https://www.sunstar.com.ph/

---

• Lalake walay meat inspection certificate dakpan
• Sobra 100 ka baboy gipamatay sa Kananga
• Tricycle driver miuli og pouch, gitagaa’g reward
• 25 ka tawo nga nalambigit sa pagkuha og grabe gipasakaan og kaso
• 2 nagmotor naglumba, namatay
• RHU sa Santander gipasirhan
• Lot owners mabayran sa Disyembre
• Resto bar sa Barili gipasirhan
• Walk-in nga senior sa Mandaue dawaton
• Veco: bantay sa pagsaka sa bayranan sa Hulyo-Agusto
• Dugang 17 ka Delta variant napalgan
• Editoryal: Angay masayod
• Nalzaro: Requiescat in pace, Rey Cortes
• Mongaya: Pabalikon pa si Labella?
• Diola: Mentor
• Daclan: Jake, Dimples balik Kapamilya series
• Super Blowout: Kurog pagtikang sa kalampusan
• Sumbagay ug way daganay
• Migallen: Mas dalaygon ang nahimo ni Giannis
• Vallena: Enjoy sa ride
• Ravena, Parks moduwa sa B. League sa Japan
• Pilipinas gisubhan og kadaugan sa Olympics
• Lakers paborito sa free agency

Lalake walay meat inspection certificate dakpan Posted: 24 Jul 2021 11:15 PM PDT LALAKE nga padulong unta mag hatod sa mga order nga karneng baboy nadakpan sa kapulisan didto sa Barangay San Pablo, Ormoc City alas 7 sa buntag, Martes, Hulyo 20, 2021. Giila sa kapulisan ang dinakpan nga si Rodrigo Francisco, 47, taga Purok 2, San Pablo, Ormoc City. Base sa report sa kapulisan, ang suspek sakay sa iyang multicab ang padulong unta maghatud sa mga order nga karneng baboy gikan sa Purok 2 paingon sa Simangan. Dugang pa sa report, walay napakita nga meat inspection certificate ang dinakpan. I-agi sa slaughterhouse Si Dr. Joseph Cortes sa City Veterinary Office nipasabot sa publiko nga tanan nga baboy nga ihawon dapat i-agi gyod sa slaughterhouse aron masusi sa mga meat inspectors ug ma isyuhan og ante-mortem certificate. Sa una pa dad-on sa slaughterhouse ang baboy, dapat mo kuha una og certificate to transport gikan sa Barangay kapitan. Dili itabok sa laing barangay Giklaro usab ni Cortes nga bawal pa sa pagkakaron nga itabok sa laing barangay ang mga buhing baboy, dapat ilahos na kini sa slaughterhouse. "Pero kung karne na or pork products, pwede ra siya itabok pero kung buhi, dili gyod pwede," pasabot ni Cortes. Dugang ni Cortes, ang slaughterhouse mo dawat og baboy gikan alas 8 sa buntag hantud alas 5 sa hapon. Ang inihaway ipahigayon sa kadlawon ug tanan nga baboy hutdon gyod pag ihaw o "All-in" ug "All-out." Lakang batok ASF Gisugilon ni Cortes nga kining tanan ilang gibuhat aron mapugngan ang pagkatap sa African Swine Fever (ASF) kahuman naigo ang dakbayan niadtong Hunyo. Gatusan ka mga buhing baboy ang gipamatay hilabi na kadtong nasakop sa 500-meter radius gikan sa index case sa Salvacion. Si Mayor Richard Gomez niisyu og executive order pagpatuman og "pork holiday" sa dakbayan sugod Hulyo 3 hantud Hulyo 17. Bisan sa paglibkad sa kamanduan, duna gihapon pipila ka kondisyon. Ang dakbayan sa Ormoc modawat lang og buhing baboy basta gikan lang sa lugar nga walay ASF sama sa Cebu ug Bohol ug dapat i-agi kini sa pantalan ug dunay saktong papeles. Naa na sa kustodiya ang dinakpan ug gipasakaan og kasong kalapasan sa section 51 sa Republic Act 9296 samtang na-impoung ang iyang multicab sa Police Station 1. (JKDP) This posting includes an audio/video/photo media file: Download Now

Sobra 100 ka baboy gipamatay sa Kananga Posted: 24 Jul 2021 11:14 PM PDT SOBRA sa 100 ka mga baboy ang gipamatay sa lungsod sa Kananga, Leyte aron mapugngan ang pagkatap sa African Swine Fever (ASF). Matod sa lokal nga kagamhanan sa Kananga, pipila ka mga baboy sa Sitio Sagkahan, Barangay Poblacion, Kananga, Leyte ang naigo sa ASF. Base sa kamanduan sa Department of Agriculture, tanan nga mga baboy nga sulod sa 500-meter radius gikan sa mga baboy nga naigo sa ASF ang gipamatay. Si Mayor Matt Torres nag imposar og duha ka sa semana nga pork holiday sa lungsod sugod Hulyo 14, 2021. Walay baligya nga mga baboy sa merkado ug gidili usab ang pagpagawas ug pagpasulod og mga baboy sa kada barangay aron mapuggan ang pagkatap sa ASF. Ang mga namuhi og baboy nga nakapa-insured sa ilang binuhi nga baboy sa una pa niigo ang ASF, dunay madawat nga ayuda gikan sa Department of Agriculture pinaagi sa indemnification program. (JKDP) This posting includes an audio/video/photo media file: Download Now

Tricycle driver miuli og pouch, gitagaa’g reward Posted: 24 Jul 2021 11:07 PM PDT KAHADLOKAN paminawon ang iyang agnay apan sa tinuod nga kinabuhi usa diay ka matinud-anon ug tarong nga tricycle driver sa dakbayan sa Ormoc. Siya si Aladin Luchavez, o nailhan sa uban nga "Kuya Manyakis," usa ka tricycle driver nga miuli sa usa ka pouch nga gipanag-iya sa usa ka healthcare worker sa Gatchalian Hospital nga si Hanzel Manatad. Matod ni Hanzel sa iyang post: "Thank you so much kuya Aladin Florendo Luchavez aka 'Kuya Manyakis' pero maayo kaayog kasing2. Salamat kuya sa pag uli sa akong pouch nga naa jud importante nga mga gamit." Gitagaan ni Mayor Richard Gomez og reward ang driver tungod sa pagkamatinud-anon. "Mas maayo daghan pa nga mga driver ang pareha nimo ug dapat ato ipakita nga kita diri sa Ormoc mga matinud-anon," matod ni Gomez. Bisan sa pagka tricycle driver, gisaad ni Luchavez nga pabilin siya nga matinud-anon. "Ako sir, bisan tricycle driver ko. Pero mao ra ni ako gipasigarbo nako sa akong mga anak nga matinud-anon ko ug nagtarong sa akong kinabuhi," matod ni Luchavez. Kauban ni Gomez sa paghatag sa reward si City Councilor Goito Yrastorza ug Barnsby Cagang sa Team. (JKDP) This posting includes an audio/video/photo media file: Download Now

25 ka tawo nga nalambigit sa pagkuha og grabe gipasakaan og kaso Posted: 24 Jul 2021 11:02 PM PDT GIPASAKAAN og kaso ang 25 ka mga tawo nga nalambigit sa ilegal nga pagkuha ug pagpagawas og graba gikan sa dakbayan sa Ormoc. Ang insidente nahitabo alas 9 sa gabie, Lunes, Hulyo 12, 2021, sulod sa Yakal Port sa Barangay Macabug, Ormoc City. Gipasakaan og kaso mao sila si Carlito Sollano, Dionesio Ygot, Marcelo Macareza Jr., Antonio Solon, Ronnie Lloren, Jason Limbo, Jhon Slimvher Sinadjan, Gilbert Nonog, Jose Sumoda, Charlie Fernandez, Anthony Brinquez, Mario Narandan, Joel Balatucan, Christian Paulo De Arce, Danilo Malubay, Bernard Asutilla, Jezrel Rebuyas, Eduardo Dadizon Jr., Lilio Morillo, Emil Cobrado, Jose Wilbert Vibar, Reynaldo Raguin ug Jayrell Ambe. Apil sa gikasohan ang tag-iya sa Yakal Construction ug Yakal Port nga si Violeta Codilla ug ang tag-iya sa barge nga si William Ko sa Uni-Orient Pearl Ventures Inc. Gipasaka nga kaso mao ang kalapasan sa Section 103 sa Republic Act 7942, kon Philippine Mining Act; Section 23 sa Ormoc City Ordinance 94-74 nga giamyendahan sa City ordinance 43; Section 2 sa Executive Order 17-A gumikan sa pagpagawas og baras ug graba gikan sa Ormoc; ug Executive Order 5 gumikan sa pag-operate lapas alas 7 sa gabie. Matod sa City Environment and Natural Resources Office (Cenro), ilang naaktohan ang 23 ka mga lalake nga nagsige og karga og graba sulod sa barge gamit ang mga dumptruck. Ang maong graba niabot og 1,000 cubic meters. Sa ilang pag inspeksyon, walay nakapakita og extraction permit ug transportation permit sa mga materyales nga dalhon kini sa Masbate. "Bawal ang exportation sa sand and gravel materials tungod kay naa ta EO 17-A," matod sa Cenro. Narekober sa kapulisan ug taga Cenro ang 1 ka barge nga dunay pangan nga "Morning Valor" nga iya sa Uni-Orient Pearl Ventures Inc., 1 ka tugboat nga iya gihapon sa Uni-Orient, 1 ka payloader nga walay dokumento, 3 ka dumptruck nga iya sa Yakal Construction ug graba nga 1,572.82 cubic meters. Ang mga nadakpan gidala sa police station alang sa pagdokumento samtang naka impound na karon sa Ormoc Bay ang barge ug tugboat. Gawasnon na hinuon ang mga dinakpan human gi-dismiss sa piskalya ang reklamo. (JKDP) This posting includes an audio/video/photo media file: Download Now

2 nagmotor naglumba, namatay Posted: 24 Jul 2021 07:23 AM PDT Nangamatay ang duha ka batan-ong mga lalake nga naglumba sakay sa ilang tagsa ka motorsiklo alas 3:20 sa kaadlawon sa Sabado, Hulyo 24, 2021 sa national highway sa Brgy. Bolinawan, Dakbayan sa Carcar. Samtang date sa manag-uyab wa mahinayon human sila nangaangol kay natumbahan og kahoy dihang miagi nga nagmotorsiklo sa Biyernes sa buntag, Hulyo 23, 2021 sa Brgy. Polo, lungsod sa Alcantara. Ang nangamatay sa aksidente sa Dakbayan sa Carcar human magkapingki ang ilang mga motorsiklo mao sila si Jodell Domque, 17, taga Sitio Bonsai, Brgy. Bolinawan ug silingan nga si Niño Crisanto, 21, ulitawo, taga Sitio Ylaya. Si Police Corporal Argie Noel Espinosa sa Carcar Police Station nga nahinabi sa Superbalita Cebu nagkanayon nga sila si Domque ug Crisanto patay nang nangabot sa tambalanan sa dakbayan sa Carcar gumikan sa grabeng mga kadaut sa ilang lawas. Matod ni Espinosa nga si Domque nagmaniho sa iyang itom nga Honda XRM 125 samtang si Crisanto nagsakay sa iyang blue Honda XRM. Ang duha gikan ningtambong og bilar sa namatay nilang silingan diin giingon nga sila nag-inom. Nag-inom uban sa mga higala ug mga silingan. Dihang nipauli sila si Domque ug Crisanto, pwerting kusoga nakapadagan sa motorsiklo kay naglumbaanay. Kalit lang nagkapangka ang duha ka mga motorsiklo ug nangalagpot ang mga biktima. Gumikan sa kakusog sa impact, ang duha nakaangkon og grabing kadaot sa ulo ug kalawasan. Mga sakop sa rescue team sa dakbayan sa Carcar ug kapulisan nagdali sa pagdala sa mga biktima sa tambalanan, apan patay na silang ning-abot. "Grabi daw nakapadagan ning duha ka batan-on, kanlatkanlat. Unya naka-inom, naglumba aksidenting nagkapangka ilang mga motorsiklo," dugang ni Espinosa. NATUMBAHAN Samtang nangaangol sa pagkatumba sa usa ka dakong punoan sa kahoy sa lungsod sa Alcantara giilang sila si Francisco Orongan, 24, taga Brgy. Tangke, dakbayan sa Talisay ug iyang silingan nga si Shania O. Gabison, 25. Si Police Master Sgt. Richard Cababat, imbestigador sa Alcantara Police Station nga nahinabi sa Superbalita Cebu, nagkanayon nga sila si Orongan ug Gabison gikan sa dakbayan s Talisay. Sakay sa ilang motorsiklo padulong unta sila manuroy ug maligo og dagat sa lungsud sa Moalboal. Sa pag-abot sa lugar, kalit lang natumba ang usa ka dakong kahoy nga Camansiles hinungdan nga nangaigo sila sa sanga ug natumba ang motorsiklo. Ang mga biktima nadala sa tambalanan sa Badian, apan wa magdugay si Gabison gibalhin sa tambalanan sa dakbayan sa Sugbo. Sumala ni Cababat, nga atol sa maong oras, kusog kaayo ang pagkusokuso sa hanging Habagat. This posting includes an audio/video/photo media file: Download Now

RHU sa Santander gipasirhan Posted: 24 Jul 2021 07:21 AM PDT Kasamtangan nga gisirad-an sa kagamhanan sa lungsod sa Santander ang Rural Health Unit (RHU) human nagpositibo sa coronavirus disease (Covid-19) ang staff niini. Gipahibaw sa kagamhanan nga sirad-an sugod Hulyo 26 hangtod Agusto 2 ang RHU. Tungod niini, giawhag ang mga pasyente nga adto una modangop sa silingang mga hospital o medical providers sa kasikbit nga mga lungsod. "Usual RHU services can be availed at our nearest neighboring municipalities. Partial health services can also be availed at the respective barangay health stations," matod sa LGU. Sa uwahing datos sa lungsod, adunay 10 ka mga bag-ong kaso sa Covid-19 ang natala niini. Subay niini, gisubli sa kagamhanan ang awhag sa mga lumolupyo sa pagsunod sa tanan nga mga lagda batok Covid-19 aron dili na modaghan pa ang mga kaso sa lungsod. Giawhag usab ang mga konstituente nga nakasinati sa simtomas sama sa sip-on, hilanat, pagkawala sa panglasa ug uban pa sa dali nga pagtawag sa barangay aron daling ma-isolate paglikay nga makatakod sa uban. (ANV) This posting includes an audio/video/photo media file: Download Now

Lot owners mabayran sa Disyembre Posted: 24 Jul 2021 07:16 AM PDT Tinguha sa Dakbayan sa Sugbo nga mabayran na ang tanang mga tag-iya sa mga luna nga maagian sa una sa tulo ka phase sa pagpalapad sa karsada gikan sa Barangay Talamban gym padung sa Barangay Pit-os, Dakbayan sa Sugbo. Si Cebu City Councilor Jerry Guardo, tsirman sa komitiba sa infrastructure sa Konseho sa Dakbayan sa Sugbo, niingon nga duna pay P91 million nga nahabilin sa gahin sa pagbayad sa road right-of-way ug mga estruktura nga maagian sa pagpalapad sa karsada. Ang Konseho kaniadto sa administrasyon ni kanhi mayor Tomas Osmeña nigahin og P97 milyunes sa 2017 dihang si kanhi konsehal Alvin Arcilla pa ang nagkupot sa komitiba. Nasayran ni Guardo nga 98 porsyento sa tanang mga nanag-iya og estruktura nga maigo sa road widening nabayran na sa Siyudad, apan wa pa ang ilang lote. Si Guardo niingon nga iyang target nga sa di pa matapos ang Disyembre, ang mga lote nga maagian sa first phase nga manukad sa Talamban gym padung sa taytayan sa sityo Tigbao mabayran na tanan. Ang pagpalapad sa karsada gibahin sa tulo ka phases. Ang unang phase manukad sa Talamban gym padung sa taytayan sa Tigbao ug Bacayan. Ang ikaduha mao ang pagpalapad sa karsada sa Barangay Bacayan. Ang ikatulo mao ang sa Barangay Pit-os. Nipasabot si Guardo nga gituyo kini aron di magsangkiig ang Siyudad sa galastuhan sa pagbayad sa mga tag-iya sa estruktura ug luna. Matod niya nga way problema ang mga tag-iya sa yuta basta ang bag-ong appraisal ang gamiton sa pagsumada kon pilay mabayran sa Siyudad matag usa kanila. Base sa resolusyon sa City Appraisal Committee sa Marso 2021, ang presyo matag metro kwadrado sa luna sa Talamban naa sa P12,662. Sa Bacayan mobalor og P5,616 matag metro kwadrado. Ang Pit-os mobalor og P3, 616 matag metro kwadrado. Si Guardo niingon nga kon mahuman na ang responsibilidad sa Siyudad, ang Department of Public Works and Highways (DPWH) na ang mopalapad sa karsada kay ila na kining gimbuhaton. Nakigkita na siya sa miaging semana kang DPWH Cebu City Engineering District Engineer De Yusoph Rasuman aron mapangayoan kini og budget gikan sa ilang buhatan alang sa pagtrabaho. Matod ni Guardo nga himuon nga 20 metros ang gilapdon sa karsada aron mahimo na kining upat ka mga lane. Sa pagkakaron, duha lang ka lanes ang maagian hinungdan nga dako kaayo nga problema ang trapiko sa mga lumolupyo gikan sa Talamban paingon sa mga bukirang dapit sa north district sa Dakbayan sa Sugbo. Butangan usab kini og dako nga drainage aron di magbaha ug duna say sidewalk matag habig sa karsada nga dunay gilapdon nga usa ka metro ug tunga. Si Guardo niingon nga kon mahurot ang P91 million, mangayo siya og dugang P100 million nga ilakip sa 2022 budget. Iyang tinguha, nga kon masublian sa iyang katapusang ikatulo nga termino, matuman na ang dugay nang gidamgo sa mga lumolupyo sa tulo ka mga barangay ug mga kanait niini nga mapalapdan na ang ilang karsada. Upat na ka dekada nga wa mahilabti ang mao nga karsada bisan sa pagpanaghan na sa mga mga subdivision ug mga tunghaan. (REV) This posting includes an audio/video/photo media file: Download Now

Resto bar sa Barili gipasirhan Posted: 24 Jul 2021 07:14 AM PDT Gipasirhan ni Barili Mayor Julieto Flores ang usa ka resto bar nga nakuhaan og video ang mga kustomer nga wa mag-obserbar sa minimum health protocol. Ang video nag-viral sa social media sa Sabado, Hulyo 24, 2021. Matod ni Flores nga nimando na siya sa pagluwat og temporary restraining order batok sa establisemento. "I just learned about it too. As of this time, I already told my municipal administrator to issue a temporary closure order and I already coordinated with my chief of police to conduct an investigation why it happened," sulti niya sa SunStar Cebu sa Sabado sa gabii. Sa pagsuwat ning taho, matod niya nga nagpadulong na ang mga pulis sa Barili aron pag-serve sa temporaryong pagpasira. Sa usa ka video nga kuha sa usa ka concerned citizen, mga kustomer nakita nga wa magsul-ob sa face mask ug face shield ug wa mag-obserbar sa minimum social distancing samtang nanganta uban sa banda. Ang establisemento nahimutang sa Barangay Guiboangan. Matod niya nga mao pa kini ang establisemento nga gisumbong kaniya nga nakalapas sa mga protocol. "They have business permit, but because they failed to implement the minimum health protocols amid the pandemic, we will issue the temporary closure order," matod ni Flores. Ang gidugayon sa temporary closure, matod niya, magdepende sa resulta sa imbestigasyon sa kapulisan. Ang kapulisan sa Lalawigan sa Sugbo hugot nga nagpatuman sa pagpasunod sa mga health protocol pinaagi sa pagpamadlong niadtong wa magsunod sa mga lagda. (WBS) This posting includes an audio/video/photo media file: Download Now

Walk-in nga senior sa Mandaue dawaton Posted: 24 Jul 2021 07:13 AM PDT Modawat na og walk-ins ang tanang vaccination site sa dakbayan sa Mandaue alang sa mge senior citizen aron mas mapaspasan ang pagbakuna sa maong sektor. Sa miaging semana, gigahinan ang dakbayan og 11,250 ka doses sa Johnson & Johnson, diin ang bakunahan lang niini ang mga senior citizen. Matod ni Ernie Manatad, pangu sa Mandaue Vaccine Board ug presidente sa Association of Barangay Councils, nga sa unang semana sa pag-apod apod nila sa Johnson & Johnson vaccine, wala sila makaabot sa ilang target nga 1,500 matag adlaw. Gani, gikan sa Hulyo 19 hangtod Hulyo 23, nakabakuna lang sila og 1,195 ka doses sa Johnson & Johnson ngadto sa senior citizens. Karon nga manawat na og mga walk-in ang tanang vacination site sa dakbayan sa Mandaue, matod ni Manatad nga gihatagan sab og priority lane ang mga senior citizens aron dali ra makakuha sa bakuna ug dili na magpaabot og dugay. Matod ni Manatad nga kinahanglan sila makabakuna og 1,500 ka doses sa Johnson & Johnson aron mahurot na nila og apod-apod sa di pa ang Hulyo 30. Sigon ni Manatad nga buot lang nila nga mapaspasan ang pag apod-apod aron di sila maabtan sa deadline. Aron makab-ot nila ang ilang target, matod ni Manatad nga nakadawat siya og impormasyon sa Vaccination Operations Center nga giawhag nila ang mga opisyal sa barangay nga makighinabi sa mga senior citizen ug kombinsihon nga magpabakuna na. Gani, sigon ni Manatad nga giawhag ang mga opisyal sa barangay sa paghatag og transportasyon sa mga senior citizen paingon sa vaccination site labi na kon maglisod og sakay. Kinahanglan na nga magpabakuna ang mga nasakop sa "vulnerable" nga sector sigon ni Manatad labi na sa pagsulod sa Delta variant sa nasod. Ang Delta variant mao ang usa sa matang sa Sars-CoV-2 nga gikalisangan sa ubang mga nasod sama sa India, Indonesia ug Estados Unidos. Mas paspas kini manakod ug mas isog hinungdan nga mas daghan ang nangamatay niini. Una kining niigo sa India diin liboan ang nangamatay ug nangasakit nga gani, naglisod na ang mga ospital sa pagtagad ug nagkuwang ang supply sa oxygen. Ang labing uwahing naigo sa Delta variant mao ang Indonesia, silingang nasod sa Pilipinas. Sa labing uwahing ihap sa Hulyo 24, 2021, niabot na og 64 ang na-detect nga mga kaso sa Delta varian sa Pilipinas. (Estorya sa pahina 13.) Matod ni Manatad nga tungod niini, kinahanglan na gyud nga mapaspasan ang pagpamakuna sa mga residente sa dakbayan. Sa laing bahin, sigon ni Manatad nga adunay usa ka tigulang nga niadto sa barangay health center tungod kay nitaas ang iyang blood pressure usa ka adlaw human siya nagpabakuna og Johnson & Johnson. Gitan-aw sa nars sa health center ang tigulang ug tuod man nitaas ang blood pressure. Apan alang kang Manatad nga tungod sa iyang pangedaron normal lang kadto nga blood pressure. Gani, wala ray gibati nga lain ang tiguwang, taas lang ang iyang blood pressure apan gipainom lang kini sa iyang tambal ug naulian na, sigon ni Manatad. Gumikan niini, sigon ni Manatad nga way angay ikabalaka ang mga senior citizen sa Johnson & Johnson tungod kay luwas kini alang kanila. Matod niya nga dili nagpasabot nga usa lang ka dose ang Johnson & Johnson, di kini isog. Ang tanang vaccination site sa dakbayan sama sa Mandaue City Cultural and Sports Complex, University of Cebu Lapu-Lapu Mandaue (UCLM), Pacific Mall, JCentre Mall ug Parkmall abli sa Lunes hangtod sa Biyernes gikan sa alas 8 sa buntag hangtod sa alas 5 sa hapon. Sa Hulyo 22, matod sa taho sa Project Balik Buhay (PBB) aduna nay 132,182 ka mga bakuna ang naapod apod na sa dakbayan sa Mandaue, diin ang 89,101 alang sa unang dose ug ang 43,081 alang sa nakakompleto na sa bakuna. This posting includes an audio/video/photo media file: Download Now

Veco: bantay sa pagsaka sa bayranan sa Hulyo-Agusto Posted: 24 Jul 2021 07:12 AM PDT Ang Visayan Electric nipahimangno sa iyang mga kustomer sa pagsaka sa presyo sa kuryente sa billing period sa Hulyo-Agusto tungod sa taas nga generation rates. Matod sa utility nga ang taas nga presyo sa elektrisidad sa Wholesale Electricity Spot Market, ingon man ang taas nga presyo sa coal ug fuel sa world market maoy hinungdan sa nagsaka nga power generation rates ngadto sa P0.39/kWh alang sa July- August billing period. "We are asking our customers to be mindful of their electricity use because of the high prices of coal, fuel and even WESM. While we understand that electricity is a necessity especially since many are working from home, we are reminding our customers to use electricity wisely to avoid bill shock," matod ni Visayan Electric President ug COO Raul C. Lucero. Ang presyo sa coal ug fuel sa merkado sa kalibutan nagsaka sukad sa Enero ug maoy hinungdan sa pagsaka og maayo sa mga presyo sa WESM kay sagad sa power generators nga namaligyag kuryente sa electricity spot market naggamit og raw materials. Ang inoras nga presyo sa WESM maggikan sa P10 ngadto sa P12. Dugang ni Lucero nga ang taas nga rates sa WESM nasinati sa tanang distribution utilities sa Luzon ug Visayas, diin naa ang WESM. "Since our bills are driven by electricity consumption and power rates, it is best that we as consumers will take the necessary precautions in controlling our electricity consumption to lessen the impact of high power rates," matod niya. Bisan kon ang power generation rates nisaka, ang Visayan Electric distribution rate nagpabilin nga naa sa P1.5992/kWh sukad sa 2014. Aron makadaginot sa kuryente, ang Visayan Electric nag-awhag sa ilang mga kustomer sa pag-ibot ug pagpawong sa appliances nga wa gamita. Seguraduhon nga maayo ang pagkamintinar sa mga appliances nga magpabugnaw sama sa airconditioners ug electric fan aron dili kalas og kuryente. (REV gikan sa PR) This posting includes an audio/video/photo media file: Download Now

Dugang 17 ka Delta variant napalgan Posted: 24 Jul 2021 07:09 AM PDT Dugang 17 ka Delta (B.1.617.2) variant cases nakaplagan sa Pilipinas, nga nihatod sa kinatibuk-ang gidaghanon sa na-detect nga coronavirus disease 2019 (Covid-19) nga kaso sa mas mananakod nga variant ngadto sa 64. Sa usa ka pamahayag sa Sabado, Hulyo 24, 2021, ang Department of Health (DOH) niingon nga ang ang bag-ong mga kaso nga na-detect naglangkob sa 12 ka local, usa ang returning overseas Filipino (ROF) ug upat nga gisusi pa. Sa 12 ka mga lokal nga kaso, siyam ang nag-address og National Capital Region (NCR) samtang tulo gikan sa Calabarzon. Tulo ang nagpabiling aktibo samtang 14 gitumbok nga recovered na. Ang regional ug lokal nga mga buhatan sa DOH nagsusi sa kahimtang sa matag pasyente. Ang University of the Philippines Philippine Genome Center (PGC) naka detect usab og 11 ka Alpha (B.1.1.7) variant cases, 13 ka Beta (B.1.351) variant cases ug duha ka Theta (P.3) variant cases sa labing uwahi nga batch sa coronavirus-positive samples nga gipailawom sa whole genome sequencing. Pito ka mga pasyente nga dunay Alpha ug duha ka mga Beta nangamatay. Sa 11 ka mga kaso sa Alpha, 10 ang lokal nga mga kaso ug usa ang gisusi pa. Usa ang aktibo, pito ang nangamatay ug tulo ang gitumbok nga recovered. Sa dugang 13 ka Beta variant cases, 10 ang lokal ug tulo ang gisusi. Usa ang aktibo pa, duha ang nangamatay ug 10 ang naka recover na. Usa sa duha ka P.3 cases lokal samtang ang lain gisusi pa. Ang duha naka recover na. Karon duna nay 1,679 Alpha variant cases, 1,840 Beta variant cases ug 235 P.3 cases sa nasod. Kini nga mga resulta sa sequencing wa pa maglakip sa mga sample nga nakuha gikan sa mga tripolante sa barko gikan sa Indonesia nga nagdunggo sa Albay. Kini ilakip sa sunod nga batch, matod sa DOH. (HDT, Sunstar Philippines) This posting includes an audio/video/photo media file: Download Now

Editoryal: Angay masayod Posted: 24 Jul 2021 07:06 AM PDT Gusto ni Acting Mayor Michael Rama nga mahibaw-an ang tinud-anay nga estado sa panglawas ni Mayor Edgardo Labella. Gani, gusto siyang makigtagbo unta sa mayor aron sila magkasultihanay. Apan pakyas ang iyang tinguha kay ang mayor di pa makadawat og bisita. Nisamot ang kaikag ni Rama nga masayod siya ug ang mga taga Dakbayan sa Sugbo sa unsay tinud-anay nga kahimtang sa mayor human sa mga hungihong nga namatay ang mayor. Igo rang niluwat og pamahayag ang anak sa mayor nga nagpaalim ang iyang amahan sa balatian. Nag-medical leave ang mayor tungod sa pneumonia. Sakto baya si Rama nga angay masayod ang mga taga Dakbayan sa Sugbo sa tinud-anay nga kahimtang sa mayor kay di man siya usa ka pribadong tawo. Elected official si Labella, busa ang tanang mga lungsoranon angay nga masayod unsa nay kahimtang sa panglawas sa ilang mayor. Kon pribado pa unta nga tawo ang mayor, way katungod ang si bisan nga manginlabot sa health status sa mayor. Apan kay public official man siya, kinahanglan iyang ipahibawo ang estado sa iyang panglawas bisan kon ang tumong sa wa pagbutyag niini maayo. Aron usab nga mahunong na ang mga tagna-tagna kon unsa nay kahimtang sa iyang panglawas. Pinaagi gud sa pagbutyag, makahulma og direksyon si Rama sa iyang pagpadagan sa City Hall samtang wa pa mahibalik si Labella sa buhatan. Sama karon nga gitudlo siyang acting mayor. Kon duna siyay gustong buhaton, masulod kaha sa gitas-on sa iyang pag-alagad isip acting mayor ang polisiya o proyekto nga iyang gustong mapatuman? Bisan ang iyang mga kauban sa partido sa konseho kinahanglan nga masayod sa kahimtang sa mayor taliwa sa way hunong sa di maayong mga hungihong nga ingon sa nagtunglo na hinuon kang Labella. Isip public official, di pribadong tawo, kinahanglan nga mosulti na ang pamilya sa kahimtang sa mayor. This posting includes an audio/video/photo media file: Download Now

Nalzaro: Requiescat in pace, Rey Cortes Posted: 24 Jul 2021 07:05 AM PDT Matod pa sa inila ug bantugan nga Indian writer, poet ug philosopher, Rabindranath Tagore (1861-1941) nga: 'Ang kamatayon dili mao ang pagpakgang og pagsanta sa kahayag; kon dili mao ang pagpawong sa lampara gumikan kay mi-abot na ang kabuntagon.' Si Komentarista Reynante 'Rey' Cortes, 47, nagsugod sa pagpanibya sa DYMF Bombo Radyo Cebu niadtong mga dekada 90. Usa siya sa mga staff reporter. Ako ang production manager sa dihang mi-apply siya. Si karon Tudela, Camotes Mayor Greman 'Jojo' Solante ang among station manager. Ako ang mi-interview ni Rey ug bisan way igong kasinatian apan aduna may determinasyon ug abilidad nga mahimong magsisibya, amo siyang gi-hire. Sa dihang mibalhin ako sa DYSS (RGMA) Cebu niadtong 1997, si Kit Matus, assistant researcher sa Bombo Radyo nga hinigugma ni Rey ug nahimong asawa, niuban kanako sa pagbalhin sa DYSS. Si Kit maoy among news director sukad sa pagsugod namo sa DYSS sulod na sa 26 ka tuig. Sukad niadto, wala na kaayo kami magkita ni Rey. Ako na lang nahibaw-an nga ni-resigned siya sa Bombo Radyo ug nag-blocktime. Bisan tuod og blocktimer siya, apan susama ang among propisyon nga anaa sa broadcast media. Mohatod sa mga balita ug mokomentaryo sa mga hiwing binuhatan labi pa sa anaa sa posisyon sa kagamhanan. Ang media dako og papel ning atong katilingban kay dangpanan sa mga dinaug-daug ug nilupigan. Tinuod, sakit usahay mosulti ang media labi pa kon ang gisulti maoy kamatuoran. Kay matod pa bitaw 'sakit man ang kamatuoran.' Apan sa mga tawo nga naigo sa komentaryo, igo bang rason nga mogamit ug mosagop sa bayolente nga paagi aron makabalos sa mediaman? Aduna pa man kitay hukmanan ug anaa ang libel law sa atong Codigo Penal nga puwedeng makapasaka og kaso ang argabyado nga tawo batok sa 'abusado nga mediaman' kon abusado man gani para sa argabyado nga partido. Isip kauban sa buhat ni Rey Cortes ug isip higala, apil ako sa manawagan ngadto sa atong mga awtoridad nga unta mahatagan og hustisya ang iyang brutal nga kamatayon pinaagi sa pagpusil. Requiescat in pace (rest in peace), Kumentarista Rey Cortes. (bobbygnalzaro@gmail.com) This posting includes an audio/video/photo media file: Download Now

Mongaya: Pabalikon pa si Labella? Posted: 24 Jul 2021 07:01 AM PDT Mangaliya kita nga mabalik ang maayong panglawas ni Mayor Edgar Labella. Nag-sick leave na sab gud ang mayor. Karong higayona, ang unang istorya nga gipakatap mao nga giubo. Dayon, dihang nikatag ang tsismis nga na-ICU, dunay statement sa media ang iyang anak nga si JP nga iyang papa gipulmonya. Apan, nagka-improve ang kahimtang. Maayo gyud hinuon kon mao. Ang ako lang, makapabalaka ang hitsura ni Mayor Labella kadtong nibalik siya pagtrabaho gikan sa una niyang pag-sick leave. Nilagom man gud ug nihugo. Dili maka-inspire og kumpyansa nga siya maayo na. Gani, wa moangkon ang iyang pamilya dayon nga nag-sepsis diay niadtong higayona. Ang ako lang kay mas maayong hatagan og igong panahon si Mayor Labella nga maayo gikan sa iyang sakit. Total, nidagan man siya kuyog ni Bise Mayor Mike Rama kaniadtong 2019. Buot ipasabot, duna siyay igong pagsalig niini. Sama unta siya ni kanhi mayor Tomas Osmeña nga gisiguro gyud nga mamaayo sa iyang cancer didto sa Estados Unidos. Maniguro unta kining kampo ni Mayor Labella nga lig-on na siya inig mobalik na man gani siya. Lito O Sa wala pa namatay si Emilio 'Lito' Osmeña, nakahimo kini og mahinungdanong kasabutan sa kampo ni Sen. Manny Pacquiao. Nagplano man gud si Mimo Osmeña, ang anak ni Lito O, nga modagan pagka senador. Dugay nang panahon nga walay senador nga Sugboanon. Panahon na karon nga dunay modagan aron maoy modala sa tingog sa mga Sugboanon didto sa hawanan sa Senado. Sa wala pa kini namatay, gi-negotiate ni Lito nga maapil si Mimo sa lineup sa mga kandidato alang sa Senado ni Sen. Pacquiao. Nakahibawo na man kita nga daghan ang interesado nga modagan ang senador alang sa pagka presidente. Mao bitaw nga nasuko si Presidente Rodrigo Duterte kang Pacquiao kay mokumpetensya man kini sa iyang anak nga si Davao City Mayor Inday Sara Duterte-Carpio. Kay nalantaw na man daan ni Pacquiao nga taktakon kini sa PDP-Laban, naa sab siyay hangyo kang Lito O. Banhawon ang Promdi nga maoy usa sa Partido unya sa senador. Naa koy mga higala nga dili kumbinsido nga modaog si Mimo. Wa kuno mailhi. Apan simple kaayo akong tubag. Ang katawhang Pilipino wala makaila og Mimo. Apan ang tanan nakaila sa lolo ni Mimo nga si Don Sergio Osmeña. Ang iyang amahan nga si Lito maoy amahan usab sa Ceboom. Ug si Mimo pag-umangkon og duha ka mga senador nga si Serge O ug Sonny O. Pag-umangkon usab sa iladong mayor nga gisiguro og pildi sa kampo ni Duterte nga si Tommy O. (DM nako sa @anol_cebu) This posting includes an audio/video/photo media file: Download Now

Diola: Mentor Posted: 24 Jul 2021 06:54 AM PDT Binasi sa 2 Hari 4:42-44; Salmo 145; Taga-Efeso 4:1-6; Juan 6:1-5 Kaniadto kon lider gani ka kinahanglan maantigo kang momando. Kusog kang manugo. Ang gisugo mosunod na lang. Mao man gani nga adunay panultihon, "Obey first, ask questions later." Military kaayo ni nga panglantaw. Sa kasamtangang panahon adunay laing aspeto sa pagkalider ang mituwaw. Ang usa ka lider usa usab ka-"mentor". Ang tumong sa "mentor" mao nga ang iyang gitudloan makat-on pinaagi sa iyang pagpakita sa mga lakang sa himuonon ug dili lamang sila suguon nga himuon. Adunay mga amahan nga mga maayong "mentor". Mogahin silag panahon para sa ilang anak. Tudloan nila ang anak pinaagi sa "step-by-step" ka pamaagi. May paagi sa pagpasugod sa maong proseso sa pagpanudlo. Makita kini sa atong ebanghelyo. "Asa kita mamalit og pan aron ipakaon kanila?" nangutana si Jesus kang Felipe, usa sa Napulog-Duha. Nagpadayon ang ebanghelyo: "Apan kini iyang gisulti aron pagsulay kaniya kay nahibaloan na niya og unsay iyang buhaton." Gisulayan diay niya si Felipe nga morag wa kapasar: "Duha ka gatos ka denaryu nga pan dili paigo alang kanila aron ang tagsatagsa makadawat og bisan gamay." Tawhanon ra kaayo ug pit-os ang panghunahuna ni Felipe. Wala siya kakuha nga mahimo man diayng magmilagro si Jesus. Maayo pa ang usa ka batang lalaki "nga adunay lima ka buok pan nga sebada ug duha ka buok isda." Midonar ang bata aron makakaon ang daghan. Bisan pa man niini, miingon pod si Andres: "Apan unsa man kini alang sa hilabihan ka daghan nga mga tawo?" Tawhanon pod ug pit-os ang iyang panglantaw. Wala nay daghang gisulti pa si Jesus kondili nagmandar nga palingkoron ang mga tawo nga mikabat og lima ka libong mga lalaki. Eyukaristikanhon ang mga pulong ug buhat ni Jesus sa dihang nagpasalamat siya ug giapod-apod ang pan ug isda. Gipakita na lang ni Jesus ang iyang milagro human niya pangutan-a si Felipe mahitungod sa pagpalit og makaon. Mentor si Jesus ug nagmilagro pod siya. Susama sa milagro ni Jesus ang milagro nga gihimo ni Eliseo. Daghan pod siyag gipakaon nga mga tawo bisag limitado ang iyang pan nga hinimo. Apan dako ang kalahian kay mas daghan ang gipakaon ni Jesus ug mas daghan pod ang pan nga gihimo ni Eliseo. Gawas pa niini, padulong ang milagro ni Jesus sa pagkapan nga gikan sa langit ni Jesucristo. Sa pagpakaon ni Jesus sa mga tawo ug sa iyang pagkahimong Eyukaristiya, ang tanang Kristohanong tumutuo nahimo nang mga igsuon diha kaniya. Usa na sila ka lawas ug Espiritu tungod kay diha ni Cristo nadawat nila ang "usa ka Ginuo, usa ka pagtuo, usa ka bunyag." Dili lang diay "mentor" si Jesus kondili Ginuo ug gigikanan sa panaghiusa. Giunsa man ikaw pag-"mentor" sa atong Dios? This posting includes an audio/video/photo media file: Download Now

Daclan: Jake, Dimples balik Kapamilya series Posted: 24 Jul 2021 06:54 AM PDT Nakit-an nato silang Jake Cuenca ug Dimples Romana sa "ASAP Natin 'to" nga mibisita atol sa episode sa Kapamilya forever. Gikan didto akong nasugatan nga naa gyud ni buhatong proyekto ang duha sa ABS-CBN. Wala gyud ko masayop kay human sa ilang gihimong salida sa TV5 balik Kapamilya ang duha. Silang Jake ug Dimples ang lead star sa umaabot nga teleserye "Viral" ug makauban nila dinhi ang "Fan girl" Star nga Charlie Dizon. Kon walay mga kausaban kauban usab nila dinhi silang Ria Atayde, Jameson Blake, Louise Abuel, Markus Patterson, Karina Bautista, ug Aljon Mendoza. Sa "Viral" mao ni ang pagbalik sa Kapamilya series nilang duha apan una natong nakita si Dimples sa "Huwag Kang Mangamba." Excited na sab kaayo si Charlie nga mahimong parte sa maong teleserye. Sa titulo pa lang nga viral nagtuyok ang sugilanon dinhi mahitungod sa usa ka sex scandal nga nasudlan ni Charlie. Ang maong drama series ubos sa direksyon ni Dado Lumibao ug Froy Leonardo. Kon unsa man gyud ang tinuod nga mga panghitabo niining usa ka sekreto nga nahimong viral ato kining manuntan sa Kapamilya online live sa umaabot nga mga adlaw, Ay'g saba! * * * Human ma-ukay ang tanan sa mga hungihong nga mahimo nang Kapuso ang aktor nga si John Lloyd Cruz. Karon nasurpresa na sab ang iyang mga followers tungod sa nakita ug nabasa nga post sa instagram ni Marilen Nuñez ang inilang event organizer ug usa sa nagpadagan sa Crown Artist Management kauban ang aktres nga si Maja Salvador. Kinsa may dili makurat nga kauban man nilang Marilen ug John Lloyd sa post ang ABS-CBN President ug Chief Executive Officer Carlo L. Katigbak. Daghang mga pangutana ang mitumaw kon duna bay gituto nga bagong proyekto karon si John Lloyd ug ang kapamilya network? Ay'g Saba! * * * Nahimong mabulukon ug malampuson ang gihimong unang digital concert ni Vice Ganda. Mao nga sobra-sobrang pasalamat ang iyang gipaabot sa tanan niyang mga supporter. Bisan pa man og wa matuman ang iyang gisaad nga duha ka oras kay miabot man kini og tulo ka oras nga puno sa kalipay ug katawa. Usa sa mga gitutokan nila dinhi mao ang pagbisita sa higala niining si Anne Curtis nga nahimong emosyonal ang duha kay kini ang unang nilang panagkita human kini nanganak. Sa mga wala pa nakakita niini gidapit og usab ni Vice Ganda ang tanan kay may repeat ang "GANDEMIC: The VG-TAL Concert" Ay'g Saba! This posting includes an audio/video/photo media file: Download Now

Super Blowout: Kurog pagtikang sa kalampusan Posted: 24 Jul 2021 06:51 AM PDT Sagol kalipay, hilak ug pagpangurog sa mga tuhod ang gibati ni Melchor "Mhel" Buenaflor dihang nipaso sa stage atol sa ilang graduation sa kolehiyo. Dili makalimtan ni Mhel ang Hunyo 1, 2021, ang usa sa mga labing malipayong adlaw sa iyang kinabuhi, kay sa maong adlaw nakab-ot niya ang kalamposan nga gipangandoy. Sa maong adlaw, nahitabo ang ilang virtual graduation sa Cebu Eastern College (CEC). Siya nitapos sa kursong Bachelor of Science in Development Communication sa edad nga 30. Atol sa ilang graduation, nakadawat og mga pasidungog si Mhel sama sa Academic Excellence Awardee-3rd honor, Development Communication Scientist of the Year, Supreme Student Government President Awardee ug Cebu City Scholar-Cebu Eastern College President Awardee. Giangkon ni Mhel nga nakasuway siya nga gi-bully sa iyang kanhi classmates gumikan sa iyang pangidaron. Apan wa kini makapugong sa iyang pangandoy. Niadtong 2012, ni-graduate sa sekondarya si Mhel sa night department sa Don Vicente Rama Memorial National High School ug nakapadayon og eskwela sa 1st semester sa Hunyo sa samang tuig sa CEC. Apan naundang sa pagtungha sa second semester sa 2013 gumikan sa kawad-on. Niadtong 2015, nabalik siya og eskwela. Sa samang panahon, gidungan niya ang pagtrabaho ug pag-eskwela. Nagtrabaho siya og dul-an tulo ka tuig isip assistant secretary ug gender and development focal person sa barangay hall sa Barangay Basak Pardo, siyudad sa Sugbo. Ang iyang honorarium maoy gibayad niya sa ilang tuition. Aron makadugang sa iyang kita, nang-raket usab si Mhel isip events host diin naila siya isip "buak nga host sa Cebu." Nagsunod-sunod ang mga grasya nga nadawat ni Mhel kay nahimo siya nga eskolar sa Kagamhanan sa Siyudad sa Sugbo hangtod na sa iyang pag-graduate sa kolehiyo. Nakadawat usab siya og P6,000 nga subsidy matag semester gikan sa Kalinga partylist nga nakatabang og dako sa iyang pagtungha. Matod ni Mhel, kon wala siya maningkamot ug midiskarte sa kinabuhi, hayan kutob lang sa pangandoy ang tanan alang kaniya. "(I) continue to be brave all the time. Because walay mobarog sa akoa if dili ko. Dapat mobarog ko for myself. I need to stand with the Lord. I need to face everything," paambit ni Mhel. Siya lang ang bugtong nakatapos sa pag-eskwela sa kolehiyo sa pito ka managsuon. Ang iyang inahan ug amahan wa usab makahuman sa pagtungha. Ang kalisod sa kinabuhi ug ang pangandoy nga mapaarang-arang ang kahimtang sa pamilya, maoy nagdasig ni Mhel nga kab-uton ang kalamposan sa pag-eskwela. Karon, anam-anam nga natuman ang kanhi gipangandoy lang ni Mhel. Sa Agusto karong tuiga, magsugod na siya og tudlo sa CEC dungan sa iyang pag-eskwela og masters sa public administration. Aduna na usab negosyo nga food cart si Mhel kauban sa iyang mga higala ug networking. (SCG) This posting includes an audio/video/photo media file: Download Now

Sumbagay ug way daganay Posted: 24 Jul 2021 06:50 AM PDT Kini ang hagit ni John Riel Casimero sa iyang kontra nga si Guillermo Rigondeaux atol unya sa ilang away karong Agusto 14 (15 dinhi sa Pilipinas) didto sa Amerika. Gisaway ni Casimero si Rigondeaux sanglit base sa iyang kanhi mga away, sige lang kini og dagandagan atol sa ilang gipahigayon nga virtual press conference aron pag-promote sa ilang bantamweight championship match sunod buwan. Gidayeg ni Casimero ang iyang kontra human maoy nihulip kang Nonito Donaire kinsa niatras sa ilang away ug nikomedya basin makatulog ang ilang mga fans. "Rigondeaux, fight me.Don't run. I want a fight. You know, because Rigondeaux runs. People who are watching are sleeping. All of the fights of Rigondeaux are no good. Always run, run, and all the fans are asleep. They're tired of watching. This fight August 14th, maybe no run. You box, always you run," padayag ni Casimero. Niresbak usab ang beteranong boksingero kinsa 40 anyos na batok sa Pilipino. "It's simple and plain. You do your job, I'll do my thing. You do you, I'll do me, and then we'll see each other in the ring," padayag ni Rigondeaux. Si Casimero 30-4, 21 KOs modepensa sa iyang WBO 118-pound championship batok ni Rigondeaux 20-1, 13 KOs, sa Showtime Championship Boxing main event sa Dignity Health Sports Park. Ang lumad nga taga Cuba maoy nagkupot sa WBA's secondary world bantamweight title diin ang Japanese superstar nga si Naoya Inoue 21-0-18 KOs maoy WBA's legitimate champion sa ilang division. Ang Casimero-Rigondeaux inisyal nga gipahibawo niadtong Abril apan niadtong tunga-tunga sa Hunyo, si Donaire maoy nihulip sa Cuban isip sunod nga kontra ni Casimero. Nipadaplin si Rigondeaux gumikan sa iyang pagtuo nga iya ang makaharong sa modaog batok nilang Casimero ug Donaire ug moaway unta sa ilang undercard batok sa mas huyang nga kontra apan kalit ni withdraw si Donaire sa ilang away hinungdan nga nabalik ang orihinal nga schedule. Ang 38 anyos nga si Donaire nisakmit og balik sa WBC bantamweight title nga iyang kanhi nahuptan 10 na katuig ang nakalabay pinaagi sa pagtumba sa kanhi way pilde nga si Nordine Oubaali 14-1,12KOs niadtong Mayo 30 sa samang venue. (PAC) This posting includes an audio/video/photo media file: Download Now

Migallen: Mas dalaygon ang nahimo ni Giannis Posted: 24 Jul 2021 06:44 AM PDT Pipila na ka adlaw ang nakalabay, nagpadayon gihapon ang hisguthisgot ug sungog sa mga NBA fans kalabot sa wala damha ug makasaysayon nga pagsakmit sa kampiyonato sa Milwaukee Bucks human sa 50 ka tuig nga pagpaabot. Taliwala sa kadaugan sa Bucks, nasentro ug misilaw usab og maayo ang kapintas ug kahanas ni Giannis Antetokoumnpo kansang abilidad gikatandi gilayon sa mga banggiitang magduduwa sa NBA. Ang 26-anyos nga Giannis, ika-15 sa overall pick sa 2013 NBA Draft, miaswat sa unang kampiyonato sa Milwaukee sukad niadtong 1971 ug sa samang higayon maoy nahimong Finals MVP. Sa Game 6 diin gitapos nila ang serya sa finals, ang gitawag og The Freak mipaulbo og 50 puntos, 14 ka rebounds, lima ka blocks ug duha ka assists aron kuliton ang 105-98 nga kadaugan. Sa ato pa, hapit katunga sa kinabuk-ang puntos sa team iyaha. Gawas sa iyang pagka-MVP finals, atong lakbitan ang ubang mga achievements nga nagdugang sa iyang resume sa wala pa siya ma champion. Duha ka sunodsunod nga higayon nga nahimo siyang MVP sa regular season, katulo nalakip sa All-NBA First Team, nakadawat sa pasidungog nga Defensive Player of the Year, katulo sab malakip sa All-Defensive First Team, nahimong All-Star MVP, kalima na makaduwa sa All-Star ug nahimo usab nga Most Valuable Player. Walo pa lang siya ka tuig sa NBA, pero sa iyang gipakita nga abilidad nakasiguro na siya og luna isip usa sa pinakamaayong player sa NBA ug gituohan nga sa umaabot nga katuigan motipun-og pa ang iyang pagkolekta og mga pasidungog. Pero sa bag-ong landscape sa natad sa paugnat sa kusog, unique ug talagsaon kining gihimo ni Giannis. Kon ang ubang mga star players sama nila ni LeBron James, James Harden, Russel Westbrook, Kyrie Irving, Anthony Davis ug bisan gani si Kevin Durant nalukop na sa pagbalhinbalhin og team aron makig-uban og laing mga dekalibring magduduwa sa tinguha nga ma-champion, si Antetokoumnpo lahi kay nagpabilin sa Bucks, (ang team nga nagdraft kaniya) nga wa mo demand og mga dekalidad nga mga players. Ang iyang mga backups nga sila si Jrue Holiday ug Khris Middleton matawag nga mga second class star caliber lang. Pipila ra usab ka mga players ang nakapa-champion sa team nga maoy nag-draft kanila ug nahimong Finals MVP. Kini sama ni Dirk Nowitzki niadtong 2011. Pero before ni Nowitzki, sila si Kobe Bryant, Paul Pierce, Kawhi Leonard, Tony Parker, Dwyane Wade ug Tim Duncan nakahimo usab niini. Si LeBron James miaswat man tuod sa Cleveland Cavaliers, ang iyang unang team, ngadto sa unang kampiyonato apan kini iyang nahimo gikan na sa iyang pagbalhin sa Miami Heat diin siya nakigduyog nila ni Dwyane Wade ug Chris Boss aron makapupo sa iyang unang titulo. Tinuod nga magpabilin nga title-favorite ang mga super power teams nga langkuban sa mga star players, apan ang gipakita ni Giannis nagpamatuod nga ang saktong chemistry sa team maoy laing butang nga maghatag og dakong bintaha sa team. Ning dapita mas ni bilib pa ko ni Antetokoumnpo kon itandi nianang pipila sa atong gipanghinganlan sa unahan. Nagbunga og maayong prutas ang iyang saktong sakripisyo, taas nga pasensiya ug loyalidad sa team nga nakapahimo usab niya kon si kinsa ug unsa siya karon. Alang nako mas dalaygon ang nahimo ni Antetokoumnpo ug morag daghan sab ang nainsultohan sa maong kalampusan. (jun.migallen22@gmail.com) This posting includes an audio/video/photo media file: Download Now

Vallena: Enjoy sa ride Posted: 24 Jul 2021 06:36 AM PDT Ang kahimtang sa karsada sa 2010 sa pagsugod nako og mountain biking ug karong 2021 lahi na kaayo. Kaniadto makalusot lusot ra ko sa kilid sa outer lane kay wa pa may daghang mga motorsiklo nga kakompetensya. Apan sugod sa 2014, anam nang nagkadaghan ang mga motorsiklo tungod kay nagkabarato ang downpayment ug nanaghan ang mga habalhabal. Busa lisod nang ilusot lusot sa daplin. Duha ang imong mabuhat. Kon kada adlaw kang mosikad sama nako kaniadto, kinahanglan kang mosayo og maayo aron di maabtan sa paghuot sa mga sakyanan. O mobalhin ka og gabii aron seguradong luag ang dan. Daghan kog nakit-an nga mag bike og sayo sa gabii manungas sa Busay. Kon mosikad ka og gabii, ayaw kalimti ang blinkers, labina sa likod aron makakita ang mga drayber sa mga sakyanan nga nagsunod. Ayaw intawon nang puti kay sakit kaayo sa mga mata. Gamit lang og puwa or mixed colors. Kon naa kay mabutang sa helmet, mas maayo. Unya ayaw pagsul-ob dark nga kolor sa gabii kay di ka makita. Unya ra ba, ang panan-aw sa tawo basta gabii limitado kaayo. BAG-O PA Basta bag-o pa gani magbiseklita, hilig kaayo mopaspas og sikad. Magkiat lang ang agi. Apan ang dugay nang nagsige og sikad, either sa road bike o mountain bike, relax ra kaayo ang pacing. Mas nindot ang relax nga sikad kay sa maora kag gigukod og irong buang o gisilaban ang imong lubot. Enjoy the ride. Enjoy sa mga talan-awon nga imong maagian. Mao ni ang akong nakat-unan sa 10 ka tuig nakong sige og sikad. Kon maghinay man gud ka, imong makita ug mas ma appreciate ang palibot. Di sab makalitan o masobraan nimo pag-exert ang imong muscles. Anyway, wa man ka mag-agi og lumba. Gusto lang nimo ipakita nga kusgan ka kay sa uban nimong mga kauban? I-reserve ang imong kusog ngadto sa mga lumba. Okay ra nang mopaspas ka og sikad to burn more calories kon exercise lang ang imong tuyo or nangandam ka sa lumba nga imong apilan. Apan kon lingawlingaw ang imong tuyo, hinayhinay lang. Mas malingaw ka sa mga talan-awon nga imong maagian. Mas maka appreciate ka sa mga talan-awon. PAGKAON Usa sa akong tungason sa bukid mao ang mga pagkaon nga ang uban lisod na makit-an sa ubos. Sama sa bingka nga mao pay paghaon, init pa kaayo. O kanang linat-ang bisayang manok ug kan-ong mais. Kaniadto mag bike mi gikan sa amoa padung sa Asia Town IT Park aron lang mangape o mangaon. Kay folding bike ang ubang bikes namo, pil-on ang biseklita ug mag taxi og uli. Sa akong tan-aw, ang pagsulbong sa biseklita di na ni mohunong kon padayong maghulga ang Covid-19. Mga tawo gustong mopalig-on sa immune system pinaagi sa exercise. Molikay sa public transport aron di matakdan. Managhan sab ang mga kan-an nga ang target bikers. Basta ra ba kaon, di palupig ang gabiseklita. This posting includes an audio/video/photo media file: Download Now

Ravena, Parks moduwa sa B. League sa Japan Posted: 24 Jul 2021 06:35 AM PDT Humanon nalang ni Kiefer Ravena ang All Filipino Cup conference ubos sa NLEX Road Warriors sa dili pa siya mobiya paingon sa Japan aron moduwa sa Shiga Lakestars sa B. League. Dili mag-inusara si Ravena sanglit mao sab ang direksyon ni Bobby Ray Parks human gitugtan siya sa TNT nga maoy iyang mother team sa PBA nga makaduwa sa samang liga. "He will continue to play with NLEX at least until the final playing date of NLEX," matod ni Ronald Dulatre, opisyal sa NLEX. Magpabilin sa Road Warriors si Ravena kon moabot sila sa playoffs labi na kon mo-arangkada pa sila semis o sa finals. "If that will be the case, we will honor yung agreement namin na until the last playing date (of the all-Filipino conference). Kung hanggang saan pupunta ang NLEX," dugang ni Dulatre Gipanglantawan nga ang Philippine Cup makumpleto sa una o ikaduhang semana sa Oktubre diin sa samang panahon, mosugod na usab ang season sa B. League sa Japan. Sa iyang bahin, si Parks nakakuha na usab og clearance sa TNT human nitugot ang PBA nga mag-overseas na lang ang ilang kanhi pambato sanglit wa kini nipirma og kontrata para sa All Filipino Cup. "TNT sent a letter to PBA, it has no objection subject to PBA policy," matod ni Ricky Vargas, opisyal sa TNT ug PBA chairman. Si PBA Commissioner Willie Marcial, niingon nga kon aprobado sa mother team ang pagbiya sa ilang players, aprubado usab kini sa ilang buhatan. Ang duha ka batan-ong magduduwa sa PBA maoy mosunod sa mga Pilipino nga nagduwa sa Japan diin unang nibiya sa nasod ang manghod ni Kiefer nga si Thirday Ravena kinsa nakapirma og multi-year contract sa B. League. (PAC) This posting includes an audio/video/photo media file: Download Now

Pilipinas gisubhan og kadaugan sa Olympics Posted: 24 Jul 2021 06:35 AM PDT Gisubhan og kadaugan ni Nesthy Petecio ang kampanya sa Team Philippines sa Tokyo Olympics pinaagi sa unanimous decision nga kadaugan batok ni Marcelat Matshiu Sakobi sa Congo, Sabado, sa Kokugikan Arena. Si Petecio, ang No. 7 sa ranking sa featherweight division ug gilantaw nga usa sa lig-ong prospect sa Pilipinas nga maka medal, ang tatawng midominar sa tulo ka rounds nga nakapakombinser sa lima ka mga judges. Ang 5-0 nga kadaugan maoy nag-aswat kaniya alang sa round-of-16 diin iyang ikasangka ang top seed nga si Lin Yu-ting sa Chinese-Taipei. Saktong dominasyon ang gipakia ni Petecio nga gani usa lang sa lima ka mga judges ang mihatag og pabor ni Sakobi sa first round (29-28), Samtang ang laing upat ka mga judges mitali og 30-27 pabor kang Petecio. Nakalabni usab og luna alang sa quarterfinals si Cris Nievarez sa single sculls rowing competition. Ang lumad nga taga Sariaya, Quezon maayo usab nga nakalabang sa 2,000-meter course sa Sea Forest Waterway niadtong Biyernes human kini mitapos sa ikatulong dapit sa iyang heat. "Masarap sa pakiramdam, unang race, unang sabak, masaya, para ito sa Pilipinas," matod ni Nievarez, kinsa katapusang Filipino qualifier sa Tokyo Olympics. Siya mitapos sa rota sa oras nga 7:22.97, sunod sa duha ka world-class rowers nga sila si Damir Martin (7:09.17) sa Croatia ug Alexander Vuazovlin (7:14.95) sa Russia nga maoy kasamtangang world indoor champion. Sa laing bahin, napakyas si Kurt Barbosa sa iyang pagpakigsangka sa Koreanong top seed nga si Jang Jun sa Korea, 26-6, sa men's -58kg division sa taekwondo nga gipahigayon sa Makahuri Messe Hall A. (JBM) This posting includes an audio/video/photo media file: Download Now

Lakers paborito sa free agency Posted: 24 Jul 2021 06:32 AM PDT Duha sa mga dekalibre nga magduduwa sa National Basketball Association (NBA) gikatakdang mahimong unrestricted free agent sa off season ug interesado nga magpasakop sa Los Angeles Lakers ni Lebron James. Matod pa sa Los Angeles Times, ang shooting guard sa San Antonio Spurs nga si DeMar DeRozan ug point guard sa Toronto Raptors nga si Kyle Lowry kinsa maoy one-two punch sa Raptros kaniadto pulos nipakita og interest sa Lakers sa umaabot nga free agency. Bisan asa sa duha ka players adunay dako nga impact sa Lakers kinsa maoy kampiyon niadtong 2020 apan sayo nga nanamilit sa 2021 season kay igo lang nakaabot sa first round. Si DeRozan, 31, maoy gitan-aw nga haom sa Lakers. Siya lumad nga taga Compton, California ug niduwa sa iyang college sa USC. Ang 12 anyos nga beterano sa NBA kaupat na nahimong All Star ug nag-average og 20 puntos o sobra pa sa niaging walo ka tuig diin siya nag-average og 21.6 puntos sa 61 niya ka duwa sa Spurs uban sa 4.2 rebounds ug career high 6.9 assists. Si Lowry sa iyang bahin maoy usa sa maayong point guard sa NBA sa niaging mga season kinsa ka-unom na nahimong All Star gikan niadtong 2014-2020. Iyang gitabangan ang Raptors paglangkat sa kampyonato niadtong 2019 ug nag-average og 17.5 puntos, 7.1 assists, 4.9 rebounds, 2.5 three pointers made ug 1.5 steals sa 601 ka regular season games. Bisan kon nalimitahan ang iyang duwa gumikan sa injury sa niaging season, apan nag-average gihapon siya og 17.2 puntos, 7.3 assists, 5.4 rebounds sulod sa 46 ka mga duwa sa niaging season. Ang duha ka stars sa Raptors sa wala pa nibiya si DeRozan paingon sa Spurs makahatag og igong tampo sa edaran nga LeBron James nga maoy posibleng maghatag og dugang kampyonato sa Lakers kon mahinayon. Haom ang ilang pag-abot kon mahinayon man sanglit ang ilang point guard nga si Dennis Schroder mahimo na usab nga free agent ug posibleng di na kini mobalik sa Lakers. Ang adunay buhing kontrata sa Lakers para sa sunod season silang James, Anthony Davis, Kentavious Caldwell-Pope, Kyle Kuzma, Marc Gasol ug Alfonzo McKinnie. Si Montrezl Harrell mahimong mobalik sa team gumikan sa iyang player option. Bisan usa lang sa duha ka star nga mahimong free agent, dako na kini og ikatabang ni James ug Davis para makamugna og big-3 nga pulos All Star. (PAC) This posting includes an audio/video/photo media file: Download Now

You are subscribed to email updates from https://www.sunstar.com.ph/. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States