https://www.sunstar.com.ph/

---

• Liboan midagsa aron magpabakuna
• Kagamhanan nangandam sa Omicron variant
• Editoryal: Naa pay nalambigit
• Tambagi ko Noy Kulas: Tungod kay PWD
• Masahista gipatay sa riding in tandem
• Financial assistance sa Lawis gipadali sa mayor
• P13.7M shabu nasakmit gikan sa 2 ka habalhabal driver
• Rama mitudlo og 3 ka abogado sa City Hall
• Dakong bonus sa mga kawani sa Toledo City
• Dan Lopez daog Star Hollywood Awards
• Exhibit, mga pakigpulong atol sa kasaulogan sa Bonifacio Day
• Globe midaug sa 2021 Stevie Awards for Great Employers
• 6K PUJ units sa CV makadawat og fuel subsidy
• Pacquiao gipasalamatan sa bag-ong boxing star
• Super Sealers kampyon sa PBA 3x3
• PBA sugdan, Disyembre 8
• De La Hoya gusto lang gihapong mobalik sa pag-away
• Curry mas kuyaw kon maglagot
• Thomas miluwas sa Team USA
• ‘Pagpangilkil’ sa kawani sa vendors imbestigahon
• Espinoza: Hulga sa Omicron variant
• 47 ka tawo mi-fake sa swab test
• 2 ka 'durugista' sa Duljo nakuhaag 2 ka kilo nga shabu
• Gipusil-patay sa merkado
• Milayat sa condo, patay
• 7 anyos nalumos sa swimming pool
• Negosyante gibanhigan
• Daghan nang menor de edad nabakunahan
• P7.7M gahin sa TESDA scholars sa Lapu-Lapu
• Mga senior citizen awtomatik na nga miyembro sa PhilHealth
• 5 gikan sa tunghaan sa Sugbo mi-top sa civil engineer licensure examination
• 1.3M target bakunahan sa DOH 7 sa 3 ka adlaw
• Flights gikan sa HK gi-ban tungod sa Omicron variant
• SEDC gipasidunggan na sab
• Editoryal: Sunog, gidiling druga
• Barrita: 'Barkong hapit malunod', ang luha ni Casas
• Talk to Papa Joe: Mobadlong ba ko?
• Mga ginikanan sa managsuong Constantino gipangita sa DSWD 7
• Akrho Ginatilan chapter namintal sa waiting shed
• Pangagpas ni Peñalosa: Donaire di kaseguro ni Gaballo
• Marcial dumalaon sa iyang asawa
• Sultan wala mahadlok sa Monster
• Ex-sparmate ni Pacquiao kampyon na
• Init sa Suns misilaob sa Brooklyn
• Wiliamson tugtan na makapraktis

Liboan midagsa aron magpabakuna Posted: 29 Nov 2021 06:21 AM PST Ang Cebu City Government nakabakuna og kapin 25,000 ka mga individual gikan sa ilang 90 ka vaccination sites sa dakbayan sa Sugbo atol sa unang adlaw sa National Vaccination Days nga molanat hangtod Disyembre 1, 2021. Kini ang gibutyag ni Dr. Jeffrey Ibones, pangulo sa Cebu City Health Department, kinsa gitahasan ni Mayor Michael Rama sa preparasyon para sa tulo ka adlaw nga pagpamakuna sa tibuok siyudad batok sa coronavirus disease (Covid-19). Si Konsehal Dave Tumulak, kinsa nitabang sa pagmonitor sa mass vaccination sa dakbayan, niingon nga angay pang pakusgan ang pagpahibawo sa maayong epekto sa bakuna ngadto sa sitio level. "Sa atong observation, kinahanglan pa gyud nga palapdan ang information dissemination para maabot sa mga sityo ang pagpahibawo sa bakuna. Ato silang dasigon pa alang niadtong wala pa nabakunahi nga magpabakuna na labi na nga adunay nagpabiling hulga sa tibuok kalibutan sa Omicron variant kay ang bakuna makapanagang batok sa virus aron makab-ot nato ang herd immunity," matod ni Tumulak. Sa iyang bahin si Konsehal Joel Garganera, deputy chief implementer sa Emergency Operations Center (EOC) nagpasalamat ngadto sa mga tawo nga nisanong sa panawagan sa City Government sanglit ang gilantaw sa gobiyerno mao ra ang kaayohan sa katawhan ug malikay sa peligro batok sa virus. LAPU, MANDAUE MALAMPUSON Ang Dakbayan sa Mandaue mipasigarbo nga misaylo sila sa ilang target sa gidaghanon sa mabakunahan sa unang adlaw. Sa mga alas 7:25 sa gabii sa Lunes, miabot na og 8,922 ang ilang nabakunahan, mas taas kaayo sa ilang target nga 7,500 sa unang adlaw. Samtang ang Dakbayan sa Lapu-Lapu, sa mga alas 4 sa hapon, niingon nga nakabakuna na sila og 8,107 ka mga tawo sa ilang target nga 9,700 sa siyam ka sites. This posting includes an audio/video/photo media file: Download Now

Kagamhanan nangandam sa Omicron variant Posted: 29 Nov 2021 06:19 AM PST Si National Task Force (NTF) Against Covid-19 chief ug vaccine czar Carlito Galves Jr. nipasalig sa publiko sa Dominggo, Nobiyembre 28, 2021, nga ang gobyerno, pinaagi sa Inter-Agency Task Force (IATF), hugot nga nag-monitor sa tanan nga mga kalamboan bahin sa bag-o ug posible nga labing ka mananakod nga strain sa Sars-CoV-2, ang variant sa Omicron. (B.1.1.529). Matod ni Galvez nga way angay ikabalaka ang publiko tungod kay nangandam na ang gobyerno batok sa variant sa Omicron. "Nag-usap-usap na kami sa IATF, para 'yung preparation natin sa mga treatment therapies, ICUs, sa ating mga hospitals, personnel, hinahanda na po natin 'yan," matod niya sa usa ka pamahayag. "Huwag po kayong mag-alala, huwag po kayong mag-panic. Sundin lang po natin ang minimum health standards at protocols, magsuot po ng face mask, at hopefully, magawa natin 'yung ating ginawa sa Delta variant where we were able to completely manage 'yung [virus and prevent] possible unnecessary loss of lives at economy," dugang niya. PANINGKAMOT Matod ni Galvez nga ang mga estratehiya sa pagbakuna sa nasud magpadayon ug i-recalibrate, palambuon ug palig-unon taliwala sa hulga sa Omicron. Siya niingon nga ang mga target, nga naglakip sa mga health worker, mga tigulang ug mga tawo nga immunocompromised, magpabilin sa nag-unang prayoridad sa pagbakuna aron makontrol ang kritikal nga sakit, pagpaospital ug pagpanaghan sa mangamatay tungod sa Covid-19. "Ang aming panagawan din sa lahat ng ating kababayan, 'yung mga wala pang bakuna, magpabakuna na. During the onslaught of the Delta [variant], nakita natin na karamihan ng casualties at severe cases ay 75-85 percent unvaccinated," matod ni Galvez. Sa Nobiyembre 27, labing menos 35,557,409 ka mga indibidwal ang hingpit nga nabakunahan, samtang 45,286,049 ka mga tawo ang nakadawat sa unang doses. VACCINATION DRIVE Gilusad sa Pilipinas ang tulo ka adlaw nga National Vaccination Drive sa Lunes, Nobyembre 29, aron mabakunahan ang siyam ka milyon ka mga indibidwal. Naglangkob kini sa primary, booster ug pediatric nga pagbakuna. Mokabat sa 11,000 ka vaccination sites ug 160,000 ka mga boluntaryo ang na-activate ug napalihok alang sa tibuok nasud nga pagpatuman sa programa, nga molungtad hangtod sa Disyembre 1. Ang ikaduhang leg sa kalihokan sa pagbakuna ipahigayon gikan sa Disyembre 15 hangtod 17. Taliwala sa hulga sa variant sa Omicron, si Galvez niingon nga ang Nasyonal nga Gobyerno nagpabilin nga nakatutok sa ilang tumong nga hingpit nga mabakunahan ang labing menos 77 ka milyon nga mga indibidwal sa nasud sa unang quarter sa 2022, ingon man ang pagsugod sa inoculation sa mga bata nga 11 anyos paubos. "By the second quarter of 2022, the government shall have fully vaccinated 90 million individuals, in time for the national elections," matod ni Galvez. "The rest of the Filipino population is expected to be fully vaccinated by the third quarter of next year based on the national government's vaccination synchronization matrix," dugang niya. GIDUGANGAN Kaniadtong Dominggo, Nobiyembre 28, ang IATF nagpagula sa Resolution 151-A, nga naglakip sa mga bag-ong nasod nga gidid-an sa pagsulod sa mga utlanan sa Pilipinas. Ang mga bag-o naglakip sa Austria, Czech Republic, Hungary, The Netherlands, Switzerland, Belgium ug Italy sa Pulang listahan, nga sa sinugdan naglangkob sa South Africa, Botswana, Namibia, Zimbabwe, Lesotho, Eswatini ug Mozambique. Ang mga flight nga gikan sa nahisgutang mga lugar gidid-an sa pagsulod sa nasud hangtod sa Disyembre 15. Ang mga Filipino lamang nga mobalik sa nasud pinaagi sa government-initiated o non-government-initiated repatriation ug Bayanihan flights ang mahimong tugutan nga makasulod ubos sa nag-una nga entry, testing, ug quarantine protocols para sa Red List nga mga nasud/ hurisdiksyon/teritoryo. (SunStar Philippines) This posting includes an audio/video/photo media file: Download Now

Editoryal: Naa pay nalambigit Posted: 29 Nov 2021 06:19 AM PST Ipaimbestigar ni Mayor Michael Rama ang giingong pagpangilkil og P100,000 sa usa ka kawani sa Market Operations Division (MOD) sa matag vendor sa merkado publiko sa Carbon. Nagtuo si Rama nga 'tip of the iceberg' ang pagpangilkil sa kawani nga si Kara Arcilla-Bargamento busa iyang ipaimbestigar ang gibuhat niini. Bitaw, imposible kaayo nga ang usa ka ordinaryong kawani ingon niadto ka isog nga mangayog og ingon niana ka dako, kana ko n tinuod ang pasangil, sa kwarta gikan sa ordinaryong mga vendor. Dako kaayo ang kahigayunan nga duna kini gisandigan nga opisyal nga maoy iyang gisaligan. Karon sa pag-asumer ni Rama sa katungdanan human sa kamatayon ni Mayor Edgardo Labella, ang kaso ni Bargamento mahimong unang pagsuway sa iyang liderato. Molutaw ba kaha ang tinuod, nga si Bargamento wa mag-inusara sa iyang gibuhat? Siya lang ang dagway nga mitumaw sa pagkakaron. Di ni unang higayon nga dunay giingong pagpangilkil sulod sa city hall. Sa miaging tuig, dunay duha ka pribadong mga tawo nga na-entrap usab human giingong nangilkil gamit ang ngan sa usa ka dakong opisyal sa Siyudad. Apan human niadto, wa imbestigasyon nga napahigayon kon unsa ka tinuod ang mga alegasyon. Karon nga niingon na man si Rama nga ang kurapsyon di niya "cup of tea,"busa magpaabot ang mga Sugboanon nga dunay mas lawom nga imbestigasyon ug tanang mga nangalambigit pagasilhigon. Tingali, sa kasaysayan sa City Hall, usa ni sa mga dakong anomaliya, kana kon mamatud-an sa imbestigasyon nga dunay mas taas nga opisyal nga nagpaluyo niini. Iapil usab unta sa imbestigasyon ang lifestyle check sa mga opisyal nga matumbok sa imbestigasyon, kon duna na ba silay napalit nga mga kabtangan, sama sa sakyanan, bisan kon ang ilang pay grade layo ra kaayo sa kapabilidad sa pagpalit. Dinhi mamatud-an ni Rama nga ang iyang administrasyon di mopiyong basta kurapsyon. This posting includes an audio/video/photo media file: Download Now

Tambagi ko Noy Kulas: Tungod kay PWD Posted: 29 Nov 2021 06:09 AM PST Dear Noy Kulas, Tawga lang ko og Teofi, 34 years old, employee sa usa ka government agency. Hilig kaayo ko og sports, apil na ang biseklita. Kaning akong problema parte ni sa akong kauban nga PWD. Gwapa ug buotan kaayo unya very intelligent kaayo. Ang nakaapan lang kay ang usa niya ka tiil naigo sa polio. But aside ana, wala na siyay deperensya. Tungod sa among ka close, na realize nako nga in love na ko sa iyaha. Nag court ko niya ug wa ko mag expect nga mo say yes siya early this year. Daghan sa akong mga barkada ug family members wa makauyon niya tungod sa iyang situation. Bisan ang akong parents di ganahan niya. But wa ko maminaw nila, ang akong gi continue ang among relationship. Until nga iyang gihatag ang iyang self sa akoa. Wa ko mag expect nga iyang ihatag kay gatuo ko nga conservative but sa una namong check in sa motel, naa dayon nahitabo namo. Until nga siya na ang magsige og hagad nako na manglaag ug mang check in. Wild kaayo siya sa sex nga nakapa intense sa akong feeling niya kay grabe pud ni siya kaparaygon. Wa ko mag expect nga bisan sa iyang situation, naa siya ka high og energy. Karon, mabdos na siya ug gusto niya nga magminyo mi. But wa siya kahibawo nga against ang akong parents. Noy, unsa man ang akong buhaton nga majority sa akong family wa makauyon? TEOFI Teofi, Nag edad na man kag 34, ayaw na padiktar sa ubang mga tawo kon ang imong kalipay maoy hisgutan. Not even sa imong family kay ikaw man ug ang imong uyab magpuyo. Kon happy ka sa uban niya, do it. Kay naa na man mo sa hustong edad, way bisan usa nga makababag ninyong duha. Makasabot ra ang imong pamilya kon iiang makita nga malipayon mong nagpuyo ug successful mong duha. Mao man na ang sagad barometer sa change sa sayop nga pagtuo. Di usab na sukdanan ang iyang apan sa lawas kon gugma ang basehan. Naa gani uban nga mas lisod pa ang kaso, yet, nagkahigugmaay gihapon. Kon unsa ang imong ikalipay, go for it. NOY KULAS kulassuper@sunstar.com.ph This posting includes an audio/video/photo media file: Download Now

Masahista gipatay sa riding in tandem Posted: 29 Nov 2021 05:41 AM PST Namatay diha-diha ang usa ka babayeng masahista human pusila sa riding in tandem sa sitio Puntod, Alaska, Barangay Mambaling, Siyudad sa Sugbo alas 3:20 sa Lunes sa hapon, Nobiyembre 29, 2021. Giila ang biktima nga si Pinky Sanchez, 46, taga sitio Huyonghuyong Alaska Mambaling, kinsa nakaangkon og samad pinusilan sa nawong ug lawas. Sigun sa mga saksi nga wala lang una nganli sa Mambaling police station nga duha ka mga lalake nga naka helmet ningduol kang Sanchez ug dayong pusil kaniya makaduha tumong sa nawong ug lawas. Dali nga misibat ang mga killer sakay sa motorsiklo sa wala matino nga destinasyon. Matod ni Police Major Dindo Alaras, hepe sa Mambaling police station, nga nagpadayon pa ang ilang imbestigasyon kon unsay motibo sa krimen. Apan nakadawat silag impormasyon nga si Sanchez nalambigit sa illegal nga drugas. Gawas sa illegal nga drugas ila usab nga tan-awon ang personal grudge ilabi na nga aduna impormasyon nga naay nakontra si Sanchez. "Nag imbestigar pa ang atong mga investigator on case. Dunay info nga involved daw ni sa drugs ang biktima pero atoa pa na nga tan-awon kon unsa ka tinuod," matod ni Alaras. Ang igsuon ni Sanchez nga si Kenneth nitug-an nga masahista ang iyang igsuon diin adunay usa ka anak. Wala pa silay kasayuran nganong gi pusil kini, kon aduna bay gikaaway sa wala pa ang insidente. Nanghakot pa kinig mga butang sa giabangang balay kay mobalhin og puyo sa pikas panimay. LAY MINISTER Samtang duna nay person of interest ang Pardo police station sa pagpusil patay kang Danilo Vestil Bacalso, 68, duol sa merkado sa barangay Inayawan, Dakbayan sa Sugbo sa Dominggo sa alas 12:20 sa udto, Nobiyembre 28, 2021. Matod ni Police Major Jose Angelo Acupinpin, hepe sa Pardo police station, nga ang usa sa ilang gisubay ang panimawos nga motibo. Giingong gipasanginlan si Vestil nga maoy nagpadakop sa usa ka drug personality nga ila ra usab nga silingan tungod kay gibaharan kini niya nga ipadakop. "Prior sa shooting, naay drug personality nga gikontrahan sa ilahang sitio nga permi niya ingnun nga iyang ipadakop tungod sa illegal drug activities. So, kato nga personality nadakop namo adtong Saturday during sa Sacleo," matod ni Acupinpin. This posting includes an audio/video/photo media file: Download Now

Financial assistance sa Lawis gipadali sa mayor Posted: 29 Nov 2021 05:41 AM PST Gipadali ni Mayor Michael Rama sa City Treasurer's Office ang pagpagawas sa financial assistance alang sa gatusan ka mga pamilya nga nasunogan sa ilang mga balay sa sityo Lawis, Barangay Mambaling, Dakbayan sa Sugbo. Si Rama nimando kang City Treasurer Mare Vae "Ivy" Reyes sa pag-andam sa P20,000 nga ayuda alang sa mga tag-iya nga nasunogan og bala, P10,000 alang sa mga sharer ug P5,000 alang sa mga renters o boarders. "Three days to make Lawis feel that government is there," padayag ni Rama, kinsa naglaom nga sa Disyembre 1 o 2, mahatag na ang ayuda. Gawas sa financial assistance, gusto usab sa mayor nga mahatag na usab ang housing materials nga gilangkuban sa 10 ka sin ug 10 ka plywood sa matag tag-iya sa balay. Si Portia Basmayor, pangulo sa Department of Social Welfare and Services (DSWS), nagkanayon nga base sa ilang uwahi nga lista, niabot na og 987 ka mga balay ang nasunog ug 1,300 ka mga pamilya ang apektado o 4,000 ka mga individual. Apan gipasabot ni Basmayor nga mokunhod pa ang maong gidaghanon sanglit ila pa kining i-double check aron mahashasan ug ang makadawat kadto rang mga tinuod nga house owner, sharer ug renter. This posting includes an audio/video/photo media file: Download Now

P13.7M shabu nasakmit gikan sa 2 ka habalhabal driver Posted: 29 Nov 2021 05:38 AM PST Duha ka drayber sa habalhabal nga giilang high value individual sa Cebu City Police Office (CCPO)) nasikop sa buy-bust sa dalan C. Padilla, Barangay Duljo Fatima, dakbayan sa Sugbo niadtong Dominggo, Nobiyembre 28, alas 11 sa gabii. Nakuha ang kapin sa duha ka kilo nga shabu nga mobalor og P13.7 milyunes. Target sa operasyon maos si Vinch Neil Arnaiz alyas "Baloy", 27, drayber sa habalhabal ug taga dalan Spolarium, Duljo Fatima, human migawas ang iyang pangalan gikan sa usa ka tinubdan sa kapulisan. Lakip sa nasikop ang iyang pangabaga sa illegal nga negosyo nga si Jessie Caballero alyas "Pogi" nga usa usab ka drayber sa habalhabal ug taga Barangay Quiot. Matod ni Police Colonel Josefino Ligan, hepe CCPO, nga si Arnaiz adunay agalon nga bilanggo na sa Cebu City Jail nga mao usab ang nag-supply kaniya sa illegal nga drugas ug si alyas Pogi ang mohatod niini ngadto sa street pushers. Dugay na, matod pa, nga nalambigit sa illegal nga drugas si Baloy ug giingong sakop kini sa usa ka drug group nga naglihok dinhi sa Sugbo. Timailhan niini ang putos nga Chinese tea bag nga gisudlan sa kinilo nga gituohang shabu nga susama kini sa nakuha nga 8 kilos sa milabayng tuig sa Barangay Talamban nga gipadagan usab sa usa ka dakong drug personality nga nabilanggo na sa New Bilibid Prison. Ang kanhi agalon niini maoy nag pailaila niya sa drug personality nga naa usab sa bilanggoan sa dakbayan sa Sugbo nga wala lang una nganli ni Ligan tungod kay nagpadayon pa ang imbestigasyon. Giingong maka baligya si Baloy og 4 ngadto sa 5 kilos matag buwan diin moabot ang iyang supply sa drugas sa mga silingang siyudad ug lungsod sa lalawigan sa Sugbo. Sulod lang sa 29 ka adlaw sa Nobiyembre nakasakmit na ang CCPO og 5,700 gramos sa gituohang shabu nga adunay kantidad nga P38,760,000. Gibutyag ni Ligan nga daghan ang nasakmit sa tibuok Nobiyembre itandi sa milabay nga mga buwan nga makakuha lang sila og tag 3,000 gramos. Nagtuo siya nga gisakyan sa mga durugista ang pagluag sa quarantine ug ang holiday season hinungdan nga daghan ang nakuha anti-illegal drug operations sa kapulisan. Samtang, moabot usab ngadto sa 119 ka mga indibidwal ang nadakpan sa CCPO sa usa ka adlaw nga synchronized anti criminality and law enforcement operation kun Sacleo niadtong Biyernes, Nobiyembre 26. Matod ni Ligan nga nakahimo sila og 103 ka operations nga naglangkob sa illegal gambling, illegal drugs, pag-serve sa mga warrant of arrest diin naka dakop silag most wanted persons, lakip na niini ang loose firearms. Ang labing dako nga ilang nakuha mao ang illegal nga drugas diin nakasakmit sila og kapin sa 200 gramos gikan sa drug personalities. This posting includes an audio/video/photo media file: Download Now

Rama mitudlo og 3 ka abogado sa City Hall Posted: 29 Nov 2021 05:38 AM PST Tulo ka abogado ang gitudlo ni Mayor Michael Rama kagahapon, Nobiyembre 29, nga molingkod sa puwesto sa City Attorney , In-house Ombudsman ug Chief of Staff sa Office of the Mayor. Iyang gi-appoint nga mohulip sa posisyon nga gibakante ni Atty. Rey Gealon sa City Legal Office mao si Atty. Eugene Orbita samtang, si Atty. Homer Cabaral, CESO IV, kanhi regional director sa National Police Commission (Napolcom- 7) isip Resident Ombudsman. Ang kanhi City Attorney nga si Gealon ni-resign gumikan sa iyang pagpapili pagka konsehal sa south district para sa 2022 elections. Si Orbita maoy kanhi dean sa College of Criminology sa University of the Visayas (UV) sa 1996-2004, ug practicing forensic document examiner and signature, master in public administration ug 4th placer sa Criminology board examination. Sa iyang bahin, si Cabaral, CESO IV nahimo usab nga kapitan sa Barangay Duljo Fatima gikan sa 1983-1987 ug nakatrabaho sa Napolcom niadtong 1990-2019 diin siya nahimong regional director sa sulod sa 10 ka tuig sa wala pa siya niretiro ug Master in National Security Administration gikan sa National Defense College of the Philippines ug lieutenant colonel sa Philippine Air Force (reserved). Siya usab ang magsilbing point person ni Rama sa peace and order sa dakbayan sa Sugbo, samtang si Atty. Dominic Diño maoy iyang chief of staff. Si Diño nahimong chief of staff ni Rama dihang konsehal pa kini hangtod nahimong bise mayor ug mayor apan na-promote pagka-assistant City Administrator ni Rama sa iyang ika-duhang termino hangtod sa 2016 ug ni-resign dihang nabaslan og kapildi si Rama ni kanhi mayor Tomas Osmeña sa samang tuig. Ang kanhi chief of staff ni Rama nga si Dax Arcilla maoy gihulip ni Rama isip pangulo sa Division for the Welfare of the Urban Poor (DWUP) sanglit ni-resign si Simeon Romarate kay nagpapili siya pagka konseha sa south district. This posting includes an audio/video/photo media file: Download Now

Dakong bonus sa mga kawani sa Toledo City Posted: 29 Nov 2021 05:36 AM PST Gilauman nga makadawat dili lang usa apan duha ka financial incentives ang mga regular nga empleyado sa kagamhanan sa dakbayan sa Toledo karong holiday season. Kini human nga gi-anunsyo ni Toledo City Mayor Marjorie Perales nga hatagan og tag P30,000 nga Christmas bonus ang matag regular nga empleyado sa kagamhanan atol sa inauguration sa bag-ong gi-ayo nga public plaza sa Nobiyembre 29, 2021. Dugang niini nga madawat usab sa mga empleyado ang laing bonus nga doble sa ilang binuwan nga sweldo. Ang regular nga empleyado nga may salary grade nga 11 nga makadawat og bonus nga moabot sa P70,000. Ang kagamhanan adunay moabot sa 500 ka regular employees ug 2,000 usab ang job order (JO). Gawas sa regular nga empleyado, makadawat usab og tag P5,000 nga bonus ang JO. Giproseso na sa liason officers ang mga gikinahanglang dokumento. Gusto sa mayor nga mahatag ang bonus sa dili pa ang adlaw sa Pasko. This posting includes an audio/video/photo media file: Download Now

Dan Lopez daog Star Hollywood Awards Posted: 29 Nov 2021 05:11 AM PST Ang Sugboanong aktor nga si Dan Sy Lopez maoy nakakuha sa Best Actor award atol sa gipahigayon nga Star Hollywood Awards 2021, New Jersey USA. Nadag-an ni Dan ang iyang acting sa short film nga 'Isolasyon.' Magsilbi kining labing unang international award nga nakuha ni Dan sa iyang 10 na ka tuig isip aktor, kinsa regular nga makita sa mga drama serye sa CCTN Channel 47. "I'm proud nga nakadaog ta sa Pilipinas and not just sa Pinas but bringing the name sa Cebu pud," tipik sa pamahayag ni Dan sa Superbalita Cebu. This posting includes an audio/video/photo media file: Download Now

Exhibit, mga pakigpulong atol sa kasaulogan sa Bonifacio Day Posted: 29 Nov 2021 05:11 AM PST Mga nitibong mahait nga hinagiban ug ang pakigpulong sa mga batan-on bahin sa mabayanihong buhat atol ning pagsaulog sa ika-158 nga adlawng natawhan sa nasudnong bayani nga si Andres Bonifacio karon, Nobiyembre 30. Ang kalihokan gitawag og "Manggugubot! Celebrating Andres Bonifacio Day @158 and the 500 Years of Visayan Heroism", anha sa Palm Grass The Cebu Heritage Hotel, alas 2:30 sa hapon. Kini mopakita sa onsite exhibit ug panel discussion bahin sa mga hinagiban nga gigamit sa mga nitibong manggugubat alang sa kagawasan. Sumala sa mga manunuwat sa kasaysayan, ang 1898 Cebu revolutionaries gitawag og manggugubot. Ang blades collector ug kaliwat sa Katipunero, Randy Salazar sa Camp Red Bushcraft and Survival Guild, mopasabot sa nagkalainlaing tradisyonal nga mahait nga hinagiban sa Visayas, Mindanao, ug Luzon. Si Jesus Christopher Salon, Museum In-charge sa City Museum of Cagayan de Oro, mopaambit bahin sa mga tawo kaniadto sa Philippine archipelago ug ang mga impluwensiya sa tradisyon sa paghimo og mahait nga butang. Si Department of Education Region 7 (DepEd 7) Regional Director Salustiano Jimenez mohatag og inspirational message sa kasaulogan sa Andres Bonifacio Day ug ang 500 ka tuig sa Visayan heroism. Ang DepEd 7 motunol usab og awards sa mga mananaug sa Cebu Island-wide Extemporaneous Speech Contest nga giapilan in virtually sa 20 ka grade school students nga nagrepresentar sa siyam ka divisions ug 18 ka schools sa Cebu island. Ang extemporaneous speech contest judges mao sila si UP Cebu Communication Senior Lecturer Atty. Ian Manticajon, TV and radio broadcaster Leo Lastimosa, Heritage architect ug kanhi TV newscaster Melva Rodriguez-Java ug Cebuano Studies Center Director Dr. Hope Sabanpan-Yu. Ang onsite blades exhibit ablihan karon, Nobiyembre 30 ug motapos sa Disyembre 4, 2021 pinaagi sa Camp Red Bushcraft and Survival Guild (Camp Red). Ang Camp Red mohimo usab og Jungle Survival Workshop sa Disyembre 4, 2021, alas 2:00 sa hapon sa Palm Grass Hotel. Ang kasaulogan ubos sa pagpasiugda sa Palm Grass Hotel uban sa Department of Education Region 7, National Historical Commission of the Philippines, National Quincentennial Committee, Camp Red Bushcraft and Survival Guild, Museo Sugbo, Central Visayas Association of Museums, Diyandi Heritage Center ug SOAN2020. (PR) This posting includes an audio/video/photo media file: Download Now

Globe midaug sa 2021 Stevie Awards for Great Employers Posted: 29 Nov 2021 05:08 AM PST Nakadawat ang Globe og Gold Stevie for Employer of the Year, telecommunications division, atol sa 2021 Stevie Awards for Great Employers. Ang kompaniya naila nga maayo moatiman sa iyang mga kawani. Ang Globe niabag sa mga kawani atol sa pandemiya aron mahimong luwas ug motunol og igong suporta.. Lakip sa Globe's award - winning programs mao ang Globe Labs nga kaugalingong PCR testing facility, Thursdays By The Desk nga nag-aghat sa mga kawani matag Huwebes nga dili pabalda sa trabaho ug HopeChat nga nagdugtong sa mga kawani sa pag-atiman sa health uban sa mga batid pinaagi sa Messenger. "Ultimately, by caring for our employees, we can achieve great business results and create products that connect families, help businesses flourish, and make the nation admired — not only during this difficult time, but for many years to come," matod ni Ato Jiao, Globe Chief Human Resource Officer. Samtang, ang pag-ila sa iyang best practices sa employee engagement, ang Globe nakadawat og Gold Stevie for Achievement in Employee Engagement. Bisan sa hagit mugna sa pandemiya, ang Globe's engagement score sa 2020 iSpeak Employee Engagement Survey gikan sa Willis Towers Watson naa sa 93%, labing taas sa miaging lima ka tuig. Ang Globe maoy bugtong Filipino company nga nahimong kabahin sa WTW High Performing Organizations. Ang Globe nakadawat usab og Silver Stevie for Most Valuable HR Team. Gipahaom sa Globe ang iyang tanang lakang sa United Nations Sustainable Development Goals No. 3 sa good health ug well-being, UN SDG No. 8 sa decent work ug economic growth ug UN SDG No. 9 sa industry, innovation, ug infrastructure. (PR) This posting includes an audio/video/photo media file: Download Now

6K PUJ units sa CV makadawat og fuel subsidy Posted: 29 Nov 2021 05:07 AM PST Dili mominos 6,000 ka public utility Jeepney (PUJ) units sa Central Visayas (CV) gikatakda nga makadawat og fuel subsidies gikan sa Land Transportation Franchising and Regulatory Board (LTFRB) pinaagi sa Pantawid Pasada Program (PPP) sugod sa sunod semana. Sa text message sa SunStar Cebu, si LTFRB 7 Director Eduardo Montealto, Jr. nikompirmar sa subsidy nga balor og P7,200 nga i-download sa PPP cards sa eligible drivers ug operators sa traditional ug modern PUJ. Matod sa regional director, gitugot ang subsidy per unit sa PUJ human ang drayber usahay managlahi og unit nga drayban o extra. Gawas pa, dason niya, ang operators nakalista sa ilang buhatan sa pagparehisto sa sakyanan ug wala silay insaktong listahan sa mga ngalan sa PUJ drivers. Dugang ni Montealto, ang card gamiton sa pagpalit og fuel adto lang sa participating petroleum retail outlets o gasoline stations. Kadtong mga drayber nga wala makadawat o nawala ang PPP card, si Montealto nagkanayon nga kinahanglan mobisita sa ilang buhatan ug Landbank of the Philippines sa pagpakigsayod sa bag-ong lagda sa pagkuha sa card. Ang subsidy usa ka national program gamit sa P1-billion allocation gikan sa Development Budget Coordination Committee, Department of Transportation (DOTr), ug LTFRB. Sa Facebook post sa LTFRB 7, duna nay 78,101 ka PUJ drivers ang nakadawat og fuel subsidy nga balor og kapin sa P500 million. Dugang sa post, ang fuel subsidy program maoy tubag sa DOTr ug LTFRB sa nagpadayong pagtaas sa presyo sa fuel o lana nga nakapadugang sa kalisod sa mga drayber ug operators. Ang paghatag og fuel subsidies sa public transportation drivers ug operators dili bag-ong programa. Ang PPP program gipatuman sa 2018 ug 2019 sa pagtuman sa probisyon sa Republic Act (RA) No. 10963 o ang Tax Reform for Acceleration and Inclusion (TRAIN) Act. This posting includes an audio/video/photo media file: Download Now

Pacquiao gipasalamatan sa bag-ong boxing star Posted: 29 Nov 2021 05:06 AM PST Nagpasalamat ang bag-ong Australian boxing star nga si George Kambosos ngadto kang Filipino boxing legend Manny Pacquiao, kinsa iyang gihulagway nga nakatabang og dako aron mahashasan ang iyang abilidad. Si Kambosos maoy sparring partner ni Pacquiao kaniadto ug kapin na sab sa 200 ka rounds ang ilang pagbinubokay sa sparring sessions. Matod ni Kambosos nga daghan siya'g nakat-unan gikan kang Pacquiao nga iyang naggamit aron pakagingon ang kalibutan sa boksing pinaagi sa pagrehistro og split decision nga kadaugan batok kang American Teofilo Lopez ning bag-uhay lang sa New York. Ning maong kadaugan, naharos pag-ilog ni Kambosos gikan kang Lopez ang World Boxing Association (WBA), International Boxing Federation, ug World Boxing Organization (WBO) lightweight titles. Human sa iyang kadaugan, si Kambosos gi-congratulate dayon ni Pacquiao pinaagi sa Twitter. "Congratulations to my friend George Kambosos on an epic win! You helped me in so many of my past fights," tweet pa ni Pacquiao. "I hope our hundreds of rounds of sparring helped you in some way tonight. I'm proud of you." Wala ra milabay ang usa ka adlaw ug nitubag si Kambosos. "Thank you for everything, Manny Pacquiao! The rounds we shared together shaped me to become champion! Thank you, brother!" Si Pacquiao miretiro na dili pa lang tantong dugay ug kasamtangan kining nagtutok sa iyang presidential campaign sa umaabot nga eleksyon sa Pilipinas samtang si Kambosos aduna pa'y hataas nga dalan nga pagasubayon sa kalibutan sa boksing. This posting includes an audio/video/photo media file: Download Now

Super Sealers kampyon sa PBA 3x3 Posted: 29 Nov 2021 05:06 AM PST Lain na sab nga puwersa ang naghari sa third leg sa Philippine Basketball Association (PBA) 3x3: Lakas ng Tatlo tournament. Ang Sista Super Sealers, nga maoy 3x3 affiliate sa Rain or Shine Elasto Painters, ningmakmak sa Pioneer Pro Tibay, 20-13, sa finals aron angkunon ang kampyunato ning maong edisyon sa torneyo niadtong Nobiyembre 28, 2021 sa Ynares Sports Arena sa Pasig City. Si Kenneth Mocon maoy labing kuyaw nga nakaduwa sa Super Sealers ug nimugna kini'g siyam ka mga puntos aron pangulohan ang kadaugan nga nagtunol sa iyang puwersa og P100,000 nga ganti. Paingon sa finals, gipangdispatsar sa Super Sealers ang Purefoods TJ Titans, 19-15, sa semis, ug Phoenix affiliate team Limitless Appmasters, 17-16, sa quarter-finals. Ang Pioneer nakabulsa og P50,000 isip 2nd placer. Sa inilugay sa ikatulong dapit, gipangbuntog sa Terrafirma ang Purefoods Titans, 21-16, aron angkunon ang P30,000 nga ganti. Ang nag-unang duha kampyon sa torneyo mao ang TNT Tropang Giga sa first leg ug Meralco Bolts 3x3 sa second leg. This posting includes an audio/video/photo media file: Download Now

PBA sugdan, Disyembre 8 Posted: 29 Nov 2021 05:03 AM PST Sugdan na karong Disyembre 8, 2021 ang Philippine Basketball Association (PBA) Governor's Cup sa Ynares Sports Arena sa Pasig City apan sama sa miaging duha ka mga komperensya, wala gihapoy mga tumatan-aw nga pagatugtan. Gipasabot ni Commissioner Willie Marcial nga padayon pa silang nakigsabot sa nagkadaiyang local government units (LGU) alang sa ilang tinguha nga pasudlan na og mga tumatan-aw ang mga kombati sa komperensya. Malaumon si Marcial nga makadawat og positibong tubag gikan sa mga LGU ang ilang hangyo. "Kasalukuyan tayong nakikipag-usap mga LGUs at tayo ay umasa na mapagbibigyan ang ating kahilingan na pahintulutang makapasok at makapanood ang ating mga fans ng laro," opisyal nga pamahayag ni Marcial. Ang PBA nagplano sab nga mopahigayon og mga duwa sa Smart Araneta Coliseum sa Quezon City, Mall of Asia Arena sa Pasay City, Ynares Sports Center sa Antipolo City, ug FilOil Flying V Arena sa City of San Juan alang sa import-laden conference. Ang PBA nakadesisyon nga sugdan na ang komperensya human kini nakadawat og pagtugot gikan sa Inter-Agency Task Force (IATF). Sa miaging duha ka mga komperensya, nga pulos All-Filipino, ang PBA ninggamit og bubble setup sa Pampanga. Sa kasamtangan, ang Metro Manila ug uban pang mga rehiyon sa nasod anaa ubos sa Alert Level 2 diin tugtan na ang pagpahigayon og contact sports sama sa basketball apan nagdepende lang gihapon kini kon tugtan sa LGU. This posting includes an audio/video/photo media file: Download Now

De La Hoya gusto lang gihapong mobalik sa pag-away Posted: 29 Nov 2021 05:03 AM PST Padayong nagtinguha si kanhi six division world champion Oscar De La Hoya nga mobalik og away taliwala sa iyang pangidaron nga 48. Si De La Hoya katapusang miaway niadtong 2008 diin nakasinati siya og grabeng kastigo gikan kang Filipino boxing icon Manny Pacquiao. Mobalik na unta og away si De La Hoya sa sayong bahin ning tuiga batok ni kanhi UFC champion Vitor Belfort sa main event sa Triller pay-per-view apan nauswag kini niadtong Septiyembre. Usa ka semana sa dili pa ang away, miatras si De La Hoya human siya nataptan sa Covid-19. Nagplano si De La Hoya nga mag-training og balik karong Enero sa sunod tuig alang sa iyang tinguha. This posting includes an audio/video/photo media file: Download Now

Curry mas kuyaw kon maglagot Posted: 29 Nov 2021 05:02 AM PST Dili ikalimod nga si Stephen Curry maoy usa sa labing kuyaw nga mga magduduwa sa National Basketball Association (NBA) apan kagahapon, Nobiyembre 29, 2021 (RP time), gipakita sa kanhi two-time MVP nga mas kuyaw siya kon maglagot. Gihabwa ni Curry ang iyang kapungot sa 4th quarter pinaagi sa pagpaulbo sa iyang opensa nga naghatod sa Golden State Warriors ngadto sa kadaugan batok sa host Los Angeles Clippers, 105-90, sa NBA 2021-22 season. Niulbo ang kaspa ni Curry dihang gitawagan siya og technical foul sa nahabiling 9:08 minutos sa 4th quarter human sa grabe niyang pagreklamo nga wala'y gitawag nga foul ang mga referee sa iyang paglusot niadtong gutloa. Human niini, nimugna si Curry og 11 ka mga puntos lakip na niini ang tulo ka sunodsunod nga three-point bombs nga naghatag sa Warriors og 95-77 nga labaw sa nahabiling 5:21 minutos. Sa kinatibuk-an, si Curry nipupo og 33 puntos lakip na niini ang pito ka three-point shots. "It was just an accumulation of all types of weird stuff. All that led into where I thought I got a foul," batbat ni Curry. "It definitely fired me and the team up. After that it was time to direct my energy into putting the ball in the basket." Ang Warriors, nga ningpahugot sa ilang paggunit sa overall leadership dala ang 18-2 nga rekord, nakadawat sab og 18 puntos gikan ni Otto Porter Jr., 17 puntos gikan ni Jordan Poole ug 12 puntos gikan ni Andrew Wiggins. Ang Clippers, nga nahagsa sa 11-9 nga rekord, gipangulohan ni Paul George pinaagi sa iyang 30 puntos samtang ningtampo og 13 puntos matag usa sila si Eric Bledsoe ug Marcus Morris Sr. (AP) This posting includes an audio/video/photo media file: Download Now

Thomas miluwas sa Team USA Posted: 29 Nov 2021 04:59 AM PST Gipaneguro ni Isaiah Thomas nga dili masubhan og makapakurat nga kapildihan ang USA basketball team sa pagsugod sa 2023 World Cup qualifiers kagahapon, Nobiyembre 29, 2021 (RP time) sa Chihuahua, Mexico. Nagpakatap si Thomas og 21 puntos lakip na niini ang labing mahinungdanong three-pointer sa duwa sa nahabiling 13.3 segundos aron agakon ang mga Amerikano sa makutas nga kadaugan batok sa Cuba, 95-90. "It's an honor and a privilege to put USA on your chest," batbat sa 32 ayos nga si Thomas, kinsa usa ka free agent sa National Basketball Association (NBA). "So, anytime USA Basketball comes calling, I'm always going to be for it. We have a great group of guys, a great coaching staff and it was fun to be out there. It was a great game. It was a tough game for us." (AP) This posting includes an audio/video/photo media file: Download Now

‘Pagpangilkil’ sa kawani sa vendors imbestigahon Posted: 28 Nov 2021 08:53 PM PST Mopahigayon og imbestigasyon ang Cebu City Government sa kawani nga na entrap sa National Bureau of Investigation (NBI) 7 sa Nobiyembre 24, 2021. Matod ni Mayor Michael Rama nga iyang ipaimbestigar ang gihimo ni Kara Marie Arcilla-Bargamento, administrative aide III nga nadestino sa Market Operation Division (MOD) nga maoy unit-in-charge sa Freedom Park ug Warwick Barracks sa Carbon Market. Si Rama niingon nga ang mga buhatan sa Human Resources Department, City Legal Office (CLO) ug resident Ombudsman ang mosusi niini. Ang mayor bag-ohay lang nitudlo kang Atty. Eugene Orbita para maoy mangulo sa CLO ug Atty. Homer Cabaral isip resident Ombudsman ug maoy lead person kon adunay mga empleyado nga magpabadlong. Nagtuo si Rama nga duna pay nangalambigit ining mao nga anomaliya. "It might be the tip of the iceberg..dako kaayo og trabahuonon," matod ni Rama sa usa ka press conference sa Lunes, Nobiyembre 29. Matod ni Rama nga una niyang gipabuhat sa Lunes, Nobiyembre 29, sa HRD mao ang pagsuwat sa termination paper alang kang Bargamento. Si Rama niingon nga sa iyang administrasyon way luna ang kurapsyon sa iyang administrasyon. "Corruption is not my cup of tea," busa ang mga kawani nga nalambigit sa kurapsyon di na kinahanglan pang pahimangnoan. WAY BAYAD Ang Cebu2World Development Incorporated (C2W) niingon nga dili sila makahatag og komentaryo sanglit dili nila kawani ang nadakpan ug ang certificate wa sab nila masusi kon tinuod ba kini sanglit wala nila makita ug wala say pirma gikan sa ilang opisyal. "We emphasize that C2W does not ask for any reservation fees from vendors to secure their stalls in Carbon and we will continue to comply with the City's clear direction to accommodate all registered vendors as of the 2020 master list," mensahe sa C2W. Giingong nangayo si Bargamento og tag P100,000 matag vendor alang sa "prime location" sulod sa modernong merkado ug sa temporaryong balhinan sa vendors. Gipasakaan na siya sa NBI 7 og kasong kalapasan sa Republic Act 3019 kun Anti-Graft and Corrupt Practices Act human sa inquest proceedings human sa entrapment operation. NANAWAGAN Nanawagan ang National Bureau of Investigation (NBI-7) sa mga manindahay nga giingong nabiktima ni Bargamento nga pormal nga mo-duso sa ilang sumbong sa buhatan alang sa dugang ebidensya ug witness labot sa giingong pagpangilkil niini sa vendors. Gibutyag ni Atty. Renan Oliva, hepe sa NBI-7, nga human nasikop si Bargamento nakapiyansa kini sa kantidad nga P90,000 sa Nobiyembre 25, 2021 ug nakagawas sa Nobiyembre 26. "We are calling on those who have been similarly victimized by Miss Bargamento to come to the office and file necessary complaints. Because during our investigation, our witnesses in this case revealed that there are fifty or more victims by Miss Bargamento. So bring the necessary documents regarding sa kaso so we can file additional cases against her," matod ni Oliva sa Lunes, Nobiyembre 30. Dugang ni Oliva nga nakig-alayon na ang buhatan sa opisina ni Rama alang sa imbestigasyon. This posting includes an audio/video/photo media file: Download Now

Espinoza: Hulga sa Omicron variant Posted: 28 Nov 2021 08:32 PM PST DILI sama sa miaging tuig nga gilalisan pa kon pasudlon ba o dili ang mga turista gikan sa Tsina, labina gikan sa Wuhan, diin didto nanukad ang Covid-19, karon, nakapangandam na ang atong kagamhanan sa hulga aning giingon nga Omicron variant sa Covid-19, nga nadiskobrehan didto sa Africa. Niadtong Bernes, November 26, ang Inter-Agency Task Force for the Management of Emerging Infectious Diseases (IATF) nagpakanaog og "red list" sa mga sama sa South Africa, Botswana, Namibia, Zimbabwe, Lesotho, Eswatini ug Mozambique. Ang mga biyero gikan ani nga mga nasud dili makasulod sa atong nasud. Kagahapon, gidugang sa "red list" ang nasud sa Austria, Czech Republic, Hungary, Netherlands, Switzerland, Belgium ug Italy kay dunay nadiskobrehan sa Omicron variant. Ang "red list" nagsugod niadtong November 28 ug hangtud kini sa December 15. Apan kon ngano nga kutob ra sa December 15 wa ta gipasabot sa IATF. Matud ni Cabinet Secretary Karlo Nograles, ang tigpamaba ug co-chair sa IATF, ang tanan pasahero nga gikan sa mga nasud nga nalakip sa "red list" sulod sa 14 ka adlaw bisan kon bakunado dili pasudlon sa atong nasud. Apan kadtong atong mga kaigsoonan bisan gikan sa nasud nga "red list" nga mouli subay sa gipasiugdahan nga pamaagi sa atong kagamhanan ug sa "bayanihan flights" makasulod sa atong nasud apan moagi sa testing ug mosunod sa quarantine protocols. Si Secretary Carlito Galvez Jr., ang chief implementer sa National Task Force (NTF) Against Covid-19, nagpasabot nga basin og ibalik ang strikto nga pagpatuman sa pagdili sa mga lakaw ug kalihokan sa katawhan aron malikayan kining Omicron variant. Ang problema nga akong nakita sa atong nasud mao ang kadaghan sa puerto gikan sa amihanan hangtud sa habagatan nga mahimo nga adto mosulod ang mga mobiyahe nganhi sa atong nasud tungod kay molikay sa proseso sa quarantine protocols. Matag usa kanato, gawas kadtong mga gahi'g ulo ug talawan sa dagum sa bakuna batok sa coronavirus, nakasabut na kon unsa ka delikado kining Covid-19 ug nakahibawo na usab ta kon unsay angayan nga buhaton aron mahalikay ta ani nga klase sa virus. Sa ato pa, ang buhaton na lang sa atong kagamhanan pinaagi sa IATF ug NTF mao na lang pagbantay-badlong sa mga dili motuman sa health protocols. Hatagan ba kaha sa IATF ug NTF ang mga lokal nga kagamhanan sa paghimo sa ilang kaugalingon mga lakang ug pamaagi aron malikayan kining Omicron variant? Sa nangagi, dihang nagkamenos na ang takod sa Covid-19, ang mga lokal nga kagamhanan gihatagan sa IATF og igong' katungod sa paghimo og ilang mga pamaagi nga malikayan ang pagsaka sa takod sa Covid-19 tungod kay mas nakahibawo sa sitwasyon ang mga lokal nga opisyales sa ilang tagsa-tagsa ka dapit. Gani, atong mahinumduman nga nagbangi kaniadto ang IATF ug si Cebu Gobernador Gwen Garcia tungod kay si Gobernador Gwen nagpakanaug og iyang orden sa pamaagi sa health protocol sa mga moabot sa Cebu gikan sa lain nga nasud nga dili subay sa IATF. Hinuon, nasulbad ra ang maong isyu. This posting includes an audio/video/photo media file: Download Now

47 ka tawo mi-fake sa swab test Posted: 28 Nov 2021 07:57 PM PST Nanawagan ang National Bureau of Investigation (NBI-7) sa publiko nga likayan ang pagpameke ug paggamit og peke nga mga dokumento sama sa Reverse Transcription Polymerase Chain Reaction (RT-PCR) test kon mobiyahe ilabi na nga nag-atubang pa sa health crisis ang Sugbo ug duna na say laing variant of concern nga Omicron. Kini human nga gipasaka sa buhatan ang falsification complaints batok sa 47 ka mga indibidwal nga nigamit og peke nga mga RT-PCR test results nga mokantidad og di momenos P1,000 matag usa atol sa ilang pag biyahe. Si Atty. Renan Oliva, regional director sa NBI-7, mipahibaw nga nalakip sa mga mo atubang sa reklamo mga pribadong indibidwal ingon man naa sa kagamhanan. Nalakip sa mga kasong atubangon niini may kalapasan sa Republic Act 11332 o ang Mandatory Reporting of Notifiable Disease and Health events of public concern, partikular na sa Section 9, paragraph B may labot sa pagpameke sa mga dokumento ingon man kalapasan sa Article 175 sa Revised Penal Code. Matod ni Oliva nga nagpatabang si Dr. Gerardo Aquino Jr., medical center chief II sa Vicente Sotto Memorial Medical Center, labot sa mga lista sa ngan nga nigamit sa peke nga swab test results gamit ang pangan ug official seal sa hospital. Nalakip sa maong mga indibidwal nagagikan sa dakbayan sa Lapu-Lapu, Mandaue, Cebu City, Tagbilaran City, lungsod sa Argao, Liloan ug uban pa. Nahitabo kini sa managlahing mga petsa, apan ang labing uwahi sa Hulyo 2021. "You have knowledge siguro nga falsified na kay wa gud ka kuhai og swab test and as per our investigation, ang pinakadugay one hour ra naa nay result which is not what is happening, di ba. Because 24 to 48 hours ang result sa RT-PCR, diba. You cannot get it less than one hour and everybody should undergo a swab test. Ang uban wa kuhai og swab, ang uban dihas sakyanan, gi print. So ang katong bearer, dunay knowledge," matod ni Oliva sa Nobiyembre 29 nga press conference. "Like ig abot nimo didto duna na sa system. Kani naa man list ang Sotto kon kinsa gyud tong nagpakuha so katong gigamit sa travel upon reaching the port of entry, i-certify gyud na indeed nga nagpa test gyud ka," dugang ni Oliva. Si Oliva nipasabot nga gikinahanglan nga mokooperar sab ang publiko sa legal nga pamaagi sa kagamhanan aron mapugngan ang pagkatap sa bag-ong variant sa coronavirus disease. "Especially karon nga naay bag-ong variant nga nakit-an, if you continue using falsified documents, mosamot og spread ang virus kon makalusot mo. But since this is a health issue, kinahanglan tanan mo cooperate kay imong palusotan, wa ka moagig test unya asymptomatic ka, makatakod ka," matod ni Oliva. Samtamg nag padayon nga gisusi sa NBI ang lain pang mga ngan nga nalakip sa listahan sa VSMMC alang sa pagpasaka og kaso. Giawhag niya ang publiko nga mosumbong sa buhatan aron nga mapugngan ang samang paagi. This posting includes an audio/video/photo media file: Download Now

2 ka 'durugista' sa Duljo nakuhaag 2 ka kilo nga shabu Posted: 28 Nov 2021 05:18 PM PST Duha ka kilo sa gituohang shabu nga gibana bana mokantidad og P13.7million nasakmit sa buy-bust sa Dominggo sa gabii, Nobiyembre 28, sa mga sakop sa City Drug Enforcement Unit -City Intelligence Enforcement (CDEU-CIU) sa Cebu City Police Office sa duha ka high value target nga durugista sa Barangay Duljo Fatima, Dakbayan sa Sugbo. Ang mga dinakpan nga pulos wala moluwat og pamahayag sa ilang habig mao sila si Vinch Neil Arnaiz, alyas Baloy, 27, taga sityo 34-D, Spolarium St., Duljo-Fatima, ug Jessie Llanos Caballero, alyas Pogi, 27, driver, taga Quiot Pardo, Dakbayan sa Sugbo. Si Caballero ang gitumbok nga tighatod sa illegal drugs isip bodegero. Ang operasyon gipangulohan ni Police Major Beethoven Taneo uban sa City Intelligence Unit nga gipangulohan ni Police Lt. Col.. Randy Caballes ug gi supervise ni Police Col. Josefino Ligan. Kasong kalapasan sa Republic Act 9165 kun Comprehensive Dangerous Drugs Act of 2002 ang ipasaka sa kapulisan batok sa duha karong Lunes, Nobiyembre 29. (Alan Tangcawan) This posting includes an audio/video/photo media file: Download Now

Gipusil-patay sa merkado Posted: 28 Nov 2021 05:33 AM PST Usa ka lay minister sa Barangay Inayawan, siyudad sa Sugbo ang gipusil-patay sulod sa merkado sa naasoy nga barangay kagahapon, Nobiyembre 28, pasado alas 12:00 sa udto. Si Police Corporal Jeymos Tordios sa Pardo Police Station, kinsa maoy nag-imbestigar sa nahitabo nga pagpamusil, niila sa biktima nga si Danilo Vestil Bacalso, 68, molupyo sa Sityo Colo sa Inayawan. Sa imbestigasyon sa kapulisan, matod pa ni Tordios, nga samtang naglakaw si Bacalso sulod sa merkado, usa ka tawo ang kalit nga niduol sa biktima ug dayon pusil kapila ka higayon. Matod ni Tordios, ang biktima nakaangkon og samad pinusilan sa iyang lawas lakip na ang ulo nga niresulta sa iyang hinanaling kamatayon. Dugang ni Tordios nga sa ilang inisyal nga pagsubay sa maong kaso, ilang gitan-aw ang personal nga anggulo sa pagpatay sa biktima. "Sa among pag-imbestigar, paingon diay ni siya sa ilang ancestral house," matod ni Tordios. Gibutyag niini nga sa gisulti sa anak ni Bacalso nga bisitaon unta niini ang ancestral house sa biktima kay sanglit patay naman ang igsuon ni Bacalso hinungdan nga siya na ang nag-asikaso. "Amo pud to nga susihon ang ancestral house kon didto na ba ni gikan si Bacalso kay ang iyang anak wala pud nahibawo kon gikan naba didto," dugang ni Todios. Usa sa mga senior citizen nga nahinabi sa Superbalita Cebu nga nihangyo lang nga dili magpaila sa iyang pangalan, niingon nga sa iyang pag-adto sa merkado sa Inayawan, nagkanayon nga si Bacalso nailhan kini nga moabag sa pagkalawat sa simbahan sa lugar ug nakurat sa dihang nahibawo sa nadangatan sa ilang layko. Samtang, ang kapulisan sa Pardo padayon pa sa ilang imbestigasyon sa posibleng motibo sa pagpatay ug pag-ila sa mamumuno. This posting includes an audio/video/photo media file: Download Now

Milayat sa condo, patay Posted: 28 Nov 2021 05:29 AM PST Patay dihadiha ang 26 anyos nga lalake ug wala mahitsura ang ulo niini human nilayat gikan sa ika-12 nga andana sa La Guardia Flats 1 condominium sa Barangay Lahug, siyudad sa Sugbo, pasado alas 5:00 sa buntag kagahapon, Nobiyembre 28. Si Police Staff Sergeant Roy Bacus sa Mabolo Police Station niila sa biktima nga si Ron Jushua Aguardera, 26, molupyo sa ikalima nga andana sa nahisgutan nga condominium. Sa imbestigasyon sa Mabolo Police Station, ang uyab ni Aguadera nga si Ericka Lopez, niingon nga kini sa deperensiya sa panghunahuna. Gituohan sa kapulisan nga wala makontrol sa biktima ang kaugalingon sa gihambin nga balatian rason nga nag-wild kini. "Gipangbuak na niya ang mga jalousie sa ilang bintana sa unit. Mao ni ingon ni Lopez sa amoa," dugang ni Bacus. Nanawag kini sa selpon sa iyang uyab, nidagan paingon sa ika-12 nga andana ug milayat. Pag-abot sa ubos sa maong edipisyo, napusa ang ulo sa biktima. This posting includes an audio/video/photo media file: Download Now

7 anyos nalumos sa swimming pool Posted: 28 Nov 2021 05:26 AM PST Usa ka 7 anyos nga batang babaye nalumos sa swimming pool sa Enchanted Mountain Resort sa Barangay Lumbang, lungsod sa Dalaguete, alas 10:00 sa buntag sa Dominggo, Nobiyembre 28. Si Breah Dionne Amores Gutang, 7, taga Zone Luy-a, Barangay Paknaan, dakbayan sa Mandaue, dead-on-arrival (DOA) sa tambalanan sa Dalaguete. Si Major Pedy Noval, hepe sa Dalaguete Police Station, nagkanayon nga ang biktima uban sa iyang pamilya. Gitabang ang bata ug gidala sa sa tambalanan apan DOA na. Ang swimming pool dunay gilawmon nga 3-feet. This posting includes an audio/video/photo media file: Download Now

Negosyante gibanhigan Posted: 28 Nov 2021 05:15 AM PST USA ka negosyante gibanhigan samtang nasakay sa iyang sakyanan sa dalan N. Bacalso sa atubangan sa simbahan sa Barangay Lipata, lungsod sa Minglanilla, pasado alas 5:20 sa hapon, Dominggo, Nobiyembre 28, 2021. Ang kapulisan niila sa biktima nga si Jimmy Visitacion Hernandez, hingkod sa edad, negosyante ug taga Alang-alang, Dakbayan sa Mandaue. Ang namusil duha ka tawo nga nagsakay og motorisklo. Kauban sa biktima mao ang iyang asawa ug katabang nga mopauli na unta sa Mandaue gikan sa lungsod sa Moalboal. Ang biktima gidala sa South General Hospital sa Naga City ug atol ning pagsuwat, wala pa matino ang kahimtang sa biktima. This posting includes an audio/video/photo media file: Download Now

Daghan nang menor de edad nabakunahan Posted: 28 Nov 2021 04:55 AM PST ORMOC CITY - Subra na sa katunga sa populasyon sa mga bata ang nabakunahan og anti-Covid. Matod ni Jester Zacarias, spokesperson sa City Health Department, dunay 14,864 ka mga bata ang nalista sa mga barangay. Sa 14,864 nga target population sa mga bata nga bakunahan, 8,217 na ang nahatagan og bakuna batok Covid. "Dako kaayo og turn out ato pedia, sila gyud mismo ang moadto sa Superdome para magpabakuna," matod ni Zacarias. Gipasabot niya ang mga bata nga bakunahan dapat magpalista sa barangay aron mateksan sila sa City Health alang sa schedule. Ang bata dapat dunay dala nga birth certificate o baptismal certificate or ID pag-adto sa vaccination site. Dapat kauban ang ginikanan, apan kon dili makauban ang ginikanan ug lain lang ang paubanon, dunay dunay parent's consent ug nakabutang sa suwat ang pangan sa miuban ug pirmado sa ginikanan. Kon wala nay ginikanan ang bata, mahimo ra ang barangay certificate. Samtang, suhod karong adlawa, Nobiyembre 29, 30 ug Disyembre 1, 2021, mao ang ang national vaccination days. Target sa Ormoc nga bakunahan ang kapin sa 20,000 sud sa tulo ka adlaw. Matod ni Zacarias, i-activate sa Ormoc ang uban nga vaccination sites aron magamit sa tulo ka adlaw. Apil sa mag-activate ang mga ospital. "Walk-in ra na siya, pwede ra wala'y text basta naa lang ID nga nakabutang ilang name and address. Kon nagtrabaho siya sa Ormoc, ID lang or COE, no need na ang kadtong text," dugang ni Zacarias. Base sa Nobiyembre 23, 2021, niabot na sa 205,762 ang naturokan og bakuna; 118,560 ang naka-first dose samtang 87,202 ang fully vaccinated. Target sa LGU-Ormoc ug City Health nga makuha ang herd immunity sa Disyembre o sa Enero. Sa paghimo ning balita, tulo na lang ang aktibong kaso sa Covid-19 sa Ormoc. This posting includes an audio/video/photo media file: Download Now

P7.7M gahin sa TESDA scholars sa Lapu-Lapu Posted: 28 Nov 2021 04:54 AM PST Gipangulohan ni Technical Education and Skills Development Authority (Tesda) Deputy Director General for Partnership and Linkages Aniceto "John" Bertiz III ang pagpang apud-apod og tool kits alang sa mga Oponganong Tesda scholars ubos sa Special Training for Employment Program (STEP) niadtong Nobiyembre 22 sa covered court sa Barangay Buaya, Dakbayan sa Lapu-Lapu. Ang maong kalihukan nahimong posible sa pagpaningkamot ni Kongresista Paz Radaza nga miabot sa 218 ka scholars ang nakadawat sa ilang starters toolkit nga nipaubos sa ilang training sa Dressmaking NC II, Shielded Metal Arc Welding NCI ug Assemble Electronic nga mga produkto. Ang kongresista tuyo nga nakigtambayayong sa Tesda alang sa ginagmayng panginabuhian sa mga Oponganon pinaagi sa mga training nga mahatag sa ahensya. Ang scholars nakadawat og libreng allowance sud sa ilang tulo ka buwan nga training. Nipasalig si Radaza nga mangita og dugang pundo alang sa Tesda aron daghan pang mga Oponganon ang makapahimulos sa maong programa. Mapasalamaton ang kongresista ni Kongresista Argel Joseph Cabatbat sa Magsasaka Partylist gumikan kay sa 218 ka scholars ang nakapahimulos sa maong programa 75 niini ang scholar sa partylist. (PR) This posting includes an audio/video/photo media file: Download Now

Mga senior citizen awtomatik na nga miyembro sa PhilHealth Posted: 28 Nov 2021 04:48 AM PST Daghan nang benepisyo sa pagkatiguwang. Ang Philippine Health Insurance Corp. (PhilHealth) nipahinumdom sa senior citizens nga mandatorily covered na sila sa state health insurer ug dili na kinahanglang mobayad og premiums. Sa ilang pamahayag, ang PhilHealth nagkanayon nga ang Filipino citizens nga nagpuyo sa Pilipinas nga 60 anyos ug pataas covered na ubos sa National Health Insurance Program subay sa Republic Act (RA) 10645 ug RA 11223 o ang Universal Health Care Act of 2019. Sa Section 5 sa Republic Act 10645, gitahasan sa National Government sa pagpundo og salapi alang sa annual premium contributions sa senior citizens gikan sa kita sa RA 10351, o mas naila nga Sin Tax Law, kini kon ang senior citizens dili covered sa bisan unsang existing membership category sa PhilHealth ug kon walay regular source of income. Ang Sin Tax Law, nipasar sa 2012, naghatag og incremental revenues gikan sa excise tax sa alcohol ug tobacco products nga magahin sa universal health care ubos sa National Health Insurance Program, ug ang medical assistance and health enhancement facilities. Sa pagpahiluna sa registration o updating sa senior citizens' records, ang PhilHealth nakig-abin sa nagkalainlaing local government units (LGUs) sama sa Office for Senior Citizen Affairs (Osca) sa pagdawat sa two copies sa accomplished PhilHealth Member Registration Form (PMRF) sa qualified senior citizens. Human sa pagsumiter, ang tanang senior citizens maghuwat sa pagpadala og notisya sa Osca nga ang PhilHealth duna nay gipadala nga Member Data Record ug identification card. Kadtong gusto magparehistro sa mga lokal nga buhatan sa PhilHealth, mosumiter og kopya sa senior citizen's identification card o bisan unsang kamatuoran sa edad uban sa usa ka 1x1 photo nga nakuha nga dili molabaw sa miaging unom ka buwan gawas sa pagsumiter sa duha ka kopya sa PMRF. Base sa Hunyo 2021, ang PhilHealth dunay 8.4 million senior citizen members ug 1.3 million lifetime members uban sa combined 3.3 million qualified dependents. Sa unang unom ka buwan ning tuiga, ang PhilHealth nakabayad og P9.4 billion sa benepsiyo alang sa 988,000 claims filed sa senior citizens sa tibuok nasod. Lakip sa nag-unang kondisyon nga nabayran sa PhilHealth sa ilang benepisaryo mao ang community-acquired pneumonia, stroke, hypertension, urinary tract infection ug congestive heart failure. Ang lifetime members nga senior citizens mao kadtong nakabayad og dili mominos 120 monthly contributions ngadto sa PhilHealth ug ang kanhi Medicare Programs sa Social Security System (SSS) ug ang Government Service Insurance System (GSIS); uniformed personnel nga dili mominos 56 anyos o SSS underground miner-retirees nga dili mominos sa 55 anyos nga nakabayad og dili moubos sa 120 monthly contributions sa PhilHealth ug kanhi Medicare Programs sa SSS and GSIS; ug SSS ug GSIS pensioners sa wa pa ang Marso 4, 1995. Kon ang ospital niinstalar og HCI Portal, ang senior citizens kinahanglan na lang mopresentar sa ilang senior citizen card, Member Data Record o bisan sa unsang accepted proof of identity ug age, sumala sa PhilHealth. (SunStar Cebu) This posting includes an audio/video/photo media file: Download Now

5 gikan sa tunghaan sa Sugbo mi-top sa civil engineer licensure examination Posted: 28 Nov 2021 04:46 AM PST Lima nga ninggraduwar gikan sa mga tunghaan sa Sugbo ang nasulod sa top 10 sa November 2021 Civil Engineer Licensure Examination. Mga graduwado sa Cebu Institute of Technology - University (CITU) nga si Kamelle Apurado Legaspi maoy third place human nikuha og 92.05 percent rating samtang, si Jodane Estreba Paez nga nikuha og 91.70 percent, maoy naa sa ikalimang dapit. Si Frances Noel Bontia Carvajal sa Cebu Technological University (CTU)-Danao ikaunom nga dapit sa 91.5 percent rating. Si John Philippe del Valle Dakay ug si Mathew Niño Go Dy sa University of San Carlos (USC) mao ang ikawalo uban sa ilang raing nga 91.15 percent. Sa kinatibukan, 24 ka examinees ang nasulod sa top 10, diin nagpatas og dapit gawas sa numero uno ug ikapito nga dapit. Si Rajiv Nooh Dalagan Amil gikan sa Ateneo de Davao University maoy top one sa rating nga 93.25 percent. Ang Professional Regulation Commission (PRC) nibutyag nga 2,374 ang nipasar gikan sa 6,474 nga nikuha sa pasulit taliwala sa pandemiya sa Covid-19. This posting includes an audio/video/photo media file: Download Now

1.3M target bakunahan sa DOH 7 sa 3 ka adlaw Posted: 28 Nov 2021 04:20 AM PST Kon maabot ang 1.3 milyunes nga target sa Region 7 sulod sa tulo-ka-adlaw nga National Covid-19 Vaccinations Days gikan karon, Nobiyembre 29 ngadto sa Disyembre 1, 2021, gilauman nga kini motabang sa Central Visayas sa pagkab-ot sa 50 percent fully vaccinated individuals ug 70 percent alang sa single dose. Ang Visayas Covid-19 Vaccination Operations Center (VVOC) andam na sa pagsugod sa halapad nga pagpabakuna. Si Dr. Mary Jean Loreche, tigpamaba sa VVOC, nagkanayon nga bisan sa percentage completion sa pagpangandam nga wala makaabot og percent, gipasabot niya nga ang mga local government units (LUGUs) "preparado." "Our vaccine supplies is good. As to percentage completion for the preparations, I believe we are not yet in the 50 percent. Our LGUs are cooperative and committed," asoy ni Loreche sa SunStar Cebu. Si Loreche nagkanayon nga dili maseguro nga hundred percent nga walay glitches o walay masugatan nga balda. "So far, our target has remained with minor adjustments but we can definitely know the actual numbers (today)," dason niya. Ang Central Visayas nitarget og 1.3 million individuals nga mabakunahan uban sa kapin sa 400,000 daily target. Ang national government gikataho nga nipaubos sa ilang target doses ngadto sa 9 million gikan sa 15 million tungod sa kakuwang sa syringe, matod ni Loreche nga ang supply officer-in-charge sa rehiyon nipasalig nga makasuporta sa ilang target. This posting includes an audio/video/photo media file: Download Now

Flights gikan sa HK gi-ban tungod sa Omicron variant Posted: 28 Nov 2021 04:20 AM PST Temporaryong gi-ban sa Pilipinas ang tanang flights gikan sa Hong Kong tungod sa nakaplagan nga Omicron variant, bag-o ug posibling mas grabe motakod kon itande sa unang Sars-CoV-2, matod sa tigpamaba sa National Task Force (NTF) Against Covid-19 Restituto Padilla kagahapon, Nobiyembre 28, 2021. Sa usa ka television interview, si Padilla nagkanayon nga ang Inter-Agency Task Force (IATF) on Emerging Infectious Diseases temporaryo usab nga nisuspenso sa pagsulod sa flights gikan sa South Africa, Botswana, Namibia, Zimbabwe, Lesotho, Eswatini, ug Mozambique tungod sa kaso sa B.1.1.529 o Omicron variant sa maong mga nasod. Ang ban epektibo hangtod sa Disyembre 15, 2021. "Binantayan po lahat ng country na may na-detect na variant. So, Hong Kong, may na-detect po diyan..." matod ni Padilla. "Ang movement po ng Filipino ay hindi pinagbabawal. Pero 'yong flight na kanilang sasakyan na papunta dito, pinagbabawal. So, kung wala silang masasakyan, wala rin silang means para makarating," dason niya. Dugang ni Padilla, ang mga Filipino nga nakasulod na sa Pilipinas gikan sa maong mga nasod ipaubos sa estrikto nga quarantine procedures sa pagsanta sa Omicron variant. Ang Omicron variant unang nakita sa Botswana, dayon sa South Africa. Ang unang kaso sa Omicron sa Hong Kong usa ka biyahidor gikan sa South Africa. Ang World Health Organization (WHO) niila sa Omicron isip usa ka variant nga makapabalaka tungod sa kapaspas ug kalapad sa iyang matakboyan tungod sa kakusog mosanay ug "dunay dugang pa nga kanaiya." Samtang, unang higayon gikan sa Enero ning tuiga, ang Department of Health (DOH) nitala og ubos sa 1,000 ka bag-ong kaso sa Covid-19 sulod sa sunodsunod nga upat ka adlaw, gikan sa Miyerkules, Nobiyembre 24. Sa alas 4:00 sa hapon, ang case bulletin sa Sabado, Nobiyembre 27, ang DOH nitala og 899 ka bag-ong Covid-19 cases sa nasod. Kini nihatod sa kinatibuk-ang caseload ngadto sa 2,831,177 diin ang 17,052 ang active cases. (SunStar Philippines) This posting includes an audio/video/photo media file: Download Now

SEDC gipasidunggan na sab Posted: 28 Nov 2021 03:25 AM PST Naka-grand slam ang Solid Earth Development Corp. (SEDC) sa pagkaangkon niini og duha ka major awards sa ika-6 nga Gawad Tugas Award alang sa "Responsible Mining" ug "Clean Air and Water" sa pantalan nga gipadagan niini sa lungsod sa San Fernando. Giila kini sa Department of Environment and Natural Resources (DENR) sa tungatungang Kabisay-an ang maong mga pasidungog "tungod sa gipakita nga kabag-ohan, kinaadman ug mahinungdanong nabuhat sa pagpanalipod sa kalikopan, pagdaginot ug pagdumala alang sa kinaiyahan" niini. Nakab-ot ang pasidungog nga usa ka "three-peat" alang sa SEDC tungod sa pagkaangkon sa maong pag-ila nga ubos sa non-metallic category pagka 2017 ug 2019, ang kataposan mao'y nakapa-"back-to-back" uban karon sa 2021 kay wala ma'y napahigayon nga pag-ila sa miaging tuig tungod sa pagsugod pa sa pandemiya. Una kini sa kompaniya alang sa kategoryang pangpantalan. Nakaangkon sab ang primera kliyente niini, ang Taiheiyo Cement Philippines, Inc. (TCPI) sa 2018 Gawad Tugas alang sab sa responsableng pagmina apan sa kategoriyang paggaling sa mga giminang minerales. Gidawat nilang Dennis B. Tenefrancia, pangulo sa SEDC, ug Director Motohiro Tonsho ang kadungganan alang sa pagmina, samtang sila si Port Operations Manager Engr. Cris V. Nuez ug Technical Adviser Masatsune Takeyasu alang sa pantalan. Mitunol sa mga pasidungog si DENR 7 Regional Executive Director Paquito D. Melicor, Jr. atol sa seremonyas ni'ng bag-o pa lang didto sa Marco Polo Hotel uban sa iyang mga luyo-luyo, sila si Trinidad "Nene" C. Etulle ug Charlie E. Fabre. Mitunol sab si Armando L. Malicse, regional director sa Mines and Geosciences Bureau (MGB 7), sa pagtunol sa pasidungog alang sa responsableng pagmina, samtang si Regional Director Lormelyn E. Claudio sa Environmental Management Bureau (EMB) 7 mao ang nitunol alang sa clean air and water – port facilities category. MAPAUBSANON Sa iyang mensahe, gidawat ni Tenefrancia ang pasidungog nga "uban sa dakong garbo ug pagpasalamat" samtang gipasalamatan niya ang DENR sa maong "mapaubsanong pag-ila ug walay puas nga suporta." Pag-angkon sa duha pa gyud ka mga pasidungog sa unang higayon ug sa susamang higayon "pinasahi kaayo ug halandomon," siya midugang. "Lawom kaayo ni namo nga pasidungog ug mas makadasig namo nga maninguha pa aron makab-ot namo among ngadto-ngadtong katuyoan ug mga saad aron maabot pa ang dagkong mga butang, ilabi na alang sa pagpanalipod ug pagtipig sa kalikopan ug sa pagduso sa malungtarong kauswagan," siya mipadayag. Gipahinungod niya ang duha ka mga pasidungog sa mga kawani sa SEDC "kansang mga paninguha, sakripisyo, kabag-ohan ug kinaadman misangpot niining mga pag-ila." Gipahalipayan ni Yoshihito Izawa, kinsa bag-o pa lang milingkod isip CEO ug pangulo sa TCPI, ang tigsangkap niini og mga minerales ug tig-abag sa pantalan, sa ilang kalamposan. "Gipasigarbo namo kamo og maayo," siya mipahayag. (PR) This posting includes an audio/video/photo media file: Download Now

Editoryal: Sunog, gidiling druga Posted: 28 Nov 2021 03:22 AM PST Halapad ang epekto sa gidiling druga sa kinabuhi sa tawo ug komunidad. Daghang nangabuang. Kaugmaon nahugno. Naghikog. Ang tanang ngilngig nga krimen mahimo tungod sa nagumon sa espiritu sa gidiling druga. Ang seguridad sa komunidad nahimong risgo tungod sa mga adik sa druga sa palibot. Ang grabeng sulot nga matagboan sa yanong molupyo makahadlok. Usa sa ehemplo sa gidangatan sa komunidad mugna sa tawo naulipon sa gidiling druga mao ang sunog sa Sityo Lawis, Barangay Mambaling, Dakbayan sa Sugbo niadtong Biyernes, Nobiyembre 26, pasado alas 5:00 sa hapon. Dili mominos kapin sa 670 ka mga balay ang naugdaw. Halos tanan walay naluwas nga kabtangan. Tapot sa lawas ang nabilin. Maayo na lang nga walay kinabuhi nga nakalas. Sumala sa taho, giduslitan sa lalake nga nawad-an og maayong panghunahuna tungod sa pagkaulipon sa gidiling druga ug gidagkutan ang kurtina sa ilang balay. Ang resulta nag-antos karon ang gatosan ka pamilya sa halapad nga epekto sa gihimo sa tawo nga nagumon sa druga. Makaluluoy ang kahimtang sa mga molupyo sa evacuation center, labina sa mga bata. Seguro dunay balay sa mga tigpayuhot og gidiling druga sa dapit nga naapil sa sunog. Sila ang angay nga mag-antos ug tawgon nato nga mirisi. Dili ba sakit ang epekto sa druga sa komunidad? Usa usab ang hinungdan tungod sa walay pagpakabana sa mga silingan sa angnegosyo og druga, naangin na hinuon. Usa kini ka trahedya nga angay kuhaan og leksiyon. Sakto ang kasuko ni Presidente Rodrigo Duterte ug nilusad og gubat batok sa gidiling druga. Bisan dunay daghang akusasyon batok sa presidente apan niminos kini ubos sa iyang naghinapos nga administrasyon. Hinaut nga ang mosunod nga presidente sa nasod dunay kawsa sa pagsumpo sa gidiling druga, diin hulga na sa nasudnong seguridad. This posting includes an audio/video/photo media file: Download Now

Barrita: 'Barkong hapit malunod', ang luha ni Casas Posted: 28 Nov 2021 03:22 AM PST Naghingapin ang kasubo ug kaguol ni Atty. Floro Casas Jr., Cebu City administrator, sa kamatayon ni Mayor Edgardo Labella. Kini nagsagol sa kasakit, kahiubos ug kahimangod sa tawo o mga tawo nga wa niya isulti kon si kinsa. Ug sa dihang di na niya kapugngan ang nag-alintabo nga kasubo, kaguol, kasakit, kahiubos ug kahimangod nga nagluoy sa iyang dughan, niawas ang mga luha sa iyang mga mata samtang namulong siya sa necrological rites ni Labella niadtong Biyernes sa City Hall. Ginaingon nga ang mga luha, sama sa uwan, mobanlas sa mga abog sa kinabuhi. Apan kon ang abog igo lang mabasa, mahimo kining pilit nga lapok. Wa kaha mopilit sama sa lapok ang mga kasakit, kahiubos ug kahimangod sa dughan ni Casas? * * * Si Mayor Labella usa ka survivor sa pagkalunod sa M/V Princess of the Orient niadtong 1998. Si Casas, ang pangabaga ni Labella, niingon nga kalunuron na ang barko nga gihimo ni Labella. Nangayo siya og giya sa nitaliwan nga mayor aron makalingkawas usab sila sama ni Labella gikan sa usa ka "tragedy" ug "oppression" nga nahitabo kanila. Wa diay mosaler ang pasalig nga "I won't rock the boat"? Si Casas niingon nga nakasabot siya nga ang mga co-terminous officials sama niya, mawagtang sa puwesto sa pagtaliwan ni Labella. Apan ang iyang gisakitan mao ang usa ka buwan nga evaluation sa mga kawani sa pagsuta kon i-renew ba o di ang ilang appointment. * * * Si Mayor Michael Rama, ang bise mayor nga nihulip kang Labella, niingon nga, "I won't rock the boat." Tubag niya kini sa pangutana kon unsay mahitabo sa mga kawani sa City Hall. Apan niadtong miaging Lunes, iyang gimando ang usa ka buwan nga evaluation sa mga kawani sa City Hall. Normal lang ang gibuhat ni Rama. Ang angay nga ibilin sa City Hall kadto rang makapakita nga nitrabaho gyud. Si Rama usa ka beteranong politiko ug nasayod sa iyang angay nga pagabuhaton. Nagsingabot ang eleksyon ug nakahibawo siya kon asa padulong ang mga kawani nga iyang pagataktakon. * * * Gipadayag ni Casas nga ang mga tawo nga nidayeg ni Labella sa dihang namatay na, mao ang samang mga tawo nga nisaway ni Labella sa buhi pa siya. Ug alang kaniya si Labella ang "best mayor." Ngano man? Matod pa niya, "Sa akong pagkaila, ang akong mayor dili palaaway, ang akong mayor dili traydor, ang akong mayor dili hilabtanon, ang akong mayor dili bakakon ug ang akong mayor dili plastic." Ang laing mayor, unsa man diay? This posting includes an audio/video/photo media file: Download Now

Talk to Papa Joe: Mobadlong ba ko? Posted: 28 Nov 2021 03:19 AM PST Dear Papa Joe, Tagoa lang ko sa ngan nga Shio, 32 years old ug minyo, nagtrabaho isip call center agent. Ang akong suliran kay mahitungod sa akong kauban nga babaye. May ka live-in ni siya ug wa siya masayod nga kaila nako iyang bana kay nagkauban mi sa trabaho sa una. Wa ni kaila iyang ka live-in nako kay wa man ko mag-profile og face sukad sa una apan kaila gyud ko sa iyang asawa. Bag-o pa sad ni nasud iyang partner apan kining iyang ka iring iring diri dugay na sa BPO. Sweet kaayo ni sila sa work place unya akong amigo tawon kay ordinaryo lang unya wa gyud tawon alamag kay naa ra tawon sa iyang trabahuan isip repair man nga technician. Unsa may angay nakong buhaton, mosud ba ko sa ilang kinabuhi? SHIO Shio, Naa ra gyud na nimo kon nagmalasakit ka sa amigo nimo. Pwede man nimo i-confront ang babaye sa maayong pamaagi kanang imo siyang ingnon nga kaila mo sa iyang ka live in. Pwede nimo siyang ingnon sila pa ba para ma aware siya ug basin maundang pa. Apan ayaw lang sulti nga mosumbong ka. Enough na nga moingon ka nga kaila mo. Naa ra niya kon moundang siya kay ila man nang problema. Wa ta masayod unsay rason kon nganong nagbinuang siya. Kana lang. PAPA JOE This posting includes an audio/video/photo media file: Download Now

Mga ginikanan sa managsuong Constantino gipangita sa DSWD 7 Posted: 28 Nov 2021 02:11 AM PST Ang Department of Social Welfare and Development Field Office (DSWD FO) VII nanawagan sa publiko sa pag-abag sa pagpangita sa mga ginikanan sa bata o kabanay sa usa ka gibanabana nga 7-anyos nga batang lalake nga gianggaan og BERNARD CONSTANTINO ug usa ka gibanabana nga 5-anyos nga babaye nga gianggaan og ALJEN CONSTANTINO. Niadtong Nobiyembre 17, 2018, gibiyaan silang Bernard ug Aljen Constantino sa ilang giabangan sa Barangay Casili, Mandaue City. Gibiyaan sila sa gituohang inahan sa duha ka bata nga si Jasmine Constantino. Kini sumala sa gisaysay ni Mary Faith Tubod, kinsa tag-iya sa ilang giabangan. Si Bernard gi-turn-over sa BPSO Barangay Banilad, Mandaue City ngadto sa City Social Welfare Services, Mandaue City niadtong Nobiyembre 17, 2018, alas 8:35 sa gabii paghuman nakit-ang naglakaw-lakaw sa maong barangay nga walay kuyog. Samtang si Aljen gi turn-over kaniadtong Enero 24, 2019, 10:00 sa buntag ngadto sa City Social Welfare Services, Mandaue City. Para maamumahan sa usa ka pamilya, sila si Aljen ug Bernard nabutang sa usa ka licensed foster family sa Department of Social Welfare and Development Field Office VII kaniadtong May 28, 2019. Kinsa kadtong dunay kahibalo or paryente niining mga bataa, palihug og tawag sa telepono: (032) 232-8795 / (032232-0261 Telefax: (032) 231-2172 ug pangitaon si May Sunshine G. Sastre, social worker o bisita sa DSWD FO VII, M.J. Cuenco Avenue Corner Gen. Maxilom Avenue, Brgy. Carreta, Cebu City, Lunes hangtud Biyernes alas 9:00 sa buntag hantud sa alas 5:00 sa hapon sa labing madali nga panahon. Ug kon walay motunga nga ginikanan/paryente sa bata sulod sa usa (1) ka bulan, ang mga bata ipaubos sa "legal abandonment" sa Department of Social Welfare and Development Central Office ug maisyuhan og certification nga sila Legally Available for Adoption." Kini nga certification giisyu ubos sa hangyo sa DSWD FO VII alang sa tumong sa pag-file og petition to declare sa maong mga bata nga legally available for adoption, ubos sa Republic Act 9523. (PR) This posting includes an audio/video/photo media file: Download Now

Akrho Ginatilan chapter namintal sa waiting shed Posted: 28 Nov 2021 02:09 AM PST Isip kabahin sa ilang ikatulo nga founding anniversary, ang mga sakop sa Alpha Kappa Rho (Akrho) Xi Lambda Ginatilan Chapter namintal sa waiting shed sa Barangay San Roque, lungsod sa Ginatilan niadtong Nobiyembre 14. Ang pagpamintal gipangulohan ni Renz Banosong pinaagi sa suporta sa ilang chapter president nga si Arjay Mendoza ug James Pol Donglasa nga maoy organizer. Nanghatag sab ang grupo og snacks sa mga habalhabal drayber. Mapasalamaton ang grupo sa suporta ni Mayor Dean Michael Singco ug sa hepe sa kapulisan sa lungsod nga si Police Lieutenant Canciano Llenos IV, kinsa usa usab ka sakop sa Akrho. (PR) This posting includes an audio/video/photo media file: Download Now

Pangagpas ni Peñalosa: Donaire di kaseguro ni Gaballo Posted: 28 Nov 2021 02:07 AM PST Duha ka semana gikan karon, depensaan na ni Nonito Donaire ang iyang World Boxing Council (WBC) bantamweight title batok sa kataganasod nga si Raymart Gaballo. Ang away ipahigayon sa Dignity Health Sports Park nga kaniadto mao ang StubHub Center sa California, USA. Si Donaire, kinsa naghupot og 41-6, 27 KOs nga baraha, gipaabot nga mosaka sa ring nga inilog batok sa batan-on nga Gaballo, kinsa wala pa makaangkon og kapildihan sulod sa 24 ka away diin 20 sa iyang mga kontra ang iyang gipang-knockout. Apan alang sa kanhi two-time world champion Gerry Penalosa, di makasiguro si Donaire ni Gaballo sanglit aduna usab kini igong kusog nga ikatugbang kaniya. "Alam na natin na pag gutom mahirap labanan yun, dahil lahat gagawin para manalo lang. Yung laban na yun dapat sa case ni Raymart huwag lang siyang tayo na tayo sa taas nang ring. Kailangan niyang makipagsuntokan.Kailang niyang sugorin si Donaire," matod ni Penalosa sa iyang forecast nga na-post sa YouTube. "Kung hindi, tingin ko mahihirapan siya." Hinuon, dugang ni Penalosa, nga anaa ni Donaire ang dakong bintaha sa eksperiyensiya sanglit daghan na kaayo kini og napakita ibabaw sa ring. Gidayeg usab niya ang kalantip ug kahanas sa gitawag og "The Filipino Flash." "Alam natin si Donaire ang daming style at saka magaling mag-outbox, may bilis. Pero minsan na man si Donaire maubosan din nang stamina. Si Raymart alam natin na hindi pa rin nakikita na napapagod, yun na. Mas bata rin at saka alam ko very discipline ang bata na yan," dugang ni Penalosa. Sa kinatibuk-an, nagtuo si Penalosa nga mamilegro si Gaballo sa mga sayong round apan kon makalahutay kini og dugay, hayan mobali ang pabor ngadto sa batan-on nga challenger. "Very dangerous yung early round for Gaballo. Kasi si Donaire talaga ang galing mag-setup nang mga hook niya, yung mag jab, baga stylish talaga pero yun nga pag may style ka naman pero pag naubosan ka ng hangin di mo na maipalabas yan. I hope may the best man win," dugang ni Penalosa, kinsa kanhi boxer nga karon usa na ka international promoter. "Mag-risk talaga siya (Gaballo) kasi yung chance niya baka siya ang makauna. pareho silang malakas. Parehong gustong manalo, so may the best man win." This posting includes an audio/video/photo media file: Download Now

Marcial dumalaon sa iyang asawa Posted: 28 Nov 2021 02:05 AM PST Gitudlo ni Eumir Marcial ang iyang asawa nga si Princess Galarpe isip bag-o niyang manager. "Blessed ako na ikinasal ako. Nandyan ang asawa ko na nagga-guide sa atin. Kasi 'pag binata tayo madaming temptation e, pero ngayong kasama ko ang asawa ko nafo-focus ako na para sa pamilya namin ang gagawin ko," matod ni Marcial nga napatik sa www.abs-cbnnews.com. Gipasabot ni Marcial nga adunay saktong kasinatian ang iyang asawa sa pagdumala og boksidor hinungdan nga iya kining gipiyalan sa pagpadagan sa iyang boxing career. "Yun naman kasi ang pinag-aralan niya management. Wala naman akong manager. So nag-ask ako ng favor, kasi nagtatrabaho kasi siya sa Okada bago ako mag-pro," dugang ni Marcial. "Nag-ask ako sa kanya kung pwede siyang tumulong sa akin. So ngayon kung may schedule, may meetings, sa kanya ako nagtatanong. Tulungan kaming dalawa." This posting includes an audio/video/photo media file: Download Now

Sultan wala mahadlok sa Monster Posted: 28 Nov 2021 02:05 AM PST Gilab-as ni World Boxing Organization (WBO) Intercontinental bantamweight champion Filipino Jonas Sultan ang pagpadayag sa iyang pangandoy nga ikaharong si Japanese Naoya "Monster" Inoue, kinsa maoy tag-iya sa World Boxing Association (WBA) ug International Boxing Federation (IBF) bantamweight titles. Nasayod si Sultan nga kon matuman ang iyang pangandoy nga away, hayan seguradong usa siya ka dakong underdog apan iyang giklaro niya nga dili kini niya panumbalingon. "Pangarap ko talaga si Inoue, kahit sabihin na underdog ako. Kasi kapag underdog ka mas pressured sila. Walang pressure sa akin," matod ni Sultan nga napatik sa www.abs-cbnnews.com. Kon madayon, matod ni Sultan nga aduna siya'y himuong taktika nga makasurpresa kang Inoue. This posting includes an audio/video/photo media file: Download Now

Ex-sparmate ni Pacquiao kampyon na Posted: 28 Nov 2021 02:01 AM PST Nahimo nang world champion ang kanhi sparring partner ni Filipino boxing legend Manny Pacquiao nga si Australian George Kambosos. Sa usa ka surpresang panghitabo, gilupig ni Kambosos ang kanhi wala'y pildeng si American Teofilo Lopez pinaagi sa split decision kagahapon, Nobiyembre 28, 2021 (RP time) sa New York. Sa kadaugan, naharos pag-angkon ni Kambosos ang World Boxing Association (WBA), International Boxing Federation (IBF), World Boxing Organization (WBO), ug The Ring ligfhtweight titles. Sa iyang Twitter account, gi-congratulate ni Pacquiao si Kambosos. "Congratulations to my friend, George Kambosos, on an epic win," tweet sa Pambansang Kamao ng Pilipinas. Si Kambosos misaka sa 20-0, 10KOs nga rekord samtang si Lopez nahagbong sa 16-1, 12KOs nga baraha. This posting includes an audio/video/photo media file: Download Now

Init sa Suns misilaob sa Brooklyn Posted: 28 Nov 2021 02:01 AM PST Giinat sa Phoenix Suns ang ilang sunodsunod nga kadaugan ngadto sa 16 pinaagi sa pagpukan sa host Brooklyn Nets, 113-107, kagahapon, Nobiyembre 28, 2021 (RP time) sa National Basketball Association (NBA). Ning sangkaa, gidominar sa Suns ang Eastern Conference leaders sa nag-unang tulo ka quarters nga naghatag kanila og dakong agianan paingon sa kadaugan. Adunay higayon nga ning-abot og 22 puntos ang labaw sa Suns. Ang Nets ning-aksyon paggukod sa 4th quarter apan nahikawan na sila sa oras. Ang Suns ningsaka sa 17-3 nga rekord nga nagpasolido sa ilang posisyon sa ikaduhang puwesto sa Western Conference. Gipangulohan ni Devin Booker ang kadaugan pinaagi sa iyang 30 puntos samtang nidugang og 22 puntos si Chris Paul. "I'm looking forward to it, man," matod ni Booker. "Obviously not a make it or break-it game, not a playoff game, but we know it's going to be high-energy, two best records in the NBA. It's going to a high-intensity, fun game." Nagkinahanglan na lang og usa ka daog ang Suns aron matupngan ang labing taas nga sunodsunod nga kadaugan sa kasaysayan sa team. Ang Nets, nga pabiling nag-una sa East dala ang 14-6 nga rekord taliwala sa kapildihan, gipangulohan ni Kevin Durant pinaagi sa iyang 39 puntos samtang ning-amot og 18 puntos matag usa sila si James Harden ug DeAndre Bembry. "For us, handing the ball off in the first half the way we did, you're not going to beat a good team like that," asoy ni Durant. (AP) This posting includes an audio/video/photo media file: Download Now

Wiliamson tugtan na makapraktis Posted: 28 Nov 2021 01:25 AM PST Gitugtan na si New Orleans Pelicans forward Zion Williomson nga makaapil sa tanang mga kalihukan sa team apan wala lang gihapon klaro kon kanus-a makabalik og duwa ang 2019 No. 1 overall pick sa National Basketball Association (NBA) 2021-22 season. Mao kini ang desisyon sa mga doktor human nasusi ang labing ulahing resulta sa MRI sa naangol nga tuo nga tiil ni Williamson. "We want him back soon as possible," matod ni Pelicans coach Willie Green. "But it's all predicated on how he feels after workouts." Sa pagpadaplin ni Williamson, nagkagidlay ang kampanya sa Pelicans ug kasamtangan kining nahimutang sa ilawom nga bahin sa Western Conference dala ang 5-17 nga rekord. Tataw nga naglisod ang Pelicans sa pagtapak sa haw-ang nga nabiyaan ni Williamson, kinsa nag-average og 27 puntos sa miaging season. (AP) This posting includes an audio/video/photo media file: Download Now

You are subscribed to email updates from https://www.sunstar.com.ph/. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States