Wednesday, June 22, 2022

https://www.sunstar.com.ph/

https://www.sunstar.com.ph/

Editoryal: Nganong gobyerno ray basulon?

Posted: 22 Jun 2022 06:19 AM PDT

Pwerteng panglimpyo sa Kagamhanan sa Dakbayan sa Mandaue sa Butuanon river human sila nakadawat og mga reklamo sa mga residente nga nanagpuyo sa daplin sa sapa. Niapaw na ang tubig sa kabalayan human sa sunodsunod nga pagbaha tungod sa uwan.Ang kagamhanan nipalupad og drone ug didto nakita ang baga kaayong mga basura nga nagtipun-og ug nakabara sa agianan sa tubig. Matod sa Siyudad nga kasagaran sa basura mao ang plastic bottles. Tuod man, 50 ka toneladang basura kun 45,359 ka kilo ang nahaw-as gikan sa sapa. Kini grabe na kadaghan kay gikan lang kini sa usa ka dapit.Kini nga suliran mapugngan baya nga mahitabo. Gikinahanglan nga dunay periodic o naandan nga pagpanglimpyo sa kasapaan, di lang kay ipahaum sa mga kasaulogan sa kalihukang environmental kini ipahigayon. Unya, kanunay mangulo ang barangay, di kay agdon ang local government unit (LGU) una pa molihok ang mga barangay.Subo kaayo palandungon nga daghan sa mga barangay official wa nagpakabana niini. Taspukan kaayo. Ang suliran timaan usab sa kapakyas sa kagamhanan sa pagpatuman sa solid waste management. Kay kon malampuson pa, di unta kini mahitabo.Makapahimangod usab huna-hunaon nga sa mga ing ani nga sitwasyon, ang kagamhanan lang usab maoy han-ukan nga unta ang suliran nagsugod man sa iyang katawhan. Kon disiplinado pa ang katawhan ug dunay pagmahal sa nasod, di kini magpataka sa paglabay sa mga basura kay kini usa ka matang sa pagyama-yama.Sa uban bitaw nga mga nasod, sama sa Singapore, nakahimo man sa paglimpyo sa ilang mga dapit. Kini tungod kay ang katawhan sa disiplinado ug ang gobyerno di lang kutob sa estorya, ila sab kining gibuhat. Walk the talk ba.Di lang kay sige lang og basol ang katawhan sa kagamhanan. Sa atong pagtulisok sa gobyerno, tulo baya ka mga tudlo ang mobalik. Responsibilidad sa usag usa ang paghinlo sa mga basura, di kay sa gobyerno ra.

Tambagi ko Noy Kulas: Di diay iyaha?

Posted: 22 Jun 2022 06:15 AM PDT

Dear Noy Kulas,Maayong adlaw nimo ug sa imong fans. Tagoa lang ko sa alias nga Wowie. Call boy ko kaniadto pero miundang na ko human nako gikahimamat ang akong live-in partner nga taguon lang nato sa ngan nga Maris.Naa na mi mga anak nga tulo ka buok ug maayo ang among pagpuyo kay pulos mi dunay stable job. Bisan sa time sa pandemic wa mi nawad-an og work. Kani gud si Maris maayo mokupot og kwarta.Ang akong problema karon mao ang mga estorya nga miabot nako nga di kuno ako ang amahan sa among eldest nga anak. Lain kuno nga lalaki ug ako lang ang gipaangkon ni Maris. Naglisod ko og sulti niya kay buotan baya kaayo ni siya. Gaplano gani ko nga ako siyang pakaslan next year ug ako siyang i-surprise.Unsa kahay maayo nga buhaton aron akong masusi kon tinuod ba o di ang mga estorya? Ang akong nadunggan ra gikan sa mga kaila ug friends ni Maris. Wa ray lain. Ma confirm man o di, ako gihapon siyang pakaslan but nahasol lang ko sa mga estorya. Unsa kahay maayo, Noy Kulas?WOWIEWowie,Kon tinuod kang nahigugma kang Maris, ayaw na lang na utingkaya. Let it be kay malipayon man mong nagpuyo. Basin siya sab wa masayod ug kanang mga estorya nitumaw lang na kay ang iyang kanhi boyfriend nasuya nga gibuwagan, gipanabi sa hanggaw nga ex. Naay mga lalaki nga ing ana, manaut kay di makadawat nga sila giilisan tungod sa ilang pagkatawo isip boyfriend.Apan kon gusto ka gyud nga masayod, na hala, gastohi ang pagpa DNA. Ambot og naa na ba tay kapasidad ini sa Sugbo. Nya mahal ra ba sab ni nga proseso. Hasol ba. Basta sa ako nang giingon, ayaw na lang kawta ang kagahapon kon ikaw nagmalipayon na karon. Basin mao pa nay makaguba sa inyong relasiyon.Kon di ka gyud mahimutang, sultihi si Maris sa mga estorya aron mahibawo siya sa mga panglibak sa mga marites nga nagpa pretend nga mga higala, apan traydor diay sa kaulahian.NOY KULAS

Asset, ex-con tipi

Posted: 22 Jun 2022 06:09 AM PDT

Usa ka asset sa pulis patay samtang ang ex-convict nga suspek sa pagpamusil, patay sab human nisukol sa kapulisan sa follow-up operation sa Sitio Crossing, Barangay Poblacion Oriental, lungsod Consolacion, alas 2:30 sa hapon sa Martes, Hunyo 22, 2022.Ang biktima nga si Renante Gerundio, hingkod, ulitawo, police asset, taga Barangay Nangka, Consolacion, dead-on-arrival (DOA) sa tambalanan.Apan patay sab ang suspek nga si Ronald Judilla, hingkod, ex-convict, taga Brgy. Tugbungan, Consolacion.Si Police Staff Sgt. Arnold Rusiana sa Consolacion Police Station nga nahinabi sa Superbalita Cebu nagkanayon nga si Gerundio natulog sa ilang panimalay.Gisulod ni Judilla ug gipusil sa makadaghang mga higayon sa nagkadaiyang parte sa lawas hinungdan sa iyang hinanaling kamatayon.Ang suspek nisibat, apan sa hot pursuit operation sa kapulisan, nasigpatan siya sa Barangay Poblacion Oriental.Ang mga pulis nipaila ug nimando sa suspek nga motahan apan wala kini nituman, giingong namusil ngadto sa kapulisan busa nahitabo ang pinusilay.Naigo si Judilla, natagak sa sapa ug namatay diha-diha. Narekuber sa kapulisan ang kalibre .45 nga armas nga gigamit sa suspek."Nasuko daw ning suspek sa biktima kay mao ni mohatag info sa police sa illegal nga kalihukan niini," dugang ni RusianaMatud ni Rusiana, ang suspek notadong nalambigit sa pagpayuhot og gidiling drugas.Gawas niini, dugang ni Rusiana, nalambigit usab sa uban pang krimen sa ilang lugar.

DA Visayas misuporta sa hukom ni Marcos nga modumala sa ahensiya

Posted: 22 Jun 2022 06:08 AM PDT

Gidayeg ni Assistant Secretary Salvador Diputado sa Department of Agriculture ang personal nga pagdumala ni President-elect Ferdinand 'Bongbong' Marcos, Jr. sa Departamento sa Agrikultura (DA) sugod sa Hulyo 1, 2022.Si Diputado kinsa tinudlo ni outgoing President Rodrigo Duterte nagkanayon nga sa paglingkod unya ni Marcos, makabaton na og labing dako nga pundo ang DA para sa mga mag-uuma."Good choice because this will be the right time for food production to take front seat in nation building. Maybe this time, the DA will have bigger and better budget," matod ni Diputado.Ang DA adunay P91 bilyones nga approved budget gikan sa gipangayo nga P231 bilyones alang sa tuig 2022.Ang assistant secretary sa DA, kinsa maoy nakatutok sa Visayas, nagkanayon nga adunay mga challenges sa pagdumala unya ni Marcos apan kini masulbad ra kon adunay political will.Dugang niya, sa pag-asumir unya ni Marcos sa katungdanan, kinahanglan mobutang siya og tawo nga iyang kasaligan sa DA isip caretaker sanglit dili malukop sa pangulo ang bulohaton labi na nga ang mga problema sa tibuok nasod ang iyang atubangon."Nobody will dare challenge his program but he will need somebody to act as caretaker, someone who will actually do it for him. Someone who is new and who comes from within," dugang ni Diputado.Ang anak ni kanhi Presidente Ferdinand Marcos, Sr. niingon grabe ang problema sa agrikultura hinungdan nga iyang pangunayan.Tuyo sa umaabot nga presidente nga mabalik ug mapalambo ang maong departamento.

1 ka salesman banggaan, patay

Posted: 22 Jun 2022 06:08 AM PDT

Usa ka salesman namatay human nabanggaan sa usa ka dump truck sa national highway sa Barangay Ibabao, dakbayan sa Mandaue, kagahapon sa kaadlawon, Hunyo 22, 2022.Si Staff Sergeant Jimson Dapar sa Mandaue Traffic Enforcement Unit, niila sa biktima nga si James Miag-ao, 25, sales staff sa Virginia Foods, Inc., taga Barangay Pagsabongan, Mandaue City.Si Dapar niila sa dump truck driver nga mao si Jovanni Pritos, 26, taga Garing, lungsod sa Consolacion.Base sa imbestigasyon, si Dapar nibutyag nga si Miag-ao, kinsa mopadulong sa trabaho, nagsakay og motorsiklo ug ni-overtake sa laing sakyanan nga gimaneho ni Mark Angelo Abecia, 31, taga Sudlon, Maguikay, Mandaue City.Matod ni Abecia, nga sa pag-overtake ni Miag-ao, siya ni-counterflow nga niresulta sa pagkaigo niya sa dump truck nga gimaheno ni Pritos hinungdan nga nalagpot ug nabunal sa dalan.Matod ni Dapar sa SunStar Cebu nga si Miag-ao nagdali ug ang iyang pamilya nihulagway kaniya nga hilumon ug dili gusto ma-late sa trabaho.Dugang ni Dapar, ang drayber sa dump truck nidala dayon sa biktima sa Mandaue City Hospital apan gideklarar kini nga dead on arrival.Samtang, ang pamilya sa biktima dili na mopasaka og kaso sa drayber sa dump truck human sila nagkasabot.

Mga kaso sa dengue sa nasod nanobra na

Posted: 22 Jun 2022 05:32 AM PDT

Ang Department of Health (DOH) nakatala og lapas sa dengue epidemic threshold sa 14 ka mga rehiyon sa nasod, matod ni DOH spokesperson Undersecretary Maria Rosario Vergeire sa Miyerkules, Hunyo 22, 2022.Si Vergeire niingon nga aduna silay natala nga kinatibuk-ang 39,705 ka kaso sa dengue gikan sa Enero 1 hangtod Hunyo 4, diin 202 ang namatay.Siya niingon nga mas taas kini og 31 porsiyento sa mga kaso sa dengue nga natala sa samang panahon niadtong 2021.Ang threshold mao ang gidaghanon sa mga kaso sa miaging tuig itandi sa gidaghanon sa samang mga buwan karong panahuna.Matud ni Vergeire nga kasagaran sa mga kaso na-report sa Central Visayas, Central Luzon ug Zamboanga Peninsula.Sa mga nangamatay, 29 ang natala niadtong Enero, 36 niadtong Pebrero, 34 niadtong Marso, 43 sa Abril, 48 sa Mayo, ug duha sa Hunyo.Gipahinumdoman ni Vergeire ang publiko sa mga preventive measures batok sa dengue, ilabi na sa pagmentinar sa ilang palibot nga limpyo gikan sa nagpundo nga tubig nga mahimong magsilbing lamok.Gitambagan usab niya ang publiko nga sundon ang estratehiya sa 4S, nga mao ang pagpangita ug pagguba sa mga lugar nga itluganan sa mga lamok, pagsiguro sa pagpanalipod sa kaugalingon, pagkonsulta gilayon sa doktor kon dunay mga simtomas ug pagsuporta sa fogging. (SunStar Philippines)

RITM maka-detect na og Monkey pox

Posted: 22 Jun 2022 05:28 AM PDT

Ang Research Institute for Tropical Medicine (RITM) mi-upgrade sa kapasidad niini alang sa pag-detect sa mga kaso sa Monkeypox, pahibawo niini sa Miyerkules, Hunyo 22, 2022.Sa usa ka pamahayag, ang RITM niingon nga isip kabahin sa nasudnong pagpangandam ug pagtubag batok sa monkeypox, ilang gi-optimize ang ilang real-time nga PCR assay."The RTM technical team is currently optimizing a second PCR assay for differentiating the Monkeypox Virus clade," matod niini."The Institute reiterates that only cases satisfying the definition of suspect Monkeypox and complying with all procedures for referral including documentary requirements shall be processed," dugang niini.Ang RITM nagkanayon nga ang DOH nag-organisar og pagbansay/orintasyon sa clinical approach sa skin lesions, ingon man ang pagkolekta, pagdumala, ug pagdala sa mga sample gikan sa skin lesions, aron paggiya sa tanang Disease Reporting Units (DRUs) ug Epidemiology and Surveillance Units (ESUs). ).Ang monkeypox virus sa pagkakaron nakit-an sa Australia, Belgium, Canada, France, Germany, Italy, Netherlands, Portugal, Spain, Sweden, United Kingdom, United States of America (USA) ug Singapore.Sumala sa World Health Organization, ang monkeypox mapasa pinaagi sa mga samad, likido sa lawas, mga tinulo sa respiratory ug kontaminado nga mga materyales sama sa higdaanan.Kini adunay incubation nga mga unom hangtod 13 ka adlaw apan mahimo usab kini gikan sa lima hangtod 21 ka adlaw.Lakip sa mga sintomas sa impeksyon mao ang labad sa ulo, hilanat, paghubag sa lymph nodes, pagsakit sa lawas ug kaluya. (SunStar Philippines)

Buta nga inahan benepisaryo sa ‘Bahay Mo, Sagot Ko’ sa CCPO

Posted: 22 Jun 2022 05:27 AM PDT

Inahan nga nawagtangan sa panan-aw nga nag inusara na lang nga nag-atiman sa iyang tulo ka mga anak ug usa ka pamilya nga mangobkob lang og graba, gibuhatan og balay sa Guadalupe Police Station inabagan sa Advisory Council niini.Si Jenden Mancia, usa ka person with disability tungod kay siya buta, ug si Benjie Mabano, gipili nga maoy recipients sa "Bahay Mo, Sagot Ko" program sa Police Community Affairs and Development Group sa Cebu City Police Office (CCPO).Matod ni Police Major Jonathan dela Cerna, hepe sa Guadalupe Police Station, si Mancia nagpuyo lang sa makaluluoy nga barong-barong nga hapit na mahagbong sa pangpang sa sitio Baksan, Barangay Sapangdako, Siyudad sa Sugbo.Ang nakasakit kay gibiyaan siya sa iyang kaipon nga usa usab ka buta human nikuyog sa laing babaye nga usa usab ka PWD nga sama niya.Bisan pa man niini, naningkamot siya nga mabuhi pinaagi sa mga pagpanghilot ang iyang tulo ka mga anak nga nag pangidaron pa og 6 anyos ang kamaguwangan, 3 anyos ang ikaduha ug 2 anyos ang kamanghoran.Nakita sa iyang mga kaubang pulis ang kahimtang ni Mancia busa wala sila nagduha-duha sa pagtabang niini pinaagi sa pagtukod sa bag-ong balay nga ginama sa konkretong dapat nga sarang masulod ang iyang tibuok pamilya.Gisugdan kini sa pagtukod niadtong Disyembre 2021 pinaagi sa abag sa Guadalupe Police Station Advisory Council.Pagka Martes Hunyo 21, 2022 sa alas 2:00 sa hapon, gitunol ni Dela Cerna ang yawe sa bag-ong nahuman nga panimalay kang Mancia aron hingpit na kining maiya."Kay kami man gyud ang nag koan ani ngadto, pagtan-aw nako sa ilang bay, hapit naman gyud matagak sa pangpang nya busloton pa, ingun ana bitaw ang sitwasyon, luoy ba," matod ni dela Cerna.NAKAHILAKGiangkon ni dela Cerna nga mitulo ang iyang luha nga nagsud-ong sa kahimtang sa pamilya nga bisan sa sitwasyon niini nga adunay apan sa lawas, naningkamot gihapon nga mabuhi alang sa iyang mga anak.Ang ika duha nga gihatagan og bag-ong balay mao si Mabano sa sitio Santikon, Barangay Kalunasan.Makaluluoy usab ang kahimtang sa maong pamilya sanglit ang panginabuhian niini mao lang ang pag kubkub og graba ug pagtigum og balas aron ibaligya niadtong motukod og balay sa ilang lugar.Nalipay si dela Cerna nga makita ang panagway sa maong mga kabus nga pamilya nga nahatagan og paglaom nga magpakabuhi pa bisan sa kalisud sa kalibutan.Matod niya nga ang gasa nga balay maoy labing importante sanglit lakip kini sa tulo ka mga batakang panginahanglan sa tawo nga mao ang sapot, pagkaon ug pinuy-anan.Gikalipay niya nga aduna nay desente nga pinuy-anan ang duha ka kabus nga mga pamilya bisan pa man nga dili kini mahalon sama sa mga arangan ang kahimtang sa kinabuhi.Aduna pay laing duha ka mga pamilya sa Barangay Guadalupe nga sunod hatagan og pinuy-anan.

Tining uyon sa ordinansa bahin sa face mask

Posted: 22 Jun 2022 05:22 AM PDT

Gisugyot ni Bokal Celestino "Tining'' Martinez III, presidente sa Association of Barangay Councils (ABC) sa lalawigan sa Sugbo nga mas maayong hatagan og pagtagad sa kagamhanan ang pagsiguro nga limpyo, nisunod sa saktong hygiene ug na-regulate ang kapasidad sa mga establisimento inay panakpon ang mga Sugboanon nga wala nagsul-ob og face mask sa mga lugar nga hawan ug well-ventilated sa lalawigan sa Sugbo.Mao kini ang panahon ni Martinez sa interbyu sa Superbalita Cebu sa Hunyo 22, 2022.Uyon si Martinez nga hatagan og kagawasan ang publiko sa pagdesisyon kon magsul-ob ba og face mask o dili mosul-ob basta anaa lang sa lugar nga gitugot nga optional."Personally, I feel it should really be down to choice now as far as masks are concerned," matod ni Martinez sa Hunyo 22, 2022."Government should shift to focusing on sanitation, proper hygiene, medical assistance, information, vaccination, regulating the capacity of public establishments and events, observing health protocols for foreign and domestic travel,"dugang niya.Matod ni Martinez nga wala kini nagpasabot nga dili na respetuhon ang desisyon sa mga gustong magsul-ob og face mask ilabi na kadtong dunay mga gihambin nga sakit."There is no argument, masks still serve a purpose and we should respect those who feel they should wear one for protection specially those who have inherent health problems and comorbidities. But making it mandatory and penalising for not wearing is no longer needed, we are past educating its value," matod ni Martinez.Mao kini ang komento ni Martinez subay sa pamahayag ni DILG Undersecretary for Barangay Affairs Martin Diño nga kinahanglang mosunod sa lagda sa Malacañang ang tanang mga barangay.

Ilugay sa pasahero: Driver sa traysikol brutal nga gipatay

Posted: 22 Jun 2022 05:22 AM PDT

Inilugay sa pasahero nisangko sa brutal nga pagpatay sa usa ka tricycle driver sa alas 5:30 sa hapon sa Martes, Hunyo 21, 2022 sa sityo Baybay, Brgy. Poblacion, dakbayan Toledo.Ang biktima giilang si Jophel Placibe Basilan, 43, minyo, taga Sitio Bawod, Barangay Magdugo, Toledo City. Si Basilan patay nang miabot sa tambalanan tungod sa kadaghan sa bun-og ug mga samad dinunggaban sa nagkadaiyang parte sa kalawasan.Ang suspek nga wala pa nadakpan sa kapulisan giilang si Jajan Alferez, 41, tricycle driver, taga Sitio Planta, Poblacion.Si Police Senior Master Sgt. Marciano Suarez, imbestigator sa Toledo Police Station nga nahinabi sa Superbalita Cebu, nagkanayon nga si Basilan naglingkod sa iyang traysikol, nagpaabot og pasahero dihang niabot usab si Alferez.Wala nakabantay si Basilan nga nilipot sa luyo si Alferez nga nagdala og kahoy nga dos-por-dos, iya dayon gibunalbunalan ang biktima sa tangkugo.Si Basilan nalup-og, nikirig tungod sa pagbunal ni Alferez kaniya.Wa pa natagbaw ang suspek, nibunot si Alferez sa iyang dala nga screw driver, gidunggab sa makadaghan si Basilan.Patay nang niabot sa tambalanan ang biktima tungod sa kadaghan sa iyang mga samad.Nagdali sa pagsibat si Alferez samtang ang kapulisan nagpadayon sa hot pursuit operation.Ang motibo sa krimen mao ang panaglalis sa panag-ilog og mga pasahero.Taudtaod na nga sila si Basilan ug Alferez nagkaaway parte sa pasahero.Si Alferez di makaharong sa pagsukol kang Basilan, kinsa gihulagway nga dakong tawo hinungdan nga nilipot sa luyo sa paghimo sa krimen.

Bodega nahugno; mga trabahante nakalikay

Posted: 22 Jun 2022 05:22 AM PDT

Usa ka bodega sa dalan V. Albaño sa Sitio Sugar Valley, Barangay Maguikay, dakbayan sa Mandaue nahugno sa Miyerkules sa buntag, Hunyo 22, 2022.Si Jun De Lima, first responder ug deputy emergency volunteer sa Bureau of Fire and Protection (BFP), nibutyag sa SunStar Cebu nga alas 10:15 sa buntag siya nakamatikod nga ang yuta mitay-og.Pipila ka gutlo ang milabay, usa ka residente sa Sugar Valley Subdivision nagkamatikod nga kahugnuon ang edipisyo ug nitaho dayon sa iyang nakita.Si De Lima nitawag dayon sa BFP, diin nipasa sa taho ngadto sa City Disaster Risk Reduction and Management Office ( CDRRMO).Sumala ni Gelyn Barino, usa ka barangay health worker nga nakasaksi sa hitabo, ang edipisyo bag-ong natapos pagtrabaho sa miaging Disyembre sa wala pa ang bagyong Odette.Matod ni Barino nga alas 8:00 sa buntag, ang construction workers ningtunga na sa trabaho apan wala mosud dayon sa bodega tungod sa uwan ug nagpasilong sa laing bodega.Dihang alas 10:00 sa buntag, ang construction workers ningsulod na apan gipapahawa tungod sa namatikdan nga pag-uyog sa edipisyo.Igo lang nakagawas ang mga trabahante, ang tulo ka mga bungbong sa bodega nahugno."Maghuwat ra mi sa management kon unsa ila plano ani nga maaksiyonan ni.Pero for the mean time, nagbutang na mi og crossing tape nga danger zone area anang dapita para malikayan ang aksidente," matod ni De Lima.

Loreche mao nay head sa CCMC

Posted: 22 Jun 2022 05:05 AM PDT

Si Mayor Michael Rama nitudlo kang Dr. Mary Jean Loreche isip bag-ong pangulo sa Cebu City Medical Center (CCMC).Sa pakighinabi sa telepono, si Rama niingon sa mga tigbalita Huwebes, Hunyo 22, 2022, nga gidawat na ni Loreche ang tanyag ug magsugod sa pagsugod sa pagsugod usab sa termino sa mayor karong Hulyo 1.Si Loreche nahimong chief pathologist sa Department of Health (DOH) Central Visayas ug nahimong tigpamaba sa Visayas Vaccination Operations Center.Sa usa ka bulag nga pakighinabi, si Loreche niingon nga ang mayor naglantaw sa siyudad nga mahisama sa Singapore, ug kabahin niini mao ang pagpalambo sa mga pasilidad ug serbisyo sa pag-atiman sa panglawas.Dugang ni Loreche nga iyang gidawat ang maong tanyag sanglit susama man siya og panglantaw ni Rama nga makabaton og dekalidad nga serbisyong medikal alang sa mga lumolupyo sa dakbayan sa Sugbo.Matod ni Loreche, konektado gihapon siya sa DOH 7 sanglit siya ang hepe sa laboratory services sa maong departamento sa rehiyon.Desisyonan pa sa regional director sa DOH kon magpabilin ba siya sa iyang puwesto apan matud ni Loreche nga dako ang posibilidad nga mapulihan siya.Gihisgutan usab ni Rama nga iya nang gimanduan si City Administrator Suzanne Ardosa ug acting CCMC head Sonia Empinado nga makig-coordinate kang Loreche.Wa hinuon maghisgot ang mayor kon magpabilin ba si Espinado sa CCMC o ibalhin sa laing buhatan.Giangkon ni Loreche nga daghang trabaho ang angay buhaton ilabi na sa pagkab-ot sa panglantaw ni Rama sa paghatag og dekalidad nga healthcare sa tanan.

Pasidaan sa PDRRMO: Alerto kanunay sa uwan

Posted: 22 Jun 2022 05:00 AM PDT

Nanawagan ang Cebu Provincial Disaster Risk Reduction and Management Office (PDRRMO) sa mga Sugboanon sa probinsya nga mahimong alerto ug magpabilin sa sulod sa panimalay kon masinati ang dugdog ug kilat aron kalikayan ang mga disgrasya.Kini ang panawagan ni Wilson Ramos, interim officer sa PDRRMO sa Hunyo 22, 2022, taliwa sa sunodsunod nga pag-uwan ug pag baha sa pipila ka bahin sa Sugbo.Giklaro ni Ramos nga sukwahi sa gikatahong buhawi sa lungsod sa Argao, usa lamang ka waterspout ang nasigpatan sa kadagatan niini sa Martes sa buntag.Apan gikonsiderar ni Ramos nga bantayanan ilabi na sa mananagat nga manginabuhi sa maong dapit."Sa LGUs naay reported nga kusog ang hangin, kusog uwan ilabi na sa south but we are still verifying if sa atong local counterparts regarding sa katong ingon nga tornado dapit sa Argao. That's not tornado. That's just waterspout kay naa man sa dagat ug walay possibility nga moabot nga mo landfall na.Pero kinahanglan lang gyud ang safety sa mananagat kay delikado pod og mo duolduol ka didto," matod ni Ramos sa Hunyo 22.Dugang ni Ramos nga laoman sa mga Sugboanon sa probinsya ang kusog nga bunok sa uwan hinungdan nga iyang giawhag ang mga residente sa paglikay sa mga lugar nga duol sa transmitter sites ug mga poste sa kuryente aron malikayan ang disgrasya."Moderate to heavy rainshowers due to thunderstorms unya expected gyud diri sa atoa sa Cebu....Ang ato lang nga paglikay sa thunderstorm ug lightning ang katong dili sad ta anha kanang mga lugar nga duol sa transmitter, mga poste, mas maayo anha sulod sa balay," dugang pasidaan ni Ramos.

‘Pasigarbo sa Sugbo’ ibalik sa Kapitolyo karong Agusto 28 ning tuiga

Posted: 22 Jun 2022 04:32 AM PDT

Subay sa tinguha nga mas mapalambo ang turismo ug ekonomiya sa probinsya, gikatakda nga mobalik na ang Pasigarbo sa Sugbo sa Agusto 28, 2022.Kini maoy inisyal nga gipahibaw sa Cebu Provincial Tourism Office (PTO) human sa moabot duha ka tuig nga wala makapahigayon sa festival of festivals sa probinsya tungod sa pagtumaw sa coronavirus disease 2019 (COVID-19) sa 2020.Usa kini ka kalihukan sa Probinsya nga nag-agni og mga turista pinaagi sa pagpasundayag sa sayaw, pagpakita usab sa mga matahom nga suroyanan, mga pagkaon ug uban pa.Ang kagamhanan uwahing nipahigayon sa Pasigarbo sa Sugbo sa Agusto 2019 atol sa ika-450 nga founding anniversary sa Probinsya sa Sugbo.Atol sa maong kasaulogan dunay moabot sa 45 ka mga contingent gikan sa component cities ug municipalities sa probinsya ang nisalmot.Sama sa naandan, himuon usab ang Pasigarbo Street Dancing ug Grand Showdown Competition ug sa Agusto 26, ipahigayon ang Festival Queen coronation night diha sa Cebu City Sports Center (CCSC).Gawas sa maong kalihukan, nalakip usab sa gipangandaman sa kagamhanan ang pagpadayon sa Suroy-Suroy sa Sugbo nga una nang gidagsa sa mga turista nga gustong motan-aw ug masinati ang mga tourist destination sa lalawigan.Si Maria Lester "Marti" Ybanez, pangulo sa PTO, nagkanayon nga dili pa sila makapahibalo sa uban pang mga detalye sa kalihukan ug uban pa nga may kalabutan sa tourism activities sanglit gikatakda pang magtagbo ang kadagkoan sa Kapitolyo alang sa paghingpit sa mga plano niini.

Sugilanon: Kining sugal

Posted: 22 Jun 2022 03:56 AM PDT

JOHN TAM. YBAÑEZGun-ob, Lapu-Lapu City, CebuLabihan kadaghan sa matang sa sugal sa kalibutan. May nahisubay sa balaod (legal) ug may nahisupak sa balaod (illegal). Apan alang ning tagsulat, ang tanang kalihukan ning kalibutan maisip nga sugal. Gani, gihulagway man nga usa ka sugal ang kinabuhi. Mahimo kang modaog ug mahimong mapilde. Sa imong mga paningkamot, anaay kalampusan ug anaa usay kapakyasan. Kana ang bagad sa kinabuhi.Sa namat-an ning tagsulat, diha nay hantak, mga sugal sa baraha, madyong, buwang o tari sa manok ug ubang matang sa sugal. Sa iyang pagkamatngon og buot, nauso ang Jai Alai kansang resulta gibasihan pod sa gitawag og masyaw nga nahisupak sa balaod kay tago-tago man ang pagpamaligyag tiket pinaagi sa aser. Gani naa pay tip sheet nga gipatik sa ingon. Apan dihang nahunong na ang dula sa Jai Alai nga gitawag ug giila nga game of a thousand thrill, wala maundang ang masyaw kay naa man gihapoy resulta ug mga player. Ambot diin kini dulaa? Apan bisan pa niini, daghan gihapon ang manaya. Mamasin lagi sanglit naa man usay panahon nga makadaog ka. Tiaw mo bay ang imong 25 sentabos modaog og P100.00 nga sa ato pa, kon peso imong itaya, modaog kag P400.00! Makaingon lagi ta sa atong kaugalingon nga sugarol gyud ning mga Pilipino.Aron kuno pagwagtang sa masyaw, nakahunahuna ang kagamhanan pagpasiugda og bola sa tulo-ka-numero nga gitawag og suwertres sa PCSO (Philippine Charity Sweepstakes Office) gawas sa naandang Lotto Draw. Tuod man, daghan ang na-engganyo kay ang imong P10.00 modaog man og P4,500.00 (mas labaw og lima ka gatos sa masyaw) kon target kay naa man poy ramble nga gitawag sa PCSO og rambolito nga ang imong P10.00 modaog og P750.00 sa walay doble nga kombinasyon ug P1,500.00 sa naay doble sama sa 112. Gawas sa doble naa pa gyuy triple nga mogawas sa suwertres sama sa 111 nga sukwahi kaayo sa Jai Alai. Hinuon, naay nigawas kaniadto nga doble sama sa 1-1 kay usa ra ka pelotaryo ang naka-eskor, apan talagsa ra kaayo kining mahitabo. Kana sa tinuod ug legal gyud nga duwa sa Jai Alai diin may tiket nga ipamaligya sa mga fronton. Apan sa masyaw, lainlain gyud nga numero ang molangkob sa usa ka kombinasyon gikan sa 1 ngadto sa 10 lahi sa suwertres nga 0 - 9 kay single digit may ilang gigamit.Tungod sa kahimalitan sa suwertres ilabi na sa Kabisay-an ug Mindanao, gihimo kining tulo ka draw sa PCSO sa usa ka adlaw. Apan wa gihapon mapapas ang masyaw.Gawas sa nahisgutang mga sugal, naa pay casino nga ginaduaw sa mga sugarol, ilabi na sa mga adunahan ug mga turista nga gustong maglingaw-lingaw. Gidumala kini sa PAGCOR (Philippine Amusement & Gaming Corporation). Sa casino, lainlaing matang sa sugal ang imong makita. Naay mga dula sa baraha nga blackjack, baccarat ug poker. May dice, roulette. bingo ug kanang gitawag og slot machine kun jackpot machine.Sa sugal sa mga manok dunay legal nga lugar para sa buwang o tari nga mao ang lisensiyadong buwangan sa usa ka lungsod o siyudad. Ang tigbakay wala itugot sa balaod. Unya ang E-SABONG nga on-line nga tari na-kontrobersiyal tungod sa pagkahanaw sa pipila ka e-sabungero.Sama sa inom, sigarilyo ug druga, maka-adik usab ang sugal. Kay kon makadaog, gusto pa gyung mosugal aron mapun-an ang daog, ug kon mapilde, dili gihapon moundang kay buot makabawi sa napilde, bahalag maputos sa utang.Apan aniay tambag alang sa mga sugarol, ilabi na sa mga kabos: Isipa lang nga lingawlingaw ang pagpanugal kay may kamatuorang dili malalis, nga diha sa sugal pirme gyung maglabi ang pilde kaysa daog. Gani, naa kana sa kanta nga giduhawitan nila ni Max Surban ug Yoyoy Villame nga "Magsugal Ta." Gawas niana, seguroa nga legal ang apilan nimong sugal aron walay peligro nga mapagan ka sa dakop o kaha dili ka hitahanan sa imong daog.(KATAPUSAN)

Balak: Kon mahimo nang handumanan ang tanan

Posted: 22 Jun 2022 03:56 AM PDT

MARCELO T. DANO, JR.Abuno, Pajac, Lapu-Lapu City, Cebu Kon sa katapusan mahimoNa nga handumanan ang tananHipuson ko ang pagsayaw sa kabulakanDinhi sa akong kiliran,Pasagdan kong mangalarag ang ilangMga gihay sa akong dughan.Bisag kanunay silang tamaktamakanSa kasub-anan gakson ko silaUg kon idumili man sa kalibutanAng pagbalik sa tim-os nilang katahomMangiliyupo akosa langit nga idapoAng duha ka mga kamot sa dughanNga sila magpabiling buhi dinhiNing kongpanumdoman.

Balak: Tugon sa kabataan*

Posted: 22 Jun 2022 03:52 AM PDT

DON PAG-USARADavao CityAnia kamiBiyahero sa hataas nga kagabhionGisagubang namo ang kalisdananSa matag gutling sa panahonGisabwag namo sa kangitngitanAng banagbanag sa amongpangandoyDaw mga ginilaw sa daghanganinipot.Ania kamiMga saksi sa pagbukas sa pultahanSa kasingkasing sa bag-ong kaliwatanTingog sa liboang mga dughanMidagayday sa among mga babaGihagkan sa kalayo sa among ngabilAng yamog sa tabunong yuta.Ania kamiDungga ang pinitik sa among awitTan-awa ang ulbo sa among gugma –Lab-as nga binhi sa kalag sa kaliwat.*Hubad ni Lamberto G. Ceballossa 'TAGUBILIN SA KABATAAN'ni Don Pag-usara.

Olè, da best party place, live bands

Posted: 22 Jun 2022 03:51 AM PDT

Puno na sab ang "Olè Live Music + Bar" niadtong Sabado nga naa mahimutang sa dalan Hernan Cortes, Mandaue city.Samot pa nga dunay special performance niadtong gabhiona ang sikat nga bandang "Lily" (formerly Callalily), ang nagpasikat sa kantang "Magbalik" ug kanhi banda ni Kean Cipriano nga nag-solo na.Ang "Lily" dinhi sa Sugbo aron mangita og bag-ong bokalista atol sa gipahigayon nilang national audition sa Ayala Event Center.Niadtong Hulyo 10 puno sab ang Olè diin gipahigayon ang 48th birthday celebration sa Cebuana socialite nga si Arlyne Hisoler-Romoff diin usa sa iyang special guests ang iyang suod nga ig-agaw nga si Vina Morales nga ni-jam sa Firelights band.Naila nga "home of the finest musicians," ang Olè nga gipanag-iya sa mga "empowered women" nga puros malampuson ug beterana sa entertainment industry nga silang Analou Reyes, Daisy Jane Villamor ug Madam Ophelia Nadela."Daisy and I used to perform with a band for Ophelia's bar before. Ever since then we've been toying the idea to have our own bar someday. Then niabot ang opportunity nga gihatag ni Ophelia nga maoy ni-guide namo ani. Indeed, it's a dream come true. We are so grateful to Ophelia for trusting us," paambit ni Analou, kinsa respetado usab sa pageantry isip Mrs. Philippines Grand International Classic 2020, Mrs. Philippines Universal 2019, ug Mrs. Cebu GAIA 2019.Samtang si Daisy mao ang orihinal nga bokalista sa Interact Band ug tag-iya sa Music Are Us nga magpa-renta og mga sound system."The idea to name our bar, Olè, actually came from Ophelia. It's the Spanish word for bravo. Everyone loves it because it's like an exclamation of approval which reflects our vision for excellence."Unsa pay dagkong events sa Olè?"Nagplano pa mi kay since we opened July last year wala pa gyud ta ka grand opening. Last December unta but wa madayon tungod sa super typhoon Odette. Mao to nagpa-fundraising mi alang sa mga banda nga nawad-an intawon og trabaho kay buwan kapin baya to way kuryente. Nagre-open mi February na. Hopefully, with the continuous decline of Covid cases, the entertainment industry will be able to get on its feet again," dugang ni Analou.Gawas sa mga celebrity nga mobisita sa ilang bar, ang Olè padayong nag-feature sa mga pinaka-season nga banda sa Sugbo sama sa Firelights, Southside, Interact, Great Ideas ug Joefre C. on Sax."Band starts at 8 p.m. every Tuesdays thru Saturdays. We're open until 12 midnight (weekdays) and until 1 a.m. (weekends). Our entrance is P300 (consumable). One may check our Facebook for more info."

Tropang Giga, Elasto Painters magpinaksitay

Posted: 22 Jun 2022 03:51 AM PDT

Mga duwa karon5:15 pm- NorthPortbatok Meralco7:15 pm- TNT batokRain or ShineMagsangka ang Talk N' Text (TNT) Tropang Giga ug Rain or Shine Elasto Painters sa main game karong gabii sa Philippine Basketball Association (PBA) 2022 Philippine Cup sa Ynares Center sa Antipolo City.Taliwala sa napiang nilang lineup, ang Tropang Giga nakakombati gihapon ug kasamtangan kining naggunit og 3-2 nga rekord.Ang gihuwat sa Tropang Giga nga si Rookie of the Year Mikey Williams ania na sa nasod apan wala pa'y klaro kon makaduwa na ba kini ning higayuna.Ning pagsuwat, wala pa'y impormasyon nga nakuha kon nahan-ay na ba ang bag-ong kontrata ni Williams sa Tropang Giga.Ang Elasto Painters mas nagsalimoang gumikan kay duha sa ilang labing mga sinaligan nga sila si Gabe Norwood ug Rey Nambatac ang adunay angol. Ang Elasto Painters adunay 1-3 nga rekord.Sa premirong duwa, magtagbo ang Meralco Bolts (2-1) ug NorthPort Batang Pier (2-2) sugod karong alas 5:15 sa hapon.

Reyes, Cone mag-partner

Posted: 22 Jun 2022 03:50 AM PDT

Gikuha sa Gilas Pilipinas isip sakop sa ilang coaching staff ang winngest coach sa Philippine Basketball Association (PBA) nga si Tim Cone sa Brgy. Ginebra Gin Kings alang sa pagpangandam sa national team sa 2023 FIBA World Cup.Mismong si Gilas coach Chot Reyes ang mikablit ni Cone aron makatabang kaniya.Kini maoy ikaupat nga higayon nga magtambayayong sila si Reyes ug Cone sa usa ka puwersa.Gipahibalo kini ni Reyes atol sa iyang acceptance speech isip Coach of the Year awardee sa PBA Press Corps Awards night sa Novotel Manila Araneta Center ning bag-uhay lang.Gipasabot ni Reyes nga ang pagkuha kang Cone nahisama sa gihimong lakang dihang nangandam ang Gilas sa 2014 Fiba World Cup diin lig-ong coaching staff ang naporma nga naglakip sab kang national team coach Tab Baldwin."I'm here to form the best team possible, not only the players but also the coaching staff," matod ni Reyes.Gipasabot ni Reyes nga mahinungdanon ang lig-ong coaching staff alang sa usa ka dakong tahas.

Nagpanikad si Magsayo

Posted: 22 Jun 2022 03:50 AM PDT

Nagpanikad na si World Boxing Council (WBC) featherweight champion Mark "Magnifico" Magsayo (24-0, 16KOs) kabahin sa umaabot niyang labing unang pagdepensa sa iyang titulo batok sa sama niyang wala'y pilde nga si Mexican Rey Vargas (35-0, 22KOs).Ang gikahinamang engkuwentro, nga gipasiugdahan sa Premier Boxing Champions (PBC), gikatakda karong Hulyo 9, 2022 sa Alamodome sa San Antonio.Si Magsayo, 27, kinsa maoy gituohang mosunod pagdala sa bandera sa Pilipinas sa kalibutan sa boksing, milabni sa iyang titulo pinaagi sa madanihong majority decision nga kadaugan batok sa mas inilog nga si American Gary Russell Jr. niadtong Enero 22, 2022.Gipasabot ni Magsayo nga grabe ang iyang kahinam gumikan kay ipahigayon ang away sa venue diin unang nagkrus ang dalan nila ni Filipino boxing legend Manny Pacquiao ug Mexican great Marco Antonio Barrera.Ang dominanteng unanimous decision nga kadaugan ni Pacquiao batok kang Barrera maoy nag-abli og daghang mga pultahan sa Pambansang Kamao ng Pilipinas alang sa dagkong mga away.Gibutyag ni Magsayo nga ang maong kadaugan ni Pacquiao maoy nakahatag kaniya og interes nga mahimong usa ka boksidor.

Kings himuong title contender

Posted: 22 Jun 2022 03:45 AM PDT

Human niya natabangan ang Golden State Warriors nga makaangkon sa ikaupat niining kampyunato sa miaging walo ka mga tuig sa National Basketball Association (NBA) isip assistant coach, si Mike Brown mopas-an na og mas bug-at nga tahas.Si Brown pormal nang gipaila isip headcoach sa Sacramento Kings kagahapon, Hunyo 22, 2022 (RP time).Niadto rang Mayo nakadawat og tanyag si Brown gikan sa Kings apan nakadesisyon kini nga tiwason lang una niini ang iyang obligasyon sa Warriors sa 2021-22 season.Gipasalig ni Brown nga himuon niyang usa ka title-contender ang Kings. (AP)

DILG miduso sa pagpalig-on sa kasambahay registration system sa ang-ang sa barangay

Posted: 22 Jun 2022 03:09 AM PDT

Ang Department of the Interior and Local Government (DILG) niawhag sa mga barangays sa Martes, Hunyo 21, 2022, sa pagpalig-on sa registration system sa local domestic workers o katabang sa pagpanalipod sa ilang batakang katungod isip usa ka pwersa sa pamuo.Si DILG Secretary Eduardo Año nagkanayon nga ubos ang nagparehistro nga katabang nga giilang "kasambahays," diin naa lang sa 3,359 gikan sa 42,000 ka mga barangay sa nasod.Matod niya nga timailhan kini sa wala pagtuman sa probisyon sa Republic Act (RA) 10361 o "Domestic Workers Act" o "Batas Kasambahay."Ubos sa pagpatuman sa Rules and Regulation of RA 10361, ang punong barangays (village chiefs) mao ang responsable sa pagparehistro sa kasambahay sud sa iyang hurisdeksiyon.Ang employer mopa-enroll sa kasambahay sa SSS, PhilHealth, and Pag-Ibig."There is more work to be done in the barangays in imploring better kasambahay registration turnout only. We direct our Punong Barangays (PBs) to be more proactive in instituting a registration system for our helpers as it is critical to ensuring that they are accorded the full protection of the law," matod ni Año."With the care and service they [kasambahays] provide to households, especially to parents and their children, domestic workers deserve safe and healthful working conditions," dugang niya.Si Año nipasabot sa kaimportante sa pagpanalipod sa kaayohan sa kasambahays ug proteksiyon kanila gikan sa bisan unsang matang sa pangabuso sa iyang agalon.Kutob sa Hunyo 7, 32,902 ang kasambahays nga narehistro sa tibuok nasod, gikan sa 28,149 ka mga barangay nga naghimo sa ilang Kasambahay Desk ug 28,074 ka mga barangay, dunay designated Kasambahay Desk Officer.Ang DILG nagkanayon nga ang 977 ka local government units nipasar og ordinansa ug resolusyon sa pagpatuman sa Batas Kasambahay. (SunStar Philippines)

Liboan namakwit tungod sa lunop sa South China

Posted: 22 Jun 2022 03:07 AM PDT

BEIJING — Dakong lunop nakapugos sa pagpamakwit sa liboan ka mga tawo sa southern China tungod sa kanunay nga pag-uwan.Nasuspenso ang klase, trabaho ug transportasyon sa manufacturing hub sa Guangdong province tungod sa nagsaka nga lunop ug hulga sa pagdahili sa yuta.Sa silingang lalawigan sa Jiangxi, dul-an sa 500,000 ang nawad-an o naguba ang panimalay ug nadaut ang ilang panginabuhian.Susamang gidaghanon ang naapektohan sa Guangdong, labi na sa mga dakbayan sa Shaoguan, Heyuan ug Meizhou.Tungod sa pagbunok sa uwan, dunay mga dalan nga nadaut sa pipila ka dakbayan ug mga balay naanod, sakyanan ug mga tanom.Gibana-bana sa weather bureau sa kagamhanan nga dunay uwan nga umaabot nga mobundak.Ang awtoridad sa China niluwat og red alert niadtong Dominggo, Hunyo 18, nga unang pasidaan ning tuiga tungod sa grabeng epekto sa uwan.Sa Zhejiang province, dapit sa norte sa China, ang mga rescue crew nigamit na og inflatable boats sa pagluwas sa mga residente nga napriso sa ilang kabalayan.Ang China kanunay makasinati og lunop o baha sa mga buwan sa summer, labina sa central ug southern nga rehiyon nga magbunok ang uwan.Apan ang kasamtangang lunop maoy labing grabe sa sulod na sa pipila ka tuig taliwala sa nagpadayon pa nga pandemiya sa Covid-19 nga daghang wala pa hingpit mabalik sa ilang normal nga panginabuhi. (AP)

DENR miedukar sa Consolacion sa hazard map

Posted: 22 Jun 2022 12:32 AM PDT

Usa ka training workshop sa pagsabot sa risk exposure map sa baha ug landslide-prone areas sa Consolacion gipahigayon sa Department of Environment and Natural Resources-Mines and Geosciences Bureau (DENR-MGB) 7 sa Martes, Hunyo 21, 2022, sa Consolacion municipal hall.Si Julius Umali, senior geologist sa DENR nga nangulo sa kalihokan, niingon nga ang pagbansay usa ka information, education, and communication (IEC) campaign sa pagsabot sa geohazard map sa Consolacion.Kini, human ang DENR-MGB, nihimo og geohazard assessment sa munisipyo niadtong 2018.Si Engr. Danilo Capangpangan, Local Disaster Risk Reduction and Management Office (LDRRMO) head, niila nga pito sa 21 ka barangay sa Consolacion nga mga lugar nga daling bahaan.Kini mao ang mga Barangay Tugbongan, Nangka, Pitogo, Cansaga, Danglag, Garing, ug pipila ka bahin sa Casili.Sa pikas bahin, ang mga lugar nga adunay landslide sa lungsod mao ang Garing, Panas, Lanipga, Panoypoy, ug Tolotolo.Hinuon, gidugang sa MGB nga ang Pitogo usa sa mga landslide-prone nga lugar sa ilang geohazard map. Ang barangay Cabangahan giila nga landslide prone ug bahaanan.Si Capangpangan niingon nga ang interactive discussions sa MGB nakatabang sa pag-update sa danger zones sa lungsod, sama sa mga bahin sa Laray Road sa Barangay Tayud, nga karon giisip nga usa sa mga lugar nga daling bahaan tungod sa pagsaka sa lebel sa dagat sa maong lugar. Tumong sa DENR-MGB nga masabtan sa katawhan sa Consolacion, partikular sa mga emergency responders sa munisipyo, ang batakang pamaagi sa pagtumbok sa mga lugar nga adunay risgo.Nagtuo sila nga ang usa ka geohazard map kinahanglanon alang sa publiko aron matan-aw sa ingon mag-amping sa ilang tagsa-tagsa ka mga lugar sa bisan unsang katalagman nga mahimong moabot. (HIC)

P20M nga drugs, 109 nasikop sa anti-criminality campaign

Posted: 22 Jun 2022 12:23 AM PDT

Nasakmit sa Cebu Police Provincial Office ( CPPO) ang kapin sa 20 milyones nga balor sa ilegal nga drugas ug nasikop ang 109 ka mga personalidad nga nalambigit sa nagkadaiyang kriminal nga kalihukan atol sa ilang usa ka semana nga operasyon.Ang operasiyon gikan sa Hunyo 13 hangtod sa Hunyo 19. Ang nasikop sa ilegal nga drugas gilangkuban sa 26 ka mga personalidad, 27 ka most wanted persons ug 23 ka ordinary wanted persons, 54 ka tawo sa illegal nga sugal ug duha sa paghupot og ilegal nga armas.Sa mga buy-bust, 26 ka mga personalidad ang ilang nasikop, diin nasakmit ang kinatibuk-ang 3,042.02 gramos nga shabu nga adunay standard nga presyo sa drugas nga P20,685,736.Usa sa drug personalities nga nasikop mao si Lyndon Rongasan, kinsa nakuhaan og tulo ka kilo nga shabu niadtong Hunyo 18 sa dakbayan sa Talisay. Sa kampanya batok sa wanted persons, 27 ang ilang nasikop, upat ang most wanted, usa niini giilang si Nelson Sunit, alyas Tatay Enson, number 5 sa most wanted persons sa dakbayan sa Carcar. (GCD)

3 nga mitulis, mipatay sa manag-uyab sa Calbayog gikiha na

Posted: 22 Jun 2022 12:10 AM PDT

Tulo ka mga suspek, usa niini menor, gipasakaan og kaso ngadto sa Catbalogan City Prosecutors Office niadtong Hunyo 20, 2022 sa pagtulis ug pagpatay sa manag-uyab niadtong Hunyo 13 sa gabii sa Dakbayan sa Calbayog, Samar.Duha sa mga suspek duna nay mga kasong robbery nga giatubang sa hukmanan.Ang mga suspek nga naa na sa kustodiya sa Calbayog Police Station ubos sa pagpangulo ni Police Lt. Colonel Ericson del Rosario, hepe, giilang sila si Glenn Baculpo, Jericho Fajardo, alyas Chokoy ug Jan-jan (tinuod ngan gipugngan kay menor).Kasong robbery with homicide aggravated by rape ang gipasaka sa kapulisan batok sa tulo nga ningtumaw sa imbestigasiyon nga maoy katapusang nakita nga kuyog sa mga biktimang sila si Jade Andre Bestudio ug iyang girlfriend nga si Roan.Nasuta kini sa kapulisan sa ilang nakuhang closed circuit television (CCTV) footage atol sa ilang imbestigasiyon.Si Fajardo nasikop sa 1st Samar Provincial Mobile Force Company pinangulohan ni Police Lt. Colonel Aquilino Pongcol III, commander, ug sa Tracker Team sa Regional Intelligence Division ug Calbayog police pinasikad sa warrant of arrest sa kasong robbery nga gipetsahan og Hunyo 9, 2021.Nasikop usab si Baculpo sa Tarangnan Municipal Police Station, inabagan sa Provincial Intelligence Unit, 1st SPMFC ug sa RID pinasikad gihapon sa warrant of arrest sa kasong robbery.Samtang si Jan-jan, menor, kinsa gihasol sa iyang tanlag, boluntaryong nitahan sa kapulisan kuyog ang iyang inahan, abogado ug social worker.Nikompirmar siya nga nalambigit siya sa pagtulis ug pagpatay sa mga biktima.Si Jan-jan nitug-an sa dapit sa Brgy. Capoocan diin nila gilabay ang mga butang ni Roan ug nakaplagan sa kapulisan nga gikompirmar usab sa mga ginikanan nga iyaha sa biktima.Gawas sa pagtug-an ni Jan-jan nga magamit sa kaso, ang kapulisan nihangyo usab sa Samar Provincial Forensic Unit alang sa DNA examination sa seminal fluid nga nakaplagan sa babayeng biktima.Nagpahigayon usab sila og ballistic cross matching sa kabhang sa bala nga nakaplagan duol sa lawas ni Bestudio ug sa armas nga nasakmit gikan sa suspek ingon man finger prints sa mga butang ni Roan.Niini, kon pulos positibo ang mga eksaminasiyon, molig-on og maayo ang kaso batok sa tulo.Mga lawas nila ni Bestudio ug Roan nakaplagan sa managlahing mga dapit sa siyudad niadtong Hunyo 14.Nianang buntag sa mao nga adlaw nakaplagan ang lawas ni Bestudio ug nianang gabii nakit-an usab ang lawas ni Roan sa kasagbutan daplin sa dan.Katapusan silang nakit-an nga nagkuyog nga nag-angkasay sa motorsiklo sa gabii sa Hunyo 13, dihang gikuha ni Bestudio si Roan gamit ang iyang motorsiklo padung na sa pagpauli. (REV)

Special vax sa private schools; F2F giplano sa Agusto

Posted: 22 Jun 2022 12:08 AM PDT

Si Mayor Michael Rama mopagawas og direktiba alang sa usa ka espesyal nga vaccination drive sulod sa mga pribadong tunghaan sa dakbayan sa Sugbo tungod kay ang mga top executive sa lainlaing mga tunghaan ug unibersidad nagplano sa hingpit nga pagpatuman sa face-to-face nga klase sa Agusto, 2022.Ang mga opisiyal sa 10 ka lainlaing mga eskwelahan ug unibersidad sa siyudad nakigtagbo kang Rama niadtong Lunes, Hunyo 20, aron lugakan pa ang restrictions sa pandemya sa pagpahigayon sa in-person learning.Si Manlalaban Joan Largo, assistant vice president for academic affairs sa University of San Carlos, niingon sa mayor nga ang 50-50 nga kapasidad sa pagkat-on dili mahimo tungod kay ilang namatikdan nga kadaghanan sa mga estudyante naglisud sa pagsubay sa ilang shifting schedules.Ang mga pangulo sa University of Southern Philippines Foundation ug Don Bosco Technical College–Cebu nidason usab sa kabalaka ni Largo. "That is why we are here to meet with you (Rama) to discuss on this matter," matod ni Largo.Ang ubang mga institusyon nga nagplano sa pagpatuman sa in-person nga mga klase mao ang University of San Jose-Recoletos, Cebu Institute of Technology-University, University of Cebu, Southwestern University, University of the Visayas, Cebu Institute of Medicine, Don Bosco Technical College–Cebu, ug Velez College.Matod sa grupo, ang kasamtangang guidelines sa Inter-Agency Task Force nagkinahanglan sa mga institusyon sa pagpatuman sa health ug safety protocols sama sa physical distancing ug pagbutang og face barriers.Gihangyo sa mga sakop sa akademya nga basta hingpit nga nabakunahan ang mga estudyante, magtutudlo, ug kawani, tugotan sila sa pagpahigayon sa hingpit nga pagpatuman sa face-to-face classes."Ang amoa lang gyud hangyo is to lessen (the restriction) because when face-to-face classes start, we will also be requiring our students and our staff to be fully vaccinated," matod ni Largo.Ang mayor nitubag nga moluwat siya og direktiba alang sa special vaccination days sulod sa mga tunghaan ug unibersidad aron madugangan ang pagbakuna sa mga tinun-an."Atong tawag ani mao ang 'Balik Eskwela Extravaganza, Bakuna Para Ekonomiya Mosaka' to campaign para sa bakuna and involves your schools. Inyoha ang venue ug kamo sad ang motabang og kampanya ani," matod ni Rama. (IRT)

Babaye nadasmagan sa Ceres bus sa Compostela

Posted: 21 Jun 2022 07:45 PM PDT

Babaye nga hubog natapsingan sa Ceres bus bisan nilihay, apan hinungdan kini nga nakabangga ang bus og SUV sa national highway sa Sitio Lutao, Barangay Estaca, lungsod sa Compostela, alas 6:00 sa buntag kagahapon, Hunyo 22, 2022.Usa ka Bernadeth Borja Atis, hingkod, taga Brgy. Jubay, lungsod sa Liloan, nakaangkon og minor nga kadaot sa lawas nga nalandig sa tambalanan sa dakbayan sa Danao.Apan maayong pagkaguba sa Ford SUV nga gimaneho sa tag-iya nga si Karl Christian Baculpo Lora, hingkod, taga Barangay Yati, Liloan.Si Ruben Lumbab Catipan, 42, minyo, taga Brgy. Panalipan, lungsod sa Catmon, maoy drayber sa Ceres bus, gibuhian sa kapulisan human dunay amicable settlement nga nakab-otsa matag habig.Si Police Lt. Andrew Rellanos, hepe sa Compostela Police Station, nagkanayon nga sa nakita nila sa CCTV footage, sayop gyud ni Atis nga nilabang. Nasuta nila nga hubog kini, kinsa mopauli na unta ug nilabang sa dalan apan nihunong sa tunga sa highway hinungdan nga nakalitan ang drayber sa Ceres bus ug natapsingan kini. / GPL, hulagway gikan sa PNP Compostela

Kanhi priso gitipi

Posted: 21 Jun 2022 05:27 PM PDT

USA ka kanhi piniriso ang gipusil patay sa wa mailhing mamumuno didto sa Sityo Laurente, Barangay Tejero, siyudad sa Sugbo sa Martes sa alas 5:30 sa buntag, Hunyo 21, 2022.Ang biktima giila nga si Kerwin Ancero Florita, 56 anyos, ug molupyo sa nahisgutang lugar.Si Master Sergeant Rainer Mahinay, imbestigador sa Waterfront Police Station 3, nagkanayon nga si Florita naigo sa iyang likod makaduha ka higayon ug ang bala milapos sa iyang dughan, ug sa iyang tuo nga abaga.Ang suspek dali'ng misibat human sa nahitabo, samtang ang biktima gidala sa Cebu City Medical Center diin gideklarar nga dead on arrival.Matud ni Mahinay nga anggulo sa ilegal nga drugas ang ilang tutokan sa imbestigasyon sanglit ilang nasayran nga ang biktima napriso kanhi sa kasong drugas ug niadtong tuig 2018 kini nakagawas. (BBT, TPT)

Drivers di gusto’g fare increase

Posted: 21 Jun 2022 05:37 AM PDT

Transportation group sa Sugbo way tinguha nga mangayo og umento sa pletehan sa mga public utility vehicles (PUVs) apan nanawagan sa kagamhanan nga mopatunga sa sagunson nga pagsaka sa presyo sa gasolina.Ang Pinagkaisang Samahan ng mga Tsuper at Operator Nationwide (Piston) Cebu chapter ang niawhag ngadto sa Cebu City government ingon man sa Land Transportation Franchising and Regulatory Board (LTFRB) Central Visayas nga momugna og programa nga katabangan ang PUV drivers sa maong sitwasyon.Matod pa sa chairman sa Piston, Greg Perez, nga ubay-ubay na sa mga PUV drayber ang wa una mamasahero gumikan sa grabeng pagsaka sa presyo sa gasolina.Sa higayon nga mangayo og umento sa pletehan ang maong mga PUV drayber ug operators, maghatag sab kini og suliran sa mga pasahero. "Amoa pud gi balanse kon asa kuhaon ug unsay mahitabo sa atong mga sumasakay kon mo submit ta og petition," matod ni Perez.PETISYONNiadtong Hunyo 9, ang LTFRB-7 nakadawat og petisyon sa gipangayo nga P2 nga provisional mininum fare increase sa mga PUJs nga gikan sa nagkadaiyang transport group sa Sugbo.Kon kaaprobahan ang maong usbaw sa pletehan, mamahimo nang P9 ngadto sa P11 ang mininum nga pletehan sa PUJs.Si Perez nagkanayon nga angay nga isuspenso sa kagamhanan ang excise tax ngadto produktong petrolyo.E-JEEPSamtang si Konsehal Nestor Archival nisugyot nga angayan na nga mogamit ang kagamhanan sa electric-powered vehicles sa tuyo nga makadaginot sa gasolina, ilabi na nga way hunong ang pagsaka niini.Matod pa ni Archival nga mopalabang siya og resolusyon ngadto sa Konseho sa tinguha nga ma-implementar ang maong proyekto."What I am going to do is I am going to make a resolution then I will reach out the mayor that this is the time now to make a proactive (solution)," pasabot ni Archival.Masaligon ang konsehal nga kon kini mapatuman ang siyudad makadaginot ngadto sa P200 milyones nga gasolina ingon man sa maintenance sa unit.TAXISa laing bahin, ang chairman emiritus Richard Cabucos sa Metro Cebu Taxi Operators Association (MCTOA), kon maoy pabut-on, gusto niyang ipatuman ang status quo nga pabiling P40 ang flag down rate sa mga taxi dinhi sa Sugbo.Gihulagway ni Cabucos, kinsa maoy tag-iya sa Richielda Taxi, nga gumikan niining walay hunong nga pagsaka sa produktong petrolyo, ug kon ang mga operator magsige usab pasaka sa pletihan, ang mga sumasakay mao nay masuko."Tungod aning increase sa gasolina nga wa ta kabawo kanus-a mohunong, useless lang gihapon nang gipangayo nga P20 kay wa man tay mahimo ana, sunod na sad, na ana say increase, sige lang increase," pasabot ni Cabucos.Matod pa nga mamahimong sabuton lang sa taxi drayber ug pasahero ang pletihan sa taxi."Sa akong bahin, sabotsabot lang gud unta ang pasahero ug ang driver nga gusto silang madali ila lang sab i-compensate ang ilang pagsakay nga adunay aircon, naa silay auto kon asa silang destinasyon moadto sila nalang unta ang mag-igo ug ilang tabangan ang driver nga mo-exist ang ilang industry," pasabot ni Cabucos.

Malacañang maoy agdon sa EO ni Gwen

Posted: 21 Jun 2022 05:19 AM PDT

Ang undersecretary sa Department of of Interior and Local Government for barangay affairs, Martino Diño, nibutyag nga agdon ang desisyon sa Malacañang mahitungod sa balaudnon sa kagamhanan sa Probinsiya sa Sugbo may labot sa optional nga paggamit sa face mask.Matod pa ni Diño nga pabiling ang tanang barangays sa nasud sa pagtamod sa balaod bahin sa pagpatuman sa preventive protocol gumikan sa padayong hulga sa coronavirus disease."Tayo naman susunod lang tayo sa batas na ginawa ng ating kongreso at senado ito 'yung Bayanihan Act para sa paglaban natin sa Covid-19. Itong batas na ginawa ay hanggang September."Ito ay ipinapatupad sa utos ng Pangulo," saysay ni Diño atol sa Laging Handa public briefing."Pero kung 'yan ang kagustuhan ni Governor Gwen, tignan na lang natin kung ano ang tinatadhana ng batas at tingnan natin kung ano ang magiging kapasyahan ng Malacañang tungol dito sa ginawa na ordinansa ng Cebu," dugang pa sa opisyal.

Informal settlers gibasol, flood control projects nalangay

Posted: 21 Jun 2022 05:17 AM PDT

Usa sa mga hinungdan nga nalangay ang dinalian nga pagpatuman sa multi-million river improvement ug flood control project sa Cebu City mao ang informal settlers ug mga estruktura.Ang chairman of the committee on infrastructure, Konsehal Jerry Guardo, nipahibawo nga ang Nasudnong Kagamhanan pinaagi sa Department of Public Works and Highways (DPWH) migahin og P8 bilyones alang sa maong proyekto apan P1.2 bilyones pa lang ang napatuman.Gitug-an sa opisiyal nga naglisod sila sa pagpatuman sa kinatibuk-ang proyekto gumikan sa mga residente nga namuyo sa project site ug estraktura nga nilapas sa 3-meter easement sa sapa.Ang naasoyng proyekto naglakip sa mga sapa sa Butuanon, Lahug, Guadalupe, Kinalumsan ug Bulacao.Bugtong ang phase one kun dredging works sa maong mga sapa ang nakompleto nga nagkantidad og P100 milyones.Makita sa hulagway ang baha sa dalan Bonifacio, Barangay Parian sa dihang nibunok ang uwan niadtong Lunes sa gabii, Hunyo 20, resulta sa pag-awas sa sapa sa Barangay T.Padilla. (IRT, Amper Campaña)

Sugilanon: Ang balos sa kasal-anan

Posted: 21 Jun 2022 05:15 AM PDT

FAMILA N. JMENEZLindogon, Sibonga, CebuWala makalihok si Magda dihang nanghagis ang iyang kinamaguwangang anak nga si Lando sa ilang tugkaran. Wala siya masayod kon unsaon paghupay ang labihang kalagot niini. Buotan ug responsable ang iyang anak. Wala kini bisyo sama sa uban niyang mga igsuon. Di pa lang dugay gikan sa trabaho dihang nasayran niini nga ang iyang asawa nikuyog sa laing lalaki.Maoy gibalita ni Lando nga ang mga sinina ni Selda wala na sa kabinet. May tulo sila ka mga anak nga pulos pa gagmay. Ang kamaguwangan nag-edad og nuybe, siyete ang ikaduha ug singko ang kamanghuran. Dugay na nilang nadunggan gikan sa mga silingan bahin sa pag-iring-iring ni Selda ug sa usa ka trabahante nga taga Cansico, apan kay kutob ra sa huhungihong, wala kini panumbalinga ni Lando. Dako ang iyang pagsalig sa iyang asawa nga di kini magluib kaniya kay nakita niya nga mahal kaayo niini ang ilang mga anak. Pakyas diay ang iyang gitanom nga pagsalig, kay bisan aduna silay mga anak, yano ra ang pagtalikod niini sa ilang pamilya."Balik intawon, Selda! Maluoy ka bisan para na lang sa atong mga anak!" singgit ni Lando samtang naghilak. Diha sa iyang kilid dinha ang iyang tulo ka mga anak nga naglumba usab paghilak. "Ma...asa na man ka?"Sama sa gikumot og puthawng kamot ang kasingkasing ni Magda nga nagsud-ong sa kahimtang sa iyang anak ug mga apo. Wala niya himatikdi nga may mga luha nga midalitay sa iyang duha ka aping. Nagpabilin siyang wala mahaglihok sa iyang gibarugan. Nitalaw siya, di siya makahimo sa paglakang sa iyang mga tiil aron duolon ang iyang anak.Ang tinuod, diha si Magda sa paglakaw sa iyang binalaye kauban ang kabit niini. Ulitawo pa ang maong lalaki. Ilahang gilipat ang mga bata pinaagi sa paghatag og usa ka gatos nga kuwarta aron mamalit sa tindahan og pagkaon. Gipugngan niya si Selda, apan gitubag siya niini, "Tan-awa usa ang imong kaugalingon sa di ka pa mopugong kanako!"Wala siya makatingog sa gisulti ni Selda hangtod nawala sila sa iyang panan-aw. Nahunong na ba diay ang iyang katungod isip usa ka inahan?MILABAY ang pipila ka mga adlaw ug wala gihapon silay balita bahin kang Selda. Ang nahitabo sa ilang pamilya nahimong sumsoman sa ilang mga silingan. Kon hunahu-naon mas may daghan pang nahibaw-an ang mga silingan kay kanila nga nahitungdan. Si Lando nagsige lang og hinuktok nga mag-atubang sa dalan. Maila sa mga mata niini ang walay saktong pagkatulog. Kanunay siyang namasinbasin nga maayo untag mapul-an si Selda sa kabit niini ug mobalik na sa ilang panimalay. Andam niyang buhaton ang tanan aron modako ug motubo ang ilang mga anak nga may inahang nag-amuma.Usa ka hapon niana wala kapugngi ni Magda ang kaugalingon. Giduol niya si Lando."Kon mahimo, bisan lisod...kalimti na lang si Selda, anak," ni Magda.Lalom ang gibuhiang panghupaw ni Lando. Wala niya lingia ang iyang inahan nga diha sa iyang kilid."Ingon ini ba sab ang gibati ni Papa, Ma?" ni Lando human trapohi ang unang tulo sa bag-o niyang luha. "Saksi ko sa pagkahugno sa iyang kalibutan dihang imo kaming gibaylo sa imong kabit. Dili diay lalim ang iyang gibati adtong panahuna kay sama ni Papa, nakapangutana ko sa akong kaugalingon kon diin ko dapita nagkulang sa akong asawa ."Nakahinumdom si Magda sa mitaliwan niyang bana ug giunsa niya kini sa pagluib kaniadto. Dako ang iyang pagmahay."Pasayloa intawon ko, anak!" ni Magda sa nagkurog nga tingog."Dawaton ko si Selda kon mobalik siya, Ma, sama sa pagdawat ni Papa dihang nibalik ka namo," ni Lando.Wala kapugngi ni Magda ang paghilak samtang gihalog si Lando. Walay kabutangan ang kasakit nga iyang gibati samtang nagsud-ong sa gidangatan sa iyang anak. "Pasayloa ko kon ikaw ang nahiagom sa balos sa akong kasal-anan!"(KATAPUSAN)

50 ka toniladang basura nakuha sa Butuanon River

Posted: 21 Jun 2022 04:51 AM PDT

Sa gihimong clean-up drive sa kagamhanan sa Mandaue City ngadto sa Butuanon River agi og pangandam sa ting-uwan, moabot ngadto sa 50 ka toniladang basura ang nakolekta.Matod pa ni Atty. John Eddu Ibañez, executive secretary ni Mayor Jonas Cortes, nga ang maong clean-up drive gipasiugdahan sa Department of Public Works and Highways (DPWH), Department of General Services (DGS), Mandaue City Disaster Risk Reduction and Management Office (MCDRRMO), ug ang buhatan sa city engineer nga gihimo niadtong Hunyo 20.Sigun pa ni Ibañez nga nakadawat sila og reklamo gikan sa mga residente duol sa maong sapa nga mosanap ang tubig ngadto sa ilang kabalayan resulta sa basura nga nagtipun-og nga nakabara.Sa kabalaka nga masinati ang grabeng baha kon sagunson ang ting-uwan human mipahibawo ang Philippine Atmospheric, Geophysical and Astronomical Services Administration (PAGASA) nga masinati ang uwanon gikan niadtong Abril hangtod na sa buwan sa Agusto, nihimo sila sa kalihukan.Sagad sa mga nakuha gikan sa maong sapa mga plastik, nangaputol nga sanga ug punoan sa kahoy, ug ubang matang sa basura human gisudlay ang 500 metros ngadto na sa usa ka kilometro nga distansiya paingon ngadto sa baba-an sa Butuanon.Matod pa ni Ibañez nga ang mga kahoy nga nakolekta naggikan sa bukirang bahin diin konektado ang sapa nga nangaanod atol niadtong bagyong Odette niadtong Disyembre 2021.Subling mipahinumdom si Ibañez ngadto sa publiko ilabi na niadtong nanimuyo daplin sa sapa nga dili magpatakag labay sa ilang basura.Nasayran nga ang sapa sa Butuanon ug Mahiga Creek gihulagway sa City Planning and Chamber of Commerce and Industry Development Office niadtong 2015 nga usa sa hinungdan sa grabeng baha sa Sugbo. (Dugang taho ni FVQ)

LCPO, PDEA nakadawat og P50,000

Posted: 21 Jun 2022 04:51 AM PDT

Human sa malampuson nga buy-bust operation sa Lapu-Lapu City Police Office nga miresulta sa pagkasakmit sa P27.2 milyones nga kantidad nga shabu, nakadawat sila og pahalipay gikan ni Mayor Junard Chan.Ang buhatan sa City of Lapu-lapu Office for Substance Abuse Prevention (CLOSAP), ubos sa pagdumala ni Garry Lao, nirekomindar ngadto sa buhatan ni Chan nga hatagan og pahalipay ang kapulisan sa ilang kalampusan.Plaque of recognition ug P50,000 ang gitunol ngadto sa LCPO agig pahalipay sa ilang subsob nga kampaniya batok sa ginadiling drugas.Matod pa ni Lao nga pinaagi sa maong incentive makahatag kini og igong kadasig sa kapulisan ug ubang ahensiya nga doblehan pa ang ilang paningkamot sa pagsumpo sa illegal drugs sa Lapu-Lapu.Kahinumduman nga niadtong Hunyo 13, personnel sa Drug Enforcement Unit ug City Intelligence Unit sa LCPO nipahigayon og operasyon sa Barangay Pajo nga niresulta sa pagkasikop ni Leonora Quistadio, 43, taga Surigao del Sur, apan nag-operate sa Lapu-Lapu City.Nasakmit ang gibana-bana P27.2 milyones nga kantidad sa shabu.Lakip nga makadawat og P50,000 ang Philippine Drug Enforcement Agency (PDEA)-Lapu-Lapu sa ilang paningkamot nga mamahimong drug cleared ang Barangay Tungasan, Tingo, Baring, Caw-oy sa isla sa Olango ug ang barangay Suba-basbas sa mainland.Nakadawat sab og pasidungog ang mga sakop sa City Anti-Drug Abuse Council (CADAC).

Typhoid fever mitumaw sa Barili

Posted: 21 Jun 2022 04:48 AM PDT

Ipasusi ni Barili Mayor Julieto "Julie" Flores ang reklamo kalabot sa giingong kaso sa typhoid fever sa lungsod.Ang typhoid fever usa ka bacterial infection nga makuha gikan sa pagkaon o contaminated nga tubig.Gibutyag ni Flores nga makighinabi siya pag-usab sa Municipal Health Officer (MHO) aron masusi kon diin nakuha sa mga pasyente ang maong sakit.Nasayran nga adunay post gikan sa usa ka residente sa Barili nga nagpakita sa gituohang taas nga linya sa mga pasyente nga matod pa nataptan sa dengue ug typhoid."Atong giingnan ang atong Municipal Health Officer to conduct investigation kon asa gyud or unsay hinungdan nganong taas kaayo ang kaso," matod pa ni Flores.Gawas sa maong sakit, ipasusi usab ni Flores ang datos sa mga nataptan sa sakit nga dengue.Ang dengue usa ka virus nga gikan sa usa ka matang sa lamok.Matod ni Flores nga sukad sa Abril 2022 hangtod sa uwahing adlaw sa Mayo, nakatala kini og walo ka mga kaso sa dengue fever ug way gikatahong nakalas.Subay niini, giawhag ni Flores ang iyang mga konstituente nga magbinantayon ug manghinlo sa palibot aron kalikayan ang pagkatap sa dengue.

Editoryal: Seguridad sa pagkaon

Posted: 21 Jun 2022 04:20 AM PDT

Usa sa labing importanteng pundasyon sa kalig-on sa usa ka nasod mao ang seguridad sa pagkaon. Kon gutom ang katawhan, daghang aburido nga utok. Dili makahunahuna pag-ayo. Dili makabalanse sa dili o maayong buhaton. Tabunok nga kahigayonan sa pagduslit sa pag-alsa sa masa ug rebelyon.Makatay-og sa pagbati ang gibutyag ni National Economic and Development Authority (Neda) chairman-designate Arsenio Balisacan niadtong Martes, Hunyo 21, 2022, nga ang nasod karon nakasinati og krisis sa sektor sa agrikultura mugna sa pagtaas sa mga palaliton, labi na sa pagkaon."Food crisis have risen already and as you know, the Avian Flu, this problem has been with us that has led to price increases of meat. Rice prices have also been a problem that while the tariffication has brought down the cap of prices quite a bit, they are still high and the issues that concern farmers, the low profitability of rice farming in agriculture and farming in general.." matod ni Balisacan sa usa ka television interview.Gawas pa, gitumbok ni Balisacan ang korapsiyon sa pagpatuman sa mga programa, proyekto ug pagpayuhot sa mga produkto gikan sa gawas sa nasod, ningpasamot sa giatubang nga problema, sama sa epekto sa pandemiya sa Covid-19 ug ang pagsutoy sa presyo sa mga produkto sa petrolyo tungod sa kasamok sa Russia ug Ukaine sa Northern Europe.Halos dungan sa laing umento sa presyo sa lana niadtong Martes, Hunyo 21, mao ang pagtikyaob sa bili sa peso sa Pilipinas ngadto sa P54.2 batok sa 1 ka US dollar. Paborable kini sa remittance sa overseas Filipino workers (OFWs) apan negatibo ang epekto sa ekonomiya sa nasod sa kinatibuk-an.Dunay punto ang pamahayag niadtong Lunes, Hunyo 20, ni President-elect Ferdinanad 'Bongbong' Marcos, Jr. nga temporaryo nga modumala sa Department of Agriculture (DA) sa iyang paglingkod sa gahom karong Hunyo 30, tungod sa naasoy nga krisis nga kinahanglan sa dinaliang aksiyon ug solusyon.Hinaut nga masanta sa bag-ong administrasyon sa nasod ang nag-ung-ong nga halapad nga kagutom.

Talk to Papa Joe: Way amahan

Posted: 21 Jun 2022 04:19 AM PDT

Dear Papa Joe,Tagua lang ko sa ngan nga May, di tinuod nakong name kay medyo sensitibo ni akong problema. Ang akong suliran mao nga wa ko makaila sa akong amahan ug way pangalan na nahisgutan akong mama. Bisan na sa akong mga lolo ug lola. Wala diay mi mag puyo sa amo ug naa mi karon sa laing lugar ug bisitahon lang mi sa akong lolo ug lola. Ambot ba nga di gyud ganahan si Mama mobisita sa balay sa akong mga apuhan, as in layo kaayo mi.Di man sad ko makasulti nga nasuko sila si Lolo ug Lola niya nga namabdos nga way papa. Pero sa akong edad nga 15 wa gyud ko makaila kinsa gyud akong amahan. Sa akong pagduki-duki pinaagi sa mga marites nga na friend nako sa Facebook nga mga silingan nila mama kay ang nakapabuntis daw ni Mama kay iyaha ra daw nga igsuong adik. Meaning akong tiyo nga naa ra sa amo pa nagpuyo kay medyo nalisuan man og maayong pangisip.Angay ba nako pangutan-on si Mama niini? Unsa may buhaton ko? tambagi ko.MAYMay,Kon may basihan kang makapamatuod na sakto imong mga nadungog, mas maayo siguro nga di na lang nimo pangutan-on si Mama nimo kay basin hangtud karon naa lang gihapon ang trauma.Pwede ka siguro pasekreto nga mangutana sa imong mga apuhan. Basin pa diay og mosulti sila sa tinuod kay katungod sad nimo nga makaila kinsa sad imong amahan. Pero wa na siguroy pulos kay gawas nga bati ang nahitabo, wa naman diay sa maayong pangisip ang imong tiyopapa. Basin nahimo to niya bunga sa tama sa ginadiling drugas. Kon sakto na ka sa panghuna-huna, mabalanse na lang na nimo tanan ug masabtan nimo. Ang importante magpadayon ka sa imong pagpakabuhi ning kalibutana.PAPA JOE

Diputado: Nakabalos na ang mga biktima

Posted: 21 Jun 2022 04:18 AM PDT

Dihay usa ka supplier og tambal nga gusto moapil sa bidding sa probinsiya.Ang una niyang gihimo, nagpangutana usa siya sa patakaran, kay lainlain baya ang patakaran sa bidding.Timing nga napunta siya sa nakabalo sa patakaran. Gitagaan dayon siya og bidding form nga papirmahan niya sa ubang suppliers aron pagseguro nga siya gyod ang modaog.Sobra sa P10 milyunes ang budget sa probinsiya.Hilabihang lipaya niya, tiaw bay makuha niya ang bidding nga balor og P10 milyunes.Human madawat ang bidding form, nangutana dayon siya og pila may inyo ani. Ang tubag: 40%.Wala dayon makatubag ang supplier ug human sa pipila ka pitokpitok sa mata, iya na lang giuli ang bidding form.Dili na lang ko moapil ana, sir, patay akong negosyo ana.Aw okay, unsaon man nato nga mao man ni patakaran diri, matod pa sa naghatag sa form.* * *Dihay gusto magpa-renew sa iyang quarry permit.Niadto siya sa usa ka opisina ug nangutana siya kabahin sa renewal sa permit. Awtomatik nga gi-refer siya usa ka tawo nga sinaligan, kinsa mao lang kuno ang iyang duolon.Gitagaan siya og cellphone number ug nagsabot sila nga magkita sa usa ka kapehan.Tuod man, nagkita ang duha. Human nisulti sa iyang tuyo nga renewal, awtomatik pod ang maong sinaligan nga niingon nga dunay bayranan nga P1 ka milyon aron mahatagan sa renewal.Nakugang ang quarry operator sa kantidad ug nihangyo. Gikataho nga nitugot usab ang sinaligan nga pwede og P800,000.00.Ang nakadimalas kay P500,000 ra ang iyang nadala busa nihangyo ang gusto magpa-renew nga iuna lang usa niya ang kwarta ug isunod lang ang kulang nga P300,000.Nisugot ra pod kini.* * *Human sa bayranay, nanawag dayon ang nagpa-renew sa iyang mga trabahante ug nimando dayon nga magpadayon na ang pag-quarry.Nagtuo siya nga libre na siya sa dakop kay nakahatag na god siya og partial nga sobra sa katunga.Nasiga ang iyang mga mata sa pagkahapon sa dihang gibalitaan siya nga gidakop ang iyang mga cargo truck.Nanawag na pod siya sa sinaligang tawo ug nakigsabot nga makigkita. Sa dihang nagkita na sila, mibayad na lang ang quarry operator sa iyang kulang nga P300,000.Ug tuod man, wala na dakpa ang iyang mga truck.Sa dihang gipangutana siya og nganong mibayad siya sa kulang, mitubag lang pod ang quarry operator nga ilimos na lang to niya sa taas nga opisiyal.Matod pa sa quarry operator ngadto sa iyang gisultihan nga "makabalos ra bitaw ko ana niya pohon".Tuod man, nakabalos gyod ang operator (human napildi kini sa miaging eleksiyon). Hasta ang supplier og tambal. Hasta ang uban nga mga nabiktima pod sa kurakot sa opisiyal.

Barrita: Katungod sa bata nga abandonado

Posted: 21 Jun 2022 04:09 AM PDT

Gipirmahanan ni Presidente Rodrigo Duterte niadtong Mayo 6, 2022 ang usa ka balaod nga nagpatigbabaw sa mga katungod ug naghatag og proteksyon sa mga "foundling" kun mga batang abandonado ug wa mahibaw-i kon si kinsa ang ilang mga ginikanan.Ubos sa Republic Act No. 11767, ang Foundling Recognition and Protection Act, ang foundling nga makit-an dinhi sa Pilipinas ingon man sa mga embahada, konsulado ug teritoryo sa Pilipinas sa gawas sa nasod pagailhon nga usa ka natural-born Filipino citizen "regardless of the status or circumstances of birth."Ang ilang mga katungod magsugod sa ilang pagkahimugso. Busa wa na silay pagabuhaton pa aron mahingpit ang ilang pagka Filipino citizen. Di usab kini mahimong kwestiyunon, gawas lang kon dunay igong kalig-unonan nga langyaw ang iyang ginikanan.Di usab makaapekto nini ang simulated birth certificate o kakuwang sa mga papeles sa pagsagop, kalangan sa pagtaho ug pagrehistro sa hingtungdan nga mga ahensiya sa kagamhanan.Ubos sa maong balaod, gisangon ang proteksyon sa mga foundling ngadto sa National Authority for Child Care (NACC), usa ka ahensiya ubos sa Department of Social Welfare and Development (DSWD). Gilatid usab ang mga lagda alang sa adoption ug legitimization sa mga foundlings ingon man foster care. Lakip niini kadtong mga foundlings nga karon hingkod na ang panuigon.Ang si bisan kinsang ginikanan mahimong mobiya sa iyang anak nga 30 ka adlaw o mas bata pa nga way tulubagong kriminal didto sa mga safe havens sama sa mga licensed child-caring and child-placing agencies, mga hospital sa gobyerno, infirmaries, city health offices, birthing homes, rural health units ug barangay health stations. Apil sab niini ang mga local social welfare office ug residential care facilities sa DSWD ug sa lokal nga kagamhanan.Pananglit ang mga biological parents ug mga legal guardians magmahay sa ilang pagbiya sa bata, mahimo silang mopasaka og petisiyon sa NACC aron makuha pagbalik ang bata ug mahibalik ang ilang parental authority, gawas lang kon gisagop na ang maong bata.Ang makakaplag sa usa ka abandonadong bata kinahanglan nga mopahibawo niini sa usa ka local social welfare officer o sa labing duol nga safe haven provider sud sa 48 oras pinaagi sa usa ka affidavit.Ang maong balaod nagpahamtang og silot nga pagkapriso gikan sa unom ka buwan ngadto sa unom ka tuig sa mopalsipikar sa rehistro sa usa ka foundling. Kon gitumong kini alang sa kidnapping o human trafficking, ang tanan nga nalambigit multahan og gikan sa usa ka milyon ngadto sa lima ka milyon ka pesos dugang sa priso gikan sa tulo ka buwan ngadto sa duha ka tuig.Kadtong mobabag o molangaylangay sa pagsusi sa tinuoray nga kahimtang sa pagkahimugso sa foundling ug sa iyang mga ginikanan silotan sa pagkabilanggo gikan sa unom ka buwan ngadto sa lima ka tuig. Samtang ang usa ka safe haven provider nga napakyas sa pagtaho sa pagkakaplag sa usa ka foundling sud sa 48 oras multahan og gikan sa P500,000 ngadto sa P1 milyon. - edbarrita@gmail.com

Gisilutan si Abueva

Posted: 21 Jun 2022 04:09 AM PDT

Mga duwa karon3:00 pm- Converge batok Terrafirma6:00 pm- Ginebra batok NLEXGipahamtangan og silot sa Philippine Basketball Association (PBA) ang pambatong forward sa Magnolia Ang Pambansang Manok Hothots nga si Calvin Abueva gumikan sa reaksyon niini human siya na-ejected sa duwa batok sa Brgy. Ginebra Gin Kings sa Philippine Cup niadtong Dominggo, Hunyo 19, 2022.Gianunsyo sa PBA kagahapon nga gipamulta sa liga si Abueva og P10,000 ug gipahamtangan sab kini og usa ka duwa nga suspensyon."Abueva has already been warned after a first unsportsmanlike conduct prior the PBA season, and that a similar offense would result in a suspension," opisyal nga pamahayag sa PBA.Sa sayong bahin sa 4th quarter, natawagan si Abueva sa iyang ikaduhang technical foul dihang nagkabinanggaay sila ni Ginebra pointguard John Pinto ug na-ejected ang gitawag og 'The Beast.'Sa iyang paggawas sa korte, si Abueva nagsinggit-singgit og "Japan! Japan! Bye PBA!" nga daw nagpasumbingay nga mobalhin na siya pagduwa sa Japan B.League sama sa gibuhat sa ubang dekalidad nga Pinoy nga mga baskebolista.Sa laing bahin, ang Gin Kings (2-1) makigbatok sa NLEX Road Warriors (2-1) sa main game karong alas 6:00 sa gabii sa pagpadayon sa aksyon sa Philippine Cup sa Mall of Asia Arena sa Pasay City.Sa premirong duwa, makigbatok ang Converge FiberXers (1-3) sa Terrafirma Dyip (0-3) sugod karong alas 3:00 sa hapon.

Multi-titled French team moataki sa Pilipinas

Posted: 21 Jun 2022 04:06 AM PDT

Nakatakdang moasdang sa Pilipinas ang multi-titled French basketball team nga Asvel Lyon aron mohamag og tulo ka exhibition games – usa batok sa Gilas Pilipinas – sa umaabot.Ang Asvel Lyon, nga nakalangkat na og 20 ka mga titulo sa French Pro A League, makigsangka sa Philippine Basketball Association (PBA) squad nga Blackwater Bossing sa premiro nilang tahas karong Agusto 29, 2022.Sunod nga sangkaon sa Asvel Lyon ang laing bisitang team nga mao ang Hong Kong Dragons.Human niini, ikaharong na sa Asvel Lyon ang Gilas Pilipinas.Nahulma ang ideya sa pag-ataki sa Asvel Lyon sa Pilipinas dihang personal nga misaksi si French Ambassador to the Philippines Miche'e Boccoz sa Game 3 sa miaging Governors Cup finals tali sa Brgy. Ginebra Gin Kings ug Meralco Bolts.Ang Asvel Lyon gipanag-iya ni National Basketball Association (NBA) legend Tony Parker.

RAFI mipasalamat, miila sa ilang mga kauban sa Komunidad Kontra Covid 19

Posted: 21 Jun 2022 03:43 AM PDT

Sa miaging duha ka tuig, ang katawhan nag-atubang sa Covid-19 global pandemic. Bisan sa kadaghan sa hagit, nahimo gihapon nga makahuluganon ang kinabuhi sa pagsagubang niini.Ang Humanitarian Disaster Preparedness and Response program sa Ramon Aboitiz Foundation, Inc. (RAFI HDPR) hugot nga nakig-alayon sa local government units (LGUs), private organizations, ug ubang civil society groups sa pakigbatok sa Covid-19.Uban sa pakighiusa sa partner organizations, ang RAFI HDPR nakahatag og tukma sa panahon nga hinabang sa mga komunidad pinaagi sa relief, information education campaigns, vaccination drives, patient transportation support, ug daghan pa.Sa pagsaulog sa maong kolaborasyon ug paningkamot, ang RAFI HDPR nag-organisar og recognition ug thanksgiving night niadtong Hunyo 9, 2022, uban sa tema nga nag-ulohan og "Pasalamat."Ag RAFI HDPR nipakita sa ilang paghangop ug pagpasalamat sa tanang organisasyon ug mga indibiduwal nga ningtabang kanila sa pakigbatok ug pag-alibyo sa epekto sa Covid 19 sa risgo nga mga komunidad.Ang mga nanambong sa kalihokan naglakip sa partner government ug non-government organizations, individuals ug companies lakip sa Department of Health, Visayas Vaccination Operations Center, Project Balik Buhay, Department of Interior and Local Government (DILG), Philippine Colleges of Physicians (PCP) Central Visayas Chapter, Cebu Medical Society (CMS)_, ug LGU's Cebu City, Mandaue City, Talisay City, mga lungsod sa Minglanilla, Cordova, Lilo-an, Consolacion, ug Lapu-Lapu, uban pa.Si Amaya Cristina Aboitiz-Fansler, RAFI President ugChief Executive Officer, nipadayag sa iyang kinasingkasing nga pasalamat sa tanang partners nga nihatag sa ilang panahon ug kusog sa pagsuporta sa RAFI ug sa ilang paningkamot batok sa Covid-19.Sa 2020, ang RAFI HDPR nilusad sa Komunidad Kontra Covid 19 campaign nga gitumong sa pagtaas sa kahibalo bahin sa makamatay nga virus ug pagpanalipod sa panglawas ug kaayohan alang sa risgo nga komunidad.Sa 2021, ang RAFI gipasidunggan isip Most Outstanding COVID-19 Volunteer Organization sa Central Visayas sa Philippine National Volunteer Service Coordinating Agency.Si RAFI Chief Operating Officer Riella Guioguio nipaambit sa maong pasidungog sa tanang program partners nga nakatabang sa ilang paningkamot bahin sa pandemiya sa Covid-19. (PR)

JCI Cebu misaulog sa 74th founding anniv.

Posted: 21 Jun 2022 03:43 AM PDT

Ang JCI Cebu misaulog sa ika-74 nga anibersaryo niadtong Hunyo 16, 2022 uban sa padayong pag-abante taliwala sa daghang hagit sa organisasyon.Ang kasaulogan gipahigayon sa Casa Gorordo nga naghulagway sa kultura sa Sugbo atol sa cultural appreciation night sa JCI Cebu.Ang anibersaryo gitambongan sa mga miyembro lakip sa past presidents, ug senators sa JCI Cebu, uban sa valued partners.Ang midyear awards ug pagbukas sa 75th diamond anniversary logo mao ang highlights sa kasaulogan ug ang pag-ila sa mga trabaho ug dedikasyon sa mga miyembro.Si JCI Sen. Juanito Cubos, usa sa mga past president sa JCI Cebu, nihatag sa inspirational message bahin sa kalamboan sa organisasyon."For a new aspirant witnessing the 74th Anniversary celebration. It gave me the glimpse of what I will go through and this thrilled me to kickstart my journey with this brotherhood," matod ni Warren Flores, usa ka aspiring member sa JCI Cebu. (PR)

Tinubdan sa drugas nga nasakmit sa siyudad sa Sugbo, Talisay usa ra

Posted: 20 Jun 2022 09:00 PM PDT

ANG hepe sa kapulisan sa siyudad sa Sugbo ug Talisay mibutyag nga usa ra ang tinubdan sa ilegal nga drugas nga ila'ng nasakmit gikan sa duha ka suspetsado atol sa ilang tagsa-tagsa ka gipahigayon'g anti-illegal drug operation.Kaganinan'g Martes sa kadlawon, Hunyo 21, 2022, ang suspetsado nga si Jonathan Avenido Conahap, 46 anyos ug molupyo sa Sityo Ponce 2, Barangay Carreta, nakuhaan og sobra sa usa ka kilo sa gidudahan'g shabu nga mobalor og P7.4 milyones atol sa pagpang-ronda sa mga operatiba sa Drug Enforcement Unit sa Parian Police Station 1 nga gipangulohan sa hepe nga si Major Efren Diaz Jr. didto sa Imus Road, Sityo Riverside, Barangay Lorega San Miguel.Samtang niadtong Sabado sa gabii, usa ka Lyndon Ylanan Rongasan, 34 anyos nga taga Barangay Hipodromo apan tua na mag-basehan sa kaulohan, nasakmitan usab og sobra sa tulo ka kilo nga ilegal nga drugas nga mokantidad og P20.4 milyones atol sa buybust operation sa Talisay City Police Station nga gipangulohan ni Lieutenant Colonel Randy Caballes didto sa Sombria Road, Barangay Lawaan 1.Si Diaz ug Caballes nagkanayon nga usa ra ang supplier sa ilegal nga drugas ni Conahap ug ni Rongasan.Apan wala una nila nganli ang maong supplier samtang ila pang gisubay ang lain'g gihagbongan sa mao'ng drugas dinhi sa Central Visayas. (BBT, TPT)

Editoryal: Napagan ang tanan

Posted: 20 Jun 2022 06:55 AM PDT

Sukad pa kaniadto nga kon mosaka ang presyo sa gasolina ug uban pang produktong petrolyo, motakod usab kini ngadto sa ubang mga palaliton.Di lang sa mga palaliton, apil na usab sa presyo sa uban, sama sa kuryente. Magtakodtakod lagi unya ang mga kabos maoy magping-it. Ang mga negusyo nga apektado sa pagsaka sa presyo sa lana mopatong ra man sa ilang dugang gasto ngadto sa ilang mga baligya.Ang mga kabos? Igo ra sa pag-ugom sa umento, way mahimo. Mag-antos kay suweldo ra ang gisaligan. Kinahanglan nga mangita og paagi ang kagamhanan nga di magpasulabi ang umento sa lana pinaagi sa pagtimbangtimbang kon maayo bang moangkat sa Russia inay magsalig sa naandang tinubdan karon nga pwerte nang mahala.Gisilutan man gud ang Russia sa mga nasod sa Kasadpan tungod sa ilang pagsulong sa Ukraine. Apil sa gi-ban mao ang lana sa Russia nga karon gibaligya na og barato ug gikatahong gipangsuyop sa India ug China.Ang Pilipinas duna tingali untay maayong tinubdan sa lana kon wa pa ang China magsige og harass sa mga kompaniya sa lana nga sobra na sa usa ka dekada nga naundang sa pag-survey sa kadagatan sulod sa exclusive economic zone (EEZ) sa nasod.Panahon na nga moduol sa mga silingang nasod, sama sa Malaysia ug Indonesia nga dunay kaugalingong tinubdan sa lana sa pag-supply dinhi sa nasod, inay nga magsalig sa mga supplier gikan sa nasod sa Kasadpan.I-explore ang possibility sa pagdawat sa tanyag sa Russia nga mo-supply og lana dinhi sa nasod kon mas makaayo ba kay sa makadaut sa nasod ang pagdawat sa tanyag sa mga Ruso.Makigsabot sa China alang sa joint exploration nga mas pabor sa Pilipinas kay sa China kay naa man kini sa atoang EEZ.Di magsalig sa estorya sa Estados Unidos ug ubang adunahang mga nasod nga sayon kaayo nila ang pag-ugom sa epekto sa pagsaka sa produktong petrolyo. Ang Pilipinas di makahimo, igo na lang sa pag-ubo.

Tubilan: Salary Grade 15 sa mga magtutudlo

Posted: 20 Jun 2022 06:54 AM PDT

Daghan na kaayo ang naglaum nga may daghang kausaban sa Department of Education (DepEd) ning pagpanumpa niadtong Dominggo sa Davao City ni Vice President-elect Sara Duterte, diin nitambong mismo ang iyang amahan nga si Presidente Rodrigo Duterte. Gihangop ang pagpanumpa ni Sara kay gipili man siya ni President-elect Ferdinand "Bongbong" Marcos Jr. nga maoy secretary sa DepEd.Wa mahimuot ang mga magtutudlo pinaagi sa grupong Alliance of Concerned Teachers (ACT) sa performance ni Education Secretary Leonor Briones diin ubos kaayo ang kondisyon sa atong panudlo ug pagtuon kansang test scores sa atong mga tinun-an ubos kaayo ikompara sa atong mga silingang nasod sa habagatang Asya ug ang kakuwang sa mga pasilidad nga gamiton sa patudlo nga nasamutan pa sa atong gikasinati nga coronavirus pandemic.Nisamot nga wa mahimuot ang mga magtutudlo kay ang gisaad sa administrasyon ni Presidente Duterte nga pasakahan ang ilang suweldo sama sa gibuhat sa kapulisan ug militar nahitabo, apan wa mohaum sa unsay gimbuhaton. Sugod sunod tuig, ang Teacher 1 magdawat og P25,439. Mao ni ang labing ubos nga suweldo nga madawat sa usa ka magtutudlo nga anaa sa salary grade 11.Gitinguha karon sa ACT nga ang entry level sa Teacher 1 anaa sa salary grade 15 nga mokantidad og P36,619 na ang matag buwan nga madawat nga suweldo kon ibase sa Salary Standardization Law 5, 4th tranche nga magsugod sa Enero sunod tuig. Daghan na kaayo ang malipay niini nga mga magtutudlo kon kini ang madawat nilang suweldo kay karong higayona anaa sa P5,000 ngadto sa P8,000 nalang ilang madawat matag buwan tungod sa daghang deductions.Ang mga maayong mga magtutudlo atua na nang-apply sa Amerika nunot ning klase sa suweldo ug bug-at nga trabaho dinhi sa Pilipinas. Matod sa akong kauban nga magtutudlo nga tua na magtudlo sa Amerika nga ang iyang suweldo kon kwentahon niya base sa kwarta nganhi sa Pilipinas, anaa sa mosobra sa P300,000 matag buwan.Anugon kaayo nga kining maayong mga magtutudlo nga maoy makaluwas nato aron matarong ning sistema nato sa edukasyon adto na hinuon mosilbi ngadto sa laing mga nasod kay maayo ang ilang benepisyo alang kanila. (josephelvirtubilan@gmail.com)

Tambagi ko Noy Kulas: Rinobohay

Posted: 20 Jun 2022 06:52 AM PDT

Dear, Noy Kulas,Maayong adlaw nimo ug sa imong daghang fans. Itago lang ko sa alias nga Del. Ang akong problema parte ni sa akong officemate nga suod na kaayo nako.Ulitawo pa ko but kaning akong officemate nga taguon lang nato sa ngan nga Lenlen, minyo but buwag sa bana sulod na sa two years. Suod kaayo ug usahay dudahan ming uyab but friends lang gyud ming duha. Pirme mi magkuyog og panglaag ug mag-inom kon weekends ug kaadlawon na mi manguli.Naay time nga kuyog mi sa among mga kauban sa office og gimik kay weekend man. Nag rent mi og usa ka balay nga pwede bakasyunan. Grabe ang among inom ug kaon until nangahubog ming tanan. Iyahay ra mi og diskarte sa among pagkatulog.Si Lenlen akong giagak sa usa ka room ug ambot among mga kauban wa mosunod. Pagpahigda nako niya, ni-hug siya ug ni-kiss nako sa lips. Nanginit ko ug pwerte namong romansang duha. Actually semi naked na unta mi but wa nako gidayon nga padung na unta mi og sex kay na worried ko sa among mga kauban.Pagka next week, nahibung man ko wa na siya managad nako. Kon makig-estorya ko niya, molikay na siya. Bisan ang among officemates nahibung. Unsa kahay hinungdan? Unsay akong buhaton?DELDel,Siya ra gyud ang makatubag ana nga pangutana. But ang labing dakong rason ana kadtong nahitabong rinobohay ninyong duha. Duha ra na, either nasuko siya or nauwaw sa hitabo. Kon di man siya makigsulti nimo, pag text kaniya or e-mail na lang og taas pagpasabot sa imong side sa nahitabo.Posible man gud nga naglikay siya aron mapanalipdan iyang self gikan sa emotional attachment or entanglement human sa iyang marriage nga di maayo. Naay mga babaye nga ing ana. Busa ang imong buhaton mao ang pag-explain sa imong side. Ayaw lang gyud pagpamugos kon di pa siya ganahan makigsulti.NOY KULASrojval69@yahoo.com

Dept. heads ipabilin ni Suan

Posted: 20 Jun 2022 06:51 AM PDT

Gisaad ni incoming Cordova mayor Cesar "Didoy" Suan nga iyang ipabilin ang tanang department heads nga kasamtangang nagtrabaho ubos sa administrasyon ni outgoing Mayor Mary Therese "Teche" Sitoy-Cho.Si Suan, kinsa mipildi kang Sitoy-Cho niadtong Mayo 9 nga piniliay, nihimo sa saad atol sa iyang unang dinner meeting uban sa mga department head sa lungsod sa Cordova Home Village niadtong Biyernes, Hunyo 17, 2022."Sa akong gipasalig maski wala pay election, wala akong taktakon kaninyo kay salig ako sa inyong katakos isip mga department heads," pasalig ni Suan ngadto kanila, nga gi-post sa iyang Facebook page.Ang incumbent first councilor nipadayag og paglaum nga magtinabangay sila sa pagpangulo sa lokal nga kagamhanan, sanglit nilabay na ang eleksiyon ug panahon na nga sugdan ang ilang serbisiyo alang sa mga konstituwente sa Cordova.Kabahin sa ilang mga diskusyon atol sa tigom mao ang mga butang nga kinahanglang pangandaman sa tanang mga departamento sa paglingkod ni Suan sa Hulyo 1.Ang mga department head, isip bawos, gikataho nga nagpadayag sa ilang 100 porsyento nga suporta ug pasalig sa bag-ong administrasiyon.Ang kampo ni Sitoy-Cho sa sayo pa niduso og motion for disqualification batok kang Suan atubangan sa Commission on Elections (Comelec) central office niadtong Election Day.Base sa resulta nga gipagawas sa Comelec, si Sitoy-Cho nakakuha lang og 17,052 ka botos niadtong Mayo 9 nga lokal nga eleksyon, samtang si Suan nakakuha og 21,222 ka boto.Usa ka semana human sa piniliay, si Sitoy-Cho niingon nga ang iyang kampo mopasaka usab og election protest batok sa mga opisiyal sa Comelec, barangay kapitan, tanod, barangay health workers ug mga magtutudlo nga gikatahong nalambigit sa mga kahiwian sa eleksyon nga misangpot sa pagkapildi sa kadaghanan sa iyang slate.Siya niingon nga sobra sa 100 ka mga tawo ang nakasaksi sa mga iregularidad nga naglakip sa pagpamalit og botos, mga indibidwal nga nagbotar labaw pa sa kawsa, dili rehistrado nga mga botante nga ningbotar ug ang presensya sa pre-shaded nga mga balota.Una na nga gihimakak ni Suan ang mga pasangil nga gibato kaniya, niingon nga nahimo siyang konsehal sa munisipyo sa miaging 15 ka tuig nga wala namalit og botos.
at

No comments:

Post a Comment

Subscribe to: Post Comments (Atom)

End of Summer Sale ☀️😎

20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...

  • End of Summer Sale ☀️😎
    20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...
  • Breaking: Aaron Rodgers teases Jets return this season: 'Anything is possible'
    New York Jets quarterback Aaron Rodgers suffered a torn Achilles tendon in Monday's 22-16 overtime win vs. the Buffalo Bills. If you a...
  • Last Chance - Win over $1,800 in BLEUSALT
    Elevate your Wardrobe. Offer ends Midnight. ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏ ...