https://www.sunstar.com.ph/

12 ka balay sa Sawang Calero nasunog
Mingla mayor nag-una-una pagpabakuna
Groundbreaking sa Carbon ipahigayon
Police operations, pag-abag sa komunidad armas batok drugas
Basil: 36th Star Awards for Movies Official Nominees
Editoryal: Carbon Market
Lonzon: Magpapili sa pagka presidente
Diputado: Migawas na ang binuang
Talk to Papa Joe: Murag mangigi
Mga batang IP padayong gialagaran sa DSWD 7
Balay-Balay, Tubig-Tubig: Semana alang sa batang babaye
Nanghinaot si Magsayo nga matagan na siya'g usa ka world title bout
Surfer naigo'g kilat, namatay
Sotto gidayeg sa NBA trainer

Posted: 24 Mar 2021 01:09 AM PDT

DOSE ka mga balay, 10 niini nangaugdaw, sa sunog sa udtong tutok sa Miyerkules, Marso 24, 2021 sa dan C. Padilla, sityo Block 1, Barangay Sawang Calero, Dakbayan sa Sugbo.

Ang sunog nibilin og danyos nga P275, 000.

Matod sa Cebu City Fire Department nga butane ang hinungdan sa sunog sa ilang pasiunang pakisusi, apan ila pa kining imbestigahon og maayo. (GPL)

This posting includes an audio/video/photo media file: Download Now

Mingla mayor nag-una-una pagpabakuna

Posted: 23 Mar 2021 06:44 AM PDT

Wa palabya ni Minglanilla Mayor Elanito Pena ang kahigayonan nga makapabakuna sa AstraZeneca vaccines atol sa unang adlaw sa vaccination program.

Nasayran nga sa pagpangabot sa vaccines sa nasud mipahibawo ang nasudnong kagamhanan nga hatagan og priority nga 1.7 milyones nga healthcare care workers sa nasud.

Wa malakip sa priority sa maong libreng bakuna ang mga elected officials sama sa gobernador, mayor, barangay kapitan, ug ubang opisyal sa matag local government unit (LGU).

Makadawat lang sa bakuna ang mga naasoyng opisyal sa higayon nga hingpit nang mapabakunahan ang tanang healthcare workers, senior citizens, persons with comorbidities .

Subay niini gipahibawo ni Dr. Mary Jean Loreche, tigpamaba sa Department of Health (DOH-7) nga wala mokonsulta ang LGU sa gihimong pagbakuna sa mayor.

"If we are to base on the priority listing as mandated in the guidelines the subgroup A-states 'medical healthcare frontliners' DOH-7 is not aware neither was consulted on the matter," sumala pa ni Loreche.

Samtang si Mayor Pena mipasabot nga nakahukom siya nga magpabakuna kay iyang gi-isip ang iyang kaugalingon nga usa usab ka "frontliner."

Kini ilabi na nga si Pena maoy nangulo sa Task Force sa pakigbatok sa coronavirus disease (Covid-19) sa lungsod.

"Ako usa man sad ko sa frontliners, unya ang mga tawo bisan kinsa lang mo-approach nako mao ni decide nalang ko og kuan sa vaccine," pamahayag ni Pena sa dihang nahinabi sa mga tigbalita.

Sa susamang kalambuan, gimanduan si Tacloban City Mayor Alfred Romualdez sa pagpahatag og pagpasabot sa iyang gihimong nag una-una sa pagpabakuna og Sinovac nga gikatagana una sa healthcare workers.

Ang maong kamanduan naggikan ni Undersecretary sa Department of Interior and Local Government (DILG) Epimaco Densing diin nag-andam na og show cause order batok ni Romualdez aron patubang sa gihimo niining nagpabakuna niadtong Lunes, Marso 22.

Gitug-an sab ni Densing base taho CNN nga adunay laing tulo ka mga mayor nga wa nganli ang lakip nga patubagon sa nahimo nilang kalapasan.

This posting includes an audio/video/photo media file: Download Now

Groundbreaking sa Carbon ipahigayon

Posted: 23 Mar 2021 06:43 AM PDT

Human mauswag og kaduha, mahinayon na sa alas 5 sa hapon sa Miyerkules, Marso 24, 2021 ang ground breakingsa P5.5 bilyones nga new Carbon Public Market human naoktaba ang orihinal nga schedule.

Sa Marso 23 unta ang groundbreaking, apan nauswag na sab kini. Gipahibawo ni Market Administrator Irvin Cabales human nga nakumpleto na ang tanang gikinahanglan labot sa ceremonial nga pagsugod sa construction sa bag-o ug modernong merkado publiko sa Dakbayan.

"There was a miscommunication on the schedule of the groundbreaking plus the resolution of the Public Market Oversight Committee regarding the concern of the vendors," padayag ni Cabales.

Ang mga manindahay nangabalaka nga mahawa na sila sa pagpaninda, mawagtangan og panginabuhian ug himuong pribado ang Carbon market.

Apan matod ni Cabales nga nahatagan ra og kasulbaran ang tanan atol sa meeting sa Martes sa buntag.

Matod ni Cabales nga madayon na sa hapon ang groundbreaking.

Samtang kapin o kulang 100 ka mga manindahay sa Carbon ang nipahigayon og rally.

Sila nanawagan nga ibasura ang kontrata sa Cebu City Government ug Megawide Construction Corporation.

Supak sila sa privitization sa Carbon sanglit sila nagtuo sila nga ang Megawide na ang manag-iya ug modumala merkado.

Apan subli na kining gisulti sa Megawide nga ang Carbon market magpabilin nga iya sa Kagamhanan sa Dakbayan sa Sugbo.

Ang tanang mga manindahay di mahawa sa pagpaninda kay ipahimutang sila og tarong sa di pa magsugod ang construction sa bag-ong mga edipisyo.

Ang Siyudad usab maoy magbuot sa arkabala pinasubay sa Market Code sa Cebu City.

Sa mosunod nga tulo ka mga tuig human matukod ug magamit sa vendors ang bag-ong pasilidad, di umentuhan ang abangan sa matag stall.

Nikabat lang og mga kapin 10 minutos ang pag-rally sa mga vendor sanglit sila gibadlong sa kapulisan.

This posting includes an audio/video/photo media file: Download Now

Police operations, pag-abag sa komunidad armas batok drugas

Posted: 23 Mar 2021 06:41 AM PDT

Pagkuha sa suporta sa komunidad usa sa duha ka suwab sa kampanya batok sa illegal nga drugas nga gilusad sa kapulisan sa Dakbayan sa Talisay uban sa local government unit (LGU).

Ang laing naandan nilang gimbuhaton mao ang pagpahigayon og way puas nga anti-drug operations.

Matod ni Talisay City Police chief Police Lt. Colonel Gerard Ace Pelare nga kining duha ang ila karong gigamit sa padayong kampanya batok sa illegal drugs.

Nagtuo si Pelare nga pinaagi sa pagkuha sa simpatiya sa komunidad importante kaayo aron magmalampuson ang kampanya batok sa illegal drugs.

"Importante kay naa gud diha ang support sa community. Di na sila (mga durugista" makalihok," sulti ni Pelare sa Superbalita Cebu.

Karon, wa nay dagkong drug group nga naglihok sa dakbayan sa Talisay sukad ilang napuhag ang Obrero drug group, katapusang grupo nga naglihok sa Dakbayan sa Talisay.

Niadtong ikaduhang quarter sa 2020 ilang napuhag ang grupo bisan sa coronavirus pandemic.

KOMUNIDAD

Mokabat sa 100 ka mga pamilya ang nahatagan og food packs ug personal protective equipment (PPE) sa Martes alas 6 sa buntag, Marso 23, 2021 sa sityo Magabay, Barangay Tanke, Dakbayan sa Talisay.

Mga sakop sa City of Talisay Police Station, City Advisory Council member ug mga opisyal sa barangay nanglimpyo usab gawas sa pagpanghatag ug pag house-to-house nga pagbisita.

Ang food packs ug PPE gi-sponsor ni Cyril Velasco, vice chairman sa City Advisory Council for Police Transformation and Development (CACPTD).

Ang programa nga gilusad nila ni Police Lt. Colonel Gerard Ace Pelare gihimo human sa ilang subsob nga anti-illegal drug campaign sa tapos sa miaging semana.

Tumong sa kapulisan ug Kagamhanan sa Dakbayan sa Talisay nga ilang makuha ang simpatiya sa mga lumolupyo batok sa illegal drugs.

Ang Barangay Tanke dunay grabeng suliran sa ilegal nga drugas itandi sa ubang mga dapit sa Dakbayan sa Talisay.

Ang sityo Magay usa sa pito ka mga sityo sa Tanke nga nasudlan sa illegal drugs. (REV)

This posting includes an audio/video/photo media file: Download Now

Basil: 36th Star Awards for Movies Official Nominees

Posted: 23 Mar 2021 06:38 AM PDT

Manila--Gipagawas na ang opisyal nga mga nominado sa Philippine Movie Press Club (PMPC) 36th Star Awards For Movies. Biente nuebe ka kategorya, lakip ang mainstream ug independently produced nga mga lilas ang magtigi ug adunay upat ka special awards.

Ang Nora Aunor Ulirang Artista Lifetime Achievement Award mapupunta sa premyadong aktres nga si Ms. Angie Ferro ug ang Ulirang Alagad ng Pelikula sa Likod ng Kamera Lifetime Achievement Award pagadawaton ni Direk Elwood Perez.

Pangungunahan ng 2021 president nga si Roldan Castro ang awarding kauban ang 2020 president nga si Sandy Es Mariano, mga opisyales ug mga miyembro sa Philippine Movie Press Club. I-anunsiyo sa sunod nga mga adlaw ang uban pang detalye kabahin sa 36th Star Awards For Movies.

Ania ang mga nominado para sa Best Actress ug Best Actor, Supporting Actress ug Best Actor categories: (Ang kinatibuk-an nga lista makita sa internet)

MOVIE ACTRESS OF THE YEAR

· Bea Alonzo (Unbreakable)

· Kathryn Bernardo (Hello, Love, Goodbye)

· Angie Ferro (Lola Igna)

· Sarah Geronimo (Unforgettable)

· Janine Gutierrez (Babae At Baril)

· Ruby Ruiz (Iska)

· Sylvia Sanchez (Jesusa)

· Judy Ann Santos (Mindanao)

· Jodi Sta. Maria (Clarita)

MOVIE SUPPORTING ACTOR OF THE YEAR

· John Arcilla (Miracle in Cell No. 7)

· Joem Bascon (Write About Love)

· Elijah Canlas (Babae At Baril)

· Ricky Davao (Fuccbois)

· Arturo De Guzman (Guerrero Dos, Tuloy Ang Laban)

· Ronnie Lazaro (Maria)

· JC Santos (Miracle in Cell No. 7)

· Joel Torre (Miracle in Cell No. 7)

MOVIE SUPPORTING ACTRESS OF THE YEAR

· Yayo Aguila (Metamorphosis)

· Angel Aquino (Kaputol)

· Ella Cruz (Edward)

· Jaclyn Jose (Kalel, 15)

· Maricel Laxa (Hello, Love, Goodbye)

· Gina Pareño (Unforgettable)

· Meryll Soriano (John Denver Trending)

· Tuesday Vargas (LSS)

This posting includes an audio/video/photo media file: Download Now

Editoryal: Carbon Market

Posted: 23 Mar 2021 06:03 AM PDT

Usa ka dakong pakli sa panid sa kasaysayan sa Carbon Public Market ang mahitabo karong hapon, Marso 24, human sa pipila ka siglo sa pagserbisyo isip labing dako o sentro nga merkado sa Sugbo.

Ang groundbreaking alang sa pagtukod sa P5.5 bilyunes nga bag-ong Carbon Public Market ipahigayon na gyud karong alas 5:00 sa hapon human naoktaba ang orihinal nga schedule kagahapon, Marso 23.

Si Market Administrator Irvin Cabales nipahibalo nga nakompleto na ang tanang gikinahanglan labot sa ceremonial grondbeaking sa pagsugod sa construction sa bag-o ug modernong merkado publiko sa dakbayan.

Samtang, dihay kapin o kulang 100 ka mga manindahay sa merkado ang nipahigayon og rally kagahapon ug manawagan nga ibasura ang kontrata sa Cebu City Government ug Megawide Construction Corp.

Nakasuwat sa ilang placards ang "no privitization" sanglit sila nagtuo nga ang Megawide na maoy manag-iya ug modumala merkado. Base sa ilang gipangsuwat, maklaro nga wala nila masabot ang kontrata. O, dili ba kaha, nagdumili sa pagsabot tungod sa bulok sa pulitika.

Mas maayong dili magpahikot ang kagamhanan sa pagsupak sa pipila tali sa nagpakahilom nga mayoriyang uyon sa kalamboan. Samtang, ipadayon ang pagtubag ug pagpasabot sa katawhan alang sa pag-isa sa kalidad sa merkado.

Ug kon balik-lantawon, walay dakong proyekto sa dakbayan nga walay pagsupak sa sinugdanan sama sa pagpalambo sa kanhi golf course ngadto sa Ayala Business Park ug ang kanhi airport sa Lahug ngadto sa IT Park.

Sa Carbon Public Market, maayong mapanalipdan usab ang interes sa masa ug kagamhanan taliwala sa pagpalambo niini sa pribadong kompaniya aron pagsira sa laing panid sa iyang kasaysayan, ang tanan makabenepisyo sa dekalidad nga serbisyo.

This posting includes an audio/video/photo media file: Download Now

Lonzon: Magpapili sa pagka presidente

Posted: 23 Mar 2021 06:01 AM PDT

Kon madayon kini, sila ang modagan sa pagka Presidente sa Pilipinas alang sa May 9, 2022 presidential elections.

Si Davao City Mayor Sarah Duterte sa pagka Presidente ug parisan ni kanhi Senador Bongbong Marcos.

Posibling mag-tandem sab sila si Bise Presidente Leni Robredo ug Manila City Mayor Isko Moreno.

Kon madayon, anaa sila si Senador Manny Pacquiao kauban ni Senador Grace Poe nga wa sab magpauwahi sa survey.

Mitumaw sab ang pangan ni Senador Bong Go ug si President Rodrigo Duterte maoy mag bise presidente base sa petisyon sa mga opisyal sa partido sa PDP LABAN.

Salikwaut ug di maayo tan-awon nga mag bise si Duterte kon delikadiza atong ipatigbabaw.

Sa Ssrvey, si Digong ug si Robredo mao ang pinakahinay ikompara nila ni Sarah, Moreno, Pacquiao, Grace Poe, Marcos ug Bong Go.

Kini hinuong nagpatuo nga independent survey o research center makita nga dili patas.

Ang nagpa-commission sa survey ang nakapabor nga migasto ug multimillion pesos. Duna pa gayud bayad ang nag-subscribe aron maapil ilang pangan sa survey.

MAYOR LABELLA

Kutob ra sa barko ang mga Katsila nga miabot sa Sugbo gikan sa Spain. Ang ilang pag-abot subay sa kasaulogan sa 500th anniversary sa Christianity.

Si Cebu City Mayor Edgardo Labella maoy nangulo sa kalihukan sa pantalan sa Cebu International Port (CIP).

Bisan tuod og dili normal ang kasaulogan tungod kay naapektahan sa Covid-19 naangkon ang kalampusan.

Si Magellan maoy nangulo sa pagda sa Kristyanismo sa Pilipinas ug nagda sa imahen ni Sto Niño ug Krus 500 years na ang milabay.

PULITIKO SA SUGBO

Dunay pagduda nga ang pag-adto sa mga pulitiko sa Sugbo sa kaulohan, pinanguluhan ni Gobernador Gwen Garcia, aron suportahaan ang pag-indurso sa kadagkoan sa PDP Party sa kandidatora nila ni Senador Bong Go ug Presidente Rodrigo Duterte, alang sa pagka presidente ug bise presidente. (Email: efrenlonzon71@gmail.com, Text:09235562777)

This posting includes an audio/video/photo media file: Download Now

Diputado: Migawas na ang binuang

Posted: 23 Mar 2021 06:01 AM PDT

Duna na koy nakuha nga dokumento nga nagpakita og dakong rason ngano nga maglibog ko sa kanunay pagsaka sa gidaghanon sa kaso sa Covid-19.

Ang usa ka dokumento, death certificate, gikan sa usa ka lungsod sa Bohol. Ang ikaduha, ang medical abstract gikan sa usa ka ospital.

Dili lang nato hisgotan ang ngalan sa pasyente nga namatay, ang lungsod ug ang ospital.

* * *

Nahinabi nako ang daughter-in-law sa namatay nga pasyente ug siya ang naghatag nako sa mga dokumento. Suheto siya sa sitwasyon sa iyang ugangan nga babaye ug makasulti siya sa iyang nahibaw-an bahin sa kondisyon sa iyang namatay nga ugangan.

Dunay sakit sa kidney ang iyang ugangan. Dugay na kining sakita ug kaniadtong Pebrero 28, 2021, wa na kaagwanta ang iyang lawas, mitaliwan na siya sa dayon.

Dako ang kahingangha nila sa dihang nakita na nila ang death certificate kay gibutangan man sa municipal health officer (MHO) og "Covid suspect" ang namatay.

Gidalidali paglubong kay Covid lagi kuno, wa na gani mabinditahi sa pari, diretso na lang sa sementeryo.

Matod sa MHO, dunay Chronic Kidney Stage IV ang sakit sa namatay.

Unya gisumpayan sa ubos og Covid suspect.

Nganong Covid man, naglibog ang mga hingtungdan.

* * *

Sa akong pagpakighinabi sa daughter in law, mao ni akong nahibaw-an.

Wala maglisod pag-ginhawa ang namatay.

Wala giubo. Wala gihilantan.

Ang iyang gana sa pagkaon walay nausab, matod pa.

Ang iyang gibati mao ra gyod ang sakit sa iyang tiyan, ngutngot kuno kanunay.

Wala magpakita og symptoms og Covid akong ugangan, Sir, nganong gibutangan man og Covid suspect iyang death certificate?

Mao kini ang pangutana sa daughter-in-law.

Ang nakalisod pa gyod, unsaon man nila paglalis ang MHO nga maoy nagbunyag sa sakit nga Covid?

Mahimo ba nila nga ipa-review ang maong diagnosis sa MHO?

Karon nga gibunyagan og Covid suspect ang namatay, silang tanan nga sakop sa pamilya nahulog na og mga suspect sab sa Covid kay kauban ra man sila og puyo sa usa ka balay.

Maayo ra ba na?

* * *

Unsay epekto sa maong Covid suspect nga marka sa MHO sa maong lungsod?

Kon dunay report nga required nga i-submit ngadto sa Provincial Health Office matag adlaw o semana, siyempre iapil og ihap kadtong maong panghitabo.

Ang resulta, laing pasyente na usab ang namatay sa Covid.

Kadtong pirmi lang nagsunod sa bulletin gikan sa DOH magtuo gyod nga tinuod nga nagkadaghan ang namatay sa Covid.

Kon i-compile na kini sa national DOH, mogawas nga tinuod gyod nga nag-increase ang gidaghanon sa namatay sa Covid.

Kon kadtong nahitabo sa maong lungsod mao sab ang nahitabo sa ubang lungsod ug sa ubang probinsiya, daghan gyod ang magtuo nga hilabihan na ka-seryoso sa problema sa Covid sa atong nasod.

Kon ingon ani ang sitwasyon, angayan pa ba kaha nga motuo ta anang mga numero sa "active" cases, apil na ang gidaghanon sa mga namatay sa Covid?

* * *

Kon di pa mopahawa kining Cocid sa atong nasod hangtod Disyembre karong tuiga, unsa kahay mahitabo sa pangampanya sa mga politiko nga gusto magpapili sa piniliay sunod tuig?

Malipay kaha sila nga mangampanya atubangan sa mga tawo unya nagtaptap sa ilang mga nawong, ang ilang mata ray makita unya dili makita ang tibuok nawong?

Malipay kaha sila nga mopailaila sa ilang kaugalingon sa kadaghanan unya di makita ang ilang panagway, igo rang madungog ang ilang mga tingog?

Malipay ba pod kaha sila nga makighimamat sa mga tawo nga di pod nila mailhan kay nagtaptap pod ang mga katawhan sa ilang nawong?

Unsay gamit sa nawong nga makita sa tarpaulin og uban pang campaign materials kon ang kandidato nga nakighimamat kanila nagtaptap sa ilang nawong?

This posting includes an audio/video/photo media file: Download Now

Talk to Papa Joe: Murag mangigi

Posted: 23 Mar 2021 05:58 AM PDT

Dear Papa Joe,

Ako diay si Josep, 45 anyos na ang panuigon, minyo ug may upat ka anak.

Ako ra ang ga trabaho para maka focus akong asawa sa among mga anak. Karon, naa koy inahan nga tiguwang na tawon ug manghud nga high school pa. Karon kon mohatag ko, makita nako nga lain ang batasan sa akong asawa. Hinuon, di man siya mosulti pero klaro kaayo sa iyang mga aksyon. Manggawas dayon ang mga bayrunon. Pero kon iya na ganing side, sekreto sad siya sige og padala kay makakita ko sa resibo.

Di sad ko ka sekreto kay siya may naggunit sa akong sweldo. Unsaon nako ni? Palihug tambagi ko.

JOSEPH

Joseph,

Mag talk mo sa imong asawa ug prangkahi nga di sad siya mag-ing ana. Pero klaroha kay basin feeling ra nimo sad nga mao na ang iyang na-feel.

Kon mahimo, i-budget na lang na daan nga equal para way rason nga magsinahay. Ana lang. Ingna siya nga what if kon "kita na ang matiguwang" okay ra ba niya nga "pasagdan na lang ta sa atong mga anak?" Ana lang ug daghang salamat.

PAPA JOE

(sa inyong tampo ipadala lang sa papajoesuperb@gmail.com)

This posting includes an audio/video/photo media file: Download Now

Mga batang IP padayong gialagaran sa DSWD 7

Posted: 23 Mar 2021 05:11 AM PDT

Ang Department of Social Welfare and Development (DSWD) 7 padayong nagserbisyo sa nabiling lima ka IP ka mga bata sa ilang pasilidad.

Sukad sa ilang pagkasulod sa pasilidad, ang DSWD-7 naneguro nga ang social welfare ug development services mahatag kanila.

Sa center, ang mga bata gihatagan og homelife, health care, personal hygiene, spiritual enhancement services, ug stress management exercises lakip sa ilang personal nga panginahanglan.

Mandato sa DSWD social worker sa pagpalambo sa overall well-being sa maong mga bata sa ilang kustodiya. (PR)

This posting includes an audio/video/photo media file: Download Now

Balay-Balay, Tubig-Tubig: Semana alang sa batang babaye

Posted: 23 Mar 2021 05:10 AM PDT

Sa ikaupat nga semana matag Marso gisaulog nato ang Protection and Gender-Fair Treatment of the Girl Child Week.

Ang matag tuig nga kasaulogan alang sa mga batang babaye nakalatid sa Presidential Proclamation No. 759 nga gipirmahan ni kanhing pangulo sa Pilipinas nga si Fidel V. Ramos niadtong 1996 o 25 na ka tuig ang milabay.

Subay sa maong proklamasyon, kinahanglang mahatagan og mga kahigayunan ug pagpanalipod ang mga batang babaye aron maandam sila sa ilang papel sa pagpalambo sa ilang mga komunidad.

Niadtong gihimo ang Presidential Proclamation, duna nay pag-ila sa pait nga kahimtang sa mga batang babaye human nasayran nga nagkasaka ang insidente sa mga batang babaye nga nahimong biktima sa economic exploitation, prostitusyon, ug sekswal nga pagpangabuso.

Gawas sa maong kasinatian, nasayran sab ang mga kaso sa teenage pregnancy ug pagkasakit tungod sa Human Immunodeficiency Virus (HIV) ug Acquired Immunodeficiency Syndrome (Aids).

Ang pagpanday sa maong proklamasyon usa ka reaffirmation sa Pilipinas sa iyang pagsunod sa mga kasabutan sa global initiatives nga gisalmutan ini.

Apil sab kini sa lakang nga gihimo sa estado aron mapatuman ang mga plano ug proyekto sa 1995-2025 Philippine Plan for Gender-Responsive Development.

Mando sa proklamasyon nga kinahanglan buhaton sa Department of Social Welfare and Development (DSWD) isip lead agency inubanan sa Council for the Welfare of Children (CWC) ang pipila ka mga importanteng tahas sama sa pag-review sa mga programa sa gobyerno alang sa mga batang babaye, pagsugyot ug mga kausaban sa mga balaod nga nagdiscriminate sa mga batang babaye, ug paghimo og information campaigns aron mapasiguro nga dunay equal opportunities ang matag batang babaye.

Gimanduan sab ang ubang departamento ug ahensya sa gobyerno sa pag-assist ug coordinate sa DSWD ug CWC sama sa Department of Interior and Local Government (DILG), Department of Labor and Employment (Dole) ug Philippine National Police (PNP) sa pagkab-ot sa mga tumong ug tinguha sa kampanya alang sa mga girl child.

Bisan pa man sa pagpakanaog ining proklamasyon sa pagsaulog sa Girl Child Week, dili malimod nga kinahanglan pa nga doblehon ang pagpaningkamot alang sa kaugmaon sa atong mga batang babaye.

Subay sa research nga gihimo sa Save the Children (The Hidden Impact of Covid-19 on Child Protection and Well-Being), nahibaw-an nga usa sa matag unom ka mga bata ang nakasinati ug pagpangabuso sulod sa ilang panimay atol sa Covid-19 pandemic.

Mipagawas sab og datos ang mga nasudnong ahensya nga misaka ang mga kaso sa mga gender-based violence (GBV) diri sa Pilipinas niadtong sinugdanan sa pagpatuman sa community quarantine sa miaging tuig.

Kinahanglan sab nga ma-amyendahan ang child protection laws aron mapalig-on kini sa pakigbatok sa pagpanghimulos sa batang babaye sama sa Anti-Rape Law ug Anti-Trafficking in Persons Act.

Gawas sa gobyerno, kinahanglan nga mangilabot ang pribadong sektor ug publiko sa pagpanalipod sa mga batang babaye.

Kon dunay mga insidente sa pagpangabuso sa mga batang babaye sa inyong dapit, mahimo kamo nga mangayo og tambag sa CLB pinaagi sa pag-abli sa Children's Legal Assistance Forms--alang sa mga criminal cases: tinyurl.com/clbcrimeform ug alang sa mga civil cases: tinyurl.com/clbcivilform.

[Lindog sinuwat ni Atty. Joan Saniel-Amit, executive director, inubanan sa mga abogado sa Children's Legal Bureau sama nilang Jenny Vieve Cabradilla ug King Anthony Perez. Mahimo kamo nga mopadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa Facebook Messenger: m.me/ChildrensLegalBureauInc]

This posting includes an audio/video/photo media file: Download Now

Nanghinaot si Magsayo nga matagan na siya'g usa ka world title bout

Posted: 23 Mar 2021 05:09 AM PDT

Tinguha ni Mark Magsayo nga makapakita og maayong away sa iyang pagpakigbatok sa beteranong si Pablo Cruz karong Abril 10, 2021 sa Mohegan Sun Arena sa Uncasville, Connecticut, USA alang sa iyang tinguha nga makapanuktok alang sa world title.

Ang Bol-anong si Magsayo, kinsa adunay rekord nga 21-0, 14 KOs, malaumon nga mahatagaan siyag kahigayunan nga makaaway og world title fight kon molampos siya batok kang Cruz, kinsa adunay 21-3, 6 KOs nga rekord.

"Pagpapalarin na manalo tayo sana mabigyan na tayo ng world title fight ni sir Sean (Gibbons)," matod ni Magsayo sa virtual press conference niadtong Marso 22, 2021.

Si Magsayo moaway isip undercard sa world title defense ni Filipino boxer Jerwin Ancajas batok sa Mexicano nga si Jonathan Javier Rodriguez.

Dako ang pagtuo ni MP Promotions Sean Gibbons nga maayo ang ipakita nga away ni Magsayo.

Mao na kini ang ikaduhang away ni Magsayo sa Estados Unidos sukad siya mipirma ubos sa MP Promotions ug mi-train kauban si legendary coach Freddie Roach sa Wild Card Boxing Gym.

Matod ni Gibbons nga iyang nakita nga modaog si Magsayo pinaagi sa knockout sa tungatungang bahin sa away.

"You know I see Mark (Magsayo) fight, he likes to mix it up. The guy (Cruz) fighting is pretty one dimensional," sigon ni Gibbons.

Batbat ni Magsayo nga kondisyon kay siya aning awaya kay sukad pa niadtong Nobyembre sa miaging tuig, nag-training na siya. (RSC)

This posting includes an audio/video/photo media file: Download Now

Surfer naigo'g kilat, namatay

Posted: 23 Mar 2021 05:09 AM PDT

Namatay ang usa ka dalagang surfer sa El Salvador human maigo sa kilat samtang nag-training sa dagat alang unta sa umaabot nga Tokyo Olympics.

Nag-surfing ang 22-anyos nga si Katherine Diaz sa spot dapit nga gitawag og El Tunco sa dihang naigo kini sa kilat.

Gidali siya og tabang sa emergency personnel sa maong lugar apan wa na kini maluwas.

Si Diaz mao ang pambato unta sa El Salvador sa umaabot nga Tokyo Olympics karong Hulyo 23 ngadto sa Agosto 8, 2021 sa Japan.

Sa Instagram ni Diaz, daghan ang mipadangat sa ilang pahisubo.

Nakurat ang mga netizen sa nahitabo ug naguol kay daghan pa unta kining matabang sa komunidad hilabi na sa natad sa surfing.

Mosalmot unta si Diaz sa ISA World Surf Games karong Mayo 29 ngadto Hunyo 6 nga usa ka qualifying event alang sa Tokyo Olympics.

Ang Top 7 sa maong kompetisyon mao ang makakuha sa pito ka slots sa Olympics.

Miisyo na og opisyal nga pamahayag ang International Surfing Association (ISA) kabahin sa trahedya.

Matod sa asosasyon nga grabeng kaguol ang ilang gibati tungod sa nahitabo ni Diaz.

"Katherine embodied the joy and energy that make surfing so special and dear to us all, as a global ambassador of the sport. She excelled at the international competition level, representing her country with pride at both the ISA World Surfing Games and ISA World Junior Surfing Championship," padayag sa ISA.

Samtang ang Salvadoran Surf Federation nagkanayon nga usa ka maayo nga atleta nga nag-representar sa ilang nasod ang nawala sa kanila.

Unang higayon nga adunay surfing event sa Olympics kay gilakip man kini sa 33 ka sports nga duwaon sa matag upat ka mga tuig nga kompetisyon. (RSC)

This posting includes an audio/video/photo media file: Download Now

Sotto gidayeg sa NBA trainer

Posted: 23 Mar 2021 04:28 AM PDT

Nakadayeg og maayo sa batan-ong Pinoy nga higante nga si Kai Sotto ang usa ka professional basketball skills coach nga naka-train na og ubay-ubay nga magduduwa sa National Basketball Association (NBA).

Si Stanley Remy, kinsa nahimong trainer nila ni Andre Drummond sa Cleveand Cavaliers ug Trevor Ariza sa Miami Heat, nag-post og hulagway sa Instagram diin makita nga nagtudlo siya sa 18 anyos ug 7'2" nga si Sotto.

"Potential is only potential if you work hard to make it a reality," pasabot ni Remy. "Great work this weekend with Kai Sotto, the sky is truly the limit."

Ang East West Private, nga management group ni Sotto, nag-post sab og video diin nakighinabi si Sotto kang Drummond pinaagi sa video call. (ESL)

This posting includes an audio/video/photo media file: Download Now

Magnificent News

Wednesday, March 24, 2021