https://www.sunstar.com.ph/

---

• Dul-an P10M danyos sa 3 ka mga sunog
• Manhunt sa kapulisan nga mipatay sa 74 anyos nga lola
• Government center sa Sugbo sugdan pagtukod ning tuiga
• Samsam mohatag og P50K sa makatudlo sa killer sa kanhi market administrator sa Tabunok
• Garcia mokuha ni Loreche isip hepe sa tanang ospital ubos sa lalawigan sa Sugbo
• Covid-19 pandemic response magpadayon
• 480 ka barangay sa Sugbo gideklarar nga drug-cleared
• Binghay: Likay sa ‘online scam’
• Editoryal: Lungsod himuong siyudad
• Tambagi ko Noy Kulas: Nagpailang anak
• Super Busog: Pinoy Menudo
• Beermen giagak ni Fajardo
• Magsayo, Vargas nagbinaharay
• Pacquaio moaway og balik
• 48 anyos nga lalaki gidunggab patay; plamingko nagtaup pa

Dul-an P10M danyos sa 3 ka mga sunog Posted: 08 Jul 2022 08:10 AM PDT Dul-an sa P10 milyones ang danyos sa tulo ka managlahi nga mga sunog sa dakbayan sa Sugbo ug Talisay sa gabii sa Huwebes, Hulyo 7 ug Biyernes sa kaadlawon, Hulyo 8 bisan sa mga pagbunok sa uwan sa miaging mga adlaw.Gitubag sa personnel sa Talisay City Fire Station ang sunog sa Sityo Longdream, Barangay Bulacao, dakbayan sa Talisay sa mga alas 8:43 sa gabii, matod ni Fire Sr. Inspector Alvin Torion, fire marshall sa siyudad.Dali ra napawong sa mga bombero ang sunog sa usa ka balay.Mga usa ka oras ang milabay, niresponde na sab sila sa usa ka sunog sa Bihai subdivision, sityo Laray, Brgy. San Roque, dakbayan sa Talisay.Ilang nadawat ang alarma alas 10:13 sa gabii ug naabot ang kabumberohan mga alas 10:19 sa gabii.Ilang gideklarar ang first alarm alas 10:41 dayon nakontrolar mga alas 11:10 sa gabii.Matud ni Torion nga naugdaw gyud ang usa ka balay apan wa na kini makatabok pa sa laing pinuy-anan. Moabot sa P1.1 milyones ang danyos sunog.Samtang alas 9:13 sa gabii sa samang adlaw, ang mga sakop sa Cebu City Fire Office (CCFO) ug mga barangay fire brigade sa dakbayan sa Sugbo ningtubag sa usa ka alarma sa sunog sa no. 21, Lorenz St., Barangay Lahug, dakbayan sa Sugbo.Tulo ka mga balay ang nangaugdaw sa sunog nga midanyos og P7.5 milyunes.Ang alarma nadawat alas 9:13 samtang alas 9:20 sa gabii gisaka dayon sa unang alarma.Nakontrolar ang sunog alas 9:39 sa gabii ug gideklarar nga napawong mga 13 minutos ang milabay.Nasuta nga nagsugod ang kayo sa balay sa usa Francia Pacis, nga giukopar usa ka Rosemarie Timoteo.Gisusi pa sa CCFO ang hinungdan sa kayo.

Manhunt sa kapulisan nga mipatay sa 74 anyos nga lola Posted: 08 Jul 2022 08:08 AM PDT Kapulisan sa probinsya sa Sugbo nagpadayon sa manhunt operation batok sa lalaki nga nipusil-patay sa 74 anyos nga lola sa Barangay Gunting, lungsod sa Barili niadtong Martes, Hulyo 5, 2022.Si Melchora Aligato Bayadog, 74, taga Sitio Malinging sa Gunting, Barili gipusil-patay sa iyang silingan nga giila sa kapulisan nga si Joel Saplaag, hingkod, gamit ang wala pa matino nga kalibre sa armas.Dali nga nisibat ang suspek human sa krimen. Tungod niini, ang kapulisan sa Barili nagpatabang sa publiko pinaagi sa ilang Facebook page nga kon kinsa ang nakakita sa suspek, mahimong motawag gilayon sa ilang hotline.Si Police Lieutenant Colonel Mark Gifter Sucalit, deputy provincial director for operations sa Cebu Police Provincial Office (CPPO), niingon nga nagpadayon ang ilang pagpangita inabagan sa mga police station nga sikbit sa Barili.Nakig-alayon na sila sa kabanay ni Saplaag dungan sa awhag niini nga ipatahan nalang kini sa iyang kaugalingon aron dili na modako pa pag-ayo ang problema nga iyang giatubang.Awhag ni Sucalit kang saplaag nga kon nahadlok siya nga motahan sa Barili Police Station, mahimong moduol siya sa kaila niini nga police o sa provincial command aron mahatagan siya og proteksyon sa mga tawo nga nasuko na kaniya."Sa mga nakakita ug nakaila aning suspetsado kindly inform Barili or any stations aron matabangan ta sa pag-locate sa suspek although duna tay lead nga gitan-aw karon kon asa siya," matod ni Sucalit.

Government center sa Sugbo sugdan pagtukod ning tuiga Posted: 08 Jul 2022 08:04 AM PDT Gitinguha ni Cebu Governor Gwendolyn Garcia nga masugdan na karong tuiga ang proposed Cebu Provincial Government Center (CPGC).Sa kasamtangan nagpadayon ang negosasyon sa Kagamhanan sa Probinsya tali sa mga nanag-iya sa mga luna sa lungsod sa Balamban nga gi-identify niining mahimo nga kabalhinan sa seat of government sa Probinsya.Si Garcia nagkanayon nga pasiunang P200 milyunes nga pundo ang gigahin ni Senador Bong Go alang sa inisyal nga site development."Sa pagkakaron, naghangyo pa tas presyo sa yuta nga maubos kay kon mopalit na ta ana mosaka na pud ang presyo. So we are trying to... naay mga 16 hectares nga gi-offer at a certain price and I said hangyoa pa na, kon pwede katunga unya pun-i pa na og pila ka ektarya kay if makapalit na ta'g inisyal ana, mo zoom up gyud ang mga presyo. So, duna nay appraisal ang atong Provincial appraisal committee pero wa ko nisugot kay gitas-an ko. Akong gipakanaugan," matod ni Garcia.Ang Kapitolyo una nang nigahin og moabot P550 milyunes ubos sa proposed 2021 budget alang sa pagtukod sa edipisyo sa lungsod.Nahimutang ang lungsod sa sentro sa lalawigan, tuyo niini nga mas mapaduol ang mga serbisyo sa mga Sugboanon sa probinsya gikan sa habagatan ug amihanang bahin sa lalawigan,"I really want to build an entire government complex diha with area for the national government offices, pwede gani regional, pwede gani mamalhin sila didto. Unya housing para sa atong mga employees," matod ni Garcia.

Samsam mohatag og P50K sa makatudlo sa killer sa kanhi market administrator sa Tabunok Posted: 08 Jul 2022 08:01 AM PDT Kagamhanan sa Dakbayan sa Talisay mohatag og P50,000 cash reward sa makatudlo sa gitagoan sa nipusil-patay sa negosyante nga si Leonora Carlos niadtong Dominggo sa gabii, Hulyo 3, 2022, sa dan Rabaya, Barangay Tabunok, dakbayan sa Talisay.Ang biktima paingon na unta manirado sa iyang tindahan.Si Police Lieutenant Colonel Randy Caballes, hepe sa Talisay City Police Station, niingon nga atol sa ilang meeting sa Miyerkules sa hapon, Hulyo 7, uban ni Talisay City Mayor Gerald Anthony "Samsam" Gullas, ilang gihisgotan ang imbestigasyon sa kaso.Dugang ni Caballes nga sa ilang tinguha nga mapaspasan ang kasulbaran sa kamatayon sa kanhi public market administrator, mohatag sila og ganti.Ang Talisay City Police duna nay tulo ka persons of interest nga gilakaw karon sa iyang mga sakop. Duna na usay nakuha nga kopya sa CCTV camera ang imbestigador sa kaso sa pagpatay kang Carlos."Naa usab ta lead ug mga valuable information sa suspek kon asa kini posibleng nag tago-tago ang suspek," matod ni Caballes.Samtang siya nipasabot sa rason kon nganong gibuhat sa mayor ang paghatag og reward ngadto na sa kinsa ang makatudlo sa gitagoan sa killer.Alang kang Caballes walay dautan sa gibuhat sa mayor. Alang kaniya nga nakita Gullas ang pag tabang sa panginahanglan lakip na ang dinaliang pagsulbad og dali sa krimen.Nasayran nga ang kabanay ni Carlos nibisita sa buhatan ni Caballes sa udto sa Huwebes, Hulyo 7, diin iyang gihatagan sa mga kalamboan sa imbestigasiyon.Ang kabanay ni Carlos wala na mohatag og higayon nga makahinabi ang mga sakop sa media.

Garcia mokuha ni Loreche isip hepe sa tanang ospital ubos sa lalawigan sa Sugbo Posted: 08 Jul 2022 08:00 AM PDT Gilaraw ni Cebu Governor Gwendolyn Garcia nga kuhaon ang chief pathologist sa Department of Health (DOH) nga si Dr. Mary Jean Loreche nga usa sa mga modumala sa tanang provincial ug district hospitals sa probinsya sa Sugbo.Plano ni Garcia nga maghimo og team nga modumala sa tanang provincial ug district hospitals sa Probinsya sa Sugbo aron maseguro nga maayo ang mga serbisyo nga madawat sa matag Sugbuanon sa probinsya."Hopefully Dr. Loreche will be heading the team probably I might ask her to come in as hospital administrator, the provincial and district hospital administrator," matod ni Garcia kagahapon, Hulyo 8, 2022.Dili hinuon mag-inusara si Loreche sanglit duna kini makuyog nga duha ka mga sakop sa grupo aron motuon sa operasyon sa 16 ka provincial ug district hospitals sa Probinsya sa Sugbo."Focus on the administration aspect of running these hospitals. It's no joke really, from as I've said ang procument daan taas na gud na nga process. So to see to it nga this is also run efficiently nga walay waste of resources, kana laging culture of excellence sa atong mga medical workers nga kana bang ayohon og tratar hilabina ang mga pobre nga mosulod, they deserve really good service and courtesy and tanan," matod ni Garcia.Sa kasamtangan, usa si Loreche sa mga consultant sa Kapitolyo ilabi na sa health services sa probinsya.Gikuha usab siya ni Cebu City Mayor Michael Rama nga motabang sa operasyon sa Cebu City Medical Center."I talked to her. And she informed me nga wala siya nidayon sa CCMC," matod ni Garcia.Si Loreche nagkanayon nga maghulat siya sa ilang tigom ni Garcia aron hisgotan ang maong offer.Matod ni Garcia nga nipadayag si Loreche sa kaandam nga mo-assist sa Probinsya sa Sugbo.Tuyo ni Garcia nga mahapsay ang operasyon sa mga tambalanan hilabina nga lain lain ang kapasidad sa matag hospital ug dunay limit sa kon pila lang ka mga doktor ang mabutang subay sa balaod."Ang occupancy lain lain ug ang personnel gyud. it's a 10-bed mao ra ni allowed nga number. Ang personnel diha mao ra ni.....So i know that feeling nga wala na kay madaganan nya mao ranang ospitala. So we will try our very best gyud to upgrade our services nga i-upgrade ang services," matod ni Garcia sa mga tigbalita. /

Covid-19 pandemic response magpadayon Posted: 08 Jul 2022 07:59 AM PDT Ang Department of Health (DOH) nipasalig sa publiko sa Lunes, Hulyo 4, 2022, nga ang tanang mga serbisyo ug mga kalihokan sa departamento magpadayon lakip sa Covid-19 response efforts.Kini ilang gipasalig human si Presidente Ferdinand "Bongbong" Marcos Jr. motudlo pa og bag-ong DOH secretary ug wala pa niya gibutyag hangtod sa Martes, Hulyo 5 atol sa pagkutlo ning taho.Sumala ni Press Secretary Trixie Cruz-Angeles, ang Presidente naghashas pa sa iyang itudlo nga kalihim tali sa mga kandidato sa pwesto.Matod ni Angelez, niadtong Lunes, pending ang appointment sa bag-ong DOH secretary, apan ang tanang operasyon lakip sa policies ug guidelines sa DOH bahin sa Covid-19 response, naa sa status quo.Si DOH Undersecretary Lilibeth David, atol sa iyang mensahe sa unang flag raising ceremony ubos sa administrasyon ni Marcos, nipasalig sa publiko ug staff sa health department nga ang tanang mga serbisyo ug paningkamot sa ahensiya magpadayon."We eagerly await the announcement of the name of the new secretary of Health. We look forward to working with our new secretary on delivering services that promote the people's health," matod niya.Ang DOH nagpadayon sa pandemic response ug ubang mga operasyon ubos sa liderato sa iyang senior career officials.Si David nangulo sa DOH Health Policy and Systems Development Team and Health Facilities and Infrastructure Development Team, uban ni Assistant Secretary Kenneth Ronquillo."The DOH continues to serve our people, delivering the best, and further developing programs and policies for a better and Healthy Pilipinas. Whoever becomes our new secretary, our commitment to cater to the health needs of every Juan and Juana will be upheld," dugang niya. (SunStar Philippines, PR)

480 ka barangay sa Sugbo gideklarar nga drug-cleared Posted: 08 Jul 2022 07:56 AM PDT Moabot na sa 480 ka mga barangay sa probinsya sa Sugbo ang gideklarar nga drug-cleared sa Regional Oversight Committee on Barangay Drug Clearing Program (ROCBDC) human laing 11 ka mga dapit ang gideklarar niadtong Huwebes.Ang mga barangay nga gideklarar nga drug-cleared mao ang Hagdan ug Kinatarkan, island barangays sa lungsod sa Santa Fe; Maya sa Daanbantayan; Barangay Poblacion sa Medellin; Cantobaon ug Tigbawan sa Tabuelan; Lamac ug Sacsac sa Consolacion; Masa ug Kang-aktol sa Dumanjug samtang sa dakbayan sa Carcar, dunay labing una nga barangay ang na drug cleared nga mao ang Calidngan.Matod ni Police Lieutenant Colonel Mark Gifter Sucalit, deputy provincial director for operations sa Cebu Police Provincial Office (CCPO), nga sa ilang datus, niabot na og 480 ka mga barangay lukop probinsya sa Sugbo ang drug-cleared na ug duna na lay kapin sa 500 ang posibling sunod nga ipaubos sa ilang proseso."Yun ang effort ng Cebu Police Provincial Office na paigtingin ang barangay drug clearing and at the same time while we do this program, we will support the program of the PDEA we will also be relentless sa atoang operation against illegal drugs," matod ni Sucalit.Si Police Lieutenant Colonel Leo Ty, hepe sa Police Community Relationa sa CPPO nagkanayon nga ang drug personalities sa maong mga barangay pulos na napaubos sa community-based rehabilitation program (CBRP) sa barangay.Kon matapos sila sa maong programa, kinahanglan nga matag karon ug unya ipaubos sila sa kinalit nga drug test aron maseguro nga wala na sila mobalik sa paggamit sa illegal nga drugas.Giangkon niya nga lisud ang pagkab-ot sa status nga drug cleared barangay ilabi na kadtong seriously affected sa illegal nga drugas sanglit naa na kini mga drug pusher, drug den ug daghang drug users sa dapit.Apan bisan pa man niini, gitinguha nila nga madugangan pa ang mga barangay nga ma cleared pinaagi sa pagpaningkamot sa mga opisyal niini.Si Leia Alcantara, information officer sa PDEA 7, nitug-an nga moabot sa 114 ka mga barangay sa tibuok Central Visayas ang nadeklarar nga drug-cleared niadtong Huwebes, Hulyo 7, 2022.Ang labing daghan nga barangay nga na drug-cleared mao ang lalawigan sa Bohol nga adunay 97, lima sa Negros Oriental samtang usa sa dakbayan sa Lapu-Lapu.

Binghay: Likay sa ‘online scam’ Posted: 08 Jul 2022 07:53 AM PDT Di na maihap ang akong mga kaila nga nanga-biktima ining pagpangilad 'online' kun 'online scam'. Gani usa ini nila nga nagrabihan diriyot maghikog kay nahurot gayod iyang hinaguan ug hinipusan human nailad sa tam-is nga dila sa namaligya nga iyang nailaila online.Tungod ini, naingganyo ko pagsuwat ining lindog aron madiparahan ug makalikayan dayon ang pagpangilad samtang sayo pa.Una, ayaw dayon pagtuo kon naay mang-ingganyo sa pagbutang og puhunan para negosyo nga daling mopadubli o tripli sa kita kay layo ra ni sa tinuod nga mahitabo gawas kung makadaog ka og sweepstakes o lotto unya ma instant milyonaryo.Kasagaran ini, para ka madani, magpakita kunuhay og pinaypay nga kwarta o pitaka nga nag-awas-awas ang sulod sa kadako sa kita.Way kumo kon magkuti-kuti og pakisusi una motuo o mohatag og pagsalig.I background check ang record sa iyang nangaging mga transaksyon lakip ang iyang rehistro sa SEC (Securities and Exchange Commission) o business permit gikan sa lokal nga kagamhanan.Importante sab ang track record ug kredibilidad sa iyang mga negosyante . Mahibaw-an nimo nga binuang o di tinuod kay dali man kining makaipsot sa estorya kon makadipara nga duna kay kahibalo.Sunod, ayaw pagderitso og pirma og mga dokumento kon wa ka kasabot kay sa iningles pa 'ignorance of the law excuses no one' busa hinayhinay. Way komo kon mangutana sa dunay kahibalo sa natad sa negosyo.Kon makigkita o makig-atubang sa personal, ikaw dapat ang magbuot kon asa mo magkita unya seguraduha gayod nga luwas ang lugar. Mas maayo kon makadala ka og kauban nga mahimo nimong witness kon magkinaunsa.Kon magkasinabot na, pangayo og resibo inig bayad isip ebidensiya o dokumento sama sa kontrata, memorandum of agreement o terms of reference nga mahimo ninyong kinuptanan kon magkinaunsa. Mas maayo kon kini manotaryohan.Katapusan, tawag o sang-at dayon sa reklamo sa mga awtoridad sama sa PNP Anti-cyber Crime Group: 0915-589-8506.

Editoryal: Lungsod himuong siyudad Posted: 08 Jul 2022 07:52 AM PDT Upat na ka mga lungsod sa lalawigan sa Sugbo ang buot himuong siyudad sa hingtungdang lokal nga mga opisyal. Kini maghatod unya sa 13 na ka mga dakbayan sa Sugbo kon molusot ang ilang pagpaningkamot nga balaudnon sa Ubos Balay-Balauranan, Senado ug pinal nga pagsanong sa Presidente.Highly urbanized cities mao ang dakbayan sa Sugbo, Lapu-Lapu ug Mandaue. Ubang dakbayan sa lalawigan mao ang Talisay, Toledo, Naga ug Carcar sa habagatan ug Danao ug Bogo sa aminahan.Si Kongresista Pablo John (PJ) Garcia sa ika-3 nga distrito sa Sugbo nipadayag nga usa sa iyang prayoridad sa 19th Congress mao ang paghimong siyudad sa lungsod sa Balamban, diin naila sa kalibotan tungod sa mga dagkong kompaniya sa ship building nga nagbase sa maong dapit nga nihatag og liboan ka trababaho ug nipatuyok sa ekonomiya sa lungsod.Bag-ong nanumpa nga si Mayor Rajiv Enad sa Minglanilla nibutyag nga prayoridad sa iyang administrasyon mao ang paghimo nga siyudad sa ilang lungsod, gawas sa pagtukod og bag-ong municipal hall ug pagtapos sa 100-hectare reclamation project. Gisaysay niya kini sa iyang inaugural address sa town plaza niadtong Hunyo 30, 2022.Ang bag-ong representante sa sixto distrito nga si Kong. Daphne Lagon nagkanayon nga iyang ipadayon ang cityhood sa Consolacion. Samtang, si Kong. Vincent Franco "Duke" Frasco sa Kinto sa Distrito nipasaka na sa House Bill No. 5031 alang sa cityhood sa 18th Congress ug nagpaabot na sa pag-uyon sa Kongreso.Dkong garbo ang pagka siyudad sa usa ka lungsod. Timailhan kini sa kalamboan. Mosaka ang Internal Revenue Allotment (IRA) nga magamit sa dugang proyekto ug serbisyo. Maayo usab kini sa mga opisyal kay ubanan sa dakong pagtaas sa ilang suweldo.Paet ang sitwasyon sa yanong lumolupyo, dungan sa pagka siyudad, mosaka ang buluhisan sa negosyo, yuta ug ubang transakiyon sa kagamhanan. Maayo kaha ang paghimong siyudad?

Tambagi ko Noy Kulas: Nagpailang anak Posted: 08 Jul 2022 07:44 AM PDT Dear Noy Kulas,Ako diay si Fred, biyudo na for five years. Naa koy duha ka mga anak nga puro na nagwork. Nagtrabaho pa sab ko kay 51 years old pa man ko.Kaniadto siaw kaayo ko sa mga babaye kay lumponglumpungon nako sa pagpanguyab ug biyaan kon pul-an na ko. In short, daghan na kog napasakitan. Kani laging batan-on pa ta unya nag part-time nga musician. Sa mga gig, daghan ang maila-ila ug magkiligkilig nga chicks nako ug diskartehan dayon.Usahay naa pay one night stand kon makasugat og babaye nga mosukol dayon og tagay sa kalipay. Di na maihap ang mga babaye nga akong nadimdim ang katam-is.Karon, naay batan-ong babaye nga niduaw sa akong gitrabahoan. Nipaila siya nga akong anak kay maoy sulti sa iyang inahan nga namatay last year. Ambot naglisod ko og tuo kay bisan gamay, wa may luksong dugo. Unsa man, akoa ning ilhon nga akong anak nga bisan sa picture wa na ko kahinumdom sa nawong sa iyang mama kon niagi sa akong mga kamot? Ang akong duha ka mga anak wa pa nakahibawo ani.Please i-guide ko sa akong buhaton.FREDFred,Mahimo man nga di nimo angkunon nga ikaw ang amahan kay mahimo ra sab nga ikaw ang gitudlo, yet, lain diay nga lalaki ang nakapaangkan. Naa na man gani cases nga nagtuo ang bana nga siya ang amahan sa kamaguwangan nga anak, apan lain diay nga lalaki.Kon nagduha-duha ka, mas maayong ilhon ang pagkatawo anang bayhana, pamilya nga nadak-an aron imong masubay kon duna ka bay encounter sa iyang inahan.Masubay man na nimo ang estorya kon tinuod bang usa sa imong nakadulog mao ang iyang inahan. Kon di ka ganahan sa iyang gisulti, ipa DNA test aron masuta kon tinuod ba nga ikaw ang papa.But be honest pud, sultihi ang imong duha ka mga anak parte ana nga development.NOY KULASrojval69@yahoo.com

Super Busog: Pinoy Menudo Posted: 08 Jul 2022 07:27 AM PDT Mga Sagol:Set A:1 1/2 kgs. pork kasim, gihiwag cubed1/4 kg. pork liver, gihiwag cubed3 pcs. chicken liver, grilled4 kutsara sa soy sauce1 ka kutsara sa calamansi juiceSet B:Mantika, alang sa pag-fry2 pcs. nga carrots, gihiwag cubed2 pcs. sa patatas, gihiwag cubedSet C:Mantika, panggisal4 ka lusok sa ahos, gihiwa og gagmay2 ka buok sibuyas bombay, gihiwa2 ka kutsara sa fish sauce3 ka buok bay leaves2 ka kutsara sa tomato paste1 ka tasa sa tomato sauceUnsay Buhaton:A. I-marinate ang pork kasim cubes ug pork liver sa soy sauce ug calamansi juice. Human sa 15 minutos, hauna ang atay gikan sa marinade, ug i-drain.B. Sa usa ka kaha, mantikai ang patatas ug carrots, hauna ug ipadaplin.C. Gisala ang ahos ug sibuyas bombay sa mantika. Isagol ang pork kasim ug lutoa hangtod mausab ang kolor sa karne. Idugang ang fish sauce, bay leaves, pork liver ug grilled chicken liver nga giproseso sa blender.D. Sagula og maayo. Isagol sa tomato paste, tomato sauce ug bell pepper. Unya idugang ang raisins, asukar, fried potatoes ug carrots.E. Isagol ang green peas kon ganahan ka. Templahi og asin ug pepper.Sunda ko sa akong social media accounts.Facebook: facebook.com/lutongsimpolYouTube: youtube.com/c/SimpolSimpolInstagram: @lutongsimpol

Beermen giagak ni Fajardo Posted: 08 Jul 2022 07:24 AM PDT Mga duwa karon:5:15 pm- NLEXbatok Rain or Shine7:15 pm- NorthPortbatok ConvergeNagbangis ang Sugboanong higante nga si JuneMar Fajardo ug nagpakatap kini og 30 puntos ug 16 rebounds aron ituboy ang San Miguel Beermen ngadto sa kadaugan batok sa TNT Tropang Giga, 115-99, niadtong Hulyo 7, 2022 sa gabii sa Philippine Basketball Association (PBA) Philippine Cup sa Smart Araneta Coliseum sa kaulohan.Sa kadaugan, nasolo og balik sa Beermen ang liderato dala ang 7-1 nga rekord nga nagpaduol kanila og samot sa top two spots nga nagtangag og twice-to-beat nga benepisyo sa quarter-finals.Kuyaw sab nga nakaduwa alang sa Beermen si Jericho Cruz, kinsa sama ni Fajardo, niamot sab og 30 puntos alang sa kadaugan.Tungod sa kapildehan sa mga kamot sa Beermen, ang Tropang Giga nabulasot ngadto sa ikaupat nga puwesto dala ang 7-3 nga rekord.Tungod niini, kuli na ang purohan sa Tropang Giga nga makasulod pa sa mahinungdanong top two spots.Ang Tropang Giga gipangulohan sa ilang mga beterano nga sila si Kelly Williams ug Jayson Castro.Nimugna og 20 puntos si Williams samtang nihatag og 17 puntos si Castro.Sa laing duwa, gipakaging sa Converge FiberXers ang NLEX Road Warriors, 112-108.Ang FiberXers ningsaka sa 3-5 nga rekord samtang ningkanaog sa 4-4 nga baraha ang Road Warriors.

Magsayo, Vargas nagbinaharay Posted: 08 Jul 2022 07:23 AM PDT Naglabayay og mahait nga mga pulong sila si Filipino Mark Magsayo ug Mexican Rey Vargas sa ilang panagtagbo sa pre-fight press conference kagahapon, Hulyo 8, 2022 (RP time), duha ka mga adlaw sa dili pa sila magsinumbagay.Si Magsayo modepensa sa iyang World Boxing Council (WBC) featherweight title batok kang Vargas karong Hulyo 10, 2022 sa Alamodome sa San Antonio, Texas.Bitbit ang 24-0, 16KOs nga rekord, si Magsayo nanghinaot nga dili modagandagan si Vargas aron mahatagan og katagbawan ang boxing fans nga naglaom nga mao kini ang mahitabo tungod kay parehong knockout artist ang duha ka mga protagonista."I hope Rey Vargas does not run too much so we can give a good fight to the people. I am not worried, I have beaten the best in my division so my confidence is high. You never fought a guy like me," matod ni Magsayo nga napatik sa www.fightnews.com.Gitubag kini ni Vargas pinaagi sa pagpabuhagay nga ang saktong binukbokay maoy iyang ampay."If you want to exchange blows I am more than happy to do it. I see it as a compliment that you added people to your team because it means you are taking me seriously and not just another opponent," batbat ni Vargas, kinsa adunay 35-0, 22KOs nga rekord. "I think that is an advantage because it means you are worried."Gipasalig ni Vargas nga dili niya lung-an si Magsayo ug iyaha kining kulatahon og maayo kutob sa iyang mahimo.Wala kini panumbalinga ni Magsayo ug nidugang ang lumad nga Boholano sa pag-ingon, "there would be only one left undefeated this Saturday (Domiggo sa Pilipinas), it is going to be me."

Pacquaio moaway og balik Posted: 08 Jul 2022 07:16 AM PDT Mobalik og away si Filipino boxing legend Manny Pacquiao karong Disyembre ning tuig 2022, hinuon sa usa ka exhibition bout.Si Pacquiao, kinsa niretiro niadtong Septiyembre, 2021, nakatakdang makigbatok kang DK Yoo, usa ka inilang YouTuber ug martial art instructor sa Korea.Mismong si Yoo ang nikompirmar ning maong impormasyon sa worldboxingnews.com."I have told you I'll fight against one of the best fighters in the world," matod ni Yoo."I tell you right now who my next opponent is. I'm going to fight against Manny Pacquiao."Sa usa ka video sa YouTube, gisuportahan ni Pacquiao ang gipamahayag ni Yoo pinaagi sa pag-ingon: "DK Yoo, see you in the special event this coming December. God bless you and be safe."Gipasabot ni Yoo nga daghan na nga natad sa combat sports ang iyang nasagubang diin naengkuwentro niya ang mga eksperto sa matag klase sa combat sport."I have experienced various types of martial arts, including boxing, Kung–Fu, Wushu, Judo, as well as track and field," pamahayag ni Yoo."The most important fact other than my experience in all types of martial arts is that I have met with the experts from each martial art. I have sparred with many people and have had combat experiences. These experiences and the research I have conducted led to what I am today."Human sa iyang wala damhang unanimous decision nga kapildihan batok kang Cuban Yordenis Ugas niadtong Agusto, 2021, ang Pambansang Kamao ng Pilipinas nakadesisyon nga moretiro sa professional boxing aron magtutok sa pulitika.Si Pacquiao, kinsa kasamtangang senador, milansar isip presidente sa Pilipinas niadtong eleksyon sa Mayo apan napakyas.

48 anyos nga lalaki gidunggab patay; plamingko nagtaup pa Posted: 07 Jul 2022 07:12 PM PDT Nagtaup pa sa lawas sa usa ka hamtong lalaki ang plamingko nga gigamit sa pagpatay kaniya pasado alas 5 sa Biyernes sa buntag, Hulyo 8, sa sityo Upper Anonang, Brgy. Madridejos, Alegria, Sugbo.Ang biktima giila nga si Sergio Jarpacio Jamero, 48, ulitawo, samtang ang suspek nga nasikop sa hot pursuit operation giilang si Anthony Timplado Estiban, 41, silingan.Matod ni Police Lieutenant Alexius Tangub nga nakadawat sila og tawag kalabot sa pagpanunggab sa nahisgutang dapit.Ilang naabtan si Jamero nga nagbuy-od daplin sa karsada nga patay na samtang nagtaup angplamingko sa wala nga kilid sa lawas.Nasayran nila ni Tangub gikan sa mga silingan nga sila si Jamero ug Estiban nagkalalis nianang Huwebes sa gabii.Sa ilang hot pursuit operation, ilang nasikop si Estiban mga alas 9:10 sa Biyernes sa buntag. (GPL)

You are subscribed to email updates from SUNSTAR. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States