https://www.sunstar.com.ph/

---

• CIDG 7 nanguha'g CCTV duol sa dyRB
• ‘Sniper’ mipatay sa brodkaster
• Kawatan misulod sa balay ni Cuenco
• Editoryal: Hinaut nga masulbad
• Nalzaro: Paglaum sa nasud
• Barrita: Panahon sa mga ‘political butterflies’
• Rabacal: Pulitika sa Cebu City
• Talk to Papa Joe: Na scam ko?
• Serna: Miyembro sa “Bini” gikan sa Star Hunt Academy
• Jodi, Raymart nakuhaan og hulagway
• Morisette mo-awit sa Sona ni Duterte
• Celebrities nga magpapili, Robin mi-deny
• Sugilanon: Panamastamas sa Bibliya
• Kai mobalik sa Gilas nga mas kusgan
• Olympics sugdan
• Crawford vss Porter title fight gimando sa WBO
• Ginebra, SMB gilauman nga makabangon
• Alza mipukan sa Pagadian; Clarin mibuntog sa Kapatagan
• Pagka acting mayor ni Rama malugwayan pa
• Mga pulitiko gihangyo sa EOC di magtapok
• Daghan nang milapas sa curfew, health protocol; timaan sa pagkompyansa
• 1 patay, 2 angol sa bangga sa motor
• Casas gihatagan og gahom sa pagpirma
• 7 ka barangay sa Samboan gi-lockdown
• Ulitawo naghikog kay Suns pildi?
• Super Suroy: New normal sa Cebu Ocean Park

CIDG 7 nanguha'g CCTV duol sa dyRB Posted: 22 Jul 2021 08:53 PM PDT Criminal Investigation and Detection Group (CIDG) 7 nikuha sa mga footage sa closed circuit television (CCTV) camera footage sa mga establisemento sa dapit diin gipusil patay si Reynante 'Rey' Cortes. Basaha: Radio blocktimer DOA sa ospital Matod ni Police Colonel Ireneo Dalogdog, Regional Chief sa CIDG 7, nga ilang gikuha ang mga video sa CCTV usa ka semana sa wala pa ang krimen hangtod usa ka oras sa dihang misaka si Cortes sa DyRB alang sa iyang programa. Dugang ni Dalogdog nga sila gimandoan sa ilang director, Police Major General Albert Ignatius Ferro, sa paglusad og parallel investigation sa Cebu City Police Office alang sa dinalian nga kasulbaran sa kamatayon sa magsisibya. Pinaagi niini, ilang masuta kon wa ba panid-i og maayo si Cortes sa killer nga gituohang usa ka sniper. (AYB) This posting includes an audio/video/photo media file: Download Now

‘Sniper’ mipatay sa brodkaster Posted: 22 Jul 2021 06:44 AM PDT BLOCKTIMER sa radyo gipusil patay sa gituohang sniper human sa iyang programa sa dihang padung na unta mosakay sa iyang sakyanan aron mopauli mga alas 8:50 sa Huwebes sa buntag, Hulyo 22, 2021 sa Natalio Bacalso Avenue, Barangay Mambaling, Dakbayan sa Sugbo. Ang biktima nga si Reynante "Rey" Cortes, 45, gihulagway nga hard-hitting nga komentarista, namatay sa Cebu City Medical Center (CCM) diin siya gidala sa driver ni Cebu City Councilor Dave Tumulak. Matod ni Police Major Dindo Alaras, hepe sa Mambaling Police Station, nga ilang subayon ang mga kuha sa closed circuit television (CCTV) camera tungod kay way bisan usa ang nakakita kinsa ang namusil. Nahinabi ni Alaras ang close-in bodyguard ug driver ni Cortes nga si Felix Booc. Sulti ni Booc nga sa dihang padung mosakay ang iyang amo, usa ka lanog nga buto sa armas ang ilang nadunggan dayon nahagba na ang magsisibya. Wala sila masayod kon diin gikan ang buto ug wa usab silay nabantayan nga adunay sakyanan nga mipahilayo sa dapit sama sa motorsiklo nga kasagaran gamiton sa riding in tandem. Gituohan nila nga layo rang gunman hinungdan nga nagtuo silang sniper ang killer. "However, according sa close in ni Sir Rey, kini si Felix Booc wala gyud sila nakakita kon asa gikan ang buto. Basta nakadungog silag buto nya natumba na si sir Rey," matod ni Alaras. Si Cortes naigo sa bukton ug ang bala nilapos sa dughan gikan sa armas nga wa pa matino ang matang ug kalibre. Si Tumulak, kinsa nisunod sa programa ni Cortes, nitug-an nga buhi pa nga gidala sa iyang driver ang biktima paingon sa CCMC apan naa na kini sa kritikal nga kondisyon. Sa interbyu sa Superbalita Cebu, si Tumulak niingon nga mga alas 8:30 sa buntag nagkaabot pa sila ni Cortes kay nag-una ang programa. Mga alas 8:57 dunay nisaka nga tawo nga nipahibawo kaniya nga gipusil si Cortes hinungdan nga iyang gimandoan ang iyang driver sa pagdala kang Cortes sa ospital. Iyang gimandoan si Cortes sa di pag-utong aron di mosamot pag-agas ang daghang dugo. Pagka alas 9:55 sa buntag gideklara sa doctor nga nabugto-an sa gininhawa ang magsisibya tungod sa kadaot nga naangkon niini sa iyang sulod sa lawas. Hulga Nitug-an si Booc sa mga imbestigador nga daghan og kaaway si Cortes tungod kay naigo sa komentaryo niini sa radyo. Sigun ni Alaras nga ilang tagsa-tagsaon sa pag subay kon kinsa kining mga personalidad nga giingong gikakontra ni Cortes aron didto sila magsugod sa imbestigasyon. Ang Cebu City Police Office miumol dayon og Special Investigation Task Group (SITG) aron maoy motutuk sa kamatayon ni Cortes. Matod ni Police Lieutenant Colonel Wilbert Parilla, deputy city director for operations, maglangkob sa SITG mao ang Mambaling police station, Investigation Section sa CCPO, Criminal Investigation and Detection Group (CIDG) 7 ug PNP Crime Laboratory. "As per directive by our city director, the Station 11 commander was directed to request for the creation of SITG considering that the victim Rey Cortes is a media personality," matod ni Parilla. Si Cortes ang ika 14 sa 15 nga gipusil sulod lang ning buwana nga natala sa kapulisan sa siyudad sa sugbo. Samtang si Kit Matus-Cortes, asawa ni Rey, nikompirmar nga daghan kaayo sila og mga hulga nga dawat. "Daghang kaayo mig hulga sa mi-aging tuig pa, kami daw tibuok pamilya patyon, naay mga trolls sa social media, ako, akong mga anak makadawat sab," dugang ni Cortes. Gipanghinaot ni Kit nga mahatagan og hustisya ang kamatayon sa iyang bana. This posting includes an audio/video/photo media file: Download Now

Kawatan misulod sa balay ni Cuenco Posted: 22 Jul 2021 06:44 AM PDT GISAKA sa wa mailhing kawatan ang balay ni Cebu City Councilor James Cuenco pasado ala 1 sa kaadlawon sa Huwebes, Hulyo 22, 2021, sa Barangay Guadalupe, Dakbayan sa Sugbo. Ang kawatan kinsa nakuha sa closed circuit television (CCTV) camera nga nagbitbit atol sa iyang pagsulod sa balay. Sa video nga nakuha ni City Councilor Dave Tumulak, nagpakita nga gisuhid sa kawatan ang balay hangtod nga siya naabot sa lawak. Ang konsehal sa south district niingon nga pwerte niyang pagkahinanok ug wala siya makamatngon sa pagsulod sa kawatan. Nagpasalamat nalang siya kay kon nakabantay pa siya, posible nga gipusil na siya sa kawatan. Nakuha gikan kaniya ang pitaka nga adunay sulod nga P25,000 cash. (PAC) This posting includes an audio/video/photo media file: Download Now

Editoryal: Hinaut nga masulbad Posted: 22 Jul 2021 06:42 AM PDT LAIN na sab nga high profile nga pagpatay ang nahitabo dinhi sa Sugbo. Human sa iyang radio program sa sibyaanang dyRB sa Huwebes sa buntag, gipusil patay si radio blocktimer Rey Cortes sa wa pa mailhing gunman. Nailhan si Cortes nga hard-hitting nga komentarista nga way gipili basta sawayunon, iya kining atakihon. Sa iyang trabaho, nakahimo to siya og daghang mga kaaway. Gani, siya ug iyang pamilya mismo nakadawat og mga hulga sa ilang kinabuhi. Mao ni ang makapalisod sa imbestigasyon sa kapulisan tungod kay daghang mga tawo ang iyang napasakitan sa mga komentaryo. Labing seguro nga una gyud nga anggulo nga subayon sa kapulisan mao ang iyang trabaho. Apan labing lisod sa imbestigasyon mao ang kadaghan sa subayon. Kon naglisod pagsulbad ang kapulisan sa ubang high-profile nga mga kaso, dako ang kahigayunan nga sama sa uban, di gihapon kini masulbad. Kutob ra sa person of interest, wa na moirog pa ang imbestigasyon. kay kuno way kooperasyon sa pamilya ug saksi. Labina gyud niining mga kaso sa pagpatay nga sama sa kang Cortes. Bisan pa sa kadaghan sa nasuko kaniya, buhat man sa kapulisan ang pag-imbestigar sa bisan unsa nga matang sa krimen, labina sa usa ka media practitioner bisan kon siya usa ka radio blocktimer, kinahanglan ila ning susihon. Bitaw kon trabahuon lang sa pulis ang pag-imbestigar sa mga kaso, wa may krimen nga di masulbad. Namatud-an na ni sa ubang mga kaso nga gidangop sa National Bureau of Investigation (NBI) nga nasulbad, sama sa pagpatay sa usa ka abogado. Paspas kaayong nakakuha og mga ebidensya, naunhan pa ang mga pulis sa ilang pagsikop ug nakapasaka pag kaso. Nasulbad sa NBI ang kaso kay ilang gitutokan og maayo. Hinaut masulbad dayon kining kaso ni Cortes kay ang pagpatay sa usa ka komentarista, blocktimer man o di, usa ka pagpangatake sa kagawasan sa pagpadayag. This posting includes an audio/video/photo media file: Download Now

Nalzaro: Paglaum sa nasud Posted: 22 Jul 2021 06:41 AM PDT MATOD pa sa atong nasudnong bayani, Dr. Jose Rizal, nga ang "mga batan-on mao ang paglaum sa atong nasud." Sa iyang sinuwat nga "to the Filipino youth," miingon si Rizal: "Ang mga batan-on mao ang fair hope of the Fatherland."Mao sab ni gituhuan sa atong mga lider nga ang mga batan-on maoy maghatod sa positibong mga kausaban nga sila mao ang maghatag og dakong kausaban sa nasud. Sila ang makaestablisar sa epektibo, tinuod ug matinud-anon nga gobiyerno. Ang sunod lang nga pangutana mao kon si kinsa ang gihimo nilang sumbanan? Kini bang atong kaliwatan karon? Masaligon ba kita nga maayong binhi sa pagtulun-an ang atong gisabwag ngadto kanila? O ang dunot ug mao gihapon nga sistema sa pamulitika ang atong gibilin? Magpaabot ba kita nga mangga ang ibunga kon nagtanum kitag bayabas? Dia kining mga batan-on karon nga misalmot sa pulitika, morag naka kat-on na sa mga binoang sa eleksiyon. Mora na hinuon og nakaon sila sa sistema sa traditional nga pamulitika. Sumala god, ang Sangguniang Kabataan (SK) makamao na mamalit og botos. Dili hinuon ilang kuwarta kay iya sa ilang mga ginikanan. Apan nganong mosugot man sila nga manipulahon ang eleksiyon? Unya inig lingkod na sa konseho isip ex-officio member, mosandig na og partido ug magpagamit sa tang-an nga mga pulitiko. Aber kinsa man karon sa SK federation presidents nga nanglingkod sa local councils ang wala mo-affiliate og political party? Dili na sila indepente kay madiktahan naman sa partido. Naa bitaw batan-on nga mga kongresista marukoy na man hinuon. Wala kaha ta mag-train og umaabot nga political monsters ning atong kabataan karon, inig dagko nila ug inig abot sa ilang political maturity, mas tang-an pa hinuon nga mga pulitiko? Ambot kon ang atong mga batan-on ba ang makapa-usab sa imahen sa atong pulitikanhong sistema? Dia tuod ning mga batan-ong mga lider karon sama nila ni Pasig Mayor Vico Sotto, Manila Mayor Isko Moreno ug Inday Sara Duterte sa Davao. Apan magpabilin kaha silang matinud-anon, ligdong ug seryoso sa katungdanan? Dili kaha ni sila malamoy sa dunot natong sistema sa umaabot nga mga katuigan sama sa atong mga pulitiko sa karon? This posting includes an audio/video/photo media file: Download Now

Barrita: Panahon sa mga ‘political butterflies’ Posted: 22 Jul 2021 06:39 AM PDT UNSAY tawag sa mga politiko nga magbalhin-balhin og partido? Gitawag sila nga mga "political turncoats," mga "political butterflies" ug balimbing. Sa mga karaan, gitawag sila nga mga himungaan nga puwa og lubot kay magbalhin-balhin og pugaran. Gitawag silang balimbing kay ang maong prutas daghan man og nawong. Sama sab sila sa mga alibangbang nga magbalhin-balhin sa pagpaniba gikan sa usa ka buwak ngadto sa lain aron pagsuyop sa ilang dugus. Ang tumong sa mga political butterflies mao ang political survival. Dali silang mopauyon-uyon sa partido nga ilang gibalhinan. Sama sa matod pa giingon ni Charles Darwin, "It is not the strongest of the species that survives, nor the most intelligent that survives. It is the one that is most adaptable to change." *** Dali silang makabalhin sa laing partido. Ang umaabot nga 2021 elections maoy ilang signal aron mangita na sab sila og laing partido nga kabalhinan, labi na gyud kadtong partido kansang kandidato sa pagkapresidente dakog purohan nga modaog kay adto man sila mopasilong. Sama sa usa ka dakong politiko kaniadto nga akong nahinabi human siya mapildi sa eleksyon. Ako siyang gipangutana kon wa ba siya biya-i sa iyang mga political supporters. Matod pa niya, "Kinsa pa may mopasilong nako nga wa na man koy landong." Ang mga kongresista, ingon man ang mga lokal nga opisyales, nagkinahanglan sa pagpaluyo sa mga nasyonal nga opisyales alang sa pagkuha og mga proyekto ug mga doleouts sa ilang nga constituents sa ilang mga distrito ug lokalidad. Busa nagkinahanglan silag kapasilongan. *** Sumala pa sa inquirer.net, sa 2013 midterm elections, labing menos 77 ka mga kongresista nibalhin sa laing mga partido, ang kadaghanan kanila ngadto sa kanhi ruling party, ang Liberal Party (LP) ubos ni anhing Presidente Noynoy Aquino. Ang mga sakop sa LP hapit modoble gikan sa 30 sa 2010. Kadaghanan sa namalhin sa LP mga sakop sa Lakas-CMD, ang ruling party ubos sa administrasyon ni kanhi Presidente Gloria Macapagal Arroyo. Nisaka pa gyud ang mga sakop sa LP ngadto sa 97 human sa 2013 elections. Samtang nag-anam kadaghan ang mga magbabalaod nga sakop sa PDP-Laban, ang partido nga nagpaluyo ni Presidente Rodrigo Duterte hangtod nga niabot og 121 sa wa pa ang 2019 elections. This posting includes an audio/video/photo media file: Download Now

Rabacal: Pulitika sa Cebu City Posted: 22 Jul 2021 06:38 AM PDT MURAG nahan-ay na ang kamada sa mga mokandidato sa piniliay sa Cebu City sa Mayo 2022. Dili na mahinayon ang gidudahang pagkatunga sa administration party kay gituhoang nahilot na sa pagpatawag ni Presidente Rodrigo Duterte kang Bise Mayor Mike Rama. Sa laktod nga pagkasulti, si Rama na ang modagan sa pagka-mayor, dili na si incumbent Mayor Edgardo Labella. Gituhoan nga dili na magpapili pag-usab si Labella kay mopahuway na tungod sa iyang sakit. Si Konsehal Raymond Alvin Garcia maoy gituboy nga himuong bise ni Rama. Sa Bando Osmena–Pundok Kauswagan (BOPK), pilian pa kinsa kanila ni Association of Barangay Council (ABC) president ug Konsehal Franklyn Ong ug outgoing Congressman Bebot Abellanosa ang himuong standard bearer ug si kinsa ang mo-bise. Sa pagka-kongresista sa north district wala pay siguro kon si kinsa ang bendisyunan sa Barug-PDP. Adunay nagtuo nga gideklarar na si Konsehal Niña Mabatid, apan mismo si Rama mipahibawo nga wala pa silay napili-an nga kandidato. Si Richard Yap maoy mikandidato sa distrito, apan napildi siya ni Kongresista Raul del Mar. Ang nag-awhag kaniya pagkandidato mao ang iyang classmate nga si Presidential Assistant for the Visayas Secretary Mike Dino. Dili kaha siya tabangan ni Dino aron maoy mahimong kandidato? Sa dihang namatay si Raul, gituhoan nga ang mudagan puli sa amahan mao si kanhi kongresista Cutie del Mar. Apan daghan nang mga tabi-tabi nga dili mulansar si Cutie. Interesado usab sa pwesto si Mimo, anak ni anhing gobernador Lito Osmeña. Nahisgutan usab ang ngan ni kanhi konsehal Mary Ann de los Santos. Sa south district, buot mudagan pag-usab si kanhi konsehal Joy Pesquera. Interesado usab si Konsehal Edu Rama sa administrasyon. Wala pay nahisgutan sa habig sa BOPK. Ang alegre niini mao ang pagpili sa padaganon sa pagka-konsehal. *** Ang labing siguro nga molansar sa pagka-presidente mao si Senador Panfilo "Ping" Lacson ug si Senate President Vicente "Tito" Sotto pagka-bise presidente. Duna koy pagduda nga mag-tandem mao sila si kanhi senador Ferdinand "Bongbong" Marcos ug bise si President Rody Duterte o dili ba si Mayor Sara Duterte Carpio. Nahimo kining maong pangagpas tungod kay human sa dugay nga pagpakahilum, mikalit man lang og guwa si Bongbong sa social media ug sa mga tarpaulin nga modagan siya pagka-presidente. Dili ko motoo nga makig-atbang siya kang Mayor Sara kon seryuso ang mayor nga molansar pagka-presidente. Kanunay usab niyang gibalik-balik nga imposible nga mahitabo ang Duterte-Duterte tandem. Sa laing bahin, si Senador Manny Pacquiao gipaabot nga pormal nga mu-anunsiyo sa iyang kandidatura human sa iyang away kang Errol Spence. Daghang nagtuo nga si Bise Presidente Leni Robredo dili modagan sa pagka-presidente. (mannyrabacal1144@gmail.com) This posting includes an audio/video/photo media file: Download Now

Talk to Papa Joe: Na scam ko? Posted: 22 Jul 2021 06:38 AM PDT DEAR Papa Joe, Ako si Nelda, usa ka inahan diri sa Mandaue City. Ang akong patambagan mao ning usa ka kompaniya nga magpautang sa malls ug department stores. Last year, nakautang ko nilag camera unya mga usa ka tuig nakong bayad, karon naimpas na. Pag-utang nako sa akong item, niingon ang ilang agent nga tagaan kog credit card gikan pod sa kompaniya. Gidawat pod nako kay niingon man ang agent nga naa ra nako ug i-activate ba nako or dili. Wala kunoy annual fee or uban pang hidden charges. Pero dihang naimpas na akong item, syempre wala na koy utang nila, pero sige pa man gihapon panawag kay naa kuno koy charges sa akong credit card. Wala man nako gi activate ang card. Naa pa gani sulod sa sobre unya maningil man sila, dili ra ba mohunong og tawag.Every 20 minutes samok-samokon gyud ka bisag dunay trabaho ug nag online class akong anak. Disturbo kaayo. Nitawag na pod ko ug ni e-mail sa ilang customer service para ipaputol og ugaling man gani na activate tog iyaha ra pero dili makontak ug wala gyud reply akong e-mail. Unsay buhaton ani? Asa ta pwede ka reklamo? Nelda *** Dear Nelda, Daghan kong nadunggan nga sama sa imong sitwasyon about anang kompaniyaha. Pwede ta ka reklamo legally pero mao lagi ang kahasol kay mogamit na pod og abogado. Pero og willing gyud ka, why not? You can always file a case. I-compile lang nang imong mga history sa imong emails nga ni request naka nilag paputol or ni request ka nilag pahunong sa pagsigeg panawag kay para magamit sa ebedensiya. Naa pay lain nimong buhaton, kon pwede kang mag change og number ilisi na lang imong simcard para dili naka makontak.Daghang salamat Papa Joe (Kon kamo dunay problema ipadala sa papajoesuperb@gmail.com) This posting includes an audio/video/photo media file: Download Now

Serna: Miyembro sa “Bini” gikan sa Star Hunt Academy Posted: 22 Jul 2021 06:37 AM PDT DUNAY usa ka grupo sa mga batan-ong babaye nga nakigtigi sa grupo sa mga batan-ong lalaki aron mapalanog ang ilang matang sa musika ug kanta. Kini ang grupong BINI nga sakop sa Star Magic sa ABS-CBN. Naporma kini pinaagi sa Star Hunt Academy (SHA) nga gilangkuban nila ni Aiah,20; Colet,19; Maloi ,18; Gwen,17; Stacey,17; Mikha,16; Jhoanna,16; ug Sheena,16. Ang ilang pre-debut single nga "Da Coconut Nut" gipagawas niadtong Nobiyembre. Nisunod niini ang ilang debut single nga "Born To Win" nga gipagawas sa miaging Hunyo diin gipakita ang ilang mas isog nga kalidad ug lahi sa una nilang kanta nga "Da Coconut Nut." Ilang girepresentahan ang batan-on, moderno ug maayong Filipina nga mahigala-on pero mahimo usab nga isog kon gipangayo sa kahigayonan. *** Nakahisgot ko dinhi sa una bahin sa mga gibaligya sa online stores nga hasta ang pilok sa kanding o pilikmata ng kanding gibaligya na didto. Sa una kay makakita lang ka ani sa sidewalks dapit sa Ludo & LuYm building sa Cebu downtown area. Karon morag nagkagrabe na hasta ang mga kinatawo sa babayeg lalaki ug ang mismong sex act makita na. Kini tungod sa mga produkto nga alang sa kinatawo sa babaye ug lalaki. Nakamatikod na tingali ang Facebook tungod kay niadtong Miyerkules sa gabii, nakadawat ko og survey form nga nangutana kon may nakita ba ko nga pornographic sa Facebook. Siyempre, positibo ang akong tubag kini tungod sa kasinatian nako niadto sa Cebu Provincial Council for the Welfare of Children diin mga ingon niini kanunay namong gibantayan tungod ug alang sa kabataan sa lalawigan. *** Coincidence ba kaha o unsa? Nikomentaryo ko nga sayop ang gisulti sa usa ka kandidata sa Reyna ng Tahanan sa "It's Showtime" nga niingon nga '...nag-iiwan ng kataga...' tungod kay usa ka sentence ang gisulti ug di kay kataga lang. Morag nagka-abot ang among brain waves ni Vice Ganda niadto tungod kay wa pa gani ko makahuman, nisulti si Vice nga kinahanglan na nga korehi-an ang maong sayop. Kay ang kataga bale usa lang ka pulong o grupo sa pila ka pulong ug di kay usa gyud ka sentence. Mao na diha! *** Naluoy ko sa grupo sa mga kasambahay (lalake ug babaye) nga niapil sa "Everybody Sing" di pa lang dugay. Di gyud ta kapaabot nga hanas sila sa mga kanta kay duna gyud silay trabaho sa panimalay sa ilang mga amo. Diyes mil ra gyud ang ilang nadag-an nga bahinon sa 25 ka buok, bale P400 ra gyud intawn ilang madala. Wa makaagwanta si Vice, iyang gidugangan og P100,000 mao nga tag P4,400, kapin kon kulang, ang madala sa matag contestant. Nakahilak intawn ang mga nangapil lakip ang mga lalaki. Bisan tuod kon may hambogan magtan-aw ni Vice, manggihatagon diay kini. This posting includes an audio/video/photo media file: Download Now

Jodi, Raymart nakuhaan og hulagway Posted: 22 Jul 2021 06:37 AM PDT SA TALAGSAONG kahigayonan nakita nga nagkuyog sa usa ka picture ang aktres nga si Jodi Sta. Maria ug ang boyfriend niini nga si Raymart Santiago. Ang maong picture gi-post ni Shaina Magdayao sa iyang Instragram stories, taho sa PUSH. Gikatahong kuha kini atol sa ika-48th birthday celebration sa aktor nga co-star ni Shaina sa "FPJ's Ang Probinsyano," nga gipahigayon niadtong Hulyo 20. Nasayran nga very private ang duruha sa ilang relasyon ug dili kaayo sila pagya ngadto sa publiko ingon man ang pag-post og picture diha sa social media. Uban sa maong picture mao ang photographer nga si Sara Black, TV Patrol correspondent Gretchen Fullido, Raymart, Jodi ug Shaina. (Superbalita Cebu) This posting includes an audio/video/photo media file: Download Now

Morisette mo-awit sa Sona ni Duterte Posted: 22 Jul 2021 06:36 AM PDT PIPILA sa mga netizen ang wa ka-uyon sa dihang ang singer nga si Morisette maoy mo-awit sa Philippine national anthem atol sa final State of the Nation Address (Sona) ni Presidente Rodrigo Duterte didto sa Batasang Pambansa, Quezon City, Hulyo 26. Tungod niini, ginganlan ang singer nga Diehard Duterte Supporter kon DDS. "Undersecretary Demic Pabalan of Radio TV Malacanan (RTVM) said that Morissette will sing the national anthem to the accompaniment of pre-recorded music from the Philippine Philharmonic Orchestra (PPO) under conductor Herminigildo Ranera," tipik sa artikulo sa ABS-CBN. Usa ka netizen mi-react: "Performing for this administration is performing for Duterte. Kaya nga maraming singers ang NEVER pumayag mag perform for Trump when he was in office. Same thing here. If she has any ounce of respect for herself and her career, she would not accept this. Unless she's a DDS." (Superbalita Cebu) This posting includes an audio/video/photo media file: Download Now

Celebrities nga magpapili, Robin mi-deny Posted: 22 Jul 2021 06:36 AM PDT SA NAGKADUOL nga pinili-ay ubay-ubay sa mga showbiz personality ug celebrity ang gidungog nga modagan sa umaabot nga election. Samtang direktang gisalikway ni Robin Padilla ang matod pa magpapili siya pagka-Senador ubos sa partido ni Presidente Rodrigo Duterte. "Maraming nangarap na maging pulitiko ako. Hindi mangyayari yun. It's not gonna happen. Gusto kong magkaroon ng tahimik na buhay ang mga anak ko," tipik sa pamahayag ni Robin sa YouTube channel sa iyang misis nga si Mariel Rodriguez-Padilla, taho sa PEP.ph. KANDIDATO Gihugon-hugon sab nga magpapili sa eleksiyon sa posiyon nga senador mao sila si Willie Revillame, Raffy Tulfo. Nitumaw sab ang pangalan ni Arjo Atayde nga mosuway nga pagka-kongresista sa District 1 sa Quezon City. Ang aktor-host nga si Anjo Yllana interesado sa posisyon pagka-kongresista sa District 5, Camarines Sur. Samtang si Senate President Tito Sotto modagan pagka-bise presidente kansang running-mate pagka-presidente mao si Senator Panfilo Lacson ubos sa partido National People's Coalition (NPC). Sila si JV Ejercito, Chiz Escudero, Loren Legarda, at Lucy Torres-Gomez ang upat sa 10 ka senatoriables sa NPC. Nasayran nga anaa na sa iyang katapusang termino si Lucy pagka-kongresista sa 4th District sa Leyte. Gidungog sab nga si Ormoc City Mayor Richard Gomez magpa-elect pagka-kongresista hulip sa biyaang posisyon sa iyang misis nga si Lucy. (Superbalita Cebu) This posting includes an audio/video/photo media file: Download Now

Sugilanon: Panamastamas sa Bibliya Posted: 22 Jul 2021 06:35 AM PDT Ni Alcea Maningo Cangyan, Carmen, Cebu SA BALAY ni Denver sa Mandag-um dunay Bible Study nga pagahimuon matag adlawng Sabado. Alas sayis sa hapon magsugod ug mohangtod sa alas siyete sa gabii. Si Pastor Jason Tabla sa Good Shepherd Ministry maoy lecturer. Atol nga nakabisita si Rudy, maguwang ni Denver, nga usa ka pastor sa True Religion Assembly. Gipasulti si Rudy. Nakuryuso si Jason kon unsay mga doktrina nga ikapamahin ni Rudy sulod sa 40 anyos nga pagtuon sa Bibliya. "Wala ako magsangyaw og doktrina. Akong gisangyaw ang Biblical Truth, mga kamatuoran gikan sa Bibliya nga dili matuis. Ang doktrina tinuis na kana gikan sa mga bersikulo sa Bibliya," ni Rudy. Diha siya maglingkod sa habagatang habig sa cottage ni Denver. Daghan ang nanambong sa Bible Study karon, maong ania kini himoa sa cottage kay dakog lugar. Naminaw ang 20 ka tawo uban sa mga suod sa kinabuhi ni Denver. Diha ang iyang mga maguwang nga sila si Maria, Edith, Diogene, ug Dennis. Diha si Raquel, asawa ni Denver, ug ang ilang mga anak, sila si Kate ug Karyll. Diha sab si Reinelle, asawa ni Dennis, ug ang ilang mga anak nga sila si Samantha ug Kelly. Diha si Mira, asawa ni Rudy, ug mga klasmeyt ni Mira nga sila si Marilou, Cornelia, Melona, Bebe, Odet, Betchy, Anghelo, Estong ug Jose. Mipadayon si Rudy pagpamulong, "Nasaysay na nako ang tinuod nga relihiyon, ang tinuod nga Diyos ug ang tinuod nga kamatuoran gikan ni Jesus. Aron mahimong mabulukon kining atong Bible Study, gusto kong motubag sa mga pangutana gikan ninyo nga naminaw karon!" "Unsa may mga kalihukan sa tinuod nga relihiyon?" ni Jason nga naglingkod sa tuo ni Rudy. Nangita siyag katin-awan o namasin nga masipyat iyang karibal nga pastor. "Ang tinuod nga relihiyon magasulbad sa kapobre sa kalibutan ug magmintinar sa katarong ug kalimpyo sa katawhan," ni Rudy. "Ang tinuod nga relihiyon dili manguwarta. Ako, gikan sa Lunes hangtod sa Biyernes nanarbaho ko. Kay retirado ko nga abogado, duna koy gamayng pensyon. Hinuon, makakuwarta gihapon kog ginagmay kon may mangunsulta ug magpahimo og dokumento. Sa Sabado ug Dominggo magsangyaw ko nga libre. Kon dunay gusto mohatag nakog kuwarta, ako silang ingnon nga ihatag lang na sa labing ubos sa inyong paryente, silingan o higala. Kon naa gyuy mohatag og kuwarta sa akong relihiyon, adto kini padung sa mga pobreng tabangunon nga akong nailhan." Nangyamiid ug unya miduko si Jason. "Sa pagkakaron nagkadaghan ang mga relihiyon, apan daghan gihapon ang mga pobre. Ngano man ni?" gikan ni Denver. "Tungod kay way laing tinuod nga relihiyon, gawas sa akoa nga mao ray tinuod," ni Rudy. "Ang tanang mo-alagad sa tinuod nga relihiyon mo-alagad nga boluntaryo. Way giapas nga suweldo. Sila mo-sakripisyo tungod sa gugma sa Diyos ug sa isigka tawo." "Unsa may gusto nimong usbon sa Bibliya?" ni Jason nga miyahat pagtan-aw kang Rudy. "Ang mga suwat ni Paul angay papason sa Bibliya. Kon dili bakak, puro kini mensahe sa pagpakaaron-ingnon," ni Rudy. "Ang sayop nga paggamit sa Bibliya angay korehian. Kausa ra namatay si Jesus. Kausa ra Siya nabanhaw ug tua na Siya sa langit. Dili nato gamiton ang Bibliya sa pagpangilad. Ang kalibutan sa panahon ni Jesus lahi kaysa karon human molabay ang dos mil ka tuig. Dili nato ipakatap nga si Jesus namatay tungod sa atong sala. O ang atong sala gibayran sa kamatayon ni Jesus. Kana maoy dakong panamastamas sa Bibliya. Ang kamatayon ug pagkabanhaw ni Jesus usa ka historical truth. Ang iyang pagtulun-an nga gibilin maoy usa ka eternal truth. Ang mga pagtulun-an ni Jesus maoy atong tun-an aron matarong atong kinabuhi. Apan dakong bakak o ilad ang pag-ingon nga si Jesus nagpakamatay tungod sa atong sala. Angay nang wad-on ang pagpangilad sa tawo pinaagi sa Bibliya. Mobasa ta sa Bibliya pero bantayan nato ang mga katuigang nanglabay!" Nakapanglab-ok og laway si Jason. Dako ang iyang pagbasol nganong gipasulti pa si Rudy. Dakog puruhan nga mawad-an na siyag panguwarta. (Katapusan) This posting includes an audio/video/photo media file: Download Now

Kai mobalik sa Gilas nga mas kusgan Posted: 22 Jul 2021 06:33 AM PDT GITATAW sa batan-ong Pinoy nga higante nga si Kai Sotto nga mobalik ra siya pagduwa sa Gilas Pilipinas sa ugma damlag ug iyang gipasalig nga ning higayuna, mas kusgan ug mas daghan na siya'g nakat-unan. Sa miaging adlaw, gianunsyo sa 19 anyos ug 7'3" nga basketbolista nga dili siya moduwa sa Gilas Pilipinas sa kampanya niini sa 2021 Fiba Asia Cup nga ipahigayon sa sunod buwan sa Jakarta, Indonesia. Ning maong desisyon, dili na sab mouban si Sotto sa pag-asdang sa Gilas sa Jordan alang sa The King's Cup sa sunod semana, nga tipik sa ilang preparasyon alang sa Fiba Asia. Nangayo og pasaylo ug sa samang higayon nanghinaot si Sotto nga masabtan siya sa Filipino basketball fans ning iyang desisyon. Gipasabot ni Sotto nga magtutok na siya sa iyang obligasyon sa Adelaide 36ers alang sa National Basketball League (NBL), usa ka professional league sa Australia. Giklaro ni Sotto nga ganahan gyud unta siyang makatabang sa Gilas Pilipinas apan kinahanglan niyang moduwa sa NBL, nga dili ikalimod, posibleng mahimong pultahan alang sa iyang pangandoy nga makaduwa sa National Basketball Association (NBA). "But as you all know, I already committed to join the NBL starting the 2021/2022 season and I will be in Adelaide on August 1 to start my two week quarantine, get settled and start preparing for preseason activities," pasabot ni Sotto nga napatik sa Spin.ph. Si Sotto niduwa sa Gilas sa ikatulo ug katapusang tipik sa Fiba Asia qualifiers niadtong Hunyo, 2021 sa Clark, Pampanga diin natabangan niya ang national team nga maharos pagdaog ang tulo mga tahas niini sa kompetisyon pinaagi sa iyang averages nga 9.3 puntos, 7.0 rebounds, ug 1.3 assists. Niduwa sab siya sa Gilas sa Fiba Olympic Qualifying Tournament sa Belgrade diin nag-average siya og 9.0 puntos ug 4.5 boards. "Playing in the NBL is a critical step in my basketball journey and now that I have fulfilled my qualifier window and OQT commitments to the National Team, I want to focus on playing well for the Adelaide 36ers and focus 1000% on giving the 36ers all my best," batbat ni Sotto. (ESL) This posting includes an audio/video/photo media file: Download Now

Olympics sugdan Posted: 22 Jul 2021 06:23 AM PDT SUGDAN karong adlawa ang Tokyo Olympics diin 19 ka Pinoyng mga atleta ang mamasin nga makalangkat og bulawan gikan sa Japan. Sa 19 ka mga atleta sa Pilipinas, tulo niini ang taga Sugbo ug kini mao sila si Margielyn Didal sa women's skateboarding, Elreen Ando sa women's weightlifting, ug Kiyomi Watanabe sa women's judo. Sa tulo nga taga Cebu, gikonsiderar nga si Didal maoy adunay labing dakong poruhan nga makalabni og medalya sa matag upat ka mga tuig nga kompetisyon. Si Didal, kinsa lumad nga taga Lahug, Cebu City, nag-post og mga hulagway sa iyang social media account diin nag-ensayo siya sa Ariake Urban Sports Park, ang mismong venue nga pahigayunan sa skateboard competition. Sa caption sa usa sa mga hulagway nga iyang gi-post, gipadayag ni Didal ang iyang gibati. "The Olympics are way more serious than I thought," caption ni Didal, kinsa usa ka gold medalist sa 2018 Asian Games ug 2019 Southeast Asian Games. Ang skateboard competition sugdan karon pang Hulyo 25, 2021 diin mokampanya si Didal sa mokampanya sa women's street event. Ang ubang mga atleta sa Pilipinas nga mohamag sa kompetisyon mao sila si Ernest John Obiena (athletics - men's pole vault), Carlos Yulo (gymnastics – artistic), Eumir Marcial (boxing - men's middleweight), Irish Magno (boxing - women's flyweight), Nesthy Petecio (boxing - women's featherweight), Carlo Paalam (boxing - men's flyweight), Hidilyn Diaz (weightlifting - women's 55kg). Naa sab sila si Cris Nievarez (rowing - men's single sculls), Kurt Barbosa (taekwondo - men's -58kg), Jayson Valdez (shooting - men's air rifle 10m), Juvic Pagunsan (men's golf), Kristina Knott (athletics - women's 200m), Bianca Pagdanganan (women's golf), Yuka Saso (women's golf), Remedy Rule (swimming - women's 200m butterfly), ug Luke Gebbie (swimming - men's 50m and 100m freestyle). Si Nievarez maoy labing unang mohamag sa Pinoy nga mga atleta diin mopakita siya og aksyon karong alas 8:00 sa buntag (RP time) sa dili pa ipahigayon ang opening ceremony karong gabii. (ESL) This posting includes an audio/video/photo media file: Download Now

Crawford vss Porter title fight gimando sa WBO Posted: 22 Jul 2021 06:22 AM PDT GIMANDUAN sa World Boxing Organization (WBO) si welterweight champion Terence Crawford sa pagdepensa sa iyang titulo batok sa kanhi title holder nga si Shawn Porter. Sa suwat nga gipadala ngadto ni Bob Rank sa Top Rank, ang promoter ni Crawford, ug ni Tom Brown sa Premier Boxing Champions, gibutyag sa WBO nga hatagan ang duha ka mga kampo og 30 ka mga adlaw sa pag-negotiate alang sa maong away. Kon way kasabutan nga makab-ot sulod sa gihatag nga mga petsa, imando ang purse bidding aron pagdeterminar kon kinsa ang makakuha sa katungod sa pag-promote sa away. Sa sayo pa, si Crawford kinsa wala pay pildi sa 37 ka away nga may 28 ka knockouts, maoy unang gikataho nga ikontra unta ni Pacquiao. Ang away giingon nga adto ipahigayon sa Middle East apan wala kini mahinayon tungod sa problema sa pinansiyal nga aspeto. (JBM) This posting includes an audio/video/photo media file: Download Now

Ginebra, SMB gilauman nga makabangon Posted: 22 Jul 2021 06:22 AM PDT GILAUMANG makabangon ang magsuong puwersa sa San Miguel Beermen ug Barangay Ginebra Gin Kings gikan sa pagkapandol sa ilang pagpakigbatok og lainlaing kontra karong hapon sa 46th Philippine Basketball Association (PBA) Philippine Cup sa Ynares Center sa Pasig City. Ang Gin Kings, nga nabunyagan og 75–94 nga kapildihan batok sa TNT KaTropa, makigbatok sa Blackwater Bossing (0-2) sa premirong duwa sugod sa alas 3:00 sa hapon. Samtang ang Beermen, nga nasubhan og 87-93 nga kapildihan batok sa Meralco Bolts, makigharong sa NLEX Road Warriors (1-1) sa main game sa alas 6:00 sa gabii. (ESL) This posting includes an audio/video/photo media file: Download Now

Alza mipukan sa Pagadian; Clarin mibuntog sa Kapatagan Posted: 22 Jul 2021 06:19 AM PDT NAKAHAGPAT sa ilang unang daog ang Alza Alayon Zamboanga Del Sur sa nagpadayon nga Chooks-to-Go Pilipinas VisMin Super Cup sa dihang kulbahinam nilang gipatapsingan ang host Pagadian Explorers, 78-72, Miyerkules sa Pagadian City Gymnasium. Ang panagkombuya sa mga beteranong sila si Dennis Daa, Eluid Poligrates ug Dan Sara maoy nahimong mahait nga hinagiban sa Alza Alayon aron irehistro ang ilang unang kadaugan sud sa tulo ka duwa. Ang 42 anyos nga si Daa, kinsa kanhi sa sakop sa Sta. Lucia Realty sa Philippine Basketball Association (PBA), mitali og 17 puntos, si Poligrates niamot og 15 puntos samtang nihatag og 12 puntos si Sara. Samtang nagpabiling limpyo ang baraha sa Clarin, 5-0, sa dihang ilang gipukan ang naghingutas nga Kapatagan, 76-65. Si Carlo Lastimosa mipakatap og 22 puntos aron pangulohan ang Clarin. (ESL) This posting includes an audio/video/photo media file: Download Now

Pagka acting mayor ni Rama malugwayan pa Posted: 22 Jul 2021 06:17 AM PDT ADUNAY posibilidad nga malugwayan pa ang pagka-acting mayor ni Cebu City Acting Mayor Michael Rama hangtud sunod semana samtang nagpadayon og paalim si Cebu City Mayor Edgardo Labella sa iyang pneumonia. Mao kini ang gibutyag ni Rama human sila magkaestorya ni City Administrator Floro Casas Jr. Huwebes sa buntag, Hulyo 22, 2021. "I was intimated by Jun Casas, the city administrator, that the possibility is towards that (extension)," segun ni Rama. Nakatakda si Rama nga makighinabi kang Labella sa Huwebes. Niadto pang Hunyo ang labing uwahi nga interaksyon ni Rama ngadto kang Labella human nitubag sa iyang text ang mayor. Gikompirmar sad ni Casas ang gisulti ni Rama. Matod ni Casas mao kini ang set-up samtang nagpaayo pa ang mayor. Segun sad ni Casas nga giabisohan ang mayor sa iyang doktor nga padayon lang sa sa pagpahuway. Ang pagkaadmit ni Labella karon sa hospital kay alang sa iyang treatment sa pneumonia, matud ni Casas. Gisuguro ni Casas ang publiko nga "slowly improving" na ang mayor. "Yes, he's improving and he will be out soon," matod ni Casas. "Ganahan man gud sa family (ni mayor) nga inig balik ni mayor 100 percent gyud si mayor ba," segun sa city administrator. (JJL) This posting includes an audio/video/photo media file: Download Now

Mga pulitiko gihangyo sa EOC di magtapok Posted: 22 Jul 2021 06:17 AM PDT NINGHANGYO ang Cebu City Emergency Operations Center (EOC) ngadto sa mga politiko, apil na sa mga supporter, nga di sa magpasiugda og political gatherings tungod sa nagsaka nga mga kaso sa coronavirus disease 2019 (Covid-19) sa dakbayan. Si Cebu City Councilor Joel Garganera, deputy chief implementer sa EOC, niingon nga ipaimplementar kini sa mga kapulisan nga maoy ilang nasabutan sa tigom. Matod ni Garganera nga likayan sa kini sa mga pulitiko bisan karon lang panahona. Matod ni Garganera nga pwede hinuon ning gamiton sa mga pulitiko nga sitwasyon arun magkahiusa sa pagsanta sa mga transmisyon sa maong sakit. Ang pahinumdum ni Garganera gibuhat tulo ka mga buwan sa di pa ang filing sa certificate of candidacy sa Oktubre. Si Lieutenant Colonel Wilbert Parilla, deputy city director for operations, niingon nga ilang nasabutan tali sa EOC nga kon duna may mga pulitikanhong panagtapok kinahanglan nga mananghid. Ang kapulisan mao ang mopatuman niini nga kamandoan. Sa lain bahin, nisanong sad ang Cebu Archdiocese ngadto sa EOC sa dili sa pagpahigayon og misa sa mga kapilya sa barangay tungod sa nagkataas nga mga kaso sa Covid-19. Sa Hulyo 21, 2021, nisaka ngadto sa 1,396 ang aktibong mga kaso sa Covid-19 sa dakbayan. Ang datus sa EOC nagpakita sad nga niabot na sa 27,712 ang total nga mga kaso sa dakbayan kundiin 25,417 niini ang nangaayo ug 899 ang nangamatay. Sa 80 ka mga barangay sa dakbayan, 18 ang way natala nga mga kaso sa miaging 10 ka adlaw, ug 64 ka mga barangay ang naay aktibo nga transmisyon. Ang Guadalupe, nga maoy dunay labing taas og populasyon sa mga barangay sa dakbayan mao say dunay labing daghan og mga kaso. Ang kapulisan nakatutok na usab sa pipila ka mga sityo niini diin nagagikan ang daghang mga kaso. Nisugyot ang kapulisan sa dakbayan sa pagpatuman unta og granular lockdown. This posting includes an audio/video/photo media file: Download Now

Daghan nang milapas sa curfew, health protocol; timaan sa pagkompyansa Posted: 22 Jul 2021 06:16 AM PDT NASAGMUYO ang Cebu City Police Office (CCPO) sa kadaghan na sa mga tawo sa Dakbayan sa Sugbo nga kompyansa na kaayo bisan sa nagsakang mga kaso sa coronavirus disease 2019 (Covid-19). Si Lieutenant Colonel Wilbert Parilla, deputy city director for operations, niingon nga kon basehan ang ilang nadakpan sud lang sa usa ka adlaw, makasagmuyo na kaayo ang sitwasyon. Matod niya nga matag adlaw, sukad gisugdan ang Oplan Bulabog, di mominos sa 100 ang ilang masikop. Wa hinuon mohatag sa data si Parilla sa Lunes, Hulyo 20, apan sa Hulyo 21, nakasikop sila og 188 ka mga tawo. Ang 133 kanila nadakpan sa paglapas sa curfew ordinance samtang ang 55 wa magsul-ob face mask. Matod ni Parilla nga ilang gibalik ang pag-estrikto sa pagpatuman sa ordinansa ug mga health protocol tungod sa pagsaka na sab sa mga kaso sa Covid-19 nga nag-three-digit na kada adlaw. Ang ilang mga nadakpan ilang gi-turnover ngadto sa Prevention Restoration Beautification and Enhancement (PROBE) alang sa pagpahamtang sa silot. Ang mga nadakpan gipapili sa pagbayad og P500 o mag community service. Dunay mga dapit sa mga barangay nga giandam alang kanila. Niadtong Biyernes, Hulyo 16-18, nakasikop sila og 493 ka mga tawo nga nakalapas sa curfew ug health protocol. Inay kada tapos sa semana ang ilang pagpahigayon sa Bulabog, kada adlaw na kini sama niadtong pagsaka sa mga kaso Covid-19 sayo sa miaging tuig. (AYB) This posting includes an audio/video/photo media file: Download Now

1 patay, 2 angol sa bangga sa motor Posted: 22 Jul 2021 06:16 AM PDT USA ka lolo patay samtang magtiayon nangaangol sa panagbangga sa motorsiklo sa national highway sa Barangay Abogon, lungsod sa Sibonga niadtong Miyerkules sa alas 6:00 gabii, Hulyo 21. Si Alejandro Caballes, 61, minyo, ug nagpuyo sa nahisgutang lugar namatay sud sa usa ka tambalanan sa dakbayan sa Sugbo. Naangol ang managtiayong Roderic, 37, ug Cristy Lacre, 31, taga Barangay Kalunasan, dakbayan sa Sugbo. Si Police Staff Sgt. Bernard Otida sa Sibonga Police Station nagkanayon nga ang namatay sakay sa iyang motorsiklo padulong mopauli sa ilang panimalay apan pag-abot sa nahisgutang lugar, kalit kining nga ni-left-turn hinungdan nga naigo sa motorsiklo nga gimaniho ni Roderic, uban sa iyang asawa gikan sa lungsod sa Ronda. Sumala ni Roderic, nagsunod sila sa motorsiklo sa biktima pero wala mohatag nila og signal nga moliko. Naapiki na siya pag-brake kay kusog sab ang iyang dagan human nagdali sila pagpauli kay gabii na. Sa kakusog nga impact sa bangga, ang magtiayon nilupad niadtong higayuna. (GPL) This posting includes an audio/video/photo media file: Download Now

Casas gihatagan og gahom sa pagpirma Posted: 22 Jul 2021 06:14 AM PDT LEGAL ug awtorisado ang pagpirma ni City Administrator Floro Casas Jr. sa higayon nga dili makapirma si Mayor Edgardo Labella sa mga transaksyon sa Cebu City Government. Si Casas, gitudlo ni Labella sa posisyon, gitugotan nga makapirma pinaagi sa resolusyon sa City Council niadtong Hulyo 9, 2019. Si Labella, sa iyang bahin, niisyu og memorandum ngadto sa iyang City Administrator nga makapirma sa mga voucher, payroll, purchase request ug uban pa. "To delegate and grant authority to Atty. Floro Casas Jr., to sign document vouchers, payroll, purchase requests and such other documents relates thereto," tipik sa resolution no. 15-0039-2019 nga gipirmahan ni Vice Mayor Michael Rama isip presiding officer. Si Casas nagkanayon nga way specific nga balaud o patakaran nga nagdili sa mayor sa pag-delegate sa trabaho ngadto sa iyang City Administrator pagpirma sa mga dokumento. Matod ni Casas, kini ang gihimo sa ubang local government units aron di mahurot ang oras sa mayor sa pagpirma sa mga dokumento. "So, wala intawon ta magbuotbuot. even with this delegated authority, constant ang atong communication & coordination with the Mayor's Office to ensure that the mayor is always abreast of whats happening sa syuadad," padayag ni Casas. Ang pamahayag ni Casas naggumikan sa kuwestiyon sa Commission on Audit (COA) ngadto kang Labella. (PAC) This posting includes an audio/video/photo media file: Download Now

7 ka barangay sa Samboan gi-lockdown Posted: 22 Jul 2021 06:14 AM PDT IPAUBOS sa lockdown ang pito ka mga barangay sa lungsod sa Samboan sugod karon, Hulyo 23, hangtod sa Hulyo 28, Miyerkules, tungod sa nagpadayon nga pagsaka sa kaso sa Covid-19. Nakahuom ang lokal nga kagamhanan nga limitahan ang lihok sa mga tawo. Subay sa giluwatan nga Executive Order 25 ni Samboan Mayor Emerito Caldero Jr., ipaubos sa lockdown ang Barangay Bato, Bonbon, Colase, Suba, Dalahikan, Poblacion ug Tangbo. Sa kamandoan, dili pwede nga makalugsong o masulod ang mga residente gikan sa bukirang barangay sa sentro sa lungsod ug ngadto sa coastal areas. Dili una pwede mobukas ang mga establisimento gawas sa pharmacy, remittance center ug convenience stores. Walay mobukas nga tourism sites, sirad-an una ang mga simbahan ug dili una pwede mopahigayon og misa. Sirad-an usab ang merkado ug mga kan-anan. Sama sa panahon nga gipaubos sa enhanced community quarantine (ECQ) ang nasud, gidili ang sports activities ug non-essential travels. Dili usab pwede ang pagpahigayon og kasal, bunyag ug uban pang mga kalihukan. Mipasalig ang kagamhanan nga adunay ayuda sa pagkaon ug tambal nga iapud-apod alang sa mga apektadong residente sa lungsod. Ang kapulisan gitahasan sa pag-monitor sa mga residente alang sa hapsay nga pagpatuman niini. Sa update sa Rural Health Unit, moabot sa 24 ang natala nga aktibong kaso sa lungsod. Nanawagan ang kagamhanan sa lungsod sa pagsunod sa tanan nga lagda aron malikayan ang pagtakod sa Covid-19 sa uban. (ANV) This posting includes an audio/video/photo media file: Download Now

Ulitawo naghikog kay Suns pildi? Posted: 22 Jul 2021 06:13 AM PDT ULITAWO wala kadawat nga napildi ang iyang team sa National Basketball Association (NBA) nga Phoenix Suns, nagpakamatay. Si Paul De Vincent Intud, 20, ulitawo ug taga J.M. Basa St., Barangay Sawang Calero, naghikog ug gideklarar nga dead-on-arrival (DOA) tambalanan sa alas 8:55 sa gabii niadtong Miyerkules, Hulyo 21. Si PSSg Benedicto Ehan nibutyag sa Superbalita Cebu mao kin ang ilang nakuhang kasayoran gikan sa pamilya sa ulitawo human mainitong championship game tali sa iyang team nga Phoneix Suns batok sa Milwaukee Bucks. Ang biktima nakit-an nagbitay sa lawak sa ilang panimalay. (GPL) This posting includes an audio/video/photo media file: Download Now

Super Suroy: New normal sa Cebu Ocean Park Posted: 22 Jul 2021 05:01 AM PDT SA MGA nagsubay sa Super Suroy ning pamantalaan na-feature na ang Cebu Ocean Park sa dihang una kining gibuksan sa publiko. Niining laing edisyon mao ang pagpahibawo sa mga mosuroy o paggiya sa mga bag-ong patakaran sa maong establisemento gumikan sa pandemiya resulta sa coronavirus disease (Covid-19). Gikinahanglan ang pagsubay sa guidelines ubos sa "new normal" nga paglulinghayaw, gipaniguro sa Cebu Ocean Park nga mamahimong luwas ang inyong pagsuroy. Kay ubos na sa a MGCQ (Modified General Community Quarantine) ang dakbayan sa Sugbo, daghang mga establisemento ang nagbukas usab. Kabahin sa ilang lakang nga masunod ang gilatid sa atong mga kadagkoan 50 porsento lamang sa kapasisad sa Cebu Ocean Park ang mamahimong motan-aw sa mga nagkadaiyang kahayupan nga anaa niini. Mga safety measures nga gipatuman sa pagsulod: Mandatory nga pagsul-ob og mask dili lang sa mga bisita apan lakip na sa tanang staff. Gikinahanglan nga tumanon ang social distancing ug aron kalikayan nga magkaduol adunay gipamutang nga markers. Sa pagsulod pa lang gikinahanglan sab ang pagtubag Health Declaration Forms, dayon pagsusi sa temperatura sa lawas. Adunay gipakatap nga sanitation stations sa nagkadaiyang areas. Mga bata nga nag-edad og 15 anyos paubos ang dili pa mahimong makasulod sa establisemento base sa rekomendasyon sa IATF. MGA ATRAKSIYON Deep Tank Lagoon. Matan-aw 360 degrees nga gipuy-an sa nagkadaiyang koleksyon sa dili kasagaran nga species sa dagat. Adunay gidak-on nga 3,500 cubic meter nga tubig sa dagat nga adunay gilawmon nga 7.2 metros nga tubig. Ang Deep Tank Lagoon sa sulod sa Oceanarium ang labing lawom nga aquarium sa Pilipinas. Jungle Trek. Nahimutang dinhi ang mga koleksyon sa mga isda sa tab-ang ug uban pang mga matang sa tanum. Dinhi masaksihan ang langgam sama sa Australia lories & lorikeets ug mga isda sa tab-ang nga sagad makita sa mga sapa sa Amazon ug Africa. Creepy Critters. Kini nga bahin ang adunay daghang mga species ug makita ninyo ang katahum, ug talagsaon nga mga lumad ug exotic nga mga reptilya ug insekto. RATES Operating hours: 9 a.m. – 6 p.m. abli sa adlawng Huwebes ngadto sa Dominggo. Ticket Prices: P600 – weekdays, samtang P800 sa weekends. Lakip sa day-use mao ang osunod; Jungle Trek, Creepy Critters, Lorries, Seven Seas, Stingray Interaction, Oceanarium Journey, Ampitheatre ug main tank gallery. Dugang bayranan; Sea Trek–P1,200, Crocodile Cage–P2,000, Fish spa–P100 matag 20 minutos ug pakiglangoy sa sting ray–P1,000. ASA DAPITA? Ang Cebu Ocean Park nahimutang sa SM Seaside Complex, South Road Properties (SRP), Dakbayan sa Sugbo nga adunay gilay-on nga 20 minutos nga biyahe kon manukad sa Fuente Osmeña Circle samtang 30 minutos ang kalayo gikan sa Ayala Center Cebu. (Depende sa traffic). Sa kadtong way pribadong sakyanan adunay libreng biyahe sa MyBus gikan o padulong sa BDO Fuente Osmena. Makasakay sab og MyBus gikan sa Mactan Airport, SM City Cebu, Talisay, Mandaue City ug Parkmall. DUGANG INFO Online booking: www.cebuoceanpark.com or via Klook Facebook Page: https://www.facebook.com/cebuoceanparkofficial/ Contact number: (032) 888-5288 ext. 805, 804 Email address: info@cebuoceanpark.com This posting includes an audio/video/photo media file: Download Now

You are subscribed to email updates from https://www.sunstar.com.ph/. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States