https://www.sunstar.com.ph/ |
- Koreano nga sakop sa Mafia nasikop sa CIDG 7
- Mag-uuma gianod sa baha atol sa bagyong Dante, patay
- 114 nadakpan sa CCPO sa Mayo 31
- Landslides, baha miigo sa Sugbo atol sa bagyo
- Editoryal: Sulbaron sa hingpit
- Nalzaro: Pabakuna namo; humana ko
- Barrita: Balaudnon sa pag-abolish sa pista
- Tambagi ko Noy Kulas: Love si Padre
- CCCI misuporta sa modernisasyon sa Carbon
- Unsa kadaghan ang uwan nga dala ni ‘Dante?’
- Leisure travel ban sa NCR gilibkas, gihangop ni Chan
- Mga prosesyon higpit nga gidili
- 5 guilty sa kasong attempted abortion
| Koreano nga sakop sa Mafia nasikop sa CIDG 7 Posted: 03 Jun 2021 12:42 AM PDT Korean national nga sakop sa Mafia sa South Korea nga nag-atubang og kasong pagpangilad sa ilang nasud nadakpan sa Miyerkules sa alas 5 sa hapon, Hunyo 2, 2021 sa Criminal Investigation and Detection Group (CIDG) 7 sa usa ka mall sa Barangay Apas, Siyudad sa Sugbo. Ang nadakpan giila nga si Kim Byunggon, 43, kasamtangan nga nagpuyo sa Caryx West sa dakbayan sa Sugbo. Ang pagsikop gipasikad sa warrant of arrest nga giluwatan sa korte sa South Korea. Matod ni Police Colonel Ireneo Dalogdog, regional chief sa CIDG-7, nga ang ilang buhatan sa dakbayan sa Lapu-lapu nakadawat og komunikasyon sa Bureau of Immigration (BI) 7 pinaagi usab sa Korean National Police labot sa presensya sa most wanted person sa South Korea. Dali nga niresponde ang mga sakop sa CIDG Lapu-lapu field unit nga gipangulohan ni Police Major Lirio Coral uban sa BID 7 ug Korean police ug ilang nadakpan si Byunggon. Giingong nakailad og mga Koreano ang akusado sa ilang nasud ug nadala ang 200 million won kun P10 million. Sa Huwebes, Hunyo 3, siya gidala na sa BID sa kaulohan aron ipa-deport na sa South Korea. (AYB)  This posting includes an audio/video/photo media file: Download Now |
| Mag-uuma gianod sa baha atol sa bagyong Dante, patay Posted: 02 Jun 2021 05:03 PM PDT Usa ka kinabuhi ang nakalas sa pagkuso-kuso sa bagyong Dante sa Sugbo sa sayo sa Miyerkules sa buntag, Hunyo 2, 2021 sa Barangay Tubod-Dugoan, lungsod sa Dumanjug, Sugbo. Ang biktima giila ni Police Master Sargeant Nelson Mendaros nga si Joel Maravillas, 51, minyo, nagpuyo sa dapit. Matod ni Mendaros nga mga alas 3:30 sa kaadlawon, gikuha ni Maravillas ang iyang kabaw nga naglunang sa sapa taliwa sa padayong pagbunok sa uwan ug baha sa sapa. Gituohan nga tungod sa kakusog sa bul-og sa tubig, gidala sa sulog si Maravillas. Niana nang buntag sa Miyerkules nila napalgang patay si Maravillas pipila ka metros ang gilay-on gikan sa gipalunangan niya sa kabaw. Buhi nga napalgan ang kabaw sa mga kabanay ni Maravillas. Nabalaka na ang iyang pamilya nga na siya mauli human nilakaw nianang kaadlawon, busa ilang gisusi sa sapa. Matod ni Mendaros nga mga alas 3 na sa hapon sa Miyerkules na-report sa pamilya ni Maravillas ang trahedya. Gihaya na ang biktima sa ilang pag-abot sa balay niini. Ang bagyong Dante nagdala og uwan sugod sa Martes sa buntag, Hunyo 1, hangtod sa Miyerkules sa buntag, Hunyo 2 nga nisangko sa pagsuyla sa pipila ka mga sapa. Gilibkas ang tropical storm signal sa tanang dapit sa Sugbo sa alas 11 sa buntag sa Miyerkules.(GPL)  This posting includes an audio/video/photo media file: Download Now |
| 114 nadakpan sa CCPO sa Mayo 31 Posted: 02 Jun 2021 06:25 AM PDT Kapin sa 100 nadakpan sa kapulisan sa Siyudad sa Sugbo atol sa usa ka adlaw nga Simultaneous Anti Criminality Law Enforcement Operations (Sacleo) 34 drug personalities. Moabot ngadto sa 114 ka mga tawo, nga naglakip sa drug personalities ug most wanted persons sa Siyudad sa Sugbo, nasikop sa operasyon niadtong Mayo 31. Ang kapulisan lukop nasud gimandoan ni Police General Guillermo Eleazar paghingusog sa kampanya batok kriminalidad nunot sa nagsingabot nga eleksyon sa sunod tuig Sa talaan nga gibutyag ni Police Lieutenant Colonel Wilbert Parilla, deputy city director for operations sa Cebu City Police Office (CCPO), sila nakalusad og 32 ka anti illegal drug operations, 34 ka drug personalities ang ilang napusasan, siyam kanila high value individual. Nakadakop usab sila og 25 ka most wanted persons nga adunay nagkalainlaing mga kaso nga giatubang sa 27 ka warrants of arrest nga ilang gi serve. Ang 14 nga nasikop naghupot og loose firearms. Giangkon ni Parilla nga ubos ang accomplishment sa kapulisan sa Siyudad sa Sugbo sa ilang kampanya batok sa wanted persons nga padayon pang gawasnon. Tungod niini, gipanghatagan ni Police Colonel Josefino Ligan ang tanang station commanders og mga kopya sa pending warrants of arrest, kansang mga akusado wa pa makuha. Ipatawag usab niya ang warrant servers sa CCPO aron ma account ang tanang mga kopya nga giisyu sa korte karong tuiga nga maoy ilang paningkamotan nga madakpan. "So far, naa tay daghan gyud nga pending warrants of arrest. Gani naa na tay himuon nga meeting sa tanang warrant servers karong Friday just to account sa tanang warrants of arrest nga nadawat karon nga tuig," matod ni Parilla. Samtang moabot usab sa 12 ka most wanted persons sa Central Visayas ang nasikop sa Criminal Investigation and Detection Group (CIDG) 7 atol usab sa usa ka semana nilang operation. Matod ni Police Colonel Ireneo Dalogdog, regional chief sa CIDG 7, nga gawas sa mga gipangita sa balaod, ang ilang nadakpan nakasakmit usab og 14 ka mga armas nga way lisensya.  This posting includes an audio/video/photo media file: Download Now |
| Landslides, baha miigo sa Sugbo atol sa bagyo Posted: 02 Jun 2021 06:22 AM PDT Mga baha ug landslides nasinati sa Sugbo sa pagkusokuso sa bagyong Dante sa Martes, Hunyo 1 hangtod sa sayo sa kaadlawon sa Hunyo 2, apan way naangol ug namatay. Ang aktibong lihok sa mga disaster personnel maoy gitumbok nga nalikayan ang dautang mga epekto sa katalagman. Sa Miyerkules sa alas 11 sa buntag, gilibkas na ang tropical storm signal sa Sugbo busa gipaabot nga maayo ang panahon sa Huwebes, Hunyo 3, 2021. GIANOD Sa Lungsod sa Tudela sa isla sa Camotes, gipahibawo sa kagamhanan sa lungsod nga unom ka mga mananagat gi-rescue sa local disaster responders human nisungasong ang lima ka mga mananagat sa pagpalawod bisan sa kamandoan sa Philippine Coast Guard (PCG) nga way gitugotan nga molawig tungod sa di maayong kahimtang sa panahon. Sa official social media page ni Tudela Mayor Greman Solante, iyang gisaysay nga nagsugod og lawig ang mga mananagat sa kadagatan sa Dakbayan sa Danao, Hunyo 1 alas 5:00 sa buntag. Iya kining giila nga sila si Arturo Nipaya; Jenny Agbay, 18; Ardie Dumdom, 29; Jay Michael Agbay, 26; Nestor Marcado, 26; ug Petronilo de Gracia, 25, pulos taga Brgy. Baliwagan, Lungsod sa Balamban. Napulo ka oras nga nagpalutaw-lutaw sa kadagatan ang mga mananagat human nipalyar ang makina sa ilang pumpboat. Matod ni Solante nga sa maong higayon, kusog ang hapak sa bawod hinungdan nga naanod ang mga manangat sa baybayon sa Tudela. Gawas sa maong hitabo, naglisod usab og agi ang mga sakyanan sa mga major road sa Metro Cebu tungod sa sagunson nga pag-uwan ug pagbaha sa kadalanan Hunyo 1 sa hapon hangtod na sa gabii. Subay sa pakighinabi sa mga tigbalita, gipahibaw usab sa disaster and rescue unit sa Lungsod sa Consolacion nga nisuyla ang sapa tungod sa kusog nga uwan. Gibahaan ang mga silingang barangay niini sama sa Cansaga, Latasan, Pitogo-Laray ug Jugan-Laray. "Taga hawak gyud ang baha. Nikusog ni siya gabii mga 7:00 pm unya ni subside na siya after 12:00 midnight. Wala ra hinuoy na affected nga houses," matod ni Danilo Capangpangan, pangu sa Disaster Risk Reduction and Management Office (DRRMO) sa Consolacion. Sa Dakbayan sa Sugbo, pipila usab ka dan gibahaan hinungdan nga naglisod og agi ang mga sakyanan. Kini naglakip sa mga dalan sa P. Del Rosario, Sikatuna, Mambaling Flyover, Bayanihan sa Quiot Pardo, Kinasang0an, Nasipit sa Talamban, pipila ka bahin sa Lorega San Miguel, ug Ayala Access Road sa Brgy. Hipodromo. Nasinati usab ang pag baha sa Barangay Tipolo, dakbayan sa Mandaue ingon man sa barangay Bulacao sa may border sa dakbayan sa Talisay ug Sugbo. (ANV)  This posting includes an audio/video/photo media file: Download Now |
| Editoryal: Sulbaron sa hingpit Posted: 02 Jun 2021 06:20 AM PDT Grabe kaayo ang uwan nga dala sa bagyong Dante dinhi sa Sugbo bisan tuod kon wa kaayoy hangin. Nimugna kini og grabeng baha ug duna say mga landslide. Apan bisan pa niini, nalikayan ang pagkakalas sa kinabuhi sa mga Sugboanon. Nahitabo kini tungod sa mga disaster preparedness sa kagamhanan nga niabot ngadto sa katapusang sityo sa matag barangay. Naa dayon ang preemptive nga pagpamakwit sa mga tawo sa mga dapit nga dali bahaon ug maigo sa landslide. Kon wa pa ang mga disaster personnel sa matag barangay gibansay, maglisod ang mga local government unit (LGU). Sa Dakbayan sa Sugbo, gipahimutang usab ang mga heavy equipment aron dali rang makatubag sa mga emerhensya panahon sa ting-uwan ug bagyo. Bisan ang mga ambulansya ug rescue personnel gibutang sa strategic areas. Apan ang mga landslide ug baha kaniadto di ingon niani kagrabe karon. Naa man tuod, apan gamay ra. Ang kahadlukan sa mga tawo kaniadto mao ang kusog nga hangin. Apan karon, hasta ang tubig ug yuta apil na sa gikabalak-an. Di lang global warming ang hinungdan ning nagkagrabe nga mga epekto sa bagyo. Apil na niini ang pagsulbong sa populasyon nga nakaingon sa pagkaupaw sa kabukiran. Baha ug landslides ang resulta. Tinuod, ang kalikupan magdala og katalagman. Apan ang binuhatan sa tawo, sama sa deforestation, land development nga nakaguba sa kabukiran, pagpatakag labay sa basura ug paspas nga urbanization maoy nakapagrabe sa epekto. Kon tutokan lang unta og tinud-anay sa kagamhanan, di lang ang pagpugong sa grabeng epekto, kon di ang pagpangitag hingpit nga kasulbaran sama sa paghaw-as sa mga tawo gikan sa mga dapit nga bahaanan ug maigo sa landslide ug ibalhin sila sa permanente ug luwas nga dapit, di na unta magbalikbalik sa pagpabakwit kada dunay bagyo ug grabeng uwan.  This posting includes an audio/video/photo media file: Download Now |
| Nalzaro: Pabakuna namo; humana ko Posted: 02 Jun 2021 06:19 AM PDT Niadtong buhi pa akong nanay, matag bakasyon nako sa akong yutang natawhan sa Olingan, Dipolog City, hatagan ko niya og gamay nga botelya nga adunay sulod nga lana nga gikan pa sa Siquijor nga kinalap sa mga mananambal matag Mahal nga Adlaw. Moingon si Nanay Doring nga ipahabak (kanang ibugkos sa hawak) ang botelya nga may lana kay pang-kontra sa mga hilo-anan. Nauso man god na sa among lugar kanang pekpek (hilo-anan) nga ipaagi sa pagkaon, imnunon, aso sa sigarilyo o bisan hikapon o pekpikon sa hilo-anan, maglain na imong lawas. Unya ang pang-alkontra sa mga hilo-anan mao nang lana. Inig bukal sa lana, buot ipasabot nga kanang tawo sa duol nimo hilo-anan. Apan dili mo-saler o modulot ang iyang hilo gumikan sa lana. Kon mahilo-an man gani ka, adto ka sa mananambal. Patuoban ka ug pa-imnon og paet kaayo nga kinilkig. Mga panit kini sa dagkong kahoy nga gidugmok nga gihimong tambal. Mao nay tambal sa probensiya nga herbal. Karon nga na-fully vaccinated na ko batok sa Covid 19 gamit ang AstraZeneca, morag akong feeling naa koy habak nga lana batok sa hilo-anan. Kana bang confident nga protected na ko batok sa Covid. Naka-second dose nako niadtong Biyernes, Mayo 28. Sa wala pa ko mabakunahi, anaa ang kanunay ang kahadlok ug kabalaka nga simbako og matakdan kog Covid. Ambot og na-Covid na ba ko niadtong miaging tuig nga aduna koy "dry cough" ug napagaw ko. Pero wala man ko hilanti ato ug wala mawala akong panglasa o taste. Wa man pod ko magpa-swab test kay nahadlok kong ma-positive ug ma-quarantine unya ko. Wala pa ra bay tarong quarantine facilities niadtong higayona. Adto lang ka ibutang sa mga eskuwelahan nga puwerting bahoa. Mi-file lang ko og 15-day leave of absence aron dili ko makatakod sa akong officemates. Nawala ra man pod akong ubo ug pagaw sulod sa pipila ka adlaw. Sa mga nagduha-duha pa diha, pabakuna na mo aron mawala na nang inyong kabalaka nga ma-Covid mo. Wala may side effect sa akong habig bisan kon aduna koy gihambin nga balatian nga high blood ug diabetes. Pero para sigurado, pangayo lang mog clearance sa inyong doktor.  This posting includes an audio/video/photo media file: Download Now |
| Barrita: Balaudnon sa pag-abolish sa pista Posted: 02 Jun 2021 06:19 AM PDT Nilabay na ang Mayo, ang buwan sa mga pista, labi na Bohol. Apan adunay pista hapit kada adlaw sa tibuok tuig sa nagkalain-laing sitio, barangay ug lungsod sa Pilipinas. Ang pista nahimo nang tipik ug kabahin sa kinabuhing Pilipinhon. Gani, usa ka pari niingon ngadto sa iyang mga katagibalangay nga kinahanglan nga magpista sab sila. Ang nahitabo mao nga ang mga tawo sa iyang barangay magsigi lang og pamista sa ubang barangay. Kay wa man silay pista, di intawon makabawos ang ilang gipamistahan. Apan ang di nato makalimtan mao ang napagya nga balaudnon nga giingong gipasaka ni kanhi senador Raul Manglapus aron sa pag-abolish sa pista, balaudnon nga nahimong babag sa iyang mga politikanhong ambisyon. Kay kinsa may gustong mawagtang ang pista? Napatik sa atong panumdoman ang giingong balaudnon ni Manglapus sa pag-abolish sa pista tingali tungod kay gisuwat kini sa duha ka mga inila ug tinamod nga kolumnista, sila si Max Soliven ug Teodoro Benigno, nga nitaliwan na sa laing kinabuhi. Si Soliven, kanhi publisher sa Philippine Star, nisuwat niadtong 1987 nga miproponer og balaudnon si Manglapus nga i-ban ang mga pista. Tungod niini, napildi siya sa eleksyon sa pagkasenador sa 1967. Si Benigno, sa iyang lindog sa Philippine Star sa Marso 21, 1997, nisuwat og susama niini. Ang giingong sugyot ni Manglapus sa pag-ban sa mga pista pareho sa makapahimuot nga mando ni kanhi Presidente Ramon Magsaysay nga i-repeal ang law of supply and demand ug ang balaudnon sa usa ka kongresista nga i-ban ang mga bagyo sa Pilipinas. Ang kang Magsaysay klaro nga pasiaw ug binuang sa iyang mga kaatbang sa politika. Apan si Manglapus mismo nihimakak nga nipasaka siya og balaudnon nga mag-abolish sa pista. Gibawon niya ang kahiubos sa pagbalik-balik niini hangtod sa iyang kamatayon niadtong Hulyo 25, 1999 sa edad nga 80 anyos. Gipaluyohan si Manglapus sa iyang higala nga si Hilarion Henares Jr., sa iyang lindog sa The Philippine Post sa Agusto 7, 1999. Matod ni Henares, ang sugyot ni Manglapus mao nga gamiton ang mga pista alang sa mga ekonomikanhong kalihokan sama sa pagpamuhi og baboy ug itik, pagmugna og credit unions ug scholarship funds. Si Henares miingon nga siya maoy nangulo sa kalihokan nga Fiestas for Progress. Gihimakak usab ni Henares nga mao kini ang hinungdan nga napildi si Manglapus sa eleksyon sa 1967. Matod niya, wa modagan si Manglapus sa maong eleksyon, busa, wa siya mapildi. Si Manglapus gibantog nga usa ka orador. Gikataho nga si kanhi Presidente Manuel Quezon mibisita sa Ateneo University aron maminaw sa iyang diskurso. Natudlo siya nga labing batan-ong kalihim sa kalihokang langyaw sa Pilipinas niadtong 1957 sa edad nga 39 anyos. Gitudlo siya pagbalik sa maong puwesto ubos ni kanhi Presidente Corazon Aquino. Nahimo siyang kontrobersiyal sa iyang gisulti atubangan sa Senado nga nag-imbestigar sa pagpanglugos sa mga Pilipina nga katabang sa Kuwait atol sa Iraqi occupation. Matod niya, "If rape were inevitable, one should relax and enjoy it." (edbarrita@gmail.com)  This posting includes an audio/video/photo media file: Download Now |
| Tambagi ko Noy Kulas: Love si Padre Posted: 02 Jun 2021 06:15 AM PDT Dear Noy Kulas, Tawga ko sa ngan nga Mitzie. Nag-edad ko karon og 38 anyos, naay kapuyo ug duha ka anak. Ang akong problema mao ang akong kanhi uyab nga karon naa na na-assign dinhi sa Cebu. Usa siya ka pari. Nakahibawo ko nga di maayo ang magkita kita mi, apan di namo malikayan. Mao ni ang story sa among lovelife. Sa seminarista pa siya, nagkaila ming duha, nagka close ug nagkauyab. Sa iyang entire seminary life, naa ra ko pirme. Apan pagkahibawo sa iyang family sa among relasyon, nagubot sila. Nangisog ang iyang parents ug gipugos mi sa pagpabuwag kay gusto sila nga magpari ang ilang anak. Naputol gyud ang among communication ug sukad niadtong nahuman sa seminaryo, wa na mi magkita. Naordinahan siya sa pagka pari ug nag mission sa abroad. Few years later nabalik siya sa Pilipinas ug dayon lately, gi assign na siya dinhi sa Cebu. Nagkakita na sab mi. Nagkumustahay ug filling in the years nga wa mi magkauban. We still love each other so much. Moangkon ko, naay nahitabo namo. Gusto siya nga buwagan nako ang akong partner ug mogawas siya sa pagkapari. But lainan ko maghuna huna nga ako ang hinungdan nga mawala siya sa simbahan. Mosugot ba ko, Noy Kulas? Unsay imong tan-aw? MITZIE Mitzie, Lisod kaayong tubagon ang imong pangutana. Hinuon, alang nako, mas maayo nga di mo paundayunan ang imong pagbati kaniya. Naa ka na may pamilyang gitukod uban sa imong kapuyo. Nganong di ka man makigminyo kon wa kay problema kaniya isip partner? Let him serve the Lord. Ikaw, amumaha ang pamilya nga gisugdan mo pagtukod. Pagminyo mo sa imong leave in kon wa kay rason nga balido sa pagbiya kaniya. And pray for guidance and enlightenment sa Ginuo. NOY KULAS rojval69@yahoo.com  This posting includes an audio/video/photo media file: Download Now |
| CCCI misuporta sa modernisasyon sa Carbon Posted: 02 Jun 2021 06:11 AM PDT Ang Cebu Chamber of Commerce and Industry (CCCI) nisuporta sa pagpalambo sa karaang Carbon Public Market ngadto sa pagka-world class nga merkado alang sa hamugaway nga pagserbisyo sa mga konsumidor. Ang CCCI, pinangulohan ni Felix Taguiam, nagkanayon nga di lang ang maanindot nga estruktura ang mohulip sa karaang Carbon, kon dili mabag-o usab ang pasilidad sama sa solid waste and liquid waste water and water management infrastructure nga maoy labing mahinungdanon alang sa luwas nga pagkaon. Gihulagway sa CCCI nga ang pag-moderno sa karaang merkado sa Carbon maghimong sentro sa patigayon ug maoy makadugang sa Sugbo isip economic powerhouse sa nasod. Gawas sa CCCI, ang construction sa New Carbon Public Market nga gastuan og P5.5 bilyones alang sa first phase gipaluyohan usab sa mga pribadong korporasyon, usa niini si magpapatigayon Edward Tan Ting, kinsa maoy pangulo sa tulo ka korporasyon nga nahimutang palibot sa Carbon. Matod ni Ting nga gawas nga mahimong transport hub ang Carbon alang sa mga local ug foreign tourist, sanglit adunay direktang transportasyon gikan sa airport, ang local government unit mokita og sobra sa doble kon itandi sa kasamtangang gi-income sa karaang merkado. Ang presidente ug CEO sa Topline Business Development Corp., Eugene Eric Lim, niingon nga bisan sa nasinati nga pandemya, angay lang nga hatagan og pagtagad kon unsay mahitabo sa umaabot human sa kalisod nga gidala sa Covid-19. Angay nga sugdan ang luwas, limpyo ug komportable nga merkado aron matandi sa mga nanag-unang merkado sa tibuok kalibutan. Si Louie Ferrer, chairman sa Cebu2World Development, Inc. (C2W), subsidiary sa Megawide Construction Corp., ka-joint venture sa Cebu city Government para sa pagpalambo sa 112 ka tuig na nga public market sa Dakbayan sa Sugbo, nalipay sa suporta sa CCCI ug sa laing mga pribadong korporasyon. "We are grateful for the support of pillar organizations such as the Cebu Chamber of Commerce and its member companies. As they are comprised of Cebu's most storied and respected businesses, our ongoing dialogue, which includes insights and questions they have raised, are always geared to ensure Cebu City and its people get the best possible value from the project," padayag ni Ferrer. Base sa joint venture agreement, ang Cebu City Government makadawat og P50 milyones matag tuig isip annual guaranteed payment sa C2W. Kini magtubo og 10% matag lima ka tuig ug laing P20 milyones gikan sa makolektang buhis sa real property ug business tax sa Carbon market. Sobra sa triple ang ma-income sa City Government sa higayon nga mag-operate na ang New Carbon Public Market sanglit base sa kita niadtong 2019, sa wala pa niabot ang pandemya, ang Carbon market nikita lang og P21 milyones sa maong tuig. / PAC Sugdan karong buwana ang pag-renovate sa Unit-II sa Carbon Market para maoy balhinan sa gatusan ka vendors sa Warwick Barracks ug Freedom Park. (PAC)  This posting includes an audio/video/photo media file: Download Now |
| Unsa kadaghan ang uwan nga dala ni ‘Dante?’ Posted: 02 Jun 2021 05:51 AM PDT NAKATALA og 102.7 millimeters nga uwan ang Philippine Atmospheric Geophysical and Astronomical Services Administration (Pagasa) Mactan station atol sa pagbunok sa uwan dala sa Bagyong Dante sa Sugbo gikan alas 8 sa buntag sa Martes, Hunyo 1, 2021, hangtod sa alas 8 sa buntag sa Miyerkules, Hunyo 2. Matod ni Jhomer Eclarino, Pagasa Mactan weather specialist, nga ang gidaghanon sa uwan katumbas ngadto sa 513,500 ka mga barrel sa tubig matag usa ka kilometro kwadrado. Matod sa Pagasa nga kada usa ka millimeter sa uwan mutumbas og 5,000 ka mga barrel sa uwan kada kilometro kwadrado. Matod ni Eclarino hapit kini moapas sa 103. 5 mm nga uwan nga natala niadtong Hunyo 1-30 sa 2020. Samtang ang average kun normal nga rainfall amount alang sa dinhi dinhi sa Cebu anaa sa 190.4 mm. Tungod niini, si Eclarino nagkanayon nga posibleng makatala og above normal amount of rainfall ang Cebu karong buwana. Matod usab niya nga makasinati na og normal kun ting-init, sagol ginagmay nga uwan ang Sugbo karong adlawa hangtod sa weekend. (WBS)  This posting includes an audio/video/photo media file: Download Now |
| Leisure travel ban sa NCR gilibkas, gihangop ni Chan Posted: 02 Jun 2021 05:51 AM PDT Ang mga residente sa National Capital Region (NCR) nga nagplano nga mobakasyon human sa duha ka buwan nga ban, makahimo na sa pagbiyahe aron makalingawlingaw apan giawhag sa pagsusi una sa health protocol sa dapit nga ilang destinasyon. Si Philippine National Police (PNP) Chief Guillermo Eleazar niingon nga ang local government units (LGUs) dunay ilang lahi nga protocol alang sa mga bisista o turista. "Alam ko po na sabik tayo ngayong magbakasyon o maglibang dahil sa tagal ng pagkakakulong sa ating mga tahanan. Pero tandaan po natin na nariyan pa din po ang banta ng Covid-19. Dobleng pagiingat pa rin po ang ating gawin habang nasa labas ng ating mga bahay," matod ni Eleazar. Ang national government nilibkas na sa Hunyo 1, Martes, sa domestic travel restrictions human sa pagtugot sa leisure trips gikan sa NCR Plus ngadto sa mga dapit ubos sa general community quarantine (GCQ) ug modified GCQ gikan sa Hunyo 1 ngadto sa Hunyo 15, 2021. Ang NCR Plus naglakip sa National Capital Region, ug mga lalawigan sa Bulacan, Cavite, Laguna ug Rizal. Ang mga mobiyahe kinahanglan nga test negative sa virus nga hinungdan sa coronavirus disease 2019 (Covid-19) ug ang ilang biyahe kinahanglan nga "point-to-point only." Si Presidential Spokesperson Harry Roque Jr., atol sa press briefing sa Hunyo 1, nagkanayon nga ang non-contact outdoor sports gitugotan na usab lakip ang meetings o conferences nga kutob lang sa 30 percent sa venue capacity, personal care services kutob sa 40 percent capacity ug outdoor tourist attractions kutob sa 30 percent. AHONG NALIPAY Gihangop ni Lapu-Lapu City Mayor Junard Chan ang pagtugot na sa residente sa NCR Plus nga makabakasyon na. Matod ni Chan, makatabang kini sa pagbangon sa turismo sa dakbayan nga hilabihan kaapektado sa pandemya. Wala mabalaka ang mayor sa hulga sa Covid-19 sanglit aduna nay protocol usab nga gisunod ang mga hotel. Giklaro sa mayor nga booking lang sa hotel ug medical certificate sa pagmatuod nga walay kakulian sa panglawas ang usa ka dumuduong mahimo na kining makasulod sa dakbayan. Dili na kinahanglan pa ang reverse transcription polymerase chain reaction (RT-PCR) test sa usa ka dumuduong sa Lapu-Lapu, sumala ni Chan. "Naa na nay protocol nga gisunod ang atoang hotel so maayo ni nga development," matod ni Chan. (Third Anne Peralta-Malonzo sa SunStar Philippines, GCM)  This posting includes an audio/video/photo media file: Download Now |
| Mga prosesyon higpit nga gidili Posted: 02 Jun 2021 05:51 AM PDT Mga relihiyusong prosesyon atol sa mga piyesta sa kabarangayan sa siyudad sa Sugbo hugot nga gidili sa kapulisan. Nahukman kini human duha ka mga barangay giingong nitugot sa maong relihiyusong kalihukan sa miaging semana. Kon di sila makabadlong, mga barangay kapitan gibaharan nga mamahimong ikiha. Sa miaging semana, nimando si President Rodrigo Duterte sa kapulisan pagdakop sa mga barangay kapitan kon masakpan nga nitugot sa mga mass gathering sa ilang barangay human sa nahitabong picnic sa usa ka resort sa Caloocan City, Metro Manila. Aang Cebu City Police Office (CCPO) nimando na usab sa mga station commander nga makig-alayon sa mga barangay kapitan nga nahisakop sa ilang hurisdiksyon aron pahimangnoan nga di tugotan ang mga panagtapok ning panahon sa pandemiya. Matod ni Police Lieutenant Colonel Wilbert Parilla, deputy city director for operations sa CCPO, nga duha ka semana na ang nakalabay, aduna silay na-monitor nga nagpahigayon og prosisyon atol sa kapistahan sa duha ka mga barangay. Giklaro ni Parilla nga dili nila dakpon ang mga barangay kapitan nga masuta nga milapas sa kamandoan sa presidente sanglit ila lang kining pasakaan og kasong dereliction of duty kay wa pa sila makadawat sa kamandoan gikan sa Camp Crame. Nipasabot si Parilla nga wa pa tugoti sa Emergency Operations Center (EOC) ang mga kalihukan sama sa prosisyon nga adunay drum and bugle nga nagsunod. (AYB)  This posting includes an audio/video/photo media file: Download Now |
| 5 guilty sa kasong attempted abortion Posted: 02 Jun 2021 05:24 AM PDT Guilty sa kasong attempted intentional abortion ubos sa Article 256 of the Revised Penal Code ang lima ka mga dinakpan sa National Bureau of Investigation (NBI) 7 niadtong Marso 2021 subay sa entrapment operation. Base sa court order sa Mayo 31, 2021 ni Judge Merlo Bagano, nahukman nga guilty sa salaod sila si Joey Guirigay, Francisca Rebamonte, Gloria Gabutin, Maryteiss Rural ug Amparo Gemarangan. Mapriso sila sulod sa upat ka buwan apan ug makapyansa og P6,000 matag usa. Nasikop sa operasyon sa NBI ang lima human nagpakaaron-ingnon nga lehitimong abortionist. Atol sa operasyon nasakmit ang mga ebidensya sama sa speculum, suction syringe, rubber mat ug plastic basin nga gituohang gamit sa pag- abort. Kon mabilanggo na ang lima, nagpabiling gawasnon human giisyuhan og release order sa Talisay City Prosecutor's Office ang gitumbok nga illegal abortionist nga unang nasikop sa National Bureau of Investigation (NBI-7) atol sa operasyon niini. Si Amparo Lumagbas Gemarangan, 82, nasikop sa barangay Mohon, Talisay ug gituohan nga maoy aborionist. Una na nga nanawagan ang NBI-7 sa publiko ilabi na sa kababayen-an nga mosumbong sa awtoridad kon may susamang panghitabo sa ilang dapit. (ANV)  This posting includes an audio/video/photo media file: Download Now |
| You are subscribed to email updates from https://www.sunstar.com.ph/. To stop receiving these emails, you may unsubscribe now. | Email delivery powered by Google |
| Google, 1600 Amphitheatre Parkway, Mountain View, CA 94043, United States | |
No comments:
Post a Comment