Sunday, July 4, 2021

https://www.sunstar.com.ph/

https://www.sunstar.com.ph/

Paryente sa bata gipangita sa DSWD

Posted: 04 Jul 2021 05:21 AM PDT

ANG Department of Social Welfare and Development Field Office (DSWD) VII, Cebu City nangayo og tabang sa publiko sa pagpangita sa kaparyentihan sa bata.

Si Harlow Janine Baltazar, babaye, duha ka tuig ang pangidaron, nga anak ni Katrin Rae Pagarigan Baltazar nga namatay kaniadtong Nobiyembre 9, 2019 ug apo ni Rene Dwight C. Baltazar nga namatay kaniadtong April 4, 2002 ug ni Catherine P. Baltazar nga namatay kaniadtong Hunyo 15, 1993.

Ang bata anaa sa pag-amuma karon sa magtiayon nga sila si Mr. Alex Testa ug si Mrs. Fe Testa nga taga Sitio Gumamela, Purok Papaya, Barangay Lawaan II, siyudad sa Talisay, Cebu, sugod kaniadtong Enero 27, 2020.

Kon mapakyas ang mga ginikanan ug kaparyentihan sa pagpatim-aw ug pagkuha sa bata sulod sa usa ka buwan, mamahimo na nga mapasang-at ang administrative abandonment sa bata sa buhatan sa DSWD Central Office.

Mamahimo nga makigkita sa social worker nga si Marvin O. Solivio sa buhatan sa DSWD, Field Office VII, M.J. Cuenco Avenue Corner Gen. Maxilom Avenue, Brgy. Carreta, dakbayan sa Sugbo o motawag sa landline (032) 412-9908 ug 232-9505 ug 0995-9730-145. / (PR)

This posting includes an audio/video/photo media file: Download Now

Libreng wifi sa Olango island

Posted: 04 Jul 2021 05:17 AM PDT

NAGMALAMPUSON ang gi-blessing ug launching sa Libreng Wifi ni Mayor sa Olango Island diin giapud-apod ang wireless modems sa matag barangay niadtong Sabado, Hulyo 4.

Sa samang adlaw, gisugdan ang paggamit sa public wifi sa Mini City Hall ug sa Sta. Rosa Community Hospital.

Bisan nga isolated ang isla tungod sa kalayo, mas connected ug mapaduol sila tungod sa internet connection.

Dako usab ang mahatag nga benepisyo niini sa mga estudyante hilabi na kadtong mga nag-online classes.

Dili na sila kinahanglan nga mogasto pa alang sa pagpalit og data kay libre naman kini.

Gipahigayon usab ang ceremonial signing sa memorandum of agreement (MOA) tali sa Smart Communications, Inc. ug sa Lapu-Lapu City Government alang sa libreng wifi sa 23 ka public sites sa mainland.

Sulod sa tulo ngadto sa loma ka buwan, matagamtam na sab sa mga taga mainland ang maong kaayuhan gikan sa mayor.

Kauban nga misaksi sa kalampusan si City Attorney Eugene Espedido, ang deputy mayor sa Olango nga si Climaco 'Montor' Tatoy, Councilors Janvi Amistad Dela Serna ug Atty. Rex Mangubat, City Social Welfare and Development Office Head Annabeth 'Mama Abeth' Cuizon, Sports Commissioner Vince Dominique Carungay, si Konsehal Jasmine 'Daday' Chan ug ang mga barangay kapitan sa Olango Island kuyog ang ilang mga SK chairman ug mga konsehal.

Gipasalamatan ni Mayor Junard Chan ang Department of Information and Communications Technology (DICT) 7 hilabi na ni Regional Director Frederick Amores sa pagtabang ug sa Smart Communications, Inc.

Dugang gipasalamatan ni Mayor Chan ang Information Technology (IT) Office nga gipangulohan ni Louie de los Santos sa pagtabang nga mapatuman ang maong proyekto. (Alan Tangcawan)

This posting includes an audio/video/photo media file: Download Now

Donaire makig-rematch ni Inoue

Posted: 04 Jul 2021 05:17 AM PDT

HUMAN siya miatras sa ilaha untang All-Filipino world unification bout ni World Boxing Organization (WBO) bantamweight champion Johnriel Casimero, nagtinguha si World Boxing Council (WBC) king Nonito Donaire nga makig-rematch sa gitawag og Japanese Monster nga si Naoya Inoue.

Niadtong Nobiyembre 2019, unang nag-away sila si Donaire ug Inoue diin midaog ang Japanese boxing superstar pinaagi sa unanimous decision.

Midaog man tuod si Inoue apan grabeng bun-og ang iyang nasinati diin nabuak ang iyang ilong. Ang ilang away midaog nga Fight of the Year.

Si Donaire gikatakda untang makig-away kang Casimero karong Agusto 14, 2021 sa Carson, California apan kalit lang niatras si Donaire sa away gumikan sa VADA (Voluntary Anti-Doping Association) ug personal.

Naglagot si Donaire hilabi na dihang nipagawas og mga komentaryo si Casimero batok sa iyang asawa nga si Rachel.

Alang kang Donaire, wala'y respeto si Casimero hinungdan nga miatras siya sa away aron dili makadawat si Casimero og dakong ganti sa pagpakig-away kaniya.

Sa iyang bahin, si Casimero makigharong na lang sa iyang orihinal nga kontra karong Agusto 14, 2021 nga si Cuban Guillermo Rigondeaux. (ESL)

This posting includes an audio/video/photo media file: Download Now

Manny mura og naghikog batok ErroL

Posted: 04 Jul 2021 05:16 AM PDT

MURA'G naghikog si fighting senator Manny Pacquao sa iyang pagbuhi og desisyon nga makig-away kang World Boxing Council (WBC) welterweight champion Errol Spence Jr. karong Agusto 21, 2021 (RP time) sa Las Vegas, USA.

Mao kini ang gipabuhagay sa beteranong sports analyst nga si Anow Badua sa interbyu sa GMA News online.

Sa panahom ni Badua, dili makatiwas sa away ang Pambansang Kamao ng Pilipinas kontra sa Amerikanong si Spence.

"I'd like to believe that Pacquiao's decision to pick Spence for his next fight is a suicide. This is going to be a losing cause for Pacquiao. Spence beats him in six rounds," batbat ni Badua.

Alang kang Badua, usa ka dakong sayop ang desisyon sa 42 anyos nga si Pacquiao nga makigharong kang Spence ning puntoha sa iyang boxing career.

Asoy ni Badua nga nabalaka siya alang ni Pacquiao gumikan kay mao kini ang labing unang higayon nga wala moaway ang 8-division world champion sulod sa duha ka mga tuig.

"Pacquiao has been on a two-year hiatus. What did he do? He ate, attended the Senate, slept late, played chess, he did everything that can take a toll on his body," asoy ni Badua.

"At some point when I saw Manny, his stomach was out. Don't believe that he plays basketball, his basketball does not equate to the training of the likes of Errol Spence."

Nidugang si Badua nga ang angayan untang gibuhat ni Pacquiao mao ang pagsagubang og usa ka tune-up bout una kini makigharong kang Spence.

"This is the first time that Pacquiao will fight from a two-year layoff. This is going to be very worrisome for Pacquiao to think that Spence is a livewire [opponent]. Spence is the top dog in the welterweight division," asoy ni Badua.

"I am surprised that Pacquiao did not ask for his usual catchweight for this fight so he really wanted a fair fight."

Si Pacquiao naggunit og 62-7-2, 39KOs nga rekord samtang ang 31 anyos nga si Spence adunay 27-0, 21KOs nga baraha. (ESL)

This posting includes an audio/video/photo media file: Download Now

Beermen puno sa kadasig

Posted: 04 Jul 2021 05:16 AM PDT

NAGHATAG og daghang positibong enerhiya sa San Miguel Beermen ang pagbalik og apil sa Sugboanong higante nga si JuneMar Fajardo alang sa ilang pagpangandam sa umaabot nga 2021 season sa Philippine Basketball Association (PBA).

Si Von Pessumal mipaambit sa iyang kasinatian sa iyang pagpraktis kauban ang 6-time MVP, kinsa taudtaod nagpaalim gikan sa seryusong pagkaangol niadtong 2020 season.

"Si June Mar, he is coming off a major leg injury. I'm actually in awe," matod ni Pessumal sa interbyu sa Spin.ph.

"Natutuwa ako na nakikita ko siya na tumatakbo kapag 5-on-5. For the last conference, ang laking wala niya sa amin. The fact na nandoon siya sa practice and he is going up and down with us, it's a good sign for everyone."

Sa pagbalik sa produkto sa University of Cebu (UC) Webmasters, malaumon ang Beermen nga makabawi human sila natangtangan og titulo sa Philippine Cup sa miaging bubble season sa Clark, Pampanga.

Gawas kang Fajardo, nakabalik na sab si Terrence Romeo gikan sa seryuso sab nga pagkaangol sa abaga niini.

Gitataw ni Pessumal nga grabe ang kadasig nga ilang gibati karon nga nakompleto na'g balik ang ilang puwersa.

"Alam mo naman 'yung mga veterans ng team, even the others, super competitive 'yung mga 'yan... I think we are doing our best. I can see it everyday in practice. We are really going at it. Mataas ang level ng practices namin," pasabot ni Pessumal.

Sa iyang bahin, matod ni Pessumal nga naningkamot siya'g maayo nga mas mahashasan pa ang iyang abilidad sa pagtira sa gawas nga maoy dako niyang kontribusyon sa Beermen.

"I can't go through a day na hindi ako nagsu-shooting. I'm finding ways to sharpen my skills and try to be in good shape for the PBA," batbat ni Pessumal. (ESL)

This posting includes an audio/video/photo media file: Download Now

Kanhi trabahante sa Cebu City DPS, 4 ka tawo dakpan sa buy-bust

Posted: 03 Jul 2021 10:32 PM PDT

KANHI trabahante sa Department of Public Services (DPS) sa dakbayan sa Sugbo nga nagpadagan og drug den sa Brgy. Carreta, Dakbayan sa Sugbo, gironda sa mga sakop sa Philippine Drug Enforcement Agency (PDEA) 7 alas 7:30 Sabado sa gabii, Hulyo 3, 2021.

Lakip sa nadakpan ang laing upat ka mga tawo nga naatlan sa balay sa suspek nga gihimo niyang suyopanan.

Ang nadakpan giilang mao si Richard Cañete, 48, taga sitio Ponce 1, Barangay Carreta, drug maintainer, iyang live in partner nga si Marites Banquicio, 38; Alex Pardillo Jr. 39, usa ka electrician;Juanito Basiliote, 69; ug Emmanuel Maloloy-on, 29, construction worker.

Nasakmit sa mga operatiba sa PDEA 7 ang 16 ka pakete sa gituohang shabu nga motimbang og 17 gramos nga adunay Dangerous Drugs Board (DDB) value nga P115,600, buy bust money nga P210 ug mga drug paraphernalia.

Ang mga dinakpan gikatakdang pasakaan og kasong may kalapasan sa Sections 5,6,7,11,13 ug 15 Article 2 sa Republic Act 9165 kun Comprehensive Dangerous Drugs Act of 2002. (AYB)

This posting includes an audio/video/photo media file: Download Now

Maestro ‘mipindot’ sa pusher

Posted: 03 Jul 2021 08:46 AM PDT

Pusher nakaipsot sa buy-bust kay usa ka public school teacher giingong nisinggit nga dunay pulis sa Biyernes sa alas 11:45 sa gabii, Hulyo 2, 2021 sa may DAS Highway Center, Brgy. DAS, dakbayan sa Toledo.

Wa na maapsi pa sa ginukdanay sa kapulisan si Charlie Abalde, giingong durugista, nagpuyo sa nahisgutang dapit.

Apan napusasan si James Delos Reyes Camangyan Jr., 32, ulitawo, magtutudlo, taga Sitio Looc 1, Brgy.Bato, Dakbayan sa Toledo.

Lakip sa nasikop ang iyang kauban nga si Patrick Mayorca Alfante, 18, taga Purok 9, Brgy. Bunga, dakbayan sa Toledo.

Ang mga sakop sa Toledo Police Station Drug Enforcement Unit nipalit kang Abalde og usa ka putos nga shabu.

Apan atol sa transaction, giingong nisinggit si Camangyan nga dunay pulis hinungdan nga nakabantay si Abalde ug nakasibat.

Sila si Camangyan ug Alfante maoy gidakop sa mga pulis aron pasakaan og kasong obstruction of justice.

Samtang nasikop ang usa ka inahan sa laing buy-bust alas 8:50 sa gabii, Biyernes, sa may Dasuga 3, Brgy. DAS.

Ang suspek giilang si Mary Jennet Manguray Cuarenta, 32, minyo, nagpuyo sa nahisgutang lugar.

Nakuha sa possession niya ang lima ka putos sa shabu, tulo ka dagkong putos sa shabu balor og P1,400 matag usa, P500 buy bust money.

Ang drugas mitimbang og 100 gramos nga mobalor sa P680,000.

This posting includes an audio/video/photo media file: Download Now

Adventist Hospital nasagmuyo sa NBI 7

Posted: 03 Jul 2021 08:44 AM PDT

Ang Adventist Hospital-Cebu, sa Biyernes, Hulyo 2, 2021, niingon nga sila "disheartened" sa pagpahibawo sa National Bureau of Investigation (NBI) 7 sa kasong gipasaka batok sa pipila ka mga staff ug doktor sa tambalanan tungod sa giingong anumalusong claim sa Covid-19.

Matod sa opisyal nga pamahayag sa ospital nga wa gani sila hatagi og kopya sa pormal nga reklamo.

"We are disheartened that the NBI 7 released a public announcement on the alleged PHIC claims and connivance with the said agency without furnishing us a copy of the formal complaint and giving our staff and physician the opportunity to refute the accusations against them," matod sa tipik sa official statement nga gipagawas sa Adventist-Hospital Cebu, niadtong Biyernes sa gabii.

Matod sa tambalanan nga kon ang doktor gihatagan pa og igong kahigayunan sa pagpasabot sa clinical/medical arrangement, ang doktor nga gilambigit unta "strongly shed light to the investigation."

Apan dihang gikuhaan og pamahayag, si NBI 7 Director Rennan Augustus Oliva, niingon nga gipadad-an og subpoena ang tanang giimbestigar aron mopasabot.

"That is our SOP (standard operatong procedure) as part of due process in all our investigations under our mandate," matod ni Oliva sa usa ka text message.

Lakip sa hospital officers ug mga kawani nga gikiha sa NBI 7 ngadto sa Office of the Ombudsman-Visayas sa Hunyo 29 mao sila si Dr. Michelle Jay Francisco-Napigkit, attending physician; Cefriano Julian Jr., chief sa patient business department; Ma. Kenneth La Sage, clerk, PhilHealth section; Dicchel Grace Napigkit, billing clerk; Red Ford Gargarila, billing clerk; ug Romeo Rando, Jr., registered nurse.

Samtang sa habig sa PhilHealth 7 officials mao sila si Arlan Granali, kanhi acting regional vice president; Francis Javier, division chief-HCDMD; Joan Tiu-Ayuson, medical specialist IV/section head sa Benefits Administration Section (BAS); Josette Bacalso, fiscal controller IV; Anecito Ramas Jr., social insurance officer 1; Anthonneette Maamo, BAS clerk III; Nina Christine Lunday, BAS social insurance officer 1, ug Kenneth Donalyo.

Gikiha sila og kasong kriminal nga kalapasan sa Section 3 sa Republic Act (RA) 3019, kun Anti-Graft and Corrupt Practices Act, ug giingong malversation of public funds or property nga silutan ubos sa Article 217 sa Revised Penal Code.

Gawas ning mao nga mga kiha, sila si Granali, Javier, Tiu-Ayuson, Bacalso, Ramas, Jr., Maamo, Lunday, ug Donalyo gipasakaan usab og kasong administratiba sa paglapas sa Revised Administrative Code of 1987 ug paglapas sa RA 6713 kun Code of Conduct and Ethical Standards of Public Officials and Employees, samtang dugang mga kaso gipasaka batok kang Francisco-Napigkit sa Adventist Hospital tungod sa pag-isyu og giingong di tinuod nga medical certificates.

Ang gibasehan sa pagpasaka sa NBI 7 ning mga kaso, matod ni Oliva, mao ang findings sa imbestigasyon sa P333,519 nga bvalor sa Covid-19 claim sa namatay nga pasyente sa nga negatibo sa SARS-CoV-2 sa iyang RT-PCR test.

Matod sa Adventist-Hospital, nga ang ilang mga staff nagsubay sa ilang mga responsibilidad sumala sa gimbut-an sa updated PhilHealth guidelines.

Matod sa ospital nga ang ilang PhilHealth Covid-19 claims gipaubos sa "stringent process in strict conformance to the criteria and guidelines of PhilHealth." (WBS, ANV)

This posting includes an audio/video/photo media file: Download Now

Gobernador Garcia midayeg sa business-friendly Ormoc City

Posted: 03 Jul 2021 08:44 AM PDT

Nakigtagbo si Cebu Governor Gwendolyn Garcia kang Ormoc City Mayor Richard Gomez ug Congresswoman Lucy Torres - Gomez, Biyernes, Hulyo 2, 2021.

Matod ni Garcia nga ang iyang tuyo sa pagbisita mao ang pagsusi sa mga negusyo sa iyang anak nga si Paulo ug gimingaw usab siya sa Ormoc City ug kang Kongresista Gomez.

Si Kongresista Gomez nakauban ni Garcia sa Kongreso sa dihang kongresista pa siya.

Sa ilang meeting, gipadayag sa gobernadora nga suportado niya si Kongresista Gomez kon modayon sa pagpapili pagka senador.

Apan daan na gipadayag ni Kongresista Gomez nga wala pa sa iyang plano ang pag senador kay daghan pa siya og tiwason sa Ormoc.

NINDOT NGA EKONOMIYA

Gidayeg sa gobernadora ang administrasyong Gomez gumikan sa iyang nakita nga kahapsay, kalimpyo ug maayong ekonomiya bisan pa sa giatubang nga krisis sa coronavirus disease 2019 (Covid-19).

"I went around Ormoc. I find it very very orderly, very clean and the economic activity is on going. The city is very progressive," matod ni Garcia

Gani, nakita usab sa gobernadora ang ka business-friendly sa Siyudad.

"I would like to thank Mayor Richard Gomez for being supportive to all our businesses kay wa gyod makaagi si Paulo og kalisud kay maayo man gyod ang support sa LGU sa mga businesses," matod ni Garcia

WALAY MAGPAPILI

Giklaro usab ni Garcia nga di tinuod ang mga hungihong nga dunay usa sa iyang sakop sa pamilya nga magpapili sa Ormoc karong 2022.

Usa sa nigawas nga ngan ang iyang anak nga si Paulo.

Si Paulo anak ni Garcia ug sa iyang kanhi bana nga si Winnie Codilla nga hugot nga kaatbang sa mga Gomez sa natad sa pulitika.

Apan giklaro sa gobernadora nga wala gyuy magpapili bisan kinsa sa iyang pamilya.

"Wala. Wala gyod hangtod sa hangtod," matod ni Garcia. (JKDP)

This posting includes an audio/video/photo media file: Download Now

277K na sa Cebu City mirehistro sa bakuna

Posted: 03 Jul 2021 08:44 AM PDT

Mga tawo nga ningparehistro ubos sa Cebu City Government Covid-19 vaccination program niabot na og kapin sa 277,000.

Sa data nga gihatag sa Management Information and Computer Services (MICS) officer-in-charge Richter Castañares sa Hulyo 3, 2021, duna nay 277,514 ka mga tawo ang nagparehistro sa programa.

Sa mga nagparehistro, mayoriya kanila mga trabahante nga naa sa Priority Code A4. Dunay 67,050 kanila nagparehistro sa website.

Sa nangaging mga interview, si Cebu City Health Department (CHD) officer-in-charge Jeffrey Ibones niingon nga ang City Government nagtagad na sa mga trabahante kinsang mga buhatan naa sa Cebu City.

Si Ibones niingon nga di importante nga ang A4 workers nagpuyo sa Cebu City aron sila makapahimulos sa coronavirus disease 2019 (Covid-19) vaccination program, basta naa lang sila nagtrabaho sulod sa siyudad.

Nagsunod sa mga naa sa A4 mao ang kadtong nahisakop sa category A3 kun senior citizens nga nilangkob og 66,408 ka rehistradong individual.

Matod ni Ibones nga ang Siyudad padayong nag-awhag sa senior citizens sa siyudad sa pagpahimus sa programa.

Sa Office of the Senior Citizen Affairs (Osca) data, dunay 87,538 ka senior citizens sa Cebu City.

Laing mga individual nga nagparehistro sa ubos vaccination program sa Siyudad naglangkob sa mga tawo nga dunay comorbidities nga nahisakop sa category A3 (52,040); medical workers kun category A1 (14,908); indigent individuals kun category A5 (29,749); uniformed personnel (3,143); ug dunay 44,216 nga napakyas sa pagbutang kon diin silang kategoriyang nahisakop.

Sukad gisugdan sa Cebu City Government ang Covid-19 vaccination program, ang Siyudad nakabakuna na og kapin sa 106,000 ka doses sa bakuna.

Ang vaccination program sa Siyudad nagsugod niadtong Marso 24.

Sa Hulyo 3, dunay kinatibuk-ang 106,203 ka doses sa bakuna ang nadapat.

Sa mao nga gidaghanon, ang 80,486 ka doses nadapat sa unang dose, samtang 25,717 ka doses alang sa second dose.

Ang Siyudad nga dunay mga usa ka milyon nga populasyon nag-target sa pagbakuna sa 70 porsyento alang sa herd immunity. (JJL)

This posting includes an audio/video/photo media file: Download Now

Bisan refrigerator sa barangay hall sa Kawasan gikawat

Posted: 03 Jul 2021 08:35 AM PDT

Gi-ransak sa wala mailhing mga kawatan ang barangay Hall sa Kawasan, lungsod sa Aloguinsan.

Ang insidente nadiskubrihan alas 4:30 sa kaadlawon Sabado, Hulyo 3, 2021, apan alas 7 na sa buntag nareport sa kapulisan.

Nahanaw ang refrigerator nga P3,000 ang balor. Laing nadala ang hot and cold water dispenser (P7,000); air purifier (P30,000); personal computer nga dunay CPU (P30,000); printer (P17,000); Gasol tank (P3,500); multicab battery (P8,000) tupperware box nga dunay mga kutsara (P3,000); assorted medicine (P2,000); usa ka galon nga Betadine. Tanang nangawala mobalor og dul-an sa P100,000.

Si Police Officer Ricky Igonia sa Aloguinsan Police Station nga nahinabi sa Superbalita Cebu nagkanayon nga usa ka tanod nga si Roberto Tresmundo maoy nakadiskubre pagpanglungkab.

Matod niya nga sa ilang gihimong imbestigasyon, way mo duty matag gabii sa barangay hall. Ang mga kawatan misaka sa second floor dayon giguba nila ang sliding window ug gikuha ang mga butang.

Way closed circuit television (CCTV) camera ang barangay hall. Wa isalikway sa kapulisan ang posibilidad nga taga diha ra ang mga kawatan. (GPL)

This posting includes an audio/video/photo media file: Download Now

Kasaligan sa Kabataan gilusad sa CCPO sa Mambaling

Posted: 03 Jul 2021 08:35 AM PDT

Sigun sa panultihon nga ang kabataan maoy paglaom sa nasud, apan kon pasagdan, sila usab ang maghatag og problema sa katilingban.

Tungod niini, gilusad sa Cebu City Police Office ang "Kasaligan sa Kabataan" isip kabahin sa kasaulogan sa ika 26 nga Police Community Relations Month nga gisabak usab sa programa sa Philippine National Police (PNP) nga barangayanihan nga gipangulohan ni Police Colonel Josefino Ligan.

Kapin sa 60 ka mga bata gikan sa Barangay Mambaling ug mga silingang lugar gitapok sa San Roque parish church nga gi dumala ni Father Carmelo Diola, kura paroko, gilingaw sa mga pulis pinaagi sa pagpaduwa kanila.

Gawas sa mga kalingawan nga gidalit sa kapulisan, gihatagan usab silag mga duwaan ug mga pagkaon nga pangbata.

Matod ni Ligan nga ilang gituyo ang pagduol sa mga bata tungod sa sunod-sunod nga mga insidente diin ang mga bata maoy biktima.

Sama sa 2-anyos nga bata ug iyang igsuon sa maong barangay nga gipasuyop og shabu sa ilang inahan aron lang mohilom sa paghilak.

Lakip na niini ang paggamit kanila sa pagpamaligya sa illegal nga drugas nga angay na nga hatagan og pagtagad sa otoridad.

"Kahibalo man ta sa panghitabo ron sa palibot sa atoang siyudad nga kining mga bata mao ra bay gihimong kasagarang courier sa mga illegal drugs sa mga drug personality. Gani, atong madunggan or mabasa nga lately lang last week, maoy gipang balita. So, mao ni atung gilusad ning programaha," matod ni Ligan sa mga tigbalita.

Si Diola, sa iyang bahin, nalipay sa programa nga gihimo sa kapulisan sa Siyudad sa Sugbo nga nagsentro sa kaayohan sa kabataan nga linghod pa ang pangisip.

Matod ni Diola nga ang mga bata sakop sa Agak kun "Atung Gugma alang sa Kabataan" diin giatiman na sila sa simbahan sukad pa niadtong 2016, bisan dili pa siya ang kura paruko sa San Roque Parish Church.

Giangkon ni Diola nga ang mga bata maoy daling madala nga mobuhat og krimen sama sa paggamit kanila nga mahimong drug courier.

"Kining mga bata, battle field of the minds baya karon. Daghan bayang mogamit sa mga bata nga pang baligyag drugas," matod ni Diola.

Si Mrs. Melanie Montejo, asawa sa direktor sa kapulisan sa Central Visayas, Police Brigadier General Ronnie Montejo, maoy usa sa pinasidunggang dinapit, nagkanayon nga sukad pa kaniadto usa sa ilang adbokasiya sa pamilya ang pagtabang sa mga bata.

Matod niya nga ang mga bata angay nga giyahan nga mobuhat og maayong gawi aron aduna silay masanag nga kaugmaon.

"Kining mga bata mao man ni atong pag-asa baya. Pag asa gyud ni siya kay wala ta kahibalo nga isa sa ilaha ani mahimong leader. Kon pasagdan nato, mahimong tulisan, mahimong pasaway. Pero kon ato silang i-guide, nindot ang ilang kaugmaon," matod ni Montejo. (AYB)

This posting includes an audio/video/photo media file: Download Now

Laing 2 ka barangay sa Cebu City drug-cleared

Posted: 03 Jul 2021 08:35 AM PDT

Laing duha ka mga barangay sa Dakbayan sa Sugbo gideklarar sa Regional Oversight Committee on Barangay Drug Clearing Program nga drug-cleared na.

Ang nadugang mao ang Barangay Sinsin ug Sapangdaku, pulos mga bukirang dapit sa Dakbayan sa Sugbo.

Matod ni Cebu City Office For Substance Abuse Prevention (COSAP) head Jonah John Rodriguez, kini naghatod na sa upat ka barangay nga drug-cleared.

Ang unang duha mao ang Sudlon 1, kasikbit sa Sudlon 1, ug Santo Niño, kansang jurisdiction naglakip sa Cebu City Hall.

"Cosap's utmost desire is to declare Cebu City as one of the drug-cleared cities, and eventually be declared as a drug-free city, in the Philippines," matod ni Rodriguez.

Ang Cebu City dunay 80 ka mga barangay.

Labing minos lima ning mga barangay dunay dakong suliran sa illegal drugs.

LAPU-LAPU

Aduna na usay laing duha ka mga barangay sa dakbayan sa Lapu-Lapu nga gideklarar nga drug-cleared sa ROCBDC nga gipangulohan sa Philippine Drug Enforcement Agency (PDEA-7) ug ubang mga ahensya sa gobyerno.

Matod ni Garry Lao, pangulo sa City of Lapu-Lapu Substance Abuse and Prevention (C-Losap) nga ang gideklarar nga drug-cleared barangay sa dakbayan mao ang Tingo ug Baring, isla sa Olango.

Apan gipasabot ni Lao nga ang naasoyng mga barangay lahi og estado sa Brgy Caohagan sa isla gihapon sa Olango.

Sanglit ang naasoyng barangay usa ka drug-free nga dapit sukad pa kaniadto.

Pasabot niini wala gayuy presensya sa ilegal nga drugas, bisan mga user ug pusher sa dapit.

"Drug-free man gyud ang Caohagan kay wala gyud silay surrenderees. Di man gyud sila affected," pasabot ni Lao.

Ang Tingo ug Baring aduna apan ila nang napaubos sa mga intervention, sumala ni Lao.

Moderately affected usab ang duha ka mga barangay sa ginadiling drugas.

Sa talaan sa C-Losap, moabot sa 74 ka drug personalities ang anaa sa Baring samtang 36 ang sa Tingo base sa ilang certified BADAC watchlist (CBWL).

Kining tanan nakahuman na sa community drug rehabilitation program (CBDRP).

Pasabot ni Lao nga ang duha ka barangay mao ra usab ang ilang gipresentar sa oversight committe nga ipaubos sa drug-cleared sanglit mao ra usab kini ang makapasar sa criteria.

Pinaagi usab niini, dili sila mahimong kataw-anan sa katawhan.

"Sa mainland, I am not in a hurry to declare. Ang focus nako ang isla the whole island of Olango will be declared as drug cleared kay feasible man gud siya. I want to be realistic nga og drug-cleared, clear gyud siya di kay sa papel lang," pasabot ni Lao. (REV, GCM)

This posting includes an audio/video/photo media file: Download Now

114 ka kaso gi-file sa CCTO; 9K naisyu nga citation ticket

Posted: 03 Jul 2021 08:30 AM PDT

Tungod sa wa pagpakabana og bayad sa multa, 114 ka mga kaso ang gipasaka sa legal section sa Cebu City Transportation Office (CCTO) sa Hunyo sa mga naisyuhan og traffic citation tickets.

Ang drayber nga madakpan sa kalapasan sa balaud sa trapiko kinahanglan mobayad sa multa sulod lang sa 72 oras kun tulo ka working days.

Busa, matod sa CCTO, kinahanglan nga bayran kini ngadto sa ilang buhatan nga bukas gikan sa alas 8 sa buntag ngadto sa alas 5 sa hapon, gikan sa Lunes ngadto sa Biyernes.

"Ibalik namo, kon kita ma issue-han og Traffic Citation Ticket, usa na kini ka porma og summon ug tagaan ra kamo og 72 hours (3 working days) para maka bayad o settle," matod sa CCTO sa ilang Facebook post.

Kon mapasaka na kini ngadto sa korte, mas dako na ang bayranan ug naa pay warrant of arrest aron dakpon ang drayber ug mapugos sa pagbayad sa multa.

Samtang dako ang pagminos sa gidaghanon sa mga TCT nga naisyu sa CCTO sa Hunyo.

Kini nagpasabot nga nagkagamay ang mga nakalapas sa trapiko sa miaging buwan.

Ang naisyu nga TCT 9,773, mas ubos kay sa 14,009 sa Mayo kun mas minos og 4,236.

Mokabat usab sa 724 ka mga motorsiklo ang na impound, 76 ka electric bikes, siyam ka mga trak, tulo ka mga PUJ, pito ka mga traysikad, 15 ka pribadong four-wheeled nga mga sakyanan, sagad way rehistro o way lisensya ang driver.

"Kon magatuman lang unta kita sa mga lagda sa trapiko, hapsay ug haruhay ra unta ang atong kadalanan sa Siyudad sa Sugbo. Pero naa manpud dyod ning mga pasaway nga makapa aghat kanato nga mo pa implementar jud og hugot sa lagda sa trapiko," dugang sa CCTO.

Daghan sab sa mga drayber nga nakalapas sa disregarding traffic sign, sama sa pag park sa sakyanan sa no parking zone ug pag left turn o u-turn bisan kon gidili.

Samtang sa pagpadayon sa pagpatuman sa CCTO sa City Ordinance 2111 kun Anti Smoke Belching Ordinance, 708 ka mga sakyanan ang ilang nasakpan nga nakalapas niini sulod sa tulo ka mga buwan kun gikan sa Abril hangtod sa Hunyo ning tuiga.

"Ang polusyon sa hangin nga may kalabotan sa transportasyon mao ang labing dako nga hulga sa kahimsog sa kinaiyahan sa Pilipinas," pagpasabot sa traffic office.

Bisan sa panahon ning pandemic, ang CCTO way hunong sa hugot nga pagpatuman sa balaud sa trapiko hinungdan nga liboan ka TCT ang ilang maisyu matag buwan.

Gikan sa Enero hangtod sa Mayo, nag-average ang ilang naisyu nga TCT og 10,000 matag buwan ngadto sa mga driver nga nakalapas sa balaud sa trapiko. (REV)

This posting includes an audio/video/photo media file: Download Now

Editoryal: Masustenir, mahuman unta

Posted: 03 Jul 2021 08:26 AM PDT

Maanindot huna-hunaon nga ang mga kabos nga konsumidor sa Metro Cebu Water District (MWCD) di na pabayron kay abagahon na sa Kagamhanan sa Dakbayan sa Sugbo. Nangayo ang Board of Directors (BOD) og P200 million sa Cebu City Government.

Ang P200 million kuhaan sa full subsidy sa 35,000 ka mga konsumidor, partial subsidy sa nagkonsumo og 11-30 cubic meters ug alang sa pagtukod og imprastraktura sa pagkuhag tubig sa mga tinubdan sa Tagbao ug Budlaan.

Kon eleksyon sa 2022 ang huna-hunaon, dako na kaayo ning puntos sa administrasyon karon. Bisan pag moingon nga pang eleksyon, apan ang paghatag niini nagpasayon sa kinabuhi sa mga kabos nga apektado kaayo sa pandemic.

Apan ang P200 million nga kwarta di gamay nga pundo. Dako kaayo kini nga kwarta. Busa, gikinahanglan sihag ang duha ka mga buhatan, ang MCWD ug City Hall, sa publikong kwentada sa nagastuhan sa kwarta, mga ngan sa mga beneficiary ug uban pa.

Gikonsulta ba usab kaha kini nila sa Commission on Audit (COA) kining lakang karon sa MCWD ug Siyudad?

Hinuon, dako og purohan nga makalabang kini sa Konseho kay gawas nga mayoriya ang mga kaalyado ni Labella, lisod usab pakgangon ang proyekto nga daghang mga kabos ug ordinaryong Sugboanon nga makapahimulos.

Kinahanglan usab nga seguraduhon Siyudad ug MCWD nga di mausik ang pundo nga gastuhon alang sa imprastraktura sa pagdala sa tubig sa kabukiran ngadto sa patag. Kana bang di lang sugdan, kon di humanon gyud ang proyekto aron madugangan ang supply sa tubig sa Dakbayan, labina sa mga konsumidor nga naa sa kabukiran nga igo rang hatdan sa water tankers.

Kay kon igo rang gisugdan ang proyekto apan di humanon ug mabiyaan kon lain nang administrasyon ang mopuli, tan-awon kini sa publiko nga tipik sa pang-eleksyon bisan kon ang tumong unta kaayuhan sa kinabag-an.

This posting includes an audio/video/photo media file: Download Now

Nalzaro: Mga isyo sa vaccines

Posted: 03 Jul 2021 08:26 AM PDT

Usa sa mga hinungdan nganong daghan gihapon ang nagpanagana sa pagpabakuna batok sa Covid 19 mao ang safety o kaluwas sa bakuna. Ang side effects niini ngadto sa mga nabakunahan na. Human sa isyo sa blood clot sa Astrazeneca ug dili pagkagarintisado sa Sinovac, nitumaw na usab ang isyo sa rare heart inflammation o mogahi ang kasing-kasing isip side effect sa Pzifer BioNtect ug Moderna sa Estados Unidos. Kasagaran sa nakasinati niini mao ang mga batan-on. Ang Pzifer ug Moderna migamit sa mRNA Covid 19 vaccine. Ang mga sintomas mao ang pagpanakit sa dughan ug maglisud og ginhawa.

Hinuon, dili kaayo daghan ang nakasinati niining side effect sa mga nabakunahan na sa Estados Unidos. Ang Center for Disease Control and Prevention (CDC) mimando na sa pag-review niini aron masuta kon ang vaccines ba ang hinungdan. Wala pa hinoon momando ang lokal nga Food and Drugs Administration (FDA) sa pagpahunong sa paggamit ning duha ka vaccines dinhi sa ato. Inilog ra ba ning Pfizer dinhi sa ato.

Kahinunduman, ang FDA mipahunong sa paggamit sa UK manufactured Astrazeneca niadtong miaging mga buwan gumikan sa side effect usab nga nabatyagan sa mga nabakunahan niini labi pa ang mga batan-on sa Britanya. Apan gibalik ra usab kini ug walay susamang kaso nga dinhi nga blood clot. Astrazeneca ang akong bakuna ug kaluoy sa Diyos wala man koy nasinate nga side effect.

Samtang sa Estados Unidos, gamay lang ang nangamatay gumikan sa Covid nga nabakunahan na kay sa wala mabakunahi. Siguro nakatabang ang bakuna sa pagsalbar sa ilang kinabuhi. Dili man tuod garantiya nga sa oras nga mabakunahan na ang tawo, dili na siya matakbuyan sa Covid. Matakbuyan gihapon ug makapanakod gihapon apan dili mo-grabe ang pasyente.

Pero unsa man ning nahitabo sa Indonesia nga daghan man hinuon ang nangamatay human ma-fully vaccinated sa Sinovac? Kasagaran sa nangamatay frontliners, nurses ug doctors. Nagkuwestiyon na pod kini sa ka-epektibo sa Sinovac. Bisan man gani dinhi sa ato, daghan ang nagduda aning Sinovac. Yam-iran man gani sa uban kay gusto sila sa US made brand. Bisan kon gigamit na kini karon, apan nagpadayon man god gihapon ang clinical trial aron gyud ma-perfect.

This posting includes an audio/video/photo media file: Download Now

Mongaya: Baho na gyud

Posted: 03 Jul 2021 08:25 AM PDT

Kon pabor ang hangin sa Inayawan padung sa Syudad sa Sugbo, moabot na daw sa Cebu City Hall ang baho sa basura sa Inayawan. Mao kini ang obserbasyon nga gipadayag ni Konsehal Dave Tumulak diha sa iyang programa sa DYRB.

Ug akong nasabtan nga tungod kini kay wala mobayad ang Docast, contractor nga mohipos sa basura sa Syudad sa Sugbo, sa utang niini nga P18 milyones ngadto sa Arn Central Waste Management Inc. diha sa Barangay Binaliw.

Nakakolekta na man unta ang Docast og P39 milyones gikan sa Cebu City apan nganong dili man kini makabayad sa utang? Naa pa ganiy P1.6 milyones sa Aloguinsan dumpsite.

Kurakot lang gyud kining Docast o duna kiniy gipahinungdan diha sa Cebu City Hall?

Bise Mayor Mike Rama, ngano man gyud nga adto sab ninyo ipalabay ang basura sa Consolacion nga layo man kaayo kini. Di ba ang kontrata sa City Hall ug Docast dapat sulod ra sa syudad ang labayanan unta, buot ipasabot ang Binaliw? Nganong di na lang ilisan kining Docast ug ikiha ang mga kakunsabo niini sa Cebu City Hall?

Ug sama sa pangutana ni Konsehal Tumulak, asa na ang DENR? Nganong hilom kaayo mo?

Tabunan ang bulkan?

Nipasiaw si Presidente Rodrigo Roa Duterte nga iyang tabunan ang bulkang Taal. Nahitabo kini dihang gipangutana ang pangulo kabahin sa pag-aso pagbalik sa bulkan padung sa pagboto niini.

Apan dili kataw-anan ang presidential joke batok sa laing disaster nga nagsugod na og hitabo. Mao kini ang pagboto sa bulkan nga Taal.

Wa pa gyud mahuwasi ang katawhan sa pasiaw ni Digong kabahin sa pag-jet ski ngadto sa usa sa atong isla diha sa West Philippine Sea (PPS) nga gihimong kampo sa mga Insek.

Unsa man diay kining kaisog ni Digong? Pasiaw lang?

Pangurakot

Sa ubang okasyon, masuko siya sa tawo nga manaway niya. Ang labing ulahi niyang giaway nga binabaay mao si Sen. Manny Pacquiao.

Nasuko ang Presidente nga niuyon ang senador sa punto nga daghan pa gyud ang pangurakot. Iyang giingnan si Pacquiao nga nganlan dayon. Ug mao sab ang gibuhat sa senador.

Nakahibawo sab kita nga aron matabangan ang presidential daughter nga si Davao Mayor Inday Sara Duterte-Carpio, gisugo ni Digong ang loyalist nga si DOE Secretary Alfonso Cusi nga tangtangon si Pacquiao isip presidente sa PDP-Laban.

Gigamit usab ang PDP-Laban nga moduso sa punto nga mag-bise presidente si Digong.

Kay daghan man ang wala makauyon, niingon karong bag-o ang Presidente nga taktika sa politika lang kini.

Tingale, angay ipaapil nato ang nahitabo sa Cebu City sa listahan sa pangurakot ni Sen. Pacquiao. (DM nako sa @anol_cebu)

This posting includes an audio/video/photo media file: Download Now

Diola: Napahingangha

Posted: 03 Jul 2021 08:20 AM PDT

Binasi sa Ezekiel 2:2-5; Salmo 123; 2 Taga-Corinto 12:7-10; Marcos 6:1-6

Makalingaw ning pulong "napahingangha". Mabulokon. Milarawan sa tawo nga nakalitan, nanindotan, o nibati og tumang kataha. Wala nay ikasulti pa ang nag-abri nga bâbâ. Nagnganga na lang kini. Bisan sa atong paglitok sa maong pulong – "nagnganga" – makapaabri na sa atong bâbâ.

May mga debuho nga makapahingangha. Adunay mga artista sa pelikula nga maayo kaayong moarte – makaapaabri sa bâbâ. Naay mga tanan-awon sa kalangitan nga mahipatik sa alimpatakan tungod sa ilang katahom ug katalagsaon. May buhat sa kaluoy ug puangod nga wala damha ug tinuoray. Makapahingangha.

Apan, matag karon ug unya, dili positibo ang gipasabot niining pulonga. Sa atong ebanghelyo, si Jesus "wala makahimo didto og mga milagro gawas sa pagtapion sa iyang mga kamot ug pag-ayo sa pipila ka mga masakiton". Kini ang subo nga nahitabo didto sa Nazaret, ang "iyang lungsod nga nadak-an." Ngano man? "Wala sila motuo kaniya", sumala ni Marcos. Nakaminus ang mga katagilungsod ni Jesus. Mitapos ang ebanghelyo: "Ug natingala siya sa ilang pagkawalay-pagtuo."

Mahimo pod nga hubaron ang "natingala" sa "nahingangha". Mao gihapon kining pulonga sa Griyego diin gilarawan ang gibati ni Jesus sa mapaubsanon ug masaligong pagtuo sa senturyon kansang sulogoon himalatyon: "Ginuo, dili ko angay nga mopadayon kanimo sulod sa akong panimalay; apan paglitok lamang og pulong, ug mamaayo ang akong sulugoon." Napahingangha si Jesus.

Sa ebanghelyo karong adlawa, laing matang ang pagkahingangha ni Jesus. Dili kini makapadangat og kalipay ni pasalamat kondili kaguol ug kahigwaos. Sa tinagalog pa, "sayanga" oy. Usika oy. Sila na hinuon nga iyang mga kauban sa Nazaret maoy wala moila kaniya. Nakaminus sila kaniya. Milabay ang kahigayonan nga makabaton og daghang kaayohan apan ila kining giusikan!

Sagad sukwahi ang kinaiya sa tawo sa plano sa Dios. Sumala pa ni propeta Ezekiel, "Ipadala ko ikaw ngadto sa katawhan sa Israel, katawhan nga masupilon...Mga gahi silag ulo, ug way tahod kanako." Mora usab og nakapahingangha kini sa Ginuo. Bisan pa man niini, hatagan lang gihapon niya og kahigayonan ang iyang katawhan pinaagi sa mensahe sa propeta.

Sa sulat ni San Pablo, makaingon pod kita nga nahingangha siya sa misteryosong pamaagi sa Ginuo sa paghimo og kaayohan bisan gikan sa nakaapan o kahuyang ni Pablo. "Busa gikalipay ko pag-ayo ang pagpagarbo sa akong mga kahuyang aron maangkon ko ang gahom ni Cristo...Kay kon huyang ako, nan lig-on ako," miingon si Pablo.

Makapahingangha ang gahom, katahom, kamatuoran, kaayo, ug gugma sa Dios. Dili gyod nato mabaslan ang Ginoo sa iyang kaayo. Unsang matang sa paghingangha ang mahimong bation sa Dios sa atong relasyon tali kaniya?

This posting includes an audio/video/photo media file: Download Now

Daclan: John Lloyd ug Katrina?

Posted: 03 Jul 2021 08:19 AM PDT

John Lloyd Cruz ug Katrina Halili duna bay relasyon?

Mao kini ang daghang mga pangutana sa madlang pipol.

Daghan ang naukay sa dihang nag-post sa Instagram og belated birthday greetings si Katrina.

Kinsa may di makurat nga sa mga litrato niini kauban man sa Kapuso actress ang kanhi Kapamilya actor nga may buhaton nang mga proyekto sa Dyete.

Gawas ini may mga piktyur usab si Katrina kauban ang anak ni John Lloyd nga si Elias.

Wala naghisgot ang babaye kon diin nakuha apan nahibaw-an na lang nato nga sa resthouse diay kini ni John Lloyd sab Nasugbu, Batangas diin didto nagselebrar ang aktor sa iyang birthday.

Didto usab sa maong okasyon ang Maja Salvador ug uyab ining si Rambo Nuñez, gawas nga suod nga managhigala si Maja ug John Lloyd kini usab ang nagdumala sa Crown Artist Management nga maoy nag-manage karon sa career ni Loydie.

Apan nganong anaa man si Katrina Halili?

Matod pa sa usa sa mga amigo ni John Lloyd, uyab niin karon si Katrina, mao buh?

Kon nahinumdom mo unang migawas sa usa ka vlog nga nag-uban silang Katrina ug John Lloyd sa El Nido, Palawan niadtong Abril.

Kon nanuntan man kini karon silang duha ra gyud ang nasayod kon unsay tinuod nilang relasyon, Ay'g Saba!

* * *

Makauban ni Xian Lim si Jennylyn Mercado sa usa ka drama series sa GMA nga "Love. Die. Repeat."

Natapos na ang Season 1 sa gameshow ni Xian sa TV5 nga "1,000 Heartbeats: Pintig Pinoy."

Samtang wala pa sugdi ang Season 2 sa maong gameshow, ang taping sa proyekto nilang Jennylyn mao una ang iyang atimanon.

Excited si Xian Lim kay mao kini ang unang niyang trabaho sa Kapuso network sa bag-ong chapter sa iyang career.

Nagsugod sa Kapamilya, nahimong Kapatid ug kon way mga kausaban sa schedule sa iyang taping mahimo na kining Kapuso, Ay'g Saba!

* * *

Lami ug tam-is ang gugma sa ikaduhang higayon, mao kini ang gibati karon nilang McCoy de Leon ug Elisse Joson.

Ilang gipabuhagay ang ilang panag-uli ug pagbati pinaagi sa social media gumikan niini nahibaw-an natong tanan nga may balikan diay nga nahitabo.

Matod pa ni McCoy nga nagbalik silang Elisse sa wala pa magsugod ang pandemia, kasamtangang tua sa San Francisco, California ang Elisse mao nga super miss na kaayo kini sa ulitawo.

Dili mahulagway ni McCoy ang kalipay nga iyang gibati karon, daghan sab kini nga mga pagtulon-an nga nakat-onan gikan sa naagian nilang mga pagsuway sa ilang relasyon, Ay'g Saba!

This posting includes an audio/video/photo media file: Download Now

Super Blowout: 'Gihatag siya sa diyos kanako'

Posted: 03 Jul 2021 08:18 AM PDT

"Mao na gyud ni! Salamat sa Ginuo."

Kini ang nasulti ni Ariel Itumay sa iyang kaugalingon dihang iyang nakita ang tubag sa sign nga iyang gipangayo sa Ginuo, kon kinsa ang babaye nga iyang seryusohon ug higugmaon sa iyang tibuok nga kinabuhi.

Nahitabo kini human ni-chat og balik niya si Regine Godinez, pipila ka buwan human sila nagkabuwag.

Karon, si Regine nahimo na nga kapikas sa kinabuhi ni Ariel.

Niadtong Hunyo 29, 2021, nakasal ang duha sa Archdiocesan Shrine of St. Therese of the Child Jesus sa Barangay Lahug, siyudad sa Sugbo.

Nagsugod ang ilang love story sa newsroom sa Superbalita Cebu.

Niadtong 2011, dihang una sila nga nagkaila. Si Regine, intern sa Superbalita niadtong higayona, samtang layout artist si Ariel sa samang mantalaan.

Gisungogsungog silang duha sa mga kanhi klasmeyt ni Regine.

Niadtong Marso 2012, sila nagkauyab.

Gihulagway ni Ariel si Regine nga maanyag ug siaw nga lahi sa iyang mga kauban.

Samtang, siaw, mapinanggaon ug buotan si Ariel, paghulagway usab ni Regine sa iyaha.

Sama sa ubang mga relasyon, niagi usab sila og mga pagsuway. Sila nagkabuwag.

Sa paglabay sa panahon, gusto ni Ariel nga mahiluna ug magtinarong na sa gugma. Nangayo siya og sign sa kahitas-an.

Wa niya damha nga mo-chat niya og balik si Regine pinaagi sa Messenger. Nangumusta kini niya.

Niini, nakaingon si Ariel sa iyang kaugalingon nga kini na ang tubag sa sign nga iyang gipangayo sa Ginuo.

Niadtong Abril ning tuiga, nakahukom ang duha nga magpakasal. (SCG)

This posting includes an audio/video/photo media file: Download Now

Casimero vs Rigondeaux

Posted: 03 Jul 2021 08:18 AM PDT

Human moatras si World Boxing Council (WBC) bantamweight champion Nonito "The Filipino Flash" Donaire, ikaharong ni World Boxing Organization (WBO) bantam king Johnriel Casimero ang orihinal niyang kontra nga nga si Guillermo Rigondeaux sa Cuba karong Agusto 14, 2021.

Ang Premier Boxing Champions mipahibawo ning bag-ong kalambuan diin ila pang tukion kon asa kini ipahigayon.

Ang kalit nga pag-atras ni Donaire nagagumikan sa isyu kalabot sa Voluntary Anti-Doping Agency (VADA) ug ang pagpakita sa kampo ni Casimero nga way respetar kanila.

Pinaagi sa social media, nagbinirahay ang matag habig sulod sa pipila ka semana gikan sa pag-anunsiyo mismo ni Donaire sa ilang away.

Kon kahinumdoman, si Rigondeaux, regular WBA champion, mao gyud unta ang unang makontra ni Casimero nga nahikay sa PBC alang sa Agusto 14.

Apan sa kalit lang misal-ot si Donaire ug mipahibawo nga siya ang makig-away ni Casimero ning maong petsaha.

Dugang sa taho nga misabot ug mihatag sa maong kahigayonan si Rigondeaux aron paghatag og dalan sa unang all-Pinoy unification fight nga ipahigayon sa Dignity Health Sports Park sa Carson, California.

Ang 32 anyos nga Casimero mirehistro og unom ka sunodsunod nga kadaugan ug pinakauwahi niini mao ang technical knockout nga kadaugan batok sa Ghanaian fighter nga si Duke Micah niadtong Septiyembre aron pagpasaka sa iyang record ngadto sa 30-4, 21 KOs.

Si Rigondeaux, 40, sa iyang bahin naghambin og 20-1, 13KOs nga baraha ug katapusang nakaaway niadtong Pebrero sa niaging tuig diin iyang napildi ang Venezuelan nga si Liborio Solis pinaagi sa split decision. (JBM)

This posting includes an audio/video/photo media file: Download Now

Migallen: Donaire dili diay preparado?

Posted: 03 Jul 2021 08:15 AM PDT

Nabulit sa negatibong komento, apil na ang pagbiay-biay, si Nonito "The Filipino Flash" Donaire sa social media tungod sa iyang kalit nga pag-atras sa ilang away ni Johnriel "Quadro Alas" Casimero nga gikatakda unta karong Agusto 14, 2021.

Daghan na man gud kaayong naghinamhinam ug nag-atang sa maong away kay kini maoy unang higayon nga pulos Pinoy ang mag-abot ibabaw sa ring alang sa unification title fight.

Si Donaire maoy kasamtangang kampiyon sa World Boxing Council (WBC) bantamweight division samtang si Casimero mao usab ang naghupot sa bakus sa World Boxing Organization (WBO) sa mao gihapon nga timbang.

Wa magdahom ang kinabag-an nga motalikod ba diay sa Donaire sa panagsangka tungod kay siya pa man ang nag-una-una og pahibawo sa publiko kalabot niini.

Gani mora og ganado kaayo siya nga misabwag sa balita ilabi na kay una na usab niyang gipahibawo nga ang pag unify sa bantamweight titles maoy iyang target.

Pero niisa ang mga kilay sa mga boxing fans lakip na ang pipila sa iyang mga dumadapig tungod kay mora man og nangita siya og paagi nga dili mahinayon ang away.

Una mao ang isyu sa pagpa drug test sa ubos sa Voluntary Anti Doping Agency (VADA) nga ilang gipalanog nga gilikayan ni Casimero.

Pero sa dihang gibutyag sa VADA ug sa WBC nga na-enroll na diay si Casimero alang sa drug testing, nangita na usab siya og laing rason.

Kini ang kabahin na usab sa trash-talk sa kampo ni Casimero nga daw og sa wa nay respetar kaniya ug sa iyang pamilya.

Por diyos por santo, kanang trash-talk kabahin na kana sa stratehiya sa pamoksing. Sayod si Donaire niini kay taodtaod na gud siya sa boxing.

Dili kini himuon niyang rason aron lang di madayon ang away kay sukad ma sukad way boksidor nga mitalaw tungod sa trash-talk.

Makapainit kini sa publiko ug makaayo sa promotion.

Nganong di man tug-anan ni Donaire ang publiko nga niatras siya tungod kay nahadlok ni Casimero kay dili siya preparado sa maong away.

Pila na lang ka adlaw sa dili pa ang gikatakda nilang petsa, wala pa siya ka setup sa iyang training camp samtang si Casimero nagpadayon sa iyang ensayo.

Tungod sa iyang gihimo, naguba ang iyang reputasyon ug nakuhaan sa bilib ang uban niyang dumadapig. Sobra pa gani sa trash-talk ang iyang nadawat sa social media.

Pero dili pa uwahi ang tanan. Aron pagbangon sa iyang legasiya, iyang awayon si Casimero.

Mangayo lang siya og postponement sa away, kanang petsa nga sakto na siya sa pagpangandam.

Sa akong lang panglantaw, bisan tuod og mas edaran siya kay ni Casimero, kon abilidad lang ang hisgutan, nakabintaha gihapon siya sa tapad kon anaa lang siya sa saktong disiplina ug ensayo.

Anaa gihapon niya ang kusog ug kahanas. Mas maayo ni kay sa mokakak nga mora sab og ang Japanese star nga si Naoya Inoue nga grabing nakalikay ni Casimero. (Alang sa inyong komento ug reaksiyon, mahimong mopadala sa jun.migallen22@gmail.com)

This posting includes an audio/video/photo media file: Download Now

VisMin Cup Mindanao leg giuswag

Posted: 03 Jul 2021 08:15 AM PDT

Sa makausa pa, giuswag na usab ang Chooks-to-go Pilipinas VisMin Super Cup Mindanao leg ngadto sa Hulyo 6.

Ning higayona, matod pa sa tinubdan, nga posibling adto kini temporaryong ipahigayon sa lungsod sa Ipil, mga duha ka oras gikan sa Pagadian City nga mao gyuy orihinal nga venue.

Ang padayon nga pagpaubos sa Pagadian City sa MGCQ tungod sa pabiling pagkatap sa coronavirus sa maong siyudad maoy rason nga gidid-an pa sa pagsugod ang torneyo sa maong dapit.

Dugang sa taho, nga sa higayon nga ipaubos na sa GCQ ang Pagadian City, ibalhin gilayon didto ang mga duwa sa torneyo nga salmotan sa siyam ka mga teams.

Ang mga teams nga magkombati mao ang Iligan Archangels, Alza Alayon Zamboanga, Roxas Vanguards, JPS Zamboanga City, Basilan Peace Riders, MisOr Brew Authoritea, Kapatagan Buffalo Braves, Sto. Nino Clarin ug Pagadian Explorers.

Niadto pa untang Hunyo 22 gikatakda ang opening ceremony sa bag-ong professional basketball league sa nasod ug giuswag kini sa Hulyo 3, 2021 sa susamang rason. (JBM)

This posting includes an audio/video/photo media file: Download Now

Kanhi kontra ni Pacquiao namatay sa coronavirus

Posted: 03 Jul 2021 07:52 AM PDT

Ang kanhi kontra ni Manny Pacquiao nga maoy iyang unang nahimong ang-ang sa iyang sunodsunod nga kalampusan, mipanaw na sa laing kalibutan.

Si South African Lehlohonol Ledwaba namatay niadtong Biyernes (Sabado sa Pilipinas) tungod sa Covid-19 disease, matod pa sa taho sa usa ka television nga nagbase didto sa South Africa.

Motangkod na unta nga 50 anyos si Ledwaba karong Hulyo 27.

Siya miretiro sa boxing niadtong 2006 nga may record nga 36-6-1, 23 KOs nga record.

Usa sa iyang makasaysayon nga away sa iyang karera mao ang pagdepensa sa iyang International Boxing Federation (IBF) super bantamweight title batok ni Pacquiao sa undercard sa WBC title fight ni Oscar de la Hoya ug Javier Castillejo sa MGM Grand sa Las Vegas niadtong 2001.

Kini maoy unang away ni Pacquiao sa US sa edad nga 22 anyos. Bisan pa man sa hamubo ug dinalian nga pagpahibawo, napildi ni Pacquiao si Ledwaba pinaagi sa technical knockout sa ikaunom nga round.

Dinhi nagsugod sa pagsubang ang boxing career ni Pacquiao nga maoy nakapahimo niyang boxing legend ug Hall of Fame career sa tibuok kalibutan. (JBM)

This posting includes an audio/video/photo media file: Download Now

Vallena: Balaud ug kaluoy

Posted: 03 Jul 2021 07:45 AM PDT

Sa tanan nga mga bike lanes sa Dakbayan sa Sugbo, ang nakit-an nako nga gitahod sa mga motorista mao ang portion sa P. del Rosario street, kanang sa atubangan sa Sunstar. Nakabantay ko ini niadtong Biyernes.

Nagsige ko og analisar kon ngano. Ang presensya sa mga traffic enforcer dako kaayo og factor kon nganong ang mga motorista nagrespeto sa bike lane. Wa ko makakita sa ilang pagbadlong, apan knowing sa mentalidad sa mga driver sa atoang kadalanan, seguradong gipamadlong sila sa mga traffic enforcer.

Hinaut pa unta nga ipaedukar ni CCTO head Lyntoni Alboro ang tanang mga motorista matag karon ug unya sa mga bike lane gamit ang mga traffic enforcer sa mga corner sa mga karsada sa dakbayan sa Sugbo.

Kani man gung P. del Rosario agianan kini sa mga mga bike-to-work natong kaigsuonan busa importante usab kaayo ang pag-edukar sa mga motorista. Kani gyung whole stretch sa Cebu North Road nga nasulod sa teritoryo sa Cebu City padung na sa southern part sa Cebu City, gikan sa P. del Rosario hangtod sa whole stretch sa N. Bacalso Avenue.

Maanindot kaayo kon naay maagian ang mga biker nga nag bike-to-work kay maka encourage sab ni sa uban. Kon mahinayhinay kini og himo sa CCTO ubos sa pagpangulo ni Maam Lyntoni, makakita kitag kausaban sa kadalanan kay mausab man usab ang mentalidad sa mga driver.

It's a matter of implementation, not necessarily nga silot dayon, kon di reminder lang una.

COUNTERFLOW

Hinaut pa unta usab nga badlungon na sa mga traffic enforcer ang mo-counterflow, kon mahimo, dakpon ug pamultahon. Kon kuyaw sa mga nagmotorsiklo nga moagi sa sidewalk, mas deadlier ug mas kuyaw ang counterflowing.

Di ko makalimot sa akong makapanglimbawot ug makaulpot sa kabuhi nga experience. Kadtong ni counterflow nga Subaru nga SUV nga samtang naghunong ko sa corner sa Archbishop Reyes avenue ug Cebu Business Park. Iya kong gidasmagan unta but nakalihay dayon ko. Akong gigukod ug naapsan. Nangayo rag sorry ang hanggaw.

Hapit sab mi maigo sa akong asawa sa mi counterflow nga big bike sa may Nasipit, Talamban, unahan sa University of San Carlos. Maayo gani nakalihay sab ko. Di na maihap nako ang akong di maayong mga kasinatian sa counterflowing.

IPATUMAN

Sa ako nang giingon, nothing is wrong sa pagpatuman sa balaud. Mahimo man gud nga phases ang implementation. Una, information drive sa pagpatuman nga dunay petsa nga gitakda. Ikaduha, pagpatuman nga warning lang una. Ikatulo, mao ang pagpatuman nga duna nay silot. Kanang tag usa ka semana nga kampanya kada phases.

Ang silot ipasubay sa balaud, di kanang oppressive ra kaayo. Makasabot ra ang mga motorista. Kanang pagpatuman sa balaud nga dunay kaluoy ug pagsabot. Ang abuso maoy papason.

This posting includes an audio/video/photo media file: Download Now

Antetokounmpo, Young way siguro

Posted: 03 Jul 2021 07:36 AM PDT

Gumikan sa injury, kwestyonable ang presensiya sa duha sa superstars sa Atlanta Hawks ug Milwaukee Bucks atol sa ilang game 6 sa Eastern Conference Finals sa National Basketball Association.

Si Antetokounmpo kinsa napiang atol sa game 4 batok sa Hawks gumikan sa hyperextension sa walang tuhod ug si Young nga adunay bone bruise sa tuong tiil padayon pa nga nagpaalim sa ilang mga angol.

Ang Atlanta nga wala ang ilang 22 anyos nga lider nakahimo pa sa pagtabla sa series 2-2 human sila nidaog sa game 4 apan gibawsan sila sa Bucks sa game 5 nga wala usab si Antetokounmpo.

Ang duha ka superstars wala gisalikway sa ilang teams nga makabalik og duwa sa playoffs apan ang mga fans nangutana hangtod kanus-a sila makabalik og duwa?

Si Giannis gilista sa Bucks isip questionable para sa game 6 base sa report nga mao sab ang iyang status sa game 5 sa wala pa siya hingpit nga gipapas sa lista atol sa duwa.

Samtang walay sigurado nga makabalik og duwa si Giannis sa game 6. Adunay report si Chris Haynes sa Yahoo Sports nga posibleng makaduwa si Antetokounmpo kon ang ilang series moabot sa game 7.

Sa 15 ka duwa sa playoffs, si Giannis nag-average og 28.2 puntos, 12.7 rebounds ug 5.2 assists ug nag-average og 55.1% gikan sa field.

Mao sab ang status ni Young para sa maong duwa.Si Hawks coach Nate McMillan nitug-an sa mga reporter nga ang decision sa pagpaduwa sa iyang superstar magdepende kini sa iyang pamati kon dili na ba mosakit ang iyang piang sa tuong tiil.

Si Young nag-average og 29.8 puntos ug 9.5 assists per game sulod sa 15 ka duwa sa post season. (PAC)

This posting includes an audio/video/photo media file: Download Now

SBP boxers daog sa “First Blood”

Posted: 03 Jul 2021 07:34 AM PDT

Nidaog ang tulo ka boksidor sa Stags Boxing Promotions atol sa gipahigayon nga "First Blood" sa barangay San Isidro, Dakbayan sa Talisay.

Impresibo ang gipakita nga abilidad ni Marco Pomar batok ni Renate Noblefranca human iyang napatumba pinaagi sa left hook sa ikaduhang hugna sa ilang four-round boxing aron angkunon ang kadaugan.

Mao sab ang gipakita ni Keyt Niño Abatayo, kinsa nipahagba ni CD Noblefranca sa second round apan wala siya maka-follow-up og mga solid nga kumo hangtod niabot sa fourth round ug nidaog siya pinaagi sa unanimous decision.

Sa main event sa "First Blood", gipalukapa ni Kit Ceron Garces ang iyang kontra nga si Marvin Laping human maigo sa mga body shots apan ang left hook sa dapit sa gusok maoy nakapalu-og sa kontra hinungdan sa iyang impresibong kadaugan.

Si Atty. John Jigo Dacua, sa Stags Boxing Promotions (SBP), kinsa maoy nagpasiugda sa professional boxing, nihulagway nga malampuson ang "First Blood" apan ang nakalahi mao ang audience sanglit walay fans nga gitugotan atol sa mga away.

Ang big boss sa SBP nga si Dacua nagkanayon nga mopahigayon unya sila og mas dako nga promotion sa higayon nga moluag na ang mga health and safety protocol batok sa Covid-19 aron mas daghan ang makakita ug mangimbitar sab sila og mga iladong boxidor.

Gipasalamatan ni Dacua si Mayor Samsam Gullas sa Talisay City, Governor Gwendolyn Garcia ug mga sponsors nga maoy responsable para mahimong malampuson ang labing unang promotion sa SBP. (PAC)

This posting includes an audio/video/photo media file: Download Now

at

No comments:

Post a Comment

Subscribe to: Post Comments (Atom)

End of Summer Sale ☀️😎

20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...

  • Last Chance - Win over $1,800 in BLEUSALT
    Elevate your Wardrobe. Offer ends Midnight. ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏ ...
  • Breaking: Aaron Rodgers teases Jets return this season: 'Anything is possible'
    New York Jets quarterback Aaron Rodgers suffered a torn Achilles tendon in Monday's 22-16 overtime win vs. the Buffalo Bills. If you a...
  • End of Summer Sale ☀️😎
    20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...