https://www.sunstar.com.ph/ |
- Pacquiao 146 lbs., Ugas 147 lbs. atol sa tinimbangay
- Blackout sa Visayas nasinati
- Pacquiao puwerte ka inilog
- Ugas di mosunod ni Rigondeaux nga kusog modagan
- Binghay: Epekto kon masakit sa Covid-19
- Detention cell sa CCPO gi-lockdown
- Tambagi ko Noy Kulas: Pirmeng naguol
- Albor: Nagpasagad si Duque
- Fiesta sa social media
- Online sabong gitugtan, apan di pa makasugod
- 963 nadakpan sa pulis sa curfew, wa mag-mask
- ‘Party’ gitugot ubos sa MGCQ; Frasco: kalihukan dunay pagtugot sa IATF, LGU
- Babaye nakuha sa bito sa Catmon
- Pribadong sakyanan di pasudlon sa Carbon
- Magsayo, K.O. ang tinguha
- Nagkaduol na ang pagbalik sa aksyon sa PBA
- Yaw-Yan Phils. magsaulog sa ilang ika-49 nga anibersaryo
- Bise mayor sa San Isidro, Leyte nakuhaan og daghang armas
- Namili og brand sa bakuna?
- P10K Charter Day bonus sa Cebu City Hall ihatag
- Super Busog: Kinilaw nga tuna
- Basil: Madam Inutz, Wilbert nipirma og kontrata
| Pacquiao 146 lbs., Ugas 147 lbs. atol sa tinimbangay Posted: 20 Aug 2021 07:46 PM PDT MITAKDO ug saktong nakakuha sa ilang tagsatagsa ka timbang sila si Manny Pacquiao ug Yordenis Ugas atol sa weigh-in Biyernes (Sabado sa Pilipinas) alang sa ilang World Boxing Association (WBA) welterweight title showdown sa T-Mobile Arena sa Las Vegas, Nevada. Ang 35-anyos nga Ugas ang Cuban fighter nga maoy defending champion, mipatong sa weighing scale nga may 147 lbs. ang gibug-aton samtang ang Filipino legend nga Pacquiao, 42-anyos, mitimbang og 146 lbs. Ang weigh-in gipahigayon sa MGM Grand Arena. "I'm very emotional and very excited for this opportunity," matod ni Ugas. "I have the belt. Whoever wins tomorrow gets the belt. But right now, I'm the champion." Si Pacquiao, sa iyang bahin, subling namahayag nga way siyay kompiyansa nga makigkombati ni Ugas bisan pa man sa iyang ka inilog. JBM 'I'm not taking this fight lightly. Of course i don't want to be over-confident for this fight," ingon ni Pacquiao. (JBM)  This posting includes an audio/video/photo media file: Download Now |
| Posted: 20 Aug 2021 10:20 AM PDT UPAT ka isla sa Kabisay-an ang nakasinati og wala'y supply sa kuryente sugod Biyernes sa gabii, Agusto 20. Ang National Grid Corporation (NGCP) mikompirmar nga nasinati ang unscheduled power interruption sa mga parte sa Sugbo, Leyte, Samar, ug Bohol. "Unscheduled power interruption affecting parts of Cebu, Leyte-Samar and Bohol on Aug. 20 at 11:56PM," matod ni Betty Martinez, tigpamaba sa NGCP Visayas. Sa pagkutlo ning balita, wala pa'y detalye ang NGCP sa possibleng rason sa blackout nga nasinati. Mao na kini ang usa sa labing halapad nga blackout sa Visayas karong 2021./HBL  This posting includes an audio/video/photo media file: Download Now |
| Posted: 20 Aug 2021 08:44 AM PDT GRABE ka inilog sa MGM betting odds si Filipino boxing icon Manny Pacquiao sa iyang pag-challenge kang World Boxing Association (WBA) welterweight champion Yordenis Ugas sa Cuba ugma, Agusto 22, 2021 (RP time), sa T-Mobile Arena sa Las Vegas, USA. Ang Pambansang Kamao ng Pilipinas natali sa -375 favorite nga nagpasabot nga ang $375 nga pusta alang kaniya igo lang modaog og $100. Sa iyang bahin, si Ugas, kinsa kanhi Olympic bronze medalist, napatik sa +295 nga nagpasabot nga ang $100 nga pusta kaniya modaog og $295. Dili kini maoy pustada dihang wala pa moatras ang orihinal nga kontra ni Pacquiao nga si American Errol Spence Jr., kinsa maoy gikonsiderar nga inilog ning mao untang panagparang. Si Spence natali sa -250 nga nagpasabot nga ang $250 nga pusta kaniya modaog lang og $100 samtang si Pacquiao nalista sa +180 nga nagpasabot nga ang $100 nga pusta modaog og $180. Ang grabeng pagkainilog sa 8-division world champion wala panumbalinga sa kampo ni Ugas. "Manny Pacquiao is a star, and of course, we are the underdog side," asoy sa trainer ni Ugas nga si Ismael Salas nga napatik sa philboxing.com. (ESL)  This posting includes an audio/video/photo media file: Download Now |
| Ugas di mosunod ni Rigondeaux nga kusog modagan Posted: 20 Aug 2021 08:43 AM PDT GIPANEGURO ni Cuban Yordenis Ugas nga dili siya pareho sa iyang kababayan nga si Guillermo Rigondeaux nga kusog modagan-dagan. Mao kini ang gipasiatab ni Ugas kabahin sa iyang pagpakig-away kang Filipino boxing legend Manny Pacquiao ugma, Agusto 22, 2021 (RP time) sa T-Mobile Arena sa Las Vegas, USA. Adunay mga nagtuo nga modagan-dagan ra sab si Ugas sa iyang away ni Pacquiao sama sa gibuhat ni Rigondeaux sa away niini batok sa kababayan ni Pacquiao nga si Johnriel Casimero niadtong Agusto 15, 2021. "You will never see Ugas running away. He never does," matod sa trainer ni Ugas nga si Ismael Salas nga napatik sa Spin.ph. "Ugas is a very competitive fighter. He's always eager to fight." (ESL)  This posting includes an audio/video/photo media file: Download Now |
| Binghay: Epekto kon masakit sa Covid-19 Posted: 20 Aug 2021 08:37 AM PDT RESPONSIBILIDAD namong maglilindog ug magsisibya ang pagpaambit sa among mga hunahuna kung dunay mga isyu nga naglambigit sa bagang katawhan o katilingban, maayo o bati man. Mao ni rason nganong nangita ko og paagi para mas makapasabot sa epekto ining makamatay nga coronavirus disease 2019 (Covid-19) kay hangtod karon daghan pa gihapong ang nangahadlok ug nagdumili sa pagpa-bakuna tungod sa mga buktot nga tinuhoan (mahimong zombie o mamatay). Hangtod karon daghan pa gihapon ang mga nagpabadlong, waldas og lag, way suot nga face mask ug face shield, ug way klarong social distancing maong di ikahibulong nga mibalik pagsaka ang gidaghanon sa natakdan ini. Apil ini akong higala nga si Andy (tinuod ngalan gitago) nga akong nahinabi sa telepono human siya na-admit og subra usa ka buwan sa ospital sa pagkumbati ining kagaw. Matod niya, pait kung masakit o mamatay ka sa Covid-19 kay mismong imong kabanay o mga minahal di nimo igkita bisag sa haya kay ideretso kaman og lubong o i-cremate. Gisaysay ni Andy ang iyang kasinatian sama sa pagsugod og labad sa ulo sa may agtang nga bahin, tumang pagpangapoy sa lawas ug kaunoran, taas nga hilanat, pagpangatol sa tutunlan, uga ug sagunson nga pag-ubo nga makahapo unya murag way kahumanan maong magsakit ang dughan, bukobuko ug baga. Punga sab iginhawa kay bation man nga murag naay nagbara sa ilong nga murag gisap-ungan maong gitauran siya og oxygen kay ang tubo ini makalahos man taman sa tumoy sa sulod sa ilong nga sarang kunong sakita. Unya kay wa man kini nagsilbi kay lisod man gihapon iginhawa, giabrihan ug gipaskan na sab og tubo iyang tutonlan deritso paingon sa baga (artificial respirator) unya gi-sedate siya sa doktor aron di kalihok, di ka estorya, di kakaon unya makapahuway. Naghilak siya sa kapait ug kamingaw kay wa may pweding makaduol ug makatabang. Kini tanan akong gisuwat di sa pagpanghandlok kundi paghangyo sa nagsunod ining lindog sa pagpabakuna og pagsunod sa gilatad nga health protocols sa mga awtoridad.  This posting includes an audio/video/photo media file: Download Now |
| Detention cell sa CCPO gi-lockdown Posted: 20 Aug 2021 08:35 AM PDT GI-LOCKDOWN ang temporary detention cell sa Cebu City Police Office (CCPO) human nga nagpositibo sa coronavirus disease 2019 (Covid-19) ang 22 ka persons under police custody (PUPCs). Sa pagkakaron, walay bisan usa ka tawo ang gitugotan nga makaduol sa bilanggoan gawas lang sa mga jailer nga gipang-isolate na usab. Matod ni Police Lieutenant Colonel Wilbert Parilla, deputy city director for operation sa CCPO, wala lang una nila tugoti ang bisita sa mga kabanay nga nabilanggo ug ang ilang mga dala nga pagkaon ibutang lang kini sa gate sa kampo aron dili kini makatakod sa laing tawo. Adunay mohatod sa pagkaon nga naka-personal protective equipment suit nga motunol sa PUPCs ug hugot nga gidid-an ang mga jailer nga makaduol sa police personnel nga naka-duty sa kampo ug i-isolate sila sulod sa pipila ka adlaw. Wala na usab manawat og dinakpan ang kampo sanglit kadtong bag-ong mga madakpan sa operation adto kini temporaryo nga ibalhog sa police stations. Dugang ni Parilla nga kung madala na sila sa Cebu City Jail (CCJ), ang temporaryong bilanggoan palimpyohan nila ug ipa-disinfection. Adunay kapin pa sa 30 ka mga piniriso ang CCPO apan silang tanan gikonsidera na nga mga positibo human nagtapok na sila sa sulod nga mahimong magtinakdanay na. "Bawal na ang moduol diha, basta dili ka apil sa gwardya dinha dili ka pwedeng moduol," matod ni Parilla. Adunay upat ka aktibong kaso sa Covid-19 sa CCPO, ang usa niini bag-o lang naayo human madala sa tambalanan. Matod ni Parilla nga ang usa ka personnel nga natakbuyan ug naglisod kini og ginhawa nga hinungdan nga gidala kini sa Chong Hua Hospital apan wala kini masulod sa emergency room tungod sa kadaghan sa mga pasyente nga naglinya sa gawas nga naka-oxygen. Naabot na lang ang 12 ka adlaw ug nadeklarar kini nga Covid-free ug, matod pa, waa siya masulod sa tambalanan tungod sa kadaghan sa mga pasyente. Gipahibawo ni Parilla nga 90 porsiyento na sa mga pulis sa siyudad sa Sugbo ug kompleto na sa bakuna, bisan pa man niini, wala sila mokompyansa ug hugot pa gihapon ang ilang pagbantay. Samtang gikompirmar sa warden sa CCJ nga dunay persons deprived with liberties (PDL) o piniriso nga gipang-ubo ug gisip-on. Matod ni Jail Supt. Jose Abueva, ang maong mga PDL ang gipang-isolate na bisan wa pa matino kung Covid ba ang hinungdan sa ilang gipamati. Gi-monitor karon ang ilang kahimtang sa panglawas pinaagi sa mga medical personnel sa BJMP ug gipanghatagan og tambal. Ang kagamhanan sa siyudad sa Sugbo nakig-alayon usab sa CCJ aron ma-monitor ang maong mga PDL ug malikayan ang tinakdanay sa sulod sa bilanggoan.(AYB)  This posting includes an audio/video/photo media file: Download Now |
| Tambagi ko Noy Kulas: Pirmeng naguol Posted: 20 Aug 2021 08:35 AM PDT Dear Noy Kulas, Maayong adlaw kanimo ug sa Superbalita readers. Kanunay akong nagbasa sa inyong website kay proud kaayo ko nga Bisaya. Kaning akong problema parte ni sa akong mama nga naa gihapon sa grabeng kaguol bisan kon si Papa namatay na three years ago. Maingon ta nga wa na ganahi si Mama sa iyang kinabuhi sukad si Papa namatay kay close kaayo ni silang duha. Bisan unsa na lay among gibuhat pero si Mama pirme lang maguol. Naay ni suggest namo nga pauyabon si Mama og laing lalake, but majority sa akong mga igsuon di ganahan. Lainan sila magtan-aw nga naa laing lalake nga kauban si Mama. Unsa kaha ang among buhaton aron mabalik nga happy si Mama? Daghang salamat, Noy Kulas. BELEN Belen, Constant nga communication sa inyong inahan ang inyong buhaton. Di lang kay ikaw, apil na ang imong mga igsuon ug kon dunay mga apo, mas labing maayo nga inyong kanunay ipaduol sa iyaha. Kon tugtan na ang mga travel, dad-a ang inyong inahan sa mga biyahe sa lainlaing dapit. Kana makaayo kaayo niya kay change of environment man. Usa gud sa makalisod aning paghikalimot mao ang pagtan-aw sa mga dapit nga kanunay mo ma-associate sa namatay na. Ayaw lang sab nang pauyabon ninyo ang inyong mama og lain kay basin, opposite sa inyong amahan ang batasan. Unya di pa ganahan ang imong ubang mga igsuon. Mas I encourage pa ninyo sa pag-apil og church organizations aron maengganyo siya sa pagkuyog og mga grupo. NOY KULAS rojval69@yahoo.com  This posting includes an audio/video/photo media file: Download Now |
| Posted: 20 Aug 2021 08:35 AM PDT DAAN nang nagsagubang og kasong plunder si Department of Health (DOH) Sec. Francisco Duque kay nanag-iya og kompaniya ug ospital nga nakakontrata sa DOH ug Philhealth tataw nga conflict of interest. Gitumbok nga godfather sa Philhealth mafia isip chairman sa Interim Reimbursement Mechanism. Sa dihang midasmag ang pandemiya, haguka ang estratihiya sa pagdumala. Walay tino nga sistema sa travel restrictions, contact tracing ug mass testing. Palpak kadtong inpormasyon nga milapdos ang second wave nasupalpal sa Malacañang, mibahar o na-flatten ang curve maong nangayo og pasaylo. Wala mosanong sa sugyot ni Dr. Rafael del Castillo nga dili ihulat og duha ka test ang napositibo nga wala nay gipamati aron dili magsugwak ang mga ospital. Dihay mitiyabaw ang medical society nga giubos sa GCQ ang Metro Manila nga nagkadaghan ang pasyente. Gisibog kadtong desisyon ubos sa MGCQ nga makagawas ang 10-14 anyos, buksan ang mga cinema, paglugak sa mga guidelines nga wala nay swab test, quarantine ug pagtugot sa face-to-face classes. Gilaygay nga makapalit og bakunang Pfizer-US kay midula pabor sa Sinovac-China. Paistaron sa hotel ang mga overseas Filipinos workers (OFWs) bisan negatibo aron pagkompleto sa 14 ka adlaw nga kwarantinas. Nagparihas lang sila Duque ug DEpartment of Interior and Local Government (DILG) Sec. Eduardo Año nga walay pinansyal, emosyonal ug tawhanong konsiderasyon. Wala pa mogawas ang resulta sa inbestigasyon ni Ombudsman Samuel Martires batok Duque sa iregularidad pagpalit sa medical supplies. Apan ang COA nakamatikod nga dili maayong paggasto ang P67 biyunes nga Covid response. Ang Blue Ribbon Committee moimbestigar sa giingong mismanagement sa pundo. Malacañang wala mopakagamay sa maong isyu batok DOH, apan nagkinahanglan og komprehensibong report gikan sa COA. Gikuwestyon sab sa COA ang Overseas Workers Welfare Administration (OWWA) nga ang thermal scanners, hygiene kits ug sanitary napkins nga didto palita sa hardware ug gipaburot ang presyo. (csa_1156@yahoo.com / 09064648954)  This posting includes an audio/video/photo media file: Download Now |
| Posted: 20 Aug 2021 08:35 AM PDT KUYAW na kaayo rong panahuna tungod sa social media kay ang personal unta nga away, mahimo nang masibya sa tibuok kalibutan. I-Facebook live dayon. Bisan gud ang problema sa magtiayon isibya na sa tibuok nasod. Ang lalis sa duha ka mga babaye, usa nagnegusyo og pagkaon samtang ang usa kliyente. Gi-live sa ginang ang iyang pagsingil sa bayad. Nag-trending ang ilang lalis ug nakamugna og memes sa social media. Misikat ang mga pulong "not worth it" ug "sagpaon ta kag escabeche." Niadtong Agusto 17, 2021, nag-trending na sab sa social media ang away tali sa usa ka food delivery driver ug traffic enforcer sa Lungsod sa Consolacion. Gikuhaan diay og video sa driver ang ilang panagkomprontase tali sa traffic enforcer. Ang reactions sa post sa Superbalita Cebu niabot na og 24,000 sa hapon sa Agusto 19, 2021. Kining mga lalis mahilot ra unta dayon kon dunay mabugnaw nga ulo. Apan tungod kay niabot sa social media, usahay mangabot sa hukmanan kay nainit ang mga hingtungdan. Ang lalis tali sa traffic enforcer ug driver wa na unta moabot sa korte, apan tungod sa social media, nahagit ang nahauna, nikiha og disobedience. Ning panahon sa social media, kinahanglan batunan ang kabugnaw sa ulo aron malikayan ang away, labina kon naa atubangan sa publiko. Mga silingan ra unta ang saksi, apan karon, tibuok nasod ug tibuok kalibutan. Pistahan sa social media. Di lang ang nag-away ang nauwawan, apil na ang masig ka pamilya. Daghan na sab ang masakitan. Busa karon laging panahuna, doble ang pag-amping, likayan ang kainit sa ulo. Batunan ang kakalma sa bisan unsa nga sitwasyon aron di pistahan sa netizens. Kon sa imong tan-aw moinit na ang sitwasyon, pagdali og biya. Kon gikinahanglan nga hiluton, dad-on sa hustong buhatan, sama sa barangay hall, di sa Facebook kay kauwawan ra ang padulngan.  This posting includes an audio/video/photo media file: Download Now |
| Online sabong gitugtan, apan di pa makasugod Posted: 20 Aug 2021 08:28 AM PDT BISAN kon way pagsupak ang Cebu City Council sa operasyon sa online sabong sa Dakbayan sa Sugbo, dili pa pa gihapon sila makasugod sa ilang operasyon. Kini ang gipadayag ni Konsehal Phillip Zafra, chairman sa public order and safety sa Konseho, kinsa maoy nipalabang sa resolution nga nagtugot sa franchisee nga akreditado sa Philippine Amusement and Gaming Corp. (Pagcor) nga makapahigayon sa sabong pinaagi sa online. Matod ni Zafra, hangtod di pa molambo ang quarantine classification sa Cebu City sama pananglit kon mamintinar ang modified enhanced community quarantine (MECQ), di sila tugotan nga maka-operate sa online sabong sa galyera sa Barangay Tejero ug Agsungot nga maoy lisensiyado nga mga buwangan. Si Zafra nagkanayon nga way mga tawo nga gitugotan nga manugal sa arena sa higayon nga makasugod na ang operasyon sanglit ang gitugotan kadto rang moluwat sa manok, kuyme, tigtaod sa buwang, announcer ug ubang personnel sa online sabong. (PAC)  This posting includes an audio/video/photo media file: Download Now |
| 963 nadakpan sa pulis sa curfew, wa mag-mask Posted: 20 Aug 2021 08:15 AM PDT DUL-AN sa usa ka libo ka mga tawo nadakpan sa kapulisan sa siyudad sa Sugbo ug mga sakop sa Prevention, Restoration, Order, Beautification and Enhancement (Probe) team atol sa pagpatuman sa Oplan Puyo gikan sa Agusto 18 hangtod sa gabii sa Agosto 19, 2021. Ilang nalapas ang curfew ug health standards. Sa talaan nga gipahibawo ni Police Lieutenant Colonel Wilbert Parilla, deputy city director for operations sa Cebu City Police Office, 963 ka mga tawo ang ilang nadakpan, 674 mga hamtong samtang 135 mga menor de edad. Ang 493 nakalapas sa curfew samtang 288 ka mga tawo nasugatan nga way mask. Lima usab ang nakalapas sa liquor ban nga bisan hugot nga gidili, aduna pa gihapoy mag-inom sa mga publikong lugar. Dugang ni Parilla nga ang mga nadakpan matag adlaw gi-record sa data base sa Probe aron ma monitor kinsa kining mga tawo nga kanunay na nga madakpan taliwala sa ilang sub-sub nga operation. Kon masuta nga adunay mga tawo nga magbalik-balik na nga madakpan, pasakaan kini og kasong criminal sanglit adunay ordinansa ang Siyudad labot niini. "Ato nanang gi suggest sa Probe considering nga sila ang mo consolidate sa tanang apprehended. Naa na silay data base aron makita gyud didto og kinsa ang pabalik-balik na lang, and then duna man tay ordinansa anang nagpabalik-balik second ug third offense pwede nato silang filan og criminal case kadtong mga recidivist,"matod ni Parilla. Gihulagway ni Parilla nga daghan na ang nisunod sa bag-ong executive order nga giluwatan ni kanhi acting Mayor Michael Rama, apan aduna pa gihapoy maglisud sa pagtuman niini ilabi na sa mga tawo nga nag puyo sa sudlonong bahin sa kabarangayan ug nagsikit nang mga balay. Samtang gipahibawo usab ni Parilla nga gipahugtan na sa kapulisan ug sa mga barangay official ang mga quarantine control points (QCP) nga gipang montar sa 10 ka mga barangay nga adunay taas nga kaso sa coronavirus disease (Covid-19). Kadtong di authorized person outside residence (Apor) nga mogawas aron mopalit og pagkaon lakip na sa tambal, tugotan ra sila apan kinahanglan nga magbilin silag identification (ID) card. Sa ilang pagbalik ilang ipakita ang ilang gipamalit. Mao usab kini ang buhaton sa mga tawo nga mosulod sa barangay nga di lumolupyo sa maong dapit. Kon di essential ang ilang tuyo, dili sila tugotan nga makasulod. "If you are not living in that barangay, kon mosulod ka dinhi, pangutan-on kag unsay imong tuyo diha. Kon essential, naa kay paliton didto. Kon naa didto nabutang ang mga pharmacy or naa kay emergency nga tuyo sa diha nga lugar, so you will be allowed but ibilin gihapon nimo imong ID,"dugang ni Parilla. Giklaro hinuon ni Parila nga walay lockdown nga mahitabo sa top 10 b arangay sa covid sanglit gi estrikto lang ang lagda sa EO sa Kagamhanan sa Siyudad sa Sugbo. Ipatuman kini sulod sa 24 oras hangtod nga matapos ang modified enhanced community quarantine (MECQ) aron usab nga malimitahan ang lihok sa mga tawo nga way tuyo sa gawas.(AYB)  This posting includes an audio/video/photo media file: Download Now |
| ‘Party’ gitugot ubos sa MGCQ; Frasco: kalihukan dunay pagtugot sa IATF, LGU Posted: 20 Aug 2021 08:15 AM PDT ANG giingong beach party sa usa ka lugar sa Lungsod sa San Francisco, mga isla sa Camotes, niadtong Hulyo 10, 2021 nahitabo dihang ang tibuok Sugbo ubos pa sa modified general community quarantine (MGCQ), labing lugak sa upat ka quarantine classifications sa nasod. Mao kini ang pasiunang impormasyon nga gihatag ni Cebu Police Provincial Police Office (CPPO) chief Police Colonel Engelbert Soriano ngadto kang Police Regional Office (PRO) 7 chief Police Brigadier General Ronnie Montejo bisan kon wa pa makadawat sa kamandoan ang nahauna. Matod ni Montejo nga ubos sa MGCQ, ang party gitugtan, apan 50 porsyento lang sa kapasidad ang gitugot. "Nahitabo to siya last July. July is MGCQ pa ang Cebu Province, apil pa gani ang tri-cities, MGCQ pa ta. Sa MGCQ allowed pa ang 50 percent ang mag attend sa mga activities. Pero gihuwat nako ang iyang final nga report kabahin ato," dugang ni Montejo. Apil sa gipaimbestigar ni Montejo mao ang organizers, nangapil ug ang local government unit (LGU) sa San Francisco. TUBAG NI FRASCO Si Kongresista Vincent Franco "Duke" Frasco, sa iyang tubag sa isyu, niingon nga ang kalihukan dunay permiso sa LGU nga pinirmahan mismo ni Mayor Alfredo Arquillano, Jr. Gawas sa LGU, gitugtan usab kini sa Inter-Agency Task Force (IATF) ug Probinsya sa Sugbo. Atol sa kalihukan nga ginganlan og TeamFrasco Friendship Ride/Run event, naa usab ang mga pulis, barangay officials, tanod ug health workers aron makaabag sa hingpit nga pagpatuman sa mga health protocol. "In compliance with IATF, Cebu Province, and local rules, all 667 bikers and runners were required to fill out health declaration forms and undergo temperature checks before the event, as well as wear masks during the event," matod ni Frasco. Ang dapit nga gipahigayunan sa kalihukan sa Barangay Santiago gibana-banang makasulod og 25,000 ka tawo, nga ang katunga naa sa 12,500.(AYB, REV)  This posting includes an audio/video/photo media file: Download Now |
| Babaye nakuha sa bito sa Catmon Posted: 20 Aug 2021 08:15 AM PDT NAKUHA na sa rescuers ang usa ka babaye gikan sa lawom nga bito sa alas 3 sa hapon sa Biyernes, Agusto 20, 2021 sa Barangay Tinabyonan, Lungsod sa Catmon, amihanang Sugbo. Ang napalgan sa alas 7:46 sa buntag sa Huwebes, Agusto 19, 2021, giilang si Judy Ann Colonia, 20, tinun-an sa 3rd year sa Bachelor of Science in Agriculture sa Cebu Technical University (CTU) Tuburan campus. Si Police Lt. Teofilo Manlanat, hepe sa Catmon Police Station nga nahinabi sa Superbalita Cebu, nagkanayon nga si Colonia unang gi-report nga missing sa ilang buhatan niadtong miaging simana. "Ang estorya gipahatod daw ni siyag paniudto sa iyang inahan sa bukid nga nanguhag kumpay. Apan wala na mobalik hinungdan nga gipa-blotter ang pagkahanaw," nagkanayon si Manlanat. Niadtong buntag sa Agosto 19, 2021, nagubot ang dapit human usa ka residente nga nagpuyo duol sa lugar nakabantay sa grabing kalang-og sa baho. Ilang gisusi ang bito ug dunay tawo nga nakit-an nga naa sa ilawom hinungdan nga gi-report sa mga opisyal sa barangay ngadto sa kapulisan. (GPL)  This posting includes an audio/video/photo media file: Download Now |
| Pribadong sakyanan di pasudlon sa Carbon Posted: 20 Aug 2021 08:15 AM PDT DI na tugotan sa Cebu City Government pinaagi sa Market Operations Division (MOD) ang mga pribadong sakyanan nga makasulod sa Carbon market complex sugod sa Lunes, Agosto 23, 2021. Kini ang gipahibawo ni Market Administrator Irvin Cabales sa Agosto 20, 2021. Tumong niini aron madugangan ang espasyo ug lahoslahos na ang mga tawo sa merkado. Delivery trucks na lang ang gitugotan nga makasulod. "Starting Monday dili nata magpasulod og private vehicles sa Carbon. Unya atong buhaton ani especially sa Plaridel ug F. Gonzales streets kay mao may daghan og tawo during peak hours, atong giandaman og mga railings incase loaded na kaayo ang area. Atong sirhan ug adto na sila moagi sa entrance nga dili daghan og mga tawo," pahibawo ni Cabales. Ugma, Dominggo, Agusto 22, sirado ang Carbon market sugod sa alas 8 sa buntag hangtod alas 3 sa kaadlawon sa Lunes para sa pagahimuon mga disinfection sa mga karsada, stalls sa Carbon isip preparasyon pag-abli sa tinda sugod sa alas 4 sa kaadlawon hangtod. Manira og balik alas 9 sa gabii gumikan sa curfew niining panahon sa modified enhanced communitu quarantine (MECQ). Ang mga sakyanan sa mangomprahay nga masakpang giparada sulod sa Carbon complex, i-clamp sa Cebu City Transportation Office nga pinangulohan ni Lyntoni Alburo. Ang entrance sa mga sakyanan adto sa dalan Escaño duol sa University of San Jose Recoletos (USJ-R) samtang ang exit sa dalan MC Briones duol sa Cebu City Hall. Mahimong makaparada sa ilang mga sakyanan sa mga pay parking area ug dapit sa Compaña Maritima ug maglakaw nalang sila pagsulod sa Carbon market para mamalit. Mohimo usab og daghang entrance ug exit ang MOD aron daghan og kalutsan paingon sa gawas ang mga mangomprahay isip ilang preparasyon sa hugot nga implementasyon sa safety and health protocol batok Covid-19. "Atong gi-balance ang pag-observe sa safety and health protocol ug ang panginabuhian sa mga vendors kay mawad-an gyud sila og panginabuhian ug wala say mapalit ang konsumidor kon atong isira ang Carbon market o ibalik ang alphabitical order ang pagpangompra," matod ni Cabales. Ang MOD inabagan sa Police Station 5 pinangulohan ni Police Major Kenneth Albotra, Prevention Restoration Beautification and Enhancement (PROBE) team ni Raquel Bohol-Arce, Barangay Ermita ni Kapitan Mark Miral istrikto sa ilang pagpatuman sa basic health protocol hilabi na nga ang Carbon market maoy hugopanan sa kinabag-an. Si Albotra nagkanayon nga dili na kaayo problema ang pagsul-ob sa mask ug face shield sanglit nituman na ang mga vendor ug konsumidor. Ang tutokan sa Station 5 mao na lang ang social distancing. Giklaro sa police official nga kon tan-awon sa mga picture labi na sa mga gi-upload sa social media, daw naghuot ang mga tawo sa Carbon apan sa aktwal, aduna pay espasyo ang matag usa.  This posting includes an audio/video/photo media file: Download Now |
| Posted: 20 Aug 2021 05:12 AM PDT TINGUHA sa Filipino featherweight world-title prospect nga si Mark Magsayo nga makarehistro og makapaukyab nga kadaugan batok kang Mexican Julio Ceja sa undercard sa Manny Pacquiao-Yordenis Ugas sa Dominggo, Agosto 22, 2021 (RP time) sa T-Mobile Arena sa Las Vegas, USA. Si Magsayo, kinsa lumad taga Tagbilaran City, Bohol ug adunay 22-0, 15KOs nga rekord, mipasabot nga andam siyang molahutay sa 12 ka rounds nga away apan kon adunay oportunidad alang sa knockout, dili kini niya usikan. Gitataw ni Magsayo nga nasayod siya nga adunay saktong abilidad si Ceja apan andam ug masaligon siyang maangkon ang kadaugan. Si Ceja, kinsa kanhi world title contender, naggunit og 32-4-1, 28 KOs nga rekord. Si Magsayo, kinsa naa sa top 5 sa rankings sa World Boxing Council (WBC), International Boxing Federation (IBF) ug World Boxing Organization (WBO), nag-training ubos sa paggiya ni Hall of Fame trainer Freddie Roach. Nakasaksi si Magsayo sa training camp ni Pacquiao ubos sa pagdumala ni Roach ug matod niya, daghan siyang nakat-unan nga alang kaniya nagpalambo sa iyang abilidad. Gipasalig ni Magsayo nga buhaton niya ang tanan niyang makaya aron modaog ning awaya gumikan kay mao kini ang pultahan sa dugay na niyang pangandoy nga makapanuktok alang sa world title. Ang modaog sa away nila ni Magsayo ug Ceja gituohang mahatagan og oportunidad sa pag-challenge ni WBC featherweight king Garry Russel Jr. (ESL)  This posting includes an audio/video/photo media file: Download Now |
| Nagkaduol na ang pagbalik sa aksyon sa PBA Posted: 20 Aug 2021 05:12 AM PDT GIAPRUBAHAN na sa Pampanga government ang Philippine Basketball Association (PBA) alang sa pagbalik sa aksyon sa 2021 Philippine Cup nga ipahigayon sa probinsya, asoy ni commissioner Willie Marcial. Kon madawat na sa PBA ang formal approval, nagtuo si Marcial nga makapraktis na og balik ang tanang teams. Nananghid na sab ang PBA sa Inter-Agency Task Force (IATF). Kining maong kalambuan naghatag og senyales nga hapit na'ng mahibalik ang aksyon sa liga nga naundang niadtong Agusto 1, 2021. (ESL)  This posting includes an audio/video/photo media file: Download Now |
| Yaw-Yan Phils. magsaulog sa ilang ika-49 nga anibersaryo Posted: 20 Aug 2021 05:09 AM PDT ISAULOG sa Yaw-Yan Ardigma Philippines karong adlawa, Agusto 21, 2021, ang ika-49 ka mga tuig nga kasumaran niini dungan sa adlaw nga natawhan sa nagkaplag ning maong natad sa paugnat sa kusog nga si anhing SGM Napoleon "Nap" Fernandez. Subay niini, si Yaw-Yan Ardigma Cebu founder Master Benigno "Ekin" Caniga Jr. miingon nga taliwala sa mga restriksyon gumikan sa padayong pagkuyanap sa Covid-19, isaulog gihapon nila ang kalihukan apan dili sama sa naandan. Gipasabot ni Master Ekin nga mopasiugda sila og thanksgiving mass ug aduna sab laing misa alang sa kalag ni SGM Fernandez. "Tungod aning pandemya, wala una ta'y salusalo pero naa ta'y thanksgiving mass ug magpamisa sab ta para ni SGM Nap," matod ni Master Ekin. Matod ni Master Ekin nga taliwala sa mga kahasol nga hatod sa pandemya, padayon siyang mangita og paagi aron mapalambo ang natad sa martial arts nga iyang nakat-unan gikan kang SGM Fernandez. Ang Yaw-Yan, nga usa ka lumad nga Filipino martial arts, gipaila ni SGM Fernandez sa publiko niadtong 1972 sa Sta. Cruz, Metro Manila. Ang pulong nga Yaw-Yan kinutlo gikan sa linya nga "sayaw ng kamatayan" o "dance of death." (ESL)  This posting includes an audio/video/photo media file: Download Now |
| Bise mayor sa San Isidro, Leyte nakuhaan og daghang armas Posted: 20 Aug 2021 05:09 AM PDT GIDAKOP ang bise mayor sa lungsod sa San Isidro, Leyte sa Criminal Investigation and Detection Group (CIDG) Northern Leyte gumikan sa pagkupot og mga armas nga walay lisensiya o illegal niadtong Huwebes, Agusto 19. Si San Isidro Vice Mayor Isidro Balmoria, 57, biyudo, ug taga Barangay Matungao, nasikop base sa search warrant nga giisyu ni Judge Manasseh Bastes, acting presiding judge sa RTC Branch 11 sa Calubian, Leyte.. Si Police Major Duane Francis Ducducan maoy nangulo sa pagronda sa 7:00 sa buntag sa naasoy nga adlaw. Nasakmit sa mga pulis ang mga ebidensya nga 2 ka kalibre .45 nga pistola, silencer, magazine ug 41 ka mga buhing bala; 1 ka kalibre .380, 4 ka magazine ug 20 ka buhing bala; 1 ka kalibre .38 nga revolver ug mga bala; 3 ka magazine sa M16; 53 ka bala sa 9mm; ug 71 ka bala sa 5.56/M16. Ang operasyon gisaksihan sa mga barangay opsiyal sa Matungao. Gidala sa kapulisan ang bise mayor sa opisina sa Ormoc City. Ug kagahapon sa buntag, Agusto 20, gidala sa Calubian Hall of Justice ang bise mayor alang sa inquest proceedings sa kasong kalapasan sa Republic Act 10591 o illegal nga pagtiner og mga armas.(JKDP)  This posting includes an audio/video/photo media file: Download Now |
| Posted: 20 Aug 2021 05:09 AM PDT GIAWHAG ni James Sayson, ang deputy officer sa vaccination operations center sa Dakbayan sa Lapu-Lapu, ang mga Oponganon nga dili mamili og brand sa bakuna. Kini human nga nabantayan nga minos ang nagpabakuna sa mga vaccination site sa dakbayan karong semanaha kon itandi sa miaging mga semana. Usa sa posibleng rason niini, sumala ni Sayson, mao ang pagpamili og brand. Sa miaging mga semana ang dakbayan namakuna gamit ang Sinovac gikan sa China. Apan karong semanaha Pfizer ug Moderna ang giturok sa dakbayan apan wala lang nila ni gianunsyo sa publiko aron kalikayan ang pagdumog sa mga tawo. Sa pagsusi usab ni Sayson sa ubang local government units (LGUs), susama usab ang nahitabo diin mas menos ang mga nagpabakuna karong semanaha kaysa mga nangagi. Laing posibleng hinungdan niini gibutyag ni Sayson mao ang posibilidad nga nahadlok mogawas ang mga tawo gumikan sa hulga sa Delta variant ug karon aduna na usay Lambda variant. Laing posibilidad mao usab ang pagbalik sa kabalaka sa kadaghanan kalabot sa sayop nga impormasyon bahin sa bakuna. Sa paglibotlibot sa mga City Health personnel sa kabarangayan diin nagpahigayon usab sila og pagpamakuna mao gayud kini ang ilang madungog nga rason sa publiko nganong dili sila magpabakuna. Subling gipahimangnoan ni Sayson ang publiko nga karon ang dili insaktong panahon nga mamili og brand sa bakuna sanglit ang tanan pulos epektibo batok sa Covid-19 nga dili gyud ka magrabehan sa naasoyng virus. Anaa na usab ang Delta variant sa palibot ug posibleng masundan pa sa Lambda variant busa mas maayo nga maniguro gayud ug pabakuna sa labing daling panahon.(GCM)  This posting includes an audio/video/photo media file: Download Now |
| P10K Charter Day bonus sa Cebu City Hall ihatag Posted: 20 Aug 2021 05:02 AM PDT IPA-RELEASE na ni Mayor Edgardo Labella ang tag P10,000 nga Charter Day bonus alang sa kapin 5,000 ka mga regular ug casual employees sa Cebu City Hall, Agosto 20, 2021 Ang mayor niisyu og memorandum ngadto sa mga department head ug head of offices, administrative officers atol sa unang adlaw sa iyang pagbalik og trabaho niadtong Agusto 19. Si Atty. Joan Quiñanola sa Office of the Mayor nagkanayon nga nagsugod na og proceso ang lainlaing mga buhatan para ma-release ang ilang tag P10,000 ug direktang cash ang madawat sa mga kawani sanglit dili na kini ipaagi sa banko. Ang City Council niaprub sa P4.5 bilyones nga ubos sa supplemental budget number 1 nga gipangayo ni Labella niadtong Hulyo 28 sa niaging buwan diin ang P56 milyones niini para sa bonus. Ang pag-process sa Charter incentive sa tanang kawani sa Cebu City Government gitugyan ngadto sa matag departamento opisina diin ang paspas nga makakumpleto sa mga rekisito maoy unang makadawat sa maong bonus para sa ika-84 nga anibersaryo pagka-siyudad sa Cebu, dugang ni Quiñanola. Ang pagparelease ni Labella sa tag P10,000 nga incentives gihangop sa mga empleyado labi na kadtong wala pa makapabakona sanglit nahadlok sila nga dili makadawat. Niadtong Hunyo 21 atol sa Flag raising ceremony, gianunsyo ni Bise Mayor Michael Rama kinsa maoy acting mayor niadtong higayona nga dili makadawat sa ilang bonus kadtong dili magpa-vaccine batok sa Covid-19. Matod pa sa usa ka abogado, ang dili paghatag sa bonus ngadto sa usa ka kawani nga dili magpabakona nahisupak sa lagda sa Civil Service Commission ug sa Department of Labor and Employment. Ang mga empleyado nga nakatrabaho na sa City Hall niadtong Enero 31, 2021 makadawat sa tibuok P10,000 samtang 60% sa maong kantidad ang madawat sa nagkatrabaho na og tulo ka buwan apan wala kaabot og 120 ka adlaw, 40% sa nakatrabaho og 2 months apan wa kaabot og 3 months ug 20% kadtong nakatrabaho og wala kaabot og duha ka buwan.(PAC)  This posting includes an audio/video/photo media file: Download Now |
| Posted: 20 Aug 2021 05:02 AM PDT Serves 2 to 4 Mga sagol: Set A: 350 gramos sa tuna fillet, gihiwa og pina-cubed 1 ka kutsarita sa asin 1/2 nga tasa sa suka Set B: 1 ka kutsara sa luy-a, gihiwa og gagmay 1 ka buok puwa nga sibuyas bombay, gihiwag nipis 2 ka buok tamatis, gikuhaag liso ug gihiwa ½ gamay nga cucumber, gihiwa 2 ka buok finger chilies, gihiwa 1/2 nga stalk sa spring onions o cilantro, gihiwa 1/2 sa tasa sa suka Fish sauce, pangtempla 1 ka kutsarita nga asukar 3 ka kutsarutang lime juice o 4 ka kutsara sa calamansi juice 2 ka buok red chilies, gihiwa Set C: 1/2 tasa sa coconut cream 1/2 stalk sa spring onions o cilantro, gihiwa (sobra gikan sa Set A) Unsaon: A. Sa usa ka bowl, ibutang ang cubed tuna, ug templahi sa asin ug suka. Pasagdahi og 5 minutos unya hugasi sa suka. Kuhai sa sobra nga suka. B. Sa lahi nga bowl, tadtara dayon sagola ang tanang set B ingredients. Templahi sa suka ug fish sauce. Idugang ang marinated tuna. C. Idugang ang coconut cream. Isagol og maayo ug ibalhin sa serving plate, balibori og spring onions.  This posting includes an audio/video/photo media file: Download Now |
| Basil: Madam Inutz, Wilbert nipirma og kontrata Posted: 20 Aug 2021 05:02 AM PDT MANILA–Paspas kaayo ang panghitabo sa kinabuhi sa misikat nga online seller nga si Madam Inutz (Daisy Lopez) nga nag-viral gumikan sa iyang pagpamalikas samtang nag-online selling sa iyang mga pre-loved nga mga sinina. Daghan siyang viewers pero way nag "mine" sa iyang mga tinda eh bread winner si Madam Inutz ug bedridden pa ang iyang inahan. Since nag-viral nga siya sa social media, gi-contact siya sa taga Star Image og ura-uradang gipapirma og kontrata. Bisan og way alam sa background sa maong talent management, gisunggaban ni Madam Inutz kay gusto niyang mabuhi, since wala nay mopalit sa iyang mga tindang sinina. Pero sa dihang nahibaw-an sa netizen nga nipirma siya sa Star Image nga maoy nagdumala sa career sa talent/vlogger nga sila si Buknoy Glamur, Zander Ford nga medyo dili limpiyo ang image sa social media. Hinungdan nga pinutakti si Madam Inutz og bad comments saying, dapat nagtanong-tanong siya bago nipirma. Naturete siya sa mga nabasang bad comments ug adunay siyay gi-istorya nga abogado para mabalewala ang kontratang gipirmahan sa Star Image, ilabi na nga paso nga passport ang iyang gipakita, kaya hayun daw baboy siyang nakabuhi sa koral. Ang sunod nga eksena, mao ang pag-kumpra ni Donita Nose ug Ethel Booba sa iyang mga sinina og ang paghatag sa negosyanteng si Wilbert Tolentino kaniya og P200,000 para sa tambal sa iyang inahan ug dugang puhunan sa iyang mga tinda. CONTRACT SIGNING Kalit ang panghitabo tungod kay may update sa panaghigala nila ni Madam Inutz ug Wilbert Tolentino. Nipirma og exclusive contract si Madam Inutz kang Wilbert Tolentino og nasaksihan kini sa mga netizens tungod kay gi-live kini sa FB page ni Wilbert. Kung sa Star Image puro negative ang comments sa netizen sa dihang nipirma si Madam Inutz, kang Wilbert puro positive. Nasa tamang mga kamot si Madam Inutz. For the record, ang uwahing social media sensation nga gi-manage ni Wilbert mao si Mother Sitang pero wa kini magdugay kay dili maayo ang ilang panagbuwag . But with Madam Inutz, siguro di sasakit ang ulo ni Wilbert. Talented si Madam Inutz ug puwede siyang mag-record og mga novelty songs, di ba, Blanktape? Good luck, Madam Inutz and Sir Wilbert Tolentino nga gi-anggaan sad og Kuya Wil II.  This posting includes an audio/video/photo media file: Download Now |
| You are subscribed to email updates from https://www.sunstar.com.ph/. To stop receiving these emails, you may unsubscribe now. | Email delivery powered by Google |
| Google, 1600 Amphitheatre Parkway, Mountain View, CA 94043, United States | |
No comments:
Post a Comment