https://www.sunstar.com.ph/ |
- Leonard, George nagkumboya; Clippers milampornas sa Jazz sa Game Four
- Young, Hawks midagit sa Sixers sa Game Four; series tabla na, 2-2
- Espinoza: Baha na sad!
- 2 sa mga Durugista anting-antingan?
- Duterte mimando pagsunod sa IATF protocol
- 300 ka mga balay maigo sa expressway; Mingla wa konsultaha sa DPWH?
- Ormoc City ubos na sab sa GCQ tungod nagsakang mga kaso sa Covid-19
- EOC morekomendar og No sa swab sa nag 2nd dose nga mga biyahidor
- Magsuong wanted sa Sugbo nadakpan
- Comelec mogamit og app sa registration
- Lawas sa gidagsa gi-claim sa iyang kabanay sa Negros
- Gikan sa Bohol, Negros rekisitos na ang negative RT-PCR result
- Martin: Wa gihapoy ayo ang mga show
- Barangay road gisemento sa SEDC
- Ford Talisay branch, abli na
- Sotto, Kouame mangulo sa Gilas 15-man lineup
- Hot and Spicy vs. monster
- Rigondeaux ma-knockout ni Casimero -- Ancajas
| Leonard, George nagkumboya; Clippers milampornas sa Jazz sa Game Four Posted: 14 Jun 2021 11:05 PM PDT Nagkumboya si Kawhi Leonard ug Paul George og 62 puntos (31 matag usa kanila) aron pangulohan ang Los Angeles Clippers ngadto sa 118-104 nga dominasyon batok sa Utah Jazz aron tablahon ang series, 2-2, sa Game Four sa Western Conference semifinals. Ang Clippers sayo kaayong miarangkada nga gani miposte gilayon kini og 30-44 nga labaw sa first quarter ug yano nga mipabukad niini ngadto sa 69-43 nga bintaha sa pagsira sa halftime. Gikan niini, ang pagpahak lang sa labaw ngadto sa 10 puntos maoy pinakaduol nga nahimo sa Jazz human nanginit si Donovan Mitchell kinsa mitali og 37 puntos nga may unom ka tres. Apan sa panaghugpong og balik sa Clippers mitidlom ang paglaom sa Utah kinsa nakakuha og tag 12 puntos gikan ni Jordan Clarkson ug Bogan Bogdanovic. Gawas sa ilang puntos, si George aduna usay upat ka tres ug siyam ka rebounds samtang si Leonard nakapabuto usab og tulo gikan sa three-point area ug may pito ka rebounds. Mitimang sa opensa sa Clippers si Marcus Morris nga may 24 puntos. Ang Game 5 motapon og balik sa luna sa Utah karong Miyerkules (Huwebes sa Pilipinas). Mikawat sa atensiyon sa kadaugan mao ang dunk ni Leonard sa second quarter atubangan sa hugot nga depensa sa Jazz. Human makuha niya ang bola sa may three-point line, iyang gilabyan si Royce O'Neal nga nagbarog haduol sa lane ug milupad kini nga mihansak atubangan ni Derrick Favors nga maoy naghatag og 62-38 nga labaw sa Clippers, 1:24 ang nahabilin sa second quarter. Sa 11 ka duwa sa playoffs, si Leonard ug George pulos adunay 20 puntos o kapin matag duwa. Sa kasaysayan, sila maoy ikatulo nga nakahimo niini ug mao ni unang higayon nga nahitabo sukad sa panahon nilang Shaquille O'Neal ug Kobe Bryant sa Los Angeles Lakers niadtong 2003. Si Jerry West kinsa mitan-aw sa maong duwa, ug si Elgin Baylor maoy unang nakahimo niini niadtong 1962 ubos sa Lakers. (JBM)  This posting includes an audio/video/photo media file: Download Now |
| Young, Hawks midagit sa Sixers sa Game Four; series tabla na, 2-2 Posted: 14 Jun 2021 08:05 PM PDT Kulbahinan nga nakawrasan sa Atlanta Hawks ang and Philadelphia Sixers, 103-100, sa Game Four sa Eastern Conference best-of-seven semis, Martes, Hunyo 15 aron tablahon ang series, 2-2. Hinay man tuod nga nakasugod sa duwa, apan ang Hawks misandig sa ilang sinaligan nga si Trae Young kinsa mitali og 25 puntos, 18 ka assists ug upat ka rebounds aron irehistro ang kadaugan atubangan sa ilang dumadapig. Gawas kang Young, ang laing upat ka starters ang nakakulit usab og double-figure Si Bogdan Bogdanovic mitali og 22, John Collins 14 ug 12 ka rebounds, Clint Capela nga may 12 puntos ug 13 ka rebounds ug 10 puntos usab ang natampo ni Kevin Huerter. Ang Sixers, sa ilang bahin, mipakita unta sa ilang dominasyon sulod sa tulo ka quarters ug sama sa Hawks, naka double figure usab ang ilang mga starters, apan gilupig sila sa mga himatyong segundos nga nahabilin. Ang Game 5 mobalik didto sa territoryo sa Philadelphia karong Miyerkules sa gabii (Huwebes sa buntag sa Pilipinas). Si Joel Embiid mitapos sa duwa nga may 17 ug 21 ka rebounds, ug 20 puntos usab ang natampo ni Tobias Harris alang sa Sixers kansang 18 puntos nga labaw sa kalit lang napapas. Diha pa unta kahigayonan nga maka overtime ang Sixers apan ang tres ni Seth Curry igo lang miuntol sa rim dungan sa pagkapupos sa oras. Si Curry mipakli og 17 puntos sa ilang kapildihan. (JBM)  This posting includes an audio/video/photo media file: Download Now |
| Posted: 14 Jun 2021 09:05 AM PDT MIABOT na ang panahon nga atong gitawag nga Ting-uwan. Sa ato pa, di na kalikayan nga magsige na unya og uwan bisan kon walay dautan nga panahon o bagyo nga moabot. Niadtong Sabado sa buntag (Hunyo 12, 2021), daghan ang dapit sa dakbayan sa Sugbo nga gibahaan tungod sa kalit nga pagbunok, nga mora og wa gani kaabot og usa ka oras. Matud sa taho sa SunStar Cebu, daghan nga mga balay ang nangadaut tungod sa baha nga dala sa kusog nga uwan niadtong Sabado sa buntag. Ang mga barangay sa Malubog, Lorega, Ermita ug Zapatera gibahaan. Milapaw ang tubig sa sapa sa Sitio Pili, Barangay Malubog ug sa sapa sa Tejero, nga miawas ang tubig ngadto sa Gen. Maxilom Ave. Mao ning dapita ang gibahaan niadtong miaging buwan sa ting-init dihang kalit lang nga nagbunok. Kaniadto, atong mahinumduman nga sa mga buwan sa ting-init ang Department of Public Services (DPS) sa Dakbayan sa Sugbo magsige na og panglimpyo sa mga kanal agi'g pangandam tungod kay ig-abot sa buwan sa Hunyo magsige na man og ulan. Apan sa akong mahinumduman, wala ko makakita og mga trabahador sa DPS nga nanglimpyo sa mga kanal sa miaging mga buwan. Akong gipadalhan og mensahe agi'g hangyo si Kon. Jerry Guardo sa iyang pahina sa social media, nga palimpyohan na og balik ang mga kanal tungod kay miabot na ang panahon sa ting-uwan. Ang ako pirmi nga gibalak-an nga og magbunok diri sa among dapit bahaan na sad ang among garahe bisan og gipatas-an na ang entrada nahitabo gyud niadtong Sabado sa buntag. Maayo gani kay mitrabaho pa ang among water pump. Ang problema diri sa among dapit sa Hiway-77, St. Anthony village sa Talamban kon mokusog ang uwan kay di dayon makagawas ang tubig-uwan tungod kay barado ang kanal sa mga hugaw ug matud pa ni Engr. Norman Del Mar kaniadto, nga gamay ra ang kanal sa dayon gawas sa tubig padulong sa sapa. Apan sa ako na nga gisulti kaniadto nagsugod nga dali bahaan diri sa among dapit, bisan og bag-o pa nga gipadak-an ang kanal, dihang gisemento ang sawog sa basketbolan. Wa gihatagan og bili sa engineer sa dakbayan sa Sugbo ang gisugilon sa mga namuyo duol sa basketbolan nga dunay parte sa kanal nga natabunan sa pagsemento sa sawog, nga maoy akong gituhoan nga usa sa mga dako nga hinungdan nga dali molapaw ang tubig-uwan sa dalan ug sa kanal kay dili dayon makalahos og gawas didto sa sapa. Mora og gidepensahan sa Barangay Talamban ug sa dakbayan sa Sugbo ang kontraktor sa pagsemento sa sawog sa basketbolan kay wala man gyud gipabungkag ang semento sa dapit, nga matud pa sa mga saksi, nga natabunan sa pagsemento ang kanal nga nagsubay ilawom sa basketbolan. Maayo unta og mahatagan og dali nga pagtagad ni Konsehal Guardo, kay siya man ang tsirman sa komitiba sa inprastraktura sa dakbayan, ang pagpanglimpyo sa mga kanal sa dakbayan nga napuno na sa hugaw tungod sa way batasan nga mga tawo nga anha ilabay sa kanal ang ilang basura. Daghang salamat daan, Konsehal Guardo!  This posting includes an audio/video/photo media file: Download Now |
| 2 sa mga Durugista anting-antingan? Posted: 14 Jun 2021 06:23 AM PDT Bisan kon natusak na sa mga bala gikan sa mga armas sa mga pulis, padayong nakigpinusilay ang duha sa tulo ka mga durugista nga napatay human sa buy-bust sa mga sakop sa PNP Drug Enforcement Group (PDEG) 7 niadtong gabii sa Hunyo 10, 2021 sa Transcentral Highway (TCH) sa Barangay Taptap, bukirang dapit sa Dakbayan sa Sugbo. Ang duha, sumala sa background checking sa Cebu City Police Office (CCPO), mga sakop diay sa usa ka kulto sa lungsod sa San Fernando, habagatang Sugbo, kinsang mga miyembro giingong kublan, kun di madutlan og bala ug hait nga mga hinagiban. Ang mga sakop niini dunay anting anting nga gitawag og agod-agod. Sila si Christopher Lim, alyas Christopher Aparice ug Boyet Rama, puro mga gun-for-hire ug nasikop na sa kapulisan sa San Fernando kaniadto sa kasong pagpamusil, mga sakop diay niini. Matod sa usa ka operatiba sa PDEG 7 nga usa sa mga gikaengkwentro sa tulo nga nagpadayon sa pagpabuto sila si Rama ug Lim bisan kon daghan na kaayo og mga samad dihang nakigpinusilay kanila ug sa Highway Patrol Group (HPG) 7. Matod ni Police Lieutenant Colonel Wilbert Parilla, deputy city director for operations sa CCPO, nga sa ilang pagkuha sa background sa tulo ka gikatahapang mga durugista, ang duha kanila kuyaw og mga record. "Another information given to us, mga miyembro diay ni sila sad og kulto nga duna silay mga gituohan nga agod-agod, kini si Aparice ug Boyet Rama," matod ni Parilla. Ang agod-agod maoy termino sa gahom-gahom sa karaanan diin mao kini ang mga tawo nga adunay gihuptan nga "Latin" nga yamyamon. Ang tawo nga naa niini magtuo nga dili madotlan ang lawas og bala. Sila si Lim, Rama ug Lihbon Kerr Bargayo nangikyas gikan sa PDEG 7 nga ni buy-bust kanila sa Hunyo 10, 2021 sa Campo 4, Dakbayan sa Talisay. Atol sa buy-bust, ilang gipusil ang poseur-buyer nga naigo sa dughan, apan wa madutli kay naka bullet proof vest nga dunay puthaw. Sa ginukdanay, nasum-ok ang tulo sa TCH sakay sa itom nga Toyota Vios diin didto ang blocking force sa PDEG ug HPG nag checkpoint. Nahitabo ang pinusilay nga nisangko sa kamatayon sa tulo. Unang nakuha sa PDEG 7 ang duha ka kilong shabu sa buy-bust. Sa paghiling sa mga pulis sa awto sa tulo human sa engkwentro, laing walo ka kilo sa gituohang shabu nakuha sa baggage compartment. Ang tanang illegal drugs nagbalor og P68 milyunes. (AYB)  This posting includes an audio/video/photo media file: Download Now |
| Duterte mimando pagsunod sa IATF protocol Posted: 14 Jun 2021 06:21 AM PDT Si Presidente Rodrigo Duterte nakahukom nga ang international arrival protocols nga gitakda sa Inter-Agency Task Force (IATF) for the Management of Emerging Infectious Diseases kinahanglan nga ipatuman sa Sugbo. "The President has decided that the IATF protocols must be implemented by the Cebu Province," matod ni Presidential Spokesperson Harry Roque Jr. sa Lunes, Hunyo 14, 2021, nga nagkutlo sa Office of the Executive Secretary. "The last extension (of the diversion of flights from Mactan-Cebu International Airport to the Ninoy Aquino International Airport) was just in preparation for the full implementation of that decision," dugang ni Roque. Nagkutlo gihapon sa OES, si Roque niingon nga gikonsiderar sa Presidente ang critique sa Department of Health (DOH) sa protocol sa Sugbo ug nakahukom nga Lalawigan sa Sugbo kinahanglan nga motuman sa IATF policy. / MVI sa SunStar Philippines Dihang gipangutana kon unsay buhaton sa Malacañang kon ang Sugbo padayong magmagahi sa pagsunod sa national protocols, matod ni Roque nga siya "not aware of what the DILG (Department of the Interior and Local Government) will do." Nipahibawo ang Malacañang niini mga 36 ka oras human sa OES memorandum nga naglugway sa diversion sa flights gikan sa MCIA ngadto sa NAIA ni-expire na. (MVI sa SunStar Philippines)  This posting includes an audio/video/photo media file: Download Now |
| 300 ka mga balay maigo sa expressway; Mingla wa konsultaha sa DPWH? Posted: 14 Jun 2021 05:25 AM PDT Mopasar og usa ka resolusyon ang Konseho sa Lungsod sa Minglanilla nga maghangyo kang Department of Public Works and Highways (DPWH) Secretary Mark Villar nga tumanon ang pasiunang plano niini sa Metro Cebu Expressway nga sa kabukiran patadlason ang mao nga karsada. Kay kon tumanon ang labing uwahi nga feasibility study nga gihimo sa DPWH nga nag-usab sa rota, 200-300 ka mga balay ang mangaapektuhan sa pagtukod sa Metro Cebu Expressway sa lungsod sa Minglanilla. Matod ni Konsehal Rajiv Enad sa lungsod sa Minglanilla sa interbyu niadtong Sabado, Hunyo 12, 2021, nga daghan ang mangaigo nga balay. Sa orihinal nga plano, molagbas ang karsada sa kabukiran sa Minglanilla busa gamay ra ang maigo. Apan sa labing uwahi nga kalamboan, motadlas na kini sa mga Barangay Tunhaan, Cadulawan, Tubod, Cuanos ug Linao. Daghang mga balay na hinuon ang mangaigo. Gibutyag ni Enad nga nahuman na ang feasibility study sa DPWH alang sa pag sugod sa proyekto, apan nanghinaot gihapon siya nga mahangyo pa ug mahatagan og konsiderasyon ang sugyot. "Ako nagplano ko nga magpasar na lang og resolution mo try lang ta basin pa diay mosugot angh Secretary sa DPWH nga mabalhin ang rota. If dili man gani kay na finalize na man ni nila, ila naman ning nasabotan, makig meeting gihapon ta sa DPWH aron matabangan nato pag facilitate ang mga tawo nga maigo nga mabayran silag tarong sa ilang yuta ug balay," matod ni Enad. Ang proyekto adunay tulo ka bahin. Ang unang segment magsugod sa Naga-Minglanilla nga boundary. Kini mopaingon sa Mandaue City. Sa ikaduhang segment, Mandaue City-Consolacion boundary paingon na sab sa Danao City. Samtang ang ika-tulo mao ang Minglanilla-Talisay City boundary padung sa Naga City. Subay sa uwahing feasibility study sa buhatan, moabot sa P28.18 bilyones ang pundo nga gikinahanglan alang sa maong proyekto. Naglakip na diha ang bayad alang sa road-right-of way (RROW) acquisition ug civil works alang sa tulo ka segments. / "We were dissapointed no kay when we knew kon asa moagi pag sugod...kay daghan na og residents nga nireklamo. So we were shocked nga adto diay iagi kay wala may public hearing nga among nahibaw-an. So, kami nay nipatawag nila ako personally nipatawag ko sa legal team," matod ni Enad.  This posting includes an audio/video/photo media file: Download Now |
| Ormoc City ubos na sab sa GCQ tungod nagsakang mga kaso sa Covid-19 Posted: 14 Jun 2021 05:24 AM PDT Gianunsyo ni Ormoc City Mayor Richard Gomez nga gipaubos na sab og balik sa mas estrikto nga community quarantine classification nga general community quarantine (GCQ) ang dakbayan. Ang pag-anunsyo gihimo atol sa meeting sa Ormoc City Covid-19 Task Force, Lunes, Hunyo 14, 2021. Base sa gikasabotan sa task force, ang si bisan kinsa nga gikan sa laing lugar nga moabot sa pier ug airport sa Ormoc, dapat makapakita og negative swabtest, rapid antigen or saliva test result. Dapat adto kini kuhaon kon diin sila gikan ug dapat 72 oras ang effectivity niini. Matod sa city health, mas ubos og presyo ang rapid antigen nga naa lang sa P1,000. Pwede ra ang gatherings sa mga establisemento ug venues, apan kinahanglan 30 porsiyento lang sa seating capacity ang gamiton ug dapat kadto lang dunay permit gikan sa Business Permit and Licensing Office. Ang mga pribado nga establismento nga dunay pool ug ubang water recreational activities dapat 30 porsiyento lang sa total capacity ang makagamit. Sirado sab ang karaoke bars, clubs, concert halls, mga perya, kids amusements sama sa playground, playroom ug kiddie rides. Sirado usab ang mga sabongan gawas lang kon gamiton sa E-sabong ug kinahanglan dunay lisensya sa Pagcor. Kon maghikay sa balay, ang kadto lang naa namuyo ang mangaon ug dili pwede mangimbitar sa lain. Apan kon naay bakante nga lugar sa gawas sa balay, dapat 30 porsiyento lang sa capacity ang makagamit. Ang mga bilar, dapat dili mo lapas sa lima ka adlaw ug dapat dili molapas sa 30 porsiyento nga capacity. / JKDP Giuyonan usab sa mga sakop sa task force nga QR code scanning ug temperature checking lang gihapon ang pangayuon sa mga border para sa mga nag-landtrip. Ang mga senior citizen nga fully-vaccinated pwede na makagawas gawas pero dapat naka facemask, face shield ug social distancing gihapon. Sa pagka karon ang Ormoc duna nay 251 ka mga senior citizens nga fully-vaccinated. Gikatakda nga mo pagawas og executive order si Gomez karong adlawa, Hunyo 15, 2021. Niadtong Septiyembre 1-15 2020 gipaubos sa GCQ ang Ormoc City, apan gilibkas ra sa Septiyembre 16. (JKDP)  This posting includes an audio/video/photo media file: Download Now |
| EOC morekomendar og No sa swab sa nag 2nd dose nga mga biyahidor Posted: 14 Jun 2021 05:20 AM PDT Ang Emergency Operations Center (EOC) morekomendar ngadto sa Office of the Mayor nga hatagan og insentibo ang mga pasahero nga gikan gawas sa Sugbo nga nakahuman na sa ilang ikaduhang dose sa bakuna. Si Konsehal Joel Garganera, deputy chief implementer sa Cebu City EOC, niingon nga nagkahiusa ang mga opisyal sa buhatan sa pagduso ngadto sa buhatan sa mayor nga di na ipaubos sa swab o RT-PCR test ang mga pasahero. "As an incentive to fully inoculated passengers, EOC will be endorsing to the Mayor re: Cebu City inbound passengers to be exempted from PCR test and other medical requirements if the said passengers are fully inoculated," padayag ni Garganera. Apan domestic ra nga mga pasahero nga makapahimulos, way labot ang gikan gawas sa nasod kon maaprobahan sa mayor. Si Acting Mayor Michael Rama niingon nga ila pa kining hisgotan kon mohaom ba usab sa polisiya sa ubang local governments labi na sa Lalawigan sa Sugbo. "We will sit down with that.We have to look at it that we are one island of Cebu. We cannot have a new one, then the rest is different," paghulagway ni Rama. / PAC Si Gobernador Gwendolyn Garcia niluwat og mga executive order sa miaging semana nga nag-require og RT-PCR test results sa mga lumolupyo nga gikan sa Bohol ug Negros Oriental. Base sa rekomendasyon sa EOC, ang kadtong mga Pilipino nga nakumpleto na sa ilang bakuna ug nagpuyo sa gawas sa Sugbo ug gustong moanhi sa dakbayan, i-exempt sila basta lapas na sa duha ka semana human sila gi-tirahan sa second dose. " This is also our way of incentivizing our Cebu City (inbound) travelers. This will also apply to our airport and seaport passengers," dugang ni Garganera. Ang deputy chief implementer sa EOC nagkanayon nga mahimong dinhi sa nasod o sa abroad nabakunahan ang nahisgotang mga Pinoy sa higayon nga maaprobahan na kini sa mayor. (PAC)  This posting includes an audio/video/photo media file: Download Now |
| Magsuong wanted sa Sugbo nadakpan Posted: 14 Jun 2021 05:19 AM PDT Nasikop sa Criminal Investigation and Detection Group (CIDG) 7 ug Regional Intelligence Unit (RIU) 7 ang managsuong naa sa top 5 most wanted persons sa lungsod sa Dalaguete. Ang mga nadakpan pinasikad sa warrant of arrest ni Judge Noel Darren Damian sa RTC branch 26 sa lungsod sa Argao sa kasong robbery with intimidation mao silang Domingo Lachica Asenjo, 45, taga Sitio Bato, Barangay Ermita ug Damasino 43, ug taga sitio ISKP Sambag 2, sa dakbayan sa Sugbo. Matod ni Police Colonel Ireneo Dalogdog, hepe sa CIDG 7, nga nakadawat silag tawag sa kapulisan sa siyudad sa Sugbo nga nasigpatan ang magsuon sa ilang panimay hinungdan nga ilang giadto ug gi-serve ang warrant of arrest. Si Domingo naa number 4 most wanted person station level ug ang manghod niini nga si Damasino naa sa number 3 nga pinangita sa balaod. Dugang niya nga daghan pang i-serve nga warrants sa mga mosunod nga adlaw isip kabahin sa Oplan Pagtugis sa CIDG. (AYB)  This posting includes an audio/video/photo media file: Download Now |
| Comelec mogamit og app sa registration Posted: 14 Jun 2021 05:17 AM PDT Dili na unya lisod alang sa mga buot nga mo-apply ug moparehistro sa Commission on Election (Comelec) tungod sa ilusad niini nga Comelec app nga mahimong magamit alang sa mas sayon nga pagproseso. Kini maoy gipahibalo ni Atty. Lionel Castillano ang Comelec Officer sa Probinsya sa Sugbo. Matod ni Castillano nga malangay pa hinuon kini pagpatuman ngadto na sa Hulyo 1 tungod sa kasamtangang restrictions nga gipatuman gumikan sa coronavirus disease 2019 (Covid-19). Nagtuo si Castillano nga sa bag-ong paagi, maminosan usab ang posibilidad sa pagtakod sa kagaw tungod mahimo lang nga magpa-schedule og adlaw kon kanus-a buot modangop sa Comelec offices alang sa pagparehistro sa biometrics. "Kaning mobile app is one way nga mapaspas ang pagrehistro. Once you downloaded the app pwede na nga didto na mo-fill-up sa imong application for voters registration," matod ni Castillano sa Hunyo 14. "Less contact ba ang purpose namo di nata mag dugay sa among opisina unya tabang sad na nato panahon nga pandemic," dason niya. Bisan paman sa bag-ong paagi, gipahibalo ni Castillano nga modawat gihapon ang Comelec og walk-in alang sa mga wala gyuy laing paagi nga makaparehistro. Gawas nga bukas kini matag Lunes hangtod Biyernes, may satellite registration na usab nga gibuksan sa mga barangay nga wala nay mga kaso sa Covid-19. Subsay sa uwahing datos sa Comelec ubos sa daily registration output, adunay 196,934 ang nakaparehistro sukad Septiyenbre 2020 hangtod sa Hunyo 12, 2021. Nanghinaot si Castillano nga sa maong paagi, mas modaghan ang moparehistro ilabi na sa mas gipasayon nga paagi sa buhatan. (ANV)  This posting includes an audio/video/photo media file: Download Now |
| Lawas sa gidagsa gi-claim sa iyang kabanay sa Negros Posted: 14 Jun 2021 05:17 AM PDT Na-claim na sa iyang kabanay ang lawas sa patay nga lalake nga napalgan niadtong Domiggo, Hunyo 13, sa alas 4:00 sa hapon sa baynayon sa Pescador Island, lungsod sa Moalboal. Si Paul James Yuson Abordo, 37, minyo, ug taga Brgy. Lamogong, lungsod sa Manhuyong, Negros Oriental, gi-claim sa iyang kabanay alas 11:00 sa buntag sa Lunes, Hunyo 14. Si Police Staff Sgt. Alfredo Rosal sa Moalboal Police Station nga nahinabi sa Superbalita Cebu nagkanayon nga usa ka Mary Joy Yuson, ig-agaw sa biktima mao ang ni-claim sa namatay. Gibutyag niini nga niadtong Biyernes, Hunyo 11, nahanaw si Abordo human nagkuha sa iyang kabaw, mipugos sa paglabang sa sapa bisan kusog ang uwan ug baha. Ang kapulisan sa Moalboal nakig-alayon sa kapulisan sa Negros kabahin sa tawo nga napalgan. Nasuta nga dunay na missing dihang gisusi sa kabanay nailhan si Abordo. (GPL)  This posting includes an audio/video/photo media file: Download Now |
| Gikan sa Bohol, Negros rekisitos na ang negative RT-PCR result Posted: 14 Jun 2021 05:13 AM PDT Tungod sa padayon nga pagsaka sa mga kaso sa coronavirus disease 2019 (Covid-19) sa lalawigan sa Bohol, Negros Oriental ug Negros Oriental, mangayo na og negative RT-PCR o Rapid Antigen test result sa dili pa kini mobyahe paingon sa Sugbo. Kini maoy nalatid sa bag-ong kamandoan ni Cebu Governor Gwendolyn Garcia nga EO No. 22 "Regulating the Entry of persons into the Province of Cebu who originate from Bohol, Negros Oriental and Negros Occidental." Nahisubay kini sa nahiusahang desisyon sa mga direktor sa Department of Health (DOH), Department of Interior and Local Government (DILG) ug Office of the Presidential Assistant for the Visayas (Opav) nga kinahanglan na ang pagpatuman sa mas hugot nga restrictions sa mga tawo nga gikan sa naasoyng mga dapit. Sa nasayran adunay moabot sa 2,528 na ang aktibong kaso sa coronavirus disease sa lalawigan sa Negros Oriental samtang 1,095 sa lalawigan sa Bohol. Samtang sa kinatibuk-an nga 128 ka mga probinsya ug syudad sa nasud, anaa sa ikaduha nga spot sa may labing aghang kaso ang Negros Oriental samtang ika-28 usab ang Bohol subay sa pagsulbong sa mga kaso niini. Subay niini, gitahasan ang Department of Health (DOH) sa pagpahigayon og Rapid Antigen Test sa tanang ports of origin alang sa tanang mga mobiyahe paingon sa Sugbo. Samtang ang tanang sakop sa Philippine Ports Authority (PPA) ug Philippine Coast Guard (PCG) ang gitahasan sa pagsusi o pag-screen sa mga pasahero. (ANV)  This posting includes an audio/video/photo media file: Download Now |
| Martin: Wa gihapoy ayo ang mga show Posted: 14 Jun 2021 05:07 AM PDT Kon tinuod nga mamalhin na silang kanhi Star Magic heads Johnny Manahan ug Mariole Alberto sa GMA-7 unsa kahay sunod nga mahitabo ani? Siguradong daghang Kapuso stars ang maapektuhan kay siyempre ang prioridad unya nilang Manahan ug Alberto ang ilang mga talent nga nabiyaan nila sa ABS-CBN nga wa say mga regular show karon. Una man diay ganing gikuha sa GMA si Bea Alonzo apan wala lang magkasinabot sa presyo. Karong bag-o si Beauty Gonzalez ang kumpirmadong dunay himuong teleserye sa GMA. Samtang si John Lloyd Cruz bisan dili exclusive pero Kapuso na sad siya. Apan kini tanan temporary ra kay sa higayon nga makabalik ang ABS-CBN siguradong mamalik ra gihapon ni sila tanan sa ilang mother studio. Gihatagan lang una ni sila og kagawasan kay wala pa may prangkisa. Apan usa katuig kapin na ang nakalabay gikan sa pagkawa sa Kapamilya network pero wa man gyud gihapon mo-improve ang mga programa sa ubang TV network uy. Layo pa kaayo sila sa tinuod. Mao kaha tingaling namayrit na lang!? Unsa ba! KONTROBERSYAL Kontrobersiyal karon ang 28-anyos nga Cebuanang aktres nga si Devon Seron tungod sa break-up nila ni Kiko Estrada human sa duha katuig kapin nilang relasyon. Ang giingong third party si Heaven Peralejo nga ex sad sa anak ni Manny Pacquiao. Gi-deny ni Heaven nga siya ang rason sa break-up ni Devon ug Kiko. Apan nigawas karong bag-o ang mga litrato nilang Heaven ug Kiko nga sweet kaayo samtang nagbakasyon sila sa Boracay ug nag-holding hands pa. Hilom ra hinuon si Devon sa isyu apan ang iyang manghod maoy nag-post og mga halang nga mensahe bahin sa maong hitabo. Si Devon nadiskubre dihang nahimo siyang housemate sa 2010 Pinoy Big Brother Teen Clash diin nidaug siyang 4th Big Placer. Mga taga-Jagobiao, Mandaue man kuno ni ilang kaliwat. MIHUGO Grabe diay ang paghugo karon sa aktres nga si Chynna Ortaleza nga gikan sa 109 lbs. nitimbang na lang ni karon og 86 lbs. Ang rason kay gibawalan kuno siya sa iyang doktor nga mokaon og mga acidic nga pagkaon sama sa itlog, mais ug dairy products kay mao kuno ni nakaingon sa pagpunay og panakit sa iyang tiyan ug lisud pagkalibang. Apan ang tanan niyang test normal ra gawas lang sa mga gibawal nga pagkaon. Bitaw, keep safe and healthy lang gyud ta pirme kay lisud kaayong magkasakit karong panahona nga nagkamahal ang tanan.  This posting includes an audio/video/photo media file: Download Now |
| Barangay road gisemento sa SEDC Posted: 14 Jun 2021 05:06 AM PDT Naghiusa ang duha ka mga magkaalyadong kompaniya aron masemento ang 200 metros nga nabiling bahin sa barangay road sa San Fernando padulong sa Tonggo Integrated Public School. Giabagan sa Solid Earth Development Corp. (SEDC) ug Taiheiyo Cement Philippines Inc. (TCPI) ang proyekto sa lokal nga kagamhanan nga kabahin sa ilang pagsuporta sa local infrastructure program. Misangkap ang SEDC og mga bas ug graba, ingon man sa gisuhol sa mga mitrabaho samtang mihatag ang TCPI og 500 ka mga sako sa semento alang sa unang bahin sa proyekto sa miaging tuig nga milangkob sa 100 metros, matod ni Zeny L. Tapuyao, community relations coordinator sa SEDC. Mipadayon ang ikaduhang bahin karong tuiga uban sa susamang gitampo sa duha ka mga kompanya, dason niya. Tigminahan ang SEDC og anapog sa bukirang bahin sa Tonggo nga gigamit sa TCPI sa paggama og upat ka klase sa tatak Grand nga mga produktong semento. "Kung naa'y mga kompaniya nga pareho sa Solid Earth nga naghatag ug bili sa mga komunidad palibot sa ilang quarry, dako kaayo og panalangin para sa amoa ug kami mapasalamaton kaayo," mipahayag si Virgilio P. Siarot, barangay kapitan sa Tonggo. Gisusi ni Siarot ning bag-o ang kalamboan sa proyekto uban ni Irenea Villamero, usa ka lumolupyo sa maong dapit, ug nila ni Gines T. Boltron, community relations officer sa SEDC, ug Tapuyao. / Tampo  This posting includes an audio/video/photo media file: Download Now |
| Posted: 14 Jun 2021 05:05 AM PDT Ang Ford Talisay, ika-50 nga dealership facility sa Ford Philippines, abli na. Ang Ford Talisay ubos sa pagdumala sa Fairlane Automotive Ventures Inc. (Favi), gipaabot nga mopalapad sa Ford brand sa habagatan sa Sugbo. Ang Ford Talisay dunay total floor area nga 1,397 square meters ug makapahiluna og 7-car showroom display ug 11 service bays alang sa future expansion. "Opening our 50th dealership facility in the country is a special milestone for Ford Philippines and for our growing customer base in Cebu," matod ni Michael Breen, Ford Philippines managing director. "We thank our partners from Ford Philippines for their support and collaboration in seeing the construction of Ford Talisay," matod ni Favi general manager Andre Borromeo. (PR)  This posting includes an audio/video/photo media file: Download Now |
| Sotto, Kouame mangulo sa Gilas 15-man lineup Posted: 14 Jun 2021 05:05 AM PDT Pangulohan sa batan-ong Pinoy nga higante nga si 7'3' Kai Sotto ug naturalized player 6'10" Ange Kouame ang 15-man Gilas Pilipinas pool nga mokombati sa 3rd window sa 2021 Fiba Asia Cup qualifiers nga ipahigayon karong semanaha pinaagi sa bubble set-up sa Clark, Pampanga. Naa sab sa Gilas pool sila si Dwight Ramos, Justine Baltazar, Javi Gomez de Liano ug ang Philippine Basketball Association (PBA) draftees nga sila si Isaac Go, Mike Nieto, Jordan Heading, William Navarro, ug Jaydee Tungcab. Mokompleto sa batan-ong puwersa sa Gilas mao sila si Carl Tamayo, Lebron Lopez, RJ Abarrientos, SJ Belangel, ug Geo Chiu. Ang team captain sa Gilas nga si Rey Suerte, kinsa produkto sa University of the Visayas (UV) Green Lancers, wala naapil sa team gumikan kay naangol kini atol sa ensayo. Dili ikalimod nga kuwang og kasinatian ang batan-ong puwersa sa Gilas apan masaligon ang Samahang Basketbol ng Pilipinas (SBP) nga makapakita kini og maayong performance sa kompetisyon. "We're ready to compete obviously, and the goal has always been an opportunity to win. It really is our specific goal. We've been working out for the past nine weeks, the coaching staff and our players in the Inspire bubble," matod ni SBP special assistant to the president Ryan Gregorio Gregorio nga napatik sa www.gmanews.tv. "But we have to understand that this is a developmental team, it's a very young team. We're hoping that we can get the necessary experience at a very high level." Ang Gilas, nga adunay 3-0 nga rekord gikan sa 1st ug 2nd windows, adunay tulo ka mga tahas nga sagubangon sa katapusang tipik sa kompetisyon. Ikaharong sa Gilas ang South Korea karong Hunyo 16 ug Hunyo 20, 2021 ug ang Indonesia karong Hunyo 18, 2021. Nagkinahanglang lang ang Gilas og usa ka daog aron makaabante sa 2021 Fiba Asia Cup nga ipahigayon sa Indonesia karong Agusto ning tuiga. (ESL)  This posting includes an audio/video/photo media file: Download Now |
| Posted: 14 Jun 2021 05:04 AM PDT Sa dili pa sila si Nonito Donaire ug Johnriel Casimero, laing Pinoy nga si Michael Dasmariñas maoy unang mosuway paglumpag sa gingharian sa gitawag og "Monster" nga si Japanese Naoya Inoue. Si Dasmariñas, kinsa gitawag og "Hot and Spicy", mosuway pag-ilog sa World Boxing Association (WBA) ug International Boxing Federation (IBF) bantamweight titles gikan kang Inoue karong Hunyo 20, 2021 (RP time) sa Las Vegas, Nevada. Ning awaya, grabe ka inilog si Inoue apan determinado si Dasmariñas nga mokulit og surpresang kadaugan nga seguradong maoy mag-agak kaniya ngadto sa taas nga andana sa kalibutan sa boksing. Sa sayo pa, mibahad si Inoue nga iyang palukapahon sa sayong rounds si Dasmariñas sama sa iyang gibuhat sa lima sa katapusan niyang unom ka miaging mga kontra. Sa miaging unom ka mga kontra ni Inoue, bugtong si Donaire lang ang wala niya napatumba sa ilang away niadtong 2019 diin midaog si Inoue pinaagi sa unanimous decision. Sa miaging tuig, nakatakda untang mag-away sila si Inoue ug Casimero sa usa ka unification bout apan dihang nauswag kini gumikan sa COVID-19, nakadesisyon si Inoue nga dili na lang modayon sa away. Alang kang Casimero, kinsa maoy World Boxing Organization (WBO) bantamweight champion, nahadlok si Inoue kaniya. Sila si Donaire ug Casimero pulos mihagit kang Inoue apan kinahanglan pa nilang maghuwat og taastaas nga panahon ug sa resulta sa away nila ni Inoue ug Dasmariñas. Si Inoue naggunit og 20-0, 17KOs nga rekord samtang si Dasmariñas naghupot og 30-2-1, 20KOs nga baraha. Kon modaog si Dasmariñas batok kang Inoue, dako ang posibilidad nga magparang ang parehong Pinoy sa usa ka unification bout. Si Donaire, kinsa bag-uhay lang mibulsa sa World Boxing Council (WBC) bantamweight title, nagtinguha nga haruson pag-angkon ang tanang mayorihiyang mga titulo sa iyang timbang. (ESL)  This posting includes an audio/video/photo media file: Download Now |
| Rigondeaux ma-knockout ni Casimero -- Ancajas Posted: 14 Jun 2021 04:57 AM PDT Nagtuo si Filipino world champion Jerwin Ancajas nga ma-knockout sa iyang kababayan nga si Johnriel Casimero si Cuban Guillermo Rigondeaux sa ilang world bantamweight title fight karong Agusto 14, 2021 sa Dignity Health Sports Park sa Carson, USA. Si Ancajas, kinsa maoy tag-iya sa International Boxing Federation (IBF) super flyweight title, mipasabot nga dili na sama kaabtik si Rigondeaux kumpara kaniadto gumikan sa pangidaron niini nga 40. Sa interbyu sa GMA News.TV, nagtuo si Ancajas nga sa usa lang ka kumo ni Casimero hayan ma-knockout na si Rigondeaux. Si Casimero, 32, mi-knockout sa tanan niyang miaging unom ka mga kontra. Naghupot si Rigondeaux og 20-1, 13KOs nga rekord samtang si Casimero adunay 30-4, 21KOs nga baraha. (ESL)  This posting includes an audio/video/photo media file: Download Now |
| You are subscribed to email updates from https://www.sunstar.com.ph/. To stop receiving these emails, you may unsubscribe now. | Email delivery powered by Google |
| Google, 1600 Amphitheatre Parkway, Mountain View, CA 94043, United States | |
No comments:
Post a Comment