https://www.sunstar.com.ph/ |
- Pekeng dentist giposasan
- Mga biktima sa buhawi giayudahan
- Lawom nga imbestigasyon pagpatay sa empleyada sa Pag-Ibig ilusad
- P1M damyos sa sunog sa tunghaan
- Bag-ong kuwartang papel makahasol
- China mosuporta sa programa sa mga lumad sa Davao City
- 18 barangay sa Davao City low risk na; 5 moderate risk
- 11 marites giunay sa kauban
- Motibo pagtipi sa supervisor sa DepEd selos sa posisyon?
- Roldan: United Nations walay ngipon?
| Posted: 12 Jul 2022 04:26 AM PDT MATI CITY, Davao Oriental -- Balhog na sa prisohan ang giingong peke nga dentista dihang malampuson nga nasikop sa awtoridad sa gilusad nga entrapment operation alas 3:30 sa hapon, Hulyo 11, 2022, didto sa usa ka hotel sa Sitio Madang, Barangay Central, dakbayan sa Mati.Sa report gikan sa Criminal Investigation and Detection Group (CIDG) Regional Field Unit (RFU) Davao Region, ilang gilusad ang entrapment batok sa nagpailang dentista nga alyas Renz.Dihang nagpositibo ang paghimo sa giingong dentista og serbisyo sa nagtakuban nga awtoridad, gilayon kining giposasan.Malampuson siyang nadakpan sa hiniusang puwersa sa CIDG Davao Oriental PFU (lead unit) uban ang Regional Special Operating Team (RSOT) ug ang Mati City Police Station.Narekober sa awtoridad gikan sa posisyon sa dinakpan ang mga ebidensiya sama sa dental materials nga gilangkuban sa assorted elastics, orthodontic brackets, mouth retractors, ug orthodontic wires, ug daghan pa nga sagad pulos gamit sa orthodontic treatments ug braces.Sumala sa awtoridad nga illegal practice sa dentistry partikular ang pagpanghimo og mga braces nga walay awtorisasyon gikan sa Philippine Dental Association kun kalapasan sa Republic Act 9484 nga mas nailhang Philippine Dental Act of 2007 ang ipasaka nga kaso sa dinakpan didto sa korte. |
| Mga biktima sa buhawi giayudahan Posted: 12 Jul 2022 04:26 AM PDT DIGOS CITY, Davao del Sur -- Naabagan na og mga pasiunang panginahanglanon sa lokal nga kagamhanan ang mga apektado nga mga pamilya sa paghapak sa buhawi sa Barangay San Miguel ning siyudad Lunes sa hapon, Hulyo 11, 2022.Subay sa report sa Digos City Disaster Risk Reduction and Management Office (DCDRRMO), usa ka balay ang hingpit nga naguba, samtang 15 ka mga balay ang partially damaged.Sumala ni Philip Jun Caminade, team leader sa Digos CDRRMO, usa ka buhawi ang miigo sa lugar.Temporaryong anaa sa barangay gym ang mga apektadong residente samtang ang uban anaa sa ilang mga paryente namuyo.Hinuon, nahatagan na sab og mga pasiunang ayuda ang mga apektadong residente sama sa food packs ug hygiene kits.Nakasinati og localized thunderstorms ang Digos City ug pipila ka bahin sa Davao Region hinungdan sa kusog ngadto na sa hinay nga mga pag-ulan ug kasarangang hangin. |
| Lawom nga imbestigasyon pagpatay sa empleyada sa Pag-Ibig ilusad Posted: 12 Jul 2022 04:24 AM PDT USA ka lawom nga imbestigasyon ang gihimo sa Buhangin Police Station, ubos sa Davao City Police Office, sa pagpusil-patay sa babaye nga giingong admin officer sa Pagibig Fund.Subay sa report gikan sa Buhangin police, ang biktima nga si Ma. Elena Atop Cordeta, minyo, nagpuyo sa Panorama Homes Subdivision, Barangay Buhangin Proper, nagbaktas nga padung na unta sa ilang balay.Alas 5:30 sa hapon niadtong Lunes, Hulyo 11, 2022, tungod sa simbahan sa Iglesia ni Cristo sa Tigatto Road, Panorama Homes, pipila lang ka metros ang gilay-on gikan sa balay sa biktima, gipusil kini sa wa pa mailhing mamumuno.Ang hepe sa Buhangin police, Major Bernie Suaga, nagbutyag nga subay sa ilang pasiunang imbestigasyon, migula nga nakasuot og itom nga jacket ug yellow nga helmet ang mamumuno, dayon mipusil sa biktima sa makadaghang higayon tumong sa nakadaiyang parte sa kalawasan.Dead on the spot ang biktima samtang ang mamumuno daling misibat sakay sa motorsiklo.Narekober sa crime scene ang walo ka mga empty shells sa .45 caliber pistol, duha ka mga deformed slug ug ang mga personal nga gamit sa biktima apil na ang kuwarta nga P26,870.Personal nga bangi ang usa sa mga posibleng anggulo ang gitan-aw karon sa kapulisan diha sa ilang nagpadayon nga imbestigasyon. |
| P1M damyos sa sunog sa tunghaan Posted: 12 Jul 2022 04:24 AM PDT COTABATO CITY -- Moabot sa gibanabanang kapin sa P1 milyon ang damyos sa naugdaw nga tulunghaan sa sunog alas 2:00 sa kaadlawon niadtong Martes, Hulyo 12, 2022, sa Buluan, Maguindanao Province.Sa taho gikan sa Bureau of Fire Protection (BFP-Buluan) nga misilaab ang dakong kalayo sulod sa Maguintech Learning Center School sa Barangay Poblacion sa nahisgutang lungsod.Gikanayon ni BFP fire investigator FO3 Edison Cadagat nga dako na kayo ang kalayo sa dihang sila nahiabot sa lugar hinungdan nga naglisud sila sa pagpakgang niini.Niabag na ang mga bombero gikan sa Tacurong City ug North Cotabato hinungdan alas 4:30 sa kaadlawon nakontrola ang kalayo.Sumala sa mga molupyo duol sa tulunghaan nga nakadungog na lang sila og buto sa ikaduhang andana sa wala pa misilaab ang kalayo.Dako ang pagtuo sa mga lokal opisyal sa Buluan nga posibleng ang transformer sa Maguindanao Electric Cooperative (Magelco) nga anaa sa tulunghaan ang mibuto ug mipaulbo sa kalayo.Hinuon, padayon ang gihimong pagpanubay sa BFP-Buluan aron nga matumbok ang saktong hinungdan sa sunog sa eskuwelahan. |
| Bag-ong kuwartang papel makahasol Posted: 12 Jul 2022 04:18 AM PDT DAVAO DE ORO -- Nakahasol alang sa pipila ka mga negusyante ang polisiya sa Bangko Sentral ng Pilipinas nga naglambigit sa bag-ong kuwartang papel nga usa ka libo ka pesos.Sanglit ang Bangko Sentral ng Pilipinas (BSP) naghatag pahinumdom sa mga makabaton sa bag-ong P1,000 bill nga gikinahanglang dili kini sulatan, bawal ang pagpili o pagkumot niini, bawal guntingon, bawal i-staple, bawal gamitan sa lastiko, bawal sunugon o ipaduol sa kalayo, bawal plantsahon, bawal mabasa ug gikinahanglang ilayo sa mga toxic chemicals sama sa muriatic acid ug bleach.Sumala pa ang makalapas niini dunay multa nga di-mosobra sa P20 mil ug pagkakulong nga di muobos sa lima ka tuig.Tungod niini, usa ka alyas Diomedes, 46, negusyante'g isda nga taga-Cateel, Davao Oriental namahayag nga dakong kahasol alang kanilang mga lab-asera nga di mabasa ang kuwartang papel nga ibayad ngadto kanila sanglit sa pagkuha pa lang daan og isda aron ipakita sa mga kustomer, basa na sa tubig ang ilang mga kamot.Sumala pa ni Diomedes nga sa biyahe pa lang pauli sa Cateel dili malikayan nga mapilo ug mabasa ang kuwartang papel labi na sa higayon nga maabtan sila ulan sa dalan.Gisaway sab sa usa ka empleyado nga wa magpabutyag sa iyang pangalan ug gitawag nga "tunto" ang tawo nga mobayad sa giingong multa nga balor og P20 mil sa makalapas sa polisiya sa maong kuwarta.Samtang alang sa usa ka magsasangyaw sa usa ka sekta, gikanayon niini nga dili makatarunganon ang maong polisiya alang sa bag-ong kuwartang papel sanglit daw gitudloan ang mga tawo sa paghatag og dakong bili sa kuwarta nga ginama sa tawo itandi sa pulong sa Diyos.Apan ang BSP, pinaagi ni Gregorio Baccay III, acting bank officer sa BSP Visayas Regional Office, nagtin-aw nga ang pagpilo (apan di kumoto) sa papel nga kuwarta mahimo pa gihapong dawaton sa bisan asa nga establisemento sa nasud apan ilang gipahimangnoan ang publiko bahin sa saktong paggamit sa banknotes. |
| China mosuporta sa programa sa mga lumad sa Davao City Posted: 11 Jul 2022 07:00 AM PDT MALAUMAN nga dugang mga proyekto ang ibubo sa nasud China sa Davao City human nga nakigtagbo si Chinese Consul General sa Davao City Li Lin ug ang mga kaubanan niini ngadto kang First District Congressman Paolo Z. Duterte.Gikataho nga ang panagkita simbolo sa padayon nga panaghigalaay tali sa duha ka mga nasud ug ang pag-ila sa programa nga suportahan sa gobyerno sa China sa dakbayan.Sa samang okasyon, gipresentar sa Chinese Consul General ngadto kang Duterte ang mga programa nga suportahan sa gobyerno sa China ubos sa bag-ong termino ug sa kasamtangang gobyerno sa nasud.Nasayran nga suportahan niini ang mga programa sa livelihood alang sa mga lumad sa Davao City nga maoy highlight sa panag-istoryahanay.Si Congressman Duterte nagpakita sa iyang hingpit nga suporta sa programa ug mipasalig kang Consul General Li Lin nga andam siyang makigtambayayong sa opisina sa konsulado, alang sa katuyoan sa pagpagaan sa socio-economic nga kahimtang sa mga lumad.Dugang pa nga ang maong miting nagbukas sa kahigayonan alang kang Duterte sa pagpahayag sa iyang pasalamat sa padayong suporta sa gobyerno sa China sa mga proyektong imprastraktura nga gihimo sa gobyerno sa Pilipinas ug sa daghang mga programa nga nagpalagsik sa ekonomiya sa nasud.Gikonsidera kining usa ka maayong lakang sa usa ka tukma nga direksiyon sa duha ka mga nasud. |
| 18 barangay sa Davao City low risk na; 5 moderate risk Posted: 11 Jul 2022 06:58 AM PDT ANAA na sa low risk ang 18 ka mga barangay sa Davao City ug laing lima ka mga barangay ang anaa ubos sa moderate risk batok Covid-19.Ang datus base sa gipagawas nga barangay classification sa City Government of Davao gikan Hulyo 11 hangtud Hulyo 16, 2022.Ang 18 ka mga barangay mao ang mga barangay sa 11-B, 18-B, 33-D, Angliongto Sr., Bucana, Buhangin Proper, Cabantian, Catalunan Grande, Catalunan Pequeño, Indangan, Maa, Matina Aplaya, Mintal, Pampanga, Panacan, Tigatto, V. Hizon, Sr. ug Wilfredo Aquino.Samtang ang lima ka mga barangay nga anaa sa moderate risk mao ang mga barangay sa 10-A, 19-B, Gov. Paciano Bangoy, Tacunan ug Talomo Proper.Samtang walay mga natalang barangay ubos sa critical ug high risk category.Ang lokal nga kagamahanan sa Davao padayon nga nagapahimangno sa publiko nga likayan ang pag-adto sa mga lugar nga may kaso sa Covid-19 gawas na lamang og may kalabutan sa trabaho, emerhensiya ug negusyo.Dungan niini, giawhag sab ang tanan nga magpabakuna batok Covid-19. |
| Posted: 11 Jul 2022 06:58 AM PDT ONSE ka mga tsismosa ang gipa-blotter sa Talomo Police Station human sila naduhig sa nabandilyo nga istorya sa ilang purok sa Barangay Matina Aplaya, Talomo District, Davao City, Hulyo 8, 2022.Sa impormasyon nga nakalap sa Superbalita Davao, nasayran nga perteng sukoa ni Shony (bansagon gitago), 52-anyos, dihang gipanabi siya nga duna kuno siya'y batan-on nga kabit.Dugang pa nga ang duha sa onse ka tsismosa maoy nakakita kang Shony nga misulod sa usa ka lodging house nga anaa naglumbay sa Matina Aplaya Road, kauban ang usa ka bagets nga kabit.Subay sa kasaligan nga impormante nga mitaho sa Superbalita Davao, ang duha nga nakasaksi, nanago kini sa usa ka eskina hangtud nga nanggawas sila Shony ug ang bagets sa lodging Inn.Usa, suma pa, ka oras una nanggawas sila Shony ug ang bagets, butang nga gidudahan na sila sa duha ka tsismosa nilang silingan ug maoy gihimong sumsuman nga istorya sa ilang purok.Niadtong Hulyo 8, hapit pangbunali ni Shony og planggana ang mga nahisgutan dihang iya kining gipangkompronta human siya nasayod nga siya ang gisumsuman og istorya.Dugang nasayran nga ang usa sa onse ka tsismosa mao ra sab ang mitug-an kang Shony hinungdan nga nabulabog sila.Nakatakda silang mag-abot sa barangay aron didto sila mahusay. |
| Motibo pagtipi sa supervisor sa DepEd selos sa posisyon? Posted: 11 Jul 2022 06:58 AM PDT SELOS sa posisyon ang gituohang sa mga awtoridad nga motibo sa pagpusil patay sa district supervisor sa Department of Education (DepEd) alas 4:30 sa hapon, Dominggo, Hulyo 10, sa President Quirino, Sultan Kudarat Province.Giila ang biktima nga si Tuwa Maguid Mangudadatu, 63, minyo, DepEd dist. supervisor sa Buluan, Maguindanao Province.Gibutyag ni Sultan Kudarat Provincial Police Office Director Colonel Tom Tuzon nga gisulod sa duha ka wala mailhing tawo ang balay sa biktima sa Purok Kamias, Barangay Poblacion sa maong lungsod ug gipusil gamit ang kalibre .45 nga pistola.Human mahimo ang tuyo, mga suspek daling misibat sakay sa usa ka motorsiklo paingon sa direksiyon sa Tacurong City.Patay on the spot ang biktima human makaangkon og daghang samad pinusilan sa nagkadaiyang parte sa lawas.Gihulagway nga mga suspek nakasul-ob og jacket, nakakalo ug naka-face mask hinungdan nga nalisdan ang kapulisan ang pagsubay kanila.Apan taliwala ning tanan, padayon ang gihimong imbestigasyon sa kapulisan sa President Quirino Municipal Police Station aron nga mailhan ang mga suspek. |
| Roldan: United Nations walay ngipon? Posted: 11 Jul 2022 06:57 AM PDT NAMUGNA ang United Nations (UN) niadtong 1945 pagkahuman sa ikaduhang gubat sa kalibutan. Gilangkuban kini sa 51 ka nasud aron mapatunhay ang pangkalibutanong kahapsay ug kalinaw, pagmentinar sa mahigalaong relasyon sa mga nasud, pagduso sa kalamboan, maayong pamuyo ug tawhanong katungod.Hataas na ang naabtan sa UN apan daghan sab ang nibatikos niini nga walay ngipon ug wala makapahunong sa kagubot, kapobrehon ug pagpang-abuso sa tawhanong katungod sa katawhan.Karong bag-o, gibatikos kini ni Pope Francis tungod sa nagpadayon nga giyera sa Ukraine batok sa Russia. Daghan sab nga mga deklarasyon ug resolusyon niini nga wala tumana sa iya mismong mga sakop kay matud pa, wala kini "police power" aron ipatuman kini sa matag nasud. Apan matud pa ni Ted Turner, tsirman ug usa sa mga nagpundar sa UN nga dili mabuhat sa usa ka nasud ang ginabuhat sa UN ilabi na sa pagseguro sa dignidad sa tawo.Sa akong kabahin, daghan tuod nga butang nga dili mahimo sa UN tungod sa kadako sa responsibilidad niini ug sa kakulang sa pundo aron mapatuman ang tanang deklarasyon ug plano niini.Akong gisulat diri ang 10 ka impormasyon sa UN nga posible wa nato masayri. Una, ang Universal Declaration of Human Rights maoy unang pinaka-importanteng dokumento nga napanday sa UN niadtong 1948. Ikaduha, ang badyet sa UN Peacekeeping kay ubos lang sa 0.5 percent sa tibuok badyet sa militar sa kalibutan. Aduna kini 100,000 peacekeeper sa 13 ka operasyon sa tulo ka kontinente. Ikatulo, ang World Food Programme naghatag og pagkaon sa 115.5 milyon ka mga tawo nga gigutom sa 84 ka nasud. Ikaupat, ang mga ahensiya sa UN naghatag og tabang sa 1.9 milyon ka babaye nga buntis ug nanganak.Ikalima, mga ahensiya sa UN nagsuplay og 5.5 bilyon nga doses sa bakuna sa Covid-19. Ikaunom, nagtabang ang UN sa malinawong piniliay sa 50 ka nasud nga iyang miyembro. Ikapito, ang UN ug mga ahensiya nagtabang sa mga bakwit tungod sa kabangis, giyera ug pagpanglutos. Moabot og 82.4 milyon ka tawo nga namakwit tungod sa kagubot. Ikawalo, napagawas ang UN og Paris Agreement kabahin sa "climate change" nga gipirmahan sa 174 ka lider sa mga nasud sa kalibutan niadtong Earth Day 2016. Ikasiyam, ang UN nagpaguwa sa Sustainable Development Goals 2015-2030 sa pagbatok sa kapobrehon, walay panag-angay ug pagprotekta sa kalibutan. Hulip kini sa gitawag nga Millennium Development Goals nga natapos niadtong 2015. Ang ikanapulo, 63 percent sa tanang botante sa Ustados Unidos kay nagtuo nga gikinahanglan ang UN karon.Apil ang Pilipinas sa mga unang nagpundar sa UN ug gani nahimo siyang Presidente sa Fourth Session sa UN General Assembly isip delegado sa Pilipinas sa unang komperensiya niini sa San Francisco, USA niadtong 1945.Usa sab si Romulo nga nipirma sa Bretton Woods treaty diin natukod sa World Bank ug International Monetary Fund. Ang UN Children's Fund maoy nag-unang ahensiya nga nagtabang sa daghang isyu kabahin sa kabataan dinhi sa Pilipinas ilabi na sa panahon sa kalamidad ug pagpang-abuso. Atong tabangan ang UN! |
| You are subscribed to email updates from SUNSTAR. To stop receiving these emails, you may unsubscribe now. | Email delivery powered by Google |
| Google, 1600 Amphitheatre Parkway, Mountain View, CA 94043, United States | |
No comments:
Post a Comment