https://www.sunstar.com.ph/

---

• Sugilanon: Natuman na! Natapos na ang tanan!
• Balak: Diha ka dihang giurom ako
• Balak: Giunsa nako pagpadayon human sa imong pagbiya
• Chao Sy Boxing Gym giablihan
• Migallen: Ang Boxing Commission ni Pacquiao
• Tabal mohatag og sapatos sa PADS members
• Gilas andam, naa o wa si Kai
• P7.5M danyos sa sunog sa Tejero
• Clark Zozobrado Nakabarug sa Pungkopungko
• Nets mipalagpot sa Celtics sa Game 5; mosakbang sa Bucks sa second round
• Kapin sa 260 ka pasahero natanggong
• Covid approach Sugbo gitun-an sa DOH
• Bike lanes magamit sa nagmotorsiklo
• Di Covid namatyan sa ROF sud sa hotel
• Negusyante dunay 3 ka kaso, nadakpan
• Babaye nagmotor nabangga, tipi
• Tomboy gisuwayag rape; kinatawo sa silingan gibagnos sa paa
• Lalakeng missing napalgan nga patay sa CICC, dunay mga bun-og

Sugilanon: Natuman na! Natapos na ang tanan! Posted: 02 Jun 2021 05:23 AM PDT FRED FUENTES MONTERNEL Lorega Proper, Cebu City Wala mokuyog si Cesar sa iyang Papa Oscar ug Mama Julia nga nagsaulog sa Viacrucis sa Good Shepherd sa Banawa nunot sa kasaulogan sa Biyernes Santo uban sa ilang mga silingan. Nakasaad man siya nga mosulod sa prayer room sa Cebu Metropolitan Cathedral karon aron hilom nga mag-ampo, apil na ang iyang pagpasalamat sa Ginuo nga bisan naagian niya ang tumang kalisdanan isip self-supporting nga estudyante gikan sa hayiskol hangtod sa kolehiyo, naka-gradwar gyud siya sa kursong Accountancy. Nangandam na pod siya alang sa board exam para CPA pinaagi sa pag-self review kay dili niya makaya ang galastuhan. Bugtong anak si Cesar sa iyang ginikanan. Si papa niya Oscar ug si mama niya Julia naninda og mga utanon nga inangkat sa Carbon Public Market. Nagpuyo sila sa eskuwater nga dapit sa Barangay Carreta. Misulod siya pagka newsboy sa SUPERBALITA gikan sa edad nga siyete hangtod disi-utso anyos kanus-a naka-gradwar siya sa publikong tunghaan sa siyudad. Tungod kay ang kita sa iyang ginikanan sa pagpaninda og utanon igo ra man nga makasapar sa ilang inadlaw nga panginahanglan, mi-aplay siya pagka working scholar sa usa ka dakong unibersidad sa siyudad sa Sugbo. Tungod kay maayo man ang iyang mga grado sa hayiskol gidawat siya ug nakapadayon pagtungha sa kolehiyo. Nahuman niya ang Accountancy isip cum laude. Ug nalipay siya kay bisan dili pa siya CPA may dakong kompaniya nga mi-hayir niya isip accounting clerk. Nangalipay sab ang iyang ginikanan nga naka-gradwar siya sa iyang kurso kay makabangkilya na man siya sa ilang panginabuhian. Sa pag-abot ni Cesar sa simbahan sa Cebu Cathedral maoy iyang naabtan ang naghinapos na nga tulumanon sa gipahigayong Siete Palabras, diin ang Paring mamumulong nagbatbat na sa ikaunom nga pulong nga gilitok sa Ginuong Hesus samtang naghanot na sa kamatayon sa gilansangan nga krus. "NATUMAN NA! NATAPOS NA ANG TANAN...!" misulbong sa palibot ang lanog nga tingog sa Paring mamumulong. Nanganaykanay ug mituhop sa tibuok galamhan ni Cesar ang gipaambit nga mensahe sa mamumulong. Wala na siya maminaw sa sunod nga mamumulong kay gihatod na siya sa iyang mga lakang paingon sa sulod sa prayer room, aron pagtuman sa iyang saad ning kasaulogan sa Biyernes Santo. Miluhod siya sa atubangan sa bakanteng lingkuranan ug mikibot-kibot ang iyang mga ngabil. "Salamat, Ginuo ko! Natuman na ang akong pangandoy. Naka-gradwar na ko sa kolehiyo taliwala sa tumang pag-antos ug pag-ampo Kanimo! Natapos na ang tanan kong sakrispisyo! Ania ako aron pagtuman sa akong saad nga magpasalamat Kanimo, kinsa maoy manluluwas sa mga sala sa katawhan!" ni Cesar nga kahilakon. Hugot niyang gitutokan ang rebulto ni Ginuong Hesus nga nagdupa sa krus sa ibabaw sa altar sulod sa prayer room. (KATAPUSAN) This posting includes an audio/video/photo media file: Download Now

Balak: Diha ka dihang giurom ako Posted: 02 Jun 2021 05:23 AM PDT ERLANDO LIGAN MAJAN Brgy. Hipodromo, Cebu City Diha ka ba sa mga higayon – nga gihikawan siya sa tanang katungod nga mabuhi ang tawo sa mga mata sa adlaw? nga ang kabuntagon miawop na sa daghang mga dugo nga gisuyop sa yuta tungod sa inhustisya ug walay kaangayan sa timbangan sa balaod? nga ikaw makapalugwa nag kamatuoran ug kaluwasan sa nahilubong na sa kalimot? Diin ka man sa panahon sa kawad-on ug kagutom sa mga biktima sa mga bagyo, linog ug baha? Matulisok mo ba ang mga bagag nawong ug nagpaka-aron-ingnon nga sila ang manluluwas? Wala na ba gyuy paglaom ug kaluoy maila sa gipakatawo nga mga buta, bungol ug bakol? Ug ang tanang tinunglo adto na lang sa sulad? Apan diha ka dihang giurom ako. Mikisikisi ka. Giibtan mog sungay ug ikog ang mga yawa. Mikunsad ka gikan sa Puting Langit usa ka anghel nga mialim sa akong mga samad, gipala mo ang mga uwat ko sa yuta. May mga tanom nga nabuhi sa disiyerto. Ikaw ba diay ang anino sa Diyos tugahala sa pagpailob ug sa pagpaabot? Moluhod ug mag-ampo ako Kanimo! This posting includes an audio/video/photo media file: Download Now

Balak: Giunsa nako pagpadayon human sa imong pagbiya Posted: 02 Jun 2021 05:20 AM PDT JESSABELE G. BENTAZAL Boljoon, Cebu Ang imong pagbiya sama lamang sa pagkaibot sa tunok nga mitaroy sa akong dughan apan nagbilin og kahapdos hangtod karon kay wala pa gihapon maalim ang samad ning kasingkasing. Apan may milagro sab ang kapakyas sa akong gugma ug ako nakapadayon bisan pag gasigeg ngulngol ang samad nga walay pagkaalim sa handumanan. Tubagon tika sa imong pangutana kon giunsa ko pagpadayon human sa imong pagbiya nga way panamilit. Gipuy-an ko lamang ang kasakit ug gianad ko ang akong kasingkasing sa kapintas sa matag ngutngot niini. Sa ingon dili ko na kahadlokan ang kangulngol sa samad sa dughan nga akong masinati sa higayon nga mobiya unya ang akong himaya. This posting includes an audio/video/photo media file: Download Now

Chao Sy Boxing Gym giablihan Posted: 02 Jun 2021 05:09 AM PDT Alang sa iyang intensyong makatabang sa batan-ong mga uyamot nga nagtinguhang makahaw-as sa kalisod pinaagi sa boksing, si sportsman Lorenzo "Chao" Sy nagtukod og boxing gym alang sa ilang pag-ensayo. Ang gitawag og Chao Sy Boxing Gym opisyal nga giablihan ug gibendisiyunan kagahapon, Hunyo 2, 2021, dungan sa kasaulogan sa ika-69 nga adlawng natawhan ni Sy. Ang gym nahimutang sa 2nd floor sa You We Tong Bldg. sa dalan Escaño corner El Filibusterismo sa Brgy. Ermita, Cebu City tapad sa Novo Store atubangan sa Freedom Park. Giklaro ni Sy nga estrikto niyang gipasunod sulod sa gym ang pagtuman sa health protocols batok sa Covid-19. Si Sy, kinsa maoy Central Visayas regional director sa Association of Boxing Alliances of the Philippines (Abap), mipasabot nga andam siyang motabang sa batan-ong mga boksidor nga nangandoy nga makasunod sa lakang ni boxing icon Manny Pacquiao. "Akong garbo lang gyud ni nga magtukod ko'g gym kay naluoy man gud ko sa mga pobre ba," matod ni Sy, kinsa maoy tag-iya sa Hotel Fortuna. "Gusto nako nga mosikat pud sila nga mapareha ni Pacquiao. Long term program na ni siya." Nagkanayon si Sy nga adunay kapin sa 50 ka amateur boxers nga nag-edad og walo ngadto sa 13 anyos ang nagbansaybansay sa iyang gym. (ESL) This posting includes an audio/video/photo media file: Download Now

Migallen: Ang Boxing Commission ni Pacquiao Posted: 02 Jun 2021 05:08 AM PDT Human mapakyas sa iyang tinguha nga makakuha og igong pundo gikan sa panudlanan sa gobiyerno, boluntaryo nga mitanyag sa iyang kaugalingong kuwarta si Senador Manny Pacquiao aron mahulma ug matukod na ang iyang gisugyot nga Philippine Boxing and Combat Sports Commission. Ubos man gud sa balaodnon nga gipalusot ni Pacquiao sa Senado, nalatid man didto ang gahin nga P100 million-P150 million nga magasto sa pagbutang og opisina sa Luzon, Visayas ug Mindanao ug ingon man itabang ngadto sa mga retiradong boksidor ilabi na niadtong mga nakahatag og dungog sa nasod. Nipalag si Senator Pia Cayetano niini tungod sa kadako sa budget ug gawas pa ang pagtukod og boxing and combat commission usa lang ka duplikasyon sa function sa Games and Amusement Board (GAB). Ngano man tuod nga magtukod og laing ahensiya nga anaa na man ang GAB nga gitahasan sa pag-regulate o pag-amuma sa professional athletes lakip na ang sa boxing ug combat sports. Napakyas si Pacquiao sa pagdepensa sa iyang balaodnon ilabi na kay wa niya makombinsi si Cayetano o ang Senado kon unsay kalahian sa ilang function ngadto sa GAB. Iya man tuod nga gitumbok ang ubang mga nasod sama sa Japan nga adunay kaugalingong boxing commission, apan nasayran nga ang maong commission gipadagan sa pribadong mga sektor ug wa magkinahanglan og gahin gikan sa gobiyerno. Sa pagkatinuod lang, ato man tuod nga gidayeg ang pagpakabana ni Pacquiao sa mga boksidor, apan isip senador dili lang kay ang boxing maoy iyang hatagan og dakong pagtagad. Daghang mga atleta sa nagkalainlaing natad sa paugnat sa kusog, ilabi na sa mga amateur athletes, ang naghatag og dungog sa nasod nga tabangunon usab human kini nangretiro na. Kon magtukod man gani siya og ahensiya sa sports, kanang makadangop ang tanang mga atleta ug dili duplikasyon sa ubang ahensiya. Dili kay sa pag-unsa, ubos sa pamunoan ni chairman Baham Mitra daghang siyang mga inisyatiba nga nahimo alang sa kaayohan nga napahimuslan sa mga professional boxers ilabi na ning panahon sa pandemya. Karon nga nakahukom ang fighting senator nga mogasto sa iyang kaugalingong kuwarta aron ihinayon ang maong ahensiya, ato kining suportahan uban sa panghinaot nga dili unta kini makakomplikar sa bulohaton sa GAB nga makalibog na unya hinuon sa mga atleta. (jun.migallen22@gmail.com) This posting includes an audio/video/photo media file: Download Now

Tabal mohatag og sapatos sa PADS members Posted: 02 Jun 2021 05:08 AM PDT Isip bugti sa iyang nakab-ot nga kalampusan, sa makausa pa, ang giilang Marathon Queen ug Cebuana Olympian nga si Mary Joy Tabal ang moapod-apod og 120 ka mga parisan nga sapatos ngadto sa mga sakop sa Philippine Accessible Disability Services Inc. (Pads). Ang pagpanghatag ipahigayon karong Biyernes, Hunyo 4, 2021 sa alas otso ang takna sa buntag sa Naval Forces Central (Navforcen) sa Philippine Navy sa Dakbayan sa Lapu-Lapu. "Kining mga bataa daw nga mga mahilig na sa paddling. Part sa ilang training kay running three times a week para ma-develop ilang endurance unya wala sila'y shoes. Ang uban nag-tsinelas, ang uban nag-barefoot. Mao nga nanghangyo sila kon maka-provide ba ko og shoes," matod ni Tabal. Dili kini maoy unang higayon nga si Tabal mibukhad sa iyang palad aron paghatag og suporta ngadto sa usa ka charitable institution. Ingon niya nga niadtong 2019 nakahatag usab siya og mga sapatos sa pipila ka mga bata kinsa nangandoy nga, sama kaniya, mamahimo usab nga runner. "2019 nanghatag sab ko sa akong grassroots sa advocacy program nako. Mga 300 sab to ka bata. Unya last year kay pandemic man, so wala ko kapangayo (sa sponsors)," dugang sa lumad nga taga Barangay Guba, dakbayan sa Sugbo. "This is one way of giving back and to inspire the young generation to go sports kay this is one way og keeping us, and then malayo ta sa mga bisyo." Sa tuig 2016, ang 31-anyos nga Tabal nakapanghatag sab og 300 ka armchairs sa Guba Elementary School. (JBM) This posting includes an audio/video/photo media file: Download Now

Gilas andam, naa o wa si Kai Posted: 02 Jun 2021 05:05 AM PDT Naa o wala ang batan-ong higante nga si Kai Sotto, ang Gilas Pilipinas andam na alang sa ikatulo ug katapusang tipik sa 2021 FIBA Asia Cup Qualifiers nga gikatakda karong Hunyo 16-20 sa Clark, Pampanga. Gipasabot ni interim head coach Jong Uichico nga nagpadayon ang hugot nilang preperasyon sa bubble setup sa Inspire Sports Academy sa Calamba, Laguna samtang naghuwat sila sa kompirmasyong makaduwa ang 18 anyos ug 7'3" basketbolista. Si Sotto nahibalik sa nasod gikan sa training niini sa Amerika niadtong Mayo 31, 2021 apan wala pa kini nakaapil sa ensayo sa Gilas tungod kay naka-quarantine pa kini isip pagtuman sa IATF health protocol. "We are getting there, in time for the third window," matod ni Uichico sa interbyu sa GMA News Online. Si Sotto, kinsa di pa lang dugay mipirma og kontrata sa Australian professional team Adelaide 36ers sa National Basketball League (NBL), gikinahanglan sa kampanya sa batan-ong puwersa sa Gilas. "As soon as he clears all protocols, we will take it from there," matod ni Uichico. (ESL) This posting includes an audio/video/photo media file: Download Now

P7.5M danyos sa sunog sa Tejero Posted: 02 Jun 2021 04:22 AM PDT MOKABAT sa P7.5 million ang danyos sa sunog nga niigo sa usa ka edipisyo nga nagsilbeng bodega ug hardware sa alas 12 pasado sa kaadlawon sa Miyerkules, Hunyo 2, 2021, sa T. Padilla Extension, Barangay Tejero, Dakbayan sa Sugbo. Matod ni Fire Officer 3 Emerson Arceo, imbestigador sa Cebu City Fire Office, ilang nadawat ang unang alarma sa mga alas 12:20 sa kaadlawon ug ilang nakontrolar ang kayo alas 12:57. Hingpit nilang napawong ang sunog sa ala 1:40 sa kaadlawon. Ang nasunog ug diin usab nagsugod ang kayo mao ang El Felo Construction and Supply nga gipanag-iya ni Jimmy Tee. Usa ka tawo ang naangol nga giilang si June Jaime Abadinas, 40, kinsa napaso sa tuo nga kiting. Gawas sa hardware, duna pay laing duha ka mga establisemento ang naangin. Matod ni Arceo nga ang kayo nagsugod sa hardware, apan wa nila matino kon unsa ang hinungdan. Wa isalikway ni Arceo nga linya sa kuryente nagsugod ang kayo tungod sa kakaaraan na sa mao nga edipisyo. Matod niya nga sa kadugayon, di malikayan nga dunay "wear and tear" sa mga linya nga naandan nga mahitabo sa pagpanglabay sa katuigan. Usa ka pamilya ang apektado kun 15 ka mga tawo. Mokabat sa 40 ka fire trucks ang ningtubag sa alarma, 10 niini gikan sa Bureau of Fire Protection samtang ang 30 mga fire volunteer. (REV) This posting includes an audio/video/photo media file: Download Now

Clark Zozobrado Nakabarug sa Pungkopungko Posted: 02 Jun 2021 04:10 AM PDT Kada buntag usa na ka pamilyar nga talan-awon sa Barangay Suba, Liloan ang mga sud-gawas nga mga suking kustomer sa "Pungkopungko Ta Bhai." Pagamaygamay lang apan ang maong kan-anan ang naghatag sa musikerong si Clark Zozobrado og bag-ong paglaum aron makabarug taliwa sa mga pagsuway nunot sa pagkakanselar sa tanan niyang shows abroad tungod niining pandemya. "Nakalarga na kog Malaysia (2016), Dubai (2018), Qatar (2019), Indonesia (2020) ug pa-China unta ko last year pero na-pending tungod aning Covid," paambit sa 27-anyos nga bokalista sa interbyu sa Superbalita Laysho. "Grabe gyud ka krisis kay kining musikero kon wala kay tukar wala sad kay kita. Tanan nakong savings sa abroad nahurothurot jud. Pasalamat lang ko duna koy girlfriend nga masinabtanon ug nagtrabaho sa BPO nga maoy nitabang nako aron maka-start-up ko aning pungkopungko ug ni-encourage nako nga laban lang," dugang ni Clark, kinsa natawo ug nidako sa Banacon, Getafe, Bohol. "Napunta ko dinhi sa Cebu tungod sa akong mga uyoan nga naa na dinhi nagpuyo ug mao say nagpa-eskuwela nako kay wala man koy namat-an nga mga ginikanan. Akong lola ug lolo ray nagpadako nako. Upat mi ka managsuon ug ako ang pinaka-eldest. Lain-lain mi og amahan kay kini lagi dili tantong guwapa atong inahan daghang maibog. Hehehe. Joke." "Sa tinuod lang wala pa gyud ko kakita sa akong papa sukad sa akong pagkatawo. Gi-try na nakog search sa Facebook. Naay daghan pareho niyag pangan pero dili man siya. Kon hatagan mig higayon sa Ginoo nga magkakita ako gyung ikalipay og dako." Sa pagsugod sa pandemya bisan unsa na lay gisudlan nilang negosyo sa iyang fiancee' nga maoy lumad nga taga-Liloan aron makapunopuno sa ilang income. Namaligya sila og masks, mga kinilong manok, Medex Health Tonic hangtod nga naka-desidir sila nga mag-pungkopungko sa tabang sa iyang uyoan nga maoy dugay na sa maong negosyo. "Wala pay alas dos sa hapon mahurot na man akong paninda mao nang maka-spearfishing pa ko human nako dinhi. Mamana mig isda lawom sa dagat ug ang kuha ako sad ibaligya. Nakat-on ko ani karon na lang pandemya. Walay lisud basta pursigido lang kang makat-on." Hinuon, wa mawad-i og paglaum si Clark nga puhon makakanta ra siyag balik sa gawas ug makatigom aron mahatagan niyag katumanan ang iyang mga damgo, lakip na ang makapanag-iya og dakong kan-anan sama sa Pungkopungko sa Fuente nga pagatawgon kuno niyang Pungkopungko sa Norte. Clark Zozobrado, Ssssuper Ka! Sayo diay kang nanimpad sa kinabuhi? Sayo jud kay wa man koy namat-an nga mga ginikanan. Ang akong mama tua sa Leyte ug duna nay iyang pamilya. Kiwawan gani ko motawag niyang mama. Last namong kita mga two years ago kadtong namalaye ko sa parents sa akong partner. Kinsay naka-influence nimo mag-singer? Akong mga barkada. Nagsugod kog tukar pag-eskuwela nako sa CTU-Danao, where I took up BS in Hospitality Management. Kami nag-champion sa Battle of the Band. Kaduha sad ko nag-champion sa singing contest pag-high school sa District Meet. Unsay pangan sa imong banda? Lain-lain man akong mga banda. Kon naa ko sa Cebu, kining Stereophony band. Nagtukar mi sa una sa MoodNight Resto Bar sa Consolacion ug Compostela. Pero pag-adto nako sa Malaysia ang akong kauban ang Hyperzone band. Then sa Dubai ang Aftershock band while sa Qatar ang Twist of five ug ang Stellar band sa Indonesia. Unsay inyong mga tirada? Mga pop ug classic favorites like The Lazy Song (Bruno Mars), Crazy Little Thing Called Love (Freddie Mercury), Californication (Red Hot Chili Peppers), Together in Electric Dreams (Philip Oakey & Giorgio Moroder), Tarzan Boy (Baltimora) ug mga sikat nga Indonesian and Chinese songs. Unsay bestseller sa imong pungkopungko? Ang kusog ang ginabot, tungol, crab meat, pusit, bolabola, lumpia ug tortang pasayan. Open mi from 10 am to 2 pm or until supplies last. Suroy nya mo sa gamay namong pungkopungko. Naa ra gyud mi atbang sa Suba Elementary School sa Liloan. This posting includes an audio/video/photo media file: Download Now

Nets mipalagpot sa Celtics sa Game 5; mosakbang sa Bucks sa second round Posted: 01 Jun 2021 08:32 PM PDT Mimugna og triple-double si James Harden nga maoy iyang unang nahimo sa playoffs ubos sa Brooklyn Nets sa dihang ilang gipalagpot ang Boston Celtics, 123-109, sa Game 5 sa first round sa Eastern Conference playoffs, Miyerkules, Hunyo 2, 2021. Si Harden mipakatap og 34 puntos, 10 ka rebounds ug 10 ka assists, samtang midugang usab og 25 puntos si Kyrie Irving nga gisundan usab sa 24 ni Kevin Durant aron tapuson ang series, 4-1, ug maoy ilang unang pagtaak sa second round sukad niadtong 2014. Ang No.2-seeded nga Nets mosakbang sa Milwaukee Bucks sa second round nga sugdan karong Dominggo (Sabado sa US). Bisan tuod og hamubo ra ang kahigayonan nga sila nagkauban, apan gipakita sa Big Three sa Nets kon unsa sila ka lantip sa maong series ilabi na sa dihang nagkumboya sila og 104 points sa Game 4. Ang katapusang hunat sa Celtics mao ang pagpakunhod sa labaw sa Nets ngadto sa otso puntos na lang sa katapusang otso minutos sa duwa. Apan nahunong ang arangkada sa Boston human mipabuto og duha ka sunodsunod nga tres si Durant ug Irving nga nagpainat og balik sa bintaha. Si Jayson Tatum mipakli og 32 puntos nga may siyam ka rebounds aron pangulohan ang Celtics, ang finalists sa Eastern Conference sa niaging tuig. Ang nakatampo sa sayong pagbakasyon sa Boston karong tuiga mao ang pagka injured nila ni Jaylen Brown ug Kemba Walker. (JBM) This posting includes an audio/video/photo media file: Download Now

Kapin sa 260 ka pasahero natanggong Posted: 01 Jun 2021 06:59 AM PDT Kapin sa 260 ka mga pasahero sa mga pantalan sa Sugbo ang natanggong sa dihang gikanselar ang biyahe sa mga barko ug ubang sakayan gumikan sa Bagyong Dante. Base sa labing uwahing weather update sa Philippine Atmospheric Geophysical and Astronomical Services Administration (Pagasa) as of 5 p.m. kagahapon, Hunyo 1, 2021, gipaubos ang amihanan ug tunga-tungang bahin sa lalawigan sa Sugbo sa signal no. 1. Gilangkuban sa Balamban, Asturias, Tuburan, Tabuelan, Sogod, San Remigio, City of Bogo, Borbon, Tabogon, Bantayan Islands, Daanbantayan, Medellin, Catmon, Danao City, Carmen, Compostela, Cebu City, Liloan, Consolacion, Mandaue City, Lapu Lapu City, ug Cordova lakip na ang amihanang-silangan bahin sa lalawigan sa Bohol. Gibutyag ni Coast Guard Station Central Cebu acting commander Alvin Dagalea nga base sa ilang uwahing ihap adunay 166 ka mga pasahero ang natanggong sa pantalan sa Central Cebu ug 97 ka mga pasahero ngadto sa amihanang bahin sa lalawigan. ALERTO Gipa-alerto ang tanan nga mga sakop sa Disaster Risk Reduction and Management Office (DRRMO) sa mga kalungsoran sa Lalawigan sa Sugbo, aron sa pagtubag sa posibling katalagman nga motumaw sa ilang dapit. Si Neil Sanchez, pangu sa Provincial DRRMO, niahwag sa mga lokal nga kagamhanan nga dili mokompyansa og padayon nga mag-monitor sa mga disaster ug landslide prone areas. Gipahimangnoan gilayon kadtong mga nanimuyo sa danger zone nga mobakwit ngadto sa mas luwas nga lugar. GIPABIYAHE Bisan pa man nga gipaubos sa Signal No. 1 ang Dakbayan sa Lapu-Lapu kagahapon, Hunyo 1, sa udto, gitugotan gihapon nga makabiyahe ang mga motorbanca ug ubang sakyanan sa dagat sa Angasil Port sa Barangay Mactan kutob lang sa 5:00 sa hapon, kay dili pa dagko ang bawod sa Hilutungan channel labang sa isla sa Olango. Gituyo ang maong lakang aron menos ra ang matanggong nga mga pasahero sa mainland paingon sa isla ug vice versa. Matod ni Nagiel Bañacia, pangulo sa City Disaster Risk Reduction and Management Office (CDRRMO), nga ang maong desisyon gibase sa sitwasyon sa kadagatan unya makita ra usab ang paglawig sa mga sakayang pandagat sa isla ug vice versa bisan kusog ang pagbunok sa uwan. Si Lapu-Lapu City Mayor Junard Chan maoy nihangyo sa Philippine Coast Guard kalabot niini. Ang mga pasahero nga wala gihapon makasakay human sa alas 5 hayan maoy natanggong sa mga pantalan. Nag-andam og food packs ang mga sakop sa City Social Welfare and Development Office (CSWDO) alang sa mga natanggong nga pasahero. "Gitugotan lang sa kay hayag pa man unya base sa atong mga CCTV wa may bawod uwan ra. Para lang gyud way matanggong pero pag ngitngit na wala nay gitugotan," matod ni Bañacia. RESPONDER Gibutyag ni Bañacia nga gumikan sa pagpaubos sa Signal No. 1 sa dakbayan nga naglakip sa isla sa Olango hayan magamit na unya ang ilang mga bag-ong responder sa isla nga nigradwar sa ilang training duha ka semana na ang nakalabay. Moabot sa 20 ka personnel ang mga responder nga taga isla sa Olango ug bahinon kini sa tag 3 ka personnel matag shift sulod sa 24 oras nga monitoring. Kini aron masiguro nga adunay makaresponde panahon sa emerhensiya sumala ni Bañacia. (JJL, ANV, GCM) This posting includes an audio/video/photo media file: Download Now

Covid approach Sugbo gitun-an sa DOH Posted: 01 Jun 2021 06:46 AM PDT Kutob Miyerkules, Hunyo 3, 2021, ang gihatag nga tagal ni Presidente Rodrigo Duterte ngadto ni Health Secretary Francisco Duque III sa gihimong pagtuon sa gipatuman nga lagda ug paagi sa kagamhanan sa lalawigan sa Sugbo niadtong manguli-ay nga overseas Filipino workers (OFWs) ug returning overseas Filipinos (ROFs). Kini maoy gibutyag ni Gobernador Gwendolyn Garcia atol sa press conference sa Hunyo 1 human siya nakigtagbo kang Duterte ug ubang opisyal sa hingtungdang ahensiya didto sa Malacañang, sa gabii sa Mayo 31. "Secretary Duque at first said that: 'Yes we will discuss this but words could be different but our minds are made up so the president had to repeat, to study so at least we did all that we could'," saysay ni Garcia. Pasabot sa Garcia nga ang ilang gipatuman mao ang tinguha nga dili mokatap ang Covid-19 nga maoy gihimo sa lalawigan sud sa 10 ka buwan, diin ang Sugbo gipa-ubos pa gihapon sa modified general community quarantine (MGCQ) status. "Let me repeat that, the province of Cebu for the past 10 months continues to be on MGCQ status inspite of the fact that we have reopened tourism, that we have reopened economy and where we become sensible on our requirements for those coming from other parts of the country intending to visit Cebu," matod ni Garcia. Sa labing uwahing talaan adunay 355 ka aktibong kaso sa virus ang probinsiya base niadtong Mayo 30. Samtang sa 400 ka hospital bed occupancy, 89 niini ang okupado ug adunay 2,415 ang bakante nga hotel rooms sa mga accredited hotels nga mamahimong temporaryong quarantine facility niadtong pasahero nga gikan sa abroad. Subling mipahinumdum si Garcia nga dili angayang itandi ang Sugbo sa ubang lugar gumikan kay managlahi ang gipatuman nga paagi ug case management sa nasinateng pandemiya. Gibutyag ni Garcia nga sa kasamtangan magpabilin una ang national policy labot sa mga lagda nga agi-an sa mga OFWs ug ROFs. Gi-divert ang tanan nga international flights ngadto sa Ninoy Aquino International Airport (NAIA) ug kasamtangang gihunong ang direct flight paingon sa Mactan Cebu International Airport (MCIA) sugod niadtong Mayo 29. Subay sa paagi sa probinsya, magpuyo sa usa ka hotel ang OFW o ROF samtang magpaabol sa resulta sa swab test. Sa paglabay sa duha ngadto sa tulo ka adlaw, kon negative sa Sars-CoV-2 mahimo nang makapauli, sa kadtong magpositibo i-quarantine kini. Apan sa IATF protocol, gikinahanglan nga ang OFW ug ROF mopailawom sa 14 ka adlaw nga quarantine bisan negatibo ang resulta sa swab test. Ang 10 ka adlaw niini magpabilin sa accredited hotels ug ang nahabiling upat ka adlaw ngadto na sa ilang tagsa-tagsa ka mga balay tiwason ang pag-quarantine. Samtang ang Cebu City Government nakatala og labing ubos nga critical care occupancy rate ug death rate sa buwan sa Mayo, 2021. Si Konsehal Joel Garganera nagkanayon nga sa pagtapos sa buwan Mayo, ang critical care occupancy sa siyudad mikunhod ngadto sa 16.9 porsiyento diin 156 ra ang okupado sa kinatibuk-ang 923 ka Covid beds sa 15 ka public ug private hospitals. Base sa record, adunay natala nga 12 ka mga nakalas sa miaging buwan nga maoy labing ubos karong tuiga. (ANV, PAC) This posting includes an audio/video/photo media file: Download Now

Bike lanes magamit sa nagmotorsiklo Posted: 01 Jun 2021 06:45 AM PDT Mga nagmotorsiklo gitugotan nga makasubay sa bike lanes sa mga kalsada sa Dakbayan sa Sugbo, apan ubos sa kondisyon. Nagkanayon si Gerry Carillo, chairman sa Sugbo Bike Lanes Board (SBLB) nga adunay mga bike lanes nga mahimong magamit sa mga motorista nga ilang gitawag og shared roads (sharo). Matod ni Carillo, magamit sa mga nag-motor ang bike lanes ngadto sa area nga walay gilaray nga bollard sa areas nga adunay bollards nga gitaod nagpasabot nga exclusive lang sa mga nagbiseklita ang bike lanes. Ang bollards gitaod ngadto sa mga kalsada nga lapad, samtang kadtong bike lanes nga way bollards anaa sa lugar nga gip-ot ang kalsada. Ang bike lanes nahimutang sa South Road Properties, Mambaling, V. Rama, B. Rodriguez, General Maxilom Ave., MJ Cuenco Ave., N. Bacalso Ave. ug ubang mga major roads. Si Carillo nagkanayon nga 80 porsiyento na sa 140 kilometro nga bike lanes ang nahuman sa pag-implementar sa Cebu City ug kasamtangan nilang gitrabaho ang habig sa Fuente Osmeña rotunda. Iyang gihawhag ang mga biker sa pagsunod sa bike rules ilabi sa paglabang sa intersections, dili lang sa Fuente Osmeña rotunda. Matod pa ni Carillo nga mopahigayon unya sila og bikers education aron masayod ang tanang bikers sa mga pamaagi apil na ang mga hand signals, gear nga angayang gamiton ug uban pa. Matod ni Carillo nga kon adunay intersection kadtong nagbiseklita kinahanglan nga mohunong ug mokanaog sa bike. Guroyon ang biseklita samtang nagsubay sa pedestrian lane apan kon wala, mangita og labing duol nga pedestrian lane ug adto moagi paingon sa ilang destinasyon. Sa higayon nga mahimo nang aktibo ang 60 ka sakop sa bike patrol nga maoy magpatrolya sa 140 km bike lanes sila maoy manakop sa mobabag sa bike lanes ug manakop sa violator nga bikers. Ipatuman kini sa Cebu City ang mga lagda sa bike lanes apil na ang violation niadtong wa magsul-ob og protective gear. Karong Sabado, Hunyo 5, ang SBLB mopahigayon og "bike through" sa ilang gipamutang nga bike lanes aron pagsusi sa kahaom niini alang sa mga bikers. (PAC) This posting includes an audio/video/photo media file: Download Now

Di Covid namatyan sa ROF sud sa hotel Posted: 01 Jun 2021 06:40 AM PDT Ang pagkamatay sa usa ka returning vverseas Filipino (ROF) sulod sa lawak sa usa ka hotel sa Brgy. Mactan, Dakbayan sa Lapu-Lapu way kalabotan sa coronavirus disease 2019 (Covid-19). Mao kini ang giklaro sa mga taga Lapu-Lapu City Health Office ug ingon man sa Lapu-Lapu City Police Office (LCPO). Ang ROF nga taga Nueva Ecija gipaubos sa 10 ka adlaw nga quarantine sa usa ka hotel sa dakbayan human niabot gikan sa gawas sa nasod ug ni stopover sa Sugbo. Kasamtangan lang unang gipugngan ning mantalaan ang ngalan sa ROF nunot sa hangyo sa pamilya. Matod ni Police Colonel Arnel Banzon, director sa LCPO ,nga anaa na sa katapusan unta nga adlaw sa iyang pag quarantine ang ROF niadtong Mayo 30 dihang napalgang patay sa iyang lawak. Ilang girespondehan ang hitabo sanglit nanawag og police assistance ang tagdumala sa hotel. Base sa ilang inisyal nga pakisusi, way foul play ang kamatayon niini. Giingong daan na kini nga nakahisgot sa iyang kauban nga gi-quarantine usab sa laing lawak sa hotel nianang Sabado, Mayo 30, pinaagi sa video call nga naglain ang iyang pamati sa lawas ug maglisod siya og ginhawa apan wala lang panumbalinga. Layo usab ang posibilidad nga Covid-19 ang namatyan sanglit ka duha na nag negatibo ang maong ROF sa Reverse Transcription -Polymerase Chain Reaction (RT-PCR) test sa Covid-19. Mogawasay na siya nianang adlawa aron molarga sa kaulohan. Ang pamahayag ni Banzon gidasonan usab ni Grace Mary Carungay, city epedimiological and surveillance unit officer sa kagamhanan dihang nahinabi ning mantalaan. "Dili ta kaingon unsay cause of death kay ang Overseas Workers Welfare Administration (OWWA) ang makahatag anang ilang death certificate kay ilaha man ni. Ang ato lang ari ra ta sa police side. Natural death ra gyud ang iyang kamatayon. Dili sad ta ka autopsy sa iyang patayng lawas og walay consent sa family," pagpasabot ni Banzon. (GCM) This posting includes an audio/video/photo media file: Download Now

Negusyante dunay 3 ka kaso, nadakpan Posted: 01 Jun 2021 06:36 AM PDT Negusyante nga giilang number 6 most wanted person sa dakbayan sa Lapu-Lapu ug gitumbok nga sakop sa usa ka criminal gang nadakpan sa Criminal Investigation and Detection Group (CIDG) 7 Lapu-Lapu field unit pinasikad sa warrant of arrest sa duha ka kasong cyber libel, carnapping ug qualified theft. Ang nadakpan mao si Darren Ray Diaz, 32, taga Salinas Drive, Barangay Lahug, Siyudad sa Sugbo. Siya gidakop samtang padung na manihapon human malutsi og warrant of arrest sa korte niadtong Lunes, Mayo 31, 2021. Ang korte mitugot og dul-an sa tunga sa milyon ka pesos nga pyansa alang sa iyang temporaryong kagawasan. Matod ni Police Colonel Ireneo Dalogdog, hepe sa CIDG-7, nga pipila ka mga buwan midangop sa ilang buhatan ang usa usab ka negosyante. Nipasangil kini kang Diaz nga maoy nikuha sa iyang sakyanan ug mi post usab sa social media labot sa mga pasangil batok sa reklamante. Dugang ni Dalogdog nga sigun sa ilang nakuha nga impormasyon, sakop sa Chong criminal group si Diaz. Giingong ug nalambigit usab kini sa gun running, illegal drugs ug gun-for-hire. Aduna siyay mga kauban sa grupo apan gibutyag ni Dalogdog nga siya pa ang unang nailhan tungod kay migawas na ang ngalan niini sa intelligence monitoring sa kapulisan. "Itong arrested person na ito siya si alyas Torre. He is newly identified member of Chong criminal gang, engaged in gun running, gun-for-hire, robbery and illegal activities operating in Lapu-lapu City," matod ni Police Colonel Ireneo Dalogdog. Apan hugot nga gihimakak ni Diaz nga nakahimo siyag krimen. Natingala na lang siya nga nalutsan siyag warrant of arrest bisan wala siya makadawat og supoena gikan sa korte. Atol sa pag sikop kaniya sa sulod sa ilang balay sa Salinas Drive sa Lahug, nanihapon sila uban sa iyang asawa ug duha ka mga anak tungod kay nag selebrar sila sa adlawng natawhan sa iyang kapikas. Iyang gibutyag nga suod niya nga higala ang mipasaka kaniyag kaso. Nagkauban silag negosyo diin siya matod pa ang nag tukod niini. Nahibulong siya nga gikiha siyag carnapping nga unta utangan pa man kaniya ang nakapalit sa iyang sakyanan. Giingong nakakuha matod pa siyag kapin sa duha ka milyon ka pesos sa kompaniya nga iyang gitukod. "Ako mismo nahibung nga asa man ning kwarta gikan. Mo surrender unta ko sa ilang attorney kay wala man koy problema limpyo man ang akong konsensya. Gipa blotter pa ko nga nangawat ko with my own mga gamit pa, " matod ni Diaz. Bahin sa carnapping nga isyu matod niya nga iyang gi baligya ang iyang sakyanan sa kantidad nga P300,000 diin ang down payment usa ka motor nga mo kantidad sa kapin P100,000. Apan gipasanginlan na hinuon siya nga iyang gi kawat ang maong sakyanan. Andam nga atubangon ni Diaz ang maong mga kaso nga gisang-at batok niya apan abli usab siya sa posibilidad nga makig husay sa reklamante nga iyang giila nga higala alang sa siguridad sa iyang mga anak. (AYB) This posting includes an audio/video/photo media file: Download Now

Babaye nagmotor nabangga, tipi Posted: 01 Jun 2021 05:53 AM PDT Namatay ang usa ka babaye human nabangga ang iyang gisakyan nga motorsiklo alas 8:30 sa gabii sa Mayo 31, 2021, sa national highway sa Kabulihan 2, Brgy. Ilihan, Dakbayan sa Toledo. Ang babaye giila sa kapulisan nga si Charlote Plaza Canillas, 22, dunay kapuyo, taga Sitio Masaba, Brgy. Cantabaco, dakbayan sa Toledo . Sa imbestigasyon nila ni Police Señor Master Sgt. Jun Ian Alquiza, sa Toledo Police Station, si Canillas sakay sa iyang Mio nga motorsiklo padulong sa Barangay Matab-ang, Dakbayan sa Toledo. Sa pag-abot niini sa dapit, nawad-an sa kontrol sa manobela si Canillas sa iyang motorsiklo ug nabangga sa steel railings. Ang ulo ni Canillas napantok sa railings ug patay nang niabot sa tambalanan. (GPL) This posting includes an audio/video/photo media file: Download Now

Tomboy gisuwayag rape; kinatawo sa silingan gibagnos sa paa Posted: 01 Jun 2021 05:53 AM PDT Tomboy nakamata kay gibagnosbagnosan ang iyang bugan sa kinatawo sa usa ka traysikad driver alas 5 sa buntag sa Martes, Hunyo 1, 2021 sa Sitio Camaligbato, Brgy. Taboc, Dakbayan sa Danao. Si Aiza, 20, nagpuyo sa dapit nisinggit pagpangayo og panabang human hapit na mahubo iyang shorts ingon man sinina sa iyang silingan nga si Arnel Esteliori, 33, ulitawo. Si Police Corporal Mezal Hortelano, sa Women's and Children's Protection Desk (WCPD) sa Danao City Police Station nga nahinabi sa Superbalita Cebu nagkanayon nga si Aiza uyab sa manghod ni Esteliori. Si Aiza natulog sa balay nila ni Esteliori, kinsa hubog nga niabot sa buntag. Mideretso sa pagsulod sa lawak ug nitupad sa paghigda ni Aiza. Nakabantay si Aiza nga dunay nagsigeg bagnos-bagnos sa iyang bugan ug gihapuhap ang iyang paa. "Pagmata niya iyang nakit-an ang suspetsado nagbagnosbagnos sa ___ niini diha sa iyahang paa," asoy ni Aiza ngadto sa pulis. Napugwat siya kay hapit na sab mahubo ang iyang shorts ug sinena busa nisinggit siyag panabang. Gipukaw niya ang iyang uyab nga manghod ni Esteliori. Usa sa ilang mga silingan nakabati sa kaguliyang. Gitug-an ni Aiza ang hitabo hinungdan nga gidakop si Esteliori pinaagi sa citizens arrest ug gi-turn over sa kapulisan. Matod pa ni Hortelano nga si Esteliori hubog kay nag-inom og Kulafu. Nisulti si Esteliori kanila nga wala siya masayod sa iyang gibuhat. Gibutyag niya nga iyang gipagawas ang iyang kinatawo kay mikatol. "Wala siyay plano nga dautan iyaha lang daw gipahanginan iyang junior kay misakit unya mikatol kay nadaot sa babaye," dugang ni Hortelano. Nangayo si Esteliori og pasaylo ni Aiza, apan mopasaka og kasong acts of lasciviousness si Aiza. Si Aiza gisuportahan sab sa iyang uyab nga manghod ni Esteliori. (GPL) This posting includes an audio/video/photo media file: Download Now

Lalakeng missing napalgan nga patay sa CICC, dunay mga bun-og Posted: 01 Jun 2021 05:53 AM PDT Napalgang patay ang usa ka lalaking missing sud sa tulo ka mga adlaw sulod sa elevator sa Cebu International Convention Center (CICC) building sa gabii niadtong Mayo 31, 2021. Giila ang lalaki nga dunay mga bun-og sa lawas nga si Arjun Navares Canangga, 33, taga Sitio Basubas, Barangay Tipolo, Mandaue City. Nakaplagan si Canangga tungod sa baho sa iyang lawas nga nagkadugta na. Ang CICC building giabandonar na sukad nahugno ug naguba sa 7.2 magnitude nga linog niadtong 2013. Matod ni Police Major Eric Gingoyon, hepe sa Centro Police Station, nga nakadawat sila og taho nga adunay nakit-ang lawas sulod sa elevator sa CICC alas 9 sa gabii sa Lunes. Niingon siya nga sigon sa pamilya ni Canangga, katapusan siyang nakit-an sa gabii sa Mayo 29, 2021. Sa pakighinabi sa Superbalita Cebu sa ig-agaw ni Canangga nga si Ana Mae Dejito, niingon siya nga nabalaka ang ilang pamilya tungod kay pipila na ka adlaw nga wala na nila siya igkita. Nabalaka ang asawa ni Canangga kon naunsa na ang iyang bana labi na nga nagsabak pa siya sa ilang ikalimang anak, sigon ni Dejito. Matod ni Dejito nga nagsige na sila og pangita ni Canangga. Niadto na sila sa mga prisento sa kapulisan namasin nga nadakpan tungod sa curfew. Buntag sa Lunes, nakit-an sa ilang usa ka ig-agaw ang bisikleta ni Canangga gawas sa building sa CICC. Sigon ni Dejito nga mihangyo ang asawa nga balikon og pangita si Canangga sa sulod sa building bisan kon dili pwede pasudlan. Matod niya nga gisuroy nila ang sulod sa CICC ug nisaka sila sa taas apan wala nila nakit-an. Nikanaog sila ug aduna silay natimahoan nga lain og baho nga anaa sa may elevator. Ilang giablihan ang elevator ug didto nila nakita ang lawas ni Canangga. Sigon ni Dejito nga maayong tawo si Canangga ug wa silay nailhan nga kontra. Apan sa imbestigasyon sa kapulisan, matod ni Gingoyon nga nisulti ang gwardya sa CICC nga inilang kawatan si Canangga nga magkuha og mga matimbang nga butang. Gani, aduna na kini record si Canangga nga nadakpan niadtong Oktubre 2014 tungod kay nangawat. Dugang ni Gingoyon nga aduna nay grupo nga mangawat og para matimbang sulod sa CICC ug gitan-aw sa imbestigasyon nga basin og natripan sa ubang grupo si Canangga. Apan, dili pa nila matumbok ang hinungdan sa kamatayon ni Canangga tungod kay nagpadayon pa ang imbestigasyon. Gani, gipaubos pa sa autopsy ang lawas niini sa Philippine National Police Crime Laboratory ug nagpaabot pa silang Gingoyon sa resulta. Niingon si Gingoyon nga adunay nakita nga mga bun-og sa lawas ni Canangga. (KFD) This posting includes an audio/video/photo media file: Download Now

You are subscribed to email updates from https://www.sunstar.com.ph/. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States