https://www.sunstar.com.ph/

---

• Mga pamilyang naigo sa typhoid fever abagan
• Barangay kapitan biktima sa budol
• 3 ka rehiyon hagbungan og shabu sa 2 nga nasikop
• Gikatahapang kawatan nasikop sa sundawo
• Kapulisan mo-monitor sa pumping stations
• Wa pay PUVs nanghunong sa pagpamasahero
• Editoryal: Apil sa gubat batok dengue
• Mongaya: Gikamang ka?
• Vallena: Lingi pud, Bay
• Sugilanon: Si Ponso ug si Juday
• Migallen: Unsa kahay sunod lakang ni Sotto?
• Kai di 'ipapriso' sa agent
• Cebuanos hari didto sa Clark
• Jordan mikuha ni Steve
• 2 ka lalaki nakuhaan og 15 kilo nga shabu
• 3 nang patay sa tipUs sa Barili

Mga pamilyang naigo sa typhoid fever abagan Posted: 25 Jun 2022 07:09 AM PDT Makadawat og moabot sa P5,000 nga pinansyal nga ayuda ang tanang mga pamilya sa mga pasyente nga nataptan sa tipus sa lungsod sa Barili.Kini maoy gipahibawo ni Kongresista Pablo John Garcia sa tersero distrito, pinaagi sa iyang official social media page.Matod ni Garcia nga pinaagi sa pakig-alayon sa Department of Social Welfare and Development (DSWD) mahatagan og hinabang ang mga pamilya sa pasyente, aron mogaan ang tulubagon niini sa tambal ug hospital bill."...nag coordinate na ta sa tagsa-tagsa ka pamilya aron sila mahatagan og minimum P5,000 nga hinabang, aron mogaangaan ang ilang mga tulubagon sa tambal ug sa bill sa ospital. Amounts will vary depending on the needs of each family," matod ni Garcia.Gawas sa ayuda, may dugang kantidad usab nga giandam si Garcia alang sa mga pamilya sa mga kaso sa nangamatay."Naa sa'y gamayng kantidad gikan sa akong personal nga pundo madawat ang tulo ka mga pamilya sa mga nitaliwan, nga personal itunol sa among pamilya,"dugang ni Garcia.Ang typhoid fever usa ka bacterial infection nga makuha gikan sa pagkaon o contaminated nga tubig.Sa nasayran, moabot na sa 98 ang natala nga kaso sa mga nataptan sa typhoid fever o tipus diin tulo na ang nakalas sukad sa Abril 2022.

Barangay kapitan biktima sa budol Posted: 25 Jun 2022 07:09 AM PDT Usa ka barangay kapitan nangayog abag sa kapulisan kay nabiktima sa lima ka tawo nga sakop sa Budol Budol gang alas 10:00 sa buntag sa Biyernes, Hunyo 24, 2022 sa Brgy. Poblacion, lungsod sa Barili.Ang nireklamo giilang si Kapitan Myrna Cebuco Binondo, 48, minyo, negusiyante ug barangay kapitan sa Mayana, Barili. Asoy ni Binondo ngadto sa kapulisan nga lima ka mga tawo ang ningpalit niyag prutas sa iyang sari-sari store.Na busy siya sa mga kustomer kay usa nangutana og presyo sa mangosteen samtang ang usa gustong masayod sa presyo sa saging.Nagduda siya nga nagkunsabo ang lima sa paglipatlipat kaniya kay paglabay sa pipila ka mga gutlo, nahanaw na ang iyang sling bag diin didto ang kwarta, mga alahas ug uban pa.Ang sulod sa sling bag mao ang cash P130, 000, lainlaing mga alahas, 60 ka Dasig Sugbo Cards, identification (ID) card sa Liga ng mga Barangay ug uban pa.Si Police Staff Sgt. Jeffrey Alpas, sa Barili Police Station nga nahinabi sa Superbalita Cebu nagkanayon nga nihimo na silag lakang karon alang sa pag-ila sa mga kawatan. Ilang subayon kon duna bay mga closed circuit television (CCTV) nga hayan nakuha ang mga kawatan.

3 ka rehiyon hagbungan og shabu sa 2 nga nasikop Posted: 25 Jun 2022 07:08 AM PDT Lapad ang operasiyon sa duha ka mga lalaking nasikop sa buy-bust sa Sabado sa alas 10 sa buntag, Hunyo 25, 2022 sa merkado publiko sa Brgy. Poblacion, Dakbayan sa Lapu-Lapu.Si Police Colonel Arniel Banzon, hepe sa Lapu-Lapu City Police Office (LCPO), nibutyag nga ang niimbestigar sa operasiyon sa duha mao si Police Lieutenant Noah Añana, human nakuha ang mga ngalan nila ni Eric Felisilda, 45, lumad nga taga Tagbilaran City, Bohol ug kauban nga si Niel James Vallesquiña, 27, taga San Francisco, Agusan Del Sur."Kining operation karon follow-up ni sa previous operations kadtong upat ka kilo nga atong nakuha didto sa barangay Pajo. Mao ni karon ang resulta. It's a matter of continuous follow-up. So mao ni ang nasakmit karon," matod ni Banzon.Ang iyang gipasabot mao si Eleonor Tagra Quistadio, 43, kinsa nadakpan sa kapulisan sa Lapu-Lapu City niadtong Hunyo 14 ug nakuhaan og upat ka kilo nga shabu.Matod ni Banzon nga lapad ang operasiyon nila ni Felisilda ug Vallesquina hinungdan nga daghan ang nasakmit nga illegal drugs gikan kanila."Di lang Central Visayas ni sila kon di the whole Visayas, Regions 6,7,8, and sometimes naapil pa gani ang northern Mindanao noh ang market nila. Gikan ngari ipang-distribute nana nila ngadto na sa atong gipang mention nga mga region," dugang ni Banzon.Atol sa buy-bust, unang nakasakmit ang team og usa ka kilo nga shabu nga maoy ilang nasabutan tali sa poseur buyer. Laing 14 ka kilo ang nasakmit gikan sa duha nga dunay street drug price (SDP) nga P102 milyunes.Gipangsulod kini sa green nga teabags nga sama sa nasakmit sa Regional Police Drug Enforcement Unit (RPDEU) pipila ka mga semana ang nakalabay gikan sa usa ka magtiayong taga San Carlos City, Negros Occidental. Matod ni Banzon nga ila pang subayon kinsa ang tinubdan sa illegal drugs nga gikan sa Luzon nga gidala sa duha ka mga suspek.Ang duha mag-atubang og kaso sa paghupot ug pagpamaligya og drugas nga kalapasan sa Republic 9165 kun Comprehensive Dangerous Drugs Act of 2002.

Gikatahapang kawatan nasikop sa sundawo Posted: 25 Jun 2022 07:05 AM PDT Gikatahapang manglabnihay nga nisuway sa pagkuot sa pitaka sa iyang biktima wala kaipsot human nagunitan sa usa ka sundawo nga nagmotorsiklo nga igo lang milabay sa dapit dihang paingon na unta siya mosibat niadtong Biyernes sa hapon, Hunyo 24, 2022 sa dan Colon, eskina Climaco, Brgy. Pahina Central, Dakbayan sa Sugbo.Si John Mark Oila Boayaban, 20 , nagpuyo sa dan P. Burgos, Barangay Sto. Niño, Siyudad sa Sugbo, wala na nakadagan dihang nakwelyohan sa usa ka sundawo dihang nagpakitabang ang biktima.Ang giingong iyang gikuotan mao si Darren Blake Tanzu Bacus, 20, taga Brgy. Lagtang, Dakbayan sa Talisay.Nabawi ang pitaka ni Bacus nga dunay sulod nga dul-an sa P1,000.

Kapulisan mo-monitor sa pumping stations Posted: 25 Jun 2022 07:01 AM PDT Human gi-monitor karon sa kapulisan sa dakbayan sa Sugbo ang mga gas station dihang nasakpan ang wa pagpa-calibrate sa tulo ka mga pumping station dihang gisusi sa City Hall, ang Cebu Police Provincial Office (CPPO) mohimo sa samang lakang.Matud ni Police Lieutenant Colonel Mark Gifter Sucalit, deputy director sa CPPO, nga iya kining ipaabot ang maong lakang atol sa ilang meeting sa Cebu Provincial Peace and Order Council.Hinuon, giklaro ni Sucalit nga sa kasamtangan wala pa silay nadawat nga mga reklamo kalabot sa samang problema.Una nang gipahibawo ni Sucalit nga bisan wa pay nasakpan nga gas stations nga wa magpa calibrate sa ilang pumps sa mga local government unit (LGU), iya nang gitahasan ang 50 ka mga hepe sa matag lungsod ug siyudad sa pakig-alayon daan sa mga magpapatigayong nanag-iya og gas stations aron masabotan kon unsay angay nga buhaton.Makig-alayon sila sa hingtungdang mga ahensiya sa kagamhanan sa panagana nga dunay masugatang problema.Samtang giawhag ni Sucalit ang publiko sa pagtaho sa labing duol nga police station kon duna silay nasayran nga gas station nga wa mosubay sa regulasiyon sa LGU, sama sa pag-calibrate sa ilang pumps.Iyang gihangyo ang mga negusiyante nga di magpasulabi sa ilang pagpaginansiya kay kon duna silay masakpan, ilang pasakaan og kaso.

Wa pay PUVs nanghunong sa pagpamasahero Posted: 25 Jun 2022 06:59 AM PDT Wala pa nakadawat og report ang Land Transportation Franchising and Regulatory Board (LTFRB) 7 nga ang mga operator sa public utility vehicles (PUVs) sa rehiyon, partikular na sa Sugbo, nipili sa pagsuspenso sa ilang operasyon taliwala sa pagsaka sa presyo sa gasolina sa nasod.Si LTFRB 7 Director Eduardo Montealto Jr. niingon sa SunStar Cebu sa Sabado, Hunyo 25, 2022, nga ang mga PUV operator, modernized public utility jeepneys, taxi, ug buses, wala pa mopadayag sa pagsuspenso sa ilang operasyon.Giingon ni Montealto nga mahimo'ng adunay kakuwang sa transportasyon sa publiko kay ang gidaghanon sa mga pasahero mitubo taliwala sa pagpaluag sa mga pagdili ug pag-abli pag-usab sa daghang mga negosyo nga gisirhan dihang taas pa ang mga kaso sa coronavirus disease (Covid-19)."Makaingon ra hinuon ka nga daghang pasahero tungod sa nibalik na gyud tanan, labi na gyud og mo-face-to-face na gyud ang mga estudyante," matod niya.Gawas niini, nagtuo si Montealto nga posibleng nawad-an og kadasig ang mga adunay pribadong sakyanan sa paggamit sa ilang kaugalingong transportasiyon ug nipili sa pag-commute aron makadaginot og gasolina.Ang Department of Energy (DOE) sa sayo pa niingon nga gawas sa Covid-19 pandemic, ang pagsaka sa presyo sa lana tungod sa pag-ban sa lana sa Russia sa European Union tungod sa pagsulong niini sa Ukraine, ang pagtaas sa panginahanglan sa Estados Unidos ug China, ug ang premium sa krudo sa Saudi Arabia.Gitumbok ni Montealto nga ang P6,500 nga fuel subsidy alang sa matag PUV unit isip usa sa mga abag gitumong sa nasudnong kagamhanan aron maminusan ang epekto, labi na sa sektor sa transportasyon.Apan gihimug-atan niya nga pipila pa lang sa mga operator sa rehiyon ang nakadawat tungod kay ang nasudnong kagamhanan gikatahong naglisod sa pagbalanse sa ilang pundo sanglit ang mga tricycle operator naapil na sa subsidy.Sa laing bahin, si Montealto niingon nga adunay nag-ung-ong nga aplikasyon alang sa P2 nga umento sa plitehan sa mga modernized jeepneys sa Sugbo apan ubos pa kini sa pag-uyon sa central office gawas sa gikinahanglang mga dokumento ug rekomendasyon gikan sa rehiyon.Gitataw sa regional director nga dili lang nila mahimo nga patas-an ang plitehan tungod kay kinahanglan pa nilang determinahon kon mahimo ba kini o dili, ug midugang nga mag domino effect kini diin mabug-atan usab ang mga sumasakay.

Editoryal: Apil sa gubat batok dengue Posted: 25 Jun 2022 06:56 AM PDT Si Cebu City Mayor Michael Rama nideklarar na og gubat batok sa dengue nga dala sa Aedes aegypti nga mga lamok. Kapin na sa 2,000 ang nangataptan og dengue ug dul-an na sa 20 ang nangamatay. Daghan nang mga komunidad ang gihugpaan ning mao nga sakit. Padayong nagsaka ang gidaghanon sa nangataptan. Kahibulongan kaayo tungod kay sa 2020 ug 2021, minos ra ang gidaghanon sa dengue itandi sa nangaging katuigan, apil na ang 2022. Ngano kaha?Usa sa gitumbok nga mga hinungdan mao ang kalimpyo sa palibot tungod kay naa ra sa balay ang kadaghanan sa katawhan tungod sa mga lockdown. Busa, way laing mahimo, kon di manglimpyo sa sulod ug palibot sa balay. Dunay katinuoran ning mao nga teyoriya kay usa sa mga epektibo nga pagkombate batok sa dengue mao ang pagpanglimpyo sa palibot ug paghawan sa mga tubig nga kaitlogan sa mga lamok.Sagad ra ba ani nga lamok anha mangitlog sa sulod o duol sa kabalayan. Bisan gamay nga mga lungag sa kahoy, basta dunay gamay nga tubig, mahimo nang itlugan. Gusto ni Rama nga sa tagsa ka balay magsugod ang kombate batok sa dengue. Bitaw, sa bisan unsa nga mga sakit nga mananakod, sama sa Covid-19, ang tagbalay dako kaayo og papel sa pagpugong sa pagpanakod sa sakit.Sa klase sa klima sa Pilipinas nga maoy ampay nga puy-an sa mao nga matang sa mga lamok, ang epektibo nga paagi sa pagkombate mao ang di paghatag niini og kahigayunan nga makapuyo ug makapangitlog bisan asa na lang. Di ni mahimo lang sa local government ug sa barangay kon way pakigtambayayong sa mga lumolupyo. Gikinahanglan ang partisipasyon sa katawhan. Kon way partisipasiyon, bisan pag unsay buhaton sa kagamhanan, padung ra gihapon ni sa kapakyasan.Kon mapakyas man, magpadayon sa pagsaka ang mga kaso sa dengue ug mag-anam og kadaghan ang nangamatay, di sab ni angay nga iyabo ngadto sa gobiyerno. Matag usa dunay responsibilidad ug kaakuhan.

Mongaya: Gikamang ka? Posted: 25 Jun 2022 06:54 AM PDT Nagkinahanglan og sumpay ang usa ka forum nga gipahigayon sa Palm Grass Hotel duha ka Sabado na nga milabay nga gititulohan og "Gikamang na ka? Elections in Philippine History."Samtang daghan og nahisgutan kabahin sa giingong vote-buying sa miaging mga eleksyon, apan wala gyud matuki kining maong isyu nga lawomlawom. Alang kanako, eye-opener lang kadto kabahin sa usa ka dakong suliran matag eleksyon dinhi sa Pilipinas.Si Rejene Lakibul, chairman sa Political Science department sa University of San Carlos (USC), nakahisgot kabahin sa pagkontrolar sa mga agalong-yutaan sa dagan sa piliay sa ilang dapit. Ug kining maong pagkontrolar sa piliay anaa pa gyud hangtod karon.Naminaw ko kang Maam Laila Labajo sa Socio-Anthropology department sa USC ug sa CCIMPEL-PPCRV kun Cebu – Citizens Involvement and Maturation in People's Empowerment and Liberation/Parish Pastoral Council for Responsible Voting.Ang laing duha ka nga resource persons mao silang Hal Atienza nga gikan sa kampo ni Bise Presidente Leni Robredo ug kang Guilliam Roque nga representante sa team nilang Ferdinand Marcos Jr. ug Sara Duterte.Ebidensya?Tingale di lang sila gusto nga makahisgot og pasangil nga wala pay klarong ebidensiya. Apan, alang kanako wala gyud sila makadut niining giingong pangamang kun vote-buying panahon sa eleksyon.Apan nakahibawo na man gud kita nga kining giingong pangamang nagsugod kini kaniadto pa gyung gidala dinhi sa mga Amerikano ang sistema sa eleksyon dinhi sa Pilipinas.Kon seryuso ang paninguha nga makakuhag ebidensya sa pagpamalit og boto, makakuha na unta kita sa pagkakaron.Bisan pa man sa pagpatigbabaw sa People Power kaniadtong 1986, igo ra man natong gibalik ang bulok nga sistema sa politika sa wala pa ang Martial Law sa 1972.Tinuod nahimo na kitang multi-party system. Naa ang mga party list groups. Ug daghang tarong nga mga kandidato nga nanagan.Apan, wala gyud matangtang ang giingong vote buying kay nagpadayon ang mga political dynasty ug nahimong stratehiya sa pagdaog sa piliay ang pagpamalit o pangamang.EvascoTestigo ko nga estrikto kaayo si kanhi Cabinet Secretary Leoncio "Jun" Evasco nga dili mamalit og botos kaniadtong nidagan siya pagka gobernador sa Bohol batok ni Arthur Yap pag 2019.Nakahibawo na man kita nga dagko kaayo ang palit og boto diha sa Bohol. Apan wa gyud mamalit ang Evasco.Wa gyud intawon makalusot. Pero kapin sa dos mil lang ang labaw sa kaatbang. Mao nga wa ko mahibong nga sayon ra kining gibuno karong 2022 kay gisuklan man si Gob. Yap ni Rep. Ares Aumentado nga nisubay sa tradisyonal nga paagi sa pagkampanya.Mas maayong mokuha og mga impormasyon ang atong naa sa akademya sa mga party list groups nga pwerteng nakahimog voters' education sulod sa katuigan.Apan ang mga political officers sa mga tinuod nga party-list groups makatestigo nga ang ilang mass base, madutlan gyud sa mga mangamang.TrapoKon seryuso man kitang mawagtang ang pangamang, kulang kining usa ka forum lang. Kulang gani ang mga panginguha sa simbahan ug kining mga naa sa akademya.Alang kanako, angay seryusohon sa pagwagtang kining mga political dynasty ug ipakanaog ang mas striktong pagbantay batok sa mga pagador mga tulo ngadto sa bisperas sa elekyon.Apan dakong hagit kini kay ang pangamang, nahimo nang kasaligan nga stratehiya sa pagdaog sa eleksyon. (DM nako @anol_cebu)

Vallena: Lingi pud, Bay Posted: 25 Jun 2022 06:51 AM PDT Samtang nagbiyahe mi sa akong asawa padulong sa San Remigio sa northern Cebu, among nabantayan ang sakit sa mga nagbiseklita karon: di kahibawong molingi. Ikaw ang palihayon kon nagmaneho ka og sakyanan.Naguol kaayo kong naghuna-huna human sa pipila ka mga aksidente sa dan ning pipila ka mga buwan nga nakalabay nga naglambigit og biseklita. Duna pay namatay. Di baya lalim kon ikaw ang nahitaboan.Sa una nakong tulo ka mga tuig sa mountain biking, basta naa gani ko sa karsada, molingi ko, labina kon moliwag ko sa manubela, aron pagsusi kon wa bay nagdulong nga sakyanan aron malikay sa aksidente.Kon kuyaw kaniadto ang karsada, mas kuyaw na ni karon tungod sa nanaghang mga sakyanan, upat o duha ang mga ligid. Busa, mas triple ang amping kon magsikad.But maguol ko karon nga magsud-ong sa bag-ong mga tigbiseklita kay daghan kanila careless sa karsada, labina sa mga batan-on. It's as if ang karsada playground. Kaniadto, kon mag night ride mi, amoang badlungon ug tudloan sa mga pamaagi sa responsible riding. Dunay nangasuko, duna say ningpatuo namo.Kon mag bike ka, lingi-lingi pud, Bay.COUNTERNahimuot man ko sa Cebu City Transportation Office (CCTO) nga niingon nga ang pedestrian countdown timers sakto ra alang sa mga pedestrian nga makalabang. Amo nga gipatan-aw sa amoang photographer, kuwang ra ang panahon sa pagtabok, dali rang mapawong ang pag blink.Okay ra na sa mga paspas nga molakaw, apan sa mga hinay, labina sa mga middle aged nga bisan medyo igo pa ang edad, maglisod na sa paglakang og paspas.Mas maayo nga lingkuran ni sa CCTO, labina sa ilang kadagkuan, ug sa contractor nga gibayran sa Siyudad aron itaud ang traffic light system nga gipasigarbo sa administrasiyon ni anhing mayor Edgardo Labella nga dunay artificial intelligence (AI).Ambot kon nganong naghisgot na sab ang adminitrasiyon ni Mayor Michael Rama og contractor nga nagtanyag og traffic lights system nga dunay AI. Ngano diay ang nakatrabaho sa una ug ikaduhang phase sa pagbag-o sa traffic system, di diay to AI?Unsa diay tong gilusad niadtong Marso 2021? Di diay to tinuod nga Intelligent Traffic Light System? Gigastuhan baya to og P250 milyunes sa Siyudad gikan sa panudlanan nga hapit na nabuslot tungod sa Covid-19. Mas maayo nga ang samang contractor maoy papadayunon.HAPIT NAKarong Hulyo, makasugod na sa pagsulod ang mga motorsiklo nga dunay P125cc-399cc sa Cebu-Cordova Link Expressway (CCLEX). Apil na usab niini ang mga magbiseklita ug joggers nga ganahan molabang sa ikatulong taytayan sa Mactan.Kahibawo ko nga daghang bike riders nga kaya ra kaayong tungason ang CCLEX, apan angay nga mag-amping ta kay di baya lapad kaayo ang exclusive lanes nga naa sa duha ka mga side sa taytayan. Magsunod lang gud.Kay kon dunay madisgrasiya, unya magsunod pa gyud, basin mausab ang huna-huna sa bridge management, limitahan na ang pag-agi sa bikers.Mag-amping ta sa pagsikad. Likayan ang mga aksidente.

Sugilanon: Si Ponso ug si Juday Posted: 25 Jun 2022 06:48 AM PDT LAMBERTO G. CEBALLOSIlaya, Cawayan, Dalaguete, CebuTextmate sila si Ponso ug si Juday. Esklusibo silang 'textmate' kay dili man sila magtawagay o 'call' pinaagi sa selpon. Mao kanay hangyo ni Ponso kang Juday; misugot lang pod si Juday, kay ang importante nga may teksmeyt siya. Siya man gani ang nagpadala sa iyang ngalan ug numero sa selpon sa usa ka 'tabloid' nga Binisaya diin gipadayag niya nga gusto siyang makig-teksmeyt sa usa ka lalaki nga way kabilinggan sa kinabuhi ug nag-edad og 25 ngadto 30. Maayo na lang may ikaestorya dayong katulog sa gabii ug may motimbayag 'Good morning!' inig kaadlawon. Daghan ang mi-teks kang Juday, apan si Ponso ang iyang naayunan kay maguwang lang niyag usa ka tuig, kay siya 25 ug si Ponso 26. Ug nagkasuod ang ilang mga pagbati pinaagi sa selpon. Nagkasabot sila nga 'Babe' ilang tawganay.Usa ka gabii gi-teksan ni Ponso si Juday, "Babe, tulog na ka?""Wa pa man. Ngano man?" bawos teks ni Juday."Duna koy gusto isulti.""Unsa man na?""Bahin sa gugma. I love you, Babe!""Uy, ka presko god nimo!""Ba diha. Bisan inlab gyud na siya nako!""Uy, Ponso, hunong na ha?""Pero, Babe, gusto ko text-uyab ta. Sige na, sugot na!"Mipahiyom si Juday. Dugay na siyang nagpaabot nga mopadayag sa iyang gugma si Ponso. Gituslok niya ang mga 'key' sa iyang selpon. "Kon sugton tika unsa may atong buhaton?" Tubag ni Ponso, "Mag text hug ug mag text kiss ta. Pwede text romance.""A, di ko ana. Magkita ta aron magkailhanay ta sa personal," teks ni Juday."Sige, nus-a man?" bawos ni Ponso.Gipanuslok ni Juday ang mga 'key' sa selpon, "Ugma, sa Plaza. Alas 4 sa hapon.""Ok. Unya, mangaon ta ug manan-aw sa sine?" bawos ni Ponso."Pwede! Unsay imong isul-ob?" ni Juday."Pulang T-shirt ug maong jeans. Ikaw unsay imong isul-ob?""Parehas sa imoha," ni Juday.PAGKA UGMA didto sa Plaza Independencia naglingkod si Ponso sa usa ka sementadong lingkuranan nga nag-atubang sa Fort San Pedro. Lapas na sa alas kuwatro sa iyang relo. Gipaliraw niya ang iyang panan-aw sa tibuok plasa, apan wa siyay dalaga nga nakita nga nagsul-ob og pula nga T-shirt. Siya mismo wa motuman sa sapot nga iyang isul-ob kay kon bati og nawong si Juday, di niya kini duolon. Sa atbang nga lingkuranan may naglingkod nga usa ka babayeng hamtong. Hitsuraan kini. Karon ug unya motan-aw kini kaniya. Kay wa man gyud siyay nakitang dalaga nga nagsul-ob og pula nga T-shirt, giduol niya ang babayeng hamtong."Tabi, Inday, may gipaabot ka?" ni Ponso nga milingkod tupad sa babaye."Oo, Manoy. Akong textmate nga magsul-ob og pula nga T-sirt!" sa babaye.Nahiulpot si Ponso sa iyang nahimutangan. "I-Ikaw si J-Juday?"Nahingangha pod ang hamtong nga babaye. "Ngano nakaila ka nako, Manoy?""Ako si Ponso! Wa lang ko magsul-ob og pulang T-shirt.""Traydor diay ka," ni Juday nga midiyong ang mga mata. "Ug bakakon.""Parehas tang duha!" ni Ponso nga nagngisi. "Ingon ka 25 ka. Bi, pila gyud imong edad?""52," ni Juday nga gitago ang kahimuot. "Ikaw pod, imo edad 62.""Nakatag-an ka. Hahaha!" ni Ponso. "Bitaw, Babe, magpinasayloay lang ta. Pero padayunon nato atong pagka textmate. Okey?"Dugay nga gitutokan ni Juday si Ponso, dayon namulong, "Okey, Babe, gidawat ko na imong gugma nga gihalad sa atong panag-teksanay. I love you, too!"Kalit gigakos ni Ponso si Juday ug gihagkan sa aping. (KATAPUSAN)

Migallen: Unsa kahay sunod lakang ni Sotto? Posted: 25 Jun 2022 06:45 AM PDT See...Sa gikaingon ko na, bisan gani sa akong sports program sa Radio One Cebu 90.1 FM "Sports Ta Bai," nga tungason kaayo ang dinaliang pagsalmot ni Kai Sotto sa 2022 National Basketball Association (NBA) Draft.Gi-snub siya sa teams atol sa drafting niadtong Biyernes, Hunyo 24, 2022 (sa Pilipinas) nga wa gyuy bisag usa nga nitawag sa iyang ngalan. Daghan ra ba untang naghinamhinam nga makadungog niini.Kadtong mga ninggawas sa national nga mga pamantalaan nga duna nay team nga sekretong nag-atang ni Sotto atol sa drafting, bunga lang kadto sa pag-hype sa 7-3 ug 20 anyos nga full-blooded Filipino basketball player. Pero didto sa Estados Unidos wa gyud intawon siya mahisguti ilabi na sa mga nag-una ug dagkong media outfit.Ang kahilaw pa sa dinuwaan ni Sotto ug ang kayagpis sa iyang pamarog maoy lig-ong rason kon nganong walay interesadong mokuha niya. Nakatampo usab ang kakuwang sa iyang exposure sa mga international competition. Kon nganong ilang gidali-dali, kana maoy pangutana nga sila sa kampo ni Sotto ra ang makatubag.Kon ila pa unta tong gimanso og maayo sa ubang mga international league bisan na lang sulod sa duha ka tuig, dako pa unta og chance kay gawas nga mohait ang dinuwaan niini, mahashasan pa usab kini sa mga scout.Sa NBA, lisod halinon kon ang gitas-on ra sa aplikante maoy ikatanyag ngadto sa team. Kini tungod sa kadaghan ug ka abunda sa mga players nga gustong mosulod sa lega. Ang abilidad nga maoy mopahaom kon unsay gikinahanglan sa team mao gyud ang prayoridad.Kon edad sab ang hisgutan, dili sila angay nga mabalaka kay duna man gani nagpa draft nga dul-an sa 30-anyos o 30 kapin na ang edad. Kini sama nila ni Pablo Prigioni sa New York Knicks, Marcelo Huertas sa Los Angeles Lakers ugAntoine Rigaudeau sa Dallas Mavericks. Hinuon sama sa uban undrafted ni sila pero gikuha gihapon og team.Human makatagamtam og laing kapakyasan, mora man og wa magkasinabot ning kampo ni Sotto. Ang iyang agent nga si Joel Bell nibutyag nga si Sotto nga magpalabay na lang sa NBA Summer League ug adto na kini mo focus og duwa sa Gilas Pilipinas.Kini gipanghimakak sa East West Private nga maoy nagiya sa Team Sotto kinsa nipasabot nga dili tinuod ang gisulti ni Bell sanglit ang ila pang gitun-an og unsay sunod nilang buhaton. Wa pa silay desisyon kalabot sa NBA Summer League nga maoy maghatag og laing kahigayonan nga makaagni og mga scout sa NBA teams, Depende ra usab hinuon ni sa iyang mapakita sa hamubong lega."Kai Sotto and his management team East West Private wish to clarify that at the moment, no decision has been made as to what his next step will be. Kai is exploring all options, including playing in the NBA Summer League," pamahayag sa East West Private. Mao na ni ron. Wa magkatono.Ang third window sa FIBA World Cup Asian Qualifiers gikatakda karong Hunyo 30 batok sa New Zealand ug Hulyo 3 batok sa India, samtang ang 2022 FIBA Asia Cup sa Indonesia ipahigayon sa Hulyo 12.Ang Summer League, sa laing bahin, sugdan sa Hulyo 2 hangtod sa 6 sa California ug sa Utah ug motapon kini sa Las Vegas sa Hulyo 7 ngadto sa 17. Ano ba talaga, Kuya? (jun.migallen22@gmail.com)

Kai di 'ipapriso' sa agent Posted: 25 Jun 2022 06:44 AM PDT Bisan kon adunay nadawat nga mga imbitasyon si Kai Sotto para moduwa sa Summer League team human wala siya makuha sa NBA Draft, apan dili gusto niini ang iyang NBA agent.Si Joel Bell nipasabot nga gusto niya nga gawasnon ang iyang player ug makapili og team sa higayon nga moduwa na kini ug dili mahigot sa usa lang ka team."I've already got several Summer League invites for him. But we're not gonna do two-way contracts, we're not gonna do G League, Exhibit 10 contracts," matod ni Bell nga usa ka Amerikano.Gipasabot sa iyang agent nga aduna silay daghang kapilian, pwede sila mobalik sa Australia para ipadayon ang NBL career ni Kai o moadto sa Europe sanglit adunay mga team nga interesado sa serbisyo sa Pinoy."He's gonna develop wherever he goes. He's gonna have a personal agility coach, a strengthening coach, and do things that he can work on to improve on his game. And I think in the following season, he'll be in the NBA," dugang ni Bell.Gipasabot ni Bell nga sa maong sistema, adunay daghang kapilian si Kai sa umaabot nga panahon ug dili ikandado ang iyang kaugalingon sa usa ka NBA team.Sila si Ron Harper Jr. ug Johny Juzang kinsa wala sab ma-draft nipirma og two-way contract-non guaranteed deals diin ang magduduwa mahimong ma-cut sa team nga nipaduwa sa tryout labi na nga hapit na ang NBA Summer League."With the two-way contract, you're not gonna play that much. He needs to play. He's not gonna play very much unless there's a bunch of injuries or something unusual happens. You are the 16th or 17th player on the team and you just don't play that much. He needs to play. That's the reason why he wouldn't do that," dugang ni Bell.Ang kontrata sa G League maoy mag-lock sa player sa affiliate sa NBA team ug adunay tsansa nga maapil sa main line-up samtang ang Exhibit 10 contract usa ka non-guaranteed contract diin ang magduduwa imbitahon alang sa training camp.Gipahibawo ni Bell nga gitanyagan si Sotto og "draft-and-stash" deals diin ang magduduwa tagaan og two-way contract ug tugotan siyang makaduwa bisan asa ug magpabilin ang rights sa NBA team nga iyang gipirmahan."Teams say that we'll draft you but we don't want you to come right now. We want to hold your rights and stash you to a team outside of the US and that's a generally bad idea," pasabot ni Bell.Ang American agent nihimo og sanglitanan sa French guard nga si Hugo Besson, ang 58th pick nga gipanag-iya sa Milwaukee Bucks diin matod pa ni Bell nga ang Bucks na ang tag-iya sa iyang rights bisan kon moduwa pa siya sa New Zealand Breakers sa NBL didto sa Autralia."To be locked into a team and have them have your rights and they don't want you now and they may not ever want you is generally a pretty horrible idea," ni Bella pa.Ang American agent nihulagway nga sa sunod tuig, si Kai mokusgan pa ug halinon na kini sa mga NBA teams. (PAC, Spin.ph)

Cebuanos hari didto sa Clark Posted: 25 Jun 2022 06:37 AM PDT Ang Cebu Racing Group (CRG) maoy naghari hapit sa tanang kategoriya sa Petron Kalayaan Endurance Cup (PKEC) 2022 sa Clark International Speedway (CIS) niadtong Independence Day.Ang CRG pinangulohan sa ilang team captain nga si Atty. Jess Garcia, maguwang ni Vice Mayor-elect Raymond Alvin Garcia nakahakot og unom ka pasidungog atol sa 12 ka oras nga endurance gamit ang ilang Mazda Miata sa 1990's kontra sa laing racing cars.Adunay 20 ka mga lainlaing grupo ang ningsalmot sa PKEC diin ang mga racer gikan sa lainlaing suok sa nasod apan ang mayoriya gikan sa Metro Manila, nagpadaghanay og tuyok sa CIS sulod sa 12 ka oras.Ang CRG ni Garcia, Jojo Lloren, Jong King ug Curbie Cañete nakaabot og 280 laps nga maoy labing daghan sa kasaysayan sa CIS."Ang nahitabo niadtong June 12 sa Independence Day maoy atong gitawag og true test of man and machine kay 12 hours ang lumba unya 20 ka mga awto ug lainlaing team sa tibuok nasod ang ni-intra ug kaluoy sa Diyos, kita ang nahimong champion," matod ni Garcia.Nahimong kampyon ang CRG sa category Open A nga adunay lapas 150 horsepower ang mga sakyanan, category B nga adunay 100 -150 horsepower nga sakyanan ug overall champion, duha ka second place sa first half sa endurance (6 hours) ug champion usab ang CRG sa team category."Dili sayon ang among gibuhat didto kay taga Cebu gud ta, mga Sugbuanon unya nakigkontra sa mga taga Manila ug ubang parte sa nasod.Perting inita atong panahona. Each driver is required to drive 1:30 to 2 hours in every single stint drive ka walay aircon. Init kaayo ang adlaw wala kay mainom unya di pa gyud ka kaihi. Ang awto kinahanglan kondisyon gyud," paghulagway sa team captain sa CRG.Ang PKEC gisugdan alas 5:30 sa buntag ug nahuman alas 5:30 sa hapon diin nabuak sa CRG ang 274 laps nga maoy labing daghan nga natuyok sulod sa 12 ka oras nga nakulit sa kasaysayan niadtong 2021 ug karon ilang napulihan.Ang CRG modepensa sa ilang titulo sa ikatulo unyang hugna sa Endurance Cup didto gihapon sa CIS nga ipahigayon karong Nobyembre 30 atol sa Bonifacio Day.Ang unang hugna sa endurance gipahigayon sa Batangas apan upat ra ka oras niadtong Abril 9, Araw ng Kagitingan diin ang CRG champion sa first half nga 2 hours apan aduna silay nahimo nga mga errors hinungdan nga dihang napupos ang lumba, nahimutang na lang sila sa ikatulo nga maoy ilang gibawon nga inspirasyon alang sa ilang pagpangandam sa PKEC.

Jordan mikuha ni Steve Posted: 25 Jun 2022 06:37 AM PDT Balik sa iyang kanhi team nga giserbisyohan si Steve Clifford aron pangulohan ang Charlotte Hornets sa sunod NBA season.Si Clifford nisugot sa multiyear deal contract sa iyang pagbalik isip head coach sa Hornets, upat ka tuig human siya gitaktak ni Michael Jordan nga maoy tag-iya sa team.Ang Charlotte nisugot na sa miaging mga buwan sa ilang kontrata uban ni Kenny Atkinson, assistant coach sa Golden State Warriors sulod sa upat ka tuig apan nibalibad ang nauwahi ug dili mopadayon gumikan sa family reason."I'm happy to be returning to Charlotte, and I want to thank Michael Jordan, Mitch Kupchak and Buzz Peterson for this opportunity," matod ni Clifford"This is an exciting young team with a lot of talented pieces. Charlotte is a great city and I know first-hand the passion that Hornets fans have for this franchise. I can't wait to get back to town and start working with our players," dugang ni Clifford.Ang 60 anyos nga kanhi coach sa Charlotte maoy nagdumala sa team gikan niadtong 2013-2018 ug adunay NBA record nga 196-214 (win-loss) diin iyang franchise player si Kemba Walker.Nahatod niya ang Charlotte sa duha ka playoffs sa wala pa siya gitaktak ni Kupchak, kinsa gi-hire ni Jordan isip general manager.Siya gikuha sa Orlando Magic gikan sa 2018-2021 ug iyang natimonan ang team sa duha ka playoffs ug sa miagi nga season, siya ang coaching consultant sa Brooklyn Nets.

2 ka lalaki nakuhaan og 15 kilo nga shabu Posted: 24 Jun 2022 08:04 PM PDT KANHI dance instructor nga nag drug courier ug ang kauban niini nga drayber ang nadakpan ug nasakmitan og 15 ka kilos sa giingon'g shabu sa ronda nga gipahigayon sa Drug Enforcement Unit (DEU) sa Lapu-Lapu City sa Sabado sa buntag, Hunyo 25, 2022.Moabot sa P102 milyones ang balor sa droga nga nasakmit gikan sa mga suspetsado nga si Eric Felisilda, 45 anyos, lumad nga taga Tagbilaran City, Bohol ug Niel James Vallesquiña, 27 anyos nga taga San Francisco, Agusan del Sur.Si Major Joey Bicoy, pangu sa DEU Lapu-Lapu, maoy nangu sa ronda uban sa mga sakop sa Philippine Drug Enforcement Agency in Central Visayas ug Naval Forces Central.Giingon nga kining si Valesquiña maoy nagdala niining ilegal nga drugas dinhi sa Sugbo aron ihatud sa kaulohan.Kasong kalapasan sa paghupot ug pagbaligya sa ilegal nga drugas ang atubangon sa duroha. (BBT, TPT)

3 nang patay sa tipUs sa Barili Posted: 24 Jun 2022 07:41 PM PDT Moabot na sa 98 ka mga kompirmadong kaso sa typhoid fever o tipus ang natala sa 24 ka mga barangay sa lungsod sa Barili diin tulo na niini ang nangamatay sukad sa Marso 16, 2022 hangtod niining pagsuwat.Kini subay sa resulta sa inspection report sa Cebu Provincial Health Office (CPHO).Subay sa talaan, nag-una sa may labing taas nga kaso sa tipus ang Barangay Poblacion (28), Gunting (21), Mantayupan (12), Guibuangan (5), Japitan (5), Maigang (4) ug Minolos (3).Samtang natala ang tagurha ka mga kaso sa barangays Tubod, Nabunturan, ug Maghanoy. Nakatala usab og tagsa ka mga kaso sa Cagay, Bolocboloc, Luhod, Patupat, San Rafael, Hilasgasan, Budbud, Nasipit, Kangdampas, Tal-ot, Mantalongon, Pangpang, Campangga ug Sta. Ana.Naila ang mga nakalas sa sakit nga sila si Britney Capio, 19, taga barangay Gunting (namatay sa Hunyo 17, 2022); Shaun Miguel Vergara Mompar, 31, taga Poblacion (Hunyo 14, 2022) , ug si Juvelyn Encallado, taga Barangay Sta. Ana (Abril 5, 2022).Sagad nga nasinati sa mga pasyente mao ang hilanat sulod sa 10 hangtod sa 14 ka adlaw, diarrhea ug panakit sa tiyan.Ang Kagamhanan sa Probinsya sa Sugbo nipadala na og mga tambal, antibiotics, typhoid ug NS1 Test Kits ug 70 porsiyento nga chlorine granules nga maoy isagol sa tubig.Nalakip na niini ang 1,000 ka vials sa Ceftriaxone, 100 ka vials sa Omeprazole, 1,000 ka tabletas sa Paracetamol, 144 ka botelya sa paracetamol syrup ug duha ka boxes sa test kits.Sa inisyal nga imbestigasyon, 16 ka mga water sources ang gipaubos sa e.coli test diin duha ang wa makapasar sa bacteriological test nga mao ang Dakitanong Pundok Inc. ug Barili Waterworks."It was found out that some patients used mineral water for drinking, others used water from Kang Undo Spring box, Luhod Spring Box, Guibuangan Water tank, Bolocboloc Spring box, Belgian Reservoir, Mantayupan Spring and COWASCO in Guadalupe Carcar," saysay sa inspection report sa Cebu Provincial Health Office.Nasayran usab sa buhatan nga walay operational permit gikan sa Department of Health (DOH) ang tanan nga waterworks system sa lungsod.Sa kasamtangan gi-mandoan sa kagamhanan ang tanang water sources sa lungsod sa pagpatuman sa pag-inspection ug paghinlo sa tanang leakage sa pipelines, pagbutang og 'not safe for drinking' nga signage hangtod dili mag negatibo ang resulta sa pagsusi sa water sources.Gimandoan usab ang tanang mga water system sa lungsod nga molukat og operational permit.Kon bation og sintomas sa tipus sama sa hilanat, labad sa ulo, sakit sa lawas, ubo ug paglisod sa pagdiskarga sa hugaw, giawhag ang mga residente sa pagtawag sa Barili Rural Health Unit sa (032) 470 9195.

You are subscribed to email updates from SUNSTAR. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States