https://www.sunstar.com.ph/

---

• Kanhi OFW nakuhaan og 15 ka kilo nga shabu
• Magtiayon sa Negros Oriental giingong mamarang, gipatay
• Mga bato mitabon sa highway sa Oslob; trapiko nabara
• Danyos sa sunog sa Dole P8M
• Ombud mibasura sa kaso ni Osmeña batok Alcover
• Olango cemetery palapdan ni Chan
• Pagpatay sa tiger shark gipaimbestigar ni Shimura
• Floating cottages gidili na subay sa EO ni Suan
• SK official uyon sa pag-uswag sa SK, barangay elections
• 335K nang nagparehistro sa SK, barangay elections
• DOH officials negatibo sa Covid human sa meeting ni Marcos
• Kapin sa 30 ka bata nakapahimus sa operation tuli
• Editoryal: Ayaw basula ang LGU
• Vallena: Tudloi unsaon pag bike
• Lillard pabilin sa Blazers
• Sumbagay na!
• Migallen: Magsayo by knockout; Vargas by decision
• Wall gikuha sa LA
• Slaughter sa Japan

Kanhi OFW nakuhaan og 15 ka kilo nga shabu Posted: 09 Jul 2022 06:35 AM PDT Babayeng kanhi Overseas Filipino Worker (OFW) nakuhaan og 15 ka kilo sa gituohang shabu sa buy-bust sa Lapu-Lapu City Police Office (LCPO) pasado alas 3:00 sa hapon sa Sabado, Hulyo 9, 2022 sa Sityo Semento, Barangay Pusok, Dakbayan sa Lapu-Lapu.Ang grupo ni Police Lieutenant Brigido Paca II, nangu sa operasiyon, ningsikop kang Grace Juntilla, 31, walay permanenting pinuy-anan sa mao nga dakbayan.Ang buy-bust gi-monitor ni Police Lieutenant Colonel Jul Mohammad Jamiri, pangu sa City Intelligence Unit (CIU) sa LCPO.Kuyog sa operasiyon ang mga operatiba sa Regional Intelligence Division (RID) 7 ug Regional Police Drug Enforcement Unit (RPDEU) 7 ingon man ang Naval Security Group (NSG) Central Visayas.Sa kinatibuk-an, ang nasakmit nga shabu gikan kang Juntilla gibana-banang moabot og 15 kilos nga mobalor og P102 milyunes subay sa iyang street drug price (SDP). Ang matag kilo sa shabu dunay P6.8 milyunes nga SDP.Si Police Colonel Arnel Banzon, pangu sa LCPO, sa interview sa Superbalita Cebu, niingon nga si Juntilla ilang gipanid-an sulod na sa tulo ka mga semana.Ilang nasayran nga ang shabu nga nasakmit gikan kang Juntilla gikan sa Mindanao ug gibilin kaniya. Siya usab ang maghatud sa mga ilegal nga drugas ngadto sa mga drug pusher.Ang hinigugma ni Juntilla kasamtangan nga napriso apan subayon pa sa kapulisan kon kining nasakmit nga shabu may kalambigitan ba ang iyang boyfriend.EX OFWSi Juntilla, sa iyang habig, nibutyag nga siya nagtrabaho kanhi sulod sa duha ka tuig sa usa ka nasud sa Middle East samtang duha usab ka tuig kapin sa Singapore.Ang iyang pagkalambigit sa ilegal nga kalihukan, matud pa niya, igo lang siya tawagan aron kuhaon ang shabu apan wala na siya nibutyag kon pila ang iyang kita ug kinsa ang gigikanan niini.Kaso nga kalapasan sa paghupot sa ilegal nga drugas ug pagbaligya ang atubangon ni Juntilla subay sa Republic Act (RA) 9165 o Comprehensive Dangerous Drugs Act of 2002.Samtang si Lapu-Lapu City Mayor Junard "Ahong" Chan nga nidalikyat sa dapit nga gipahigayunan sa buy-bust nihulagway nga lain na usab nga kalampusan ang pagkasakmit sa kinilo nga shabu sa LCPO.Tungod niini, mo-request siya og cash reward ning laing malampusong operasiyon batok sa ilegal nga drugas sa dakbayan.

Magtiayon sa Negros Oriental giingong mamarang, gipatay Posted: 09 Jul 2022 06:30 AM PDT Mag-uuma nga magtiayon gipanigbas patay sa pito ka wala pa mailhi nga mga tawo sa dalan samtang sila paingon na unta manguli sa ilang balay sa Sityo Magabii, Barangay Pacuan, lungsod sa Jimalalud, Negros Oriental.Si Police Master Sergeant Oliver Quezon sa Jimalalud Police Station niingon nga nahitabo kini alas 5:00 sa hapon niadtong Hulyo 6, 2022, ug nadawat sa kapulisan ang alarma alas 7:30 na sa gabii.Ang mga biktima giila nga sila si Alfredo ug Bebelyn Abrasado, nagpuyo sa nahisgutang lugar. Nakaangkon ang magtiayon og mga samad tinigbasan sa kalawasan nga maoy hinungdan sa ilang kamatayon.Si Police Chief Master Sergeant Marte Absin sa Jimalalud Police Station, imbestigador, niangkon nga hangtud karon naglisod sila sa pagtumbok sa killers tungod kay walay nibarog nga mga saksi.Bisan ang anak nga babaye nga kuyog sa iyang mga ginikanan wa moila kinsa ang killers."Pito daw ni sila ka mga suspek nga mitabang sa pagtigbas sa magtiayon. Naa man tuod anak nga kauban, pero nidagan pud sa panghitabo kay nahadlok," matod ni Absin.Nasayran sa imbestigasyon sa kapulisan nga ang magtiayong Abrasado gikan sa husay sa ilang barangay tungod lagi kay dunay reklamo nga matud pa silang duha mga mamarang. Kuyog sa magtiayon ang ilang anak nga babaye nga 28 anyos.Sa ilang pag-uli na sa ilang balay, tungod kay bukiran ang dapit ug awaaw, sa dalan pa lang giingong giatangan sila sa pito ka mga tawo dayon gipanigbas. Ang magtiayong Abrasado nakaangkon og ubay-ubay nga samad tinigbasan.Matud ni Absin nga usa sa ilang giimbestigar karon kining nireklamo batok sa magtiayon nga sila mamarang.

Mga bato mitabon sa highway sa Oslob; trapiko nabara Posted: 09 Jul 2022 06:27 AM PDT Nasudnong dalan sa Barangay Hagdan, lungsod sa Oslob, habagatang Sugbo, natabunan sa nidahili nga dagkong mga bato sa Sabado sa buntag, Hulyo 9, 2022.Tungod niini, nabara og mga lima ka oras ang mga sakyanan nga padulong sa habagatan ug amihanang Sugbo.Kini ang gipahibawo ni Police Corporal Anthony Jugo, desk officer sa Oslob Police Station nga nahinabi sa Superbalita Cebu pinaagi sa telepuno.Hinuon, matod ni Jugo nga mga alas 11:00 sa buntag sa Sabado, nakaagi na ang mga sakyanan paingon sa lungsod sa Santander ug paingon sa dakbayan sa Sugbo.Apan ang kapulisan padayon pa gihapon nga nidumala sa dagan sa trapiko hangtud ning pagsuwat tungod sa taas kaayong lumbay sa mga sakyanan.Nadawat sa kapulisan sa lungsod ang report sa pagdahili sa mga bato alas 6:00 pasado sa buntag sa Sabado.Apan gitin-aw sa Oslob Police Station nga wala hinuoy naangol ug namatay atol sa hitabo.

Danyos sa sunog sa Dole P8M Posted: 09 Jul 2022 06:27 AM PDT Walo ka milyon ka pesos ang pasiunang danyos nga natala human sa sunog sa Sabado sa hapon, Hulyo 9, 2022 sa Department of Labor and Employment (DOLE) 7 building sa Gorordo Ave., Cebu City.Nasunog ang buhatan sa Overseas Workers Welfare Administration (OWWA) sa ikaduhang andana sa edipisyo sa ala 1 sa hapon.Giisa kini sa first alarm ala 1:11 sa hapon ug gideklarar nga under control ala 1:40 ug fire out ala 1:41 sa hapon.Walay nasamdan o gikataho nga namatay atol sa insidente, matod ni SFO1 Riza Julve .Gitan-aw sa fire investigators nga "faulty electrical wiring" ang posibleng hinungdan sa sunog.

Ombud mibasura sa kaso ni Osmeña batok Alcover Posted: 09 Jul 2022 06:26 AM PDT Gibasura sa Office of the Ombudsman ang reklamong cyber libel batok kang Cebu City Councilor Pastor "Jun" Alcover Jr.Sa pito ka pahina nga desisyon nga giaprobahan ug gipirmahan ni Ombudsman Samuel Martires nga pinetsahan og Pebrero 11, 2022, ang mga akusasyon sa cyber libel nga gisang-at ni kanhi Cebu City mayor Tomas Osmeña batok kang Alcover walay legal nga basehanan.Niadtong Enero 2019, si Osmeña, kinsa mayor sa dakbayan niadtong panahuna, nikiha kang Alcover tungod sa mga alegasyon nga ang naulahi nidaot sa iyang reputasyon pinaagi sa paghatag og pamahayag nga ang naulahi ni-post sa Facebook nga nagtumbok kaniya bahin sa usa ka bullying incident nga naglambigit sa estudyante sa Ateneo de Manila Junior High School.Gawas sa kasong cyber libel, nipasaka usab si Osmeña og lahi nga reklamo nga grave misconduct ug paglapas sa Republic Act 6713 o ang Code of Conduct and Ethical Standards for Public Official and Employees.Nakahukom ang anti-graft office nga ibasura ang kaso batok kang Alcover kay wala gyud siya mohimo og bisan unsang "defamatory imputation of a crime" nga giingong gihimo ni Osmeña."Complainant's contention that respondent (Alcover) made it appear that the former condoned the act of bullying is just a mere conjecture. Complainant failed to persuade this Office that the post made by respondent is libelous," dugang sa Ombudsman.NAPAMATUD-ANSa pamahayag nga gipadala sa SunStar Cebu sa Sabado, Hulyo 9, matod ni Alcover nga gihangop niya ang desisyon sa Ombudsman nga gibasura ang reklamo batok niya."This would show that I never committed a crime as alleged by a former mayor," dugang ni Alcover. Si Alcover, kinsa napili og balik sa Konseho sa Siyudad human sa Mayo 9, 2022 nga eleksyon, niingon nga wala siyay kasilo nga gibati kang Osmeña."Human na dismiss ang akong kaso, wa ko masuko o magdumot ni Tommy. Mas nilig-on ang akong tumong sa panerbisyo kay daghan pa kaayo ta og trabahuon sa Konseho nga ikatabang sa atong mayor," dugang ni Alcover.

Olango cemetery palapdan ni Chan Posted: 09 Jul 2022 06:21 AM PDT Nagplano si Lapu-Lapu City Mayor Junard "Ahong" Chan nga palapdan ang bag-ong Olango public cemetery ngadto sa 10 ka ektarya aron magahinan og mga lubong ang lainlaing relihiyon.Samtang giangkon ni Chan nga ang Humay-Humay public cemetery sa Barangay Gun-ob sa mainland Mactan island niabot na sa full capacity.Si Chan niingon nga ang Siyudad sa pagkakaron nakaangkon na og duha ka ektarya nga luna alang sa nahisgutang publikong sementeryo sa Olango, ug midugang nga aduna na silay natukod nga mga lubnganan samtang ang uban anaa pa sa pagtukod.Siya niingon nga ang publikong sementeryo sa Olango lahi sa Mactan kay gitumong kini dili lang sa mga Katoliko kon dili sa tanang mga relihiyon, sama sa Muslim.Namatikdan sa reelected mayor nga daghan sa iyang mga konstituwente ang dili makasarang sa pagpalubong sa ilang mga minahal sa kinabuhi sa pribadong mga sementeryo tungod sa kamahal niini.Agi'g tubag, si Chan niingon nga adunay 300 ka mga nitso nga gitukod sa municipal cemetery sa Tugas sa Barangay Gun-ob, diin 100 niini ang nagamit na.Ang konstruksyon nagpadayon nga anam-anam, nga gamiton alang sa mga nagpuyo sa mainland Mactan.Gianunsyo ni Chan atol sa iyang pakigpulong sa inaugural session sa 16th Sangguniang Panlungsod niadtong Hulyo 7, ang lot expropriation alang sa pagpalapad sa New Olango cemetery isip usa sa iyang agenda atol sa iyang ikaduhang termino isip local chief executive, bisan og wala pa sila makagahin og pundo alang sa maong proyekto.

Pagpatay sa tiger shark gipaimbestigar ni Shimura Posted: 09 Jul 2022 06:18 AM PDT Gimandoan ni Daanbantayan Mayor Sun Shimura ang kapulisan ug lokal nga kagamhanan sa pag-imbestigar sa insidente sa giingong pagdakop, pagpatay ug pagbaligya sa Tiger shark sa isla sa Malapascua, lungsod sa Daanbantayan.Subay sa panahom sa lokal nga kagamhanan pinaagi sa Facebook page niini sa Hulyo 8, 2022, gikondinar ang di maayong gibuhat sa pagtagod-tagud sa bisan unsang klase sa shark ug uban pang endangered species."We came across this post on Facebook about the mutilated head of what appeared to be of a Tiger shark. Its head had been removed and dumped on the shore of Malapascua Island, while the rest of the body is believed to have been sold for human consumption," saysay sa post.Ang maong klase sa isda gikonsiderar sa kagamhanan nga bililhon ug angay nga protektahan aron mahimong mabalanse ang kinabuhi sa mga hayop sa kadagatan."Sharks play a significant role in promoting the ecological balance and protection of coral reefs. Thus, people should be reminded that it is unlawful to catch sharks or to sell, purchase, possess, transport and export, or to wound or kill these endangered species,"saysay sa post sa Hulyo 8.

Floating cottages gidili na subay sa EO ni Suan Posted: 09 Jul 2022 06:14 AM PDT Gidili ang construction o pagtukod og mga estruktura sama sa floating cottages sa coastal areas sa lungsod sa Cordova.Kini subay sa labing unang lagda nga giluwatan ni Cordova Mayor Cesar "Didoy" Suan sa Hulyo 8, 2022. Matod ni Suan nga sagad sa mga floating ug fixed cottages anaa nahimutang sa lugar nga gidili."It is observed that structures including floating and fixed cottages are constructed and operating indiscriminately in some areas of Cordova without any permits or clearances from the Municipality of Cordova to do so. The same is detrimental to the environment and a blatant disregard of the rules on the legal easement and other government laws for that matter," matod sa executive order nga giluwatan sa mayorSa nasayran, una nang nipadala og suwat ang Department of Environment and Natural Resources (DENR) sa Enero ning tuiga labot sa operasyon sa mga cottages sa Barangays Poblacion ug Catarman nga anaa sa non-build zone. Giingong nisupak kini sa 3-meter easement zone ug 20-meter easement zone alang sa urban ug rural areas.Ang lungsod sa Cordova nailhan usab sa nabantog nga "Bora-Bora" diin nahimutang ang floating cottages nga giingong wala usay tarong nga pansayan hinungdan nga sagad sa mga hugaw sa tawo diha malabay sa kadagatan.

SK official uyon sa pag-uswag sa SK, barangay elections Posted: 09 Jul 2022 06:10 AM PDT Ang Sangguniang Kabataan (SK) president sa Mandaue City pabor sa pag-uswag sa Barangay and Sangguniang Kabataan Elections (BSKE) karong Disyembre, kay maghatag kini og dugang panahon sa SK officials sa pagpalig-on sa ilang mga programa alang sa kabataan.Si Dallie Mae Cabatingan, Mandaue City SK Federation president, nitug-an sa SunStar Cebu sa Biyernes, Hulyo 8, 2022, nga uyon siya sa panawagan sa pipila ka mga sakop sa House of Representatives nga i-postpone ang 2022 BSKE.Matud pa ni Cabatingan nga daghan sa mga SK member nakigbisog sa pagtuman sa ilang gihatag nga mandato ubos sa bag-ong guidelines sa bag-ong SK Reform Law Republic Act 11768, o nailhan nga Sangguniang Kabataan Governance Reforms and Compensation Law.Ubos sa maong balaod, gipalapad ang tahas sa SK sa pag-institutionalize sa youth governance sa lebel sa local government unit (LGU), nga naghatag og usa ka SK Federation representative nga gitahasan sa usa ka kritikal nga buhat sa pagtubag sa lapad nga mga panginahanglan sa ilang mga hurisdiksyon.Kon madayon ang pag-postpone, si Cabatingan namahayag nga maghatag kini og dugang panahon sa mga SK member sa pagpadayon ug pagpatuman sa ilang kasamtangang mga proyekto ug mga plano nga gipahimutang alang sa mga batan-on sa ilang tagsa-tagsa ka barangay.Sa dakbayan sa Mandaue, pipila ka malampusong mga proyekto nga gipatuman sa SK Federation naglakip sa pagpalig-on sa Local Youth Development Council (LYDC) sa dakbayan.

335K nang nagparehistro sa SK, barangay elections Posted: 09 Jul 2022 06:09 AM PDT Upat ka adlaw human sa pagsugod sa voter registration period alang sa Disyembre 2022 Barangay ug Sangguniang Kabataan (SK) polls, kapin na sa 355,000 ka mga indibidwal ang naka-file na sa ilang mga aplikasyon aron mahimong rehistrado nga mga botante.Sa datus gikan sa Commission on Elections (Comelec)-Election and Barangay Affairs Department (Ebad), nagpakita nga niabot na og 355,321 ang bag-ong mga nagparehistro sa tibuok nasod, niadtong Hulyo 7.Gibahin ngadto sa mga matang sa mga botante, kadtong nag-edad og 15 ngadto sa 17 (SK voters) adunay 215,822 ka mga aplikante; 18 ngadto sa 30 (parehong SK ug regular nga botante) adunay 118,130 ka aplikante; ug 31 anyos pataas (regular voters) adunay 21,369 ka mga aplikante.Gawas sa bag-ong mga nagparehistro, nakadawat usab ang Comelec og 68,146 ka Applications for Transfer from Other Cities/Municipality; 16,218 ka Application for Transfer gikan sa sulod sa samang Syudad/Municipality; 3,119 Application for Transfer uban sa Reactivation; 997 ka Application for Transfer uban sa Reactivation and Correction of Entries; 3,688 Application for Transfer uban sa Correction of Entries; ug 22,140 ka Application for Transfer uban sa Reactivation.Nakadawat usab ang poll body og 4,999 ka Applications for Reactivation with Correction of Entries; 15,089 Applications for Change of Names/ Correction of Names; 56 ka Applications for Inclusion of Record in the Book of Voters; 9 ka Applications for Reinstatement of Name in the List of Voters; ug 1,340 Applications for Transfer from Overseas Voting to Local.Sa kinatibuk-an, ang tanan nga mga matang sa mga aplikasyon, kaniadtong Hulyo 7, adunay 491,122 ka mga indibidwal. Ang voter registration period alang sa December 5 poll exercise gibuksan niadtong Hulyo 4. Ang voter registration period gitakdang molungtad hangtod sa Hulyo 23. / HDT sa SunStar Philippines

DOH officials negatibo sa Covid human sa meeting ni Marcos Posted: 09 Jul 2022 06:08 AM PDT Negatibo sa Covid-19 virus ang mga opisyal sa Department of Health (DOH) bisan kon sila nakigtagbo kang Presidente Ferdinand Marcos Jr. niadtong Miyerkules, Hulyo 6, 2022.Si Health Undersecretary Maria Rosario Vergeire miingon nga ang dagkong mga opisyal sa DOH, nga nakigkita kang Marcos, negatibo sa virus."Since we have a meeting later in OP (Office of the President), we had our RT-PCR (reverse transcription-polymerase chain reaction) tests. The results are all negative," matod ni Vergeire.Bisan og wala sila mopailawom sa swab testing sa wala pa ang tigom, si Vergeire niingon nga wala sila kinahanglana nga mohimo niini bisan pa man nga adunay exposure kang Marcos."Based on current protocols, we dont need to, unless we are symptomatic," siya nagkanayon.Si Marcos nakigtagbo sa dagkong mga opisyal sa DOH aron hisgutan ang tubag sa nasud sa Covid-19.Gawas kang Vergeire, nitambong sa tigom sila si DOH Undersecretaries Lilibeth David, Ma. Carolina Vidal-Taiño ug Abdullah Dumama Jr., ingon man si Assistant Secretary Maylene Beltran.Niadtong Biyernes, nagpositibo sa coronavirus si Marcos Jr. pinaagi sa antigen test.Siya adunay gamay nga hilanat. / HDT sa SunStar Philippines

Kapin sa 30 ka bata nakapahimus sa operation tuli Posted: 09 Jul 2022 06:07 AM PDT Malampuson nga napahigayon ang Operation Tuli sa lungsod sa Pilar, mga isla sa Camotes, Sugbo sa Biyernes, Hulyo 8,2022.Kini gihimo sa Pilar Gymnasium sa nahisgutang lungsod nga nagsugod pasado alas 8:00 sa buntag ug nahuman alas 12:00 sa udto.Ang kalihukan gipangulohan ni Dr.Stephen Miayo, bag-ong gitudlo nga municipal health officer sa lungsod sa Pilar. Ning-abag usab ang mga nurse ug midwife sa maong isla.Dili mominus sa 30 ka mga bata ang natuli sa grupo.Matud ni Miayo nga ilang target nga maserbisyohan sa libreng tuli ang 13 ka mga barangay sa lungsod. Sa usa ka semana, ka usa pagahimuon ang libreng tuli sa barangay diin kini gi-schedule.Matod ni Miayo nga tungod sa pandemiya wala nakapahigayon og tuli ang kagamhanan mao nga senemana na ang ilang kalihukan.

Editoryal: Ayaw basula ang LGU Posted: 09 Jul 2022 06:03 AM PDT Daghan ang mga netizen nga negatibo og reaksiyon sa hukom sa City of Talisay Traffic Operations and Development Authority (CT-TODA) nga ipatuman sa N. Bacalso ug Cebu South Coastal Road (CSCR) ang outer lane only sa mga motorsiklo. Nagpasabot nga anha lang sa daplin sa right side ang mga motorsiklo nga mahimong makasubay.Gibase ni CT-TODA chief Jonathan Tumulak ang hukom nila sa daghang mga aksidente nga gikalambigitan sa mga motorsiklo. Hapit katunga sa vehicular accidents ang gikalambitan sa mga tigmotorsiklo. Nahuna-hunaan ni Tumulak nga usa sa mga paagi sa pagsanta sa nagkataas nga gidaghanon sa mga aksidente mao ang pag-confine sa mga motorsiklo sa right lane sa duha ka major nga mga karsada.Wa ni mahukmi nila nga way basehanan. Ang tumong niini mao ang pagpalikay ug pagpaminos sa mga aksidente sa motorsiklo, diin dunay nangamatay. Ang mga aksidente nahitabo sa middle ug inner lanes. Ning mao nga impormasiyon, ang traffic body nakahukom nga ipatuman ang right lane only sa mga motorsiklo nga mao say subayan sa mga biseklita. Daghan sa mga tigmotorsiklo reckless kun mapasagaron sa pagpadagan. Pataka lang og padagan nga way paghuna-huna nga sila maangol ug makaangol sa ubang mga tawo nga ilang maigo.Suma gud, pila na man ka mga kinabuhi ang nangakalas sa mga aksidente sa dan tungod sa motorsiklo? Bisan sila pa ang sad-an kasagaran, ang mga driver sa four-wheeled nga mga sakyanan mao ang mogawas nga sad-an. Kon di usbon sa mga tigmotorsiklo ang batasan ug buhat niini sa karsada, hayan duna pay ubang mga LGU nga mopatuman og samang mga lagda batok sa motorsiklo. Labina kon makita nga epektibo ang resulta sa buhaton sa Talisay City.Di mabasol ang mga LGU kon sila nagpatuman og mga lagda sa dan kay kini reaksyon ra man sab sa gibuhat sa mga motorcycle driver sa karsada.

Vallena: Tudloi unsaon pag bike Posted: 09 Jul 2022 05:39 AM PDT Bisan sa bata pa ko, ganahan na kaayo ko og biseklita, apan lagi kay kabos kaayo kay bisan gani ligid di makapalit, igo ra ko sa pagpanghuwam. Hangtod nga nakat-on ko og sikad.Mas maayo nga kon ikaw ginikanan maka-afford, gamay pa ang imong anak imo nang i-expose sa biseklita aron ganahan kini. Kay importante ang pagkat-on og bike kay moabot ra ang panahon nga magamit kaayo ni.Sa ako nang giingon, sa mga panahon sa katalagman, sama sa linog ug bagyo nga posible kaayong mababagan ang mga agianan sa sakyanan ug di available ang fuel, sama sa miaging bagyo nga Odette, magamit kaayo ang biseklita. Labina kay ang nasod usa sa mga dapit sa kalibutan nga kanunay maigo og katalagman.Mao ni ang usa sa mga rason nga gagmay pa ang among mga anak, ako na silang gipatuon og biseklita. Ang akong asawa nga mahadlok mo bike, akong giubanan sa mga higayon nga ganahan siya mosikad.Nahinumdom ko niadtong linog sa Japan sa 2011, dunay tiguwang babaye nga naluwas gikan sa tsunami kay nitindak siya sa bike sa pagtungas sa elevated nga lugar.Mismo ako atol sa bagyong Ruping sa 1990 nakaduaw sa siyudad kay nagsige ko og panghuwam og road bike sa akong classmate ug suod nga higala.I-PROMOTEMaayo unta kon i-promote og tinud-anay, di lang estorya, ang bike culture dinhi sa Sugbo, apil na sa nasod. Dako og matabang ang mga local government unit (LGU) sa bike culture promotion pinaagi sa pagpanday og ordinansahon.Magbutang og mga pasilidad ubos sa iyang hurisdiksiyon alang sa mga magbiseklita. Ang lungsod sa San Francisco sa mga isla sa Camotes usa sa akong nakita nga nag-promote og bike awareness. Haum usab hinuon kaayo kay ang isla maanindot kaayo alang sa biseklita.Magpasiugda usab og mga event sama sa sports competition sa bikers ug mahimong magpasiugda og bike festival bisan ka usa sa usa ka tuig nga iatol sa World Bicycle Day sa matag Hunyo 3.Makaayo ni sa mga dapit nga nihit ang mga sakyanan ug kinahanglan pa sa mga bata nga molakaw og duha ngadto sa lima ka kilometro aron lang sa pagtungha.Dako kaayo ni og ikatabang sa kabos nga mga pamilya, labina kon ang mga LGU mohatag og biseklita sa mga kabus isip tabang pagpatungha sa mga bata.IMAHINASYONDinhi ko nakakita sa kakuwang og imahinasyon ug inisyatiba sa mga opisyal sa kagamhanan nga wa nakakita sa potensiyal sa biseklita isip epektibo nga alternatibong transportasiyon ning nagkagrabeng kahimtang sa panahon.Inay magsakay og four-wheeled nga sakyanan ang mga kawani sa kagamhanan, labina tong mag inspection sa interior nga mga dapit, mas maayong gamiton ang biseklita. Kay slow moving, mas makita ang mga dapit nga nagkinahanglan og pagtagad sa kagamhanan.Makadaginot pa sa gasolina ang gobiyerno kon biseklita ang ipagamit sa mga kawani nga haum alang ning mao nga matang sa transportasyon.Maayo unta mausab na ang pagtan-aw sa mga opisyal sa gobyerno sa biseklita.

Lillard pabilin sa Blazers Posted: 09 Jul 2022 05:36 AM PDT Ang All Star guard nga si Damian Lillard ug ang Portland Trail Blazers nagkasabot na sa $122 milyones nga balor sa duha ka tuig nga extension diin ang Olympic gold medalist magpabilin sa team hangtod 2026-2027 season.Sa 2025-2026 NBA season, si Lillard adunay sweldo nga $59 milyones ug mahimong $63 milyones sa sunod season, padayag sa wa magpaila nga executive sanglit wala pa ipahibawo sa publiko ang maong kontrata.Ang sinaligan sa Blazers mokita og $137 milyones sa mosunod nga tulo ka tuig sa dili pa moepekto ang iyang extension contract.Si Lillard kaunom na nahimong All Star ug 10 na ka tuig nga nagduwa sa Blazers apan limitado ngadto sa 29 ka mga duwa sa miaging season gumikan sa core injury nga nagkinahanglan og operasyon"My body is stronger than it was before in certain areas," padayag ni Lillard samtang nagtan-aw sa duwa sa NBA Summer League sa Las Vegas.Ang 32 anyos nga pambato sa Portland niingon nga dako og gikatabang kaniya ang pagpahuway diin siya nag-average og 24.6 puntos ug apil sa top 75 players sa NBA's 75th anniversary celebration sa miaging season. (PAC, AP)

Sumbagay na! Posted: 09 Jul 2022 05:34 AM PDT Depensahan ni Pinoy boxer Mark Magsayo ang iyang bakos sa WBC featherweight division batok ni Mexican boxer Rey Vargas sa Alamodome sa San Antonio Texas, Hulyo 10, 2022.Kini maoy labing una nga pagdepensa sa 27 anyos nga lumad nga taga Tagbilaran City, Bohol sa 126-lb division belt ug iyang paningkamotan nga magpabiling kampyon sanglit siya na lang ang nag-inusarang Pinoy nga world champion.Karong tuiga, ang mga world champion nga sila si Jerwin Ancajas, Nonito Donaire Jr., ug Rene Mark Cuatro pulos napilde sa ilang mga away samtang si Jonhriel Casimero gitangtangan og bakus sa World Boxing Organization (WBO).Si Magsayo kinsa nagbansaybansay sa bantugan nga Wild Card gym ni coach Freedie Roach nga maoy boxing gym usab ni Manny Pacquiao."I guarantee that this is going to be a big night for me. We're ready to show who the best in the division is," matod ni Magsayo atol sa official weigh-in kagahapon.Sa paglangkat ni Magsayo sa iyang bakus, iyang gipalagpot si Gary Russell, kinsa maoy gikahadlokan sa maong division.Kini maoy naghatag og kompiyansa sa Pinoy boxer ug siya nanghinaot nga dili magsige og dagan ang Mexican atol sa ilang sumbagay sulod sa 12 ka rounds."I'm not worried about Vargas. I've already beat the best in the division, so my confidence is very high heading into this fight," matod ni Magsayo kinsa wala pay pilde sa 24 ka away ug adunay 16 ka knockouts."I hope Rey Vargas doesn't run too much, so we can give a good fight to the people," ni Magsayo pa.Si Vargas kinsa kanhi WBC super bantamweight champion ug taas og tulo ka inches ni Magsayo, nidawat sa maong panawagan."If you want to exchange blows, I'm more than happy to do that. Magsayo may want to exchange blows so badly because that may be the only thing he knows how to do. He doesn't know how to fight otherwise. We will dominate him and take the belt.The higher the confidence of my opponent, the harder the fall is," tubag ni Vargas kinsa 35-0 ug adunay 22 knockouts.

Migallen: Magsayo by knockout; Vargas by decision Posted: 09 Jul 2022 04:23 AM PDT Karong buntag (Hulyo 9, 2022 sa Pilipinas) malisod nga tahas ang sagubangon sa kasamtangang bugtong world boxing champion sa Pilipinas nga si Mark "Magnifico" Magsayo sa iyang unang pagdepensa sa WBC featherweight title sa Alamodome sa San Antonio, Texas sa Estados Unidos.Kini tungod kay dili basta-basta ang iyang makontra nga si Rey Vargas kinsa, sama usab kaniya, wala pa nakatilaw og kapildihan.Kon sa tapad ang basehan, dako og bintaha si Vargas gumikan kay gawas sa gitas-on, mas halapad usab kini og kasinatian batok sa lumad nga taga Tagbilaran City, Bohol.Sa edad nga 31 anyos, si Vargas adunay 35-0, nga record, 22 niini gipang-knockout, ug siya usab ang kanhi WBC superbantamweight champion.Samtang ang 27-anyos nga Magsayo, kanhi sakop sa nasira na nga Ala Boxing Club, naghupot og 24-0 nga may 16 ka knockout ug nahimong world champion niadtong Enero ning tuiga pinaagi sa majority decision batok sa kanhi undefeated usab nga si Gary Russel Jr.Aduna man tuoy kusog, apan dili lisod nga awayon si Magsayo tungod kay permi kining moataki ug gusto og saktong sinukliay sa kumo.Makita kini sa iyang miaging away batok ni Julio Ceja nga bisan tuod og alkansi siya sa palutsanay sa kumo, apan wa kini mobahar sa iyang pag-ataki hangtod nga nakaantimano siya og igo sa apapangig sa Mexicano nga maoy iyang gipahimuslan aron angkunon ang brutal nga knockout nga kadaugan.Sa ilang championship fight ni Russel Jr., gihulagway nga daw og naglisod si Magsayo bisan pa man og usa ra ka kamot ang gigamit ni Russel tungod kay adunay piang ang tuo nga abaga niini.Kini maoy usa sa mga rason kon nganong biya si Magsayo ning awaya tungod kay sama kang Russel, kini si Vargas usa usab ka technical fighter.Maingon nato nga nakabintaha lang si Magsayo batok ni Russel niadtong awaya tungod kay baldado man ang iyang kontra. And this is not the case in fighting against Vargas kinsa naila nga makamaong mogamit sa bintaha sa iyang gitas-on nga epektibong iyang napahimuslan batok sa mga dekalidad niyang mga kontra.Pero wa kini magpasabot nga sarado na ang tsansa ni Magsayo nga modaog batok ni Vargas.Kini tungod kay ang Mexican fighter duha ka tuig nga wala makaaway human nakadepensa og kalima ka higayon sa iyang superbantam title. Problema sa iyang promotional team maoy hinungdan. Dugang niini mao usab ang pagka angol sa iyang batiis.Si Vargas usa ka distant fighter nga kugihan usab nga mobuhi og mga kumo. Luhagan ug maayog footwork nga daghan og variation ang iyang mga lihok.Kamao usab nga mo-roll sa iyang lawas nga dali ra kaayong makagawas sa pressure sa kontra.Pero kini maoy ikaduha pa lang niyang away sa featherweight division, ang timbang nga maoy naandan ni Magsayo.Sa niaging Nobiyembre, maoy una niyang away sa featherweight division diin yano ra usab niyang gidominar ang di inila nga si Leonardo Baez (21-5, 12KOs) nga iyang gipildi pinaagi sa unanimous decision.Awkward man tuod nga manumbag si Baez unya minus pa og power ang iyang kumo, apan daghang higayon nga iyang masungag usab si Vargas.Kon atong itandi, layo ra gyud kaayo si Baez og estelo ni Magsayo. Samot na ang kusog.Dinhi misihag og gamay ang paglaom sa Boholano champion. Mahimong Lupigon siya sa pinuntosay, apan wa siya bintahai sa gikusgon sa kumo. Sama sa nahitabo ni Ceja duha lang ka solidong kumo ang nipahagba niini.Tinuod, inilog ug atoa dapig ni Vargas ang pabor sa panagsangka, apan ang kalig-on sa pagsalig ug determinasyon ni Magsayo maoy magpamatuod sa tanang kritiko nga di taghap ang iyang pagka champion.Akong panagna. Magsayo by knockout, Vargas by decision. Goodluck, Mark!* * *Akong kinasingkasing nga pahasubo sa pamilya sa among kanhi managing editor sa Superbalita nga si Sir Anol Mongaya, kinsa sa kalit lang mipanaw ngadto sa laing kalibutan niadtong Hulyo 8, 2022.Nakauban ko si Sir Anol sa trabaho sukad pa niadtong 1998 gikan sa Newstime Daily, SunStar-Cebu ug sa Superbalita hangtod niadtong pagretiro niya sa 2010 apan nagpabiling kolumnista sa mantalaan.Rest in Peace, Sir.... (jun.migallen22@yahoo.com)

Wall gikuha sa LA Posted: 09 Jul 2022 04:23 AM PDT Nipirma na og kontrata ang kanhi All Star guard nga si John Wall sa Los Angeles Clippers kagahapon, Hulyo 9, 2022Sa iyang social media account, gi-post ni Wall ang iyang pagpirma og kontrata ug nakadawat og pagtimbaya gikan ni Steve Ballmer,tag-iya sa team didto sa Las Vegas diin ang Clippers niapil sa liga."John is one of the great downhill drivers and shot creators of his era. He will add depth to our backcourt with his initiating, passing and point-of-attack defense," matod ni Lawrence Frank, president of basketball operations.Ang 31 anyos nga si Wall nag-average og 20.6 points, 6.9 assists ug 3.2 rebounds samtang maoy starting guard sa Houston Rockets niadtong 2020-21NBA season. Wala siya niduwa sa niaging tibuok season.Si Wall naoperahan sa iyang walang tikod hinungdan nga wala siya nakaduwa niadtong 2018-2019 season gumikan sa recovery ug 41 games ra usab ang iyang naapilan niadtong 2017-18 season.Siya niduwa sa Washington Wizards gikan niadtong 2010-2016 isip first overall pick atol sa 2010 NBA draft.

Slaughter sa Japan Posted: 09 Jul 2022 04:21 AM PDT Gitalikdan na sa Sugbuanong Filipino American nga si Greg Slaughter ang Philippine Basketball Association (PBA) ug nipirma og kontrata sa Japan B. League second division alang sa Rizing Zephyr Fukuoka.Ang bag-ong team ni Slaughter maoy nipahibawo kagahapon diin siya modala sa number 20 alang sa iyang jersey.Ang alumnus sa University of the Visayas katapusang niduwa sa NorthPort Batang Pier sulod sa upat ka duwa alang sa 2021 Governors' Cup ug siya nag-average og 14.3 puntos, 9.3 rebounds ug 1.3 blocks.Ang Fukuoka team adunay 20-30 nga win-lose record sa niaging season sa B. League."I am really excited to play for the great city of Fukuoka and the fans! Thank you for all the support and I can't wait to see you all!," padayag sa press statement ni Slaughter.Ang Batang Pier ug si Slaughter adunay walay pagsinabtanay sa kontrata human nangangkon ang Sugbuanong higante nga wala niduol kaniya ang team dihang ni-expire ang iyang kontrata niadtong Enero 31.Apan gilalis kini sa NorthPort ug nipadayag nga aduna silay offer sa kanhi number 1 overall pick nga maximum deal apan matod pa ni Slaughter nga ang presyo layo ra kini sa iyang unang nadawat .Sa pag-abot ni Slaughter sa Japan B. League, iyang ikakontra ang laing mga Pinoy nga silang Kobe Paras sa Altiri Chiba ug Jordan Heading sa Nagasaki Velca sa second division.

You are subscribed to email updates from SUNSTAR. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States