Saturday, June 26, 2021

https://www.sunstar.com.ph/

https://www.sunstar.com.ph/

Indian national, menor gidunggab

Posted: 26 Jun 2021 06:45 AM PDT

Indian national naa sa kritikal nga kahimtang samtang naangol ang babayeng menor human sila gipangdungab sa suspetsadong kawatan ala 1:50 sa hapon sa Sabado, Hunyo 26, 2021 sud sa Oman Apartment, Sapphire St., Brgy. Tisa, dakbayan sa Sugbo.

Mga biktima giilang sila si Simar Kaur, 61, babayeng Indian national ug si Nikki Aleria, 17.

Samtang nasikop sa mga tawo ang suspek nga si Adriane James Desamparado, 19, nagpuyo sa nahisgutang lugar human nadakpan ug nakulatahan sa mga silingan.

Si Major Janelito Marquez, hepe sa Labangon Police Station nga nahinabi sa Superbalita Cebu, nagkanayon nga si Desamparado nisulod sa balay ni Kaur.

Apan nakugang si Desamparado kay wala siya nagdahom nga naa sila si Kaur ug Aleria hinungdan nga iyang gipangdunggab.

Si Kaur nakaangkog daghang mga samad dinunggaban sa nawong ug tuong bukton, lakip si Aleria.

Hinuon ang duha stable na ang kahimtang sulod sa Cebu City Medical Center (CCMC).

Matod pa ni Marquez nga ang edepisyo nga gipuy-an ni Kaur tulo ka andana.

Ang pagpanunggab nahitabo sa ikaduhang andana sa lawak sa mga biktima.

Gibutyag ni Marquez nga hilom nga nakasulod si Desamparado ug nangukay sa mga butang nga kawaton.

Apan nakugang siya kay kalit nga nangabot ang mga biktima.

Iya kining gipangdunggab, apan nabali ang kutsilyo nga iyang gigamit, nikuha kinig laing kutsilyo sa kusina.

Samtang nagkaguliyang, nakapangayo og panabang sila si Kaur ug Aleria.

Si Desamparado na trap sa sulod hinungdan nga nadakpan sa mga silingan.

Nakuha sa kapulisan ang kitchen knife nga iyaha ni Kaur nga gikuha sa suspek.

Si Desamparado nibutyag ni Marquez, nga daw nablangko siya sa kakuyaw dihang nasakpan sa mga biktima hinungdan nga iyang gipangdunggab.

Gihulagway ni Marquez nga daw sabog si Desamparado atol sa hitabo.

Si Desamparado niangkon nga sa Carbon Market mangawat sab siyag mga utanon.

Samtang ilado siya sa lugar sanglit siya ang kaabag sa mga namuyo.

"Kaila rani sila kay kining suspek, mao man ni sugo-sugoon nila diha mag-ayo sa mga leaking sa tubo. Uuban pa siyay tawagon. Basin nakasuyop ni nangawat," dugang ni Marquez.

Kasong frustrated murder ang gi-andam sa kapulisan batok kang Desamparado.

This posting includes an audio/video/photo media file: Download Now

PNoy gilubong; yanong state funeral gihimo

Posted: 26 Jun 2021 06:41 AM PDT

Si kanhi Presidente Benigno Simeon "Noynoy" C. Aquino III, 61, gilubong nga gihatagan og full military honors sa wa pay alas 2 sa hapon sa Sabado, Hunyo 26, 2021.

Ang urna nga gibutangan sa abo ni Aquino gilubong tupad sa iyang mga ginikanan, sila si anhing senador Benigno "Ninoy" S. Aquino Jr. ug kanhi anhing Presidente Corazon "Cory" C. Aquino, sa Manila Memorial Park.

Si Lingayen-Dagupan Archbishop Socrates Villegas, sa iyang wali atol sa misa sa lubong sa Sabado sa buntag pahinungod kang Aquino, nihulagway sa kanhi Presidente kinsa naila usab nga PNoy isip "brave, headstrong visionary" nga nakatutok sa iyang papel sa iyang liderato.

"PNoy died as he lived. He served without fanfare. He abhorred power trappings and power tripping. He slipped away quietly as much as possible disturbing no one. Walang wang-wang, very PNoy and not surprising," matod ni Villegas.

Si Villegas naglaum nga ang kamatayon ni Aquino "will spark another fire within us to resurrect his example of decency and integrity."

Si Villegas, kanhi presidente sa Catholic Bishops Conference of the Philippines, niawhag sa mga Pinoy sa pagbantay sa nangahitabo sa nasod. (MVI sa SunStar Philippines)

This posting includes an audio/video/photo media file: Download Now

Basura sa gatipun-og sa transfer station

Posted: 26 Jun 2021 06:38 AM PDT

Gawas sa pandemya, laing problema ang giatubang sa dakbayan sa Sugbo karon nga mao ang basura.

Nitumaw og balik ang problema sa basura human ang ARN Central Waste Management Inc., nagdumala sa sanitary landfill sa Barangay Binaliw, naningil sa Aljory Waste Management Solutions/Docast, hired private hauler sa dakbayan, sa giingong wa mabayri nga obligasyon nga naabot og P17.6 milyones.

Tungod niini, wa na makalabay sa basura ang Docast sa Binaliw mga unom ka adlaw na ang nilabay.

Niresulta kini sa pagtipun-og sa mga basura nga nagdam-ok sa transfer station sa Barangay Inayawan.

Karon, gikonsidera sa mga opisyal sa Cebu City Government ang pagpaubos sa Inayawan sa state of emergency o state of calamity aron pagsulbad sa problema sa transfer station.

BASURA GATIPUN-OG

Si Cebu City Acting Mayor Michael Rama, atol sa press conference niadtong Hunyo 26, 2021, niingon nga sa iyang pagbisita sa Inayawan transfer station, nakaingon siya nga ang kondisyon sa maong pasilidad kay "beyond comprehension."

"Piles of garbage can be found everywhere and the stench is unbearable causing so much inconvenience and threat to the health to over 6,000 households within the area," matod ni Rama.

Pun-an pa sa problema sa Docast ug ARN, gideklarar ni Rama nga ang problema sa basura sa dakbayan usa ka "serious cause of concern."

Matod ni Rama, kinahanglan pa nila kining istoryahan kuyog sa mga ubang opisyal kon ugaling man nga ipaubos sa state of emergency o calamity ba ang Inayawan.

Ang ideya suportahan ni Cebu City Acting Vice Mayor Donaldo Hontiveros, ug matud niya posibleng mag-umol og task force ang konseho para sa motutok sa problema sa transfer station.

Si Konsehal Eduardo Rama Jr., kinsa tsirman sa committee on public services, niingon nga kon madayon kining planoha, mas maayo unahon ang pagpatarong sa White Road sa barangay.

Ang konsehal niingon nga ang Department of Engineering and Public Works (DEPW) adunay kwarta alang sa pag-aspalto sa dalan ug mamahimo nga kini lang ang gamiton.

Si Inayawan Barangay Captain Kirk Bryan Repollo niingon nga kon ipadayon sa mga opisyal ilang plano, kinahanglan tanang kwarta ipagawas sa Dakbayan kwentadahon.

"I don't want that Barangay Inayawan be used as a possible money-making venture by anyone," matod ni Repollo.

Si Repollo, kinsa miyembro sa Bando-Osmeña Pundok Kauswagan (BOPK), nihangyo sab sa mga opisyal nga dili gamitan og politika ang maong proyekto ug makigtambayayong sila sa barangay ug di sa Mayor's Information and Liaison Officers (Milo).

Si John Javier sa Docast General Contractor, kinsa niapil sab sa press conference, nibutyag nga nagsugod na sila og balhin sa mga basura gikan sa transfer station padung sa landfill sa Consolacion.

Si Javier niingon nga nag-transition sila gikan sa ARN ngadto sa Consolacion landfill.

Mihangyo si Javier nga hatagan ang Docast og duha ka semana aron ma-normalize ang pagkolekta ug dispose sa mga basura.

Gihimakak sab ni Javier ang bayranan nga gipaningil sa ARN kaniya.

"Ang nahitabo, ilang gipagawas nga naay payables kay di na tinuod nga amount. That is why di ko ganahan mubayad ana kay naa koy advances nila nya ila kong pabayron og balik," matod ni Javier.

This posting includes an audio/video/photo media file: Download Now

Ebidensya batok sa konsehal ‘planted’

Posted: 26 Jun 2021 06:38 AM PDT

Gikondinar sa pamilyang Tabada sa lungsod sa Trinidad, Lalawigan sa Bohol ang ilang gihulagway nga di makiangayon ug butang-butang nga pasangil nga gihimo sa mga sakop sa Criminal Investigation and Detection Group (CIDG) 7 ug mga sundawo nga mi serve sa search warrant sa balay ni Carmilo Tabada, kagawad sa Barangay Poblacion.

Si Maricel Tabada Bolofer, pag-umangkon ni Carmilo, nagkanayon nga bakak ang tanang gipasangil sa kapulisan ngadto sa iyang uyoan sanglit buotan kini nga pagka barangay official.

Sa report nga gipagawas sa CIDG-7, si Tabada giingong leader sa Tabada criminal gang nga naglihok sa probinsya sa Bohol.

Giingong supporter kini sa mga rebeldeng New People's Army (NPA)-Bohol Party Committee.

Giangkon ni Maricel nga sakop kaniadto sa Farmers Development Center (FARDEC) si Tabada nga maoy motabang sa mga mag-uuma sa probinsya sa Bohol. Apan sa dihang napili na kini nga konsehal sa ilang barangay, wala na kini moaktibo sa grupo.

Nasayod na sila nga adunay hulga sa kinabuhi sa iyang uyoan gumikan kay gipasanginlan kini nga miyembro sa NPA.

"Previously, sa unang mga panahon before siya barangay kagawad, naa na gyud na siyay mga ingon ana, Sir, nga pasanginlan siya nga apil siya sa NPA nga pasukoon siya, pa surrenderon siya. Nganong mo surrender man siya nga dili man siya sakop anang mga tawhana?," matod ni Bolofer.

Dugay na nga mihimakak si konsehal Tabada nga nag suporta siya sa kalihukan sa mga rebelde bisan pa man nga naa siya sa organisasyon nga mitabang sa mga mag uuma.

Gihimakak usab niya nga iya ang nakuhang mga armas ug eksplosibo sulod sa panimay sa konsehal tungod kay adunay nakakita nga planted kini.

Gisaysay ni Maricel nga sa dihang misulod na ang mga sakop sa CIDG 7 sa kwarto ni Camilo, nagdala na kinig armas ug granada ug gibutang ilawom sa foam sa kama sa pamilyang Tabada.

"Naa silay gibutang didto ilang gi waling ang katong naay foam ug didto to nakit-an ang mga ang ilang gibutang nga eksplosibo ug kadtong mga armas nga gibutang ra nila," dugang ni Maricel.

Ila usab nga gihimakak nga leader sa criminal gang si Tabada sanglit naila ang ilang pamilya nga dyosnon sa lungsod sa Trinidad ug wa usab silay record nga nalambigit sa ilegal nga kalihukan.

Wa nadungog sa tibuok probinsya nga adunay nanulis nga ang suspek nag apilyedog Tabada. Atol sa pag serve sa search warrant gipasangil ni Maricel nga gipugos sa mga pulis ang pagsulod sa mga balay nga silingan ni Tabada gamit ang vault cutter.

Tungod niini, nidangop sila karon sa Commission on Human Rights (CHR) aron mahatagan og hustisya ang gihimo sa awtoridad ngadto kanila.

Nag plano usab ang ilang pamilya nga mopasakag kaso batok sa kapulisan ug mga sundawo nga giingong illegal nga mi search sa ilang balay bisan kon nihangyo sila nga sa di pa mohimo sa pag siksik, ubanan silag mga barangay official. (AYB)

This posting includes an audio/video/photo media file: Download Now

3 ka sakyanan nabangga

Posted: 26 Jun 2021 06:38 AM PDT

Maayong pagkadasok sa usa ka Honda BRV sa buhatan sa Mactan Electric Company (Meco) sa Airport-Sangi Road, Brgy. Pajo, Dakbayan sa Lapu-Lapu, pasado alas 8 sa buntag sa Sabado, Hunyo 26, nga niresulta sa pagkaguba sa usa ka bahin sa buhatan ug sakyanan.

Wa hinuoy namatay sa aksidente apan naangol og gamay ang drayber sa sports utility vehicle (SUV) nga daling gidala sa tambalanan.

Ang SUV gimaneho sa usa ka Grace Racaza Villahermosa, 51, taga St. Paul Village, Kinalumsan, Brgy. Gun-ob, Dakbayan sa Lapu-Lapu.

Matod ni Police Chief Master Sergeant Rodrigo Inoc sa Police Station 3 sa Lapu-Lapu City Police Office (LCPO) nga base sa ilang inisyal nga imbestigasyon, giingong padulong untang mo-park ang sakyanan sa atubangan sa Meco.

Apan inay mo-park na, kalit kining nibangga sa buhatan human nga nawad-an og kontrol sa iyang sakyanan si Villahermosa.

Ang sakyanan automatic transmission sumala sa kapulisan busa posibleng nasipyat si Villahermosa sa control niini dihang padulong na unta mo-park.

Wa hinuoy tawo sa buhatan sa Meco atol sa hitabo hinungdan nga ang ila rang buhatan ang naguba.

Sanglit usa kini ka self accident, sumala sa kapulisan nga ang Meco na unya ang posibleng mangayo sa drayber sa bayrunon sa kadaut sa ilang buhatan.

5 KA MOTOR GIDARO

Gidaro sa usa ka pick-up nga sakyanan ang lima ka mga motorsiklo sa interseksyon sa J.P. Rizal St. ug H. Abellana St., Barangay Canduman, Mandaue City sa alas 2:59 sa hapon sa Biyernes, Hunyo 25, 2021.

Giila ang driver sa pick-up nga si Hazel Mantandao, 43, taga Barangay Tabok, Lapu-Lapu City.

Sa pakighinabi sa Superbalita Cebu ni Edwin Jumao-as, pangu sa Traffic Enforcement Agency of Mandaue (Team), nga nakuha sa CCTV monitoring sa Mandaue City Central Command Center ang hitabo.

Nakita didto nga naghunong ang pick-up nga gimaneho ni Mantandao uban ang lima ka mga motor nga anaa sa atubangan niini ug kilid.

Ang mga sakyanan nagsubay sa J.P. Rizal St. ug ang direksyon nila gikan sa Barangay Jagobiao paingon sa Barangay Basak.

Human ni-signal og "go" ang traffic light, kalit lang nga kusog nga nidagan ang pick-up ug nadaro ang unom ka mga motorista.

Matod ni Jumao-as nga gituohang natumban ni Mantandao ang gasolinador ug dulhogon sab ang dapit hinungdan nga wala niya nakontrolar ug nadaro ang lima ka mga motorsiklo.

Upat ka mga motorista ang nakaangkon og mga pangos sa insidente.

Usa ka motorsiklo nakasinati og grabeng danyos tungod kay napasok sa may atubangan nga ligid sa pick-up, sigon ni Jumao-as.

Matod niya nga daling miresponde ang mga kawani sa Disaster Risk Reduction Management Office (DRRMO) aron pag-atiman sa mga nasamdan.

Samtang si Mantandao giimbetar sa Mandaue City Police Office (MCPO) Traffic Division.

Sa imbestigasyon ni Police Staff Sergeant Maximo Moneva, sala ni Mantandao ang nahitabo.

Gikasabotan sa tanang partido nga i-settle ang hitabo tungod kay naamong ang lima ka mga motorista sa pagdaro ug nakaangkon ang uban og minor physical injuries.

Wala ra gipasakaan og kaso si Mantandao sa mga motorista.

Sa laing bahin, sigon ni Jumao-as nga wala ra nakamugna og hinay sa trapiko ang insidente tungod kay na pull out ra dayon kini nila sulod sa tulo ka minutos.

FERRARI BATOK TRAYSIKOL

Traysikol driver naangol human nabanggaan sa usa ka Ferrari alas 10 sa buntag sa Sabado, Hunyo 26, sa national highway sa corner Alonso Street, Brgy. Poblacion, lungsod sa Asturias.

Si Roel Empenado, 31, minyo, traysikol driver, nalandig sa tambalanan sa Balamban human naigo iyang walang tiil.

Nakadasmag niya si Sebastian Yap Jakosalem, 19, ulitawo, taga Brgy. Mabolo, dakbayan sa Sugbo, kinsa nagmaniho sa iyang Ferrari (ZHR-898).

Si Police Chief Master Sgt. John Philip Acaso, imbestigador sa Asturias Police Station nga nahinabi sa Superbalita Cebu, nagkanayon nga si Empenado namasahero ug kalit nga miliko sa crossing sa maong dapit.

Akto sab kaayo nga ang Ferrari nga gimaniho ni Jakosalem nagsubay sa dapit padulong sa lungsud sa Tuburan, naigo ang traysikol ug driver.

Naguba ang traysikol ingon man atubangan sa Ferrari.

Hinuon gi-release sa kapulisan sanglit nagkasinabot ang matag habig, ang tag-iya sa Ferrari nga maoy moabaga sa gastuhan sa biktima. (KFD, GCM, GPL)

This posting includes an audio/video/photo media file: Download Now

Pusher ‘misukol’ sa mga pulis, napatay

Posted: 26 Jun 2021 06:31 AM PDT

Pusher namatay samtang pulis naangol atol sa buy-bust ala 1:55 sa kaadlawon sa Sabado, Hunyo 25, 2021, sa Sitio Young Riverside, Brgy. Alaska, Mambaling dakbayan sa Sugbo.

Si Renante Manloloyo, 42, alias "Insik", minyo, nagpuyo sa lugar, namatay human giingong ningsukol sa mga sakop sa Regional Drug Enforcement Unit (RDEU-7).

Si Police Major Philip John Libres, team leader sa RPDEU 7, nga nahinabi sa Superbalita Cebu, nagkanayon nga si Manloloyo kalit nga namusil sa ilang mga sakop atol sa buy-bust.

Naigo si Patrolman Rodgene Rey Aliway sa tiyan apan maayo na lang kay nakasul-ob sa bulletproof vest hinungdan nga bun-og lang ang naangkon.

Nibawos ang iyang mga sakop hinungdan nga naigo si Manloloyo, nga maoy hinungdan sa kamatayon niini.

Si Libres nibutyag nga nakuha nila sa possession ni Manloloyo ang armas nga 9mm pistol nga dunay duha ka mga bala, usa ka kabhang, 55 ka gamayng putos sa shabu, unom ka medium nga putos sa shabu, buy-bust money ug gituohang halin sa illegal drugs.

Ang drugas mitimbang og 32.16 gramos nga mobalor og P218, 688 base sa Dangerous Drugs Board (DDB) value.

This posting includes an audio/video/photo media file: Download Now

Editoryal: Kalimti na

Posted: 26 Jun 2021 06:31 AM PDT

Human sa iyang pangatungdanan, nahanaw sa mga mata sa publiko si kanhi Presidente Benigno Aquino III. Kon motumaw man, pipila ka ra sab ka higayon. Nakit-an siya sa hamubong higayon dihang ning-embistigar ang mga magbabalaud sa kontrobersiya sa Dengvaxia nga usa sa mga kontrobersiya sa iyang administrasyon.

Gani, napasakaan siya og kaso uban sa pipila ka mga opisyal sa iyang administrasyon.

Taliwa sa pagpanaway sa administrasyong Duterte sa paghupot sa administrasyong Aquino sa krisis sa Scarborough Shoal ug West Philippine Sea, pabiling nagpakahilom si Pnoy. Mao diay kay ning pipila ka nanglabay nga mga tuig, duna diay siyay sakit nga wa niya gipasaba aron di makaingon ang publiko nga nangayo siyag simpatiya.

Ang iyang pamilya ug suod kaayong mga higala ang nasayod sa tinud-anay nga kahimtang sa iyang panglawas.

Nagbaha ang mga simpatiya, bisan gani ni Presidente Rodrigo Duterte, kinsa nideklarar og 10 ka adlaw nga nasudnong pagbangutan.

Apan bisan pa niini, naa gihapon ang mga pagpanaway ug pagpamugalbugal, labina niadtong mga kritiko ug nahimong imortal nga kaaway sa administrasyong Aquino. Mas init pa ang ilang mga dumadapig sa pagpangaway sa social media.

Unta, namatay na si Pnoy, palabyon na lang kon unsa man ang kasuko nga gibati sa usag usa nga wa makauyon sa iyang administrasyon ug kadtong nabiktima sa pagpanglutos nga di siya direkta ang naghimo kay iya rang mga tawo ang nagkinaugalingon.

Di man gud panahon sa pagpangaway ug pagpanaway samtang dunay pagbangutan. Isip Pinoy nga naila nga matinahuron, ipatigbabaw ang pagkatawhanon unta karon. Kon duna may kaligutgot ug kasuko, iuban usab kini sa paglubong sa mitaliwan nang kanhi Presidente nga gidayeg usab sa minilyon ka Pinoy.

Panahon na karon sa pag move on.

This posting includes an audio/video/photo media file: Download Now

Nalzaro: Requiescat in Pace, PNoy

Posted: 26 Jun 2021 06:29 AM PDT

Matod pa sa inilang magsusuwat, poet ug philosopher, Rabindranath Tagore, 'Ang kamatayon dili mao ang pagpakgang sa kahayag. Kon dili mao ang pagpawong sa lampara gumikan kay miabot na ang kabuntagon.'

Nakurat ang katawhang Pilipinhon sa balita niadtong Huwebes sa kalit nga pagtaliwan ni kanhi Presidente Benigno Simeon 'Noynoy' Aquino III sa pangidaron nga 61 anyos kay wa na kaayo siya makita human sa iyang termino. Si PNoy maoy ika-15 nga Presidente sa Pilipinas. Miserbisyo siya isip presidente gikan sa 2010 hangtod sa 2016. Sa wala pa mapresidente, siya kongresista ug senador. Matod pa sa mga kritiko nga sulagma lang ang iyang pagka-presidente kay misimpatiya lang ang katawhan gumikan sa kamatayon sa iyang inahan. Well, kining presidency gitawag og 'destiny'.

Walay perpekto nga tawo ug way perpekto nga administrasyon. Daghan siya og nahimo atol sa iyang pangagamhanan sama sa pagpalambo sa ekonomiya. Daghan usab og mga kapakyasan. Daghan ang nakadayig sa iyang pagkatawo kay simple kaayo ug matinud-anon. Apan ang pagdumala dili man lang pagdayeg sa batasan sa lider, kon dili ang kinatibuk-an nga pangatungdanan.

Sama iyang inahan nga si kanhi Presidente Cory Aquino, matinud-anon sa pagdumala sa nasud ug way isyo sa kurapsiyon. Apan ang problema kay ang mga tawo nga naglibot kaniya nipahimulos sa panahon nga nakamantsa sa iyang administrasyon. Uban sa iyang panaad nga 'Daang Matuwid', gitinguha ni Pnoy ang paglimpiyo sa gobiyerno ug pagpaumento sa kahimtang sa katawhan. Iyang gipanggukod ang mga magbabalaod nga nahilambigit sa pork barrel scam, labi pa ang oposisyon, apan ang iyang mga kaalyado nga nangangurakot napasagdan.

Sama sa mga lider sa ubang suok sa kalibutan, madawat nila ang mga pagdayig ug pagpanaway sa ilang mga kalampusan ug kapakyasan. Gihimo ni PNoy ang tanan aron moumento unta ang kahimtang sa mga Filipino apan subo palandungon nga wala niya kini mahimo. Igo lang siya nagbilin og legasiya nga angay kapanaminan sa umaabot nga henerasyon. Maayong pagpanaw PNoy. Sigurado nga ang imong maayong nabuhat alang sa nasud dili makalimtan sa katawhang Pilipinhon karon ug ugma. Requiescat in pace (Rest in peace), Pnoy. (bobbygnalzaro@gmail.com)

This posting includes an audio/video/photo media file: Download Now

Diola: Sukol, dagan, kaging

Posted: 26 Jun 2021 06:29 AM PDT

Binasi sa Kinaadman 1:13-15; 2:23-24; Salmo 30; 2 Taga-Corinto 8:7, 9, 13-15; Marcos 5:21-43

Atubangan sa peligro ug sa ngil-ad nga panghitabo, adunay tulo ka mga tubag nga mahimong himuon sa tawo. Kon ininglison pa, "fight, flight, freeze". Mag-agad ang atong tubag sa atong kaagi, naandan, kinaiya, ug, usab, sa kahimtang nga atong giatubang. Kon may tawo nga nagwara-wara og sundang nga padulong kanato, daghan siguro nato ang modagan. Kon maapikihan ug wala nay daganan, mahimong mosukol ug mokaging na lamang. Sa laing bahin, kon moatubang kita og nindot, maayo, ug matahom nga butang ug reyalidad, madani kita. Dawaton nato kini, moduol kita, ug maabri ang atong kahiladman. Lahi atong himuon.

Kahadlok ang nag-atubang sa mga hingtungdan sa ebanghelyo. May duha ka episodio. Ang una mahitungod kang Jairus, usa ka opisyal sa sinagoga, kansang anak nga babaye himalatyon. Ipatapion niya ang kamot ni Jesus aron kini maayo. Nahadlok siya nga mamatay kini. Sa ikaduhang episodio, may babaye nga gitalinug-an sulod sa napulog-duha ka tuig. Nahurot na iyang kabtangan sa pagbayad sa mga mananambal, apan wala gihapon siya maayo. Duha purohan ang iyang kahadlok: nga basig dili siya maayo ug, labaw pa niini, nga basig isalikway siya ni Jesus kay ang pagkatalinug-an makapahugaw sa babaye ug kinahanglan siya magpalayo sa uban.

Taliwala niining mga kahadlok, mingsukol si Jairus ug ang babaye. Nakigharong sila kang Jesus nga nagpakitabang kaniya. Mihangyo si Jairus ug mihikap sa bisti ni Jesus ang babaye. Lain ang tubag sa uban taliwala sa mga kalisdanan. "Mingdagan" ang mga sakop ni Jairus sa dihang namatay ang anak niini ug miingon sila: "Patay na ang imong anak nga babaye; nganong imo pa mang samokon ang Magtutudlo?" Aduna poy mikaging: "Ug pag-abot nila sa balay...nakita niya ang kaguliyang ug paghinilakay og kusog nga pagminatay."

Wala panumbalinga ni Jesus ang mga babag. Hinunoa, naayo ang babaye ug gipabangon niya ang anak ni Jairus. Pagsukol ang pagtuo batok sa kahadlok ug kamatayon.

Nagkanayon ang libro sa Kinaadman nga "ang Dios wala magmugna sa kamatayon, ug kon ang buhi nga mga binuhat mamatay, dili siya malipay niini." Kinabuhi ang tumong sa Ginuo: "Gibuhat niya ang tanan aron magpadayon kini ug ang tanang butang nga iyang gibuhat hingpit ug maayo." Sukwahi diay sa plano sa Ginuo ang kamatayon ug kini misulod sa kasaysayan sa tawo tungod sa sala. Nahimong tawo ang Pulong sa Dios aron pagasugdan ug tapuson ang hingpit nga kaluwasan sa tawo batok sa sala ug kamatayon. Siya ang hingpit nga tambal sa pandemya sa sala ug kamatayon.

Giunsa man pag buhat ni Jesus niini? Sumala ni San Pablo sa 2 Taga-Corinto: "Kay nasayod kamo sa grasya sa atong Ginuong Jesucristo, nga bisan siya dato, nagpapakabos siya tungod kaninyo aron madato kamo pinaagi sa iyang kakabos." Gihubo ni Jesus ang pagkadayag sa iyang pagka-Dios aron mabatonan niya ang atong pagkatawo. Namatay siya sa krus tungod ug alang kanato. Kini ang gipasabot sa pagtubos ni Jesus.

Dili diay kita angay modagan o mokaging atubangan sa kangil-ad ug kamatayon bisan pag wala kini magpasabot nga magpasaya-saya kita atubangan sa peligro. Dili pod mistil mosukol ginamit lamang ang atong kaugalingong kusog. Anaa si Jesucristo ug siya ang nibuntog sa sala ug sa kamatayon.

Unsa may imong buhaton atubangan sa peligro ug kangil-ad?

This posting includes an audio/video/photo media file: Download Now

Daclan: Heart Evangelista sa bag-ong teleserye

Posted: 26 Jun 2021 06:20 AM PDT

Andam na ang tanan alang sa umaabot nga teleserye ni Heart Evangelista nga "I Left My Heart in Sorsogon" sa Kapuso network.

Dugay na kong gasunod aning Heart sukad pa niadtong Kapamilya artist pa kini hangtod sa paglayat ani sa GMA-7.

Bata pa kini fan na kaayo ko aning bayhana, hangtod na lang na dalaga ug naminyo kini.

Karon nga may bagong serye na kini usa sab ko sa mag-atang unya niini, samot na siguro ang iyang mga diehard fans.

Sa gipahigayong virtual conference sa maong serye nakuha sab nato kon kinsa ang mahimong kauban niya dinhi.

Mahimong leading man ni Heart silang Paolo Contis ug Richard Yap diin iyang unang Kapuso project.

Adunay bag-ong loveteam nga ipakita dinhi silang Mavy Legaspi ug Kyline Alcantara.

Ang maong loveteam unang nag-viral sa Instagram sa dihang may gi-post si Mavy nga usa ka misteryosong babaye nga lawom kaayo og kandiis.

Gani may mga hugonhugon pa nga mao kini ang espesyal nga babaye karon sa kasingkasing ni Mavy.

Uban usab ang beteranang actress nga si Shamaine Buencamino nga gikan sa "FPJ's Ang Probinsyano" diin bag-o lang gipatay ang iyang papel sa serye.

Makauban usab nila dinhi silang Rey "PJ" Abellana, Marina Benipayo, Isay Alvarez, Aubrey Miles ug uban pa.

Ipahibalo ra nila kon sugdan na ang ilang lock-in taping ug kon kanus-a kini nato makita sa Syete, Ay'g Saba!

* * *

Kapamilya stars Judy Ann Santos Agoncillo ug Jericho Rosales mahimong guest sa talkshow sa Kapuso network nga "Mars Pa More."

buhaton atol usab sa birthday celebration nilang Camille Prats ug Iya Villania sa ilang balik taping sa maong programa, atangi, Ay'g Saba!

* * *

"Gluta" ang bag-ong pelikula ni Ella Cruz diin usa ka Aeta nga gustong mahimong beauty queen ang iyang papel.

Drama comedy ang pelikula nga puno sa mga pagtulon-an matod pa ni Ella, sobrang challenging para kaniya ang iyang papel kay hapit dili nimo siya ma-ilhan dinhi kay gipa-itom ug maayo ang iyang nawong ug tibook lawas dinhi.

Tag-as kaayo ang iyang dialogue dinhi ug kinahanglan nga one take ra kini nga kuhaon ug naa pay make up niya nga kinahanglan dili molubad ang iyang ka-itom tungod sa ka-init.

Bisan grabe ang hagit sa iyang papel apan malipayon kaayo kini nga siya ang gitugyanan ug gisaligan ni Direk Darryl Yap.

May espesyal nga partisipasyon dinhi si Marco Gallo nga unang nakauban ni Ella sa thriller movie nga "Rooftop."

Ang Ella Cruz mapasalamaton kaayo nga natagaan sa maong nindot proyekto nga mahimong iyang ikapasigarbo ug mapakita pa ang iyang abilidad sa pag-arti, Ay'g Saba!

This posting includes an audio/video/photo media file: Download Now

Pulis kuno, tulisan diay; swertres sa Danao giigo

Posted: 26 Jun 2021 06:20 AM PDT

Nagpailang pulis nanulis sa outlet sa Swertres alas 6:50 sa gabii sa Biyernes, Hunyo 25, 2021 sa Sitio Tabok, Brgy. Maslog, Dakbayan sa Danao.

Ang teller nadala usab sa diskarte kay maayo kaayong nakaestorya, nag inspection pa sa outlet.

Si Ellen Sarda, 52, biyuda, nagpuyo sa nahisgutang lugar, teller, way nahimo, iyang nahatag ang P3,000 nga kita ngadto sa armadong suspek nga giila sa kapulisan nga si Richard Tundag, 35, taga lungsud sa Liloan, kinsa wa pa igkita.

Si Police Staff Sergeant Raymond Bacordo, imbestigador sa Danao Police Station nga nahinabi sa Superbalita Cebu, nagkanayon nga si Sarda gipasakay ni Tundag sa motorsiklo human gipatuo nga dalhon sa police station.

Apan sa pag-abot sa unahan, gipakanaog siya ug gikuha ang P3,000 nga kita sa outlet.

Matod pa ni Bacordo, nga wa mag helmet si Tundag, kinsa kalit nga niabot sa ticketing both ug nagtuo si Sarda nga mopatad.

Nangutana kunohay si Tundag duna ba silay dukomento ug certificate sa ilang outlet kay sa iyang tan-aw illegal kini nga gimontar sa lugar.

Nagpaila si Tundag nga pulis ug gihulga ang teller nga mokuyog niya kay moadto sila sa police station.

Gisultihan niya si Sarda sa pag-angkas kaniya sa motorsiklo kay ang patrol car toa sa highway nagpaabot.

"Pag-abot nila sa national highway, wala may patrol car sa pulis. Unya nihunong daw, nagtawag ang suspetsado nga 'Sir, dili nalang nato ni dalhon ang usa kay luoy man kaayo."

Diha-diha nimando si Tundag kang Sarda nga ihatag ang kwarta kay gamiton niyang ibedensiya.

Gumikan sa iyang kahadlok kay nagpakita og armas, gihatag ni Sarda ang ilang kita dayon mipadagan ang suspek sa iyang motorsiklo nga wala masuta asa padulong.

Si Sarda dali nga nibalik sa outlet ug nipahibawo sa iyang operator ug ilang gi-report sa Danao Police Station ang hitabo.

Sa follow-up sa kapulisan, nasuta ug ilang nailhan si Tundag.

Giingong nagpuyo kaniadto sa maong dapit si Tundag nga nagpa-ilang pulis ug kanunay magdalag armas.

Si Bacordo niingon nga nasubay na nila asa si Tundag, apan nakasibat hinungdan nga giandam na nila ang kaso batok niini.

This posting includes an audio/video/photo media file: Download Now

Vallena: Unsay nakalangay?

Posted: 26 Jun 2021 06:15 AM PDT

Kon duna gani planong panghimuon nga mga karsada, hisgutan dayon ang sidewak ug bike lane. Sama sa pagtuki kaniadto sa Cebu-Cordova Link Expressway nga sa sayong bahin, gihisgutan ang posibilidad sa pag-agi sa biseklita. Apan karon, bisan gani motorsiklo nga ubos sa 400cc di makaagi sumala sa pasiunang assessment.

Kaanindot man unta kon sa mga pagpalapad sa karsada, iapil na ang bike lane aron luwas ang mga tawo nga mogamit sa biseklita. Sa pagkakaron, ang mga karsada nga gipalapdan way bike lane. Kana hinuong hagip-ot nga mga dan gipamutangan hinungdan nga daghang drivers nangreklamo.

Sama karsada sa amoa, gikan sa eskina sa Talamban hangtod na sa Barangay Pit-os. Sukad ko nakamatngon og buot, ang karsada sa amoa, gawas lang sa pipila ka bahin, wa mapadak-i hangtod karon. Imagine lima na ka dekada nga way nahitabo.

Ingon niana kadugay, apan nituybo ang populasyon og tingali usa ka libo ka pilo. Mao nga bisan usa ka sakyanan nga i-park daplin sa dan, o bisan motorsiklo lang, momugna na ni og hinay o paghunong sa dagan sa trapiko. Ambot kon nganong sa kamubo sa karsada wa pa may nahitabo hangtod karon.

Kon moabot man gani ang pagpalapad, hinaut pang apilan ni og bike lane kay kining Talamban hangtod sa Pit-os, gateway ni sa kabukiran sa Dakbayan sa Sugbo, Mandaue, Consolacion, Liloan, Compostela ug Danao nga rota sa bikers . Naa gani mangadto sa Balamban ug Asturias pud nga anha gihapon moagi. Hangyo lang nako sa Department of Public Works and Highways (DPWH).

UNSAY NAKADUGAY?

Niadtong sayo sa 2000, nagkasultihanay mi ni Alvin Arcilla nga mao pay barangay captain sa Talamban niadtong higayuna. Matod niya nga masugdan na sa di madugay ang pagpalapad sa karsada gikan sa Talamban padung sa Pit-os. Apan hapit na mag 20 ka tuig sukad sa among panag-estorya, wa gihapoy nahitabo.

Naa na guy mga balay nga gipangguba na, apan wa gihapoy nahitabo nga pagpalapad sa dan. Nangabayran na man unta, apan wa gihapoy nahitabo. Di unta mag-antos ang mga taga Talamban, Bacayan, Pit-os, San Jose, Binaliw, Pulangbato ug uban pang mga barangay sa kahuot sa trapiko.

Usa sa rason nganong di na kaayo mi ganahan magbiseklita basta udto na ug weekdays, kini tungod sa trapiko. Kaniadto sayon rang ilusot, apan karon makigkompetensya ka sab sa mga motorsiklo.

Hinaut pang makakita ta ining tinud-anay nga pagpalapad sa karsada sa amoa kay gikinahanglan na kaayo ni. Wa gani makapasabot ang mga opisyal sa DPWH kon unsay nahitabo, nganong kini nalangay. Wa pa gani managan ang tanang sakyanan, nibalik nag huot ang dan. Unsa na kaha kon mag new normal na, moirog pa kaha ang mga sakyanan?

This posting includes an audio/video/photo media file: Download Now

Super Blowout: Lain nga gasa gikan sa kahitas-an

Posted: 26 Jun 2021 06:10 AM PDT

Nadoble ang kalipay nga gibati nila ni Ronnel Boltron ug Sarah Nyven Yncierto tungod kay masundan og laing anghel ang ilang anak.

Ang maayo nga balita sa pagsabak na usab ni Sarah iyang nahibaw-an atol gyud mismo sa 1st birthday sa ilang una nga anak ni Ronnel nga si Nelven Red niadtong Hunyo 18.

Matod ni Sarah, dili lalim ang mahimo nga ginikanan ug usa kini ka dakong tahas alang niya.

"Mapasalamaton kaayo ko sa Ginuo sa lain na pud nga grasya nga iyang gihatag namo... Dako jud siya nga tahas isip usa ka ginikanan kay moduha na among anak pero nindot kaayo sa pamati nga managhan mi," padayag ni Sarah.

Ang kalipay nila ni Sarah ug Ronnel ilang gipaambit ngadto sa ilang isig ka pamilya ug mga higala pinaagi sa pag-post sa ilang tagsatagsa ka Facebook account.

Ang kasaulogan sa 1st birthday ni Nelven Red gipahigayon niadtong Hunyo 20 sa Eighty Affordable Events sa dakbayan sa Talisay.

Aduna kini tema nga Boss Baby kay matod ni Sarah, si Nelven ang ilang boss.

Ang birthday party gitambongan sa ilang mga pamilya, kabanay ug mga higala.

Gidugang ni Sarah nga gisunod nila ang protocols samtang nagpadayon ang party.

Nabusog ang mga bisita sa mga pagkaon samtang nalingaw ang mga bata sa games nga giandam alang nila. (SCG)

This posting includes an audio/video/photo media file: Download Now

Binukbokay sa Talisay

Posted: 26 Jun 2021 06:10 AM PDT

Ang Stags Boxing Promotions (SBP) mopahigayon og boxing event nga giulohan og "First Blood" sugod karong alas 2 sa hapon sa barangay San Isidro multipurpose gym sa dakbayan sa Talisay, Hunyo 27,2021.

Si Atty. John Jigo Dacua, tag-iya sa SBP, nagkanayon adunay lima ka boxing match ang mahitabo nga bituonan sa mga amateur boxer kansang abilidad nahisama na sa mga professional.

"Naay boxing event karon sa San Isidro multi-purpose gym sa Talisay City apan mangayo ko og dispensa sa mga ganahang motan-aw physically kay dili man pwede (no audience) kay mao may protocol nga gipatuman because of Covid-19," padayag ni Dacua.

Lakip sa mga mobida ibabaw sa ring mao silang Marco Pomar, 23, kinsa nagsugod og kahilig sa boxing sa edad nga 9 anyos ug nahimong gold medalist sa Regional Batang Pinoy niadtong 2011 sa Dumaguete City, silver medalist sa CVRAA niatong 2011 sa Tagbilaran City, gold medalist sa PRISAA National niadtong 2015 sa Ilo-ilo City ug daghan pang bulawan ug silver nga mga medalya nga iyang nahakot.

Mopakita sab sa iyang labok si Keyt Niño Bacalso kinsa 11 anyos palang nagboxing na ug nahimong silver medalist sa Batang Pinoy National Championship niadtong 2015 sa Cebu City ug gold medalist usab siya sa Philippine Sports Commission championships niadtong 2019 nga gipahigayon gihapon sa Cebu City.

Anaa sab ang presensya ni Kit Garces, 22 anyos, kinsa nahimong bronze medalist sa Tammer Cup ubos sa Philippine Boxing Team nga gipahigayon didto sa Finland, silver medalist sa Road of Belt sa China, gold medalist sa Palarong Pambansa, gold medalist sa Batang Pinoy sa Visayas ug sa national, gold medalist sa Philippine National Games ug 5-time gold medalist sa CVIRAA.

Ang maong sumbagay dili patan-awan sa personal aron paglikay sa pagtakod sa virus nga magsugod alas 2 karong hapon. (PAC)

This posting includes an audio/video/photo media file: Download Now

Migallen: Simmons i-trade kaha sa Sixers?

Posted: 26 Jun 2021 05:53 AM PDT

Napuno sa negatibong komento si Ben Simmons taliwala sa kapildihan sa Philadelphia Sixers sa deciding Game 7 sa Eastern Conference semis batok sa underdog nga Atlanta Hawks.

Daghan man tuod nga mga aspeto nga nakatampo sa maong kapakyasan, apan mipatugbabaw gyud ang pagbasol ngadto sa 6-11 nga maoy top overall pick sa Sixers sa 2016 NBA Draft.

Kini nagagumikan ra pud sa iyang gipakitang performance sa playoff batok sa Hawks nga layo ra kaayo sa gituohan sa kadaghanan.

Imbis asset nahimo na man hinuon siyang liability sa team. Kini sukwahi sa iyang unang duha o tulo ka tuig sukad sa pagsulod niya sa NBA.

Nawala ang iyang kaagresibo. Wa niya magamit ang iyang gitas-on ug kahanas nga maoy nakapahimo niyang ikatulong Australiano nga na no. 1 pick sa drafting, sunod ni Andrew Bogut ug Kyrie Irving.

Mahadlok nga moitsa nga gani sa fourth quarter sa Game 7 wa gyud kini attempt sa field goal.

Ang 24-anyos nga American-Australian nga Simmons bag-o lang gibag-ohan og kontrata sa Sixers nga mokantidad og $177.24 sulod sa lima ka tuig.

Sa unang tuig, makadawat siya og $30, $33 million sa ikaduhang tuig, $35 million, $37 million ug $40 million sa pasunod nga mga katuigan.

Pero mora og wa makita sa iyang dinuwaan ang kantidad sa gibayran sa Sixers.

Sa ilang kapildihan, 103-96, sa Game 7, si Simmons wa gyuy attempt sa field goal. Sa katapusang kuwatro minutos nga nahabilin sa duwa, dihay higayon nga libre na kaayo unta siyang makahansak nga posibling maoy makapausab sa dagan sa duwa, apan iya pa gyud kining gipasa.

Dili interesadong moitsa kay mahadlok nga ma foul ug maghatod kaniya sa free throw line. Gihulagway nga kini si Simmons, sa kasaysayan sa NBA, maoy usa sa pinakabanga nga moitsa sa free throw area.

Tungod niini, misubaw ug mikatap karon ang pangagpas sa posibilidad nga i-trade si Simmons ngadto sa laing team.

Ang headcoach sa Sixers nga si Doc Rivers wa makatubag sa dihang gipangutana sa mga reporters kon mahimo bang point guard sa usa ka championship team si Simmons.

Buot ipasabot nga niminus ang pagtan-aw ug pagsalig ni Rivers ngadto sa iyang batos kinsa maoy runner up sa best defensive player award sa karon nga season.

Pero ning uwahi lang, daw og sa anugonan ang Sixers nga mawala kanila si Simmons. Imbis buhian, ang pagdevelop sa itsa niini, ilabi na sa free throw line, maoy ilang hatagan og prayoridad.

Apan kini magdepende lang sab sa kooperasyon ni Simmons. Posibling dili siya haom sa sistema sa ilang bag-ong coach nga usa pa lang ka season nga nakahupot kanila.

Tinuod nga andam ang Sixers nga moinat sa ilang pasensiya ngadto ni Simmons, apan kon makadawat og saktong offer nga ika-trade si Simmons, kinsa man ang Sixers nga modili sa tanyag.

Pipila ka mga teams karon ang naniid kon unsay sunod buhaton sa Philadelphia ngadto ni Simmons ug andam usab sila sa paghatag og saktong tanyag aron lang makuha ang serbisyo sa 6-11 nga ballhandler. (jun.migallen22@gmail.com)

This posting includes an audio/video/photo media file: Download Now

Kidd, Billups bag-ong head coach sa NBA

Posted: 26 Jun 2021 05:53 AM PDT

Ang Portaland Trail Blazers ug Dallas Mavericks pulos adunay bag-ong head coach inig sugod sa 2021-2022 season sa National Basketball Association.

Base sa report, si Chauncey Billups kinsa maoy assistant coach sa Los Angeles Clippers maoy bag-ong bench tactician para sa Blazers nga maoy mohulip kang Terry Stotts kinsang serbisyo wala na kuhaa sukad niadtong unang semana sa Hunyo.

Samtang si Jason Kidd, mobalik na usab sa Dallas Mavericks kinsa iyang gigiyahan niadtong 2011 para malangkat ang kampyonato sa NBA apan dili usa ka player kon dili magsilbi nga head coach sa sunod season.

Si Kidd ug ang Mavericks nagkauyon sa ilang kontrata kagahapon, walo ka adlaw human niluwat sa iyang katungdanan si Rick Carlisle human sa pagbiya sa ilang general manager nga si Donnie Nelson.

Ang kontrata ni Kidd sa Mavericks ug Billups sa Blazers wala pa hibaw-i kon pila ka tuig ang ilang gisabotan ug pila sab ang kantidad matag season hangtod niining pagsuwat.

Ang Blazers gitaktak sa first round sa playoffs samtang mao sab ang gidangatan sa Mavericks kinsa nagtinguha nga ila pang maapsan ang ilang naabtan para sa sunod season. (JBM)

This posting includes an audio/video/photo media file: Download Now

Bucks misungay, Hawas mikupokupo

Posted: 26 Jun 2021 05:53 AM PDT

Gi-massacre sa Milwaukee Bucks ang Atlanta Hawks, 125-91 aron tablahon sa 1-1 ang best of seven eastern conference finals sa National Basketball Associations.

Ang paglubong sa Bucks og 34 puntos sa Hawks maoy nagsilbing panimalos human sila gipakauwawan mismo sa ilang balwarte, 116-113, atol sa game 1 sa East.

Si Giannis Antetokounmpo maoy nagmangtas para sa Bucks pinaagi sa iyang 25 puntos, 22 puntos ang giabag ni Jrue Holiday diin sa first half palang, klaro na nga hinay nag paglupad sa Hawks.

Ang Bucks niiskor og 20 ka sunodsunod nga puntos sa uwahing bahin sa second quarter diin ang mga starters sa duha ka team gipapahuway na sa fourth quarter ug nakapahimulos ang mga bench players.

Ang superstar sa Hawks nga si Trae Young, kinsa nirehistro og 48 puntos ug 11 assists sa game 1, igo nalang nihipos og 15 puntos ug 9 turnovers sa wala pa siya nipahuway sa 3:48 nga nahabiling oras sa third quarter.

Ang kapildehan sa Hawks maoy ilang ikatulo nga sunodsunod nga pilde sa game two sa playoffs sa balwarte sa kontra human sila nidaog sa game 1 ug ang duha nila ka pilde sa first round ug second round, gilubong sila og 59 puntos sa ilang kontra.

Ang game 3 motabok na usab sa Atlanta karong Lunes.

Samtang suwayan og tabla sa Los Angeles Clippers ang ilang series sa game 4 atol sa ilang duwa karong buntag sa Staples Center.

Ang Clippers kinsa nag 0-2 sa Western Conference Finals batok sa Phoenix Suns mosuway og bangon aron tablahon ang series sa 2-2 ubos sa liderato ni Paul George human naangol sa tuhod si Kawhi Leonard. (JBM)

This posting includes an audio/video/photo media file: Download Now

Pacquiao mobalhin sa Amerika

Posted: 26 Jun 2021 05:44 AM PDT

Molarga na paingon sa Amerika si Senator Manny Pacquiao sunod semana para sa pagpahugot pa sa iyang pagbansaybansay batok sa batan-on ug walay pilde nga si Errol Spence Jr., para sa ilang away karong Agusto 22,2021.

Ang eight-time wold division champion nga si Pacquiao kasamtangang nag-ensayo sa General Santos City uban ang iyang head coach nga si Buboy Fernandez para sa labing dako niya nga away itandi sa nanglabay nga mga tuig.

"Ngayong July 3, para pagdating ko doon hindi na ako mahihirapang mag-adjust," matod ni Pacquiao kinsa adto mopuyo sa iyang balay sa Los Angeles California.

Si Spence, sa iyang bahin, nagmakuli paghatag sa iyang prediksyon batok sa iyang pagpakigharong kang Pacquiao apan iyang gipasalig nga malingaw ang mga tumatan-aw.

Sa maong duwa, nakasugal ang duha ka bakus ni Spence, ang WBC ug IBF samtang WBA ang kang Pacquiao ug ang modaog sa maong away maoy makaangkon sa maong mga titulo.

Ang ticket sa maong away nagkantidad og $105 ngadto sa labing mahal nga $2,505. (PAC)

This posting includes an audio/video/photo media file: Download Now

5 motor gidaro sa pickup truck, 4 angol

Posted: 25 Jun 2021 11:35 PM PDT

GIDARO sa usa ka pick-up nga sakyanan ang lima ka motorsiklo sa interseksyon sa J.P. Rizal Street ug sa H. Abellana Street, Barangay Canduman, Mandaue City alas 2:59 sa hapon Biyernes, Hunyo 25, 2021.

Giila ang driver sa pick-up nga si Hazel Mantandao, 43, ug taga Barangay Tabok, Lapu-Lapu City.

Sa pakighinabi sa Superbalita Cebu ni Edwin Jumao-as, ang pangu sa Traffic Enforcement Agency of Mandaue (Team), nga nakuha sa CCTV monitoring sa Mandaue City Central Command Center ang maong panghitabo.

Ang mga sakyanan nagsubay sa J.P. Rizal Street ug ang direksyon nila gikan sa Barangay Jagobiao paingon sa Barangay Basak.

Human ni-signal og "go" ang traffic light, kalit lang nga kusog nidagan ang pick-up ug nadaro ang lima ka mga motor.

Matod ni Jumao-as nga gituohang natumban og maayo ni Mantandao ang gasolina ug dulhogon sab ang maong dapit hinungdan nga wala niya nakontrolar ug nadaro ang unom ka mga motorsiklo.

Upat ka mga motorista ang nakaangkon og mga pangos sa maong insidente ug usa ka motorsiklo ang nakasinati og grabeng danyos tungod napasok kini sa may atubangan nga ligid sa pick-up, sigon ni Jumao-as.

Matod niya nga daling miresponde ang mga kawani sa Disaster Risk Reduction Management Office (DRRMO) aron pag-atiman sa mga nasamdan.

Samtang si Mantandao giimbestigahan sa Mandaue City Police Office (MCPO) Traffic Division.

Matud ni PSSgt. Maximo Moneva nga sala ni Mantandao ang nahitabo ng insidente.

Gikasabotan sa manag kampo nga i-settle ang maong panghitabo.

Wala ra gipasakaan og kaso si Mantandao sa mga motorista. (KFD)

This posting includes an audio/video/photo media file: Download Now

Retired nga pulis gipatay sa riding in tandem

Posted: 25 Jun 2021 08:50 AM PDT

RETIRADONG pulis gipusil patay sa riding in tandem sa alas 4 sa Biyernes sa hapon, Hunyo 25, 2021 sa District 1, Barangay Pulpogan, lungsod sa Consolacion, amihanang Sugbo.

Ang biktima giilang si retired Police Chief Master Sergeant Michael Rivera Ermie, 46, nagpuyo sa nahisgutang dapit.

Si Rivera namatay diha-diha human pusila sa makadaghan sa gunman nga nag-angkas sa usa ka motorsiklo nga gituohang nag-atang na kaniya mga 200 metros gikan sa ilang balay.

Matod ni Police Corporal Ritchie Guilleran, imbestigador, si Ermie dunay gipalit ug nagsakay sa iyang motorsiklo ug padung na unta mopalit. / GPL

This posting includes an audio/video/photo media file: Download Now

National 10-day mourning gideklarar ni Duterte

Posted: 25 Jun 2021 08:50 AM PDT

SI PRESIDENTE Rodrigo Duterte nideklarar og 10 ka adlaw nga national mourning alang kang kanhi President Benigno "Noynoy" S.C. Aquino III gikan sa Hunyo 24 ngadto sa Hulyo 3, 3, 2021, pahibawo sa Malacañang.

Si Presidential Spokesperson Harry Roque Jr.niingon nga si Duterte nipirma sa Proclamation 1169, nga nagmando nga ang tanang mga nasudnong bandila "flown at half-mast from sunrise to sunset on all government buildings and installations throughout the Philippines and abroad for a period of 10 days."

"Let us continue to pray and pay respects to the former President who gave his best to serve our nation and our people," matod ni Roque sa usa ka pamahayag sa Huwebes sa gabii, Hunyo 24, 2021.

Si Aquino namatay sa sakit sa kidney nga dala sa diabetes sa Huwebes sa buntag.

Gideklarar siyang namatay sa Capitol Medical Center. Iyang haya gidala sa The Heritage Park sa Taguig City alang sa cremation ug novena.

Ang urna nga gisudlan sa iyang abo gidala sa balay sa iyang igsuong babaye Pinky Aquino-Abellada sa Green Meadows Subdivision sa Quezon City.

Sa Biyernes sa buntag, ang urna ni Aquino gidala sa Church of Gesu sa Ateneo de Manila University alang sa public viewing gikan sa alas 10 sa buntag ngadto sa alas 10 sa gabii.

Arrival honors gipahigayon sa mga alas 9:45 sa buntag.

Mga alas 6 pa lang sa buntag, mga tawo nga nagsul-ob og yellow ug puti nga mga sapot naa na sa Gate 3 sa ADMU. / AYB

This posting includes an audio/video/photo media file: Download Now

Garganera: Flyover makadaut sa USC kon idayon

Posted: 25 Jun 2021 08:49 AM PDT

DAKO og epekto sa pundasyon sa University of San Carlos (USC) building ang flyover nga planong tukuron sa Department of Public Works and Highways (DPWH) sa dan P. Del Rosario, Dakbayan sa Sugbo.

Mao kini ang tan-aw ni Konsehal Joel Garganera, nagsuwat sa ordinansa nga "Cultural Heritage Site Declaration, Protection and Preservation Ordinance of Cebu City" kon ugaling madayon ang pagtukod sa proyekto. Ang USC nipagawas sa ilang posisyon, supak sa plano nga flyover project.

Ang USC, sa ilang position paper nga gilagdaan ni USC president Narciso Cellan, SVD, niingon nga kon madayon ang proyekto, aduna kini "tremendous impact" sa ilang 73-anyos na nga Arthur Dingman Building nga anaa sa ilang downtown campus sa dan P. Del Rosario. Si Garganera, kinsa chairman sad sa urban planning committee, nisuporta sa basuraganan sa USC.

"Mind you, it is one of the oldest buildings in this city and is considered to be of historical value," matod ni Garganera.

Ang Dingman building sa USC kay nadeklarar sa National Historical Commission of the Philippines (NHCP) niadtong 2010 isip Important Cultural Property (ICP).

Ang USC sab mismogiila nga National Historical Landmark.

Gawas niana, matod ni Garganera, ang proyekto makaapekto sa historical sites sa lugar.

Matod ni Garganera nga adunay mga building sa lugar nga natukod pa niadtong panahon sa American period.

Nabalaka sab si Gargnera nga basin makaapekto ang proyekto sa Bus Rapid Transit (BRT) project.

Para sa konsehal, dili usab solusyon sa trapiko ang dugang nga karsada. Ang solusyon sa problema sa trapiko, matod ni Garganera, mao ang mass transportation system, mas lapad nga dalan, ug dugang intelligent traffic system.

"If we allow this flyover to take precedence over the facts that I have mentioned, then there's no way for us to solve this traffic problem in the city," matod ni Garganera. / JJL

This posting includes an audio/video/photo media file: Download Now

Pastor, barangay konsehal sa Bohol nasikop sa raid

Posted: 25 Jun 2021 08:44 AM PDT

Nadakpan sa mga sakop sa Criminal Investigation and Detection Group 7 (CIDG) 7, inabagan sa Regional Mobile Force Battalion 7, Bohol Police Provincial Office (CPPO) ug 42nd Infantry Battalion sa Philippine Army ang usa ka pastor ug usa ka barangay kagawad sa Probinsya sa Bohol nga giingong mga supporter sa New People's Army (NPA) sa lalawigan.

Unang nadakpan ala 1:40 sa Biyernes sa kaadlawon, Hunyo 25, 202,ang usa ka kagawad ug giingong lider sa criminal gang nga nalambigit usab sa gun running sa bohol nga si Carmilo Tabada, 51.

Si Tabada giingong naila, matod pa sa walhong pundok, nga "Eloy, Asyed ug Emil," konsehal sa barangay Poblacion, lungsod sa Trinidad.

Si Tabada nasikop pinasikad sa search warrant nga giluwatan ni Judge Azucena Macalolot-Credo sa Regional Trial Court (RTC) sa Talibon, penitsahan og Hunyo 21, 2021.

Nakuha gikan sa balay ni Tabada ang usa ka kalibre .45 nga pistola ug mga bala, usa ka 9mm machine pistol ug mga bala niini, usa ka granada ug mga subersibong dokumento.

Si Tabada giingong maoy lider sa Tabada crime group nga nalambigit sa gunrunning ug nalakip siya sa target list personalities sa CIDG Bohol.

Gawas sa pagka barangay kagawad, si Tabada giingong aktibong supporter sa Bohol Party Committee sa Communist Party of the Philippines (CPP).

(PASTOR)

Pagka alas 2:30 sa buntag, ang pastor na usab sa United Church of Christ in the Philippines (UCCP) Nathaniel Vallente, 52, nasikop sa raid sa Purok 5, Barangay San Jose, lungsod sa Mabini.

Si Vallente gidakop pinasikad gihapon sa search warrant nga giluwatan ni Executive Judge Leo Moises Lison sa RTC Branch 3 sa dakbayan sa Tagbilaran.

Nasakmitan siya og upat ka kalibre .45 nga pistola, lakip na sa upat ka magazine, usa ka hand grenade ug nagkadaiyang mga bala sa armas lakip na ang subersibong dokumento nga iya sa rebeldeng New People's Army.

Sigun sa background investigation sa CIDG 7, giingong sakop sa Tabada crime group si Vallente.

Nabutang usab siya sa target personality sa CIDG Bohol sa Oplan Sumbohan diin gipanggukod kadtong mga leader ug mga miyembro sa usa ka criminal gang ug nahimong recruiter aron mahimong sakop sa NPA.

This posting includes an audio/video/photo media file: Download Now

GIINGONG tambal batok sa co­ro­navirus disease 2019 (Co­vid-­19) nga gibana-bana nga moba­lor og kapin sa P200,000 gi­pangsakmit sa mga sakop sa Regional Special Operations Group (RSOG) 7 atol sa buy-bust alas 3 sa Biyernes sa hapon, Hunyo 25, 2021.

Posted: 25 Jun 2021 08:38 AM PDT

Ang mga tambal giingong way pagtugot sa Food and Drugs Administration (FDA) hinungdan nga ilegal ang pagpamaligya.

Apan sa pakisusi sa Superbalita Cebu, giaprobahan na diay kini sa Department of Health (DOH) ug FDA, apan di kini mapalit kay gikinahanglan ang prescripition.

Busa kinahanglan usab nga dunay lisensya ang mamaligya niini.

Nasikop sa RSOG 7 ang negusyante nga namaligya pinaagi sa online nga giila nga si Matthew Louis Christopher Ngo Po, 25, nagpuyo sa San Antonio Village, Barangay Apas, Siyudad sa Sugbo.

Ang mga tambal nga adunay brand nga Lianhua Qingwen Jiaonang ginama sa China ug gipamaligya ni Po online.

Gawas sa mga kinahon nga Lianhua tablets, aduna usab silay nakuha nga Lungene rapid test kit nga gipamaligya.

Matod ni Police Major Glenn Hife, pangulo sa RSOG 7, nga ilang na-monitor si Po human makadawat og impormasyon labot sa iyang pagpamaligya sa tambal.

Ila una nga gipasusi sa FDA ug nasuta nga di rehistrado, nagpasabot nga illegal kini.

Tungod niini, ni-order dayon si Hife kang Po pinaagi sa online nga balor og P200,000.

Sa dihang ila nang kuhaon ang kinarton nga tambal sa balay niini sa San Antonio Village, ila dayon nga gidakop.

"Nahug ni siya nga unregistered per certification sa Food and Drugs Administration, thru online ang order ani nila. Gipalitan namo nya karon gi-entrap namo siya," matod ni Hife.

Gisekreto ang pagpamaligya sa maong tambal tungod kay hugot nga gidili.

Wa pa usab mamatud-i nga kini makaayo sa Covid, apan giingong daghan na ang namalit niini.

Gipasabot ni Hife nga ning panahon sa pandemic, di mahimo nga adunay mga tambal nga giingong makaayo sa virus nga way pagtugot sa DOH ug FDA.

"Dili ta ani mopalit nga tambal kay unang una, dili ni registered sa FDA nya for sure dilikado ni. Dili man ta sure nga makaayo nig tinuod. Magbantay ta nga dili magpatakag palit nga dili registered sa RDA otherwise mosamot ang atong sakit," dugang ni Hife.

Si Apas Barangay Captain Virgil Cabigon nagkanayon nga nakurat siya nga adunay namaligyag tambal sa Covid sa iyang barangay.

Kon wa pa siya pahibaw-a sa kapulisan, wala siya masayod nga adunay illegal nga nagnegusyo niini.

Giawhag niya ang iyang mga konstituwente nga kon adunay na monitor nga namaligya sa maong tambal, labing maayo nga mo report sa awtoridad.

KON WAY PRESCRIPTION

Niadtong Abril 5, 2021, ang DOH ug FDA niklaro nga ang "Lianhua Qingwen is a prescription medicine approved by FDA in the Philippines but is not registered as a Covid-19 medication," matod sa giluwatang pamahayag sa DOH.

Nagpasabot nga di kini mapalit nga yano kay gikinahanglan nga dunay resita sa doktor.

Niadtong Agusto 7, 2020 ang Lianhua Qingwin nakakuha og registration sa FDA apan isip tradisyunal nga herbal product nga motabang sa pagtangtang sa "heat-toxin invasion of the lungs, including symptoms such as fever, aversion to cold, muscle soreness, stuffy and runny nose," matod sa DOH. / Dugang taho ni REV

This posting includes an audio/video/photo media file: Download Now

Go moabag pagpalambo sa Bantayan airport

Posted: 25 Jun 2021 08:36 AM PDT

ALANG sa pagpalig-on sa turismo sa Sugbo ug ekonomiya sa Kabisay-an, si Senador Christopher "Bong" Go mosuporta sa pagpalambo sa Bantayan airport.

Gisportahan ug gihangop niya ang hangyo nga ayuda sa pundo gikan sa Mactan-Cebu International Airport Authority (MCIAA) alang sa pagpalambo sa Bantayan airport sa lungsod sa Sta. Fe, isla sa Bantayan, amihanan sa lalawigan sa Sugbo.

Dunay plano sa pagpalapad sa airport aron makapahiluna og dugang commercial aircraft sa pagpakusog sa turismo ug ubang opurtunidad sa amihanang bahin sa Sugbo ug Kabisay-an.

"Ipinapahayag ko po ang aking buong suporta sa pagbibigay ng pondo upang i-develop ang Bantayan Airport sa Bantayan Island," matod ni Go.

"Sigurado pong malaki ang maitutulong nito upang mapaunlad pa lalo ang turismo sa lugar na makapagbibigay ng hanapbuhay sa ating mga kababayan doon," dugang niya.

Sa Mayo 18 nga suwat sa Department of Budget and Management, Department of Transportation Secretary Arthur P. Tugade nga nagduso sa hangyo sa MCIAA alang sa funding assistance nga mobalor og kapin sa P154 million nga gikinahanglan sa pagpalambo sa Bantayan airport.

Ang MCIAA nagplano sa pagpalambo sa Bantayan Island Airport sa pagpataas sa runway alang sa maayong pagtugpa sa 24/7 commercial aviation activities.

Ang MCIAA dili makapatuman sa plano tungod sa limitado nga pundo, samtang ang DOTr walay igong pundo nga gastuhon alang niini.

"Suportado po ni Pangulong Duterte ang proyektong ito para mabigyan ng mas maayos na airport ang kapwa nating Bisaya at maiangat lalo ang kabuhayan doon," dason niya.

Ang proyekto naglakip sa pagpalapad sa runway ug pagtukod sa taxiway lakip sa apron areas sa airport. Kini nagseguro nga makasunod sa safety standards ug butangan og night-time flight operations ug commercial aviation activities.

Samtang, si Go nitumbok sa proyekto nga mahimong alternatibong dapit nga magkutay sa Bantayan Island ug iyang silingang mga isla ug mga lalawigan sa panahon sa emerhensiya.

Gipasabot ni Go nga ang iyang paningkamot sa pagsuporta ug pagpanalipod sa kaayohan sa mga Sugbuanon ug tibuok Visayas kanunay naa sa iyang prayoridad uban sa iyang pakig-alayon sa mga lokal nga lider sa pagpalambo sa komunidad sa mga Bisaya.

"During my visits to Cebu, I always emphasized my high respects to the Visayan people. Like President Duterte, I am proud of my Visayan heritage and I will do everything I can to serve them as a public servant and representative in the Senate. I frequently visit Cebu to personally see to the needs of our fellow Cebuanos and find ways on how to better help and serve them," matod ni Go.

"Sa mga kapwa ko Bisaya, hindi kayo pababayaan ng gobyernong ito. Mahal po namin kayo ni Pangulong Duterte. Mahal namin ang mga kapwa naming Bisaya. Bisaya pud ko ug garbo nako akong pagka-Bisaya," dason niya.

Dugang ni Go nga mapalasamaton siya sa pagserbisyo ug suporta sa katawhan sa Visayan ubos sa administrasyon ni Presidente Rodrigo Duterte.

Si Duterte uban ni Go ug ubang kandidato sa ilang linya nakakuha og makabuhong nga mayoriya sa botos dinhi Sugbo ug tibuok Kabisay-an sa miaging nasudnong eleksyon. (PR)

This posting includes an audio/video/photo media file: Download Now

36K na nabakunahan sa PBB, operasyon nagpadayon

Posted: 25 Jun 2021 08:19 AM PDT

ANG Project Balik Buhay (PBB)-IEC Vaccination Megacenter nakabakuna na og 36,000 ka mga empleyado gikan sa lainlaing kompaniya dinhi sa Sugbo hangtod niadtong Huwebes, Hunyo 24, ug padayon pa ang operasyon.

Ang 12,000 kanila nakakumpleto na sa second dose gamit ang Sinovac, AstraZeneca ug Pfizer kinsa nagsugod sa ilang operasyon niadtong unang semana sa Hunyo 2021.

Ang PBB, gipangulohan chairman Edmun Liu, nakarehistro na og di mominos 200,000 ka mga empleyado gikan sa 2,500 ka mga kompaniya sa Sugbo kinsa gustong magpabakuna batok Covid-19.

Si Justine Espina, volunteer gikan sa LH Foundation, niawhag ngadto sa mga kompaniya ug organisasyon nga patas-an ang ilang pasensiya sanglit mabakonahan ra ang tanan.

"Anyone nga na-register sa atong program kay mabakunahan gyud. Atong hangyo lang is patience as we follow the priority code of DOH and also simultaneous natong pag-gradual rollout sa A4," padayag ni Espina.

Ang PBB-IEC vaccination megacenter makaatiman og labing daghan 2,000 ka mga vaccinees matag adlaw apan depende sa gidaghanon sa vaccine nga ibakuna sa maong adlaw.

Moabot ngadto sa 133 ka mga healthcare workers nga gilangkoban sa doctors, nurses, medical interns ug ubang vokunteers kinsa maoy moatiman sa mga tawo gikan sa step 1 hangtod sa step 6 nga maoy katapusan.

Paspas ug hamugaway ang proseso sa pagpabakuna didto sa PBB-IEC gumikan sa kalapad sa ilang lugar.

Ang maong inisyatiba gikan sa PBB nga gisuportahan sa Department of Health (DOH), Office of the Presidential Assistant for the Visayas (OPAV) ug ubang organisasyon para mapaspasan ang vaccination rollout sa Sugbo. (PAC)

This posting includes an audio/video/photo media file: Download Now

Panagtagbo sa PB, IATF giuswag

Posted: 25 Jun 2021 08:18 AM PDT

GIUSWAG ngadto sa Hunyo 29, Martes, ang gikatakda nga panagtagbo sa Provincial Board (PB) ug Inter Agency Task force (IATF) gikan sa unang schedule nga Hunyo 28, Lunes.

Pinaagi sa pormal nga suwat pinetsahan og Hunyo 24, 2021, nangayo og dispensa si Health Secretary Francisco Duque III nga dili kini makatambong sa tigom.

"Please accept my sincere regrets as I will not be able to attend your invitation through a Sangguniang Panglalawigan Resolution No. 1441-2021, for a meeting...however, as the Chairperson of the IATF-MEID...we will be attending a meeting arranged by the Office of the President on the same day," saysay ni Duque.

Tungod niini, nadesisyonan sa PB nga iuswag na lang ang adlaw sa tigom aron makatambong si Duque.

Ang suwat ni Duque gitubag usab ni Cebu Governor Gwendolyn Garcia. pinetsahan Hunyo 25.

"The Cebu Provincial Board has scheduled a special session on June 29, at 2 o'clock in the afternoon...to accommodate you, the medical, the medical and technical experts, World Health Organization representatives and select members of the IATF-EID..." saysay ni Garcia.

Atol sa Senate Hearing, gidapit ni Garcia ang Inter Agency Task Force (IATF) aron mas masabtan ang hisgutanan labot sa analysis sa IATF sa protocols nga gipatuman sa Lalawigan sa Sugbo ilabi na ang Provincial Ordinance No. 2021-04 nga giamendahan sa Hunta Probinsyal.

Ang maong imbitasyon nahisubay sa padayong hisgutanan labot sa mga lagda nga kinahanglan nga subayon sa moabot nga overseas Filipino workers (OFWs) ug returning overseas Filipinos (ROFs) sa Mactan Cebu International Airport (MCIA).

Sa kasamtangan, mituman na ang Probinsya sa kamandoan ni Presidente Rodrigo Duterte pagsubay sa lagda sa IATF. (ANV)

This posting includes an audio/video/photo media file: Download Now

Albor: Gimok sa pulitika sa Sugbo

Posted: 25 Jun 2021 08:17 AM PDT

MOHULAM ko sa obserbasyon sa political analysts. Sa malambuong pilosopiya sa pangalagad ni Gobernador Gwendolyn Garcia lisod parangan. Gipalutaw ang mga ngalan nila ni Serge Osmeña ug Justice Davide apan nalantawan nga dili mosulod og political suicide. Mitumaw ang ngalan ni Ace Durano.

Hungihong nga si Allan Bucao mosungay sa mga Gullas sa Talisay posibling maaghat sila Romy Villarante ug JVR. Mayor Samsam mobalik pagka kongresista iyang kapikas si Rhea maoy magmayor samtang mopahulay sa politika si Eddiegul.

Lisod parangan ang mga Chiong sa Naga hinoon posibli nga mobalik sila Delfin Senior ug Vince del Mar. Lig-on ang mga Apura sa Carcar maong nagpakahilom si Badong Aleonar. Rep. Willy Caminero magmayor sa Argao human mapildi sa iyang igsuon Stanley.

Sila si Edsel Galeos, Tata Salvador, Stanley Caminero ug Ronald Sesante magbangga sa segundo distrito. Si Rep. PJ Garcia misamot kalig-on sa tersiro kay wala na si Sonny Osmeña. Npaalong na sab ang mga Yapha ug Sanchez.

Si Mayor Joy Perales balikan pag-atbang ni Daydee Espinosa-Zambo sa Toledo. Si Rep. Janice Salimbangon versus Tining Martinez sa kuwatro. Padayong gihuptan sa mga Martinez ang Bogo. Nagpanikad si Nito Durano batok kang Duke Frasco sa kinto distrito. Si Red Duterte itugpo og mayor sa Danao atbang ni Red Durano.

Si Rep. Sonny Lagon molansar sa sixto distrito ingon ug wala pay migimok nga kaatbang.

Sington si Rep. Peter Calderon kon modagan si Atty. Winston Garcia sa ikapito.

Pabiling lig-on ang panaghiusa nila ni Mandaue Mayor Jonas Cortes ug Rep. Lolypop Ouano-Dizon. Milutaw ang ngalan ni Carlo Fortuna, kanhi Rep. Aileen Radaza atbangan ni Atty. Eugene Espedido sa lone district sa Lapu-lapu. Pabor si Mayor Junard 'Ahong' Chan versus Paz Radaza.

Sa Cebu City, Mike Rama–Raymond Garcia tandem atbangan sa Abellanosa–Ong.

Kining maong obserbasyon masayop gamay ug masipyat dyotay.

This posting includes an audio/video/photo media file: Download Now

Tambagi ko, Noy Kulas: Guwapo paborito

Posted: 25 Jun 2021 08:16 AM PDT

DEAR Noy Kulas,

Maayong adlaw diha. Kaning akong suwat parte ni sa akong trabaho.

Kining akong problema parte ni sa akong kauban sa work ug among manager. Among manager bayot ni unya kaning akong kauban tsoy tsoy sad ba. Kanang pang call boy og beauty.

Nakabantay mi nga paborito siya sa among manager kay gwapo ug humot. Usahay dad-on siya og laag unya naka in na sa work while kami nahabilin ug grabe ang among work kay amo man nga i-filler ang iyang trabaho. Gaduda mi naa silay relasyon pero di lang kaayo magpa obvious.

Unsa kahay among buhaton ani nilang duha? Mahadlok ming initan ba kay manager baya namo. Sayon ra kaayo pagresbak namo unya basin masuspenso o pangitaan mi og sayop, mataktak na hinuon mi.

LEX

***

Lex,

Mas maayo kon inyo nang ipa check sa inyong management, labina sa mga tag-iya. Mahimo ra man nga maghimo mo og letter nga anonymous ug ipadala sa e-mail ug mail. Mahimo sab nga teksan ninyo ang owners aron masayod. Apan sa di pa ninyo ni himuon, pagkuha una mo og ebidensya sama sa video ug pictures.

Balido kaayo ang inyong reklamo busa angay lang nga tagdon sa kadagkuan. Kon duna moy supervisors, mahimo sab nga inyong I-channel sa proper channel ang inyong complaint. Kay kana nga buhat maka demoralize na og bisan asa nga organisasyon kon dunay pakitaan og paboritismo bisan kon di angay nga hatagan niini.

Di baya sab makadulot ang manager kon magkahiusa mong tanan nga mga trabahante. Mag-unsa man ang manager kon ang tanang mga sakop diskompyado? Mas mahadlok ang management ana.

NOY KULAS

rojval69@yahoo.com

This posting includes an audio/video/photo media file: Download Now

Daghang tubig sa Manggasang

Posted: 25 Jun 2021 08:11 AM PDT

NIBUHAGAY gahapon ang balita nga usa ka dakong tinubdan sa tubig ang gipanglantawan nga makasulbad sa krisis sa panubig dinhi sa ato. Kini mao ang Manggasang Falls nga nahimutang sa bukirang barangay sa Tagba-o sakop sa dakbayan sa Sugbo.

Nalipay ko ky sa pagka tinuod lang, kining naghigos nga kahimtang sa panubig dinhi sa ato, daw dili katuhoan. Ngano man? Saksi tang tanan nga kong tinubdan lang sa tubig ang hisgutan, hilabihang daghana dinhi sa ato.

Pagbuto sa isyu niadto labot sa posibilidad nga adto sa Inabanga River magkuha og tubig ang Sugbo, usa ko sa mga reporter nga nikuyog ni kanhi Mayor Alvin Garcia sa dihang giduaw niya ang maong lungsod. Dugay na kaayo kadto. Ug namingaw ra sab ang maong plano.

Mao nga sa dihang gipakita sa social media gahapon ang hulagway sa Manggasang Falls, dali ra kong nahinumdum niadtong panahon nga giduaw nako kuyog ang akong pamilya ang hilabihan ka nindot nga waterfalls.

Lain nakong kuyog mao si higalang Elvis Tabal anak ni Kapitana Ana Tabal sa Tagba-o, Giovanni Stephen Romarate kanhi Manager sa Cebu Zoo ug eksperto sa patubig nga si Pareng Ben Lim.

Gawas sa pagpangaligo apil sa akong tuyo mao ang pagsusi sa posibilidad nga ang hilabihan ka daghan sa tubig nga gibubu sa Manggasang Falls, mapahimuslan isip supply sa inadlaw nga panginahanglan sa mga molopyo sa patag.

Si Pare Ben nihatag og positibo nga panlantaw nga ang gidaghanon sa tubig didto sulbad sa dakong panginahanglan sa mga konsumedor sa Metro Cebu Water District (MCWD). Gibasi niya kini sa gidaghanon sa tubig nga napundo gikan sa Manggasang Falls.

Sa iyang taas nga kasinatian pag-ugmad og mga water system sa mga barangay, lungsod, siyudad ug pribadong tinubdan, ang iyang iyang nakita sa Manggasang Falls giisip niya nga labing haum ug tukma kong supply sa tubig ang hisgutan. Panahon baya to sa huwaw sa among pag-adto.

Inay sa kasapaan ug dagat modagayday ang tubig, mahimo kaayong ambitan ang pila ka libo ka kobiko para sa kabalayan. Kini nga panglantaw subra na sa napulo ka tuig ang nakalabay. Sa ato pa subra na sa napulo ka tuig sukad namo nadiskubrehi ang posibling pang-alkuntra sa magpalong palong nga agas sa atong mga gripo.

Si Giovanni nga akong gitawgan ug gipahinumduman sa among biyahe sa Manggasang Falls, naningil hinuon kong may picture ba ko sa iyang pag-dive padung sa giambakan sa tubig. Giingnan nako siya nga basin nakalimot ka nga dili ingon niini ka high tech ang cellphone kaniadto.

Hinuon, nagbag-o ang gadgets pero ang gasa sa kinaiyahan sama sa Manggasang Falls, nagpabiling mabulokon ug puno sa paglaum.

This posting includes an audio/video/photo media file: Download Now

Binghay: Social media, internet

Posted: 25 Jun 2021 08:06 AM PDT

ANG mga higanting social media sama sa Twitter, Skype, Instagram ug Facebook ug ang internet dako og epekto sa atong pang adlaw-adlaw nga mga tulumanon kay hastang mga tinun-an ug mga ginikanan napugos pagkat-on ug gamit ini tungod sa online nga transaksyon sama sa pag-eskwela, pagbaligya ug pagpamalit, pag-deposit og tseke sa bangko o pamayad.

Gawas ini, dako kini og natabang sa natad sa komunikasyon kay bisag asa ka pang suluka sa kalibutan, paspas ug sayon ra i-kontak ang imong mga kabanay og higala. Di parehas kaniadto sa telegrama ug suwat pa ang gigamit nga maabtan og siyam-siyam una pa mabawsan imong suwat.

Sa laing bahin, duna sab kini bati nga mga epekto sama sa pagkaylap sa fake news nga way klarong tinubdan og cyberbullying.

Matod sa SWHELPER, kining mosunod maoy mga positibong epekto sa labing importanting naimbento sa 21st century:

Labing una ang paspas ug sayon nga komunikasyon. Sa tabang sa social media ug internet sama sa Facebook ug WhatsApp, sayon, barato og paspas ng makakonektar sa tuyo nga di na kinahanglang mogasto pagbiyahe. Ang uban sab makabaligya ug makapalit pina-agi sa social media.

Unya kong mobisita sab sa doktor para mangonsulta, di na kinahanglan pang personal nga mag-atubangay kay virtual ra man kining mahimo.

Bisag magklase, di ka na kinahanglang mag-uniporme ug mobiyahe pa kay diha ra man mismo sa balay ang klase.

Di na sab mingaw ikumparar sa una kay bisag unsang orasa maka-Skype o FB mesenger ra man ka sa imong mga minahal.

Ang ka-apan lang kay wa nay privacy ug confidentiality. Gani, ultimo sa pagpang-recruit, matintal paglili ang mga kompaniya sa imong FB account para masuta imong background. Hasta gali mga counselor ug therapist mangispiya sab sa estado sa ilang kliyente pina-agi sa mga social networks.

Ang kadaot sab kay naay mga cyberbully nga manaot sa ilang kontra pina-agi sa pag-post og mga ngil-ad, bastos og hilas nga mga pulong ug hulagway pagpanaot sa uban.

This posting includes an audio/video/photo media file: Download Now

Editoryal: Misyon sa kinabuhi

Posted: 25 Jun 2021 07:56 AM PDT

NAKURAT ang nasod atol sa kapistahan ni San Juan niadtong Huwebes, Hunyo 24, tungod sa balita bahin sa kamatayon ni kanhi Presidente Benigno "Noynoy" Aquino Jr. o gitawag usab nga PNoy sa edad nga 61. Wa masayod ang publiko nga nag-antos kini sa grabeng balatian sa kidney nga komplikasyon sa diabetes. Gipaubos na siya sa chemotherapy.

Isip kanhi pangulo sa nasod, nagbaha ang mensahe sa Facebook sa pagpadayag sa ilang kasubo ug paghinumdom sa pagserbisyo ni PNoy sa nasod. Bisan ang iyang kaatbang sa pulitika nipadala og mensahe. Miila sa kamatinud-anon sa kanhi presidente. Balanse ang mga komentaryo. Wala mougkat sa mga kahungayan sa iyang pagdumala sa nasod.

Samtang mao kini ang mensahe sa kadaghanan taliwala sa kamatayon sa kanhi pangulo, apan ang atong pamalandong karon magsentro sa kabililhon sa atong kinabuhi ug sa pagkapatas sa tanan, adunahan o kabus, kon tawgon na kita og balik sa sabakan sa Magbubuhat, ubos sa pagtuo sa mayoriyang sumosunod sa Kristiyanismo isip nag-unang Kristiyano nga nasod sa Asya.

Sa opisyal nga panahayag sa pamilyang Aquino, gisaysay nga 'mission accomplished' na si Noynoy sa pag-alagad sa pamilya ug pagserbisyo sa publiko. Dili kini makuwestiyon. Apan ikaw, kita nakaamgo na ba atong misyon sa kinabuhi? Adunahan o kabus dunay iyang importanteng papel sa kalibotan sa paghimo nga makahuluganon sa hinuwaman nga kinabuhi.

Sa kaulahian, patas ang tanan sa kamatayon. Bahandianon o kabus dunay kinutoban dinhi sa yuta. Way bahandi nga makapugong kon panahon na sa pagtaliwan sa laing kalibotan. Sumala sa atong pagtuo, labaw nang patas ang tanan sa gingharian sa langit. Hukman kita base sa pagpakabuhi ning kalibotan.

Wa kita masayod kon "accomplished" si PNoy sa mata sa Maghuhukom. Mag-ampo kita sa kapahuwayan niya sa dayon. Apan importanteng mensahe taliwala ning tanan, ang matag usa kanato dunay bili ug misyon sa kinabuhi.

This posting includes an audio/video/photo media file: Download Now

Raymart Santiago proud sa GF nga si Jodi Sta. Maria

Posted: 25 Jun 2021 07:55 AM PDT

VERY proud si Raymart Santiago sa bag-ong nakab-ot sa iyang girlfriend nga si Jodi Sta. Maria.

June 23 dihang gi-announce ni Jodi nga mi-graduate kini sa collage human ang upat ka tuig.

Bachelor of Science in Psychology ang gikuha ni Jodi sa Southville International School and Colleges sa Las Piñas.

Sa comment ni Raymart sa post ni Jodi, miingon kini og "congratulations" lakip ang clap emoji ug heart emoji.

Daghang celebs pa usab ang mi-greet kang Jodi sa iyahang bag-ong achievement.

This posting includes an audio/video/photo media file: Download Now

Kris gipasaylo ni PNoy sa wa pa namatay

Posted: 25 Jun 2021 07:51 AM PDT

"NAGPAPASALAMAT ako na napatawad ako at minahal ako."

Tipik kini sa pamahayag ni Kris Aquino dihang miatubang kini sa sakop sa media human gi-anunsiyo niini nga gi-cremate na iyang igsuon nga si Former President Benigno "Noynoy" Aquino III.

Wala modetalye si Kris kon unsa ang ilahang giawayan sa iyang igsuon apan gipahibaw niini nga nagka-estorya sila.

"God blessed me because we made our peace, but that is private and I would like to keep that for myself."

Ilubong si Pnoy sa Manila Memorial Park tupad sa iyahang ginikanan.

"Ipinangako ko sa kanya na gagawin ko ang lahat to just be even 1 percent of what he is as a man and as a Filipino."

This posting includes an audio/video/photo media file: Download Now

Erich magparetoke, manimalos sa 'La Vida Lena'

Posted: 25 Jun 2021 07:48 AM PDT

MANILA -- Sugod Hunyo 28, sugdan na ang teleseryeng "La Vida Lena" nga gibituonan ni Erich Gonzales. Makita kini every 10PM sa A2Z ug TV5.

Ang istorya motuyok sa mga panaogdaog nga nahiaguman sa pamilya ni Erich (Magda/Lena) nga naka-discover og sabon nga epektibong pangpaputi sa panit.

Bisan og may gamayng negosyo na si Magda, maka-feel gihapon siya og pagmamalupit sa ubang tawo nga maoy hinungdan kon nganong nagpa-retoke siya, nigwapa ug dinhi na nahimugso si "Lena" diin magsugod na sa iyang pagpanimalos.

Sa gipahigayong Zoom conference sa mga regional press, akong gipangutana kon nganong in Spanish ang title, nganong dili Tagalog ang title since dili kini adaptation kundi usa kini ka original Pinoy teleserye.

Wala sa Zoomcon ang tulo ka direktor niini nga sila si Direk Andoy Ranay, Jerry Sineneng, ug Jojo Saguin pero sumagot si Kit Thompson, usa sa mga bida nga nag-ingon nga mao sigurong in Spanish ang title para maging "sexy" ang dating.

Siyempre, sumingit na rin ako og pangutana kung may mga sexy scenes ba, matod ni Erich duna kuno pero more on sa mga lalaki kuno like Kit, Carlo Aquino, ug JC de Vera. Dili puwedeng puro lalaki na lang ang magpakita ng flesh, Erich, dapat ikaw sad. Hahaha.

Nanibago ang cast sa La Vida Lena gumikan sa new normal nga gimando sa mga shootings ug tapings hilabi na ang lock-in taping diin kinahanglang mag-stay sila sa usa ka lugar og dire-diretso ang taping, way puwedeng mopauli, maliban kung emergency lang maong miss na miss nila ang ilang pamilya nga bisan og gusto silang moduaw sa set, dili pwede.

Kauban sad sa La Vida Lena sila si Janice De Belen, Agot Isidro, Raymond Bagatsing, Sofia Andres, Christian Vasquez, Pen Medina, Ruby Ruiz, Soliman Cruz, Malou Crisologo, Josh Ivan Morales, Hasna Cabral, Danica Ontengco, ug Renshi De Guzman.

Usa ka dakong challenge kang Erich ang iyang role sa pagpanimalos tungod kay identified sa ingon aning teleserye si Maja Salvador. Di puwedeng di sila i-kumparar pero matod ni Erich, gigampanan lang naman daw niya ang role nga gihatag kaniya ug gawin niya ang iyang best.

Ang kanunay nga bilin sa ABS-CBN, ire-scan ninyo ang inyong digital box para ma-access ang TV5 hilabi na sa mga taga Visayas ug Mindanao.

Para sa updates, sundan ang @abscbnpr sa Facebook, Twitter, at Instagram o bisitahin ang www.abs-cbn.com/newsroom.

This posting includes an audio/video/photo media file: Download Now

Julie Ann San Jose sa Viu Philippines musical series

Posted: 25 Jun 2021 07:38 AM PDT

HUMAN sa primetime series ni Julie Anne San Jose nga Heartful Café, laing musical series na usab ang dalhon niini pinaagi ang Viu Philippines.

Ang Still, usa ka musical series diin kuyog niini si Christian Bautista.

"It tackles on different issues, particularly itong pandemic na ito and what everyone was going through ngayong pandemic. Lahat na mga characters namin dun ay may kanya-kanyang story na relatable sa bawat istorya na nararanasan nating mga Pilipino ngayon," matod sa singer.

Daw susama og usa ka salida ang kalidad sa maong musical series.

Mapasalamaton usab si Julie Ann ug si Christian nga gitugtan sila sa GMA-7 nga himuon kini kauban ang Viu Philippines.

This posting includes an audio/video/photo media file: Download Now

Teen romance: Our time will come (Ikaupat sa pito ka mga gula)

Posted: 25 Jun 2021 07:35 AM PDT

WA KO makabalibad dihang giimbertar ko ni Reid.

"Kusog pa man ang uwan, Luz. Abli pa man ang canteen. Manihapon una ta."

"Aw, libre man kaha?"

Nagkinataw-anay mi si Reid. Sa pagkatinuod, gigutom na gyud ko. Gitan-aw ko ang akong wrist watch. Hapit na moalas otso sa gabii.

Matag karon ug unya magkatinan-away mi si Reid samtang nangaon mi. Di ko makalikay sa pag-smile niya kay mopahiyom man siya nako. Maayo si Reid nako bisan gibalibaran ko ang iyang gugma tungod kay naglaom gihapon ko kang Harold nga moibalik siya nako sa umaabot nga mga adlaw. Angay lang sab nga maayo ang pagtagad ko kang Reid.

"Kining, Reid, duna koy classmate. Guwapa siya ug bright sa klase. Wa siyay boyfriend. Ipaila-ila tika niya, ha?"

Miinom si Reid sa iyang softdrinks. Gitan-aw ko niya pag-ayo. Unya miyangu-yango siya.

"Aw, ila-ila ra man kaha. Sige. Call ko."

Hilom kong nakaingon nga magustohan unta ni Reid ang akong classmate aron di na siya magsamok nako. Naluoy na kaayo ko kang Reid nga morag ako ra ang babaye nga iyang nakita ug gihigugma.

"Tomorrow, dad-on ko siya sa suki nimong kan-anan during lunch time."

Usa ka limpiyo ug dako nga karenderya ang kan-an kanunay ni Reid panahon sa paniudto. Duol ra kini sa among gitunghaan.

"Sige. Pero magdungan tang tulo sa pagpaniudto."

Gitando dayon nako si Reid.

Morag miluag ang naghuot kong dughan. Nakaseguro ko nga ma-in-love si Reid sa akong classmate kay tinuod man gyud nga guwapa kini ug nindot pa gyud og lawas.

Anang pagka ugma sa udto, eleven thirty ang last subject namo, gidala nako ang akong classmate sa lugar nga among gikasabotan ni Reid. Morag nahadlok ang akong classmate.

"Kauwaw ani, uy, Luz. Babaye ko ug ako ang makig-ila-ila anang imong giingon nga si Reid."

Nahikatawa ko sa gisulti sa akong classmate.

"Sus uwaw ba. Di na kana uso ron, uy, Julie."

Wana lang magtingog si Julie hangtod nga nahiabot mi sa suking karenderya ni Reid. (SUMPAYAN)

This posting includes an audio/video/photo media file: Download Now

Mixed seafood binakol

Posted: 25 Jun 2021 07:18 AM PDT

Serving: 3-5 people

Mga sagol:

Set A:

2 ka kutsara sa mantika

2 ka luy-a sama ka dako sa kumagko, gihiwa

1 ka gamay nga red onion, gihiwa

4 ka lusok sa ahos

1 ka stalk sa tanglad

4-5 ka tasa sa buko juice (3 ka pieces sa coconut)

Set B:

5 ka buok sa medium-sized shrimps

¼ kilo sa halaan (clams)

1 ka buok crab

1 ka tasa sa butong (young coconut meat)

2 ka buok sa finger chilis

Fish sauce, pangtempla

Dahon sa sili

Unsaon pag-andam:

A. Inita ang mantika sa kaha. Gisala ang luy-a, sibuyas bombay, ahos ug tanglad. Idugang ang tubig sa butong ug pabukalan og 5 minutos.

B. Ibutang ang preskong seafood ug pabukali. Idugang ang unod sa butong, finger chilis ug templahi og sauce. Padayuna ang pagluto hangtod maluto ang seafoods: ang crabs ug prawns mo-orange ug mobuka ang clams. Idugang ang dahon sa chili basta maluto na ang seafood ug i-serve dayon.

Sunda ko sa akong social media accounts.

Facebook: facebook.com/lutongsimpol

YouTube: youtube.com/c/SimpolSimpol

Instagram: @lutongsimpol

This posting includes an audio/video/photo media file: Download Now

Inoue mas gustong moaway ni Donaire kay ni Casimero

Posted: 25 Jun 2021 07:18 AM PDT

GIPABUHAGAY ni Japanese Naoya "Monster" Inoue nga andam siyang makig-away sa all-Pinoy unification bout tali nila ni World Boxing Council (WBC) bantamweight champion Nonito Donaire ug World Boxing Organization (WBO) titlist Johnriel Casimero nga gikatakda karong Agusto 14, 2021 sa Carson, California.

Apan gitataw ni Naoya nga mas ganahan siya kon si Donaire maoy iyang ikaharong kumpara ni Casimero.

"To be able to fight the winner of Casimero-Donaire brings me a smile on my face. Dramatically it would be better to have Donaire II," hinubad sa englis nga asoy ni Inoue sa post-fight interview human sa iyang away sa laing Pinoy nga si Michael Dasmariñas dili pa lang tantong dugay.

Si Naoya, kinsa maoy tag-iya sa World Boxing Association (WBA) ug International Boxing Federation (IBF) bantamweight belts, nakasugat og grabeng binukbokay sa premiro niyang pagpakig-away kang Donaire una niya naangkon ang unanimous decision nga kadaugan niadtong 2019.

Nganong mas gusto si Inoue nga makig-away og balik kang Donaire kaysa makigkontra ni Casimero sa labing unang higayon?

Nagtuo si fight analyst Nissi Icasiano nga gustong kontrahon og balik ni Inoue si Donaire gumikan kay mas bantugan ang Filipino Flash kumpara sa Quadro Alas.

"He wants Donaire because he is the bigger name between the two," pasabot ni Icasiano nga napatik sa www.abs-cbnnews.com.

"They produced a bout worthy of a Fight of the Year award. Inoue acknowledges how special Donaire is as a fighter. Donaire is not just a fighter."

Matod ni Icasiano nga dili siya motuo nga nahadlok si Inoue kang Casimero, kinsa taodtaod na sab nga nagtinguhang makig-away kaniya.

Sulod na sab sa pipila ka mga higayon nga gihagit ni Casimero si Naoya pinaagi sa pagsiatab nga nahadlok kini kaniya.

Nakatakda na untang mag-away sila si Casimero ug Naoya niadtong Abril sa miaging tuig apan nauswag kini tungod sa hulga sa Covid-19.

Human nauswag, nakadesisyon si Naoya nga makigkontra na lang og lain maong naahat si Casimero nga makigsangka na lang sab og lain.

"We should get rid of the idea that Inoue is afraid of Casimero. It was unfortunate that their bout got canceled. And Inoue has nothing to be afraid of," pasabot ni Icasiano.

Sa tan-aw ni Icasiano, mas mokita og dako ang panagharong og balik nila ni Inoue ug Donaire gumikan kay grabe ka kulbahinam ang ilang unang away.

"Inoue knows he got exposed by Donaire in their first encounter. I think what drives him is to get a more decisive win against Donaire," pasabot ni Icasiano. (ESL)

This posting includes an audio/video/photo media file: Download Now

VisMin Cup Mindanao leg giuswag

Posted: 25 Jun 2021 07:16 AM PDT

Gumikan sa gamayng kakulian, giuswag ngadto sa Hulyo 2, 2021 ang opening sa Chooks-to-Go VisMin Cup Mindanao leg nga ipahigayon sa Pagadian City.

Kini maoy gibutyag ni Chelito Caro, ang head sa basketball operation sa bag-ong professional basketball league sa nasod.

Sa orihinal nga plano, nakatakda unta kining sugdan niadtong Hunyo 22 diin siyam ka teams ang magtigi.

Posibling ang kalit nga pagsulbong sa kaso sa coronavirus disease maoy hinungdan nga nakahukom ang mga opisyal sa liga sa pag-uswag niini.

Ang kompirmadong mga mosalmot sa Mindanao leg mao ang host Pagadian Explorers, Clarin, MisOr, Roxas, Iligan, Zamboanga del Sur, Zamboanga City ug Basilan.

Dugang ni Caro nga ang torneyo mosunod sa single elimination round diin ang top four maoy makaangkon sa twice-to-beat advantage batok sa no. 5-8 teams sa quarterfinals round diin magparang ang no.1 team batok no. 8; no. 2 batok no. 7; no. 3 batok no. 6; ug no. 4 batok no. 5.

Ang modaog maoy masulod sa best-of-three semifinals round nga maoy modeterminar kon kinsa ang mag-abot sa best-of-three finals series.

Kon kahinumdoman ang Visayas leg gisugdan niadtong Abril 9, 2021 ug natapos niadtong Mayo 10, 2021 diin ang KCS Computer Specialists maoy nakampiyon human mapukan ang MJAS Zenith Talisay City Aquastars sa finals series, 2-1.

Ang KCS nga gipanag-iya ni Ricky Verdida magpaabot sa makampiyon sa Mindanao leg alang sa best-of-five National Finals. (JBM)

This posting includes an audio/video/photo media file: Download Now

Yap mipahasubo kang Noynoy

Posted: 25 Jun 2021 07:15 AM PDT

MIPADANGAT sa iyang kahasubo ug pasalamat si basketball star James Yap ngadto sa kanhi presidente sa nasod nga si Noynoy Aquino, kinsa mipanaw sa laing kalibutan sa edad nga 61 anyos.

Ang Philippine Basketball Association (PBA) star mipadayag sa iyang pasalamat pinaagi sa social media ngadto ni Noynoy, kinsa nahimo niyang brother-in-law kaniadto human sa iyang kaminyuon sa movie personality nga si Kris Aquino.

"Rest in peace President Noynoy Aquino. Thank you for being nice to me. You will be missed," matod sa shooting guard sa Rain or Shine Elasto Painters sa iyang Instagram account.

Si Yap hugot nga nangumpanya ni Aquino sa presidential election niadtong 2010 bisan pa man og padayon kining nagduwa sa Purefoods.

Ang renal disease secondary to diabetes maoy namatyan ni Noynoy, kinsa maoy presidente sa nasod gikan saa tuig 2010 hangtod sa 2016. (JBM)

This posting includes an audio/video/photo media file: Download Now

Clippers mibawos sa Suns

Posted: 25 Jun 2021 07:13 AM PDT

WA PANUMBALINGA sa hosts Los Angeles Clippers ang pagbalik sa lider sa Phoenix Suns nga si Chris Paul ug natuman nila ang ilang tinguhang panimalos pinaagi sa pagposte og 106-92 nga kadaugan sa Game 3 sa Western Conference finals series sa National Basketball Association (NBA) kagahapon, Hunyo 25, 2021 (RP time).

Sa kadaugan, napahak sa Clippers ang bintaha sa Suns, 2-1, ning maong best-of-seven series.

Gipangulohan ni All-Star forward Paul George ang Clippers pinaagi sa iyang 25 puntos lakip na niini ang halfcourt three-point shot sa dayong paghuman sa halftime. Nidugang sab siya og 15 rebounds ug walo ka assists.

Alang kang George, nagsilbe kining bawi sa iyang duha ka sipyat nga freethrows sa hinapos nga bahin sa Game 2 nga usa sa mga nakitang rason sa kapildihan sa Clippers niadtong higayuna.

"I knew I had to be better," matod ni George. "All my energy was directed toward a better game."

Kuyaw sab nga nakaduwa alang sa Clippers si Reggie Jackson, kinsa niamot og 23 puntos, nitunol og 15 puntos si Ivica Zubac samtang nidugang og 12 puntos si Terance Mann.

Ang Suns gipangulohan sa ilang bayani sa Game 2 nga si DeAndre Ayton pinaagi sa iyang 18 puntos, ninghatag og 15 puntos matag usa sila si Paul ug Devin Booker, niamot og 13 puntos si Mikal Bridges samtang nitampo og 12 puntos si Cameron Johnson. (AP)

This posting includes an audio/video/photo media file: Download Now

Retired nga pulis gipatay sa riding-in-tandem

Posted: 25 Jun 2021 06:17 AM PDT

RETIRADONG pulis gipusil-patay sa riding in tandem alas 4 sa hapon, Biyernes, Hunyo 25, 2021 sa District 1, Barangay Pulpogan, lungsod sa Consolacion, amihanang Sugbo.

Ang biktima giilang si retired Police Chief Master Sergeant Michael Rivera Ermie, 46, nagpuyo sa nahisgutang dapit.

Si Rivera namatay diha-diha human pusila sa makadaghan sa gunman nga nag-angkas sa usa ka motorsiklo nga gituohang nag-atang na kaniya mga 200 metros gikan sa ilang balay.

Matod ni Police Corporal Ritchie Guilleran, imbestigador, si Ermie dunay gipalit ug nagsakay sa iyang motorsiklo ug padung na unta mopalit.

Ang gunman nga nag-angkas kalit nga namusil gamit ang kalibre .45 nga pistola. Si Ermie naigo sa ulo ug ubang bahin sa lawas.

Matod ni Guilleran nga si Ermie usa sa mga pulis nga gibalhin ngado sa Cordillera Region gikan sa Cebu City Police Office niadtong 2016.

Si Ermie sayo nga niretiro sa pagkapulis.

Wa pa nila matino kon unsay motibo sa krimen. (GPL)

This posting includes an audio/video/photo media file: Download Now

at

No comments:

Post a Comment

Subscribe to: Post Comments (Atom)

End of Summer Sale ☀️😎

20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...

  • Last Chance - Win over $1,800 in BLEUSALT
    Elevate your Wardrobe. Offer ends Midnight. ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏ ...
  • Breaking: Aaron Rodgers teases Jets return this season: 'Anything is possible'
    New York Jets quarterback Aaron Rodgers suffered a torn Achilles tendon in Monday's 22-16 overtime win vs. the Buffalo Bills. If you a...
  • End of Summer Sale ☀️😎
    20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...