Monday, September 6, 2021

https://www.sunstar.com.ph/

https://www.sunstar.com.ph/

4 ka graduate sa USC ming-top sa Architecture Licensure exams

Posted: 06 Sep 2021 01:59 AM PDT

UPAT ka graduate sa University of San Carlos sa Dakbayan sa Sugbo nalakip sa topnotchers sa August 2021 Architechture Licensure Examination.

Lakip niini ang nag-top 1 nga si Benson Heinrick Booc Go, kinsa nag-una sa tanang 560 ka bag-ong mga arkitekto sa nasod.

Sa listahan nga giluwatan sa Professional Regulation Commission (PRC) Lunes, Septiyembre 6, gipahibaw niini nga sa 849 nga ningkuha sa exams niadtong Agusto, 560 niini ang nakapasar.

Gipahigayon ang ALE sa Baguio, Cebu, Iloilo, Koronadal, Legazpi, Lucena, San Fernando (Pampanga), Tacloban ug Zamboanga niadtong Agusto 27 ug 29, 2021.

Si Go nakaangkon og average rating nga 83.50% nga gisundan sab sa laing graduate sa USC nga si Mark Anthony Veloso Flordelis sa top 2 sa average rating nga 83.40%.

Laing mga tinun-an sa USC nga anaa sa top 10 naglakip nila ni Magdalena Beatriz Lepiten Arriola ug Gerard Luague Borbon nga parehong nakakuha sa 81.60% nga rating.

Matod ni Flordelis nga wala pa siya makatuo sa resulta sa maong eksaminasyon.

"This news is really so overwhelming to me and I feel like I need a day or two to calm down and give you a proper reaction," si Flordelis dihang gikuhaan og reaksyon sa Superbalita Cebu.

Mapasalamaton usab siya sa iyang pamilya, higala, ug sa Ginuo sa naabot niya nga gihulagway pa niya nga wa niya damha.

"I believe I made many guesses in the exam, but I did my best to gather all my knowledge and experience to make educated guesses and it seems that I did well with that. God is really good," matod ni Flordelis.

Sa 83 ka graduates sa USC, 66 ang nakapasar sa ALE.

This posting includes an audio/video/photo media file: Download Now

Pagara 'nakagawas sa prisuhan' human mipiyansa

Posted: 06 Sep 2021 12:13 AM PDT

NAKAGAWAS na sa bilangguan ang iladong boksingero nga si Prince Albert Pagara, kinsa gialegahan nga nangmolestiya sa 14-anyos nga babaye.

Sa YouTube channel ni World Boxing Organization (WBO) bantamweight champion Johnriel Casimero, iyang gipahibawo nga nakagawas na gikan sa Pardo Police Station si Pagara sa niaging adlaw human kini nakapiyansa.

Ang impormasyon nakuha ni Casimero pinaagi sa iyang higalang pulis nga nakadestino sa Pardo Police Station ug mipahibawo sa maong kalambuan.

Si Vince Monterde, ang administrator sa barangay Inayawan, dakbayan sa Sugbo, mikompirmar niini sa Superbalita Cebu.

i Pagara, uban sa iyang live-in partner, anaa nanimuyo sa Inayawan nga ubos sa hurisdiksiyon sa Pardo Police Station.

Nabalhog sa bilangguan si Pagara niadtong Septiyembre 1, 2021 human mireklamo sa kapulisan ang iyang giingong gimolestiya.

Niadtong Septiyembre 2, 2021, si Pagara misuway paghikog sulod sa bilangguan gamit ang liston sa sapatos nga gituok sa iyang liog unya gihigot sa rehas sa selda.

Naluwas si Pagara sa iyang kaubang mga piniriso nga nakakita sa iyang gibuhat.

Si Pagara, 27, adunay 33-1, 23KOs nga rekord isip professional boxer. (Jun B. Migallen)

This posting includes an audio/video/photo media file: Download Now

Jimuel Pacquiao batok YouTuber Boy Tapang?; Sultan maoy sparring partner

Posted: 05 Sep 2021 07:23 PM PDT

Human misulbong og balik sa world ratings, tinguha karon ni Jonas Sultan nga dili usikan ang dugang pang mga oportunidad.

Imbis mobalik sa Pilipinas human sa iyang impresibong knockout nga kadaugan batok ni Sharone Carter niadtong Agusto 14 didto sa Carson City, California, ang kanhi pambato sa nasira na nga Ala Boxing Gym nakadesider nga magpabilin lang una sa US samtang magpaabot sa iyang sunod nga away.

Dunay hugon-hugon nga si Sultah moaway unta karong Septiyembre 11 apan wa kini mahinayon.

Sa samang higayon, si Sultan nagsilbi karong sparring partner ni Jimuel Pacquiao, ang kamaguwangang anak ni eight-division world champion Manny Pacquiao.

Ang batan-ong Pacquiao, matod pa, gikatakdang makigsangka sa YouTuber nga si Boy Tapang nga posibling ipahigayon karong buwana.

Ang taho wala magbutyag kon asa kini ipahigayon ug kanus-a gyud ang petsa. Si Jimuel nabantayan nga hinayhinay nang misunod sa lakang sa iyang amahan sa natad sa pamoksing.

Hinuon di pa matino kon tugotan ba kini sa mga ginikanan nga mamahimo usab nga boksidor.

Sa sayo pa, ang inahan nga si Jinky mipadayag sa iyang pagsupak niini.

Si Sultan, sa iyang bahin, nanghinaot nga ang MP Promotions (Manny Pacquiao) ubos sa pagdumala ni Sean Gibbons makahatag kaniya og away karong Oktubre o kaha sa Nobiyembre ning tuiga.

Si Sultan, 29-anyos, lumad nga taga Tampilisan, Zamboanga del Norte, mao karon ang No. 9 sa World Boxing Association (WBA) ug gipaabot nga iparang kini og dekalidad usab nga fighter nga makapabukad sa iyang kahigayonan nga makaaway na usab alang sa world title fight.

Kon kahinundoman, human mapildi ni Sultan si World Boxing Organization (WBO) bantamweight champion Johnriel Casimero pinaagi sa unanimous decision sa super flyweight eliminator sa 2017, misuway kini paglangkat sa titulo ni Jerwin Ancajas sa International Boxing Federation (IBF) bantamweight division apan napildi.

Human niadto, iyang gidispatsar ang kataganasod nga si Salatiel Amit niadtong 2019 ug bisan pa man tuod og taodtaod nga wa na makaaway sukad niadto, iyang na-knockout si Carter (12-4) alang sa iyang 17-5, 11 knockouts nga baraha.

Ang presensiya sa iyang manager nga si Junnie Navarro kinsa usa usab ka Zamboangeno naghatag og kadasig ni Sultan sa iyang padayon nga training ubos sa pag-abag sa trainer nga sila si Jorge Capetillo ug Marvin Somodio.

Si Navarro ug ang co-owner sa MLV Zamboanga Valientes nga si Mike Venezuela maoy lig-ong nagsuporta sa boxing career ni Sultan sukad sa niaging tuig.

Gipasalig ni Navarro nga si Sultan magpadayon sa pagpakondisyon aron permi kining andam sa bisan unsang orasa kon siya matanyagan og away. (JBM)

This posting includes an audio/video/photo media file: Download Now

Nangamatay sa Covid mikunhod

Posted: 05 Sep 2021 06:53 AM PDT

Sukwahi sa mga nangaging buwan nga napuno ang mga punerarya, karon nabantayan ang pagminos sa mga minatay alang sa cremation sa usa ka dakong punerarya sa siyudad sa Sugbo.

Gibutyag sa manager sa punerarya, kinsa nihangyo nga magpatago lang sa iyang ngalan, nga sa milabayng buwan sa Agusto, nikabat sa 110 ka minatay ang ilang gidawat alang sa cremation ug direct burial, ang 90 porsiyento o 99 ka minatay, ang gi-cremate. Gikan sa 99 minatay, 90 porsiyento niini ang positibo sa Covid-19.

Dugang pa sa manager nga kon buwan sa Hulyo ug Agusto, mi-cremate ang ilang crematory machine og lima hangtod unom ka minatay ug puno pa gyud ang reservations sud sa tulo ka adlaw.

Ang ubang pamilya sa mga namatay kaniadto gitambagan nalang og direct burial gumikan sa kapuno sa ilang schedule.

Apan sa pagka Septiyembre 4, Sabado, adunay upat ka minatay ang nakaskedyul nga i-cremate ug giisip nga normal kining operasyon. Gani bakante pa ang tanang slot sa cremation alang ugma.

"Di na gyud in-ana kataas ang pila sa cremation, unlike before, even tomorrow, wala pami schedule cremation. Taas kaayo, dako kaayo og pagkababa which is a good sign," matod sa manager.

Naay manawag kon available ba ang crematory, inquiries lang. Para namo it's a good sign, at least effective ang atoang mga pamaagi sa pag-control sa pagkuyanap sa virus," dason niya.

Malipay ta nga nihinay na ang death, para sa tanan man gyud ni ang gibuhat sa gobyerno," dugang sa manager.

Ang proseso sa cremation molanat og tulo ka oras apil na ang cooling ug pagpulbos sa minatay nga gikan gi-cremate.

Ang maong punerarya nakapalit og dugang duha ka freezer diin unom ka minatay ang masulod niini. Anaa sa 10 ka minatay ang masulod sa ilang upat ka freezer sa pagkakarun.

Giklaro usab niini nga ang isulod sa freezer kadto lang mga namatay nga dili positibo sa Covid-19 samtang ang mga nagpositibo sa virus, kinahanglang i-cremate o ilubong dayon.

Gikataho usab sa Superbalita Cebu sa miaging semana nga wala nay naglinya nga pasyente sa karsada sa gawas sa mga emergency room (ER)sa mga ospital sa dakbayan nga nanagdala og oxygen tanks.

Apan ang taho gikan sa manedyer sa punerarya wala pay opisyal nga kompirmasyon gikan sa Department of Health (DOH) 7 o Emergency Operation Center (EOC) sa dakbayan sa Sugbo.

This posting includes an audio/video/photo media file: Download Now

Dondon: Wa ko mangluod

Posted: 05 Sep 2021 06:52 AM PDT

"Wala ko mangluod kay wala ko pilia isip kandidato pagka-vice mayor sa among partido (Barug), let's get that out of the way."

Kini ang post sa FB page ni Cebu City Councilor Donaldo 'Dondon' Hontiveros nga nagkompirmar sa iyang pagkandidato nga independente sa eleksiyon sa Mayo 2022.

Si Hontiveros, sa iyang official statement kagahapon, ang Partido Barug "can draft their line-up now without me."

Gihimakak niya ang hugonhugon nga nangluod human wala pilia nga kandidato sa pagka bise mayor.

Si Hontiveros maoy numero uno sa konseho sa miaging eleksiyon ubos sa Barug.

Samtang, laing kasamtangang konsehal nga sakop sa Barug nga si Phillip Zafra ang nipadayag sa iyang pagbiya sa partido apan wala pa mobutyag bahin sa iyang plano sa pulitika labi na sa umaabot nga eleksiyon.

Atol ning pagsuwat, ang Barug wala pay opisyal nga linya sa kandidato gawas sa mga hugonhugon ning nagsingabot filing sa certificate of candidacy (COC) sa sunod buwan. (JJL)

This posting includes an audio/video/photo media file: Download Now

1.4M lang nagpa-enroll sa region 7

Posted: 05 Sep 2021 06:47 AM PDT

Base sa talaan niadtong Biyernes, Septiyembre 3, 1.4 milyones pa lang ang nagpa-enroll sa publiko ug pribadong mga tunghaan sa Central Visayas (CV), sumala sa Department of Education (DepEd) 7.

Si Dr. Salustiano Jimenez, direktor sa DepEd 7, nagkanayon nga duha ka milyon ang ilang target nga motungha sa elementarya sa rehiyon.

Sa pagkakaron, Septiyembre 6, walo na lang ka adlaw sa pag-abli sa bag-ong school year (SY) sa sumad nga Lunes, Septiyembre 13.

Si Jimenez nag-awhag sa mga ginikanan ug guardians sa pagpa-enroll sa mga bata sa SY 2021-2022.

Matod niya, ang DepEd 7 mogamit sa kombinasyon sa nagkalainlaing modalities o pamaagi sa enrolment. (WBS)

This posting includes an audio/video/photo media file: Download Now

Editoryal: Magparehistro

Posted: 05 Sep 2021 06:46 AM PDT

Usa ka sagrado nga katungod sa matag lungsoranon ang pagbotar sa eleksiyon, lokal ug nasudnon, aron pagpili sa mokupot sa sensitbong renda sa kagamhanan. Apan unsaon sa pag-ehersiyo sa naasoy nga katungod kon wala magparehistro sa Commission on Elections (Comelec). Mausik ang imong katungod. Dili takos sa benepisyo gikan sa gobiyerno kon walay pagpakabana sa paghulma sa pundasyon sa organisado ug lig-ong katilingban.

Human naputol tungod sa pag-isa sa quarantine status sa Covid-19 sa Sugbo ngadto sa modified enhanced community quarantine (MECQ), nabalda ang rehistrasyon sa Comelec alang sa nasudnon ug lokal nga eleksiyon karong Mayo 2022. Apan karong adlawa, Septiyembre 6, mobalik ang rehistrasyon uban sa gipalapdan nga dapit sa pagrehistro aron mas daghang maatiman ug mapatuman usab ang minimum health protocol.

Ang registration sites moabli gikan sa alas 8:00 sa buntag hangtod sa alas 5:00 sa hapon, Lunes hangtod sa Sabado, bisan sa adlaw nga official holiday sa kagamhanan. Aron mas dali, ang moparehistro mosulod sa www.irehistro.comelec.gov.ph aron mo-fill-up sa porma ug iprinta. Dad-on ang kopya sa Comelec site aron kuhaan og biometrics.

Timan-i, ang rehistrasyon hangtod lang sa Septiyembre 30. Wala nay lugway human sa sunod buwan mao na usab ang pagduso sa certificate of candidacy (COC) sa buot magpapili sa posisyon sa kagamhanan. Busa ning sayo pa, maayo magparehistro na. Dili magdasok o magdalidali dapit sa kataposan nga mga adlaw sa tagal sa rehistrasyon. Putlon nato kini nga negatibong kinaiya sa katawhan, ang 'unya-unya lang.'

Ang aktibong lumolupyo ug nagpakabana nga lungsoranon sa katarong dugokan sa demokrasya ug kausaban, sihag ug malambuong pagtimon sa kaugmaan sa nasod sa umaabot nga liderato sa kagamhanan nga atong mapili sa matag eleksiyon.

Magparehistro na kita.

This posting includes an audio/video/photo media file: Download Now

Barrita: Overpriced

Posted: 05 Sep 2021 06:45 AM PDT

Matag karon ug unya, mopagawas og market reports ang mga estasyonan sa radyo. Usa ka tawo nga nakadungog sa market report namalit og isda sa Pasil. Nasayran niya nga mas mahal ang presyo sa mga isda didto kay sa gitaho sa estasyonan sa radyo.

Iyang gipahibawo niini ang usa ka tindera. Wa gani bisan na lang mohangad ngadto kaniya ang tindera ug igo lang niingon, "Didto lang palit og isda sa estasyonan sa radyo kay mas barato man kaha ilang presyo."

Apan di makapahimuot karon ang mga taho bahin sa pagpalit sa gobyerno og mga overpriced nga face masks, face shields, personal protective equipment ug mga Covid-19 test kits.

* * *

Samtang overpriced ang gipamalit sa gobyerno, nasayran sa imbestigasyon sa Senado nga undercapitalized ang kompaniya nga gipalitan. Ang misteryuso nga Pharmally Pharmaceutical Corp. P625,000 ra ang capital apan nakakuha og kontrata nga P8.7 bilyones.

Gibutyag sab ni Senador Risa Hontiveros ang mga taho nga ang mga opisyal sa Pharmally ug ang mother company niini nga Pharmally International Holding Co. Ltd. mga wanted sa mga tinugyanan sa balaod sa Taiwan tungod sa financial crimes.

Si Senador Panfilo "Ping" Lacson miingon nga mahinungdanon ang presyo sa gipamalit sa gobyerno kay ang pundo nga gipalit niini gikan sa katawhan nga karon nag-antos sa pagkawagtang sa ilang mga trabaho tungod sa Covid-19 pandemic.

* * *

Gidepenshan sa Malacañang ang pagpalit sa giingong overpriced pandemic supplies pinaagi sa pagkomparar niini sa gipamalit sa miaging administrasyon sa susamang supplies.

Subay sa website sa Department of Budget Management-Government Procurement Policy Board, ang Procurement Service sa DBM mipalit sa miaging tuig gikan sa Pharmally og duha ka milyon ka PPE nga tag P1,910 kada set o P3.82 bilyones; 10 ka milyon ka surgical mask nga tag P22 ang buok o P220 milyones; ug 41,400 ka Covid-19 testing kits (50 tests per kit) nga tag P69,500 ang unit o P2.8773 bilyones.

This posting includes an audio/video/photo media file: Download Now

Nadela: KBP Month panahon sa pandemiya

Posted: 05 Sep 2021 06:45 AM PDT

Akong yukbo sa Kapisanan ng mga Brodkaster ng Pilipinas (KBP) Cebu Chapter ug sa mga kaubang brodkaster atol sa kasaulogan sa KBP Month 2021. Ikaduha na ni nga kasaulogan nga ang pandemiya niputol sa tradisyon sa pagbukas sa selebrasyon nga himuon pinaagi sa usa ka mabulokon nga parada, santos nga misa ug mga presentasyon sa matag radyo ug TV station nga sakop sa kapunongan. Kutob nalang ta sa paghandum kay lagi ang health protocol hugot man nga nagdili sa mga tapoktapok. Kinsay makalimot sa mga programa sa opening salvo hangtod na sa closing program.

Diha toy panahon nga matag adlaw, ang nagkadaiyang departamento sa usa ka sibyaanan motagana gyud og mga presentasyon sa usa ka gabii sa dili pa ang culmination night. Pananglit ang News ang Public Affairs Department. Usa ka gabii nga ang mga reporter ug anchor mosalida sa entablado nga may banda pa nga moapil og lingaw sa mga bisita. Naka-host sab ko ka usa ani diin ang ka alegre ilabi na ang raffle sa mga nindot nga items maoy labing kulbahinam nga bahin sa programa.

Mao sab sa Drama Night, Engineering Night, Admin ug uban pang departamento modumdum sa ilang naandang tulomanon isip pagpalambo sa diwa sa panaghiusa sa mga tawo nga nag-alagad sa industriya. Tungod ni Covid-19, napapas ang tanan. Limitado na kaayo ang kalihukan. Hinuon bisan pa man sa pandemiya, nakita nga mas lagsik ug determinado ang KBP pagtuman sa iyang responsibilidad alang sa mas mabungahon nga panibya.

Di ba tinuod nga nisamot ka sensitibo ang papel sa KBP ning panahon sa pandemiya. Dili lalim ang mangita og balita nga gisap-ongan ang katunga sa nawong nianang face mask. Nakasulay ko og sul-ob ana pipila na ka tuig ang nakalabay. Kadtong flash flood sa Ormoc City maoy akong gipasabot.

Ang face mask gisul-ob sa halos tanang tawo nga akong nahinagbuan sa mga dapit nga naigo sa makalilisang nga baha. Ang rason mao ang di masingo nga kabaho tungod sa daghang nangamatay atol sa trahediya. Taudtaod sab mi didto. Kay gawas sa pagpangita og balita, nagpahigayon man sab mi og relief operation para sa mga biktima.

Kinsay magtuo nga ang pagsul-ob og face mask niadtong panahona masundan paglabay sa katuigan. Dili basta basta kay tibuok kalibutan ang naghimo niini. Ang pandemiya wala gyud damha nga niabot ug nipugong sa atong panlihoklihok. Ang nakaparat ra ba kay sama sa ubang isyu, ang pandemiya gikaluhaan sab og fake news gikan sa nagkadaiyang tinubdan. Mga fake news nga sagad mokatap diha sa social media may labot sa pandemiya.

Mao ni ang hagit sa KBP ning panahona, unsaon pag-alkontra sa mga mini nga propaganda labot sa Covid-19.

Mabuhi ang KBP!

This posting includes an audio/video/photo media file: Download Now

Talk to Papa Joe: Tsismosa

Posted: 05 Sep 2021 06:41 AM PDT

Dear Papa Joe,

Tagoa lang ko sa ngan nga Dado, minyo sa babaye nga grabe ka tsismosa. Ug mao ni ang akong problema.

Sa di pa mi minyo, daan na ni nga tsismosa ang akong asawa. Nikalma ni dihang nakasal mi ug nakatrabaho siya. Nalingaw sab siya sa ginagmay namong negusyo. Apan mihinayhinay og balik ang iyang bisyo pagsugod sa pandemic kay naundang siya sa trabaho kay nanirado ang kompaniya nga iyang gitrabahoan. Ang iyang gi-focus mao na lang ang among gamay nga negusyo.

Karon, nibalik na sab ang iyang katsismosa ug kani ang rason nganong pirme siyang makakita og away ug nauwaw na kaayo ko ug ang among mga anak. Di ra ba mopatuo kon tambagan namo kay gatuo siya nga sakto siya pirme.

Paps, unsa kaha ang among buhaton aron mahunong siya aning iyang sigeg pang tsismis unya mangluod kon nganong wa siya namo labani. Daghang salamat sa pagtambag.

DADO

Dads,

Naa gyud na sa nature sa ubang tawo, lalake ug babaye, ang pagkatabian ug di ra ba moangkon nga sila sayop o nagsulti sila ani o ana. Bisan pa lagi kuno og ibala sa kanyon.

Kon di siya maminaw, pasagdahi na lang kay sa kamo na ang mag-away. Mao na ang imo nga isulti sa inyong mga anak aron di na lang sila mopansin kon unsa na sad ang sudlan nga gubot sa ilang mama. Ayaw lang pagpalit kon unsa ang iyang masudlan as long as kanang di magdapatay, baba ra kutob. Moundang ra na siya kon makasugat siya og grabe nga hitabo. Ayha na siya maleksyon.

Papa Joe

(sa inyong tampo ipadala lang sa papajoesuperb@gmail.com)

This posting includes an audio/video/photo media file: Download Now

TB program apektado sa Covid-19 pandemic

Posted: 05 Sep 2021 05:30 AM PDT

Taliwala ning pandemiya sa coronavirus disease 2019 (Covid-19), ang tuberkulosis kun TB mao gihapon ang nag-unang sakit nga makapatay sa mga Filipino.

Mao kini ang gibutyag sa Center for Disease Control and Prevention (CDCP) sa Department of Health (DOH) apan, ang programa ug mga inisyatiba sa TB naapektuhan sa kabalaka sa pandemiya.

Si Dr. Sharon Azenith Laurel, regional medical coordinator sa TB program sa DOH 7, nagkanayon nga anaa gihapon ang stigma nga nagpalibot sa sakit nga TB, nagpabilin gihapon nga hagit hilabi na sa pandemiya.

"That is also one factor why a lot of patients with TB symptoms refuse to go to health centers for screening because they don't want to be labeled as TB (patients). Another misconception is that TB is a disease of the poor," sigon niya.

"We don't get to see many patients coming in seeking consultation for TB now also because they fear Covid," dugang niya.

TB SURVIVOR

Usa ka TB survivor gikan sa Cebu ang nipaambit sa iyang kaagi pagbuntog sa sakit ug sa stigma gikan sa laing tawo.

Si Josephine (dili niya tinuod nga pangalan), 41, ug usa ka inahan ug Cebuana TB survivor sulod sa walo na ka tuig karon, nagkanayon nga normal ang kaguol ug kabalaka panahon nga makadawat og diagnosis, ilabi na sa sakit nga TB, apan dili kini ang katapusan ug aduna pay mahimo.

Nagpangedaron siya og 29 sa dihang gibati siya og sakit niadtong 2008. Nakasinati siya og walay hunong nga ubo ug kalit nga pag-ubos sa timbang. Gihilantan usab siya matag hapon ug nakasinati siya og sakit sa dughan ug sa iyang likod.

Ang giila nga upat ka mga sintomas sa sakit nga TB, matod sa DOH, mao ang duha ka semana nga ubo, duha ka semana nga hilanat, kalit nga pag-ubos sa timbang sa tawo, ug ang di masabot nga pagsingot sa lawas matag gabii.

Sa samang tuig, human siya moagi og check up sa usa ka pribado nga klinik sa Cebu, na-diagnose siya og pneumonia ug naospital.

Ang pneumonia, matod sa World Health Organization, usa ka acute respiratory infection sa baga rason sa nagkalainlaing infectious agents sama sa virus, bacteria, ug fungi.

Human sa upat ka tuig, niadtong 2012, pagdayon og uli niya gikan sa usa ka kasal nga iyang gitambungan, siya nag-ubo og dugo sa labing unang higayon.

Tungod niini, nagpa check-up na usab siya ug nagpa x-ray ug didto nakita nga TB diay ang iyang gibati.

"Duha-duha sad ko'g sulti sa akong bana kay kuyawan lagi ko masuko siya ba. Pagluwa nako ato og dugo, luya kaayo akong lawas," saysay niya.

Apan tuod wala nasuko ang iyang bana kaniya, gani giubanan siya niini hangtod nga siya naayo na sa TB.

Tungod kay nakagasto naman sila sa pagpa-check up ug pagpatambal niya sa pneumonia, matod niya, dako nga tabang nga niduol sila sa ilang City Health Office.

Matod ni Josephine, nitumar siya og halos tag tulo ka tabletas sa tambal kada human og kaon sulod sa unom ka buwan. Mag-sputum exam sab siya kada duha ka buwan hangtod nga nadeklarar siya nga TB-recovered.

Gidugang niya nigamit usab siya og iyang kaugalingon nga mga gamit pangkaon aron dugang proteksyon alang sa iyang pamilya.

SAYOP NGA LAKANG

Matod hinoon ni Dr. Laurel, walay sayop sa pagbuhat og mga extra nga lakang aron pagpanalipod sa mga kauban, apan giklaro niya nga dili makuha ang sakit nga TB sa paggamit sa mga gamit sama sa plato ug kutsara sa mga tawo nga adunay TB.

Dugang niya di usab kinahanglan nga ilahi og dugay ang tawo nga nagpaayo ug nag-inom na og tambal sa TB.

Matod niya, bacterial infection ang TB ug di kini hereditary. Dili usab tanan nga aduna niini makatakod na dayon sa uban kay chronic nga sakit.

Matod niya, 30 porsiyento sa mga aduna niini, kinsa mga immunocompromised, kon hinay nga immune system, ang matakdan.

Matod ni Laurel, base sa datus sa DOH 7, ang TB case detection rate sa Central Visayas sa first quarter sa 2021, anaa sa 36 porsiyento (3,948 cases registered over 11,091 target per population) mas ubos kaysa first quarter sa 2020 nga anaa sa 54 porsiyento (6,034 cases registered over 11,091 target per population).

Matod niya, dili kini reflective sa actual cases tungod kay base lang kini sa reporting sa Covid-19 pandemic.

Niadtong Abril 30, 2021, gilusad sa Cebu City government, sa DOH 7, ug sa PhilHealth ang City-Wide TB Elimination Campaign (CiTEC), usa ka joint undertaking aron masumpo ang TB ug mapatuman usab ang Universal Health Care (UHC) Act pinaagi sa pag-translate niini ngadto sa lokal nga mga polisiya.

Ang CiTEC program gisuportaan usab sa USAID-TB Innovations and Health Systems Strengthening (TB-IHSS) ug USAID-Protect Health.

BARANGAY SCREENING

Sigon ni Dr. Raymond Ogan, Cebu City Health TB coordinator, nga unang napatuman ang CiTEC sa mga barangay sa Pasil ug Mambaling sa siyudad sa Sugbo, gikonsiderar nga highly-urbanized ug congested areas sa Sugbo.

Matod ni Dr. Laurel, gi-prioritize ang densely populated areas tungod kay gituohan nga daghan ang undernourished populations dinhi.

Gipatuman sa Mambaling ang Active Case Finding (ACF) samtang ang Enhanced Case Finding (ECF) ang gibuhat sa Pasil. Ang duha nagpatuman sa screen all approach pinaagi sa TB navigators aron pag-screen ug pag-monitor sa TB symptomatics.

Makabag-o nga mga teknolohiya ang gigamit sa CiTEC sama sa x-ray with artificial intelligence sa Mambaling aron makuhaan ang turnaround time gikan sa screening hangtod sa treatment ug ang rapid diagnostic laboratory exam (GeneXpert) sa duha ka barangay.

Bisan naundang pa sa pagkakaron ang mga aktibidad sa CiTEC tungod sa community quarantine, naka-screen na og 4,676 ka mga residente sa Barangay Mambaling.

Niini, 25 ang nahibaw-an nga positibo sa TB ug nagtambal na karon.

Sa 3,284 ka mga tawo nga na-screen sa CiTEC sa Barangay Pasil, 5 ang dunay TB.

"Early detection is longer time (to live) and less chances of infecting others, especially the most vulnerable ones," matod niya.

This posting includes an audio/video/photo media file: Download Now

Ormoc Development Team mibutyag sa ilang line-up

Posted: 05 Sep 2021 05:27 AM PDT

ORMOC CITY -- Pipila ka semana sa dili pa ang pag-file sa certificate of candidacy (COC), gibutyag ni Ormoc City Mayor Richard Gomez ang pipila ka personalidad nga posibleng mokumpleto sa line-up sa Ormoc Development Team (ODT).

Pipila sa mga personalidad nga gipili dili na bag-o sa pagpanerbisyo ug sa natad sa pulitika.

Gipili sa mayor mao sila si incumbent Leyte board member Caren Torres-Rama, Kananga Leyte Municipal Administrator Atty. Lito Solibaga, kanhi Ormoc City Mayor ug kongresista Toto Locsin Sr., City Health Officer Dr. Edmund Keirulf ug Philippine Basketball Association superstar Rey Evangelista.

Hulipan sa nahisgutang mga personalidad ang pwesto sa kasamtangan nga mga miyembro sa Sangguniang Panlungsod nga matapos na ang termino.

Mohuman sa ilang termino mao sila si Vice Mayor Toto Locsin Jr., Kon. Tommy Serafica, Kon. Vince Rama, Kon. Bennet Pongos ug Kon. Gerry Penserga.

Gitug-an ni Gomez nga dili lang usa moapil si Vice Mayor Locsin sa pulitika kay motabang kini sa iyang amahan nga si Toto Sr.

Si Cong. Lucy Torres- Gomez, wala pa gihapon pinal nga desisyon kon magpapili pagka senador.

Alang kang Mayor Gomez, mas gusto niya nga magmayor sa Ormoc iyang asawa ug bise mayor niini si Toto Sr.

Si Mayor Gomez magpapili pagka kongresista sa kwatro distrito sa Leyte.

Nihatag usab sa iyang inisyal nga tubag si Atty. Solibaga sa iyang radio program nga Krusada bahin sa tanyag ni Gomez.

"I'm so flattered nga ma-consider ta sa Ormoc Development Team labi na gyod si Mayor Richard ang namahayag niini. So, kinsa ba kaha ang mobalibad niana kung wa lang tay kakulian. But ato ning tan-awon ang anunsyo. As of now, connected ko sa LGU-Kananga. So far, daghan pa ng storyahunon but as of the present magtrabaho pa ta sa LGU-Kananga," matod ni Solibaga.

Sa paghimo ning balita, wala pay klaro kinsa ang moatbang sa ODT. (JKDP)

This posting includes an audio/video/photo media file: Download Now

MCFS mihimo og assessment sa pasilidad sa kabarangayan sa pagpalambo sa ilang serbisyo

Posted: 05 Sep 2021 05:24 AM PDT

Alang sa mas paspas nga pagresponde sa sunog, ang Mandaue City Fire Station (MCFS) nagpahigayon og hose mapping sa tanang eskinita sa 27 ka mga barangay sa dakbayan.

Matod ni CFSupt. Nelson Ababon, fire marshal sa MCFS, usa kini ka programa nga ilang gitutokan karon sukad sa buwan sa Agusto.

Sigon niya nga ilang gitan-aw kon unsa ang mga eskinita nga dili masudlan og emergency vehicles sama sa fire truck ug ambulansya.

Human niini, ilang ipintal ang numero sa gitas-on sa hose nga ilang kinahanglanon kon ugaling adunay sunog nga mahitabo sa lugar.

Pinaagi niini, dili na kinahanglan nga magsukod pa ang mga bombero sa panahon nga masunog ang lugar ug motawag pa sa ilang aksiyon kon kuwang og hose. Mao kini ang hinungdan nga malangay sa pagpawong ang bombero sa kayo, sigon ni Ababon.

Gawas niini, sigon ni Ababon nga gipintal sab nila ang hotline number sa ilang estasyon.

Tungod niini, mahibalo na ang mga residente kon asa sila manawag kon adunay emerhensya sa ilang lugar.

Gipaambit niya nga adunay mga higayon nga moingon ang mga residente nga dugay sila nakaresponde apan sa ilang pagpangutana nila moingon kini nga wala sila nahibawo sa numero nga tawagan.

Sa ingon man, gipahibawo nila Ababon ang komunidad sa maong inisyatiba.

Tungod kay wala silay insaktong ekipo alang sa pagpawong sa sunog sulod sa suok nga lugar, matod ni Ababon, nga hose mapping una ang ilang mabuhat sa pagkakaron aron matubag ang maong mga problema.

Ang labing ulahi nga insidente sa sunog sa Dakbayan sa Mandaue nahitabo kaniadtong Agusto 16 nga adunay 25 ka balay nga nasunog diin nakapahawa sa 412 ka mga indibiduwal sa Sitio Riverside, Barangay Subangdaku. (KFD)

This posting includes an audio/video/photo media file: Download Now

141 ka trabahante sa Lapu-Lapu nakadawat na sa suweldo sa GIP

Posted: 05 Sep 2021 05:22 AM PDT

Moabot sa 141 ka mga Oponganon nga nakapahimulos sa Government Internship Program (GIP) nga programa sa Department of Labor and Employment (Dole) 7 ang nakadawat na sa ilang suweldo niadtong Septiyembre 2, Huwebes, sa covered court sa Barangay Buaya.

Si Kongresista Paz Radaza mibutyag nga ang maong mga benepisaryo sa GIP gipatrabaho sa nagkadaiyang opisina sa barangay sa dakbayan sulod sa tulo ka mga buwan.

Gisuweldohan sila og P404 matag adlaw ang matag usa kanila.

Pinaagi sa pagpaningkamot sa kongresista, ang 141 ka mga benepisaryo nakasinati og unsaon ang pagtrabaho sa gobyerno ug mangalagad sa publiko.

Dako na usab unya ang tsansa nila nga makatrabaho sa gobiyerno sa umaabot hilabi na kon sila irekomendar sa mga buhatan diin sila nipaubos sa ilang internship.

Ang mga barangay nga adunay benepisaryo sa GIP nga nakadawat sa ilang suweldo mao ang Barangay Mactan, Poblacion, Gun-ob, Buaya, Looc, Caohagan ug Sabang, isla sa Olango.

Moabot sa P561,298.44 ang pundo nga gigahin sa Dole-7, sumala ni Radaza.

Ang mga nakatrabaho sa maong programa mao kadtong nag-edad og 18 ngadto sa 30 anyos ug gradwado sa high school ug technical vocational school nga walay work experience.

"Gi-look into gyud nato nga ang mga less fortunate maka-avail ani kay dako nani og kaayohan para nila labi na karon nga panahon sa pandemic," matod ni Radaza sa Superbalita Cebu. (GCM)

This posting includes an audio/video/photo media file: Download Now

Tigbulkit og ligid girakrakan sa nagsakay og motorsiklo

Posted: 05 Sep 2021 05:22 AM PDT

Usa ka tigbulkit naangol human rakraki sa riding-in-tandem sa sa national highway sa Barangay South Poblacion, lungsod sa San Fernando, alas 9:10 sa gabii, niadtong Sabado, Septiyembre 4.

Si Roger Zamora Medequillo, 39, dunay kapuyo ug taga Barangay Pitalo, San Fernando, nalandig sa tambalanan.

Wala pa mailhi sa kapulisan ang duha ka tawo nga namusil nga nagsakay sa usa ka motorsiklo apan wala makuha ang numero niini sa mga saksi.

Si Police Corporal Adrian Dipay sa San Fernando Police Station nga nahinabi sa Superbalita Cebu, nagkanayon nga ang biktima duty sa vulcanizing shop niadtong higayona daplin sa naasoy nga dan.

Apan kalit nga niabot ang usa ka motorsiklo ug ang angkas niini nikanaug ug niduol sa biktima dayon mipauwag mga bala.

Bisan kon naigo na ang biktima, nakahimo pa kini sa pagdagan palayo sa gunmen.

Ang mga mamumuno dali nga nisibat ug wala na masuta kon asa mipadulong.

Ang biktima gidala sa tambalanan ug kritikal ang kahimtang niini.

Wa pa masuta sa kapulisan kon unsay motibo sa naasoy nga krimen. (GPL)

This posting includes an audio/video/photo media file: Download Now

Ulitawo gidunggab

Posted: 05 Sep 2021 05:03 AM PDT

Kritikal ang kahimtang sa usa ka ulitawo human dunggaba sa iyang silingan, alas 7:40 sa gabii niadtong Sabado, Septiyembre 4 sa Barangay Tal-ot, lungsod sa Barili.

Si Bernie Caballes, 26, ulitawo nagpuyo sa nahisgutang lugar, talandugon ang kahimtang nga naa sa tambalanan sa dakbayan sa Sugbo.

Samtang, si Marvin Ponsica, ulitawo, ug balot vendor sa maong dapit, nitahan sa kapulisan sa alas 9:00 sa buntag sa Dominggo, Septiyembre 5.

Si Police Staff Sgt. Jeffrey Alpas sa Barili Police Station nga nahinabi sa Superbalita Cebu, nagkanayon nga ang suspek hubog nga nagsakay sa iyang motorsiklo ug niagi kini sa panimalay sa ilang silingan, iyang nakit-an ang biktima nga hubog usab.

Nihunong ang suspek ug giduol niya ang biktima ug nagkalalis silang duha.

Gumikan niini, ang biktima milakaw agi sa barangay road apan gisundan siya sa suspek ug gidunggab makadaghang higayon sa lawas.

Ang suspek nisakay sa motorsiklo palayo sa lugar, samtang ang biktima gidala sa Vicente Sotto Memorial Medical Center.

Ang suspek dihang nitahan sa kapulisan, nangangkon nga giatngan sa biktima hinungdan nga napugos siya sa pagdepensa sa iyang kaugalingon. (GPL)

This posting includes an audio/video/photo media file: Download Now

Basil: Mahal, Tatay Remigio idungan og lubong karon

Posted: 05 Sep 2021 04:43 AM PDT

Manila – Unang adlaw sa bilar ni Mahal nga gipahgiayon sa Cosmopolitan Funeral Homes sa likod lang sa simbahan sa San Vicente sa Tandang Sor.

Didto ko akong kauban ang friend ko nga vlogger nga si Benny Andaya og usa pang vlogger nga dito ko lang nahimamat, si Myrna.

Diyutay ra kaayo ang tawo sa usa ka dakong chapel, siguro mga 10 lang kami og ang kadaghanan, pamilya na ni Mahal.

Didto ko muling nakita ang manghod nga babaye ni Mahal nga si Lany (ang last namong kita last December pa sa joint birthday party ni Mahal ug Mygz Molino sa Marikina).

First time ko namang nahimamat ang usa pa kamanghod ni Mahal, si Jason nga usa ka pulis og nadestino sa Palawan.

Nakurat ako tungod kay duha ka urn ang nakabutang sa usa ka sealed glass, yun pala ang usa ka urn, sa tatay diay to ni Mahal nga si Tatay Remigio nga namatay last August lang.

"Sabay na ililibing sa karong adlawng Lunes, Septiyembre 6 si Mahal ug si Tatay.

"Kailangang ilibing sila kasi baka may isa na namang mawawala sa amin kung hindi sila ililibing," paniwala ni Jason.

Very accommodating si Jason og nagkuwento na siya sa iyang pagkakilala kang Mahal.

"Ate namin siya pero ang lumalabas parang bunso namin siya. Kahit bata pa ako pero na-abutan ko si Mahal naging classmate kami sa Grade 2, matalino siya dahil ako di pa marunong magbasa pero siya marunong na,"

Usa pa sa natatandaan ni Jason, mahilig kining mag-surprise ilabi na kung may magbi-birthday sa iyang pamilya.

"Alam ni Mahal ang mga birthdays namin, pati mga pinsan namin, siya ang unang-unang bumabati ng happy birthday," saysay ni Jason.

Nangutana sad kang Jason kung nganong nahimong artista si Mahal.

"Sa isang police headquarter, mayroong pulis na kinunan si Mahal kasama ang armelite, mas malaking di hamak sa kanya ang armalite, nalagay ito sa dyaryo hanggang sa naging guest siya sa 'Eye to Eye' ni Inday Badiday hanggang sa kinuha siyang mainstay sa 'Lunch Date.'

Sa first day sa bilar di ko nakita ang love interest ni Mahal nga si Mygz Molino diin kasa-kasama na ni Mahal for 12 years now ingon man ang ilahang manager nga si Jeth Carey.

Daghan ang naghahanap sa duha pero since na-exposed sila kang Mahal kaya di muna sila sila nagpakita sa first day, ambot lang kung mipatam-aw sila on the third day which is kagahapon.

Nagpadala og buwak si Mayor Joy Belmonte ug ang fans nila, ang Mahmygz.

Gusto ko lang iklaro nga during the first day, even sa second day diin sumilip din ako sa may gate way gilabag nga safety protocol ang bilar ni Mahal , mahigpit masyado ang guards ingon man ang mga pari.

Sa paggawas ning maong kulom, gilubong na siguro si Mahal ug ang iyang Tatay Remigio sa Loyala Memorial Park kay matud pa ni Lany, sayong buntag karong adlawa ang lubong ni Mahal.

Di ka namo makalimtan Mahal ilabi na ang imong mga katawa og taklidhay, magpabilin sa among handurawan. May your soul Rest in Peace!

This posting includes an audio/video/photo media file: Download Now

Aboitiz nangulo sa governance best practices sa industrial estates

Posted: 05 Sep 2021 04:09 AM PDT

Subay sa lig-ong baroganan sa Aboitiz Group sa operasyon sa iyang pamatigayon nga nagtamod sa malahutayong estratehiya, ang Aboitiz Integrated Economic Centers nipatigbabaw sa best practices sa environmental management, social responsibility, ug good governance (ESG) sulod sa industrial-anchored Estates sa Sugbo ug Batangas.

"The Aboitiz Group has always been committed to striking a balance between the interests of people, planet, and profit; and we take this very seriously as an operating business. Constant learning and sharing of best practices have been key to sustaining our operations throughout this pandemic and they will reinforce our strong position as we head into recovery," matod ni Rafael Fernandez de Mesa, First Vice President for the Aboitiz Integrated Economic Centers.

"Through consistent implementation of these ESG best practices, we hope to not just deeply embed the sustainability mindset in all levels of the organization, but also influence and encourage our business partners, locators, and host communities to live by the same standards," dason niya.

Usa niini ang pagkatukod sa LIMA Estate's LIMA Organization of Pollution Control Officers (LOPCO), diin dunay 41 ka member locators. Ang LOPCOs nagsilbi nga tigbantay sa pagpanalipod ug pagpalambo sa kinaiyahan.

Ang flagship initiative sa LIMA mao ang "Adopt-An-Estero" Program, uban sa estero community, donor-partners, local government units, ug Department of Environment and Natural Resources (DENR).

Ang The Outlets sa Lipa, LIMA's mall development sulod sa iyang Central Business District, naggamit og solar energy.

Ang Aboitiz Construction, naghimo og proyekto alang sa LIMA, nipaila sa "Scrap to Crop and Waste Management" program alang sa Batangas communities.

Sa 2020, ang Lima Water Corporation accredited isip environmental testing laboratory sa DENR, giila sa iyang outstanding water quality testing standards.

Sa Sugbo, ang Mactan Economic Zone 2 nihulip na ngadto sa 100% sa iyang sodium street lights with LED lights, pagpaminus sa kaon sa enerhiya o elektrisidad.

Pinaagi sa iyang third party providers, ang MEZ 2 nigamit na og electric shuttles ug tricycles sulod sa Estate sukad sa 2015 sa kaluwas sa mga pasahero ug kinaiyahan.

Sa miaging buwan, ang MEZ 2 niabag sa lakang sa Lapu-Lapu City bahin sa drainage clean-up aron pagseguro dili mabara sa mga basura ang agianan sa tubig.

Ang IMA, MEZ 2, ug WCIP managements naghimo og regular nga disinfection sa common areas ug regular virtual meetings uban sa locators o nag-abag sa Estate bahin sa safety procedures sama sa reporting system, contact tracing, infection control ug ubang Covid-related nga hisgpotanan. (PR)

This posting includes an audio/video/photo media file: Download Now

at

No comments:

Post a Comment

Subscribe to: Post Comments (Atom)

End of Summer Sale ☀️😎

20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...