https://www.sunstar.com.ph/ |
- 4 sikop tungod sa shabu
- 113 nang patay sa baha, landslide sa Leyte
- Patay sa Eastern Visayas niabot na og 76
- 3 ka dapit sa Sugbo lisod agian sa mga sakyanan
- Mga barko nakabiyahe na human ang bagyo na-LPA
- Cebu tri-cities, Siquijor magpabilin sa Alert Level 1
- Editoryal: Drug transactions sa jail
- Principal naghikog human niya patya ang maestra, bana
- P1.4M drugs nasakmit
- 250 ka tawo nasikop sa Comelec gun ban
- 28 anyos nga lalaki gipatay sa Mandaue
- 5 ka mga pulis gikiha sa pagkawala sa e-sabong agent
- Mga kaso sa dengue misaka
- Tambagi ko Noy Kulas: Patyon kon di pakasal
- Sugilanon: Dughit sa damgo
- Balak: Unos sa tungang gabii
- Balak: Apan hain man ang tigtabanog?
- Marcial moaway balik sa amateur
- Fajardo miapil sa praktis sa Gilas
- Pipila ka NBA teams interesado ni Kai
- Nets abante sa playoffs
- Sa talagsaong hitabo, Wolves sud sa playoffs
- Taxi driver giputla’g dila
| Posted: 14 Apr 2022 05:59 PM PDT Upat ang nangadakpan gabii sa Huwebes Santo sa duha ka managlahi'ng anti-illegal drug operation nga gilusad sa kapulisan dinhi sa dakbayan sa Sugbo.Pasado alas 11 sa gabii sa gihimo nga pagpangronda sa mga operatiba sa Police Drug Enforcement Group (PDEG) Visayas nga gipangulohan ni Police Lieutenant John Kennedy Pajantoy didto sa dan Natalio Bacalso sa Barangay Poblacion Pardo ning Siyudad sa Sugbo diin nasikop ni Joel Gabrillo alyas Suwang, 42 anyos, taga Barangay Poblacion Pardo.Si Gabrillo maoy target sa maong ronda kinsa giingon'g nagmintinar og drug den. Lakip sa nadakpan sila si Maryjane Autor, 37 anyos, taga Sityo Filtersite ug ang iyang hinigugma si Cerelo Decoriza, 49, nga taga Sityo Mangga, Barangay Tisa ning Siyudad sa Sugbo.Pasado alas 12 sa tunga'ng gabii sa Biyernes Santo, ang mga operatiba sa Labangon Police Station-10 mihimo usab ug pagpangronda didto sa dan Banawa ning Siyudad sa Sugbo diin nadakpan ang usa ka Robert Lanchica, 29 anyos, nga taga Mhel Hills, Barangay Lahug ning siyudad.Moabot tanan sa kapin P200 mil ang kantidad sa gituohang shabu ang nasakmit gikan kang Gabrillo ug Lanchica.Kasong kalapasan sa Dangerous Drugs Act of 2002 ang atubangon sa duha ka mga4 suspetsado. (BBT, TPT) |
| 113 nang patay sa baha, landslide sa Leyte Posted: 13 Apr 2022 07:27 PM PDT MISAKA pag-ayo ang gidaghanon sa nangamatay sa bagyong Agaton sa Leyte tungod sa mga landslide nga niigo sa kalungsoran sa lalawigan resulta sa way tuangtuang nga uwan.Sa ilang alas 6 sa buntag sa Huwebes, Abril 14, 2022 nga bulletin, ang Leyte Police Provincial Office (LPPO) nitala og 113 nga nangamatay.Sa Baybay City nga naigo og maayo sa mga baha ug landslide, 81 ang nangamatay, 59 ang nailhan samtang 22 ang wa pa mailhi.Sa Abuyog City, 32 ang patay, 30 kanila nailhan samtang duha ilhon pa.Duna pay lima nga missing sa Baybay City.Mokabat sab sa 236 ang nangaangol, 106 gikan sa Baybay City; 128 sa Abuyog samtang duha sa Dulag.Mokabat usab sa 674 ka mga pamilya o 3,663 ka mga tawo ang namakwit.Ning higayuna, nagpadayon pa ang search and retrieval sa mga dapit nga naigo kaayo sa bagyo.Mga lumolupyo nga apektado nanginahanglan og mga hinabang, sama sa limpyong tubig, mga pagkaon ug mga sapot.Duna na hinuoy mga hinabang nga nangabot, usa niini gikan sa local government unit (LGU) sa Ormoc City. (REV, JKDP) |
| Patay sa Eastern Visayas niabot na og 76 Posted: 13 Apr 2022 06:42 AM PDT Mikabat na sa 76 ang gidaghanon sa mga nangamatay sa Eastern Visayas gumikan sa bagyong Agaton human nakuha ang dugang 28 ka mga lawas sa Barangay Pilar, Abuyog, Leyte sa Miyerkules, Abril 13, 2022.Sa Baybay City, mga usa ka oras nga biyahion gikan sa Abuyog, mga awtoridad nitaho og 47 nga nangamatay tungod sa baha ug landslides samtang usa ang namatay sa Motion, Samar kay nalaumos.Sa Miyerkules, unom pa ka mga tawo sa Baybay ang missing samtang 236 ang nangaangol."This has been the catastrophe that broke my heart. I can't help but sigh and closed my eyes as I felt sorrow of losing my beloved people of Barangay Pilar," matod ni Lemuel Gin Traya.Matod ni Traya, nga uban siyang kang ABC President Darrio Lleve sa Martes sa hapon, Abril 12, kay nipahigayon sila og pre-emptive evacuation sa Barangay Bahay sa mas luwas nga dapit."In fact, road clearing operations were already in placed to access Barangay Pilar including its nearby barangays to continue with the pre-emptive evacuation," matod ni Traya.Pagkataudtaud diha na sila nakaamgo nga hingpit nga nagusbat ang Brgy. Pilar tungod sa landslide. Sa 236 nga nangaangol, 106 niini natala sa Baybay ug 128 sa Abuyog ug duha sa Dulag, Leyte.Duna usay 720 ka mga pamilya ang namakwit.Si Baybay City Mayor Jose Carlos Cari nideklarar na og state of calamity sa lugar alang aron mapagawas ang calamity fund nga makatabang sa relief and rescue operations. (JKDP, SunStar Philippines) |
| 3 ka dapit sa Sugbo lisod agian sa mga sakyanan Posted: 13 Apr 2022 04:44 AM PDT Gumikan sa baha ug landslide, tulo ka mga dapit sa sa Sugbo di pa maagian og sakyanan gumikan sa pagkadanyos sa karsada mugna sa uwan dala sa bagyong Agaton.Base sa travel advisory sa Department of Public Works and Highways (DPWH 7), ang national highway sa Toledo-Tabuelan-San Remigio di maagian og mga sakyanan human dunay mga 50 metros nga gitas-on sa karsada gibanlas sa baha.Nasuta kini sa gipahigayon nga inspeksyon sa Cebu 3rd District Engineering Office pinangulohan ni Engr. Suzette Nwanaka.Gibutangan na kini og mga way sulod nga barrel ug yellow tapes aron mapahimangnoan ang mga motorista."Cebu 3rd DEO will backfill the area with rocks and soils in tonner bags as temporary solution to make the road passable as soon the flood subsides," tipik sa post sa DPWH 7 aron mahatagan og solusyon ang maong problema.Laing dalan nga di maagian mao ang Cebu North Hagnaya Wharf Road sa Barangay Kanlagang, Borbon gumikan sa pagkairog sa semento gumikan sa baha ug ang slope protection nahugno.Ang mga motorista giabisohan nga adto moagi sa Provincial Road sa Bongoyan-Tabunan-Bagacay -Managase sa Borbon.Apan alas 9:40 kagahapon sa buntag, gipahibawo sa DPWH 7 pinaagi sa ilang official Facebook page nga magamit ang katunga sa karsada human kini ilang giayo inabagan sa mga residente.Giabisohan usab sa DPWH ang mga motorista nga moagi sa Transcentral Highway (TCH) sanglit adunay landslide nga nahitabo sa Barangay Tabunan, Dakbayan sa Sugbo.Adunay pag-irog sa yuta sa Barangay Babag 2 nga nakahatag og risgo sa mga lumalabay nga nagmaneho og sakyanan. |
| Mga barko nakabiyahe na human ang bagyo na-LPA Posted: 13 Apr 2022 04:44 AM PDT Ang Philippine Coast Guard (PCG) Cebu nilibkas na sa tanang suspension sa biyahe sa mga barko ug ubang sakyanan sa kadagatan gikan sa Cebu paingon sa ubang parte sa Visayas ug Mindanao sa Abril 13, 2022.Kini ang gipahibawo ni Lt. Krysta Bergantin, operations officer sa PCG-Cebu, human gilibkas na ang tropical storm signal sa Sugbo ug Bohol gumikan sa paghinay na sa bagyong Agaton nga karon usa na lang ka low pressure area (LPA).Ang PCG, kinsa nisuspenso sa biyahe niadtong Enero 10 ug 11 labi na sa mga barko nga nagbiyahian sa northern Cebu, central Cebu, southern Cebu ug eastern Bohol, karon nilibkas na.Matod pa ni Bergantin nga balik sa normal na ang biyahe sa mga de pasaheroan ug cargo vessel nga gikan sa Sugbo.Gumikan niini, wala na say natala ang PCG-Cebu nga stranded nga mga pasahero ug rolling cargoes sanglit nakasakay na sila sa mga unang biyahe sa barko sugod sa alas 6 kagahapon sa buntag.Gumikan sa bagyong Agaton, niabot og 763 ka mga pasahero ang na-stranded ug labing daghan kanila nahimutang sa northern Cebu nga maoy sentro sa mga local ug langyaw nga turista.Niabot usab og 142 ka rolling cargoes kansang mga kargamento nadelatar sa pag-abot paingon sa ilang destinasyon ug di mominos 20 ka mga barko ang gigaid sa pantalan kay gipangkanselar ang ilang biyahe aron paglikay sa disgrasya.Giasoy ni Bergantin nga walay danyos sa port areas ug sa mga barko nga nakaistambay gawas lang niadtong barko nga nitalikid sa pantalan sa Bgry. Consuelo, San Francisco, mga isla sa Camotes niadtong Dominggo, Abril 10. |
| Cebu tri-cities, Siquijor magpabilin sa Alert Level 1 Posted: 13 Apr 2022 04:38 AM PDT Ang mga siyudad sa Sugbo, Mandaue ug Lapu-Lapu, ingon man ang Siquijor sa Central Visayas magpabilin ubos sa Alert Level 1 gikan sa Abril 16 ngadto sa 30, apan ang Lalawigan sa Sugbo, Bohol ug Negros Oriental ubos sa mas estriktong Alert Level 2, pahibawo sa Malacañang sa Miyerkules, Abril 13.Ang Talisay City sa Cebu, nga ubos sa Alert Level 1 hangtod sa Abril 15, wa na maapil sa listahan sa mga dapit nga naa sa labing ubos sa quarantine status sa nasod.Ang mga dapit nga ubos sa Alert Level 1 makapatuman na sa 100 porsyentong balik sa mga kalihukan, apan gikinahanglan gihapon nga tumanon ang mga health protocol. (SunStar Philippines) |
| Editoryal: Drug transactions sa jail Posted: 13 Apr 2022 04:10 AM PDT Mayoriya, kon di man gani tanan, mga transaction gihimo tali sa drug suppliers, pushers ug mga kustomer sa mga piniriso nga naa sa jail. Sa dakbayan sa Sugbo, naa sa Cebu City Jail. Di na maihap ang mga dinakpan nga ningtumbok sa mga piniriso nga naa sulod sa jail.Unya kay mailhan man dayon sa mga pulis kinsa ning mga tawhana, karon mga alyas na lang ang ilang gipanggamit. Wa na tong tinud-anay nga ngan ug apelyedo.Makadaghan na nisulti ang kapulisan nga ni-coordinate na sila sa Bureau of Jail Management and Penology (BJMP) apan way kalamboan nga gipresentar ang kapulisan. Bisan ang BJMP tak-om kaayo niini nga mga kalamboan.Di malikayan nga magduda ang publiko nga dunay protektor sulod sa ahensiya ang mga durugista. Kay kon way kakunsabo sulod sa buhatan, nganong nakalusot man ang mga kahimanan sa komunikasyon nga banned man unta kini? Ing ana na ba ka lugak ang ilang seguridad nga sayon ra man malutsan?Kon duna pa usab silay gibuhat, nganong nagkadaghan man ang mga supplier sa illegal drugs nga naa sulod sa prisohan? Nagkadaghan sila kay way nakapugong ug nasilutan human nalutsan o gipalusot?Ang pasilidad iya sa Cebu City, apan gipadumala lang mga sakop sa BJMP. Apan maora man og busy ang Siyudad sa mga isyu kalabot sa coronavirus disease (Covid-19) nga napasagdan na lang hinuon ang isyu sa illegal drugs.Tinuod, aktibo ang Cebu Office for Substance Abuse Prevention (Cosap), apan hilom ang officials sa isyu sa tinubdan sa drugas.Kinahanglan nga hatagan kini og pagtagad sa city officials kay ang problema wa magkagamay, nagkadako ug nagkalapad ang network sa mga durugista sulod sa city jail. Lainlain na gud ang ngan nga ipanghatag sa mga nangadakpang pushers sa gawas.Kay pasilidad man kini sa Cebu City, kinahanglan nga mohimo og lakang ang kagamhanan aron masusi kon nganong nagkadako kini nga problema. |
| Principal naghikog human niya patya ang maestra, bana Posted: 13 Apr 2022 03:48 AM PDT Normal unta nga adlaw niadtong Martes, Abril 12, alang sa mga tinun-an ug magtutudlo sa Uybico Bilbao National High School (UBNHS) sa lungsod sa Hinoba-an, Negros Occidental, apan kalit silang gihakop sa kahadlok dihang gipusil sa ilang prinsipal ang usa sa mga magtutudlo ug bana niini sulod sa campus.Si principal Warren Escosar, 56, taga Barangay Buluangan sa maong lungsod, nipusil usab sa iyang kaugalingon human sa krimen, matod ni Hinobaan Municipal Police Station Chief Major John Ganzon.Sa inisyal nga imbestigasyon nga gihimo ni Corporal Francisco Sabanal Jr. nagpakita nga niabot si Escosar sa school campus sakay sa iyang pick-up truck nga armado og duha ka armas pasado alas 8 sa buntag.Sa pag-abot sa magtiayon, sila si Christopher ug Almarisa Arroy, parehong 35, taga Barangay Poblacion, lungsod sa Cauayan, si Escosar nipusil kanila gamit ang 12-gauge shotgun.Ang mga saksi niingon nga ang bana nahulog gikan sa motorsiklo ug namatay diha-diha, samtang ang magtutudlo nidagan paingon sa bukas nga classroom aron unta motago apan gisundan siya sa suspek.Gipusil dayon ni Escosar ang magtutudlo sa nawong nga maoy hinungdan sa iyang hinanaling kamatayon. Nibalik siya sa iyang sakyanan, gikuha ang iyang kalibre .45 nga pistola ug gipusil ang iyang kaugalingon, dugang sa mga saksi.Usa ka tinubdan, kinsa nihangyo nga dili magpaila, nitug-an sa SunStar Bacolod nga ang mga tinun-an nga nagklase nakurat sa ilang pagkakita sa insidente.Ang uban kanila nanagan paingon sa duol nga katubhan nga walay mga tsinelas.Matud pa ni Ganzon nga sa wala pa ang pagpatay, si Arroy adunay plano nga pasakaan og kasong sexual harassment si Escosar ug moadto unta sa ilang police station niadtong Martes. (SunStar Philippines) |
| Posted: 13 Apr 2022 03:48 AM PDT Moabot sa dul-an P1.4 million nga balor sa illegal nga drugas nasakmit sa kapulisan sa dakbayan sa Sugbo ug lalawigan sa Bohol sa ilang managlahi nga mga anti-illegal drug operations sa Martes sa gabii, Abril 12, 2022.Ang mga nadakpan giila nga silang Johnrey Rama Bayon, alyas "Jun", 38, taga Villa Bulsita, Barangay Bulacao, Dakbayan sa Sugbo ug Joseph Lanaja Ocon, alyas "Ilong", 26, taga Barangay Population, siyudad sa Tagbilaran, Bohol.Unang nilusad og buy-bust ang mga sakop sa City Drug Enforcement Unit sa Cebu City Police Office (CCPO) alas 7:30 sa gabii sa sitio Tuburan, Barangay Punta Princesa, Dakbayan sa Sugbo.Nakuha sa kapulisan gikan kang Bayon ang 155 gramos sa gituohang shabu nga adunay street drug price nga P1,054,000, lakip na ang buy-bust money nga naa sa sulod sa sling bag nga dala niini.Pagka alas 9:30 sa gabii sa samang adlaw, nasikop usab sa kapulisan sa dakbayan sa Tagbilaran si Acon, alyas Ilong, sa Purok 3, Barangay Population.Nakuha gikan sa suspek ang 50 gramos sa gituohang shabu nga mokandidad og P340,000 ug ang duha ka mga motorsiklo.Silang alyas Ilong ug Jun pulos nalakip sa listahan sa high value individual (HVI) sa kapulisan diin gipangsubay pa kon kinsa ang ilang mga tinubdan sa ilang illegal nga drugas. |
| 250 ka tawo nasikop sa Comelec gun ban Posted: 13 Apr 2022 03:48 AM PDT Nakasikop na ang Police Regional Office 7 og 250 ka tawo nga nakalapas sa Comelec gun ban sulod sa 90 ka adlaw sukad nagsugod ang campaign period sa Enero 9, 2022.Sa datos nga gipagawas sa PRO 7 gikan sa Regional Election Monitoring Action Center REMAC 7, gikan sa Enero 9, 2022 hangtod sa Abril 9, 2022, ang kapulisan uban sa Armadong Kusog sa Pilipinas, pinaagi sa pagpangulo sa Commission on Elections, 252 na ka mga armas ang ilang nasakmit, 49 ka mahait nga mga hinagiban ug 474 ka lainlaing matang sa kontrabando ug mga bala sa managlahing mga kalibre sa armas.Si Police Brigadier General Roque Eduardo Vega, hepe sa PRO 7, nagkanayon nga ang sayo nga pagpangandam sa eleksiyon sa kapulisan lukop Central Visayas nahimong epektibo sa ilang kampanya aron mapugngan ang election related violence.Kini aron makab-ot ang malinawon, patas ug luwas nga piniliay sa Mayo 9, 2022, walay kinabuhi nga makalas."We remain neutral and non-partisan in the performance of our election duties and ensure public safety and security. PRO 7 will continue the conduct of better implementation of anti-criminality, anti-illegal drugs operations, the campaign against loose firearms, counter-insurgency, and the dismantling of private armed groups, which will contribute to the peace and order of the 2022 National and Local Elections," matod ni Police Brigadier General Roque Eduardo Vega.Gipahibawo usab ni Vega nga samtang nagkaduol na ang eleksiyon, bugtong ang PRO 7 ug ang Cordillera Region ang wala pa makatala og insidente diin ang mga biktima naglangkob sa Elected Government Official (EGO), Appointed Government Official (APO), Other Political Aspirants (OPA) ug Election Related Incidents.Gidugang ni Vega nga nagpasabot lang kini nga ang Central Visayas nagpabilin pa nga malinawon ug manageable nunot sa subsub ug dungan nga anti criminality and law enforcement operation matag semana diin kadtong mga pinangita sa balaod ilang madakpan. |
| 28 anyos nga lalaki gipatay sa Mandaue Posted: 13 Apr 2022 03:45 AM PDT Gituohang away sa halin sa ilegal nga drugas ang motibo sa pagpatay sa usa ka 28 anyos nga lalaki nga tigbangan sa usa ka tindahan sa dakbayan sa Mandaue sa Martes sa gabii, Abril 12.Ang lawas napalgan sa mga residente nga nanimuyo duol sa Sityo Mahayahay sa Barangay Labogon sayo sa Miyerkules sa buntag, Abril 13.Si Police Captain Emmanuel Rabaya, hepe sa Police Station 3 sa Mandaue City Police Office (MCPO), nibutyag nga sa ilang pakisusi sa lugar, ilang nailhan ang biktima nga si Jonard Mendez Viola, 28, taga Sityo Tabay, Barangay Labogon.Apan nasayran nga si Viola lumad nga taga lungsod sa San Miguel, lalawigan sa Zamboanga Del Sur.Matud ni Rabaya nga ilang paabuton ang resulta sa pagsusi sa mga sakop sa Scene of the Crime Operations (Soco) tungod kay si Viola naghayang na nga napalgan pasado alas 7:00 sa buntag sa Miyerkules.Gituohan sa kapulisan sa dakbayan sa Mandaue nga wala sa dapit patya si Viola tungod kay walay mga lama nga agi sa dugo dihang siya gipusil.Samtang ang Soco nga nihiling sa lawas naka-recover og usa ka bala nga kabhang ug usa ka buhing bala.Lakip sa nakuha ang usa ka gamay nga pakete sa gituohang shabu sa walang kamot ni Viola.Matod pa ni Rabaya nga sa ilang inisyal nga nakita, hayan away sa halin sa drugas o posible nga nagkaonsehan. |
| 5 ka mga pulis gikiha sa pagkawala sa e-sabong agent Posted: 13 Apr 2022 03:43 AM PDT Gipasakaan og kaso ang lima ka mga pulis ug pipila ka wala mailhing mga tawo tungod sa giingong pagdagit sa usa ka online cockfight betting (e-sabong) agent sa San Pablo City sa Laguna sa miaging tuig, matod ni Philippine National Police (PNP) spokesperson Colonel Jean Fajardo.Si Fajardo niingon nga kasong serious illegal detention/kidnapping ug robbery ang gipasaka sa Department of Justice batok kang Daryl Paghangaan, Roy Navarete, Henry Sasaluya, Michael Claveria, Regil Brosas ug ubay-ubay nga John Does.Ang mga kaso gipasaka sa mga kabanay sa missing nga si Ricardo Lasco. Giabagan sila sa Criminal Investigation and Detection Group (CIDG).Atol sa imbestigasyon sa Senado, ang asawa ni Lasco nga si Princess Montañez, ug ang iyang igsuon, ig-agaw ug inahan, niila kang Navarete ug Paghangaan nga lakip sa 10 ka armadong mga tawo nga pugsanong ningkuha kang Lasco gikan sa ilang pinuy-anan.Si Montañez niingon nga ang mga suspek nagpaila sa ilang kaugalingon nga mga sakop sa National Bureau of Investigation (NBI), nga niingon nga si Lasco adunay standing warrant of arrest sa kasong estafa.Nakuha usab sa mga suspek ang mga mahalong butang sa balay, lakip ang mga alahas, gadgets ug pitaka ug vault nga adunay sulod nga kuwarta.Si Lasco sa pagkakaron gikonsiderar nga missing person. Ang CIDG nagsusi sa walo ka mga kaso nga naglambigit sa pagkawala sa 34 ka e-sabong enthusiasts.Sa sayo pa, gipasakaan sa CIDG og kasong kidnapping ang walo ka security personnel sa Manila Arena tungod sa pagkahanaw sa unom ka mga sabungero niadtong Enero. (TPM sa SunStar Philippines) |
| Posted: 13 Apr 2022 03:43 AM PDT Namatikdan sa Department of Health (DOH) ang pagsaka sa mga kaso sa dengue sa Zamboanga Peninsula, Cagayan Valley, Western Visayas ug Davao Region, matod ni Undersecretary Maria Rosario Vergeire sa Martes, Abril 12, 2022.Hinuon giklaro ni Vergeire nga nagpabiling mas taas ang gidaghanon sa mga kaso sa dengue sa 2021."Nationally, the weekly reported cases in 2022 were still significantly lower than what we had in 2021...Mayroon pong specific provinces in each of these regions na apektado ng pagtaas ng kaso. Mayroon pong mga ibang probinsya ito na hindi mataas ang kanilang kaso, bagkus bumaba pa ang kaso nila ng dengue. Specific po sa probinsya 'yung kanilang pagtaas," matod niya sa usa ka virtual press conference."Hindi naman lahat ng areas na ito ay nagkaroon ng pagtaas ng pagkakamatay because of dengue. Mayroon lang tayong namonitor na ang pinakamataas na reported were from Zamboanga City, Lapu-Lapu City, Cebu province, and Iloilo province," dugang niya.Siya niingon nga ang labing posibling rason sa pagsaka sa mga kaso sa maong mga dapit mao ang kanunay nga pag-ulan.Matud pa ni Vergeire nga hugot ang ilang koordinasyon sa ilang regional units aron magiyahan ang ilang tagsa-tagsa ka local government units sa pagpugong sa dengue ilabi na sa pagmintinar sa limpyo nga palibot.Gipahinumdoman niya ang publiko bahin sa estratehiya sa 4S, nga naglakip sa pagpangita ug pagguba sa mga lugar sa pagpasanay sa lamok, mga lakang sa pagpanalipod sa kaugalingon, pagpangita og sayo nga konsultasyon sa mga sintomas, ug pagsuporta sa pag-spray o fogging aron malikayan ang dugang nga mga outbreak."Kailangan na masusing linisin ang mga backyard natin, ang ating mga tahanan, public spaces para mawala itong Aedes aegypti o yung lamok na nakaka-cause ng dengue," matod niya. (TPM sa SunStar Philippines) |
| Tambagi ko Noy Kulas: Patyon kon di pakasal Posted: 13 Apr 2022 03:42 AM PDT Dear Noy Kulas,Please i-hide ang akong name ug email address. Itago lang ko sa ngan nga Robin. Sa akong edad nga 40 anyos, sagad sa akong uyab naa sa 20s. Ulitawo pa ko until now.Ang akong mga uyab karon kay mag-cousin but wa sila kahibawo nga ako silang gilumpong kay wa man nako ni sila gidungan og meet. Ako ra ni silang gi-stalk sa Facebook unya gi-chat. Aron di ko mahibaw-an, wa ko makig friends nila sa Facebook kay akong pasangil akong gi-deactivate. Nitago lang ko kay lisod na makahibawo silang duha.Karon naproblema ko kay kaning usa nila mabdos og tulo ka buwan. Nahadlok ko kay mibahad ra ba siya nga ipapatay ko kon di pakaslan. But nilang duha, kani si Melay maoy akong mas ganahan unta. Pero di pa ko ready nga makigminyo kay wa pa koy klarong work. Unsa may akong buhaton? Makapugos ba sila nako sa pagpakasal? Please tambagi ko.ROBINRobin,Misangpot na gyud ang imong pagkadukirok sa babaye. Karon naproblema na ka. Ubos sa balaud, way tawo nga mahimong mapugos sa pagpakasal. Kay kon madayon ang kasal tungod sa threat, gikan sa sinugdanan, invalid na gyud na. Apan kuyaw usab kon tinud-on ang bahad, patyon ka o ipapatay sa pamilya kay imo mang gipamabdusan ang imong uyab. Kon wa pa na nimo hilabti, di unta na maingon niana ang sitwasyon karon.Atubanga ang iyang mga ginikanan kay manubag man gyud ka sa imong kaakuhan nianang bayhana. Prangkahan mo bang di ka pa andam magpakasal apan mosaad ka nga mosuporta sa inahan ug anak. Although sa balaud, ang imong responsibilidad human sa pagpanganak mao ang bata lang.Patabang usab sa imong pamilya nianang imong problema aron sila aware kon unsa man ang mahitabo nimo. Huna-hunaa kon duna ka nay pamilya, mas ma-inspire ka pagpaninguha. Apan kon sama ka sa ubang lalaki nga bisan gani paghugas sa kaugalingong itlog di kahimo, wa gyud kay ayo. Mosumbalik ra nimo nang imong pagpahimus sa mga babaye.NOY KULASrojval69@yahoo.com |
| Posted: 13 Apr 2022 03:25 AM PDT Emeterio S. SumagangValencia City, BukidnonDreams are reality waiting to happen. — Nick Jonas Hapon. Sa Atrium sa Mall."Uy! Edwin, ikaw ni?""Oo! Ikaw si Glenda? Kumosta?""Nia, lola na, ikaw?""Ulitawong gurang.""Ha! Wala ka magminyo?""Nalimot ko.""Mao ba?""Upat ug tunga sa dekada nga wala ta magkita.""Bitaw, karon puti na ang atong buhok.""Wa ka magdali?""Nag-window shopping ko. Way angayng dalian.""Hilig gihapon kag pizza?"Mipahiyom si Glenda ug miyango."Kon mao, mosulod tas Greenwich. Didto ta mag-estorya."Sulod sa Greenwich."Glen, unsay imo?""Hawaiian ug cold tea, please.""Sige, tuay bakanteng lamesa sa ngilit. Adto paabot samtang mag-order ko."Milingkod siya atbang ni Glenda. Taudtaod miabot ang ilang order. Nagtabi sila samtang nag meryenda. Iyang nasulyapan ang singsing sa tudlo ni Glenda."Tabi, kinsay ngalan sa imong nabana?""Rogelio Kwan. Klasmyt nakos hayskol.""Ka suwerte niya. Kumosta siya?""Patay na siya. Tulo na ka tuig.""Sori. Pila diay inyong anak?""Upat. Duha ka babaye ug duha ka lalaki. Minyo na silang tanan. Ang kamanghoran nagpuyo dinhis CDO kay taga dinhi ang iyang bana. Maoy akong gibisitahan karon.""Mao ba? Suwerteng nagkahibalag ta.""Nagkita ang kasili ug luwag. He-he-he!""Siaw gihapon ka.""Ikaw, always a gentleman."Nahimong seryoso ang panagway ni Glenda."Sori, Ed, sa nahitabo kanato. Mea culpa, akong sala.""Ako na tong gilubong sa kalimot."Tinuod, apan karon nga nagkakita sila si Glenda, kalit mibuhagay ang iyang talagsaong pagbati ngadto sa kanhing hinigugma. Gibitad siya sa kamot sa kagahapon. Daklit mipasundayag sa iyang alimpatakan ang malipayong mga yugto sa ilang paghigugmaay."Ed, nganong wala ka magminyo?""Wala koy suwerte sa babayeng gusto nakong makasalo sa salag sa kaminyuon."Buot niyang sultihan si Glenda, nga siya ang babayeng gusto niyang mahimong asawa. Apan wala niya kini ibungat."Glen, unsay imong trabaho human nakatapos sa kolehiyo?""Nagtrabaho kos opisina sa mamahandi sa among dakbayan. Apan miundang kog trabaho ug gigahin ang panahon sa pag-atiman sa among mga bata. Gusto ni Roger kay paigo man ang iyang kinitaan sa negosyo nga ibuhi sa iyang pamilya. Ikaw?"Nagtudlo kos College of Business Administration. Retirado na ko. Duha na ka tuig.""Nia ka nagpuyo sa dakbayan?""Naa koy balay sa usa ka subdibisyon sa Upper Carmen.""Nag-inusara ka?""Naa koy working student. Akong pag-umangkon. Ikaupat ni nga pag-umangkon nga akong gipaeskuyla.""Siguro miangay kas imong trabaho ug kinabuhi. Bata ka tan-awon sa imong edad.""Ikaw sad, maanyag gihapon."Namula ang nawong ni Glenda."Bola. Apan salamat.""Nagdamgo baya ko nimo gabii. Natingala ko kay dugay na man kong wala maghamdom nimo. Batan-on kas akong damgo.""Mao ba? Dili mapanas ang mga karaang kasinatian sa kasuokan sa utok. Usahay molutaw kini sa damgo.""Daghan kog damgo sa mga karaang lugar ug panghitabo, apan mao to ang unang higayon nga nagdamgo kos imo.""Gipahinumdoman kas imong damgo."Sa iyang damgo, naamgohan niya nga dakong sayop ang iyang desisyon nga magpabiling ulitawo. Nagmahay siya. Gidughit ang iyang galamhan sa damgo ug nagbilin kinig dakong haw-ang sa iyang dughan. Hinungdan nga nangindahay siya nga makakitag babaye nga minyoan. Apan kinsa may makigminyo sa usa ka edaran? Gusto niyang isugid kang Glenda ang iyang naglahugayng gibati sa iyang damgo apan gipugngan niya ang iyang kaugalingon."Glen, hangtod kanus-a ka dinhi?""Mouli na ko ugma.""Sa Pagadian City?""Sa Pagadian City.""Mohatag kos akong selpon number.""Sige, Ed, kay mohatag sad kos ako."Human magbaloay sa ilang mga kontak number."Glen, kanus-a ka makabalik dinhi?""Sunod bulan, Ed."Magpaabot kos imong pagbalik, mohunat na unta siyag bungat, apan iyang gipakgang ang iyang kaugalingon.Sa wala pa sila magbulag sa mall."Salamat sa imong pakighinabi kanako. Ug hapi trip.""Way sapayan. Nalipay ko nga nagkita ta."Sa pagsud-ong niya sa pahiyom ni Glenda, nasiguro niya nga dili damgo ang ilang wala damhang panagkita. |
| Posted: 13 Apr 2022 03:25 AM PDT MELQUIADITO M. ALLEGOTuburan, CebuDaghan nang mga unosatong gisungsong gisalindotug wa panumbalinga.Adunay mipukling sa tigbayonsa pasalig o pagduhaduha.Aduna upod wa makagarasni makatarog sa pundasyonsa atong pag-inunongayug lambigit panaghiusa.Karon panid-i adunaynagtungkaol sa tungang gabii,samtang ang karaang sanganagsaghidsaghid sa atong atop –ang sinating palad monaghapyodhapyod nagtuhiltuhilning katupad kaduloghubong kasingkasing. |
| Balak: Apan hain man ang tigtabanog? Posted: 13 Apr 2022 03:24 AM PDT ESTER TAPIAKanlaon City, Negros Occ.Kadtong bakilid nga bukid pulos kabatoanlabi na sa ting-init;walay mais ni lagutmon nga motubo didtopipila lang ka mga mugbong kahoy ug madre de cacao.May babaye nga walay dala nga mikatkatsa dalan-dalan nga morag usa ka nipis ug hanap nga lamboang iyang pula ug asul nga sayal papel de haponnga gikayab matag karon ug unyainighuros sa hangin.Sa iyang luyo nagsunod ang bukogong batakansang mga gusok, akong nahanduraw,nag-ugdo morag tusok nga kawayannga gihashasan sa dahon.Ang inahan ug anak misubay sa gamayng agianan,sungsong sa bugwak sa hangin,usa ka paresang tabanog sa tumoy sa naylonnga gipalupad diha sa ngilit sa bungtod.Ang dalan-dalan milipot sa luyo diha sa tumoydiin gilamoy kini sa gutom nga mga panganod.Apan hain man ang tigtabanog? |
| Marcial moaway balik sa amateur Posted: 13 Apr 2022 03:23 AM PDT Human siya nidaog sa ikaduha niyang away isip professional fighter nga gipahigayon sa Amerika, si Filipino middleweight prospect Willie Marcial nakatakdang mouli sa Pilipinas aron mokampanya og balik sa amateur rank.Ning bag-uhay lang, nasugakod ni Marcial ang tulo ka knockdowns aron paundangon si American Isiah Hart sa 4th round.Sa interbyu sa www.abs-cbnnews.com, nagkanayon si Marcial nga tinguha niyang mas hashasan pa ang iyang abilidad ug nisaad nga mobawi sa dili maayo niyang kasinatian sa miagi niyang away.Nakatakdang moabot karong adlawa si Marcial sa Pilipinas ug matod niya, mopahuway una siya'g kadiyot sa dili pa siya molarga paingon sa Thailand aron moapil sa training sa Philippine national team alang sa 31st Southeast Asian Games, nga sugdan karong Mayo 12, 2022 sa Hanoi, Vietnam.Si Marcial nakadaog og gold medal sa 2015, 2017, ug 2019 nga mga edisyon sa SEAG.Gipanumpa ni Marcial nga iyang buhaton ang tanan niyang makaya aron makahatag og laing pasidungog sa Pilipinas.Ang pagbalik ni Marcial sa amateur rank suportado sa mga nagdumala kaniya sa professional rank nga gipangulohan ni MP Promotions president Sean Gibbons."They say you truly don't know a man until he is knocked down, and in Eumir's case it was three times, and how they get up," batbat pa ni Gibbons kabahin sa miaging away ni Marcial."We found out that Eumir has a tremendous Filipino heart and his will to win emanates from it." |
| Fajardo miapil sa praktis sa Gilas Posted: 13 Apr 2022 03:22 AM PDT Nahilakip ang Sugboanong higante nga si JuneMar Fajardo sa mga ningbutho sa pagbalik og ensayo sa Gilas Pilipinas niadtong Martes sa gabii, Abril 12, 2022 sa Moro Lorenzo Sports Center sulod sa Ateneo de Manila University campus.Ang Gilas nagsugod na sa ilang pagpangandam alang sa ilang kampanya sa 31st Southeast Asian Games nga sugdan karong Mayo 12, 2022 sa Hanoi, Vietnam.Si national team head coach Chot Reyes nag-post og videos sa praktis sa team sa iyang Instagram account.Gawas kang Fajardo, ang ubang mga magduduwa sa Philippine Basketball Association (PBA) nga ningtunga mao sila si Moala Tautuaa, Isaac Go, Kevin Alas, Robert Bolick, Troy Rosario ug Kib Montalbo.Naa sab ang 16 anyos nga Fil-Am prospect nga si Caelum Harris, kinsa masubhan isip sakop sa Gilas Pilipinas sa matag duha ka mga tuig torneyo.Ningbutho ang Gilas cadets nga sila si Will Navarro ug Lebron Lopez.Wala nakatunga mao ang Japan-based professionals nga sila si Thirdy Ravena ug Dwight Ramos, hasta si PBA player Roger Pogoy. |
| Pipila ka NBA teams interesado ni Kai Posted: 13 Apr 2022 03:22 AM PDT Adunay dakong posibilidad nga matuman na ang pangadoy ni Kai Sotto nga mahimong labing unang lumad nga Pinoy nga makaduwa sa National Basketball Association (NBA).Mao kini ang gibutyag ni US-based Filipino Homer Sayson sa iyang artikulo sa Spin.ph.Ang agent ni Sotto nga si Joel Bell miasoy sa Spin.ph nga padayon kining nakigsabot sa pipila ka teams sa NBA nga mihangyo nga paapilon na ang 19 anyos ug 7'2" nga batan-ong higante sa 2022 NBA Draft.Hinuon ning puntoha, nagkanayon si Sotto nga wala pa siya'y pinal nga desisyon kon magpa-draft na ba siya sa NBA o padayon unang moduwa sa National Basketball League (NBL), usa ka professional league sa Australia ubos sa kampo sa Adelaide 36ers.Mismong si 36ers coach CJ Bruton masaligon nga makaduwa ra puhon si Sotto sa NBA. |
| Posted: 13 Apr 2022 03:22 AM PDT Nakaabante sa playoffs ang hosts Brooklyn Nets human nila gipangbuntog ang Cleveland Cavaliers, 115-108, kagahapon, Abril 13, 2022 (RP time), atol sa pagsugod sa Play-in Tournament sa National Basketball Association (NBA) 2021-22 season.Ang Nets mao ang nakaangkon sa No. 7 seed sa Eastern Conference playoffs diin ilang ikaharong ang No. 2 Boston Celtics sa best-of-seven series.Nagbangis si Kyrie Irving ug gipangulohan niya ang Nets pinaagi sa iyang 34 puntos ug 12 assists samtang nidugang si Kevin Durant og 25 puntos ug 11 assists.Sayong ningratsada ang Nets ug nakamugna dayon kini'g 20 puntos nga labaw, 40-20, human sa 1st quarter,Adunay mga higayon nga ning-aksyon paggukod ang Cavaliers apan wala nagpasagad ang Nets ug giprotektahan nila ang ilang labaw hangtod na sa katapusang gutlo.Wala nasipyat si Irving sa nag-una niyang upat ka mga itsa. Nasipyat lang siya'g sugod sa iyang three-point attempt sa 4th quarter.Si Bruce Bowen nidugang og 18 puntos alang sa Nets samtang niamot og 16 puntos si Andre Drummond.Taliwala sa kapildihan, ang Cavaliers aduna pa'y laing kahigayunan nga makasulod sa playoffs.Makigsangka ang Cavaliers sa modaog sa laing play-in game tali sa No. 9 Atlanta Hawks ug No. 10 Charlotte Hornets (ipahigayon karon) - aron ilugan ang No. 8 ug katapusang luna sa East playoffs. (AP) |
| Sa talagsaong hitabo, Wolves sud sa playoffs Posted: 13 Apr 2022 03:19 AM PDT Sa usa ka talagsaong hitabo, nakasulod sa playoffs ang Minnesota Timberwolves human nila gipangpukan ang Los Angeles Clippers, 109-104, kagahapon, Abril 13, 2022 (RP time) sa laing duwa sa Play-In Tournament sa National Basketball Association (NBA).Mao pa lang kini ang ikaduhang higayon nga nakasulod sa playoffs ang Timberwolves sa miaging 18 ka mga tuig ug ikasiyam sa 32 nila ka mga tuig sa NBA.Kuyaw nga nakaduwa si Anthony Edwards ug gipangulohan niya ang Timberwolves pinaagi sa iyang 30 puntos samtang niamot og 29 puntos si D'Angelo Russell.Ang gipakita nila ni Edwards ug Russell igo na aron tapakan ang bati nga duwa sa ilang lider nga si Karl-Anthony Towns, kinsa igo ra nakamugna og 11 puntos.Ang Timberwolves mao ang nakaangkon sa No. 7 seed sa Western Conference playoffs diin nag-atang kanila ang No. 2 Memphis Grizzlies alang sa best-of-seven series.Sa kapildihan, ang Clippers mao ang makigharong sa modaog sa laing play-in match tali sa New Orleans Pelicans ug San Antonio Spurs (ipahigayon karon) aron ilugan ang No. 8 ug katapusang puwesto sa West playoffs. (AP) |
| Posted: 12 Apr 2022 08:47 PM PDT Taxi driver giputlan og dila sa giingong duha ka mga tulisan sa ala 1:00 sa kaadlawon sa Martes, Abril 12, 2022 sa may Brgy. Pitalo, lungsod sa San Fernando, habagatang Sugbo.Ang duha ka giingong mga tulisan nipahatod gikan sa Banawa, Brgy. Guadalupe, Dakbayan sa Sugbo ngadto sa San Fernando.Ang biktima mao si Andres Alfanta, 52, taga Brgy. Cantao-an, dakbayan sa Naga, driver sa Hadjie Taxi.Si Alfanta malampusong naoperahan sa doktor sa Cebu South Medical Center, kanhi Talisay District Hospital, pinaagi sa pagtahi og balik sa dila nga giputol sa giingong tulisan.Si Police Corporal Mario Paul Pino, imbestigador sa San Fernando Police Station nga nahinabi sa Superbalita Cebu, nagkanayon nga wala pa nila mailhi ang duha ka mga tulisan nga gihulagway ni Alfanta nga hingkod ang panuigon apan wa niya maklaro ang mga nawong kay naka facemask ug nagkawo.Ang duha giingong dunay armas ingon man kutsilyo.Matud ni Pino nga naglisod sila kay si Alfanta di pa makasulti og tarong gumikan sa samad sa dila.Apan nibutyag kini nga padulong na siya mopauli sa dakbayan sa Naga dihang gipara siya sa duha ka mga tawo sa may Banawa, Guadalupe.Nagpahatod kini kaniya sa San Fernando ug nisanong na lang sab siya kay padulong siya mogarahi.Sa ilang pag-abot sa unahan og gamay sa barangay hall sa Pitalo, ang mga tulisan ningdeklarar og tulis dayon gitiunan siyag armas ug kutsilyo.Gipasulod siya sa usa ka eskinita nga duol sa Poblacion ingon man sa barangay hall sa Pitalo.Didto nakuha ang iyang kapin sa P4,000 nga kita."Wala maputol tanan iyang dila, Sir, nahiwa sa tunga. Basin sa pagkisi-kisi sa biktima, gituok man gud ni, nidiwal ang dila, naigo sa kutsilyo," dugang ni Pino.Si Pino nagkanayon nga subayon nila ang dapit sa pamasin makakuhag ebidensiya.Makig-ayon sab sila sa Police Station 9 sa Cebu City Police Office (CCPO) aron makakuhag impormasyon.Ilang paabuton nga maayo na si Alfanta kay dakog ikatabang ang dugang impormasyon nga mahatag niini.Si Alfanta nakatawag pa sa iyang pamilya sanglit wala madala sa mga tulisan ang iyang selponSa post sa Facebook sa iyang anak nga si Lovely Alfanta, 26, ang iyang amahan naghilak nga nagmaniho sa taxi padulong sa hospital.Wala siya dawata sa pribadong tambalanan sa dakbayan sa Naga hinungdan nga nilahos siya sa ospital sa Talisay.Matod ni Lovely nga nagkadugo ang baba sa ilang amahan samtang naningkamot nga makaabot sa tambalanan.Si Cristelle, laing anak ni Alfanta, niingon nga ang naputol nga bahin sa dila diha ra sa baba sa ilang amahan.Naninguha kini nga di matagak bisan sa pag-agas sa dugo.Malampuson kining natahi pagbalik atol sa operasyon sa doktor.Matod ni Cristelle sa Superbalita Cebu nga nanginahanglan sila og tabang kay ang iyang amahan duna pay tulo ka gagmay nga mga anak sa kapuyo niini nga laing babaye.Kon duna pay dautang nahitabo sa ilang amahan, makaluluoy ang iyang mga manghod.Busa samtang di pa makamaneho og balik og taxi ang ilang amahan, nagkinahanglan sila og tabang kay way laing gisaligan ang pamilya niini. |
| You are subscribed to email updates from SUNSTAR. To stop receiving these emails, you may unsubscribe now. | Email delivery powered by Google |
| Google, 1600 Amphitheatre Parkway, Mountain View, CA 94043, United States | |
No comments:
Post a Comment