https://www.sunstar.com.ph/ |
- Nadela: Laing hugna sa ayudang pinansiyal?Laing hugna sa ayudang pinansiyal?
- Binghay: Korona sa kabantog
- Ediotryal: Milagro ni Camomot
- Pagara misuway og hikog
- Nagkawot sa ‘septic tank’ natabunan, namatay
- Wa nay mga pasyente gawas sa mga ospital; mga kaso sa Covid-19 anam nang mikunhod
- Bakunado makakaon na sa sud, makapatupi
- Serna: Paggimaw ni Jose Mari Chan
- CCPO mihatag og balay sa mga kabus sa bukid
- 17 ka balay naugdaw sa sunog; 3 naangol
- Caindec: Body cameras sa LTO 7 agents nangabot na
- Comelec registration mobalik na sa Sept. 6
- Sundang gilupig sa Red Horse
- Wright misalbar sa Phoenix batok sa Rain or Shine: PBA
- Talk to Papa Joe: Gi-tsismis
- Rabacal: Unsay gamit sa face shield?
- Barrita: Bakuna alang sa tanang Pinoy
- Nalzaro: Personalan na
- Editoryal: Kon motuman unta
- Ancajas andam makig-away ni Loka
- Super Suroy: Mga tanom pabugnaw dalit sa Cebu Plant Co.
- Grocery items ipanghatag sa Gaisano Country Mall Cyclothon
| Nadela: Laing hugna sa ayudang pinansiyal?Laing hugna sa ayudang pinansiyal? Posted: 03 Sep 2021 03:56 AM PDT NAKADAWAT ta og suporta labot sa atong sugyot nga tabang pinansiyal alang sa atong mga tinun-an pahaum sa pagbukas sa klase sa mosunod nga mga adlaw. Hinuon, mabalak-on kaayo ang komento sa uban kong duna pa bay pundo nga ikapanghatag taliwala sa nagkainit nga isyu nga dunay nakasapi gikan sa pundo nga gigahin para sa pandemya. Presyo nga gipaburot ug daghan pang anomaliya ang kanunay natong mabasa ug mabati nga mga komentaryo karon. Maghilak ang adlaw nga dili ni mahisgutan ilabi na sa social media. Pero ang akong gilantaw ang karon. Ang sitwasyon sa panginabuhi nga bisan kong makalikay ang mga ginikanan sa plitihan ug balon sa mga bata kay wala may face to face nga klase, ang pagbukas sa klase dugang pas-anonon lang gihapon natong ginikanan. Basi sa kasinatian sa miaging tuig-tingtungha, makita nga nagkinahanglan gyud og ayudang pinansiyal ang mga ginikanan. Ang DepEd dili makalimod sa kamatuoran nga ang mga module class nga gipasiugdahan nagkinahanglan gihapon og kuwarta aron ma submit ang projects nga nasukip sa module. Kana lang daan nga magpa photo copy sa mga papel nga apil sa module nagkinahanglan naka og budget. Ang para sa kusina makuhaan pa. Samot na kong ang ipa-photo copy kay colored, mas mahal kay sa naandan. Suwerte ang mga tinun-an nga makapahimulos sa mga programa sa ubang local government unit nga nanglibre niining matang sa serbisyo. Kana kong duna man gani. Mao man gyud unta ni ang tukma nga programa isip ayuda sa mga bata. Kadtong nagkinahanglan nga mag-research pinaagi sa on line. Asa man ka og ipalit og load para makapangukay ang mga bata sa internet, aron matubag ang mga pangutana sa module?Palihug hinuktukan daw nato ni ilabi na sa mga educators nato. Malipay ta nga makadungog nga gumikan sa kugi sa mga principal nakahimo silag mha proyekto aron maanfam ang ilang eskwelahan para sa face to face nga pagbukas sa klase kong duna man galing. Pero kong sa cake pa ni, nahug ra ni og panindot sa tinud-anay nga hulagway sa kahimtang sa atong mga bata. Balik sa pangutana, may lain pa bang hugna sa financial assistance ning panahona? Ang tubag gikinahanglan kaayo. Kong asa og pundo, sila sa local government unit (LGU) nahibalo na tubag niana. Ang importante nga ang kasaysayan mohusgar nila nga ning panahon sa pandemya, makatilaw sab ang mga bata sa ayuda nga labaw pa nga gikinahanglan nila ning panahona. Kadtong niingon nga anhi masukod ang gugma sa atong mga lider sa ka importante sa edukasyon, sakto gyud ka. Kana kay naa sila sa katungdanan tagsaon ra ni nga kahigayonan nga ilang mahandum hangtod sa hangtod, nga sila may nahimo para sa mga tinun-an ning pandemya.  This posting includes an audio/video/photo media file: Download Now |
| Posted: 03 Sep 2021 03:56 AM PDT ANG atong buhok gitawag og crowning glory kun korona sa kabantog kay una kining makadani sa panan-aw. Apan di kalikayan nga dunay uban gipakatawo nga nipis og buhok. Ang uban sab naupaw tungod sa stress, gikan nagpa-chemotherapy, bag-ong nanganak o gioperahan, nasubrahan sa chemicals pagpa-kolor o paggamit og electronic devices sama sa curling iron. Matod sa American Academy of Dermatology dunay daghang paagi kung unsaon pag-atiman ang buhok labi na niadtong dali ra ma-split ends, mangaputol og manglagas. Labing una ang insaktong pag-shampoo. Bas-on og maayo ang buhok unya ibuntang una sa palad ang shampoo, dili idiretso sa bagulbagol. Kadtong medyo uga ang buhok, mahimong mogamit og conditioner aron mohumok. Banlawan pag-ayo og tubig para matangtang ang hugaw og pilit-pilit. Di angay inadlawon ang paggamit sa shampoo labi na kung edaran na kay mosamot kini og kalagas. Kung magpa-uga, di angay inudnod sa tualya ang buhok aron di kini maputolputol, madaot og magabok, hinuon puston kini sa tualya kay sagukom ini ang nahabiling basa. Inig panudlay, angay mogamit og sudlay nga dagko og ngipon, dili hairbrush, kay di kini makasamad sa bagol-bagol unya malikayan ang split-ends og pagkalarot ini. Di sab angay magpunay og gamit og hair dryer o curling iron kay makasamot kini og pa-uga sa bukok. Di sab angay sudlayon og ka 100 ka beses ang buhok. Panagsaan ra kini kung kinahanglan na gyod. Duna say mga sakit-sakit nga mo ataki sa bagol-bagol sama sa ringworm. Angay kining ikonsulta sa doctor aron maresitahan og anti-fungal cream. Para niadtong nipis ang buhok, suwayi paggamit og shampoo nga naay conditioner nga volumizing para magka body ang buhok. Pwede sab og ikulot gamit ang curlers aron mo baga-baga gamay. Inig kaligo, unahon ang conditioner una ang shampoo. Niadtong uga ang buhok, mahimong mag-hot-oil treatment gamit ang tuno sa lubi o olive oil unya puston og plastic cap pataud-tauran (2 ka oras pataas) una banlawan.  This posting includes an audio/video/photo media file: Download Now |
| Posted: 03 Sep 2021 03:56 AM PDT MGA deboto nga Romano Katoliko sa Sugbo seguradong nalipay tungod sa kalamboan sa proseso sa paghimo sa ikaduhang Bisaya nga santo nga si anhing Archbishop Teofilo Camomot. Ang una mao si San Pedro Calungsod, sakristan nga martir sa misyon sa Guam. Apan ang unang Pinoy nga santo mao si San Lorenzo Ruiz, usa usab ka martir sa misyon sa gawas sa nasod. Apan dili sa pagka martir ang pagduso nga pagka santo ni Camomot. Ang iyang talagsaong kabuotan ug Diyosnon nga kinabuhi hangtod namatay sa aksidente sa dan. Sa buhi pa, siya nagpakita na kini og milagrusong sitwasyon, sama sa iyang dungan nga pagpakita sa samang higayon apan managlahing lokasyon. Matod ni Fr. Mhar Balili, vice postulator sa Canonization ni Camomot, ang panel sa theologians magtagbo sa Roma karong Oktubre 21 aron pagtuki sa " positio" o saysay sa iyang kinabuhi ug trabaho. Ug takos kini sa atong pagsuporta ug pag-ampo nga modapig ang mga cardinal sa paghimong santo sa laing garbo nga Sugbuanon. Ang positio ni Camomot nakompleto niadtong Marso 3, 2020. Nakapasar sa Congregation of the Causes of Saints sa Hunyo sa samang tuig. Kon mopasar kini sa tigom sa Oktubre, ang positio ipasa sa ang-ang sa cardinals. Kon mopasar sa ilang grupo, ilang irekomendar sa Santo Papa nga ideklarar nga "venerable" sa anhing Arsobispo. Kini nga ang-ang sa proseso ang angaton. Kinahanglan nga mopresentar sa ikaduhang milagro ni Camomot. Usa ka kahimtang nga dili maugkat sa makuting imbestigasyon sa siyensiya. Daghang giisip nga milagro sa Arsobispo apan mapasabot kini sa pagtuon sa siyensiya. Dako ang matabang sa mga magtutuo ning bahina sa proseso. Manghinaut kita sa intersisyon ug milagro ni Camomot nga molurang na o mapapas ang pandemiya sa Covid-19.  This posting includes an audio/video/photo media file: Download Now |
| Posted: 02 Sep 2021 07:18 AM PDT SAMTANG naa sulod sa selda sa Pardo Police Station sa Cebu City Police (CCPO), si Cebu star boxer Albert Pagara misuway paghikog sa Huwebes sa hapon, Septiyembre 2, 2021. Apan nakit-an siya sa iyang kaubang mga piniriso hinungdan nga naluwas. Si Pagara, 27, taga sityo Terra, Barangay Inayawan, Dakbayan sa Sugbo, gipadakop sa inahan sa 14 anyos nga dalagita sa Miyerkules, Septiyembre 1, human gireklamo nga milugos kaniya samtang natulog sulod sa ilang balay sa Inayawan. Apan si Pagara hugot sa iyang pagpanghimakak nga iyang nahimo ang krimen. Matod sa kaubang mga piniriso ni Pagara, ilang nakit-an nga naghigot na og liston sa sapatos sa iyang liog ang boksidor nga gibaligtos ngadto sa rehas sa selda. Naglingkod si Pagara nga natuok na sa liston sa sapatos. Dali nila kining gitabang ug nasanta hinungdan nga wa maunsa si Pagara sa iyang gibuhat. Naabtan sa Superbalita Cebu si Pagara nga nagpahuway na sulod sa selda human sa hitabo. Sa interbyu sa Superbalita Cebu, niangkon si Pagara nga nauwaw kaayo siya sa pasangil batok kaniya. Subli niyang gihimakak nga iyang gilugos ang dalagita nga paryente sa iyang kapuyo. INSIDENTE Matod ni Police Lieutenant Colonel Wilbert Parilla, deputy city director for operations sa Cebu City Police Office, samtang natulog ang dalagita, giingong kalit lang kini nga gihinol sa boksidor ang mga pribadong bahin sa lawas. Giingong wala lang mag langas sa biktima tungod sa kahadlok, apan paglabay sa pipila ka oras, nitug-an kini sa iyang inahan nga mao na usab ang mi report sa mga barangay tanod nga maoy nidakop sa boksidor. "At first natulog ni ang biktima and then nga mao nalay iyang nabantayan nga gihikap ang iyang pribadong lawas. Wala lang siya mopalag. According sa biktima nga wala siya mo react kay nahadlok siya sa suspect," matod ni Parilla. Gidala si Pagara sa Pardo police station alas 7:30 sa gabii sa Miyerkules aron imbestigahon ug hugot kini nga mihimakak sa pasangil batok kaniya. Apan adunay mga ebidensya nga gipakita ang kabanay sa biktima sama sa resulta sa medical exam niini sa pink room sa Vicente Sotto Memorial Medical Center nga gihilabtan siya ni Pagara. "Mi-deny man gyud ni siya sa allegation. Later on sa interview sa atoang WCPD sa Station 7, iyaha ra daw gihikap but that on his part sa iyang alibi. But we will stick on the allegation of the victim who is a minor," dugang ni Parilla. Ang hepe sa Pardo police station police Major Jose Angelo Acupinpin mitug-an nga positibo nga gitumbok sa dalagita ang boksidor nga maoy niamong-among kaniya nga tungod niini, giandam na nila ang kasong pagpanglugos in relation sa kasong child abuse. Gitakda usab nga ipaubos sa stress debriefing ang dalagita sa mga sakop sa Department of Social Welfare and Development (DSWD 7) tungod kay na trauma pa sa hitabo.  This posting includes an audio/video/photo media file: Download Now |
| Nagkawot sa ‘septic tank’ natabunan, namatay Posted: 02 Sep 2021 06:00 AM PDT NAMATAY ang usa ka 38 anyos nga lalake human natabunan sa nahunlak nga yuta sa iyang gikawot nga giingong septic tank sa Sitio Panagdait, Brgy. Ibabao, lungsod sa Cordova, alas 3 sa hapon sa Septiyembre 1, 2021. Ang namatay nailhang si Rolando Alfanta, taga Sitio San Isidro, Brgy. Basak, dakbayan sa Lapu-Lapu. Matod ni Patrolman Christian Cogata sa Cordova Police Station nga ang mga sakop sa Cordova Local Disaster Risk Reduction Office (LDRRMO) nitaho kanila kalabot sa insidente. Sa ilang pag-abot sa lugar, natabonan na si Alfanta sa yuta. Gibanabanang anaa sa 14 ka tiil ang gilawmon sa lungag sumala pa sa kapulisan hinungdan nga naabtan pa sila og hapit tungang gabii una naugkat ang lawas ni Alfanta. Sa inisyal nga pakisusi sa kapulisan, giingong nagbangag og daw sa usa ka tunnel si Alfanta sa dapit uban ang laing duha ka mga kauban. Posibleng nihumok ang babawng bahin sa ilang gikawot nga miresulta sa pagkahunlak. Wa maunsa ang duha ka mga kauban ni Alfanta. Apan wa gisalikway sa kapulisan ang taho nga posibleng nag treasure hunting si Alfanta sa dapit gumikan sa kalawom sa iyang gikawot.(GCM)  This posting includes an audio/video/photo media file: Download Now |
| Wa nay mga pasyente gawas sa mga ospital; mga kaso sa Covid-19 anam nang mikunhod Posted: 02 Sep 2021 06:00 AM PDT WA nay mga pasyente sa Covid-19 nga naghuwat ug naglinya sa gawas sa mga pribadong tambalanan sa dakbayan sa Sugbo. Kini human nimenos na ang gidaghanon sa mga nataptan sa virus sa miaging mga semana human nisugwak ang daghang mga kaso sa pagsugod sa buwan sa Agusto nga niresulta sa pagdas-ag sa pasyente sa mga private hospital. Base sa monitoring list sa Emergency Operations Center nga gipahibawo ni Konsehal Joel Garganera, wa nay pasyente sa gawas sa Velez Hospital, Cebu Doctors Hospital, Perpetual Soccour Hospital, North General Hospital, St. Vincent Hospital, Miller Hospital samtang adunay duha nga naghuwat gawas sa holding area sa Vicente Sotto Memorial Medical Center nga usa ka public hospital. Ang deputy chief implementer sa EOC nagkanayon sa miaging duha ka semana, nikunhod na ang gidaghanon sa mga active cases base sa ilang graph monitoring. Sa unang mga semana sa Agusto, nag-average og kapin 300 ka mga kaso matag adlaw samtang karon, nikanaog na sa kapin 100 cases matag adlaw. Sa samang mga semana, gikan sa 12 ngadto sa 14 ka patay matag adlaw gumikan sa Covid-19, karon ang Cebu City nag-average og 6 ka patay matag adlaw. Si Garganera nagkanayon nga naka-record ang EOC og 3,998 ka mga aktibong kaso sa Covid-19 nga maoy labing taas sa nakalabay nga 14 ka adlaw sa buwan sa Agusto. Dunay 2,643 ka aktibong mga kaso sa virus sa miaging 14 ka adlaw nga maoy na-record niadtong Septiyembre 1, nga gihulagway sa konsehal nga labing ubos sa third surge sa Covid-19. Ang deputy chief implementer sa EOC niingon nga ang critical care occupancy rate sa pribado ug publikong mga tambalanan niabot unta og 80 porsyento. Matod ni Garganera nga anaa na sa critical zone ang mga ospital gumikan sa kapuno ug kakuwang sa ilang mga medical staff hinungdan nga ang mga pasyente naglinya na gawas sa mga emergency rooms dihang nibuylo ang pagpanakod sa Covid. Gipahibaw usab niya nga niabli na og balik ang ilang walo ka barangay isolation centers human sa disinfection sa miaging mga adlaw. Pito ka mga hotel makadawat na usab og bag-ong mga asymptomatic ngadto sa mild nga symptoms sa mga individual nga positibo sa Sars-CoV-2, kagaw sa Covid-19.(PAC)  This posting includes an audio/video/photo media file: Download Now |
| Bakunado makakaon na sa sud, makapatupi Posted: 02 Sep 2021 05:55 AM PDT ANG Cebu City Government nihatag og pabor sa mga individual nga hingpit nang nabakunahan kay makapahimulos na sa mga serbisyo nga wala gitanyag sa mga wala nagpabakuna. Kini ang pipila sa mga mahinungdanon nga unod sa Executive Order No. 38 ni Acting Mayor Michael Rama nga epektibo sugod kagahapon, Septiyembre 2 hangtod Septiyembre 7 nga gitawag og Oplan Puyo 9-2-7. Nalatid sa EO nga makakaon na sa sulod sa restaurant, eateries, kiosks, commissaries ug susamang estabisemento ang mga tawo nga nakapabakuna na. Apan kinahanglang 10 porsyento ra ang gidaghanon sa sulod apan gidili gihapon ang pag-inom og ilimnong makahubog. Ang mga bakunado mahimo na usab silang makapaserbisyo sulod sa beauty salons, barbershops, beauty parlors ug nail spas sanglit gitugotan na silang makaabli, apan 30% ra ang ilang serbisyohan. Ang mga establisemento gikinahanglan nga mokuha og protocol compliance certificate gikan sa Emergency Operations Center (EOC) diin ang ilang mga personnel o workers kinahanglan bakunado usab batok sa Covid-19. Ilawom sa EO-138, ang simbahan gitugotan usab nga makapahigayon og misa ug ubang kalihukan nga relihiyuso. Makapasulod hangtod 30 porsyento sa ilang kapasidad basta way pagsupak gikan sa Cebu City Government. Ang City Government nagtinguha nga makabakuna sa mga individual nga nalakip sa A4 ug A5 categories ug ang mga trabahante sa mga business establishment apil na ang mga restaurant personnel ug personal care services ug uban pa. Ang non-essential retail trade ug service establishments sama sa mga street vendor wala pa gitugotan nga makabalik og tinda sa dalan gawas lang sa mga otorisado o kadtong gitugotan sa Gasa sa Gugma Board. Ang EO No. 138 ni Rama maoy pagpadayon sa iyang EO 137 Oplan Puyo 8-15-31 nga nagpailawom sa Cebu City sa modified enhanced community quarantine (MECQ) gawas sa pag-amendar sa section 9,21,22,29 ug 35 nga sa miaging 15 ka adlaw, wala tugoti apan karon gihatagan na og pabor.  This posting includes an audio/video/photo media file: Download Now |
| Serna: Paggimaw ni Jose Mari Chan Posted: 02 Sep 2021 05:55 AM PDT NAKITA nako sa TV si Jose Mari Chan nga naghilak tungod kaha kay sa ako nang naandan, Disyembre 1 pa ko mopatukar sa iyang Christmas In Our Hearts sukwahi sa uban nga niadtong Miyerkules, Septiyembre 1, nagpatukar nag mga Christmas songs? Bitaw nakahinumdom kuno siya nga sa dihang nagpasundayag siya sa Lanao del Norte ug nikanta sa Christmas In Our Hearts, bisan mga Muslim ug uban pang di Katoliko niapil og kanta. Nagpasabot kini nga ang Pasko ug ang musika alang sa tanan. *** Di gyud papugong si Presidente Digong, modagan gyud siya pagka Bise Presidente. Iya pang gi-ismol ang oposisyon nga di gyud makadaug. Unya kon itugot gyud sa kahigayonan nga makadaog si Bise Pres. Leni Robredo pagka Presidente, kon modagan gyud kini unsa kahay mahitabo nga si eni mao nay Presidente unya si Pres. Digong ang bise? Kalingaw kaha no? *** Sumala sa mediacon niadtong Martes, mas init ug kulbahinam ang mga eksena sa nahibiling unom ka gabii sa "Init sa Magdamag." Matud ni Yam Concepcion, duna pay usa ka eksena nga magsilbing labing kulbahinam tali niya, JM de Guzman ug Gerald Anderson. Mahibaw-an kini kon sundon ang teleserye karong gabii, sa Lunes hangtud Biyernes. Sa mga mingawon ni JM ug Gerald, may gihimo silang pelikula samtang si Yam mag-enjoy sa iyang pagkabag-ong minyo ug mag-vlog matag karon ug unya. *** Gusto mong mahimong housemate sa balay ni Kuya sa Pinoy Big Brother? Tulo ang gitawag og Kumunities ning Season 10: Celebrity, Adults ug Teens. Sa adults, kinahanglan lang nga mag-edad og 20 - 40 anyos ang gustong moapil, mo-download sa Kumu application, mo-create og account unya sulod sa usa ka minuto ipaila ang kaugalingon ug kon ngano nga angay siyang mahimong housemate ni Kuya. I-upload ang maong video uban ang hashtag nga PBBKumuAdults. Hangtud sa Septiyembre 30 ang pagpanawat ug sa Disyembre 1 - 31 pa ang alang sa Teens. *** Sa mga fans sa BINI ug BGYO ang duha ka grupo dunay umaabot nga virtual concert sa Nobiyembre 6 ug 7. Ang tickets mobalor og P1,950 sa SVIP alang sa duha ka gabii (may meet and greet pa sa duha ka grupo human sa ikaduhang gabii) ug P1,490 sa VIP alang gihapon sa duha ka gabii pero way meet and greet. *** Nisunod sa lakang nila ni Nadine Lustre, Maja Salvador ug Kim Chiu ang Cebuanang skateboarder nga si Margielyn Didal. Ni pose siya sul-ob ang mga baligya sa H&M. Bongga ang atong paysana kon mao.  This posting includes an audio/video/photo media file: Download Now |
| CCPO mihatag og balay sa mga kabus sa bukid Posted: 02 Sep 2021 05:55 AM PDT ANG Cebu City Police Office (CCPO) pinaagi sa City Mobile Force Company (CMFC) nanghatag og mga balay ngadto sa labing kabus nga mga pamilya nga nagpuyo sa bukid nga naapektohan sa kalisod ning panahon sa pandemiya sa Covid-19. Kapin sa 10 na ang ilang napili nga tukoran og balay nga mobalor ang matag usa og P400,000 nga igo na alang sa pamilya. Ang hepe sa CMFC Police Major Chuck Barandog nipasabot nga ang maong kalihukan kabahin kini sa advocacy program sa PNP nga mao ang Barangayanihan nga ilang gi ulohan nga "Bahay mo, Puso ko." Kini uban sa pagpaningkamot sa stakeholders sa CMFC ug sa advisory council nga maoy nangita og pundo aron mahatagan og disente nga kinabuhi ang mga pamilya nga labing kabus. Tinguha nila nga dunay 15 ka pamilya ang mahatagan og bag-ong panimay nga mobalor ang matag usa og P400,000 nga igo nga makapahuway tibuok sakop sa pamilya. "Ni-come up mi ani nga programa to help sa kanang pinaka less fortunate sa member sa isa ka barangay, nga patindugan namo og balay with the help sa stakeholders, no cost to the government to the PNP among patindugan og disente nga panimalay," matod ni Barandog. Niadtong Agusto 30, 2021 atol sa Adlaw sa mga Bayani, gihimo ang groundbreaking sa Barangay Pamutan sa bukiran sa Siyudad sa Sugbo diin ang unang beneficiary mao si Roldan Saballe, usa ka mag-uuma. Si Saballe dunay walo ka mga anak ug tungod sa kalisod, nagpuyo kini sa usa ka balay nga ginama sa kahoy nga halos dili na mapuy-an tungod sa kagabok na ug buslot pa ang atop niini nga ganama sa pawod o nipa nga atop. Gikatakdang matapos ang pagtukod sa matag balay sulod lang sa 26 ka adlaw ug ilang target nga makapabarog sila og 15 ka mga balay sulod lang ning tuiga. Ang maong programa kabahin kini sa ilang police community relation ug mapakita sa mga kabus nga pamilya nga naa nagpuyo sa bukid nga naa ang gobiyerno mibati usab sa ilang kalisud nga mahimo nilang kasandigan. "Ipakita nato nga the government is still there, the government is trying moving heaven and earth to help the community," dugang ni Barandog. Sukwahi kini sa nanglabay nga tabang nga ilang gihatag nga pagkaon sama sa bugas ug grocery items nga mahurot lang sa pipila ka adlaw. Apan kining maong programa sigun ni Barandog molatas kinig taas nga katuigan nga mapanunod pa sa ilang kabataan. Nagpatabang usab sila sa mga barangay kapitan nga mahatagan og gamay nga luna ang mapilian nga pamilya aron matukod ang ilang gidamgo nga bag-ong panimalay. (AYB)  This posting includes an audio/video/photo media file: Download Now |
| 17 ka balay naugdaw sa sunog; 3 naangol Posted: 02 Sep 2021 05:43 AM PDT SA IKADUHANG insidente karong semanaha, laing sunog na usab ang miigo sa Barangay Sta. Cruz, Dakbayan sa Sugbo. Ang sunog miigo sa Sitio Bugnay, Osmeña Boulevard, Sta. Cruz, Cebu City, Huwebes sa gabii, Septiyembre 2, 2021, diin tulo ka mga residente ang nangaangol. Sa inisyal nga imbestigasyon sa Cebu City Fire Office, nadawat sa kabomberohan ang alarma sa sunog alas 5:59 na sa hapon sa Huwebes. Daling miresponde ang kabomberohan ug giisa sa second alarm ang maong sunog alas 6:04 sa gabii. Hingpit kining nakontrolar alas 6:44 na sa gabii diin nasuta nga nagsugod ang sunog sa panimalay nilla ni Fernanda ug Ramon Ramos. Mokabat sa 17 ka mga balay ang hingpit nga nangaugdaw, lima ang nakan-an sa kayo. Ang nangaangol giila ni Fire Officer 2 (FO2) Fulbert Navarro sa Cebu City Fire Office nga sila si Jose Antonio Oller, 40, kinsa dunay 1st degree burns sa upper extremities ug nawong; Ramon Ramos, 60, 1st degree burns sa nawong liog ug mga kamot samtang si Gwendolyn V. Jarina, 54, naangol human paaka sa iro. Matod ni Navarro nga 20 ka mga pamilya kun 100 ka mga lumolupyo ang apektado. Gibana-banang P1,1116,000 ang danyos sa sunog. Wala pa matino ang hinungdan sa sunogi. Mao na kini ang ikaduhang insidente sa sunog sa Sta. Cruz human nahitabo kadtong sunog sa Arlington Pond niadtong Martes, Agusto 31 nga mikalas sa usa ka pamilyahan o pito ka tawo. (HBL)  This posting includes an audio/video/photo media file: Download Now |
| Caindec: Body cameras sa LTO 7 agents nangabot na Posted: 02 Sep 2021 05:16 AM PDT NAKADAWAT na ang Land Transportation Office (LTO) 7 og 46 modernong body cameras para sa ilang personnel nga magsilbing dokumentasyon sa ilang ipahigayon nga mga operasyon. Si LTO 7 Regional Director Victor Caindec nagkanayon nga gikan sa ilang ulohan nga buhatan ang maong mga body camera nga adunay kapasidad pagsusi sa nahimutangan sa ilang mga law enforcer, mahibaw-an kon kanus-a pagngon ang camera ug automatic nga mapadala ang kuha nga video sa ilang server didto sa kaulohan. "Everyday, the users, when they log out of duty or report to the office, we have the server dock. As soon as they surrender their cameras, the data is automatically loaded into the systems. Apart from being able to identify where they are in terms of location, we also have data in terms of where they have been," matod ni Caindec. Si Caindec nihulagway nga dako kini og ikatabang sa ilang mga personnel ug sa mga motorista sanglit dokumentado ang tanan nilang aksyon panahon sa operasyon ug makatabang usab kini kon aduna silay emerhensiya nga masugatan. "The unit also has the SOS capability in an unfortunate event that the enforcers are in a situation where they feel there is an emergency then they can activate the SOS feature," matod niya. Giklaro ni Caindec nga dili tanang higayon i-on ang body camera sanglit dili kini 'diary' camera sa mga law enforcer kansang battery molungtad sa walo ka oras ug adunay extra battery para aduna silay magamit sa higayon nga i-charge ang empty nga battery. Ang maong mga body camera mao ang gamiton sa mga enforcer sa LTO 7 ug mga district office dinhi sa Sugbo, Bohol, Negros Oriental ug Sequijor. (PAC)  This posting includes an audio/video/photo media file: Download Now |
| Comelec registration mobalik na sa Sept. 6 Posted: 02 Sep 2021 05:16 AM PDT MOBALIK na ang rehistrasyon sa Commission on Election (Comelec) sa dakbayan sa Lapu-Lapu, Mandaue, Cebu City ug ubang lugar nga ubos sa status nga modified enhanced community quarantine (MECQ) sugod sa Septiyembre 6, Lunes, human mahunong gumikan sa pagsaka sa kaso sa coronavirus disease 2019 (Covid)-19 sa Sugbo. Kini ang gipadayag ni Election Officer Marchel Sarno sa Lapu-Lapu City human giaprobahan sa Comelec en banc aron usab sila makapadayon sa rehistrasyon gumikan sa nagsingabot nga piniliay sa Mayo 2022. Ang buhatan sa Comelec abli gikan sa alas 8:00 sa buntag hangtod sa alas 5:00 sa hapon, gikan sa Lunes hangtod sa Sabado, apil ang mga holiday. Ang kanhi election officer sa Cebu City north district nga si Sarno nagkanayon nga bisan MECQ, gibalik ang ilang operasyon sanglit wala nay extension nga pagahimuon ug nagkaduol na usab ang filing sa certificate of candidacy (COC) nga karon nang Oktubre 1 hangtod sa 8. Ang gustong moparehistro, mosulod lang sa www.irehistro.comelec.gov.ph aron mo-fill-up ug dad-on ang kopya didto sa Comelec diin sila magparehistro aron kuhaan sila og biometrics kansang registration molanat hangtod sa Septiyembre 30. Sama sa naandan, ang Comelec hugot nga nipatuman sa mga health protocol batok sa Covid-19 ug kinahanglan nga magsul-ob sa face mask ug face shield ug social distancing para malimitahan ang posibleng pagtakboy sa maong virus. Giawhag ni Sarno ang mga gustong magparehistro nga dili na huwaton ang katapusang semana sa dili pa mapupos ang registration aron dili magpundok ang mga tawo ug malikayan ang transmisyon sa virus. Si Atty. James Jimenez, spokesperson sa Comelec National, nagkanayon nga niabot na og 61 milyones ka mga Pilipino ang narehistro ug makaboto alang sa 2022 elections. (PAC)  This posting includes an audio/video/photo media file: Download Now |
| Posted: 02 Sep 2021 05:16 AM PDT WA mosaler ang duha ka sundang nga gidala sa usa ka construction worker, gilupig siya sa iyang gikaaway nga nigamit og botelye sa Red Horse hinungdan nga siya napatay alas 10:45 sa gabii sa Miyerkulis, Septiyembre 1, 2021, sa YY Beach Resort, Birhen Los Remedios, Brgy. Odlot, dakbayan sa Bogo. Ang biktimang namatay sa mga samad dinunggaban agi sa botelya sa Red Horse giilang si Berlan Arlan Billiones, 27, alias "Joey", ulitawo construction worker helper, taga Placer, Surigao del Norte, kasamtangang nagpuyo sa Mambaling, Dakbayan sa Sugbo. Ang suspek nga nasikop sa kapulisan giilang si Joel Daigon, 39, minyo, mason, taga Suarez, Iligan City. Si Daigon duna say samad tinigbasan sa ulo. Si Police Police Staff Sgt. Leliano Pepito, imbestigador sa Bogo Police Station nga nahinabi sa Superbalita Cebu, nagkanayon nga nagtagay sila si Billiones ug Daigon kauban ang ubang construction workers sa alas 6 sa gabii. Apan dihnag nangahubog, nagkalalis ang duha ug nagkainitay. "Pasiaw daw ning biktima. Nasuko ang suspek kay gikataw-an dihang nanghambog nga maayo siyang mosultig Winaray," dugang ni Pepito. Pwerting sukoa ni Daigon nga nagsige og katawa si Billiones. Si Daigon mikuhag duha ka litro nga botelyang Red Horse iyang gibuak, samtang si Billiones nagdalig kuha og duha ka mga sundang. Iyang gitigbas si Daigon kinsa mibawos sab sa pagdunggab gamit ang duha ka mga botelyang buak. Gumikan kay pulos na mga hubog ang duha, sama sa salida nagkumbate, naigo sa sundang ang agtang ni Daigon dayon niatras si Billiones. Si Billiones na out balance samtang nagsige og tigbas, nakabawos si Daigon. Nakabuylo si Daigon, gidunggab niya makadaghang mga higayon si Billiones gamit ang buak nga botelya sa ilok ug ubang parte sa kalawasan. Naabtan sila sa gwardiya, gibadlong siya ug nisibat. Samtang si Billiones nakadagan balik sa ilang gi-imnan apan nahagba ug namatay. Si Daigon nadakpan alas 4 na sa kaadlawon sa Huwebes.(GPL)  This posting includes an audio/video/photo media file: Download Now |
| Wright misalbar sa Phoenix batok sa Rain or Shine: PBA Posted: 02 Sep 2021 05:15 AM PDT IPABUTO ni Matthew Wright ang iyang bugtong field goal sa katapusang 2.6 segundos sa duwa aron aswaton ang Phoenix Super LPG ngadto sa makutas nga kadaugan, 78-77, batok sa Rain or Shine sa nagpadayon nga 2021 PBA Philippine Cup sa Don Honorio Ventura State University gym, Huwebes, Septiyembre 2, 2021. Way nahimo gikan sa sinugdanan sa duwa, human masipyat sa iyang 14 ka field goal, si Wright nahimong bayani sa Phoenix pinaagi sa iyang turnaround jumper sa himatyong segundos nga maoy nagkompleto sa ilang dakong rally nga nagpapas sa 15 puntos nga labaw sa Rain or Shine. Diha pa untay kahigayonan nga maka overtime ang Rain or Shine human nga si Beau Belga nakakuha og foul ni Wright nga naghatod kaniya sa free throw line, 1.7 segundos ang nahabilin. Napasulod man tuod ni Belga ang unang free throws apan nasipyat kini sa ikaduha niyang itsa. Nakuha ni Jake Pascual ang bola og siniguro kining giprotektahan hangtod napupos ang oras nga sa samang higayon naghatag sa ikaduhang daog sa Fuel Masters sa pito nila ka duwa. Bisan tuod og kuwatro puntos ray nahimo ni Wright, apan dako kaayo kini og natampo sa ubang departamento diin milangkat kini og 12 ka rebounds ug nakapakatap og lima ka assists. Maayo usab nga nakaduwa sila si RR Garcia ug Jason Perkins kinsa nakatampo og 18 puntos matag usa, sagad niini sa dihang mi-rally ang Phoenix. Mga puntos: Phoenix Super LPG (78) – Perkins 18, Garcia 18, Banchero 14, Melecio 6, Pascual 5, Jazul 5, Muyang 4, Wright 4, Demusis 3, Manuel 1, Calisaan 0, Napoles 0, Chua 0, Rios 0. Rain or Shine (77) – Mocon 17, Belga 17, Torres 12, Santillan 8, Wong 6, Johnson 5, Guinto 4, Norwood 3, Asistio 3, Caracut 2, Nambatac 0, Tolentino 0, Ponferada 0, Yap 0. (JBM)  This posting includes an audio/video/photo media file: Download Now |
| Posted: 02 Sep 2021 05:08 AM PDT Dear Papa Joe, Ako diay si Michelle, 27 years old, minyo ug kasado. Naa na sad koy mga anak. Ang akong suliran karon kabahin ni sa akong kauban sa trabaho na gi tsismis mi ron nga naa daw mi relasyon kay mag-adtuan ang lalake sa amoa. Makit-an ni siya sa amo sad kauban kay silingan ra man sab namo. Pero wa sila masayud nga kahibawo ang akong bana ani kay amigo sila, kaduwa niya sa ML. Pero ang nakita sa uban na ako maoy giadto. Akong giingnan akong bana ani. Moingon man siya nga sagdi nang mga tsismoso diha. Pero angkunon ko nga moadto sad ang lalake nga kauban nako nga wala ang akong bana pero wala man miy dautan nga gibuhat sa ngan lang nga suod sila sa akong bana. Unsa may buhaton ko? Palihug tambagi ko. MICHELLE Michelle, Di gyud na nimo malikayan nga matsismis mo. Daghan nang higayon nga makadungog ka og balita nga giunay ni Pare ang asawa ni Kumpare. Pasalamat ka nga dako og pagsalig imong bana nimo. Pero ayaw og kumpyansa kay basin mamansahan na og malisya labi na mahibaw-an niya nga moadto iyang kumpare kon wala siya nga sila man ta ang suod. Wa sad ka kabalo gipanid-an lang mo sa imong bana, gahuwat makakuha og saktong ebedensya. Kon moanha gani imong kauban nga wa imong bana, tarunga lang og balibad nga ayaw lang sa og dayon kay lain paminawon magpasulod ka og lalake nga wa imong bana. PAPA JOE (sa inyong tampo ipadala lang sa papajoesuperb@gmail.com)  This posting includes an audio/video/photo media file: Download Now |
| Rabacal: Unsay gamit sa face shield? Posted: 02 Sep 2021 05:08 AM PDT NIADTONG Disiyembre 2020 misugod ang Inter-Agency Task Force for the Management of Emerging Infectious Diseases (IATF-EID) pagsugo sa mga tawo nga magsul-ob og face shield, gawas sa mask kon ugaling mogawas sila sa balay. Hugot kining gipatuman labi na sa mga malls. Apan atong na-obserbahan nga mosul-ob lang sila sa face shield kon dunay mananakop. Karong bag-o, wa na estriktuha ang pagamit niini kay wa man kita makabalita nga adunay nadakpan nga wala magsul-ob og face shield. Sumala sa Department of Health (DOH) nga ang face shield makapugong sa pagtakud sa Covid-19 agi sa mata. Kon mao, nganong dili man mahimo nga magsul-ob lang kita og visor o kaha shades kun antipara? Ang World Health Organization (WHO) buot masayod kon anaa bay nahimo ang face shield batok sa Covid-19 kay ang mga Pilipino ra man ang gipugos sa pagsul-ob niini sa tibuok kalibutan, apan grabe man gihapon ang kaso sa Covid-19 sa Pilipinas itandi sa mga nasud nga wa magamit og face shield. Ang pagduda sa katawhan nga gigamit kini og negusyo inay batok sa pandemic. Napalig-on karong bag-o sa dihang nabulgar na sa Senado nga adunay kadudahan kaayong pagpamalit niining face masks, face shield ug ubang medical supplies nga balor og P8.68 billion sa Pharmally, usa ka tindahan nga na-rehistro niadto lang Septiyembre 4, 2019 sa paid-up capital nga P625,000. Si Michael Yang nga gitudlo ni Pres. Rodrigo Duterte isip presidential economic adviser, mipresentar ngadto kang Duterte sa dagkong opisyal sa Pharmally International of Taiwan sa Malacanang. Pagka- Abril 14 ngadto sa Hunyo 10, 2020 si kanhi undersecretary Lloyd C. Lao sa Department of Budget and Management-Procurement Service (DBM-PS) mipalit gikan sa Pharmally Pharmaceutical Corp. sa mga medical supplies nga wala lang niya sutaa pag-ayo ang maong kompaniya. Gipasanginlan usab sa mga senador nga overpriced ang mga face masks ug face shields. Agig tubag ni Presidente Duterte sa pasangil nga adunay anomaliya ang maong pagpalit, iyang gisaway personal ang mga senador nga may pagduda sa maong transaksiyon, si Dick Gordon, Ping Lacson ug Imee Marcos. Apan ang iyang gipasangil nga si Imee Marcos miadto sa Davao City kay buot siyang modagan og bise kang Mayor Sara Duterte Carpio gipanghimakak ni Inday Sara mismo. Ang kuyaw niini kay basin og dunay mahitabong krisis tali sa Senado ug Malacanang kay misaad raba ang Presidente nga dili na niya tugotang motambong ang mga sakop sa iyang Gabinete ug ang mga opisyal sa military sa Senate inquiry. Siya lang kunoy bahala kon ugaling i-contempt sila sa Senado. Kining nahitabo sa Senado mas mapun-an pa inig yagyag na ni Sen.Manny Pacquiao sa dugang anomaliya human unya sa iyang 10-day quarantine. (mannyrabacal1144@gmail.com)  This posting includes an audio/video/photo media file: Download Now |
| Barrita: Bakuna alang sa tanang Pinoy Posted: 02 Sep 2021 05:08 AM PDT USA sa mga nikatap nga estorya sa nisupak sa bakuna sa Covid-19 mao nga mahimong zombies ang mabakunahan. Sa mga pelikula sa mga zombies, ang mga zombies maoy mogukod sa tawong normal. Unsay imong gusto, ikaw maoy mogukod o ikaw maoy gukdon? Apan ang mas mahinungdanong pangutana mao nga nakapalit na ba ang gobyerno og mga bakuna alang sa tanang mga Pilipino nga eligible sa bakuna. Gitubag kining maong pangutana ni Finance Secretary Carlos Dominguez III. Matod pa ni Dominguez, ang gidaghanon sa mga bakuna sa Covid-19 nga napalit sa Pilipinas paigo sa pagbakuna sa tanang mga Pilipino. Ug hayan mabakunahan ang tanan sa buwan sa Enero sa sunod tuig. Si Dominguez niingon nga nakadawat ang nasod og mokabat sa 48.89 ka milyon ka doses sa bakuna gikan sa Marso 1 ngadto sa Agusto 25. Mapun-an kini ug 42 ka milyon ka doses gikan sa Agusto 26 ngadto sa Septyembre 30 ug laing 103.59 ka milyon ka doses gikan sa Oktubre ngadto sa Disyembre. Nigasto ang gobyerno sa Pilipinas, matod niya, og 1.302 bilyones dolyares, ang 1.12 bilyones dolyares niini gikan sa multilateral loans ug 176.5 milyones dolyares gikan sa 2021 national budget aron pagpalit sa 174 ka milyon ka doses. Nipasalig si Dominguez nga way problema ang nasod sa pagpaplit og bakuna batok sa Covid-19. Samtang laing 45 bilyones pesos ang gigahin sa 2022 isip unprogrammed appropriations aron sa pagpalit og booster shots alang sa fully vaccinated. Si vaccine czar Secretary Carlito Galvez Jr. niingon nga 13.3 ka milyon ka mga Pilipino ang kompleto na sa bakuna. Ang maong gidaghanon 17.33 porsyento sa 70 porsyento nga target sa bakuna ug 12.13 porsyento sa populasyon sa Pilipinas. Apan kinahanglan pa ba ang booster shots alang sa fully vaccinated? Wa pa morekomendar og booster shots ang Department of Health (DOH) ug wa pa usab kini maapil sa ilang giproponer nga budget sa 2022. Si DOH Undersecretary Maria Rosario Vergeire miingon nga di pa nila ikarekomendar ang booster shots tungod sa "minimal scientific evidence" alang niini ug kay daghan pa ang wa mabakunahi.  This posting includes an audio/video/photo media file: Download Now |
| Posted: 02 Sep 2021 05:00 AM PDT PASTILAN no, wala kita magtuo nga kining atong honorableng tag-as nga mga opisyal sa gobiyerno mora man sab og mga lab-asera kon mag-tinubagay sa publiko. Mawala man ang ilang pagka-honorable kay mogawas na man nga persolan na ang sinukliay sa mahait nga mga pulong. Morag sab og ordinaryo nga mga tawo nga madala sa ilang garbo ug emosyon. Morag dili mga edukado. Sama aning tinubagay karon tali nila ni Presidente Rodrigo Duterte ug ingon man sa pipila ka mga senador kabahin sa mga kuwestiyonable nga pagpalit og mga mask, personal protective equipment (PPE) ug ubang mga kagamitan sa Covid-19 response sa Department of Health (DOH). Niadto pa ning miaging tuig ang pagpamalit sa maong mga kagamitan nga gidudahan nga adunay mga anomaliya. Ang nakakuha sa kontrata usa ka gamay lamang nga kompaniya ug walay igong kapital, apan dako kaayo ang nakuha nga pahat sa pagpalit sa mga kagamitan. Unya ang mga suod ni Presidente Duterte ang gidudahan nga maoy nagpaluyo ning maong mga kontrata. Naapil man gani si Senador Bong Go kay mga suod pod sa senador ang mga nahilambigit. Mao kini ang gustong imbestigahan sa Senate Blue Ribbon Committee nga gipangulohan ni Senador Richard Gordon. Apan nangugat si Pres. Duterte sa pagdepensa sa mga tawo nga nagpaluyo ning maong multi-billion transaction. Wala kunoy anomaliya. Nahitabo ang tinubagay sa mga senador ug Presidente. Unang namersonal si Duterte pinaagi sa pagtawag ni Gordon og tambok ug tabian. Kay si Gordon lang ang kanunay motabi kon adunay mga committee hearings. Iya usab gisaway ang "hairdo" o hinapay ni Senador Ping Lacson. Pastilan no, nahimo nang personalan ang usa ka lihitimo nga isyo nga angay untang hatagan og katin-awan sa mga nahilambigit niini alang sa kasayuran sa katawhan.(bobbygnalzaro@gmail.com)  This posting includes an audio/video/photo media file: Download Now |
| Posted: 02 Sep 2021 05:00 AM PDT NABANTAYAN nga nikanaug na ang mga kaso sa coronavirus diseases 2019 (Covid-19) sa nakalabay nga mga adlaw human sa grabeng pagsulbong niini sugod sa Hulyo. Hayan usa sa mga hinungdan niini mao ang pagpahugot sa pagpatuman sa mga health protocol. Ang pagpanakod naa sagad sa mga panagtapok, labina sa mga dapit nga sirado. Pun-an pa sa pagsulod sa mas mananakod nga Delta variant. Sa mga siyudad sa Sugbo, Mandaue ug Lapu-Lapu, gipatuman ang liquor ban, dine in sa mga kan-anan ug gipahugtan ang pagpatuman sa mas sayo nga curfew. Bisan gani ang pultahan sa mga public transport gipaablihan aron mas minos ang kahigayunan sa pagpanakod. Namatud-an na man nga ang pagpahugot sa pagpatuman sa health protocol sa nangaging duha ka wave sa Covid-19, epektibo. Kada hugot sa pagpatuman sa mga health protocol ug uban pang mga restriction aron malikayan ang mga tapok, mominos ang pagpanakod. Nagpasabot nga paglikay sa tapok, social distancing ug pagpuyo sa balay epektibo kaayo. Sa ato pa, kon mosunod lang ang publiko sa gipangdili sa kagamhanan samtang naa pa ang pandemic, di makabuylo ang kagaw sa Covid-19 sa pagpanakod sa tawo. Apan ang nakapait lang, gikinahanglan pa sa mga awtoridad nga manakop aron mapatuman ang kamandoan sa kagamhanan. Bisan sa mga barangay, ang mga opisyal haguka kaayo sa pagpatuman sa mga lagda kay basin nahadlok sa pulitikanhong pagsumbalik sa mga lumolupyo nga maigo sa hugtanay nga pagpatuman. Sa laktod, kuwang sa politicial will. Isip responsable nga mga lumolupyo sa Sugbo, wa na unta kinahanglana pa nga magbantay ang kagamhanan aron motuman ang tanan sa mga lagda. Di ba daghan kaayo ang manaway sa kagamhanan tungod sa mga palpak? Apan unsa may katungod nimo kon ikaw di usab motuman sa yano kaayong mga lagda batok sa Covid-19? Wa kay angay kay salawayon ka sab.  This posting includes an audio/video/photo media file: Download Now |
| Ancajas andam makig-away ni Loka Posted: 02 Sep 2021 05:00 AM PDT ANDAM si International Boxing Federation (IBF) junior bantamweight champion Filipino Jerwin Ancajas nga makig-away kang World Boxing Organization (WBO) title holder Kazuto Ioka sa Japan sa usa ka unification bout. Human nadepensaan ni Ioka ang iyang titulo batok kang mandatory challenger Francisco Rodriguez Jr. sa labing ulahi niyang away, iyang gihisgutan si Ancajas nga maoy sunod niyang makontra. Matod ni Ancajas nga posibleng mapahigayon ang ilang away ni Ioka karong Oktubre o Nobiyembre, 2021. (ESL)  This posting includes an audio/video/photo media file: Download Now |
| Super Suroy: Mga tanom pabugnaw dalit sa Cebu Plant Co. Posted: 02 Sep 2021 04:38 AM PDT ANG kamahiligon sa tanom usa sa mga nahimong paboritong "pastime" sa kadaghanan sa miaging tuig. Dili ikalimod nga daghan kanato ang mi-apil usab sa maong uso, kini tungod kay daghan kanato ang natanggong sa atong isig ka panimalay gumikan sa gipahamtang nga lockdown. Gani ang matag suok sa balay napuno sa bisan sa unsang matang sa mga tanom. Nagtrending sa social media ang mga panimalay nga daw sama sa hardin ang mga bahin sa kanhi bakante nga luna nga nahimong sama sa gagmay nga greenhouse nga maoy sagad makita sa newsfeed sa social media sa atong mga kaila. Sagad sa mga mahiligon sa tanom modagsa sa bukid aron makapalit ug mga tanom ug mga lagutmon. Ang tuyo sa uban mao nga makahanggap og presko nga hangin ug mopalayo sa kasaba sa dakbayan. Sagad nga mahimong adtoan ang mga kabarangayan sa bukirang bahin sa Dakbayan sa Sugbo ug sa Lungsod sa Balamban nga anaa motadlas sa Trancentral Highway. NAA RA SA MACTAN Apan karon, dili na kinahanglan motangas pa sa bukid kay mahimo na kaayong adtuon ang dapit nga sayon rang matultolan. Ang dapit na akong gipasabot mao ang Cebu Plant Company nga anaa mahimutang sa Casanta Road, Sityo So-ong, Barangay Mactan, Dakbayan sa Lapu--Lapu. Sa akong pagduaw sa maong lugar nakapahingangha nako mao ang mga nagkadaiyang matang sa mga tanom nga siguro nga hugupan sa mga plantito ug plantitasn. Usa ka 1,000-square-meter nga property nga gihulagway nga paraiso alang sa mga mahiligon og tanom ug niadtong mopasanay niini ngadto sa ilang mga panimalay. Makita sa Cebu Plant Company ang tanan nga kinahanglanon alang sa mga mag-garden. Ang Cebu Plant Company gipanag-iya ni Neil Felipp ug Yasmine Moeller diin makita ang mga tanom sama sa bushes, ferns, herbs, succulents ug cacti nga han-ay kaayong gi-display. Tungod sa ilang kamahiligon sa tanom ilang nahukman nga motukod og negosyo. Nakakuha ang magtiayon og ideya gikan sa laing nasud nga ilang naduaw diin sila namalit sa uban nilang mga tanom. Sa kadtong mga interesado mopalit og tanom igo lang molibot ug sa mapili-an sa counter bayaran mora ka og nangumpra sa grocery store. UNSAY NAA? Palibot sa maong dapit adunay dagkong punoan sa kahoy, kadaghanan mga tanom nga makita mao ang ylang-ylang, nangka ug buri nga naghatag ug landong sa lugar. Hilabihan nakong lipaya sa dihang nakita nako ang mga tanom, nga mahimong mapalit ug magamit isip sagul sa luto sama sa mint, bay leaf ug uban pa. Kadaghanan sa mga tanom nga makita ug mapalit sa Cebu Plant Company gikan sa mga koleksyon sa mga tag-iya. Kompleto sa Aglaonema, Clerodendrum quadriloculare nga naila nga Philippine Glorybower o orchids. Katuyoan sa tag-iya nga hatagan og bili sa bag-ong henerasyon nga mga plantito ug plantitas ang kaanyag sa atong lokal nga tanom. Gawas sa tanaman, ang Cebu Plant Company aduna say mga luna alang sa mga kalihokan alang sa mga seminar sa dili madugay. Naglaraw usab nga mopahigayon og workshop sa mga bisita lakip na sa mga batan-on. Lakip na ang pagkat-on sa re-pot ug pagpintura ang ilang mga kaang. Ang maong lugar adunay fish pond dugang atraksiyon ug dapit nga kapahuwayan sa mga kliyente ug labaw sa tanan coffee shop nga Nimo Brew. CAFE Ang Nimo Brew anaa sa sud sa Cebu Plant Company human nga makapamalit ug mga tanom, haom kaayo ang maong lugar nga mag-relax ug paghupay sa kagutom ug kauhaw. Matilawan ang Nimo Latte, Cold Brew o Italian Soda sa usa ka Al Fresco nga set up, nga swak ilabi na sa karon nga gidasag open-air set-up. Ang nakanindot pa gyud sa maong lugar, mamahimo kaayong dad-on ang inyong fur babies kay pet friendly ang maong dapit. Ang Cebu Plant Company abli sa adlawng Martes ngadto na sa adlawng Domingo, gikan sa 10:00 sa buntag hangtod 7:00 sa gabii. UNSAON PAG-ADTO? Alang sa mga adunay sakyanan o sa kadtong mag-taxi dali ra kini matultulan pinaagi sa paggamit ug directional app sama sa Waze o Google Maps. Sa kadtong mag-commute pinaagi sa mga Bus o E-Jeep, sakay sa magbiyahian ug Mactan Newtown Terminal ug magpahunong sa may Kings Crossing Mactan, ug pipila ka metro makita na ang maong dapit.  This posting includes an audio/video/photo media file: Download Now |
| Grocery items ipanghatag sa Gaisano Country Mall Cyclothon Posted: 02 Sep 2021 04:24 AM PDT MOKABAT ngadto sa P500,000 nga kantidad sa grocery items ang nagpaabot sa mga mosalmot sa Gaisano Country Mall 28th Anniversary Virtual Cyclothon nga gikatakda karong Oktubre 23 - Nobiyembre 7, 2021. Ang mga partisipante gibahin ngadto sa tulo ka mga kategoriya nga mao ang fun ride, advanced ug elite. Ang Fun Ride category motadlas sa 30 kilometros nga gilay-on samtang 100 ka kilometros usab ang sa Advance. Motadlas sa 300 kilometros kadtong mosalmot sa Elite category sa maong kalihukan nga giorganisar sa ActiveHub ug giayudahan sa Smarties Apparel. Ang pagpangrehistro gisugdan na niadtong Agusto 27, 2021. Hatagan og discount sa ilang registration fee ang mga partisipante nga nabakunahan na. Ubos sa basic kit package, imbis nga P1,000, gius-os ngadto sa P950 ang regular rate niini apan mominos pa gyud kini ngadto sa P850 alang niadtong mga early bird registrants nga motapos sa Septiyembre 15. Ang tanang early registrants adunay P100 nga diskuwento sa regular rate nga P1,000. Hingpit nga motapos ang pagpangrehistro sa Oktubre 20. Sa Jersey Kit race package, ang regular rate mokantidad og P2,000 apan P1,900 alang sa nabakunahan. Ang tanang makaabot sa early bird registration period maka-diskuwento og P150. Anaa na niini ang race shirt, e-certificate, medal, raffle ticket ug lootbag of grocery items. Alang sa dugang pakisayod mahimong mobisita sa info@activehub.online o mokontak sa 09176517637. (JBM)  This posting includes an audio/video/photo media file: Download Now |
| You are subscribed to email updates from https://www.sunstar.com.ph/. To stop receiving these emails, you may unsubscribe now. | Email delivery powered by Google |
| Google, 1600 Amphitheatre Parkway, Mountain View, CA 94043, United States | |
No comments:
Post a Comment