https://www.sunstar.com.ph/

---

• 'Gun runner, supporter sa CPP-NPA' nadakpan
• Pastor nakuhaan og 4 ka armas
• Pnoy namatay sa kadaot sa kidney
• Mga legasiyang proyekto ni Aquino sa Sugbo
• P18M ‘utang’ sa hauler sa basura
• Waterfalls tinubdan sa MCWD
• Truck boy patay sa aksidente
• Nahulog sa buho
• Background sa gipangtulis gisubay
• Sugbo Negusyo mogamit og e-commerce app
• Editoryal: Kalig-on ug kahuyang
• Nalzaro: Way bakuna, way bonus
• Barrita: Kinsay nikita sa face shields?
• Rabacal: Trabaho for sale
• Talk to Papa Joe: Silingan nga hugawan
• Serna: Kamatayon ni Noynoy, tahuron unta sa uban
• Bamboo Beach house, budget-friendly
• Cebu Skate Park sa SRP na tukoron
• Lebron gitaktak sa Gilas
• Virtual ultramarathon ipahigayon alang sa breast cancer patients

'Gun runner, supporter sa CPP-NPA' nadakpan Posted: 24 Jun 2021 07:30 PM PDT Barangay konsehal apan giingong leader sa criminal gang nga nalambigit sa gun running sa lalawigan sa Bohol nadakpan sa mga sakop sa Criminal Investigation and Detection Group 7, Regional Mobile Force Batallion 7 , 62nd Special Action Force ug 47th Infantry Batallion Philippine Army nga nag base sa Bohol ala 1:40 biyernes sa kaadlawon, Hunyo 25, 2021. Ang nadakpan giila nga si Carmilo Tabada, 51, konsehal sa barangay Poblacion, lungsod sa Trinidad, pinasikad sa search warrant nga giluwatan ni Judge Azucena Macalolot-Credo sa Regional Trial Court Talibon nga pinitsahan Hunyo 21, 2021. Nakuha sa panimay ni Tabada ang usa ka kalibre. 45 nga pistola ug mga bala niini, usa ka 9mm machine pistol ug mga bala, usa ka granada ug mga subersibong dokumento. Ang suspek maoy leader sa Tabada Crime Group nga nalambigit, matod pa, sa gun running ug nalakip siya sa target list personalities sa CIDG Bohol. Gawas sa pagka barangay kagawad ni Tabada, giingong aktibong supporter kini sa kumonistang grupo nga Bohol Party Committee. (AYB) This posting includes an audio/video/photo media file: Download Now

Pastor nakuhaan og 4 ka armas Posted: 24 Jun 2021 05:45 PM PDT PASTOR sa United Church of Christ in the Philippines ang nadakpan sa hiniusang pwersa sa Criminal Investigation and Detection Group 7, Regional Mobile Force Batallion 7, Bohol Police Provincial Office, Special Action Force ug 47th Infantry Batallion Philippine Army human makuhai ug mga armas ug subersibong dokumento atol sa pag serve sa search warrant sa iyang panimalay sa Purok 5 Barangay San Jose Lungsod sa Mabini Lalawigan sa Bohol. Ang nadakpan mao si Pastor Nathaniel Vallente, 52, nga nag puyo sa maong lugar nga nasakmitan og upat ka kalibre 45 ug upat ka magazine niini, 1 ka unit sa hand grenade ug nagkadaiyang mga bala sa armas lakip na subersibong dokumento nga iya sa komunistang pundok nga New People's Army. Sigun sa gihimong background investigation nga sakop sa TABADA crime group si Vallente diin nalambigit matod pa kini sa gun running sa tibuok probinsya sa Bohol. Nabutang usab siya sa target personality sa CIDG Bohol sa Cuplan Sumbuhan diin gipang gukod kadtong mga lider ug mga membro sa usa ka criminal gang. (AYB) This posting includes an audio/video/photo media file: Download Now

Pnoy namatay sa kadaot sa kidney Posted: 24 Jun 2021 08:14 AM PDT Si kanhi Presidente Benigno "Noynoy" S. C. Aquino III, nga naila usab nga PNoy, namatay sa Huwebes sa buntag, Hunyo 24, 2021. Siya 61. Sa usa ka pamahayag sa pamilya, nga gibasa sa iyang igsuon nga si Pinky Aquino-Abellada, si Pnoy namatay alas 6:30 sa buntag samtang natulog. Matod ni Abellada nga ang kanhi Presidente dunay renal disease secondary to diabetes. "His death certificate pronounced his death at 6:30 a.m. due to renal disease secondary to diabetes." Siya gidala sa Capitol Medical Center sa Quezon City sayo sa Huwebes sa buntag. Iyang mga igsuon, nga naglakip sa kamanghurang babaye nga si Kris Aquino niabot sa Capitol Medical mga alas 10 sa buntag sa Huwebes. Laing niadto mao ang kadagkuan sa Liberal Party nga sila si Senador Francis Pangilinan ug kanhi senador Manuel Roxas II. Si Abigail Valte, kanhi deputy presidential spokesperson ni Aquino, niabot sa Capitol Medical sa dayong udto. Siya nidumili sa pagluwat og pamahayag kay ang pamilya mopagawas niini. "The family will issue a statement later. Hintayin na lang po natin ang statement ng pamilya," matod ni Valte. Mga alas 12:39 sa udto, usa ka ambulansya nga dunay gamay nga Philipine flag nibiya sa Capitol Medical Center. Gituohan kining gikargahan sa lawas ni Aquino ngadto sa Heritage Park sa Taguig City. Si Aquino ang bugtong anak ug ikatulo ni anhing senador Benigno "Ninoy" Aquino Jr., kinsa gipatay niadtong 1983 ug nakaingon sa pulitikanhong kagubot nga gituldokan sa pagkahagsa sa diktaduriyang Ferdinand Marcos, ug paglingkod ni Presidente Corazon "Cory" C. Aquino human sa 1986 People Power Revolution. Si Pnoy mao ang ika-15 nga Presidente sa Pilipinas, nangalagad gikan sa Hunyo 30, 2010 ngadto sa Hunyo 30, 2016. Sa wa pa siya mapili isip Presidente, niserbisyo siya sud sa tulo ka mga termino isip representante sa ikaduhang distrito sa Tarlac sa 1998, 2001 ngadto sa 2004 ug 2004 ngadto sa 2007. Nidagan siya pagka senador ug nidaug sa May 2007 senatorial elections, diin siya ikaunom. Nialagad siya sa Senado gikan sa 2007 ngadto sa 2010. Si Aquino napili pagka presidente sa 2010 elections human mamatay ang iyang inahan. NAHASUBO Mga lokal nga opisyal nga publiko ug pribado nahasubo usab sa kamatayon ni Aquino. Ilang gihinumdom ang kaayo sa kanhi Presidente. Si Filipino Cebuano Business Club chairman Rey Calooy niingon nga si Aquino mao ang naghatag og dalan sa gihulagway niya nga "golden age" sa Pilipinas sa ekonomikanhong paglambo. "During his administration, the country caught the attention of global credit rating agencies. The entire MSME (micro, small, and medium enterprises) sector benefited from the high investment credit ratings of the Philippines from the international community. This was a first in history," matod ni Calooy sa SunStar Cebu. Matod ni Calooy nga sa panahon usab ni Aquino nisaka ang gross domestic product. Sa 2013, matod ni Calooy nga ang Pilipinas nahimong ikaduhang labing paspas nga ekonomiya sa pagtubo sa Asya sunod sa China. "He was able to raise national coffers without imposing new taxes except for the sin tax," matod ni Calooy. Si Mandaue Chamber of Commerce and Industry (MCCI) president Steven Yu niila sa maayong impact sa public private partnership sa panahon ni Aquino. "He will be remembered for giving a greater role to the private sector in economic development through the public-private partnership projects initiated during his administration," matod ni Yu. Si Cebu City Mayor Edgardo Labella nipahasubo sa pamilyang Aquino. "I join the nation today in grieving the passing of former President Noynoy Aquino. People remember him for his presidency, for his and his family's role in our history and the return of democracy. Former President Noynoy bannered in his personal mantra an important principle for us public servants, "kayo ang boss ko." It is an important reminder to all of us in public service whom we serve," si Labella sa iyang pamahayag. Si Cebu Vice Governor Hilario Davide III, sa iyang bahin, niingon nga nakugang ug naguol siya sa pagkamatay ni Aquino dihang siya nasayod niini sa Huwebes sa buntag. Matod niya nga si Aquino ang nagpahibalik sa pagsalig sa katawhan sa kagamhanan nga namansahan sa kurapsyon sud na sa dugay nga panahon. "When there was so much erosion of confidence in our public officials back in 2010 because of unabated corruption, PNoy took the daunting task of restoring the Filipinos' faith and trust in government by making those in power accountable for their actions," matod ni Davide sa iyang opisyal nga pamahayag nga gipadala sa Superbalita Cebu. (MVI sa SunStar Philippines, JOB, WBS, REV) This posting includes an audio/video/photo media file: Download Now

Mga legasiyang proyekto ni Aquino sa Sugbo Posted: 24 Jun 2021 08:14 AM PDT Ang administrasyon nila ni kanhi Presidente Gloria Macapagal Arroyo ug Benigno "Noynoy" Aquino III gitandi kon mga imprastrakturang proyekto dinhi sa Sugbo ang hisgutan. Di ikalimod nga si Arroyo daghan og mga proyekto sa iyang administrasyon hinungdan nga ang mga kritiko ni Pnoy nagsige og basal nga way proyekto si Aquino sa Sugbo. Apan duna siyay mga proyekto nga sa umaabot nga katuigan mapahimudsan gihapon sa mga Sugboanon. Ang labing dako niini mao ang P32 bilyunes nga modernisasyon sa Mactan Cebu International Airport (MCIA) nga naghimong pribado sa operasyon sa terminal nga gipaagi sa private public partnership tali sa GMR-Megawide Cebu Airport Corp. (GMCAC). Tungod niini, maisip na gani ang MCIA nga labing maanindot nga airport sa tibuok nasod. Naangkon niini ang Asia Pacific Medium Airport of the Year sa CAPA Aviation Awards for Excellence. Nakadawat usab kini og Ani ng Dangal Award gikan sa National Commission for Culture and the Arts (NCCA). Sa 2019 midaug usab kini sa World Architecture Festival 2019 sa kategoriyang Completed Buildings-Transport. Laing proyekto nga kabilin gihapon ni Aquino mao ang pagpalapad sa 28 kilometro nga Mactan Circumferential Road nga nagpasayon sa pagbiyahe padung sa airport. Gidugangan ang lanes alang sa mga sakyanan aron di na maghuot sa karsada. Sa Dakbayan sa Sugbo, iyang gipakongkreto ang Serging Osmeña Boulevard Port Corridor. Ang kaniadtong libaungon nga karsada, karon hapsay ug lapad na alang sa mga sakyanan, labina sa dagkong cargo trucks gikan sa pantalan. Sa amihanang Sugbo, iyang gipaayo ang 16 kilometro nga Medellin-Daanbantayan Road aron sayon na ang access sa mga beach sa amihanang Sugbo, labina sa Daanbantayan. Nagpadali usab kini sa pagbiyahe sa Daanbantayan paingon sa Dakbayan sa Sugbo. Di man tuod maisip nga nasudnong proyekto ang Cebu-Cordova Link Expressway kay iya kini sa duha ka mga local government unit (LGU), Dakbayan sa Sugbo ug Cordova nga gihimong partner ang Metro Pacific Tollways Corp., apan giaprobahan ang proyekto atol sa pamunoan ni Aquino. Isip public private partnership nga proyekto, nagkinahanglan kini og pagtugot sa nasudnong kagamhanan. Sa iyang administrasyon ra usab gisugdan ang plano sa paggamit sa Bus Rapid Transit (BRT) system alang sa Metro Cebu ug gipadayon sa administrasyon ni Presidente Rodrigo Duterte. Kon kini nga proyekto madayon, gilauman nga mopaluag sa dagan sa trapiko kon isagol sa monorail transit system nga giplano usab sa administrasyong Duterte dinhi sa Sugbo. (REV) This posting includes an audio/video/photo media file: Download Now

P18M ‘utang’ sa hauler sa basura Posted: 24 Jun 2021 08:10 AM PDT Gumikan sa bayranan nga P18.6 milyones, wa na palabaya sa ARN Central Waste Management, Inc. (ARN-CWMI) ang hauler sa basura sa Cebu City Government sa ilang landfill sa barangay Binaliw, dakbayan sa Sugbo. Gumikan niini, ang mga basura nga gikan sa 80 ka nga barangay sa Cebu City adto una ipundo sa transfer station sa Barangay Inayawan sa di pa hakuton sa service provider ngadto sa laing landfill inay ilargo ra kini og hatod ngadto sa ilang pasilidad. Ang abogado sa ARN-CWMI nga si Elias Espinoza maoy naningil sa Aljory Waste Management Solutions/Docast pinaagi sa ilang general contractor nga si John David Javier. Ang P1 milyon maoy ilang balanse sa 2020 ug gikan niadtong Marso hangtod Mayo 31, giingong wala pa makabayad ang Docast sa ilang P17.6 milyones nga balanse. "Your office may have overlooked these unpaid billing statements of our client that we are giving your goodself time, 10 days from receipt of this demand to pay your long overdue and legal obligation," tipik suwat ni Espinoza nga nadawat sa Docast niadtong Hunyo 22. Ang mga tigbalita nisuway og kuha sa habig ni Javier, apan hangtod niining pagsuwat, wala pa sila makatubag sa maong alegasyon. (PAC) This posting includes an audio/video/photo media file: Download Now

Waterfalls tinubdan sa MCWD Posted: 24 Jun 2021 08:10 AM PDT Ang Metro Cebu Water District (MCWD) nangita og dugang tinubdan sa tubig sama sa waterfalls, gawas sa katukoran sa desalination plants. Si Jose Daluz III, chairman sa MCWD Board of Directors (BOD), kauban silang director Frank Malilong, Miguelito Pato ug Judelyn Mae Seno ningbisita sa Mangasang Falls sa Barangay Tagbao sa bukirang dapit sa Dakbayan sa Sugbo kagahapon, Hunyo 24. Ang maong busay gibanabana nga maka-supply og 200,000 cubic meters matag adlaw panahon sa ting-uwan ug 2,000 cubic meters sa ting-init. Si Daluz nagkanayon nga ang Cebu City wala magkuwang og tubig kon dili ang inprastraktura para ang tubig gikan sa kabukiran madala ug magamit didto sa siyudad. "Wala gyud tay water crisis. Nasuroy nako sa duha ka waterfalls. We have abundant water. What we lack is the infrastructure and development in order to catch the water to deliver this to our consumers," paghulagway ni Daluz, kinsa nibisita sab sa Budlaan falls. Si Daluz nagkanayon nga gumikan sa gilay-on sa Tagbao, nagkinahanglan og dako nga funding para pagtukod sa dam ug pag-istalar sa mga tubo nga maoy agian sa tubig paingon sa ibabaw lahos ngadto sa mga konsumidor sa siyudad. Matod ni Daluz nga nipadayag na usab sa iyang suporta si Mayor Edgardo Labella sa paghimo og mga dam ug andam nga moabag sa gastuan ang dakbayan para dunay igong suplay sa tubig ang mga Sugbuanon. Gibanabana nga dili mominos 30 kilometros gikan sa siyudad ang Tagbao ug gipadayag ni Daluz nga sobra sa P1 bilyunes ang gikinahanglan nga pundo. Gawas sa Tagbao, ila usab unya nga susihon ang waterfalls sa Barangay Pamutan ug Bonbon para sa susamang katuyoan. (PAC) This posting includes an audio/video/photo media file: Download Now

Truck boy patay sa aksidente Posted: 24 Jun 2021 08:07 AM PDT Usa ka truck boy nalagpot-patay samtang lima ang naangol sa aksidente nga naglambigit sa trak de karga ug motorsiklo sa national highway sa Sitio Manoong, Barangay Don Pedro, Dakbayan sa Bogo, alas 12:20 sa udto sa Hunyo 23, 2021. Si Nestor Arcipe, 39, minyo, truck boy ug taga Barangay Punta, Lungsod sa San Remegio, namatay human nalabay ug napantok ang iyang ulo sa dan. Lakip sa naangol ang drayber sa trak de karga nga si Judy Amistoso, 31, minyo ug taga Barangay Punta, San Remegio ug ang laing truck boy nga si Justin Eral, 21, minyo ug taga Punta sa San Remegio. Sa habig sa motorsiklo, naangol ang managtiayong Rexel Pino Sinongote ug Ivy, parehong 39 anyos, ug ang ilang 4 anyos nga anak nga si Gabriela. Ang pamilya taga Purok Indian Tree, Barangay Maño, San Remegio. Si Police Senior Master Sgt. Jerry Dela Cruz, imbestigador sa Bogo City Traffic Police nga nahinabi sa Superbalita Cebu, nagkanayon ang mga biktima pulos padulong sa San Remegio. Nag-una ang motorsiklo nga gimaniho ni Rexel Sinangote ug nagsunod ang trak de karaga nga puno og ba, graba ug 15 ka sako mga semento. Sa pag-abot sa nahisgutang lugar, ang trak de karga ni-overtake sa motorsiklo pero naapiki sa pagbawi hinungdan nga naigo ang motorsiklo bisan nalamba ang managtiayon uban sa ilang anak nangaangol. Nawad-an sa kontrol sa manobela ang drayber sa trak de karga hinungdan sa pagsarasay ug nalimbuwad. Ang truck boy nga si Arcipe didto sa likod hinungdan nga nalagpot ug namatay. "Gikan sa impact sa bangga, mga 200 ka tiil nalimbuwad ang cargo truck, unya didto man sa likod ang truck boy napantok siya ug namatay," matod ni Dela Cruz. Gibutyag niini nga paspas nga nakapadagan ang drayber sa trak de karga kay nagdali sa ilang mahatod ang gamiton sa construction. (GPL) This posting includes an audio/video/photo media file: Download Now

Nahulog sa buho Posted: 24 Jun 2021 08:06 AM PDT Nahulog ang usa ka Toyota Avanza sa lungag sa nagpadayong drainage project sa Agora Public Market sa Barangay Pajac, Dakbayan sa Lapu-Lapu, alas 2:19 sa hapon sa Hunyo 24, 2021. Ang sakyanan nga may plate number nga A2P 530 ug gimaneho sa Korean national nga si Kang Hee Jai, 33. Wala ra siya maunsa. Apan ang iyang sakyanan nahagbong sa dakong buho sa gitrabahong kanal. Matod ni Mario Napule, pangulo sa City Traffic Management System (CTMS) nga base sa ilang pakighinabi sa Korean national, wala kini makamatikod nga adunay dakong lungag kilid sa karsada sa dapit dihang nilihay sa iyang kasugat nga sakyanan. Ang naasoyng drainage project giingong iya sa Department of Public Works and Highways (DPWH) 7. Ang insidente nakamugna og paghuot sa dagan sa trapiko sa lugar samtang wala pa makuha ang sakyanan sa lungag. Dihang nakuha na gamit ang towing truck, gidala kini sa impounding area sa dakbayan diin miadto usab ang drayber nga si Kang. Pahimango ni Napule sa mga motororista nga moagi sa dapit nga magmatngon aron kalikayan ang susamang insidente. (GCM) This posting includes an audio/video/photo media file: Download Now

Background sa gipangtulis gisubay Posted: 24 Jun 2021 08:03 AM PDT Nakig-alayon ang kapulisan sa siyudad sa Toledo sa Cebu City Police Office (CCPO) human sa pagpanulis sa 12 ka mga armadong tawo sa duha ka panimalay sa Barangay Bato sa miaging gabii. Mipalawom karon sa ilang imbestigasyon ang kapulisan sa probinsya sa Sugbo sa naasoy nga kaso. Matod ni Police Colonel Engelbert Soriano, hepe sa kapulisan sa probinsya, nga nakig-alayon ang mga imbestigador sa Toledo sa CCPO sanglit ang mga biktima giingong napuyo usab kini sa Barangay Pasil, dapit nga nabaniog ang negosyo sa gidiling druga. "Yun ang impression.. sa atin naman, we just take it as is for the mean time until we come up with the proper findings through sa investigation natin," matod ni Soriano bahin hugonhungon nga anggulo sa pagpanulis. Usa sa ilang sutaon ang background sa mga biktima aron dinhi sila magsugod sa ilang imbestigasyon ilabi na nga sa kadaghan sa panimalay sa dapit nganong sila ang girombo niini. "Kasama naman yan sa investigation to determine kung ano talaga yung totoong motive," dugang ni Soriano. Si Police Lieutenant Colonel Junel Caadlawon, hepe sa Toledo City Police Station, una nang nibutyag sa dihang nahinabi sa mga tigbalita nga nabilanggo na sa New Bilibid Prison ang bana sa usa sa mga biktima sa kasong pagpanulis. Samtang, ang sunodsunod nga krimen nga nahitabo sa probinsya sa Sugbo, dason ni Soriano, dili lang matawag kini nga alarming apan makahatag na og kahadlok sa mga Sugbuanon. Gipasabot ni Soriano nga ang matag hitabo adunay kaugalingon nga istorya nga mahimong nahitabo tungod sa personal nga motibo nga angay sutaon. (AYB) This posting includes an audio/video/photo media file: Download Now

Sugbo Negusyo mogamit og e-commerce app Posted: 24 Jun 2021 08:03 AM PDT Bag-ong pamaagi ang gihan-ay karon sa kagamhanan sa Lalawigan sa Sugbo alang sa pagbukas sa ikaduhang round sa Sugbo Negosyo program. Kini mao ang pag-partner sa usa ka electronic commerce platform nga Tinda.ph nga maghatag og kasayon sa pagpalit sa publiko sa ilang gikinahanglan sama sa grocery supplies, produktong Sugboanon ug uban pa. Subay sa uwahing kalamboan, moabot sa 52 ka mga partner merchants o mga dagkong tindahan ang mi-salmot alang sa ikaduhang round sa Sugbo Negosyo. Ang maong mga tindahan maoy kuhaan og supply sa mga benepisyaryo sa programa, pinaagi sa pag gamit sa coupon. Unang gilusad ang programa sa miaging tuig diin moabot sa 17, 881 ka mga aplikante kapin sa 8,250 ang nakapasar ug nakapahimulos sa maong programa. Migahin ang kapitolyo og P100 milyones alang sa maong programa nga gi-bahin sa mga bokal ug sa opisina sa Bise Gobernador. Tuyo niini ang pag tabang sa mga Sugboanon nga nawad-an sa pangita, mga Oversease Filipino Workers (OFW) nga nipauli gumikan sa epekto sa coronavirus disease 2019 (Covid-19) ug kadtong may katakos nga matabangan. Una na nga gipahibalo sa Kapitolyo nga sugdan na ang ikaduhang hugna sa programa karong Hulyo. (ANV) This posting includes an audio/video/photo media file: Download Now

Editoryal: Kalig-on ug kahuyang Posted: 24 Jun 2021 07:58 AM PDT Daghan ang nangakugang sa kamatayon ni kanhi Presidente Benigno Aquino III sa Huwebes sa buntag, Hunyo 24, 2021, kay way nasayod sa kahimtang sa iyang panglawas sukad siya nibiya sa katungdanan. Bisan sa mga pagsaway sa administrasyon ni Presidente Rodrigo Duterte kaniya, nagpabiling nagpakahilom ang kanhi presidente. Sa iyang panahon, sa kasaysayan sa nasod, dunay mga magbabalaud nga nangapriso tungod sa mga alegasyon batok sa kurapsyon sa Priority Development Assistance Funds (PDAF) human makaplagi ang mga ghost project ug ghost beneficiaries. Nangabilanggo sila si Senador Bong Revilla, Juan Ponce Enrile ug Jinggoy Estrada human sila gilambigit sa scam, kansang gitumbok nga utok mao si Janet Lim-Napoles. Nagsugod ra unta ang imbestigasyon sa fertilizer fund scam, apan nabuko ang binuang niadtong 2013. Gibana-banang mga P10 bilyunes ang nabulsa sa nangalambigit nga government officials, apil na mga magbabalaud. Iya usab nga napabilanggo si kanhi Presidente Gloria-Mapacapagal Arroyo tungod gihapon sa mga alegasyon sa kurapsyon, apan gipangbasura ang tanang mga sumbong. Ang pagkapriso sa dagkong nasudnong mga opisyal sa kagamhanan sa iyang panahon nagpalig-on sa iyang krusada batok sa kurapsyon nga pagtuman sa iyang slogan nga "daang matuid." Apan taliwa niini, dunay duha ka mga palpak sa iyang administrasyon. Kini mao ang hostage crisis sa mga turistang taga Hong Kong nga namatyan og walo niadtong 2010 ug Mamasapano Massacre sa 44 ka mga sakop sa Special Action Force (SAF) niadtong 2015. Ang duha ka dagkong mga krisis nagpakita usab sa iyang kahuyang sa desisyon sa mga krisis nga nagkinahanglan og dinaliang desisyon. Nasayod siya nga giihaw na ang mga pulis, apan nagdumili siya sa dinaliang rescue. Kon duna siyay kalig-on, duna sab siyay kahuyang. This posting includes an audio/video/photo media file: Download Now

Nalzaro: Way bakuna, way bonus Posted: 24 Jun 2021 07:57 AM PDT Unang nibutyag si Acting Mayor Mike Rama atol sa flag raising ceremony niadtong Lunes ngadto sa mga empliyado sa City Hall nga "no bakuna, no bonus." Buot ipasabot nga kon dili magpabakuna ang mga empliyado sa Cebu City Hall, dili makadawat sa ilang mga bonus. Daghan pa silang bonus nga dawatunon hangtod sa Disyembre. Dayon si Presidente Duterte niingon usab nga iyang ipadakop ang dili magpabakuna. Unsa man ni? Hulga ni Mike Rama sa mga empleyado aron mapugos magpabakuna? Abi ba nako og voluntary ang pagpabakuna, walay pugsanay. Sa private, ang Department of Labor and Employment (Dole) mipagawas og memorandum ngadto sa mga private companies nga dili himuon nga rekisito ang vaccination sa recruitment, employment ug paghatag og benefits ug promotion sa mga empleyado. Wala hinuoy memorandum sama niini alang sa government employees. Alang kanako dili kini makiangayon kon mao kini ang isagop sa liderato sa City Hall. Coercion ug pagpang-hostage man ning ila. MAKALIBOG No ID, no entry. No face shield, no ride. No mask, way gawas. No swab, no entry. No vaccine, no work. No vaccine, no bonus. Pipila lang kini sa daghang makapalibog sa katawhan taliwala sa padayon natong pagsakbang sa dakong hulga sa pandemiya. Karon, morag gisilaban ang sampot sa atong mga lider gumikan sa makuyaw nga variant mga kinahanglan atong kapugngan nga makasulod sa nasud. Apan unsa man gyud nga polisiya ang atong sundon ug tumanon nga wala man sila magkahiusa sa klaro ug katohoan nga mga paagi? Mismo sa face shield wala ta makasiguro kon tinuod bang epektibo. Karon sa vaccine hesitancy gidani kita og mga insentibo sama sa mga diskuwento, freebies ug bonuses. Mga pagdani nga nahimo nang hulga. No bakuna, no bonus. O no vaccine, ipadakop ka. Mahimo ba kaha nga makabati kita bisan makausa na lang nga bisan hain aning ilang mga polisiya ug kamanduan mao na unta ang husto. Dili kay mag-una-una og pagawas og mando una pa nila tun-i kon husto ba o dili. Kini aron dili ta mosamot og kayabag. (bobbygnalzaro@gmail.com) This posting includes an audio/video/photo media file: Download Now

Barrita: Kinsay nikita sa face shields? Posted: 24 Jun 2021 07:56 AM PDT Nagduda ang mga senador nga dunay mga opisyal sa gobyerno nga nikita sa pagpamaligya'g face shields, kay hangtod karon ang Department of Health (DOH) wa pa makapakita og lig-on nga scientific basis sa paghimong mandatory sa pagsul-ob niini. Si Senate President Vicente Sotto III niingon nga di kalikayan nga magduda ang mga tawo nga dunay binuang kay ang Pilipinas ra man ang naghimong mandatory sa pagsul-ob og face shields. Matod pa sa nigamit og face shield, "Mora man ko og welder ini." Unya, unsa man gyud ang gamit sa face shiled? Tinuod bang makaprotehir ni sa mga tawo batok sa Covid-19? Kon si Cebu City Acting Mayor Mike Rama pay pasultion, igo ra man ning himuon nga headband. * * * Ang Estados Unidos sa Amerika, abante kaayo sa natad sa panglawas, wa maghimong mandatory sa pagsul-ob og face shields. Gani sa mga estado sa Amerika nga mayoriya sa katawhan nabakunahan na, wa na gani magsul-ob ang mga tawo og face mask. Si Senador Panfilo Lacson niingon nga posible nga dunay kurapsyon kay nagyagaw ang mga pamahayag sa gobyerno bahin sa face shields. Pun-an pa sa anomalusong paggasto sa pundo sa social amelioration program, Philippine Health Insurance Corp., DOH, Food and Drug Administration ug uban pa. Samtang si Senador Francis Pangilinan niingon nga di ikahibung kon dunay mga opisyales sa gobyerno nga nakasapi kay ilang napamatud-an sa hearing sa Senado sa miaging tuig nga dunay mga overpriced testing kits, personal protective equipment (PPEs) ug testing equipment nga naglambigit sa DOH. * * * Di na man unta kita maghisgot niining face shields kon nadali pa ang pagbakuna batok sa coronavirus. Si Senador Joel Villanueva niingon nga nag-agwanta intawon ang mga tawo sa pagsul-ob og face shields kay wa pa man makab-ot ang herd immunity. Niabot na hinuon sa pagpanghulga sa mga tawo nga dakpon kon di magpabakuna. Unsay dakpon? Dunay daghan nga moadto sa vaccination center aron magpabakuna balibaran man kay kinahanglan pang moregister online. Dunay moregister online, inig adto sa vaccination center, wa nay bakuna. Sigi na hinuon ang pagpalit sa gobyerno og mga bakuna. Kon mabakunahan na ang kadaghanan, di na ta maghisgot pa niining face shields. Ang mga tawo, Mayor Mike, mogamit na sa tinuod nga headband. This posting includes an audio/video/photo media file: Download Now

Rabacal: Trabaho for sale Posted: 24 Jun 2021 07:55 AM PDT Dugay na kong nakadungog niining mga pwesto sa gobiyerno nga ipamaligya ngadto sa mga tawo nga buot makatrabaho. Sagad kining mahitabo human sa eleksiyon labi na kon mag-ilis og mga opisyal. Nahitabo usab kini sa Cebu City Hall. Suma sa atong mga "duwende" sud mismo sa balay-lungsod, adunay mga departamento nga adunay job order (JO) ug casual employees nga dumadapig sa kaatbang nga partido inay nga mga botante sa bag-ong napili nga mga opisyal. Dili kini malilong kay mag-ilhanay man ang mga botante kon kinsa ang ilang kauban panahun sa kampanya. Ang katarungan nga namali na kining maong mga tawo apan ang tinuod gipamaligya kining maong mga pwesto. Sa mountain barangay sa Guba ingon man sa ubos sama sa barangay silingan sa Guadalupe nga kusog kunong baligya-ay sa pwesto. Bisan sa kanunay nga pagpahinumdom nga dili gayud mupasod og taga-pikas nga partido apan aduna gayuy napahamutang mao nga daghang nangreklamo nga dumadapig ni Mayor Edgardo Labella. Sumala sa atong nasayran nga ang ubang mga JO mobayad og P500 ug sa una nilang usa ka buwan nga sweldo nga P8,000 samtang ang mga casual muhatag og P1,000 og usa ka buwan nga sweldo nga P11,000 ngadto sa P13,000. Ang mamaligya mao ra ang ubang lider sa partido diin ipaagi ang ilang rekomendasyon ngadto sa mga konsehal. Murag wa masayud si Mayor Labella niini. Maayo unta og mahiling kini ni acting mayor Mike Rama. Daghan na silag dumadapig nga mi-islag tungod kay mas nakulokar pa ang ilang mga kaatbang. * * * Gipalutaw na karon ang panagpares nila ni Davao City Mayor Sara Duterte Carpio ug kanhi defense secretary Gilberto "Gibo" Teodoro. Bisan tuod og daghang nakadayeg ni Gibo apan inay makatampo sa kadaugan ni Inday Sara pagka-presidente, mas mobug-at na hinuon ang kandidatura sa mayor. (mannyrabacal1144@gmail.com) This posting includes an audio/video/photo media file: Download Now

Talk to Papa Joe: Silingan nga hugawan Posted: 24 Jun 2021 07:54 AM PDT Dear Papa Joe, Tagoa lang ko sa ngan nga Ramon, 36 years old, taga Lapu-Lapu City. Nagpuyo ko sa usa ka rent-to-own house sa subdivision kon diin sikit ang mga balay. Nakaingon kong kapait diay makasilingan kag hugawan. Nakaingon ko ani kay kining akong tupad nga unit, batan-on nga lalake nagpuyo nga wa pakialam. Patuga-tugag buhig og iro di kamao manglimpyo, pasintabi lang sa mga nagkaon apan ang hugaw sa iyang mga iro mangalimyon sa duol nga units. Ang garage mura nag basurahan. Sa una ako pay manilhig kay moabot na ang hugaw sa karsada pero karon gikapoy nako. Kapila na namo ingna nga manglimpyo pero igo rang motando-tando. Aside sa kahugawan, saba pa gyud kaayo ma gabii kay magdala siyag mga barkada sa ila unya mag-inom then magsiyagit-siyagit. Kon badlongon sa mga guard, sila pay isog, kay kono naa silay grupo nga kahadlokan. Asa ta pwede mo duol ani? Palihug tambagi ko. RAMON Dear Ramon, Daghang salamat sa imong tampo. Maka relate ko nimo kay naa pod koy silingan nga ingon ana ka hugawan. Mao nay nakaproblema sa sikit-sikit nga pinuy-anan kay ang hugaw niya modahili padong sa imong unit. Pwede nimo ireklamo sa inyong homeowners association. Paghimo mog letter nga pirmado sa inyong mga silingan ug ipakita kon mag-atubang na mo para mahibaw-an niyang daghan sa iyang mga silingan ang wala kauyon sa iyang gibuhat. Kon dili pa gani mopatuo, ipa barangay dayon. About sa iyang pagsaba-saba, kon mahubog unya sila pay masuko badlongon, panawag mog police kay public disturbance man na para motagam. Daghang salamat. PAPA JOE (Kon duna kay problema ipadala sa papajoesuperb@gmail.com) This posting includes an audio/video/photo media file: Download Now

Serna: Kamatayon ni Noynoy, tahuron unta sa uban Posted: 24 Jun 2021 07:48 AM PDT May his soul rest in peace. I'm sad. I'm a fan. Mao ni ang akong tubag sa mga post kalabot sa pagkamatay ni kanhi Presidente Noynoy Aquino. Dunay uban nga gibuhi ang mga isyu batok sa namatay. May basehanan man kamo o wala, respeto na lang unta alang kaniya. Namatay na god ang tawo, inyo pa gyud dauton. Luoy. * * * Sa pagsulat nako niini, mga duha ka oras ug tunga pa human ko naturokan sa ikaduhang dose sa Astrazeneca. Fully documented ang proseso ug akong gi-post sa Facebook. Gamay lang to nga tabang sa programa aron makaangkon kita sa gitawag nga herd immunity. Wa man hinooy ni-bash iya-iya lang god tag desisyon. Kon ganahan mo, go! Kon di, stop! Aw! Haha! * * * Naka-istorya nato via Zoom ang mga artista sa La Vida Lena nga sila si Erich Gonzales, JC de Vera, Carlo Aquino ug Kit Thompson niadtong Miyerkules sa hapon. Giablihan ni Sir Kane Errol Chua ang mediacon pinaagi sa pagtimbaya sa mga nangapil. Sa Hunyo 28 magsugod ang pagsalida sa A2Z ug TV5 sa alas 10 s.g. Dinaugdaug kaniadto, giswerte, nanimalos. Ingon ana ang istorya pero may mga liko ug simang matag karon ug unya. May mga kataw-anan usab nga mga sitwasyon. 'Completos recados,' matud pa ni Erich. May makauban na mo kon dugay duawon sa dukâ magabii. * * * Nakita nako si Senate President Tito Sotto nga giinterbyu sa telebisyon. Maayo manubag si TitoSen, ma-Tagalog man o Inengles. Didto ko nakaingon nga angayan siya mamahimong Presidente sa nasud. Wa kuno hinoon siyay plano nga modagan sa labing taas nga posisyon sa nasud. * * * Kining segment sa "It's Showtime" nga Reyna ng Tahanan, gawas nga magpakita sa kagwapa ug abilidad sa mga batan-on o edaran nga mga inahan usahay mahimong pahungawanan sa mga kahiubos, kasuko, pagmahay ug uban pa. Kini tungod kay imbitahon sa programa ang bana, anak, higala o kinsa man nga suod sa contestant nga mopagawas sa ilang gibati. Usahay, hasta ang mga hurado nga sila si Janice de Belen, Ruffa Guttierez ug Amy Perez (si Gellie de Belen mo-substitute usahay ni Ruffa), makahilak na lang sab og apil. Di kaayo ko ganahan ani nga portion sa pagsugod pa lang niini pero nakagusto na ko samtang nagkadugay. Malingaw ko aning Ruffa sa iyang pagkahurado kay duna siyay paagi diin ang iyang isulti bisan kon seryoso, mogawas nga kataw-anan. This posting includes an audio/video/photo media file: Download Now

Bamboo Beach house, budget-friendly Posted: 24 Jun 2021 07:43 AM PDT Sa kadtong nag-budget sa ilang pagpanuroy aniay tubag inyong pagdaginot ilabi na niadtong nagplano nga mosuroy sa habagatang bahin sa Lalawigan sa Sugbo. Ang MLK Bamboo Beach house usa ka family-run business nga nagtanyag og komportable nga accommodations sa Lungsod sa Malabuyoc, Sugbo dili lang sa mga local apan lakip na sa mga langyawng turista. "Our main objective is to make your stay as comfortable and memorable as possible," saad sa management sa maong beach house. Garbo sa maong beach house ang ilang ma-abi-abihon ug maatimanon nga mga staff aron pagsiguro nga nahiluna ug komportable ang matag guest sa ilang stay. LOKASYON Ang MLK Bamboo Beach house nahimutang sa National Road, Talangan, Santo Niño, Barangay Labrador, Malabuyoc, Cebu. Gibana-bana nga moabot ngadto sa upat ka oras ang biyahe kon manukad sa Cebu South Bus Terminal sa dalan Natalio Bacalso Avenue, Cebu City nga adunay distansiya nga 124.3 km. Sa mga way pribadong kasakyan aduna mga public transportation nga mopa-ingon sa habagatang bahin sa lalawigan sama sa bus ingon man V-hire. Sayon ra matultolan ang area tungod kay nahimutang ra daplin sa highway ug dali ra sab makita ang signage niini. UNSAY NAA? Gitung-an ang MLK sa mga inila nga tourist destination nga mao ang Kawasan Falls sa lungsod sa Badian ug Oslob Whale Shark watching. Apan dili maguol sa gustong mosuroy sa mga silingang lungsod tungod kay nagtanyag o mo-arrange sab ang Bamboo Beach house og day trips o adventure sama sa canyoneering sa Kawasan Falls ug Alegria. Ingon man island hopping ngadto sa Pescador island sa gustong makakita og sea turtles, dolphins ug sardine run o lapad nga pundok sa isda. Pwede sab sila ang moatiman sa gustong mosuroy sa Sumilon Island sand bar. Sa MLK Beach house mismo mamahimong maka-snorkel ang guest diha sa kadagatan nga nasakop sa ilang property diin masaksihan ang colorful corals ug gagmayng pawikan. Aduna sab silay gitanyag nga paabangan og scooter sa gustong mosuroy sa maong lokasyon ug kayak sa barato nga presyo. Sa kadtong gustong magpuyo o mag-relax nga mopalabay sa oras mamahimo kaayo nga magpundo lang sa ilang garden area o sa common lounge diin nahimutang ang TV set. Adunay sab silay lounge area alang sa mag-sunbathing nga nag-atbang sa baybayon. Mamahimong magkalingaw ang guest og duwa og billiard o pagkanta-kanta sa ilang karaoke. ROOMS Komportable sab ang pagpahuway sa matag guest gikan sa nagkadaiyang activities kay ang Bamboo Beach house adunay unom ka klase nga room types nga kapili-an base sa budget. Adunay good for two, family o grupo nga guest. Pulos air-conditioned ang matag kuwarto, wifi access, private toilet and bath ilabi na ang view ngadto sa kadagatagan. Ang maong room types naglangkob sa; Economy Quadruple Room with Shared Bathroom, Deluxe Villa, Bungalow with sea view, Bungalow-Water Front ug Double Room with Private Bathroom. Mahitungod sa rates mas bintaha nga direkta nga motawag sa MLK Bamboo Beach house tungod sa kausaban sa presyo ilabi na karong pandemiya o booked sa nagkadaiyang booking apps. CONTACTS Alang sa dugang kasayuran o mga pangutana mamahimong motawag sa ilang contact number 0916 970 9000 / 639 77811 1108 o ngadto sa ilang email address nga malabuyoc768@gmail.com o mahimong moduaw sa ilang website: http://www.bamboobeachhouse.net This posting includes an audio/video/photo media file: Download Now

Cebu Skate Park sa SRP na tukoron Posted: 24 Jun 2021 07:40 AM PDT Tinguha karon ni Cebu City councilor Joel Garganera nga mahatagan og katumanan ang dugay na nga gihandom sa mga kabatan-onan nga skate park. Sa iyang privilege speech atubangan sa iyang mga kaubanan sa konseho, gilakbitan ni Garganera nga niadto pang Disyembre 2018 napahigayhon ang groundbreaking ceremony sa skate park nga ibutang sa luyong bahin sa Fort San Pedro. Ang maong kalihukan naghatag og dakong paglaom sa skateboarders ug skateboarding enthusiasts nga mahatagan na sila og luna nga makapahanas sa ilang abilidad. Kining maong natad sa paugnat sa kusog nakatampo na og dungog dili lang sa siyudad sa Sugbo kon dili sa tibuok nasod pinaagi ni Asian Gold medalist Margielyn Didal, lumad nga taga brgy. Lahug, Cebu City. Apan ang pagtukod og skate park sa dakbayan sa Sugbo daw nabutang na lang sa kalimot ug wa mahatagi og igong pagtagad. Nagpabilin nga wa gihapoy lugar nga kabansaybansayan ang skateboarders ilabi na kay gidili kini sa kadalanan. Niini gibuhi ni Garganera ang maong saad ug nagtinguha karon ang konsehal nga mogahin ang dakbayan og hawan nga luna sa South Reclamation Project diin adto ibutang ang skate park. Si Didal, usa sa mga atleta sa nasod nga ning-qualify na sa Tokyo Olympics. "We, as a city, have not given Margielyn Didal or any of our skate enthusiasts a space to hone their skills and talents. In this city, there could be another Margielyn Didal whose skills remain undiscovered and unrefined for we have not given them an environment where they can prosper," matod ni Garganera sa iyang privilege speech. "In fact, I have (authored) a resolution urging the Office of the Mayor in coordination with the SRP Management Office to allocate 10 hectares of the SRP as an open space last May 7, 2021. It can be used as a sports hub for our athletes and aspiring athletes and an outdoor facility where our constituents can freely and happily exercise, hang out, and hone their skills and talents. This posting includes an audio/video/photo media file: Download Now

Lebron gitaktak sa Gilas Posted: 24 Jun 2021 07:40 AM PDT Bisan pa man og nakaangkon og gamayng angol sa miaging Fiba Asia Cup qualifiers, nalakip gihapon ang Sugboanong si Carl Tamayo sa 12-man final lineup sa Gilas Pilipinas nga mokombati sa umaabot nga Fiba Olympic Qualifying Tournament sa Belgrade, Serbia. Kini human nakahukom ang head coach ug project director sa Gilas nga si Tab Baldwin nga ang Fil-Am nga si Lebron Lopez maoy katapusang tangtangon sa puwersa sa Gilas alang sa OQT nga sugdan karong Hunyo 29 ug mahuman sa Hulyo 3 ning tuiga. Ikauban sa lumad nga taga Dakbayan sa Talisay, Sugbo mao sila si Kai Sotto, Isaac Go, Jordan Heading, Geo Chu, Dwight Ramos, Mike Nieto, SJ Belangel, William Navarro, Justine Baltazar ug ang naturalized player nga si Ange Kouami. Kagahapon, Hunyo 24, 2021, migikan na ang Gilas paingon sa Serbia. Ikasangka dayon sa Gilas ang host Serbia karong Hulyo 1 ug sa sunod nga adlaw ilang suwayan ang katakos sa Dominican Republic. Sa Serbia, dili na makapahigayon og dugang tune-up game ang Gilas tungod sa kapiit sa oras niini. "There's no room for that," matod ni Baldwin, kinsa miangkon nga nabalaka siya sa hinayhinayng paghamok sa injury sa team. "I don't think we could withstand that. I don't think we want to take a chance and I think we'll have to tone our practices down as well. Because these kids go hard at one another and they don't really know how to pace themselves yet, which is a good thing in terms of development." Hinuon, giangkon ni Baldwin nga dako kaayo og natabang ang ilang exhibition game batok sa China sa niaging adlaw nga nahuman sa panagtabla, 79-79. Ning maong exhibition game, adunay sitwasyon nga gidungan og pasulod ni Baldwin sila si Sotto ug Kouami aron sukdon ang kaepektibo sa iyang twin towers. (JBM) This posting includes an audio/video/photo media file: Download Now

Virtual ultramarathon ipahigayon alang sa breast cancer patients Posted: 24 Jun 2021 07:40 AM PDT Usa ka virtual ultramarathon ang ipahigayun aron sa pagtabang sa mga pasyente nga adunay breast cancer nga gitawag og "Cebu Pink Virtual Ultramarathon 2021". Mao kini ang gianunsyo sa Cebu Pink Paddlers Dragon Boat Team atol sa ilang gipahigayong press conference sa Radisson Blu Hotel Cebu, kagahapon, Hunyo 24, 2021. Ang maong marathon, nga adunay duha ka categories; 50K ug 100k, sugdan Oktubre 1 hangtod Oktobre 31, 2021. Matod ni race director Lulu Valiente nga ang mahipos nga kwarta niini nga ultramarathon ilang gamiton alang sa ilang programa sa CPPDBT. Mao kini ang ikaduhang hugna sa virtual ultramarathon human nga nagmalampuson ang ilang unang event niadtong Marso 2021. Ang registration pagahimoon online ug magsugod sa Hulyo 1 hangtud Agosto 31, 2021. Alang sa dugang mga detalye, puwede mo-cantact sa numero 09176307164 o mag email sa cebupinkpaddlersdbt17@gmail.com. Mahimo usab nga mo bisita sa ilang sa ilang facebook page ug instagram sa _cebupinkpaddlers. This posting includes an audio/video/photo media file: Download Now

You are subscribed to email updates from https://www.sunstar.com.ph/. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States