Thursday, September 2, 2021

https://www.sunstar.com.ph/

https://www.sunstar.com.ph/

Dyip mosuway’g ligis sa Kings

Posted: 02 Sep 2021 03:03 AM PDT

HUMAN nila gipakaging ang usa sa labing inilog nga San Miguel Beermen sa labing ulahi nilang duwa, ang Terrafirma Dyip mosuway na sab pagligis og laing lig-ong puwersa sa ikaduhang duwa karong hapon sa Philippine Basketball Association (PBA) 2021 Philippine Cup sa Bacolor, Pampanga.

Ang Dyip, nga ningpakaging sa multi-titled San Miguel Beermen pinaagi sa overtime, 110-104, niadtong Miyerkules, Septiyembre 1, 2021, makigbatok sa defending champion Brgy. Ginebra Gin Kings sugod karong alas 3:00 sa hapon.

Ang Dyip, nga naggunit og 1-4 nga rekord, seguradong nakahakot og abundang pagsalig sa kaugalingon human sa ilang kadaugan batok sa Beermen ug mao kini ang gipangandaman sa Gin Kings, nga adunay 2-2 nga rekord.

"Needless to say, we'd like a little more time to get in tip-top shape but that's what it is," batbat ni Cone nga napatik sa www.pba.ph.

"SMB's loss to Terrafirma was a big cautionary tale for our guys. You just can't take any PBA team for granted. Despite what it looks on paper, any PBA team can beat any PBA team."

Nagkanayon si Terrafirma coach Johnedel Cardel, nga kanunay niyang gitanom sa alimpatak sa iyang mga batos nga kinahanglang mosalig sa ilang kapabilidad.

"Sinasabi ko sa kanila, this is basketball, kung titignan natin yung kalaban, malakas, walang mangyayari sa atin. As long as we're ready to play as a team and ready to play to win, may mangyayari," asoy ni Cardel.

Nanghinaot si Cardel nga magpadayon ang ilang maayong gipakitang duwa hangtod nga hingpit silang makabangon gikan sa kasamtangan nilang sitwasyon.

Sa premirong duwa, magsangka ang Magnolia Ang Pambansang Manok Hotshots (4-1) ug Blackwater Elite (0-5) sa alas 12:30 sa udto.

Samtang sa main, mag-abot ang mga lider nga Talk N' Text Katropa (4-0) ug Meralco Bolts (5-1) karong alas 6:00 sa gabii. (ESL)

This posting includes an audio/video/photo media file: Download Now

Magsayo, 'Hilaw' pa?

Posted: 02 Sep 2021 03:03 AM PDT

BISAN pa man sa makapaukyab nga kadaugan ni Filipino featherweight Mark Magsayo sa labing ulahi niyang away, dili pa gihapon siya hatagan og world title fight sa nagdumala kaniya nga mao ang MP Promotions.

Si MP president Sean Gibbons, sa interview ni Quinito Henson, mibutyag nga ila unang paawayon ang Boholano fighter og tune-up fight sa dili pa ang world title bout niini.

Apan kon buhian ni World Boxing Council (WBC) featherweight champion Gary Russel ang iyang titulo aron mosaka og timbang, si Magsayo iparang sa no. 1 contender nga si Rey Vargas alang sa mabakante'ng korona.

Ang 30-anyos nga si Vargas, kinsa adunay gitas-on nga 5'10" ug kanhi WBC super bantamweight champion, naggunit og impresidong rekord nga 34-0,22KOs.

Samtang si Magsayo, 26, may gitas-on nga 5'6", wa pa sab nakatilaw og pilde sa 23 ka mga away nga gibuwakan og 16 ka knockouts.

Sa labing ilahi niyang away niadtong Agusto 21, 2021 sa undercard sa Pacquiao-Ugas fight card sa Las Vegas, si Magsayo mirehistro og 10th round knockout nga kadaugan batok kang Mexican Julio Ceja.

Apan niagi una'g malisod ug makutas nga dalan si Magsayo sa wala pa kini niya nahimo.

Sa first round, iya man tuod nga natumba si Ceja apan sa sunod nga mga hugna, nagkapungasi siya pagpanagang sa nag-aso-aso nga mga kinumo ni Ceja.

Sa ikalimang round, maayong pagkasabak sa bodega ni Magsayo ug dinhi napaluhod siya nga nagpanglipong.

Padayon ang dominasyon sa Mexican fighter ug way puas ang pagsigi og ataki niini nga maoy nakapaluya ni Magsayo. Apan sa 10th round, daw og sa naulian ang kanhi pambato a nasira nga Ala Boxing Gym ug ang usa ka right straight ga solidong miigo sa apapangig ni Ceja nga gisundan og right cross maoy nagpalukapa sa Mexican fighter.

Milanat pa og pipila ka mga minutos una nakabangon si Ceja samtang nag-ambak-ambak sa kalipay si Magsayo uban ni Gibbons ibabaw sa ring.

Sa pagsusi sa scored card sa tulo ka mga judges, naglabaw unta si Ceja ug gituohan nga kon niabot pa og 12 ka mga hugna ang maong away, hayan posible untang modaog si Ceja pinaagi sa desisyon.

Sa kadaugan, si Magsayo maoy misakmit sa bakanteng WBO International title ug gituohang mosaka pa ang iyang world ratings sa nagkadaiyang boxing bodies. (JBM)

This posting includes an audio/video/photo media file: Download Now

Real estate agent miduaw sa CCPO; hayan ma saksi sa Fernandez killing

Posted: 01 Sep 2021 11:21 PM PDT

GIKAN sa pagka person of interest, hayan himuon nang saksi ang babayeng real estate agent nga pasahero ni manlalaban Rex Fernandez dihang siya gipatay niadtong Agusto 26, 2021 sa Banawa, Barangay Guadalupe, Dakbayan sa Sugbo.

Si Rosinda Acot nibisita na sa Cebu City Police Office (CCPO) sa Miyerkules sa hapon, Septiyembre 1, 2021 dala ang mga dokumento ug cell phone ni Fernandez nga iyang gikuha gikan sa awto human pusila patay sa usa ka wa mailhing mamumuno ang human rights lawyer.

Si Lieutenant Colonel Wilbert Parilla, pangu sa operations sa CCPO, niingon nga si Acot nipasabot nga iyang gikuha ang mga dokumento aron mapreserbar, apil na ang cell phone.

Tungod niini, ang Special Investigation Task Group (SITG) motuki sa Biyernes, Septiyembre 3, 2021, sa posibilidad sa paghimo kang Acot nga state witness.

Gitakdang moluway og pinanumpaang pamahayag si Acot sa Huwebes sa hapon kalabot sa kon diin gikan sila si Fernandez ug asa unta mopadung. (AYB)

This posting includes an audio/video/photo media file: Download Now

Sikat nga boksidor nga si Albert Pagara gisikop, pasakaa'g kasong panglugos

Posted: 01 Sep 2021 09:51 PM PDT

SIKAT nga boksidor sa Sugbo ang mag-atubang og malisod nga tahas dili ibabaw sa ring kon dili sa korte sa hustisya.

Kini human nga usa ka 14-anyos nga babaye ang mireklamo nga gimolestiya sa inilang boksidor nianang alas 4 sa hapon sa Septiyembre 1, 2021, adlawng Miyerkules.

Base sa natala sa blotter sa Pardo Police Station, ang gireklamo giila nga si Albert Gerogalim Pagara, 27 anyos, nga adunay address nga Poblacion, Maasin, Leyte ug usa ka professional boxer.

Si Pagara temporaryong nanimuyo sa Sitio Terra Dulce, Barangay Inayawan, dakbayan sa Sugbo uban sa iyang live-in partner diin nahitabo ang pagmolestiya.

Sa iyang reklamo, gisaysay sa reklamante nga samtang siya natulog, mao na lay iyang namat-an ang gibuhat sa suspek ngadto kaniya samtang siya nahinanok.

Ang biktima gikuyogan sa iyang inahan sa pagpa-blotter sa maong hitabo.

Si Pagara gisikop pinaagi sa citizen's arrest nianang alas 7:30 sa gabii nga gi-abagan usab sa mga barangay tanod sa Inayawan nga sila si Danilo Girao, Danilo Abangan, Nelson Tero ug Pablito Balinguit Jr.

Kasong pagpanglugos ang posibling atubangon sa suspetsado.

Si Pagara adunay record nga 33-1, 22 knockouts isip professional boxer.

Katapusan siyang nakaaway niadtong Disyembre 18, 2020 diin iyang gipildi si Virgil Puton pinaagi sa unanimous decision sa IPI Compound sa Mandaue City.

Ang kanhi pambato sa nasira nga Ala Boxing Gym ubos na karon sa pagdumala sa usa ka dakong international boxing outfit nga mao ang MTK Global and D4G Promotions. (JBM)

This posting includes an audio/video/photo media file: Download Now

Tambagi ko Noy Kulas: Giilog

Posted: 01 Sep 2021 07:11 AM PDT

Dear Noy Kulas,

Please hide my identity. Tagua lang ko sa ngalang May. Ang akong problema same sa uban, lovelife.

Taguon lang nato siya sa name nga Ruel, akong classmate kaniadto sa college ug karon minyo na. While ako single pa bisan 32 years old na ko.

Suod kaayo mi since college days ug nagkauyab. Siya ang akong first boyfriend ug ga expect ko nga kami na gyud. But kalit lang nausab ang tanan human siya nakapamabdos og laing babaye nga iya lang nauyab og usa ka semana. Sila ang nagkaminyo kay gi threaten man siya sa family sa babaye nga dunay mahitabo niya kon di niya pakaslan.

Bisan sakit, ako ning gidawat pero nanghangyo si Ruel nga di mi magbuwag. For 3 years after sa ilang marriage nagsige pa mi but, niundang na si Ruel pagpakig-meet ug communicate nako kay nahadlok siya nga dunay mahitabo namong duha nga bad.

Noy, two years ago na ang last namong kita ug communication but until now sakit gihapon. Maka imagine ko sa among kiss, making love in bed nga passionate kaayo it's as if nahitabo ni yesterday lang. Unsaon kaha nako pag move on? Daghang salamat.

MAY

May,

Kon unsa kalawom ang samad, ingon ana sab kadugay ang pagkaalim. Lawom ang samad nga gibilin sa imong uyab kay dugay mong nagkarelasyon. Di dali ang pagpapas sa inyong malipayong mga adlaw, gisaw-an nga lawasnong kalipay nga alang nimo pagpakita sa gugma.

Apan huna-hunaa usab, siya ang nagmugna sa problema tungod sa iyang pagpaanod sa tentasyon. In short, nahitabo tungod sa iyang pagluib nimo. Kana maoy sigehag huna-huna.

NOY KULAS

rojval69@yahoo.com

This posting includes an audio/video/photo media file: Download Now

Barrita: Balaudnon sa proteksyon sa mga abogado

Posted: 01 Sep 2021 07:11 AM PDT

ADUNAY risgo sa kinabuhi ang matag propesyon, lakip na sa legal profession. Laing sakop sa legal profession ang gibanhigan ug napatay dinhi sa syudad sa Sugbo. Si manlalaban Rex Fernandez gibanhigan sa usa ka wa pa mailhing mamumuno samtang luwan sa iyang sakyanan sa hapon sa Agusto 26 didto sa Banawa, syudad sa Sugbo.

Si Fernandez naglingkod sa atubangang passenger seat. Nimenor ang dagan sa sakyanan sa paggawas sa Good Shepherd Road sa dihang miduol ang mamumuno ug mipusil sa makadaghan sa passenger side window. Pagkahuman, dali siyang misibat sakay sa usa ka motorsiklo nga gidrayban sa kauban.

Ikawalo si Fernandez sa mga abogado nga napatay dinhi sa Sugbo sukad sa Hulyo 1, 2016, sumala sa National Union of Peoples' Lawyers (NUPL). Sa samang gidugayon, 57 ka mga abogado, prosecutors ug huwes ang gipatay sa tibuok nasod.

Gipaimbestigar na sa Supreme Court (SC) committee on human rights ang pagpatay ni Fernandez. "The killing of any lawyer is of serious concern to all of us. Violence solves nothing. It is anathema to the rule of law," matod pa ni Associate Justice Marvic Leonen, chairman sa committee nga nagkutlo sa SC en banc.

Samtang si Deputy House Speaker Pablo John "PJ" Garcia (Cebu, third district), mipasaka niadtong Hulyo sa usa ka balaudnon alang sa proteksyon sa mga abogado, ang House Bill (HB) 9882, ang giproponer nga "Protecting the Practice of Law Act."

Si Kongresista Garcia, usa ka abogado ug bar topnotcher, niingon nga ang iyang balaudnon maghulma sa usa ka Council for the Protection of Lawyers nga maoy mopatuman sa tanang lakang sa gobyerno sa pagprotehir sa mga law practitioners samtang nagpadayon sila sa ilang mga katungdanan.

Gilatid sa maong balaudnon ang mga lagda ug responsibilidad sa Council, sa National Bureau of Investigation, sa Philippine National Police (PNP) ug sa Integrated Bar of the Philippines (IBP) bahin sa pagprotehir sa mga abogado.

Gipahamtangan niini og silot ang "unlawful interference in the practice of law or the direct or indirect vilifying, persecuting, coercing, threatening, or harassing of law practitioners" nga prision mayor (unom ka tuig ug usa ka adlaw ngadto sa 12 ka tuig). Kon gihimo kini sa usa ka opisyal o kawani sa gobyerno, ang silot reclusion temporal (12 ka tuig ug usa ka adlaw ngadto sa 20 ka tuig).

Ipahamtang usab ang mas bug-at nga silot kon abogado ang biktima sa mga kaso sa physical injuries and murder. Two degrees higher ang silot ubos sa Revised Penal Code sa mga kaso sa mutilation, administering injurious substances ug serious physical injuries, samtang tulo ka pilo ang multa.

Ang silot sa murder mao ang reclusion perpetua (20 ka tuig ug usa ka adlaw ngadto sa 40 ka tuig) ug multa nga P3 milyones. (edbarrita@gmail.com)

This posting includes an audio/video/photo media file: Download Now

Nalzaro: Gidili ang pagsikit sa manag-uyab

Posted: 01 Sep 2021 07:11 AM PDT

GISUGYOT ni Cebu City Councilor Philip Zafra nga dili pasikiton ang manag-uyab sulod sa sakyanan aron dili lagi magtakod sa virus. Namatikdan siguro ni Zafra nga bisan kon anaa sulod sa public transportation, magpakita sa ilang public display of affection (PDA) ang manag-uyab. Kon puwede pa, magsinabakay man gani. Kabalo naman mo og manag-uyab mga "loving" man kaayo.

Pareho gihapon ni niadtong ubang kamanduan sa kapulisan nga dili magpakita sa ilang PDA ang mga manag-uyab diha sa mga plaza o mga lugar nga anha mag-date, bisan gani og mag-holding hands lang. Mo-observe gihapon sila og social distancing. Puwede ba na? Basta uyab pa "sweet" ra ba kaayo. Morag tikoy nga pirming sikit o pilit. Pero kon magminyo na, aw, lagyo na uy.

Sa makadaghang higayon gipasabot kita kon unsa kamahinungdanon ang pagdistansiya sa ubang mga tawo aron kaminusan ang pagkuyanap sa kagaw sa Covid-19. Labaw nang gidili ang hinikapay. Tingali dinhi ning bahina daghang Pinoy mosuki nga dili ka na paduolon. Dili pa gyud ka pahikapon ug labaw sa tanan dili pa gani ka makasikit sa imong mga minahal.

Kanunay gibalik-balik sa atong propaganda sa radio ang paglikay sa beso-beso, halok, gunit-gunit o bisan man gani ang paglamano sa pagka-karon. Aduna man gani plano ang mga magbabalaod nga usbon ang pagpakita og respeto, dili na pinaagi sa pag-amin o lamano, kon dili moyuko na lang ang tawo. Unya na kon makasagubang o makalabay na ta aning maong pandemiya nga gawasnon na tang tanan nga makahimo labaw sa pagsikit-sikit sa atong mga minahal.

Okey na unya na bisan pa sa mga SSDU o sikit-sikit bisan dili uyab. Kining maong plano ni Konsihal Zafra walay kalainan niadtong unang kamanduan nga dili maka-backride ang mga asawa sa motorsiklo sa ilang mga bana. Dili maka-backride apan inig abot sa balay, magdulog ra gihapon. Dili pasikiton ang manag-uyab sa mga sakyanan labi pa sa jeep, apan mag kiss-kiss o beso-beso ra gihapon kon walay tawo nga magtan-aw.(bobbygnalzaro@gmail.com)

This posting includes an audio/video/photo media file: Download Now

Editoryal: ‘Sirkus’ sa Lapu-Lapu

Posted: 01 Sep 2021 07:00 AM PDT

NAA pa sa pandemic karong panahuna, apan ang huna-huna ug atensyon sa mga opisyal sa Lapu-Lapu City anam nang gianod sa pulitika.

Tan-awa ra, nahimo nang isyu ang gipahigayon nga session sa miaging semana, labina nga nigawas ang resulta sa swab test nga nagpositibo sa Sars-CoV-2, kagaw sa Covid-19, ang usa sa mga reporter nga ning-cover sa session.

Ang session wa mapahigayon sa session hall kay gipasirhan nga kasamtangan ni Mayor Junard Chan ang city hall kay gi-Covid ang 15 ka mga kawani. Duna pa gani usa ka opisyal nga nagpositibo.

Mismo si Bise Mayor Celedonio Sitoy di mahimong motambong sa session kay kinahanglan niyang mag-isolate human ang iyang asawa dunay coronavirus disease 2019 (Covid-19). Apan mahimo ra unta pinaagi sa Zoom nga maoy new normal nga paagi sa mga corporate meeting panahon ning pandemic.

Nidepensa ang oposisyon nga ilang gipahigayon ang session bisan wa si Sitoy kay magka quorum sila kay walo. Kaning walo puro ni mga kaalyado ni Kongresista Paz Radaza nga mahimong kaatbang ni Chan sa 2022 elections. Mas lig-on ang kongresista kay sa iyang bana nga si kanhi mayor Arturo Radaza.

Ang usa diay sa mga hisgutanan mao ang kabahin sa hangyo sa Konseho sa Department of Environment and Natural Resources (DENR) nga hatagan og area clearance ang 400 ektarya nga reclamation project sa panahon ni Paz dihang siya mayor pa.

Hayan kini nga proyekto maoy tumong sa oposisyon nga matuki kay importante sab ni kay maisip nga flagship project sa kanhi mayor.

Apan di ba diay mahimong estoryahan kon unsa may ilang kasungian sa ilang gustong mahisgutan sa session? Di na kinahanglan pang dunay lipatlipat, mag Zoom ba o atubangay.

Bisan unsa pay ilang mga rason, ang ilang gibuhat mahisama og usa ka sirkus, diin silang tanan clowns, makalagot nga makalingaw.

This posting includes an audio/video/photo media file: Download Now

Mama, 3 ka anak patay sa sunog

Posted: 01 Sep 2021 07:00 AM PDT

ARON iyang maatiman ang iyang tulo ka mga anak, gibiyaan ni Hannah Mae Carvajal ang iyang trabaho sa usa ka 5-star hotel sa Dakbayan sa Lapu-Lapu.

Sila si Hannah Mae ug iyang tulo ka mga anak apil sa pito nga nangamatay sa sunog sa Martes sa hapon, Agosto 31, 2021, sa Arlington Pond, Barangay Santa Cruz, Dakbayan sa Sugbo.

Samtang ang ikapito nga missing nga lawas nakaplagan sa Miyerkules sa buntag, Septiyembre 1.

Matod sa suod nga higala ni Hannah Mae, buotan nga pagka inahan ug pagka asawa ang iyang higala ug mapinanggaon sa iyang mga anak ug sa tanang mga sakop sa pamilya.

"Good mother, buotan jud na siya, Sir. Dayon buotan sad ang pamilya ni Hanhah. Nag-work na siya Shangrila, pero pag naa na siya mga anak, focused siya sa pag-atiman ila mga anak," matod sa suod nga higalang babaye ni Hannah Mae nga nihangyong di lang siya nganlan.

Ang bana ni Hannah Mae, kinsang ngan gipugngan sa Superbalita Cebu, sa abroad nagtrabaho, apan wa masayod ang higala kon unsa nga nasod ug unsa ang trabaho.

Matod sa higala nga grabe usab makatabang si Hannah Mae sa iyang mga higala kay kahibawo kini mounong.

Samtang nag-chat sa Messenger ang Superbalita Cebu, matod sa higala nga di matukib ang iyang kasakit nga gibati.

Naglisod siya sa pagdawat sa nahitabo sa iyang suod nga higala ug tulo ka mga anak kay nagbangutan pa siya sa kamatayon sa iyang inahan.

Wa pa siya makalimot nga nitabang si Hannah Mae kaniya sa dihang nawad-a siya og panimuot.

"Dayon siya maoy naa sa akong tapad nag monitor sa akong BP. Wa siya mibiya nako kon wala ko na okay, maong di jud kalimot niya," matod sa higala.

Ang balay ug luna gipanag-iya sa pamilya sa bana ni Hannah Mae.

NAKIT-AN

Ang gihulagway sa Cebu City Fire Office nga labing masulub-on nga trahedya sa sunog karong tuiga, pito ang kompirmado nga nakalas sa nahitabong sunog sa Arlington Pond, Barangay Sta. Cruz, Dakbayan sa Sugbo niadtong Agosto 31.

Human makit-i ang usa sa nahabiling lawas sa Miyerkules sa buntag, gikompirmar sa kabomberohan nga nakalas sila si Hannah Mae Carvajal, 34; Felicity Sachi Carvajal, 12; Jen Lyka Lino, 16; Andre Carvajal, 6; Dan Henry Carvajal, 3; Lilian Carvajal, 72; ug Ivan Mejia, 58.

Matod sa tigpamaba sa CCFO, SFO1 Wendel Villanueva nga giingong natanggong ug wala makagawas sa ilang gipuy-an ang pito ka mga biktima hinungdan nga naapil og kasunog.

Usa sa gitan-aw nila nga rason nga wala dayon kini makagawas tungod kay posible nga natuok na sa aso ang mga biktima.

"Base sa account sa naka survive, paggawas niya, murag late na bitaw siya naka realize nga duna siya'y mga kauban sa sulod. Wala naman siya gitugtan nga makabalik sa balay nga nasunog," si Villanueva nagkanayon.

ALARM SYSTEM

Gihatagan usab og importansya ni Villanueva ang pagmontar og alarm system sa panimalay nga dako og tabang aron makahibawo ang mga miyembro sa pamilya nga aduna'y sunog nga nahitabo.

"Ang numero uno makapaluya, makapatay nato.It's because of the smoke due to suffocation," matod ni Villanueva.

Matod niya nga importante usab kining simulation exercises o pag-practice sa panimalay sa Exit Drill in the Home (Edith) aron malikayan nga aduna'y makalas sa mga insidente sa sunog.

"Your fire fighters in Cebu City Fire Office and all over the Philippines among gi-encourage ang tanan to do pratice Edith. Exit drill in the home. We need to practice that kay not all the time especially mga ginikanan, ato gyud (i-practice) atong mga anak, sakop sa pamilya nga mag exit drill ta kay og simbako dunay sunog, ato na ma identify asa ta mogawas."

Dugang ni Villanueva nga kinahanglan usab nga aduna'y common area aron didto mag-abot kon aduna'y sunog.

Sa labing uwahi nga report sa CCFO, 15 ka panimalay ang naugdaw samtang lima ang nakan-an sa kayo.

Niabot usab sa P11.2 milyones ang danyos sa sunog.

Wala pa hinuon matino sa kabomberohan ang hinungdan sa maong sunog apan nasuta nga nagsugod kini sa second floor sa panimalay sa usa ka Lizabeth Lao.

Alas 2:03 sa hapon niadtong Martes dihang nadawat sa kabomberohan ang alarma sa sunog ug sulod sa 22 minutos nakontrolar nila kini.

Alas 3:41 sa hapon na dihang hingpit na nga na-fire out ang sunog.

Nasayran nga sa mga bombero nga miresponde tulo ang samdan.

Naglakip kini nila ni Insp. Eraño Fernandez, 23, nga nakaangkon og paso sa iyang wala nga tiil; FO1 Terencio Lape, 30, nga samdan sa wala nga pad niini; ug Fire Volunteer (Sambag 2 Fire)John Robert Rallos, 22, nga samdan sa iyang wala nga pulsohan.(Dugang taho ni REV)

This posting includes an audio/video/photo media file: Download Now

Ambulant vendors may pwesto sa modernong Carbon

Posted: 01 Sep 2021 05:24 AM PDT

KON ang ambulant vendors karon way permanente nga katindahan, dili na kini ang sitwasyon kon mahuman na ang modernisasyon sa Carbon Market sa Barangay Ermita, Dakbayan sa Sugbo.

Kini ang surpresa nga gipahibawo ni Louie Ferrer, chairman sa Cebu2World Development Inc., kansang estruktura ipahimutang sa ML Quezon duol sa modernong merkado.

Ang pwestong gitagana adunay 1.5x1.5 meters ang gilapdon.

Si Ferrer nagkanayon nga mapahiluna ang di momenos 1,600 ka vendors ug makatinda sa oras nga ilang gustohon.

Sundon gihapon ang arkabala system nga maoy gipatuman sa Cebu City Government.

Matod niya nga ilang naumol ang desinyo human sa gipahigayon nila nga konsultasyon uban sa mga vendors nga dugay nang nag-antos sa karsada nga payong lang ang gisaligan ug mabasa inig bundak sa uwan.

"Naa gyud silay pwesto. Sa among consultation nila, for many years or even decades, naa ra sila sa floor. Gusto sila og naay pwesto. Mao ni ilang pwesto exclusive for the ambulant lang gyud," matod ni Ferrer sa pagpakita sa perspective sa tindahan.

"Interim lang ni. Siguro this is good for two to three years. Once ma-plastar nato, ibalhin nato sila tanan didto sa area. Kami gahunahuna pami unsay atong ibutang diri," dugang sa chairman sa Cebu2World.

Iyang giingon nga kadtong legitimate stall holders, kinsa sigurado na nga adunay pwesto sa modernong Carbon Market, P8.50 ang ilang abangan sa renta matag adlaw kada metro kwadrado. Kini maoy labing ubos itandi sa ubang market.

Sugod 2021, ang Megawide maghatag na og P5 milyones sa City Government ug P50 milyones matag tuig kon mahingpit na ang operasyon sa bag-ong merkado.

Gipadayag sa pangulo sa Cebu2World nga hangtod 2024 ang rental freeze ug kon aduna may usbaw lapas sa maong tuig, ipaagi kini sa City Council para sa amendment sa Market Code sa Cebu City.

Gipasabot ni Ferrer nga ang Market Code maoy maghatag og kasigurohan sa mga vendor nga mobayad ug dili pasobrahan ang buhis nga kolektahon gikan nila sanglit sa kasamtangan, dili pareha ang gikolekta nga buhis matag metro kwadrado. (PAC)

This posting includes an audio/video/photo media file: Download Now

90% sa tag-iya sa drugs taga City Jail

Posted: 01 Sep 2021 05:23 AM PDT

GIANGKON sa hepe sa Cebu City Police Office (CCPO) nga 90 porsiyento sa mga dakop sa anti-drug operation gi-facilitate sa usa ka binilanggo sa ilegal nga drugas sa Cebu City Jail.

Matod ni Police Colonel Josefino Ligan nga mihimo na sila og aksyon pinaagi sa pagpakig alayon sa kadagkoan sa Bureau of Jail Management and Penology (BJMPO) aron mabutang sa isolation ang maong drug personality.

Ang mao nga personalidad gitumbok sa mga madakpan nga maoy ilang contact.

Niadtong Martes, Agusto 31, 2021, sa alas 8 sa gabii, ilang nadakpan ang usa ka high-value individual atol sa buy-bust sa Sitio Tinabangay, Barangay Mambaling, Siyudad sa Sugbo nga nakuhaan og dul-an sa usa ka kilo sa gituohang shabu.

Ang suspek giila nga si Manuel Requinto Rafols, alyas "Jr Mojako," 33, nabilanggo kanhi sa kasong attempted rape niadtong 2015 apan nakagawas sa Hunyo 2021.

Nakuha gikan kaniya ang mga binulto sa gituohang shabu nga gisulod sa Chinese tea bag nga motimbang sa 800 gramos nga adunay standard drug price nga P5,440,000.

Gitug-an, matod pa ni Rafols, nga ang iyang supplier usa ka binilanggo sa City Jail nga maoy mo facilitate sa illegal nga drugas nga giila nga si Jojo Sumayang.

Nakaila niya sa sulod sa bilanggoan si Sumayang nga mao usab ang nitudlo niya unsaon ang pagpamaligya sa illegal nga drugas sa gawas.

"Ang atoang taga city jail hugot atong coordination didto. In fact, kada naa mi madakpan, mag pinpoint didto, i-isolate dayon nila na ang kanang maong tawo. Didto sa ilang isolation facility, dili na sila maka gamit sa cellphone,. From there, putol ang iyang transaction," matod ni Ligan. (AYB)

This posting includes an audio/video/photo media file: Download Now

Mananaka og lubi nahulog, patay

Posted: 01 Sep 2021 05:23 AM PDT

NABUAK ang ulo sa usa ka mananaka og lubi dihang nahagbong niadtong Agosto 31, 2021 alas 8:15 sa buntag sa Sitio Ilaya, Barangay Panalipan, Lungsod sa Catmon.

Si Jeffrey Popoy, 27, ulitawo ug nagpuyo sa nahisgutang lugar, patay dihadiha.

Si Police Corporal Mendel Orevillo sa Catmon Police Station nga nahinabi sa Superbalita Cebu nagkanayon nga sayo nga nanaka og lubi si Popoy aron koprason.

Gisaka niini ang punoan sa lubi nga gibanabana nga 40-50 ka tiil ang gitas-on.

Samtang nagpatong si Popoy sa ibabaw sa mga palwa ug bunga sa lubi, nadakin-as ug nahangbong.

Gumikan sa kakusog sa impact, nabuak ang ulo ni Popoy ug nabali sab ang mga bukog sa iyang dughan.

"Paspasa daw ni kaayo siyang manguhag lubi, nadakin-as, didto siya motugpa sa sementadong karsada. Patay dihadiha," dugang ni Orevillo sa Superbalita Cebu.

Sa kakalit sa panghitabo wala na makakupot si Popoy sa palwa dungan sa pagkatagak sa mga lubi. (GPL)

This posting includes an audio/video/photo media file: Download Now

8 ka brgy. kapitan nangasurprisa sa order nga pagkaon

Posted: 01 Sep 2021 05:19 AM PDT

WALO ka mga barangay kapitan sa Dakbayan sa Bacolod, Negros Occidental ang biktima sa binuang human gihatdan og pagkaon bisan wala mag-order niadtong Agosto 30, 2021.

Si Konsehal Lady Gles Pallen, presidente sa Liga ng mga Barangay, nagkanayon nga niadtong Agosto 31, usa siya sa nasurprisa ang ilang barangay tanod nisulti nga alas 8:00 sa gabii, usa ka food delivery rider nga nagbisekta ang nangita kaniya sa barangay hall ug nagdala og usa ka bucket sa manok nga mobalor og P506.

Ubang biktima mao mao ang mga barangay kapitan sa Pta. Taytay, Leah Palma; Singcang-Airport, Rosinie Distrito; Montevista, Glo-Ann Tambasen; Pahanocoy, Yolanda Noble; Sum-ag, Rodney Carmona; Bata, Lito Abaring; ug Baeangay 35, Ruben James Miranda.

Matod ni Pallen, susama ang ilang nadawat nga orders sama sa chicken ug pizza, pereho og kantidad ug tanan gipang-deliver sa barangay halls.

Dugang niya nga gitaho na kini nga hitabo sa Bacolod City Police Office (BCPO) alang sa tukma nga imbestigasyon.

Namatikdan ni Pallen nga ang tawo nga nag-order sa pagkaon nigamit sa usa ka cellular phone number. Gisuwayan kini nila sa pagkontal apan walay motubag.

"We are in the pandemic, but still there are some persons who are victimizing the food delivery riders. Instead of supporting and helping one another, we create a problem so we are hopeful to stop this activity," matod ni Pallen.

Dili pa niya masuta kon ang pagpanghatod og pagkaon kabahin sa pulitika. (SunStar Bacolod)

This posting includes an audio/video/photo media file: Download Now

Daanbantayan miestrikto sab

Posted: 01 Sep 2021 05:19 AM PDT

SIRADO na ang tanang internet cafes, videoke, karaoke ug uban pa nga leisure establishments sa alas 8:00 sa gabii sa Lungsod sa Daanbantayan ug gikinahanglan nga kutob lang sa 30 porsyento ang kapasidad sa makasulod.

Kini maoy bag-ong kamandoan ni Daanbantayan Mayor Sun Shimura nga gipaagi sa Executive Order No. 28-A S. 2021 pagsiguro nga dili makalapas sa minimum health standard ang mga establisimento.

Gipasabot ni Shimura nga gikinahanglan nga dili paluagan sa kagamhanan ang pagpatuman sa health protocol sa lungsod aron dili na madugangan ang mga positibo ug aktibong kaso sa lungsod.

Sa labing uwahing datos sa lungsod, dunay 76 ka mga aktibong kaso ug ang namatay.

Gimandoan ang tanang residente nga mask ug face shield kon mogawas sa panimalay ug modistansya tali sa uban sa publikong dapit aron malikay sa sakit. (ANV)

This posting includes an audio/video/photo media file: Download Now

P15M gahin sa siyudad sa Sugbo isip hinabang sa mamatyan sa Covid

Posted: 01 Sep 2021 05:08 AM PDT

NIGAHIN og P15 milyones ang Cebu City Government isip ayudang pinansiyal sa mga pamilya nga mamatyan gumikan sa coronavirus disease 2019 (Covid-19).

Gipahibawo kini ni City Councilor Dave Tumulak sa Agosto 31 human gipirmahan ni Mayor Edgardo Labella niadtong Agosto 28, 2021 ang paghatag og financial assistance.

"This is an offshoot of our resolution nga na-approved last week paghangyo sa atoang mayor nga makahatag siya og financial burial assistance sa mga namatay nga biktima sa Covid-19. Adto lang Sabado napirmahan ni Mayor Labella ug nihatag siya og pagtugot nga tabangan kadtong mga pamilya nga nabiktima sa Covid," matod ni Tumulak.

Ang konsehal nagkanayon nga duha ang kapilian sa pamilya nga nagbangutan.

Adunay package nga P16,000 diin aduna nay lungon ug libre na ang ubang serbisyo sa minatay ug ang usa mao ang P35,000 alang sa cremation.

Ang P15 milyones nga pundo gikuha sa buhatan sa budget sa Local Disaster Risk Reduction and Management, partikular sa trust fund nga P5 milyunes ug Quick Response Fund nga P10 milyunes.

Nahunahunaan ni Tumulak ang pagpangayo og ayuda gikan sa buhatan ni Labella gumikan sa pagsaka sa nangamatay sa Covid-19 nga niabot og 700 sa tibuok Sugbo sa unang 18 ka adlaw sa Agosto.

Punopuno usab ang mga tambalanan gumikan sa Covid-19.

Ang mga tagtungod sa namatay mopakita sa ilang death certificate nga sila taga Cebu City ug ang hinungdan sa kamatayon mao ang Covid-19 aron maayudahan. (PAC)

This posting includes an audio/video/photo media file: Download Now

8 ka konsehal sa Lapu negative sa swab test

Posted: 01 Sep 2021 05:08 AM PDT

GIBUTYAG ni Konsehal Flaviano Hiyas sa Dakbayan sa Lapu-Lapu nga negatibo siya sa coronavirus disease (Covid-19) uban ang laing pito ka konsehal nga ningtambong sa nakontrobersyal nga sisyon niadtong Agosto 26, 2021 human dunay nitambong niini nga nagpositibo sa virus.

Ang ubang konsehal mao sila si Konsehal Rico Amores, Junrey Gestopa, Rudy Potot, Michael Dignos, Rex Mangubat, Gregorio Paquibot ug Association of Barangay Council (ABC) President Eduardo Cuizon.

Sa usa ka pribadong clinic sa dakbayan niadtong Agosto 31 sila nagpaubos sa reverse transcription polymerase chain reaction (RT-PCR) test, sumala sa konsehal.

Gumikan niini gikatakdang magpahigayon na usab og laing face to face session ang konseho karong adlawa, Septiyembre 2.

Matod ni Hiyas nga dili na unta himuong isyu pa ang ilang pagpahigayon og face to face session sanglit mandato kini nila isip mga piniling opisyal sa dakbayan.

Gawas nga gituman ang physical ug social distancing niadtong Agosto 26 adunay mga air purifier ang function room diin sila nagpahigayon og sisyon.

Aduna usay pagtugot gikan ni Bise Mayor Celsi Sitoy ang maong session sanglit aduna kini giluwatang kamandoan alang sa mga konsehal kalabot niini sumala ni Hiyas.

Sukwahi kini sa giingong pagsupak nila sa kamandoan sa bise mayor nga unang nataho sa mga balita sa media.

Si Sitoy niluwat na usab unta ug kamandoan niadtong Agosto 31 nga magpahigayon na lang sila ug session pinaagi sa Zoom sa Septiyembre 2 sanglit ipaubos pa sa swab test ang walo ka konsehal sa City Health Office.

Ang resulta niini molanat pa og duha ngadto sa tulo ka adlaw nga matunong sa ilang regular session matag Huwebes.

Apan, matod ni Hiyas, karong anaa na silay resulta sa ilang swab hayan walay rason nga dili sila magsisyon sanglit anaa gayud sa ilang internal rules nga ipaagi sa face to face ang session.

Kun ugaling usbon kini nila, hayan desisyonan kini sa mayoriya ug dili lang ni Sitoy, ang presiding officer.

"Bisan wala siya or wala ang secretariat, we can still push through sa session basta ma quorom we can appoint anyone to act as such basta ma quorom lang ," pasabot ni Hiyas.

Si Sitoy. sa iyang bahin, nibutyag nga wala siyay plano motunga sa face to face session ug motambong lang niini pinaagi sa Zoom gumikan kay mao kini ang iya kamandoan sa konseho.

Naglaom siya nga mao usab kini ang sundon sa ubang konsehal.

Dason niya, kung magtuman ang walo ka konsehal, hayan sila ra ang motunga sa face to face session.

"Unya ang uban ang atong secretariat wala pa may resulta (sa swab test) wa sad ko kay ako mo-preside pero sa virtual ra ko," matod ni Sitoy. (GCM)

This posting includes an audio/video/photo media file: Download Now

Balak: Sa akong pagbunak kanimo

Posted: 01 Sep 2021 05:08 AM PDT

Ma-adlaw man o ma-gabii

sa akong dughan ikaw ang gibunakan

ug giwaswasan sa akong hunahuna.

Apan, Undong, dili ka gyod maanod

kay bisag sa damgo maaninaw ko gihapon

ang imong larawan.

Usa ka putol sa baretang sabon

akong ginudnod ning subo kong dughan

ug gikuso-kuso aron ikaw mahikalimtan.

Abi kog ikaw usa lamang ka buling

nga sa unang pagwaswas maanod sa tubig.

Usa ka man diay ka mantsa nga mipilit na

Sa akong kasingkasing.

Nagpabukal kog tubig kay matod ni Nanay

mapala ka og lapwaan sa mainit nga tubig.

Apan bisag lemonsito, zonrox ug chlorine

ang akong gitimpla dili ka gayod mapanas.

Karon hapit na ko mahuman og pamunak,

apan unsaon man tika paglimpyo nga ning

katapusan kong pagwaswas mora ka na

man nuon og bula nga sa linabhan mipalami,

sa palad ko mipagilok, sa tubig mipakamig,

ug sa kamot ko mibirig?

*Pagbunak - paglaba

This posting includes an audio/video/photo media file: Download Now

Balak: Distansiya

Posted: 01 Sep 2021 05:03 AM PDT

Inday

Sayod ko nga sa mapa

puyde ra sukdon ang gilay-on

sa Gensan ug Cebu gamit

ang pipila lang ka tudlo.

Apan nganong mora mag

dili masukod ang kahaw-ang

nga gibati ko karon

sukad sa imong paglakaw?

Mora na ikaw og bituon

nga duol da sa akong panlantaw

apan diay kini usa lang ka lamat.

Milapad pag-ayo ang kahaw-ang

nga dili masulod ning dughan

bisan kon kapila pil-on.

Bisan akong hutdon og tupong

ang akong mga tudlo kuwang ra

man bisag apilon pa nako

ang akong mga bukton,

aron tuohan nga ang kamatuoran

dili diay masukod.

Sama sa dagat ug langit nga

nag-abot apan kintahay ra diay.

Ikaw naa na dinha ug ako ania pa diri.

Duol tuod, apan baya pagkalayoa!

This posting includes an audio/video/photo media file: Download Now

El Kapitan, mobalik og away inig disyembre

Posted: 01 Sep 2021 05:03 AM PDT

SA tinguha nga makulit og balik ang iyang pangalan sa kalibutan sa boxing, ang kanhi Sugboanong world champion nga si Jhack "El Kapitan" Tepora mobalik og saka sa ring sa Disyembre 2021.

Kini maoy gibutyag sa iyang maguwang nga mao usab ang iyang trainer nga si Christopher "Pingping" Tepora.

Matod ni Pingping nga laraw unta nila nga karong Oktubre, 2021 paawayon ang 26-anyos niyang manghod apan gumikan kay gipaubos man sa Modified Enhance Community Quarantine (MECQ) ang Sugbo tungod sa pagsaka sa pagkatap sa coronavirus, hayan nauswag kini sa Disyembre.

Hinuon wala pa matino kon kinsa ang makontra sa gitawag og El Kapitan ug ingon man asa usab kini ipahigayon.

Ang maong away magsilbing tuneup fight ni Tepora sa dili pa kini moaway sa gawas sa nasod.

"Tune up fight ni niya kay duha na ka mga tuig kapin nga wa siya nakaaway," matod ni Pingping.

Sa sayo pa, sa Radio One Cebu interview, si Jhack Tepora mibutyag nga aduna na siya'y komunikasyon sa iyang promoter sa Estados Unidos diin siya gipasaligan nga paawayon og balik kon mahiuli na ang kondisyon niini.

Katapusang nakaaway si Tepora niadtong Disyembre 21, 2019 diin nasugamak siya sa iyang unang kapildihan sa dihang gi-knockout siya sa beteranong si Oscar Escandon sa first round sa Amerika.

Giangkon ni Tepora nga sa pagkakaron mosobra sa 150 lbs. ang iyang timbang nga layo ra kaayo sa iyang fighting weight nga 126 lbs.

Apan iyang gipasabot nga dali ra kaayo kini niyang makuha ilabi na og magsagunson na siya og away. Hinuon sa tuneup fight, posibling sa 135-140 lbs. ang iyang awayan.

"Mangita pa mi og kinsay available niyang makontra. Magdepende ni sa iyang maatbang kon unsa nga timbang," matod ni Pingping, ang kanhi trainer ni World Boxing Organization (WBO) bantamweight champion Johnriel Casimero.

Sa niaging semana, si Tepora sa iyang Youtube channel maisugon nga mihagit ni Mark Magsayo, kinsa lab-as pa sa impresibong kadaugan batok ni Julio Ceja sa undercard sa Pacquiao-Ugas fight card niadtong Agusto 21, 2021 sa Las Vegas, Nevada.

This posting includes an audio/video/photo media file: Download Now

PBA players kuhaon og balik sa RP Gilas

Posted: 01 Sep 2021 04:50 AM PDT

ASOY ni national coach Tab Baldwin nga kutob sa iyang mahimo, pormahon niya og suway ang posibleng labing lig-ong puwersa sa Gilas Pilipinas sa pagpangandam sa team alang sa 2023 Fiba World Cup diin lakip ang Pilipinas sa tulo ka mga nasod nga mo-host sa kompetisyon.

Niini, gusto ni Baldwin nga sagulan ang kasamtangang batan-ong puwersa sa Gilas nga gipangulohan ni 7'3' Kai Sotto og mga magduduwa sa Philippine Basketball Association (PBA).

Ang batan-ong puwersa sa Gilas maayo og gipakita sa mga kompetisyon nga ilang gisagubang sa minglabay nga pipila ka mga buwan apan sa tan-aw ni Baldwin, nagkinahanglan ang ilang puwersa og suporta gikan sa mga magduduwa sa PBA.

Gipasabot ni Baldwin nga ang pagporma og team maoy usa sa labing lisod niyang trabaho.

"I think that the evolution of the roster is probably the most difficult thing that we face, and also probably one of the most exciting things for our fans to talk about because everything has to be on the table," asoy ni Baldwin nga napatik sa Spin.ph.

"The PBA has got to come back again in the mix, we got to talk about potential PBA players. There's going to be UAAP and NCAA next year, so there's going to have discussions with all the stakeholders for all of those involved."

Gipasabot ni Baldwin nga makighugpong siya sa Samahang Basketbol ng Pilipinas (SBP) ug SBP hasta sa UAAP ug NCAA alang sa iyang plano.

Nanghinaot si Baldwin nga makahagpat siya og positibong resulta sa iyang pagpakighugpong sa mga nangahisgutan kabahin sa iyang plano.

Sa laing bahin, ang Gilas nahiluna sa Group A sa 1st round sa Fiba World Cup qualifers.

Ikauban sa Gilas ning maong grupo mao ang South Korea, India, ug New Zealand. (ESL)

This posting includes an audio/video/photo media file: Download Now

Pacquiao samot mapilde

Posted: 01 Sep 2021 04:50 AM PDT

GIPASIATAB ni World Boxing Association (WBA) welterweight king Yordenis Ugas sa Cuba nga kon adunay rematch, samot niyang pildehon si Filipino boxing icon Manny Pacquiao.

Matod ni Ugas nga kon nalupig niya si Pacquiao pinaagi sa unanimous decision niadtong Agusto 21, 2021 sa Las Vegas bisan kuwang siya sa preparasyon, samot niyang mabuntog ang fighting senator kon makapangandam siya og insakto.

Gidawat ni Ugas ang oportunidad nga makig-away sa Pambansang Kamao ng Pilipinas bisan 11 na lang ka mga adlaw ang gintang paingon sa gikatakdang petsa.

Si Ugas maoy gihulip sa orihinal nga kontra ni Pacquiao nga si American Errol Spence Jr., kinsa miatras sa away gumikan kay naangol ang iyang mata.

"Manny Pacquiao is a legend. He is a warrior. There was never any concern over taking the fight on short notice," asoy ni Ugas sa interbyu sa boxingscene.com.

"The moment it was offered, I said yes. It will be my honor and pleasure to face him again."

Gipabuhagay nang daan ni Ugas nga kon mohangyo si Pacquiao nga makig-away kaniya og balik, dili siya magpanuko sa paghangop niini aron pamatud-an nga dili taphaw ang iyang naposteng kadaugan batok sa 8-division world champion.

Human sa ilang away, gibutyag ni Pacquiao nga nakasinati siya og cramps sa iyang duha ka mga tiil hinungdan nga nakaapekto og dako sa iyang away.

"The main difference if there is a rematch is that we will be even better prepared," dugang ni Ugas.

"That is an important distinction heading into the rematch where I will have a full training camp specifically preparing for Manny Pacquiao." (ESL)

This posting includes an audio/video/photo media file: Download Now

Sugilanon: Ang krus ni Charlie

Posted: 01 Sep 2021 04:50 AM PDT

GIADTO ni Berto ang balay ni Charlie ning sayong buntag. May dala siyang sulat. Gipadayon siya ni Charlie ug gipalingkod sa sala. Ang balay nahimutang sa baryo Guahibo ning dakbayan.

"Unsa may buhaton nako ining sulat ni Andy, imong anak, nga siya may mokolekta sa abang sa akong gipuy-an?" sukot ni Berto nga mitunol kang Charlie sa sulat.

Gidawat ni Charlie ang sulat samtang naglingkod atubangan sa bisita. Gibasa niya ang sulat. Mikunot iyang agtang ug miping-it. Dugay nang naglagot si Charlie kang Andy apan wa siyay nahimo kay iya man laging anak. Adik kini sa ginadiling drugas, barkadista ug himabaye. Lisinsiyado nga physical therapist si Andy apan di magdugay sa trabaho. Bisag propesyonal na siya, iresponsable kini ug nagsalig pa gihapon sa ginikanan. Duna man say apan si Charlie. Biyudo na siya. Usa si Andy sa duha nila ka anak ni anhing Daria. Si Edna, manghod nga dalaga ni Andy, kanunay nagpatunga sa panagbangi nilang Charlie ug Andy. May ten-door apartment si Charlie sa baryo Herania, silingang baryo sa Guahibo. Sulod sa maong compound naa sab ang residensiya ni Charlie diin nagpuyo ang duha niya ka anak. Nagtukod siyag karenderiya sa Guahibo aron may kalingawan siyang buluhaton paglabay sa duha ka tuig nga siya nabiyudo. Ug nakakaplag siyag ikapuli kang Daria. Milambo ang iyang karenderiya tungod sa kakugihan sa iyang kusinera nga si Felina, usa ka dalagang may anak, ug naibog si Charlie kaniya. Ug nagkasabot silang magpuyo. Nanganak silag duha, puro babaye. Diha sila puyo sa bag-ong balay nga gipatukod ni Charlie luyo sa karenderiya, sulod sa luna nga iyang gipanag-iya. CPA si Charlie ug retirado nga manedyer sa banko. Nakapalit siyag mga yuta sa iyang natigom. Nadugangan ang iyang kita sa abang sa mga apartment.

Nangigi si Andy ug gusto nang makigbahin sa kabtangan sa iyang inahan. Nahadlok siya nga wa na unya siyay mapupho, labi nag madugangan pa ang mga anak nilang Charlie ug Felina.

Gikiha ni Andy si Charlie sa opisina sa barangay kapitan. Didto gipakita ni Charlie ang mga titulo sa yuta nga iyang napalit sa ulitawo pa siya. Way labot ang inahan ni Andy kay wala kini mapalit sulod sa kaminyuon nilang Charlie ug Daria; dili 'conjugal property.'

"Paghuwat unag mamatay ko, una mo si Edna makapanunod sa akong mga butang," giingnan ni Charlie si Andy dihang nag-abot sila sa lupong tagapamayapa. "Puwede ipiyal ko nimo ang apartment. Ikaw nay mokolekta sa mga abang, apan ikaw nay mogasto sa repair and maintenance. Apan may kondisyon, kinahanglan magpa-rehab una ka!" Wala sila mahusay sa Lupon.

HUMAN og basa ni Charlie sa sulat miingon siya, "Ah, nia ra! Duna siyay gikumiter diri nga siyay mokolekta sa abang aron mamintin niya ang apartment. Pero ang maong kuwarta kuhaan sab niyag para gasto batok nako, kay iya gyud kong ikiha!"

"Unya unsa may buhaton ko? Kaming tanang mangangabang gipadad-an niya ining sulata!" ni Berto.

"Tumana lang ninyo kini, kay magsulat sab ko kaninyo sa akong pagtugot nga may dugang kondisyon nga kon mo-reklamo na ang mga tenant nga wa ma-mentin og tarong ang apartment, ibalik unya ninyo kanako ang pagbayad sa renta." Mipadayon pagsulti si Charlie, "Nasayod ko nga di mo magdugay pagbayad niya. Iresponsable kaayo nang bataa. Ang kuwarta hurot gihapon sa bisyo ug barkada. Way mahabilin para repair and maintenance. Ang mga babaye ug barkada ang naggalgal niya nga buhaton ni. Bisag giingnan ko siya nga ang kaulawan nako, kaulawan sab niya." Unya nanghupaw si Charlie.

"Buyno, ang ako ra gyung ikasulti nga kada tawo duna gyuy krus nga pagapas-anon. Kon wa kay problema sa kuwarta ug panglawas, naa kini sa relasyon sa imong kapamilya," ni Berto.

"Mao lagi. Matod pa sa mga Insek, 'Each one has his own sorrow!' Matag usa kanato dunay usa ka matang sa kaguol," dason ni Charlie.

Nanindog sila si Berto ug Charlie ug naglamanuhay. Dayon nanamilit si Berto. (KATAPUSAN)

This posting includes an audio/video/photo media file: Download Now

Ciar: Abigail Buenaventura ang tattoo artist sa showbiz

Posted: 01 Sep 2021 04:50 AM PDT

SI Abigail "Abby" Buenaventura ang multi-award winning Cebuana tattoo artist nga nihimo karon og kasikas sa tattoo industry tungod sa katahum sa iyang mga obra.

Bisan kon pito pa lang siya katuig sa maong propesyon apan di na maihap ang iyang mga pasidungog nga nadawat sama sa "2018 Dutdutan International Tattoo Competition" sa World Trade Center-Manila, "Savage Ink Int'l Convention" sa Waterfront Cebu City Hotel and Casino ug sa 2019 ug 2020 "Party in Paradise Int'l Tattoo Expo."

Ang iyang talagsaong talento wala malilong sa showbiz diin lakip sa iyang mga nahimo nang kliyente ang aktor nga si Baron Geisler ug ang komedyanteng singer nga si Ethel Booba.

"Meeting Baron for the first time was intimidating, but I could say he is a true person with a good heart. Twice to tattoo him here in Cebu, together with his wife for their couple tattoo on their arms. Also sa Galaxy background on his shin (leg)," paambit sa 33-anyos nga si Abby sa Superbalita Laysho.

"Ethel Booba was my first celebrity client. Funny but true, na-meet nako siya first time sa elevator sa hotel kon asa sila naka-check in. While naa sa elevator, na starstruck ko ni Ate Ethel, wala ko nakapislit sa among floor, ang ending sila ang unang nigawas. Nakita namo iyang room, so gibalik namo and placed a note sa ilang door saying, `I am a female tattoo artist. If you are interested please message me on Facebook.'

"After few weeks yun na! It was a start of our tattoo and friendship bond which I will always treasure. Sobrang bait. Done some retouch on her back and arm and the name of Jesus on her hand. Also, a couple of cherry blossoms on her body and recently, a matching couple tattoo with husband chef Jessie Salazar."

Ang kanhi Wowowee dancer nga si `Luningning' nagpatattoo usab kang Abby sa paborito niyang buwak.

"I tattooed her ankle with Peony flower and hopefully, we might have some more tattoo sessions pag-okay na mag-travel sa Manila."

Sa Sports lakip usab sa mga nagpatattoo niya silang PBA Phoenix Fuel Master Vic Manuel ug mga kanhi PBA players Carlo Lastimosa ug Reil Cervantes.

'TANDEM'

Si Abigail niangkon nga dili lalim mag-tattoo apan sa higayon nga makita na niya ang pahiyum sa iyang kliyente nga nalipay sa resulta wagtang tanan niyang kakapoy.

"Our rate depends on the design and size but I can assure you that it's worth it `cuz I work with my heart on every piece I do. Maski kapoy ug sakit sa likod sometimes but once makita nako ang finished product ug ang smile sa client nga satisfied sa akong work, it's the best and happy feeling you get."

Si Abby nga lumad nga taga-Talisay nibutyag nga sukad elementary ug high school hilig na gyud niyang mag-drawing ug moapil sa mga poster-making contest hangtod nga nagka-interes siya sa pagdisenyo og tattoo. Ug kay mao say hilig sa iyang banang si Clark, wa ni magpanukong ni-resign sa iyang trabaho sa call center ug ang katapusang suweldo maoy gipalit nila og Tattoo Kit.

Sa sinugdanan naglisud sila sanglit kuwang sila sa kasinatian ug resources apan tungod kay pursigido si Abby nga makat-on ug mabansay, uban sa mga pag-ampo, nakuha gyud nila ang saktong timpla ug abilidad.

"We are tandem. I do the tattoo, my husband does the piercing and prepares everything I need during and after tattoo. I am very thankful for having a partner who is very supportive and caring at the same time," pabuhagay ni Abby nga mabdos diay sa una nilang liwat.

"Yes, I'm pregnant finally after 11 years married and waiting. God's plan is always the best! I know kuyaw mag-tattoo while preggy but it is our only source of income, but with proper health protocols, mas doble among pag-amping. And maybe sooner we'll take a break for few months para maka-prepare for the coming of our first baby."

Sama sa kinabag-an apektado sad sila sa pandemya apan mas nakita usab nila karon ang bili ug gahum sa pamilya ug pakighigala.

"We learn to value even the smallest things and are thankful that despite everything, we are still alive, kicking and working hard para mabuhi. Simple lang! Trust in the Lord and He will help us," panapos pa ni Abby.

Ang iyang tattoo shop makita sa 2nd floor sa LBC Mercado Bldg., Gorordo Ave. (atbang sa CIC) ug mahimo sad ninyo siyang ma-message sa FB page nga Abby Ink.

This posting includes an audio/video/photo media file: Download Now

at

No comments:

Post a Comment

Subscribe to: Post Comments (Atom)

End of Summer Sale ☀️😎

20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...

  • Breaking: Aaron Rodgers teases Jets return this season: 'Anything is possible'
    New York Jets quarterback Aaron Rodgers suffered a torn Achilles tendon in Monday's 22-16 overtime win vs. the Buffalo Bills. If you a...
  • End of Summer Sale ☀️😎
    20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...
  • Last Chance - Win over $1,800 in BLEUSALT
    Elevate your Wardrobe. Offer ends Midnight. ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏ ...