https://www.sunstar.com.ph/

---

• BPI, Aboitiz foundations mihatag og miayuda sa medical frontliners
• Warriors bangis nga mibangon
• LeBron nagpatukod og sinehan sa ilaha
• Lola namatay sa katugnaw sa dagat
• Kasal ni Mike mikompleto sa iyang 67th birthday
• CCPO gihimong modelo sa Covid response
• Mga pulitiko giawhag pagpakig coordinate sa EOC
• Malacañang mipahibawo sa holidays sa 2022
• Babaye ‘nangilkil’ sa mag pulis, nasikop
• Mo-renew sa lisensya pagmaneho mag-seminar, mokuha og exam
• Editoryal: Bungkaga na lang kaha
• Mongaya: Anti-Marcos si Pacman?
• Vallena: Nganong folding bike
• Super Blowout: Pasalamat alang kang Mama Dora
• Naghikog kay gibalibaran ang taban?
• Sultan vs Caraballo karon
• Harden mibida sa Nets
• LeBron mipadaog sa Lakers
• Clarkson ganahan og dugang Pinoy sa NBA
• TNT maoy hari sa PBA
• 42 puntos ni George nasayang

BPI, Aboitiz foundations mihatag og miayuda sa medical frontliners Posted: 31 Oct 2021 03:25 AM PDT Ang BPI Foundation, social development arm sa BPI, milusad sa "Maagang Pamasko sa Panahon ng COVID-19" project alang sa medical frontliners sa Sugbo uban sa pag-abag sa Ramon Aboitiz Foundation, Inc. (RAFI). Ang Maagang Pamasko sa Panahon ng COVID-19, usa ka three-part project ubos sa BPI Foundation's Bayanihan program nga magpadasig ug maghatag og paglaum sa naapektohan sa pandemiya. Sa pagtubag sa panginahanglan sa kakuwang sa pagkaon ug PPEs, ang BPI Foundation nisaad og P8.2 milyunes alang sa pagkaon sulod sa usa ka semana niadtong Oktubre, ning Nobiyembre ug Disyembre alang sa 449 ka healthcare workers sa 14 ka hospitals sa Cebu City ug usa sa Mandaue City. Ang 449 medical ka frontliners makadawat usab og personal protective equipment (PPE) ug half-face respirators aron padayong malikay sa Covid-19 pandemic. "Among those most affected by the ongoing health crisis are our healthcare workers who continue to be at the forefront of this war against Covid-19," matod ni BPI Foundation Executive Director Owen Cammayo. "To our dear medical frontliners, know that we appreciate your commitment to helping our fellow Filipinos survive this pandemic. Aligned with BPI's aspiration to build a better Philippines, we support and salute your courage, sacrifice, and hard work," dason niya. Ang proyekto gisuportahan sa RAFI's Humanitarian Disaster Preparedness and Response (HDPR) program, usa ka response ug relief program alang sa Covid-19. Niini nga panag-uban, ang RAFI maoy mohimo sa on-the-ground coordination tali sa beneficiary hospitals, logistics, documentation, ug quality assurance. "Our healthcare workers have expressed their need for equipment to continue to protect them from COVID-19 and to allow them to continue serving the people who need their help," matod ni RAFI President Amaya Aboitiz-Fansler. Dugang niya, "We hope that the meals, PPEs, and half-face respirators from BPI Foundation will not only allow them to do their jobs confidently and ensure that they're safe, but also show them that the community values their work and continues to stand behind them." Ang Philippine College of Physicians - Central Visayas Chapter President Dr. Carmela Remotigue nitambong ug nidawat sa mga donasyon alang sa medical frontliners. "We would like to extend our heartfelt gratitude to the Ramon Aboitiz Foundation and BPI Foundation for continuously supporting us in these challenging times," matod ni Remotigue. (PR) This posting includes an audio/video/photo media file: Download Now

Warriors bangis nga mibangon Posted: 31 Oct 2021 03:25 AM PDT Bangis nga ningbangon gikan sa pagkapandol ang hosts Golden State State Warriors ug ilang gipahimungtan ang Oklahoma City Thunder, 103-82, kagahapon, Oktubre 31, 2021 (RP time) sa National Basketball Association (NBA). Ang Warriors, nga nasugamak sa overtime nga kapildihan sa miagi nilang duwa batok sa Oklahoma City Thunder, wala na kaayo mobabad sa ilang lider nga si Stephen Curry gumikan kay kontrolado nila ang kombati gikan sa pagsugod hangtod sa katapusan. Si Curry, kanhi two-time MVP, igo lang nipakita og aksyon sulod sa 27 ka mga minutos apan napangulohan gihapon niini ang Warriors pinaagi sa iyang 20 puntos. Ningtampo og 14 puntos matag usa sila si Andrew Wiggins, Draymond Green, ug Jordan Poole samtang nidugang og 10 puntos si Otto Porter Jr. alang sa Warriors, nga ningsaka sa 5-1 rekord. Si Curry igo lang nakamugna og lima ka puntos sa 1st half apan nagmangtas kini sa 3rd quarter diin gimugna niya ang iyang dugang 15 puntos. "He's obviously the head of the snake for them," matod ni Thunder coach Mark Daigneault kabahin kang Curry. Ang Thunder, nga natagak sa 1-5 nga rekord, gipangulohan ni Shai Gilgeous-Alexander pinaagi sa iyang 15 puntos, niamot og 14 puntos si Lu Dort samtang nitunol og 10 puntos si Josh Giddey. (AP) This posting includes an audio/video/photo media file: Download Now

LeBron nagpatukod og sinehan sa ilaha Posted: 31 Oct 2021 03:13 AM PDT Di na kinahanglan moadto sa movie house ang anak ni Lebron James karong Halloween kay gibuhatan kini sa Los Angeles Lakers superstar og movie house sulod mismo sa ilang backyard. Ang National Basketball Association (NBA) superstar mipatukod og Addams Family-themed theater nga adunay dagko nga projector ug daghan nga lingkuranan alang sa iyang 7-anyos nga anak nga si Zhuri Nova ug sa mga higala niini. Gi-post kini ni Zhuri Nova sa iyang Instagram account ug daghan ang nakadayig sa gibuhat ni Lebron para sa iyang babayeng anak. Adunay tulo ka mga anak si James: ang kamagwangan si Lebron "Brony" James Jr, 16; si Bryce Maximus, 14; ug ang unica hija Zhuri Nova, 7. Sa edad nga 36-anyos, si James anaa na sa iyang ika-19 nga season sa NBA ubos sa sikat nga Los Angeles Lakers. Nasulod si James sa NBA sa tuig 2003 isip No. 1 overall pick sa Cleveland Cavaliers. (RSC) This posting includes an audio/video/photo media file: Download Now

Lola namatay sa katugnaw sa dagat Posted: 30 Oct 2021 08:33 AM PDT Usa ka 69 nga ginang nga senior citizen namatay sa katugnaw human nalunod ang pumboat nga iyang gisakyan alas 5:30 sa hapon sa Biyernes, Oktubre 29, 2021 sa kadagatan sa Gato Island ug Carnaza Island, Lungsod sa Daanbantayan. Si Rustica Oyao, taga sityo Linao, Brgy. Carnaza, Carnaza Island, usa sa 50 ka mga pasahero sa nalunod nga pumpboat, gikan nagkobra sa iyang benepisyo sa senior citizen sa lungsod. Ang mga survivor naglakip sa 18 ka mga hamtong nga babaye, 28 ka hamtong nga lalake, 20 ka mga pasahero, upat ka mga bata, tulo kanila mga babaye, usa ang lalake. Si Police Corporal Mark Quiflen Buano, sa Daanbatayan Police Station nga nahinabi sa Superbalita Cebu, nagkanayon nga dihang nadawat nila ang impormasyon, nakig-alayon gilayon sila sa Philippine Coast Guard, Municipal Disaster Risk Reduction and Management Office (MDRRMO), ug Bantay Dagat aron pag-rescue. NABALI Si Jojie Iladro Diano, 36, minyo, kapitan sa pump boat, taga Carnaza, nga nahinabi sa Superbalita Cebu nagkanayon nga mga alas 4:00 sa hapon sila migikan sa Brgy. Poblacion, Daanbantayan. Didto unta sila manukad sa pantalan sa Brgy. Tapilon, apan gumikan kay bawod kay nagdaut ang panahon, mibalhin sila Poblacion. Samtang naglawig ang pumboat sa tunga-tunga sa lawod nabali ang atubangan nga katig niini. Nalunod ang pump boat ug dali nilang gipanghatagan og life jacket ang mga pasahero, diin ang mga bata gisakay dayon sa bote, samtang nagpa-utaw utaw. Hinuon nakatawag pa sila ug ang ubang mga pasahero sa Coast Guard aron mangayog panabang. "Ana siya nako kining namatay na, ayaw baya kog biya-e Dong ha. Ako siyang gikuptan, giabayan namo, unya gikapoy na daw siya kay gitugnaw dihang naabtan sa gabii, kalit nga namatay," dugang ni Diano. Sumala pa niya nga 26 ra ang gitugot sa Marina nga makasakay sa pumpboat, apan gumikan kay hapon na, kalit nga naabot ang mga pasahero. Sagad niini gikan sa trabaho sa mainland, gustong manguli kay managkot sa Kalag-kalag. Gawas sa 50 ka pasahero ug walo ka mga tripolante, may karga usab nga 10 ka sako sa 50 kilos nga bugas ug 70 ka cases sa mga nagkalain-laing ilimnon. OVERLOADING Matod sa PCG nga ang hinungdan sa pagkalunod mao ang overloading, Gipasabot ni Coastguard Lieutenant Junior Grade Erick Salcedo nga anaa sa moderate ang kondisyon sa dagat atol sa hitabo. "Ang ginamit din sa pag-rescue sa ating mga victims ay motorbancas. We find out na talagang overloaded ang banca, gawa na din na hindi ito nagpa-clear sa PCG personnel deployed sa area nung time na nag-depart ito," matod ni Salcedo. Giklaro ni Diano nga 10 na ka tuig siyang kapitan, kadto pa siya nakasugat og disgrasya. Ang bawod dili dagko, kasamtangan lang nila nga masugatan apan naguba ang pumboat hinungdan sa pagkalunod. Gabii na sila na rescue sa taga PCG, MDRRMO, Bantay Dagat sa may Kinatarcan Island, Sta. Fe, human gianod sila sa sulog. Ang 50 ka survivors, lakip si Oyao, ug tulo ka injured gidala sa District Hospital-Bliss, Pajo, Daanbantayan. Tungod sa hitabo, gipahibaw sa PCG nga kasamtangan nang gitanggong sa Daanbantayan Police station si Diano alang sa pagpasaka sa kasong reckless imprudence resulting to homicide batok kaniya. Subay niini, makadawat usab og ayuda gikan sa lokal nga kagamhanan sa lungsod sa Daanbantayan ang pamilya ni Oyao. Matod ni Daanbantayan Mayor Sun Shimura nga kasamtangan nga gipapasilong una sa evacuation center sa lungsod ang mga naluwas. This posting includes an audio/video/photo media file: Download Now

Kasal ni Mike mikompleto sa iyang 67th birthday Posted: 30 Oct 2021 08:31 AM PDT Ang ika-67 nga adlaw nga natawhan ni Cebu City acting Mayor Michael Rama gikaluhaan og laing selebrasyon nga maoy nagkumpleto sa iyang bag-ong pamilya niadtong OKtubre 28,2021. Kini human gipakaslan ni Rama ang iyang uyab nga si Malou Jimenez Mandanat, 32, sa usa ka pribadong seremonyas. Ang kasal gitambongan lang sa pipila ka mga suod nga higala sa acting mayor, kinsa magpapili pagka-mayor sa Cebu City sa election karong Mayo 2022. Dili babag ang edad sa duha ka binuhat bisan pa kon aduna silay 35 anyos nga gintang sa edad sanglit sa kainit sa ilang panaghigugmaay, gigasahan sila og batang lalake nga si Jude Michael Mandanat-Rama kinsa kapin pa sa usa ka tuig ang edad. Niadtong Oktubre 30, ang magtiayong Rama nitambong sa seremonyas sa Cebu-Cordova Link Expressway (CCLEX) main bridge deck connection nga gipahigayon sa taytayan ug pormal nga gipailaila sa acting mayor ngadto sa mga tawo ang iyang kapikas. "My wife, I would like to introduce her. Never mind asking when my marriage is. Many may have known it, many are called but only few can be invited because of the constraint of the pandemic... Malou Mandanat-Rama... can you please stand up?," pagpaila-ila ni Rama dihang iya usab gi-acknowledge ang mga VIP nga nitambong. Nipadangat usab sa iyang congratulatory message si Ambassador Gorge Moragas Sanchez sa Spain ngadto sa magtiayong Rama kinsa maoy nisunod sa acting mayor sa pagpamulong atol sa kalihukan sa CCLEX niadtong Biyernes. Ang kalihukan niadtong Biyernes usa ka walk through diin si Rama usa sa mga opisyal nga lokal nga ningtambong. Lakip sa ningtambong sila si Gobernador Gwen Garcia ug Mayor Jonas Cortes, ingon man mga opisyal sa kompaniyang nagpatukod sa ikatulong taytayan. Si Rama gikasal kaniadto ni Araceli Lim Francisco diin aduna silay duha ka anak, Atty. Mikel Rama ug Micheline Rama, apan ang ilang kasal wala molungtad sanglit niadtong 2000, ang sala ni Judge Pampio Abarintos nihukom pabor sa annulment sa ilang kasal nga giduso ni Francisco. Si Rama nagsugod og panerbisyo sa Cebu City Government sa 1992 isip city councilor, nahimong bise-mayor gikan sa 2001 hangtod 2010 ug mayor sa Cebu City niadtong 2010 hangtod 2016 ug kasamtangang pinili nga bise mayor sa dakbayan. This posting includes an audio/video/photo media file: Download Now

CCPO gihimong modelo sa Covid response Posted: 30 Oct 2021 08:29 AM PDT Gihimong model sa Camp Crame ang Cebu City Police Office (CCPO) sa pagtubag sa problema sa coronavirus disease 2019 (Covid-19) hinungdan nga mikunhod pag ayo ang kaso gikan sa pagsulbong sa milabay nga mga buwan. Matod ni Police Colonel Roderick Minong, deputy regional director for operationa (DRDO) sa Police Regional Office 7 nga gipatawag siya sa ilang labaw sa kaulohan aron maoy mahimong speaker sa tanang DRDO sa mga police regional office lukop nasud. Iyang gibutyag atol sa ceremonial shoot sa CCPO Directors Cup sa Wonderland shooting range sa dakbayan sa Lapu-lapu sa Sabado, Oktobre 30, 2021 nga ang best practices sa CCPO ang gihimong modelo sa PNP lukop nasud. Gustong masayod ang Camp Crame kon giunsa sa kapulisan sa siyudad sa Sugbo ug mga opisyal sa dakbayan nga mikunhod man pag ayo ang kaso itandi sa ubang mga rehiyon sa nasud. "Sinabi nila ano ba ang magic? Ano ba ang sekreto dyan, lalo na sa Cebu City? So sinabi ko paulit-ulit, masunurin kasi number 1 ang taga Cebu City..So yun ang i-briefing, nakausap ko ang city director at operations na ito ang pag present natin, what is the best practices of Cebu City gayahin ng ibang mga regions," matod ni Minong. Si Minong ang kanunay nga mo susi sa tanang City ug Provncial Police Office kon nasakto ba ang pagpatuman sa lagda sa Inter Agency Task Force sa matag lugar. Si Police Colonel Josefino Ligan, hepe sa kapulisan sa dakbayan sa Sugbo, nagkanayon nga dakong garbo sa CCPO nga sila ang gihimong panig-ingnan sa tanang police regional offices sa nasud. Usa sa rason nga malampuson ang mga Sugboanon sa pagbatok sa Covid 19 tungod sa panag hiusa sa mga ahensya sa gobyerno. Iyang gipasabot nga matag adlaw, ang Emergency Operation Center (EOC) ubos sa pagpangulo ni Konsehal Joel Garganera mopatawag sa nagkada-iyang department sa Cebu City hall lakip na ang kapulisan aron sulosyonan ang taas nga mga kaso sa Covid sa milabay nga mga buwan. HIGPIT Dako usab og natampo niini ang kanunay nga pagpatuman sa minimum public health safety diin daghan nga mga malapason nga nangadakpan matag adlaw. Sa record sa operations branch sa CCPO, maka dakop ang matag police station lakip na ang Prevention, Restoration, Order, Beautification and Enhancement (PROBE) og 150 ngadto sa 200 ka mga tawo matag adlaw. "Kana nakita na didto sa kaulohan mao nang nahimo tang best practice kay mao lagi ang atoang pag respond, ilabi na when it comes to law enforcement, ingun ana ka hugot, ka dasig mao nang as a result, mi baba gyud pud gradually ang atoang Covid cases," matod ni Ligan. Mapasalamaton si Ligan sa mga Sugboanon nga mituman sa mga lagda nga gipagawas sa kagamhanan sa dakbayan sa Sugbo nga maoy hinungdan nga ma limit lang ang lihok sa mga tawo. Ning pag luag na sa restriction sa quarantine sa Siyudad, diin mamahimo na nga makagawas ang mga menor de edad, apan iyang giklaro nga motuman gihapon sa minimum health standard. Mga internet café mamahimo na nga maka balik sa pagpasulod sa mga bata apan kinahanglan nga sundon niini ang 50 percent nga capacity. Iyang gimandoan ang mga station commander nga monitoron pagbalik ang mga internet café sa kabarangayan aron dili maabosaran sa mga tag-iya niini. (AYB) This posting includes an audio/video/photo media file: Download Now

Mga pulitiko giawhag pagpakig coordinate sa EOC Posted: 30 Oct 2021 08:29 AM PDT Human sa lapad nga pagsaway sa social media sa pagduaw ni Senador Emmanuel Pacquaio sa mga lugar sa Sugbo ug probinsya tungod kay wala na matuman ang social distancing, ang hepe sa Cebu City Police Office (CCPO) miawhag sa mga pulitiko nga mohimo og caravan ug pagbisita sa mga lugar sa dakbaya nga makig alayon sa Emergency Operations Center aron mahan-ay kon unsay angay nga buhaton. Matod ni Police Colonel Josefino Ligan nga adunay limitations ug guidelines nga angay nga sundon sa dili pa ipahigayon ang pagbisita sa usa ka politiko. Rason ni Ligan nga malikayan ang panagtapok sa daghang mga tawo nga peligro sa tinakdanay sa coronavirus disease. Ang senador mitambong sa kalihukan sa Barangay Tisa, apan human sa programa, gidumog siya sa mga tawo. Gitapuk-an na usab siya atol sa iyang pag bisita sa dakbayan sa Toledo ug sa lungsod sa Pinamungajan sa biyernes Octobre 29, 2021. "Atong giawhag no kon kinsa nga mga grupo nga mo conduct og caravan or pundok-pundok sa ilang mga supporters palihog lang og approach or duol sa atoang EOC para malatag nato kon unsay angay nga buhaton, para maiwasan nato nang pundok-pundok," matod ni Ligan. Napanglantawan ni Ligan nga daghan pa nga mga pulitiko ang mobisita sa dakbayan sa Sugbo nunot sa nagsingabot nga eleksyon sa sunod tuig. Ning maong mga panahon, kinahanglan nga mangulo sila sa pag awhag sa mga tawo nga dili mag tapok tungod kay naa pa ang virus. Dugang sa CCPO director nga bisan kon miubos na pag ayo ang Covid sa siyudad sa Sugbo, apan di angay nga mokompyansa sila. Tanang kalihukan sa dakbayan sa Sugbo mokuha kinig permiso sa EOC aron ma-monitor ang ilang programa nga natuman ba ang ilang gihan-ay nga lagda. (AYB) This posting includes an audio/video/photo media file: Download Now

Malacañang mipahibawo sa holidays sa 2022 Posted: 30 Oct 2021 08:29 AM PDT Ang Malacanang niadtong Biyernes, Oktubre 29, 2021, nagpagawas sa deklarasyon ni Presidente Rodrigo Duterte sa regular holidays, special working ug non-working days alang sa 2022. Gipirmahan ni Duterte ang Proclamation No. 1236, nga nagdeklarar sa mosunod nga mga petsa isip regular holidays ug special days sa nasod sa 2022. Ang proklamasyon nag-ingon nga ang mga nasudnong pangilin alang sa pag-obserbar sa Eidul Fitr ug Edul Adha ipagawas human ang gibanabana nga mga petsa sa mga pangilin sa Islam nga giisip sa Islamic nga kalendaryo o sa lunar nga kalendaryo o sa Islamic astronomical calculations. "Aron ang nasud makabangon gikan sa dili maayo nga epekto sa pandemya sa Covid-19, kinahanglan nga dasigon ang pagka-produktibo sa ekonomiya pinaagi sa, taliwala sa uban, pagminus sa pagkabalda sa trabaho ug paghandum sa pipila nga mga espesyal nga holiday isip espesyal (trabaho) nga mga adlaw sa baylo," ingon ni Duterte. Gitahasan ni Duterte ang Department of Labor and Employment sa pagproklamar sa guidelines sa proklamasyon. (JGS) This posting includes an audio/video/photo media file: Download Now

Babaye ‘nangilkil’ sa mag pulis, nasikop Posted: 30 Oct 2021 08:25 AM PDT Babaye nga nangilkil sa mga aplikanteng pulis nasikop sa usa ka entrapment operation, alas 4:30 sa hapon, Biyernes, Oktubre 29, 2021. Ang suspek giila nga si Cherie Pulga, 36, usa ka medical representative, taga Barangay Campetik, Palo, Leyte. Sa maong lugar nahimutang usab ang Police Regional Office (PRO) 8, diin dagsa ang mga aplikanteng pulis. Matod sa report sa PRO 8, nakadawat ang Regional Intelligence Division (RID) og reklamo gikan sa usa ka aplikante nga gipangayoan siya og kwarta ni Pulga bugti sa siguradong slot sa Philippine National Police (PNP). "Applicants victimized by said suspect disclosed that they were enticed by her promises for a sure slot in PNP organization that prompt them to give P20,000 as what they agreed," matod sa report Gumikan sa nadawat nga reklamo, gilunsad sa mga sakop sa RID 8 ug Palo Police Station ang usa ka entrapment operation. Nakigtransaksyon ang reklamante kang Pulga gamit ang bogus nga kwarta ug sa dihang nagtunol na ang kwarta, gideklarar sa kapulisan ang pagsikop sa suspek. "Ang insidenting ito ay patunay lamang na sa kabila ng ating kinakaharap na krisis, ang iyong kapulisan ay hindi tumitigil sa pagsupil sa lahat ng uri ng kriminalidad kung kaya't hinihikayat po namin ang lahat ng nagnanais na gustong pumasok sa aming hanay na maging mapagmatiyag at h'wag magpapaniwala sa kahit na sinong mangangako sa kanila lalo na't may kapalit na pera," matod ni PRO 8 Director, Rommel Bernardo Cabagnot Si Pulga naa na sa kustodiya sa kapulisan sa Palo ug nag-atubang na og kaso. (JKDP) This posting includes an audio/video/photo media file: Download Now

Mo-renew sa lisensya pagmaneho mag-seminar, mokuha og exam Posted: 30 Oct 2021 08:20 AM PDT Ang Land Transportation Office (LTO) mo-issue na og driver's license nga balido sulod sa 10 ka tuig, apan ang tanang mga motorista kinahanglan usab nga mokuha og seminar ug eksaminasyon sa pag-renew sa ilang lisensya. Gianunsyo sa LTO sa Biyernes, Oktubre 29, 2021, nga ang 10 ka tuig nga validity sa lisensya usa ka probisyon sa Republic Act 10930, nga gipasar niadtong 2017, nga nag-amendar sa Land Transportation and Traffic Code. Ang RA 10930 nag-require usab niadtong nag-aplay og bag-ong driver's license ingon man niadtong nag-renew sa ilang lisensiya nga mokuha og eksaminasyon. Sa usa ka pamahayag, ang hepe sa LTO nga si Assistant Secretary Edgar Galvante niingon nga ang balaod gituyo aron masiguro nga kadto lamang adunay kahanas sa pagmaneho ug kahibalo sa kaluwasan sa kadalanan ug maayong pamatasan ang mahatagan sa pribilehiyo sa pagmaneho sa mga sakyanan. Ang mga motorista nga mo-renew sa ilang driver's license kinahanglang makapasar sa Comprehensive Driver's Education (CDE) nga gilangkuban sa refresher seminar ug exam. Ang pag-isyu sa mga lisensya sa pagmaneho nga balido sulod sa 10 ka tuig magsugod sa Central Office-Licensing Section sa LTO ug sa Quezon City Licensing Center (QCLC). Human sa usa ka semana nga pilot run nga nagsugod niadtong Huwebes, Oktubre 28, ang pag-isyu sa driver's license nga balido sulod sa 10 ka tuig palapdan sa ubang LTO offices sa Metro Manila. Sa gawas niining mga dapita, diin wala pa ang sistema sa pag-isyu og 10 ka tuig nga balido nga lisensya, ang mga motorista maka-renew sa ilang driver's license gamit ang karaang sistema, matod sa LTO. Ang mga motorista nga mag-renew sa ilang mga lisensya sa mga buhatan sa LTO nga andam mo-isyu og 10 ka tuig nga balido nga lisensya, kinahanglang mokuha sa CDE seminar ug ang kauban niini nga eksaminasyon. Ang CDE seminar ipahigayon sa labing taas lima ka oras. Mahimo kining kuhaon nga libre sa mga driver's education centers, ug mobayad sa LTO accredited driving schools. Apan ang mga motorista mahimo usab nga mokuha sa seminar online pinaagi sa portal sa LTMS sa LTO, ang opisina sa transportasyon miingon. Ang mga motorista nga mapakyas sa eksaminasyon human sa CDE seminar kinahanglang mokuha og balik sa pasulit. Ubos sa Republic Act 10930, ang mga bag-ong lisensya nga balido sulod sa 10 ka tuig ihatag lang niadtong mga driver's license holder nga walay bisan unsang traffic violation sa file. Kadtong adunay traffic violations nga natala atol sa validity sa ilang expired nga lisensya, mahatagan og renewed license nga balido lang sulod sa lima ka tuig. Gipahibawo usab sa LTO nga gilugwayan og duha ka buwan gikan sa petsa sa expiration ang validity sa mga expired nga driver's license. Ang lugway maghatag ug panahon sa mga motorista nga mag-renew sa ilang mga lisensya sa pagtuman sa gikinahanglan sa CDE. Ang CDE, nga gilangkuban sa video ug sinulat nga materyales nga gihimo sa LTO, gitanyag nga libre sa tanang LTO offices ug pinaagi sa LTO website (lto.gov.ph), ug pinaagi sa LTO Facebook page ug YouTube. Ang mga motorista nga nag-aplay alang sa renewal sa ilang driver's license kinahanglan lang nga magparehistro nga libre sa LTO Land Transportation Management System (LTMS) pinaagi sa portal.lto.gov.ph, o mahimong tabangan pinaagi sa proseso sa LTO frontliners sa tanang LTO offices. Gitugotan sa LTMS ang tanang kliyente sa LTO nga makahimo og mga transaksyon pinaagi sa internet 24/7, lakip na ang mga booking alang sa aplikasyon sa lisensya sa pagmaneho. Ang portal adunay library sa edukasyon sa drayber nga gihatag nga libre, lakip ang mga materyal sa CDE. Pagkahuman sa pagtuon sa mga materyal sa CDE, ang mga kliyente sa LTMS mahimong makakuha sa gikinahanglan nga pasulit sa CDE online. Sa pagpasar niini, ang mga kliyente hatagan og CDE certificate para magamit sa renewal sa ilang driver's license. (CTL uban sa PR) This posting includes an audio/video/photo media file: Download Now

Editoryal: Bungkaga na lang kaha Posted: 30 Oct 2021 08:20 AM PDT Gilugakan na sa Inter-Agency Task Force ang restrictions sa mga dapit nga ubos sa alert level 2 sa coronavirus disease (Covid-19) classification. Apil na niini ang Dakbayan sa Sugbo. Niug mga dapita, ang kabataan gitugtan na sa paggawas ug makasuroy na sa malls basta kuyog ang mga ginikanan nga fully vaccinated. Sukad niluwat og executive order ang mga local chief executive, nibalik og huot ang trapiko. Nagpasabot nga mas nidaghan na ang mga tawo nga nanggawas. Bisan ang malls daghan na og mga tawo kay makakuyog na ang mga bata sa pagsuroy. Dul-an na sa duha ka mga tuig nga ang mga bata wa na makasuroy og malls kay gidid-an sa kagamhanan. Kasagaran naa lang sila sa tugkaran makaduwa. Di kini maayo alang sa kabataan nga magdako nga wa ang socialization ug exploration nga tipik sa nature sa bata. Gihatagan na man unta og gahom sa IATF ug Department of the Interior and Local Government (DILG) ang mga local government unit ((LGU) sa pagpatuman sa mga lagda ubos sa classification sa tagsa ka mga dapit. Kay ang tibuok isla sa Sugbo ubos na man sa alert level 2, gitugtan unta sa pagbukas sa mga sementeryo apan ubos sa hugot nga monitoring. Sakto kaayo ang hukom ni Cebu City Acting Mayor Michael Rama nga mga fully vaccinated ang tugtan sa pagbisita sa mga sementeryo. Maanindot na kaayo ang mga plano nga ipatuman unta sa Dakbayan, apan nausik ang mga panahon sa mga tigom kay gipatay sa IATF. Wa tugti ang mga LGU sa pagbukas sa mga sam-ang ubos sa ilang jurisdiction. Kon buot baya huna-hunaon, mas kuyaw ang mga dapit nga sirado sa pagpanakod kay sa mga sementeryo nga bukas kaayo. Unya grabe sab ang social distancing sa mga tawo nga manulod. Asa kaha ang basehanan aning hukom sa IATF. Maorag sila ang nakaingon nga ang administrasyong Duterte ubos og grado sa Covid response. This posting includes an audio/video/photo media file: Download Now

Mongaya: Anti-Marcos si Pacman? Posted: 30 Oct 2021 08:15 AM PDT Dakong surpresa ang gibuhat ni Senador Manny Pacquiao dihang nibisita sa Sugbo sa miaging Huwebes. Nibisita siya sa marker diin gidagit sa mga tawo ni kanhi diktador Ferdinand Marcos ang Cebuano hero nga si Fr. Rudy Romano. Kahinumdoman, si Fr. Romano maoy iladong lider batok sa diktadurya ni Marcos ug gidagit kini kaniadtong Hulyo 11, 1985 diha sa Barangay Tisa. Ang senador nibutang og mga buwak sa marker ug gidayan-dayan sa maong dapit ang mga tarp nga nag-ingon "Never Again." Kuyog ni Senador Pacquiao sila si Gaye Yapha sa Promdi ug Joeyboy Holganza nga regional chairman sa PDP-Laban Koko Pimentel wing. Kahinumduman, si Joeyboy ug iyang amahan nga si anhing Dodong Holganza gidakop ug gipriso panahon sa diktadurya kay mga lider sa oposisyon. Sud sa pipila ka tuig, kuyog kanila sa prisohan si anhing Nene Pimentel, ang amahan ni Koko Pimentel ug maoy nagtukod sa PDP-Laban. Laing gamayng history, si Joeyboy isip usa ka OIC board member human sa Edsa 1 maoy nag-sponsor sa resolution sa Provincial Board (PB) nga matukod ang maong marker. Sa Syudad sa Sugbo, sponsor sab sa usa ka resolusyon si anhing konsehal Tony Avila. Tungod niini, nagpaila si Senador Pacquiao sa iyang pagdapig sa kawsa sa demokrasya kontra sa diktadurya ug sa tawhanong katungod. Kandidato sa BOPK Walay opisyal nga anunsyo si kanhi mayor Tomas Osmeña ug BOPK standard-bearer karong 2022 nga si Margot Osmeña kon si kinsa ang ilang kandidato sa pagka presidente. Nagtuo ko nga sa ilang kasingkasing mao si Vice President Leni Robredo. Moanhi ra ba si VP Leni karong Nobiyembre kay moluhod sa kasal sa anak ni Kong. Bebot Abellanosa. Apan sa miaging Huwebes, didto ang Team Pacquiao sa headquarters ni BOPK vice mayoral candidate nga si Franklyn Ong. Didto nag-meeting ang ilang mga sectoral leaders kuyog sa mga kandidato sa pagka konsehal sa north district. Didto usab si kanhi mayor Tomas Osmeña ug umaabot mayor nga si Margot Osmeña. Sara di mag-PDP Daghan kaayo kitag nadunggan nga mga tsismis kabahin sa unsay buhaton ni Davao City Mayor Inday Sara Duterte-Carpio karong Nobiyembre 15. Usa niana mao: dili mag-PDP si Inday Sara. Niingon ko nga tsismis kay bisan pag giingong kasaligan ang akong mga tinubdan, mga second-hand information gihapon ang akong nadunggan. Ako na lang unhan ang mga pagsaway unya sama sa nahitabo ni Ramon Tulfo. Apan ngano man kuno nga dili mag-PDP si Sara nga nag-una na man si Sen. Bato dela Rosa isip stand-in para sa substitution unya? PDP-Laban baya ang Partido ni Presidente Rodrigo Duterte. Ang ako lang nahibaw-an nga bisan pa og mga anak kini silang Sara, Pulong, ug Baste, di sila makadiretso sa ilang amahan. Kinahanglang moagi sila ni Bong Go. Apan lahi si Honeylet, ang kapuyo ni Digong, ug ang ilang anak. Makadiretso ra sila. Unsaon nga sila si Sara sakop man sa nabungkag na nga pamilya ni Digong nga ang inahan mao si Elizabeth. Kini si Bong Go naa sa kampo ni Honeylet ug kining mga tiguwang nga mga sakop sa Gabinete ni Digong. Nakahibawo na man kita nga kaniadtong niilis si Sara ni Digong isip mayor sa Syudad sa Davao, napapas gyud ang mga tawo ni Digong. Tungod niini, duha lang ang kapilian nga Partido nga tapunan ni Inday Sara, ang Lakas-CMD ni kanhi president ug kanhi Speaker Gloria Macapagal-Arroyo ug ang Partido Pilipino sa Pagbabago (PPP) nga maoy grupo ni Ace Durano. Hinuon, kay basi man lang sa istorya kini nga akong nadunggan, dako ang posibilidad nga ako nasayop. Atangan lang nako kon tinuod bang dunay labing dako nga caravan karong umaabot nga Sabado sa tibuok nasud ang Solid Sara Supporters kun SSS. Pipila ka adlaw kuno human niini, moanunsyo na si Inday Sara. Abangan. (DM nako sa @anol_cebu) This posting includes an audio/video/photo media file: Download Now

Vallena: Nganong folding bike Posted: 30 Oct 2021 08:15 AM PDT Dihang nagsige na ko og biseklita, anam-anam sab nga milapad ang akong mga higala sa lainlaing disiplina sa natad sa biking. Usa ini mao ang mga enthusiast sa folding bike. Sa sinugdan wa kaayo ko maka appreciate sa folding bike dihang gipakita ko sa akong higala nga si Titoy Salazar. Human nako mahimong higala ang iyang manghod nga si Alan Salazar nga nagbase na sa United States ug si Jay Garganera, igsuon ni Cebu City Councilor Joel Garganera, diha na ko naka appreciate sa folding bike alang sa urban riding. Sa cornering, tungod sa iyang geometry, maayo siya sa sa paglusot lusot sa bagang duot sa mga sakyanan sa trapiko. Usa ka example ani kadtong nagkuyog mi ni Alan sa pagpanguli gikan sa ilang Jay sa Barangay Tinago. Mountain bike ang iyang gigamit samtang ang akoa ang akong 16-inch folding bike. Pagtawag nako, mao pay pag abot niya sa ilang balay sa Cabancalan samtang ako naabot na sab sa Bacayan. Imagine ang kalainan sa amoang oras sa pag-abot.Di gyud lisod ang pagmaneobra sa mas gamay nga biseklita. Wa sab manginahanglan og mountain bike ang urban roads. Igo na kaayo ang folding bike, 20 inch o 16 inch. MAHIPOS Usa sa maayong aspeto sa folding bike mao nga kini mapilo. Gamay ra og space nga makaon kining biseklitaha. Kon imong sakyan padung sa opisina, mahimo rang imong pil-on ug ibutang sa corner. Mao ni ang akong gibuhat sa pipila ka mga higayon. Akong gidala sud sa newsroom. Bisan sa balay, makadaginot gihapon og space ang folding bike. Bisan tulo ka folding bikes, kaya kaayo. Usa sa maayong brand nga akong nasuwayan sa pagka maayo sa fold mao ang Dahon nga brand kay duna koy 5 ani ka buok. Duna koy 20 ug 16 inch. Apan nindot sab og fold ang Brompton nga dunay 18-inch wheel. Ang akong higalang si Dave Valle, usa ka architect, miapil sa among night ride kaniadto. Gikapoy na man siya, nisakay siya og taxi. Iyang gi fold ang Brompton nga sama na lang og libro nga iyang gisabak. Mao na ang naka nindot sa folding bike. PASPAS Ang 20-inch folding bike sikat usab sa abroad sa touring. Kon speed lang sa patag, di hibintahaan ang folding bike. Kon duna kay plaka nga 53-teeth ug 9speed nga 10 ang kinagamyan nga sprocket, ang pag sprint yano kaayo. Mosutoy o molupad ni kon paspasan og sakto og tindak. Ang usa lang jud ka drawback kon ang imong plaka usa ra unya mag long ride ka. Magkalayo ang biyahe. Magkabug-at ang biseklita bisan diha ka na sa labing dako nga sprocket naggamit.Gibikugan gud ko sa among biyahe gikan sa Cebu Provincial Capitol hangtod sa pag-abot sa Oslob. But sa ako nang giingon, daghan og advantage ang folding bike kon urban riding ug touring ang hisgutan. Busa, ayaw tan-awa nga ordinaryo o barat ang folding bike. Pareho ra ni kaanindot sa mountain ug road bike. Nganong mag MTB ka man sa siyudad nga mas maayo man ang foldie? This posting includes an audio/video/photo media file: Download Now

Super Blowout: Pasalamat alang kang Mama Dora Posted: 30 Oct 2021 08:14 AM PDT Naandan na sa pamilya ni Flornisa Gitgano nga di magsaulog kon dunay mag-birthday nila. "Di jud mi mahilig anang mag-celebrate nga maghatag og gifts. Di man ni namo tradition sa family jud. Pero nag-support mi sa tanan nga panginahanglanon ni Mama, labi na si Ate," sigon sa kamanghurang anak. Apan karong tuiga, nakahukom silang magsuon nga saulogon ang adlaw nga natawhan sa ilang inahan nga si Teodora "Dora" Morpos Gitgano. "Nag-decide mi ni Ate na i-celebrate like naay kaon, magtapok ang relatives, kay 70 years old naman si Mama. Murag milestone para ni Mama nga dako na iyang edad," paambit ni Flornisa. Niadtong Oktubre 23, gisaulog ang ika-70 nga birthday sa ilang inahan nga gipahigayon sa ilang panimay sa dakbayan sa Mandaue. Matod ni Flornisa, ang maong kasaulogan maoy paagi nila sa iyang Ate Debbie sa pagpasalamat sa ilang pinangga nga inahan. "Si Mama ra sad nagbuhi namo sukad mga gagmay pa mi," dason ni Flornisa. Duha lang sila ka magsuon ni Flornisa, siya ug ang iyang Ate Debbie nga tua sa laing nasod manarbaho. Atol sa birthday sa ilang mama, nigahin gyud og oras si Debbie sa pag-greet ug pagpangumusta sa inahan pinaagi sa video call. "Good health as always unya hatagan pa siya og daghan na katuigan to celebrate her birthday," ang birthday wishes ni Flornisa alang sa ilang inahan. Kanunay giapil sa pag-ampo ni Mama Dora ang kalamposan nila ni Flornisa ug Debbie sa ilang mga pangandoy ingon man ang maayong panglawas. Mapasalamaton si Mama Dora sa bana ni Debbie nga si Sivert ug sa pamilya niini sa kanunay nila nga pagsuporta ngadto nila. (SCG) This posting includes an audio/video/photo media file: Download Now

Naghikog kay gibalibaran ang taban? Posted: 30 Oct 2021 08:13 AM PDT NASIKOP sa kapulisan ang suspek sa giingong pagpusil patay sa negosyante alas 10:30 sa buntag sa balay niini sa Brgy. Pitogo, lungsud sa Consolacion. Si Amelita Aliser, 38, minyo, tag-iyag karenderya, napusasan atubangang sa iyang bana ug mga anak dihang nasubay sa kapulisan ang iyang pinuy-anan human siya mailhi. Si Aliser nanghimakak nga iyang gipatay si Teddy Manhilot, 46, usa ka negusyante kay matod niya naghikog kini human iyang gibalibaran nga magtaban sila. Si Police Chief Master Sgt. Brent Fulmaran, imbestigador sa Consolacion Police Station nga nahinabi sa Superbalita Cebu, nagkanayon nga gumikan sa balita ug nigawas sa social media, natultolan si Aliser. Nagpasalamat si Fulmaran, sa mga mihatag nilag abag sa imbestigasyon mao nga ilang natultolan si Aliser. Nakatabang sab ang impormasyon sa mga kawani sa motel, diin sila si Manhilot ug Aliser regular nga mga kustomer. Matod ni Fulmaran nga si Aliser nibutyag nga gitawgan siya ni Manhilot nga magkita dayon misakay silag taxi ug nisulod sa motel alas 6:30 sa gabii Huwebes sa Brgy. Tilhaong. Gibutyag ni Aliser nga hubog si Manhilot dihang nagkalalis sila sa sulod sa motel. Si Aliser nibutyag nga gusto ni Manhilot nga "magtaban" silang duha ug magpalayo gawas sa SugbO. "Nasuko ang biktima, nag-away sila unya mikuha sa armas dayon tion sa ulo 'dili ka mosugot magpakamatay ko.' Kalit nga mibuto," dugang ni Fulmaran. Si Aliser nibutyag nga naratol siya niadtong higayuna, mideretso sa pagdagan sa gawas, nagdagan hangtud naabot sa ilang balay sa Pitogo. Matod ni Fulmaran nga gikomprontase si Aliser sa asawa ni Manhilot samtang ang bana sa nahauna na-shock sa hitabo. Nakakita siya sa balita ug daw duna siyay namay-ungan sa babaye nga nakita sa footage sa CCTV. Wa siya magdahom nga iya diay kini nga asawa. Bisan paman niini, ang bana ug ilang mga anak nisuporta sa iyang asawa. SUPER B Si Aliser nitug-an nga pagka-Biyernes sa buntag mo-surrender unta siya apan nabalaka siya sa iyang bana ug duha ka mga anak. Hangtud nga dihang migawas ang balita sa Superbalita Cebu, ingon man mikatap sa social media, misamot nga iyang pressure ug kabalaka hangtud nga nasikop sa kapulisan. Gidugang ni Aliser nga higpit kaayo ang asawa ni Manhilot hinungdan nga gusto na siyang mobiya. Nasuta sa kapulisan nga July ning tuiga nagsugod ang relasyon sa duha. Samtang si Fulmaran niingon nga kasong murder ang ilang ipasaka batok kang Aliser. Matod niya nga version kini ni Aliser ang paghikog ug adto na niya kini ipamatood sa korte Sa Sabado sa hapon, ilang gidala sa Crime Laboratory si Aliser aron ipaubos sa paraffin test. Nakuha sab nila ang senina nga gisul-ob ni Aliser atol sa kremin./GPL This posting includes an audio/video/photo media file: Download Now

Sultan vs Caraballo karon Posted: 30 Oct 2021 08:12 AM PDT Ipahigayon karong adlawa ang binukbokay sa Pilipino nga boksidor nga si Jonas Sultan batok sa sumosunod nga superstar sa Puerto Rico nga si Carlos Caraballo didto sa Madison Square Garden sa New York, Oktubre 31, 2021. Ang Pinoy boxer wala mabalaka ug andam makig-ilis sa iyang nawong batok sa Puerto Rican malangkat lang niya ang kadaugan atol sa 10 ka round sa bantamweight class. Mahibaw-an usab karong adlawa kon dili ba malihian og kapildehan ang Puerto Rican human unya sa ilang binukbokay didto sa Amerika. Si Caraballos ni-knockout sa iyang tanang nakontra samtang si Sultan wala pa usab ma-knockout sa linghod pa niyang karera sa boksing. Ang betting site sa Amerika nihatag og pabor sa Puerto Rican kinsa adunay (14-0, 14 knockouts) ug 83.68% nga bintaha batok sa 29 anyos nga si Sultan kinsa aduna lay 19.42% nga tsansa kinsa adunay record nga 17-5,11 knockouts. Taliwa sa pagka-dehado, nagpabilin kini nga inspirasyon sa lumad nga taga Tampilisan, Zamboanga del Norte aron usab makakuha siya og dakong oportunidad didto sa Amerika. "I will show my best fight ever. This is going to {be a great fight} between me and Caraballo. May the best man win, and maybe I'll be the best man," matod ni Sultan atol sa press conference sa ilang away nga gi-promote sa Top Rank ug ESPN. Gipadayag ni Sultan nga ang iyang trainer nga si Joven Jimenez maoy nag-andam kaniya diin si IBF superflyweight champion Jerwin Ancajas kinsa maoy kontra niya kaniadto maoy nagtabang kaniya para sa preparasyon. "Jerwin Ancajas is my friend and a sparring partner for this fight. He gave me confidence and motivated me to win this fight. He gave me a lot of techniques, and let's get ready to rumble for this fight." dugang ni Sulta. "If I beat Caraballo, it would have a big impact on my career. I would be looking for another world title fight," dugang sa Pinoy boxer. Sa iyang bahin si Caraballo niingon nga hugot usab ang iyang preparasyon sa maong away hilabi na nga gitawag na siya karon nga maoy mosunod ni Miguel Cotto isip superstar sa ilang isla sa Puerto Rico hinungdan nga ila kining paninguhaon kinsa nihulagway nga dili yano nga kontra si Sultan. Atol sa tinimbangay kagahapon, si Sultan yano ra kaayo nga nakakuha sa 117.6 nga timbang diin ang ilang away ipasalida sa ESPN. (PAC) This posting includes an audio/video/photo media file: Download Now

Harden mibida sa Nets Posted: 30 Oct 2021 08:09 AM PDT Nibalik na ang ka-agresibo ni James Harden human iyang nagiyahan ang Brooklyn Nets sa pagsakmit sa ilang tulo ka daog sa niaging unok ka duwa batok sa Indiana Pacers, 105-98. Si Harden nimugna og 29 puntos, 8 assists ug 8 rebounds para pangulohan ang Nets gikan sa ilang nagkayamukat nga opensa sa unang duha ka quarter sa duwa didto New York. Ang gipakita ni Harden maoy labing maayo niya nga performance sa niaging lima ka duwa human usab siya nakaangkon sa hamstring injury niadtong buwan sa Hunyo atol sa playoffs. Sa lima ka duwa, si Harden nag-average og 16.6 points ug 35.9% shooting diin atol sa duwa kagahapon, iyang napasulod ang 5 sa 11 niya ka itsa gikan sa tres ug napasulod usab niya ang 16 gikan sa 19 niya ka tira gikan sa free throws. Naobserbahan sa mga analysts nga nabalik na ang pagka-agresibo ni Harden sanglit sa unang lima niya ka duwa, 15 ra ka free throws ang iyang nahimo. Ang 13 puntos ni Harden sa third quarter maoy nakatabang sa Nets pagpapas sa 16 puntos nga labaw ug inanay nga nakabawi ang Nets sa fourth quarter. Si Kevin Durant sa Nets niamot og 22 puntos para sa ilang kadaugan samtang si LaMarcus Aldridge nihipos og 21 puntos nga maoy naghimo kaniya nga ika-48 nga magduduwa sa NBA nga nakaabot og 20,000 points. Ang reserve sa Pacers nga si torrey Craig maoy nangulo sa kapildehan pinaagi sa iyang 28 puntos ug 19 puntos gikan sa rookie nga si Chris Duarte. (PAC) This posting includes an audio/video/photo media file: Download Now

LeBron mipadaog sa Lakers Posted: 30 Oct 2021 08:08 AM PDT Giagak ni LeBron James ang Los Angeles Lakers batok sa Cleveland Cavaliers, 112-101 aron pakgangon ang tulo ka sunodsunod nga kadaugan nga kadaugan sa iyang kanhi team atol sa nagpadayong duwa sa National Basketball Association (NBA). Si James nipaarak og 26 puntos samtang 24 puntos ang gipabuto ni Carmelo Anthony nga gibituonan sa iyang unom ka tres aron padag-on ang iyang team kinsa nasagunsonan og pilde sa iyang pagpalta og duwa. Ang bag-ong point guard sa Lakers nga si Russel Westbrook niamot usab og 19 puntos para sa ilang kadaugan diin ang kanhi defending champion aduna nay 3-3 win-lose nga baraha. Ang rookie nga si Evan Mobley maoy nangulo sa kapildehan sa Cavaliers pinaagi sa iyang 23 puntos samtang niamot og 18 puntos si Ricky Rubio nga maoy ilang ikatulong duwa sa ilang lima ka duwa nga pagpanulong sa kontra. Si James klaro nga wala pa sa iyang 100 porsiyento nga kondisyon gikan sa duha ka duwa nga pagpalta gumikan sa pagsakit sa iyang tikod sanglit usa ra gikan sa iyang 10 ka tira sa tres ang napasulod apan iya kining giabagan og 8 ka assists batok sa team nga iyang gihatagan og usa ka kampyonato sa NBA. Ang kusgan nga pagbulhot sa Cavaliers sa ilang pagpanulong naputol didto sa Los Angeles diin sa niaging mga duwa, ilang gipilde ang mga posibleng title contenders sama sa Atlanta, Denver ug Clippers kinsa nakakuha og igong pwersa gikan sa ilang mga batan-ong magduduwa. (PAC) This posting includes an audio/video/photo media file: Download Now

Clarkson ganahan og dugang Pinoy sa NBA Posted: 30 Oct 2021 08:08 AM PDT Nanghinaot si NBA sixth man of the year awardee Jordan Clarkson nga aduna pay mga dugong Pilipino ang makasulod sa National Basketball Association (NBA). Ang maong pamahayag giluwatan ni Clarkson kinsa maoy usa sa mga lig-ong pambato sa Utah Jazz human sila nagkabangga ni Jalen Green nga maoy second over-all pick sa 2021 NBA draft sa nakalabay nga adlaw. Ang Jazz nidaog batok sa Houston Rockets nga maoy nag-draft ni Green, 122-91 didto sa Toyota Center sa Housto "You know, this never can be done again because it's the first. But hopefully, we can see more [Filipino players] that can come to the league," Batbat ni Clarkson. Kini labing una nga nagkaabot ang duha ka Pinoy nga NBA player bisan tuod kon sila mga Filipino-American kansang panag-engkwentro gitawag og Filipino Heritage Night didto sa Houston. Si Clarkson nipabuto og 16 puntos samtang si Green naglisod sa iyang opensa sanglit igo lang siyang nakapasulod sa tulo gikan sa iyang 16 la otsa ug sipyat ang walo niya ka itsa gikan sa tres apan nakakuha sab siya og 3 ka rebounds, 3 assists,steal ug block. "For us two to be here, it's just like super inspirational for the youth, every Filipino-American, every Filipino, and anybody with Filipino blood. It's an amazing experience," padayag ni Clarkson. Ang inahan ni Green lumad nga taga Ilocos Norte samtang ang apohan ni Clarkson lumad nga taga Bacolor sa Pampanga. (PAC) This posting includes an audio/video/photo media file: Download Now

TNT maoy hari sa PBA Posted: 30 Oct 2021 08:08 AM PDT Human sa iyam ka tuig, nibalik si Chot Reyes isip head coach sa TnT Tropang Giga ug nahimong kampyon sa Philippine Basketball Association. Si Roger Pogoy ug Troy Rosario naghuwat pa og lima ka tuig usa pa nila matilawan ang katam-is sa unang titulo sa PBA. Kinahanglan pa ni Kelly Williams nga mobalik og duwa gikan sa iyang pag-retiro sa panghinaot nga malangkat ang titulo ug ang tanan nagbunga human ilang gipilde ang Magnolia Hotshots sa game 5, 94-79 didto sa Bacolor Pampanga. Gipamatud-an sa ilang super rookie nga si Mikey Williams nga haom siya sa labing dako nga liga sa nasod human siya ang napili nga finals MVP diin siya nag-average og 28 puntos sa iyang unang tuig sa prangkisa sa MVP Group of Companies. Ang TNT naghuwat og unom ka tuig aron ilang subli nga matagamtam ang katam-is sa kadaugan sa All Filipino Cup human ilang gipahagsa ang Pambansang Manok nga Magnolia. Ang Sugbuanon nga si RR Pogoy niluhod ug nakita ang paglugoklugok sa iyang mga luha didto sa iyang mga mata human nakab-ot na niya sa hingpit ang dugay na niyang gipangandoy nga kampyonato. Apan dili lalim ang ilang dalan paingon sa kalampusan sanglit kinahanglan pa nilang lumpagon ang gingharian sa San Miguel teams nga gipangulohan sa Barangay Ginebra ug San Miguel Beer sa quarterfinals ug semifinals ug ilang gilampornas ang laing SMC team sa PBA finals. Ang maong kampyonaTo maoy ika-unom nga All Filipino championship sa TNT ug ika-walo sa kinatibuk-an sa ilang prangkisa diin lima sa ilang championship ubos sa liderato ni Reyes kinsa aduna nay siyam nga nagtungtong sa iyang abaga. Sa pag-abot ni Mikey sa TNT, nahimong sayon ang trabaho sa ilang pointguard nga si Jayson Castro gumikan sa gipakita sa ilang super rookie kinsa maoy ikaduhang rookie sa kasaysayan sa PBA nga nahimong Finals MVP human ni Danny Seigle niadtong 1999 atol sa Commissioners Cup. Sa pag-abot ni Williams, wala na ang daghang mga minuto nga moduwa si CaStro sanglit iya nang napasa ngadto sa mas batan-ong pointguard ang responsibilidad . Si Williams maoy second best scorer na karon sa PBA kansang team walay first round pick sa niaging mga PBA draft ug nagkinahanglan pa og trade sa laing mga team aron makuha ang number four spot sa draft nga gipanag-iya sa Road Warriors aRon ilang makuha ang kanhi NBA-D League player nga si Williams. Para ni Rosario ug JP Erram kinsa pulos pa mga batan-on maoy magsilbing haligi sa TNT sa ilang front court ug aduna say igong experyensiya gumikan sa ilang natagamtam nga kampyonato. Napanglantawan nga kon magpabilin nga kumpleto ang line-up sa TNT makahakot pa kini og dugang kampyonato sa umaabot nga conference sa PBA. (PAC) This posting includes an audio/video/photo media file: Download Now

42 puntos ni George nasayang Posted: 30 Oct 2021 08:06 AM PDT Nipaarak og 25 puntos si Damian Lillard sa Portland Trail Blazers aron panimaslan ang Los Angeles Clippers 111-92 didto sa ilang balwarte sa nagpadayong duwa sa National Basketball Association. Niabag og 14 puntos ug 17 ka rebounds si Jusuf Nurkic aron putlon ang ilang pito ka sunodsunod nga kapildehan batok sa Clippers. Ang kadaugan sa Blazers maoy nagpatay sa nagdilaab nga opensa gikan sa ilang star nga si Paul George kinsa nirehistro og 42 puntos para sa Clippers. Igo nga panimalos ang gihimo sa Blazers diin sila naglabaw og 20 puntos sa third quarter apan ang Clippers sa pangpangulo ni George nipaduol sa score, 76-67 paingon sa fourt quarter. Ang fade away jumper ni George maoy nakapasikit sa score, 82-78 sa fourth quarter apan si Nurkic ug Anfernee Simons maoy nitubag sa para sa Blazers aron ipalayo ang ilang team sa pagpanghudlat sa Clippers. Ang three pointer ni Norman Powell maoy nakapalugway sa labaw sa Blazers sa wala pa ang step back three ni Lillard aron inaton ang labaw, 94-80 ug human niadto, giusban pa kini ni og laing tres ni Lillard 97-83 sa nahabiling 3:57 sa katapusang quarter. Niadtong Martes, ang Clippers nilubong sa Blazers, 116-86 diin ang Blazers nakahimo og 30 ka turnovers nga maoy nag-inusarang daog sa Clippers sa ilang unang lima ka duwa sa NBA season. Si Lillard padayon pa nga nangita sa iyang kanhi performance sa ilang unang upat ka duwa sanglit nag-average lang siya og 17.8 points nga layo ra sa iyang kasagaran nga average sa NBA ug igo lang nipasulod og unom gikan sa iyang 35 ka tira sa tres apan batok sa Clippers, 5 ang iyang napasulod. (PAC) This posting includes an audio/video/photo media file: Download Now

You are subscribed to email updates from https://www.sunstar.com.ph/. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States