https://www.sunstar.com.ph/

---

• Panawagan: Umento sa suholan
• Lola nadasmagan, patay
• Manag-uyab nag-date sa kalibunan, gitulis
• Dancesport team tinguha ang 12 golds
• Suns gipamulta’g P1 milyones
• Beterano batok batan-on
• Little League Baseball ipahigayon sa Carmen
• Greg Slaughter mitingog sa iyang sitwasyon sa PBA
• Rookie jersey ni Kobe moabot sa P261 milyones
• Kapitan sa Brgy. Buhisan gihulga
• 8 ka graduates sa mga tunghaan sa Sugbo top sa LET
• Editoryal: Bag-ong hikoganan?
• Barrita: Labing taas nga taytayan sa Pilipinas
• Anak sa magtiayong Baringuian migraduwar, miduaw sa lubnganan
• Bag-ong CIDG chief miawhag sa dekalidad nga imbestigasyon
• Goyo mihimakak sa akusasyong gi-post sa FB nga milambigit niya sa drug lord
• Talk to Papa Joe: Silingan
• Globe mitabang sa 16K kapin ka pamilya sa Vismin regions
• Layko miawhag sa ‘Catholic vote’

Panawagan: Umento sa suholan Posted: 01 May 2022 05:45 AM PDT Pagpausbaw sa minimum wage ug pagwagtang sa labor contractualization mao ang nag-unang panawagan sa mga mamumuo atol sa ilang rally sa pagsaulog sa Labor Day kagahapon, Mayo 1.Ang walhong Alyansa sa mga Mamumuo sa Sugbo-Kilusang Mayo Uno (AMA Sugbo-KMU), Gabriela Women's Party, uban sa militanteng labor groups nga nagbase sa Sugbo, ninglusad og rally sa sentro sa dalan Colon, dakbayan sa Sugbo. Ubang grupo mihimo og rally sa Fuente Osmeña.Lakip sa ilang panawagan sa kagamhanan mao ang paghatag og igong ayuda sa mga mamumuo nga naapektohan kaayo sa pandemiya sa Covid-19 sa miaging duha na ka tuig, diin daghang estabilisemento ang temporaryo o hingpit nang nanirado sa ilang operasyon.Laing dakong panawagan sa grupo mao ang pagpaumento sa kasamtangang minimum wage nga P404 ngadto sa P750 matag adlaw, pagwala na sa tanang porma sa contractualization sa trabaho, ug paghatag og patas nga pag-atiman ug proteksiyon sa mga mamumuo.

Lola nadasmagan, patay Posted: 01 May 2022 05:37 AM PDT Patay ang usa ka 73 anyos nga lola ug kritikal ang 17 anyos nga apo nga babaye human madasmagi og motorsiklo sa ilang pagtabok sa dalan Katipunan sa Barangay Tisa, siyudad sa Sugbo, alas 4:00 sa kaadlawon kagahapon, Mayo 1, 2022.Si Elisa Piquinto, 73, namatay sud sa pipila ka oras sa tambalanan human wala makaagwanta sa sakit nga naangkon ug ang iyang apo nga si Claire Bernadette Gacasan, 17, kritikal atol ning pagsuwat.Si Rosita Gacasan, anak sa namatay ug inahan ni Claire Bernadette, nisaysay sa Superbalita Cebu nga ang duha sayo ninglakaw aron moadto unta sa Carbon Public Market aron mangompra alang sa kasaulogan sa adlawng natawhan ni Claire karong adlawa, Mayo 2, 2022.Matod ni Rosita, nga una siya nitabok sa dalan Katipunan ug nagpaabot sa atbang samtang nagsunod kaniya ang iyang anak uban sa apohan.Dihang naa na sa dalan ang duha, asoy ni Rosita, nakauna og tabok ang iyang anak rason nga iya kining gisinggitan nga balik sa agi kay aron maalalayan ang iyang lola.Apan si Rosita nakakita na daan sa motorsiklo nga nagpadulong sa ilang dapit ug giingong kusog ang dagan sa motorsiklo nga paingon sa sentro sa Tisa ang rumbo.Wala magdahum si Rosita nga nasapo o naigo ang iyang inahan ug anak sa motorsiklo ug maayong pagkalagpot niini sa dalan atol sa pagkabangga.Daling gidala ang duha sa tambalanan apan pipila ka oras, namatay si Piquinto ug ang 17 anyos padayon nga giobserbahan sa pagkutlo ning taho.Si Rosita wala magdahum sa hitabo tungod kay ang iyang inahan igo ra mibakasyon sa ilang balay gikan sa lungsod sa Daanbantayan tungod sa birthday sa iyang apo.Ang hepe sa Labangon Police Station 10, Police Major Janelito Marquez, niila sa drayber sa motorsiklo nga si Rommel Panugaling, hamtong, bayot ug taga Back Rubber, Basak San Nicolas, siyudad sa Sugbo.Sa imbestigasyon sa Labangon Police Station, nasayran nga nag-backride ni Panugaling ang laing duha ka mga bayot usab.Nasayran nga gawas nga hubog, nagmaneho ang maong bayot nga si Panugaling nga walay lisensiya ug overloaded sa backride.Si Panugaling nga nahinabi sa Superbalita Cebu niangkon nga nakainom na kini gikan naglingawlingaw uban sa iyang amigong bayot sa usa ka restobar sa Gen. Maxilom Ave., sa dakbayan sa Sugbo.Si Panugaling daw wala pa sa iyang hunahuna nga naguol tungod sa iyang naligsan nga namatay samtang usa niini ang kritikal.Si Panugaling mag-atubang og kasong reckless imprudence resulting to homicide ug serious physical injury ug gipriso na sa selda sa Labangon Police Station 10.

Manag-uyab nag-date sa kalibunan, gitulis Posted: 01 May 2022 05:20 AM PDT Manag-uyab nga nag-date sa kalibunan o kasagbutan sa Sitio Bibina, Barangay Looc, dakbayan sa Danao, ang gitulis sa wala mailhing tawo, alas 9:30 sa gabii sa Biyernes, Abril 29.Naminghoy si John (dili ngan), 19, ulitawo ug taga Barangay Calawisan, dakbayan sa Lapu-Lapu, ug ang iyang uyab nga si May (di tinuod ngan), 18, taga Barangay Suba sa Danao.Si Police Staff Sgt. Allan Vertucio sa Danao Police Station nga nahinabi sa Superbalita Cebu, nagkanayon nga ang mga biktima ni-report sa krimen sa alas 7:55 sa buntag sa Dominggo, Mayo 1, 2022.Sumala pa, ang manag-uyab wala dayon maka-report sa insidente sa kapulisan gumikan sa ilang kahadlok basin sundan sa tulisan.Matod ni Vertucio, ang manag-uyab naghinamhinam na unta sa ilang date dihang niabot sa nahisgutang lugar nga nagmotorsiklo.Ug gumikan sa kabugnaw sa palibot ug kamingaw sa lugar, dugang sa pulis, ang duha nilahos sa sudlunon nga lugar sa kalibunan.Apan kalit lang nga usa ka wala mailhing lalaki ang nition kanila og armas ug nideklarar og tulis."Kalit ra man gitiunan sa armas ilang agtang, gipanguha ilang selpon," dugang asoy ni Vertucio.Apan wala makamay-on ang mga biktima sa nag-inusarang tulisan tungod sa kangitngit sa palibot.Human sa pagpanulis, nagdali pagsibat ang tulisan nga dala ang ilang mobile phone nga Iphone XR nga balor og P28, 000 ug Vivo Y15 nga nagkantidad og P10,000.Hinuon wala dad-a ang motorsiklo. Ang manag-uyab wala na modayon sa ilang pag-date sa kalibunan ug nanguli.Ang kapulisan sa Danao naniid karon sa responsable sa pagpanulis sa manag-uyab sa hulit nga dapit.Tambag sa kapulisan, maayong mag-date sa tukma nga lugar, dili sa mangitngit nga kalibunan ug awaaw nga dapit.

Dancesport team tinguha ang 12 golds Posted: 01 May 2022 05:18 AM PDT Dominasyon ang tumong sa Philippine Dancesport delegation sa ilang pagsulong ngadto sa Vietnam alang sa Southeast Asian (SEA) Games nga sugdan karong Mayo 12, 2022 didto sa Hanoi.Sa di pa sila molarga ngadto sa Vietnam, gihatagan ni dancesport patron Edward Hayco og saktong send-off ang miyembro sa PH team kagahapon, Mayo 1, didto sa Sky Deck, Beverly View niining dakbayan.Ang dancesport maoy usa sa mihatag og dakong tabang sa Philippine Team niadtong 2019 SEA Games sa Manila, diin midaog sila'g 10 ka gold medals ug duha ka silver medals.Ang Pilipinas maoy nahimong overall champion niadtong tungora pinaagi sa 149 gold medals, 117 silvers ug 121 bronzes.Tumong karon sa dancesport team nga palabwan pa ang ilang nakab-ot niadtong 2019.Matod ni coach Ronnie Steeve Vergara, andam na ang team ug tinguha nila nga ma-sweep ang kompetisyon pinaagi sa pagdaog sa 12 ka gold medals.Dugang pa ni Modern Standard coach German Enriquez nga lahi ang pamati ug dako nga achievement ang pagdaog didto sa lugar sa host country.Ang PH delegation naglangkob sa upat ka pares nila Pearl Marie Cañeda ug Wilbert Aunzo, Angelo Marquez ug Stephanie Saballo, Sean Aranar ug Anna Nualla, Mark Gayon ug Mary Joy Renigen.Tulo niini ang lumad nga taga Cebu nga mao sila Cañeda, Aunzo ug Marquez.Niadtong 2019 SEA Games, ang pares ni Cañeda ug Aunzo midaog og tulo ka gold medals, samtang si Marquez ug Saballo milangkat og duha ka gold medals uban sa usa ka silver medal.Matod pa sa mga atleta, di lalim ilang naagian tungod sa pandemiya, diin naapektohan sila physically ug emotionally.Sigon nila nga sa pagsugod sa pandemiya, wa na sila ka training kay sirado ang studios tungod sa restrictions, wa pud silay kompetisyon nga maapilan.Usa ang Hanoi SEA Games sa nasibog tungod sa pandemiya.Tungod niadto, midako ang timbang sa mga dancers. Apan ila rapud ning nabuntog nga tahas tungod sa dedikasyon ug passion sa dancesport.Nakadawat pud og dugang reinforcement ang mga atleta pinaagi sa mga world champions nga si Edgar Marcos Borjas sa Spain, Alina Nowak sa Poland ug Paolo Bosco sa Italy.Mitabang ang foreign coaches sa pagpangandam sa PH team.Mapasalamaton pud ang mga atleta sa tabang nga gihatag sa Philippine Amusement and Gaming Corporation (Pagcor) ug sa local ug foreign coaches.Anaa pud sa send-off mao sila dancesport technical manager Rendon "Loloi" Crisaldo, Cebu City Sports Commission (CCSC) Chairman John Pages ug Hayco.Ang SEA Games gitakda karong Mayo 12 ngadto sa 23 sa Hanoi, Vietnam.

Suns gipamulta’g P1 milyones Posted: 01 May 2022 05:17 AM PDT Tungod sa paglapas sa injury reporting rules, pamultahon sa National Basketball Association (NBA) ang Phoenix Suns og $25,000 o P1,309,512.Ang maong multa gisilot tungod kay wa mapahibalo sa Suns ang status ni Devin Booker sa Game 6 sa first-round playoff matchup batok Phoenix Suns ug New Orleans Pelicans.Gusto sa NBA nga ipahibawo daan ang status kon moduwa ba o dili si Booker.Miduwa si Booker sa Game 6 gikan sa iyang pagpaalim sa strained right hamstring aron tabangan ang Suns batok Pelicans, 115-109, niadtong Biyernes (PH time).Gitapos ni Booker ang maong duwa nga adunay 13 ka puntos, lima ka rebounds ug tulo ka assists.Sulod na sa next round ang Suns diin ilang agbaton ang Dallas Mavericks. Ang Game 1 sugdan karong Martes didto sa Phoenix, Arizona.

Beterano batok batan-on Posted: 01 May 2022 05:15 AM PDT Sugdan na karong adlawa ang second round sa National Basketball Association (NBA) playoffs, lakip sa moabli mao ang matchup batok Golden State Warriors ug Memphis Grizzlies sa Western Conference.Anaa sa Memphis ang homecourt advantage tungod sila man ang No. 2 seed samtang ang Golden State Warriors mao ang No. 3 seed. Ablihan ang maong series ngadto sa FedEx Forum sa Memphis, Tennessee.Gitawag ang matchup nga duwa batok sa beterano ug batan-on. Ang kampo sa Golden State mao ang mga beterano samtang ang Memphis ang mga batan-on.Ang Warriors nga gipangulohan sa Splash Brothers Stephen Curry ug Klay Thompson, moduwa sa ilang ikapito nga Western Conference semifinal sulod sa 10 seasons.Mao pud ang unang higayon nga healthy ang duha ka shooter sukad mikulit sila og lima ka sunodsunod nga NBA Finals gikan 2015-2019 seasons.Ang 22 anyos nga si Ja Morant, sa laing bahin, midala pagbalik sa Grizzlies sa West semis sa unang higayon sulod sa pito ka tuig.Si Morant nasulod sa NBA niadtong 2019 diin si Curry ug Thompson aduna nay tulo ka championship rings.Bisan paman niini, dako gihapon ang pagsalig ni Morant sa iyang team."We feel like we are one of the best backcourts in the league as well," saysay ni Morant. "So, going into any matchup, we're taking ourselves over anybody. We're very confident. We put in the work."Uwahing nag-abot ang duha ka teams sa playoffs niadtong 2015, diin midaog ang Warriors sulod sa unom ka duwa. Niadtong tuiga pud, nadaog sa Warriors ang ilang unang franchise championship sulod sa 40 ka tuig."We've been around the block, and we're trying to get back to the mountaintop and understand the opportunity in front of us," matod pa ni Curry.

Little League Baseball ipahigayon sa Carmen Posted: 01 May 2022 05:14 AM PDT Nangandam na ang North Cebu baseball team sa ilang pagsalmot sa Little League Baseball Philippines Series 2022 Visayas Qualifiers nga duwaon mismo sa ilang balwarte sa Carmen, Probinsiya sa Sugbo karong Mayo 14 ngadto sa 21.Ang North Cebu selection sa players gikan sa munisipyo sa Carmen, Asturias, Sogod ug Tuburan. Lakip sa maong torneyo ang teams sa Visayas region.Tumong sa teams ang makakuha og luna alang sa national diin magsangka ang top little league teams sa nasod.Ang mga kategorya sa liga mao ang Major League alang sa 10 ngadto sa 12 anyos, Juniors League alang sa 13 ngadto sa 14 anyos ug Seniors League alang sa 13 ngadto sa 14 anyos.Sigon pa sa head coach sa North Cebu nga si Mark Arsenio Davidon grabe ka excited ang iyang players kay duha ka tuig gyud wa makaduwa og dako nga liga tungod sa hulga sa pandemiya.Mapasalamaton pud ang presidente sa North Cebu Charter nga si Ernesto Mangapis Jr. sa local government unit sa Carmen sa pagdawat sa tahas isip host sa Little League Visayas Elimination."Kasagaran sa among players ani sa Seniors League kay katong sa Palarong Pambansa players. Ang atong Juniors kay adunay players sa Central Visayas Regional Athletic Association, samtang ang Little League gikan sa grassroots nato," sigon ni Davidon sa SunStar Superbalita.Dugang pa niya nga nangayo pud sila og tabang sa ilang kanhi player nga varsity players sa Manila sa pag-train sa mga bata.

Greg Slaughter mitingog sa iyang sitwasyon sa PBA Posted: 01 May 2022 05:14 AM PDT Gipahibalo ni Greg Slaughter ang iyang status sa Philippine Basketball Association (PBA) ug ang tinguha nga malakip sa Gilas Pilipinas kagahapon, Mayo 1, sa iyang opisyal nga social media account.Suwat pa ni Slaughter nga wa pa siya matawagan og balik sa NorthPort human ma-expire ang iyang kontrata niadtong Enero 31.Sigon pa sa 33 anyos nga kanhi Rookie of the Year ug Best Player of the Conference awardee nga misuway pud siya og volunteer sa national team nga mao ang Gilas Pilipinas, apan wa siya madawat."I expired at the end of January and talked to our team manager about extending. After our meeting he said he would get back to me," tipik sa post ni Slaughter, "I never head back then my contract expired."Ang seven-foot center miduwa sa University of the Visayas (UV) Green Lancers sa wa pa kini mobalhin sa Ateneo de Manila alang sa University Athletic Association of the Philippines (UAAP).Si Slaughter mao ang top pick sa Barangay Ginebra sa 2013 PBA Rookie Draft.Matod pa ni Slaughter na di siya kapili karon kon asa siya makaduwa sa PBA.Apan, bisan pa man niining mga pagsulay sa iyang basketball career, madasigon gihapon si Slaughter ug nangandam sa adlaw nga moduwa siya og balik sa professional league."I am continuously learning, training, and getting better everyday, preparing for wherever I play next!" matod niya.

Rookie jersey ni Kobe moabot sa P261 milyones Posted: 01 May 2022 04:37 AM PDT A jersey nga gisul-ob ni anhing Kobe Bryant sa iyang rookie season, lakip na ang duha ka playoff games, ibaligya sa auction.Ang maong jersey sa 1996-97 season mokabat ngadto sa $3 milyones o P157 milyones ngadto sa $5 milyones o P261 milyones, pinaagi sa online auction karong Mayo 18, 2022 sa David Kohler of SCP Auctions.Ang No. 8 jersey nga gipa-auction, gigamit ni Bryant sa regular season sa Los Angeles Lakers niadtong Abril 13, 1997 batok sa Utah Jazz ug Abril 17, 1997 batok sa Sacramento Kings.Gisul-ob pagbalik ni Bryant ang maong jersey sa Mayo 8 ug 10, 1997 atol sa Western Conference semifinals batok Utah. Midaog ang Lakers sa first game, diin miiskor si Bryant og 19 puntos. Napildi sila sa second.Sa iyang 20 ka tuig sa liga, midaog og lima ka championship si Bryant kini sa tuig 2000, 2001, 2002, 2009 ug 2010.Subo lamang kay mitaliwan si Bryant sa edad nga 41 tungod sa helicopter crash didto sa California.Namatay pud ang iyang 13 anyos nga babayeng anak si Gianna ug pito nila ka kauban sa helicopter.

Kapitan sa Brgy. Buhisan gihulga Posted: 01 May 2022 04:37 AM PDT Gibanabana nga moabot sa napulo ka giingong armadong mga tawo nga pareha og mga suot nga nagsakay sa mga motorsiklo ang ning-harass sa pamilya ni Buhisan Barangay Captain Gremar Barete sa dakbayan sa Sugbo, pasado alas 9:00 sa gabii sa Sabado, Abril 30, 2022.Sa interview sa Superbalita Cebu kang Barete, nibutyag siya nga atol sa hitabo, wala siya diha sa ilang panimalay sanglit niadto siya sa silingang barangay sa Toong ug sa iyang pag-uli na sa ilang balay, diha na siya nasayod sa nahitabo."Ang recovered duha ka slug (bala sa armas), ingon sa silingan duha ka buto (ilang nadungog). Gisuwatan ang pader sa akong parkinganan og ingon nga 'Gahi mo diria, Piti niya Mo' duna pud gipaskin nga papel sa bungbong nga naay suwat nga 'Warning Pa Lang to Barete'," matod ni Barete.Nahibulong si Barete kon nganong siya ang gipuntirya nga unta ang iyang gidaganan konsehal ra man sa siyudad,"Basig part ra pud na noh. I don't know unsa man pud ilang gi-after nato nga konsehal ra man ta, so nganong dili man sila sa mga higher rank..," dugang niya."Sa unang eleksiyon naa to (pag-harass) apan karon mas grabe ni kay niadto na gyud sa balay naghimo na gyud og paskin," dugang asoy ni Barete.Si Barete nipaabot na niini sa kapulisan ug gipa-blotter na usab aron kini ang iyang sumbanan alang sa mosunod nga lakang ilabi na sa posible nga pag-request og police escort."Basin kay ingon ani nga threat for safety, dili lang sa akoang kaugalingon, sa atong silingan, sa atong pamilya, kay basin maapil medyo slow down ta but padayon gihapon ta sa atong tumong," sumala ni Barete.Naglaraw si Barete nga human sa maong hitabo, mopaabot sa iyang grupo kon asa kini mikuyog sa pagdagan niini sa pagka konsehal ubos sa Bando Osmeña Pundok Kauswagan (BOPK).Si Barete miingon nga bisan pa man sa mga bahad karon nga nahitabo sa iyang kinabuhi, dili kini maoy makapapakgang sa iyang mga plano sa pagserbisyo sa siyudad."Usa ni sa destiny will guide you kon asa gyud ta, pabilin gihapon ta wala gyud tay laing tumong ang pagserbisyo sa dakbayan," dason niya.Samtang si Jojie (ngan gipugngan), usa sa mga silingan ni Barete nga maoy napangutan-an sa usa sa mga kuyog nga nagpasalba sa gawas sa balay sa kapitan, niingon nga ang nangutana kaniya nagsakay og motorsiklo nga sa iyang pagtuo maoy look-out aron kini mopahibawo kon positibo ang ilang plano.Dugang ni Jojie, ang usa sa sakay sa motorsiklo naka-sleeveless lang ug walay suot nga face mask, ang minaug sa motorsiklo nga mihunong atbang sa balay sa kapitan.Nangutana matod pa kaniya kon asa si kapitan tungod kay nakakita man siya sa paglakaw ni Barete rason nga iya kining giingnan ang katong nangutana, apan sa iyang huna-huna tungod kay daw dili motuo sa iyang ingon nga wala hinungdan nga hinay-hinay kining nipalayo kay nahadlok."Mga tres minutos, mao to naay mga buto nga duha ka higayon akong nadunggan," sugilanon ni Jojie.Si Police Major Janelito Sanchez, hepe sa Labangon Police Station, niklaro nga wala paulani og bala ang balay sa kapitan kondili dunay nagpasalba sa gawas sa balay niini.Ang Labangon Police Station nag-imbestigar na sa insidente sa gawas sa panimalay sa kapitan sa Buhisan.

8 ka graduates sa mga tunghaan sa Sugbo top sa LET Posted: 01 May 2022 04:37 AM PDT Walo ka elementary education graduates gikan sa mga tunghaan sa dakbayan uyg lalawigan Sugbo ang top 10 sa Marso 2022 Licensure Examination for Teachers (LET), sumala sa Professional Regulation Commission (PRC) sa Biyernes, Abril 29, 2022.Si Maricris Quingco Colipano sa Cebu Technological University (CTU)-Carmen, maoy nikuha sa top spot uban sa iyang rating nga 92.4 percent.Si Lucille Taro Dejos sa Talisay City College ug si Nikie Loren Decena Villa sa CTU-Main, maoy third place sa rating nga 91.4 percent.Si Jomar Concepcion Manada sa University of Cebu (UC), Glenmer Roldan Redido sa CTU-Moalboal, Khuenalyn Libradilla Ricardo sa CTU-Moalboal, Dominique Marie Pauline Navales Policios sa University of San Carlos ug Kim Verlie Balongcas Pianiar sa CTU-Main ang naa sa fifth, sixth, seventh, ninth ug 10th places.Nasulod usab sa top 10 mao sila si Ermelyn Gang-on Florida sa Davao Central College (second); Noel Masucol Ramos Jr. sa Mati Doctors College (third); Nica Mae Lacsamana De Castro sa Universiy of the Philippines-Diliman (fourth); Monique Recorba Dela Corta sa Holy Cross of Davao College (sixth); Elaiza Agbon Taga-an sa University of Southeastern Philippines-Davao City (sixth); Lodiza Lamano Magdilag sa University of Mindanao-Tagum (eight); Angelica Estrella Besa sa Cataingan Municipal College (ninth); Emylyn Ali Armodia sa University sa Mindanao-Davao City (10th); ug Desireh Jyne Pasigado Baclid sa Southern Philippines Methodist College (10th). (SunStar Cebu/SunStar Philippines)

Editoryal: Bag-ong hikoganan? Posted: 01 May 2022 04:07 AM PDT Dili na maihap ang mga kaso sa paghikog pinaagi sa pag-ambak sa duha ka mga nag-unang taytayan nga nagdugtong sa isla sa Mactan ug mainland sa Sugbo, ang Mandaue-Lapu-Lapu Bridge nga natukod sa dekada 70 ug Marcelo B. Fernan Bridge nga natapos sa 90s.Dunay pipila ka mga pagsuway nga napakgang apan daghan gyud ang nakabsan sa kinabuhi. Nahimo kini usa sa mga problema sa nagdumala sa bridge nga nipatuman sa nagkalainlaing pamaagi.Sa ikatulong taytayan, ang Cebu-Cordova Link Expressway (CCLEX), lakip ba kaha kini sa natuki o gihatagan og igong gibug-aton sa seguridad sa labing moderno, labing habog ug labing taas nga taytayan sa nasod karon? Ang giilang iconic landmark ug garbo sa Sugbo nga giablihan na sa mga motorista niadtong Sabado sa hapon, Abril 30, 2022.Ug namatikdan nga dunay parte sa kilid alang sa pedestrian sa matag habig sa gilay-on sa taytayan. Sa umaabot, basin paagian kini sa mga tawo o kaha mag-ehersisyo. Maong risgo alang sa nawad-an og balanse sa panghunahuna nga magkutlo sa hinuwaman nga kinabuhi.Maayong mahatagan kini og igong konsiderasyon sa pagpatuman sa seguridad sa CCLEX. Bisan walay kalabotan ang bag-ong taytayan sa hitabo (simbako) unya apan dili maayong balita ug makaduhig sa ngan sa dalaygong inprastraktura, dili lang sa iyang dakong matampo sa transportasyon, lakip na nga bag-ong destinasyon sa turismo.Apan lisod masimba ug mabasa ang panghunahuna sa tawo nga daklit nga panahon sa paghashas sa seguridad nga moagi sa taytayan. Usa kini sa dakong hagit sa pagdumala sa taytayan, subay usab sa kasinatian sa nag-unang duha ka mga taytayan nga milabang sa Mactan Channel.Busa, hinaut nga makakita og diskarte ang tagdumala sa CCLEX ning problema nga way kalabotan unta ang dakong inprastraktura alang sa ekonomiya, apan sambol sa iyang dungog kon simbako maila nga bag-ong dapit nga hikoganan.

Barrita: Labing taas nga taytayan sa Pilipinas Posted: 01 May 2022 04:04 AM PDT Usa ka kanhi presidente, sa dayon niyang dagan sa pagkapangulo, nipagawas og libro sa mga komedya nga siya maoy starring. Usa niini bahin sa iyang paglakaw sa bayabayon ug nakakita siya og usa ka botelya. Sa dihang iyang giablihan, nigawas ang usa ka genie.Genie: "Giluwas ko nimo gikan sa usa ka gatos ka tuig nga pagkabilanggo sud sa maong botelya. Busa, hatagan ta kag usa ka wish." Presidente: "Tukori kpg tulay gikan Cebu padung Bohol." Genie: "Lisod kaayo na. Nihit ang bas ug graba, mahal ang semento. Pangitag laing wish." Presidente: "Himoa lang kong bright." Genie: "Pila ka lane gusto nimo sa bridge? "Wa pa mahimo ang taytayan tali sa Cebu ug Bohol. Apan ang Cebu-Cordova Link Expressway (CCLEX), ikatulong land link sa Cebu ug Mactan, nahuman na. Dunay gitas-on nga 8.9 kilometros gikan sa syudad sa Sugbo paingon sa Mactan agi sa lungsod sa Cordova ug karon, maoy laing taas nga taytayan sa Pilipinas.* * *Ang proyekto giinugorahan ni Presidente Rodrigo Duterte niadtong Miyerkoles, Abril 27, 2022.Ang maong toll bridge usa ka joint venture sa mga lokal nga kagamhanan sa siyudad sa Sugbo ug Cordova ug sa Metro Pacific Tollways Corp. (MPTC) ug Cebu-Cordova Link Expressway Corp. (CCLEC).Ang desinyo sa maong tulay alang sa gikusgon nga 60 ngadto sa 80 kilometros matag takna. Ang iyang navigational clearance o gitas-on anaa sa 52 metros aron makaagi ang dagkong mga barko sa ilawom niini.Gipaabot nga hasta sa 50,000 ka mga sakyanan ang moagi sa maong tulay matag adlaw.Si MPTC chairman Manuel V. Pangilinan namahayag nga ang CCLEX, nga gitukod sa balor nga P33 bilyunes, makapalambo sa patigayon ug makaagni sa mga investor nga mobubo sa ilang phunan dinhi sa Sugbo.* * *Apan ang gipaabot sa kadaghanan mao ang pagsulbad sa kahuot sa trapiko sa nag-unang duha ka mga taytayan nga nagdugtong sa Cebu ug Mactan maong ang karaang Mandaue-Lapu-Lapu Bridge ug ikaduha mao ang Marcelo B. Fernan Bridge mnga pulos nahimutang sa siyudad sa Mandaue tabok sa syudad sa Lapu-Lapu.

Anak sa magtiayong Baringuian migraduwar, miduaw sa lubnganan Posted: 01 May 2022 03:53 AM PDT Human madawat ang diploma atol sa graduation ceremony sa senior high school, walay langan mibisita si Samantha Baranguian sa lubnganan sa iyang mga ginikanan.Kuyog sa iyang suod nga mga higala, gibisita ni Samantha ang lubnganan sa iyang amahan nga si Peter ug inahan nga si Malou.Kini aron ipakita sa magtiayong namatay nga nakuha na niini ang taudtaod nga pangandoy sa duha alang niya.Matod ni Samantha nga sa adlaw nga Biyernes, Abril 29, 2022, sa alas 7:00 sa buntag, mao ang ilang paggradwar sa senior high sa tunghaan sa Notradame Academy sa lungsod sa San Fernando."Mao man gyud na akong gipaninguha karon nga bisan wala na sila mama ug papa ba, kay mao ang ilang gipangando. Gamay naman lang unta ang kulang nga maka-graduate ko apan wala gyud makasaksi sila mama ug papa, mao na nga ako gyud giadto aron maipakita nako nila akong diploma," saysay ni Samantha.Dugang niya nga sa iyang pagpaso, nagsagol ang kalipay ug kaguol nga iyang gibati tungod sa una kay nagmalampuson siya nga wala masaksihi sa iyang mga ginikanan."Ang ako lang nga masulti nga pinangga nako gyud ang akong mga ginikanan ug mintras buhi pako, kon kaya nako mahatag ang ilang kalipay, ang ilang pangandoy buhaton, ako bitaw i-offer nilang tanan. Kining movement nako ako ning ihatag nilang mama ug papa tanan," dugang niya.Si Samantha mokuha sa kursong B.S. Medical Technology sa Southwestern University (SWU) PHINMA."Actually, Sir, nakapasar man ko sa Hawak Kamay Scholarship sa Southwestern. So, ni-enroll nako," dugang ni Barangui-an."

Bag-ong CIDG chief miawhag sa dekalidad nga imbestigasyon Posted: 01 May 2022 03:51 AM PDT Bag-ong director sa Criminal Investigation and Detection Group (CIDG) nibisita sa iyang mga sakop sa Central Visayas aron ipahibawo ang mga direktiba ug guidelines lakip na ang pagsulbad sa mga dagkong kaso nga nalubong na sa kalimot.Si Police Major General Eliseo Cruz nakigtagbo sa mga opisyal sa CIDG 7 niadtong Sabado, Abril 30, 2022, aron makighimamat ug ipasupot usab ang iyang mando ilabi na sa ilang mandato nga mao ang pag-imbestigar sa mga high profile nga kaso.Matod niya, dinhi sa Sugbo daghang gipang-umol nga Special Investigation Task Group (SITG) apan wala gyud kini masulbad.Gumikan niini, iyang gimandoan ang iyang mga personnel nga ilang palambuon pa ang ilang investigation skills aron kadtong lisud sulbaron nga kaso, mamahimong makakuha silag maayong kalamboan ug ilang madakpan ang mga responsabli."Yan ang ating guidance kanina na tutukan ng husto 'yung mga SITG (Special Investigation Task Group) na aming hinahawakan, kahit na hindi na malakas ang issue, hindi na masyadong pinag-uusapan, for as long as it is not yet solve or not yet cleared, we have to do it. Kailangan naming ma-identify kung sino man ang mga responsible sa case na hinahawakan namin and to file the case and of course to arrest them," matod ni Cruz.Dugang niya nga bisan pag lisod sulbaron ang usa ka krimen, kinahanglanga dili mohunong ang mga imbestigador sa CIDG sa pagkuha sa mga impormasyon ug subayon ang posibling hinungdan nganong nahitabo ang rimen.Gitinguha usab niya nga taas ang kalidad sa mga imbestigador sa CIDG 7 aron mahatagan og hustisya ang kamatayon sa usa ka tawo ug mosalig sila sa ilang ahensiya.Gimandoan niya si Police Colonel Ireneo Dalogdog, hepe sa CIDG 7 Regional Field Unit, nga dili magpanuko sa pagtangtang sa iyang personnel nga magtinapulan sa ilang trabaho.Iyang gitahasan ang mga regional chief sa pagtaktak sa pwesto aron mahulipan kinig makamao sa trabaho sanglit ang numero unong mandato sa CIDG mao man ang pagsulbad sa tanang krimen.

Goyo mihimakak sa akusasyong gi-post sa FB nga milambigit niya sa drug lord Posted: 01 May 2022 03:49 AM PDT ORMOC CITY - Gihimakak ni congressional candidate Atty. Goyo Larrazabal nga way kamatuoran ang post sa usa ka Facebook page nga 'FYI' nga nag-akusar kaniya nga nidawat og campaign fund gikan sa usa ka gituohang drug lord nga si Herbert Colangco.Nakadawat usab ang usa ka mantaan sa Ormoc bahin maong sa impormasyon gikan sa usa ka 'confidential source' diin makita ang listahan sa mga gituohang campaign donors ni Larrazabal alang sa 2022 elections.Sa ikalimang linya, makita ang pangan nga 'H. Colangco and Friends' nga naghatag og P5,000,000 kang Larrazabal.Gisuwayan sa pag-research sa search engine nga Google ang pangan nga H. Colangco ug nigawas ang usa ka Herbert Colangco/Colanggo, usa ka drug lord nga naa karon sa New Bilibid Prison.Base sa nigawas nga artikulo sa nasyonal nga mantalaan pinaagi sa Google, si Colangco nalambigit na kaniadto sa isyu nga naghatag og campaign funds kang Senator Leila de Lima.Niini, si Larrazabal nitubag pinaagi sa iyang Facebook account ug nanghagit nga makig-atubang sa Philippine National Police (PNP) ug niingon nga bakakon, talawan ug binayran ang tinubdan niini.Base sa listahan nga gihimo sa usa ka Microsoft Excel file, mikabat sa 45 ang donors ni Larrazabal ug mikabat sa P63,300,000 ang nakuha nga pundo.Ang labing dako nga kantidad giingong gikan sa H. Colangco and Friends nga mobalor og P5,000,000 sa listahan.

Talk to Papa Joe: Silingan Posted: 01 May 2022 03:47 AM PDT Dear Papa Joe,Tawaga lang ko og Joel, 30 anyos. Di ni about sa lovelife akong problem.Nag puyo ko sa Lapu-Lapu sa usa ka baratu ra nga subdivision. Mikuha ko og unit nga walay garahianan.Karon kani akong tupad naay sakyanan ug molapas gyud sa amo pero nisabot ra ko kay lagi tupad ra. Pero di man nato matag-an ang kinabuhi so nakapalit ko og sakyanan nga second hand ra gud so akong i-parking sa akong tungod.Nasuko man siya kay maglisud na kuno siya og park. Iya kong giaway kay maglisud na kuno siya og park.Kon mauna siya og uli kay ako say maglisud og park mao nga butangan nako og tanum. Kay ligsan man niya.Wala pa miy officers diri mao nga wa koy kasumbungan. Unsa may buhaton ko. Tambagi ko.JOELJoel,Una sa tanan, maayong adlaw. Ang angay nimong buhaton mao ang pagpa barangay ana para masayud mong duha sa inyong mga katungod.Naanad lang na siya nga mag park diha pero angay niyang sabton nga pareho ra mo naay unit diha.Mao sad nay problema kon wa moy asosasyon kay way makapatunga ninyo sa inyong mga problema.Wa koy laing nakitang solusyon ana gawas sa pag pa barangay samtang di pa grabe ang mga nahitabo nga pwede mo resulta sa pasakitan ug damages sa properties.Papa Joe(sa inyong tampo ipadala lang sa papajoesuperb@gmail.com)

Globe mitabang sa 16K kapin ka pamilya sa Vismin regions Posted: 01 May 2022 03:47 AM PDT Ang Globe nihatag og minilyon nga hinabang sa mga pamilya nga mga komunidad nga naapektohan sa bagyong Odette, diin nikusokuso sa pipila ka rehiyon sa Kabisay-an ug Mindanao niadtong Disyembre 16, 2021.Ang Globe nikolekta og kinatibuk-ang P36.7 milyunes nga kantidad sa mga donasyon nga giapud-apod sa sayon sa kapin sa 16 mil ka mga pamilya.Samtang nakahimo sa pagtigom sa kapin sa P2.9 milyones gikan sa Globe, TM, ug GOMO customers.Ang Globe, pinaagi sa iyang ground teams, nakahatag og hinabang sa 5,094 ka mga pamilya sa mga komunidad sa Palawan, Butuan, Cagayan de Oro, Camiguin, Dinagat Islands, Surigao del Norte, Bohol, Cebu, Iloilo, Negros Occidental ug Oriental, ug Southern Leyte.Dugang pa, ang paningkamot sa iyang partner organizations sama sa Ayala Foundation, GMA Kapuso Foundation, ug Rise Against Hunger Philippines, nakahatag usab og suporta ug relief sa 11,777 ka mga pamilya sa mga apektadong dapit.Ang Globe nakamuntar usab og kapin sa 130 ka Libreng Tawag and Libreng Charging sa mga apektadong rehiyon aron pagseguro sa mga biktima sa bagyo nga makakontak sa ilang pamilya ug mga mahal sa kinabuhi.Ang technical teams sa Globe walay puas sa paspas nga pagpahiuli sa normal nga linya sa komunikasyon.Ang daghang fundraising campaigns sa Globe sama sa Globe Rewards ug GCash, nagpadayon uban sa donasyon nga gipaagi sa New GlobeOne app at glbe.co/NewGlobeONE ug #GCashGivesBack. (PR)

Layko miawhag sa ‘Catholic vote’ Posted: 01 May 2022 03:42 AM PDT Samtang ang Catholic Bishops' Conference of the Philippines (CBCP) padayong nisalikway sa pag-endurso og mga kandidato, ang Sangguniang Laiko ng Pilipinas (Laiko) niadtong Biyernes, Abril 19, nipadayag sa ilang pagtuo nga ang mga sumosunod sa simbahan makaimpluwensiya sa resulta sa eleksiyon sa Mayo 9, 2022 pinaagi sa pagsagop sa hiniusang boto.Sa usa ka radio interview, si Laiko president Bro. Raymond Daniel Cruz nagkanayon nga siya naglaum nga ang mga magtutuo makahimo sa "Catholic vote" bisan ang ilang mga lider wala moendurso og kandidato."We are calling for an orchestrated lay-initiated campaign for us to have a Catholic vote," matod ni Cruz."We hope and pray that we can be able to deliver a Catholic vote," dason niya.Ang lider sa layko nagkanayon nga ang "Catholic vote" posible kon ang mga sumosunod sa simbahan nagtan-aw sa komon nga kaayohan sa ilang pagboto."There can be a Catholic vote if all will look at common good and the advancement of the people," dugang ni Cruz.Kon tan-awon, dunay mga relihiyusong grupo sa nasod nga nailang naghimo og bloc voting, sama sa Iglesia ni Cristo (INC).Ang liderato sa INC dayag nga nagsuporta sa pipila ka mga kandidato sa matag eleksiyon.Sa pikas bahin, ang CBCP padayong walay giendurso nga kandidato sa matag eleksiyon apan gisangon nila kini nga responsibilidad sa mga layko sa pagtuboy og mga kandidato.Ang Laiko nipadayag na sa pagsuporta sa kandidatura ni presidential apirant Vice President Leni Robredo tungod sa ilang pagsalig kaniya isip "most capable candidate alang sa pagka presidente. (HDT, SunStar Philippines)

You are subscribed to email updates from SUNSTAR. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States