https://www.sunstar.com.ph/ |
- Editoryal: Buylo sa ting-uwan
- Barrita: Seniors nga nabakunahan makagawas na
- Nadela: Padayon ang ayuda
- Talk to Papa Joe: Napurdoy
- 841 ka pamilya mibakwit
- Eleazar: Daghang hugaw nga police stations
- PNP chief midayeg sa kapulisan, LGU Ormoc City
- Pick-up midaro sa convenience store, bata angol
- Mag-uuma mipusil sa iyang kaugalingon
- Basil: Anak ni Vergel Meneses kandidata sa Ms. Phils. Earth
- Panawagan sa publiko
- MPBL Mumbaki Cup karong Sept.
- MPBL, NBL, VisMin mag-usa’g puwersa
- Baldwin mogiya og balik sa Gilas
| Posted: 13 Jun 2021 06:54 AM PDT Sa mga miaging adlaw, nasinati sa tibuok Sugbo ang pagbunok sa uwan matag-karon-ug-unya bisan sa pagbiya na sa nasod sa bagyong Dante. Niadtong Sabado, Hunyo 12, nagsuyla ang mga sapa ug estero sa dakbayan sa Sugbo. Labing grabe sa pagkagabii, dihang naguba ang dam sa Campo 4 sa dakbayan sa Talisay hinungdan sa flashflood sa ubos nga bahin ug pagpamakwit sa mga molupyo. Dili pa kaayo kusog ang pagbunok sa uwan ug dili usab dugay apan nimugna na og dakong epekto sa kinabuhi sa mga molupyo ug kalikupan. Usa kini sa timailhan sa pagbuylo na sa panahon sa ting-uwan ug bug-at nga pasidaan sa mga umaabot pang katalagman labina kon taas ang pagbunok sa uwan. Dili nato matagna o masukod ang epekto apan igo lang kita sa pagbanabana. Bugtong nato nga hinagiban mao ang pagpangandam. Walay igong gahom bisan ang modernong siyensiya ug ang malantip nga panghunahuna alang sa pagsanta sa lihok sa kinaiyahan. Apan ang naa sa kapasidad sa tawo alang sa makanunayong pagpangandam aron mohatag og alibyo o dili grabe ang epekto ngadto sa kinabuhi ug komunidad sa kinatibuk-an. Ang Philippine Atmospheric Geophysical and Astronomical Services Administration (Pagasa) sa Mactan, Cebu nitaho nga ang automatic rain gauge sa Department of Science and Technology sa Barangay Lahug, Cebu City nitala og subra sa normal nga bundak sa uwan sa Metro Cebu niadtong Sabado. Gipaabot nga posibleng motaas pa kini sa mga umaabot nga adlaw sa ting-uwan. Dunay dakong kuwangon sa tukma nga drainage system sa Metro Cebu. Naapiki pa ang ubang normal nga agianan sa tubig sa mga dakong pag-ugmad sa kayutaan ngadto sa komersiyal ug industriyal nga katuyoan. Way igong pagtagad o naulahi kanunay ang pagtukod og publikong inprastraktura taliwala sa paspas nga ekonomikanhong kalamboan. Bugtong mahimo sa mga molupyo nga pagbuylo sa ting-uwan mao ang pagpangandam. Magpakabana. Moduyog sa paningkamot sa kagamhanan alang sa luwas nga katilingban.  This posting includes an audio/video/photo media file: Download Now |
| Barrita: Seniors nga nabakunahan makagawas na Posted: 13 Jun 2021 06:54 AM PDT Sugod sa Hunyo 16, 2021, ang senior citizens nga kompleto na sa bakuna batok sa Covid-19, mahimo na'ng mogawas sa ilang mga panimalay sa mga lugar nga ubos sa general community quarantine (GCQ) ug modified GCQ (MGCQ). Subay kini sa Resolution No. 120 nga giluwatan sa Inter-Agency Task Force (IATF) for the Management of Emerging Infectious Diseases. Sa pasiaw pa, di na kinahanglan pang kuyogan ang mga senior citizen sa ilang mga ginikanan o guardians. Apan kinahanglan nga magsul-ob gihapon sila og mask ug face shields, physical distancing ug maglikay sa mga lugar nga dunay daghang tawo. Dad-on sab nila ang ilang Covid-19 vaccination card. Ang Hunyo 16 maoy Independence Day sa mga senior. * * * Apan mipahimangno si Health Undersecretary Maria Rosario Vergeire nga di gihapon angay nga mokompiyansa ang mga senior citizen nga nakahuman na sa duha ka dose sa bakuna kay mahimo gihapon silang matakdan ug manakod. Kapin na sa usa ka tuig ang "stay at home order" sa seniors nga nagpanuigon og 65 anyos ug pataas. Makagawas lang sila alang sa mga mahinungdanong butang sama sa pag-adto sa doktor ug magpalit sa inadlaw nga supplies sa panimalay. Adunay mokabat sa 9.5 milyones ka mga senior citizen nga nag-edad og 60 anyos ug pataas sa tibuok nasod. Hangtod sa Hunyo 8, 415,540 ka seniors ang nakakompleto sa bakuna. Dunay 1.2 ka milyon nga wa pa makahuman sa ikaduhang dose sa bakuna. * * * Ang bag-ong lagda sa IATF makadasig sa seniors nga magpabakuna. "Get vaccinated to enjoy the incentive of going out of your home to exercise or chat with other fully vaccinated senior citizens," matod pa ni Vergeire. Kagawasan nga makagawas sa balay. Maong giawhag ni Cebu City Acting Mayor Michael Rama ang seniors nga kompleto na sa bakuna sa pagpahimus sa ilang kagawasan, apan kinahanglan nga responsible sila pinaagi sa pagtamod sa health protocols. Malipay sab niini ang mga negosyante. Makaayo sa mental health sa senior citizens ug makaayo sa ilang negosyo.  This posting includes an audio/video/photo media file: Download Now |
| Posted: 13 Jun 2021 06:54 AM PDT Nagsugwak sa daghang mga tawo ang usa ka bahin sa Holy Rosary School of Pardo sa Barangay Poblacion Pardo, Cebu City pipila ka adlaw ang nakalabay. Kini tungod sa lain na sab nga community pantry nga gipasiugdahan sa Sangguniang Kabataan sa maong barangay. Ayaw mo kahibulong ngano nga nagsige ni ang ilang kalihukan pagtabang sa labing kabus natong kaigsuonan sa dakbayan. Ang rason kay daghan sab ang nisanong sa ilang panawagan nga mo-donate og pagkaon unya sila na nga mga batan-on ang bahala sa pag-pack ug pag-apud apod sa benefeciaries. Unya nakita sa donors ang ilang ka epektibo mao nga sila giganahan. Sa mga may malumong kasingkasing nga nagplano nga manghatag og bugas ug ubang pagkaon, mahimo kamong makig-alayon kanila diha sa ilang barangay hall. Makalaum mo nga kini mahatag gyud sa angayan nga hatagan. Ang nakanindot ning ilang paagi kay dili basta basta sila mohatag. Ang mangayo, magdala og basiyo sa plastic nga sudlanan og tubig. Kon unsa ka daghan ang imong dala, ingon sab niana kadaghan ang madawat nimo nga ayuda. Paagi ni pagtabang sa kampanya pagluwas sa atong kalikupan batok sa nilibo ka tonelada nga mga plastic bottle nga nagpasad bisan asa. Congrats again, SK Poblacion Pardo ug daghang salamat sa inyong mga donor. Ang ubang community pantry nagpadayon pa. Ang uban nangita pa og ikaayuda. Dili gyud ni undangon ilabi na niadtong organizers nga suhito kaayo kinsay angay hatagan. Daghan pa kaayo ang wala pa makabangon ning trahediya nga padayon natong giantos. Samtang dili pa hingpit makabangon ang ekonomiya, ang kagutom dili gyud molunga. * * * Niadtong kaadlawon sa Sabado, laing bunok sa ulan ang nasinati nga niresulta sa grabing baha. Dili nalang nato tagsa tagsaon paghisgut ang mga dapit nga grabing gibahaan. Naay daghan nga bisan way ulan, padayon nga nag-antos ang mga molupyo sa tubig nga naglooy sa ilang palibot. Ang uban ra ba niining dapita kay makadaghan na saad saari nga trabahuon. Ang saad magsugod panahon sa tinglamano, panahon sa kampanya sa eleksiyon. Kay hapit naman ang kampanya, sigurado ko nga ang ilang gisag-ulo nga drainage masterplan ilaha na sab nga isalida. Sa ato pa lain na sab nga pasalig nga kanang gadala og dengue nga baha ilang sulbaron sa higayon nga inyong padag-on. Kini sila gibuangan na lang gyud sa mga kanunay maapiki sa baha. Siging saad, siging pakyas sa saad pero siging daug. Pagka suwerte naman lang gyud. Unsaon ang mga botante sigi man sab nga palipat. Hibalo ba mo nga sagol lipat lipat baya ning politika. Maayo'g ang peryahan ray naa ani. Undang nata aning bisyoha kay kitay kanunay nga pildi kon sa sugal. Natural ra man gyud nang mosaad, unta kamaong motuman.  This posting includes an audio/video/photo media file: Download Now |
| Posted: 13 Jun 2021 06:46 AM PDT Dear Papa Joe, Ako si Mariana, 42 years old, taga Lapu-Lapu City. Seaman ang akong bana maong sa wala pa ang Covid, arang-arang gyud among pagkabutang kay nag-invest kog raw houses sa usa ka subdivision diri sa Mactan. Three units na akong gipaabangan ug maayo pod ang kita. Moginansiya gyud kaluoy sa Ginuo. Apan dihang nakapauli akong bana last year, wala na kabalik og sakay tungod aning virus. Ang akong mga tenant nagkalisod-lisod pod siguro kay wala na sila ni-renew. Karon, usa na lang ka unit ang naay nag-abang unya wala pa kalarga akong bana. Murag maboang na ko unsay akong buhaton patuyok sa kwarta kay upat ka unit dala sa among gipuy-an maoy akong bayranan sa montly amortization. Sige kog paggawas og kwarta, pero wa nay nisud. Naglibog na ko. Sakit na kaayo akong ulo. Ingon akong bana nga i-give-up nalang namo ang duha ka units nga way nagpuyo apan sayang gyud kaayo. Hay kapait. Unsaon man ni nako, Papa Joe? Tambagi ko palihug. MARIANA Dear Mariana, I feel you, tungod kay sa gikaingon ko na ug permi nakong gibalik-balik diri sa akong column, nga daghan kaayo ang naglisod ron. Hasta gani ako nag-struggle pud. Makaingon kong patas gyud tanan ron. In fact, duna koy kaila nga business owners nag-suffer pud ilang negosyo, labina og nag-rent pagpwesto sama sa malls ug department stores. Unya dili essential ang ilang business, minghoy gyud karong panahona. Kon di na gyud mada, mag-close sila. Mao sab na imong buhaton, kon dili na gyud nimo kaya, ayaw nag pagpaka-stress og taman. Sama sa imong giingon nga mura na kag maboang, let go. Sakto imong bana, pwede ninyo e give-up ang ubang units, ipa-assume nimo para dunay kwartang mosud unya maoy imong gamiton para maka-start kag bag-ong business nga ginagmay. Mag-online seller ba hinuon ka, maninda og mga bisag unsa hangtud nga makabalik nag sakay imong bana. Ana lang, relax and take a deep breath. Let go, start a new one and rebuild. PAPA JOE (Sa inyong mga problema, ipadala sa papajosuperb@gmail.com)  This posting includes an audio/video/photo media file: Download Now |
| Posted: 13 Jun 2021 06:28 AM PDT Mokabat sa 841 ka mga pamilya ang gipabakwit sa Sabado sa gabii, Hunyo 12, 2021, gikan sa lima ka mga barangay sa Dakbayan sa Talisay human nisuyla ang tubig sa Mananga River. Matod ni City of Talisay-Traffic Operations and Development Authority (CT-TODA) chief Joy Tumulak, kinsa nangunay sa pagdumala sa iyang mga sakop sa pagpadagan sa trapiko sa mga dapit nga naapektuhan, nga nidako ang tubig sa Mananga River hinungdan nga ang mga balay nga naa sa low lying areas daplin sa sapa, nangaapektuhan. Iyang gihimakak ang taho nga dunay naguba nga dam sa may Campo 4 nga maoy hinungdan sa kalit nga pagsaka sa tubig. "Anang hayag pa, amo nang nabantayan nga itom kaayo ang dag-om sa bukid. Diri sa ubos medyo hayag ra man," matod ni Tumulak sa Superbalita Cebu. Sila nagtuo nga nag-uwan sa bukid nianang sayo sa gabii hinungdan sa pagsaka sa tubig nga niabot na sa kabalayan. Sa taho sa City Social Welfare and Development Office nga gipangulohan ni Felipa Solana, 107 ka mga pamilya ang apektado sa baha sa Barangay Dumlog. Duna say 244 ka mga pamilya gikan sa Barangay Lawaan III, 130 sa Barangay Lawaan 2, 230 sa Lagtang ug 130 sa Barangay Biasong. SAYO SA GABIIAng City Disaster Risk Reduction and Management Office (CDRRMO) nakadawat og taho sa baha sa Mananga River mga alas 6:55 sa gabii. Daling gipalihok sa CDRRMO, pinangulohan ni Alvin Santillana, ang tanang barangay emergency responders sa mga dapit nga apektado. Naabtan sa mga rescuer sa sityo Bahala, Barangay Dumlog ang taga liog nga giladmon sa tubig. Niini, nangayo dayon og assistance sila si Santillana sa Philippine National Police (PNP) ug Bureau of Fire Protection (BFP) nga daling nakapadala og personnel mga alas 7:25 sa gabii. Lakip sa niabag sa rescue operations ang Philippine Coast Guard (PCG). Nagsugod paghubas ang baha sa mga alas 9 na sa gabii ug nianang mga alas 10, taga tuhod na lang ang tubig. Sa mga alas 10:45 sa gabii, gihinayhinay na sa pag-undang sa CDRRMO ang rescue operation. KALIT KAAYOSi Dumlog Barangay Captain Nelson Abellana, sa interbyu sa Superbalita Cebu, nihulagway sa baha nga "kalit kaayo." Matod niya nga sa sityo Paglaum, taga liog ang tubig ug kusog pa ang sulog sa ilang pag-abot. Bisan naggamit pa sila og pisi sa pagluwas sa mga residente, naglisod sila sa pagsungasong sa kakusog sa bul-og ug kalawom sa tubig. Matod ni Abellana, ang tubig niabot pa sa karsada sa sityo. Gipanguyawan sila kay daghan sa mga residente nagdumili sa pagbakwit bisan lawom na ang tubig. Duna mga tiguwang nga magtiayon nga 70 anyos na kapin, ilang gipugos sa pagluwas pinaagi sa pagsakwat aron malikay sa trahedya. Lain niyang gikuyawan mao ang poste nga naigo sa baha hinungdan nga nanghangyo dayon sila nga ipapawong. Sa Dominggo sa buntag, hinayhinay nga namalik ang mga lumolupyo ug wa nay nagpabilin sa evacuation center. "Nanglimpyo na to sila kay grabe kaayo ang lapok," dugang niya. Nalipay na lang siya nga way bisan usa ka kinabuhi nga nakalas. Iyang hangyuon si Mayor Gerald Anthony "Samsam" Gullas nga pangitaan og relocation site ang mga lumolupyo kay nag-ungaw ang ilang mga kinabuhi matag bunok sa uwan. Ang gipabakwit nga mga residente gihatagan sa social welfare office ug sa buhatan ni Gullas og mga banig, pagkaon sa gabii ug pamahaw sa Dominggo sa buntag, Hunyo 13, 2021. Kasagaran sa mga pamilyang gipabakwit namalik na sa ilang gipuy-an, apan gipahimangnoan sa pagbiya gilayon sa ilang mga balay kon mosaka og balik ang tubig. PASIDAANSi Enzo Puerto, weather specialist sa Philippine Atmospheric Geophysical and Astronomical Services Administration (Pagasa) sa Mactan, Cebu, nagkanayon nga niadtong Sabado, Hunyo 12, nakatala sila og tulo ka pag-unos o thunderstorms sa Talisay. Matod niya, ang unang thunderstorm advisory sa Talisay ilang giisyu sa alas 6:21 sa buntag, laing advisory sa alas 4:15 sa hapon ug gisundan sa alas 6:05 sa gabii. Kini nga thunderstorms, dason niya, nipakusog sa uwan nga nilungtad og duha ka oras. Sumala sa Pagasa, base sa automatic rain gauge sa Department of Science and Technology sa Barangay Lahug, Cebu City, nitala og subra sa normal nga gidaghanon sa uwan sa naasoy nga adlaw. Dugang pasidaan niya nga ang Metro Cebu makasinati pa og mga kusog nga pag-uwan sa mga mosunod nga adlaw. CEBU CITYPagdahili sa yuta ug pagbaha ang nasinati usab sa dakbayan sa Sugbo niadtong Hunyo 12, diin kapin sa 30 ka pamilya ang naapektohan apan walay gikatahong angol. Base sa taho sa Cebu City Disaster Risk Reduction and Management Office (CDRRMO) nga alas 12:00 sa tungang gabii sa Hunyo 13, usa ka pamilya ang naapektohan sa pagdahili sa yuta. Si CDRRMO officer-in-charge Ramil Ayuman niingon nga usa ka bahin lang sa balay ang nadaut sa pagdahili sa yuta. Ang maong balay dunay pito ka sakop sa pamilya nga gipabalhin sa barangay hall. Ang pagbaha nakaapekto sa kapin sa 90 ka pamilya sa nagkalainlaing barangay sa dakbayan. (REV, WBS, JJL)  This posting includes an audio/video/photo media file: Download Now |
| Eleazar: Daghang hugaw nga police stations Posted: 13 Jun 2021 05:43 AM PDT Nasubo ang officer-in-charge (OIC) sa Cebu Police Provincial Office (CPPO), Police Colonel Engelbert Soriano, sa komentaryo ug mando ni Philippine National Police (PNP) Chief Police General Guillermo Eleazar sa paghimo sa matag police station nga limpiyo ug pagsunod sa iyang ubang mando. Matod ni Soriano, iya nang gilibot ang 50 ka police stations sa probinsya sa Sugbo, wala siya matagbaw sa gipakita sa pipila ka mga chief of police sa paglimpyo sa ilang buhatan labi na sa ilang pansayan. Seryuso si Soriano sa kamandoan nga sundon ang programa nga gipatuman sa bag-ong liderato sa PNP nga kinahanglan hamugaway ug limpyo ang mga buhatan sa kapulisan. Wala mohingan si Soriano unsa kini nga mga police station, apan iyang giklaro nga iyang naabtan nga hugaw ang opisina lakip na ang pansayan nga maoy salamin sa usa ka opisina. Wala, matod pa, mahinloi ang plastic barrier nga naa sa desk officer nga abog na kaayo. Mihatag og tagal si Soriano sa iyang mga hepe sa kapulisan sa kalungsuran nga mohimo sa ilang tahas ug motuman sa iyang kamandoan. Kon padayon nga hugaw ug walay gihimo ang usa ka chief of police, dili siya magduha-duha sa paghulip niini sa katungdanan tungod kay daghan matod pa ang gustong mahimong hepe sa usa ka police station. "Madaming gustong mag chief of police. Yes, I will definitely give chance to those who are willing, but I'm giving all the 50 COPs this month to take the cue and react to the guidance of the chief PNP," dugang ni Soriano. Giangkon hinuon sa police official nga daghan pa sa mga police station nga karaan na kaayo ang building nga angayan nang ayuhon ug kuwang usab sa pundo ang usa ka police station aron mopanindot sa ilang opisina. Apan kon maantigo lang ang hepe niini, daghan matod pa ang pamaagi nga malimpyo ang ilang buhatan ug ang ilang pansayan. Una nang mibahad si Soriano niadtong miaging semana sa police stations nga walay nadakpan sa gilusad nga simultaneous anti-criminality law enforcement operations nga iyang pahulipan. Misamot pa ang iyang kasagmuyo sa dihang naabtan niya sa inspection ang mga chief of police nga relax ra kaayo. Gimandoan usab ni Soriano ang tanang police station nga palambuon nila ang Sugbusog program sa kagamhanan sa probinsya diin ang matag police station mananom kinig mga utanon ug lagutmon sa luyo sa ilang buhatan. (AYB)  This posting includes an audio/video/photo media file: Download Now |
| PNP chief midayeg sa kapulisan, LGU Ormoc City Posted: 13 Jun 2021 05:41 AM PDT Ormoc City - "Yung mga senior officers natin dito sa Region 8, partikular na sa Ormoc City, ay alam nila ang kanilang ginagawa at maayos na." Mao kini ang komentaryo ni General Guillermo Eleazar, hepe sa Philippine National Police (PNP), sa iyang pagbisita sa dakbayan sa Ormoc niadtong Huwebes, Hunyo 10. Ang chopper nga gisakyan ni Eleazar nitugpa sa 802nd Infantry Brigade sa Camp Downes sa Ormoc, pasado alas 7 sa buntag. Gisugat siya sa mga opisyal sa kasundalohan ug lokal nga kagamhanan sa Ormoc. Gisunod ang hamubo nga programa. Human sa programa, si Eleazar nisusi sa Police Station 1 diin nikomentaryo nga iyang nakita ang kahapsay ug kalimpyo sa buhatan. Gidayeg usab niya ang kalimpyo sa tibuok dakbayan. "Sa taas pa lang, nakita ko ang linis at ganda ng Ormoc City," matod ni Eleazar Nangulo sa pagsugat sa hepe sa PNP sa City Hall mao ang magtiayong Mayor Richard ug Cong. Lucy Torres-Gomez, kauban ang mga konsehal sa dakbayan ug mga mayor sa kwatro distrito sa Leyte si Eleazar. Si Eleazar nakig-istorya sa mga opisyal sa opisina ni Mayor Gomez diin iyang gipadayag ang kalipay sa suporta sa kagamhanan ngadto sa kapulisan. "Makita ang moral ng ating kapulisan at nakita ko napakataas ng moral nila dahil sa suportang binibigay nga ating LGU-Ormoc," matod ni Eleazar. Gipresentar atubangan ni Eleazar ang mga brand new nga armas ug gamit gikan sa LGU-Ormoc nga gihatag sa Ormoc City Special Weapons and Tactics (SWAT) ug gipahigayon ang groundbreaking ceremony sa bag-ong police station sa Barangay Dolores. Lakip sa nakig-atubang sa hepe sa PNP mao ang 110 ka mga barangay kapitan ug subli kining gipahibawo sa kampanya sa kapulisan batok terorismo ug illegal nga drugas. Sa iyang bahin, si Cong. Gomez nagkanayon, "President Rodrigo Duterte is not a perfect President but regardless of how you attack him, regardless of what you say about him, what he hasn't done, I will be always thankful for what he has done to the city of Ormoc and 4th District of Leyte. If President Duterte was not president, if Richard was not mayor, our drug problem in this city would have persisted until this time," matod sa kongresista. (JKDP)  This posting includes an audio/video/photo media file: Download Now |
| Pick-up midaro sa convenience store, bata angol Posted: 13 Jun 2021 05:39 AM PDT Usa ka pick-up nga sakyanan nga wala makaliko sa dalan, nilahos sa sud sa convenience store sa Barangay Proper Kawit, lungsod sa Medellin, alas 11:35 sa gabii niadtong Sabado, Hunyo 12. Usa ka 12 anyos nga bata ang samdan. Si Kyle Carlo Fuentes, 12, nalandig sa tambalanan human nakaangkon og mga kadaot sa iyang lawas. Samtang gitanggong si Deancy Louis Rosell, 33, ulitawo ug taga Barangay Paypay, lungsod sa Daanbantayan, kinsa maoy nagmaniho sa mahalong pick-up nga dunay numero sa plaka ABN-2485. Maayong pagkaguba sa ESEE Convenience Store nga gipanag-iya ni Roy Fuentes, 40, taga Barangay Poblacion, Medellin. Si Patrolman Gabriel Masong sa Medellin Police Station nga nahinabi sa Superbalita Cebu, nagkanayon nga ang pick-up nga gimaniho ni Rosell, gikan sa Daanbantayan ug nagpadulong sa dakbayan sa Bogo ug dunay mga sakay apan walay naangol. Kusog ang dagan niini sa pag-abot sa kurbadang karsada sa maong dapit. Nawad-ag kontrol sa manobela si Rosell, hinungdan wala makaliko ug nilahos sa convenience store. Gumikan sa kakusog sa impact, nangabungkag ang mga baligya, appliances, ingon man naigo ang 12 anyos nga bata. "Nasulod gyud ang pick-up sa tindahan, kusog-kusog ang dagan, uwan, unya dangog kaayo maong wala makaliko ug nalahos," dugang ni Masong. Giandam na nila ang tukmang kaso nga ipasaka batok sa driver. (GPL)  This posting includes an audio/video/photo media file: Download Now |
| Mag-uuma mipusil sa iyang kaugalingon Posted: 13 Jun 2021 05:34 AM PDT Naalarma ang mga residente sa Purok 5, Barangay Labrador, dakbayan sa Ormoc human usa ka mag-uuma ang nagpusil sa iyang kaugalingon. Ang insidente nahitabo pasado alas 5 sa hapon niadtong Sabado, Hunyo 12. Patay ang mag-uuma nga si Carlito Laurente, 19, ug nagpuyo sa maong barangay. Matod sa kapulisan sa Police Station 2, nakadawat sila og impormasyon gikan sa usa ka Elena Eyas ug nipahibawo nga dunay nahitabong paghikog sa maong lugar. Dali nga miresponde sa lugar ang kapulisan ug naabtan si Laurente nga naligo sa iyang dugo ug diha sa tupad ang kalibre .38 nga revolver nga gigamit sa pagpusil. Matod ni Rachell Laurente, igsuon niini, sa wa pa mahitabo ang paghikog, dunay panag-away ang iyang igsuon ug uyab niini sa Messenger. Nabatian nalang niini ang buto sa armas ug iyang nakit-an ang iyang igsuon nga nahagba ug nagkadugo. Padayon pa nga giimbestigar sa kapulisan kon diin ang armas. Wala'y nakita nga timailhan sa foul play ang kamatayon niini. Samtang sa Lawaan, Eastern Samar, patay ang usa ka mananagat human naghikog gumikan sa depresyon nga iyang nasinati. Ang insidente nahitabo sa Barangay Maslog, Lawaan, Eastern Samar, pasado alas 6 sa buntag niadtong Sabado, Hunyo 12. Giila sa kapulisan ang biktima nga si Reynaldo Racaza, 33, usa ka mananagat ug nagpuyo sa maong lugar. Base sa imbestigasyon sa kapulisan, si Racaza naka-quarantine tungod kay close contact kini sa usa ka Covid-19 positive patient. Gipaubos sa swab test ang biktima ug nianang Martes sa gabii nigawas ang resulta nga positibo usab kini sa Covid-19. Matod sa kapulisan, posible nga ang maong sitwasyon nakaaghat sa biktima nga tapuson ang iyang kinabuhi pinaagi sa paghigot og pisi ngadto sa iyang liog. (JKDP)  This posting includes an audio/video/photo media file: Download Now |
| Basil: Anak ni Vergel Meneses kandidata sa Ms. Phils. Earth Posted: 13 Jun 2021 05:32 AM PDT Manila - Sa may mga nahinumdom niadtong 80's ug early 90's, siguro nasundan ninyo ang stint ni Vergel Meneses sa Philippine Basketball Association. Usa siya sa ambungang basketball player. After niya sa PBA naging head coach naman si Vergel sa JRU (Jose Rizal University) sa NCAA ug sa kasamtangan, siya ang mayor karon sa Bulakan, Bulacan. Iyang gipulihan ang iyang manghod nga si Patrick Meneses nga na-linked kang Ara Mina kanhi. May anak si Vergel, si Roni ang reigning Miss Mandaluyong ug sa kasamtangan official candidate siya sa Miss Philippines Earth 2021 representing the same city. Usa ako sa naimbitahan ni Mel Caparas para sa meet and greet ni Roni nga gipahigayon sa Alex III Restaurant sa Greenhills niadtong usang adlaw. Very fresh ang beauty ni Roni nga usa ka UP Graduate sa kursong B.S Clothing Technology. Nangutana ko kang Roni kon nganong Mandaluyong ang iyang gi-represent og dili ang Bulakan, Bulacan pero ang tubag niya, sa Mandaluyong siya gipanganak ug hangtud karon sa Mandaluyong gihapon sila nagpuyo. Aduna sila'y ancestral house sa Bulakan ug sige ra sad siyag duaw sa Bulakan. Highlight sa nahisgutang meet and greet mao ang pagdawat ni Roni og plaque isip Global Youth awardee gikan sa mga organizers, Global Youth Parliament gumikan sa kontribusyon ni Roni sa pag-uplift sa imahe sa mga kabataan og sa iyang aggressive response sa Covid-19 pandemic. Imbitado si Roni sa official awarding nga ipahigayon sa November 18-21 sa Mount Everest, Base Camp sa Kathmandu, Nepal. Since advocacy driven ang Miss Earth, akong gipangutana si Roni kung unsa ang iyang advocacy, "environmental vegetarianism" diin gi-encourage sad niya ang plant-based diet. Usa sad ka ka entrepreneur si Roni, aduna siya'y RM Clothing og ang RM Kitchen nga kusog ang palitay sa online. Natilawan namo ang cookies ni RM og in fairness, super lami. Si Roni under sa Kagandahang Flores nga daghan na kaayong na-produced nga beauty queens including Gazini Ganados and Samantha Bernardo. Goodluck sa imong laban Roni sa MPE og hinaot unta nga usa ka sa ma-koronahan, pero mas okey kung Miss Earth Philippines jud para ikaw ang mag-represent sa Pilipinas sa sunod nga Miss Earth pageant.  This posting includes an audio/video/photo media file: Download Now |
| Posted: 13 Jun 2021 05:28 AM PDT Ang Department of Social Welfare and Development (DSWD) Field Office VII, Cebu City nangayo og tabang sa publiko sa pagpangita sa mga ginikanan ug kaparyentihan sa niining bata. Usa ka batang babaye nga gihatagan og pangalan Alexandra Yule Denise Rivera nga gibanabana nga usa ka adlaw sa dihang gibilin sa usa ka inahan nga ginganlan og Abegail niadtong Agusto 6, 2004 sa North General Hospital, Barangay Talamban, Siyudad sa Sugbo. Kon mapakyas ang mga ginikanan ug kaparyentihan sa pagpatim-aw ug pagkuha sa bata sulod sa usa ka buwan, mamahimo na nga mapasang-at ang administrative abandonment sa bata sa buhatan sa DSWD Central Office. Mamahimo nga makigkita sa social worker nga si Joafe Astaca-an sa buhatan sa DSWD, Field Office VII, M.J Cuenco Avenue Corner Gen. Maxilom Avenue, Barangay Carreta, Cebu City o motawag sa (032) 412-9908 ug 232-9505 ug mobile phone no. 09066566199. (PR)  This posting includes an audio/video/photo media file: Download Now |
| Posted: 13 Jun 2021 04:41 AM PDT Naglaraw ang Maharlika Pilipinas Basketball League (MPBL) nga iuswag ang pagsugod sa ilang Mumbaki Cup karong Septiyembre ning tuiga. Gipasabot ni Commissioner Kenneth Duremdes nga napugos sila sa paghimo ning maong lakang gumikan sa labing ulahing mga panghitabo kabahin sa mga kaso sa Covid-19 sa nasod. "Meron tayong na-plan before. Nag-change na lang tayo due to pandemic again," matod ni Duremdes sa One Chooks-to-Go Pilipinas virtual press conference nga napatik sa www.abs-cbnnews.com. "May tinatarget tayo ng September for the Mumbaki Cup. Actually, this is our first time na hindi tayo nakapag-open ng June 12 . . . But for some reason, ito nga, 'yung pandemic, hindi talaga pwede." Nanghinaot si Duremdes nga makakumpleto na sa pagpabakuna ang tanang mga magduduwa, coaches, staff ug uban pang mga nahilambigit sa liga sa dili pa masugdan ang Mumbaki Cup. "We're hoping by September ma-ease out na, roll out nu'ng vaccines, and we want to be sure everybody is vaccinated," dugang ni Duremdes, kinsa kanhi MVP sa Philippine Basketball Association (PBA). "Para safe tayong lahat and magkaroon tayo ng magandang approval from the IATF (Inter-Agency Task Force) and the government." Sa orihinal nga plano, karon untang Agusto 2021, sugdan ang Mumbaki Cup nga kombatihan og 19 ka teams. Apan gumikan sa padayong hulga sa pandemiya, gipasabot ni Duremdes nga kinahanglan nilang iuswag ang pagsugod sa Mumbaki Cup dala ang panghinaot nga moubos na ang mga kaso sa Covid-19. (ESL)  This posting includes an audio/video/photo media file: Download Now |
| MPBL, NBL, VisMin mag-usa’g puwersa Posted: 13 Jun 2021 04:15 AM PDT Mag-usa og puwersa ang Maharlika Pilipinas Basketball League (MPBL), National Basketball League-Pilipinas (NBL), ug Pilipinas VisMin Super Cup alang sa pagpahigayon og liga diin magkombati ang mipatigbabaw nilang teams alang sa inilugay sa national title. Mao kini ang gipadayag ni Chooks-to-Go head honcho Ronald Mascariñas, kinsa miingon nga mao kini ang ilang pamaagi aron ipakita ang ilang kinatibuk-ang suporta sa local basketball scene. Ang Chooks-To-Go mao ang main backer sa MPBL, NBL, ug VisMin Cup. "Mula sa araw na ito, sama-sama naming ipapakita ang pagkakaisa at ipadama ang tunay na puso para sa pinakamamahal nating Pilipinas," asoy ni Mascariñas sa usa ka virtual press conference nga napatik sa www.gmanews.tv. "We're doing this primarily for the fans. Today, we stand together for Philippine basketball and the basketball fans." Hinuon giklaro ni Mascariñas nga wala pa'y mga detalye kon unsaon pagpadagan ang kompetisyon. "Kung paano gagawin ito, this has to be a collaborative effort. Pag-uusapan namin ng iba't ibang liga," pasabot ni Mascariñas. Ang mga kadagkuan sa tulo ka mga liga nipadayag sa ilang kahinam ning maong kalambuan. (ESL)  This posting includes an audio/video/photo media file: Download Now |
| Baldwin mogiya og balik sa Gilas Posted: 13 Jun 2021 04:15 AM PDT Mobalik isip head coach si American-Kiwi Tab Baldwin alang sa kampanya sa Gilas Pilipinas sa umaabot nga duha ka dagkong mga kompetisyon. Gianunsyo sa Samahang Basketbol ng Pilipinas (SBP) kagahapon, Hunyo 13, 2021 nga si Baldwin maoy mogiya sa Gilas alang sa 3rd window sa 2021 FIBA Asia Cup Qualifiers ug FIBA Olympic Qualifying Tournament. "I have accepted the opportunity and the challenge to be Gilas' head coach at this time. I am honored to continue working with this outstanding coaching staff as we strive to take these next steps forward in the direction we envision for 2023," pamahayag ni Baldwin, kinsa mao sab ang program director sa SBP. Si Baldwin, kinsa usa ka respetadong coach sa international basketball, migiya sa Gilas sa silver-medal finish sa FIBA Asia Championship ug William Jones Cup niadtong 2015. Sa samang tuig, natunolan ni Baldwin og gold medal ang Gilas sa Southeast Asia Games. "I'm hoping that my international coaching experience and familiarity with our playing systems will be an additional asset to the team in the upcoming challenges the team is facing," dugang ni Baldwin. Sa wala pa siya gikuha sa SBP aron mogiya sa Gilas niadtong 2014, si Baldwin nag-coach una sa nagkadaiyang mga nasod sama sa New Zealand, Lebanon, ug Jordan. Si Baldwin maoy ikatulong modala sa Gilas sa Fiba Asia qualifiers sunod nila ni Mark Dickel sa first window ug Jong Uichico sa second window. Masaligon si Baldwin nga ang batan-ong puwersa sa Gilas nga pangulohan nila ni Angelo Kouame, Dwight Ramos, Isaac Go, ug Kai Sotto makahatag og maayong performance. "The players are responding very well to the system and to each other. Bumps along the road are inevitable due to their youth and relative lack of experience, but these could be double-edged swords too," batbat ni Baldwin. "I know that when push comes to shove, these men will not only move forward, but more importantly, they will rise up because of the energy, athleticism, and determination granted to them by their youth." Sa 3rd window, ang Gilas makigbatok sa South Korea karong Hunyo 16 ug 20, 2021 sa Clark, Pampanga ug batok sa Indonesia karong Hunyo 19, 2021. Nagkinahanglan lang og usa ka daog ang Gilas aron makaabante. (ESL)  This posting includes an audio/video/photo media file: Download Now |
| You are subscribed to email updates from https://www.sunstar.com.ph/. To stop receiving these emails, you may unsubscribe now. | Email delivery powered by Google |
| Google, 1600 Amphitheatre Parkway, Mountain View, CA 94043, United States | |
No comments:
Post a Comment