Saturday, July 31, 2021

https://www.sunstar.com.ph/

https://www.sunstar.com.ph/

Pacquiao gibisita ni Klay Thompson

Posted: 30 Jul 2021 08:19 PM PDT

Way hunong ang karisma ni Manny Pacquiao didto sa Hollywood nga gani nakaagni og mga NBA superstars ug celebrities.

Ang Golden State Warriors star nga si Klay Thompson maoy uwahing nakabisita sa Filipino boxing superstar sa iyang training camp, tulo ka semana sa dili pa siya makigsangka ni World welterweight champion Errol Spence sa T-Mobile Arena sa Las Vegas.

Ang 6-6 nga three-time NBA champion dalit nga nakahinabi sa eight-time world division champion ug dayon nagpahulagway kaniya sa Wildcard gym.

Mapasalamaton si Pacquiao sa pagbisita sa 31-anyos nga Thompson kinsa giila nga usa sa pinakahinigo nga player sa NBA.

Gikomediyahan ni Pacquiao si Thompson nga iya kining tudloan unsaon pagsumbag kon tudloan sab siya niini kon unsaon pag-shoot sa bola.

Si Thompson kinsa wala makaduwa sa Warriors sa duha ka season tungod sa injury usa ka lumad nga taga Los Angeles, California.

Siya maoy ikatulong NBA star nga nakadalikyat sa pagbisita sa training camp ni Pacquiao.

Sa sayo pa, ang Fil-Am nga si Jordan Clarkson sa Utah Jazz ug Karl Anthony Town sa Minnesota Timberwolves maoy unang nakabisita sa 42-anyos nga Pacquiao.

Ang kanhi world champion nga si Miguel Cotto ug ang Fil-Am rapper Allan Pineda Lindo nga naila sa apl.de.ap sa Black Eyed Peas maoy pipila lang ka mga celebrities ang mihatag og higayon nga mahimamat si Pacquiao. (JBM)

This posting includes an audio/video/photo media file: Download Now

4 ka border control points imontar sa CCPO

Posted: 30 Jul 2021 07:46 PM PDT

Gi kompirma sa deputy city director for operation sa Cebu City Police Office, Pol. Lt. Col. Wilbert Parilla, nga sugod alas 12:01 sa Dominggo sa kaadlawon, Agusto 1, 2021, ibalik na nila ang mga border control points.

Upat ka border control points ang ibalik sa pag montar. Kini anha sa El Corso sa SRP ug sa Bulacao sa south, Talamban ug sa Kasambagan sa north area sa dakbayan sa Sugbo.

Hinuon, wala pay kamandoan gikan sa Emergency Operations Center kon ang mga pulis mo dili ba sa mga taga laing lugar nga mosulod sa dakbayan sa Sugbo.

Matod ni Parilla nga ang ilang buhaton mao lang ang pag badlong aron tumanon ang health protocol. (AYB)

This posting includes an audio/video/photo media file: Download Now

Editoryal: Padayon ta

Posted: 30 Jul 2021 07:35 AM PDT

TINUOD nga kabalak-an bahin sa pag-abot sa Sugbo sa Delta variant sa Covid-19, sumala sa taho sa Department of Health (DOH). Apan dili kita magpahikot sa kahadlok. Modayon sa naandang kalihokan aron moligid sa hingpit ang nagusbat nato nga ekonomiya tungod sa pandamiya.

Dili kita makabasol sa Inter Agency Task Force (IATF) nga nipakanaug og kamandoan sa paglakip sa tibuok Sugbo sa modified enhance community quarantine (MECQ) gikan sa modified general community quarantine ((MGCQ) tungod sa gikahadlokan nga pagkontrolar sa pagkaylap sa bag-ong variant sa Covid.

Tahas sa IATF ug DOH ang pagbantay sa atong panglawas. Ang kanunay nga ilang gitutokan kon unsaon sa pagsanta sa virus. Wala kaayo mohatag og konsiderasyon sa ekonomikanhong konsiderasyon sa ilang hukom nga daling mokanaug og MECQ nga duol sa hingpit nga pagsira sa kalihokan o lockdown.

Dakong tahas sa lokal nga kagamhanan o piniling opisyal uban sa sektor sa pamatigayon sa pagbalanse sa sitwasyon, ang pagsanta sa sakit ug pagpanalipod sa ekonomiya alang sa katawhan nga dili mag-ilaid sa tumang kalisod. Busa, dalaygon ang hukom ni Cebu Gov. Gwendolyn Garcia nga dili mag-lockdown.

Giuyonan sa daghang mayor, lakip sa tri-cities sa Metro Cebu, nga mopadayon sa naandang kalihokan sa pamatigayon uban sa higpit nga pagpatuman sa health protocol nga mando sa IATF. Igo na ang "pagsira" sa gamay nga dapit nga naapektohan sa virus, dili anginon ang tanang dapit.

Manawagan kita sa katawhan nga moabag ug magpakabana. Mopadayon kita ubos sa pagtamod sa protocol. Dili molakaw kon wala kinahanglana. Suportahan nato ang mando sa IATF ug DOH. Paluyohan usab ang mga piniling opisyal. Kini nga paningkamot alang kanatong tanan.

Labaw sa tanan, mag-ampo kita sa intersisyon sa balaang espiritu sa Kahitas-an nga tabangan nga mahunong na ang pandemiya.

This posting includes an audio/video/photo media file: Download Now

Binghay: Filipino Time

Posted: 30 Jul 2021 07:34 AM PDT

PARA natong mga Pinoy, normal ra nga magsugod og late sa atong mga kahalihukan kay parti naman kini sa atong kultura. Kasagaran nato nadawat o naandan na ang di-pagtunga o sugod sa kalihukan sa insaktong oras nga gitakda.

Unya, tungod sab sa nagka-grabi nga trapiko pun-an pa sa ka kuwang sa kaugalingong disiplina, na-anad na hinuon ta sa ingon ining pama-agi maong hangtod karon naglisod pa gihapon ta sa pag-irog sa kalisod kay dako man kini og epekto di lang nato kundi sa mga kompaniya sab nga maoy nagpadagan sa nasudnong ekonomiya.

Pananglitan, kon maghisgot ta sa aviation industry, atong mga dagkong airline companies taas kaayo og porsento sa ilang mga flights nga na-delatar.

Matod ni Fr. Miguel Bernard nga nagsulat sa libro nga 'Budhi: A Journal of Ideas and Culture' nga nagtuki mahitungod sa Filipino Time, kining nga termino gimugna sa panahon pa sa mga Americano dinhi sa Pilipinas niadtong early 1990's tungod lagi kay kitang mga Pinoy kanunay man ma-late unya di motamod og insaktong oras. Gihisgutan sab kini sa Chapter 22 sa libro nga "El Filibustirismo" sa atong nasudnong bayani nga si Dr. Jose Rizal.

Maong di kalikayan, mismong mga dagko ug importanting opisyal, nga atong gitahod nga modelo, nagpraktis sab ini sama pananglit sa maka-uuwaw nga nahitabo kaniadto ni President Quirino didto sa Fordham University niadtong 1950's diin gihatagan siya og dakong pasidungog. Nagsugod ang seremonyas alas 2:00 sa hapon apan mitunga siya alas 4:00 naman maong nanguli na ang mga tawo lakip ang taga-media nga mi cover.

Dakong leksyon ang maong panghitabo nga angay ug hinay-hinayan pagbatok kay kon di ta mosanong sa insaktong oras nga gitakda, pasabot nga wa sab tay respito sa oras sa uban. Sahi pa kung ikaw ang maghuwat, lalim ba.

Angay kini natong hinuktukan kay kung nahimo kini sa atong mga igsoon sa buhat nga nanrabaho sa ubang nasod, kaya sab ni nato.

Atong sugdan pagdisiplina ang atong kaugalingon ug kabanay pagbansay-bansay sa insaktong oras.

This posting includes an audio/video/photo media file: Download Now

Nadela: Mabuhi si Hidilyn Diaz!

Posted: 30 Jul 2021 07:33 AM PDT

MAKABUNGOG nga mga pahalipay ug pagdayeg ang nibuhagay nunot sa pagsakwat ni Hidilyn Diaz ang labing bug-at nga tahas sa iyang kinabuhi, nga mao ang pag-angkon sa Team Philippines sa labing unang bulawan sa kasaysayan sa Olympics. Nahitabo kini atol sa 2021 Tokyo Olympics. Nikulit si Hidilyn og talagsaong record sa paugnat sa kusog sa tibuok kalibutan.

Kinsay magtuo nga ang Zamboangeña nga nakasugat og daghang pagsulay sa paugnat sa kusog nga iyang gipili nga mao ang weightlifting, mosakwat sa tibuok Pilipinas aron angkunon ang pinaka prestiyosong Gold medal sa nagpadayon nga Tokyo Olympics.

Tinuod dili lalim ang iyang mga naagian samtang nangandam ning kumbati sa pakusganay. Kana lang magbansay bansay ka nga wala sa imong kiliran ang imong mga minahal sa kinabuhi.

Magbansay bansay taliwala sa pandemiya nga maoy naka ingon nga natanggong siya subra sa usa ka tuig sa Malaysia. Bisan pa man gipadayon niya ang hugot nga praktis inabagan sa mga higalang taga Malaysia.

Niadtong Huwebes, usa ka emosyonal nga pagpauli ang nasaksihan sa labing unang gold medalist, human sa dul-an sa usa ka century nga pakigbisog sa Team Philippines.

Gawas sa mga pasidungog, dagkong kantidad sa salapi ang nasukip sa makabungog nga kadaugan, wala pay labot sa mga balay, condominium, sakyanan ug ubang ganti nga iyang madawat. Kadtong mga nagduda sa iyang katakus unta makakat-on na kamo og leksiyon.

Subay niini, ang 4th Sangguniang Panglungsod sa siyudad sa Naga, pinaagi sa motion ni SP Member Afshin Mark Señor ug ang hiniusang pag-uyon sa mga sakop sa konseho, nipaabot sa ilang pahalipay ngadto kang Hidilyn Diaz.

Nahitabo ni atol sa ilang regular session niadtong Huwebes sa buntag, Hulyo 29, pinaagi sa ilang presiding officer Hon. Vice Mayor Virgilio Chiong.

Ang tipik sa resolusyon nga gipadangat diri kanako pinaagi sa ilang SP Secretary Gary Cabotaje nagkanayon, " her extraordinary feat serves as an inspiration to the youth to excel in their chosen profession especially in the field of sports, while her deligence and self-discipline in preparation for the Olympics are indeed worthy of emulation." Ang resolusyon personal unya nga ipadangat ngadti kang Hidilyn. Sa mga batan-on ma-atleta man o dili, unta mahimong panag-ingnan ang kalampusan ni Hidilyn.

Sa pikas bahin gipaabot ang dakong celebrasyon sa Zamboanga City atol unya sa iyang pagpauli.

Niadtong nagtungha pa ko sa kolihiyo naabot ko ning maong ciudad kuyog sa akong uyoan nga nagtumod og kinumprang baboy. Nasundan ni niadtong dekada 80 sa reporter pa ko sa Bombo Radyo. Gipadala ko sa Zamboanga City aron mo-cover sa labing una nga pagdunggo ni Nur Misuari isip kabahin sa peace initiatives sa administrasyon ni Presidente Cory.

Kutob nalang ko sa paghandum sa akong kagahapon sa Zambanga City, nga ning gutloa sayod kitang tanan nga hilabihan ka malipayon sa mga kaigsoonan natong Zamboangeño gumikan sa usa ka binuhat nga mas gipalabi ang dungog sa iyang nasod kay sa kamingaw sa pamilya.

This posting includes an audio/video/photo media file: Download Now

Tambagi ko Noy Kulas: Problema sa yuta

Posted: 30 Jul 2021 07:33 AM PDT

Dear Noy Kulas,

TAWGA lang ko og Amanda. Ang akong pangutana kabahin sa yuta sa among ginikanan.

Ang igsuon sa akong mama naa nagpuyo sa yuta sa among ginikanan. Dugay nang patay si Papa. Karon kay gusto ihatag ni mama ang bahin sa yuta nga gitukoran og balay sa iyang igsuon.

Pwede ba na , Noy, nga conjugal property nilang papa ang yuta? Kaming mga anak dili mosugot. Naa ba mi mahimo para dili mahatag ni Mama ang yuta ngadto sa iyang igsuon? Magpaabot ko sa tubag Noy. Daghang salamat.

AMANDA

***

Amanda,

Sa balaud, wa moy mahimo kon ibaligya na sa inyong inahan ang iyang share. Apan ang katunga duna moy bahin isip mga anak. Iya mang right nga makahatag og parsela sa iyang bahin sa property. Busa mas maayo nga dunay kasulatan ug maklaro kon pila ang gidak-on sa yuta. Sa ato pa, sukdon kay kani kuhaon man o i minus sa bahinan sa imong inahan kon magbahinay sa yuta.

Kon i divide na ang conjugal property, gamay na lang ang iyaha itandi sa inyoha.

Mangayo kog sorry nga nadugay kaayo kog tubag.

NOY KULAS

rojval69@yahoo.com

This posting includes an audio/video/photo media file: Download Now

Albor: Malambuong Cebu

Posted: 30 Jul 2021 07:31 AM PDT

AGUSTO 6, 2021 maoy ika-452 Charter Day celebration sa lalawigan sa Cebu. Special non-working public holiday ubos sa RA 8952 ni Deputy Speaker Pablo Garcia. Kaniadto gipuy-an sa mga Hindu ug Muslim nga gidumala sa mga Rajah ug Datu.

Sentro sa Pilipinas nga gidagsaan sa mga Insek nga ulipon sa patigayon, Katsila nga nagsabwag sa Kristyanismo, Amerikano nga nagbitbit sa edukasyon ug Hapon sa natad sa inprastraktura.

Gikan sa pulong Sibu buot ipasabot patigayon. Sa pagdumala ni Rajah Humabon nahimong trading center sa binayloay sa mga produktong agrikultura, precious stones, perfumes, uban pa. Usa ka fishing village hangtod miturok ang mga industriya sa naglakaw nga katuigan.

Kapital ang Cebu City nga maoy uyok sa industriya, patigayon ug edukasyon. Karaang siyudad sa nasod ug oldest settlement nga giistablisar sa mga Katsila.

Sa isla sa Cebu anaa ang mga adunahang timailhan sa kasaysayan sama sa Magellan's Cross, Basilica Minore del Santo Niño, Lapu-lapu Shrine, Colon street nga mubo nga nasodnong dalan, Fort San Pedro nga military defense structure, daghan pang makasaysayanong kabilin.

Ang pagtuyhakaw sa mga dagkong kompaniya, dagan sa teknolohiya ug inobasyon sa mga Sugboanon naghatod sa lalawigan nga malambuon.

Nagkahulogan og relaxation, luxury, pleasure, kabaybayonan, hotels, breathtaking mountains, amazing fun activities, luscious restaurants, daghan pa alang sa lulinghayaw. Maoy richest province sa natad sa assets, premiere province sa inprastraktura, second best island sa Asia basi sa namantala sa International Travel Magazine. Mikabig og 2M travelers matag tuig gumikan sa mga matahom nga baybayon, diving spots ug mga tourist attractions.

Sa maong napatik nga sinulat gihisgotan sab ang Basilica Minore del Santo Niño, Kawasan Falls sa Badian, daghan pa. Misamot paglambo ang Sugbo sa makugihong pagdumala ni Gov. Gwen Garcia. Nag-una sa Top Performing Governors sumala sa RP-Mission and Development Foundation ug ligdong ang paggasto sa kwarta sumala sa COA. (csa_1156@yahoo.com / 09064648954)

This posting includes an audio/video/photo media file: Download Now

Cebu City, Probinsya mag-MECQ

Posted: 30 Jul 2021 07:28 AM PDT

ANG Dakbayan sa Sugbo ug Probinsya sa Sugbo ipaubos sa modified enhanced community quarantine (MECQ) sugod sa Agusto 1 ngadto sa Agusto 15, 2021, pahibawo sa Malacañang sa Biyernes, Hulyo 30, 2021.

Kini tungod sa padayong pagsaka sa mga kaso sa coronavirus disease 2019 (Covid-19).

"Masakit na desisyon po natin 'to dahil alam natin mahirap ang ECQ pero kinakailangan gawin po to para maiwasan 'yung kakulangan ng ating mga ICU beds at iba pang hospital requirements kung lolobo po talaga ang kaso dahil sa Delta variant," matod ni Presidential Spokesperson Harry Roque Jr.

Ang quarantine classification sa Cebu City ug Cebu Province mahimo pang iapelar.

Unang gipahibawo niadtong Huwebes, Hulyo 29, 2021 nga ubos usab sa MECQ ang mga Dakbayan sa Mandaue ug Lapu-Lapu.

Way lockdown

Apan bisan nga ang Dakbayan sa Sugbo ubos sa MECQ, unang nahukman ni Cebu City Mayor Michael Rama nga walay lockdown.

Magpabiling bukas ang mga business establishment, padayon ang vaccination rollout ug pabilin nga magbiyahe ang public transport sa Dakbayan sa Sugbo.

"We do not want to close our economy. If it's going to be closed, is national government, is IATF willing to give us the money?" padayag ni Rama.

Si Rama kinsa nakighimamat kang Governor Gwendolyn Garcia ug nakahinabi kang Mayor Jonas Cortes sa Mandaue City ug Mayor Junard Chan sa Lapu-Lapu City, niingon nga mopatuman og hiniusang polisiya ang tibuok Cebu sanglit usa ra kini ka isla.

"The initial was we agreed on one Cebu island policy which is one voice... If we follow one island, no need to close our borders," dugang sa acting mayor

Si Rama niingon nga dili siya moapilar sa bag-ong quarantine status sa Cebu City gikan sa modified general community quarantine (MGCQ) ngadto na sa MECQ.

Si Rama niingon nga moisyu siya og parental supervised household lockdown sa mosunod nga adlaw para ang ginikanan na sa matag pinuy-anan ang moimplementar ngadto sa sakop sa ilang pamilya.

Gipadayag ni Rama nga dili na manghatag og ayuda ang City Hall nga maoy gibuhat kaniadto dihang gipaubos sa enhanced community quarantine (ECQ) ang dakbayan.

"We have to stop the so called doleouts. We must emphasize and encourage self-reliance, self-determination and we have to do it ourselves," batbat ni Rama.

Agi og preparasyon, si Rama nimando sa pagpadali sa paghuman sa ikaduha ug ikatulong andana sa CCMC aron magamit na isip ospital.

Paspasan ang pag-hire og nurses nga maoy gikinahanglan niining panahon sa pandemya aron maoy moatiman sa mga nasakit sa Covid-19, pagpadali sa isolation center sa Abellana National School ug uban pa.

Sa kasamtangan, ang Cebu City adunay 2,527 ka aktibong mga kaso samtang niabot na og 911 ang nangamatay gikan sa 29,428 ka mga tawong nataptan sa maong virus.

Bakuna

Gipahibawo usab ni Rama nga magpadayon ang mga pagpamakuna.

Ipakita lang ang vaccination cards ug confirmation sa schedule sa pagbakuna.

Mao usab kini ang buhaton sa Dakbayan sa Mandaue sumala sa pahibawo ni Mayor Jonas Cortes atol sa iyang press conference sa Hulyo 30, 2021.

Bisan paman nga limitado na ang kalihokan sa mga tawo, matod ni Cortes nga magpadayon ang pagpamakuna batok sa Covid-19.

Matod niya nga ang buot nga magpabakuna mopakita lang sa ilang nadawat nga text message gikan sa Mandaue City Vaccination Operations Center (MVOC) nga sila nakaiskedyul nga magpabakuna ug dad-on ang vaccination card sa nabakunahan na sa first dose.

Ang tanang vaccination sites sama sa Mandaue City Cultural and Sports Complex, University of Cebu Lapu-Lapu Mandaue (UCLM), Parkmall, Pacific Mall, ug JCentre Mall magpadayon sa ilang operasyon, sigon ni Cortes.

Sunod semana, matod ni Cortes nga ilunsad na sa dakbayan ang mobile vaccination clinic kauban sa Philippine Red Cross (PRC) Cebu Chapter aron mapakusog ang pagpamakuna sa dakbayan.

Giasoy ni Cortes nga ang mobile vaccination clinic mobakuna sa A2 (senior citizen), A3 (person with comorbidity), ug A5 (indigent) sub-category group.

Transportasyon

Sa laing bahin, kung ipatuman na ang MECQ, matod ni Cortes nga ang pampublikong transportasyon mao ang usa sa mga gikabalak-an sa iyang konstituwente labi na sa mga trabahante.

Matod niya nga kon way gitugotan nga pampublikong transportasyon nga makabiyahe, ang lokal nga kagamhanan buot ra nga mohatag og libreng sakay nga mga bus sama sa miaging tuig, apan prayoridad gihapon niini ang mga frontline workers.

Apan, ang Land Transportation Franchising and Regulatory Board (LTFRB) nipasalig nga duna gihapoy pampublikong transportasyon alang sa mga essential workers.

Matod ni Eduardo Montealto, Jr., LTFRB 7 director, nga motukma unya sa gidaghanon sa mga pasahero ang gidaghanon sa mga pampublikong transportasyon nga padaganon unya ubos sa MECQ.

"The equation would be the passenger demand. Basin mabawasan kung gamay ra ang mga pasahero," segun ni Montealto sa usa ka text message sa SunStar Cebu, Biyernes, Hulyo 30.

Matud niya, suspendido ang mga pampublikong transportasyon ubos sa bisan unsa nga community quarantine status. Apan pwede maka operate ang usa ka public transportation unit kon adunay special permit gikan sa LTFRB. (PAC, WBS, KFD, GCM, SunStar Philippines)

This posting includes an audio/video/photo media file: Download Now

Mga misa magpadayon sa mga simbahan magpadayon

Posted: 30 Jul 2021 07:27 AM PDT

BISAN kon ubos na ang Cebu City ug Cebu Province sa modified enhanced community quarantine (MECQ) sugod sa Dominggo, Agusto 1, 2021, ang mga misa sa mga simbahang Katoliko magpadayon gihapon, apan paminusan ang gidaghanon sa makatambong.

Si Monsignor Joseph Tan, tigpamaba sa Archdiocese sa Sugbo, niingon nga mamahimong mamenusan unya ngadto sa 30 porsyento gikan sa 50 porsyento ang itugot nga makasulod ug makatambong sa mga selebrasyon sa misa.

Matod hinoon niya nga aduna nay circular nga una nga napagawas ang Archdiocese sukad nagsugod ang Hulyo alang sa mga parokya sa Siyudad sa Sugbo aron hingpit nga mapatuman ang minimum health protocols ilabi na nga nisaka ang mga kaso sa Siyudad.

Kini nga mga protocol posible nga ma-apply pod sa mga parokya sa ubang lugar sa Sugbo nga ubos sa MECQ.

"As long as mo-apply ang situation, katong circular limiting the masses nga dili pwede sa mga barrio chapels and other related things, mo apply na to siya sa other areas outside Cebu City na nisaka ang kaso," matod niya.

Matod niya ang reduction of allowable attendance gikan sa 50 percent ngadto sa 30 percent maingon na nga "over and above" sa own-imposed restrictions sa Archdiocese.

Gianunsyo ni Presidential Spokesperson Harry Roque , Hulyo 30, 2021, nga lakip na sa ipaubos sa MECQ ang Cebu City ug Probinsya sa Sugbo gikan Agusto 1 hangtod Agosto 15.

Sa unang pahibawo, ang mga Siyudad sa Mandaue ug Lapu-Lapu lang unta ang gipaubos sa MECQ. (WBS)

This posting includes an audio/video/photo media file: Download Now

Mas estriktong checkpoints ibutang sa kadalanan sa Dakbayan sa Sugbo

Posted: 30 Jul 2021 07:26 AM PDT

LAPAD nga checkpoint ang ipamutang sa kapulisan sa siyudad sa Sugbo sugod sa alas 10 gabii Hulyo 30, 2021 nunot sa bag-ong giluwatan nga executive order ni Acting Cebu City Mayor Michael Rama tungod sa pagsaka sa Covid-19 sa siyudad ug ang pagsulod sa Delta variant.

Ang bag-ong EO nagpasayo sa curfew hours gikan sa alas 11 ngadto na sa alas 10 sa gabii hangtod alas 4 sa buntag.

Gitumong kini aron di makapatuyang og sulbong ang mga kaso sa coronavirus disease 2019 (Covid-19) sa dakbayan.

Kagabii sa Biyernes, Hulyo 30, gisugdan ang pagpahigayon og checkpoint.

Matod ni Police Colonel Josefino Ligan, hepe sa Cebu City Police Office (CCPO) nga ang tanang mga sakyanan ilang susihon aron masuta kon nasunod ba ang health protocol o authorized person outside residence (APOR) ba ang nanggawas.

Gipanglantawan nga makasinati og kahuot sa dagan sa tra-piko ang siyudad tungod kay tanang sakyanan man ang pahunongon aron masusi ang sakay niini.

"Kon makasugat mog traffic, pasensyahi ninyo kay tungod man kay nag estrikto gyud ta. So, i-expect ninyo na gabiing dako. Anyway wala naman sad nay trabaho," matod ni Ligan.

Lakip sa manggawas unya ang mga sakop sa Prevention, Restoration, Order, Beautification and Enhancement (Probe) team dala ang bus diin kadtong madakpan diretso nga isakay aron dalhon sa mga holding area.

Gipasalig ni Ligan nga matuman gihapon ang social distancing kon ikarga na sila sa bus.

Giawhag ni Ligan ang mga motorista og mga nagmaneho sa sakyanan nga andamon lang nila ang mga dokumento sama sa certificate of employment (COE) ug lisensya aron di sila malangay sa pagpahunong kanila.

Ang maong lakang gisuportahan sa presidente sa Association of Barangay Council (ABC) Konsehal Franklyn Ong.

Matod ni Ong nga siya mismo ang mangulo sa pag roving sa iyang barangay aron mosulod na sa ilang tagsa-tagsa ka panimay ang mga lumolupyo.

Alang niya, maayo kini nga lakang nga gihimo sa kapulisan ilabi na nga nagkasaka ang mga kaso sa Covid ug sa Delta variant nga gikahadlokan tungod kay dali nga mokatap sa mga tawo.

Awhag niya sa publiko nga maghiusa tali sa gobiyerno sa pagbatok sa makamatay nga virus ug sundon ang health ug safety protocol alang sa kaluwasan sa tanan.

"Importante ni nga maong mga lakang hilabi na nga nagsaka ang kaso sa Covid-19 sa atong dakbayan ug anaa na ang presensiya sa Delta variant. Dili ni tiaw ang atong giatubang nga hulga mao nga gikinahanglan nga magkahiusa ang gobiyerno ug katawhan," matod ni Franklyn Ong.

This posting includes an audio/video/photo media file: Download Now

32 ka kaso sa Delta variant ‘lokal’ nga panakod

Posted: 30 Jul 2021 07:25 AM PDT

ANG chief pathologist sa Department of Health (DOH) 7 niingon nga ang tanang 32 ka kompirmadong mga kaso sa Delta variant sa Sars-CoV-2 sa Sugbo gikan sa samples gikuha gikan sa komunidad nga wa makabiyahe.

Si Dr. Mary Jean Loreche, DOH 7 chief pathologist ug spokesperson for the Visayas Covid-19 Vaccination Operations Center (VVOC), niingon nga kini nagsuporta sa iyang personal analysis, isip pathologist, sa usa ka local nga pagpanakod sa variant.

Si Loreche niingon nga ang kinatibuk-ang samples nga gipadala sa Philippine Genome Center (PGC) alang sa genomic sequencing gikan sa Hulyo 4 ngadto sa 10, 2021 mokabat og 123.

"Apparently, there is evidence that the presence of the Delta variant corresponds to the rise in our cases," siya nagkanayon.

Matod ni Loreche nga ang Delta variant gilambit sa taas nga pagpanakod nga maoy nahitabo sa ubang mga nasod.

Siya nga ang labing batan-ong apektado sa gitaho nga mga kaso sa Delta variant cases usa ka tuig nga bata ug ang labing tiguwang 61 anyos. Ang 14 mga lalake samtang ang 18 mga babaye.

Matod niya nga ning mga kaso, dunay clustering sa mga pamilya.

Kon sila naka recover na ba o dunay nangamatay, ila pa kining gi-finalize.

Niingon hinuon si Loreche nga ang unang batch sa kompirmadong positibong Delta variant sa nasod mao ang Overseas Filipino Workers (OFWs) ug returning overseas Filipinos (ROFs), ang OFWs ug ROFs tested sa Cebu wa magpositibo sa Delta variant. (WBS/Dugang taho sa SunStar Philippines)

This posting includes an audio/video/photo media file: Download Now

Certificates of award gipanghatag sa vendors

Posted: 30 Jul 2021 07:23 AM PDT

GITUGYAN sa Cebu City Government ug Megawide Construction Corporation ang inisyal nga 161 ka Certificate of Award ngadto sa mga stall owner sa Carbon public market para siguraro silang makatinda sa interim market sa Unit 2 sa Barangay Ermita, Dakbayan sa Sugbo.

Si Market Administrator Irvin Cabales nagkanayon nga mayoriya kanila naninda og mga buwak gikan sa Freedom Park ug Warwick Barracks diin pagatukoron ang modernong merkado human sa renovation sa Unit II.

Human niini, isunod unya paghatag ang ubang certificate sa mga benepisyaryo.

Si Louie Ferrer, executive director for Infrastructure Development sa Megawide, nagkanayon nga mahuman sa Cebu2World Development Inc. ang interim market sa Oktubre o Nobyembre karong tuiga diin mamalihin na ang gatusan ka mga benepisyaryo gikan sa Freedom Park ug Warwick.

Matod pa ni Ferrer nga gihimo nilang libre ang stalls para sa mga vendors nga adunay 5 metros nga gilapdon para maoy butangan sa ilang mga paninda.

Si Cebu City Councilor Raymond Garcia, majority floor leader sa City Council, nagkanayon nga inig human sa bag-ong Carbon Market, sama sa malambuong nasod sa Asya, mahimo kining sentro sa turismo.

"Ang highlight sa ilang tourism, ang tourist attraction and destination is always the markets because diha modagsa ang mga turista sa merkado," padayag ni Garcia.

"This is actually the beginning of a world class Carbon Market for the Cebuanos, that is something that we should embrace as Cebuanos. Imagine inig human aning tanan, inig sulod nimo sa Carbon, mura na kag mosulod og hamugaway nga mall sama sa SM ug Ayala," dugang ni Garcia.

Nitambong sab silang Konsehal Renato Osmeña Jr, chairman sa committee on markets; Jerry Guardo sa committee on infrastructure; Atty. Rey Gealon sa City Legal Office ug mga department head sa administrasyon ni Mayor Edgardo Labella ug barangay officials sa Ermita para suportahan ang proyekto.

This posting includes an audio/video/photo media file: Download Now

Kapitolyo mohatag og tag P10,000 sa nurses

Posted: 30 Jul 2021 07:22 AM PDT

MOHATAG og tag P10,000 nga incentive ang Kagamhanan sa Lalawigan sa Sugbo alang sa nurses nga gi-hire sa Department of Health (DOH-7) nga moabag ug idugang sa mga pribadong hospital sa Metro Cebu aron makigbatok sa coronavirus disease 2019 (Covid-19).

Kini maoy gipasalig ni Cebu Governor Gwendolyn Garcia sa interbyu sa mga tigbalita sa Hulyo 29, 2021.

Ang DOH-Central Visayas nihire og dili momenos 60 ka nurses nga maoy i-deploy sa mga pribadong hospital aron motabang pag atiman sa mga pasyente sa Covid nga nanga-admit.

Si Garcia nagkanayon nga andam ang private hospitals nga mopuno og Covid beds, apan ang problema lang kay kuwang ang mga medical personnel.

"The Province has committed since ang uban nga provincial constituents nato mo end up man gihapon nganhi sa city hospital. So for every nurse, we will give an incentive of P10, 000, bisa'g pila na ibutang sa DOH, mohatag ta og P10, 000," matod ni Garcia.

Ang incentive, wala pa'y labot sa sweldohon sa mga nurse.

"Basta the Province is ready for the next two months at least to give P10,000 more on top of their salary as an incentive to our nurses. That's the key man gud, pwede mag abli sila'g mga wards diha if walay nurses dili gihapon," dugang ni Garcia.

Si Dr. Jaime Bernadas, regioinal director sa Department of Health (DOH-7), nagkanayon nga ang gihimo karon sa buhatan mao ang pag "capacitate" sa public hospitals pinaagi sa pag dugang og medical personnel ug pagpadaghan sa bed occupancy aron nga daghan ang maatiman nga pasyente.

Ang Probinsya sa Sugbo mopalit og 20 ka units sa hi-flow machine, usa ka ekipo alang sa mga pasyente sa Covid nga adunay severe nga sintomas.

Adto kini ihatag sa upat ka provincial hospitals nga mao ang Balamban, Carcar City, Danao City ug Bogo City.

"Well the doctors say ganina there is other way to manage ang covid with the use of the hi-flow than the venilators. Kaning hi-flow is a more efficient way to fight Covid..." matod ni Garcia.

Target sa Kapitolyo nga mapalit ang maong ekipo sunod semana aron mabutang na sa mga provincial hospital aron adunay kapasidad nga makadawat og severe Covid patients ug dili na kinahanglan pa ipadala ngadto sa private hospitals sa siyudad. Mopalit usab ang Kapitolyo og dugang medical supplies alang sa provincial ug district hospitals. (ANV)

This posting includes an audio/video/photo media file: Download Now

Bala nga nakuha sa lawas ni Cortes nakapalibog

Posted: 30 Jul 2021 07:22 AM PDT

USA ka bala sa Armalite rifle nakuha gikan sa lawas ni Reynante "Rey" Cortes, apan medico legal officer sa PNP Crime Laboratory naglibog pa tungod kay wa silay nakita nga marka sa lands and grooves sa sumbohan sa armas aron unta pag-ila kon kinsa ang nanag-iya sa taas nga kalibre sa armas.

Ang lands and grooves maoy marka sa bala sa iyang pag-agi sa sumbohan sa armas. Matandi kini sa fingerprint sa tawo kay way armas nga sama og lands and grooves.

Atol sa case conference sa Special Investigation Task Group (SITG) gipakita sa PNP Crime Laboratory ang slug nga maoy miigo sa lawas ni Cortes sa dihang padung na siya mosakay sa iyang sakyanan sa dalan Natalio Bacalso, Barangay Mambaling, Siyudad sa Sugbo.

Matod ni Police Colonel Josefino Ligan, hepe sa Cebu City Police Office, nga ang usa ka slug sa armas nga nakuha sa lawas ni Cortes 5.56-milimeter nga maoy bala sa Armalite rifle.

Apan sigun sa pamahayag sa ballistician, natunga kini sa dihang naigo ang walang bukton ni Cortes.

Dako ang posibilidad nga ang katunga sa slug niigo sa dughan hinungdan nga adunay duha ka samad si Cortes sa lawas.

"Nakita didto sa autopsy nga adunay duha ka entry wounds, entry wounds sa walang kamot then naa puy entry wounds sa walang dughan. Pero naay teyoriya gihapon ang medico legal nga basin og usa ra na ka bala nga nabuak ang bala," matod ni Ligan. (AYB)

This posting includes an audio/video/photo media file: Download Now

Ex nihangyo’g pakaslan atol sa kasal sa iyang ex

Posted: 30 Jul 2021 07:22 AM PDT

NAKURAT nalang kining usa ka babaye sa Indonesia human nga ang ex sa iyang pamanhunon nikalit la'g butho atol sa ilang kasal ug nihangyo nga pakaslan sab kini.

Ang pangasaw-unon nga si Nur Khusnul Kotimah, 20, nipaambit nga nakurat nalang siya sa dihang ang iyang pamanhunon nga si Korik Akbar, 20, nisugot sab sa hangyo sa ex-girlfriend niini nga si Yuanita Ruri atol sa seremonyas sa ilang kasal.

Matod pa nga dilo imbitado sa kasal si Yuanita sa ilang kasal, sigun sa taho sa Harían Metro.

"My husband's ex-girlfriend (Yuanita) found out about our plans to get married through social media, as many friends were congratulating us. Because of that, she asked to be his wife too," ni Nur Khusnul.

Dugang niya nga nagsugod ang tanan human sa Merariq nga ritwal sa ilang kasal.

Ang Merariq usa ka gawi diin ang babaye "kidnapon" sa iyang gipiling pangasaw-unon nga adunay pagtugod sa pamilya niini. Si Nur Khusnul gidala sa balay ni Korik.

"Just minutes after we arrived at Korik's house, she (Yuanita) showed up and asked to be wedded too," paambit pa niini.

Si Korik sa laing bahin nagkanayon nga nakurat siya pagkakita sa iyang ex nga iyang nailhan sukad 2016. "I wasn't expecting it and was shocked. But, upon discussing with the family, I made the decision to marry both the girls," saysay niya.

Pareho og kantidad sa dowry ang duha ka babaye kaniya apan daw murag nagmahay kini sa iyang desisyon nga pakaslan ang duha sanglit sa kasamtangan wa man siyay trabaho ug karon duha na ka asawa ang nagsalig kaniya. (Superbalita Cebu)

This posting includes an audio/video/photo media file: Download Now

Wa mahibaw nidaog og P1.97 bilyones

Posted: 30 Jul 2021 07:21 AM PDT

USA ka babaye didto sa Germany ang way alamag nga ang iyang napalit nga lotto ticket niigo diay sa jackpot.

Matod pa sa Lotto Bayern nga ang ticket anaa ra sa bag sa babaye sud sa pipila ka semana.

Di mominos sa 33 milyones euros (39 milyones dolyares) o P1.97 bilyones ang nadaog niini.

Dugang pa sa Lotto Bayern nga ang 45 anyos nga babaye maoy bugtong mananaug sa draw niadtong Hunyo 9 nga draw, human matag-ani ang pito ka mga numero sa jackpot.

"I still get dizzy at the thought that I carelessly carried almost 33 million euros around in my purse for several weeks," matod pa sa maong babaye nga usa ka inahan.

Ang ticket nga napalit niya anaa ra sa 1.20 euros o P72.

Padayag pa niini nga wa na siyay plano pa nga mopalit og laing lotto ticket sanglit ang iyang nadaog kay "more than enough for my husband, my daughter and me."

Sigun sab niini nga plano niyang gamiton iyang daog sa healthy lifestyle samtang ang uban itabang alang sa kalikupan. (Superbalita Cebu)

This posting includes an audio/video/photo media file: Download Now

Ang kahibulongang samin ni Ricky Reyes

Posted: 30 Jul 2021 07:20 AM PDT

MANILA-PINAAGI kang Tala Vera, nakatsikahan namo ni Direk Benny Andaya si Mader Ricky Reyes didto sa iyang karaang pinuy-anan/parlor sa may Aurora Boulevard.

Naabtan namo si Evangeline Pascual nga nagpa-color og buhok kang Mader ug namalit sad siya og mga wigs.

Sa dihang gitangtang ko ang akong mask, nailhan dayon ko ni Evangeline ug unang birada niya: "Nasaan yung kaibigan mong designer? Bakit hindi niya ako ginawan ng damit? Sinukat-sukatan na niya ako, akala niya titiwayin ko siya," matod ni Evangeline nga medyo misurok ang dugo.

Anyway, wala naman akong kinalaman sa ilang transakiyon although present ako sa dihang gisukatan na siya ni designer.

Na-vlog ko pa rin si Evangeline ug proud siya sa iyang mga bag-ong pictures sa iyang cellphone.

May kuha pa siya sa swimsuit nga iyang gisul-ob niya during Miss World 1974.

After ko makatsikahan si Evangeline, si Mader Ricky na ang sunod nga gi-tsika namo ni Direk Benny.

Kung kaniadto dili mahilig sa social media si Mader, karon aduna na siyay Youtube channel nga Ricky Reyes diin may mga rebelasyon siya, mga personal experiences niya isip usa ka celebrity hair dresser nga wa pa nato mahibaw-i.

Sa pagsikad sa among tsikahan, nabungat na usab ni Mader Ricky ang kabahin sa kabaklaan.

"Ang LGBTQ+ at kung ano pa ang tawag nila, iisa lang naman ang ibig sabihin niyan ba na ikaw ay bakla.

"Paulit-ulit kong sasabihin na kapag ikaw ay bakla, magpaka-disente ka.

"Saan ka ba makakakita ng babae na ipinapangalandakan ang kanilang kepay sa video na 'ito may kepay ako,' wala di ba?" saysay ni Mader.

"Ako aaminin ko, old school gay ako. Late bloomer ako. Tumigil na dapat tayo sa ating ilusyon na babae tayo," dugang pa ni Mader Ricky.

Hangtod sa iyang gisugo ang usa niyang staff para kunin ang back mirror nga gigamit sa mga customer nga nagpapagupit para makita ang ilang likod.

"Ito para sa mga ilusyunadang bakla," Dungan sa pagtungod ni Mader Ricky sa bandang luyo sa back mirror.

"Ayan, pagmasdan nyo mga bakla,tingnang mabuti. Kung may nakita kayong tumutubo na kepay, okey pero kung makikita mo na matulis pa rin ang sa inyo at kung ilang pulgada, tumigil kayo sa inyong ilusyon," prangka ni Mader.

Matod ko, "Naku Mader, kahit hindi na back mirror ang gagamitin, kahit simpleng salamin o cellphone, makikita nila kung may tumubo bang kepay o hindi. Hahahahha" Iya ning gi-uyonan.

Sa laing bahin, nagpasalamat ako kang Ma'am Mona dela Cruz of Maung Grill located at North Fairview sa among lamian nga paniudto with Mader Ricky and staff, kaya lang walay lechon ug chicken cordon bleu.

This posting includes an audio/video/photo media file: Download Now

Park Seo Joon usa sa cast sa ‘Captain Marvel 2’

Posted: 30 Jul 2021 07:19 AM PDT

ANG ALLKPOP.com nipagawas og taho nga opisyal nga lakip sa cast ang South Korean actor nga si Park Seo Joon sa 'Captain Marvel 2: The Marvels'.

Nagkadaiyang media outlet ang nipagawas og taho nga ang 32 anyos nga actor nalakip sa talaan sa IMDB's official 'The Marvels' page uban sa A-List stars nga sila si Brie Larson, Zawe Ashton, Teyonah Parris, ug Iman Vellani.

Wa matino kon unsay papel nga dad-on sa maong Asian actor.

"Park Seo Joon has now joined Claudia Kim and Ma Dong Suk as the third Korean actor to join the Marvel Cinematic Universe," tipik sa taho sa allkpop.com.

Gikatakda nga sa Nobiyembre 2022 ang premiere sa maong superhero movie. (SuperBalita Cebu)

This posting includes an audio/video/photo media file: Download Now

‘CocoJul’ konpirmado nga mag-uban sa ‘Ang Probinsiyano’

Posted: 30 Jul 2021 07:19 AM PDT

ANG Dreamscape Entertainment mi-anunsiyo niadtong Biyernes, Hulyo 30, nga si Julia Montes ang mamahimong usa sa cast sa ABS-CBN action-drama series nga "FPJ's Ang Probinsiyano" isip bag-ong leading lady ni Coco Martin.

Dili ikalimod nga gidungog nga adunay hilom nga relasyon ang duruha apan way konpirmasyon nga giluwatan mahitungod sa giingong rumored couple isyu, taho sa PUSH.

"Coco and Julia's much-awaited reunion on Ang Probinsyano comes six years after they were last seen together on television via Wansapanataym: Yamashita's Treasures in 2015," tipik sa pahibawo sa Dreamscape. (SuperBalita Cebu)

This posting includes an audio/video/photo media file: Download Now

‘Gugma Blues’ haom sa mga nag-maoy

Posted: 30 Jul 2021 07:18 AM PDT

GI-RELEASE sa Bisrock band nga Kaynam ang ilang ika-upat nga single nga giulohan og "Gugma Blues" nga makita o madungog ang music video sa YouTube ubos sa Northwave Production.

Asoy ni Kevin Sanao, bokalista sa Kaynam nga ang maong awit relatable ni bisan kinsa tungod kay naghisgot kini mahitungod sa himaya ug kasakit kon gugma ang hisgutan.

Lakip sa lyrics sa maong awit nga maayo lang sa nagsugod pa ang relasyon kay tam-is pa apan sa dihang molungtad og dugay magkatab-ang na.

"Kining kantaha para sa tanan, ilabi na sa mga gamaoy karong higayuna," tipik sa pamahayag ni Sanao.

Panghinaot sa Kaynam band nga suportahan ang ilang mga umaabot nga kanta ug local bands sa tuyo nga mapalambo ang Bisaya Rock genre.

Mipa-abot sa ilang pasalamat ang banda sa tanang mipaluyo sa kalampusan sa ilang "Gugma Blues" music video.

Ang Kaynam gilangkuban nila ni: Sanao, Islaw Aragon - bass guitar, Erwin Melon – drummer, Denver Tampos - rhythm guitar ug Karl Toledo - lead guitar. (FVQ)

This posting includes an audio/video/photo media file: Download Now

James Reid, Nadine Lustre mag-reunion

Posted: 30 Jul 2021 07:18 AM PDT

ADUNAY reunion mahitabo sa usa sa mga sikat nga love teams nga sila si James Reid ug Nadine Lustre.

Gikatakda nga karong Agosto 6 mag-abot ang duruha aron paglusad sa smartphone brand nga i-stream live via OPPO's official Facebook ug YouTube pages.

Gawas nilang James ug Nadine Makita sab ang feature performances gikan sa Careless Music Manila artist nga sila si Massiah ug Jolianne ug ang A-Team, taho sa ABS-CBN.

Nasayran nga sud sa upat ka tuig ang relasyon sa duruha ug niadtong Enero 2020 ilang gipahibawo nga ilang panagbuwag nga gikaguol sa ilang mga fan. (SuperBalita Cebu)

This posting includes an audio/video/photo media file: Download Now

SuperBusog: Beef Cocido

Posted: 30 Jul 2021 07:15 AM PDT

SERVES 6 to 7.

Mga sagol:

Set A:

1 ka kilo nga beef shank, gihiwa og dagko nga cubes

2 ka buok nga chorizo de Bilbao o Pamplona, gihiwa og bite-size pieces

1 ka buok nga dakong puti nga sibuyas bombay, gihiwag kaupat

5 ka tasa nga tubig

Set B:

2 ka buok nga medium nga patatas o kamote, gitunga

2-3 ka buok sab-a nga saging, gihiwa'g katunga nga diagonal

1 ka buok mais, gihiwag ka upat

1 ka kutsaritang peppercorns

Datu Puti Patis (fish sauce), pangtempla

Set C:

1 ka buok lata sa garbanzos

6 ka buok batong, gihiwag tag tulo ka inches

½ nga medium cabbage, gihiwag katunga, ayaw hilabti ang tunga

4 ka buok native pechay

Alang sa Eggplant Dip:

2 ka buok grilled nga talong

2 ka buok ahos, gihiwa

1 ka buok gagmay nga sibuyas bombay, gihiwa

4 ka kutsarang Datu Puti nga suka

Asin ug pepper, pangtempla

Unsaon pagluto:

A. Ibutang ang karneng baka, chorizo, ug sibuyas bombay sa usa ka kaldero uban sa tubig. Pabukala ug lutoa og 1 1/2 sa oras o hangtod mohumok ang unod. Basehe ang kadugayon sa imong pagluto hangtod sa paghumok sa karneng baka.

B. Kon humok na ang baka, idugang ang mga sagol sa Set B. Ipadayon ang pagluto hangtod nga ang mga patatas hapit na mohumok, mga 5 minutos.

C. Idugang ang Set C vegetables ug lutoa og laing 3 minutos. I-serve nga lahi ang sabaw gikan sa karne ug mga utanon uban sa talong sauce (gikan sa chicken pochero recipe) ug patis-calamansi. I-serve uban ang talong.

Sunda ko sa akong social media accounts.

Facebook: facebook.com/lutongsimpol

YouTube: youtube.com/c/SimpolSimpol

Instagram: @lutongsimpol

This posting includes an audio/video/photo media file: Download Now

Millions ni Diaz di kuhaa'g tax

Posted: 30 Jul 2021 07:03 AM PDT

GIKLARO sa Bureau of Internal Revenue nga ang milyunes nga dawatunong pahalipay ni Tokyo Olympic gold medalist Hidilyn Diaz dili kuhaan og tax.

"The P10 million cash incentive mandated under Republic Act No. 10699, shall be considered an exclusion from gross income by virtue of Section 32 (B)(7)(d) of the Tax Code," opisyal nga pamahayag sa BIR nga napatik sa Spin.ph.

"The donations given to her by businesses, private individuals, and entities shall also be excluded from the computation of her gross income under Section 32 (B)(3) of the Tax Code."

Sa kasamtangan, moabot na og P40 million ang insentibo nga dawatunon ni Hidilyn sa iyang makasaysayong pagtunol sa labing unang Olympic gold medal sa Pilipinas.

Wala pa'y labot niini ang ubang mga kabtangan sama sa luhong condominium unit nga nagbalor og P14 million nga gihatag sa Megaworld.

"We congratulate Hidilyn Diaz and the Philippine team, and we hope for the best for the Filipino athletes still in the running to earn their spot at the Olympic podium," dugang pamahayag sa BIR. (ESL)

This posting includes an audio/video/photo media file: Download Now

Fil-Am napiling no. 2 pick sa NBA

Posted: 30 Jul 2021 07:02 AM PDT

NAGHINAMHINAM si Filipino-American Jalen Green nga morepresentar sa Pilipinas sa National Basketball Association (NBA) human siya gipili sa Houston Rockets isip No. 2 overall pick sa 2021 NBA Draft kagahapon, Hulyo 30, 2021 (RP time).

Gipasabot ni Green nga nakauyon siya nga nakuha siya sa Houston baga ang populasyon sa mga Asyano lakip na niini ang Filipino community ning maong lugar.

"Man, I'm always excited to represent the Philippines. So, the fact that there's ties in Houston, it's kind of like it was scripted," matod ni Green.

"So I'm excited to take that out there and just represent and put on for the Philippines and can't wait to meet everybody and see the fans."

Nidugang si Green nga wala siya'y mibati og pressure hilabi na kay nasayod siyang daghan ang mga nagsuporta kaniya sa iyang pagkahimong usa ka Rocket.

"From what I got that the Philippines love me for me. So I'm just going to keep being myself. I'm going to keep working hard and staying in the gym," batbat ni Green.

"It's not really a responsibility, it's the game I love and they support me, so I just can't wait to get out there and just put on for them."

Gani, mismong si Filipino boxing legend Manny Pacquiao nipadayag dayon sa iyang pagsuporta kang Green pinaagi sa pagpadangat og congratulatory message sa social media.

"Congratulations to @JalenGreen on getting drafted #2 overall. Looking forward to watching your journey to becoming a superstar," mensahe ni Pacquiao ngadto kang Green sa Twitter.

Ang maong mensahe giubanan og hulagway diin nag-uban sila si Pacquiao ug Green.

Ang laing Fil-Am nga si Jordan Clarkson, kinsa usa sa mga pambato sa Utah Jazz, nag-post og artwork diin makita nga nag-uban sila si Green, ug Raymond Townsend, kinsa maoy labing unang Fil-Am nga nakaduwa sa NBA.

Ang Rockets management malaumon nga dako ang matabang ni Green sa ilahang kampanya sa NBA sa umaabot.

"Clearly we think he can be a special player," matod ni general manager Rafael Stone.

"Exactly how that plays out or the exact timing of everything else I just don't know ... but in terms of his path, the only thing I ask is that we get absolutely the utmost effort and I'm confident that we will."

Si Green, kinsa adunay gitas-on nga 6'6", nag-average og 17.9 puntos, 4.1 rebounds, ug 2.8 assists sa Team Ignite sa miaging season sa G League season. (AP)

This posting includes an audio/video/photo media file: Download Now

Gilas mipakaging sa Tunisia

Posted: 30 Jul 2021 07:00 AM PDT

GIPAKAGING sa Gilas Pilipinas ang African powerhouse Tunisia pinaagi sa overtime, 74-73, aron pag-angkon og luna sa semi-finals sa King Abdullah Cup niadtong kagahapon, Hulyo 30, 2021 (RP time) sa Prince Hamza Hall sa Amman, Jordan.

Ang free throw ni Thirdy Ravena sa katapusang 9.1 segundos nga gisundan sa hugot nga depensa sa ubang Gilas maoy nakakompleto sa ilang panimalos sa 2017 AfroBasket gold medalist aron irehistro ang ilang ikaduhang kadaugan sud sa tulo ka mga duwa.

Naglabaw unta og siyam ka mga puntos ang Pilipinas sa second period apan napapas kini sa second half ug nakalabaw pa ang Tunisians, 59-51.

Hinuon hinayhinay nga nakagukod ang Gilas sa pagpangulo nila ni naturalized player Ange Kouame, Dwight Ramos ug SJ Belangel.

Si Kouame nangulo sa Gilas nga may 12 puntos, uban sa pito ka rebounds, lima ka assists ug lima usab ka blocks.

Mga puntos:

Philippines (74) – Kouame 12, Ramos 11, Belangel 10, Go 8, Ravena 7, Ma. Nieto 7, Baltazar 5, Tamayo 5, Suerte 5, Heading 3, Navarro 1, Ildefonso 0.

Tunisia (73) – Marnaoui 19, Gannouni 16, Ochi 10, Jawadi 9, Lahiani 6, Chihi 5, Bouallegue 4, Yahia 2, Addami 2. uarterscores: 15-14, 36-31, 49-53, 66-66, 74-73. (JBM)

This posting includes an audio/video/photo media file: Download Now

Hotshots, 4-0 na sa PBA

Posted: 30 Jul 2021 07:00 AM PDT

GIPAHUGTAN sa Magnolia Ang Pambansang Manok Hotshots ang ilang paggunit sa solong liderato pinaagi sa paglampornas sa Terrafirma Dyip, 105-83, kagahapon, Hulyo 30, 2021 sa Philippine Basketball Association (PBA) Philippine Cup sa Ynares Sports Arena sa Pasig City.

Kini maoy ikaupat nga sunodsunod nga kadaugan sa Hotshots sa samang gidaghanon nga mga duwa samtang ang Dyip nakaangkon sa ikatulo nilang sunodsunod nga kapildihan.

Labing kuyaw nga nakaduwa alang sa Hotshots mao sila si Ian Sangalang, Mark Barroca, Calvin Abueva ug ang rookie nga si Jerrick Ahanmisi.

"It's all about our defense. Iyon naman pinag-usapan namin, eh," batbat ni Magnolia coach Chito Victolero.

"We want to respect this team. Last three days iyon lagi teaching ko, mindset. Binibigyan ko ng emphasis iyon. We don't want na mag-relax kami."

Gipangulohan ni Sangalang ang kadaugan pinaagi sa iyang 18 puntos, niamot og 16 si Barroca, nitunol og 15 si Ahanmisi samtang nitampo og 14 si Abueva. (ESL)

This posting includes an audio/video/photo media file: Download Now

Lakers naa na'y ‘Big 3’

Posted: 30 Jul 2021 06:59 AM PDT

NAHATAGAN og katumanan ang tinguha sa Los Angeles Lakers nga makahulma og kaugalingong "Big Three" sa dihang ilang nasignit ang serbisyo ni All-Star guard Russell Westbrook gikan sa Washington Wizards.

Isip baylo ni Westbrook, ang Lakers mi-release nila ni Kyle Kuzma, Kentavious Caldwell-Pope, Montrez Harrel ug ang ilang second round picks sa 2024 ug 2028 nga naglakip usab sa ilang No. 22 overall pick.

Sa sayo pa niini, gikataho nga si Westbrook mipadayag nga gusto siyang magpa-trade ug ang Lakers maoy iyang prayoridad.

Gikataho nga si Westbrook ubos sa iyang kontrata mokita og $44 million sa sunod season ug gituohan nga mousbaw pa kini sa sunod nga mga katuigan.

Samtang kon hiusahon, moabot ngadto sa $36 million ang suweldo nila ni Kuzma, Caldwell-Pope ug Harrell.

Laraw sa Wizards nga ipabilin ang lain nilang star player nga si Bradley Beal, matod pa sa taho. Si Beal mamahimo nang free agent sa offseason.

Dili man tuod consistent nga three-point shooter si Westbrook nga maoy gikinahanglan unta sa Lakers apan napanglantawan nga ang iyang presensya makadugang sa kalig-on sa opensa sa team tungod sa iyang kaagresibo nga mobungkag sa depensa sa kontra.

Makahatag usab kini og igong abag nila ni LeBron James ug Anthony Davis sa pagpahimutang sa ilang opensa.

Sa miaging upat ka seasons, katulo gyud nga si Westbrook maoy nag-una sa assists.

Ang gitawag og Mr. Triple Double lumad nga taga Los Angeles ug nakaduwa kini sa University of California Los Angeles sa iyang college days. (JBM)

This posting includes an audio/video/photo media file: Download Now

at

No comments:

Post a Comment

Subscribe to: Post Comments (Atom)

End of Summer Sale ☀️😎

20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...

  • Last Chance - Win over $1,800 in BLEUSALT
    Elevate your Wardrobe. Offer ends Midnight. ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏ ...
  • Breaking: Aaron Rodgers teases Jets return this season: 'Anything is possible'
    New York Jets quarterback Aaron Rodgers suffered a torn Achilles tendon in Monday's 22-16 overtime win vs. the Buffalo Bills. If you a...
  • End of Summer Sale ☀️😎
    20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...