https://www.sunstar.com.ph/

---

• Bike board mokuhag enforcers mobantay sa bike lanes
• Lalake mipiyansa sa kaso gi-ambush, patay
• Wala'y Big 3, Nets kuyaig
• Heat, 76ers gusto mokuha ni Lowry
• Ancajas positibo sa Covid?
• Sports taliwala sa pandemya gituki sa NSS
• Magic wala nahadlok sa bakuna
• Minugbo sa PBA: Paras mipirma sa Blackwater
• Serna: Jessica Villarubin garbo sa mga Sugboanon
• Super Suroy: Garbo sa Pinamungajan: Campalabo
• Talk to Papa Joe: Obligar
• Rabacal: Bag-ong oposisyon
• Barrita: Pananom og utanon taliwa sa Covid-19
• Lapu SK tsirman mibuak sa pagpakahilom
• Nalzaro: Sugat ipahigayon gyud?
• Editoryal: Gakson ang kausaban
• Mondigo: Pantalan sa Medellin buksan alang sa pagpalambo sa ekonomiya
• 10 na ka NPA namatay sa engkwentro sa Negros
• Online sabong gitun-an ni Labella
• 300 ka pamilya sa Ermita ibalhin og building
• Mga rota sa TPUJ hayan ibalik ni Labella
• Traffic light ‘buksan’; P. del Rosario sirhan
• 50K ka trabahante sa Mandaue bakunahan
• ‘Kawatan’ nailhan kay ga-selfie, gatiktok

Bike board mokuhag enforcers mobantay sa bike lanes Posted: 25 Mar 2021 10:23 PM PDT MAG-UMOL og grupo nga motutok sa pagbantay sa mga bike lane sa Dakbayan sa Sugbo ang Sugbo Bike Lanes Board taliwa sa padayong paglapas sa mga drayber sa bike lane ordinance. Si Atty. Gerry Carillo, tsirman sa board, nibutyag nga mangayo sila og P6 million nga pundo nga ilakip sa supplemental budget gikan sa Konseho aron magamit alang niini. Matod ni Carillo nga di matutokan sa Cebu City Transportation Office (CCTO) ang pagbantay sa bike lanes gikan sa mga obstruction tungod sa kalapad sa siyudad ug kadaghan sa mga gimbuhaton niini. Si Carillo niingon nga nagkinahanglan sila og 40 ka mga job order nga kawani alang niini. Bansayon ang mga personnel ug kahuman, ipakatap sila sa kadalanan kada adlaw aron mobantay sa mga driver nga badlungon ug mangisyu og citation ticket sa mga makalapas. Matod ni Carillo nga bisan sa subsob nga pagpanghawan sa CCTO sa mga nakababag sa mga karsada, daghan lang gihapon ang nagpabadlong. Usa ka netizen nga si Tan Kel ni-post sa Facebook sa iyang nakuhang hulagway sa mga taxi nga nakapatong sa bike lanes bisan kon duna nay plastic bollards. Ang board nagpakitabang na sa pagsubay sa operators aron makapanubag ang mga drayber sa mga taxi unit nga wa magtahod sa bike lanes bisan kon duna nay plastic bollards nga gibutang. Niadtong Lunes, Marso 23, 2021, gisugdan sa Cebu City ug Department of Public Works and Highways (DPWH) ang pagbutang og bollards sa bike lane sa dan V. Rama. Tumong niini aron wa nay mga illegal parking, magbutang og vulcanizing shop ug car wash. (REV) This posting includes an audio/video/photo media file: Download Now

Lalake mipiyansa sa kaso gi-ambush, patay Posted: 25 Mar 2021 09:57 PM PDT USA ka 48 anyos nga lalake nga gikan nipiyansa sa iyang kaso sa illegal nga drugas sa korte namatay human gibanhigan sa Biyernes sa alas 11 pasado sa buntag, Marso 26, 2021 sa wa pa mailhing mga mamumuno nga nagsakay og duha ka mga sakyanan sa Barangay Don Virgilio Gonzales, lungsod sa Medellin, amihanang Sugbo. Si Medellin Police chief Major Wilter Grapa niila sa biktima nga si Reynaldo Batad Arcenal, giingong usa ka drug personality nga taga lungsod sa San Remegio. Matod ni Grapa nga si Arcenal luwan sa iyang Toyota Innova kuyog ang iyang unom mga kabanay, uban kanila mga bata, gikan nipiyansa sa kasong illegal drugs sa korte sa Dakbayan sa Bogo dihang gi-ambush. Si Grapa niingon nga pag-abot sa awaaw nga dapit nga gitung-an sa katubhan, duha ka mga sakyanan, giingon nga ang usa pick-up truck, nibabag sa agianan. Ang usa nipwesto sa atubangan samtang ang usa sa likod. Nanganaug ang walo ka armadong mga tawo, uban kanila nagtaptap, dayon gipahapa ang mga kuyog ni Arcenal una pa siya girakrakan samtang naglingkod sa passenger's seat sa likod sa driver. Igsuong babaye ni Arcenal giingong samdan sa bukton human napagan. Matod ni Grapa nga si Arcenal daut na kay dunay lung cancer hinungdan nga makagawas gawas sa bilanggoan sa Medellin aron magpatambal. Mga sakop sa Scene of the Crime Operation (SOCO) sa Cebu Police Provincial Office naa na sa crime scene. Si Police Colonel Alladin Collado, hepe sa CPPO, nimando sa kapulisan sa Medellin pagpalawom sa imbestigasyon aron pagtumbok sa motibo ug pag-ila sa killers. (AYB/GPL) This posting includes an audio/video/photo media file: Download Now

Wala'y Big 3, Nets kuyaig Posted: 25 Mar 2021 10:32 AM PDT Sa labing unang higayon, wala'y bisan usa sa Big Three sa Brooklyn Nets ang ningkombati ug ang resulta, gipanglubong sila og taga liog batok sa host Utah Jazz, 118-88, kagahapon sa National Basketball Association (NBA). Ang Jazz, nga ningpahugot sa ilang paggunit sa overall leadership dala ang 32-11 nga rekord, wala'y kaluoy nga ningmakmak sa Nets, nga ningkombati nga wala sila si James Harden, Kevin Durant ug Kyrie Irving. Si Harden wala nakaduwa gumikan kay nagsakit ang tangkugo niini, si Durant padayon pang nagpaalim sa iyang angol (left hamstring strain) samtang si Irving wala miduwa tungod sa personal nga rason. Taliwala sa dako nilang bintaha, ang Jazz wala ningkumpiyansa bisan gamay ug gidominar na nila ang duwa sa 1st quarter pa lang hangtod na sa katapusang gutlo. "The biggest thing was trying to be aggressive, get downhill, make plays, get on the rim and finish," matod sa usa sa mga sinaligan sa Jazz nga si All-Star Donovan Mitchell. "That was just my mindset from the jump." Ang Jazz gipangulohan ni Mitchell pinaagi sa iyang 27 puntos, ningdugang og 18 puntos matag usa sila si Bojan Bogdanovic ug Mike Conley samtang niamot og 15 puntos si Georges Niang. Sa 1st quarter pa lang, ang Jazz nakamugna na dayon og 21 puntos nga labaw ug wala nila hatagi og kahigayunan ang Nets nga makapanghudlat hangtod sa pagtiklop sa duwa. "We want to play against guys like KD, Kyrie, James Harden — that's what competitiveness is ... but we're not gonna change how we play or our mindset because those guys aren't in the game," dugang ni Mitchell. Si Alize Johnson, kinsa gipapirma sa Nets og 10 ka mga adlaw nga kontrata, nimugna og iyang career-high 23 puntos ug 15 rebounds aron pangulohan ang Nets samtang niamot og 14 puntos si Timothé Luwawu-Cabarrot. "That's a great team. That's the team with the best record in the league. We went out there severely undermanned. Most importantly, (our players) stuck together and played hard," pasabot ni Nash. (AP) This posting includes an audio/video/photo media file: Download Now

Heat, 76ers gusto mokuha ni Lowry Posted: 25 Mar 2021 10:32 AM PDT Karong adlawa maoy trade deadline sa 2020-21 season sa National Basketball Association (NBA) ug ang labing giatangan nga estorya mao ang kabahin ni All-Star Kyle Lowry. Magpabilin kaha si Lowry sa Toronto Raptors o mabalhin sa laing team? Usa kini ka pangutana nga mismong si Lowry dili makatubag. "I wish I could give you a decision," matod ni Lowry, kinsa natunong nga mag-35 anyos karong adlawa. "At the end of the day, if something happens, it happens. And if it doesn't, it doesn't, right? Everything happens for a reason. I personally, right now, I don't know." Lakip sa mga interesado nga mokuha kang Lowry mao ang Philadelphia 76ers ug Miami Heat, pulos contenders sa Eastern Conference. Kinsa kaha ang buhian sa 76ers ug Heat aron ibaylo kang Lowry? Mao kini ang dakong pangutana. "Guys have to go through this every single year and it just gets noisier and noisier every year," matod ni Miami coach Erik Spoelstra. Gawas kang Lowry, ang ubang dekalidad nga mga magduduwa nga posibleng mabalhin sa laing team mao sila si Victor Oladipo sa Houston Rockets ug Aaron Gordon sa Orlando Magic. (AP) This posting includes an audio/video/photo media file: Download Now

Ancajas positibo sa Covid? Posted: 25 Mar 2021 10:32 AM PDT Posibleng mauswag ang pagdepensa ni International Boxing Federation (IBF) super flyweight champion Filipino Jerwin Ancajas batok kang Mexican Jonathan Javier nga gikatakda karong Abril 10, 2021 sa Amerika. Sa taho sa www.philboxing.com kagahapon, giingon nga miresulta og positibo ang labing ulahing Covid-19 test ni Ancajas. Hinuon wala pa mohatag og kompirmasyon kabahin niini ang bag-ong promotional outfit ni Ancajas nga mao ang Premier Boxing Champions ni Al Haymon. Gituohan nga giklaro pa sa PBC ang sitwasyon ni Ancajas gumikan kay naturokan na man kini og unang dose sa bakuna ning bag-uhay lang. Apan kon makompirmar nga positibo si Ancajas sa Covid-19, hayan gilaumang mauswag ang ilang away ni Javier. Kon mao kini ang mahitabo, maapektuhan niini ang pangandoy ni Ancajas nga ikaharong ang labing bantugang mga boksidor sa iyang timbang nga sila si Srisaket Sor Rungvisai, Juan Francisco Estrada ug Roman "Chocolatito" Gonzalez. Dili pa lang dugay, ang co-promoter ni Ancajas nga mao ang MP Promotions ni Filipino boxing legend Manny Pacquiao mibutyag nga dako ang kahigayunan nga matuman na ang pangandot ni Ancajas kon modaog kini batok kang Javier. Si Ancajas taodtaod na sab nga naggunit og world title apan wala kaayo kini nabantog sa tibuok kalibutan tungod kay wala niya ikasangka ang labing dekalidad nga mga boksidor sa iyang timbang. / ESL This posting includes an audio/video/photo media file: Download Now

Sports taliwala sa pandemya gituki sa NSS Posted: 25 Mar 2021 10:30 AM PDT Ang estado sa paugnat sa kusog taliwala sa pandemya maoy gituki sa ikawalo nga session sa National Sports Summit 2021 nga gipahigayon online kagahapon, Marso 25, 2021. Si international orthopaedist ug sports medicine practitioner Dr. Randolph Molo mao ang resource speaker sa online lecture-forum nga giorganisar sa Philippine Sports Commission (PSC) ubos sa liderato ni Chairman William "Butch" Ramirez. Si Molo mao ang head sa Medical Scientific Athletes Services (MSAS) Unit sa PSC ug miyembro pud sa International Football Medicine and Doping Panel sa Fédération Internationale de Football Association (FIFA) ug Asian Football Confederation (AFC). Ang experience ni Molo kabahin sa paugnat sa kusog ug sa iyang mga proyekto karon sa bubble-training sa mga atleta mao ang iyang gihisgot sa mga partisipante. Si Molo mao ang nangulo sa sports exercises sa Olympic-bound national athletes nga hugot nga nag-training karon pinaagi sa usa ka bubble set-up. Matod ni National Training Director Marc Velasco nga ang maong topic makahatag og ideya sa mga partisipante kon giunsa pagpadayon ang sports life taliwala sa health crisis nga giatubang karon sa tibuok kalibutan. Ang National Sports Summit naghisgot og managlahing topic kabahin sa paugnat sa kusog. Tungod sa pandemya gihimo kining online sa sports agency. (RSC) This posting includes an audio/video/photo media file: Download Now

Magic wala nahadlok sa bakuna Posted: 25 Mar 2021 10:27 AM PDT Nagpabakuna na batok sa Covid-19 ang National Basketball Association (NBA) legend nga si Earvin Magic Johnson kagahapon sa USC School of Pharmacy vaccination site sa California, USA. Si Johnson, kinsa kanhi 5-time NBA champion, adunay HIV (human immunodeficiency virus ) hinungdan nga hinay ang immune system kompara sa uban ug dakong risgo alang kaniya ang magpabakuna batok sa Covid-19. Apan bisan pa niini, ang kanhi Los Angeles Lakers superstar wala magmakuli sa pagpabakuna. Kuyog ni Johnson nga nagpabakuna ang iyang mga higala nga sila si actor/comedian Arsenio Hall ug actor/entrepreneur Danny Trejo. Ang giturok kang Johnson mao ang Pfizer Covid-19 vaccine. "Today I got my first dose of the Pfizer vaccine. I'm so excited to have taken one of the final steps to protect myself and my family from Covid-19," post ni Johnson sa iyang opisyal Twitter account. Gipasalamatan pud ni Johnson si Mayor Eric Garcetti sa paningkamot niini sa vaccination centers ug sa pagseguro nga malakip ang tanan hilabi na ang African-American ug Latino communities. Niadtong Nobiyembre 1991, opisyal nga gianunsiyo ni Johnson nga positibo siya HIV, usa ka kagaw nga hinungdan sa sakit nga acquired immunodeficiency syndrome (Aids). Miretiro si Johnson sa NBA niadtong tuiga. Daghang netizens ang mikomento sa pagpabakuna ni Johnson kay usa man kini ka icon di lang sa sports lakip na sa tibuok black community. Adunay miingon nga nalipay siya tungod kay nagpabakuna na si Johnson, kinsa usa sa iyang mga idolo sa basketball kauban sila si Larry Bird, Charles Barkley ug Michael Jordan. Matod pa sa netizen nga si Dwayne Todd nga maayo ang gibuhat ni Johnson sa pag-publicize sa iyang bakuna kay makatabang kini alang sa information drive kabahin sa importansiya sa pagpabakuna aron makuha ang herd immunity sa komunidad. Ang 61-anyos nga si Johnson nasulod sa NBA niadtong 1979 isip first overall pick sa Los Angeles Lakers. Sa gitas-on nga 6-foot-9, si Johnson ang labing taas nga nahimong pointguard sa NBA. Sa iyang playing career, nailado si Johnson tungod sa classic rivalry sa Lakers-Celtics ug Magic-Bird. Nahimong 3-time Finals MVP, 3-time Season MVP, 2-Time NBA All-Star Game MVP, 4-time NBA assist leader, 2-Time steal leader ug 12-time NBA All-Star si Johnson. Gituldokan ni Johnson ang iyang basketball career sa NBA bawon ang 17,707 puntos, 6,559 rebounds ug 10,141 assists sa kinatibuk-an. (RSC) This posting includes an audio/video/photo media file: Download Now

Minugbo sa PBA: Paras mipirma sa Blackwater Posted: 25 Mar 2021 09:57 AM PDT Mipirma na og kasabutan si Andre Paras ug ang laing duha ka rookies nga gipangpili sa Blackwater Elite sa miaging Philippine Basketball Association (PBA) drafting. Gawas kang Paras, segurado na sab nga makaduwa sa Elite sila si Mark Acuno ug Joshua Torralba. Gitataw ni Team owner Dioceldo Sy nga ang gipirmahan sa tulo dili pa ang opisyal nga kontrata kon dili ang kasabutan kabahin sa ilang gitanyag. Gipaneguro ni Sy nga makaduwa ang tulo sa umaabot nga season ug pormalidad na lang ang kuwang sa ilang pagkahimong sakop sa Elite. (ESL) PBA sked guba tungod sa Covid Giangkon ni Philippine Basketball Association (PBA) commissioner Willie Marcial nga naapektuhan ang ilang giplanong eskedyul sa umaabot nga 46th season gumikan sa kalit nga pagsaka og balik sa mga kaso sa Covid-19 sa Metro Manila. Sa orihinal nilang plano, sugdan unta sa PBA ang bag-ong season karong Abril 11, 2021 apan tungod sa sitwasyon, naahat silang iuswag kini karong Abril 18, 2021. "Nabulabog pati 3x3," pasabot ni Marcial nga napatik sa www.pba.ph. "Paano sisimulan eh hinto ang lahat? Mahirap gumawa ng programa at schedule."(ESL) Nabong adunay bag-ong team Nakakita og bag-ong panimalay ang beteranong si Kelly Nabong sa Philippine Basketball Association (PBA). Si Nabong nahimong free agent dihang wala na siya gipapirma og bag-ong kontrata sa NorthPort Batang Pier human sa PBA Philippine Cup bubble. Gipasabot sa Blackwater management nga nakadesisyon silang kuhaon si Nabong gumikan kay nakaduwa na kini kanila dihang nagkampanya pa lang sila sa D-League. Gawas sa NorthPort, si Nabong nakaduwa sab kaniadto sa San Miguel Beermen ug Meralco Bolts. (ESL) This posting includes an audio/video/photo media file: Download Now

Serna: Jessica Villarubin garbo sa mga Sugboanon Posted: 25 Mar 2021 09:57 AM PDT Ang Power Diva ug The Clash Season 3 grand champion nga si Jessica Villarubin padayon nga naghatag dugang garbo sa iyang mga paisanong Cebuano. Karong bag-o lang gipagawas ang iyang debut single nga "Ako Naman" nga sinulat sa Asia's Romantic Balladeer nga si Christian Bautista. Si Christian usa sa mga hurado sa The Clash ug ang iyang hinimong kanta nga mao ang winning piece ni Jessica nag-asoy sa mga na-agian sa dalaga gikan sa pagka yano nga Cebuana nga may dagkong mga damgo ngadto sa pagka Kapuso performer Ang "Ako Naman" mao ang winning piece ni Jessica sa maong bangga sa pag-awit sa GMA 7. Nanghinaut si Jessica nga daghan ang ma-inspire sa maong kanta. Nagpasalamat usab siya sa suporta sa mga Cebuano sa pagkab-ot niya sa iyang damgo. Daghan ang iyang nakat-onan sa maong bangga base sa mga tambag sa mga hurado ingon man ang pagpakigsandurot sa mga tawo nga naglibot kaniya. Ang "Ako Naman" anaa na sa Spotify, YouTube Music, Apple Music ug ubang mga digital streaming platforms. Usa sa mga artista sa bag-o lang gisugdan nga teleserye, "Huwag Kang Mangamba" si Diether Ocampo nga taudtaud na usab nga wa makita sa iyang mga magdadayeg. Usa si Diether sa grupo sa mga lalaki nga gitawag kanhi ug The Hunks nga gilangkuban nila ni Piolo Pascual, Jericho Rosales ug Carlos Agassi. Ning pagbalik ni Diether sa showbiz si Carlos na lang ang gipaabot nga mohimo usab sa iyang comeback vehicle. Sa niaging semana bugtong si Klarisse de Guzman ra gyud, isip Minnie Repperton, ang nakahatag og hustisya sa titulo sa programa nga "Your Face Sounds Familiar" kay medyo duol sa dagway ni Minnie ang iyang hitsura ug tingog. Si Jhong Hilario medyo duolduol sa gisundog niini nga si Vhong Navarro pero wa kaayo niini makopya ang tingog sa iyang ka-Streetboys kanhi. Ang uban, medyo nakakopya sa tingog pero layo ra gyud intawon ang dagway sa ilang gisundog nga mag-aawit. This posting includes an audio/video/photo media file: Download Now

Super Suroy: Garbo sa Pinamungajan: Campalabo Posted: 25 Mar 2021 09:56 AM PDT Sa higayon nga motunga ang sandbar atol sa hunas, daw mora og dalagang putli nga kung dili ka molingi imong pagabasulan sa tibouk mong kinabuhi. Ang gibana-bana nga usa ka ektarya nga kutay sa puti nga balas sa Barangay Tajao, ang Campalabo Islet nga mogimaw atol sa paghunas sa dagat ang gipanalipdan ug gi-ampingan sa lokal nga kagamhanan sa Lungsod sa Pinamungajan. Kon basehan ang panulti-on kaniadto sa mga katiguwangan nga ang pangalan nga Campalabo gikan sa termino nga dakong kampana. Atol niadtong panahon sa Katsila giingong ang dakong kampana sa Pinamungajan nga nagsilbi kaniadto nilang bahandi ang giingong gikawat ug giingong gilabay sa tunga-tunga sa dagat. Nagpabilin sa tinuohan sa pipila ka mga Pinamunganjanun nga human sa maong hitabo adunay katingalahan sa maong lugar sa dihang puti nga balas ang motumaw atol sa ting-hunas nga mopormang islet. KATAHOM Gamayng tapok sa mga puting balas nga gilibutan sa laglum nga mga dagat. Gamayng isla diin nimo makita si Kanlaon nga igo nalang sa paghandum sa iyang katahom. Usa ka sangtuaryo taguanan salipdanan sa mga isda matag panahon sa bagyo. Mawala kon mota-ob,makita kada hunas. Sa bidlisiw sa adlaw makita iyang kaanyag sa Barangay Tajao. Garbo sa Pinamungajan kay nag-inusara kining sand bar sa tibuok Tersero Distrito. Sa wa masayod o masuheto sa lokasyon nahimutang ang Campalabo sa Tañon Strait, diin makita sa atbang ang bulkan sa Kanlaon sa lalawigan sa Negros. Ang naasoyng islet natung-an sa abunda nga marine life sa kadagatan sa Pinamungajan tungod kay anaa sab ang marine sanctuary nga haom alang niadtong buot mag-snorkeling. UNSAON PAG-ADTO? Ang Barangay Tajao, Pinamungajan, Cebu gibana-bana nga adunay gilay-on nga duha ngadto sa tulo ka oras nga biyahe kon manukad sa Dakbayan sa Sugbo. Alang niadtong walay pribadong kasakyan mamahimong mosakay og bus sa South Bus Terminal sa N. Bacalso Avenue, Cebu City. Kanaog sa Barangay Tajao sa maong lugar mangutana lang og asa maka-abang og sakayan o pumpboat paingon ngadto sa Campalabo Sandbar. BUDGET Gibana-bana nga anaa sa P1,500 ang abang sa pumpboat apan mamahimo rang ikasabot ang bankero o operator kon mohangyo sa kantidad. Manukad sa Community Fish Landing Center sa Tajao ang pumpboat. Anaa sa 20–30 minutos nga biyahe sa pumpboat paingon sa sandbar. Pahinumdum nga ang lokal nga kagamhanan sa maong lungsod mangayo og environmental fee nga P50 matag tawo. TIPS Palit lang og bawon nga pagkaon ug mainom sa dili pa molawig sa pumpboat. Walay cottage sa area apan adunay istraktura sa Bantay Dagat sa lokal nga kagamhanan ug mamahimong makasilong ang mga mosuroy sa dapit. Gidili ang pagbutang og tent sa sandbar. Pahinumdum sa mga dumoduong nga ayaw pagbilin og basura sa maong lugar. Masobra na sa 20 katuig ang milabay nga wala ko makabalik sa Campalabo human niining labing uwahi nakong pagsuroy sa lugar. Apan ang akong garbo ug gugma sa Campalabo magapabilin bisan asa pa ko moadto. CONTRIBUTOR Phil Bert Undalok, 39, lumad nga taga-Poblacion, Lungsod sa Pinamungajan, Sugbo ug usa ka freelance sales agent kansang hilig mao ang music ug ang pagsuroy-suroy. MODAWAT OG CONTRIBUTOR Sa mga "certified hinuroy" mamahimo ninyong i-submit sa Superbalita Cebu ang inyong kasinatian sa mga dapit nga inyong nasuroyan. Higayon na nga mapatik dinhi sa pamantalaan ug sa Superbalita Cebu website ang inyong Suroy escapade. Mamahimo ninyong i-submit ang inyong materials (maximum 500 words o 3,000 characters/high resolution pictures): florendaquerubin@gmail.com alang sa dugang pangutana mamahimong makatawag sa 09154410665. / EDITOR This posting includes an audio/video/photo media file: Download Now

Talk to Papa Joe: Obligar Posted: 25 Mar 2021 09:52 AM PDT Dear Papa Joe, Tawga lang ko sa pangalan nga Martha, 50 anyos na ang pangidaron. Usa ko ka biyuda ug nagsalig lang sa pension ug sari sari store. Aduna koy anak naa sa gawas, naa sa Amerika. Naminyo siya didto mga 5 years na. Ang akong problema kay tagsa naman lang manawag nako ug wa na gani magpadala namo para na lang sad sa iyang mga igsuon. Nalain kaayo ko niya kay wa mag tan-aw nga lisud baya mi kay wa na koy bana. Unsa may buhaton nako para maobligar siya motabang namo? Palihug tambagi ko. MARTHA Martha, Maayong adlaw, Mother. Una, sabta ug pangitai og paagi nga makontak nimo siya. Di ingon nga naa sila sa America hayahay na ilang pagpuyo. Luyo sa mga materyales nga makita nimo nga naa nila, sila nagtakuban sa tinuod nga sitwasyon. Nasayud ko ana kay naa sad koy mga anak didto. Para nako, di ko mamugos nga makatabang akong mga anak nako kay di man sila puhunan para sa atong kahimtang. Huwat ra gyud ta og tabangan kay wa lagi ta masayud naunsa sila didto sa ilang inadlaw adlaw nga kahimtang. Kita man gud diri, mas maghuwat ta permi nga sila ang mo initiate og tawag kay okay man sila tan aw nato. Why not kita na say manawag, mangumusta man lang basin usa na sa rason ngano di siya manawag permi kay problema ra iyang masugatan. Ana lang. Salamat. PAPA JOE (sa inyong tampo ipadala lang sa papajoesuperb@gmail.com) This posting includes an audio/video/photo media file: Download Now

Rabacal: Bag-ong oposisyon Posted: 25 Mar 2021 09:52 AM PDT Anaay gitukod ni kanhi Supreme Court Senior Associate Justice Antonio Carpio nga opposition party nga 1Sambayanan. Ang ilang tumong ug tuyo mao ang pagsakbang kang Presidente Rodrigo Duterte. Ang mga convenor, way labot kang Carpio, mao sila si kanhi Ombudsman Conchita Carpio Morales, kanhi foreign secretary Albert del Rosario, Bise Presidente Leni Robredo, kanhi senador Antonio Trillanes, kanhi kongresista Neri Colmenares, kanhi kalihim sa edukasyon Armin Luistro, kanhi gobernador sa Negros Occidental Rafael Coscollela, kanhi COA commissioner Heidi Mendoza, ug uban pang mga kaatbang sa Duterte administration. Ang ilang pili-ong mokandidato mao kuno kadtong limpiyo og track record, way history sa corruption, ug uban pa. Apan kini bayang uban nga convenor duna say dili maayong record sa dihang sila mga bata-bata pa sa nangaging presidente sa nasud. Ilang gipilian sila si Robredo, Trillanes ug Mayor Isko Moreno. Dili nalang ako magdaghag sulti. Ang ako lang mao nga kon ang ilang criteria mao ang ilang barugan, murag magpili silag himuong santos, dili pulitiko. Daghang mga Pilipino ang anti-Chinese. Karong bag-o, daghang nagduda sa bakuna nga hinimo sa China nga Sinovac. Daghang nahadlok magpabakuna niini kay nagtuo sila nga dili kaayo epektibo itandi sa ubang mga bakuna nga hinimo sa Uropa ug sa ubang mga nasud. Maingon nato nga napugos na lang ang uban natong kaigsuonan tungod kay unang niabot sa nasud ang donasyon nga Sinovac vaccine nga maoy gitusok sa dagkong mga tawo sa mga ospital ug kasanihan. Nahadlok na usab ang kadaghanan tungod sa grabeng pagpanakod sa Covid – 19 sa tibuok nasud. Tunga-tunga niining pagpamakuna sa gihatag sa China nga bakuna, mitumaw ang balita nga 200 ka fishing boat ang nag-angkla sa West Philippine Sea. Duna pay mga intriga nga aduna kini karga nga mga sakop sa military bisan kon napamatud-an nga wala. Bisan ang mga oposisyon kanunay nga manaway sa Duterte administration tungod sa pagpakigsuod sa lideres sa China. Kusog kaayo sila nga manaway sa China, apan tan-awa kon unsay ilang gipamalit ug gigamit nga mga butang, dili ba made in China? Kon atong tangtangon sa estante sa mga tindahan ang tanang produkto nga made in China, unsa na man lang kaha ang mahabilin? Bisan ang Estados Unidos (US) kusog mogamit sa mga produkto sa China hinungdan nga dunay trade imbalance sa duha ka nasud kay ang US daghang paliton nga Chinese goods samtang ang China mas gamay ra ang paliton gikan sa Amerika. This posting includes an audio/video/photo media file: Download Now

Barrita: Pananom og utanon taliwa sa Covid-19 Posted: 25 Mar 2021 09:52 AM PDT Ang National Nutrition Council (NNC) 7 niawhag sa mga lokal nga kagamhanan ug sa katawhan sa pagpananom og mga utanon sa ilang mga tugkaran aron malikayan ang kagutom ug kakuwang sa pagkaon tungod sa coronavirus disease 2019 (Covid-19) pandemic. Ang mga "home gardens," matod sa NNC 7, makapamenos sa food insecurity ug makasulbad sa malnutrition sa kabataan. Apan mokaon pa ba kaha ang mga bata og mga utanon nga naanad na man silang magpa-deliver sa mga fast food? Didto sa Cabadiangan, lami kaayo ang utang kamunggay nga bag-o pang gilanggi gikan sa punoan. Usahay, subakan og tinap-anan gikan sa syudad sa Danao, usahay subakan og buwad isda nga pinikas, usahay subakan og udlot sa manok bisaya. Kon maglisod na gyud, subakan na lang og luwag. Matod pa sa NNC 7, mahinungdanon ang papel sa mga kagamhanang lokal sa pagplano ug pagpatuman sa mga garden sa mga tugkaran. Gihimong ehemplo ang lungsod sa Larena sa lalawigan sa Siquijor nga nipasar sa usa ka backyard gardening ordinance niadtong Hulyo 2020. Ang ilang ordinansa nga giulohan og "Gulayan sa Matag-panimalay," nagtumong nga maghimo og mga home gardens ang 23 ka mga barangay sa maong lungsod aron di maglisod sa pagpangita og pagkaon. Ang mga home gardens gihimo usab nga rikisito sa paglukat og mga clearance gikan sa barangay. Apan sa akong tan-aw, kining mga home gardens maayo lang ni sa mga lugar nga duna pay dagkong wanang, di sama sa syudad nga nagsikit-sikit ang kabalayan. Si Dr. Parolita Mission, NNC 7 regional nutrition program coordinator, niingon nga malaumon siya nga sundon sa ubang mga lokal nga kagamhanan sa Siquijor ug sa ubang mga lalawigan sa Central Visayas ang gihimo sa Larena aron sa pagseguro sa food security alang sa labing nanginahanglan sa panahon sa pandemic. Maayo kini nga programa sa NN7. Ang kabalayan mahisama na unya sa kanta nga "Bahay Kubo" nga sari-sari ang mga tanom. Naglakip ni sa "Singkamas at talong/ Sigarilyas at mani/ Sitaw, bataw, patani/ Kundol, patola, upo't kalabasa/ At tsaka mayro'n pang/ Labanos, mustasa/Sibuyas, kamatis, bawang at luya. Nahibung lang ko kon nganong giulohan og Bahay Kubo ang maong kanta nga bahin man kini sa mga tanom didto. Kon ang bahay kubo pay gihisgotan, ang lyrics bahin unta sa atop nga nipa o cogon ba, sa sawog nga kawayan ug sa bong-bong nga amakan. This posting includes an audio/video/photo media file: Download Now

Lapu SK tsirman mibuak sa pagpakahilom Posted: 25 Mar 2021 09:48 AM PDT Sa labing unang higayon, mitingog na ang Sangguniang Kabataan (SK) chairperson sa Barangay Pusok ug SK Federation president sa Dakbayan sa Lapu-Lapu nga si Laika Tampus kalabot sa pagluwat sa katungdanan sa iyang SK councilors lakip sa iyang secretary ug treasurer. Gipasabot niini nga nagpakahilom lang siya sa isyu sanglit gusto pa niya mahinabi ang miluwat nga SK councilors aron ilang maistoryahan ang ilang gamayng wala pagsinabtanay. Mibutyag si Tampus, human sa iyang pakighinabi kanila sa miaging semana, nisaad unta ang 5 sa 7 ka konsehal nga di moluwat sa katungdanan, apan nakugang siya niadtong Lunes, Marso 22, nga duha na lang ang mipadayag nga magpabilin sa katungdanan dihang pormal na silang misang-at sa ilang resignation. Girespetar ni Tampus ang ilang desisyon apan mihimakak nga dili siya epektibo isip SK chairman. Usa sa rason sa mga konsehal ni Tampus nga miluwat sa katungdanan mao nga giingong dili siya epektibo sa iyang posisyon. Matod sa SK chairman kanunay silang nagsabotsabot unta sa konseho kalabot sa mga proyekto nga ilang maalagad ngadto sa kabataan sa barangay bisan niining panahon sa pandemya bisan wala pa silay insaktong budget. Iya usab gitubag ang isyu kalabot sa permi niya dili motunga sa mga sisyon sa SK sa barangay. Pasabot niya nga nagtungha siya niadtong mga panahona ug walay klarong adlaw ang ilang sisyon hinungdan nga dili siya makaplantsa daan sa iyang schedule itandi sa konseho sa dakbayan nga naglingkod siya isip ex-officio member nga matag Huwebes sa semana. Kanunay usab siya nga last minute mahibawo sa sisyon ug butang nga iyang gikalibgan sanglit aduna silay group chat unta sa Messenger. Giklaro ni Tampus nga wala sa iyang kamot ang budget sa SK nga moabot sa dul-an P6 miluyones sulod sa duha ka tuig sanglit anaa kini sa barangay. Gikatakda pa kining ibalhin sa account sa SK sa banko apan dili usab siya makabuotbuot og withdraw niini sa umaabot gumikan kay kinahanglan kini og pirma sa SK secretary. Iya usab gihagit ang nagpasiatab og istorya kalabot kaniya sa iyang mga gipanag-iyang propiyedad sa pagpaubos kaniya sa lifestyle check sanglit wala siyay gitagoan kalabot niini. Nagdumili pagtubag si Tampus sa isyu nga posibleng politika ang hinungdan sa dili maayo niyang relasyon sa iyang SK councilors ug ang pagluwat usab niini sa ilang mga katungdanan. "I told them nga murag mabaw na nga reason nga mo-resign since they have taken an oath then as why my two councilors stated naa pud silay gipanumpaan ba unya mo stay pud unta sila pero I cannot stop them if ganahan na gyud sila mo-resign kay I'm not in their foot man to make decisions for them," matod ni Tampus. Si Tampus gipasakaan usab og reklamo sa Department of the Interior and Local Government (DILG) ug giawhag sa pagluwat sa katungdanan sa iyang mga konsehal niadtong 2019 gumikan usab sa giingong pagpabaya niini sa iyang trabaho isip SK chairman apan personal ra usab nilang naresolbar, sumala ni Tampus. Sa pagkakaron, maghuwat pa si Tampus sa mando gikan sa DILG kun unsay mahitabo sa mga posisyon nga biyaan sa iyang mga konsehal. (GCM) This posting includes an audio/video/photo media file: Download Now

Nalzaro: Sugat ipahigayon gyud? Posted: 25 Mar 2021 09:47 AM PDT Ang lungsod sa Minglanilla, nga naila sa mabulukong Sugat matag Easter Sunday, mopahigayon gyud sa ilang nabantog nga Kabanhawan Festival sa Dominggo sa Pagkabanhaw. Mao kini ang gibutyag ni Minglanilla Mayor Elanito Peña. Apan ipaagi sa online aron way mga tawo nga linawas nga manan-aw. Matod pa sa mayor nga ang tugutan lamang nga motambong mao ang dancers, hosts ug lokal nga mga opisyal. So, aduna gihapoy panagtapok-tapok. Niadtong 2020, sa dihang mibuto ang Covid-19, gikanselar ang maong kalihukan kay gidili na ang panagtapoktapok. Walay kalihukan atol sa Semana Santa ug kanselado ang tanang kalikuhan sa simbahan. Mismo dinhi sa Dakbayan sa Sugbo gipahibawo sa Cebu Archdiocese nga kanselado karon ang mga kalihukan sa simbahan atol sa Semana Santa sama sa Visita Iglesia ug personal nga pagbatbat sa Siete Palabras. Apan nganong ipamugos man ni Mayor Peña ang pagpahigayon sa Kabanhawan Festival? Unsa man ka importante kini alang sa katawhan? Kay ngano man, naka-solicit na sila og sponsors? Kay kining ingon niini, money-making venture man ni ba. Di tanan alang sa relihiyuso nga kalihukan. Samtang tinuod nga ubos kita sa modified general community quarantine (MGCQ) uog gitugan ang pipila ka mga kalihukan nga ingon niini, apan gisangon kini sa mga lokal nga kagamhanan. Makagarantiya ba si Mayor Peña nga dili modugok ang mga tawo inig pahigayon? Ila kahang makontrolar unya ang mga tawo? Kadlawon ra ba ni. Kanang dancers makaoberbar kaha na og social distancing? Mao kana ang nahitabo sa Misa de Gallo panahon sa Pasko ug sa mga misa sa Santo Nino niadtong Sinulog. Nakontrolar sa taga simbahan ang mga tawo sa sulod sa simbahan. Apan ang mga tawo nga naa sa gawas sa simbahan wala nila ma-control. Ug mao kadto ang usa sa mga hinungdan nganong misaka ang mga kaso sa Covid-19 sa maong mga buwan. Gusto ba si Peña nga mao kini ang mahitabo sa iyang lungsod? Mas maayo siguro nga mo-interbinir ang Regional Inter-agency Task Force for the Management of Emerging Infectious Diseases (IATF) aron mapakgang kining maong plano.(bobbygnalzaro@gmail.com) This posting includes an audio/video/photo media file: Download Now

Editoryal: Gakson ang kausaban Posted: 25 Mar 2021 09:47 AM PDT Nadayon na gyud ang groundbreaking sa Carbon market agig sinyales sa pagsugod sa pagtrabaho aron mamahimong moderno ang karaang merkado publiko sa dakbayan sa Sugbo. Sulod sa daghang mga dekada, mga katalagman sama sa linog ug sunog, nabuhi ang Carbon di tungod sa mga opisyal sa Siyudad sa Sugbo, kon di tungod sa yanong mga vendor ug mamalitay, labina niadtong ordinaryo kaayong mga lumolupyo. Naa sa Carbon ang barato nga karne, utanon ug uban pang nag-unang mga palaliton. Mga dekada pa una nanunga ang malls sa Dakbayan sa Sugbo, ang Carbon maoy palitanan sa nag-unang mga panginahanglan, kabos man o adunahan. Daghan na usab ang yano nga mga vendor nga nakapundar og negusyo uban sa kakugi ug pagdaginot. Ilang mga kinabuhi nausab. Pila na kaha ka mga ginikanan ang nakapagraduwar sa ilang mga anak tungod sa ilang panginabuhi sa Carbon? Apan uban sa paspas nga kausaban sa panahon, tukma na nga hatagan og maayong dapit nga matindahan ang vendors, kadaghanan naa lang daplin sa dalan nagpwesto, ug aron ang mga mamalitay di na mapagod sa init sa adlaw ug nag-ungaw sa kakuyaw sa mga holdupper ug esnatser sa dapit. Isip hara nga Dakbayan sa Habagatan, angay nga makabaton og modernong merkado ang Siyudad, diin naa na ang tanang gikinahanglan, sa yanong mga lumolupyo, ngadto sa mga adunahan. Kon matuman ang tanang gisaad sa Megawide, ang tanang vendors di na mauwanan ug mainitan kay duna na silay tagsa ka pwesto sulod sa merkado. Di na sab mangahadlok ang mga mamalitay bisan gabii na kaayong mangompra tungod kay duna nay mga gwardiya nga mag roving. Naandan lang nga dunay mangahadlok sa kausaban. Apan di ba maayong hatagan og kahigayunan ang kagamhanan sa pagpalambo ug pagpaluag sa kinabuhi sa iyang mga lumolupyo pinaagi sa paggamit sa pribadong sektor? Bantayan lang nga way moabuso. This posting includes an audio/video/photo media file: Download Now

Mondigo: Pantalan sa Medellin buksan alang sa pagpalambo sa ekonomiya Posted: 25 Mar 2021 09:44 AM PDT Gikatakda nga buksan karong semanaha ang pantalan sa utlanan sa Barangay Kawit ug Barangay Mahwak sa lungsod sa Medellin nga mopaingon sa nagkalainlaing isla sa lalawigan ug ubang rehiyon sa Kabisay-an. Ang Port of Medellin mao ang laing dunggoanan sa mga fastcraft nga may pasiunang biyahe niadto paingon sa lungsod sa Sta. Fe sa isla sa Bantayan. Kini maoy gipahibalo ni Medellin Mayor Benjun Mondigo alang sa pagpalambo sa ekonomiya sa lungsod. Ang pantalan unang gipanag-iya sa pribadong indibiduwal apan gidonar kini sa lokal nga kagamhanan sa Medellin. Matod ni Mondigo nga gi-develop usab sa Cebu Port Authority (CPA) ang pantalan aron mahimong mapasayon kini alang sa mga pasahero nga moagi sa dapit. Dugang ni Mondigo, bag-o usab kini nga kalamboan sa turismo sa lalawigan. "We welcome ani nga development especially makatabang ni sa atong tourism and economy sa lungsod maong nalipay gyud mi kay finally mo open,"matod ni Mondigo. Matod ni Gile Anthony Villamor, ang municipal administrator, nga gihuwat nalang sa kagamhanan ang certificate gikan sa Maritime Industry Authority (Marina) aron maka -operate ang Aznar Shipping sa fastcraft niini. Matod niya, haom usab ang adlaw sa pagbukas sa pantalan sanglit naghinangat na ang semana santa ug gipanglantawan nga mo dagsa ang mga pasahero. "Mas maayo nga mabahin napod ang passengers kay daghan kaayog maglinya didto sa Hagnaya unya naa nay comfortable dinhi sa Medellin nga pantalan nga nag-offer pod og same nga ruta, eventually naa pod tay mga Ceres buses nga mobyahe gikan sa terminal to port," matod ni Villamor. Alang sa mga buot nga mopauli, valid ID lang ang pangayuon sa pantalan. Apan kinahanglan nga magsul-ob og mask, face shield ug kanunay nga mosubay sa physical distancing policy paagi nga malikay sa pagtakboy sa coronavirus disease (Covid-19). Gipahibalo sa mayor nga bukas ang kagamhanan sa Medellin sa shipping lines nga buot mobutang og barko nga mobyahe sa ubang probinsya ug isla gikan sa ilang puwerto sa lungsod. (ANV) This posting includes an audio/video/photo media file: Download Now

10 na ka NPA namatay sa engkwentro sa Negros Posted: 25 Mar 2021 09:44 AM PDT Sa clearing operation sa 3rd Infantry Division sa Philippine Army (PA) human sa engkuwentro niadtong Marso 23, 2021 sa Barangay Trinidad, dakbayan sa Guihulngan, Negros Oriental, laing duha ka rebelde ang nakaplagan sa mga sundalo nga patay. Nisaka sa ihap sa namatay nga New People's Army (NPA) ngadto sa 10. Unang gitaho sa Army nga walo ka NPA ang patay ug laing duha nga samaran ang nasikop human sa engkwentro. Si Army Major Cenon Pancito, information officer sa 3rd ID sa Philippine Army, niingon nga 10 ang namatay nga NPA samtang walay nakalas sa habig sa Army. Nakasikop usab sila og laing duha ka rebelde, diin ang usa niini samaran, nga naa na sa kustodiya sa kapulisan sa maong siyudad. "Seguro ang atong tantsa niani kini sila ang mga nasamaran nga naka lakaw pa but eventually also perish duon sa area, so, duha ni sila kabuok ug ang next update nato naka-capture sad tag duha ka personalities," matod ni Pancito. Nakasakmit usab ang mga sundalo og mga kagamitan sama sa daghang bala sa tag-as nga kalibre sa armas, solar panel, icom radio, rain boots, back packs, mga medical paraphernalia ug uban pa. Sa pagkakaron nagpadayon ang manhunt operation sa mga sundalo uban ang kapulisan nunot sa posibilidad nga naa ra sa mga bukirang sitio sa Guihulngan nagtago sa kakahuyan o mga komunidad nga misuporta sa NPA. Samtang, nailhan na usab ang unang walo ka mga NPA nga namatay sulod sa tulo ka oras nga engkwentro, apan wala lang una gibutayag ang mga ngan. Dugang niya, ang mga nakalas lumolupyo lang sa isla sa Negros nga armadong sakop sa SDG Platoon ug SYG Platoon sa Central Negros 1 sa komiting pangrehiyon sa rebeldeng komunista sa Negros, Cebu, Bohol ug Siquijor. "Naa na tay mga pangalan pero wala pa nato i-relaese pending sa confirmation coming from their relatives," matod ni Pancito. Samtang ang kapulisan sa Negros Oriental nagpadayon pa usab sa ilang gihimo nga imbestigasyon ilabi na sa pag-ila kinsa pa ang mga kaubanan sa na engkuwentro sa mga sundalo. (AYB) This posting includes an audio/video/photo media file: Download Now

Online sabong gitun-an ni Labella Posted: 25 Mar 2021 09:44 AM PDT DAKO og kahigayonan nga itugot na ni Mayor Edgardo Labella ang online cockfighting aron mominos ang pagpahigayon sa ilegal nga tigbakay sa dakbayan sa Sugbo. Kini human niduso og resolusyon ang Cebu City Gamefowl Commission ug Emergency Operation Center (EOC) nga wala silay pagsupak sa pagpahigayon sa maong matang sa kalingawan. "Ako nang tan-awon, maybe in due time we will make a decision. Naghimo kog study kon pila ra ka tawo ang makasulod," padayag ni Labella. Sa mga local government unit (LGU) sa Sugbo, bugtong ang Dakbayan sa Sugbo nalang ang wala motugot nga ibalik ang tigbakay bisan kon dugay na kining gitugotan sa Inter Agencty Task Force (IATF). Si Konsehal Raymond Garcia, majority floor leader sa konseho ug chairman sa Gamefowl Commission, dugay na niduso og resolusyon sa pagtugot nga ibalik ang pag-abli sa mga legal nga buwangan apan limitado ra ang makasulod para mapatuman ang social distancing. Niining bag-o, nirekomendar na usab sila nga inay ibalik og 50 porsiyento ang kapasidad sa buwangan, ang online cockfigting tugotan apan pipila ra ka mga tawo ang tugotan nga makasulod. Gikataho nga walay supak usab niini ang EOC sa dakbayan sa pagsanta sa pagkatap sa coronavirus disease 2019 (Covid-19). Si Garcia uban ni ni Konsehal Phillip Zafra, chairman sa committee on public order and safety sa City Council, ninghulagway nga ang pag-abli sa legal nga buwangan ug pagtugot sa online sabong, makapaminos kini sa pagdagsa sa tigbakay. (PAC) This posting includes an audio/video/photo media file: Download Now

300 ka pamilya sa Ermita ibalhin og building Posted: 25 Mar 2021 09:38 AM PDT MGA 300 ka pamilya nga nagpuyo sa Sitio Bato, Barangay Ermita, Dakbayan sa Sugbo ibalhin sa medium rise building (MRB) nga tukuron sa dapit. Mga pamilya nagpuyo duol sa dapit diin tukuron ang redevelopment sa Carbon Public Market. Ang Megawide Construction Corp. sayo pa niseguro ngadto sa mga residente sa Sitio Bato nga di sila maapektuhan atol sa civil works sa unang phase. Si Jade Ponce, pangu sa Land Management Board, niingon nga ang konsultasyon sa proyekto magsugod sa tunga-tunga sa Abril 2021. Matod ni Ponce, ang Siyudad makigsabot tali sa Visayan Electric Company kalabot sa pagpalit sa luna kay ang tipik niini iya sa Visayan Electric. Sa iyang pasiunang tigom tali sa barangay kapitan sa Ermita ug pipila ka homeowners,"so far they liked the idea," matod ni Ponce. Siya niingon nga nagplano ang board nga pabarugon ang edipisyo nga dunay 10 ngadto sa 12 ka andana. Gipaneguro ni Ponce nga way mahawa kay ang board mosunod sa "build-move-clear" diin ang building unang tukuron, pabalhinon dayon ang mga residente ug limpyuhan ang dapit kon makabalhin na ang nagpuyo. Wa pay klaro kon libre ba kini kay ang konsultasyon magsugod pa sa Abril. Ang groundbreaking sa redevelopment sa Carbon gipahigayon sa Marso 24, 2021 human mauswag og makaduha. Atol sa groundbreaking, si Bise Mayor Michael Rama wa motambong o mopadala og iyang representante. Sa samang adlaw, si Rama nihatag sa iyang privilege speech atol sa regular session sa Konseho. Iyang gikwestyon kon nganong gidali ang groundbreaking nga duna pa may angay nga plantsahon. "Unsa kaha gyud ang kahulogan sa 'groundbreaking' nga kinahanglan man gyud dalion?" matod ni Rama atol sa online session. Gitataw ni Rama nga wa siya magsupak sa proyekto, apan kinahanglan kining buhaton nga sakto. "I do not wish to stop this project. I have been most aggressive in terms of progressive projects, but I am also very staunch in doing things right," matod ni Rama. Gitataw ni Mayor Edgardo Labella nga bisan kon nahuman na ang groundbreaking, magpadayon ang negusasyon. (JJL) This posting includes an audio/video/photo media file: Download Now

Mga rota sa TPUJ hayan ibalik ni Labella Posted: 25 Mar 2021 09:38 AM PDT Abli si Mayor Edgardo Labella sa posibilidad nga pasudlan na og mga public utility jeepney (PUJ) ang ubang mga rota sa dakbayan sa Sugbo nga gigamit kanhi sa wa pa ang coronavirus pandemic. Kini human ang Cebu City Jeepney Task Force pinangulohan ni Konsehal James Cuenco niduso og rekomendasyon ngadto sa buhatan ni Labella niadtong Marso 19 alang sa pagpabalik og bukas sa tanang mga rota kanhi sa mga TPUJ. Matod ni Cuenco nga kuwang ang pampublikong transportasyon taliwa sa pagbukas na sa daghang mga patigayon ning nakalabay nga unom ka mga buwan. Si Labella nagkanayon nga wala pa niya mabasa ang kinatibuk-ang unod sa komunikasyon ni Cuenco. "I am open but I have not received yet their new recommendation. As soon as I have received that, I will act accordingly. But I am open to all suggestions especially on the matter of public transportation," padayag ni Labella. Si Cuenco niawhag sa mayor gumikan usab sa panawagan sa mga tawo nga dugangan ang mga sakyanan ug ablihan ang ubang rota. "The undersigned would like to respectfully request for the opening of all Cebu City TPUJ routes subject to the provisions of EO 102 or the Balik Pasada Program," matod sa suwat ni Cuenco ngadto kang Labella. (PAC) This posting includes an audio/video/photo media file: Download Now

Traffic light ‘buksan’; P. del Rosario sirhan Posted: 25 Mar 2021 09:38 AM PDT Ipahigayon sa Biyernes sa hapon, Marso 26, 2021 ang ceremonial unveiling sa P238 milyones nga intelligent traffic light system sa Dakbayan sa Sugbo. Si Lyntoni Sable, officer in-charge sa Cebu City Transportation Office (CCTO), nitug-an nga 100 porsyento na nga nataod ug niandar na ang traffic signal lanterns ug timer sa unang 18 ka intersections sa siyudad. Hinuon, ang pag-istalar sa underground cabling alang sa fiber optics nga maoy mokonektar sa mga high definition cameras ug sensors anaa na sa 50 porsyento. Ilang ipahigayon ang rerouting sanglit ang programa anha sa dan P. Del Rosario gikan alas 4 sa hapon hangtod alas 7 sa gabii o mas sayo pa. Ang CCTO mosirado sa da P. Del Rosario paingon sa Carreta ug tipik niini paingon sa E-Mall himuon nga two-way traffic. (PAC) This posting includes an audio/video/photo media file: Download Now

50K ka trabahante sa Mandaue bakunahan Posted: 25 Mar 2021 09:23 AM PDT Gipahibawo sa Mandaue City Chamber of Commerce and Industry (MCCI) nga makadawat sila og dul-an sa 100,000 ka Moderna Covid-19 vaccine nga gamiton pagbakuna sa mga trabahante sa pribadong sektor. Gibana-banang 50,000 ka mga trabahante ang makapahimus niini. Ang 100,000 ka bakuna lakip sa gisaad nga 20 milyon ka doses nga makuha sa International Container Terminal Services Inc. (ICTSI) Foundation aron mabakunahan ang mga trabahante sa pribadong sektor sa nasud. Sa 20 milyon ka mga bakuna nga mapalit sa ICTSI, 13 milyon ihatag ngadto sa nasudnong kagamhanan. Si Steven Yu, presidente sa MCCI, nagkanayon nga ang 100,000 ka mga bakuna maabot sa Sugbo sa ikatulo o katapusang kwarter ning tuiga. Sigon ni Yu nga kon magsugod na sila sa pagdawat sa mga bakuna, ipanghatag dayon nila kini alang sa mga trabahante. Tungod kay nigasto ang mga negosyante sa bakuna, pasabot niini nga taas ang ilang salig. Matod ni Yu nga libre nga ihatag ang bakuna ngadto sa mga empleyado tungod kay mamahimong ibutang sa blacklist ang negosyante kon ilang ibaligya. Sa pagpamakuna unya sa pribadong sektor, matod ni Yu nga ang ilang priority listing susama gihapon sa gobyerno. (KFD) This posting includes an audio/video/photo media file: Download Now

‘Kawatan’ nailhan kay ga-selfie, gatiktok Posted: 25 Mar 2021 09:23 AM PDT Tulo ka mga sakop sa Akyat Bahay gang nasikop kay usa nila nag-selfie ug nag Tiktok pa gamit ang iPhone nga dunay i-Cloud nga gigamit sa tag-iya sa pag-trace ug pag monitor human kawati. Wa masayod ang menor de edad nga lalake nga kauban sa duha ka gikatahapang mga kawatan, nga ang iyang selfie ug Tiktok video nakuha sa tag-iya pinaagi sa abag sa kapulisan gamit ang laing cell phone. Na-trace pa usab ang iyang nahimutangan sa Dakbayan sa Sugbo bisan kon ang balay nga gikawatan niadtong Miyerkules sa kaadlawon, Marso 24, 2021, naa sa Larumbre st., Barangay Inayagan, Dakbayan sa Naga, habagatang Sugbo. Ang biktima giila sa kapulisan nga si Romulo Señor, 65, minyo, negusyante. Si Patrolman Joenil Ricaña, intelligence officer sa Naga police, niingon nga si Señor nagpatabang kanila sa paggamit sa iCloud. Gamit ang laing cell phone, ila kining giablihan ug didto, ilang nakuha ang selfie ug Tiktok video sa menor nga si Vic (di tinuod niyang ngan). Ila usab nga na-trace ang nahimutangan niini sa Barangay Tisa, Dakbayan sa Sugbo. Sa ilang pagsusi sa dapit, ilang nakit-an daplin sa dan si Vic ug diretsong gidakop sa mga alas 11 sa buntag. Nitug-an ang menor de edad sa nahimutangan ni Third Ponce de Leon, 18, ug maoy sunod nga nasikop. Nia nang alas alas 6:30 sa gabii nasikop nila si Jaycob Alia Tapuyao, 35, dunay kapuyo, sa may sityo Almasin, Barangay Calamba, Dakbayan sa Sugbo. Si Tapuyao lumad nga taga Lower Tonggo, San Fernando, habagatang Sugbo. Si Police Staff Sgt. Raymund Romares, sa Naga Police Station nga nahinabi sa Superbalita Cebu niingon nga ilang nabawi ang duha ka selpon, apan wala na igkita ang ubang mga butang sama sa duha ka power bank, HP laptop, Huawei speaker, Herschel bag, tulo ka chargers, relo nga Rado, mga alahas ug cash nga P142,362. Matod ni Romares, ang mga suspek nakasulod sa balay ni Señor pinaagi sa pagtangtang sa jalousie blade. "Kining duha nga batan-on, Sir, nasubay nga taga Tisa kay gigamit nila ang iPhone duna man diay IP address ani maong nasikop," dugang ni Romares. Gumikan sa pagkasikop sa duha, nasubay sab nila si Tapuyao, kinsa sa Dakbayan sa Sugbo nidagan human sila nakaigo sa Naga. Matod ni Romares nga ang mga suspek nibutyag nga sa Barangay Pasil, Dakbayan sa Sugbo nila nabaligya ang mga butang. Wa motug-an ang tulo hain ang P142,000. Samtang sila si Vic ug Ponce de Leon nanghimakak nga duna silay labot kay igo ra silang namalit sa cell phone. Apan si Tapayao niingon nga ang duha iyang mga kauban. Ang kapulisan sa Dakbayan sa Naga nakig-alayon na aa kapulisan sa San Fernando ug kapulisan sa Dakbayan sa Sugbu aron masubay pa nila ang record sa tulo. This posting includes an audio/video/photo media file: Download Now

You are subscribed to email updates from https://www.sunstar.com.ph/. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States