https://www.sunstar.com.ph/ |
- 108 nalanag sa pakals gisusi
- Duterte-Carpio nanamilit kay dili na mobalik sa local government
- Tag-iya'g balay nga nasunog wala makagawas, gilamayan
- Nagbaktas; liog nasangit sa 'wire,' nakuryentihan
- 121 menor de edad na-rescue
- CCTV sa pagtipi sa kapitan gisubay
- Estudyante nag-shabu, sikop
- Pagpatay sa parak gipaimbestigahan
- Embiid di na makaduwa?
| Posted: 02 May 2022 04:24 AM PDT KORONADAL CITY -- Nagpaalim na sa balay tambalanan ang moabot 108 ka tawo nga mitambong sa political rally alas 11:00 sa buntag niadtong Sabado, Abril 30, human giingong nangalanag sa giserbi nga pack lunch sa Lake Sebu, South Cotabato.Sa taho gikan sa Integrated Provincial Office (IPHO)-South Cotabato, nasayran nga mitambong mga biktima sa rally sa usa ka lokal nga kandidato sa maong lungsod.Atol sa rally, dunay gipang-apud-apod nga pack lunch nga maoy ilang gipangkaon.Human sa rally, nanguli na ang mga tawo apan pag-abot sa ilang balay, nagsugod na ang pagpanakit sa ilang tiyan, nagsuka ug nagkalibanga samtang ang uban nangalipong, hinungdan nga gipangdala ngadto sa Lake Sebu Community Health Care Complex Hospital.Giingong kasagaran sa mga nahilo o nalanag sa ilang gikaon nga pack lunch kadtong mga kabataan nga miuban sa ilang ginikanan sa rally.Padayon pang gisusi ang hitabo sa IPHO-South Cotabato. |
| Duterte-Carpio nanamilit kay dili na mobalik sa local government Posted: 02 May 2022 04:24 AM PDT DAW napugngan ni Davao City Mayor ug vice presidential candidate Sara Duterte-Carpio ang luha niini atubangan sa mga Dabawenyo sa iyang pagpanamilit Dominggo sa gabii, Mayo 1, 2022, atol sa grand rally sa Dumper PTDA Partylist didto sa Crocodile Park Ground sa Davao City.Sa pamulong sa mayor, iyang gipasalamatan og dako ang mga Dabawenyo diha sa mga katuigan nga nahimo siyang mayor sa dakbayan sa Davao, nga bisan sa mga pagsulay nga naagian sa siyudad sa Davao, naghugpong nga mga Dabawenyo ug mitabang kaniya sa pagsulbad sa suliran.Niya pa nga di na siya kabalik sa pagdagan sa usa ka posisyon sa local government."Mga Dabawenyo manamilit nako kaninyo kay dili nako mobalik sa local government nga pagdagan nga posisyon," tipik sa pamulong ni Duterte-Carpio.Dugang niya nga nalipay siya og dako nga nakabuhat og mga handumanan uban sa mga Dabawenyo, ug dakong garbo alang kaniya nga makahimo og kasaysayan kauban ang katawhan sa Davao City."I was a pleasure to have made memories with all of you mga Dabawenyos, and it is indeed my pride again, to make history with all of you," sulti ni Duterte-Carpio.Niya pa, nga wala hunong ang iyang pagpasalamat ngadto sa mga grupo nga naghimo ug nagpakita og suporta kaniya sukad pa sa tuig 2019.Gipasalamatan sab sa mayora ang mga tawo luyo sa mga naghimo og mga kanta, pagguhit ug ang paghimo sa mga butang nga makatawag sa iyang atensyon diha sa mga paghigugma ug ang pagdasig nga modagan sa pagka-pangulo.Nagpasalamat sab si Duterte-Carpio sa Ituloy ang Pagbabago Movement (IPM) ug sa ubang mga grupo nga nagtabang kaniya bisan paman nga pagka-bise presidente ang gidaganan niini."Nagpasalamat usab ako sa akong mga kaubanan since 2019 kauban sa Hugpong Ng Pagbabago, si Andrew E, ang Dumper Partylist kay Congresswoman Claudine Bautista-Lim, kay Trakker Lim ug kang TG Ponce, ug sa tanan," sumpay niya sa iyang mga pagpasalamat.Una mibiya sa entablado si Duterte-Carpio, mikanta kini uban ang mga local band artist nga mga miyembro sa LGBTQ+ Davao City Coalition, diin suma sa mayora nga ang maong awit iyang gidalit sa tanan aron kung madunggan kini mahinumdoman siya perme labi na kung anaa sa kalisdanan. |
| Tag-iya'g balay nga nasunog wala makagawas, gilamayan Posted: 02 May 2022 04:24 AM PDT DAVAO DEL NORTE -- Gilamayan karon sa pamilya'g kabanay ang patay'ng lawas sa 46-anyos nga lalaki kinsa tag-iya sa balay nga nasunog sa Purok 2-C, Barangay Pamacaun, Asuncion.Ang namatay giila nga si Jerry Diez, 46, minyo, kinsa giingong naapil pagkasunog sa iyang balay dihang miulbo ang kalayo alas 2:14 sa kaadlawon niadtong Sabado.Sumala pa ang biktima nahinanok pagkatulog sulod sa iyang lawak nga naa sa ubos nga bahin sa balay kon diin giingong didto nagsugod ang kalayo.Mokabat og P50 mil ang nahimong damyos sa sunog nga gikalas sa kinabuhi sa biktima.Sa paghagpat ning balita, wa pa masayri sa Bureau of Fire Protection ang hinungdan sa sunog sanglit nagpadayon pa ang ilang imbestigasyon. |
| Nagbaktas; liog nasangit sa 'wire,' nakuryentihan Posted: 02 May 2022 04:19 AM PDT DAVAO DEL NORTE -- Nasangit sa nagbitay nga electrical wire nga gituohang grounded, hinungdan nga nakuryentihan ug namatay ang mag-uuma sa Purok 3, Barangay San Roque, New Corella alas 8:30 sa gabii, Sabado.Kini ang nasuta base sa imbestigasyon sa New Corella Municipal Police Station kinsa nag-ila sa biktima nga mao si Dionisio Baltazar Palarao, 50, mag-uuma ug molupyo sa maong dapit.Matud pa nga niadtong higayona, ang biktima nagbaktas padulong nga mopauli sa ilang balay gikan nga nagtagay og ilimnong makahubog apan samtang naglakaw sa dalan aksidenteng nasangit ang iyang liog sa wire sa kuryente nga gikan sa main line sa Northern Davao Electric Cooperative, Inc.Nasayran nga ang electrical wire nagbitay sa ubos nga bahin ug gituohang grounded hinungdan sa pagkakuryente sa biktima.Nakahiagom og sunog sa likod nga bahin sa iyang liog ang biktima nga gihaya karon sa Damalerio Funeral Homes sa lungsod sa New Corella. |
| Posted: 01 May 2022 02:19 AM PDT NAKATALA na ang 10th Infantry Battalion, Philippine Army og 121 ka mga naluwas nga menor de edad nga gikataho nga gipanggamit lang sa communist terror groups (CTG) sukad pa 2016.Si Captain Mark Anthony Tito, tigpamaba sa 10th Infantry Division, nagsulti sa gipagawas nga pahayag nga ang pinakaulahing mitahan nga ilang nadawat mao ang duha ka menor de edad gikan sa Regional Operations Command, Southern Mindanao Regional Committee (ROC, SMRC) sa New People's Army uban sa laing pang duha didto sa Barangay Coronobe sa Maragusan, Davao de Oro niadtong Miyerkules, Abril 27, 2022.Si Tito nag-ila lang sa duha sa upat pinaagi sa ilang mga alyas nga sila Jomari, 18, squad political guide, ug Vina, 19, squad supply officer.Human sa ilang pagtahan, ang grupo nagtabang sa mga sundalo sa 66IB nga masubay ang duha ka M16 rifles nga ila mismong gitagoan sa Barangay Andap, New Bataan.Matud ni Tito nga ang duha ka mga menor de edad gihatud na ngado sa New Bataan Municipal Social Welfare Development Office (MSWDO) alang sa tukmang disposasyon.Gidawat ni 10ID commander Major General Nolasco Mempin ang mga nagsurender ug ang naluwas nga mga menor."To the members of the CTG, stop exploiting the Filipino youth. Surrender now and abandon the armed struggle that victimized thousands of lives," pung pa ni Mempin. |
| CCTV sa pagtipi sa kapitan gisubay Posted: 01 May 2022 02:18 AM PDT GISUBAY na sa kapulisan sa Digos City Police Station ang kuha sa closed-circuit television (CCTV) camera ngadto sa mamumuno nga nagpusil-patay kang Barangay San Jose Kapitan Angelito Zamora Balasabas, 50-anyos, Abril 27, 2022, didto atubangan mismo sa Bureau of Internal Revenue office sa Aurora 3rd, Purok Jakosalem, Digos City, Davao del Sur.Sa impormasyon nga nahagpat sa Superbalita Davao gikan sa Digos City Police Station, giingong gisubay na pag-ayo sa mga imbestigador ang kuha sa CCTV footage aron maila ug masikop ang mamumuno.Nakuhaan og hulagway ang plaka sa sakyanan sa gilulalan sa mamumuno, kinsa nag-istambay pa sa manggahan sa dapit aron maniid sa pag-abot sa kapitan.Wa pa sab gikabutyag sa Digos police kon election-related ba kini nga hitabo, sanglit nagpadayon pa ang ilang gihimong makuti nga imbestigasyon sa krimen.Ang Davao del Sur usa nga anaa sa listahan sa mga lugar ubos sa elections watchlist areas sa Police Regional Office-Davao Region. |
| Posted: 01 May 2022 02:18 AM PDT GIPASAKAAN na og kasong pagsupak sa Republic Act 9165 kun Comprehensive Dangerous Drugs Act of 2002 ang third-year college student sa usa ka karaang kolehiyo sa Davao City human kini namaligya og shabu sa nagtakuban nga pulis pasado alas 11 sa nakalabay nga semana didto sa Purok Mangga, Barangay Poblacion, Maragusan, Davao de Oro.Giila sa Maragusan Municipal Police Station (MPS) ang dinakpan nga si alyas Gerald, 24, molupyo sa NHA Bangkal, Davao City.Nakuha sa kapulisan sa Maragusan MPS gikan sa posisyon sa suspek ang gituohang shabu nga motimbang sa 1.386 gramo nga dunay street value nga P11,000 mga drug paraphernalia ug marked money.Depensa sa suspek, giingong tiggamit lamang siya ug wala siya namaligya, apan wala gihapon kini kalimod gumikan sa pagdawat niini sa marked money nga bugti sa ilegal nga druga.Sumala sa Maragusan MPS nga naningkamot sila diha sa ilang mga operasyon aron tunhay nang mawala ang ilegal nga druga sa ilang area of responsibility. |
| Pagpatay sa parak gipaimbestigahan Posted: 01 May 2022 02:02 AM PDT GIMANDO na ni Police Regional Office (PRO)-Soccsksargen Regional Director Brigadier General Alexander Tagum ngadto sa kapulisan sa Pikit Municipal Police Station nga gipangulohan ni Major Maxim Peralta ang lawom nga imbestigasyon sa pag-ambush-patay sa pulis nga si Patrolman Buagas niadtong Abril 27, 2022.Si Buagas, 25, ug minyo sakop sa Regional Mobile Force Battalion-Soccsksargen nga quick deployment law enforcement, anti-terror contingent sa PRO-Soccsksargen.Kahinumdoman nga sakay si Buagas sa iyang motorsiklo paingon sa ilang kampo gikan sa gipuy-an niya sa Alamada, Cotabato Province.Apan pag-abot sa pulis sa Barangay Batulawan sa Pikit, atbang sa Municipal Gym, kalit siyang girapido sa duha ka wala mailhing lalaki.Abtik sab nga miikyas ang mga suspetsado sakay sa laing motor paingon sa hilit nga dapit sa Pikit.Daling gisapupo sa mga kaubanan nga miresponde ang biktima ug gihatud ngadto sa Cruzado Medical Hospital, apan gibalhin dayon sa dako nga balay tambalanan sa Siyudad sa Kidapawan.Human ang pipila ka adlaw, namatay ang biktima human makaangkon og samad pinusilan sa iyang kilid ug likod sa iyang lawas. |
| Posted: 30 Apr 2022 04:51 AM PDT Daw nisawop ang tinguha nga kampyonato sa Philadelphia 7ers human ang ilang sentro nga superstar nakaangkon og injury ug posible nga dili na makaduwa.Si MVP candidate Joel Embiid adunay right orbital fracture ug mild concussion nga iyang naangkon sa ilang kadaugan sa game 6 batok sa Toronto Raptors ug wala pay timetable nga gihatag ang mga doktor kanus-a siya makabalik og duwa.Ang bigman sa 76ers nakaangkon sa injury human siya naigo sa siko ni Paskal Siakam sa Raptors dihang paingon siya nilusot sa uwahing bahin sa fourth quarter.Ang panglawas ni Embiid maoy sentro sa estorya sa 76ers sa first round sa playoff series batok sa Raptors dihang nakaangkon siya og angol sa tudlo apan wa magpadaog si Embiid ug iya ra kining giduwa.Nabalaka ang Philadelphia sa injury ni Embiid sanglit wala kini makaduwa sa una niyang duha ka season sa 76ers gumikan sa foot injury ug wa makaduwa labaw sa 68 games sa usa ka season sa iyang NBA career.Apan bisan paman niini, si Embiid naka-deliver gihapon og MVP numbers pinaagi sa iyang 30.6 ppg, 11.7 rebounds, 4.2 assists ug 1.5 blocks ug adunay 49.9% efficiency sa shooting. |
| You are subscribed to email updates from SUNSTAR. To stop receiving these emails, you may unsubscribe now. | Email delivery powered by Google |
| Google, 1600 Amphitheatre Parkway, Mountain View, CA 94043, United States | |
No comments:
Post a Comment