Monday, November 1, 2021

https://www.sunstar.com.ph/

https://www.sunstar.com.ph/

Knockout artist kaupat gitumba ni Sultan

Posted: 31 Oct 2021 08:30 PM PDT

Kaupat gitumba ni kanhi world title challenger Filipino Jonas Sultan ang sumosulbong nga knockout artist sa Puerto Rico nga si Carlos Caraballo aron paghimo'g agianan paingon sa unanimous nga kadaugan sa ilang away kagahapon, Oktubre 31, 2021 (RP time) sa Madison Square Garden sa New York, USA.

Ning maong impresibong kadaugan, naangkon sa kanhi sakop sa nasira nga ALA Boxing Stable sa Sugbo ang World Boxing Organization (WBO) Inter-Continental bantamweight title.

Gitumba ni Sultan si Caraballo sa ikaduha, ikatulo, ikaunom ug ikasiyam nga rounds.

Napagawas man tuod ni Caraballo ang dako niyang potensyal apan mas nipatigbabaw ang abilidad ni Sultan hilabi na sa pasudlanay og mga kumo.

Nakarehistro man tuod og upat ka knockdowns si Sultan apan ligas ra ang puntos nga gihatag sa tulo ka judges, nga parehong mitali og 94-93 sa ilang tagsatagsa ka scorecard pabor sa gitawag og Zorro.

Si Sultan, kinsa misaka sa 18-5, 11KOs nga rekord, maoy labing unang nakapilde kang Caraballo, kinsa nahagbong sa 14-1, 14KOs nga rekord.

Si Caraballo, kinsa mipalukapa sa nag-una niyang 14 ka mga kontra diin wala'y nakalapas og unom ka rounds, tataw nga nakuhaan na og lahutay pagsugod sa 7th round. (ESL)

This posting includes an audio/video/photo media file: Download Now

Editoryal: Maayong Kalagkalag

Posted: 31 Oct 2021 07:25 AM PDT

Nalugwayan og duha ka adlaw ang weekend tungod sa holidays, karon Nobiyembre 1, All Saints Day, ug ugma, Nobiyembre 2, All Souls Day. (working holiday).

Ang Kalagkalag tradisyon sa mga Romano Katoliko sa tibuok kalibotan alang sa paghandom sa mga minahal nga mitaliwan na sa laing kalibotan.

Ning panahona, ang mga Katoliko, mayoriyang relihiyusong grupo sa nasod, magpanon ug mobisita sa mga sam-ang aron pag-ampo ug paghandom sa ilang mahal nga patay na. Karong adlawa, All Saints Day, ang mga anghel o mga bata nga wala pay bahig sa sala ug ugma, All Souls Days, para sa tanang kalag.

Bisan gisaway kini sa ubang tinuhoan, apan dunay tulumanon sa matag relihiyusong grupo nga tradisyon sa dagan sa taas nga panahon. Ang simbahan niangkon nga tradisyon kini sa mga pagano sa unang panahon ug gisagop uban sa pagpahaum sa pagtulun-ang Kristiyanismo.

Gawas sa espirituhanon nga aspeto, ang maong tradisyon naghatag og maayo ug positibong mithi labi na sa pagmahal ug pagyukbo sa kaliwat.

Matod pa, ang nasayod sa iyang kagikan, mas nakasabot sa iyang pagkatawo nga batakang hinagiban alang sa kalamboan.

Labing dayag sa Kalagkalag mao ang panaghiusa sa mga buhi nga kabanay o reunion. Ang holidays naghatag og igong panahon sa alegre nga panagtabo, sama sa piyesta. Subo lang pamalandungon nga ikaduhang tuig karon nga sirado ang mga sam-ang tungod sa pandemiya sa Covid-19.

Dili kita mabalaka ug masuko. Ablihan kini human sa Kalagkalag. Gilikayan sa kagamhanan ang paghugpa sa daghang tawo sa mga sam-ang nga risgo sa pagtakod sa virus.

Pinaagi sa atong hugot nga kooperasyon, molurang ang hulga sa Covid-19. Makasaulog kita sa maayong Kalagkalag ubos sa bag-ong normal.

This posting includes an audio/video/photo media file: Download Now

Sakop sa PAF 'gikalag'

Posted: 31 Oct 2021 07:17 AM PDT

Nakurat ang guests ug mga kawani sa usa ka beach resort sa lungsod sa Oslob dihang ang awto sa usa ka sakop sa Philippine Air Force (PAF) nibangga sa gate, kalit nisulod nga nagyawyaw ug dayong ambak sa swimming pool niadtong Sabado, Oktubre 30, alas 7:10 sa gabii sa Sitio Bogo, Barangay Alo.

Si Staff Sgt. Renen Galope Emong, 41, minyo, taga Cagayan de Oro, ug nadestino sa 205th THW Mactan Airbase sa dakbayan sa Lapu-Lapu, giposasan sa niresponding kapulisan sa Oslob. Lakip sa gitanggong ang iyang Toyota Vios nga dunay numero sa plaka nga AAE 5013.

Si Major Clemente Ceralde, hepe sa Oslob Police Station nga nahinabi sa Superbalita Cebu, niingon nga unang gialarma sa hapon sa samang adlaw ang suspek human nga iyang awto gibangga sa gate sa Cavana Resort ug nakuyawan ang guests sa resort.

"Parang na possessed siya hindi maintindahan ang mga sinabi, pumasok sa comfort room (CR), nagdasal. Pagkatapos naligo sa swimming pool," dugang ni Ceralde.

Human siya maligo, misakay sa awto, mipadagan balik sa dakbayan sa Sugbo apan pag-abot sa Barangay Alo, nabangga sa poste sa pikas lane, nadaro ang 2 ka motorsiklo nga nag-park ug traysikol. Way naapektohang kinabuhi gawas ni Emong nga samdan.

Nibutyag siya sa kapulisan nga nakatulog siya samtang nagmaneho ug nangangkon nga usa siya ka faith healer ug dunay gitambalan sa maong dapit hinungdan nga nag-estar siya sa Angler Resort.

Matod ni Ceralde, daw dunay giabog nga mga dautang espiritu ang maong sakop sa PAF.

Si Flores Jabonero, 42, caretaker sa resort, mibutyag nga nakuyawan sila dihang miabot ang suspek dihang giguba ang pultahan ug misulod sa CR.

Ang nasabtan lang ni Jabonero sa yawyaw ni Emong nga siyay makasulbad sa problema sa tubig sa lugar.

Dili pa makasulti ang kapulisan kon si Emong dunay nerbiyos o kaha ubos sa espiritu sa drugas samtang padayon ang imbestigasyon sa maong kaso.

This posting includes an audio/video/photo media file: Download Now

Mayor Labella naospital og balik; Rama moasumir isip full mayor

Posted: 31 Oct 2021 07:17 AM PDT

Moasumir sugod karong adlawa, Nobiyembre 1, 2021, isip "full mayor" si Acting Mayor Michael Rama.

Gipahibawo kini ni Rama atol sa interbyu sa Superbalita Cebu sa Dominggo sa gabii, Oktubre 31, 2021 dihang gisuwayan siyag kuha og kompirmasyon sa taho kalabot sa pagka ospital na usab ni Mayor Edgardo Labella.

Matod ni Rama, base sa Local Government Code, kon molapas na og 30 ka adlaw ang leave of absence sa usa ka local chief executive, ang acting mayor "maka-exercise" na sa "function" sa pagtudlo, pagsuspenso ug pagtaktak og kawani ug opisyal.

Si Rama nipasabot nga nagkinahanglan kini og dinaliang pagtagad kay duna nay mga posisyon sa city hall nga kinahanglang duna nay matudlo human ni-resign ang naglingkod niini.

Matod niya, nakabalda kini sa mga gimbuhaton sa mga departamentong hingtungdan.

Dihang gipangutana sa Superbalita Cebu kon nakaabot na ba og 30 ka adlaw ang leave ni Labella, matod niya nga "ugma na man tingali, November 1."

Apan ang indefinite leave ni Labella aron magpaalim sa iyang sakit nagsugod niadtong Oktubre 8, 2021.

Busa, kon basehan ang 30 ka working days sumala sa nalatid sa balaud, sa Nobiyembre 18 pa "makaasumir" si Rama kana kon si Labella di mobalik hangtod mapupos ang tagal sa balaud.

Base sa nalatid sa Section 46, paragraph A sa Local Government Code, kon nilapas na ang leave sa mayor og 30 ka working days, ang gahom sa pagtudlo mahimo na sa acting mayor.

"Thus if the period of temporary incapacity exceeds thirty (30) working days, the Acting Mayor may already proceed to execise such functions so as not to impair the delivery of vital public services," matod sa probisyon.

Apan kinahanglan kining masubay sa mga lagda nga nalatid sa Civil Service Commission (CSC).

Base sa samang probisyon, ang acting mayor makabuhat sa tanang mga gimbuhaton sa usa ka mayor gawas lang sa pagtudlo, pagsuspenso ug pagtaktak.

Samtang, si City Administrator Floro Casas nikompirmar sa Superbalita Cebu nga si Labella gidala sa usa ka pribadong ospital sa Sabado, Oktubre 30 tungod sa iyang pneumonia.

Naa ra si Labella sa temporaryong kuwarto, wa sa intensive care unit (ICU) sukwahi sa nanggawas nga mga taho. (REV)

This posting includes an audio/video/photo media file: Download Now

Gob. Yap mipaluag na sa biyahe sa Bohol

Posted: 31 Oct 2021 07:17 AM PDT

Gilibkas sa Kagamhanan sa Probinsiya sa Bohol ang rekisitos nga kinahanglang iapil sa inbound travelers sa ilang listahan sa ilang iendorso ngadto sa ilang destinasyon nga local government unit ngadto sa Bohol Inter-Agency Task Force ug sa Philippine Coast Guard o aviation authority.

Sa labing ulahing executive order nga giluwatan ni Gobernador Arthur Yap, gidawat usab ang pending-for-approval nga mga S-PaSS travel pass gikan sa mga tawo nga hingpit nang nabakunahan. Ang S-PaSS, nga nagpasabot sa safe, swift, and smart passage, gi-institutionalize sa Inter-Agency Task Force for the Management of Emerging Infectious Diseases, gituyo isip one-stop communication ug (IATF-MEID) alang sa mga biyahedor ug local government units (LGUs).

Una nang nipagawas og kamanduan ang gobernador sa Bohol nga temporaryong dawaton ang vaccination cards hulip sa vaccination certificates gikan sa fully vaccinated nga mga tawo nga mosulod sa probinsiya.

Pipila ka mga pasahero gawas sa ticketing office sa usa ka fastcraft sa Pier 1 sa dakbayan sa Sugbo napakyas sa pagbiyahe paingon sa Bohol niadtong Sabado, Oktubre 30, human wala maapil ang ilang mga ngalan sa endorsement list, matod sa taho sa radio dyLA sa Facebook page.

Ubay-ubay nga mga Boholano nga nagtrabaho sa Sugbo ang mopauli alang sa obserbasyon sa All Saints' Day (Nobiyembre 1) ug All Souls' Day (Nobiyembre 2). Kining duha ka adlaw nga kasaulogan gitawag sa lokal nga tawag nga "kalag-kalag."

Si Yap niisyu niadtong Sabado, Oktubre 30, Executive Order (EO) No. 52-B, nga nag-amendar sa EOs No. 52 ug 52-A.

Ang Seksyon 2 sa EO 52-B nag-ingon: "Epektibo dayon, ang endorsement gikan sa component city/Municipal LGUs ngadto sa Bohol Inter-Agency Task Force ug sa katapusan ngadto sa Philippine Coast Guard/Civil Aviation Authority of the Philippines sa listahan sa mga aprobado nga mga biyahedor libkason ug dili na kinahanglan."

Ang Section 1 sa samang EO nag-require na lang alang sa fully vaccinated nga mga biyahedor paingon sa probinsya og (a) vaccination card nga giisyu sa bisan unsang local government unit, Department of Health (DOH)-accredited nga institusyong medikal, pribadong kompaniya, ug langyaw nga nasod o bisan unsang estado/probinsya niini nga authenticated pinaagi sa DOH-Bureau of Quarantine; (b) identification card nga gihatag sa gobyerno; ug S-Pass travel pass (giaprobahan o pending approval).

Alang sa mga biyahero nga wala pa nabakunahan, gikinahanglan na lang sila nga magpakita og negatibong resulta sa RT-PCR test nga gikuha sulod sa 72 ka oras sa dili pa molarga uban ang aprobado nga S-PaSS travel pass; bisan pa, ang mga bata nga nag-edad og upat ka tuig paubos wala gihapon magkinahanglan niini.

"Allowing the use of vaccination card as a requirement for travel to... Bohol shall be temporary. The vaccination certificate requirement shall be reimposed once the DOH website vaxcert.doh.gov.ph shall be rendered fully operational," matod sa Seksyon sa EO.

Aron mapugngan ang pagdaghan sa mga peke nga vaccination card, ang Section 4 nag-ingon nga ang aplikasyon sa S-PaSS sa usa ka biyahero mao ang "basis of criminal prosecution should they utilize and submit or falsified vaccination cards."

Ang EO No. 52 nagtangtang sa negatibong RT-PCR test result requirement gikan sa mga biyahedor nga mosulod sa Bohol. Kinahanglan lang nga magpakita sila og vaccination certificates nga authenticated gikan sa vaxcert.doh.gov.ph nga gi-authenticate usab sa Bureau of Quarantine uban sa S-PaSS gikan sa Department of Science and Technology.

Giamendahan ni Yap kini nga EO pinaagi sa pag-isyu sa EO No. 52-A, nga temporaryong nagtugot sa pagpresentar sa mga vaccination card nga giisyu sa Bohol uban sa government-issued cards ug S-PaSS travel pass alang sa mga biyahedor nga dili makakuha og vaccination certificates.

Si Yap, sa iyang EO 52-A, niingon nga "nagpaabot" siya nga ang mga local government units sa Bohol ug "ubang bahin sa nasud dili makahuman sa pag-upload sa mga rekord sa pagbakuna sa mga indibidwal," nga matod niya miresulta sa "kawalay katakos. aron makamugna og mga sertipiko sa bakuna... bisan hangtud sa paspas nga nagkaduol nga panahon sa Pasko." (KAL)

This posting includes an audio/video/photo media file: Download Now

56 anyos biyuda dasmagan, patay

Posted: 31 Oct 2021 07:12 AM PDT

Biyuda patay human madasmagi og vanfor-hire dihang kalit nga milabang sa national road sa Barangay Don Juan Climaco, dakbayan sa Toledo niadtong Sabado, Oktubre 30, alas 9:40 sa gabii.

Si Jenely Mallosa Abella, 56, biyuda ug taga Don Juan Climaco, Toledo, namatay sa tambalanan.

Natanggong si Jimmy Elladora Hernane, 61, minyo ug taga Arpili, lungsod sa Balamban, nagmaneho sa van..

Si Hernane gikan sa dakbayan sa Sugbo ug padulong sa Balamban apan pag-abot sa lugar, kalit milabang ang biktima ug nadasmagan. (GPL)

This posting includes an audio/video/photo media file: Download Now

Barrita: Kon mobalik ang mga kalag

Posted: 31 Oct 2021 04:50 AM PDT

Motuo ba kamo nga mobalik ang mga kalag, unya mag-multo?

Kalag-kalag karon. Apan sa ikaduhang tuig sagunson, gipasirad-an sa Inter-Agency Task Force (IATF) for the Management of Emerging Infectious Diseases ang mga menteryo gikan sa Oktubre 29 hangtod sa Nobiyembre 2.

Busa, di ta makabisita sa lubong sa atong mga minahal sa kinabuhi. Turno na karon sa mga kalag sa pagbisita sa ilang mga paryenteng buhi pa. Bawos-bawos ba.

* * *

Gihangyo ni acting Cebu City Mayor Mike Rama ang IATF nga ipabiling bukas ang mga menteryo, memorial parks ug mga columbaria sa siyudad sa Nobiyembre 1 ug 2.

Ang bugtong kondisyon mao nga kadtong kompleto na sa bakuna mao ray makasud sa mga menteryo. Apan gibalibaran siya, sumala pa ni Cabinet Secretary Karlo Nograles, co-chairperson sa IATF.

"Dili lang usa ta mamugos," matod pa ni Rama. Apan unsa kahang alegreha sa mga balay kon mobalik ang mga kalag.

* * *

Dihay duha ka mga kalag nga nag-estoryahay kon unsay ilang namatyan. Kalag 1: "Ako, na-frozen ko sud sa refrigerator. Nagkurog ko sa katugnaw ug wa na ko kaginahawa."

Kalag 2: "Pag-uli nako gikan sa trabaho, nakakita kog sapatos nga dili ako. Nidagan ko sa kuwarto sa akong asawa, hubo siya ug nagkurog. Giutingkay nako ang tanan sa balay apan wa koy tawo nga nakit-an. Nihuot akong dughan ug giatake ko sa kasingkasing."

Kalag 1: "Dimalas gyud tang duha. Kon imo pang giablihan ang refrigerator ug niinom kag tubig bugnaw, buhi pa unta ta karon."

* * *

Managlahi ang kalibotan sa mga patay ug ang kalibotan sa mga buhi. Ang taytayan kanila mao ang gugma.

Matod pa ni Thornton Wilder, "There is a land of the living and a land of the dead and the bridge is love, the only survival, the only meaning." Alang sa mga buhi, ang atong mabuhat mao ang paghinumdom sa mga patay na. Matod ni Cicero, "The life of the dead is placed in the memory of the living."

This posting includes an audio/video/photo media file: Download Now

Talk to Papa Joe: Unsay pasabot?

Posted: 31 Oct 2021 04:46 AM PDT

Dear Papa Joe,

Tawga lang ko sa ngalan nga Aming, hingkod na ang panuigon. Kani akong istorya simple ra ni ug di sad about sa love life. Nadisgrasya ko pila na katuig ang nakalabay ug naapektuhan akong mga mata.

To make the story short, since arang arang man mi pagkabutang, nakakita mi og donor gikan sad sa naaksidente. To make the story short again, di man ko komportable sa akong mata. Ambot lang, di man horror horror nga makakita ko og laing nilalang, apan ambot wa ko sa mood permi. Unsa may buhaton nako? Palihug tambagi ko.

AMING

Aming,

Di ko sweto pero may factors ngano ing-ana imong pamati. Usa, kay psychological sa paghunahuna nga patay na ang tag-iya sa imong mga mata o kaha thinking di imoha ang naa sa imong lawas. O ba kaha na-trauma pa ka sa aksidente.

Sa laing bahin, unsa kaha pangitaon nimo ang mga ginikanan ug ang lubnganan sa tag-iya sa imong mga mata ug pasalamatan nimo siya ug sila. Basin spiritually nakig-communicate na nimo. Wa lang nimo ma-gets. Ampo sa labawng makagagahum ug pasalamati sa kinasingkasing nga pagpasalamat sa laing kahigayunan nga nakakita ka.

PAPA JOE

(sa inyong tampo ipadala lang sa papajoesuperb@gmail.com)

This posting includes an audio/video/photo media file: Download Now

DepEd Cebu Prov. adunay team nga mo-monitor sa face-to-face classes

Posted: 31 Oct 2021 04:45 AM PDT

Nimugna og composite team ang Department of Education (DepEd) Cebu Province nga mohimo og regular nga pag-monitor sa mga tunghaan nga nominado sa limited face-to-face classes nga mag-abli karon Nobiyembre 15, 2021 hangtod sa Enero 31, 2022.

Kini ang gipaabot ni DepEd Cebu Prov. Superintendent Dr. Marilyn S. Andales sa pagpahigayon og pilot testing alang sa limited face-to-face classes sa lalawigan sa pagseguro sa hapsay, ug luwas ang mga tunghaan.

Ang composite team gilangkuban sa co-chairs nga sila si Assistant Superintendents Dr. Anelito Bongcawil, Dr. Fay Luares, Dr. Lorenzo Dizon, SGOD Chief Dr. Victor Ybańez, CID Chief Dr. Mary Ann Flores, Nurse Namue Dela Torre, SEPS Dr. Margarita Nierra, DRRM Coordinator Engr. Ester Roldan ug Engr. Danny Borces.

Ang rmga tunghaan nga nominado sa limited face-to-face classes mao ang Basak Elementary School (Samboan), Mahanlud Elementary School (Malabuyoc), Cabagdalan Elementary School (Balamban), Luyongbaybay Elementary School (Bantayan), Cańang Marcelo Luna National High School (Oslob), Busay National High School (Moalboal) ug Pilar National High School (Pilar).

Malaumon si Andales nga ang basehan sa full-opening sa mga klase mag-agad sa resulta aning ipahigayon nga pilot-testing.

Siguradohon nga ang tanang tinun-an mosubay gyud sa tanang lagda sa health protocol sama pag-gamit og masks, face shields ug pagpatuman sa social distancing. (DepEd Prov. PR ni Norman Blanco)

This posting includes an audio/video/photo media file: Download Now

82K kapin narehistro sa Comelec province

Posted: 31 Oct 2021 04:42 AM PDT

Moabot sa 82,682 ka mga Sugboanon ang hingpit nga nakaproseso ug nakaparehistro gikan sa Oktubre 11 hangtod sa tagal sa rehistrasyon sa Oktubre 30.

Kini maoy gipahibawo ni Atty. Lionel Castillano, election supervisor sa Comelec Cebu Province.

Niadtong Oktubre 30, hingpit nga mitik-op ang voters registration human sa moabot usa ka tuig nga pagproseso alang sa piniliay sa 2022.

Sa uwahing higayon, natala sa tri-cities ang 35,437 ka mga bag-ong botante ug mga nagproseso sa pagbalhin.

Sa maong datos, natala sa dakbayan sa Sugbo ang 18,335 ka registrants, sa dakbayan sa Lapu-Lapu moabot og 12,295 samtang sa dakbayan sa Mandaue adunay 5,807.

Ang Probinsya sa Sugbo nakahipos usab og moabot sa 47,245 ka mga bag-ong miparehistro ug niproseso sa ilang pagbalhin.

Gibanabana sa Comelec nga moabot sa 3,269,154 na ang kinatibuk-ang narehistro sukad sa Hulyo lakip na niini ang mi-transfer.

Gipasabot ni Castillano nga gikatakda nga mohimo og hearing ang Election Registration Board (ERB) sa Nobiyembre 11 alang na sa pag-finalize sa listahan sa mga bag-ong niparehistro.

Masuta usab kon nakab-ot niini ang target nga gidaghanon sa mga botante alang sa umaabot nga piniliay karong Mayo 2022. (ANV)

This posting includes an audio/video/photo media file: Download Now

Mayor sa Pilar misanong na sa DILG, mga sam-ang gipasira na

Posted: 31 Oct 2021 04:41 AM PDT

Sirado na alang sa mga residente ug bisita ang tanan nga mga sementeryo sa lungsod sa Pilar sugod karon hangtod sa Nobiyembre 2 subay sa bag-ong kamandoan ni Pilar Mayor Manuel Santiago.

Kini maoy bag-ong kausaban sa mando sa mayor agig pagsanong sa lagda sa Department of the Interior and Local Government (DILG).

"All LGUs are enjoined to adopt and implement ordinances, executive orders, or resolutions restricting access to cemeteries, memorial parks, columbaria for a period of five days, from October 29 to November 2, 2021," tipik sa mando sa mayor.

Sa Oktubre 28, unang mipahibawo ang mayor sa pagbukas sa tanan nga mga sementeryo atol sa adlaw sa Kalag Kalag aron nga makabisita ang mga residente ilabi na kadtong nituyo og pauli aron mobisita sa mga minahal sa kinabuhi nga nitaliwan na sa laing kalibotan.

Ang lungsod sa Pilar adunay mga sam-ang sa barangay Biasong, Dapdap, Lanao, Montserrat, Moabog ug Villahermosa.

Una na nga gihulagway sa mayor nga literal nga bukas ang mga sementeryo, pasabot nga wa kini mga kural o gate.

Apan aron malikayan ang pagtapok sa sulod, gimandoan na ang mga awtoridad sa pagbantay sa naasoyng mga sementeryo pagsiguro nga walay mosupak sa mando.

Hinuon, gipasalig sa mayor nga abli ug bukas sa pagduaw ang mga sementeryo sa tibuok tuig ug liwas na sa Kalag Kalag.

Subay niini, nanghinaot ang kagamhanan sa pagsabot sa publiko ug pagsunod sa lagda alang sa hapsay nga paghandom. (ANV)

This posting includes an audio/video/photo media file: Download Now

Curfew sa Mandaue City gipamub-an, dugang pabor sa fully vaccinated

Posted: 31 Oct 2021 04:39 AM PDT

Giluagan sa dakbayan sa Mandaue ang mga lagda alang sa paglihok aron mahatagan og dugang prebilihiyo ang mga tawo nga hingpit nga nabakunahan batok sa coronavirus disease 2019 (Covid-19).

Gipamub-an usab niini ang mga oras sa curfew.

Sa Executive Order 36-A nga gipagawas sa Sabado, Oktubre 30, 2021, si Mayor Jonas Cortes niingon nga ang mga tawo nga 65 anyos pataas mahimo nang mogawas sa ilang mga balay bisan kon lain ang ilang tuyo, way labot sa batakang mga kinahanglanon o serbisyo o pagtrabaho sa gitugutan nga mga industriya, kon sila hingpit nga nabakunahan.

Ang mga tawo nga ubos sa 15 anyos mahimo na usab nga mobiya sa ilang mga balay aron mosulod sa mga establisemento nga gitugotan sa pag-operate ubos sa Alert Level 2, kon sila ubanan sa usa ka hingpit nga nabakunahan nga ginikanan, guardian o ubang responsable nga hamtong.

Ang EO 36-A nag-amendar sa EO 36 nga giisyu ni Cortes niadtong Oktubre 20 nga naghatag sa guidelines sa pagpatuman sa bag-ong alert system nga gipatuman sa Inter-Agency Task Force for the Management of Emerging Infectious Diseases nga nagbutang sa Mandaue ubos sa Alert Level 2.

Ubos sa EO 36, ang mga tawo nga ubos sa 15 anyos ug 65 anyos pataas gidid-an sa pagbiya sa ilang mga panimalay kon dili alang sa katuyoan sa pagkuha sa kinahanglanon nga mga butang ug serbisyo, o alang sa pagtrabaho sa gitugotan nga mga industriya ug opisina.

Ubos sa bag-ong EO 36-A sa mayor, gipamub-an usab ang curfew ngadto sa alas 11 sa gabii hangtod sa alas 4 sa kaadlawon, gikan sa alas 10 sa gabii hangtod alas 4 sa kaadlawon nga nalatid sa EO 36.

Ang bag-ong curfew magamit sa tanang mga tawo, establisemento ug mga opisina nga gitugotan sa pag-operate.

Ang mga exemption sa curfew—nga nahimo na alang sa mga authorized persons outside of residence, kadtong nagtrabaho sa business process outsourcing ug uban pang importanteng industriya sama sa paghatod sa pagkaon ug pagkaon, mga health worker ug frontline sa gobyerno ug mga serbisyong pang-emerhensya—gipalapad aron maapil ang mga tawo nga moagi sa airport alang sa pagbiyahe sa gawas sa nasod.

Lakip sa mga establisemento nga gitugotan sa pag-operate ubos sa Alert Level 2 mao ang mga lugar alang sa mga tigom, insentibo, komperensya ug exhibition (Mice); mga lugar alang sa sosyal nga mga kalihokan sama sa kasal, engagement ug birthday party; mga atraksyon sa turista sama sa mga library, museyo, galeriya ug park; amusement o theme park; mga lugar sa kalingawan sama sa mga internet cafe, billiard hall, amusement arcade, bowling alleys, skating rinks, swimming pool ug uban pa; mga balay sa sine; mga establisemento sa personal nga pag-atiman sama sa mga salon, nail spa ug kadtong nagtanyag og aesthetic/cosmetic procedures; fitness studios ug gyms alang sa indibidwal nga non-contact exercise ug sports; ug mga fairs/peryas o kid amusement industries sama sa playgrounds o playrooms.

Ang tibuok Sugbo, lakip ang Mandaue City, unang gipailawom sa Alert Level 2 gikan sa Oktubre 20 hangtod 31.

Gilugwayan kini hangtod sa Nobiyembre 14. (CTL)

This posting includes an audio/video/photo media file: Download Now

Gomez nagplano nga curfew hours sa siyudad sa Ormoc usbon

Posted: 31 Oct 2021 04:33 AM PDT

Tungod sa pag-ubos sa kaso sa Covid-19 sa dakbayan sa Ormoc, abli si Mayor Richard Gomez sa posibilidad nga usbon ang oras sa curfew.

Apan kinahanglan dunay mapakita nga lig-on nga basehan ang mga negosyante nga dunay pagsaka sa ilang kita.

EVIDENCE-BASED

Matod ni Gomez, iyang gisultian ang Ormoc City Chamber of Commerce (Orcham), grupo sa mga negosyante nga magpakita og ebidensya kon pila ang increase sa ilang kita kon ugaling usbon ang oras sa curfew.

"Ang sabi ko sa Ormoc Chamber, show us an evidence yung magiging diperensya kung mag-move tayo ng curfew from 10 to 11 kung gaano kalaki yung magiging increase sa sales nila if we move the curfew," matod ni Gomez.

Sumala sa mayor naay ordinansa ang pagpatuman sa curfew busa dili kini bastabasta mausab kon wala'y lig-on ug igo nga ebidensya.

WAY LABOT SA CURFEW

Base sa giluwatan nga Executive Order 214 epektibo Nobiyembre 1 - 30, wala'y labot sa curfew ang mga negosyante ug mga trabahante.

Sama sa food and food delivery, pharmacy, frontline health workers, emergency ug uban pa nga sulod sa curfew hours ang trabaho.

Gihangyo lang ang mga trabahante nga magdala lang og certificate of employment ug ID.

Gipaabot na lang ni Gomez ang presentasyon sa Orcham bahin sa iyang gipangayo nga basehan aron mausab ang oras sa curfew.

Bisan sa pagluag sa polisiya sa Ormoc bahin sa pandemiya apan, magpabilin ang pagsunod sa protocol. (JKDP)

This posting includes an audio/video/photo media file: Download Now

Kasal di madayon, groom naghikog

Posted: 31 Oct 2021 04:33 AM PDT

Ormoc City - Usa ka lalake nga napakyas ang pagpakasal gumikan sa pandemiya, naghikog sa Javier, Leyte niadtong Oktubre 25, alas 5:00 sa buntag, sud sa iyang pinuy-anan.

Ang biktima giila nga si Larry Moreno, 20, construction worker, taga Sitio Dam, Brgy. Manlilisid, Javier, Leyte.

Matod sa kapulisan sa Javier, ang igsuon nga babaye sa biktima personal nga midangop sa kapulisan ug nangayo og tabang.

Pagresponde sa kapulisan, ilang naabtan ang ulitawo nga wala nay kinabuhi ug nagbitay sa beam sa balay gamit ang pisi nga gihigot sa liog niini.

Base sa imbestigasyon sa kapulisan, si Moreno nakauyab sa dihang nagtrabaho pa kini sa Mambajao, Camiguin isip construction worker.

Nagplano siya nga iyang dad-on sa Leyte ang babaye ug pakaslan apan napakyas gumikan sa quarantine restrictions tungod sa pandemiya.

Wala hinuo'y nakita nga timailhan sa foul play ang kapulisan sa kamatayon niini. (JKDP)

This posting includes an audio/video/photo media file: Download Now

KD gipamulta og $25,000

Posted: 31 Oct 2021 04:31 AM PDT

Gipamulta sa National Basketball Association (NBA) og $25,000 si Brooklyn Nets All-Star forward Kevin Durant gumikan sa paglabay niini sa bola ngadto sa mga tumatan-aw atol sa ilang duwa batok sa Indiana Pacers niadtong Sabado, Oktubre 30 2021 (RP time).

Ning maong duwa, si Durant nakahagpat og foul sa nahabiling 4:40 minutos sa 3rd quarter apan imbis nga itunol niya sa referee ang bola, iya kining gilabay ngadto sa mga tumtan-aw.

Ningdaog ang Nets, 105-98, ning maong duwa sa pagpangulo ni Durant, kinsa nimugna og 22 puntos. (AFP)

This posting includes an audio/video/photo media file: Download Now

Bucks mobisita sa White House

Posted: 31 Oct 2021 04:29 AM PDT

Mobisita ang 2021 National Basketball Association (NBA) champion Milwaukee Bucks ni US President Joe Biden sulod sa White House karong Nobiyembre 8, 2021.

Ang Bucks, nga gipangulohan ni Giannis Antetokounmpo, maoy labing unang NBA champion squad nga makabisita sa White House gikan niadtong 2016 diin miduaw ang kanhi champion Cleveland Cavaliers ni kanhi US President Barack Obama.

Ang Golden State Warriors wala mibista sa White House niadtong 2017 ug 2018 hasta ang Toronto Raptors niadtong 2019 ug Los Angeles Lakers niadtong 2020. (AP)

This posting includes an audio/video/photo media file: Download Now

Pogoy, Rosario daw giduyan sa panganod

Posted: 31 Oct 2021 04:06 AM PDT

Daw giduyan lang gihapon sa panganod sila si Roger Pogoy ug Troy Rosario, duha ka mga adlaw human sila nakatilaw og kampyunato sa Philippine Basketball Association (PBA) sa labing unang higayon.

Ang duha ka mga magduduwa dako og natampo aron maangkon sa TNT Tropang Giga ang titulo sa PBA Philippine Cup pinaagi sa pagdispatsar sa Magnolia Ang Pambansang Manok Hotshots sulod lang sa lima ka mga duwa sa finals series niadtong Oktubre 29, 2021 sa Bacolor, Pampanga.

Pulos nakaangkon og kampyunato sila si Pogoy ug Rosario sa college basketball apan taodtaod sab ang ilang gihuwat una sila nakatilaw og korona sa professional rank.

Ang duha nahilakip sa 10 ka mga sakop sa Tropang Giga nga nakaangkon sa kampyunato sa PBA sa labing unang higayon kauban sila si Finals MVP Mikey Williams, Poy Erram, Glenn Khobuntin, Kib Montalbo, Ping Exciminiano, Gryann Mendoza, ug Chris Javier. (ESL)

This posting includes an audio/video/photo media file: Download Now

at

No comments:

Post a Comment

Subscribe to: Post Comments (Atom)

End of Summer Sale ☀️😎

20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...

  • Last Chance - Win over $1,800 in BLEUSALT
    Elevate your Wardrobe. Offer ends Midnight. ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏ ...
  • Breaking: Aaron Rodgers teases Jets return this season: 'Anything is possible'
    New York Jets quarterback Aaron Rodgers suffered a torn Achilles tendon in Monday's 22-16 overtime win vs. the Buffalo Bills. If you a...
  • End of Summer Sale ☀️😎
    20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...