Tuesday, May 3, 2022

https://www.sunstar.com.ph/

https://www.sunstar.com.ph/

'Virginity' nahali’g P20,000

Posted: 03 May 2022 03:31 AM PDT

KANTIDAD lang sa P20 mil nga salapi ang nahimong bugti sa pagtugyan sa maanyag nga dalaga ngadto sa adunahang lalaki nga maoy mipusgay sa iyang pagka-birhen.Kini maoy gibutyag sa usa ka alyas Daisy, 19, kinsa nagtrabaho isip guest relations officer (GRO) sa siyudad sa Davao kinsa nahinabi ning tigbalita.Gisaysay ni alyas Daisy nga nagtrabaho sa usa ka balay kalingawan ang iyang inahan diin siya ang kinamaguwangan sa tulo nila ka magsuon.Apan naundang sa trabaho ang iyang inahan dihang miigo ang pandemya sa coronavirus disease (Covid-19), hinungdan nga naundang sa pag-eskuwela ang iyang mga igsuon human nga grabeng kalisud ang ilang nahiagoman, ilabi na sa dihang gipatuman ang lockdown.Niabot pa sa punto nga aron nga dunay ikapalit sa inadlaw nilang panginahanglan, gisuwayan niya ang pagsunod sa trabaho sa iyang inahan.Gitug-an niya nga ang iyang higala nga bayot maoy nahimong tulay aron makaila niya ang wa ginganlan nga negusyante nga maoy gitugyanan niya sa iyang pagka-birhen bugti lang sa P20 mil.Apan ang maong hitabo giingon nga di malimtan ug kanunay nga naa sa iyang hunahuna sanglit mao kadto ang nagsilbing pultahan aron sudlon ang kinabuhi nga gisugdan sa inahan nga ning higayona nagka-edad ug naglisud na gumikan sa giantos nga sakit sa baga.Apan alang kang alyas Daisy, wa siya magmahay nga natumpawak sa maong trabaho tungod kay alang man kini sa iyang pamilya.

Abi'g bomba, saging lang diay

Posted: 03 May 2022 03:31 AM PDT

NIBUNGA og huot nga dagan sa trapiko ang usa ka gidudahang butang nga napalgan duol sa bakery sa Calinan Poblacion, Davao City Martes sa buntag, Mayo 3, 2022.Sa maong hitabo, daling miresponde ang mga personahe sa Calinan Police Station ug Central 911 aron i-kordon ang maong lugar.Apan human giinspeksiyon ang maong butang, nasayran nga pulos saging lang ang sulod sa maong karton.Miresulta kini sa bug-at nga dagan sa trapiko sa dapit.Ang awtoridad naghangyo sa katawhan nga di magpataka og bilin sa mga butang nga makapatahap sa publiko.Samtang nagpahimangno si Davao City Police Office (DCPO) chief Colonel Alberto Lupaz pinaagi sa text message ngadto sa SunStar Davao sa publiko nga mag-igmat sa bisan unsang mga gidudahan nga mga butang ug indibiduwal ug itaho gilayon ngadto sa mga awtoridad."Don't touch all unattended bags, etc. Report immediately to the nearest police stations or call the police," panawagan ni Lupaz.Mga awtoridad nagpahimangno bahin sa pasiaw o pangatik may kabahin sa bomba nga gidili kini ubos sa Presidential Decree 1727 kun "Declaring As Unlawful the Malicious Dissemination of False information o Willful Making of any Threat Concerning Bombs, Explosives or Any Similar Device or Means of Destruction and Imposing Penalties Therefor.""Dili ni maayo nga [prank] karong mga panahon sa election, adunay silot ug kaso nga paglapas sa Presidential Decree No. 1727 ang atubangon sa tawo nga madakpan nato nga magbuhat ug BOMB Jokes ug Bomb Scare sumala niini," matud pa sa nasuwat sa Calinan Police Facebook page.

Presyo sa karne nga baboy, manok misaka's palengke

Posted: 03 May 2022 03:30 AM PDT

TUNGOD sa sagunsong pagsaka sa presyo sa petrolyo niadtong Marso 2022, mga manindahay misulti nga ang presyo sa karne (baboy ug manok) nagsugod na og saka sa maong bulan base sa SunStar Price Watch niadtong Mayo 3, 2022, itandi sa presyo niadtong Enero ug Pebrero sa Agdao Public Market."Ning taas ang presyo sa karne kay nagataas man ang presyo sa gasolina, kay ginabiyahe baya," butyag ni Waweng, usa sa mga naninda sa Agdao Public Market.Ang presyo sa karne gikan P285/kilo (Enero-Pebrero) mitaas na kini ngadto sa P330 (Perna) matag kilo, Liempo naa sa P370-P380/kilo, kasagarang ribs naa sa P250-260/kilo, ribs P350-370/kilo, maskara naa sa P280/kilo, longganisa tag P280/kilo.Ang tibuok manok naa karon sa P185-190/kg samtang ang hiniwa nga mga parte niini nag-presyo gikan P190-195/kg."Sa uban gyud, karon nga presyo kay nagmahal man gyud no, ang presyo namo nga P190 dili na gyud unta na puwede, 200 gyud unta na, looy na pud mga customer moabot og P200 ang presyo," pagtataw sa naninda sa Stall 94.Namatikdan niadtong Marso base sa taho sa Philippine News Agency (PNA) nga ang Caltex, Cleanfuel, Jetti, Petro Gazz, Seaoil, ug Shell nagpataas sa presyo sa ilang gasolina sa P3.60 matag litro ug diesel P5.85 matag litro. Caltex, Seaoil, ug Shell nagpataas sab sa presyo sa kerosene sa P4.10 matag litro.Ang nag-unang hinungdan sa pagtaas sa presyo sa kalibutanong merkado mao ang nagpadayon nga gubat sa Russia batok Ukraine, ug gidid-an ang Russian crude oil sa US ug Europe, apil ang nadelatar nga panag-istorya bahin sa Iran nuclear deal.Samtang bisan kon ang presensiya sa Avian Influenza H5N1 (bird flu) sa Barangay San Isidro nakompirma sa munisipyo sa Magsaysay sa Davao del Sur niadtong Abril 4, mga manindahay nagkanayon nga way kakuwang sa suplay sa karne.

Hustisya gisinggit sa gitiping trader

Posted: 03 May 2022 03:08 AM PDT

SULTAN KUDARAT -- Hustisya karon ang gisinggit sa pamilya ug kabanay sa negusyante nga nagpa-car wash lang apan gipusil sa wala mailhing mga suspek sa dakbayan sa Tacurong, hapon niadtong Mayo 2.Ang biktima sa pagpamusil nailhan nga si Jerry Gacayan, buy and sell trader ug nagpuyo sa Barangay Tuato, President Quirino, Sultan Kudarat.Sumala ni Lieutenant Colonel Joan Maganto, city chief of police, nga nagpa-car wash lang si Gacayan sa iyang sakyanan sa General Luna Street, Barangay Poblacion sa Tacurong City sa dihang gipusil sa duha ka wa mailhing suspek tumong sa ulo, dughan ug likod nga bahin sa lawas nga namatay on the spot. Dali sab dayong miikyas ang mga suspek sakay sa usa ka motorsiklo paingon sa direksiyon sa Lambayong sa maong probinsiya.Gisubay pa karon sa kapulisan sa Tacurong City Police Station ang hitabo.

Dura: Politics of service vs patronage

Posted: 03 May 2022 03:07 AM PDT

PANAHON sa eleksiyon, mahinumdom ako sa klase sa pamolitika sa akong gialagaran nga si kanhi Konsehal Leo "Happy L.A." Avila III sa unang distrito sa siyudad sa Davao.Sa among mga diskusyon, ang brand sa iyang pamolitika mao ang "politics of service" tungod kay buot niya nga iboto siya sa mga tawo tungod sa iyang maayong serbisyo.Alang niya, di niya himuon ang "politics of patronage" tungod kay wala siya'y kapasidad nga ihatag ang tanang panginahanglan sa iyang mga political leaders sama sa mga barangay kapitan, kagawad, purok leaders, ug ubang pa.Managsama among pagtuo nga sa politics of service gikinahanglan lang sa usa ka politiko ang iyang panahon, kakugi, katakus, ug kaalaman unsaon mahimo ang usa ka proyekto gamit ang diyutay nga pundo sa opisina.Samtang, sa politics of patronage nagtuo kami nga gikinahanglan ang dakong salapi nga ihatag sa mga political leaders bugti sa ilang suporta panahon sa eleksiyon.Gasto kini nga pamolitika tungod kay atimanon ug tagbawon gayud ang mga lider sa barangay, lungsod, probinsya o kaha sa tibuok nasud. Ug aron mabawi sa politiko ang dakong gasto, nagkalain-laing matang unya sa kurapsyon ang ilang himuon.Kini maoy nahitabo sa taliabot nga eleksiyon karon sa atong nasud. Sa akong nakita, ang brand sa pamulitika ni Vice President Leni Robredo mao ang "politics of service" tungod giendorso siya sa nagkalain-laing sektor nga iyang natabangan sama sa Sumilao farmers, women organizations, civic groups, ug daghan pa. Naa may pipila ka mga elected officials ang misuporta niya, apan kadto lamang nakatagamtam sa iyang serbisyo panahon sa kalamidad.Sa dagan sab sa pamolitika ni kanhi Senador Ferdinand "Bongbong" Marcos, Jr., akong nakita nga "politics of patronage" ang mipatigbabaw tungod kay halos tanang mga lokal nga kandidato sa eleksiyon tua man misuporta niya.Suma pa sa akong amigo, misuporta sila ni Marcos Jr. tungod kay dunay dakong pundo nga magamit nila sa ilang kampanya. Ug tungod kay kusog sa survey, segurado silang modaug sa eleksiyon ug natural mabuhong unya sila sa mga grasya gikan sa mosunod nga administration.Tungod kay nakadawat man sila og campaign funds, natural nga ilang himuon ang tanan (legal ug ilegal) nga pamaagi aron lang modaug ilang kandidato.Kining eleksiyona maoy usa ka pagsulay kung unsa man nga matang sa pamolitika (politics of service o politics of patronage) ang palabihon sa mga botante.Sa akong kasinatian, sa politics of service tanang sektor ang serbisyohan. Apan sa politics of patronage, ang mabulahanan lamang kadtong mga tawo nga nakatabang nila panahon sa eleksiyon.
at

No comments:

Post a Comment

Subscribe to: Post Comments (Atom)

End of Summer Sale ☀️😎

20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...