Sunday, March 13, 2022

https://www.sunstar.com.ph/

https://www.sunstar.com.ph/

8 ka graduwado sa mga tunghaan sa Sugbo mi-top sa teacher’s board

Posted: 13 Mar 2022 05:13 AM PDT

WALO ka mga graduwado sa mga kolehiyo ug unibersidad sa Sugbo ang nasulod sa top 10 sa Enero 2022 Licensure Examination for Teachers (LET), sumala sa Professional Regulations Commission (PRC) niadtong Biyernes, Marso 11, 2022.Sa elementary level, si Jekyll Bumarlong Almaden sa Cebu Normal University (CNU) naa sa fourth place uban sa rating nga 92 percent.Sila si Lilian Cee Ogdoc Baylon sa Cebu Technological University (CTU) ug Jana Belle Lim Rojas sa University of San Carlos (USC) parehong naa sa seventh place uban sa rating nga 91.40 percent.Si Rona Pamela Alburo Cotejo sa Bogo City-based Cebu Roosevelt Memorial Colleges naa sa eight place uban sa rating nga 91.20 percent.Samtang si Christianie Kate Verame del Rosario sa Cebu Institute of Technology University (CIT-U) naa sa 10th place uban sa rating nga 90.80 percent.Sa secondary level, si Inah Angelique Cala Lauron sa CIT-U naa sa fourth place uban sa rating nga 92 percent. Si Emegdio Malinao Cejano III sa CNU naa sa sixth place uban sa rating nga 91.60 percent.Si Sheena Castañares Suico sa University of the Philippines (UP) Cebu campus naa sa seventh place uban sa rating nga 91.40 percent samtang si Edgardo Pedrano Soqueño Jr. sa CNU naa sa eight place uban sa rating nga 91.20 percent.Gawas sa pagkuha og tulo ka topnotchers, ang CNU maoy nag-una ning tuiga nga daghang nipasar sa LET uban sa 80-percent passing percentage.Ang CNU dunay passing percentage nga 88.73 percent.Ang tinuig nga LET ipahigayon matag Enero 30, 2022 sa 29 ka testing centers sa tibuok nasod.Sa 15,696 ka examinees sa elementary level, ang nipasar nikabata og 8,737 o 55.66 percent.Samtang ang 12,074 gikan sa 22,454 examinees sa secondary level o 53.77 percent passed.

Rambol gawas sa bar

Posted: 13 Mar 2022 05:12 AM PDT

GRUPO sa mga batan-on ang nagrambol gawas sa usa ka imnanan sa Salinas Drive sa Barangay Lahug, dakbayan sa Sugbo sa Dominggo sa kaadlawon, Marso 13, 2022.Sa gi-post sa social media ni Yanne Abastas, makita ang panag-abot sa duha ka grupo gawas sa bar apan wala pa matino kon unsay giawayan sa mga batan-on.Naabot pa sa tunga sa karsada ang away nga bisan giunsa sa pag-uwang sa mga kauban lakip na sa security sa G-Spot Bar apan padayon kini sa pagsinukliay sa kumo.Madungog sa pamahayag sa nagkuha sa video nga bag-o pa nangabot ang pikas grupo apan kalit lang kini nga nagkagubot.Ang hepe sa Mabolo Police Station, Police Major Francis Renz Talosig, nagkanayon nga human nila madawat ang impormasyon, dali nila kini nga girespondihan.Apan sa pag-abot sa iyang personnel sa dapit, wala na ang grupo sa mga batan-on ug wala sad, matod pa, kini nagpa-blotter human nagkauliay sa maayong kabubut-on.Kini na ang ikaduhang karambola nga nahitabo sa Sugbo sa dihang gilibkas na ang ordinansa sa curfew diin ang una nahitabo sa siyudad sa Talisay.Bisan pa man niini nga nahilot ra ag duha ka grupo, matod ni Talosig, magpadayon sila sa ilang imbestigasyon.Ang resulta sa ilang himuon nga imbestigasyon ilang iduso ngadto sa Business Permit Licensing Office sa kagamhanan sa siyudad sa Sugbo."Pero mo-conduct gihapon mi og investigation, naay lapses ang security sa G-Spot Bar and submit it to BPLO for their disposition," matod ni Talosig.Si Police Lieutenant Colonel Wilbert Parilla, deputy city director for operation sa Cebu City Police Office (CCPO), nagkanayon nga ilang tukion sa meeting unya sa Emergency Operations Center (EOC) ang hitabo.Una nang misugyot ang CCPO ngadto sa Cebu City Government nga sa pagluag na sa alert level sa siyudad, ipadayon lang ang pagpatuman sa curfew sanglit dako kinig ikatabang sa pagkunhod sa kriminalidad sa dakbayan."Ako na gipabuhatan og special report nya attend ko next meeting sa EOC regarding sa effect ani sa curfew," sigun ni Parilla.Sukad nga gipatuman ang curfew sa tibuok siyudad sa Sugbo atol sa pagsulbong sa kaso sa Covid-19, walay gubot nga nahitabo sa mga imnanan.Gawas niini, gimandoan usab ang police station commanders nga matag gabii ilabi na sa weekend nga mag-roving sa mga establisemento nga namaligya og mga ilimnong makahubog.

Concert Queen of Cebu mibalik, music video gilusad

Posted: 13 Mar 2022 05:07 AM PDT

HUMAN sa 15 ka tuig nga nawala sa local entertainment industry, si Maybelle Padillo, giilang Concert Queen of Cebu sa 90's, nibalik na sa Sugbo 'for good' ug buot moisa pag-usab sa iyang korona nga walay bisan usa nga nakasakmit hangtod karon.Kabahin sa iyang pagpaila og balik sa industriya sa kalingawan sa Sugbo mao ang paglusad sa iyang orihinal nga kanta ug music video niini niadtong Sabado, Marso 12, sa Inconique Mall sa dalan Colon, Dakbayan sa Sugbo."Lahi gyud. Love nako ang Bisaya nga musika. Bisan successful nako sa gawas, usa sa akong pag-uli mao ang pagtabang sa mga local artists ug pagpaangat sa kantang Bisaya sa international level," matod ni Padillo, kinsa malampuson na usab nga negosyante sa Sugbo ug didto sa gawas sa nasod sama sa Hong Kong.Kini ang hinungdan nga ang music video ni Padillo nga nag-ulohan og 'Good Vibes' nga dunay parte nga Bisaya. Usa kini ka upbeat nga kanta nga haom sa bag-ong henerasyon.Ang kanta nagkuha og inspirasyon sa mga grabeng kasinatian sa katawhan sama sa pandemic ug bagyong Odette apan gipatunhay ang positibong bahin niini ug pagkuha og leksiyon aron mas molambo."Gusto lang nako nga good vibes gihapon. Kini nga man ingon ani (katalagman) temporaryo lang. Molabay ra ni..," dugang ni Padillo nga inspirasyon sa kanta.Ang music producer sa Good Vibes mao si LG Fuentes.Si Gilbert Gamollo maoy music video director ug choreographer ug lead dancer si Monica Vercide.Silang tulo ug ang ubang kabahin sa production team pulos nagkanayon nga pulos good vibes ang katrabaho si Padillo.Ang Good Vibes naa na sa Spotify, Music ug Facebook.Atangi usab ang mga umaabot nga concert ni Padillo sa Sugbo. / RRM

Editoryal: Fuel subsidy way bili?

Posted: 13 Mar 2022 05:04 AM PDT

ANG pundo sa fuel subsidy alang sa mga drayber sa public utility gi-download na sa Department of Budget and Management (DBM) ngadto sa Department of Transportation (DOTr) ug ang iyang ubos nga ahensiya nga Land Transportation Franchising and Regulatory Board (LTFRB) maoy moapud-apod niini.Si DBM Undersecretary Rolando Toledo nagkanayon nga 377,443 ka benepisaryo, lakip sa kuwalipikadong drayber sa mini buses, shuttle services, taxis, tricycles, ug full-time ride-hailing ug delivery services, makadawat og P6,500 ang matag usa gikan sa programa.Si LTFRB Executive Director Tina Cassion nagkanayon nga ang pag-apud-apod sa salapi gikatakda ning semanaha.Apan daghang pangutana bahin sa maong hinabang. Una, moabot kaha kini sa insaktong mga kamot? Magasto kaha kini subay sa iyang tumong? Igo ba kaha ang maong kantidad sa pagpaalibyo sa kinabuhi sa mga drayber?Ang umento sa mga produkto sa petrolyo nga gipatuman sa mga kompaniya sa nasod niadtong Martes, Marso 8, tungod sa pagmahal sa kalibotanong presyo sa lana tungod sa kasamok tali sa Ukraine ug Russia. Ang presyo sa diesel giumentohan og 5.85 per liter, P3.60 per liter sa gasolina ug P4.10 per liter sa kerosene nga labing dako nga pagtaas sa pump fuel ning tuiga.Ang National Government nigahin og P2.5 billion nga balor sa "Pantawid Pasada" Program alang sa public utility vehicles ubos sa iyang 2021 national budget. Sa kadako sa gahin sa fuel subsidy, usik kaayo kon ang mahatag nga alibyo sa sektor sa transportasyon labina kon molungtad og dugay ang kataas sa presyo sa lana.Mas maayong mapatuman ang undanong lakang sama sa sugyot sa ubang grupo ug mga magbabalaod bahin sa temporaryong pagkunhod sa buhis sa pag-import sa lana.Apan ang malangkubon ug malahutayon nga solusyon mao ang pagwagtang sa Oil Deregulation Law. Kinahanglan nga i-regulate aron dili magbuot sa presyo ang cartel sa lana sa nasod.Ang fuel subsidy mahulog nga walay bili labina kon mogawas ang daghang reklamo.

Barrita: Online sabong magpadayon

Posted: 13 Mar 2022 05:01 AM PDT

ANG abong, tari, buwang o tigbakay nahimo nang tipik ug kabahin sa kulturang Pilipinhon. Dunay mga buwangan. Sa matag pista sa bisan mga gagmay nga sitio ug purok, dunay tigbakay nga illegal ug sagad rondahon sa kapulisan. Dinaganay dayon. Ang sugarol nga masigmit, magtingkagol sa prisohan.Apan nakahibawo ba mo nga ang founder sa Amerika, si George Washington, nagpabuhi og mga manok igtatari sa iyang mga ulipon? Sa dihang nagpili ang Kongreso sa Amerika kon unsay ilang himuong nasudnong langgam, duhay ilang gipilian – ang agila ug ang manok igtatari. Nidaog ang agila apan usa ka boto ray labaw.Labing minos duha ka mga presidente sa Estados Unidos, si Andrew Jackson ug si Abraham Lincoln, mga sabungero. Si Lincoln naila nga "Honest Abe" tungod sa iyang kamatinud-anon isip referee o kuyme sa buwang.Ginaingon nga matinud-anon ang tanang tawo sud sa buwangan. Ang mga sugarol magtinutokay lang. Way kontrata. Kon magdaug na, ipanglabay lang ang kuwarta sa ruydahan. Ang mopunit kadto rang nakadaog. Kon manago ka, di ka mobayad kon mapildi ka, di ka makagawas nga buhi o labing minos maputos kas bun-og.Alegre kaayo ang buwang. Hilabihan kasaba ug kagahob ang buwangan, bisan ang tigbakayan, sa panahon nga magmasiyar na ang mga masyador. Samot na kon maglinabukay na ang mga manok. Unya kon duna nay modaog, mokalit lang og kahilom. Dunay magngisi, dunay huyhoy ang abaga.Sa panahon sa pandemic, gipahunong ang operasyon sa mga buwangan. Apan ang mga sugarol mangita man gyud og paagi mao nga mitumaw ang online sabong. Ang mga sabungero adto na lang sa mga online sabong centers mopusta. Mahimo gani sa smartphone. Pusta sa inilog ug sa biya. Sa Tinagalog pa, meron ug wala. Bisan usa ka gatos, makasugal ka.Si Senador Ronald "Bato" dela Rosa, usa ka kaalyado ni Presidente Rodrigo Duterte, nangamahan sa Senate Resolution No. 996 nga nag-awhag sa pangulo nga suspensuhon ang operasyon sa online sabong sa tibuok nasod tungod sa misteryusong pagkahanaw sa labing minos 34 ka mga sabungero.Apan ang Malacañang nagdumili sa pagsuspenso sa online gambling permits. Si Executive Secretary Salvador Medialdea mikonpirmar niini. Apan ang kapulisan ug ang Philippine Amusement Gaming Corporation (Pagcor) nga maoy nagluwat sa permits, nagpadayon sa pag-imbestigar niadtong nakalapas sa e-sabong agreements.Gimandoan usab ang Philippine National Police ug ang National Bureau of Investigation sa pag-imbestigar sa pagkahanaw sa labing minos 34 ka e-sabong players. Si Pagcor chairperson Andrea Domingo niingon nga makaapekto sa ekonomiya ang pagsuspenso sa online sabong tungod kay mikita kini og labing minos P640 milyones matag buwan sukad sa buwan sa Enero ning tuiga.

Talk to Papa Joe: Wa angkona

Posted: 13 Mar 2022 05:00 AM PDT

Dear Papa Joe,Tawaga lang ko og Anton. Ang akong suliran kay kabahin sa akong kaagi.Sa una sa ulitawo pa ko, nakapaanak ko og babaye nga maingon ta nga iresponsable sad kay human siya nanganak, gihatag ra sad sa amoa kay di sad siya andam mogalam og bata.Nahadlok siya kay duna siyay karelasyon sa gawas nga wa siya masayod. Karon nagtubo ang batang lalaki sa amoa pero wa siya masayod nga anak nako, kon di anak siya sa akong igsuon nga minyo na nga naa sa siyudad gatrabaho ug gibilin lang siya sa among probinsya.Karon naminyo na ko ug may anak na sad. Pero nakonsensya man ko ron nga ang akong anak wa nako ilha. Nahadlok ko sa dangatan if motug-an mi sa tinuod. Tambagi ko.ANTONAnton,May giingon nga way aso nga makumkum. Apan kon maayo mo motago, matagoan gyud na ninyo pero di mo pakatulgon sa konsensya ana, labi na ikaw.Kon motug-an mo I am sure mogaan na imong konsensya ug mapatas sab imong pagtratar sa duha ka mga bata. Makasabot ra na imong asawa kadugayan apan sa karon makalitan gyud na. Ampo lang gyud sa Ginoo nga lamdagan mo tanan nga inig decide ninyo, magsinabtanay mo o pabilin mong maglilong.PAPA JOE

Top mechanical engineer tungod sa tabang sa 4Ps

Posted: 13 Mar 2022 04:58 AM PDT

USA sa ni-top sa February 2022 Mechanical Engineer Licensure Examination, Mark Anthony Salazar Arcayan, niila sa tabang sa National Government nga Pantawid Pamilyang Pilipino Program (4Ps) tungod sa personal ug scholastic nga kalamposan, sumala sa Department of Social Welfare and Development (DSWD) - Eastern Visayas niadtong Huwebes, Marso 10."Malaking tulong ang 4Ps sa aming pamilya. Dahil sa suporta ng programa, kami ay naka-survive," matod ni Arcayan, usa ka residente sa Merida, Leyte.Si Arcayan nagkanayon nga ang 4Ps nitabang kaniya sa pagkuha og edukasyon, nutrition, ug panglawas."He is the third among seven children of a 4Ps household who recently graduated from the program after remarkably reaching the self-sufficient level of well being," pamahayag sa DSWD Eastern Visayas.Si 4Ps Municipal Link (ML) Aileen Dellosa sa DSWD Eastern Visayas, nagkanayon nga "the family started with almost nothing.""But all its members share very good relationship among each other. The parents work hard and the children study diligently," ang mga opisyal sa departamento nipadayag sa pahalipay kang Arcayan sa iyang nakab-ot nga kalamposan.Ang amahan ni Arcayan, Rogelio, nagtrabaho isip barangay secretary, samtang ang iyang inahan, Amelia, usa ka parent leader ug boluntaryo sa simbahan.Si Arcayan nigraduwar nga class valedictorian ug magna cum laude sa Visayas State University (VSU) sa dakbayan sa Baybay sa kurso nga Bachelor of Science in Mechanical Engineering.Si Arcayan usa usab ka scholar sa Department of Science and Technology (DOST).Samtang, ang DSWD Eastern Visayas niila sa guiding principles ni Arcayan hinungdan sa iyang kalamposan sa kinabuhi."First is consistency. Everyone must develop good habits because excellence is indeed a habit or something one does consistently...Even if an individual is intelligent, if one does not constantly study or practice, there will be a chance of disremembering or overlooking. Moreover, a person must be consistent and determined despite the many challenges and negativities around," dugang pamahayag sa DSWD Eastern Visayas."Second, one must strive to maintain balance in all aspects of existence including, family, school, work, physical, spiritual, social and even love life. Third is prayer. We must have a constant relationship with God. We pray always even if we are not in need or in pain," dugang sa DSWD Eastern Visayas.(SunStar Philippines)

‘Ms. Feb-Ibig’ sa Home for Girls

Posted: 13 Mar 2022 04:56 AM PDT

LIMA ka mga residente sa Home for Girls (HFG) ang nag-ilog sa korona isip 'Ms. Feb-Ibig 2022' nga panapos nga kalihokan sa buwan sa Pebrero sa center.Ang lima ka mga babaye nagpakita sa ilang kahanas sa nagkalainlaing hugna sa indigay sa kaanyag ug talento nga usa ka tinuig nga kalihokan sa sentro.Atol sa opening production number, ang mga babaye nagsul-ob og uniform attire ug nipailaila sa ilang kaugalingon sa mga nanambong sa kalihokan.Nipakita usab sila sa ilang kahanas sa pagsayaw atol sa talent segment. Sa casual wear segment, gipakita nila ang sinina nga ginama sa recyclable materials uban sa pag-abag sa ubang babaye sa HFG.Sa evening gown competition, ang mga kandidata gihukman base sa ilang poise, personal style, ug stage presence.Sa question and answer portion, nikuha sila og numero nga dunay katugbang nga pangutana.Ang mga kandidata nitubag nga puno sa mensahe gikan sa kasingkasing ug ang 14-anyos nga si Isabela (dili tinuod ngan) maoy napili nga labing maayo.Si Isabela, taga Barangay Labangon, dakbayan sa Sugbo, maoy nidaug sa indigay.Si Miss Universe Philippines Beatrice Luigi Gomez nisuporta sa kalihokan sa sentro ug nihatag og mensahe pinaagi sa video."Sa upat ka bulan nako nga pagpuyo diri sa Home for Girls, daghan ko nakat-onan sama sa pagkaresponsable ug disiplina sa kaugalingon," matod ni Isabela. (PR)

Olympian emosyonal tungod sa Russia-Ukraine conflict

Posted: 13 Mar 2022 04:54 AM PDT

ANG Olympian high jumper Yuliya Levchenko mipadayag sa iyang kasagmuyo sa nahitabo nga conflict karon sa Russia ug ang iyang nasod nga Ukraine.Sa iyang Instagram account nga adunay 388,000 followers, gipaambit sa 2017 World Championship silver medalist ang iyahang gibati karon sa nahitabo sa ilang lugar.Matod sa iyang post nga gusto lang niya magpuyo nga malinawon sa Ukraine nga walay Russian soldiers ug si President Vladimir Putin."I have no words to say, It's pain and hell. Thank you to the whole world, thank you to those who are not silent," tipik sa post ni Levchenko nga adunay dul-an sa 24,000 nga likes.Anaa na sa ika-18 nga adlaw ang Russia-Ukraine conflict human mi-declare og gubat si Putin batok Ukraine niadtong Pebrero 24.Usa si Levchencko sa mga atleta nga aktibong mipadayag sa ilang emosyon pinaagi sa social media.Ang 24-anyos nga atleta mao ang European U23 champion ug European Athletics Rising Star of the Year niadtong tuig 2017. Misalmot pud siya sa 2016 Rio Olympics ug sa Tokyo Olympics.

Netizens nalipay sa pagbangon ni West

Posted: 13 Mar 2022 04:53 AM PDT

GRABE nga drug addiction ang giatubang ni kanhi professional basketball player Delonte West, gani aduna siyay mga hulagaway sauna nga "sabog" siya nga mikatap sa social media.Nausab na karon si West human sa mga tabang nga gipaabot kaniya ug nakompleto ang mga rehabilitation nga angay agian alang sa iyang mental ug physical health recovery.Ang kanhi NBA player mibangon og naghinay-hinay pagbalik sa iyang kinabuhi gamit ang basketball.Mi-try out si West sa Big 3 League kagahapon didto sa Estados Unidos. Ang maong liga adunay 12 ka teams ug rosters nga naglakip sa kahni NBA players ug sikat nga international players.Human sa iyang tryout kagahapon, mi-trending dayon sa West sa sports news."Good luck Mr. West. Inspirational life-changing sequence and I hope it remains for the better," suwat ni Twitter user @RawrEWreckz."Delonte West has battled with mental illness his entire life. Throughout his journey, he's experienced homelessness, addiction, and incarceration. Now in 2022, he's clean and competing for a spot in the BIG3. Salute to Delonte. Wishing him the best of luck!," matod pa @DaKidGowie.Ang 38-anyos nga si West nasulod sa NBA tuig 2004 isip 24th overall pick sa Boston Celtics. Sa iyang player career tuig 2004-2015 nakaduwa siya sa Celtics, Seattle Supersonics, Cleveland Cavaliers ug Dallas Mavericks.

Obiena dili makaduwa sa World Athletic Championship

Posted: 13 Mar 2022 04:51 AM PDT

TUNGOD wa mohatag og endorsement ang Philippine Athletics Track and Field Association (Patafa), di makaduwa ang world-ranked pole vaulter EJ Obiena sa 2022 World Athletic Indoor Championship sa Belgrade, Serbia karong Marso 18 ngadto sa 20.Ang Pinoy pole vaulter mipahibawo niini pinaagi sa iyang opisyal nga social media page.Naka-qualify unta si Obiena alang sa world-class nga kompetisyon sa pagkuha sa 5.81 meters, apan nagkinahanglan siya og endorsement gikan sa mother federation nga mao ang Patafa.Adunay panagbikil ang Olympian ug ang national sports association (NSA) nga Patafa."I have not been endorsed for the Worlds. Registration is now closed. I won't be attending. I am the only top-ranked vaulter not participating," padayag sa 26-anyos nga si Obiena."I shed a tear now with a heavy heart, but not just for myself. I shed a tear for my country. We had a chance to show the world our greatness. And we lost it," dugang niini.Daghang netizen ang miingon nga gipolitika ang national record holder."Please follow your passion. Don't let the country's systems ruin you," suwat ni netizen Abellana Mark.Matod pa ni Rhyan Kim usa kini ka makaguol nga realidad sa nasod nga ang paugnat sa kusog masagolan og politika ug personal interest.Sigon pa ni netizen Faith Icao nga heart-breaking ang maong nahitabo kang Obiena.Daghan ang midaseg ug mipadayag og mensahe kang Obiena sa social media. Ang maong post aduna nay 49,000 likes, 2,300 comments ug 14,000 shares kagahapon.

Aboitiz Construction mipaila sa bag-ong logo

Posted: 13 Mar 2022 04:47 AM PDT

ANG Aboitiz Construction, Inc. (Aboitiz Construction), ang construction arm sa Aboitiz Group, nipaila sa ilang bag-ong brand identity nga nagkuha og inspirasyon sa ilang misyon alang sa kalamboan sa ekonomiya ug sa mga komunidad pinaagi sa paghatag og panginabuhian sa mga Filipino nga nag-unang elemento sa bag-ong logo."Our rebranding signifies our bold move to establish a strong national presence in the construction industry and solidify our trademark as the official construction arm of the Aboitiz Group. We aim to be regarded as a top-of-mind and reliable contractor that is committed to helping other businesses thrive, generating job opportunities, and building a better Philippines," matod ni Aboitiz Construction Chairman and President Anton Mari G. Perdices.Ang kompaniya nagsugod sa Sugbo niadtong 1975 ug nipalapad sa iyang operasyon ngadto sa tibuok nasod pinaagi sa nagkalainlaing proyekto.Ning tuiga, motutok sa mga proyekto nga parehong heavy ug light industries, infrastructure, maintenance ug manpower services.Sa pagtapos ning tuiga, gikatakda nga makompleto ang labing dakong proyekto sa kasaysayan sa kompaniya nga mao ang usa ka 26,000 square meter warehouse ug office buildings alang sa logistics giant sa Parañaque City.Ang bag-ong identity nagtimaan sa ika-46 ka tuig sa Aboitiz Construction sa industriya ug nagsamin sa iyang panglantaw sa misyon sa pagtukod sa world-class structures uban sa kalidad ug kaluwasan.Naila nga Cebu-based company, ang Aboitiz Construction nipalapad sa nasod uban sa mas dako ug nagkalainlaing proyekto."Our refocused portfolio is geared towards promoting our competent capabilities in various projects where we can take part. Furthermore, our historical and iconic achievements can attest to our ability to build and enable more businesses situated in various locations in the country to thrive and succeed," matod ni Perdices.Sa Luzon, ang mga nag-unang proyekto nga gipaabot nga makompleto mao ang pagtukod sa 53 ka transmission poles, dugang sa bag-ong nahuman nga design ug pagtukod sa 69kV ka overhead transmission lines alang sa LIMA Enerzone, ug 25 ka poles alang sa Malvar Enerzone Corporation sa Batangas.Ang Aboitiz Construction nag-target sa pagkompleto sa pagpalapad sa petrochemical complex sa Batangas City ning tuiga.Ang Aboitiz Construction malampuson nga nitapos sa pagtukod sa CD Processing Ltd.'s copper ore sorting ug processing plant sa Toledo City, Cebu.Sa Mindanao, ang design ug construction sa Berth 4 alang sa Davao International Container Terminal sa Davao del Norte laing kalamposan nga motabang sa logistics sa agricultural ug commercial products sa lokal ug gikan sa gawas.Sa Surigao del Norte, ang Aboitiz Construction nagtrabaho sa pagkompleto sa three-year maintenance services alang sa usa ka hydrometallurgical processing plant.Komitado sa pagtabang sa mga lokal nga komunidad, ang Aboitiz Construction dunay 1,730 ka mga kawani sa tibuok nasod sa iyang workforce sa miaging tuig.Sa unang quarter ning tuiga, ang Aboitiz Construction motrabaho sa 57 ka hectares nga luna sa Lima Technology Center sa Batangas nga gipaabot nga mopatuyok sa ekonomiya sa Luzon South.Uban sa bag-ong brand, tukma kini samtang ang Aboitiz Construction maisugon nga nagkab-ot sa tumoy sa bag-ong kalamposan samtang makanunayon sa iyang nabaid sa panahon nga corporate values sa responsibility, integrity, innovation, teamwork, ug execution excellence. (PR)

Konsehal Garganera: Walay minimum nga gidaghanon sa basura nga gitakda sa JVA

Posted: 13 Mar 2022 04:39 AM PDT

DI tinuod nga gikinahanglan sa Siyudad sa Sugbo nga molabay kada adlaw og 800 tonelada nga basura kon matukod na unya ang waste-to-energy facility mga tulo ngadto sa upat ka tuig gikan karon.Si Cebu City Councilor Joel Garganera, chairman sa committee on enviroment sa Konseho, niingon nga wa kini malatid sa kontrata nga ilang giaprobahan."If you read the contract, it does not state that we are required to produce 800 tons of garbage, the plant is capable of processing a maximum of 800 tons per day but the city has no minimum requirement," matod ni Garganera sa Superbalita Cebu.Giluwatan kini ni Garganera agig tubag sa usa ka environmentalists nga niingon nga ang Siyudad kinahanglan molabay og minimum nga 800 toneladang basura sa WTE facility sa New Sky Energy Philippines."Sayop na. Wa tay guaranteed volume. Ang kanang 800 tons that represents the maximum capacity of their waste energy, sa planta ba," dugang sa konsehal.Si Garganera usa sa walo ka mga konsehal nga ningpabor sa resolusyon nga naghatag og gahom ni Mayor Michael Rama sa pagsulod og joint venture agreement (JVA) tali sa New Sky Energy Philippines.Giklaro usab ni Garganera nga ang P1,000 nga tipping fee di mahal kay magsugod og bayad ang Siyudad unya pa man kon mag-operate ang power plant labing minos mga tulo ka tuig gikan karon.Nianang mga higayuna, segurado siyang mas mahal na ang tipping fee kon itandi sa P700 sa matag tonelada sa basura nga gilabay sa Siyudad sa landfill sa Brgy. Binaliw sa pagkakaron."What's to be emphasized is that we will only start paying this amount the moment we dispose our garbage in the WTE which is still in 3-4 years from now," dugang ni Garganera.Mosaka man tuod ang tipping fee, apan paglabay na usab sa laing tulo ka mga tuig sukad sa pagsugod sa pag-operate sa pasilidad.BENTAHA SA WTEMatod sa konsehal nga daghang mga bentaha nga gihatag ang tukuron nga pasilidad.Lahi sa landfill, dako og bentaha ang WTE kay mopaminos kini sa volume sa basura ngadto sa 90 porsyento ug mopaminos sa carbon emission og 90 porsyento, matod sa konsehal.Ang carbon dioxide emission numero unong pollutant sa kalibutan karon.Laing bentaha sa WTE kay di kini mogama og leachate kun duga nga maoy mahitabo sa landfill nga naghatag og kakuyaw kon motuhop kini sa yuta ug mamahimo na hinuong pollutant, labina kon dunay tinubdan sa tubig sa duol.Wa usay mamugna nga methane gas gikan sa mga basura. Ang methane gas mamugna sa paglabay sa daghang katuigan sa ilawom sa nagpatongpatong nga basura nga nakapakuyaw niini.Duna nay mga sunog nga nahitabo sa karaan nga landfill sa Siyudad tungod sa methane gas.Kon kuyaw pa ang WTE, matod ni Garganera, nganong daghan og samang mga pasilidad nga gipangtukod sa adunahang mga nasod, sama sa silingan sa Pilipinas nga Singapore ingon man Japan.Matod niya dunay mga upat ka WTE ang Singapore samtang 1,156 sa Japan."Are they trying to say nga kaning mga nasod nga top ten in wealth nga ang ilang mga executive are putting the health of their constituents in peril?," pangutana ni Garganera sa oposisyon ug mga environmentalist.Sa sayo pa, si Garganera niingon nga tungod sa teknolohiyang gigamit karon, minos kaayo og pollutant nga ibuga ang gigamit nga mga incinerator sa kalibutan hinungdan nga ang advanced nga mga nasod naggamit og WTE isip tinubdan sa supply sa kuryente ug paghipos sa ilang basura.Ang pasilidad nga tukoron mo-generate og 18 megawatts nga kuryente nga igo na kaayong ma supply ngadto sa 15,000 ka mga panimalay.KONSULTASYONDi tinuod ug nagmugna og sayop nga pagtuo.Mao kini ang gisulti ni Konsehal Raymond Alvin Garcia kalabot sa pamahayag sa environmental groups sa tukuron nga WTE facility sa siyudad nga giingong makadaut sa kalikupan ug gidali-dali ang kasabutan.Matod ni Garcia nga ilang nadawat ang unsolicited proposal nga giduso ngadto sa buhatan ni anhing mayor Edgardo Labella ug nipasa ngadto sa Join Venture Selection Commitee (JVSC) sa 2019.Si Garcia niingon nga sa wa pa gipadala ang proposed resolution sa City Council, ang JVSC nagpahigayon og daghang mga public hearing ug gani nagdapit sa multi sectoral group."This is not a public bidding process, this is a Swiss Challenge process," matod ni Garcia.Iya usab nga gisaway ang mga sakop sa environmental groups nga namasangil nga siya ug ang iyang kaubanang konsehal nanglaktaw.Si Garcia nipasabot nga basta maabot ang unsolicited proposal sa JVSC, tun-an kini ug tukion ang giduso nga kasabutan."How can you railroad it? The unsolicited proposal was submitted to the Office of the Mayor and to the JVSC in 2019, which was three years ago," matod ni Garcia.Gisusi usab sa JVSC ang pinansyal nga kapabilidad sa kompaniya ingon man ang teknolohiya nga gigamit kon nahasubay ba sa environmental law ug uban pang mga balaud.Si Garganera, sa sayo pa, niingon nga ang New Sky Energy nipailawom sa Environmental Technology Verification (ETV) sa Dept. of Science and Technology (DOST) niadtong 2019 ug nasuta nga nakatuman kini sa tanang mga balaud.

6 nasikop sa tigbakayan

Posted: 13 Mar 2022 04:38 AM PDT

UNOM ka sugarol ang nasikop sa tigbakayan sa Sitio Malubog, Brgy. Ipil, lungsod sa Carmen, alas 12:00 sa udto sa Dominggo, Marso 13.Ang dinakpan mao sila si Randell Abayon, 26, nagpuyo sa nahisgutang lugar; Fidelino Labador, 66, taga Brgy. Baring, Carmen; Junrell Olivar, 20; Agustin Davidon, Jr., 29; Rey Casas, 42, taga Brgy. Guinsay, dakbayan sa Danao; ug Silvestre Tapy, Jr., 49.Narekuber ang duha ka manok nga igtatari.

Kanhi priso nadakpan

Posted: 13 Mar 2022 04:37 AM PDT

KANHI piniriso sa kasong illegal nga druga nadakpan og balik sa gilusad nga drug-bust sa mga sakop sa City Illegal Drug Unit sa dakbayan sa Lapu-Lapu.Ang grupo ni Police Lieutenant Noah Añana, team leader sa City Drug Enforcement Unit (CDEU) sa Lapu-Lapu City Police Office (LLCPO), maoy nangulo sa pagpangronda pasado alas 11:00 sa Sabado sa gabii, Marso 12, sa Sityo Mustang sa Barangay Pusok, Lapu-Lapu nga niresulta sa pagkasikop kang Ryan Mata Sormillon, 47, taga Englis V. Rama sa Barangay Guadalupe, Siyudad sa Sugbo.Malampuson nga nadakpan si Sormillon ug nasakmitan og shabu nga mobalor og kapin sa tunga sa milyon ka pesos subay sa street drug price niini.Si Police Major Joey Bicoy, pangulo sa CDEU sa LLCPO nga nahinabi sa Sun Star Cebu, nibutyag nga si Sormillon ilang gi-monitor sulod sa duha ka semana human nga mitumaw ang iyang pangalan sa usa sa mga dinakpan nila sa milabay nga pagpangronda.Dugang ni Bicoy, ang ilang dinakpan makonsiderar nga high value individual tungod sa gidaghanon sa shabu nga nasakmiti. Ang mga dakbayan sa Sugbo ug Lapu-Lapu, ang mga lugar nga hagbunganan og shabu sa dinakpan.Sa laing bahin, duha ka mga durugista ang nadakpan sa anti-illegal drug operation sa dakbayan sa Sugbo.Unang nadakpan si Marcel Francis Pasana alyas Bogart, 41, taga Barangay Tinago.Si Pasana gidakop sa mga operatiba sa Waterfront Police Station nga nasakmitan og shabu nga moabot og kapin sa P300,000. Si Pasana nadakpan pasado alas 4:00 sa hapon sa Sabado, Marso 12.Katapusang nadakpan si Daniel Quiatzon, 23, ug molupyo nga taga sa Sityo Nangka sa Barangay Luz, siyudad sa Sugbo. Nadakpan si Quiatzon alas 5:00 sa hapon sa samang adlaw ug nakuhaan og shabu nga balor og P102,000.

2 ka aksidente nga naglambigit og e-bike, 1 patay

Posted: 13 Mar 2022 04:36 AM PDT

ORMOC CITY - Duha ka mga aksidente sa kadalanan ang natala nga naglambigit og e-bikes, Dominggo, Marso 13, 2022, usa ang patay.Unang aksidente nahitabo sa national highway sakop sa Barangay San Joaquin, Palo, Leyte, pasado alas 6:00 sa buntag.Ang mga biktima mao sila si Anastacio Juanillo, 59, dryber og electric bike ug pasahero niini nga si Maria Estelita Soliva, 66, ug si Jerom Comaling, 29, taga Javier, Leyte, nagmaneho og single nga motorsiklo ug e-bike.Base sa inisyal nga imbestigasyon, nasayran nga managlahi ang direksyon sa duha ka sakyanan.Base sa video, ang e-bike padulong na motabok sa karsada sa dihang nagdangarang ang kusog nga dagan sa motorsiklo.Wa mahitsura ang duha ka behikulo gumikan sa kakusog sa bangga.Gidali pagdala sa tambalanan ang mga biktima apan si Soliva gideklarar nga dead-on-arrival.Alas 9:00 sa buntag sa samang adlaw, usa ka e-bike ang nahulog sa kanal sa national highway sa Brgy. Pawikan, Cabucgayan, Biliran.Ang biktima mao si Miguel Joshua Baclohan, 27, taga Kananga, Leyte.Matod sa kapulisan, samtang nagdangarang si Baclohan, usa ka babaye ang mitabok sa karsada.Gumikan sa kagustohan ni Baclohan nga di maligsan ang babaye, nilahos hinuon siya sa kanal nga miresulta sa iyang pagkaangol.Ang e-bikes kabahin sa nagpadayon pa ang aktibidad pamunoan sa Adventourally 3.Alas 5 sa buntag nibiya gikan sa Ormoc City plaza ang dul-an 900 ka mga partisipante.

Kargador, helper nasikop sa managlahing drug raid

Posted: 13 Mar 2022 04:33 AM PDT

MANAGLAHING buy-bust sa kapulisan sa dakbayan sa Sugbo niresulta sa pagkasakmit sa gidiling druga nga mobalor tanan og P300,000.Unang nadakpan si Marcel Francis Pasana, 41, alyas 'Bogart' ug molupyo sa Barangay Tinago, siyudad sa Sugbo, kinsa naposasan sa gilusad nga anti-illegal drug operation sa mga operatiba sa Waterfront Police Station, pasado alas 4:00 sa hapon sa Sabado, Marso 12.Sa gihimong drug-bust, nasakmit gikan kaniya ang gituohang shabu nga motimbang og 29.6 gramos nga mokantidad sa P200,600 mil base sa street drug value niini.Kapin sa usa ka oras ang milabay, lain na usab nga pagpangronda ang gilusad sa mga operatiba sa Parian Police Station nga miresulta sa pagkasikop sa suspek nga si Daniel Quiatzon, 23, helper sa construction ug taga Sityo Nangka sa Barangay Luz, siyudad sa Sugbo.Si Police Major Albert Quilitorio, hepe sa Parian Police Station, maoy nangulo sa illegal drug bust ug nasakmitan si Quiatzon og shabu nga mokantidad og P102,000.Ang duha nga mga nadakpan pulos mag-atubang og kaso nga kalapasan sa Republic Act 9165 o kalapasan sa Dangerous Drugs Act of 2002.

Subuanong rider first finisher sa Adventourally-V3 sa Ormoc

Posted: 12 Mar 2022 09:18 PM PST

Human nag 1st finisher sa Samar Open Moto Challenge niadtong Pebrero 27, lain na usab nga record ang gikulit sa Sugbuanong rider nga si Mark Anthony Boyo sa natad sa endurance niadtong Marso 13 ,2022.Niining bahina, iya na usab gipangulohan ang Ormoc Adventourally-V3 nga adunay 500 kilometros nga distansiya nga nanukad sa Ormoc City lahos sa Leyte, Biliran Province ug balik s Ormoc nga gitapos ni Boyo og 4 hours and 9 minutes diin sila gibuhian alas 5 sa buntag.Sa Samar Open Moto, ang 764 kilometers gihuman ni Boyo og 7 hours and 10 minutes.Iyang gamit ang Ducati 1260 Multistrada Enduro sa duha ka endurance diin siya ang first finisher gikan sa gatusan ka lainlaing mga motorista nga nisalmot sa endurance.Kini maoy ikaduha nga edition sa Ormoc Adventourally nga taga Cebu ang first finisher diin ang una niadtong 2019 diin ilang gilagbas ang 1000 kilometers.Sunod apilan ni Boyo ang 2022 BOSS Ironman Motorcycle Challenge XVI didto sa Luzon. (PAC)
at

No comments:

Post a Comment

Subscribe to: Post Comments (Atom)

End of Summer Sale ☀️😎

20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...

  • Last Chance - Win over $1,800 in BLEUSALT
    Elevate your Wardrobe. Offer ends Midnight. ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏ ...
  • Breaking: Aaron Rodgers teases Jets return this season: 'Anything is possible'
    New York Jets quarterback Aaron Rodgers suffered a torn Achilles tendon in Monday's 22-16 overtime win vs. the Buffalo Bills. If you a...
  • End of Summer Sale ☀️😎
    20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...