https://www.sunstar.com.ph/ |
- Namisita’s uyab gitipi sa karibal?
- Nag-party posibleng mag-atubang og kaso
- Manuroy sa Semana Santa gipasidan-an
- Roldan: Unsa ang dysthymia sa bata?
| Namisita’s uyab gitipi sa karibal? Posted: 22 Mar 2021 03:17 AM PDT COTABATO CITY -- Gituohan nga ang karibal sa gugma ang mitipi sa usa ka ulitawo alas 3:15 sa hapon niadtong Dominggo, Marso 21, sa nahisgutang siyudad. Patay si Daniel Minted Muhillo, 24, nagpuyo sa Sitio Lomboy, Barangay Awang, Datu Odin Sinsuat, Maguindanao Province, human gipusil gikan namisita sa iyang uyab. Sumala kang Cotabato City Police Office Director Colonel Rommel Javier nga pauli na ang biktima nga nagbaktas sa dalang LR Sebastian, Barangay Roasary Heights 10 sa dakbayan sa Cotabato nga gikan namisita sa uyab. Apan duha ka wala mailhing lalaki mibutho daplin sa dalan kon diin ang usa maoy mipusil kaniya. Sa wala pa misibat, namulong ang suspek nga "akin lang siya" ug dayon paturatoy sa ilang motorsiklo. Patay on the spot si Muhillo nga nakaangkon og tulo ka samad pinusilan sa ulo. Duna nay person of interest ang kapulisan sa dakbayan alang sa kasulbaran sa maong krimen.  This posting includes an audio/video/photo media file: Download Now |
| Nag-party posibleng mag-atubang og kaso Posted: 22 Mar 2021 03:16 AM PDT GIHANDOS na sa barangay level ang reklamo sa usa ka abogado batok sa silingan niini nga dunay natigayong birthday party Sabado sa gabii, Marso 20, 2021. Sumala sa Talomo Police Station, kung dili magkasinabot ang duha ka bahin, pursigido ang abogado nga mopasaka og reklamo sa korte ubos sa regular filing. Subay sa sketchy report gikan sa Talomo police, nasayran nga giingong nakamata gikan sa pagkahinanok ang 62 anyos nga abogado mga alas 2 sa kaadlawon, Marso 21, Dominggo sa panimalay niini sa Shrine Hills, Magnolia Heights, Barangay Matina Crossing, Davao City. Gisulti sa usa ka 29 anyos nga real estate agent nga usa sa mga anaa sa party nga nagsaulog sila sa birthday sa ilang kauban nga usa sa ka 35 anyos nga real estate agent sab. Sa report sa kapulisan, kinse ka indibiduwal ang anaa sud sa usa ka balay nga giingong girentahan aron didto mapahigayon ang birthday party. Dunay impormasyon nga gipahibalo sa Superbalita nga ang napulo sa kinse, daw nagpailang mga "feymos" (kun termino nga ginagamit sa mga generation Z nga sikat sa Facebook). Sumpay sa report, giingong perteng sabaa sa mga nahisgutan ug alegasyong kusog pa ang sound system, ug giingong nagsiyagit-siyagit pa, butang nga naka-disider na ang abogado nga mo-report sa kapulisan sa Talomo. Gilayong miabot ang Mobile Patrol 32 sa Talomo PNP sa dapit ug giimbitahan ang duha ka real estate agent aron makuha ang ilang bahin batok sa reklamo sa abogado. Alas 4:59 sa kaadlawon, Dominggo, niabot ang Mobile Patrol 34 sa presinto tres sakay ang reklamante nga abogado ug ang duka ka real estate agent. Dugang nasayran gikan sa kapulisan nga wala suma pa ang tag-iya sa balay sa maong oras ug alegasyong duna nay daan nga bangi ang reklamante ug ang tag-iya. Giandam na sa kapulisan sa Talomo ang mga papeles subay sa report sa imbestigador aron maduso sa korte ang regular filing nga ipasaka sa reklamante ugaling di sila mahusay sa barangay. (Jeepy P. Compio)  This posting includes an audio/video/photo media file: Download Now |
| Manuroy sa Semana Santa gipasidan-an Posted: 22 Mar 2021 03:15 AM PDT MAGSAYSAY, Davao del Sur -- Gitanyag sa lokal nga gobyerno ang "Bidang lagan" karong Semana Santa aron luwas sa Covid-19 mao nga duha ka nindot nga mga dapit sa ilang kabukiran ang gipromotar. Hinay-hinay nga ginadayo sa mga turista ang Talusob Falls sa Barangay Balnate diin nahimutang ang bugnaw nga busay ug perpektong dapit alang sa ting-init aron nga makaligo sa tin-aw nga tubig. Nadugang sab ang bag-ong atraksiyon sa lugar nga mao ang Jardin de Sta. Rita de Cascia diin makita ang Divine Mercy Shrine ug nindot nga adtoan alang sa mga buot mag-penetensiya sa Semana Santa. Gipasalig sa mga sakop sa Magsaysay Municipal Police Station ang kahapsay ug kalinaw sa lugar human adunay mga kapulisan nga nagapatrolya sa lugar aron masegurong luwas ang mga mobisita. Libre ang pagkaligo sa busay hinungdan nga daghan na ang nagadayo dinhi ug nalipay sab ang mga molupyo sa lugar human gibutangan na og mga cottages ug adunay mga nagapamaligya og pagkaon sa kilid niini. Apan nagpasidaan ang lokal nga gobyerno sa publiko nga kanunay motamod sa safety health protocols aron malikayan ang Covid-19 ilabi nang gilauman nilang modagsa ang mga turista sa taas nga bakasyon atol sa Semana Santa. (Orlando B. Dinoy)  This posting includes an audio/video/photo media file: Download Now |
| Roldan: Unsa ang dysthymia sa bata? Posted: 22 Mar 2021 03:12 AM PDT USA na ka tuig ang nilabay sa dihang nagdeklara ang atong kagamhanan og lockdown tungod sa bag-ong virus nga hinayhinay nga nikuyanap sa tibuok kalibutan. Niining bulana sa 2020 nitumaw sa atong bukabularyo ang pangalan nga coronavirus disease 2019 (Covid-19) nga delikado pa ug nanganak na kini og laing dagway o "variant". Dinhi sa Davao kung atong mahinumduman nga nasuko si Mayor Inday Sara Duterte ug gipasirad-an niini ang dakong sabongan diha sa Matina tungod kay nasuta nga ang mga sabongero ang nagpapaspas sa pagtakod sa maong sakit nga wa pay tambal. Gikan niini, gikansela sa Mayor ang Araw ng Davao celebration sa Marso, ang Kadayawan Festival sa Agosto ug ang halos tanang dagkong kalihukan sa gobyerno. Hasta ang simbahan nanira usab tungod sa nagdagsa nga kaso sa Covid-19. Gioktaba usab ang pag-abli sa klase hangtud nga niguwa ang desisyon nga wala na unyay "face-to-face" nga klase sa mga kabataan hangtud nga anaa pa ang hadla sa sakit ug wa pay bakuna niini. Tuod man gidawat sa katawhan ang bag-ong normal sama sa paghugas sa kamot ug sabon ug alcohol, pagdistansiya, pagsul-ob og maskara ug face shield, ug uban pa. Gidid-an ang mga bata, tiguwang ug kadtong masakiton sa pagguwa kay sila kadtong dali matakdan ug madedbol kung mahinaykan. Apan luyo niining mga pagpihig nga dili mogawas, adunay mitumaw nga epekto sa katawhan ug sa akong kabahin, mas naigo niini ang kabataan. Basi sa akong ginagmay nga pakisusi, akong nasayran nga nidaghan diay ang ihap sa mga bata nga may "mental issue" sulod sa dugay nga lockdown ug walay pisikal o "face-to-face" nga klase. May suod ko nga kaila nga ang iyang anak nga 15 anyos nga babaye gidala nila sa ospital sa gabii sa Marso 16 tungod sa pagtumar og 20 ka tabletas nga paracetamol nga para sa sakit sa ulo. Natingala na lang ang asawa sa akong higala nga naghilak ang iyang anak nga nisulti nga niinom siya og 20 ka paracetamol kay abi niya dili kini delikado ug aron makatulog na siya. Human sa lockdown ug nisugod na ang "modular" o "on-line classes" sa mga bata nausab ang timplada sa ilang kinabuhi. Dugay na silang momata sa buntag ug sa gabii na sila magbasa o magtubag sa ilang klase. Grabe sab ang epekto sa way puas nga paggamit og cellphone kay magbuntag kini silang nagyampungad nga dili na gani masugo sa trabaho sa balay ug bisan ang pag-ehersisyo. Nasuta sa diagnosis sa mga doktor nga ang bata adunay toxic effects of paracetamol ug mood disorder nga dysthymia. Medyo sayon ra sabton ang pagka-overdose sa paracetamol kay nakuha ra kini sa "cleansing" ug "detoxification" apan lisud ang dysthymia nga gitawag usab og "persistent depressive disorder." Porma kini sa depresyon diin mawad-an og interest ang tawo sa normal nga kalihukan, gibati nga wa na siyay pulos, ubos ang "productivity," ubos nga pagtan-aw sa kaugalingon, ug dili makatulog. Pila kaha ka mga bata ang anaay simtomas sa dysthymia? Ipatan-aw gidayon sa doktor ang bata.  This posting includes an audio/video/photo media file: Download Now |
| You are subscribed to email updates from https://www.sunstar.com.ph/. To stop receiving these emails, you may unsubscribe now. | Email delivery powered by Google |
| Google, 1600 Amphitheatre Parkway, Mountain View, CA 94043, United States | |
No comments:
Post a Comment