https://www.sunstar.com.ph/ |
- Editoryal: Presyo sa lana ayaw ibasol sa gobyerno
- Nangilog og mike sa videoke, giatsa
- Dakong fuel price rollback ipatuman
- Mga LGU nangandam sa Pasigarbo sa Sugbo
- 2K ka kilo nga basura nakuha sa Mahiga Creek
- Dole 7 building sa Gorordo ave. temporaryong sirado
- P200M shabu nasakmit sud sa 2 ka semana
- 2 ka barangay sa Mandaue gihatagan og award, nominasyon gikan sa DENR
- P9.2M evacuation center sa Bantayan giturnover
- Lahugay sa PNP ipatuman
- 61 anyos nga mananagat sa Carmen gipusil-patay
- 7 ka mga balaudnon prayoridad ni Calderon nga iduso sa Kongreso
- Padilla: Divorce bill di pagbuak, kon di, panalipod sa pamilya
- Tubilan: Suholan sa mga magtutudlo pasakahan
- Tambagi ko Noy Kulas: Giilisan og biyudo
- DSWD 7 mitaho kang Sec. Tulfo bahin sa sitwasyon sa Region 7
- Spence masaligon madayon ang ilang away ni Crawford
- Nietes hinay ra og kumo: Ioka
- Gin Kings gilampornas sa Tropa
- Wiseman balik na sa pagduwa
- Cone mikawat og atensyon sa NBA Summer League
| Editoryal: Presyo sa lana ayaw ibasol sa gobyerno Posted: 11 Jul 2022 07:17 AM PDT Mimahal og maayo ang presyo sa mga produktong petrolyo sukad sa pagsugod sa 2022. Ning tuiga, niabot na og P42 ang pagsaka sa presyo matag litro sa diesel samtang P30 sa gasolina.Dako na kaayo ni og epekto sa nagkadaiyang mga industriya tungod kay tagsa ra man ang wa maggamit og fuel. Kon wa maggamit, nagsalig usab kini sa serbisyo sa mga kompaniya nga nagsalig usab sa fuel.Mahibung ka nga bisan ang palaliton nga batakan mimahal. Kini tungod sa transportasiyon nga gisaligan sa paglihok niini kada adlaw. Adto kini ipatong sa presyo sa produkto hinungdan nga momahal ang palaliton.Ang Pilipinas nag-import sa mga produktong petrolyo. Kay misaka man ang presyo sa lana sa world market, natural nga mopasaka usab sila sa presyo sa produktong petrolyo sa Pilipinas.Bisan gani ang Estados Unidos nga labing dako ug labing adunahan nga nasod sa kalibutan apektado sa presyo sa produktong petrolyo. Samot na ang gagmay nga mga nasod sama sa Pilipinas.Ang nakapakomplikado pa sa sitwasyon mao ang dollar-peso exchange rate. Huyang ang peso batok dolyar, mas dako nga kantidad ang magasto sa pagpalit sa lana sa Pilipinas. Sa ato pa, momahal usab ang baligya dinhi.Busa di maayo nga ibasol na lang ang tanan ngadto sa kagamhanan ang pagsaka sa presyo sa lana kay di kini kontrolado sa gobyerno. Ang tanan nagdepende sa dagan sa world market.Di maayong itandi ang nangaging administrasyon karon ug sa nangagi kay di man kini tungod sa kapakyas sa kagamhanan.Ang mahimo sa gobiyerno mao lang ang pagpaminos sa impact ngadto sa yanong mga tawo sama sa libreng sakay, fuel subsidy ug uban pang mga lakang.Kay bisan unsaon pa, ang presyo sa produktong petrolyo di kontrolado sa gobyerno. Gadiktar niini mao ang world market. |
| Nangilog og mike sa videoke, giatsa Posted: 11 Jul 2022 07:07 AM PDT Samdan ang usa ka construction worker human gihapsan og atsa ang ulo ug abaga sa iyang silingan tungod sa giingong kanunay nga pagpangilog og microphone atol sa videoke sa usa ka birthday party sa Purok 2, Sitio Bayong, Barangay Cadulawan, lungsod sa Minglanilla, alas 7:20 sa gabii sa Dominggo, Hulyo 10, 2022.Si Romel Alcansado Cansana, 32, ulitawo, construction worker, lumolupyo sa nahisgutang lugar, samdan sa walang bahin sa agtang ug abaga.Ang suspek giilang mao si Joseph Cuda Espinosa, 35, alyas 'Kasag', drayber sa habalhabal, kapuyo sa ig-agaw sa biktima. Si Espinosa nasikop sa follow-up operation sa kapulisan.Si Cansana nisaysay sa kapulisan nga niuwang siya sa ilang uyoan nga si Eugenio Alcansado ug Espinosa nga nagkalalis tungod sa microphone.Dugang ni Cansana nga si Espinosa nipauli apan nibalik nga dala na ang atsa ug gihapsan si Alcansado, apan wala kini naigo ug nakadagan.Kay nakadagan ang iyang uyoan, siya maoy gipahimungtan ni Espinosa, giatsa ang iyang abaga ug agtang.GIKULATA?Apan ang suspek nga nahinabi sa Superbalita Cebu nialegar nga gitabangan siya pagkulata nila ni Alcansado ug Cansana, kinsa ig-agaw sa iyang kapuyo.Gibutyag niya nga nitambong siya sa birthday sa iyang ig-agaw nga si Mario Cuda, 37, drayber sa habalhabal, nagpuyo sa naasoy nga dapit.Nagtagay sila og ilimnong makahubog ug nag-videoke. Matod ni Espinosa nga taliwala sa ilang kasadya, nagmaoy sa kahubog si Alcansado.Nagpabadlong kini human usa sa mga bisita iyang gihan-an og sumbag samtang nalingaw og videoke."Samukan kaayo ni sila. Mangilog og microphone sa bisita. Nindot kaayog kanta nga 'Bakit Ba' sa Cueshé, ganahan kaayo ko maminaw apan ilang barawon," dugang sa suspek.Matod ni Espinosa nauwaw siya kay sila si Cansana ug Alcansado dili mopatuo, nangilog gihapon sa microphone hinungdan sa ilang panaglalis. Nahitabo ang karambola nga nakabungkag sa party.Nialegar ang suspek nga nabun-og siya human gitabangan sa pagkulata nila ni Cansana ug uyoan niini. Mao kini hinungdan nga niuli siya sa ilang balay aron pagkuha og atsa ug nibalik, dayon niataki sa duha.Si Police Staff Sgt. Allan Villasorda sa Minglanilla Police Station nga nahinabi sa Superbalita Cebu nagkanayon nga giandam na nila ang kasong attempted murder batok kang Espinosa. |
| Dakong fuel price rollback ipatuman Posted: 11 Jul 2022 07:07 AM PDT Maayong balita alang sa mga motorista.Ang pump prices gipaabot nga dunay pag-ubos ngadto sa dili mominus P5 matag litro, sumala sa pagbana-bana sa mga dagkong kompaniya sa industriya.Sa ilang fuel forecast alang sa Hulyo 12 ngadto sa 18, 2022, ang Unioil Philippines nagkanayon nga ang diesel gipaabot nga moubos og P5.90 ngadto sa P6 matag litro.Ang gasolina gibana-bana nga moubos og P5.50 ngadto sa P5.70 matag litro.Samtang, ang Department of Energy (DOE) nikompirmar nga dunay big-time price rollback sa tanang fuel products ning semanaha.Ang mga kompaniya sa lana sagad mopahibawo sa price adjustments matag Lunes, apan mapatuman kini sa sunod adlaw (posible karon, Hulyo 12 apan wa pay kompirmasyon atol ning pagsuwat).Kahinumdoman, niadtong Martes, Hulyo 5, ang mga kompaniya sa lana nipatuman sa price reduction sa diesel og P3 matag litro, apan wala nilihok ang presyo sa gasolina.Ug kini nihatod sa year-to-date adjustments ngadto sa net increase nga P42.90 matag litro sa diesel ug P30 matag litro sa gasolina. (SunStar Philippines) |
| Mga LGU nangandam sa Pasigarbo sa Sugbo Posted: 11 Jul 2022 07:07 AM PDT Nagsugod na sa pagpangandam ug pag-recruit og dancers ang pipila ka mga lungsod sa Probinsya sa Sugbo alang sa mga contingent sa Pasigarbo sa Sugbo 2022.Ang lungsod sa Samboan nianunsyo nga nanginahanglan ang lungsod og dancers ug propsmen aron morepresentar sa lokal nga Dagayday Festival.Subay niini, giawhag ang mga karaan nga propsmen ug dancers sa Pasigarbo sa Sugbo 2019 nga moapil og balik sa maong kalihukan.Si Barili Mayor John-John Garcia nianunsyo usab sa mga gusto moapil isip mananayaw sa Panumod Festival. Niadtong Hulyo 10-11, nipahigayon na sa pasiunang screening ang LGU alang sa mga dancer sa RVA Sports Complex.Samtang ang lungsod sa Alegria nipahigayon na usab og screening sa mga gusto nga mahimong dancers alang sa Kawayan Festival sa lungsod.Ang screening nagsugod niadto pang Hulyo 8 hangtod Hulyo 10 sa Barangay Poblacion, Legaspi, Madridejos ug Sta. Filomeno.Gawas sa maong mga lungsod, gisugdan na usab sa dakbayan sa Naga nga mopasundayag sa Dagitab Festival. Nangita na usab sila og Festival Queen.Nasayran nga moabot sa 50 ka mga LGU ang moapil sa Pasigarbo sa Sugbo karong tuiga. |
| 2K ka kilo nga basura nakuha sa Mahiga Creek Posted: 11 Jul 2022 07:03 AM PDT Dili mominos duha ka tonilada nga basura, ug dul-an sa 56 kilos niini ang recyclable polyethylene terephthalate (PET) bottles, ang nakuha sa clean-up drive sa Mahiga Creek sa habig sa Barangay Subangkadaku, dakbayan sa Mandaue niadtong Sabado, Hulyo 9, 2022.Ang usa ka tonelada katugbang sa 1,000 ka kilo.Ang mga basura nagbara sa sapa dihang naanod sa pagbaha atol sa pagbundak sa kusog nga uwan sa Metro Cebu niadtong Biyernes, Hulyo 8, 2022.Sa Dominggo, Hulyo 10, si Ernie Manatad, pangulo sa Barangay Subangdaku, nisaysay sa SunStar Cebu nga mohimo sila og clean-up drive sa Mahiga River matag weekend.Si Manatad nibutyag nga sagad usa ngadto sa tulo ka dump trucks nga puno sa basura, katugbang sa unom ka tonilada nga basura ug dul-an sa 50 ngadto sa 150 kilos sa recyclables ang ilang makuha sa sapa matag semana.Sa sayo pa, si Mandaue City Mayor Jonas Cortes nipadayag sa iyang inaugural address nga usa sa iyang top priorities sa bag-ong termino mao ang rehabilitasyon sa Mahiga Creek ug Butuanon River.Ang Mahiga Creek giila nga major flood contributor usab sa dakbayan sa Sugbo ug Mandaue.Ang rehabilitasyon niini pangulohan sa City Planning ug Chamber of Commerce and Industry Development Office nga molungtad sa 2015.Alang sa Mahiga Creek, si Cortes nagkanayon nga ang Mandaue City government mopadayon sa pag-establisar sa usa ka water waste drainage system nga gitumong sa pagwala sa basura gikan sa bukirang dapit ug kapatagan sa dakbayan nga nakaapekto sa agos o bul-og sa tubig sa suba ug sapa.Matod niya, iyang ibalhin ang mga nagpuyo duol sa suba o sapa, giila nga danger zones, ngadto sa mas luwas nga dapit ug mapanalipdan sab ang suba ug sapa.Dugang ni Cortes, makig-alayon siya kang Cebu City Mayor Michael "Mike" Rama sa paglimpiyo ug pagpalambo sa Mahiga Creek nga kabahin sa utlanan sa duha ka mga dakbayan."I had always advocated for environmental sustainability. We in Mandaue City remain firm with our commitment to rehabilitate our rivers. Remember that the key to resiliency is our mindset," matod ni Cortes. |
| Dole 7 building sa Gorordo ave. temporaryong sirado Posted: 11 Jul 2022 07:03 AM PDT Temporaryong gitak-opan ang edipisyo sa Department of Labor and Employment (Dole) 7 ug ubang ahensiya sa gobyerno nga nag-okupar niini sugod kagahapon, Hulyo 11, 2022.Ang Overseas Workers Welfare Administration (Owwa) office nga usa sa nag-okupar sa edipisyo nasunog niadtong Sabado, Hulyo 9, nga nakaapekto sa ubang mga buhatan.Gibana-bana nga tulo ngadto sa lima ka adlaw ang pagsirado sa Dole 7 building nga nahimutang sa eskina dalan Gorordo ug Gen. Maxilom Ave. sa dakbayan sa Sugbo.Lakip sa mga attached agencies nga sirado mao ang Philippine Overseas Employment Administration (POEA), Owwa, National Labor Relations Commission (NLRC) 7th Dvision, National Conciliation and Mediation Board (NCMB), Regional Tripartite Wages and Productivity Board (RTWPB) ug Occupational Safety and Health Commission (OSHC).Ang Dole ug attached agenies ningpatuman sa work-from-home ug skeletal force aron pagpadayon sa serbisyo sa publiko.Sa official press statement gikan sa Dole 7 nga gipangulohan ni Officer-In-Charge Lilia Estillore nga padayon gihapon ang ilang serbisyo apan sa limitado nga paagi sanglit aduna silay make-shift office nga gihimo sa parking lot sa maong buhatan."This is to ensure the safety not only of the concemed offices' officials and employees but also of their respective customers and stakeholders," tipik sa pamahayag sa Dole-7.Ang nahisgutang mga opisina nga nag-okupar sa Dole 7 building, adunay gidestino nga mga personnel sa ilang social media pages ug motubag sa mga pangutana sa publiko samtang sirado pa ang ilang opisina tungod sa pagsusi sa kaluwasan niini. |
| P200M shabu nasakmit sud sa 2 ka semana Posted: 11 Jul 2022 05:02 AM PDT Sulod lang sa duha ka mga semana, ang Police Regional Office (PRO) 7 nakasakmit og kapin sa P200 milyunes nga balor sa gituohang shabu, timaan sa kalamposan sa ilang kampanya.Sa miaging semana lang, ang PRO 7 nakasakmit og kapin sa P100 million nga balor sa illegal nga drugas sa usa ka adlaw nga Simultaneous Anti-Criminality and Law Enforcement Operation (Sacleo).Labing daghan niini nakuha sa Lapu-Lapu City Police Office (LCPO) nga nakasakmit atol sa buy-bust og 15 ka kilo sa gituohang shabu balor og P102 milyunes base sa street drug price (SDP).Ang nakuhaan mao ang usa ka babayeng kanhi Overseas Filipino Worker (OFW).Niadtong Hunyo 25, 2022, laing 15 ka kilo sa gituohang shabu nasakmit usab sa LCPO gikan sa duha ka mga lalaki atol sa buy-bust.Nagsugod ang ilang operation sa Hulyo 9, 2022 sa alas 12:01 sa kaadlawon ug natapos sa Hulyo 10, 2022 sa susamang oras.Sa data nga gipagawas sa PRO 7, nakalusad sila og 165 ka anti illegal drug operations nga niresulta sa pagkasikop sa 199 ka drug personalities nga gikonsiderar nga high value individual.Kapin sa 16 kilos sa gituohang shabu ang ilang nakuha sa tibuok nga operation nga mobalor ang tanan og P111.4 milyunes.Nakasikop usab silag 266 ka tawo sa kaso sa illegal nga sugal diin nakasakmit sila og 204 ka gambling paraphernalia ug cash nga P20,812.Sa kampanya batok sa loose firearms, nakasakmit sila og 221 ka mga armas nga walay lisensya nga niresulta usab sa pagka sikop sa 22 ka mga tawo atol sa 134 ka operations.Matod ni Police Lieutenant Colonel Mary Crystal Peralta, tigpamababa ni Police Brigadier General Roque Eduardo Vega, ang daghang drugas nga nasakmit sa kapulisan sa Central Visayas tungod kini sa ilang walay hunong nga kampanya ug gipanghingusgan pa sa kapulisan."Actually ito po ay pina aigting pa natin ito sa pamamagitan ng ating intelligence operations sa ating pakikipag coordinate sa ating PDEA at sa lower units na kung saan maganda po ang epekto nito na ibig sabihin po malaki po ang tulong nito sa ating komunidad. Kung hindi dahil sa kanila ay hindi natin ito magagawa," matod ni Peralta.Sa nakuha nga impormasyon sa kapulisan, sigun ni Peralta nga ang daghang gidudahang shabu sa Lapu-Lapu City imported gikan sa China agi sa kaulohan base sa packaging niini nga mao Chinese tea bag.Wala silay impormasyon nga gihimo dinhi sa Sugbo ang shabu sanglit ang tanang nasakmit nila nga supply itudlo man ang kaulohan nga maoy tinubdan."Usually sa mga ganyang Chinese tea bag ito po yung tinatawag natin na tea bag with Chinese character o Guanyinwang. Ito po ay imported, pag mga ganito po kasi ito ay galing ng China," dugang ni Peralta.Atol sa flag raising ceremony sa Camp Crame, gidasig ni Department of the Interior and Local Government (DILG) Secretary Benhur Abalos ang kapulisan sa tibuok Pilipinas nga ipadayon ang gubat batok sa illegal nga drugas.Nakita nila ang kamahinungdanon sa kampanya batok sa illegal nga drugas sanglit usa kini sa mga hinungdan sa krimen busa angay hatagan og igong pagtagad. |
| 2 ka barangay sa Mandaue gihatagan og award, nominasyon gikan sa DENR Posted: 11 Jul 2022 05:02 AM PDT Duha ka mga barangay sa dakbayan sa Mandaue nakadawat og pasidungog gikan sa Department of Environment and Natural Resources (DENR) tungod sa ilang nature-conserving projects.Ang Barangay Tabok giila nga Best LGU (Local Government Unit) in Adopt-A-Waterbody program, samtang ang Barangay Subangdaku nominado isip Best in Solid Waste Management atol sa 7th Gawad Tugas Awards sa DENR Central Visayas niadtong Hulyo 4, 2022.Ang Gawad Tugas Awards maoy pag-ila sa programa nga gipangulohan sa DENR alang sa LGUs, ug mga organisasyong pribado o publiko nga nihimo og kausaban ug nagpakita sa pagkamamugnaon sa pagpanalipod sa kalikupan.Si Barangay Kapitan Dario S. Tarriman sa Barangay Tabok ug Barangay Kapitan Ernie Manatad sa Barangay Subangdaku parehong ningpadayag sa pagpasalamat sa pag-ila nga nadawat.Sa pakighinabi sa SunStar Cebu sa Dominggo, Hulyo 10, si Tarriman nagkanayon nga ang DENR award naghatag kaniya ug sa iyang gisakpan sa dugang kadasig alang sa pagpahiuli sa tubig sa Butuanon River ug dugang paglihok alang sa pagpanalipod sa kalikupan.Matod niya, kini ang ikaduhang higayon nga ang Barangay Tabok nakadawat og pasidungog gikan sa DENR Central Office sa Manila.Pipila sa ilang mga programa naglakip sa regular clean-up drive sa Butuanon River matag unang Dominggo sa buwan ug ang paglabay sa 'bokashi balls' sa suba nga gitudlo kanila sa DENR uban sa pag-abag sa private partners.Ang bokashi ball, naila usab nga 'mabuhay ball,' usa ka Japanese rehabilitation technology nga ginama sa organic materials, sama sa garden soil, molasses, ug rice hull o uhay. Kini epektibo isip microorganism solution sa pag-break down sa toxins ug kaunon ang bad bacteria sa tubig.Si Tarriman mapasigarbuhon nga tungod sa ilang mga programa, ang Butuanon River hinayhinay nga mibalik sa pagkabuhi."There are times we do not get any garbage from the river anymore during our clean-ups. Nowadays, the garbage we collect from Butuanon is usually natural waste from the mountainous areas covered by the river," matod ni Tarriman.Si Manatad nagkanayon nga ang nominasyon sa Barangay Subangdako maoy dugang kridito nga sila naghimo sa insakotng pamaagi sa pagmintinar sa kalimpiyo sa pagpanalipod sa kalikupan."Somehow, the impact of this nomination is just like an affirmation that we are doing things right. Hopefully, it will also give a model perspectives for other barangays to follow," matod ni Manatad. |
| P9.2M evacuation center sa Bantayan giturnover Posted: 11 Jul 2022 05:01 AM PDT Gi-turnover na sa Department of the Interior and Local Government (DILG) Cebu Province ang P9.2 million evacuation center nga dunay storage area alang sa food packs sa lungsod sa Bantayan, mga isla sa Bantayan.Ang evacuation center napabarog pinaagi sa assistance sa lungsod."Through the Department's 2020 Assistance to Municipalities, the evacuation center features amenities and facilities like storage room, kitchen and mess hall, separate female and male comfort rooms, bunk beds, among others," saysay sa LGU Bantayan pinaagi sa Facebook page.Subay niini, gipasidunggan ni Atty. Ian Kenneth Lucero si Bantayan Mayor Arthur Despi ug ubang mga opisyal sa pagkahuman sa center.Gikonsiderar sa kagamhanan nga dako og tabang ang maong pasilidad ilabi na kon masinati ang kalamidad sama sa bagyo ug uban pa. |
| Posted: 11 Jul 2022 04:59 AM PDT Mga regional director sa kapulisan tibuok Pilipinas uban sa Area Police Command (APC) commanders gipatawag sa Camp Crame alang sa command conference uban sa Department of the Interior and Local Government (DILG) secretary, lahugay sa tanang taas nga mga posisyon sa kapulisan gipaabot.Lakip sa nitambong sa conference si Police Brigadier General Roque Eduardo Vega, hepe sa kapulisan sa Central Visayas.Wala gibutyag kon unsay agenda sa command conference apan usa sa kasaligang tinubdan sa Camp Crame nagkanayon nga posibling adunay ilusad nga lapad nga lahugay sa PNP organization.Karong semanaha usab, matod pa, motudlo si President Fedinand Bongbong Marcos Jr. og bag-ong mangulo sa kapulisan.Unang nigawas ang mga ngalan sa pito ka mga heneral, usa niini ang kasamtangan nga kontrobersyal nga officer-in-charge sa PNP nga si Police Lieutenant General Vicente Danao Jr. nga taga Davao, Lieutenant General Rhodel Sermonia, Lt. Gen. Rodolfo Azurin Jr. nga kababayan sa presidente, Major General Valeriano de Leon, directorate for operations ug kanhi hepe sa PRO 7, Maj. Gen. Felipe Natividad kanhi hepe sa kapulisan sa lalawigan sa Bohol apan kasamtangan nga hepe sa NCPO, Maj. Gen. Eliseo Cruz sa Criminal Investigation and Detection Group (CIDG) ug Brigadier General Benjamin Acorda Jr., hepe sa Police Regional Office (PRO) 10.Matod ni Police Lieutenant Colonel Mary Crystal Peralta nga dili pa mahibaw-an kon adunay ipatuman nga lahugay apan gipaabot nila ang anunsyo sa ilang ulohang buhatan. |
| 61 anyos nga mananagat sa Carmen gipusil-patay Posted: 11 Jul 2022 04:58 AM PDT Patay ang usa ka 61 nga mananagat human pusila sa wala pa mailhing mamumuno sa Sitio Dawis Norte, lungsod sa Carmen, probinsya sa Sugbo.Ang biktima giila nga si Gerson Cabase Abarquez, lumolupyo ra usab sa maong dapit.Matod ni Police Major Eric Gingoyon, hepe sa Carmen Police Station, nga alas 12:30 sa Lunes sa udto, Hulyo 11, 2022, ang Danao City Police Station nanawag sa ilang buhatan nga nagpahibawo nga adunay tawo nga gipusil sa Dawis Norte.Dali nga niresponde ang iyang mga personnel ug ilang naabtan ang biktima nga nagbuy-od nga wa nay kinabuhi.Dunay samad pinusilan sa lawas ang biktima apan sa may tiilan niini adunay kalibre .38 nga armas nga dili pa matino kon iya ba kini ni Abarquez.Kapulisan nagpadayon pa sa ilang imbestigasyon kon duna bay nakakita sa krimen. |
| 7 ka mga balaudnon prayoridad ni Calderon nga iduso sa Kongreso Posted: 11 Jul 2022 04:57 AM PDT Pito ka mga balaudnon ang gitinguha nga mapasar ni Cebu 7th District Representative Peter John Calderon sa mosunod nga tulo ka mga tuig sa Kongreso.Lakip sa nakalinya nga House Bill ni Calderon mao ang Revising the Charter of the Cebu Technological University (CTU) and Converting CTU Into A University System. Ikaduha mao ang paghimo sa CTU Ginatilan, Dumanjug ug Malabuyoc nga regular campuses.Ikatulo ang Establishing CTU Alegria, ikaupat ang Declaring the Alegria-Badian Watershed as a Protected Area, ikaunom ang Creation of a Regional Trial Court in Moalboal ug katapusan mao ang Separate Alcantara National High School gikan sa Badian National High School.Sa pito, tulo niini ang kinahanglan niyang iduso pagbalik alang sa 19th Congress sanglit nahutdan na sila og panahon sa 18th Congress gumikan sa election period ug usa niini ang "Revising the Charter of the Cebu Technological University (CTU) and Converting CTU Into A University System"Ang laing upat ka mga HB wala pa maduso ni Calderon ngadto sa Kongreso.Iyang gipadayag nga ang mga balaudnon maoy iyang gustong mapalabang sa 19th Congress sanglit kini maoy mga nanag-unang panginahanglan sa 7th District nga nagkinahanglang paluyohan og balaod aron hingpit nga mapatuman ang damgo sa mga nagpuyo sa distrito.Si Calderon nagpapili sa miaging eleksyon apan way nangahas sa pag-challenge sa iyang kandidatura sama nilang 3rd District Representative Pablo John Garcia ug 1st District Rep. Rhea Gullas, kapikas ni Talisay City Mayor Gerald Anthony "Samsam" Gullas. |
| Padilla: Divorce bill di pagbuak, kon di, panalipod sa pamilya Posted: 11 Jul 2022 04:53 AM PDT Gisubli ni Senador Robin Padilla niadtong Lunes, Hulyo 11, 2022, nga ang divorce bill nagtumong sa pagpanalipod, dili pagguba, sa mga pamilyang Pilipino.Si Padilla, kinsang pet bills naglakip sa divorce bill, niingon nga dili sila supak sa "forever," nipasabot nga kadtong nagpabilin sa mga kaminyuon, bisag wala na mogana ang sitwasyon nilang duha, kinahanglang hatagan og ikaduhang higayon."Itong panukalang ito nagbibigay ng proteksyon unang-una sa mag-asawa, babae, lalaki, at magiging anak. May nagsasabi baka raw itong panukala ang sisira sa kasal, hindi po. Itong panukalang ito ang nagbibigay proteksyon sa kasal na, masakit man sabihin, ay sira na," matod ni Padilla."Minsan may mga bagay talaga na nakasulat na di kayo para sa isa't isa. Kailangan aminin natin 'yan. May nakasulat para sa iyo. Paano kung dumating ang para sa iyo at ikaw nakatali na? Napakalungkot. Everybody deserves a second chance," siya nidugang.Ang bag-ong senador niingon nga ang divorce bill mapuslanon alang sa mga babayeng Pilipino nga kasagaran gihukmang sayop ug dili patas nga paghukom human sa panagbulag sa iyang bana, sa konteksto sa kulturang Pilipino."Kawawa ang babae pag dalawang mag-asawa naghiwalay napakasakit ng sinasapit ng kababaihan. Sa kultura natin... ang lalaki ang na in love sa iba ang tingin ng kapwa lalaki, galing ng lalaking ito. Pag babae nagkaroon ng boyfriend, naku tsismisan 'yan, kawawa ang babae... Unfair eh," matod niya.Matud pa ni Padilla nga limitado ang access sa mga Filipino sa annulment, nga mao lamang ang paagi sa nasud aron mabuwag ang kaminyuon, tungod sa daghang mga kinahanglanon niini, lakip na ang pinansyal nga kapabilidad.Ubos sa proposed divorce measure ni Padilla, ang bana o asawa mahimong mosang-at og petisyon aron maputol ang ilang kaminyuon ubos sa mosunod nga mga kondisyon:* Sa diha nga bisan kinsa sa mga kapikas walay kapasidad sa pagbuhat sa mahinungdanon nga mga obligasyon sa kaminyuon ug ang pagkawalay mahimo magpadayon ug daw dili na mamaayo;* Kon adunay naglungtad nga dili mapasig-uli nga kalainan sa kaminyoon;* Kon ang usa ka kapikas nakakuha usa ka diborsyo sa gawas sa nasud;* Kon ang usa ka kapikas gituohan nga patay na ubos sa Artikulo 390 ug 391 sa Civil Code of the Philippines;*Sa pagkakombikto sa usa ka kalapasan ubos sa Republic Act 9262, nga mas naila nga "Anti-Violence Against Women and their Children Act of 2004";* Pagsulay sa respondent batok sa kinabuhi sa usa ka komon nga anak o usa ka anak sa petitioner;* Pagbaton og anak uban sa laing tawo gawas sa kapikas sa panahon sa kaminyuon, gawas kon sa kasabotan sa mga kapikas, ang usa ka bata matawo kanila sa vitro o pinaagi sa susamang pamaagi o sa dihang ang asawa nanganak human nahimong biktima sa pagpanglugos;* Kon adunay bisan unsang mga sukaranan alang sa pagpa-annul sa kaminyuon ubos sa Artikulo 45 sa Family Code of the Philippines, nga gisang-at sa mga tawo ug sulod sa mga panahon nga gihatag sa Artikulo 47 sa maong Kodigo anaa;* Gawas kon anaa ang sirkumstansya ubos sa Artikulo 56 sa Family Code of the Philippines kon adunay bisan unsang basehanan alang sa legal separation ubos sa Article 55 sa maong Code;* Kon ang mga kapikas nagbulag sa tinuod sulod sa labing menos duha ka sunod-sunod nga tuig sa panahon sa pag-file sa petisyon alang sa diborsyo;* Kon ang mga kapikas legal nga nagbulag pinaagi sa judicial nga mando ubos sa Artikulo 55 sa Family Code of the Philippines.Ang balaudnon nagmando usab og unom ka buwan nga mandatory cooling-off period human sa pagpasaka sa petisyon ug kini maobserbahan atubangan sa usa ka takos nga korte. Atol niana nga panahon, ang korte kinahanglan nga mogamit sa tanan nga mga paningkamot sa paghiusa, pag-usab ug pagpasig-uli sa mga partido.Kon maaprobahan ang petisyon sa diborsyo, tugotan na ang bana ug asawa nga magpakasal sa lain.Ang mga anak sa estranged parties makonsiderar gihapon nga lehitimo samtang ang ilang kustodiya, partikular na sa mga menor de edad, ang determinahon sa korte.Ang hukom kinahanglang maghatag og liquidation, partition ug distribution sa mga kabtangan sa mga kapikas, ang kustodiya ug suporta sa mga anak, conjugal nga pinuy-anan ug ang lote nga nahimutangan niini pagahukman pinasubay sa Articles 102 ug 129 sa Family Code sa Pilipinas, ug ang mga epekto sa nagdiborsyo nga mga kapikas sa intestate successions, testamentary dispositions, donations, ug insurance sa mga benepisyaryo kinahanglang maobserbahan.Gawas kang Padilla, ang divorce bill nalakip usab sa mga priority bill nila ni Senador Risa Hontiveros ug Raffy Tulfo. (TPM sa SunStar Philippines) |
| Tubilan: Suholan sa mga magtutudlo pasakahan Posted: 11 Jul 2022 04:52 AM PDT Makapalipay ang mga kalambuan karon nga nisugod na ang bag-ong administrasyon ilabi na sa mga magtutudlo sa publikong tunghaan.Nalakip sa saad ni Presidente Ferdinand "Bongbong" Marcos Jr. niadtong kampanya nga pasakahan ang suholan sa mga magtutudlo.Di kini mahimo ni Presidente Bongbong kon wa siyay kaabag sa Kongreso nga maoy moandam niini, nga motuon unsay haum nga mahatag ngadto sa mga magtutudlo. Mao pa lang gani pagsugod sa ilang termino, silang Senador Juan Edgardo "Sonny" Angara ug Senador Loren Legarda aduna nay gisang-at gilayon nga balaudnon aron pasakahan ang suholan sa mga publikong magtutudlo.Si Angara nisang-at sa balaodnon nga "Upgrading the Salary Grade (SG) Level of Teachers from 11 to 19." Pasabot niini nga ang mga Teacher 1 nga nagdawat sa SG 11 nga suweldo, ang ilang dawaton mao na ang SG 19 nga suweldo. Kon ibase nato kini sa Salary Grade Standardization Law (SSL) 5, 4th Tranche nga ipatuman sa Enero 1 sunod tuig, ang SG 11 nagdawat og suweldo nga P27,000 samtang ang SG 19 anaa sa P51,357.Ang tinguha ni Legarda ubos sa kang Angara nga ang mga Teacher 1 gikan sa SG 11 adto na sa SG 15 diin magdawat kinig P36,619 samtang ang mga teaching personnel sa State Universities and Colleges (SUCs) magsugod silag SG 12 adto na usab sila sa SG 16 nga magsuweldo silage P39,672. Gitinguha usab ni Legarda ang mga ang non-teaching personnel magdawat silag P16,000.Kining balaodnon ni Legarda nihaum sa saad ni Bongbong atol sa kampanya nga pasakahan niya ang suholan sa mga magtutudlo sa SG 15. Kon ang tinguha ni Angara ang matuman, dako kaayo kini og kaayohan sa mga magtutudlo apan kon kang Legarda ang suportahan maayo kaayo kini kay sa walay kausaban sa ilang suholan.Taas pa kaayo kini nga hisgutanan sa Kongreso aron hingpit ning matagamtam sa mga magtutudlo nga mausab na ang ilang suweldo nga sa hataas nga panahon wa matagad. Makahupay na kini isa ilang sitwasyon nga kasagaran na-loan na ang ilang mga suweldo ug sukli nalang ang ilang gidawat matag buwan. Nabuhi ra man hinuon sila sa utang kay nakapa-eskwela ug napakaon nila ang ilang mga anak sama usab sa akong natagamtaman sa kasinatian sa akong amahan. (josephelvirtubilan@gmail.com) |
| Tambagi ko Noy Kulas: Giilisan og biyudo Posted: 11 Jul 2022 04:43 AM PDT Dear Noy Kulas,Good day. Tawga lang ko og Deejay, 28 years old. Lovelife ni akong problema.Just call her Julia. Nagkauyab mi dihang 17 years old pa siya but karon 20 na. Dugaydugay ang among relasyon ug ang among life ma compare na sa minyo. Yes, we did sex bisan minor pa siya. Kon adto siya sa amoa matug, adto siya sa akong room ug natural, maglapaay ming duha. Lipay ko kay ako ang una nga boyfriend ug nakauna niya.But mga six months ago, kalit ra ko niyang gibuwagan ug wa siyay klarong rason. Nisulti siya nga na fall out of love ra siya nako. Mao to akong giadto ang iyangfriends ug relatives. Mao diay kay gipulihan ko niya og 40 years old nga biyudo. Nakakita gyud ko nila nga sweet kaayo nga nagkuyog. Sakit baya kaayo kay grabe ang among memories kay kadaghan mi nag celebrate sa among mga monthsary.Karon naglisod ko og move on especially maghuna-huna ko nga giilisan ra ko og biyudo nga kon tan-awon, ka edad hapit sa iyang papa.Noy, unsa kaha ang akong buhaton aron di na ko masakitan? Magsige ra ko og stalk niya but gi block na ko niya sa Messenger ug gi-unfriend ko. Naa bay paagi nga ako siyang makalimtan? Lisora pildehon ra tag biyudo.DEEJAYDeejay,Wa baya kaayo na sa edad labina sa mga babaye nga practical ug nakakita sa value sa tawo. Basin duna siyay nakita ug nabuhat sa lalaki nga wa nimo gibuhat ngadto niya. Kadaghan na ko nakasugat og mga babaye nga ang giilis maguwang kaayo nga lalaki. Gibuwagan ang mas batan-on nga boyfriend. Basin mao ni ang iyang naamguhan ug nakita.Sakit man gyud nang panagbuwag. But isipa lang nga temporaryo ra na kay ing ana man gyud nang relasiyon, dunay mga higayon nga di mo lang paabuton, mahitabo diay. Sama sab nga di nimo paabuton, makaamgo ka lang nga wa na diay kay feeling niya. Moabot ang time nga less and less kang maghuna-huna niya. Labina gyud kon you keep yourself busy ug mo explore ka sa laing possibility of having another relationship. Maybe kanang mas mature nga babaye, kanang duol ra nimo og edad. Kon duna ka may mga sayop sa miagi, learn from it. Kana gung giingon nga failure mas maayong moabot kay duna man nay matudlong leksyon. Makat-on ka niana. One day, you'll wake up nga okay ra diay nga wala siya.NOY KULASrojval69@yahoo.com |
| DSWD 7 mitaho kang Sec. Tulfo bahin sa sitwasyon sa Region 7 Posted: 11 Jul 2022 04:42 AM PDT Ang Department of Social Welfare and Development (DSWD) 7 nitaho ngadto kang DSWD Secretary Erwin Tulfo bahin sa status ug ang tubag sa departamento sa mga sitwasyon nga nahitabo sa mga dapit sa Central Visayas atol sa online meeting dili pa lang dugay.Si DSWD OIC Regional Director Shalaine Marie Lucero maoy nitaho sa ilang pagtubag sa mga pagbaha, outbreak sa typhoid fever sa Barili sa Sugbo ug ang level 1 alert sa Canlaon Volcano sa Negros Oriental.Ang Kalihim nimando sa DSWD 7 sa pag-ila sa mga dapit nga nanginahanglan og logistical support tungod kay ilang local government units (LGUs) walay igong transport vehicles ug mga bodega nga kabutangan sa relief goods.Matod ni Lucero, ang DSWD-7 nag-andam og dul-an sa 6,000 ka family food packs sa Canlaon City samtang ang Canlaon Volcano gipaubos sa Alert Level 1.Gawas niini, ang DSWD-7 motan-aw usab sa lima ka LGUs sa lalawigan sa Bohol nga grabeng naapektohan sa bagyong Odette ug dili maabot dayon sa hinabang.Ang DSWD 7 niila usab sa LGUs sa Sugbo nga geographically isolated and disadvantaged areas (GIDAs) aron mosulod og memorandum of agreement (MOA) sa maong LGUs alang sa prepositioning sa family food packs.Samtang, ang aksiyon nga tubag ug interventions sa typhoid fever cases, ang DSWD 7 niluwat og 1,580,000 isip financial assistance sa 313 ka pasyente. Ang matag usa nakadawat og P5,000 cash aid, samtang mga pamilya nga dunay tulo nga namatay nakadawat og P10,000 matag usa.Gikan sa report, ang Kalilhim nisugyot sa pagsusi usab sa panginahanglan sa mga pamilya nga dunay nadugang nga nakalas tungod sa naasoy nga sakit.Ang DSWD 7 padayon sa pagkoordinar sa provincial ug local government units ug City-Municipal Action Teams sa mga apektadong dapit bahin sa ilang dugang panginahanglan nga tabang gikan sa kagamhanan. / PR |
| Spence masaligon madayon ang ilang away ni Crawford Posted: 11 Jul 2022 04:41 AM PDT Nagtuo si unified welterweight champion American Errol Spence Jr. nga hapit na mahan-ay ang gikaintapan nilang unification bout sa kababayang Terence Crawford."It's closer now than it's ever been. If it don't happen now, it's never going to happen. It's way closer than it used to be. I think it's definitely going to happen," matod ni Spence sa interbyu sa FightHub TV.Sulod na sab sa lima ka mga tuig nga giplanuhan ang panagharong sa duha ka dekalidad nga mga boksidor.Alang lang Spence, kinahanglan na kining madayon gumikan kay nagkataas na ang ilang edad. Si Spence, 32, samtang si Crawford, 35.Si Spence maoy naggunit sa 147-lb titles sa World Boxing Association (WBA), World Boxing Council (WBC) ug International Boxing Federation (IBF) samtang si Crawford maoy tag-iya sa World Boxing Organization (WBO) welterweight title. |
| Posted: 11 Jul 2022 04:40 AM PDT Mas moagresibo si World Boxing Organization (WBO) super flyweight champion Japanese Kazuto Ioka sa ilang rematch ni Filipino Donnie "Ahas" Nietes nga gikatakda ugma, Hulyo 13, 2020, sa Ota City Gymnasium sa Tokyo, Japanese.Sa premiro nilang away niadtong Disyembre 31, 2021 nga gipahigayon sa Macao, midaog si Nietes pinaagi sa split decision.Sa interbyu sa The Ring, si Ioka, kinsa adunay 28-2, 15KOs nga rekord, nibutyag nga wala siya nakatilaw og sakit sa mga kumo ni Nietes sa premirong away.Gipasabot ni Ioka nga karon nga nasuta niyang dili ra kusog og kumo si Nietes, hayan dili siya magmakuli sa pag-ataki niini sa panagtagbo nila og balik.Hinuon, giklaro ni Ioka nga dili basta-basta ang abilidad ni Nietes, kinsa iyang gihulagway nga maayo mo-counter.Alang kang Ioka, anaa kaniya ang tanang bintaha ning higayuna hilabi na sa pangidaron diin manghod siya og pito ka mga tuig kumpara sa 40 anyos nga si Nietes, kinsa adunay 43-1-6, 23KOs nga rekord.Matod ni Ioka nga mas aktibo sab siya kumpara kang Nietes.Gikan sa premiro nilang away, si Ioka nakasagubang na og lima ka mga away samtang duha lang kang Nietes.Gipasalig ni Ioka nga dili niya usikan ang iyang mga bintaha ning awaya. |
| Gin Kings gilampornas sa Tropa Posted: 11 Jul 2022 04:39 AM PDT Gihuman sa TNT Tropang Giga ang ilang kampanya sa elimination round sa Philippine Basketball Association (PBA) Philippine Cup pinaagi sa paglampornas sa Brgy. Ginebra Gin Kings, 106-92, niadtong Dominggo sa gabii, Hulyo 10, 2022, sa Smart Araneta Coliseum.Ang Tropang Giga mituldok sa eliminasyon dala ang 8-3 nga rekord apan wala pa sila masayod kon asa ang ilang posisyon ini'g sugod sa quarter-finals tungod kay mag-agad pa sila sa resulta sa nahabiling mga duwa.Kasamtangang nagpatong ang Tropang Giga sa ikatulong dapit sunod sa Ginebra (6-2) ug league-leader San Miguel Beermen (8-1).Nanghinaot ang Tropang Giga nga mopabor kanila ang resulta sa nahabiling mga duwa ug matukmod sila sa top two spots nga adunay pakapin nga twice-to-beat nga benepisyo sa quarter-finals.Ang kadaugan sa Tropang Giga gipangulohan sa Sugboanong si RR Pogoy, kinsa nagpauwan og 30 ka mga puntos.Sa laing duwa, ang Beermen ning-agi pa og overtime una nila nahubog ang nagkakuyaw nga Blackwater Bossing, 110-107. / ESL |
| Posted: 11 Jul 2022 04:38 AM PDT Gipakita ni James Wiseman nga hingpit na nga naalim ang angol sa iyang tuo nga tuhod sa iyang pagbalik og duwa sa Golden State Warriors.Ang No. 2 overall pick niadtong 2020 niamot og 11 puntos aron tabangan ang Warriors sa pagpukan San Antonio Spurs, 86-85, kagahapon, Hulyo 11, 2022 (RP time) sa NBA Summer League sa Las Vegas.Ang 7-footer ug 21 anyos nga si Wiseman wala nakapakita sa tibuok 2021-22 season gumikan kay nagpaalim kini sa iyang angol.Ang kadaugan sa Warriors gipangulohan ni Jonathan Kuminga pinaagi sa iyang 28 puntos. / AP |
| Cone mikawat og atensyon sa NBA Summer League Posted: 11 Jul 2022 04:05 AM PDT Nakakuha og atensyon gikan sa beat writers si Brgy. Ginebra Gin Kings coach Tim Cone sa iyang hamubong higayon nga pagtrabaho isip assistant coach sa Miami Heat sa Summer League sa National Basketball Association (NBA).Si Ira Winderman sa South Florida Sun Sentinel nagsuwat og artikulo kabahin sa winningest coach sa Philippine Basketball Association (PBA) diin usa sa iyang nainterbyu mao mismo si Miami Fil-Am coach Erik Spoelstra."I mean, he has won 24 championships," matod ni Spoelstra ngadto kang Winderman nga napatik sa Spin.ph."He's an absolute legend over there, and he's still young as a coach. So he could still go for another 20 years. There's no telling where he'll end up at that point."Hinuon, dali nga giklaro ni Cone nga tulo ka mga titulo ang puwedeng malangkat sa PBA matag tuig kumpara sa NBA nga usa ra."So we have a chance for three championships a year," pasabot ni Cone.Gisaysay sab ni Spoelstra ang panaghigalaay nila ni Cone nga nagsugod niadtong 2009 sa labing una niyang pagbisita sa Pilipinas nga adunay kalambigitan sa NBA."I got to know him when I made my first trip over there with the NBA, and got to know him and his staff, and started going to his practices and his games. And then we just continued the friendship over the years," matod ni Spoelstra. |
| You are subscribed to email updates from SUNSTAR. To stop receiving these emails, you may unsubscribe now. | Email delivery powered by Google |
| Google, 1600 Amphitheatre Parkway, Mountain View, CA 94043, United States | |
No comments:
Post a Comment