Thursday, August 19, 2021

https://www.sunstar.com.ph/

https://www.sunstar.com.ph/

Pacquiao padayong nagtinguha'g rematch batok ni Mayweather Jr.

Posted: 19 Aug 2021 02:54 AM PDT

Giklaro ni American trainer Freddie Roach nga hangtod karon, nagtinguha gihapon si Filipino boxing icon Manny Pacquiao nga makabawos sa iyang kapildihan batok kang American Floyd Mayweather Jr.

Gipasabot ni Roach nga padayong naglaom ang Pambansang Kamao ng Pilipinas nga molugnat si Mayweather gikan sa pagretiro aron makigharong kaniya og balik.

Apan giklaro ni Roach nga dili makig-away og balik si Pacquiao kang Mayweather sa usa ka exhibition bout nga maoy gipangsagubang sa gitawag og Money Mayweather.

"We would like to fight Mayweather one more time," batbat ni Roach sa interbyu sa Sky Sports.

"But exhibitions? No. Manny is not into that. Manny has boxing fans. That's what we're after."

Si Mayweather, 44, milupig ni Pacquiao, 42, sa premirong away pinaagi sa unanimous decision niadtong 2015.

Gikan sa iyang pagretiro niadtong 2017, si Mayweather misagubang na lang og exhibition bouts samtang si Pacquiao padayong nakigkontra og dekalidad nga mga boksidor.

"Manny wants to fight real fighters. He will challenge the best," dugang ni Roach. (ESL)

This posting includes an audio/video/photo media file: Download Now

Abap mapasalamaton sa dakong abag ni ALA

Posted: 19 Aug 2021 02:49 AM PDT

Sa malampusong kampanya sa nasod sa bag-o lang nahuman nga 2020 Tokyo Olympics, mapasalamaton ang Association of Boxing Alliances of the Philippines (Abap) ngadto sa giilang Cebu boxing patron nga si Antonio L. Aldeguer.

Sa interview sa Superbalita Cebu/Radio 1 Cebu sa niaging semana, ang secretary-general sa Abap nga si Ed Picson mibutyag nga ang ALA Boxing Gym maoy usa sa nahimong dapit sa ilang training camp isip preparasyon sa Olympics.

"I would like to reiterate my sincerist and deepest thanks to our friend in Cebu bisa'g retired na siya, Mr. Tony Aldeguer has always helped Abap in a very, very valuable way," matod ni Picson, kinsa lumad nga taga Tacloban, Leyte apan kaliwat usab og mga Solon sa Cebu.

"Gipagamit niya ang iyahang boxing gym, it was open every time we would bring our national team to Cebu. He accomodated our boxers and coaches with open arms."

Gawas sa pasilidad nga libreng gipagamit ni Aldeguer alang sa Philippine team, kinasingkasing nga gihangop usab ni Picson ang tambag ni ALA ngadto kaniya ug sa tibuok team.

"And more than that, ang iyang mga advice diri nako, mga gems of wisdom gikan kaniya," dugang ni Picson.

Si Aldeguer nakakulit og pangalan sa boxing sa dihang nagsugod siya pag-ugmad og amateur boxers niadtong 1985 nga naglakip nila ni kanhi two-time world boxing champion Gerry Penalosa, one-time world title challenger Andy Tabanas ug two-time world challenger Edito Villamor.

Apan human sa mabungahon ug malampuson nga boxing promotion sulod sa 35 ka mga tuig, ang ALA Boxing Gym nasira niadtong Agusto, 2020 tungod sa pagkuyanap sa coronavirus. (ESL)

This posting includes an audio/video/photo media file: Download Now

Weightlifting posibleng iapil na sa Palaro

Posted: 19 Aug 2021 02:38 AM PDT

Naghinamhinam si Olympic champion Hidilyn Diaz human niya masayri nga gikonsiderar karon sa Department of Education (DepEd) nga ilakip ang weightlifting sa Palarong Pambansa.

Si Diaz, kinsa maoy nagtunol sa labing unang Olympic gold medal sa Pilipinas sa iyang pagkampanya sa miaging Tokyo Games, dugay nang nanghinaot nga maapil ang weightlifting sa Palarong Pambansa tungod kay dako kini'g ikatabang sa paglambo sa paugnat sa kusog nga iyang gikahiligan.

Ang presidente sa Samahang Weightlifting ng Pilipinas (SWP) nga si Monico Punetevella miasoy nga nipasa na siya og proposal ngadto sa DepEd aron ipasabot nganong angayang ilakip ang weightlifting sa multi-sport event.

"Now that we have won a gold, I would like to reiterate my appeal, 'yung appeal ko kay (Education) Secretary (Leonor) Briones," asoy ni Puentevella nga napatik sa www.abs-cbnnews.com.

Si DepEd Undersecretary Revsee Escobedo miingn nga nagsabot na og sugod ang Palarong Pambansa Secretariat ug SWP kabahin niini.

"Siyempre, sobrang saya," asoy ni Diaz. "We have to think long-term. (ESL)

This posting includes an audio/video/photo media file: Download Now

Pacquiao ihatod sa pagretiro

Posted: 19 Aug 2021 02:30 AM PDT

Gipabuhagay ni World Boxing Association (WBA) welterweight champion Yordenis Ugas sa Cuba nga sa iyang pagdawat sa kalit nga tanyag nga harungon si Manny Pacquiao, usa ka misyon ang nipilit sa iyang alimpatakan – paretiruhon ang Filipino boxing icon.

Posible kining mahitabo kon malupig ni Ugas ang Pambansang Kamao ng Pilipinas sa ilang away karong Agusto 22, 2021 (RP time) sa T-Mobile Arena sa Las Vegas, USA, hilabi na kon brutal nga kadaugan ang iyang marehistro.

"I'm here to wreck any future plans Manny Pacquiao has in the ring and make sure that Saturday (Dominggo sa Pilipinas) is his last fight," matod ni Ugas sa katapusang press conference sa ilang away kagahapon, Agusto 19, 2021.

"It feels great to be in the main event Saturday night against a true legend like Pacquiao. I can't wait to get in the ring on Saturday night."

Nakuha ni Ugas ang oportunidad sa pagpakigharong sa 8-division world champion human miatras ang orihinal nga kontra niining si American Errol Spence Jr. gumikan kay nakasinati kini og angol sa iyang mata atol sa training sa miaging semana.

Sa orihinal nga plano, si Ugas makigharong unta kang Fabian Maidana sa undercard sa Pacquiao-Spence fight apan wala kini nadayon tungod kay naangol sab si Maidana.

"I didn't hesitate at all when I got offered this fight. I knew right away what a big opportunity it would be and what a win like this can do for my career," dugang ni Ugas.

Gitataw ni Ugas nga mas nagmadasigon siya dihang nasayran niya nga si Pacquiao na ang iyang makontra.

Sa iyang bahin, gipasabot ni Pacquiao nga nagmadasigon sab siya ning awaya gumikan kay si Ugas ang nakapanag-iya sa WBA title nga gitangtang sa asosasyon gikan kaniya tungod kay wala siya nakaaway sulod sa duha ka mga tuig.

"I didn't like that someone took my belt without challenging me in the ring. Both of us are champions, but we'll see who has the belt after Saturday," asoy ni Pacquiao. (ESL)

This posting includes an audio/video/photo media file: Download Now

Pamilya sa mga pulis nga namatay sa Covid-19 makadawat og P100,000

Posted: 19 Aug 2021 01:53 AM PDT

POLICE Regional Office (PRO) Central Visayas mohatag og P100,000 nga hinabang sa mga pamilya sa upat ka mga pulis nga nakalas tungod sa Covid-19 diin ang labing uwahi nga pulis nga namatay ang kanhi hepe sa kapulisan sa Siyudad sa Talisay mao si Police Lieutenant Colonel Marlu Conag.

Sa talaan sa PRO-Central Visayas, moabot na sa walo ka mga pulis ang nakalas tungod sa Covid-19 diin upat gyud ang namatay sukad Hulyo 2021.

Tungod niini gipahibawo ni Police Brigadier General Ronnie Montejo, ang hepe sa PRO- Central Visayas, nga adunay hinabang nga ihatag ang PNP ngadto sa pamilya sa upat ka mga namatay nga pulis apan ang tulo lang una ang makadawat sa P100,000 sanglit gi proseso pa ang kang Conag.

"Aduna tay assistance nga gihatag sa naunang tulo kay katong upat last year man to nya kini karong nadugang tulo plus nadugangan pag usa nga usa ka opisyal pa gyud nga maayo ug buotan nga kugihan nga offical, tagaan nato silag financial assistance ang ilang pamilya nga tagn 100 thousand," matud ni Montejo.

Si Conag kasamtangan nga nadestino sa Regional Personnel Holding Admin Unit-Central Visayas samtang nag schooling kini nga maoy gimandato sa PNP.

Sa listahan sa PRO-Central Visayas, sa kasamtangan aduna pa silay 163 ang aktibong kaso sa Covid-19 human sila madugangi ug upat pagka Agosto 19, 2021 ug lima niini ang anaa sa tambalanan nga nakasinati og simtomas samtang adunay 16 ang naka-recover sa sakit.

"Upat ang dia sa listahan nako nya naay mga new recoveries nga 16, nya ang atong active cases karon nga naka butang diri 163 nalang," dugang ni Montejo.

Midugang si Montejo nga bisan sa ilang pag amping aduna pa gihapoy mga pulis nga maigo sa virus.

Gani ang matag police station adunay mga personnel gikan sa Regional Health Service-Central Visayas aron mamonitor ang panglawas sa mga personnel.

Samtang, 22 usab ka mga persons under police custody (PUPC) sa Cebu City Police Office ang nag positibo sa Covid-19 diin kadaghanan kanila mga babaye.

Matod ni Police Lieutenant Colonel Jannete Rafter, ang hepe sa operation branch, nga migawas ang resulta sa ilang RT-PCR test niadtong Agosto 18, 2021 human usa sa ilang mga kaubang PUPC ang mipakita og sintomas sa Covid-19.

Giingong adunay usa ang gidala sa tambalanan tungod kay naglisud kini og ginhawa. (AYB)

This posting includes an audio/video/photo media file: Download Now

Ugas, 100% sure di siya ma-TKO ni Pacquiao

Posted: 19 Aug 2021 12:01 AM PDT

SA USA ka talagsaong hitabo, mihisgot si Filipino boxing icon Manny Pacquiao og knockout nga kadaugan kabahin sa iyang pag-challenge kang World Boxing Association (WBA) welterweight champion Yordenis Ugas sa Cuba karong Agusto 22, 2021 (RP time) sa T-Mobile Arena sa Las Vegas, USA.

"If there's a chance for a knockout, then I'll go for it because that's what I want to give to the fans," batbat ni Pacquiao sa katapusang press conference sa ilang away kagahapon.

Apan gipaneguro ni Ugas nga dili siya ma-knockout sa Pambansang Kamao ng Pilipinas.

"I'm a hundred percent certain he cannot knock me out," matod ni Ugas pinaagi sa translator.

"I've done all the work over the past six years, I'm really hitting my stride. I don't think Manny Pacquiao can knock me out."

Ang respetadong trainer ni Ugas nga si Ismael Salas mipabuhagay nga dili angay i-understimate kanhi amateur star.

"The most important thing is the level of Ugas," matod ni Salas. "Yordenis Ugas is one guy coming from the Olympics with more than 500 amateur and professional fights."

Gipasabot ni Salas nga dugay na nga nakarehistro og knockout nga kadaugan si Pacquiao nga nagpamatuod lang nga sa 147 lbs. nga timbang, minus ang punching power sa 8-division world champion.

"It's been a long time that he hasn't knocked out anyone. He's been dropping people but he hasn't had a knockout for a long time," nagkanayon si Salas. (JBM)

This posting includes an audio/video/photo media file: Download Now

ABAP mapasalamaton sa dakong tabang ni ALA

Posted: 18 Aug 2021 10:53 PM PDT

TALIWALA sa malampuson nga kampanya sa nasud sa bag-o lang natapos nga 2020 Tokyo Olympics, mapasalamaton ang Association of Boxing Alliances of the Philippines (ABAP) ngadto sa giilang Cebu boxing patron nga si Antonio L. Aldeguer ko Ala.

Sa interview sa Superbalita/Radio 1 Cebu sa niaging semana, ang secretary-general sa ABAP nga si Ed Picson mibutyag nga ang Ala Boxing Gym maoy usa sa nahimong dapit sa ilang training camp isip preparasyon sa Olympics.

"I would like to reiterate my sincerist, and deepest thanks to our friend in Cebu bisag retired na siya, Mr. Tony Aldeguer has always helped ABAP in a very, very valuable way," matod ni Picson kinsa lumad nga taga Tacloban, Leyte apan mga kaliwat usab og mga Solon sa Cebu.

"Gipagamit niya ang iyahang boxing gym, it was open anytime that we would bring our national team to Cebu he accomodated our boxers and coaches with open arms."

Gawas sa pasilidad nga libring gipagamit ni Aldeguer alang sa Philippine team, kinasingkasing nga gihangop usab ni Picson ang tambag ni ALA ngadto kaniya ug sa tibuok team.

"And more than that ang iyang mga tambag ug advise niya diri nako - mga gems of wisdom gikan kaniya. I valued them and as matter of fact I called him before the fight of Carlo (Paalam) to let him know that it was always in my mind and in my heart and tanan tanan niyang mga gihatag mga advise. And it's part of what we have achieved this year in Tokyo. Dako kaayog pasalamat kang Mr. Aldeguer ang ABAP," dugang ni Picson.

Si Aldeguer nakakulit og pangalan sa boxing sa dihang nagsugod siya pag-ugmad og mga amateur boxers niadtong 1985 nga naglakip nila ni kanhi two-time world boxing champion Gerry Penalosa, one-time world title challenger Andy Tabanas ug two-time world challenger Edito Villamor.

Apan human sa mabungahon ug malampuson nga boxing promotion sulod sa 35 ka tuig, ang Ala Boxing Gym nasira niadtong Agusto 2020 tungod sa pandemya.

Daghan ang nangandoy ug nag-ampo nga mahibalik unta si Aldeguer sa boxing, apan gibutyag ni Picson sigon sa iyang pagpakighinabi niini, nga sa edad wala nay laraw nga mobalik pa sa boxing.

"Matod pa ni Mr. Aldeguer nako nga there comes a time nga kinahanglan na gyud moundang. And the time has come for him to hang up his gloves. Ingon siya nga naa may mga batan-on nga puwede mopuli niya. He's turning 80 on October, so wish him a good health and a long life, and again our deepest appreciation for his passion, his spirit and his wisdom he shared with ABAP all these years," saysay ni Picson. (JBM)

This posting includes an audio/video/photo media file: Download Now

Lalake mikatkat sa poste, nakuryentihan, patay

Posted: 18 Aug 2021 08:29 PM PDT

Namatay diha-diha ang usa ka tawo nga nakuryentihan dihang nikatkat sa poste sa Huwebes sa alas 9:30 sa buntag, Agusto 19, 2021 sa Barangay Tulay, Minglanilla.

Ang biktima giila sa kapulisan nga si Jorlie Lecciones, taga Barangay Tambongon, San Remigio, amihahang Sugbo.

Matod ni Police Staff Sergeant Ernest Laspuña sa Minglanilla Police Station nga si Lecciones niabot sa dapit.

Nakit-an siya sa mga tawo nga nikalit pagsaka sa poste, apan nasabod sa live wire ug nakuryentihan dayon natagak.

Nasayran sa kapulisan naguol si Lecciones tungod sa problema sa panimalay. (GPL)

This posting includes an audio/video/photo media file: Download Now

Tour guide may kasong rape, nasikop

Posted: 18 Aug 2021 07:06 PM PDT

Gidakop sa kapulisan sa Miyerkules sa ala 1 sa hapon, Agusto 18, 2021, ang usa ka tour guide nga nag-atubang og kasong rape tungod sa giingong paglugos sa usa ka 8 anyos nga babaye.

Ang suspek giila nga si Zando Betanguil Doremon, 18, taga sityo Tap-anan, Barangay Basdiot, Moalboal Sugbo.

Ang Anti-Kidnapping Group Visayas Field Unit (AKG-VFU) sa Philippine National Police, pinangulohan ni Lt. Zosimo C. Ravanes Jr. ,maoy nisikop kang Doremon pinasikad sa warrant of arrest nga giluwatan ni Judge Anabelle Morana Robles sa Regional Trial Court Branch 96 sa Barili pinetsahan og Agusto 12, 2021.

Way piyansa nga girekomendar ang hukmanan.

Si Doremon gitanggong na sa Moalboal Police Station samtang wa pa mapresentar ngadto sa hukmanan. (GPL)

This posting includes an audio/video/photo media file: Download Now

Babayeng enforcer sa nag trending nga video gisuspenso 15 ka adlaw

Posted: 18 Aug 2021 07:00 PM PDT

Gisuspenso sa mayor sa lungsod sa Consolacion og 15 ka adlaw nga way sweldo ang babayeng traffic enforcer nga naa sa nag-viral nga video nga nakig-away sa usa ka Grab driver kalabot sa trapiko.

Si Feliculo Leciones, pangu sa Consolacion Traffic Enforcement Service nga nahinabi sa Superbalita Cebu sa Huwebes, Agusto 19, 2021, niingon nga si Mayor Joannes Pepito Alegado nisuspenso og 15 ka adlaw sugod sa Agusto 19, 2021 kang Maricris Vallejos, 40.

Si Leciones niingon nga dunay "lapses" si Vallejos sa iyang gibuhat, apan igo ra usab kining nagpatuman sa balaud sa trapiko.

Matod niya nga bisan bug-at ang 15 ka adlaw nga pagsuspenso, apan gikinahanglan kining ipahamtang aron makita sa publiko nga way gilabi sa balaud ang lokal nga kagamhanan.

Apan matod ni Leciones nga di angay nga hukman dayon si Vallejos kay kadto pa lang nahitabo nga duna kini gikalalis ug nag-init ang ulo.

"Di sab unta dayon mo judge tang tawo. Wa ta kahibawo unsay problema sa ilaha mao na ingon siya ato," matod ni Leciones.

Gawas sa pagsuspenso kang Vallejos, hayan pamultahon pa siya sa mayor human makita ni Alegado nga gipaubos sa enforcer ang iyang facemask atol sa panaglalis.

Matod ni Leciones nga isip usa ka doktor, si Alegado estrikto kaayo sa pagpatuman sa mga health protocol, apil na ang kanunay nga pagsul-ob og facemask.

Dihang gipangutana sa Superbalita Cebu kon pila ang multa, matod ni Leciones nga di mominos og P1,000.

Nanghinaut usab siya nga magpinasayloay sila si Vallejos ug Marcelino Sabucido, 23, aron di na modako pa og maayo ang problema "kay hasol kaayo nang kaso kaso."

Sila si Vallejos ug Sabucido nagkalalis human giingong wa mopatuo sa pagpahunong sa mga sakyanan aron makatabok ang mga pedestrian sa atubangan sa SM Consolacion sa J. P. Rizal St., Barangay Lamac niadtong Martes, Agusto 17, 2021.

Sa video, namasangil si Sabucido nga gidapatan siya ni Vallejos nga gihimakak usab sa enforcer.

Sa pagsuwat ning taho, sila si Vallejos ug Sabucido nag-atubang sa Consolacion police station.

Gikatakdang mopiyansa si Sabucido sa kasong disobedience to a person in authority.

Samtang nihangyo usab si Leciones sa mga motorista sa pagtuman sa balaud sa trapiko kay tulo na ka mga babayeng traffic enforcer sa Consolacion ang nangaangol ning tuiga lang kay gituyo sa pag-igo sa mga motorista. (REV)

This posting includes an audio/video/photo media file: Download Now

Tambagi ko Noy Kulas: Suko ang parents

Posted: 18 Aug 2021 07:01 AM PDT

Dear Noy kulas,

Maayong hapon. Tawga lang ko sa ngan nga Marco, 25, taga Cebu City. Akong problema karon, Noy, sa akong uyab, Naa koy uyab nga lalake. Karon, Noy, walay adlaw nga dili mi mag lalis kay dudahan nako siya nga naay lain kay nasakpan nako siya nga nagkita sila sa iya ex ug dunay nahitabo nila.

Karon, maglalis mi ug maabot dayon sa buwag unya mag-uli ra sad dayon. Wala ko kahibawo og unsa ni amoang relasyon bisan mag 8 months na mi. Karon, ako na siya gipaila ila sa akong friends ug nasakpan na ko sa akong pamilya nga naa koy uyab nga lalake ug wa sila mosugot.

Karon nga nagka decide na mi nga buwag, nasakitan na ko kay na fall nako niya pag ayo. Noy, tambagi ko unsay buhaton naku para makalimtan na naku siya. Basin maabot na sad sa point nga maluoy ko niya ug mag-uyab na pud mig balik.

Salamat, more power and God bless.

MARCO

Marc,

Ang panagbuwag sa manag-uyab sakit man gyud na. Wa may di sakit kon mahilayo mo sa imong gimahal. Sakit man gani ang mag-away lang, unsa na kaha kon magkalagyoay.

Ang ka sakit sa buwag, sama sa samad, sakit kaayo sa sinugdan. Apan sama sab sa samad, mahanaw ra kini apan magbilin og uwat sa imong kaugalingon. Lisod ang paglikay sa pagsugod kay you crave.

Apan ang pagputol sa communication pinaagi sa pag block sa Messenger ug pag unfriend sa FB ug paghimo sa imong kaugalingon nga busy dako kaayo og ikatabang sa imong recovery.

NOY KULAS

rojval69@yahoo.com

This posting includes an audio/video/photo media file: Download Now

Barrita: COA, criminal negligence

Posted: 18 Aug 2021 06:50 AM PDT

ANG Commission on Audit (COA) usa sa tulo ka mga independente nga constitutional commissions ubos sa Article IX sa 1987 Constitution, uban sa Civil Service Commission (CSC) ug Commission on Elections (Comelec). Kay independente man, di sila ubos sa executive, legislative ug judicial branches sa gobyerno.

Gihatag sa Konstitusyon ngadto sa COA ang gahom, awtoridad ug katungdanan sa pag-examine, pag-audit, ug pag-settle sa tanang accounts sa tanang salapi nga madawat, mga resibo ug paggasto sa pundo ug paggamit sa mga kabtangan sa tanang mga ahensiya sa gobyerno.

Niining bag-o, naukay ang katawhan sa 2020 audit report sa COA nga nagyagyag sa mga deficiencies, sa mga pagkuwang sa Department of Health (DOH), sa paggamit sa P67.32 ka bilyon nga pundo alang sa Covid-19 pandemic. Nakuykuyan pa sa COA ang P11.89 ka bilyon nga wa magasto sa DOH sa 2020.

Matod pa sa editorial sa Philippine Daily Inquirer, "The news was like a fresh lash on an already prone, much-flogged country." Ang maong balita sama sa lab-as nga labhag sa nasod nga naigo sa daghang latos sa latigo ug nahapla na. Gitawag sa COA ang mga sayop sa DOH nga "missed opportunities.''

Apan ang Makabayan bloc sa mga magbabalaod miingon nga ang gibuhat sa DOH mao ang "grave inefficiency, gross incompetence, and criminal negligence." Gipasaka nila ang House Resolution No. 2129 nga nag-awhag sa House committees on public accounts ug good government and public accountability sa pag-imbestigar sa DOH.

"The inefficiency, delay and the incompetence in the delivery of the much-needed services to the public already amount to criminal negligence as thousands of Filipinos already died and are dying of getting infected of the viral disease," matod pa sa resolusyon.

Unsa man kining criminal negligence? Mao kini ang reckless imprudence nga gisilotan ubos sa Revised Penal Code (RPC). Ang Article 365, RPC (as amended by Republic Act No. 1790), nag-define sa reckless imprudence.

Nagkanayon kini, "Reckless imprudence consists in voluntarily, but without malice, doing or failing to do an act from which material damage results by reason of inexcusable lack of precaution on the part of the person performing or failing to perform such act, taking into consideration his employment or occupation, degree of intelligence, physical condition and other circumstances regarding persons, time and place."

Mao kini ang boluntaryo nga pagbuhat apan sa way malisya, ingon man sa wala pagbuhat sa angay buhaton nga niresulta sa kadaot sa laing tawo tungod sa kakuwang sa panagana ug pag-amping.

Sagad natong masugatan nga mga kaso sa reckless imprudence mao ang mahitungod sa mga aksidente sa kadalanan sama sa reckless imprudence resulting in homicide, physical injuries o damage to property. (edbarrita@gmail.com)

This posting includes an audio/video/photo media file: Download Now

Nalzaro: Karaan na diay ning Covid?

Posted: 18 Aug 2021 06:50 AM PDT

KON kaniadto kining ubo, sip-on, sakit sa tutunlan (sore throat) ug paghatsing ordinaryo lamang nga balatian, karon sintomas na kini sa Covid-19. Posible pa nga ang makamatay nga Delta variant ang mitakboy kanimo. Kini matod pa sa usa ka expert nga si Dr. Joseph Kanter, Louisiana state health officer sa Estados Unidos. Matod pa ni Kanter nga ang mga simtomas sa Delta variant nga maoy mihamok karon sa tibuok kalibutan sayon ra nga sama sa ordinaryong ubo, sip-on, inubanan sa hilanat ug"unsual sneezing" o pagpangatsi.

Hinuon, kasagaran sa mga nakasinati niining maong balatian asymptomatic nga morag ordinaryo lang ug allergies. Usahay makalibog ang mga simtomas sa Delta variant ug sa ordinaryo nga mga balatian. Apan kasagaran sa mga nakasinati niining maong mga sintomas nagpositibo sa Delta variant, matod pa ni Kanter. If you have any symptoms, no matter how mild, even if it is sore throat, even if it is runny nose, even if it is sinus congestion, go get yourself tested and limit your contact with other people until you do so,' matod pa ni Kanter.

Ang sunod-sunod nga pagpangatsing simtomas na usab kini sa Delta variant, midugang si Kanter. Busa kon atong buot sabton, kaniadto pa diay ning Covid kay karaan naman ning maong mga balatian? "Our data shows that people who had been vaccinated and then tested positive for Covid-19 were more likely to report sneezing as a symptom compared with those without being vaccinated," matod pa sa mga researchers. Ang mga researchers mibutyag usab nga Pfizer ug Moderna vaccines 95 percent effective batok sa Covid-19 samtang ang Johnson and Johnson adunay 66 per cent efficacy rate. Kining maong mga bakuna hinimo sa America. Samtang ang KN95 o N95 mask mao usay epektibo nga makadepensa batok sa virus.

Samtang kasagaran sa mga naigo sa Delta variant sa Amerika mga bata. Nasuta sa mga expert nga kasagaran sa mga natakbuyan wala mabakunahi nga mga population. Mao nang miawhag ang mga health expert nga bisan kon nabakunahan na dili gihapon angay mokompiyansa kay maigo gihapon sa Covid. Way kumo sa magmatngon ug maglikay. (bobbygnalzaro@gmail.com)

This posting includes an audio/video/photo media file: Download Now

Editoryal: Buhat sa COA

Posted: 18 Aug 2021 06:50 AM PDT

ANG Commission on Audit (COA) usa ka sanga sa kagamhanan nga nagtan-aw kon giunsa sa mga ahensya sa kagamhanan paggasto ang pundo nga gikan sa buhis sa katawhan ug mga negusyo. Sila ang magbantay kon nahasubay ba sa balaud ang paggasto sa pundo, naa bay mga dokumento.

Sa laktod nga pagkasulti, ang COA maoy gwardya sa kaban sa kagamhanan.

Alang usab sa transparency, ilang ipublikar kon unsa may ilang nakaplagan ug sultihan ang mga ahensya kon duna silay nakit-ang sayop ug kakuwangan. Sulod na sa daghang katuigan, gipublikar na sa COA ang ilang findings kun nakaplagan.

Gani, duna nay public officials nga napasakaan og kaso base sa findings sa ahensya. Tinuod, di sila makakiha, apan ang ilang findings mamahimong basehanan.

Pinaagi sa ilang pagpublikar, magmatngon ang public officials sa pagkupot ug paggasto sa pundo kay mabuko man sila kon magbinuang. Masayran sa publiko ang tanan.

Apan nangasaba si Presidente Rodrigo Duterte sa COA human gipublikar ang mga kakuwangan sa mga dokumento sa mga nagastong pundo sa Department of Health (DOH). Kay kuno nauwawan na ang mga opisyal sa DOH kay maorag nabutang nga sila nangurakot bisan kon kuwang lang sa mga dokumento.

Basin nalimot ang Presidente nga mas grabe tong pagpahibawo niya sa publiko sa mga tawo nga naa sa drug matrix nga way igong basehanan kay way mga ebidensya nga magamit unta sa pagpasaka og kaso. Kutob ra gyud to sa pagpakauwaw.

Wa usab tingali makaamgo ang Presidente nga constitutional kini nga mandato sa COA sud na sa daghang mga dekada. Apil kini sa ilang tahas. Iya ba usab kahang nahuna-huna nga pinaagi sa gibuhat sa COA, natabangan siya sa iyang gipasiatab nga hugot nga kampanya sa kurapsyon

.

Iya na lang unta pasagdan ang COA sa pagbuhat sa ilang tahas. Iya sa DOH ang pagmatuod nga wa sila nangurakot.

This posting includes an audio/video/photo media file: Download Now

Punerarya dunay nalapas?

Posted: 18 Aug 2021 06:45 AM PDT

ANG City Legal Office pinangulohan ni Atty. Rey Gealon nitigom sa tulo ka mga abogado aron paglusad og imbestigasyon sa posibleng mga kalapasan sa St. Bernard Funeral Homes, nga nasakpan nga nihimo sa ilang hayaanan isip morgue, diin adunay gitapok nga 16 ka minatay niadtong Agosto 17, 2021.

Kini human nimando si Acting Mayor Michael Rama ngadto kang Gealon sa paghimo og imbestigasyon aron masayran ang tinuoray nga hitabo may labot sa video nga nag-viral sa social media.

Ang mga patay giingong gibutang sa abandonadong building sa Barangay Basak San Nicolas nga nahimutang daplin ra sa karsada.

Matod ni Gealon nga base sa inisyal nga ebidensya subay sa nag-viral nga video gikan ni Konsehal Dave Tumulak, kinsa nisusi sa ilang edepisyo, nakalapas kini sa Section 93 sa Sanitation Code of the Philippines may labot sa ilang pagdumala sa mga cadaver.

Si Gealon, kinsa nimando sa City Health Department, Business Permit and Licensing Office , Office of the Building Official ug ubang buhatan para mosusi sa funeral parlor, wa pa makaduso sa ilang findings. (PAC)

This posting includes an audio/video/photo media file: Download Now

1 entrance, 1 exit sa Carbon irekomendar pagbalik

Posted: 18 Aug 2021 06:45 AM PDT

KAPULISAN sa Siyudad sa Sugbo mosugyot sa kadagkoan sa Carbon Public Market nga subling ipatuman ang one entrance, one exit policy human masinati ang pagdasok sa daghang mga tawo panahon sa kahapunon.

Nagtagbo sa Agosto 18, 2021 ang kadagkoan sa Carbon Public Market ug hepe sa Station 5 sa Cebu City Police Office human mabantayi nga midagsa ang daghang mga tawo sa merkado sa milabay nga mga adlaw panahon sa kahaponon nga peligro na nga magtinakdanay sa Covid-19.

Matod ni Police Lieutenant Colonel Wilbert Parilla, deputy city director for operations sa Cebu City Police Office, nga matag alas 4 hangtod sa alas 7 sa gabii nga maoy ting abli sa mga manindahay sa mga utanon, modagsa ang daghang mga tawo nga mamalit.

Dugang ni Parilla nga usa sa ilang isugyot unya sa market administrator ang one exit one entrance policy nga una nilang gihimo niadtong Semana Santa. (AYB)

This posting includes an audio/video/photo media file: Download Now

Grab driver ‘gihapak’ sa enforcer

Posted: 18 Aug 2021 06:45 AM PDT

NAPRISO ang usa ka Grab driver nga nakiglalis sa traffic enforcer sa Lungsod sa Consolacion niadtong Martes, Agusto 17, 2021 kay wa mohunong dihang nagpalabang sa mga pedestrian atubangan sa SM Consolacion sa JP Rizal St., Barangay Lamac, Consolacion.

Ang driver giingong nisukol sa babayeng enforcer dihang gipahunong apan nisuway sa pagpabulhot, diin ang hitabo nisangko sa ilang init nga panaglalis.

Ang gipriso sa Consolacion police station tungod sa disobedience mao si Marcelino Sabucido, 23, taga Upper Tabok, Dakbayan sa Mandaue samtang ang enforcer mao si Maricris Vallejos, 40, taga Barangay Poblacion Oriental, Consolacion, amihanang Sugbo.

Si Sabucido mao ang driver sa nag-viral nga video diin iyang gikalalis ang babayeng enforcer nga mao si Vallejos.

Sa video ni Sabucido, madungog siya nga nipasangil kang Vallejos nga "nanapat" kaniya ug gihagad usab siya og sukmagay.

Matod sa inisyal nga imbestigasyon sa Consolacion Police Station nga sa wa pa ang hitabo, gipahunong ni Vallejos ang mga sakyanan aron makalabang ang mga pedestrian.

Nilighot og padagan si Sabucido, apan napugngan.

Ang mga kauban ni Vallejos nga enforcer nanawag sa Consolacion Police Station aron ipahibawo ang nahitabo.

Girespondehan dayon kini nila nga miresulta sa pagkasikop ni Sabucido.

Sa pakighinabi sa Superbalita Cebu ni Sabucido, siya niangkon nga aduna siyay sayop tungod kay nipadagan na siya bisan wala pa nahuman og sinyas si Vallejos.

Apan depensa niya nga nakalabang na ang tanang pedestrian sa pagpadagan niya.

Matod niya nga nagmagahi siya paghatag sa iyang lisensya tungod kay nainit siya sa gibuhat ni Vallejos nga gihapak ang iyang bukton pagsita.

Sigon niya nga nadala siya sa kainit sa iyang ulo labi na nga ala 1 pa siya sa kaadlawn nagbiyahe hangtod na lang hapon niadtong adlawa.

Wa siya niuli aron dako siya og mauli nga kwarta alang sa iyang duha ka anak.

Matod ni Sabucido nga nangayo na siya og pasaylo kang Vallejos.

Apan, sa laing pakighinabi, niingon si Vallejos nga ipadayon niya ang pagpasaka og kaso nga "disobedience of a person in authority" tungod kay alang kaniya ang gibuhat ni Sabucido nga pag-video niya nakadaot sa iyang pamilya.

Depensa sab ni Vallejos sa alegasyon nga gihapak niya si Sabucido, sigon niya nga wa niya tuyua nga naigo niya ang bukton sa driver.

Wa usab niya gilamparo si Sabucido, buot lang niya nga iwakli ang cell phone nga nag-video.

This posting includes an audio/video/photo media file: Download Now

at

No comments:

Post a Comment

Subscribe to: Post Comments (Atom)

End of Summer Sale ☀️😎

20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...