https://www.sunstar.com.ph/

---

• PDEA-Central Visayas nakasakmit og 6 ka kilo nga marijuana
• Mananagat patay sa ‘pasalba’
• Dealers ipaimbestigar ni Caindec sa NBI
• 2 nakuhaan og 1.5 kilo shabu
• Butuanon river viewing deck nahuman na
• 1,800 nabakunahan sa anti-Covid sa Cebu City
• Pagasa: sugod nang ting-init
• Editoryal: Lisod ang RT PCR test
• Nalzaro: Retirement age 60 na
• Mongaya: Liza Soberano wa mahadlok ma-Red tag
• Diola: Mga judiong dako
• Mga pulis gipadala sa Isla sa Bantayan
• Ormoc nagtukod og convention center; BMX race track, badminton court isunod
• Daclan: Ligaya, Dulcita gailog kang Dan? sa ‘Who Am I’
• Super Blowout: Miuyon sa plano sa Ginuo
• Sotto kinahanglan mo-practice sa Gilas
• Vallena: Kalisod sa tahas
• Ang asawa ni MJ
• Nets, Jazz nakaipsot

PDEA-Central Visayas nakasakmit og 6 ka kilo nga marijuana Posted: 28 Mar 2021 02:20 AM PDT TULO ka mga batan-ong lalake nakuhaan og unom ka kilo sa marijuana human nasikop sa buy-bust sa Philippine Drug Enforcement Agency (PDEA) Central Visayas sa Sabado sa gabii, Marso 27, 2021, sa Dumlog-Climaco Road, Barangay Anislag, Siyudad sa Toledo. Si IA1 Jessie Cabutotan niila sa mga suspek nga sila si Jobert Cabelis, Jerry Orillian ug Ralph Luaren Benesisto, mga lumolupyo sa siyudad. Ang lima ka bundle sa marijuana nagbalor og P600,000. Ang tulo naa gibilanggo sa Toledo Police Station alang sa pagpasaka sa kasong kalapasan sa Section 5 in relation to Section 26 sa Republic Act 9165 kun Comprehensive Dangerous Drugs Act of 2002. Ang operasyon giabagan sa Provincial Drug Enforcement Unit pinaagi sa hepe nga si Police Major Jeorge Francis Rodrin ug sa Toledo police. (AYB) This posting includes an audio/video/photo media file: Download Now

Mananagat patay sa ‘pasalba’ Posted: 27 Mar 2021 07:13 AM PDT Mananagat namatay human maigo sa giingong pagpusil sa mga personnel sa Philippine Coast Guard alas 8:00 sa gabii sa Biyernes, Marso 26, 2021 sa kadagatan sa Sitio Dakit Dakit, Barangay Logon, Isla sa Malapascua, lungsod sa Daanbantayan, amihanang Sugbo. Si Rolex Casebo, minyo, taga Sitio Sta. Cruz Barangay, Antipolo, lungsod sa Medellin, patay nang niabot sa tambalanan sa lungsod sa Medellin human nakaangkog samad pinusilan sa lawas duol sa ilok. Alas 11:50 sa gabii Biyernes, ningtahan sila si SN1 Jayson Hermoso De Padua, 32, temporaryong nagpuyo sa Brgy. Logon, lumad nga taga Taguig City ug si SN2 Christian Amorade, 30, taga Mandaluyong City. Si De Padua, Coastguard commander nga nakabasi sa Barangay Logon. Si Police Señor Master Sgt. Noel Belicario, imbestigador sa Daanbantayan Police Station nga nahinabi sa Superbalita Cebu nagkayon nga si Police Executive Master Sgt. Mamerto Gastador sa Medellin Police Station maoy nipahibawo kabahin sa shooting incident. Uban sa Medellin Police Station, nakig-alayon sila sa Coast Guard nga nakabasi sa Maya Port, gitawgan ang Coast Guard nga nakabasi sa Brgy. Logon hinungdan nga ning-surrender ang duha ka personnel. Apan ang armas nga ilang gigamit wala pa igkita sa pagsuwat ning taho. Matod pa ni Belicario nga ang mga personnel sa Coast Guard nibutyag nga nagpahigayon silag seaborne patrol sa dapit sakay sa ilang jetski. Nialigar nga nakakita silag hayag kaayong suga sa kadagatan diin dunay duha ka dagkong mga pump boat nga ang mga sakay giingong illegal nga nanagat. Ilang gibadlong, apan wa mopatuo hinungdan ni-warning shot sila. Apan kalit nga ningsibat ang duha ka mga dagkong pumpboat, busa ilang gipasalbahan aron pahunungon aron pahunongon. Wa gihapon mopatuo ug giingong gisuwayag bangga ang ilang Jetski nga gisakyan. Nakita nila nga namilegro ang ilang kinabuhi niadtong higayuna hinungdan nga ilang gipasalbahan og balik. Apan nakasibat ang duha ka mga pump boat tungod sa kakusog modagan. Nibalik na lang sila sa ilang base sa Barangay Logon. "Ang ilang depensa, Sir, namilegro na daw sila niadtong higayuna. Wala daw silay intention nga pamusilon ang mga biktima, warning lang aron mohunong. Wa sila masayod nga naay naigo nga crew," dugang ni Belicario. Nagkakumprontasi sa police station ang mga personnel sa Coast Guard ug kapitan sa fishing boat nga si Gary Dieparine, taga Sitio Pandan, Brgy. Maghawak, lungsod sa Medellin. Si Deiparine nibutyag nga hayag kaayo niadtong higayuna nanagat sila gamit ang pukot. Mokabat sa 19 silang tanan nga sakay. Kalit nga dunay duha ka mga lalake nga naabot nga wala mag flashlight, diretso silang gipasalbahan. Gumikan sa ilang kahadlok, paspas silang mipalayo sa maong dapit. Pero ang mga personnel sa Coast Guard mibutyag nga ang mga illegal nga mananagat nagdali og biya, gipanglabay ang ilang pukot. Hinungdan nga tataw sila nga illegal nga mananagat kay nagdalig sibat. This posting includes an audio/video/photo media file: Download Now

Dealers ipaimbestigar ni Caindec sa NBI Posted: 27 Mar 2021 06:34 AM PDT NAGPATABANG si Land Transportation Office (LTO) 7 Regional Director Victor Emmanuel Caindec sa National Bureau of Investigation (NBI) sa iyang pakigbatok sa lima ka mga motorcycle dealers nga gipanag-iya sa Du Family. Kini human nadiskobrehan sa ahensya ang giingong mga iregularidad sa ilang pagsumite sa mga invoice sa LTO 7 itandi sa records sa sales nga gikuptan sa mga tag-iya. Niadtong 2019, nadiskobrehan sa LTO 7 kini isyu human sa mga reklamo sa publiko sa social media ngadto sa Presidential Complaint Center kabahin sa dugay nga pagrehistro ug di paghatag sa certification of registration sa mga motorsiklo gikan sa dealers nga gihulagway ni Caindec nga ilegal. Matod ni Caindec nga ilang nakita ang anomaliya nga gibuhat sa dealers. "We have uncovered several fraudulent sales practices of several dealerships which tantamount to huge loss of income to the government which could significantly alleviate our economy from this pandemic," matod ni Caindec sa iyang cover letter. Matod ni Caindec nga ang di pagdala sa CR ug official receipt ilegal base sa Republic Act 4136 kun Land Transportation and Traffic Code. Sigon ni Caindec nga kini gibuhat sa Du Ek Sam, Inc., DES Marketing, Inc., DES Strong Motors, Inc., Desmark Corporation ug Premio Corporation aron sila makalikay sa pagbayad sa buhis. Sa ilang pamahayag niadtong Pebrero, ang Du Ek Sam nanghimakak sa mga pasangil. Matod sa Du Ek Sam nga kon ila pang gibuhat ang mga gipasangil ni Caindec, wa na untay namalit kanila. "We would have lost the loyalty of our customers if we withheld registrations, plate numbers and insurance. The mentioned interest rates are also far from the truth we pride ourselves to be the most affordable in the market," matod sa pamahayag sa DES niadtong Pebrero 15, 2021 sa social media. (KFD gikan sa PR) This posting includes an audio/video/photo media file: Download Now

2 nakuhaan og 1.5 kilo shabu Posted: 27 Mar 2021 06:31 AM PDT NASIKOP sa buy-bust sa mga sakop sa Municipal Drug Enforcement Unit sa Consolacion Police Station ang duha ka high value individual nga usa ka delivery driver alas 8:30 Biyernes sa gabii, Marso 26, 2021 sa Purok Jasmine, Barangay Casili, Consolacion, amihanang Sugbo. Ang mga suspek nga nadakpan mao sila si Mark John Rabanes, 26 ug Diomel James Rebusa, 27, pulos lumad nga taga Ozamis City sa Mindanao apan kasamtangan nga nag puyo sa dalan B. Rodriguez, Siyudad sa Sugbo. Nakuha gikan kanila ang 1,525 gramos sa gituohang shabu nga adunay Dangerous Drugs Board value nga P10,370,000. Nangulo sa operasyon ang hepe mismo sa Consolacion Police, Major Verniño Noserale. Matod ni Noserale nga niadto pang Nobiyembre sa miaging tuig nila gipanid-an ang duha human mitumaw ang ilang ngalan nga maoy tinubdan sa illegal nga drugas sa maong lungsod. "Actually, dugay na ni nga information since November last year but mao lang lagi, with the changing scheme nila, dili man gud ni sila mga elementary pa when it comes to this operation. So, from time to time they evolved, they changed their strategy," matod ni Noserale. Gipaubos pa sa imbestigasyon ang duha kon asa gikan ang supply sa illegal nga drugas, apan dako ang pagtuo ni Police Colonel Alladin Collado, hepe sa Cebu Police Provincial Office, nga gikan kini sa siyudad sa Sugbo. Apan makita sa packaging, matod ni Collado, nga naggikan sa kaulohan ang kinilo nga shabu sanglit gisulod kinig green nga Chinese tea bag. Tungod niini, nimando siyag lawom nga imbestigasyon ug ilhon kinsa ang tinubdan sa illegal nga drugas alang sa himuon nga follow up operation. Sa inisyal nga nakuha sa kapulisan, naa sa drug matrix sa CPPO ang mga personalidad nga maoy tinubdan sa maong shabu. "May follow up operations pa kami rito. And as much as possible, we would like to ano yung movement nung drugs. But may follow up pang mangyari at nandoon sa isang matrix pero ang source galing sa Cebu City," matod ni Collado. Gihimakak nila ni Ravanes ug Rebusa nga ilaha ang nakuhang shabu sanglit igo lang sila nga gisugo sa paghatod bugti sa P10,000 nga suhol. Matod ni Rebusa nga wala sila makaila sa nag sugo ug igo lang sila gisaaran nga kon mahatod na, bayran sila sa suhol. "Gisugo ra mi ana, Sir. Wala mi kahibawo kon asa na gikan, Sir. Gisugo ra mi nya tagaan ra mig kwarta, Sir, bah, diyes mil," sigun ni Rebusa sa Superbalita Cebu. Mao usab kini ang pamahayag ni Rabanes nga kaniadto delivery driver apan mihawa tungod kay mas dako ang ilang kita kon mohatod silag illegal nga drugas. "Mao gyud na ang among hanap buhay dati, Sir. Nya naabot man ning koana nga gi offeran mi, nadani lang sad mi sa kwarta, Sir," matod ni Rabanes. Gipasalamatan ni Mayor Joannes Alegado ang kapulisan sa lungsod nga nakasakmit sa maong gidaghanon sa illegal nga drugas. Personal nga misaksi ang mayor sa mga binulto nga gituohang shabu nga nakuha gikan sa duha. Matod sa mayor nga kon wala pa makuha sa kapulisan, daghang kinabuhi ang mausik. "With this big development, it's a huge help in curtailing the drug menace, most specially here in our municipality as well as this will bring peace to each homes," matod ni Alegado. This posting includes an audio/video/photo media file: Download Now

Butuanon river viewing deck nahuman na Posted: 27 Mar 2021 06:25 AM PDT DUHA ka proyekto nga gitukod sa may Butuanon River lakip sa Green Corridor master plan sa dakbayan sa Mandaue nahuman na ug gi-turnover na ngadto sa barangay. Niadtong Marso 26, 2021, gipangulohan ni Mandaue City Mayor Jonas Cortes ang pag-turnover sa ikaduhang hugna sa Butuanon River Viewing Deck sa Barangay Ibabao-Estancia. Sigon ni Cortes nga karon nga ila nang gi-turn over ang proyekto, siya nagpaabot nga mokooperar ang mga opisyal sa barangay ug mga residente sa pagmintinar niini. Ang viewing deck usa ka parke nga puno sa mga punuan, diin mahimong makasuroysuroy ang publiko ug makita ang Butuanon River. Ang viewing deck sa habig sa Barangay Ibabao-Estancia usa lang sa pilot area sa Green Corridor sa siyudad. Kay ablihan na ang viewing deck sa publiko, sigon ni Cortes nga angay nga butangan na sab og mga kawani o mga tanod ang dapit aron mamintinar ang kalimpyo niini ug mapugngan ang paglabay sa mga basura sa sapa. Plano sab ni Cortes nga kon duna na unyay face-to-face classes sa dakbayan, giawhag niya ang mga tunghaan nga mobisita sa lugar isip apil sa civic participation ang mga estudyante. Lakip sa gi-turnover niadtong adlawa mao ang eco-fence nga gitukod sa Mandaue Chamber of Commerce and Industry (MCCI) isip public-private-partnership project. Ang katuyoan sa proyekto aron makoral na ang Butuanon River sa habig sa Barangay Umapad aron wa nay mga informal settler nga makatukod sa ilang barong barong sa three-meter easement sa sapa. Matod ni Cortes nga ang mga proyekto lakip sa Green Corridor master plan sa Siyudad nga gitumong aron makab-ot ang pangandoy sa Dakbayan nga mahimong "green city." (KFD) This posting includes an audio/video/photo media file: Download Now

1,800 nabakunahan sa anti-Covid sa Cebu City Posted: 27 Mar 2021 06:23 AM PDT KAPIN sa 1,800 ka medical workers ug barangay health workers (BHWs) sa Dakbayan sa Sugbo nabakunahan sa AstraZeneca vaccines sulod sa tulo ka mga adlaw sukad nagsugod ang Siyudad sa pagpamakuna niadtong Marso 24, 2021. Si Cebu City Health Department (CHD) officer-in-charge Jeffrey Ibones niingon nga ang CHD nitala og 1,825 ka medical workers ug BHWs nga gibakunahan sa AstraZeneca vaccine sa ikatulong adlaw, Marso 26. Ang Department of Health (DOH) Central Visayas nihatag kanila og tulo ka mga adlaw sa paggamit sa unang batch sa AZ shots nga gitagana alang sa Cebu City nga 1,600 ka doses, apan ang Siyudad nangayog dugang doses human mahurot ang unang batch. Ang Siyudad mopadayon sa pagpamakuna sa Lunes, Marso 29, sa duha ka sites, University of Cebu (UC) Banilad ug Robinsons Galeria. Matod ni Ibones nga ang Siyudad nagplano sa pagbakuna og 500 ka mga tawo matag adlaw. Matod ni Cebu City Councilor David Tumulak nga ang Siyudad nag-target nga mahurot ang nahabiling 1,575 ka doses sa AZ nga bakuna sa Miyerkules, Marso 31, sa di pa magsugod ang holidays. Apan si Tumulak niingon nga ang DOH Central Visayas wa mohatag kanilag deadline sa paggamit sa dugang 1,800 ka doses sa AZ vaccines nga gipadala sa Siyudad niadtong Marso 26. Si Tumulak niingon nga sa 1,825 ka mga tawo nga nabakunahan sa AZ, way nitaho nga nakasinati og dautang epekto. Duna na karoy dul-an sa 5,000 ka medical workers ug BHWs nga nakaparehistro online. Si Ibones niingon nga dugang mga nars ug doktor sa pribadong mga ospital nga wa pa unta makahukom atol sa gitakdang pagbakuna kanila sa ilang mga tambalanan, nagparehistro sa pagpamakuna sa Cebu City. "Gipanawag nato ang health care providers sa private clinics, stand alone doctors, schools nga nurses and doctors, para maapil gyud sila," matod ni Ibones. Matod niya nga ang gidaghanon sa gustong bakunahan nagpakita sa maayong resulta sa education drive nga gipahigayon sa CHD personnel. Si Ibones niingon nga mangayo sila og dugang doses gikan sa DOH 7 kon mahurot na ang second batch. Matod ni Ibones nga ang Siyudad mobakuna sa tanang medical workers, bisan asa pa ang address, basta ang mga klinika o tambalanan naa sa Cebu City. (JJL) This posting includes an audio/video/photo media file: Download Now

Pagasa: sugod nang ting-init Posted: 27 Mar 2021 06:19 AM PDT ANG Philippine Atmospheric Geophysical and Astronomical Services Administration (Pagasa) opisyal nga nideklarar sa pagsugod na sa ting-init sa nasod sa Biyernes, Marso 26, 2021 nunot sa pagkahuman na sa Amihan nga nagsugod niadtong Nobiyembre 6, 2020. Si Jhomer Eclarino, weather specialist sa Pagasa-Mactan station, niingon nga ang mapaabot nga average maximum temperature sa Abril naa sa 32.1 degrees Celsius samtang gipaabot kining mosaka sa Mayo. Siya niingon nga ang average heat index kun human discomfort index nga masinati sa tawo nga maapektuhan ang lawas alang sa Abril naa sa 38.2 degrees Celsius. Moabot usab kini og 41.4 degress Celsius sa Mayo. Matod sa Pagasa nga ang heat index nga moabot og 32 ngadto sa 41 degrees Celsius giila nga ubos sa extreme caution. Posilbleng epekto niini naglakip sa bikog ug kaluya sa kainit. Ang paglihok ubos sa grabeng kainit sa adlaw hayan moresulta sa heat stroke. Niini, si Eclarino nitambag sa publiko sa paglikay sa direktang pagkaigo sa adlaw gikan sa alas 10 buntag ngadto sa alas 3 sa hapon. (WBS) This posting includes an audio/video/photo media file: Download Now

Editoryal: Lisod ang RT PCR test Posted: 27 Mar 2021 06:18 AM PDT NIISYU si Mayor Edgardo Labella og executive order alang sa pag-require sa tanang moanhi sa Dakbayan sa Sugbo nga gikan sa ubang mga lalawigan, sama sa Bohol, Negros, Leyte ug uban pa nga mohatag og resultang negative sa RT-PCR test. Negatibo ang reaksyon sa publiko labina niadtong dunay mga kabanay nga moanhi unta dinhi o kadtong mga taga Dakbayan sa Sugbo nga gustong manguli dinhi, labina niadtong dugay nang nangatanggong ug mga manguliay nga overseas worker. Ang mayor igo lang sab nga nagsunod sa mando sa Inter-Agency Task Force (IATF) nga nag-require sa mga mamiyahe sa pagpakita og RT-PCR test ug uban pang mga dokumento nga nagtugot sa pagbiyahe sa hingtungdan. Lisod baya pud ning buhaton kay una, daghang mga dapit sa ubang mga lalawigan nga mokuha lang og swab test kon ang usa ka tawo nagpakita og simtomas sa coronavirus disease 2019 (Covid-19) kay daginuton ang ilang test kits. Mogasto usab og dako ang mokuha sa swab test. Labing minos naa ni sa P1,500 ngadto sa P2,000 ang test. Sa mga lalawigan nga hilit, sama sa Leyte ug Samar, gikinahanglan pang mobiyahe sa lagyo padung sa city ug town centers nga dunay pasilidad nga nagtanyag og commercial nga RT-PCR test. Mao kini ang mga kalbaryo nga agian sa mga tawo nga gustong mobiyahe apan pangitaan sa RT-PCR test ug uban pang rekisitos. Busa kadtong gustong mobiyahe aron moduaw o maglingawlingaw lang dinhi sa Dakbayan sa Sugbo, di na lang moanhi. Kadtong gustong mouli sa ilang mga lalawigan bisan silingan sa Sugbo, di na lang makahimo niini kay unyag balik, masango sila sa swab test nga lisod kaayong kuhaon. Masabot ang kahimangod sa katawhan nga usa ka tuig nang gilaming tungod sa mga quarantine procedure. Di ba kaha maayo nga ang paghigpit lang sa pagpatuman sa mga health protocol ug pag-monitor sa mangabot mas epektibong hinagiban? This posting includes an audio/video/photo media file: Download Now

Nalzaro: Retirement age 60 na Posted: 27 Mar 2021 06:17 AM PDT DAGHANG mga balaodnon karon ang naka-pending sa Kongreso nga usbawan o konhuran ang retirement age. Adunay balaod nga himuon nga 60 years old ang mandatory retirement sa mga sakop sa militar ug kapulisan gikan sa 56 years old. Kay matod pa baskog pa ang mga nagpangidaron og 56. Aduna say balaodnon nga ang ubang mga empliyado sa gobiyerno sama sa mga maestra, konhuran gikan sa mandatory nga 65 years old,himuon na lang nga 60. Kini aron kahatagan og kahigayonan ang mga batan-ong dugo nga makapangimpliyo sa gobiyerno. Adunay usa ka labor organization nga mihimo'g pagtuon sa mga trabahanteng Pinoy.Ilang nasayran nga dunay lima ka panglantaw o pag-ila sa ilang trabaho ang mga Pinoy. Adunay mi-ila sa trabaho nga 'calling', nga ang ilang pag-ila sa ilang pagtrabaho nga naghatag kanilag inspirasyon o ang ilang trabaho maoy ilang kinabuhi. Ikaduha, adunay mi-ila sa trabaho nga usa ka 'cause' o kawsa. Buot ipasabut nga ang ilang trabaho obligasyon nga angay gyud tumanon. Aduna say mi-ila sa ilang trabaho nga 'chore'. Buot ipasabot nga kinahanglan kang motrabaho aron mabuhi. Ug ang ikaupat nga matang gitawag og 'coast worker'. Kana bang dili kaayo importante niya ang iyang trabaho ug misulod lang siya niini sa dili tinuyo nga situwasyon. Apan mosugot kita'g sa dili ang Pinoy nanginahanglan nga manarbaho aron mabuhi ug aronmahimong mapuslanong sakop sa katilingban. Mao man gani hinungdan nga ang pag-retire sa trabaho maoy usa ka dakong desisyun para kaniya ug sa iyang pamilya. Sa situwasyon sa Pilipinas karon nga ang kinabag- an sa katawhan mga kabos, ang paghunung sa pagtrabaho magpasabot sa ka walay kasiguroan taliwala sa dili matagna nga kahimtang sa ekonomiya sa atong nasud. Ug bulahan kadtong mga tawo nga atong gi-ila nga nanarbaho dili lang aron mabuhi kon dili aron pagtuman sa mas taas pa niyang panglantaw sa kamahinungdanon sa iyang buhat. Kadtong mga tawo kang kansang panarbaho mao ang ilang kinabuhi. Kay matud pa sa bantugan nga si Louis Armstrong; 'Musicians do not retire. They stop when there is no more music in them.' (bobbygnalzaro@gmail.com) This posting includes an audio/video/photo media file: Download Now

Mongaya: Liza Soberano wa mahadlok ma-Red tag Posted: 27 Mar 2021 06:16 AM PDT NIANAM ang belib nako sa aktres nga si Liza Soberano. Abi nakog nitagam na niadtong gitawag siya nga nitabang sa mga Komunista dihang igo lang nahimong speaker sa usa ka forum sa Gabriela. Karon nangutana siya. Asa na ang suporta sa kagamhanan alang sa mga kabus? Kay nisaka og grabi ang mga kaso sa Covid-19, nag-lockdown na sab ang kagamhanan labi na sa Metro Manila ug mga silingang lalawigan. Kay di man sila manghatag og ayuda, gitawag kini og bubble kun buwa. Dihang gipangutana si Presidential Spox Harry Roque kabahin sa ayuda, nagkanayon ang kanahan nga naa may trabaho ang mga tawo. Ambot lang niining gusto molansar pagka senador nga moabot og 4 milyones karon ang walay trabaho. Gilantaw nga duna pay daghang mga mawagtangan og trabaho kay daghan pang mga negusyo ang mahagba. Unsaon man paglambo sa ubang mga negusyo kon mahadlok mogawas sa ilang balay ang mga tawo. Naa tuod daghan makit-an sa gawas. Apan nagdalidali. Di sab ingon niana ka daghan kon itandi sa una. Pinaagi sa Twitter, nangutana tawn kining batan-ong artista kabahin sa katawhan nga di pwedeng magpabilin na lang sa balay ug di motrabaho. "My heart bleeds for all the people who cannot afford to go out and work. They literally have to choose between dying of starvation or dying of covid. Is our country really this poor to be not able to provide stimulus?? Genuine question lang po." Mao kini ang gi-Tweet ni Liza sa miaging Marso 22, 2021 sa gabii. Ambot lang ning atong kagamhanan, langay kaayo magsigi og hulat sa mga bakunang donasyon. Mangutang aron makapalit kuno, apan daw perming nagduka. Gani, naa kitay lider nga nakalimot nga nakapirma na diay siya og balaod kabahin sa bakuna nga iya sab nga gisaway. Gialimungawan tingale. Apan kon bakuna man ang unahon, nganong mas dako ang budget alang sa imprastruktura ug paggukod sa mga Walhon. Masabtan kining budget sa imprastruktura. Dili kana tungod kay build, build, build. Nagpundo kana sila og mga dinagkong SOP alang sa umaabot nga piliay. Hapit na sab mahuman ang termino ni Presidente Duterte, magdali na kuno oi. Kining paggukod sa mga Walhon, nalakip niini ang pagpahilom nilang Liza ug ubang mga artista. Nakita na man nato nga kining gipang-red tag pamatyon. Kadtong mga batang Lumad nga gi-rescue kuno gikan sa usa ka retreat house di dayon i-release bisan pa sa usa ka court order. Kining pag-Red tag paagi sa usa ka diktadurya nga nahadlok matangtang sa poder. DM @anol_cebu This posting includes an audio/video/photo media file: Download Now

Diola: Mga judiong dako Posted: 27 Mar 2021 06:12 AM PDT Binasi sa Isaias 50:4-7; Salmo 22; Taga-Filipos 2:6-11; Marcos 14:1-15:47 Sa atong kultura dili komplimento nga ingnan ta nga "Judio kang dako" ilabina kon pinabundak kini. Sa ato pa, dili ta masaligan kay kusog tang momaneobra. Kuwarta ray atong giapas. Gani panahon sa Kwaresma, ilabina Semana Santa, hadlukon ang mga bata nga magsuroysuroy pinaagi sa hulga sa mga Judio nga mosikop kanila. Sa laing bahin, abri pod atong kabubut-on sa mga Judio. Gani sa panahon ni Presidente Quezon gidawat nato ang 1,300 ka mga Judio nga ming-eskapo gikan kang Hitler. Naluwas ug gipapuyo sila dinhi sa Pilipinas. Unya sa tuig 1947, sa dihang gitukod ang gitawag nga "modern state of Israel", ang usa sa mga unang midawat kanila mao ang Pilipinas. Gani kita ray gikan sa Asia. Ang atong pagkaJudiong dako maaninaw nato sa ebanghelyo karong adlawa. Taastaas gyod ang Pasyon sa atong Ginuo, duha ka kapitulo. Kapin kun kulang may 18 ka mga lahi nga episodyo, sama sa daotang laraw batok kang Jesus ug ang pagbudhi ni Judas hangtod sa kamatayon ug paglubong kang Jesus. Unya usa pa magsugod ang Misa, basahon pa gyod ang pagsulod ni Jesus ngadto sa Jerusalem. Naa bay punto kon mensahe nga mahimong modugtong niining tanang mga episodyo? Mahimong modugtong ang matubsanong gugma sa Dios nga makaluwas. Mao kini nagpaluyo sa tanang nahitabo kang Jesus. Gitubos kita niya tungod sa gugma sa Dios. Ang pagsulod niya sa Jerusalem mao ang inogurasyon sa kahingpitan sa iyang pagkahari ug pagkamesiyas. Tungod kay Judio man si Jesus, ang pagpahigayon sa iyang misyon nahitabo sulod sa kalibotan sa mga Judio. Gani mabasa nato diha sa Exodo 12 ang mga bulohaton sa mga banay nga Judio sa panahon sa Pangilin sa Pagsaylo. Binasi niini maaninaw nato nga ang bag-ong karnero sa Pagsaylo mao si Jesus, kansang dugo mipuli sa dugo sa karnero ug kansang kamatayon nagpahigayon sa matubsanong gugma sa Dios. Dili lalim ang matubsanong gugma. Wala tagoa sa Mesiyas ang "iyang panagway gikan sa mga insulto ug pagluwa" sumala pa ni propeta Isaias. Diha sa sulat ngadto sa mga taga-Filipos, gihubo ni Jesus ang iyang himaya ug gibatonan niya ang hulagway sa usa ka ulipon. Gikan pa diay sa pagkatawo ni Jesus hangtod sa iyang kamatayon nagpaubos siya. Gihimo niya kini aron mapakita niya ang matubsanong gugma sa Dios. Judio kitang dako kay si Jesus usa ka Judio. Judio kitang tanan kay pinaagi kanila ug sa ilang relihiyon diin nanukad si Jesus ug ang iyang mga unang sumusunod. Judio ka bang dako? This posting includes an audio/video/photo media file: Download Now

Mga pulis gipadala sa Isla sa Bantayan Posted: 27 Mar 2021 06:12 AM PDT KAPULISAN sa Probinsya sa Sugbo nipadalag mga sakop sa isla sa Bantayan sa Sabado, Marso 27, alang sa siguridad sa pagtimaan sa Semana Santa. Lakip sa pabutangan og daghang pulis mao ang mga tourist destination sa kalungsuran. Siento porsiento na nga andam ang kapulisan sa Probinsya sa Sugbo alang sa paghatag sa hugot nga siguridad sa pagtimaan sa Semana Santa. Matod ni Police Colonel Alladin Collado, hepe sa Cebu Police Provincial Office (CPPO), ilang gipatutukan ang isla sa Bantayan nga usa sa mga lugar sa probinsya sa Sugbo nga dugokonon sa mga turista panahon sa bakasyon ug ning Semana Santa. Tungod niini, magdugang si Collado og usa ka kompanya sa mga pulis gikan sa Provincial Mobile Force Company. Adunay laing pwersa nga standby force sa provincial command nga maoy ipadala sa mga lungsod nga paboritong bisitahon sa mga turista. "So, we are deploying one company there and we have also standby forces from here in the Province and we are requesting for another troops doon sa region," matod ni Collado. Tungod kay nadungan ang paghatag sa siguridad sa Semana Santa sa programa sa Philippine National Police (PNP) nga Oplan Summer Vacation, mag butang silag mga Alalay Center sa mga terminal ug pantalan sa Probinsya sa Sugbo. Pasabot ni Collado nga ang tumong sa mga Alalay Center aron mapahimangnoan ang mga mo suroy sa lalawigan unsaon pagbiyahe nga luwas sa disgrasya sa kadalanan. "There will be Lakbay Alalay Centers or areas kung saan ang mga police andyan aalalay sa mga kababayan natin na mga motorista. Enjoin the ano mga local counterparts nila sa probinsya kagaya ng Bureau of Fire at tsaka ng ibang stakeholders to participate on these activities," dugang ni Collado. Gimandoan usab niya ang iyang mga chief of police sa kalungsuran ug mga siyudad nga sakop sa probinsya sa Sugbo nga mag-alerto ug ipatuman ang kampanya batok sa kriminalidad sanglit daghan sa mga Sugboanon ang mamakasyon. Awhag usab niya sa mga Sugboanon nga sila mismo ang magbantay sa ilang mga butang ug dili biyaan ang ilang mga balay tungod kay mahimong target sa mga kriminal. This posting includes an audio/video/photo media file: Download Now

Ormoc nagtukod og convention center; BMX race track, badminton court isunod Posted: 27 Mar 2021 06:09 AM PDT ORMOC CITY - Gipahigayon sa Marso 24, 2021, ang groundbreaking ceremony sa tukuron nga Ormoc City Convention Center sa 11 hektaryang luna sa Barangay Juaton ning siyudad. Gawas sa convention center, daghan usab nga pasilidad ang tukuron sa lokal nga kagamhanan sa mao nga luna uban sa tabang ni Cong. Lucy Torres - Gomez. Matod ni Mayor Richard Gomez, nagsugod ang maong proyekto sa dihang nakita usab ni Cong. Gomez ang potensyal sa dakbayan nga modawat og dagkong meeting ug mga bisita gikan sa nagkalain laing lugar. "We were expecting that more tourists will come inside Ormoc City and we were preparing for MICE (Meetings, Incentives, Conference Exhibition)," matod sa mayor. Gawas sa 11 hektaryang yuta nga napalit sa LGU-Ormoc, naghatag usab og pundo si Cong. Gomez para sa pag-pasemento sa karsada gikan sa highway padung sa convention center. Duna usay dugang pundo si Cong. Gomez para sa paghimo og BMX Race Track ug badminton court. Giplanohan usab sa LGU-Ormoc ang paghimo og radial roads aron mas mapadali ang pagtaboktabok sa mga lumolupyo sa lain laing mga barangay. Pinaagi sa radial roads, ang mga tawo gikan sa Brgy. Juaton dali na nga makalahos sa Brgy. Dolores. Ang gikan sa Dayhagan makatabok na dayun sa Luna, samtang ant gikan sa Milagro makatabok na dayun sa Hibunaon. (JKDP) This posting includes an audio/video/photo media file: Download Now

Daclan: Ligaya, Dulcita gailog kang Dan? sa ‘Who Am I’ Posted: 27 Mar 2021 06:03 AM PDT Duha ka award winning, banggiitan ug beteranang Cebuana aktress mag-ilog sa usa ka award winning aktor? Tinuod kini pinaagi sa lenten drama special nga "Who Am I," kon nganong giilogan nilang Ligaya Rabago ug Dulcita Batausa Siroy si Dan Sy Lopez mas maayo nga tutokan ninyo ang maong lenten teledrama nga gisulat ni Restie Jumaoas Nur ug ubos sa direksyon ni Sam Costanilla. Ang "Who Am I" istorya sa pamilya, unconditional love, paglaum, kasuko, ug pagpasaylo. Duha ka suod nga amiga sukad pa niadtong high school nagkabangi dihang usa kanila mipasagop sa iyang anak nga lalake tungod sa kakabus niini. Sa dihang midako na ang bata nga nahimo nang ulitawo, bout na kining bawion sa tinuod nga inahan, gikan sa nagsagop niini. Dinhi nagsugod ang away ug panagbangi sa duha ka inahan nga maoy atong nuntan sa maong sugilanon. Kon unsay mahitabo sa kaulahian mao kini atong tutokan, masundan sab nato dinhi ang mga naagian sa anak ug kon asa siya mahipunta sa katapusan sa istorya. "Who Am I" gawas nilang Ligaya, Dulcita, ug Dan makauban usab nila dinhi silang Samantha Midel, Grace Torres Tantano ug uban pa. Ang maong lenten drama special produce ug ubos sa direksyon ni Sam Costanilla ug makita sa CCTN Channel 47 ning mosunod nga mga petsa: Marso 31 (6-7 sa gabii), Abril 1 (7-8 sa gabii), Abril 2 (7-8 sa gabii) ug sa Abril 3 (7:30-8:30 sa gabii). Makita usab kini sa Help TV Cebu karong Abril 4 alas 3 sa hapon ug Abril 5 alas 6 sa gabii. "Who Am I" ayaw kini ninyo og sipyata kay siguradong mopatulo usab kini sa inyong mga luha, di buh Dan Sy Lopez, Ay'g Saba ! * * * Atong nabalitaan nga magtukod og usa ka talent agency ang Maja Salvador kauban ang uyab niining si Rambo Nuñez. Tinuod kaha nga ang una niining mahimong talent mao si John Lloyd Cruz, wala pa hinuon kitay nadawat nga kompirmasyon, Pwede! di buh, Ay'g Saba! * * * Mosamot ka-init ang inyong summer karong 2021 kay hapit na ninyo makita ang teleseryeng "Init sa Magdamag." Sa trailer pa lang nga atong nakita grabeh ka init ug kaseksi ang mga eksena dinhi nilang Gerald Anderson, Yam Concepcion ug JM de Guzman. Siguradong panington mo sa kainit niini labi na sa mga love scenes nilang Gerald Anderson ug Yam Concepcion, okay ra kaha kini ni Julia Barretto? Tubag... Ay'g Saba! This posting includes an audio/video/photo media file: Download Now

Super Blowout: Miuyon sa plano sa Ginuo Posted: 27 Mar 2021 06:01 AM PDT GIKAN sa sungog-sungog hangtod sa panag-uyab ug karon gi-level up nila ni Jan Rolly Alcantara ug Mabel Noveda ngadto sa laing hugna ang ilang relasyon- ang kaminyuon. Niadtong Pebrero 27, 2021, nakasal ang duha sa Sto. Niño de Cebu Parish sa Barangay Mohon, siyudad sa Talisay. Nagsugod ang ilang relasyon sa trabahoan, Convergys. Top performer si Mabel sa ilang trabahoan, matod ni Jan, hinungdan nga na-admire kaayo siya niini. Samotan pa nga maayo og batasan, buotan, responsabli, manggihatagon, maluluy-on ug family-oriented nga pagkatawo. "Na-discover nako nga maayo sad siya moluto," dugang ni Jan. Sa habig ni Mabel, nagustohan niya si Jan tungod kay susama sila og batasan. Niabot og upat ka buwan ang pagpangulitawo ni Jan sa dalaga niadtong higayona. Niadtong Hulyo 21, 2019, gisugot ni Mabel si Jan. Paglabay sa usa ka tuig, ni-propose si Jan kang Mabel. Septiyembre 26, 2020, dihang gipangayo ni Jan ang kamot sa dalaga. "Naka-realized ko nga unsay plano ni Lord, niuyon ko," sigon ni Mabel. Si Padre Jonas Mejares, nabantog nga singing priest, ang nikasal nilang duha. Paambit sa duha nga espesyal gyud kaayo ang ilang kasal kay katulo sila gikantahan ni Fr. Jonas. Giasoy ni Mabel nga nagsagol ang iyang gibati dihang naglakaw na siya padung sa altar uban sa iyang amahan nga si Gil. Wa na siyay inahan. Mga miyembro sa banay ug suod nga mga higala sa duha ang nitambong sa ilang kasal. Nagpahikay usab si Jan alang sa mga kaliwat sa inahan ni Mabel didto sa Santa Fe, lalawigan sa Leyte, nga wa makatabok dinhi sa Sugbo gumikan sa pandemiya. (SCG) This posting includes an audio/video/photo media file: Download Now

Sotto kinahanglan mo-practice sa Gilas Posted: 27 Mar 2021 06:00 AM PDT PARA makapakita og igong labok sa international competition, kinahanglan ni Kai Sotto nga mo-practice sa Gilas Pilipinas. Kini ang pamahayag ni SBP program director Tab Baldwin ug kinahanglan siyang mobalik sa Pilipinas aron iyang ma-kabisado ang sistema nga ilang sundon kuyog ang ubang Gilas stalwart. "To be part of that team, you have to be integrated, and to be integrated to that team, you have to be in the training," matod pa ni Baldwin sanglit ni-commit si Sotto nga moduwa sa Pinas para sa qualifying tournament sa World cup. Gihulagway ni Baldwin nga sa higayon nga moduwa si Sotto, sigurado siya nga nakatutok ang tanang NBA scout lakip na ang gikan sa Europe. Si Sotto niatras sa gipahigayon nga training bubble sa Gilas didto sa Inspire Sports Academy sa Calamba Laguna ug nibalik didto sa US aron ipadayon ang iyang nabiyaan nga training. "For Kai to have the best experience here, he needs to be part of the training for no less than three weeks. This is a condition, it might be four, it might be two, and we have to continue to talk to Kai and his people and see what his schedule looks like and find for a solution, but it really, genuinely needs to be the best solution for Kai as the basketball player and the team." dugang ni Baldwin. Gihulagway sa coach sa Gilas nga mahimong dehado si Sotto kon moderitso ra kini og duwa nga dili moapil sa ilang pagbansaybaansay bisan sulod lang sa pipila ka semana. "If Kai comes back and plays for the team but doesn't train with us, I think he's going on the court and look bad. And I don't think that's fair to him and his prospects because nobody kids themselves, NBA coaches are watching everything that Kai does," pasabot sa SBP program director. Ang Gilas padayon nga nangandam para sa third window sa 2021 Fiba Asia Cup didto sa Clark para karong buwan sa Hunyo ugbsa Fiba Asia Cup didto sa Indonesia karong buwan sa Agusto. (PAC) This posting includes an audio/video/photo media file: Download Now

Vallena: Kalisod sa tahas Posted: 27 Mar 2021 06:00 AM PDT KALISOD sa pagdumala og lokal nga kagamhanan kay grabe ang labad sa ulo. Kana lang pagmintinar sa kahawan sa mga bike lane ug sidewalk di lalim nga tahas. Nakaingon ko ani kay matag biyahe nako, naay daghang mga sakyanan nga kon wa sa bike lane nag-park, naa kini sa sidewalk nagpatong. Niadto lang mga adlaw nga nag clearing operation ang City Hall tungod sa laing hugna sa road clearing operation nga gimando sa Department of the Interior and Local Government (DILG), daghang mga sakyanan, two-wheeled ug four-wheeled ang nakarga ug na clamp tungod sa pagpatakag park. Karon nga gitinuod na sa Siyudad sa Sugbo ug Department of Public Works and Highways, uban sa DILG ang pagpamutang og bike lanes, way puas ang pagsiaw sa badlungong mga driver. Bisan duna nay plastic bollards nga gipamutang, naa gihapoy car wash ug mang-park nga mga taxi. Gihimo sab ning pathway sa mga tawo nga wa na magsalig sa sidewalk nga gamay, ari na sa bikelane mopaso. Dedma ra ba intawon ang mga biker nga nagsubay. Ning dagana, dako kaayong tahas ug gimbuhaton nila ni manlalaban Gerry Carillo ang paghawan sa mga bike lane gikan sa mga obstruction. Magtukod na lang gud sila og grupo sa mga job order nga mga kawani aron tahasan sa pagtutok sa paghawan sa bike lanes pinaagi sa pagdakop ug pag-isyu og citation tickets. GALABAD Basin naglabad sab ang ulo ni CCTO acting head Lyntoni Sable tungod sa kadaghang mga badlungon sa karsada. Unya naa pa ning pagbantay sa mga bike lane. Busa, sakto ra sab ang plano ni Carillo nga magtukod og buhatan ang Sugbo Bike Lanes Board nga tahasan sa pagbantay sa lanes. Dinhi bitaw naklaro nga daghan sa atoang kaigsuonan nga kuwang og disiplina ug masuko pa kon badlungon. Bisan kon gahig ulo, angay nga ipatuman ang ordinansa bisan unsa pa ang reaksyon sa mangaigo aron matanom ang disiplina sa katawhan. Ang kakuwang ra sa disiplina, bunga sa urong-sulong nga pagpatuman sa balaud. Tungod sab sa kakuwang sa enforcement, ang mga sayop nahimo nang ensakto. Mao nang mga tawo morebenta na. Apan aron pagdisiplina, kinahanglan ang consistency sa pagpatuman sa mga ordinansa ug balaud sa kadalanan. MGA PLANO Daghan og maanindot ang bike board sa Dakbayan sa Sugbo. Aktibo ang board ubos sa liderato ni Carillo. Apan kahibawo ko nga naglisod sila si Carillo ug kaubanan sa pag-edukar sa publiko sa mga ordinansa sa trapiko, labina sa bike lanes. Nagplano sila sa paglusad og information drive ug education campaign sa publiko aron maedukar sa kagamitan sa bike lanes, unsay gitugot ug unsay gidili. Bisan ako, nagsige kog pakigsulti niya aron pagklaro sa pipila ka mga punto. Duna ra bay wa makauyon sa paghigpit sa pagpatuman sa bike lane ordinance. Sa akong nasabtan sa mensahe sa nasudnong kagamhanan, gidasig ang katawhan sa pagbiseklita, labina na ning panahon sa pandemic. Angay lang tang malipay nga naa nay 100-kilometer bike loop nga angay tang ampingan ug tahuron. This posting includes an audio/video/photo media file: Download Now

Ang asawa ni MJ Posted: 27 Mar 2021 04:53 AM PDT Siya si Yvette Prieto, 41 anyos, usa ka sikat nga American model. Siya ang giila nga labing gwapa ug sexy nga asawa og NBA star gikan sa 25 ka paresan nga gipilian human iyang nadagit ang kasingkasing ni Michael Jordan nga maoy gikonsiderar nga greatest of all time. Ang duha gikasal niadtong 2013 ug aduna silay anak nga kaluha nga silang Isabel ug Victoria. Nagkita ang duha niadtong 2007 sa usa ka bar ug nagsugod og live-in niadtong 2009 ug na-engage niadtong bisperas sa Pasko sa 2011. (PAC) This posting includes an audio/video/photo media file: Download Now

Nets, Jazz nakaipsot Posted: 27 Mar 2021 04:53 AM PDT DIRIYOT mangapukan ang mga championship contender sa mga huyang nga team atol sa ilang mga duwa kagahapon, Marso 27, 2021. Nakaipsot ang Brooklyn Nets sa mga kamot sa Detroit Pistons, 113-111 samtang nakasugakod ang Utah Jazz sa taas nga rally ug pagpanghudlat sa Memphis Grizzlies 117-114. Si Blake Griffin ang bag-ong magduduwa sa Nets maoy second leading scorer kinsa nipuga og 17 puntos atol sa iyang unang pagduwa batok sa iyang team sa wala pa siya nitapon sa Brooklyn. "They're a hard-playing team. I don't know if you expect to get elbowed, but I knew it was going to be chippy. They are going to play hard," matod pa ni Griffin. Apan si James Harden maoy naggiya sa Nets nga nipaarak og 44 puntos 14 rebounds ug 8 ka assists aron angkunon ang kadaugan bisan kon wala silang Kevin Durant ug Kyrie Irving. Si Dwayne Casey, coach sa Pistons, nagdumili na sa paghatag og pamahayag ngadto kang Griffin, kinsang team nihatag og tribute sa ilang kanhi player diin ang bag-ong pambato sa Nets niduwa og kapin tulo ka tuig sa Piston. Ang Detroit gipangulohan ni Jerami Grant pinaagi sa iyang 19 puntos. Samtang ang star sa Jazz nga si Donovan Mitchell nipabuto og 35 puntos aron giyahan ang Utah paingon sa kinababwan sa standing sa NBA. Si Rudy Gobert niabag og 25 puntos samtang 14 puntos kang Filipino American guard nga si Jordan Clarkson. Si Ja Morant sa Grizzlies nihipos og 30 puntos ug 11 assists samtang 14 puntos ug 18 rebounds ang iyang teammate nga si Jonas Valanciunas nga maoy bugtong nilang pilde sa upat ka duwa. Ang Memphis aduna untay tsansa nga makatabla human nasipyat ni Mitchell ang iyang itsa sa nahabiling 14.4 seconds apan nasipyat ni Brooks ang iyang tira sa tres ug nakuha ni Mikr Conley gikan sa jumpball ang bola nga maoy nagsilyo sa ilang kadaugan. Samtang giputol sa Los Angeles Lakers ang ilang upat ka sunodsunod nga kapildehan ug nidaog batok sa Cleveland Cavaliers, 100-86. Si Montrezl Harrell maoy nangulo sa Lakers pinaagi sa iyang 24 puntos ug 10 rebounds sanglit wala ang ilang duo superstar nga si LeBron James ug Anthony Davis kinsa pulos adunay injury. (PAC) This posting includes an audio/video/photo media file: Download Now

You are subscribed to email updates from https://www.sunstar.com.ph/. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States