Wednesday, December 1, 2021

https://www.sunstar.com.ph/

https://www.sunstar.com.ph/

Lapad nga pagpamakuna ipadayon sa Cebu City

Posted: 01 Dec 2021 06:18 AM PST

ANG Cebu City Government mopalapad pa sa ilang vaccination rollout bisan nahuman na ang tulo ka adlaw nga National Vaccination Days.

Kini ang gipahibawo ni Mayor Michael Rama human sa bul-og sa mga nagpabakuna atol sa unang tulo ka adlaw nga pagpamakuna sa tibuok nasod.

Si Dr. Jeffrey Ibones, pangulo sa Cebu City Health Department (CCHD), nagkanayon nga adunay igong suplay sa bakuna alang sa populasyon sa Dakbayan sa Sugbo.

Ang pangulo sa CCHD niingon nga adunay laing 50,000 doses sa bakuna ang niabot kagahapon, Disyembre 1, gawas sa unang 60,000 doses nga gihatag sa Department of Health (DOH).

Si Ibones nagkanayon nga adunay 91 ka vaccination sites sa Cebu City nga maoy gigamit sa tulo ka adlaw nga national vaccination, diin sa duha ka adlaw, Nobiyembre 29 ug 30, nakabakuna og di mominos 60,000 ka mga individual.

Gipasabot sa department head sa CCHD nga ilang ipadayon ang mass vaccination apan maghimo sila og cluster vaccination sites hilabi na kadtong mga barangay nga wala makaabot og 200 ka mga tawo nga nabakunahan matag adlaw.

Kini aron ang mga medical personnel nga maoy maglangkob sa vaccination sites matapok sa mga clustered area aron mas daghan pa ang mabakonahan

This posting includes an audio/video/photo media file: Download Now

Lider sa ‘kulto’ gikiha og rape

Posted: 01 Dec 2021 06:17 AM PST

LIDER sa kulto ug gituohang faith healer gipasanginlan sa duha ka mga babaye nga iyang gitambalan nga nanglugos kanila sulod sa iyang "templo" sa Udlom 2, Barangay San Isidro, lungsod sa Asturias, Sugbo.

Gisusi sa National Bureau of Investigation (NBI-7) ang nahimutangan sa giingong faith healer human ningsumbong ang duha ka mga babaye nga nagpatambal kaniya apan giingong gilugos sila.

Ang 32-anyos ug 17-anyos nga mga babaye giingong miserbisyo usab sa kulto, gipresentar sa NBI 7 sa Miyerkules, Disyembre 1.

Niduso sila sa ilang complaint sa NBI-7 batok kang Teodoro Rico Feriol, alyas Brod Doring, nagpuyo sa giingong templo sa Higawnon Spiritual Consultation Services.

Gawas sa pagka faith healer, si Feriol ilado usab nga fortune teller, feng sui expert, spiritual warrior ug gitawag nga dios amahan nga nangangkon nga dunay pito ka mga birhen nga iyang asawa.

Saysay ni Rose (di tinuod nga ngalan) menor de edad, nga gihilantan ug naglain ang iyang lawas hinungdan nga nidangop siya ni Feriol aron magpatambal sa Nobiyembre 2, 2020.

"Gipainom ko niya, gisulod sa blue nga baso dayon pag- inom nako ato, nalipong ko nya mao to nakatulog ko...Ana ko, Daddy (Feriol), ayaw Dyy. Ana siya ayaw kay sugo ni sa espiritu," saysay ni Rose atubangan sa mga sakop sa media.

Matod niya nga ang shorts ug underwear naubos na sa iyang pagmata. "Nihilak ko, ingon ko, Daddy, ayaw ana siya agwantaha lang, Nak, kay pagbuot ni sa espiritohanon, ako ni imong katalirungan. Ingon ra siya nga nisunod ra siya sa ilang sugo. After atong panghitabo naa siyay gikuha tissue gihulbot nga murag plastic balloon," saysay ni Rose.

Dugang niya nga gawas kaniya may lain pang mga babaye nga nabiktima si Feriol, lakip na niini ang 32-anyos nga kaduha usab giiingong gilugos ni Feriol.

Apan dili makasumbong ang babaye tungod sa hulga ni Feriol nga dunay dautang mahitabo.

"Nasakpan man ko sa akong papa nga naa koy kaestorya nga ako ra usa. Mao to gidala ko ni Papa didto, iya ko gipatambalan kay naa man say niingon niya nga patambalan. Unya gipa mission ko niya kay ako daw si Santa Barbara, akoy motabang niya kay makakita man ko, naa koy third eye," asoy ni Rose nganong naabot siya sa mga kamot ni Feriol.

Matod ni Rose nga human sa kadaghang hitabo nga iyang masaksihan atol sa iyang pag serbisyo sa kulto, nakaamgo siya nga dili na maayo ang gihimo sa ilang lider.

"Wala nako nag sigi og adto kay feel nako dili maayo kay wala may diyos amahan nga magpaila unya feel nako blind ra kaayo ko ba," asoy niya.

Panawagan sa pamilya sa biktima nga makab-ot nila ang hustisya ug masilotan si Feriol, kinsa wa pa madakpi.

Nanawagan usab si Atty. Renan Oliva, regional director sa NBI 7, nga susihon daan ang intensyon sa mga tawo nga gustong motabang aron dili mabutang sa risgo ang kinabuhi sa pasyente o sa nagpatabang.

"So let us for those nga moapil ani, bitaw lets discern, let us exercise prudence to check if tinuod ba ang intention sa motabang. Well and good if tinuoray pero kani nahitabo sa ila they were taken advantage," matod ni Oliva sa samang press conference.

Si Feriol gipasakaan og two counts sa kasong rape ubos sa Republic Act 8353 ingon man Republic Act 7610 kun Special Protection of Children Against Abuse, Exploitation and Discrimination Act involving minor.

This posting includes an audio/video/photo media file: Download Now

Gibunalan, gipusil patay; dunggan giabis pa sa 'nagpatay'

Posted: 01 Dec 2021 06:14 AM PST

GIBUNALAN ug gipusil patay sa ex-convict sa Martes sa alas 11:00 sa buntag, Nobiyembre 30, 2021 ang iyang silingan sa Brgy. Salug, lungsod sa Dalaguete, habagatang Sugbo.

Ang biktima giilang si Mario Cartesiano Ansilay, 36, minyo, mag-uuma, namatay gumikan sa kadaghan mga samad pinusilan sa ulo, nawong ug kalawasan.

Wala na igkita ang suspek nga si Greg Amancio, 40, buwag sa kapuyo, ex-convict sa kasong murder, nakagawas sa bilanggoan sa miaging tuig.

Si Major Pedy Noval, Hepe sa Dalaguete Police Station nga nahinabi sa Superbalita Cebu, nagkanayon nga ala 1:30 sa hapon sa Martes nila nadawat ang impormasyon.

Sa ilang pag-abot sa dapit, wala na si Amancio samtang si Ansilay nagbuy-od nga patay na.

Sumala pa ni Noval nga si Amancio nipuyo sa panimalay sa iyang uyoan nga si Manuel Sombilon Alonso.

Si Ansilay sayo nga mi-adto sa gipuy-an ni Amancio tan-awon ang baligyang binuhing mga manok.

Sila si Ansilay ug Amancio nag-buy-and-sell og mga hayop sa bukid.

Samtang nag-estorya ang duha sa mga tangkal sa mga manok, kalit nga gibunalag martilyo ni Amancio ang ulo ni Ansilay.

Human nalup-og, nawad-an sa panimuot si Ansilay ug giingong gipusil siya makadaghang higayon ni Amancio.

Giabis niya ang wala nga dunggan, gisuwayan sa pagputol ang liog pinaagi sa paggulgol.

Si P02 Jim Vincent Pacaldo, imbestigador sa Dalaguete Police Station nga nahinabi sa Superbalita Cebu nagkanayon nga gisubay pa nila ang motibo sa kremin.

Naglibog ang mga pulis ug ang ilang mga pamilya kay ang duha managhigala.

Nagtuo sila nga dunay lawom nga gi-awayan ang duha gumikan sa ka brutal sa kremin.

"Nahibulong mi kay lagot man kaayo siya, giabis niya ang wala nga dunggan, Unya ang tuo gikitkit. Tan-aw namo gikaon kay lahi man agi sa mahait nga hinagiban, gikaon guro to niya, kay wala ta kita mao among gipahiling sa Soco 7," dugang ni Pacaldo.

Ilang gipangita ang usa ka dunggan ni Ansilay nga giabis, apan wala nila makit-i, sa crime scene, gawas lang sa martilyo, ug usa ka kabhang sa bala sa kalibre .45 nga pistola. /

This posting includes an audio/video/photo media file: Download Now

Masahistang gipatay hayan naalaang asset

Posted: 01 Dec 2021 06:13 AM PST

DUNA nay giila nga persons of interest ang Mambaling police station sa nipusil-patay sa usa ka masahista niadtong Lunes, Nobiyembre 29, sa hapon sa Sitio Puntod sa Alaska Mambaling, dakbayan sa Sugbo.

Si Pinky Sanchez, 46, taga sitio Huyonghuyong, Alaska Mambaling, gipusil sa riding-in-tandem, makaduha ka higayon sa iyang nawong ug lawas nga maoy hinungdan sa iyang kamatayon.

Matod ni Police Lieutenant Colonel Wilbert Parilla, deputy city director for operations sa Cebu City Police Office (CCPO), nanguha nag mga ebedensya ang mga imbestigador alang sa pagpasakag kaso batok sa mga responsabli.

Drugas ang usa sa motibo sa krimen diin ang biktima giingong nalambigit sa drug personalities sa maong lugar.

Dako ang posibilidad nga nasaypan kini nga asset sa mga pulis sanglit mao kini ang mga nahitabo sa milabay nga mga kaso sa pagpamusil sa dakbayan sa Sugbo.

This posting includes an audio/video/photo media file: Download Now

Mga bakunado lang makasimba sa Misa de Gallo?

Posted: 01 Dec 2021 06:11 AM PST

KAPULISAN sa dakbayan sa Sugbo nagsugod na sa ilang pagpangandam sa Misa de Gallo nga magsugod sa Disyembre 16, 2021 diin ilang isugyot sa kadagkoan sa Simbahang Katoliko ug sa Kagamhanan sa Dakbayan nga kadto lang mga bakunado ang makatambong sa misa.

Dakong hagit karon sa kapulisan ug kadagkoan sa simbahan ang nagsingabot nga Misa de Gallo bisan pa man nga miubos na pag-ayo ang mga kaso sa coronavirus disease 2019 (Covid-19) itandi sa milabayng tuig.

Tungod niini, matod ni Police Lieutenant Colonel Wilbert Parilla, deputy city director for operations sa Cebu City Police Office (CCPO), gipangandaman na nila konunsay angay nga buhaton ilabi na sa paghatag sa seguridad ug pagpatuman sa health standard.

Dugang ni Parilla nga kinahanglan kini nga lingkuran aron maka latag na sila sa ilang mga plano kon unsay ilang pagabuhaton nga dili mosaka ang kaso sa Covid sa siyudad.

"So we have to workout ani nga problema together with the City Hall the parish sa mga taga simbahan kung unsaon nato ni pag implement considering nga pipila lang ka mga simbahan ang duna gyuy mga gate nga pwede nato nga ma check kung vaccinated lang ang pwede makasulod," matod ni Parilla.

Sigun ni Parilla, aron dili sila maglisod sa pag-deploy sa ilang mga personnel uban sa force multipliers ug makontrolar nila ang mga tawo nga mosulod sa simbahan.

Gipanglantawan nila nga modagsa ang mga tawo sa simbahan tungod kay miubos na pag-ayo ang kaso sa Covid-19 sa siyudad sa Sugbo.

Giklaro ni Parilla nga gawas sa mga pulis nga gipang-deploy sa mga simbahan, tahasan usab ang Mobile Patrol Group (MPG) nga mopatrolya sa kadalanan gikan sa ala una sa kaadlawon hangtod matapos ang kalihukan sa simbahan.

Awhag sa kapulisan sa publiko nga kon wala pa mabakunahi labing maayo nga dili lang una mosimba sanglit mamahimo ra man sila nga makasimba pinaagi sa online tungod kay daghang mga parokya ang mo-live sa social media sa Misa de Gallo.

This posting includes an audio/video/photo media file: Download Now

Christmas bonus sa JOs himuong P6K ni Rama

Posted: 01 Dec 2021 06:10 AM PST

KON tugotan sa balaud, mahimong P6,000 na ang Christmas bonus sa mga job order (JO) sa Cebu City Hall human si Mayor Michael Rama modugang og P3,000.

Ang Cebu City Government, pinaagi ni Rama ug City Councilor Raymond Garcia, unang nianunsyo nga makadawat og tag P3,000 ang kapin o kulang 4,700 ka JOs nga nagtrabaho sa lainlaing departamento sa City Hall.

Apan kagahapon, Disyembre 1, si Rama nimando sa bag-ong city administrator nga si Engr. Suzzane Ardosa sa paglili sa posibilidad nga doblehan kini sanglit adunay igong pundo ang Dakbayan para sa paghatag og dugang P3,000 para sa mga JO.

Gustong ipaklaro ni Rama kon aduna bay balaod nga nagdili sa paghatag og sobra sa P3,000 nga Christmas bonus sa mga JO sanglit kon wala, dason niya, doblehon ang pasiunang bonus nga P3,000.

Si Garcia, sa iyang bahin, niingon nga mosugyot siya kang Rama nga inay himuong P6,000 ang bonus, dugangan na lang og usa ka sakong bugas ang madawat sa JOs ug mahimo na kining duha ka sako sanglit naduso na ngadto sa City Council ang Supplemental Budget (SB) 2.

Gipasabot ni Garcia nga ang P3,000 anaa na sa Annual Budget 2021 para sa 3,000 ka mga JO apan nahimo kining 4,700 gumikan sa pandemic diin mga JO ang gi-hire para sa vaccination, isolation center, contact tracers ug uban pa.

Ang bonus nga naa sa SB2 mao ang para sa 1,700 ka JOs nga wala maapil sa budget sa 2021 sanglit, matod pa ni Garcia, mapangitaan ra og pundo nga aprubado na sa Konseho ang pagpalit sa mga bugas nga magamit sa ilang panimalay.

Ang mga regular ug casual nga kawani makadawat og P20,000 nga Christmas bonus apan silang tanan apil na ang mga JO kinahanglan pulos bakunado sa dili pa nila madawat ang bonus.

Ang mga empleyado ug JO nga dili magpabakuna kay dunay mga gihambin nga balatian ug kadtong mga dili pa preparado ang ilang lawas ug hunahuna, si Rama niingon nga kinahanglang dunay medical certificate nga pinirmahan sa doktor kinsa nagtrabaho sa usa ka public hospital.

Sa pagkakaron, ang SB No. 2 padayon pa nga gi-deliberate sa konseho diin naapil ang bonus sa mga empleyado ug JO.

This posting includes an audio/video/photo media file: Download Now

Pagpatay sa ‘durugista’ sa T. Padilla way lead ang kapulisan

Posted: 01 Dec 2021 05:58 AM PST

BLANKO pa ang kapulisan sa Parian sa motibo sa pagpusil sa giingong durugista sa Martes sa udto, Nobiyembre 30, sa sa Sityo Lower, Barangay T. Padilla, Dakbayan sa Sugbo.

Ang biktima mao si Quirico Sandico Mangyao, alyas Jong-jong, 45, nagpuyo sa nahisgutang dapit samtang ang duha ka killers, usa kanila armado, wa pa mailhi.

Si Police Staff Sergeant Nemisio Denopol sa Parian Police Station niingon nga si Mangyao namatay sulod sa Cebu City Medical Center pila ka oras human siya gidala.

Matod ni Denopol nga si Mangyao naigo sa tiyan ug hayan dunay internal organs nga nadaut nga miresulta sa iyang kamatayon.

Sa crime scene, dunay nakuha nga usa ka kabhang sa bala ug usa usab ka buhing bala nga gituohang posibleng nikagar ang ikaduhang pagpusil.

Dugang ni Denopol nga bisan sa anggulo nga bangi personal, maglisod sila og tumbok sanglit mga kabanay ni Denopol wala mokooperar.

Samtang si Police Major Albert Quilitorio, hepe sa Parian Police, nibutyag nga ilang nasayran nga si Mangyao kanhi nadakpan sa Carbon Police Station sa kasong pag pamaligya og drugas.

This posting includes an audio/video/photo media file: Download Now

Pag-dismiss sa kaso batok ni Garcia gidasunan sa SC

Posted: 01 Dec 2021 05:58 AM PST

"Justice has prevailed, as always."

Kini maoy pamahayag ni Cebu Governor Gwendolyn Garcia subay sa uwahing ruling sa Supreme Court nga nagsuporta sa desisyon sa Court of Appeals (CA) nga i-dismiss ang kasong administratiba nga gipasaka batok sa gobernador kalabot sa kontrobersiyal nga Balili property.

Ang Labaw nga Hukmanan nipagawas sa 11 ka panid nga ruling sa Septiyembre 14, ug gi-publikar sa Nobiyembre 24.

Ang desisyon giluwatan human sa petisyon nga giduso sa Office of the Ombudsman, nga naghangyo sa Supreme Court sa pagsusi sa desisyon sa Court of Appeals labot sa pagka-abswelto kang Garcia ug sa laing 10 ka mga opisyal sa Kapitolyo.

Si Garcia ug ang kaubang mga opisyal sa Kapitolyo, gipasakaan og kasong grave misconduct may labot sa pagpalit sa Balili Property sa Dakbayan sa Naga niadtong 2009.

Ang kampo ni Garcia nidangop usab sa CA nga ni-pabor kaniya.

Nalakip sa argument nga giisa sa CA mao ang condonation doctrine nga gisubay sa ruling sa Korte Suprema.

Gipasabot niini nga bisan kon giabandonar na sa SC ang nahisgutang principle sa 2016, mahimo gihapon nga magamit ang maong doktrina sa kaso ni Garcia sanglit gipasaka ang administrative complaints sa 2010 nga epektibo pa ang doktrina.

"Here, the three complaints for grave misconduct were filed against respondent (Garcia) and other individuals prior to her reelection as governor of the Province of Cebu in 2010. Since the events that transpired here occurred prior to the finality of (of the decision on condonation) on April 12, 2016, respondent can still avail herself of the benefits of the condonation doctrine as a consequence of her reelection in 2010," matod sa Korte Suprema.

"Verily, it is incorrect for the Omb to argue that the condonation doctrine merely erases the penalty and not the offense. To repeat, the condonation doctrine obliterates the offense and, consequently, the liability as well," dugang niini.

Subay niini, malipayong gi-dawat ni Garcia ang bag-ong kalamboan ug nagtuo siya nga sukad, magpabilin ang hustisya sa kamatuoran.

"And yet again, justice has prevailed as always the truth will set us free," matod sa gobernador.

This posting includes an audio/video/photo media file: Download Now

Magbantay sa fake news

Posted: 01 Dec 2021 05:57 AM PST

KARONG eleksyon, ang kaning mga troll farm mamahimo na kaayong aktibo sa pagpatakap og mga fake news nga mopahumot ug mopanindot sa imahe sa kandidato nga nag hire nila. Sugod pa lang gani karon, duna nay mga "sponsored" social media post kalabot sa nagkalainlaing mga kandidato. Klaro kaayong produkto sa troll farm nga giubanan usab sa mga public relations specialist.

Magmabinantayon kanunay kitang magsige og basa og mga "balita" sa social media. Kinahanglan nga di dayon motuo ug mo-share sa bisan unsay nahimutang sa imong newsfeed hangtod nga imong masusi kon tinuod ba kini o di. Usa sa sayon nga paagi niini mao ang pag search pinaagi sa Google. Kon naa kini sa lehitimong mga news outlet, kini tinuod. Way fake news nga gibutang sa legitimate nga news outlets sama aning Super B ug SunStar Cebu. Sa wa pa nila gibutang sa ilang mantalaan ug websites, ila ning gisusi og maayo kon tinuod ba kini o di. Gi-train nila ang ilang journalists alang niini.

Ang tanang legitimate nga news organizations, apil na ang GMA 7, mga radio station nga sa dugay nang panahon nagsibya, ang katuohan gihapon kon kini nagagikan sa ilang newsroom.

Kon kanang balita nga imong nakita wa nimo mabasa gikan nila, dako ang kalagmitan nga kana fake news. Kon di man gani balita, usa lang ka artikulo, pag search gihapon ug tan-awa ug ayaga og maayo kon tinuod ba o di ang nahasuwat.

Sama anang infrastructure projects nga giingon nga iyaha sa usa ka opisyal, apan sa pagkatinuod diay, sa nangagi pang administrasyon ug igo lang gipadayon o nasugdan og trabaho sa contractor nga gikuha sa usa ka buhatan sa kagamhanan, sama sa Department of Public Works and Highways (DPWH). Naa man gyud ni public record ang tanang mga proyekto, labina kon national government project. Makita ni sa Official Gazette of the Republic of the Philippines nga website.

Daghan sab og mga impormasyon nga makuha gihapon sa pag search sa internet sa mga impormasyon. Kon kining tanan masusi og maayo, diha nimo makita kon unsay bakak ug tinuod. Di lang diay mugna mugna o sinuwat sa usa ka tawo.

Basta lagi eleksyon, magbantay kitang tanan sa mga fake news ug information nga manggawas sa social media platforms kay lisod nang mabiktima. Mas maayo nang nasayod kita sa tinuod aron magiyahan tag tarong sa pagpili og opisyal nga atong palingkuron sa mga posisyon nga mahinungdanon kaayo sa pagtimon aron molambo ang atong nasod.

This posting includes an audio/video/photo media file: Download Now

Editoryal: Lipat lipat sa IATF

Posted: 01 Dec 2021 05:54 AM PST

GIMANDO sa Inter-Agency Task Force for the Management of Emerging Infectious Diseases (IATF-MEID) nga sugod sa Disyembre 4, ang mga kawani nga mo-report sa ilang trabaho nga di bakunado kinahanglan nga mopresentar og negatibong reverse transcription polymerase chain reaction (RT-PCR) test.

Ingon pa ni Department of the Interior and Local Government (DILG) Secretary Eduardo Año nga di mandatory ang swab test kay mahimo man nga mopresentar og RT-PCR test result. Apan di baya ang kompaniya maoy mogasto, ang matag kawani maoy mokuot sa ilang tagsa ka bulsa. Ang labing barato nga RT-PCR test naa sa P900. Kay gikinahanglan man ang test matag duha ka mga semana, ang matag kawani kinahanglan nga mogasto og P1,800 ang buwan.

Sa usa ka yano nga kawani, bug-at na kaayo ni nga palas-unon kay dugang nga galastuhan taliwa sa kalisod sa panahon karon. Busa, kinsa may di mapugos pagpabakuna aron kalikayan ang dakong gasto? Libre ang gasto sa pagpabakuna.

Giingon niani ang paagi sa kagamhanan sa pagpugos sa pagpabakuna. Pugos kay bisan di klaro ang kamandoan, mapugos man ang matag kawani sa pagpabakuna aron di na hasol sa pagtrabaho.Kinsa may ganahan nga magsige og balik sa swab test, di ba? Aron makalikay sa kahasol, magpabakuna na lang.

Kini gung kamandoan sa IATF lipat lipat kay kon himuon nga "klaro" nga mandatory, kalapasan man kini sa tawhanong katungod. Gawas pa, wa say balaud nga mahimong basehan sa pugsanay nga bakuna. Gikinahanglan nga dunay ipasaka ug ipalabang nga balaud niini nga mismo si Presidente Rodrigo Duterte ang mopirma kon aprobahan sa Ubos Balay Balauranan ug Senado.

Busa, bisan pag moingon ang DILG nga di pugsanay ang pagbakuna, apan ang gipataban nga kondisyon sa kamandoan, magpugos sa kawani sa pagpatusok aron paglikay sa tumang kahasol. Lipat lipat man ni.

This posting includes an audio/video/photo media file: Download Now

Tambagi ko Noy Kulas: Lain gisangpit sa sex

Posted: 01 Dec 2021 05:40 AM PST

Dear Noy kulas,

Tawaga lang ko sa ngan nga Monching, minyo na ko for two years but lapas na ko sa 30 anyos. Ambot matawag ba kaha ni og dako nga problema ang akong giatubang karon.

Ingon ani ang nahitabo. Sa wa pa nako ma meet ang akong asawa, duna koy ka live in kaniadto ug nakahibawo siya. Taguon lang nato sa ngan nga Meriam. Nagkabuwag mi kay nakakita siya og lain but love gihapon kaayo nako siya bisan sa iyang gibuhat. Until nga akong na meet ang akong wife nga akong na GF for nine months before mi naka decide nga magminyo bisan naa gihapon sa akong heart si Meriam.

Mao ni ang sinugdanan sa akong problema karon. Two weeks ago, nag sex mi sa akong asawa ug ambot ngano to, ang name ni Meriam ang akong nasangpit. Iya kong giwakli ug giaway ko og maayo. Nagduda siya nga nagpadayon ang among relasyon sa akong ex bisan kon wa na mi communication dugay na kaayo. Basin tungod lang tingali kay usahay magdamgo ko sa iyaha.Until now wa gihapon ko niya tinggi bisan unsa na ang akong gibuhat nga pagpangayo og pasaylo niya. Niluhod na ko sa iyang atubangan apan keber ra gihapon siya.

Noy, unsa kaha ang akong buhaton aron iya kong pasayluon? Hapit na ko masuko niya kay grabe ra sab kaayo siya. Mangayo ko nimo og tambag. Daghan kaayong salamat.

MONCHING

Monching,

Ayaw lang sab kasuko kay natural ra gyud na niya nga ingon niana ang iyang reaksyon tungod kay natural ra na sa partner. Ibutang kaha ang imong kaugalingon sa iyaha, unsa sab kaha ang imong bation kon siya ang nag mention sa iyang ex? Di kaha ka masuko pud niya ug magduda nga siya nagluib? Moabot sab na sa imong huna-huna, di ba? Busa, pasagdi lang na siya.

Ayaw paghunong sa pagpangayo og pasaylo. But kon di siya ganahan nga makig-estorya, give her space. Ipadayon kon unsa man ang inyong routine. Naa may giingon nga patience is a virtue. Yes, kana maoy imong batunan karon ning usa ka pagsuway sa inyong pagka managtiayon. Inyo ra ning malabang basta di padak-on. Ipakita kaniya nga sinsero ka sa imong pagpangayog pasaylo. Ayaw lang tugbangi ang iyang kahiubos ug kasuko.

Pag-ampo og maayo aron mapasaylo ka niya.

NOY KULAS

kulassuper@sunstar.com.ph

This posting includes an audio/video/photo media file: Download Now

Ciar: Ang make-up artist nga gilig-on sa panahon

Posted: 01 Dec 2021 05:30 AM PST

SI Yuri Erkie Igano Angcon nagsugod sa showbiz isip make-up artist apan karon tag-iya ug CEO na sa duha ka mga talent agency sa Sugbo nga mao ang Fashion Modeling Icon (FMI) for kids ug Cebu Models Angels (CMA) for adults nga mag-pito na katuig.

Ang iyang agency ang nagsilbing talent coordinator sa mga dagkong production sa Manila sama sa GMA Artist Center ug ABS-CBN. Siya mismo ang mohatag og workshops sa iyang mga talent sama sa acting, modeling, pageant walk, Q and A ug manners and etiquette kauban ang mga propesyonal sa industriya.

Duna sab siyay gitukod nga kaugalingong version sa Little Miss Cebu Philippines 2022 nga dunay 40 ka mga utokan ug maanyag nga contestants nagpangidaron og 9 hangtod 13 nga sa unang higayon ipahigayon karong Marso sa Golden Peak Hotel.

"Wala ko magtuo nga mabuhat ni nako tanan kay simple ra gyud ko nga pagkabayot: laagan, barkadista ug wala kahuman sa kursong HRM kay pobre ra lagi intawon among pamilya. Apan wala ko magpakawa sa paglaum ug akong gipakita sa akong mga ginikanan nga responsable ko nga pagkaanak isip eldest sa upat ka managsuon," paambit pa niya isip breadwinner.

Si Yuri sayo nga nanimpad tungod sa kawad-on ug bisan unsa na lay gisudlan niyang trabaho hangtod nga napadpad sa Manila diin nahimo siyang stand-up comedian sa usa ka Japanese bar. Nahimo sad siyang official makeup artist sa kanhi FHM Sexy Magazine ug Playboy Magazine diin siya nabaid isip beautician.

"I never thought I would be able to work with stars like Jennylyn Mercado, Kim Domingo, Viva Hot Babes Maui Taylor, Jennifer Lee, Sheree, Andrea del Rosario and my bff Sunshine Guimary. Klasi-klasing artista ang akong nakatrabaho ug gipang-makeupan. Sila ang naghatag nako og confidence kay proud kaayo sila nako. Mao nga nilaban gyud ko para sa akong mga damgo."

Gawas sa iyang pamilya ug mga pag-umangkon nga gisuportahan aktibo usab si Yuri sa iyang charity works, sama niadtong Lunes dihang nanghatag siya og mga hinabang sa mga sakop sa LGBT nga naapil ang kabalayan sa pagkaugdaw sa nahitabong sunog sa Alaska, Mambaling sa miaging semana.

"It's very close to my heart kay diha man mi nagpuyo sa una sa Sitio Huyong-Huyong, Alaska, Mambaling. Diha gyud ko nidako, ilado ko diha mao nga affected sab kaayo ko sa nahitabo nila," butyag ni Yuri kinsa naa na karon nagpuyo sa Poblacion Talisay. "Of course, dili ni nako mahimo ang akong charity without the solid support of my well-meaning friends."

Hinaot ang iyang maayong kabubut-on ug positibong disposisyon makahatag og inspirasyon sa mga nakasinati og kalisud ning labing mahagiton nga panahon karon sa atong kinabuhi.

Yuri Erkie Igano Angcon, Ssssuper Ka!

Unsa ni imong Little Miss Cebu Philippines?

It's designed to help our young talents discover and develop their potentials and to give them a sense of direction. Inspired siya sa Eat Bulaga pero lahi ni siya. This was first conceptualized in 2019 but was moved due to pandemic.

Unsay past projects sa imong agency?

TV ads, endorsement ug kanang mo-provide og talents for indie films and teleserye. Hopefully makabalik na mi kay niluag na man ang restrictions.

Stand-up comedian diay ka sa Manila?

Oo, sa una, but now nga nag-mature na ko nausab na akong linya. Akong focus karon akong agency.

Are you in a relationship?

Wala na although I had three serious relationships before. Bahalag way lovelife ang importante nga molambo ug malipayon kon unsa may plano sa Ginoo.

Unsay advice nimo aron magmalampuson sab sila?

Never give up on your dreams. Ignore those people who mock you. They will not help you succeed. Plan your goals and if you fail then try again. Persistence is the key.

This posting includes an audio/video/photo media file: Download Now

Balak: Pasko sa imong kasingkasing ning panahon sa pandemya

Posted: 01 Dec 2021 05:25 AM PST

Pasko karong panahona

Panahon nga maglipay ang tanan

Bisan taliwala sa bangis nga pandemya

Kay sumad sa pagkatawo

Sa Batang Balaan.

Magsadya ta karon luyo

Sa Covid-19 nga gikahadlokan

Uban sa atong pamilyag ginikanan

Kay ang Mesiya mikunsad na

Gikan sa kalangitan.

Ayaw tagoi ang Pasko

Sa suok sa imong kasingkasing.

Uban sa imong katawag katagbaw

Pagawsa ang Pasko sa imong dughan

Kay sa langit sa mga grasya

Ikaw gigasahan.

Ihatag ang gugma mo karon

Sa kabos mong mga silingan.

Binagi sila og kalipay sa panahon

Aron imong grasya ilang ambitan.

Ug sa dughan mo imong bation

Ang gugmahanong kahamilsing,

Ang matuod nga diwa sa panahon

Diha sa Pasko sa imong kasingkasing!

This posting includes an audio/video/photo media file: Download Now

Balak: Misa de Gallo

Posted: 01 Dec 2021 05:24 AM PST

Sa Misa de Gallo

Daghang mga tawo,

Mga tawong ganadong

Manimbag sayo

Bisag duka pa kaayo,

Bisag tugnaw pa kaayo.

Okey lang kaayo basta

Sa lingkuranan makapuwesto

Aron makatarong pagpaminaw

Sa ebanghelyo.

Misa de gallo nindot kaayo!

Sa simbahan magbuylo pag-adto

Silang Lola, Lolo, mga anak ug apo.

Sulod ug gawas sa simbahan

Mag-ambahan ang mga tawo.

Magtapok ang mga amigag amigo.

Magsagol pobre ug datong tawo.

Magsuhag ang kahumot ug kabaho.

Dinasig sa hugot nga pagtuo

Hatagan sa ilang gipangamuyo

Kon makatuman pagsimba

Sa tanang Misa de Gallo.

Human sa misa de gallo alegre kaayo!

Magkapuliki mga tinderag tindero

Kay ilang suman, bibingka ug puto

Gidumog sa daghang mga tawo.

Kasinatian sa Misa de Gallo ug Pasko

Ibutang unta nato sa atong kasingkasing.

Buhaton nato sa tanang mga adlaw

Kay kitang tanan usa ra sa mata sa Ginuo!

This posting includes an audio/video/photo media file: Download Now

Sugilanon:Ang pinaskohan ni Budoy

Posted: 01 Dec 2021 05:22 AM PST

NA-ADMIT sa usa ka Isolation Center sa dakbayan sa Sugbo si Budoy tungod kay nag-positibo siya sa Covid-19, ang pandemya nga milaygay sa minilyon ka mga tawo sa tibuok kalibutan. Traysikad drayber si Budoy. May asawa, si Mayang, ug duha ka anak, si Tupoy ug si Estoy. Duha na ka semana nga siya natanggong sa Center sukad adtong katapusang semana sa Nobiyembre ug nabalaka siya sa iyang pamilya bahin sa ilang panginabuhian. Gagmay pa ang mga bata. Si Mayang nanglabada ug gamay ra ang kinitaan karon tungod sa usa ka 'laundry washing service' nga natukod sa ilang dapit sa Tagunol. Ang ubang mga suki ni Mayang adto na magpalaba sa 'electric washing machine.'

May pagmahay si Budoy sa langit kay Disyembre na karon ang bulan sa Pasko.

Usa ka buntag samtang naglingkod siya sa kama nakita niya ang nars nga nagpaingon sa iyang nahimutangan. Nagsul-ob kinig 'protective personal equipment' ug morag astrunot tan-awon. Sa iyang bahin nagsul-ob siyag 'face mask' ug 'face shield'. Sa iyang hunahuna mora sab siyag piloto.

Ang nars may dalang trey. Gibutang niya kini sa kama ni Budoy. Giindeksyunan niya si Budoy ug gipatomar og tabletas.

"Nagsingabot na ang Pasko. Makagawas na kaha ko, Ma'm?" matod ni Budoy.

"Di pa, Sir. Basig inigkatapos sa Disyembre pa ka makagawas. Luya pa ka. Wa pa mawa ang virus sa imong lawas."

Nianang pagka gabii wa mahikatulog dayon si Budoy. Gusto niya nga ikauban ang iyang pamilya sa adlaw sa Pasko, sama sa nangaging mga katuigan. Bisan sila kabos malipayon silang nagsaulog sa sumad sa pagkatawo sa Balaang Bata nga si Hesus, bisag ang ilang pang-Noche Buena mao lamang ang 'sliced bread' ug pansit kanton. Unya mikidlap sa iyang hunahuna ang rebulto ni Senyor Santo Nino sa altar sa ilang pinuy-anan. Nakapahiyom siya. Miluhod siya atubangan sa iyang kama ug nag-ampo.

"Senyor Santo Nino, bug-os ang akong pagtuo Kanimo ug sa mga milagro nga Imong nahimo. Kaluy-a intawon ako! Wad-a na ang kagaw nga nag-ulipon sa akong balatian. Hatagi kog kabaskog aron makapauli na ko sa amo. Gusto ko nga ang ihatag mong pinaskohan nako mao nga sa sumad sa adlaw sa Imong Pagkatawo atua ako sa kiliran sa akong pamilya!" Hugot ang pagpangaliya ni Budoy sa Balaang Bata. Nakahilak gani siya.

Paglabay sa tulo ka tulo ka adlaw ang nars nga nag-atiman kang Budoy kuyog ang usa doktor miduol sa kama ni Budoy.

"Okey ka na, Sir. Makagawas ka na ugma. Speedy ang imong recovery!" matod sa doktor nga nagpahiyom. "Kahibulongan ang nahitabo kanimo!"

"Bitaw, Sir!" sagbat sa nars.

BISPERAS sa Pasko. Disyembre 24. Sa barungbarong nga gipuy-an sa pamilya ni Budoy nag-andam na si Mayang alang sa Noche Buena. Gawas sa linung-ag nga kan-ong humay, dihay 'sliced bread' ug pansit kanton sahi sa ilang naandan. Apan may nahidugang nga lamiang sud-an sa lamesa, usa ka buok inasal nga manok.

Pagka taudtaod mibagting ang alas dose sa kagabhion. Dili kaayo alingisig ang palibot kay gidili ang mga pabuto tungod sa pandemya. May mabati gihapong buto-buto sa rebentador.

"Sa kaluoy sa Batang Diyos nga natawo karon, Mayang, dako-dako ang akong kita sa pamasadag traysikad karon," matod ni Budoy. "Pasalamatan nato Siya."

"Angay gyud, Budoy, uy!" ni Mayang.

"Hala, tawga na ang mga bata aron mangaon na ta," ni Budoy nga mitan-aw sa rebulto ni Senyor Santo Nino ibabaw sa altar. Nanguros siya ug nagpasalamat nga gidungog sa Balaang Bata ang iyang pag-ampo. (KATAPUSAN)

This posting includes an audio/video/photo media file: Download Now

PBA opisyal na nga sakop sa EASL

Posted: 01 Dec 2021 05:21 AM PST

OPISYAL nang mipirma ang Philippine Basketball Association (PBA) og multi-year partnership contract sa East Asia Super League.

Ning maong liga, ikaparang sa PBA teams ang mga puwersa sa ubang dagkong mga liga sa rehiyon sama sa Japan B. League, Korean Basketball League (KBL), Chinese Taipei P. League, ug Hong Kong SAR.

Adunay walo ka teams ang bahinon sa duha ka mga grupo. Ang mga sakop sa matag grupo magkombati pinaagi sa round-robin home-and-away format.

Ang mopatigbabaw nga duha sa matag grupo mao ang makaabante sa Final Four nga mosunod sa knockout semifinals duel.

Ang torneyo nagtangag og $1 million nga kinatibuk-ang ganti.

This posting includes an audio/video/photo media file: Download Now

Wala’y bakuna, wa'y duwa: PBA

Posted: 01 Dec 2021 05:20 AM PST

PORMAL nang nagpadala og memorandum ang Philippine Basketball Association (PBA) sa tanang 12 nila ka miyembrong teams kabahin sa ipatumang lagda sa liga nga nagdili sa mga magduduwa nga makapakita og aksyon sa umaabot nga Governor's Cup kon wala pa kini nakakompleto sa bakuna batok sa Covid-19.

Sa nasayran, adunay upat ka Fil-foreigners ang wala nagpabakuna gumikan sa personal nga mga rason.

"We can't force them. It's their choice," matod sa usa ka opisyal sa liga, kinsa dili gustong magpaila, sa interbyu sa Spin.ph.

Ang lagda moepekto sab sa tanang coaches ug staff sa labing unang professional nga liga sa Asya.

"Kahit sa practice hindi sila makakapunta pag hindi vaccinated. And siyempre, hindi rin sila makaka-suweldo," dugang sa tinubdan sa Spin.ph.

Hasta ang imports nga mopakita'g aksyon sa komperensya gidid-an sab nga makaduwa kon wala pa nakakompleto sa bakuna.

Ang Governor's Cup nakatakdang mosugod karon nang Disyembre 8, 2021 sa Ynares Sports Arena.

"I'd like to see everybody vaccinated. So if not vaccinated, my suggestion is that they not be allowed to play, including the imports. All imports should be vaccinated," matod pa ni Board Chairman Ricky Vargas sa labing ulahi niyang pagbisita sa Philippine Sportswriters Association (PSA) Forum.

"Let's also respect the rights of those vaccinated."

Gihangop sa PBA ang kabahin sa mandatu sa pagpabakuna isip pagsunod sa mando sa Inter-Agency Task Force (IATF).

Ubos na man tuod ang bag-ong mga kaso sa Covid-19 sa nasod apan ang IATF padayon gihapong nagmatngon hilabi na kay adunay bag-ong virus nga nakaplagan nga gitawag og Omicron variant.

Aduna na'y kaso niini ang ubang mga nasod sa Israel, Hong Kong, ug ubang mga nasod sa Europe ug Southern Africa.

This posting includes an audio/video/photo media file: Download Now

Ex-CAAA players mag-reunion

Posted: 01 Dec 2021 05:19 AM PST

GIKATAKDANG maghimamat ang kanhi basketball players sa Cebu Amateur Athletic Association (CAAA) sa umaabot nga Christmas reunion nga pasiugdahan sa CAAA Basketball Alumni Association (CBAA).

Si CBAA president Inocentes "Jun" Montalbo mibutyag nga ipahigayon ang kalihukan karong Disyembre 18, 2021 sa seaside compound ni Vice-Mayor Vergilio "Jingjing" Chiong sa City of Naga.

Matod ni Montalbo nga dul-an sa 200 ka mga partisipante ang mikompirmar na sa ilang presensiya alang sa kalihukan.

Dunay pipila ang dili makatambong ilabi na kadtong atoa sa gawas sa nasod apan kinasingkasing kini silang mipadala og suportang pinansyal alang sa aktibidad.

Aron paghatag og kasayon sa pipila ka mga partisipante, adunay libreng sakay nga maoy mokuha ug mohatod paingon sa venue. Kini anha magpaabot sa Malacañang sa Sugbo (sa likod nga bahin sa Plaza Independencia) nga molarga untop alas 11:00 sa udto.

Ang Q and A games, sing-along contest, videoke, live band maoy pipila ka mga modayan-dayan sa panagtapok.

Lakip sa mga mikompirmar sa ilang presensya mao ang kanhi mga magduduwa sa Philippine Basketball Association (PBA) nga sila si Al Solis, Bonel Balingit, Elmer "Boy" Cabahug, Max Delantes, Marlowe Jacutin, Montoy Singson, Dondon Hontiveros, Roger Yap, Calvin Tuadles, ug Mark Anthony Tallo.

Si Montalbo mipasabot nga ang katuyoan niini mao ang pagpahugot sa camaraderie sa kanhi CAAA players ning panahon sa Pasko taliwala ning pandemiya.

This posting includes an audio/video/photo media file: Download Now

1 ray nagpositibo sa Covid sa Lunes sa Cebu City

Posted: 30 Nov 2021 05:54 AM PST

ANG Cebu City naka-record sa usa sa labing ubos nga daily positivity rate (DPR) sa Nobiyembre 29 sukad niigo ang coronavirus disease 2019 (Covid-19) sa miaging tuig.

Base sa record sa Emergency Operations Center (EOC), gikan sa 340 ka mga individual nga gi-swab, usa lang kanila ang napalgan nga positibo sa virus kun 0.29%.

Si Konsehal Joel Garganera, deputy chief implementer sa EOC, niingon nga aduna say pito ka mga bag-ong recovery gikan sa Covid-19 ang napatik sa ilang listahan.

Sa kinatibuk-an, gikan sa kapin 4,000 ka active Covid-19 cases sa Agusto, karon ang Cebu City aduna na lay 46, kinsa padayon pang nag-quarantine samtang pito kanila ang anaa nagpatambal sa ospital.

Gipahibawo usab ni Garganera nga niabot na og 58 ka barangay sa Cebu City ang walay transmisyon sa Covid-19 sa nakalabay nga 14 ka adlaw.

Gumikan niini nag-anam na usab og kunhod ang gidaghanon sa aktibong kaso sa 22 ka barangay.

Ang barangay Guadalupe nga maoy kanunay nga mag-una sa gidaghanon sa daghang kaso sa Covid-19, karon aduna nalay duha ug sila nahimutang sa ika-9 gikan 22 ka barangay nga adunay active cases

This posting includes an audio/video/photo media file: Download Now

Ex-convict nagmaoy, gipatay

Posted: 30 Nov 2021 05:53 AM PST

EX-CONVICT napalgang patay nga natusaktusak sa mga bala ang nagkadaiyang parte sa lawas alas 8:45 sa buntag sa Lunes, Nobiyembre 29, 2021 sa Purok Manga, Brgy. Dugoan, lungsod sa Sibonga, habagatang Sugbo.

Ang biktima giilang si Antonio Maravilles Torres, 32, ulitawo, napriso kaniadto sa kasong murder, taga Barangay Papan, lungsod sa Sibonga.Wa pa mailhi sa kapulisan ang responsabli sa kremin.

Sa imbestigasyon nila ni Police Master Sgt. Leon Gesim, sa Sibonga Police Station, si Torres posibling gipusil sa Dominggo sa gabii o kadlawon na sa Lunes.

Si Torres nakit-ang nagdala og pinuti mga alas 9:00 sa gabii sa Dominggo.

This posting includes an audio/video/photo media file: Download Now

Mananabtan naligsan sa trak, patay diha-diha

Posted: 30 Nov 2021 05:51 AM PST

MANANABTAN nga gikan nangadye sa sementeryo ug niagi og tindahan aron pagpalit og sud-an nga inun-unan nga isda alang sa iyang iring, namatay human maligsi sa usa ka trak sa alas 10 sa Martes sa buntag sa S. Osmeña Jr. Blvd., Barangay Tinago, Dakbayan sa Sugbo.

Namatay diha-diha si Maria Filipino,75, tungod sa grabeng kadaut sa lawas human maligsi sa trak nga gimaneho ni Juill Sherwin Encina, 31, taga Brgy. Pangdan, Dakbayan sa Naga.

Si Police Staff Sergeant Efifanio Comendido, traffic investigator sa Waterfront Police Station, nibutyag nga wa na madala pa sa tambalanan si Filipino.

Si Encina sa interbyu sa Superbalita Cebu niingon nga wa siya makabantay sa pagtatok ni Filipino.

Matod niya nga nagsunod siya og laing trak dihang iyang nadunggan nga dunay kalit nga nilagubo sa ilawom sa iyang sakyanan.

Diha na siya nasayod nga siya nakaligis human siya pahibaw-a sa mga tawo.

Wa na manaug pa si Encina tungod sa iyang kahadlok nga bun-ugon siya sa mga tawo sa dapit, labina sa mga kabanay.

Sa interbyu sa Superbalita Cebu, diha ra siya sa driver's seat naglingkod, nang-lock sa sakyanan.

Ang usa sa mga apo nga babaye ni Filipino nga di gustong nganlan niingon nga naandan sa ilang apuhan nga motabok sa karsada sa udto kay mananabtan kini sa sementeryo sa Barangay Carreta.

Si Encina gitanggong na sa Waterfront Police Station alang sa posibleng pagpasaka og kasong reckless imprudence resulting to homicide

This posting includes an audio/video/photo media file: Download Now

4 ka suspek sa pagpatay sa German national, misis ‘missing’

Posted: 30 Nov 2021 05:42 AM PST

UPAT ka mga suspek sa pagpatay sa German national ug sa asawa niining Pinay missing sukad napalgan ang mga lawas sa magtiayon sa kadagatan sa Barangay Maño, lungsod sa San Remegio,amihanang Sugbo.

Matod ni Police Major Ian Macatangay, hepe sa San Remegio police, nga ilang gibisita ang mga balay sa mga suspek, apan ang mga kabanay nitug-an nga wala na mopauli.

Aduna na silay mga ngalan sa upat ka mga suspek ug posibling mapun-an pa sa nagpadayon nga imbestigasyon sa Special Investigation Task Group (SITG) nga giumol sa Cebu Police Provincial Office (CPPO).

Ang gipangdudahan mga mananagat ra usab sa lungsod.

"Ang katingad-an ani nila kalit lang ning nangawagtang diri sa San Remigio sukad nga nakita ang patayng lawas after sa crime nga wala na magpakita pati sa ilang mga relatives wala magpahibawo og asa sila ug kalit lag panibat," matod ni Macatangay.

Dugang ni Macatangay nga nakakuha silag lig-on nga ebedensya nga naghatag kanilag lead nga usa sa upat ka mga suspek involved, "but dili man gud ta ka arrest based on presumption, so that's why nga atoa lang sa gyung gihimong pulido ang atoang lihok para inig file nato sa kaso, air tight and wala nay lusot unya ma file na."

Duha ka mga anggulo ang ilang gisubay, tulis ug panimawos tungod sa pamaagi sa pagpatay sa mga biktima nga gihulagway ni Macatangay nga duguon kaayo.

Sigun sa resulta sa autopsy report, nakaangkon og mga samad dinunggaban ug gibunalbunalan ang mga biktima ug ang katapusan, sila gipamusil una sila gitambog sa dagat.

Atol sa labing unang tigom sa SITG, naka-submit na ang PNP Forensic Unit sa nakuha nga dugo sa crime scene lakip na ang mga foot prints ug usa ka tsinelas nga gituohan nga iyaha sa usa sa mga suspek.

Ang cellular phone sa mga biktima gi turnover na usab ngadto sa PNP Anti-Cyber Crime Unit 7 aron masusi ang video sa close circuit television (CCTV) sa balay niini.

Dugang ni Macatangay nga giplanohan pag ayo sa mga suspek una gihimo ang krimen sanglit dili mahimo sa duha ka mga tawo lang ang pagpatay sa mga biktima tungod kay dako nga pagka tawo.

This posting includes an audio/video/photo media file: Download Now

Rama midayeg ni Sen. Bong Go

Posted: 30 Nov 2021 05:41 AM PST

GIDAYEG ni Mayor Michael Rama ang pag-withdraw ni Senator Christopher Lawrence "Bong" Go sa presidential race sa piniliay sa Mayo 2022.

Si Rama kinsa maoy standard bearer sa PDP-Laban Cebu City chapter ug nipadayag sa iyang suporta kandidatura ni Go sa pagkapangulo, niingon nga wala gibaylo sa senador ang pamilya ngadto sa pulitika.

"He valued family over politics. Therefore, that is highly commendable as I always said, politics will pass, friendship should last, family ties uncast," padayag ni Rama.

Ang mayor nagkanayon nga sa pagkakaron, wala pa silay suportahan ug mag-agad sila ni Presidente Rodrigo Duterte kon kinsay ituboy niini nga maoy mosunod sa iyang biyaang katungdanan sa Malacañang.

Matod niya nga mahibaw-an kini labing dugay karong Disyembre 10, 2021.

"He should even be commended because after all soul searching, he valued the word family.He would not want to be a reason that their relationship will be exacerbated of which the need for unity specially on the candidacy of Inday Sara Duterte," dugang ni Rama.

This posting includes an audio/video/photo media file: Download Now

Aktibista pakyas sa ilang rally sa CICC

Posted: 30 Nov 2021 05:39 AM PST

NAGKADAIYANG pundok sa cause-oriented group ang mipahigayon og lihok protesta sa Metro Cebu area, kagahapon, Nobiyembre 30 agig paghandum sa Bonifacio Day.

Apan ang grupo sa Sanlakas, Partido Lakas ng Masa, Buklorang Manggagawa ng Pilipinas ug pundok sa kababayen-an nga Oriang ang wa molampos sa ilang gitakda nga rally atubangan sa Cebu International Convention Center, dakbayan sa Mandaue.

Sa dihang kapulisan mibadlong kanila sa pagpahigayon og asembliya sa maong dapit tungod kay wa silay permit gikan sa kagamhanan sa Mandaue.

Mitugot lang si Police Lieutenant Kerwin Bejer, Mandaue City Police Office nga makatapok ang grupo atubangan sa CICC alang sa pictorial.

Si Teodorico Navea, secretary general sa Sanlakas, nagkanayon nga gipili unta nila ang CICC tungod kay nagsimbolo kini sa kapakyas sa opisyal sa kagamhanan.

"Unsa may nahitabo karon sa CICC, asa naman ni karon pa ingon?," kuwestiyon ni Teodorico.

Niadtong Nobiyembre 22, ang Sanlakas nisang-at og reklamo sa Office of the Ombudsman Visayas batok ni Cebu governor Gwendolyn Garcia og grave misconduct ug gross neglect of duty tungod sa giingong napakyas nga pagtubag sa pandemya.

Dugang pa ni Teodorico nga ang demonstrasyon nagtumong sa paghatag og dugang pressure sa gobernador ilabina nga adunay bag-ong variant sa coronavirus disease 2019 (Covid-19) nga naghulga sa nasud.

Sa susamang kalambuan, ang mga sakop sa Bayan Cebu, AMA Sugbo-KMU, Kabataan Partylist ug uban pang-raliyesta nagtapok sa dalan Colon.

Gipadayag sa maong grupo ang ilang kasagmuyo ngadto sa administrasyong Duterte.

Adunay effigy sa presidente nga ilang giguba gamit ang sundang, ang hinagiban nga gigamit sa nasudnong bayani nga si Andres Bonifacio sa pakigbatok sa mga langyawng mananakop.

Wa magdugay ang mga demonstrador sa dihang gibungkag ang maong tapok sa kapulisan.

This posting includes an audio/video/photo media file: Download Now

Bag-ong dan sa Lungsod sa Oslob gisubhan

Posted: 30 Nov 2021 05:37 AM PST

MOKABAT sa P132 milyones ang kantidad sa 7.4 kilometro nga kalsada sa Lungsod sa Oslob, Lalawigan sa Sugbo, ang pormal nga gisubhan sa Probinsiya sa Sugbo.

Ang P55.1 milyones nga 2.9 kilometros nga Phase 2 sa Poblacion-Cañang Road Section bukas na usab alang sa publiko, motorista ug skateboarders.

Si Gobernador Gwendolyn Garcia maoy nangulo sa groundbreaking ceremony sa 4.5 kilometros nga Luka-Tumalog-Cañang Road nga molahos sa Tumalog Falls sa Barangay Tan-awan diin makita ang mga butanding.

Kon kini makompleto mahimo usab kining mosumpay sa farm-to-market roads nga gipundohan sa nasudnong kagamhan paingon sa lungsod sa Santander, Samboan, Boljoon ug Alcoy.

Ang maong kadalanan gituyo nga makatabang usab sa pagpalambo sa turismo sa lungsod ug uban pang kalungsoran nga malutsan sa habagatan nga bahin.

Gawas sa maong proyekto, gi-inagurahan usab sa kagamhanan ang gi-renovate nga Cuartel Heritage Park sa Oslob nga gila-uman nga dagsaon na sa mga bisita ug turista tungod sa pagkamakasaysayanon niini.

This posting includes an audio/video/photo media file: Download Now

Pagbakuna gitinguhang i-mandatory na

Posted: 30 Nov 2021 05:36 AM PST

NIINING laing hulga sa bag-ong variant sa coronavirus disease nga Omicron, Presidente Rodrigo Duterte hayan mosanong sa ideya nga i-mandatroy na ang pagbakuna.

"I may agree with the task force if they decide to make it mandatory (vaccination). It's for public health. Now, kung ayaw mo, 'wag kang lumabas," matod ni Duterte atol Talk to the People Address.

Sumala pa nga ubang mga nasud ang nipatuman nga mandatory na ang pagpamakuna.

"Iyong ayaw magpabakuna, madali lang man 'yan. Mamili ka: matagal kang mabuhay o gusto mo nang mamamatay? Pag kumapit 'yang Covid na iyan, hindi pa natin alam itong Omicron, patay na. Mamili kayo: early demise or live longer," pahimangno ni Duterte.

Samtang si Interior and Local Government Secretary Eduardo Año, nga laraw pa lang ang maong tinguha nga himuong mandatory ang pagbakuna.

Kadtong mga unvaccinated gikinahanglan nga motamod sa higpit nga protocol samtang nagpadayon pa ang nasinate nga pandemiya.

Gitataw ni Año nga adunay igong supply sa bakuna ang nasud ug libre na kining gipanghatag, ug way rason ang publiko nga di magpabakuna.

"So while we cannot really impose mandatory because we don't have laws, national law, but at least, Sir, we -- through the Section XVI of the Local Government Code, a local chief executive can -- can issue executive order or ordinances that will protect its constituents. And that is once -- is considered legal unless stopped by the court," pasabot sa kalihim.

Nagtuo si Año nga kadtong nagdumili o nagduha-duha sa pagpabakuna gumikan sa ilang nasayran nga fake news mahitungod sa epekto sa bakuna.

Si Dr. Edsel Salvaña, infectious disease specialist, miingon nga base sa pagtuon,ang Omicron variant nga ang spike protein niini ang nidoble itandi sa Delta variant.

Ang variant sa Omicron unang nitumaw sa Botswana, ug ubang bahin sa South Africa nga giila sa World Health Organization nga 'variant of concern.' (TPM sa SunStar Philippines)

This posting includes an audio/video/photo media file: Download Now

Talk to Papa Joe: Maorag dalaga

Posted: 30 Nov 2021 05:34 AM PST

Dear Papa Joe,

Ako diay si Jemuel, 29 years old, may ka live in ug tulo ka mga anak.

Kaning akong ka live in naa sad ni siyay katipon sa una. Karon, nabantayan nako nga hilig kaayo ni siya og gimik. Sa una nasakpan ko ni nga makig carpool sa iyang kauban sa IT Park pero sila ra permi nako makit-an nga magkuyog. Nakasakop pa ko nga may pictures silang duha sa FB sa lalake pero matud pa niya bayot kuno ni nganong mag selos ko.

Mao to palabay lang nako ug nabalhin na sad ni siya og work, sige lang gihapon siya og gimik. Bilin mi sa iyang mga anak ug di gani siya proud namo nga i-post sa FB. Unsaon kaha ko ni, Paps? Tambagi ko.

JEMUEL

Jemuel,

Well, isip managtiayon, istoryahi na ninyo og tarong. Basin di makaalma kay siya maoy nag work tan-aw ko? Siguro, ikaw na ang mangita og trabaho pero kon tan-aw nimo mao na gyud na siya, basin mao nay hinungdan nga gibiyaan siya sa iyang ka live in sa una.

Saboti na lang na ninyo kay sa moluom ka diha. Basin maapektaran pa ang imong mga anak o basin makabuhat pa ka og dautan. Again, iagi sa og istorya ug pag-ampo.

Papa Joe

(sa inyong tampo ipadala lang sa papajoesuperb@gmail.com)

This posting includes an audio/video/photo media file: Download Now

Diputado: Asa gikan ang bilyones?

Posted: 30 Nov 2021 05:32 AM PST

MAKALINGAW ang nahitabo karon. Matod sa balita, miatras na sa iyang kandidatora pagka presidente si Senador Bong Go. Dili na maglibog pa ang mga dumadapig ni Presidente Rodrigo Duterte (PRRD) kon kinsa ang ilang sundon, ang giendurso ni PRRD o ang giendurso ni Mayor Sara Duterte-Carpio.

Sanglit miatras na man si Senador Bong Go, mahimong kalimtan na lang ang endorso ni PRRD ug adto na lang sila mo-focus sa endurso ni Inday Sara. Apan, may dakong apan.

Sa mga dumadapig ni PRRD, walay lalis kon kinsa ang ilang suportahan sa pagka bise-presidente, si Inday Sara.

Ang lalis kon kinsa ang ilang suportahan sa pagka-presidente.

Daghan sa dumadapig ni PRRD dili pabor ni Bongbong Marcos (BBM) tungod kay dili pa mapapas sa ilang galamhan ang nahimo sa Marcoses sa nakalabay nga panahon.

Bisan pa, matod pa, dili husto nga ang kasal-anan sa amahan mahimo sab nga kasal-anan sa anak, daghan gihapon ang nagtuo nga parehas ra og kinaiya si BBM sa iyang amahan.

Dili kalikayan nga kahadlokan gihapon ang pagka-tawo ni BBM tungod kay anak siya sa kanhi presidente nga si Ferdinand Marcos.

Gawas pa sa kasayoran nga apil si BBM sa nagbahinbahin sa mga katigayonan sa kanhi presidente.

Dayag na lang nga anaa lang gihapon ang mga pagduda kon asa gikan ang mga katigayonan ni BBM.

Matod pa sa usa ka kandidato pagka senador, magkinahanglan ang usa ka kandidato sama kaniya og usa ka bilyon ka pesos sa iyang kampanya.

Buot ipasabot, ang kandidato pagka-presidente sobra pa sa usa ka bilyon ang gikinahanglan.

Pangutana, kon magkinahanglan ang kandidato pagka presidente og sobra sa usa ka bilyon ka pesos, asa gikan ang bilyones ka pesos nga gamiton ni BBM alang sa iyang kampanya? Gikan sa negosyo ba? Donation ba?

Kay kon gikan sa iyang tinigom nga suweldo, segurado man gyod nga di kaabot og usa ka bilyon ka pesos.

Dako kaayo ang kausaban sa marine sanctuary sa dakbayan sa Lapu-Lapu. Nindot kaayo kini ug maayo kaayo ang pagdumala niini.

Tungod kini sa paningkamot sa mga diver enthusiast sama kanila ni Belle Chua nga usa sa mga naglihok aron matagad ang panginahanglan sa atong kalikopan.

Congratulations sa dakbayan sa Lapu-Lapu ug sa mga opisyal niini sama kang Alex Baring ug Belle Chua.

This posting includes an audio/video/photo media file: Download Now

Barrita: ‘No work, no pay’ sa walay bakuna

Posted: 30 Nov 2021 05:30 AM PST

MAHIMONG ipatuman sa employers sugod karong adlawa, Disyembre 1, 2021, ang "no work, no pay" policy alang sa mga empleyado nga kinahanglang motrabaho "on site" apan di makahimo niini kay nagdumili sila sa pagpabakuna batok sa Covid-19 ug magpakuha og RT-PCR test.

Apan ang no work, no pay policy alang niadtong mga kawani nga way bakuna gisupak sa mga labor unions nga niingon nga kining maong policy usa ka matang sa pagsilot ug diskriminasyon sa wa mabakunahi.

Si Labor Assistant Secretary Teresita Cucueco niingon nga subay kini sa Inter-Agency Task Force (IATF) for the Management of Emerging Infectious Diseases Resolution 148 nga giluwatan sa Nobiyembre 12 ug giamendahan sa Resolution 149 nga giluwatan sa Nobiyembre 18.

Ang duha ka resolusyon nagmando nga ang mga kawaning wa mabakunahi ug motrabaho on site kinahanglang makapakita og negatibong resulta sa RT-PCR o reverse transcription-polymerase chain reaction tests kausa kada duha ka semana. Madawat ang rapid antigen Covid-19 tests kon way RT-PCR test sa ilang dapit.

Matod ni Cucueco mao kini ang mahitabo. Ang kawani nga way bakuna mahimong adto ra magtrabaho sa balay kon dunay "work-from-home arrangement." Apan kon wa, ug kinahanglan siyang motrabaho on site, magpa-test siya sa Covid-19. Kon di siya magpa-test, mo-apply siya og paid leave of absence. Apan kon mahurot ang iyang leave credits, moabot na ngadto sa "no work, no pay."

Way labot sa no work, no pay policy ang mga kawani nga nakadawat na sa unang dose sa bakuna ug duna nay schedule alang sa ikaduhang dose. Sa pagkakaron, miabot na sa 32.9 ka milyon ka mga Pilipino ang nabakunahan batok sa Covid-19.

Si Steven Yu, presidente sa Mandaue Chamber of Commerce and Industry (MCCI) niingon nga mosunod sila sa mga resolusyon sa IATF aron makatabang sila nga makab-ot sa nasod ang herd immunity ug mabuksan na pagbalik ang ekonomiya.

Apan si Alan Tanjusay, nasudnong tigpamaba sa Trade Union Congress of the Philippines (TUCP), niingon nga ang no work, no pay policy usa ka matang sa pagsilot ug diskriminasyon sa mga kawani nga wa mabakunahi.

Ang angay nga buhaton sa gobyerno mao ang paghatag og mga incentives aron makombinsir ang mga trabahante nga magpabakuna sama sa paid leaves, financial bonuses, rice allowance ug libreng sakay paingon sa mga vaccination sites, matod niya.

Samtang si manlalaban Nora Ana Meterio-Diego, bise presidente sa Associated Labor Unions (ALU) Central Visayas, nisaway sa maong policy kay di man mandatory ang pagbakuna ubos sa Republic Act 11525, ang Covid-19 Vaccination Program Act of 2021. (edbarrita@gmail.com)

This posting includes an audio/video/photo media file: Download Now

Nalzaro: Hasta ang patay gipamulitika

Posted: 30 Nov 2021 05:28 AM PST

SA iyang pagka kongresista og pagka edukado, wala gyud hunahuna ni Cebu City South district Congressman Rodrigo 'Bebot' Abellanosa ang posibling negatibong implikasyon sa iyang post sa Facebook.

Samtang nagpadayon pa ang sunog sa Sitio Lawis, Mambaling, dakbayan sa Sugbo niadtong Biyernes sa gabii, mi-post dayon sa iyang FB account si Bebot nga 'wala dayon makaresponde og makapawong ang mga bombero sa sunog gumikan kay nadelatar ang mga firetrucks tungod kay gigamit sa lubong ni anhing Mayor Edgardo Labella.'

Sa hapon sa maong adlaw, gilubong ang mayor sa Golden Haven sa Binaliw diin nipahigayon og 'water salute' ang Cebu City Fire Department sa funeral route isip ilang yukbo sa mayor.

Gihimo ang maong tribute kay incumbent si Labella isip halad usab sa taga Bureau of Fire Protection (BFP). Gitugotan kini sa ilang lagda. Bisan ang Philippine National Police (PNP) mihalad usab og tribute.

Nahuman na kini mga alas 2:00 pa sa hapon. Gilubong ang mayor sa alas 4:00 sa hapon. Apan niulbo ang sunog pasado na alas 5:00 sa hapon. Wala kuno dayon makaresponde og makapasirit ang mga bombero kay nahubsan og tubig.

Pastilan si Abellanosa, bisan patay gipamulitika pa gihapon. Walay lain tumong si Bebot sa maong post. Ang pagdaut sa integridad sa bombero, sa administrasyon ug banay ni Labella.

Sige lang Mr. Congressman, kon mahitabo ni nimo o sa imong amo sa pulitika, amo pod mong pahatagan og 'water salute' kay hamiling mga opisyal man mo sa lungsod.

Sa pag-nuetralize sa negatibong pagsaway sa katawhan kaniya sa social media, mi-post dayon siya kabahin sa balaod nga nagdili sa BFP nga gidili ang paggamit sa firetrucks sa bisan unsang aktibidades gawas sa pagsalbar og kinabuhi og mga propreyidad. Ang iyang gikutlo mao ang Republic Act 10121 kun Philippine Disaster Risk Reduction and Management Act of 2010.

Pero walay klaro sa balaud. Akong gi-research. Wala kini gitumbok. Ngano man lagi nga sa matag piyesta sa San Juan sa kaulohan gamiton man ang firetrucks sa pagbasa sa mga tawo? (bobbygnalzaro@gmail.com)

This posting includes an audio/video/photo media file: Download Now

Editoryal: Maayong Pasko!

Posted: 30 Nov 2021 05:24 AM PST

DISYEMBRE 1, Miyerkules, unang adlaw sa buwan sa Pasko. Maayo kaha ang Pasko ning tuiga? Mas luag kaha kon itandi sa miaging duha ka mga Pasko nga higpit ang polisiya sa kuwarentina? Karon, ang quarantine status sa Sugbo ug ang dakong bahin sa nasod medyo luag, Alert Level 2.

Ang Inter Agency Task Force (IATF) mitugot na sa pubikong sa pagpanuroy apan magtamod gihapon sa minimum health standard. Abli na ang daghang estabilimento. Alegre na ang palibot bisan nagpabilin ang curfew sa lawom nga gabii.

Apan ang pagbangon sa kamabulukon sa Pasko o paghandom sa pagpakatawo sa Manunubos sa kalibotan, Ginuong Hesu Kristo, dunay bag-ong nagpahipi nga hulga - ang bag-ong variant sa virus nga gitawag sa World Health Organization (WHO) nga Omicron.

Unang nakita sa Botswana. Paspas mikaylap sa pipila ka kanasoran sa Africa ug Uropa. Ning bag-o, nakaplagan sa Hong Kong sa usa ka tawo nga gikan sa South Africa. Maayo na lang nga duna nay igong kasinatian sa pagbatok sa virus. Ang Pilipinas ni-ban sa Hong Kong sa China ug ubang nasod nga dunay kaso sa Omicron.

Samtang, makalipay tan-awon ang paghugop sa bagang duot sa katawhan sa 3-ka-adlaw Vaccination Days Program sa kagamhanan gikan sa Nobiyembre 29 hangtod karon, Miyerkules, Disyembre 1.

Ang pagpabakuna usa sa dakong tabang alang sa pagkab-ot sa herd immunity o mayoriya sa populasyon bakunado sa pagsumpo sa pagtakod sa Covid-19. Nagpadayon ang pagtiurok sa kaso sa coronavirus disease 2019 (Covd) 19 sa nasod.

Ug segurado nga ang matag usa kanato dunay plano sa Pasko. Mag-ampo kita. Moduyog sa hiniusang lakang sa pagpanalipod sa nasod batok sa Omicron. Di mokompiyansa.

Malipayong Pasko sa tanan!

This posting includes an audio/video/photo media file: Download Now

Balay-balay, Tubig-tubig: Children’s Month

Posted: 30 Nov 2021 05:18 AM PST

AKTIBO ang Children's Legal Bureau (CLB) sa pakighiusa sa pagselebrar sa ika-29 nga kasaulogan sa Children's Month.

Karong tuiga, tema sa matag tuig nga kasaulogan mao ang "New Normal na Walang Iwanan: Karaptan ng Bawat Bata Ating Tutukan".

Kini nagpasabot nga walay angay mauwahi o mabiyaan labaw na sa hisgutan sa mga katungod sa mga bata bisan pa man sa mga hagit nga dala sa pandemiya.

Gisugdan sa CLB sng kasaulogan sa Children's Month pinaagi sa pagpahigayon sa matag buwan nga online discussion series nga Para Sa Kabataan (PSK) kon diin sentro sa tigom ang pagtuki kabahin sa pagpabakuna sa mga teenagers nga nagpangedaron sa 12 ngadto sa 17 anyos.

Mga radio guestings sa matag Sabado nga programa sa DYRF sa CLB nga "Ang Kabataan Karon" maoy nahimong instrument aron mapahibalo sa mga nagkadaiyang organisasyon ang ilang mga programa sulod sa buwan sa Nobiyembre.

Lakip sa mga mi-guest sa programa mao ang mga representante gikan sa Commission on Population and Development (POPCOM), National Youth Commission (NYC) ug pipila ka mga myembro gikan sa Children's NGO Network (CNN).

Duna poy gihimo nga Trauma Informed Care Training for Multi-Disciplinary Team and Service Providers Handling Cases of Online Sexual Exploitation of Children (OSEC) kauban ang Terre des Hommes (TDH) Netherlands ug Marian Missionaries of the Philippines nga gitambungan og kapin 60 ka mga participants.

Gawas sa Trauma Informed Care Training, laing Community-Based Multidisciplinary Team Training ang gi-organisa aron matubag ang panginahanglan sa saktong pagresulba sa mga kaso nga naglambigit sa mga bata atol sa pandemiya.

Sulod sa duha ka adlaw, napahigayon usab ang ika-siyam (9th) Annual Conference sa Cebu Against Child Sex Tourism (CAST) kauban ang USAID, Philippine Development Assistance Program, Inc. (PDAP) ug Approach Consortium. Ang hisgutanan sa labor trafficking maoy gituki sa mga resource speakers ug participants.

Tulo ka adlaw nga Paralegal Training kauban ang German Embassy maoy gitambungan sa mga Community Watch Groups (CWGs) gikan sa Dakbayan sa Mandaue ug Cebu ug Lungsod sa Consolacion.

Gitapok sab ang mga representante gikan sa gobyerno ug non-government organizations (NGOs) alang sa Juvenile Justice Network (JJN) meeting aron mahatagan og pagtagad ang mga isyu sa mga children in conflict with the law (CICLs).

Skills for Life Training maoy gitambungan sa mga participants gikan sa pipila ka mga barangay sa Mandaue aron mahatagan sila og bag-ong kasayuran ilabi na sa technical vocation sulod sa duha ka adlaw.

Gilauman sa CLB nga pinaagi sa maong mga kalihukan, makatabang ang matag usa kanato ilabi na sa mga participants sa mga activities sa pagpanalipod sa katungod sa mga bata ilabi na karong pandemiya.

[Lindog sinuwat ni Atty. King Anthony Perez, usa sa mga abogado sa Children's Legal Bureau. Mahimo nga mupadangat sa inyong mga suliran o pagsumbong sa kaso sa pagpangabuso pinaagi saemail (clbphilscebu@gmail.com) o send og mensahe sa Facebook Messenger: m.me/ChildrensLegalBureauInc]

This posting includes an audio/video/photo media file: Download Now

Mga inobasyon o kabag-ohan sa tunghaan panahon sa pandemiya

Posted: 30 Nov 2021 05:13 AM PST

DILI ikalimod nga ang Covid-19 pandemic nakahatag og dakong kausaban sa educational landscape sa nasod. Tanang tunghaan sa tibuok Pilipinas, naay gihimung mga inobasyon o kabag-ohan sa sistema sa pagpadalagan sa mga tunghaang publiko o pribado.

Kini nagpakita lamang sa mga katakos sa mga magtutudlo sa nasod, ug usa lamang ang tumong niini - magpadayon ang edukasyon sa mga tinun-an bisan pa man sa dakong hagit sa Covid-19 nga pandemya.

Ang Actin National High School, medium school sa Schools Division sa Bayawan City, wala nagpaulahi sa paghimo og mga lakang ug talagsaon nga mga inobasyon nga nakahatag og dakong tabang alang sa hapsay ug han-ay nga pagpadalagan sa edukasyon alang sa mga tinun-an.

Ania ang mga nagkadaiyang inisyatibo ug programa sa tunghaan nga nahisubay sa Department of Education (DepEd) Order No. 12, 2.202 "Adoption of the Basic Education Learning Continuity Plan for SY 2020-2021 in light of the CoCovid-19 Public Health Emergency and the DepEd Order No. 32 s.2020"

1. Actin- Eduradyo (Radio Based Instruction)

Ang Radio Based Instruction sa Actin National High School ang usa sa pinaka bag-o ug dako nga proyekto sa tunghaan. Mao kini ang Actin Eduradyo nga diin mapaminawan sa mga tinu-an ang mga diskusyon sa mga magtutudlo sa kahanginan. Dagkong mga pribadong stakeholders ang nipa-ambit ug nihatag sa ilang dakong suporta sa maong proyekto. Usa kini ka panaghugpong ug panag-uban nga naay pormal nga kasabutan tali sa tunghaan ug mga pribadong stakeholders sama sa Noreco II, Rotary Club of Tolong og 104.7 Happy FM.

2. Community Learning Facilitators

Nasinati sa mga tinun-an ang dakong kalisud sa pagkat-on sa ilang mga leksyon pinaagi sa module. Nakita ang dako nga kalahian sa pagkat-on sulod sa eskwelahan ug sa panimalay. Busa tungod niini, ang Actin National High School nag-awhag sa mga boluntaryong mga propesyonal sa lokal nga komunidad sa paggahin sa ilang oras aron sa pagtabang sa mga tinun-an sa pagpasabot sa ilang mga leksyon, kini nga inisyatibo gitawag nga "silingan ko, tudlu-an ko". Baynte tres ka mga Community Learning Facilitators, silang tanang college graduates ug kadaghanan nila kay lisensyadong mga magtutudlo ang ningboluntaryo sa maong inisyatibo.

3. Edukarton

Ang Actin National High School sama sa kadaghanang tunghaan sa nasod nisagop ug nigamit usab sa Printed Modules isip distant learning nga modalidad. Aron ma ampingan ug magamit pa sa mga sumusunod nga tinun-an ang mga printed modules, gilusad sa Supreme Student Government sa tunghaan ang "Edukarton" or Education-In-A-Box. Usa kini ka simpleng karton nga gidisenyuhan sa mga tinun-an diin dinhi nila gibutang ug gisulat ang ilang mga kusog ug kahuyang isip tinun-an, apil na usab niini ang ilang mga pangandoy sa kinabuhi. Nagsilbi usab ang edukarton isip sudlanan ug tago-anan sa modules aron magpabiling hapsay og limpyo kini nga mauli sa tunghaan. Labaw sa tanan, nagsilbi kini nga inspirasyon sa mga tinun-an aron magpadayon sa pag eskwela bisan pa man sa kalisod sa panahon na atong nahiaguman.

4. Satellite Distribution Centers

Sa kinatibuk-an, naay 468 ka mga tinun-an ang nahimutang ug nagpuyo sa bukirang dapit ug layo ang mga panimalay sa tunghaan sa Actin National High School. Dakong hagit sa mga ginikanan ang paghatod ug pagkuha sa printed modules.

Nakita sa eskwelahan nga posible kini nga mamahimong babag sa ilang pagpadayon sa pag-eskwela, ug aron matabangan ang mga ginikanan sa mga tinun-an nga dili na maglisud pa sa paghatod ug pagkuha sa modules nahimugso ang "Satellite Distribution Centers" diin ang mga magtutudlo mismo ang niadto sa mga far-flung areas aron mohatod og mukolekta sa mga printed modules. Ang Actin National High School anaay tulo ka mga Satellite Distribution Centers nga gisuportahan sa mga barangay ug Lungsod sa Basay. Tungod sa Satellite Distribution Centers, dakong luwas sa pinansyal ug oras ang nahatag niini sa mga ginikanan sa mga tinun-an.

Pipila lamang kini sa mga mugnang inisyatibo ug inobasyon sa Actin National High School nga gipangulohan sa ma-abtikong school head niini nga si Christopher Bantog inubanan sa dakong suporta sa DepEd Bayawan City Division SDS Lelanie T. Cabrera CESO VI, ASDS Dr. Juliet Tuala, CID Chief Dr. Lorenzo Arcon, SGOD Chief Dr. Eduardo Lagos og uban pang mga pribadong stakeholders.

Kini nga mga inobasyon ug programa usab sa Actin National High School ang nagdala sa tunghaan aron mahimong magmalampuson isip Regional Winner sa 2021 Outstanding Program Implementer sa Brigada Eskwela – Medium School Category!

Alang sa dugang kasayuran, mahimong e follow ang Facebook Page sa tunghaan mao ang @actin303218. (Jaymar D. Villoso, MPA)

This posting includes an audio/video/photo media file: Download Now

Naay ma-TKO

Posted: 30 Nov 2021 05:11 AM PST

HUGOT ang pagtuo ni Filipino Olympic bronze medalist Eumir Marcial nga mahuman pinaagi sa knockout ang all-Pinoy world title fight tali nila ni Nonito "Filipino Flash" Donaire ug Reymart Gaballo karong Disyembre 11, 2021 sa Dignity Health Sports Park sa Carson, USA.

Mao kini ang gipadayag nga panahom ni Marcial kabahin sa away sa interbyu sa www.abs-cbnnews.com.

Wala man tuod siya nakauyon nga mag-unay ang parehong Pinoy sa usa ka world title fight, apan giklaro ni Marcial nga sama sa kadaghanan, naghinamhinam sab siyang masayod sa resulta ning maong panagsangka.

Ning sangkaa, depensaan ni Donaire ang iyang World Boxing Council (WBC) bantamweight title batok kang Gaballo.

Gipasabot ni Marcial nga parehong lehitimong knockout punchers sila si Donaire ug Gaballo hinungdan nga maglisod siya pagtudlo kon unsa'y nakabintaha, ang kasinatian ni Donaire o ang kabatan-on ni Gaballo.

Mas batan-on man tuod si Gaballo apan gihatagan og gibug-aton ni Marcial ang taas nga kasinatian ni Donaire sa dagkong mga away hinungdan nga nakutaw og samot ang iyang kalibog.

Si Gaballo nag-edad pa lang og 25 ug aduna kini makapaukyab nga 24-0, 20KOs nga rekord samtang si Donaire, 39, adunay 41-6, 27KOs nga baraha.

This posting includes an audio/video/photo media file: Download Now

Blazers misaulog sa Bonifacio Day

Posted: 30 Nov 2021 05:09 AM PST

NAKIDUYOG ang Portland TrailBlazers sa Pilipinas sa pagsaulog sa ika-158 ka adlaw nga natawhan sa national hero sa nasod nga si Andres Bonifacio kagahapon, Nobiyembre 30, 2021.

Sa social media sa usa sa dekalidad nga mga puwersa sa National Basketball Association (NBA), gi-post sa Blazers ang gi-edit nga hulagway sa ilang franchise player nga si Damian Lillard nga nagsul-ob sa trademark ni Bonifacio nga puwa nga handkerchief.

Sa ilang Facebook account, ang Blazers nagpakita sab og updates sa ilang duwa kagahapon batok sa Utah Jazz diin sakop ang Filipino-American star Jordan Clarkson. Napilde ang Blazers ning sangkaa.

Si Bonifacio maoy founder sa Katipunan ug nabantog nga "Father of the Philippine Revolution."

This posting includes an audio/video/photo media file: Download Now

Casimero dili magproblema pagkuha sa iyang timbang

Posted: 30 Nov 2021 05:07 AM PST

GILAUMANG dili magproblema sa timbang si World Boxing Organization (WBO) bantamweight champion Filipino Johnriel Casimero sa iyang pagdepensa sa korona batok kang British Paul Butler karong Disyembre 11, 2021 sa Coca-Cola Arena sa Dubai.

Niining puntoha, nilapas na lang og walo ka pounds si Casimero sa 118-pound weight limit.

Sa iyang vlog niadtong Nobiyembre 27, 2021, nipakita sa iyang mas maskuladong lawas.

"There's no more fat," batbat pa ni Casimero samtang nagkaon ug naggunit sa iyang tiyan.

Kini nga away maoy gilauman ni Casimero nga mag-abli sa pultahan sa iyang gipangandoy nga tahas batok kang Japan boxing superstar Naoya "Monster" Inoue.

Si Casimero adunay 31-4, 21KOs nga rekord samtang si Butler naghupot og 33-2, 15KOs nga baraha.

This posting includes an audio/video/photo media file: Download Now

Bolts nakakuha og mangtas sa ilugay'g rebound

Posted: 30 Nov 2021 05:05 AM PST

NAWALA man tuod sa kiliran sa Meralco Bolts ang scoring machine import nga Shabazz Muhammad apan nakabaton sila og mangtas sa rebound nga si Tony Bishop nga sa ilang tan-aw, makatabang og dako sa ilang kampanya sa umaabot nga Philippine Basketball Association (PBA) Governor's Cup.

Si Muhammad, kinsa kanhi UCLA standout ug lima ka tuig nga NBA veteran, nakatakda na untang molarga paingon sa Manila sa miaging semana human kini nakadawat og visa gikan sa Philippine consulate sa Los Angeles.

Apan sa kalit lang, nausab ang hunahuna niini ug wala kini midayon sa paglarga gumikan sa personal nga rason.

Gumikan niini, nagdalidali pagpangita og ikahulip ang Bolts ug nabira nila si Bishop, kinsa usa ka American-Panamanian nga beterano nang nagduwa sa nagkadaiyang mga suok sa kalibutan.

Naa na sab gyud hinuon sa radar sa Bolts si Bishop apan wala dayon kini nila nakuha gumikan kay nagduwa pa kini sa Puerto Rico dihang ilaha unta kining gitanyagan.

"He's one of the guys we're looking up before we signed Shabazz Muhammad," matod ni Meralco coach Norman Black sa programang The Game nga napatik sa www.pba.ph.

"Luckily for us, Tony had just finished his stint in Puerto Rico about a week ago, and he was willing to come over and play for us."

Lahi man tuod ang duwa ni Bishop kumpara kang Muhammad apan hugot ang pagtuo ni Black, matapakan niini ang dakong ilang dakong haw-ang sa ilawom nga bahin.

Ang Governor's Cup sugdan inig Disyembre 8, 2021 sa Ynares Sports Arena sa Pasig City.

This posting includes an audio/video/photo media file: Download Now

83, 460 nabakunahan sa 9 ka LGU sa Metro Cebu sa unang adlaw

Posted: 30 Nov 2021 04:49 AM PST

Siyam ka local government units sa Metro Cebu nakabakuna og kinatibuk-ang 83,460 ka mga indibidwal atol sa unang adlaw sa tulo ka adlaw nga National Covid-19 Vaccination Days sa Lunes, Nobyembre 29, 2021, ang Visayas Vaccination Operations Center (VVOC) mitaho.

Ang tigpamaba sa VVOC nga si Dr. Mary Jean Loreche niingon nga 95 porsyento kini sa 87,819 nga target.

Kini nga mga LGU mao ang highly urbanized nga mga dakbayan sa Sugbo, Mandaue ug Lapu-Lapu; component cities sa Talisay ug Naga; ug mga lungsod sa Minglanilla, Consolacion, Cordova ug Liloan.

Sa siyam ka mga LGU, ang dakbayan sa Lapu-Lapu maoy nakakuha sa labing taas nga turnout human nakab-ot ang 138 porsiyento, gisundan sa Mandaue City sa 121 porsiyento ug Consolacion sa 104 porsiyento.

Nakab-ot sa Cebu City ang 97 percent, Minglanilla sa 90 percent, Talisay City sa 83 percent, Naga City sa 72 percent, Cordova sa 66 percent ug Liloan sa 50 percent.

Gikan sa inisyal nga target nga kapin sa 1 milyon, gipaubos sa nasudnong kagamhanan ang target sa Central Visayas alang sa tulo ka adlaw nga vaccination drive ngadto sa 715,473 tungod sa mga isyu sa suplay sa mga syringes.

Ang rehiyon nakabakuna og 190,250 ka indibidwal, 163,438 sa unang doses ug 25,510 sa ikaduhang dose ug ang nahibilin alang sa booster doses base sa Vaccine Operation Reporting System sa unang adlaw.

Si Loreche niingon nga ang unang adlaw sa pagbakuna sa rehiyon maayo kaayo ug ang VVOC masaligon nga maigo nila ang target.

Sa ikaduhang adlaw sa pagpamakuna, ang Cebu City nakatala og 29, 411.

Sa unang adlaw, nakabakuna ang Siyudad og 27, 515.

This posting includes an audio/video/photo media file: Download Now

Bong Go miatras sa presidential race; pamilya, kahiusahan gitumbok niyang mga rason

Posted: 29 Nov 2021 08:52 PM PST

MIPAHIBAWO na si Senador Christopher Lawrence "Bong" Go sa iyang pag-atras gikan sa presidential race sa Martes sa buntag, Nobiyembre 30, 2021 atol sa iyang pagtambong sa wreath laying ceremony sa Pinaglabanan Shrine sa San Juan alang sa 158th birth anniversary sa nasudnong bayani Andres Bonifacio.

Sa iyang opisyal nga pamahayag, si Go niingon nga di siya gusto nga mapiit si Presidente Rodrigo Duterte sa kampanya tungod sa iyang edad ug supak usab ang iyang pamilya sa pagdagan sa pagka presidente.

Matod sa senador nga wa siyay ambisyon nga mag presidente ug iya usab nga naamguhan nga di pa niya panahon karon.

Alang usab kini sa kahiusahan sa ilang supporters nga nabahin kon kinsa ang ilang suportahan.

Di pa usab siya andam sa hugaw ug init nga kampanya sa pulitika kay di siya anak og dako ug sikat nga pamilya sa nasod kay usa lang siya ka "yanong probinsyano."

"Ayaw ko rin pong lalong maipit si Pangulong Duterte. Higit pa po sa tatay ang pagmamahal ko sa kanya. Matanda na po siya at marami na siyang naibigay sa bayan kung kaya't ayaw ko nang dagdagan pa ang kanyang problema," matod ni Go sa iyang opisyal nga pamahayag nga iyang gibasa atubangan sa mga tigbalita.

Matod sa senador nga sa nakalabay nga mga adlaw, ang naa sa iyang kasingkasing ug huna-huna nasukwahi sa iyang lihok.

"In the past few days po, I realized that my heart and mind are contradicting my own actions. Talagang nagreresist po ang aking katawan, puso at isipan. Tao lang po ako na nasasaktan at napapagod din," dugang ni Go.

Iyang gisaad nga magpadayon siya sa iyang ligdong nga pagserbisyo sa katawhan kay mao man kini ang iyang bugtong pangandoy.

"Alam niyo, alam ng lahat yung aking hangaring makapagserbisyo sa ating kapwa Pilipino. Hindi na po kailangang itanong yan dahil talagang gusto ko, gusto kong makapagserbisyo sa kapwa Pilipino. Gusto kong tumulong na maging maginhawa po ang buhay ng bawat Pilipino at walang magutom," matod sa senador.

Si Go unang ni-file pagka bise presidente, apan niatras ug niduso sa iyang kandidatura sa pagka presidente pipila ka adla sa wa pa mopahibawo si presidential daughter Davao City Mayor Sara Duterte-Carpio nga mag bise presidente pares kang kanhi senador Bongbong Marcos.

Ang desisyon ni Duterte-Carpio gikahimangod kaayo sa Presidente kay sa tanang presidential surveys, nag-una man ang iyang anak samtang layo kaayo si Marcos.

Tungod niini, nabahin ang supporters sa mga Duterte kay dunay mikuyog kang Duterte-Carpio sa pagsuporta kang Marcos samtang ang uban kang Go kay maoy kagustohan sa Presidente.

"I am willing to make the supreme sacrifice for the good of our country, and for the sake of unity among our supporters and leaders," matod sa senador. (REV)

This posting includes an audio/video/photo media file: Download Now

at

No comments:

Post a Comment

Subscribe to: Post Comments (Atom)

End of Summer Sale ☀️😎

20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...

  • End of Summer Sale ☀️😎
    20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...
  • Breaking: Aaron Rodgers teases Jets return this season: 'Anything is possible'
    New York Jets quarterback Aaron Rodgers suffered a torn Achilles tendon in Monday's 22-16 overtime win vs. the Buffalo Bills. If you a...
  • Last Chance - Win over $1,800 in BLEUSALT
    Elevate your Wardrobe. Offer ends Midnight. ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏ ...