https://www.sunstar.com.ph/ |
- Pagtabang sa uban, dalan sa kalampusan
- Comelec gilangaw?
- Supervisor namaligya'g ilimnon, butane lit-ag
- Nagmaneho giatake sa kasingkasing, nabangga
- Digos City PNP lockdown; operasyon way puas
| Pagtabang sa uban, dalan sa kalampusan Posted: 05 Sep 2021 05:29 AM PDT SAGAD atong madungog nga ang usa ka negusyante magtukod og negusyo aron matuman ang pangandoy nga moasenso ug mapalit ang tanang gusto. Apan lahi si Reher Ybañez, tag-iya ug chief executive officer (CEO) sa RLY V Herbal Products. "Wala man ko kahuma'g eskuwela, undergrad lang man ko apan dili kini babag aron makab-ot nato ang atong pangandoy. Sama sa ubang tawo, nangandoy ra sab ko sa una," saysay ni Reher. Matud pa niya lain-laing trabaho iyang naagian, gikan sa pagka-watchman hangtud na-brodkaster, na-station manager ug uban pa. Apan adunay usa ka insidente nga nakapaaghat kaniya nga magtukod og kaugalingong negusyo nga ang tumong motabang sa iyang isig-katawo. "Naa koy boss sa una nga nisaad sa amoa nga 'Dili ko madato kung dili mo mangadato', pero ang iyang saad wa man niya gituman," sugilon niya. Gikan niadtong hitaboa, nisaad sa iyang kaugalingon si Reher nga kung motukod siya'g negusyo, kini mahimong "blessing" sa uban. Sama sa ubang negusyo, daghan siyang naagiang kalisud, apil na niini ang kakuwangon sa pagtoo ug pagsalig gikan mismo sa iyang kabanay sa iyang plano'ng produkto nga haplas ginama sa kamunggay (siyentipikong ngalan Moringa oleifera). Apan wala kini nakabalda sa iyang tinguha nga makab-ot ang iyang pangandoy nga makatabang sa kadaghanan. Ug tungod kay anad na siyang mamaligya daan tungod sa iyang kasinatian sa nagklase-klaseng trabaho iyang naagian, iyang produktong haplas nga Moringa paspas pud ang pagkahalin. Ug niadtong Pebrero 23, 2013, ang kompaniyang RLY V Herbal Products natukod gamit ang "distribution system" nga pagpamaligya. Gikan sa una niining produkto nga My Moringa massage gel mipalapad kini ug karon adunay nay massage oil, lavender, luyang dilaw, Moringa soap ug kape. Usa sa mga rason, matud niya, mao ang pagsalig sa pumapalit sa My Moringa products tungod kay iyang mga produkto aduna pay makitang "bits" sa kamunggay, kamatuoran nga ang My Moringa products gama gayud sa tinuod nga tanum ug dili synthetic. Kini usab ang hinungdan nga ang My Moringa products ug RLY V Herbal Products nga kompaniya nakadawat og nagkadaiyang pasidungog sa nagkalain-laing organisasyon ug award giving bodies sama sa Asian Organic Quality Award nga gihatag atol sa 28th Global Excellence Awards niadtong 2015 didto sa Camp Aguinaldo, Quezon City ug national awardee usab sa Golden Globe Awards for Business Excellence niadtong 2016 nga gilusad didto sa Manila. "Tungod niini nakahatag na ta og mga insentibo sa atong mga sellers ug dealers, sama sa bugas nga karon niabot na og 7,000 ka sako atong nahatag gikan sa pagsugod sa maong insentibo niadtong June 2019," saysay ni Reher. Ang My Moringa aduna nay 360 hubs sa tibuok Pilipinas ug nakapalapad na sa ilang distribusyon ngadto sa Africa, Europe, ug Dubai. "Sa ingon nga pamaagi dili lang isig ka Filipino atong matabangan, kay ang pangandoy sa kompaniya mahimo siyang worldwide ug mahimo siyang dalan nga makatabang ta sa atong isig-kaingon," ingon ni Reher. Dugang niya nga nalipay siya tungod kay sa una siya ang gisuweldohan karon siya na Dako pud iyang pasalamat sa Ginoo kay maskin sa panahon sa pandemic mas nilambo pa hinuon ang My Moringa ug nisamot pa kadaghang tawo iyang natabangan. "Dili babag ang pag-asenso maskin usa ka lang ka undergrad, but the secret is you have to help. Dili ka moasenso kung wala kay kasing-kasing sa pagtabang," hinapos ni Reher.  This posting includes an audio/video/photo media file: Download Now |
| Posted: 05 Sep 2021 03:46 AM PDT GIANGKON sa Commision on Elections (Comelec)-Davao Region nga naglisud gihapon sila sa pagdasig sa mga unang botante nga magparehistro, kon diin pipila na lang ka adlaw matapos na ang voter's registration alang sa 2022 National Elections. Sumala sa abogado nga si Gay Enumerables, Comelec-Davao assistant regional director, atol sa The Talking Heads sa SunStar Davao niadtong Biyernes, Septiyembre 3, 2021, sukad nga nibalik ang voter's registration sa Siyudad sa Davao, namatikdan niya nga gamay lang ang pagdasok sa mga registrants sa ilang mga buhatan. "When we opened to the public, we are trying to hit the target set by the commission. Ang basis naman ng target namin for first time registrants, those from the PSA (Philippine Statistics Authority) data. So we're trying to hit the target. But when we reopened, when we start with the resumption of the registration, medyo hina lang ang punta ng mga tao sa Comelec offices," tin-aw ni Enumerables. Temporaryong gisuspende ang Comelec registration sa Davao City sa dihang ang siyudad gipailawom sa modified enhanced community quarantine (MECQ) ug ang lokal nga panggamhanan sa dakbayan miisyu og Executive Order (EO) No. 30, ang mando nga naglimita sa tanang face-to-face nga aktibidad sa gobyerno. Bisan pa og duna gihapon silay madawat nga mga aplikasyon, di gyud daghan kumpara sa mga miaging registration period. "Maybe because 'yung pandemic nga, they don't want to be in public, and ayaw nila 'yung part of the crowd. Basically, we understand that," tin-aw sa opisyal sa Comelec. Tungod duna lamang pipila ka adlaw nga nahabilin, milaum si Enumerables nga modasok ang katawhan sa ilang mga buhatan. Kini mao ang rason kon nganong ilang gilugwayan ang oras sa registration gikan alas 8 sa buntag hangtud alas 7 sa gabii, aron nga makaakomodar niadtong di makaadto sa ilang mga buhatan tungod kay nagtrabaho. Abli sab ang ilang buhatan matag Sabado ug holidays. Gikan Enero 20, 2020 hangtud Agosto 31, 2021, ang Comelec-Davao miproseso og kinatibuk-ang 320,386 nga aplikasyon. Sa kinatibuk-ang aplikasyon, 157,090 aplikasyon kini alang sa registration, 97,136 alang sa mga mobalhin gikan sa siyudad, distrito o munisipyo, 4,486 alang sa aplikasyon sa transfer with reactivation, 1,457 aplikasyon alang sa transfer with reactivation ug correction of entries, 4,291 aplikasyon alang sa transfer with correction of entries ug 15,630 aplikasyon alang sa pag-reactivate lang.  This posting includes an audio/video/photo media file: Download Now |
| Supervisor namaligya'g ilimnon, butane lit-ag Posted: 05 Sep 2021 03:46 AM PDT BALHOG karon sa prisohan ang usa ka sales supervisor human iyang gibaligyaan og butane ug ilimnong makahubog ang nagtakuban nga pulis Biyernes sa gabii, Septiyembre 4, 2021, didto sa Dalan Claro M. Recto, Dakbayan saa Davao. Subay sa blotter sa kapulisan, usa ka Zambo (bansagon gitago), sales supervisor, 46-anyos nga taga Mabini Boulevard, Davao City ang giposasan human siya positibo nga midawat sa kuwarta gikan sa usa ka pulis. Nasayran nga nagpakaaron-ingnong buyer ang pulis ug gihimo ang buy-bust, diin pag-abot sa Claveria duol sa Hotel Uno, gitunol na sa suspek ang mga butane canister ug mga kinahon nga ilimnong makahubog. Depensa sa dinakpan nga buhi-buhi ra siya ug iyang gidawat ang hitabo sanglit ilegal ang iyang gihimo. Giproseso na ang pagpasaka og kaso sa suspek ning adlawa sa kalapasan sa Republic Act 11332 in relation to Executive Order 37 series of 2021 ug ang Presidential Decree 1865. (Jeepy P. Compio)  This posting includes an audio/video/photo media file: Download Now |
| Nagmaneho giatake sa kasingkasing, nabangga Posted: 05 Sep 2021 03:46 AM PDT USA ka lalake ang giatake sa kasingkasing samtang nagmaneho sa usa ka pickup ug nabangga kini sa poste sa Monteverde Street, Corner Alvarez, Barangay 27-C, Davao City Dominggo sa buntag, Septiyembre 5, 2021. Sa video nga na-post sa My Day Story sa Facebook sa netizen nga si Jayson Lavarez, makita nga gidali og tabang sa mga sakop sa Bureau of Fire Protection (BFP) ang lalaki. Ilang gipahigda ug gihatagan og cardiopulmonary resuscitation o CPR ang biktima. Nagtinabangay ang mga BFP personnel gumikan anaa sa ilang tungod nahitabo. Una niini, nakurat ang mga BFP personnels dihang dunay milagubo sa gawas sa gambalay sa BFP sa Davao City Fire District. Sa ilang paggawas, usa ka pickup nga sakyanan ang mibangga sa usa ka solar panel sa dapit, hinungdan nga ilang girespondehan. Ilang nakita sa sulod nga wala nay umoy ang biktima, hinungdan nga ila kining gigawas sa sakyanan ug gitabang. Gidala dayon sa ospital ang biktima, diin suma pa gikan sa usa ka kasaligan nga impormante, nakabsan ra sab sa kinabuhi sud sa ospital. (Jeepy P. Compio/Jayson Lavarez)  This posting includes an audio/video/photo media file: Download Now |
| Digos City PNP lockdown; operasyon way puas Posted: 05 Sep 2021 03:42 AM PDT BISAN naka-lockdown ang Digos City Police Station gumikan sa Covid-19, paspas gihapon ang ilang gihimong operasyon ug monitoring labot sa mga nahitabong krimen sa Davao del Sur. Sumala ni Police Lieutenant Colonel Vici Anthony Tababa, acting chief of police sa Siyudad sa Digos, bisan pa og lockdown sila, paspas gihapon ang ilang pagserbisyo ngadto sa katawhan. "Even our station is under lockdown, the station's services and operations are still in effect. We will continue to serve the people of Digos and conduct anti-illegal gambling operations amidst the challenges we are facing," sumala ni Tababa. Una niini, dunay taho nga miabot sa kapulisan labot sa ilegal nga ginahimo sa mga dinakpan. Tungod niini, pito ka mga indibiduwal ang nasikop human nagsabot ug nanugal sa Purok 1, Sitio Clamohoy, Barangay Kapatagan, Digos City atol sa gihimong joint anti-illegal gambling operation. Nakuha sa posisyon sa mga dinakpan ang lima ka manok pangsabong usa ka bihag, 20 ka gaffs, usa ka antugan, duha ka coins ug ang salapi nga ilang pusta nga mikabat sa P1,180. Ipasaka na ang kaso Lunes, Septiyembre 6, 2021, didto sa korte. (Jeepy P. Compio)  This posting includes an audio/video/photo media file: Download Now |
| You are subscribed to email updates from https://www.sunstar.com.ph/. To stop receiving these emails, you may unsubscribe now. | Email delivery powered by Google |
| Google, 1600 Amphitheatre Parkway, Mountain View, CA 94043, United States | |
No comments:
Post a Comment