak ang akong bata pag-uli niya. Sa dihang gipangutana nako, iyang gisaysay ang nahitabo.

Wa ra sab namo gikumpronta ang among silingan kay mahadlok ko nga magkagubot. Isog ang akong bana ug posibleng magsinakitay gayod kon ako pang ingnon ang akong bana.

Wala gayod ko kahibalo kon unsa akong buhaton Atty. Nausab na pod ang kinaiya sa akong bata. Lagsik man kaayo unta ning bataa apan karon kanunay lang nga naghilom ug magpadaplin. Wa na pud niy gawas-gawas ang bata.

Hinuon, nakapablotter na kami sa insidente sa kapulisan kay giubanan ko sa akong igsuong lalaki.

Unsa may mga lakang nga akong himuon aron mapanubag ang nakasala sa akong bata? Kinahanglan nga mahatagan og hustisya ang akong bata!

Nanghinaot ko nga moabot ang akong suwat sa imong mga kamot, Atty. Salamat daan!

Imong magtatampo,

Gladys

Dear Gladys,

Una sa tanan maayong adlaw usab kanimo diha, Gladys, ug salamat sa imong pagsunod niining lindog.

Kinahanglan gayod nga mahatagan og hustisya ang imong bata. Dunay mga proseso nga kinahanglan himuon aron mabalhog ang inyong silingan ug mapasakahan kini og kaso sa korte.

Una, dangop kamo sa Women and Children Protection Desk (WCPD) sa inyong kapolisan nga maoy mu-issue og referral slip sa bata aron mahiling kini sa doctor sa Pink Room sa Vicente Sotto Memorial Medical Center (VSMMC) ug mahatagan kamo og medico-legal report.

Ang WCPD sab mao ang gitahasan nga mukuha sa saysay sa bata ug uban pang testigo sa krimen. Kinahanglan sab nga mo-assist ka sa bata samtang gi-interview kini sa kapolisan alang sa maong saysay. Kon duna moy dugang ebidensya gawas sa mga saysay sa biktima ug testigos, ihatag kini sa kapulisan.

Mag-andam dayon og complaint sheet ang WCPD uban ang mga saysay ug ebidensya pagpamatuod sa sumbong nga rape ug isumiter kini didto sa piskaliya o ang Prosecutors' Office.

Kon matumbok sa piskaliya nga dunay igong hinungdan nga mutuo nga nahitabo ang mga pasangil sa pagpanlugos batok sa inyong silingan, murekomendar dayon ang piskaliya sa pagpasaka og kaso didto sa korte pinaagi sa paghimo og Information.

Mahimo na dayon nga mo-issue og arrest warrant ang korte pagpadakop sa inyong silingan kon makita sa huwes nga dunay igong hinungdan nga mutuo nga nabuhat sa suspetsado ang maong krimen.

Daghang salamat, Gladys, sa imong sulat tampo ug hinaot nakahupay ang maong tambag sa naghoot mo karon nga galamhan.

Imong alagad,

Atty. Joan

[Lindog sinuwat nilang Atty Joan Dymphna Saniel-Amit, Executive Director, ug Atty. King Anthony Perez, usa sa mga abogado sa CLB. Mahimo kamo nga mupadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa Facebook Messenger: m.me/ChildrensLegalBureauInc]

This posting includes an audio/video/photo media file: Download Now

Panawagan sa publiko

Posted: 22 Jun 2021 07:15 AM PDT

Ang Municipal Social Welfare and Development Office (MSWDO) sa lungsod sa Cordova, Cebu nangayo og tabang sa publiko sa pagpangita sa mga ginikanan ug kaparyentihan sa bata.

Usa ka batang babaye nga gipanganlan og Talitha Ledesma a.k.a. Kate Venice C. Cimafranca nga tulo ka buwan sa dihang gihatag sa iyang inahan nga ginganlan og Franchesca Ledesma niadtong Abril 14, 2014 sa alas 8:00 sa buntag ngadto kang Lanie Cambang duol sa pier sa San Carlos City, Negros Occidental. Ang bata karon 7 anyos na.

Kung mapakyas ang mga ginikanan ug kaparyentihan sa pagpatim-aw ug pagkuha sa bata sa sulod sa us aka buwan, mamahimo na nga mapasang-at ang administrative abandonment sa bata sa sa DSWD Central Office.

Mamahimo nga makigkita sa Social Worker nga si Nessa L. Orbeta sa buhatan sa MSWDO sa Cordova, Poblacion Cordova Cebu o tawag sa MSWD Cordova mobile no. 09311906707 o 09959219820.

Kon walay motunga nga ginikanan o mga paryente sa bata sulod sa usa ka bulan, ang bata ipaubos sa legal abandonment sa Department of Social Welfare and Development Central Office ug maisyuhan og certification nga siya Legally Available for Adoption.

This posting includes an audio/video/photo media file: Download Now

Casimero gibaharan ni Donaire

Posted: 22 Jun 2021 07:15 AM PDT

Nagtinguha og knockout nga kadaugan si World Boxing Council (WBC) bantamweight champion Nonito "Filipino Flash" Donaire sa iyang unification bout batok sa kababayang si World Boxing Organization (WBO) titlist Johnriel Casimero karong Agusto 14, 2021 sa Carson, California.

Gipasabot ni Donaire nga kon nakaya niyang palukapahon ang iyang mga nakontra dihang nagkapanya pa siya sa mas bug-at nga timbang, wala'y rason nga dili niya kini mahimo sa bantamweight division.

"Apparently I'm the biggest hooker out there so I'm ready to go. He's a tough guy but I know that I have the capability of knocking anybody — if I was knocking guys out at 126, walking in at this weight, I know I can knock anybody at 118," matod ni Donaire sa interbyu sa www.badlefthook.com.

Hinuon giangkon ni Donaire nga dili sayon nga kontra si Casimero hilabi na kay aduna sab kini saktong kusog.

Apan gitataw ni Donaire nga dako ang iyang pagsalig gumikan kay nasayod siya nga anaa siya saktong kondisyon ug nagtutok sab siya og maayo ning awaya.

"I mean, anybody who has power is a tough guy," dugang ni Donaire. "For me, I believe that any fighter can be difficult if you don't practice enough or if you don't train enough and if you don't strategize enough. So I think with the best strategy can be an easier fight."

Sa edad nga 38, aduna pa'y dakong pangandoy si Donaire ug kini mao ang paghakot sa tanang world titles sa kasamtangan niyang timbang.

"I'm just really, really, really focused on it right now. You know, I'm in tremendous shape still so I'm just excited. Regardless if it's Filipino-Filipino, it's a good thing because now you have people who are at the top of the top and they're fighting each other now," batbat ni Donaire.

Kon mailog niya ang korona ni Casimero, matod ni Donaire nga tinguha niyang makig-away og balik sa gitawag og "Monster" nga si Japanese Naoya Inoue, kinsa maoy tag-iya sa World Boxing Association (WBA) ug International Boxing Federation (IBF) bantamweight titles.

Sa premiro nilang away niadtong Nobiyembre, 2019, napilde si Donaire ni Inoue pinaagi sa unanimous decision.

"Ultimately my goal is getting that belt and then fighting Inoue for the rematch and be undisputed — that's the main goal, that's the goal for me, really," batbat ni Donaire. (ESL)

This posting includes an audio/video/photo media file: Download Now

Gilas Pilipinas vs. China

Posted: 22 Jun 2021 07:14 AM PDT

Magsangka karong alas 4:30 sa hapon, Hunyo 23, 2021, ang Gilas Pilipinas ug China sa usa ka exhibition game sa Angeles University Foundation (AUF) gym sa Angeles, Pampanga.

Nagsilbe kining tipik sa preparasyon sa duha ka mga kampo una sila manglarga alang sa ilang kampanya sa managlahing Fiba Olympic Qualifying Tournament.

Ang duha ka mga kampo parehong ningduwa sa bag-uhay lang nahuman nga Fiba Asia qualifiers sa Clark, Pampanga.

Human niini, nakadesisyon ang China nga magpabilin sa nasod aron makigduwa sa Gilas Pilipinas. Sa orihinal nga plano, duha unta ka exhibition games ang sagubangon sa Gilas Pilipinas ug China apan nausab kini gumikan sa ka hagip-ot sa ilang eskedyul.

Ang Gilas Pilipinas molarga paingon sa Belgrade, Serbia ugma, Hunyo 24, 2021 alang sa ilang kampanya sa OQT samtang ang China molarga paingon sa Victoria, Canada alang sa laing OQT event. Ang OQT sugdan karong Hunyo 29, 2021 ug mahuman kini karong Hulyo 4, 2021. (ESL)

This posting includes an audio/video/photo media file: Download Now

at

No comments:

Post a Comment

Subscribe to: Post Comments (Atom)

End of Summer Sale ☀️😎

20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...