https://www.sunstar.com.ph/

---

• Swab-upon arrival gipatuman sa MCIA
• Lapida maker gipusil patay
• Van nalimbuwad, 1 patay, 10 angol
• Manifesto para sa EO 17 ni Gwen
• Ting-uwan gideklarar, pasidaan sa katalagman
• Shabu nga gibaligya online nasakpan
• Talk to Papa Joe: Bana nangabit
• Nadela: Ang baktin nga gihinganlan og Landix
• Barrita: Ang tanan posible sa demokrasya
• Editoryal: Ting-uwan na
• Pamilya sa nalumos gitabangan ni Radaza
• Ong: Kalamposan batok sa gidiling druga
• 9 nasikop sa buy-bust sa PRO 8
• Resto-bar bawian og business permit?
• Malinawong pagpanaw Direk Arlene
• Cordova mipili sa Globe alang sa GCash-Powered Citizens ID
• Pacquiao gibaharan og KO ni Spence Jr.
• Didal mi-qualify na sa olympics
• PBA malaumong makasugod ning buwan sa Hunyo
• Mayweather, Logan magsumbagay na

Swab-upon arrival gipatuman sa MCIA Posted: 06 Jun 2021 10:31 PM PDT GIBUTYAG ni Andrew Harrison, GMCAC Chief Executive Adviser nga nibalik na ang International Flights sa Mactan Cebu International Airport (MCIA) usa ka semana human nga gi-divert sa Malacañang ang mga international flights sa Ninoy Aquino International Airport (NAIA). Atol sa pakighinabi sa mga tigbalita, gipahibaw ni Harrison nga pasiunang duha ka mga flights gikan sa Doha, Quatar ug Singapore ang niabot sa Sugbo sa Hunyo 6. Dugang niya nga mo sunod gihapon ang airport sa swab-upon arrival policy samtang padayon ang pag limit sa gidaghanon nga moabot sa 300 ka mga pasahero nga moabot sa Sugbo subay sa gidaghanon sa available nga accredited hotels and quarantine facilities. "Were very happy that we had our first flight yesterday...and the number of passengers arriving will be in lined with the current capped which also tied to the number of hotel rooms and as the number of hotel rooms go up we will seek to have that limit increase because we don't want that situation that and they don't have hotel rooms..." matod no Harrison sa Hulyo 7.(ANV) This posting includes an audio/video/photo media file: Download Now

Lapida maker gipusil patay Posted: 06 Jun 2021 08:25 PM PDT Gipusil patay ang usa ka tighimog lapida sa Lunes sa alas 6:40 sa buntag, Hunyo 7, 2021 , sulod sa sementeryo sa Calamba, Dakbayan sa Sugbo. Ang biktima giila sa kapulisan nga si Eric Garces. Matod ni Police Major Eraño Regido nga duna na silay suspek sa pagpatay human nila mahibaw-i nga dunay nagpahimog lapida kang Garces nga wa niya mahuman. Iyang giila ang suspek nga alyas Eddie Boy, kinsa ila nang gipangita. (AYB) This posting includes an audio/video/photo media file: Download Now

Van nalimbuwad, 1 patay, 10 angol Posted: 06 Jun 2021 07:58 AM PDT USA ka menor de edad patay ug 10 ang naangol human nalimbuwad ang V-hire sa national highway sa Brgy. Palanas, lungsod sa Alcantara, habagatan sa lalawigan sa Sugbo kagahapon, Hunyo 6, alas 6:00 sa buntag. Usa ka pamilyahan ang sakay sa van nga mangaligo unta sa dagat sa Barangay Bas dako sa lungsod Moalboal, apan sa hospital sila nideretso. Si Police Executive MSgt. Geraldine Beriarmente sa Alcantara Police Station, niila sa namatay nga si Juana Rhian Caballes, 14, taga Brgy. Guadalupe, dakbayan sa Sugbo, kinsa dead on arrival (DOA) sa ospital. Matod ni Beriarmente, nga usa ka Nissan urban van nga dunay sakay nga 26 ka mga sakop sa pamilya, ang nalimbuwad sa naasoy nga dapit. Gawas sa menor nga namatay, naangol sila si Joseph Codella Maneja 55, Liam Montemar Maneja 1, Arnelyn Montemar Maneja 26, Khennald Aisler Montemar Maneja 2, Lance Montemor Maneja 7, Nelgin Rublica Montemor 19, Maria Eva Maneja Caballes 31, Andresa Reponte Maneja 53, ug Donald Reponte Maneja, 28, ang drayber sa van. Samtang, grabe si Niño Lorenz Ypanto, 20, ulitawo taga Palanas, Alcantara, human siya nabanggaan samtang nagsakay sa iyang motorsiklo. Gidugang ni Beriarmente, ang pamilyang Maneja, nag-abang kini og van gikan sa dakbayan sa Mandaue. Usa sa igsuon sa drayber nga si Donald, bag-o lang niabot gikan sa Saudi Arabia. Nakahukom ang managsuon uban sa kabanay nga mangaligo og dagat sa Basdako sa Moalboal. Uban sa sakop sa pamilya nga naa sa dakbayan sa Sugbo ug siyudad sa Carcar ang ilang gihapit. Sumala ni Beriarmente, ang drayber nga si Donald nibutyag nga samtang nagsubay sila sa national highway sa maong dapit, iyang gilihayan ang usa ka traysikad, apan akto nga gikasugat nila ang motorsiklo nga miliko sa eskina. Naigo ang motorsiklo ug nawad-an siya og kontrol sa manobela sa van ug nibangga sa steel railings hinungdan nga nabulintang makaduha ka higayon. "Kusog man iyang dagan, nabulintang ang van unya ang namatay nga minor nilusot na sa bintana," dugang ni Beriarmente. Ang mga biktima gidali sa rescuer sa pagdala sa Badian District Hospital, apan ang 14 anyos nga si Caballes gideklarar nga DOA gumikan sa grabing kadaot sa ulo. Grabi sab ang drayber ug drayber sa motorsiklo nga si Ypanto, diin silang duha gibalhin gilayon sa tambalanan sa dakbayan sa Sugbo alang sa dugang pag-atiman tungod sa ilang nahiagoman. This posting includes an audio/video/photo media file: Download Now

Manifesto para sa EO 17 ni Gwen Posted: 06 Jun 2021 07:21 AM PDT WALO ka kongresista sa probinsya sa Sugbo ang ninglagda og manifesto kagahapon, Hunyo 6, nga uyon sa swab-upon arrival policy sa kagamhanan sa lalawigan sa moabot nga overseas Filipinos ug pagsuporta sa baroganan ni Governor Gwendolyn Garcia sa local autonomy. Ang walo ka magbabalaud gikan sa pito ka mga distrito sa Sugbo ug usa ka partylist representative, miawhag usab sa Inter-Agency Task Force on the Management of Emerging Infectious Disease (IATF-MEID), "respect the rule of law, respect the Philippine Constitution, and respect the local autonomy of the Province of Cebu." "As representatives of the people, we can no longer sit idle while our constituent OFWs and ROFs are further burdened by unsound and impractical policies that greatly ignore their own personal and financial circumstances," tipik sa ilang manifesto. Ang IATF nagmando nga ang overseas Filipino workers (OFWs) ug returning overseas Filipinos (ROFs) nga mopaubos sa 10-day quarantine sa usa ka hotel ug ipa-swab sa ikapito nga adlaw. Gawas sa mga kongresista, nilagda usab ang mayor sa Cebu City, Mandaue, ug Lapu-Lapu nga unang ningpadayag sa ilang pagsuporta sa baroganan ni Garcia. Si Garcia niluwat og Executive Order No. 17 Series of 2021 nga i-swab upon arrival sa Mactan-Cebu International Airport (MCIA) ang OFWs ug ROFs nga libre pinaagi sa Department of Health. Mopundo lang sila og tulo ka adlaw sa hotel samtang magpaabot sa resulta sa test. Kon negative, pwede na dayon silang makapauli sa pagpadayon sa home quarantine sa 14 ka adlaw. Dili gusto si Garcia nga malangay ug dugang gasto pa sa OFWs ug ROFs. (ANV) This posting includes an audio/video/photo media file: Download Now

Ting-uwan gideklarar, pasidaan sa katalagman Posted: 06 Jun 2021 07:17 AM PDT MAKASINATI og madag-umon ug pag-uwan ang Metro Cebu sa mga mosunod nga adlaw human opisyal nga gideklarar sa Philippine Atmospheric Geophysical and Astronomical Services Administration (Pagasa) ang pagsugod sa ting-uwan sa tibuok nasod. Apan, si Jhomer Eclarino, Pagasa-Mactan weather specialist, nagkanayon nga sama sa ubang mga lugar sa nasod, makasinati usab ang Sugbo og pipila ka mga adlaw o semana nga huwaw tungod sa gitawag nga 'monsoon break'. "Not necessarily na everyday uwan. Naay monsoon break which is makasinati ta gihapon na fair weather," matod niya. Opisyal na nga gideklarar sa Pagasa ang onset sa panahon sa ting-uwan niadtong Biyernes, Hunyo 4, 2021, nga nakompirmar pinaagi sa paglabay sa Tropical Storm Dante ug sa gitawag nga 'widespread rainfall amount' nga na-monitor sa Pagasa sulod sa lima ka adlaw sa wala pa kini magdeklarar og ting-uwan. Matod usab sa Pagasa, taas ang posibilidad nga maabot kon di gani molapas pa sa normal nga rainfall amount ang masinati karong Hunyo hangtod sa Hulyo. Matod ni Eclarino, ang average normal rainfall amount sa Hunyo dinhi sa Cebu moabot sa 190.4 millimeters (mm), diin kada usa ka mm sa uwan mo-equivalent sa 5,000 ka mga barrel sa uwan matag usa ka kilometro kwadrado. Apan tungod sa milabayng bagyong Dante, nga nakadala og 102.7 mm nga uwan sa Cebu niadtong Hunyo 1 (8 a.m.) ngadto sa Hunyo 2 (8 a.m.), nagkanayon si Eclarino nga posibleng molapas pa sa normal ang rainfall amount nga matala karong buwana. Ang awtoridad nipasidaan ug miawhag sa pagpangandam sa katalagman. (WBS) This posting includes an audio/video/photo media file: Download Now

Shabu nga gibaligya online nasakpan Posted: 06 Jun 2021 07:17 AM PDT USA ka mananahi nga nag-sideline og pamaligyag shabu pinaagi sa online transaction, ang nadakpan sa buy-bust operation sa Philippine Drug Enforcement Agency (PDEA) 7. Nahitabo ang pagpangronda sa Sitio Trinidad, Barangay Punta Princesa, dakbayan sa Sugbo, alas 2:30 sa hapon niadtong Sabado, Hunyo 5. Ang nasikop mao si Kylle Basubas, 22, hamtong ug molupyo sa naasoy nga dapit. Nakuha sa iyang posisyon ang 26 ka gagmay nga pakete sa gituohang shabu nga adunay street value nga P34,000. Matod ni Leia Alcantara, information officer sa PDEA 7, nga mi-report sa "Isumbong Mo kay Wilkins" sa social media account sa ilang ahensya labot sa illegal nga negosyo ni Basubas. Human madawat ang kasayoran, ila kining gipaubos sa surveillance ug case build-up sulod sa duha ka semana. Giingong makabaligya ang suspetsado og 10 ka gramos matag semana, pinaagi sa online transaction ug kon aduna nay customer, makig-meet up kini ug dalhon na sa drug den aron didto gamiton. Samtang moabot usab sa lima ka gramos sa gituohang shabu ang nasakmit sa PDEA Bohol Provincial Office gikan sa usa ka lalake nga nalakip sa target list sa Philippine National Police (PNP) ug sa ilang buhatan. Ang nadakpan sa gihimong buy-bust operation didto sa Barangay Poblacion, lungsod sa Bilar, lalawigan sa Bohol mao si Pablito Dolotina, hingkod ang pangidaron nga molupyo ra usab sa maong dapit. Naabot usab ang pangalan ni Dolotina sa "Isumbong Mo Kay Wilkins" Facebook page nga maoy hinungdan nga giaksyonan kini sa PDEA inabagan sa kapulisan sa lungsod sa Bilar. Dul-an usa ka buwan nga gipaubos sa surveillance ang suspetsado sa wala pa nila kini nadakpan diin makabaligya matod pa kinig 25 gramos matag semana. (AYB This posting includes an audio/video/photo media file: Download Now

Talk to Papa Joe: Bana nangabit Posted: 06 Jun 2021 06:48 AM PDT Dear Papa Joe, Ako si Tilay, 38 anyos, minyo. Dako kaayo kog problema ron mahitungod sa akong bana. Sixteen years old pa ko dihang nagkauyab mi unya nabuntis ko pagka 17. Nakulatahan gud ko sa akong papa kay gawas nga bata pa kaayo ko, maguwang siya nakog 10 years. Pero nagtuman gyud ko, nag live-in mi hangtud nakaanak mig tulo usa pa mi nagpakasal. Okay kaayo ang dagan sa among pagpuyo, bisan tuod og pobre mi apan maka-provide siya kay duna man siyay trabaho. Gi-prove gyud namo sa akong pamilya nga wa ko nasayop sa akong pagminyo og sayo. Hangtud nga niabot karon mga tuiga nga lima na ka buok among anak. High school pa lang akong kamaguwangan. Bag-o lang gyud nako nahibaw-an nga duna diay siyay babaye nga gi live-in niya sa siyudad samtang kami sa akong mga anak, dia sa probinsiya. Mura kog mamatay sa akong nadiskobrehan. Gusto nako siyang buwagan apan duna man mi mga anak. Usa pa di ko gusto nga mauwawan ang akong pamilya kon mahibawo sila. Sa pagkakaron, ako ray nasayud ani. Maora nag moboto akong dughan. Please tambagi ko. TILAY Dear Tilay, Sa gikaingon nimo nga bata pa kaayo mong nagsugod, 16 pa gud ka, mamords pa ka niadtong mga panahona unya paglabay sa katuigan nga lima na imong anak, posible nga nalusyang na siguro ka. Imagine nga lima imong anak unya naa mo sa probinsiya samtang imong bana tua sa siyudad. Natintal siguro siya which is dili gyud unta angay mahitabo. Pakig-estorya sa imong bana. Ask him unsay iyang gustong mahitabo? Kaya ba niyang buhion ang duha ka mga pamilya kon ugaling momabdos iyang ka live-in karon? Wala na ba siya nag-love nimo? Wala na ba siya nag-love sa iyang mga anak? Wala na bay bili niya iyang pamilya nga posibleng mabungkag kon padayon siya sa iyang pagpakabuang? Another thing nga dapat nimong buhaton mao ang pag-open sa imong problem sa laing tawo, like sa imong parents. Ayaw soloha ang problema, ipagawas na, ipabuhagay imong gihambin diha kay lisod nag moboto ka. And most of all, pray sa Ginuo. PAPA JOE (Sa inyong problema ipadala sa papajoesuperb@gmail.com) This posting includes an audio/video/photo media file: Download Now

Nadela: Ang baktin nga gihinganlan og Landix Posted: 06 Jun 2021 06:48 AM PDT NAHIBULONG ko kon unsay gikagubtan sa mga tawo daplin sa karsada sa miaging semana. Daw may alarma nga disgrasya sa karsada. Sa akong pagsusi, baktin diay nga nagdagan. Talagsaon nga eksena niadtong buntaga. Diriyot gani masaghiri ang baktin sa namasahero nga e-bike. Iyang gigukod ang usa ka tawo nga nagkadusingot. Nagdali ko nga nisunod. Nihangyo ko nga ma-interview ang tag-iya sa baktin. Nakuryoso man gud ko sa akong nakita. Kay sa tinuod, nakabasa nako og post sa social media labot sa baboy nga gihimong pet o binuhi sa iyang amo. Ibay sa alad papuy-on ang baboy sa sulod sa ilang balay, nagpasopaso ug may kaugalingon pa nga katulganan. Wa gyuy kalainan sa binuhing iro ug iring. Salamat kay gipatalinghugan ang akong hangyo. Matod ni Rolando Arnejo, 50 anyos, matag buntag niya isuroysuroy ang iyang walo ka semana nga baktin kay mao na ni ang naandan matag buntag nga tanan. Paagi pud ni nga kong maluya na ang baktin, magpuyo na ni sa iyang alad human makakaon. Apan nganong magsunodsunod man niya ang baktin? "Ang hayop Sir, basta imong i-train, makat-on gyud kadugayan," pasabot ni Rolando diri kanako. Tinuod na. Labi na sa iro nga daghan kaayo og makat-onan. Apan sa baktin, daw talagsaon. Sa asoy ni Rolando dinhi nako natugkad nga siya ug ang iyang baktin duna gyuy espesyal nga relasyon. Nagsugod ni sa dihang nanganak ang iyang anay. Kini nga baktin usa sa nagsakit. Nagkalibang. Sa tinguha nga mabuhi, iyang gigatas hangtod nga naulian. Gikan niadto, iyang namatikdan nga hilabihan na kaparaygon sa baktin. Iyang gisulayan og pagawas sa tangkal ug gisuroy. Natingala siya kay mosunod bisan asa siya moadto. Dinhi na siya nakahunahuna nga lahi ni nga klase sa pagka baktin, mao nga nakahukom siya nga dili iapil og baligya. Mao to nakahunahuna siya sa paghingalan sa baktin nga Landix. Gikan ni sa iyang angga nga Lando. Sa mga tawo nga nakasaksi sa parayeg og pagsigi og sunod ni Landix sa iyang amo matag baktas nila sa karsada, daghan sila og nahunahunaan. Basin magdala nig suwerte sa iyang amo nga wala na maka-drive og dyip tungod sa pandemiya. Igo lang ningisi si Lando ning ilang pangagpas. Ang importante nga nakahukom na siya nga buhion si Landix hangtod sa hangtod. Bisan unsa pay mahitabo, dili niya ibaligya si Landix nga sa iyang pangidaron, pwede na ra ba unta mahalin para lechon de leche. Sa gustong makakita ni Landix, palihug sa pagsubay sa atong Youtube channel: junrey nadela password tv. Sa mga mahiligon og sakyanan, may ipaambit ko ninyo nga kalihukan nga akong gitambongan niadtong Sabado, Hunyo 5. Ang akong bag-ong higala nga si Kharl Lataza, usa ka car enthusiast, nidapit nako pagsaksi sa Bumper Bumper Car Show. Didto ni gihimo sa parking area sa Mactan Airport gikan sa adlaw Sabado hangtod gahapon, Hunyo 6. Duha ka entry ang iyaha ni Kharl. Pulos high end nga mga sakyanan nga tagsa rang igkita sa karsada. Ang usa ka sports car nga made in Germany. Ang usa hinimo sa Estados Unidos. Ang ubang entry di sab palupig. May mga pick up nga sakto sa kargada nga mahimong mosawom sa sapa, mokatkat sa bukid ug motadlas sa pinakalisod nga dalan. May mga Sports Utility Vehicle nga gi-lift up unya giparisan og mga ligid ug yantas nga lisod hitupngan sa ka nindot. Akong kauban sa BoSS nga si pare Rene Ybañez, naghilomhilom lang nisalida sa iyang duha ka entry alang sa sound enthusiast category. Sa among grupo, usa ni si Pare Rene nga mahiligon sa music, way duda nga samtang siya mag-drive, ang sulod sa sakyanan daw music room tungod sa sound system nga gipahaum. Mga pahalipay sa mga organizer sa ika-10 season nga Car Show. Ingon man sa mga nisalmot nga nipasundayag sa subra sa usa ka gatos ka sakyanan. Hinumdum ko niadtong panahon sa Grade 1 sa amo sa probinsiya. Matag piyesta, pusilpusil ug sakyanan maoy kanunay ang naa sa hunahuna nga ipapalit sa akong inahan. Kon dili palitan, luthang ug basiyo sa lata sa gatas himuong taraktarak. This posting includes an audio/video/photo media file: Download Now

Barrita: Ang tanan posible sa demokrasya Posted: 06 Jun 2021 06:36 AM PDT GINAINGON nga ang kaugmaon sa usa ka republika anaa sa mga kamot sa matag botante. Usa ka botante, usa ka boto. Kadtong mga tawo nga gusto og kausaban, balota mao ang angay nga kahimanan, dili bala. Ug matod pa ni Manila City Mayor Isko Moreno, sa usa ka demokrasya, ang mga tawo maoy mopili sa ilang lider, di kay ang lider ipamugos ngadto kanila. "Ang demokrasya ang taumbayan ang pumipili, hindi ipinipilit yung mga kalahi niya," matod pa ni Moreno. Di sama sa usa ka monarkiya kansang korona mahimong kabilin nga masunod sa mga anak ug mga kaliwat sa mga hari ug rayna. Mahitabo kana kay sa usa ka monarkiya, way eleksyon ug di mopatigbabaw ang kabubut-on sa katawhan. Apan ang tanan posible nga mahitabo sa usa ka demokrasya. Bisan gani ang mga anak og presidente nahimong mga presidente. Sama ni John Adams, ikaduhang presidente sa Estados Unidos (1797-1801). Ang iyang anak, si John Quincy Adams, nahimong ika-unom nga presidente (1825-1829). Ang anak ni George Bush, ika-41 nga presidente sa US (1989-1993), si George W. Bush, nahimong ika-43 nga presidente (2001-2009). Dinhi sa Pilipinas, ang anak ni kanhi Presidente Diosdado Macapagal (1961–1965), si Gloria Macapagal-Arroyo, napili sab nga presidente (2001–2010). Ang anak ni kanhi Presidente Corazon Aquino (1986–1992), si Benigno 'Noynoy' Aquino III napili sab nga presidente (2010-2016). Wa pa mapresidente si Ferdinand "Bongbong" Marcos Jr., ang anak sa kanhi diktador nga si Ferdinand Marcos. Apan karon, dunay mga pundok nga miduso kang Davao City Mayor Sara Duterte, anak ni Presidente Rodrigo Duterte, nga padaganon sa pagkapresidente sa 2022 elections. Si Albay Rep. Joey Salceda niingon nga wa siyay pagduda nga modagan ang mayor sa siyudad sa Davao sa pagkapresidente. Sanglit ang ruling PDP-Laban mipasar na og resolusyon nga nag-awhag kang Presidente Rodrigo Duterte nga modagan sa pagkabise presidente, posibleng mahitabo ang usa ka Duterte-Duterte tandem. This posting includes an audio/video/photo media file: Download Now

Editoryal: Ting-uwan na Posted: 06 Jun 2021 06:36 AM PDT GIDEKLARAR sa Philippine Atmospheric, Geophysical and Astronomical Services Administration (Pagasa) Mactan, Cebu station niadtong Biyernes, Hunyo 4, ang opisyal nga pagsulod sa panahon sa ting-uwan human sa pag-igo sa nasod sa bagyong Dante apan, nagpadayon ang pagbunok sa kusog nga uwan sud sa lima ka adlaw hinungdan sa pagkanaug sa maong deklarasyon. Ang Pagasa Mactan nibanabana nga molapas sa normal rainfall conditions sa Sugbo ning buwana ug karong Hulyo. Ang average rainfall sa Sugbo naa 190.4 millimeters. Usa kini sa hugot nga pasidaan bahin sa posibilidad nga pagbaha ug lunop sa ubos nga dapit ug ang risgo sa pagdahili sa yuta sa bukirang kabarangayan labi na sa dakbayan sa Sugbo nga dunay natala nga landslide prone areas. Kumusta na ang pagpangandam sa lokal nga kagamhanan? Kita mismo nga mga lumolupyo nga labing nasayod sa kahimtang sa atong dapit. Managana nang daan. Importante kaayo ang insaktong paghipos o paglabay sa atong basura aron dili kini mobara sa mga kanal, sapa, suba o ubang agianan sa tubig sa pagbunok sa uwan. Mao kini kanunay ang usa sa hinungdan sa baha o lunop. Nasayod kita nga dunay dakong kakuwangon sa tukma nga drainage system sa tanang local government units (LGUs) sa Metro Cebu. Busa matag ting-uwan, ang Disaster Risk Reduction and Management Ofice (DRRMO) sa matag LGU, aktibo kaayo ning panahona. Gikinahanglan kini nga team apan dili kini solusyon sa problema. Ang imprastruktura sa pagdumala sa drainage ug pamatasan sa mga molupyo sa kalimpiyo sa komunidad mao ang dugukan sa kasulbaran. Ang Pilipinas, nasod nga nahimotang sa layong kasadpan kilid sa dakong dagat sa Pasipiko, kanunay bisitahon sa dili mominos 20 ka mga bagyo matag tuig. Dunay kusog ug hinay sa iyang huros sa hangin apan pulos kini nagdala og dakong pagbundak sa uwan. This posting includes an audio/video/photo media file: Download Now

Pamilya sa nalumos gitabangan ni Radaza Posted: 06 Jun 2021 06:31 AM PDT MINDANGOP sa opisina ni Lapu-Lapu City Cong. Paz Radaza ang anak ni Alfonieto Y. Ompad, usa ka diver nga nakaplagang patay sa kadagatan sa Barangay Baring, Isla sa Olango niadtong Hunyo 3, 2021. Ang anak sa namatay nga si Alfonieto Ompad Jr. miduol sa kongresista human nga wala gi-release sa Rolling Hills ang patay nga lawas sa iyang amahan kay wala silay ikabayad. Gisaysay ni Alfonieto Jr. nga galisod gani sila paglabang sa patay nga lawas sa ilang amahan padung sa isla hinungdan nga midangop dayon siya sa opisina sa kongresista. Si Radaza sa iyang bahin, miluwat og suwat ngadto sa kadagku-an sa Rolling Hills sa paghatag og kahigayonan nga i-release ang patay nga lawas ni Ompad samtang nag-process pa ang pamilya sa burial assistance nga programa sa iyang buhatan diin nakig-alayon sila sa Department of Social Welfare and Development (DSWD) 7. "While we are presently assisting them in the processing for said assistance, I wish that their late father be immediately released," tipik sa suwat ni Radaza ngadto sa Rolling Hills. Misaad si Radaza nga bayran dayon ang balanse ni Ompad kon mahuman na sa pag-process sa requirements sa assistance ang mga tagtungod. "I guarantee that the balance of the amount incurred for their late father will be accordingly paid after completion of the said process," dayon tapos sa suwat ni Radaza. Gawas sa hinabang sa pagpahimutang sa patayng lawas, mipasalig si Radaza ngadto sa anak ni Ompad nga kon ugaling duna pa silay laing panginahanglanon para sa kamatayon sa ilang amahan, dili magduha-duha og duol sa iyang opisina aron matabangan sila dayon. (GCM) This posting includes an audio/video/photo media file: Download Now

Ong: Kalamposan batok sa gidiling druga Posted: 06 Jun 2021 06:23 AM PDT GIHULAGWAY ni Liga ng mga Barangay Cebu City President Kapitan Franklyn Ong nga usa ka kadaugan sa kinabuhi ang paggradwar sa 82 ka drug surrenderers sa community-based drug rehabilitation program sa Barangay Sudlon 2 niadtong Sabado, Hunyo 5, 2021. Gipadayag ni Ong ang iyang pagsaludo sa drug surrenderers sa ilang desisyon nga motalikod ug mobiya na sa bisyo aron magsugod og bag-ong kinabuhi. "Buot nako ipaabot ang akong pagsaludo sa drug surrenderees kay ila gayud gibarogan ang ilang desisyon nga motalikod na sa paggamit sa ginadiling drugas. Proud kaayo ko nila ug kini ilang maayong gibuhat maoy yawe alang sa mas hayag nila nga kaugmaon," matod ni Ong. Dugang pa niya nga ang maong community-based nga programa batok illegal nga drugas, nagpakita sa maayo nga koordinasyon sa nagkalainlaing ahensya sa gobiyerno. "Usa sa mga prayoridad nato sa Liga ng mga Barangay-Cebu City mao ang pagsumpo ning illegal nga drugas kay nasayod ta nga daghang kaugmaon, kinabuhi, ug pamilya ang giguba niini. Mao nga magpadayon ang pagsuporta sa liga sa mga kalihukan sama niining community-based drug rehabilitation program. We really have to eradicate illegal drugs," matod ni Ong. Atol sa maong kalihukan, gidala ni Ong ang iyang mobile community pantry aron manghatag sa drug surrenderers og libreng bugas, itlog, instant noodles, soy sauce, suka, ug mantika nga gikan sa iyang kaugalingong panudlanan. Gibutyag ni Ong nga sugod karong Martes, Hunyo 8, 2021, duha na ka barangay matag adlaw ang bisitahon sa iyang mobile community pantry. Tumong niya nga malibot ang tibuok 80 ka barangay sa Dakbayan sa Sugbo. "Target gayud nato nga serbisyohan ang tanang mga barangay sa Cebu City ug continuous ni nga programa kay daghan gayud ang nanginahanglan karong panahona," gidugang ni Ong. (AYB) This posting includes an audio/video/photo media file: Download Now

9 nasikop sa buy-bust sa PRO 8 Posted: 06 Jun 2021 06:23 AM PDT ORMOC City - Siyam ka mga tawo ang nasikop sa gipahigayon nga pag-implementar og search warrant ug buy-bust operation sa managlahi nga Barangay sa Calbayog City, Samar niadtong Miyerkules, Hunyo 2, 2021. Matod sa Police Regional Office (PRO) 8, ang siyam nga ilang nadakpan pulos nalambigit sa illegal nga drogas ug miyembro sa gun-for-hire. Una nga gilusad ang pagpatuman og search warrant batok sa lima ka suspek sa Barangay Migara, Calbayog City. Nasikop sa kapulisan mao sila si Ryan Pacayra, 22; Primitivo Pacayra, 46; Edgar Dionog, 29; Carlito Magbutay, 62 ug Renante Magbutay, 36, pulos nagpuyo sa maong barangay. Nakuha gikan kanila ang nagkadaiyang kalibre sa armas ug mga bala sama sa pito ka kalibre. .45 nga pistola; duha ka kalibre .22; 2 ka granada; carbine rifle; KG submachine gun; kalibre .38 revolver; duha ka de boga; mga bala, magazine, duha ka handheld radio; cellphones, bank deposit slips ug ubang personal nga gamit. Matod sa kapulisan, si Magbutay Jr. naa sa listahan sa Philippine Drug Enforcement Agency (PDEA) isip top 1 drug personality sa lalawigan. Siya usab ang responsable sa pito ka mga pagpamusil nga nahitabo sa lugar ug nasikop na niadtong Marso 25, 2017 tungod sab sa illegal nga droga. Pagka alas 4:30 sa kaadlawon, gipahigayon ang buy-bust operation sa Barangay Hamorawon. Nasikop mao sila si Aljohn Bacsal, 24; Ramil Magbutay, 40; Erical Casaljay ug usa ka menor de edad. Nakuha gikan kanila ang balor P120,000 nga illegal nga drugas ug ubang mga gamit. "The arrest of these suspects involved in illegal drugs and gun-for-hire activities is our aggressive commitment towards ending the number of reported shooting incidents in Calbayog," matod ni Police Brigadier General Ronaldo De Jesus. Naa na karon sa kustodiya sa kapulisan ang mga dinakpan ug nag-atubang og daghang kaso tungod sa paghupot og illegal nga butang. (JKDP) This posting includes an audio/video/photo media file: Download Now

Resto-bar bawian og business permit? Posted: 06 Jun 2021 06:11 AM PDT NABUTANG karon sa peligro nga mabawian sa permit ang usa ka imnanan nga nahimutang sa 88 Avenue sa Barangay Kasambagan sa siyudad sa Sugbo human nagdasok ang mga tawo niadtong Sabado, alas 10:00 sa gabii, Hunyo 5, 2021. Matod ni Police Major Renz Talosig, hepe sa Mabolo Police Station, nakadawat silag tawag sa telepono nga nagdasok ang mga tawo sa usa imnanan nga wala na matuman ang social distancing. Dali nga miresponde ang mga pulis uban nila ang mga kawani sa Business Permit and Licensing Office (BPLO) sa kagamhanan sa siyudad sa Sugbo. Ila pang naabtan ang daghang mga tawo sa sulod ug ilang gipakigkitaan ang management aron mapanubag sa kadaghan sa mga tawo. Mipasabot matod pa ang management nga tungod sa pagbunok sa ulan nga usa sa hinungdan nga midaghan ang mga tawo tungod kay namasilong kini. Ang maong imnanan adunay capacity nga 250 ka tawo ug tungod kay weekend niadtong Sabado, daghan usab ang nanggawas ug nag-inom. "Ang rason sa tag-iya ug manager kay tungod sa ulan gabii, mao to nawala ang social distancing. Naa silay capacity nga 250, pero tungod sa ulan, nagsikit-sikit sila didto, nawala na ang social distancing," matod ni Talosig. Tungod kay uban man ang taga BPLO nga misusi sa dapit, gihatagan dayon kinig show cause order aron manubag sa kadaghan sa mga tawo sa ilang establisemento nga hugot pa kining gidili sa kagamhanan sa dakbayan. Dugang ni Talosig nga iyang girekomendar ngadto sa BPLO nga ang gitugot nga 250 ka tawo nga capacity sa maong imnanan paubsan na kini ngadto sa 150, aron mapatuman gyud ang social distancing. Gawas sa ilang pagpamaligyag ilimnon nga makahubog, giingong nagpa-disco usab kini nga na-report na usab nila ngadto sa emergency operation center EOC. Ang kapulisan sa siyudad sa Sugbo padayon nga nag-monitor sa mga imnanan tungod sa pagtugot na nga makabukas ang mga imnanan human libkasa ang executive order ni Mayor Edgardo Labella bahin sa liquor ban. Apan padayon nga makadawat og reklamo ang kapulisan sa dakbayan sa Sugbo nga adunay mga imnanan nga misobra na sa kapasidad ang ilang mga customer. (AYB) This posting includes an audio/video/photo media file: Download Now

Malinawong pagpanaw Direk Arlene Posted: 06 Jun 2021 06:11 AM PDT MANILA – Nagbangutan karon ang among grupong Philippine Movie Press Club (PMPC) tungod sa pagpanaw sa among pinanggang direktor nga si Direk Arlene Tolibas. Naila si Arlene nga event director ug artista sad sa pelikula ug telebisyon. Ang kanunay niyang role sa pelikula ug telebisyon katabang o kaya alalay sa bida. Namatay si Direk Arlene niadtong June 3 gumikan sa cardiac arrest sa edad nga 55. Sa dihang nakasud ako sa PMPC tuig 2007, ako nang naabutan si Direk Arlene nga kanunay nga assistant director kang Direk Al Quinn sa PMPC Star Awards for TV, PMPC Star Awards for Movies ug PMPC Star Awards for Music. So sulod sa usa ka tuig, three times namong nakauban si Direk Arlene sa awards night, pero kaming mga officer kanunay namo siyang maka-meeting during pre-production meeting so mas dahang chance nga nakauban namo siya kesa mga member sa club. Sa dihang namatay si Direk Al Quinn, si Direk Arlene Tolibas na ang nipuli gikan sa pagiging assistant direktor. Paborito siyang direktor sa among producer nga si Maam Tess Celestino. Kanunay nga may tam-is nga pahiyom si Arlene pero kung trabaho naman, istrikto siya. Her voice reverberates during the commercial gap sa awards night mismo ug bisan kaming mga pmpc members, iyang masigawan kung mali ang among blocking sa stage. Tinuod jud nga ang cardiac arrest usa ka traydor nga sakit kinsa jud ang magdahom nga ang hyper ug very active nga si Direk Arlene Tolibas, mahimong biktima? Malinawong pagpanaw Direk Arlene mahal ka namong mga taga-PMPC. Sa laing bahin, bisan og pandemic karon, natapos na namo ang among screening for PMPC Star Awards for TV, Movies and Music og may mga nominees na kami. Karong wala na si Direk Al Quinn ug Arlene Tolibas, usa ka dakong challenge sa among grupo kung kinsa ang sunod nga mag-direk sa tulo ka awards namo kada tuig ilabi na nga medyo nagba back to normal na. Definitely, it would never be the same again without Direk Al ug Direk Arlene pero life has to go on. This posting includes an audio/video/photo media file: Download Now

Cordova mipili sa Globe alang sa GCash-Powered Citizens ID Posted: 06 Jun 2021 06:11 AM PDT PAGPATUYOK sa ilang paningkamot sa pagpanday ngadto sa intelligent city, ang lungsod sa Cordova mikuha sa Globe, pinaagi sa iyang enterprise arm nga Globe Business, sa paghatag sa 20,000 ka mga konstituwente og access ngadto sa GCash. Pinaagi sa GCash-enabled Citizens ID sa lungsod, ang mga residente sa Cordova makahimo sa cashless transactions o dili na magdala og kuwarta, lakip sa pagdawat sa financial assistance gikan sa kagamhanan. "We're grateful to Globe for helping us conceptualize our Citizens ID and other projects involving the GCash platform. Through this endeavor, we aim to assist thousands of households and journey with them towards financial inclusivity. With Globe's dedication to service, we were able to fast-track our Teche Cordova project—our leap towards transforming Cordova into a smart city powered by Globe," matod ni Cordova Mayor Therese 'Teche' Sitoy-Cho. Ang Citizens ID sa Cordova maoy magsilbi nga subra pa sa usa ka identification card alang sa mga molupyo. Gawas sa kasayoran bahin sa nanag-iya sa card, ang hinabang gikan sa kagamhanan ubos sa Social Amelioration Program (SAP) mahimong ipaagi sa samang ID. Niini, ang mga molupyo seguro nga makakuha sa ilang GCash account card alang sa financial transactions sama sa pagbayad sa groceries, utility bills, prepaid load, buying products online, opening savings accounts, ug daghan pa. Sa tibuok kalibotan, kapin sa 100 million ka hamtong ang nakadawat sa ilang government transfers, suhol o pensiyon pinaagi sa cash. Sumala sa 2019 Financial Inclusion Survey sa Bangko Sentral ng Pilipinas sa 2020, dunay 51.2 million Filipinos ang nagpabilin nga walay banko, hinungdan nga imposible kanila sa pagtigom o pag-estabilisar sa financial history sa pag-access sa ubang financial services. "We believe in inclusivity and digital democracy. Individuals and communities should have equal access to technologies that make their lives better," paambit ni Peter Maquera, senior vice president for Globe Business. Dason niya, "By working with organizations, like the Municipality of Cordova, we're able to let more people participate in the country's economic growth and achieve collective resilience through digital tools." Isip purpose-driven enterprise, ang Globe kanunay nakig-alayon sa kagamhanan ug mga negosyo sa pagkab-ot sa ilang malahutayong development goals nga giplastada sa United Nations. Usa nini nga tumong mao ang pagpatigbabaw sa infrastructure ug innovation isip timon sa pagpatubo sa ekonomiya ug kalamboan. Paghimo sa financial transactions mas sayon ug segurado sa GCash. Kontaka ang Globe Business Account Manager aron makasugod sa paggamit niini. Bisita sa website sa dugang kasayoran ug imong enterprise solutions. (PR) This posting includes an audio/video/photo media file: Download Now

Pacquiao gibaharan og KO ni Spence Jr. Posted: 06 Jun 2021 06:07 AM PDT MIBAHAD si American Errol Spence nga iyang paretiruhon si Filipino boxing icon Manny Pacquiao pinaagi sa knockout sa ilang engkuwentro karong Agusto 21, 2021 sa Las Vegas, USA. "I meant to get as strong as I can to knock out Manny Pacquiao and send him off to retirement," asoy ni Spence sa Barbershop Conversations. "I'm expecting the same Manny Pacquiao we see every time, and he'll come to fight. I'll be a lot stronger than in my previous fight with Danny Garcia." Matod ni Spence nga dili angayang basihan ni Pacquiao ang iyang pagpakig-away kang Garcia gumikan kay wala siya sa 100 percent nga kondisyon niadtong higayuna. Sa iyang banabana, naa ra sa 75% ang iyang kondisyon sa iyang pagpakig-away kang Garcia apan bisan pa niini, nakuha gihapon niya ang kadaugan. "I wasn't right for Danny and I wasn't right at all," dugang ni Spence, kinsa adunay 27-0, 21KOs nga rekord. "Now, I'm sharp as heck. I feel strong." Ang Pambansang Kamao nga Pilipinas naggunit og 62-7-2, 39KOs nga rekord. (ESL) This posting includes an audio/video/photo media file: Download Now

Didal mi-qualify na sa olympics Posted: 06 Jun 2021 06:07 AM PDT SULOD na sa Tokyo Olympics ang Sugbuanong skateboarder nga si Margielyn Didal human siya miduwa sa 2021 World Skateboarding Championships sa Rome, Italy niadtong Biyernes, Hunyo 4, 2021. Gianunsiyo kini sa Skateboarding and Roller Sports Association of the Philippines human nakasulod si Didal sa semifinals ug mitapos sa ika-17 nga puwesto. Tungod sa iyang pagsalmot sa maong torneyo, nagpabilin si Didal sa ika-13 sa women's skate world ranking nga adunay 27,560 WSR points. Adunay 20 ka slots ang available sa Tokyo Olympics. Tulo niini maadto sa Top 3 finishers sa World Championships, ang usa alang sa host country, samtang ang nahibiling 16 gikan sa Olympic o world ranking. Tungod kay anaa man si Didal sa No. 13 sa world ranking, "virtually qualified" na kini alang sa Summer Games ug maghuwat na lang siya sa opisyal nga announcement human sa World Championship. "The official announcement of qualified skaters will only be released after the World Championships Finals in Rome, but Skate Pilipinas would like to be the first to announce that our very own Margielyn Didal has earned a slot for the Tokyo Olympics. Congratulations Margie," post sa SkatePilipinas. Si Didal, 22, midaog og gold medal sa 2018 Asian Games didto sa Indonesia ug sa 2019 Southeast Asian (SEA) Games nga gipahigayon sa Pilipinas. Ipahigayon ang Olympics karong Hulyo 23 ngadto Agusto 8, 2021 sa Tokyo, Japan. Ang mga Filipino athletes nga unang naka-qualify na alang sa Tokyo Olympics mao sila 2016 Rio Olympics silver medalist Hidilyn Diaz, gymnast Carlos Edriel Yulo, pole vaulter Ernest John Obiena, taekwondo jin Kurt Barbosa, rower Cris Nievarez ug mga boksidor nga sila Eumir Felix Marcial, Irish Magno, Nesthy Petecio ug Carlo Paalam. This posting includes an audio/video/photo media file: Download Now

PBA malaumong makasugod ning buwan sa Hunyo Posted: 06 Jun 2021 06:07 AM PDT MALAUMON ang Philippine Basketball Association (PBA) nga masugdan nila ang ilahang 46th season sa ulahing bahin ning buwana o sa sayong bahin sa sunod buwan. Ang tanang teams sa liga nakapahigayon na og praktis sa nagkadaiyang venues pinaagi sa bubble set-up ug sa panglantaw sa PBA, hayan makondisyon na og balik ang tanang mga magduduwa sa dili pa masugdan ang sunod season. Hinuon ang tanang plano sa PBA nagdepende pa gihapon sa desisyon sa gobiyerno kabahin sa quarantine restrictions sa Metro Manila. Ang NCR Plus, nga gilangkuban sa Metro Manila, Laguna, Cavite, Bulacan ug Rizal, nagpabiling ubos sa general community quarantine nga molanat hangtod karong Hunyo 15, 2021. "Hinihintay lang namin 'yung June 15, kung ano ang magiging status. Kung GCQ, pwede na tayong mag-practice and scrimmages sa NCR," batbat ni PBA Commissioner Willie Marcial. "After June 15, I'll write and present ulit sa (Inter-Agency) Task Force." Sa kasamtangan, ang teams sa PBA nagpahigayon og praktis sa mga lugar nga mas luag ang restriksyon. "Nakita naman natin, successful 'yung mga practices natin. Three weeks na tayo, going four weeks na, okay ang practices natin," dugang ni Marcial.(ESL) This posting includes an audio/video/photo media file: Download Now

Mayweather, Logan magsumbagay na Posted: 06 Jun 2021 06:07 AM PDT MAGBINUKBOKAY na sila si boxing legend Floyd Mayweather Jr. ug YouTube superstar Logan Paul sa usa ka exhibition bout karong adlawa, Hunyo 7, 2021 (RP time) sa Hard Rock Stadium sa Miami Gardens sa Florida, USA. Sa taho sa TMZ Sports, gibanabanang mokabat ngadto sa $30 million o P4.7 bilyones ang posibleng kitaon ni Mayweather ning awaya. Wala pa'y labot niini ang mabulsa ni Mayweather gikan sa halin sa pay-per-view nga nagbalor og $50. Sigon ni Mayweather nga iyang giisip kining maong panagparang nga dili away apan usa ka gabii nga makahatag og kalingawan sa mga tawo. Ang exhibition boxing match molanat lang og walo ka round, tulo ka mga minutos kada round. Sukwahi sa regular nga boxing match, ang Mayweather-Paul bout walay scoring per round ug modaog lang pinaagi sa knockout, TKO o disqualification. Si Paul, 26, adunay usa lang ka boxing exhibition nga kasinatian diin napilde siya sa laing YouTube personality nga si KSI (Olajide William Olatunji) niadtong Nobiyembre, 2019. Si Mayweather, 44, miretiro sa pro boxing nga walay pilde sulod sa 50 ka mga away. Siya nahimong world title holder sa super featherweight, lightweight, super lightweight, welterweight ug super welterweight classes sa iyang 21-year boxing career. Lakip sa iyang gipanglupig mao sila Manny Pacquiao, Oscar De La Hoya, Shane Mosley ug Saul "Canelo" Alvarez. (RSC) This posting includes an audio/video/photo media file: Download Now

You are subscribed to email updates from https://www.sunstar.com.ph/. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States