Tuesday, March 30, 2021

https://www.sunstar.com.ph/

https://www.sunstar.com.ph/

11 ka pulis gitangtang

Posted: 30 Mar 2021 06:53 AM PDT

Onse ka pulis sakop sa Sawang Calero Police Station ang gipangrelibuhan sa katungdanan ug mameligrong mataktak sa serbisyo sa pasangil nga mitulis ug usa kanila ang milugos pa sa usa ka 35 anyos nga babaye nga ilang gidakop didto sa barangay Tungkil, lungsod sa Minglanilla nga wala gi-blotter sa police station.

Ang 11 ka mga pulis nga gipasanginlan giilang mao sila si Police Staff Sergeant Celso Colita, Police Chief Master Sergeant Eric Edgar Emia, Police Corporal Rochelito Mabulay, Police Corporal Emmanuel Martinez, Police Staff Sergeant Joseph Alcoseba, Police Staff Sergeant Michael Rhey Cabizares, Police Corporal Carlo Irizari, Police Corporal Junel Pedroza, Police Corporal John Carl Aceron ug Police Corporal Georny Abrasado.

Ang maong mga pulis sakop sa Drug Enforcement Unit sa Sawang Calero Police Station diin si Colita maoy nagsilbing team leader.

Kasamtangan sila nga gidestino sa Regional Police Holding Admin Unit sa Police Regional Office (PRO7) ug gipang-imbargohan na sa ilang armas.

Matod Police Brigadier General Ronnie Montejo, hepe sa PRO-7, nga si Colita gipasakaan og duha ka kasong pagpanglugos human niya giingong lugosa sa makaduha ka higayon ang babayeng dinakpan sulod sa usa ka motel.

Samtang ang napulo nag-atubang ug mga kasong grave coercion, robbery ug grave threats ngadto sa Prosecutors Office sa Siyudad sa Sugbo.

PASANGIL

Nasayran nga niadtong Marso 9, 2021 sa 9:00 sa gabii gisulod sa grupo ni Colita ang panimalay sa biktima nga gi-alyasan og Iris ug gi-search human pasanginli nga nalambigit sa illegal drugs ug giingong nagtiner og dili lisensiyado nga armas.

Sa pagka-1:00 pm sa Marso 10 gidala si Iris sa Sawang Calero Police Station ug gibutang sa usa ka lawak nga wala gi-blotter.

Giingong gidala ang maong dinakpan sa usa ka bangko ug gipa-withdraw og kwarta nga mobalor sa P170,000 ug nianang pagka 2:45 p.m. sa mao gihapong petsa gidala si Iris sa Queensland, barangay Mambaling ug giingong gipahimuslan ang iyang pagka-babaye ug gibalik sa police station pagka 5:00 p.m.

Gibuhian ra usab si Iris niadtong Marso 11 sa alas 5 sa hapon ug gihatod siya ni Colita sa barangay Tungkil, lungsod sa Minglanilla apan kutob lang sa guard house sa subdivision diin siya nagpuyo.

MISUMBONG

Dali nga midangop si Iris sa Integrity Monitoring and Enhancement Group (IMEG) Visayas Field Unit ug misumbong sa iyang gidangatan sa mga kamot sa kapulisan sa Sawang Calero.

Mihimo gilayon sa ilang imbestigasyon ang IMEG pinaagi ni Police Major Alejandro Batobalonos ug sa dihang nakonpirmar gipasakaan og kaso ang mga nahisgutang pulis.

Tungod sa gihimo sa maong mga pulis walay kabutangan sa iyang kasagmuyo si Ronnie Montejo bisan pa man nga iya kining gihulagway nga isolated lang nga kaso ang gibuhat sa mao nga mga pulis.

"Nasagmuyo ko sa nahitabo labi na nga may kalambigitan ang akong mga kauban sa buhat. Dili gyud nako ni i-tolerate kon mapamatud-an nga nakalapas sila sa balaod. Atubangon nila kon unsa may angay nga ipahamtang nga silot sa ilang gibuhat," matod ni Montejo.

HEPE NAPAGAN

Samtang si Police Colonel Josefino Ligan, hepe sa kapulisan sa siyudad sa Sugbo, nipahibawo nga lakip sa giparelibohan ang hepe sa Sawang Calero nga si Police Major Eduard Sanchez ug gihulipan ni Police Major Erano Regidor, information officer sa Cebu City Police Office.

"The station commander of police station 6 was immediately relieved and he will also be under investigation for possible lapses not being he was not able to supervise his men," matod ni Ligan.

Kasamtangan nga gi destino si Sanchez sa CCPO holding admin unit samtang nagpadayon ang gihimong imbestigasyon batok kaniya.

Ang PRO-7 modugang usab og 11 ka police personnel aron itapak sa gipangrelibohang pulis aron dili maapektohan ang ilang trabaho.

This posting includes an audio/video/photo media file: Download Now

Letter of request pangayuon sa Sta. Fe

Posted: 30 Mar 2021 06:52 AM PDT

Alang sa hapsay ug luwas nga pagselebrar sa Semana Santa sa lungsod sa Santa Fe, gimandu-an ang tanang residente sa lungsod nga moduso og letter of request ngadto sa buhatan sa mayor niadtong tanan nga buot moduaw o mopuyo sa ilang mga paryente sa maong lungsod.

Kini maoy kamandoan sa kagamhanan nga paagi aron masubay ang mga tawo nga moabot sa lungsod.

Gawas sa mga mobisita, gipasidan-an usab ang mga turista nga mosuroy sa tourist destinations sa lungsod nga magpa book daan sa authorized resorts ug hotels nga mobukas ning Semana Santa.

Sama sa rekisitos sa lalawigan sa Sugbo, medical certificate, valid idenitification (ID) card ug ecological fee ang kinahanglan kompletohon sa nga turista aron makalaag.

Gipahinumdoman usab sa kagamhanan nga striktong gidili ang pagtapok-tapok, pag inom o pagpanga-on sa mga pampublikong lugar sa maong okasyon.

Gidili usab ang camping samtang kutob lang sa alas 6:00 sa hapon mahimo nga maka-swimming. (ANV)

This posting includes an audio/video/photo media file: Download Now

Cebu City Covid cases mikunhod; bisan gani ang sa mga barangay

Posted: 30 Mar 2021 06:51 AM PDT

Ang Cebu City nakatala og 63 ka bag-ong mga kaso sa coronavirus disease 2019 (Covid-19) sa Marso 29, 2021, labing ubos gikan niadtong katapusang semana sa Enero.

Ang Emergency Operations Center (EOC) nikuha og sample sa 620 ka mga individual, kinsa adunay spymtoms ug close contact sa mga napositibo.

Nasuta nga 10.16 porsyento kanila positibo sa Sars-CoV-2, nagdala sa Covid-19.

Si Konsehal Joel Garganera, deputy chief implementer sa EOC, niawhag sa publiko nga magpadayon sa ilang pagkamabinantayon ug di mokumpyansa hilabi na nga taas ang holidays.

Iyang gipahinumdoman nga katapusang nisugod og saka ang kaso liwas sa taas nga holiday sa Pasko ug Bag-ong Tuig.

Way gusto nga masubli pa ang maong hitabo.

Dugang ni Garganera nga kinahanglan nga mapabilin nga kontrolado sa Dakbayan ang pagsaka sa kaso sanglit human sa Holy Week, pag-abot sa Abril 14, saulogon sa Pilipinas, partikular sa Sugbo, ang ika-500 ka tuig nga pagkahimugso sa Kristiyanismo.

Ang Barangay Guadalupe gihapon ang adunay labing daghan apan 104 na lang kanila ang nataptan sa nakalabay nga 10 ka adlaw.

Gisundan kini sa Talamban (68), Lahug (54), Apas (53), ug Punta Princesa ( 43).

Aron way panagtapok nga mahitabo ning Semana Santa, si Mayor Edgardo Labella mimando sa kapulisan sa paghugot sa pagbantay sa mga merkado publiko, simbahan ug kabaybayunan sa South Road Properties aron way mangaligo.

Susihon usab sa kapulisan ang taho nga dunay grabeng tapok sa mga tawo sa Transcentral Highway (TCH) nga unta gidili man kini karong panahuna.

This posting includes an audio/video/photo media file: Download Now

11 nasikop, 2 patay atol sa mga police operation

Posted: 30 Mar 2021 06:51 AM PDT

Moabot ngadto sa 11 ka mga tawo nadakpan ug duha ang napatay sa managlahing mga operasyon sa Regional Intelligence Unit 7 sa rehiyon 7 atol sa ika 53 nga anibersaryo sa pagkatukod sa New People's Army (NPA) sa Lunes, Marso 29, 2021.

Sa usa lang ka adlaw nga dungan nga operation sa managlahing mga lugar sa Central Visayas, nakasikop silag 11 ka most wanted persons.

Duha usab ang nakalas nga gituohang mga sakop sa rebeldeng NPA sa lungsod sa Santa Catalina, Negros Oriental.

Ang namatay mao silang Alfredo Banquel ug usa ka lalake nga wa pa mailhi sa pag kutlo ning balita.

Matod ni Police Lieutenant Colonel Ricky Delelis, hepe sa RIU 7, nga nagdala og warrant of arrest ang mga sakop sa Special Action Force (SAF) ug RIU, apan giunhan sila sa pagpusil sa grupo ni Baraquel. Atol sa engkwentro, nakaikyas ang mga kauban sa duha, apan nakasakmit silag mga armas ug ubang mga gamit sa komunistang grupo.

"During the implementation of search warrant they were able to shoot first our operating team. That's why ang ginawa ng ating mga kasamahan doon ay syempre ipinagtanggol ang kanilang sarili upang sa ganun naman ay maprotesksyonan nila lalong lalo na ang team natin," matod ni Delelis.

Lakip sa mga nadakpan ang dugay na nga pinangita sa balaod nga adunay warrant of arrest nga number 10 most wanted person sa regional level nga mao si Evangeline Ricana Parba, taga sitio Labsalex, Salvador Extension, Barangay Labangon, Siyudad sa Sugbo nga nag atubang og kaso sa illegal nga drugas.

Number 6 most wanted person sa provincial level sa Sugbo nga mao si Vincent Gregorio Granada, taga Mabini, lungsod sa Poro, mga isla sa Camotes nga adunay kasong statutory rape ug number 1 most wanted sa siyudad sa Sugbo nga si Adonis Sugano, taga Katipunan street, Barangay Mansasa, Siyudad sa Tagbilaran Bohol, nga adunay kaso nga illegal nga drugas.

Tulo usab ka sakop sa criminal gangs ang nangadakpan nga silang Rico Pastor, taga Purok Bayabas, barangay Poblacion, lungsod sa Compostela Cebu nga adunay kasong statutory rape ug giingong sakop sa Alvaro drug group; Edomart Espedilla, nag-atubang og kasong sexual assault ug membro sa grupo ni Nilo Quirante ug Arjun Degamo, taga San Isidro Talisay City nga sakop sa Joel Paca criminal gang diin aduna siyay warrant of arrest sa kaso sa illegal nga drugas. (AYB)

This posting includes an audio/video/photo media file: Download Now

Konsehal dakpan sa buy-bust

Posted: 30 Mar 2021 06:48 AM PDT

Barangay konsehal nadakpan sa buy-bust alas 3:30 sa hapon Lunes, Marso 29, 2021 sa Barangay Ginablan, lungsod Badian.

Ang suspek giilang si barangay konsehal Eugene Capacio Comision, 30, minyo, high value individual (HVI).

Si Comision nakuhaan og unom ka pakite sa gituohang shabu dihang nasikop nila ni Police Lt. Alexius Tangub, hepe sa Badian Police Station.

Si Police Master Sgt. Jonathan Calabroso, sa Badian Police Station nga nahinabi sa Superbalita Cebu nagkayon nga si Comision nalakip sa ilang listahan sa mga durugista nga taudtaud na nga gimonitor.

Matod ni Calabroso nga sa ilang monitoring nagpadayon ang konsehal sa barangay pagpamaligyag ilegal nga drugas. (GPL)

This posting includes an audio/video/photo media file: Download Now

Editoryal: Di mokompiyansa

Posted: 30 Mar 2021 06:48 AM PDT

Nunot sa pag-obserbar ug pagpamalandong sa Semana Santa, pasalamatan nato ang Kahitas-an nga ang Dakbayan sa Sugbo niadtong Lunes, Marso 29, mitala lang og 63 ka bag-ong kaso sa Covid-19 nga maoy labing ubos sukad sa Enero ning tuiga, ang ikaduhang hugna sa paghunat sa pandemiya.

Apan dugang pag-ampo ang gikinahanglan alang sa susamang dagan sa ubang bahin sa Sugbo ug tibuok nasod labi na sa Metro Manila nga gipatuman og balik ang enchanced communty quaratine (ECQ) tungod sa pagsutoy sa kaso sa Covid-19.

Si Konsehal Joel Garganera, deputy chief implementer sa Emergency Operations Center (EOC), nagkanayon nga nikuha sila og sample sa 620 ka mga indibiduwal kinsa adunay symtoms ug kadtong close contact sa positibo sa virus, ang 10.16% lang kanila nagpositibo.

Maayo kining kalamboan apan niawhag si Garganera sa publiko nga dili mokompiyansa . Maningkamot kita nga magpadayon ang pag-us-os sa kaso pinaagi sa pagsunod sa health protocol labina ning taas nga bakasyon o holidays sa Kuwarisma nga daghang mobiyahe.

Iyang gipahinumdoman ang katawhan nga katapusang nisugod og saka og balik ang kaso panahon sa liwas sa taas nga holiday sa Pasko ug Bag-ong Tuig. Walay gusto nga masubli pa ang maong hitabo human sa Kuwarisma.

Dakong hagit na usab sa kagamhanan sa sunod buwan, Abril 14, mao ang pagsaulog sa makasaysayanong ika-500 nga anibersaryo sa Kristiyanismo dinhi sa Sugbo. Gipaabot ang pipila ka kalihokan nga tambongan sa daghang deboto.

Samtang, dili kapugngan ang daghang mobiyahe sugod karon aron makalulinghayaw. Dili kita mokompiyansa. Angay natong hinumdoman ang pagpamalandong sa pag-antos sa atong Manunubos. Kini maghatag og paglaum. Matapos na unta ang pandemiya sa Covid-19.

This posting includes an audio/video/photo media file: Download Now

Lonzon: 64 ka kaso sa Covid-19 sa Cebu City

Posted: 30 Mar 2021 06:46 AM PDT

Maayong timailhan ang pag-ubos sa kaso sa Covid-19 sa Siyudad sa Sugbo sa Lunes, Marso 29,2021.

Kini nagpasabot nga milampos ang Siyudad ubos sa liderato ni Mayor Edgardo Labella sa kampanya pinaagi sa pagpahinumdom sa katawhan sa pagsunod sa standard health protocol.

Dako kini natong kalipay karon kay di lalim sa nanglabay nga mga adlaw ang kaso sa Covid-19, moabot sa dul-an sa 200 matag adlaw.

Pinaagi niini maayo unta og mahimong kanunay ang pag-ubos basta di lang magpabadlong ang mga tawo.

Dako kaayo og responsibilidad si Labella alang sa katawhan sa siyudad sa kahimtang karon sa pandemiya, busa atong suportahan ang kampanya batok sa Covid.

WAY KULBA SI AHONG

Bilib ko sa panerbisyu ni Lapu-Lapu City Mayor Ahong Chan ngadto sa katawhan kay maoy mangunay gyud.

Gawas nga nakita sa Agila , nakadawat sab og kasayuran gikan sa followers niini ang mga pagdayeg sa mayor.

Mangunay man gud sa pag- adto sa lugar bisan ginagmay nga panginahanglan sa probema sa katawhan. Ang ubang pulitiko ilang itahas sa ilang mga tawo ang pagsulbad ug pagtubag sa problema.

Makita nato ang dedikasyon ni Chan ug ang tinuoray nga serbisyo publiko ug gibaliwala nga matakdan sa Covid-19 basta makatabang lang.

Naay ubang mayor, motago sa ilang opisina nagbabugnaw kay hadlok mogawas ug mopakita sa mga tawo tungod sa Covid-19.

Wa man kaayo ni nako makaila si Chan, apan dili nato ihikaw ang mga pagdayeg sa iyang dalaygon nga gihimo sa Lapu-Lapu.

WOMENS MONTH

Tanang kalihukan ni Atty. Totol Batuhan sa pagpahigayon og Sugbonar subay sa pagsaulog sa Women's Month sa Marso ang nagmalampuson.

Ang mga kalihukan ni Batuhan inyong makita sa Abante Barangay ug Bayan at Kabataan kay Batuhan Facebook page.

Usa kini ka non-governmental organization nga gipalihok ni Batuhan aron pagtabang sa kabataan, estudyante, young professionals ug uban pa. Email: efrenlonzon71@gmail.com Text: 09235562777

This posting includes an audio/video/photo media file: Download Now

Diputado: Covid ang pasanginlan

Posted: 30 Mar 2021 06:46 AM PDT

Dunay namatay kay naaksidente sa national highway.

Paggawas sa death certificate, Covid suspect kini.

Dihay namatay tungod kay dugay na nalaygay sa sakit nga chronic kidney stage IV. Sa dihang migawas na ang death certificate, gi-Covid kuno ang namatay.

Mismo ang mga sakop sa iyang banay natingala.

Sila tanan nga nagpuyo sa maong balay, way Covid.

Apan wa silay nahimo kay ang municipal health office (MHO) man ang mi-certify sa death certificate nga Covid suspect ang ilang namatay nga ginikanan. Bisan asa na lang kini nahitabo.

Buot ipasabot, sayon na lang kaayo sa mga doktor, mga MHO pagbutangbutang og pagpasangil sa Covid nga maoy hinungdan sa kamatayon.

Ang pangutana, husto ba kining ilang gibuhat?

Sunod pangutana, nganong ila kining gihimo?

* * *

Nahitabo kini sa Bohol.

Mahitabo sab kini sa ubang lugar. Mahitabo sab kini sa tibuok nasod.

Ang pangutana, kinsay maka-question sa gihimo sa mga doktor o mga MHO nga mga badlungon?

* * *

Dunay usa ka mayor nga gihangyo sa katawhan - ang karsada nga agian sa prosisyon sa Santo Entierro gusto nila ipaaspalto.

Kon moagi pa sa bidding, di na maapas. Mihangyo na lang ang mayor sa usa ka contractor nga unhon lang og trabaho, ipaulahi lang ang mga papeles.

Tuod man, naaspalto gyud ang karsada. Migawas ang mga dokumento sa bidding 3 ka bulan human trabahoa ang karsada.

Walay problema hangtod miabot ang kataposang termino sa mayor, hangtod napulihan siya sa laing mayor.

Miabot ang problema sa dihang nag-apil-apil siya sa politika ug milaban siya sa kaatbang sa kasamtangang namunoan.

Naukay ang mga dokumento ug nakita ang karsada nga gipatrabaho bisan walay bidding nga gihimo.

Gikasohan ang mayor sa Ombudsman. Sangko sa langit ang pagmahay sa mayor karon kay matod sa iyang abogado, lisod depensahan ang kaso.

* * *

Dunay gobernador nga mao sab ang gihimo. Gigamit ang usa ka mahalon nga sound system kay dunay importanteng kalihokan.

Tuod man, malamposon ang maong kalihokan.

Tulo ka bulan human sa maong kalihokan, migawas ang bid documents.

Buot ipasabot, gihimo na daan ang kalihokan gamit ang mga mahalon nga mga sound system usa pa gihimo ang mga papeles niini, susama sa nahitabo sa unahan.

Pangutana – unsa man kahay mahitabo niini? Makasohan ba kini sa Ombudsman?

* * *

Dili pa lang dugay, namatay ang usa ka ilado nga DJ kay matod pa, gipusil sa iyang kaipon.

Daghan ang nasuko tungod kay ilado ang maong DJ.

Ang pangutana – kon mogawas na ang death certificate, unsa kahay ibutang nga cause of death – Covid ba kaha?

This posting includes an audio/video/photo media file: Download Now

Talk to Papa Joe: Concern sa bana

Posted: 30 Mar 2021 06:45 AM PDT

Dear Papa Joe,

Tawga lang ko og Jessa, taga Bohol. 26 na akong edad ug may duha ka mga anak.

Ang akong problema kay mahitungod sa akong silingan nga amiga gud nako kay sige na ni siya og ari sa among balay. Unya sige og pangutana kon asa akong bana ug asa nagtrabaho. Unya kon moabot akong bana, moari gihapon siya sa amo unya mabantayan nako nga magpasiklap sa ako bana.

Unsa kaha ni siya, naibog kaha ni siya sa akong bana? Ganahan unta ko nga pangutan-on siya pero basin og malain pud. Unsa may angay nakong buhaton?

JESSA

Jessa,

Di baya lain kon imo siyang prangkahan ug pinaagi sa komedya kanang "ngano sige man ka pangita sa akong bana, ibog ka?. "Ana gud para makabalo ka sa tinuod kay basin tsismosa lang gyud siya. Gusto siya masayod kon ngano nga wa permi imong bana. Total amiga man kaha mo, isulti unsay naa sa imong hunahuna para mawala nana imong duda.

Basin utangan imong bana o basin tomboy siya, naghuwat maka iga nimo. Kana lang ug salamat.

PAPA JOE

(sa inyong tampo ipadala lang sa papajoesuperb@gmail.com)

This posting includes an audio/video/photo media file: Download Now

Basil: Stella dili buhian ang mgi

Posted: 30 Mar 2021 06:44 AM PDT

Manila - Dili kapugngan sa mga Pinoy ang mag-reax sa pagiging first runner-up ni Samantha Bernardo sa gipahigayong Miss Grand International sa Thailand a few days back.

Although para kang Samantha, thankful siya sa iyang puwesto pero siyempre, nag-aim sad siya sa title.

Very cooperative si Samantha sa mga interview after the pageant ug wa kay makita sa iyang awra nga bitter siya or may gikumkom siyang kasilag ngadto sa organizer sa MGI ug kang Miss USA nga maoy grand winner.

Pero daghang nag-suggest nga dapat tigilan na ni Stella Araneta of Binibining Pilipinas ang pagpada og contestant sa MGI kay lagi, halata nga ayaw jud ni Nawat nga padag-on ang Pinay.

Sige na lang kunong nanguwat si Nawat sa mga Pinay.

Bisan unsa pa kini kakusog, never niyang padag-on.

Dili lang naman kang Samantha niya kini gibuhat. Una, kang Nicole Cordovez nga pareho ni Sam, very competitive jud pero yun nga, first runner-up lang siya.

Bisan ang Sugbuanong si Eva Patalinjug (nga usa sad sa naging representative sa Pilipinas for Miss Grand International a few years back, nakamatikod sad sa style ni Nawat.

Actually, puro kusog ang mga pambato nato in the past sa MGI like Karen Galman, Ali Forbes ug uban pa.

Pero sa tan-aw ko murag dili dunggon ni Stella ang sigaw ng netizens. For sure, magpadayon siya sa pagpadala og contestants for MGI.

Duha ka dagkong international pageants na ang nawala sa Binibining Pilipinas, ang Miss Universe ug ang Miss World.

Ang nahabilin na lang sa Bb. Pilipinas mao ang Miss International, Miss Supranational, ang Reina Hispanoamericana nga gidag-an ni Winwyn Marquez ug kining Miss Grand International og yung sa Tourism keneso.

Suggestion ko, sa sunod nga pagpada og contestant ng Pilipinas sa MGI, dapat yung parang Jeannie Anderson or Janina San Miguel ang kalibre, joke lang...or during the prelims, di gaanong magpakitang gilas, sa finals na lang, parang Miss USA ba.

Sa mga galit na galit sa pagkatalo ni Samantha sa MGI, kini na lang ang inyong basehan.

Handpicked lang si Samantha kay sa true lang, official candidate siya unta sa Bb. Pilipinas this year, kung happy si Samantha sa iyang naging puwesto, dapat happy sad ta, di ba?

This posting includes an audio/video/photo media file: Download Now

Balay-Balay, Tubig-Tubig: Kalapasan sa 15-anyos

Posted: 30 Mar 2021 06:42 AM PDT

Dear Atty. Joan,

Maayong adlaw kanimo Atty. Joan. Duna unta koy ipakonsulta nimo kabahin sa nahitabo sa akong bata pinaagi niining sulat.

Ang akong batang anak nga nagpangedaron og otso (8) anyos gipagunit sa kinatawo sa duha ka batang lalake. Gisumbong kini sa akong anak usa ka semana ang milabay human sa hitabo.

Gipagunit ang bata sa ilang mga kinatawo ug gitudluan pod ang akong bata sa pagduwa sa kinatawo niya. Gibayran dayon siya og singko pesos (P5.00) human sa hitabo.

Na-report kini nako sa among Local Social Welfare and Development Office (LSWDO) ug niingon ang mga nalambigit nga mga bata nga nagpangedaron sila og 14 ug 15 anyos.

Katong katorse anyos, gipahamtangan lang og community service ug duna kamiy gipirmahan kasabutan alang sa maong pagserbisyo sa nakasala nga bata.

Mangutana unta ko Atty. Joan kon unsay mabuhat nako alang sa nakasala sa akong bata nga nagpangedaron og 15 anyos.

Duda pod nako nga namakak lang ang bata ug iyang ginikanan sa iyang edad kay sa akong tan-aw lapas sa 18 anyos ang pamostura sa maong bata.

Hinaot nga imo kong matambagan sa angay nga buhaton, Atty. Joan.

Daghang Salamat.

Imong tigtampo,

Helena

Dear Helena,

Una sa tanan maayong adlaw usab kanimo diha, Helena. Salamat sa imong pagsunod ning lindog.

Ang atong balaod mipabor sa pagtan-aw sa "minority" o pagka-menor de edad sa mga bata. Kon adunay pagkwestyon sa edad sa bata, ideterminar ang edad base sa birth certificate sa bata o sa baptismal certificate.

Kon matumbok ang saktong pangedaron sa bata, diha na nato masusi ang implikasyon ini ubos sa Juvenile Justice and Welfare Act (JJWA).

Kon tinuod nga nagpangedaron og kinse anyos ang bata nga nakasala sa imong anak, dunay himuon nga pagsusi kon dunay discernment o abilidad ang bata nga makahibalo kon unsay sakto o sayop.

Ang inisyal nga pakisusi mahimong himuon sa mga social workers apan ang dunay gahum sa pagdeterminar sa discernment sa bata mao ang korte.

Kon makita nga 15 anyos ang lalake nga nakalapas ngadto sa imong anak ug duna kiniy discernment sa pagkahitabo sa insidente, matawag ang bata isip Child in Conflict with the Law (CICL). Ang iyang salaod o kalapasan mao ang acts of lasciviousness in relation to Anti-Child Abuse Law.

Ang korte na ang modisider kon unsay angay nga diversion proceedings para sa maong CICL.

Daghang salamat, Helena, sa imong sulat tampo ug hinaot nakahupay ang maong tambag sa naghuot mo karon nga galamhan.

Imong alagad,

Atty. Joan

[Lindog sinuwat ni Atty Joan Saniel-Amit, Executive Director inubanan sa mga abogado sa Children's Legal Bureau sama nilang Atty. Jenny Vieve Cabradilla ug Atty. King Anthony Perez. Mahimo kamo nga mupadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa Facebook Messenger: m.me/ChildrensLegalBureauInc]

This posting includes an audio/video/photo media file: Download Now

No. 1 pick andam mo-drive sa dyip

Posted: 30 Mar 2021 06:41 AM PDT

Andam na ang No.1 rookie pick nga si Joshua Munzon sa pag-agak sa Terrafirma Dyip sa kampanya niini sa Philippine Basketball Association (PBA).

Si Munzon, kinsa bag-uhay lang nipirma og tulo ka mga tuig nga maximum contract sa Dyip, nanghinaot nga mausab niya ang dagan sa kampanya sa Dyip gikan sa kulatahunong puwersa ngadto sa usa ka title contender.

Gitataw ni Munzon nga dili siya magpadala sa pressure ug magtutok lang siya sa iyang duwa.

"I'm excited about my journey to come in the PBA, and everything that comes with it. I plan to soak it all in and continue to learn and grow as a basketball player and as a person," matod ni Munzon nga napatik sa Spin.ph.

Ikaabag ni Munzon sa paggiya sa Dyip mao si Roosevelt Adams ug ang 8th overall pick nga si James Laput.

Sa pag-abot ni Munzon sa Dyip, dili kalikayan nga ikumpara siya sa kanhi lider sa team nga si CJ Perez, kinsa nitapon na karon sa San Miguel Beermen.

Matod ni Munzon, wala siya maghunahuna niini ug gusto lang niyang matabangan ang Dyip nga makahakot og kadaugan.

"For me, it's a great opportunity to step in and do whatever the teams asks of me. I don't feel any added pressure given the situation. I feel I'm ready to step into any role and be a positive influence on and off the court," dugang ni Munzon.

Ang PBA naglaraw nga sugdan ang ilang bag-ong season sa ulahing bahin sa Abril ug sayong bahin sa Mayo karong tuiga hinungdan nga aduna pay igong panahon si Munzon aron ikasinati og maayo ang iyang mga kauban.

"As we get closer to the opening, I just want to build chemistry with my teammates so we can be as successful as possible during the season. I know things won't be easy but going through battles together will help build that bond," matod niya.

Si Munzon nikuha og dakong atensyon sa Philippine basketball sa iyang pagduwa sa Asean Basketball League (ABL) ug nahimo sab siyang prominenteng magduduwa sa 3x3 basketball. (ESL)

This posting includes an audio/video/photo media file: Download Now

UFC head dakong supak sa plano ni De La Hoya

Posted: 30 Mar 2021 06:41 AM PDT

Dakong supak si Ultimate Fighting Championship (UFC) president Dana White kabahin sa plano ni boxing legend Oscar De La Hoya nga mobalik og away.

Si De La Hoya, 48, miretiro niadtong 2008 human siya nakatilaw og grabeng kulata batok kang Filipino boxing icon Manny Pacquiao.

Sa miaging semana, gianunsyo ni De La Hoya nga mobalik siya'g away karong Hulyo 3, 2021 ubos sa promosyon sa Triller, nga maoy nagpasiugda sa malampusong exhibition bout nila ni Mike Tyson ug Roy Jones niadtong Nobiyembre sa miaging tuig.

Asoy ni Triller execuitve Ryan Kavanaugh nga posibleng ikasangka ni De La Hoya sa iyang pagbalik ang usa ka bantugang mixed martial arts (MMA) fighter sa UFC.

Apan alang ni White, dili niya tugtan bisan kinsa sa iyang fighters sa pagpakigharong kang De la Hoya.

"To box De La Hoya? Come on guys, this sh-t is getting silly. You guys just want to ask me silly questions. You have got a 50-year-old guy f--king boxing, and you guys are actually talking about it and covering press conferences? Come on, come on you guys," matod ni White sa interbyu sa boxingscene.com. (ESL)

This posting includes an audio/video/photo media file: Download Now

Paras mikuha og inspirasyon sa iyang papa

Posted: 30 Mar 2021 06:40 AM PDT

Kinsa'y moagak sa artistang si Andre Paras sa iyang pagtutok sa iyang karera sa Philippine Basketball Association (PBA)?

Natural, wala na lain pa kon dili ang iyang basketball legend nga amahan nga si Benjie Paras, ang bugtong magduduwa nga nakaangkon sa MVP ug Rookie of the Year awards sa samang tuig.

Si Andre, 25, kinsa usa sa rookies nga gikuha sa Blackwater Bossing sa miaging PBA rookie draft, misaad nga magtutok siya sa PBA ug ipadaplin una niya ang showbiz ug uban pa niyang gimbuhaton.

"Who else would be the perfect person kundi yung dad ko kasi he knows the ins and outs of everything," matod ni Andre kabahin sa iyang amahan nga maoy Rookie of the Year ug MVP niadtong 1989.

Gipasabot ni Andre nga nikuha siya og dakong inpirasyon gikan sa iyang amahan, kinsa nahimo sab nga artista. (ESL)

This posting includes an audio/video/photo media file: Download Now

Porter naputlan sa 2 ka tiil

Posted: 29 Mar 2021 08:38 AM PDT

NAPUTOL ang duha ka mga tiil sa usa ka porter sa pantalan sa lungsod sa Santa Fe, isla sa Bantayan, Sugbo human napiit sa damyo sa barko alas 3:50 sa kaadlawon sa Dominggo, Marso 28, 2021.

Si Cruz Pescante Cordova, 56, minyo, taga Brgy. Okoy, lungsud sa Santa Fe, naputlan sa iyang duha ka mga tiil human siya mapiit sa damyo.

Si Police Lt. Eden Rex Baguio, hepe sa Santa Fe Police Station nga nahinabi sa Superbalita Cebu, nagkayon nga si Cordova kauban sa ubang mga porter, nag-ilog sa pagsakay sa Shuttle Ferry 27 dihang nidunggo.

Si Cordova niambak dihang hapit na mabutang ang damyo sa barko, apan siya nadakin-as hinungdan nga nalugpitan iyang duha ka mga tiil.

Gidali siya sa pagdala sa Bantayan District Hospital, apan gumikan kay naputlan sa duha ka tiil, gibalhin sa tambalanan sa dakbayan sa Sugbo.

"Kuwan, Sir, ana man gyud ni sila mag-ilog ba kinsay makauna pag-alsa sa mga bagahi sa mga pasahero. Sakto nga ubos na ang damyo, ambak dayon siya unya dangog man, nadakin-as, napiit hinuon," dugang ni Baguio.

Ang management sa barko nipasalig sa kabanay nga ilang abagan si Cordova.

Ang mga kabanay ni Cordova gipaabot sab sa kapulisan nga mobalik sa ilang buhatan alang sa ilang lakang kon mosang-at sab silag reklamo.

Si Cordova nagtrabaho sa usa ka arastre sa maong lungsod.

Hinuon ang Lungsod niabag kang Cordova.

Gibutyag ni Baguio nga ikatulo na kining higayon nga dunay porter nga napiit. Ang ikaduha namatay.

Karong liwas sa Semana Santa, magtagbo sila uban sa local government unit ug ubang mga sektor aron malikayan nga di na masubli ang hitabo.

This posting includes an audio/video/photo media file: Download Now

Central Visayas dili ma-ECQ

Posted: 29 Mar 2021 08:35 AM PDT

Ang Central Visayas, lakip ang Dakbayan sa Sugbo, di kandidato nga mabutang ubos sa enhanced community quarantine (ECQ).

Mao kini ang gipaneguro sa Department of Health (DOH) 7 taliwa sa mga kabalaka nga ang rehiyon ipaubos sa ECQ sama sa nahitabo sa National Capital Region (NCR) ug silingang mga local government unit (LGU).

Sa DOH tracker sa nakalabay nga 14 ka mga adlaw hangtod sa Marso 28, kini nagpakita nga ang Central Visayas naa sa ikaupat nga dapit sa labing daghan og mga kaso sa coronavirus disease 2019 (Covid-19) nga dunay 4,191 nga bag-o.

Layo ra kaayo kini sa NCR nga dunay 48, 951 ka bag-ong mga kaso.

"Based on our data, you will find that we are not a candidate for ECQ," matod ni DOH 7 chief pathologist ug spokesperson Mary Jean Loreche.

Gipasabot ni Loreche nga ang Central Visayas dunay "very good case management."

Si Loreche nitumbok nga ang critical care utilization rate sa rehiyon naa lang sa 35.6 percent ubos kaayo sa safe zone nga 60 porsyento.

Sa lahi nga interbyu sa Superbalita Cebu, si Emergency Operations Center (EOC) deputy chief implementer Konsehal Joel Garganera nikompirmar nga nangminos ang mga kaso sa Covid-19 sa mga ospital, publiko ug pribado, sa Dakbayan sa Sugbo. (Lahi nga estorya sa pahina 4).

Si DOH 7 Director Jaime Bernadas niingon nga bisan kon ang ang mga kaso sa Covid-19 sa dagkong mga lalawigan ug siyudad sa rehiyon mas taas itandi sa ikaupat nga quarter sa 2020, ang mga local government (LGU) dunay tukmang mga lakang.

"If you look at our statistics, we may have risen in terms of number of cases, but our respond has been also appropriate," matod ni Bernadas.

BANTAYAN

Ayaw kahibulong kon daghan ang mga pulis ug force multipliers nga makit-an sa mga public market, simbahan ug daplin sa kadagatan sa dakbayan sa Sugbo niining Semana Santa.

Si Mayor Edgardo Labella nimando ngadto kang City Director Police Colonel Josefino Ligan sa hugot nga pagbantay sa maong mga lugar aron dili magpundok ang mga tawo ug malikayan ang posibleng tinakdanay sa Covid-19.

Matod ni Labella nga di malikayan nga modagsa ang mga tawo sa merkado para magpalit og mga sagol sa binignit, magtapok sa simbahan nga molapas na sa 50 porsyento nga capacity ug ang pagkaligo sa mga tawo sa dagat labi na sa Ermita-Pasil areas.

Ang Way of the Cross gitugotan apan anha ra sulod sa simbahan diin 50 porsyento gihapon ang capacity apan gidili ang Visita Iglesia ug pagpahigayon og procession.

Apan giklaro sa mayor nga base sa nasabotan sa kapulisan, City Government ug sa Archdiocese, tugotan ang pagpahigayon og misa sa Simbahahang Katoliko ug ubang relihiyon nga adunay kalihokan para sa Semana Santa.

Si Labella gikatakdang moluwat og memorandum para sa 80 ka barangay aron awhagon sa pagmonitor sa ilang area of responsibility sa ipahigayon nga kawatkawat nga tigbakay sanglit hingpit kining gidili. (JJL, PAC)

This posting includes an audio/video/photo media file: Download Now

Lim: akong pumpboat wa nanagat nga ilegal

Posted: 29 Mar 2021 08:31 AM PDT

Gibarugan sa kanhi Philippine Basketball Association (PBA) player, Jojo Lim, nga di illegal ang iyang panagatan sukwahi sa migawas nga mga balita.

Wa usab ilegal nga nanagat ang iyang mga crew, usa niini namatay niadtong Biyernes sa gabii sa gihulagway sa duha ka mga personnel sa Philippine Coast Guard (PCG) nga pagpasalba lang.

Giangkon ni Lim nga nalapas ang iyang mga crew sa municipal waters sa dapit nga angay untang panagatan niini.

Niadtong Biyernes sa gabii, Marso 26, nanagat ang iyang mga crew sa sityo Dakit, Barangay Logon, isla sa Malapascua, lungsod sa Daabantayan.

Nangabot ang duha ka mga sakop sa PCG nga sila si Seaman 1st Class Jayson Hermoso De Padua, 32, taga Taguig City ug Seaman 2nd Class Christian Amorade, 30, taga Mandaluyong City.

Ang duha, sa ilang pamahayag sa kapulisan, niingon nga nagpatrolya sila dihang nakit-an nila ang duha ka pumpboat nga hayag nga giingong ilegal nga nanagat.

Ang duha niingon nga gisuwayan silag dasmag sa pumpboat hinungdan nga sila nipasalba.

Naigo ug namatay ang crew nga si Rolex Casebo, minyo, taga Sitio Sta. Cruz, Barangay Antipolo, lungsod sa Medellin.

DI TINUOD

Si Lim, kinsa nahinabi sa Superbalita Cebu, nagkanayon nga di illegal ang iyang panagatan kay siya kompleto sa mga papeles gikan sa Bureau of Fisheries and Aquatic Resources (BFAR), Maritime Industry Authority (Marina) ug PCG.

Siya nipasabot nga tinuod nigamit sila og pukot nga gagmay og mga mata, apan alang kini sa mga bulinaw.

Duna lang kini lima ka dupa nga gilawmon ug giputol sa iyang mga crew kay nahadlok sa pagpangabot sa duha ka PCG personnel nga wa magsuga ug kalit nga nagpabuto.

"Nangahadlok sila nga gipasalbahan, wala man magsuga o megaphone. Mipahibalo unta sila nga Coast Guard. So, aron makalikay sila, ilaha nalang giputol ang pisi sa baling," dugang ni Lim.

Samtang di sab tinuod ang pangangkon sa duha ka PCG personnel nga gibanggaan sa pump boat.

Gipasabot niya nga dihang gipamusil ang iyang mga crew, ang timunil naratol hinungdan nga wa natarong pagdagan ang pump boat.

Gipadayag niya nga ang jetski nga gisakyan nga duha ka PCG personnel maoy kusog nga nagpadagan. (GPL)

This posting includes an audio/video/photo media file: Download Now

NPA gikondenar sa rally

Posted: 29 Mar 2021 08:31 AM PDT

GRUPO nga pabor sa gobiyerno ug mga kanhi rebelde nihimong indignation rally ug ilang gikondinar ang teroristang kalihukan sa komunistang grupo atol sa 52nd founding anniversary sa New People's Army (NPA).

Gibanabana nga usa ka gatus ka mga tawo gikan sa nagkalainlaing sektor nagtapok sa Senior Citizens Park sa dalan MC Briones, dakbayan sa Sugbo kagahapon, Marso 29.

Ilang singgit nga 'ibagsak ang NPA' nga ilang gihulagway nga dangan sa nasud nga naghatag lang og kasamok sa malinawong pagpuyo sa mga mag-uuma sa kabukiran.

Gisunod dayon sa grupo ang pagtuyok sa downtown area sa siyudad.

Matod sa ilang tigpamaba nga nagpaila nga si 'Ka Norbie' nga ang ilang gihimo aron ipakita sa mga Sugbuanon nga adunay nagpakabana nga misuporta sa mga programa sa gobiyerno.

Ang 52 ka tuig nga rebolusyonaryong kalihukan walay kapaingnan, matod ni 'Ka Norbie' nga tungod niini, kinahanglan nga undangon na kini alang sa kaayohan ug kalamboan sa mga Pilipino.

"Ang akung tambag sa miabin sa NPA dili pa ulahi ang tanan, mintras buhi pa ta may pag-asa ta, hatagan nato og maayong pagtagad ang atong kaugmaon. Dili didto sa bukid kay dili nato masulbad ang problema sa gubat," matod ni Ka 'Norbie.'

Samtang, ang grupong Sambayanan kun hut-ong sa mga kanhi sakop sa rebelde nga mibalik sa sabakan sa gobyerno mihimo usab silag ilang kaugalingon nga caravan.

Sila si 'Ka Derib' ug 'Ka 'Manilyn' nga kanhi mga sakop sa NPA sa taas nga panahon nga naglihok sa lalawigan sa Cebu, Bohol, Leyte ug Negros nagkanayon nga ningsalmot sila sa caravan aron ipanawagan sa komunistang grupo nga hunongon na ang pagpang-harass ug pagpangilad sa mga Pilipino.

Ilang gipasanginlan ang Communist Party of the Philippines nga kusog mopasalig apan walay katumanan.

Giangkon sa kapulisan sa siyudad sa Sugbo nga wala nila hatagi og pagtugot ang naasoyng kalihukan.

Matod ni Police Major Elisandro Quijano nga human sila makadawat og impormasyon, ila kining gisuwayan sa pagbadlong nga undangon ang indignation caravan.

Apan, duang ni Quijano, mihangyo ang tagdumala sa kalihokan nga hatagan lang sila og mubo nga oras aron makapadayag sa sentemento.

Human sa pipila ka minuto nga programa, nanguli ang grupo. (AYB)

This posting includes an audio/video/photo media file: Download Now

Pasyente sa Covid-19 sa mga ospital sa Cebu City miminos

Posted: 29 Mar 2021 08:29 AM PDT

Ang Dakbayan sa Sugbo y nakatalaog labing ubos nga critical care occupancy (CCO) rate sa mga private hospital ug niubos pa ngadto sa 50% sa mga pampublikong tambalanan.

Si Konsehal Joel Garganera, deputy chief implementer sa Emergency Operation Center (EOC), nagkanayon nga anaa nalang sa 28% ug 49% ang CCO rate sa private ug public hospital.

Ang pangulo sa EOC niingon nga 195 nalang ka pasyente sa Covid-19 ang nagpabilin sa tambalanan gikan sa 678 bed capacity sa private hospital samtang 175 gikan sa 355 bed capacity sa publiko ang okupado.

Base sa talaan sa DOH 7, ang Cebu City adunay 80 ka bag-ong kaso samtang 178 ang bag-ong naayo sa sakit nga Covid.

Si Garganera nihulagway nga sa pagkakaron, ang positivity rate anaa na lang sa 7.43% nga taas gihapon sa limit sa WHO apan nikunhod kini sobra 200% itandi sa 15-23% sa miaging mga semana.

Dugang sa konsehal nga kini base sa 1,104 mga ilang nakuhaan og sample og 82 ra ang nagpositibo sa niaging adlaw diin iyang gihulagway nga sa nakalabay nga tulo ka semana, nitibugsok na ang gidaghanon sa mga bag-ong kaso sa dakbayan.

Ang labing maayo nga balita mao nga walay dugang namatay sa maong sakit sa niaging adlaw .

Samtang, gipahibawo ni Garganera nga 13 ka barangay sa kabukiran ang walay nahitabong tibakdanay sa Covid-19 sa nilabay nga 10 ka adlaw.

Dugang ni Garganera, ang mga kaso sa virus sa dakbayan nag-anam na og kunhod sa miaging tulo ka semana. (PAC)

This posting includes an audio/video/photo media file: Download Now

Editoryal: Angay sabton

Posted: 29 Mar 2021 08:28 AM PDT

SULOD sa ikaduha na nga tuig, ang mga taga Dakbayan sa Sugbo magsaulog sa Semana Santa sulod lang sa balay. Gidili sa kagamhanan ang Visita Iglesia ug Way of The Cross nga sagad anha sa gawas sa simbahan gihimo.

Kay ang mga Sugboanon naila man nga relihiyuso, seguradong daghan ang nangahimangod ning desisyon sa Archdiocese sa Sugbo ug Emergency Operations Center (EOC) tungod kay daghan na ang gustong mahibalik na sa normal ang pagsaulog sa relihiyusong mga kalihukan.

Niadtong Pasko makita ang pagdasok sa mga tawo sa pagsimba matag kaadlawon. Giantos ang pagmata og sayo. Apan ning Semana Santa, sa ikaduhang tuig, di na sab makasaulog ang mga taga dakbayan sa Sugbo sa naandang gimbuhaton.

Kining hukom sa EOC ug kadagkuan sa simbahan duna man usay igong basehanan. Sa nanglabay nga mga semana grabe ang pagsaka sa mga kaso sa coronavirus disease (Covid-19) sugod sa tunga-tunga sa Enero hangtod sa sayong bahin sa Marso. Kinsa bay di makulbaan nga diha man gani adlaw nga niabot og 300 ang nagpositibo sa Covid-19?

Maayo gani kay di pareho sa miaging tuig, nasayod na ang kagamhanan unsay buhaton. Andam na ang isolation centers ug mga katre sa publiko ug pribadong mga tambalanan. Paspas nga gidugangan ang mga contact tracer aron ma-isolate ug matambalan ang mga nagdala sa kagaw.

Ning nanglabay nga mga adlaw, hinayhinay nga nagkagamay ang mga kaso sa Covid-19. Hinaut pang magpadayon kining mao nga dagan aron makaginhawa nag lawom.

Tan-awa ra gud ang nahitabo sa National Capital Region (NCR) ug silingang mga lalawigan, nisulbong ang mga kaso sa Covid nga mas taas pa kaayo itandi sa miaging tuig. Di ordinaryo ang pagsulbong sa mga kaso hinungdan nga nahibalik sila enhanced community quarantine. Busa, angay sabton ang kagamhanan sa Siyudad kon higpit sa mga relihiyusong tapok ning Semana Santa kay kuyaw pa.

This posting includes an audio/video/photo media file: Download Now

Nalzaro: Bakasyon o paghinolsol?

Posted: 29 Mar 2021 08:27 AM PDT

MARTES Santo na ug sugod ugmang adlawa daghan na ang mobiyahi paingon sa probensiya aron adto mobakasyon o maghinolsol ba kaha? Apan gumikan sa pandemiya, problema gihapon ang pagbiyahi gumikan sa travel restrictions sa ubang mga local government unit (LGUs). Sama sa kaulohan, nga gipahimangnuan ang katawhan nga dili mobiyahi sa probinsiya aron kalikayan ang tinakdanay. Apan ang uban mangita gyud og lusot. Gibutang ubos sa enhanced community quarantine (ECQ) ang National Capital Region (NCR) apil na ang mga lalawigan sa Cavite, Laguna, Bulacan ug Rizal.

Dunay giingon sa mga Tagalog nga; 'Kung may gusto may paraan: Kung wala palaging may dahilan.' Matod pa sa Eninglis; 'If there's a will; there's always a way.' Nahimo nang kabahin sa kultura sa mga Pinoy nga mosaulog ug mangita og pamaagi nga makapauli sa probinsiya ning panahon sa Semana Santa. Kay ang Semana Santa mao man ang bakasyon grande gumikan sa taas nga holiday. Samtang ang simbahan mo-ingon nga ang Semana Santa dili bakasyon, kon dili 'reflection' o paghinolsol. Apan bakasyon ning panahona alang sa kadaghanan.

Apan subo kaayo palandungon nga ikaduhang tuig na karon nga mahunong ang atong tradisyon. Kini tungod sa wa mabadlong nga tinakdanay sa Covid 19. Gi-awhag kita nga maglikay sa non-essential travel o dili importante nga biyahi.Mao nga nagka- bangga, sa makausa pa, ang relihiyon ug ang Siyensiya. Kay dakong lalis man nga tawgon nga 'non-essential' ang pagpraktis sa atong tinuhuan.

Apan sa laing bahin, ang rekord sa dakong hulga sa sakit dili usab mahimong 'baliwalion' lang. Nakapasamot kini sa kalabad sa ulo sa gobiyerno unsaon pagbadlong ang mamugos nga mobiyahi ug himuong rason ang atong kustombre ug batasan. O kaha himuong rason ang turismo. Dili na lang ta magpagoryo-goryo nga kadaghanan sa gustong mobiyahi ning panahona buot maglingaw-lingaw sa dagat inay mag-hinuklog sa kamatayon ni Kristo.

Kapangitaan rag paagi nga kalutsan ang pagdili sa pagbiyahi nga dili nato kalimtan nga ato nang nasinati sa milabay'ng tuig ang paghunong sa atong naandan nga selebrasyon sa Semana Santa. (bobbygnalzaro@gmail.com)

This posting includes an audio/video/photo media file: Download Now

Espinoza: Daghang ang ayuda basta duol na ang piliay!

Posted: 29 Mar 2021 08:27 AM PDT

BISAN asa nga dapit basta magdangarang na ang eleksyon daghan ang ayuda nga moabot. Diri sa Talamban, maayo pa ang espalto sa dalan giguba na kay aron sementohon. Primero nakong kita sa espalto nga gilukba sa backhoe nahibung ko'g dako nganong wala giuna og trabaho ang mga dalan nga buslot na. Pagkahinumdum na ko nga duol na ang sunod piliay sa Mayo 9, 2022 nahimuot na lang ko.

Unya, bag-o lang gianunsyo a dakbayan sa Sugbo nga dunay 10,000 ka cash cards alang sa mga senior citizens nga nag-edad og 60 ug pataas. Kining 10,000 ka cash cards gipuno sa 15,000 kabuok nga gihatag niadtong Disyembre. Niadtong Sabado, Marso 27, gihatdan sa cash assistance ang mga senior citizen sa ilang tagsa-tagsa ka panimalay alang sa buwan sa Enero hangtud ning buwan sa Marso 2021.

Pasalamat ta sa atong mga opisyales sa kagamhanan sa dakbayan sa Sugbo nga gisayo ron og hatud ang cash assistance sa mga senior citizen nga morag nadelitar sa miaging' duha ka tuig. Apan nabolilyaso gamay ang paghatag sa cash cards kay, matud pa, dunay mga senior citizens nga wala makapa-aktibar sa ilang PIN (personal identification number) nga gihatag sa Landbank.

Ang cash card maayo nga pamaagi kay segurado ang kwarta apan ang problema kay dili tanan senior citizen makamao mogamit o di ba nahikalimot sa instruksyon. Sa liwas sa Semana Santa morag modaghan na ang proyekto gikan sa atong kagamhanan nga atong makita. Ang kadaghanan ani mga dalan o highway nga bisan og maayo pa ang espalto o semento lukbahon aron pulihan og bag-o nga espalto o semento.

Mao nga di ta mahibulong mga kaigsoonan kon mao lang gihapon ang gilapdon sa atong kadalanan kay gibalikbalik ra man og espalto o semento ang mga kaladanan bisan og maayo pa. Unya, moresulta pa gyud sa trapiko kay naay mga kontraktor nga dili motuman og butang sa husto nga traffic sign alang sa direksyon sa mga sakyanan. Kining pundo alang sap ag-espalto o semento sa mga maayo pa nga dalan kon gigasto pa unta ni sa pag-abli og bag-o nga mga dalan, maminosan na unta ang problema sa trapiko.

Usa ka dako nga hinungdan sa problema sa trapiko mao ang dalan nga usa ra sama sa highway padulong sa norte gikan sa dakbayan sa Sugbo. Ang tanan klase nga sakyanan, gamay o dako, mosubay aning kunohay four lanes apan duha ra ang maagian tungod kay ang kilid sa highway gihimo nga parkingan sa mga sakyanan labina sa dapit nga dunay mga tindahan sa pagkaon apan walay kaparkingan sa mga sakyanan.

Ang highway sa lungsod sa Liloan karon huot na sa trapiko tungod sa daghan nga mga tindahan nga naa kilid sa dalan ug ang mga sakyanan sa mamalit anha ra moparking sa kilid sa highway. Ambot og nakahibawo ba si Liloan Mayor Cristina Frasco ning mao nga sitwasyon. Ang trapiko sa Consolacion miluag na karon di sama kaniadto mag-urong ang sakyanan og 30 minutos.

This posting includes an audio/video/photo media file: Download Now

Tambagi ko Noy Kulas: Bayaw ang target

Posted: 29 Mar 2021 08:27 AM PDT

Dear Noy Kulas,

Good day to you. Ako si Mark, taga probinsya sa Sugbo. Biyudo na ko og four years. Nag 41 ko adtong January.

Nag work ko sa una sa abroad but niundang ko pagkasakit sa akong asawa until siya namatay. Human siya namatay, wa na ko mangita og lain kay lisod baya karon pagpangita og babaye nga kasaligan.

Ang akong asawa dunay igsuon nga single ug mao ni ang akong masangpit para sa mga bata. Close ni siya sa mga bata kay mao ni ang ni assist sa akong asawa sa dihang didto pa ko sa abroad. Bisan karon nga wa na ang akong asawa, siya gihapon ang akong masangpit kay ganahan niya ang mga bata.

Noy, kining akong sister-in-law kay wa ni uyab bisan gwapa. Wa siya manrabaho kay naa ra siya negusyo nga maayo og dagan. Nakahuna-huna ko nga manguyab kay di siya lisod higugmaon kay buotan, gwapa ug bright. Unsay imong huna-huna, maayo kaha? Di kaha siya lainan ug iyang pamilya? Daghang salamat sa pagtagad sa akong letter.

MARK

Mark,

Wa may dautan kon manguyab kay taudtaud na man kang biyudo. Maayo ra sab na kay kon magkadayon mo, suhito na ang mga bata. Wa na silay himuong adjustment sa imong sister-in-law kay nakaila na kaayo sila ini. Mas madawat pa na nila kon maoy imong ipuli sa ilang inahan kay sa mangita ka og laing babaye.

Panahon na sab nga mangita ka og katimbang kon ganahan kang dunay ipuli sa imong asawa. Basta way problema kon siya ang imong pilion kay mas pabor pa na samga bata. Paninguhaa lang nga imo siyang mapasugot. Mao nay imong immediate nga problema.

NOY KULAS

This posting includes an audio/video/photo media file: Download Now

Mongaya: Duha ka birthday

Posted: 29 Mar 2021 08:24 AM PDT

KINING lindog di kabahin sa mga birthday sa duha nako ka anak nga babaye nga nasulod sa buwan sa Marso. Kabahin kini sa birthday sa usa ka Lumad nga giingong 'giluwas' sa PNP diha sa usa ka retreat house sa USC-TC. Kini atong gitandi sa birthday ni Presidente Rodrigo Roa Duterte.

Igo lang ko nakakita sa video nga gi-post sa Facebook nga gibalibaran sa kapulisan ug mga kawani sa DSWD nga mahatag ang usa ka cake alang sa batan-ong Lumad nga giluwas kintahay gikan sa usa ka NPA training camp sulod sa USCTC campus.

Nahibulong ko nga kining giingong gi-rescue, mura man og gipriso hinuon. Wa na lang unta mangilad nga giluwas ang mga batan-ong Lumad. Sa pagkatinuod, gironda ug gidakop man gyud kining mga bataa.

Di sab gyud tinuod nga dunay ginikanan nga gustong luwason sila. Kadtong giingong nanguli sa Mindanao, wa moabot sa ilang tribu. Ang wa manguli, naa pa gihapon sa DSWD 7 ug kon mag-birthday, di ihatag ang mga gasa sama sa birthday cake.

Ang nakauli ra gyud nila mao kadtong gikuha ug sa iyang papa. Ug di pa gyud yano nga nakagawas ang bata, giagi pa ang amahan sa korte.

Ato kining itandi sa laing birthday celebration nga nahimong kontrobersyal kay daghan ang nanaway.

Niguwa ang usa ka post sa Facebook kabahin sa birthday ni Presidente Duterte. Matod pa, simple ang handa sa Presidente ug usa ka tasa nga kan-on ang gibutangan sa usa ka kandila.

Apan laing hulagway nga nakita ang mas dakong bahin sa lamesa nakita ang daghang pagkaon apil ang usa ka lechon.

Ang ako lang, bisan og magpa-simple lang si Presidente Duterte, lahi ra gyud ang iyang kasaulogan kon itandi sa kasaulogan sa giingong giluwas nga batan-ong Lumad.

Mga konsehal

Kining mayorya sa Cebu City Council mura sab og si Presidente Duterte. Sa usa niya ka mga late night rants, nasuko kini si Presidente Duterte nga mangayog indemnification ang mga namaligyag bakuna.

Buot ipasabot, kining mga kompanya man gud di gustong mogasto kon dunay moreklamo kabahin sa mga nabakunahan. Wa makauyon niini si Presidente Duterte. Ang nakaapan lang kay gimando kini sa President nga himuan og balaod ug iya nang gipirmahan. Gialimungawan tingale. (DM @anol_cebu)

This posting includes an audio/video/photo media file: Download Now

Martin: Makan5 kabahin diay sa theme park

Posted: 29 Mar 2021 08:21 AM PDT

Personal nakong nahinabi ang celebrity chef nga si Marc Cuizon nga nag-abli sa iyang ikalimang branch sa Makan nga gitawag og "Makan 5 Unlimited Seafood Restaurant" (kilid sa Wiggys Beach Resort) along the highway sa Jubay, Liloan.

Sukad ni giablihan niadtong Marso 20, wa gyuy hubashubas ang mga nangaon tungod kay di lang unlimited seafood kundi unlisugba pa ug unli-drinks sa presyong P499 ra.

Pagpangaon namo didto nagbaha ang lambay, nukos, pasayan, baked scallops ug init kaayong larang. Lamia! Sud lang gud sa usa ka semana nakatigum dayon sila og P3,551 sa tip lang. Apan kini diay "Makan 5" tip of the iceberg ra ni kun sa English pa kay ongoing karon ang construction aning kilid sa Makan5 aron i-convert ang bakanteng 1,800 square meters ngadto sa usa ka entertainment park.

Kini mag-feature sa ilang robotic life-size dinosaurs, dragons, giant mushrooms, giant turtle nga dunay gitas-on nga 10 feet ug daghan pa kaayong amazing creatures.

"Magical Fortress ang name sa theme park pero ang whole area is called The Northern Point Jubay Liloan. Target date namo ni ablihan karong September. Mao na unya ni bag-ong tourist attraction dinhi sa amihanang bahin sa Sugbo," ni Chef Marc nga excited jud sa iyang higanteng proyekto.

Very colorful sad kaayo og lifestory si Chef Marc pang-teleserye pero sa sunod na lang pud ta mag-chika ani. Abli ang Makan5 karong Huwebes Santo ug Biyernes Santo. Basin masaag mog Liloan hapit nya mo ha!

LOVE OR MONEY

Nagpadayon karon ang streaming sa pelikulang "Love or Money" nilang Coco Martin ug Angelica Panganiban. Sa direksyon ni Mae Cruz Alviar, naghubit ni sa mag-ex lovers nga nagkita sa Dubai tulo katuig human sa ilang magical night.

Ang powerhouse cast naglakip nilang Gelli de Belen, Ketchup Eusebio, Cai Cortez, Matet de Leon, Dante Rivero, Teresa Loyzaga ug Pinky Amador. Bisitaha ang http://solo.to/cinexpress alang sa inyong movie pass.

This posting includes an audio/video/photo media file: Download Now

BP, sugar testing machines gidonar ni Sen. Marcos sa Barangay Paknaan

Posted: 29 Mar 2021 08:20 AM PDT

ANG 24 ka mga sityo sa Barangay Paknaan, dakbayan sa Mandaue nakadawat og digital blood pressure (BP) ug sugar testing machines, Lunes, Marso 29.

Mismong si Senator Imee Marcos ang nihatag sa mga kahimanan nga iyang gitugyan ngadto ni Barangay Kapitan Malaquias Socco ug Marilou S. Mag-isa, pangulo sa United Womens's of Paknaan (UWOP) sa Paknaan Covered Gym.

Nasayran nga dili mominos P200,000 ang ang kinatibuk-ang kantidad sa maong mga kahimanan nga gi-donate sa usa ka private individual kinsa nagdumili sa pagpaila.

Ang maong mga gamit o kahimanan, matod pa, gikan sa Japan.

Tuyo sa maong lakang nga imbes moadto sa mga ospital o pribadong clinic ang mga residente, moduol na lang unya sa mga lider sa health center nga gitugyanan sa mga kahimanan aron maoy mopahigayon sa BP ug sugar tests niadtong mga diabetic nga tawo.

Gitataw ni Marcos nga nakadawat ang iyang buhatan og suwat gikan ni Kapitan Soco sa ilang panginahanglan mao nga dali kini niyang gipangitaan og paagi.

Sayon ra hinuon gamiton ang mga kahimanang makina sanglit digital man kini ug tudluan sab ang mga health workers sa hustong paggamit niini.

Sa susamang kalihukan, nanghatag og mga seedling sa kamunggay si Marcos alang sa iyang kampanya batok malnutrisyon.

Ang IMEE Kabuhayan Cebu Chapter nanghatag og 100 ka mga kamunggay seedlings sa mga residente sa barangay.

Kagahapon, Marso 29 usab gihimo ang symbolic turnover ug pagpananom sa mga kamunggay.

Sa umaabot, tag 50 ka mga seedlings sab ang ipang-apod apod sa senador sa duha ka barangay sa Mandaue nga mao ang Tabok ug Banilad. Samtang laing 50 ka seedlings ang ipanghatag unya didto sa dakbayan sa Lapu-Lapu. (PR)

This posting includes an audio/video/photo media file: Download Now

Naa'y misteryo sa pagkataktak ni Kai sa Ignite

Posted: 29 Mar 2021 08:19 AM PDT

ALANG kang Samahang Basketbol ng Pilipinas (SBP) program director Tab Baldwin, adunay misteryo nga wala pa natubag kabahin sa naputol nga pagkahilambigit sa batan-ong Pinoy nga higante nga si Kai Sotto sa Team Ignite sa National Basketball Association (NBA) G League.

Mao kini hinungdan nga dili gusto motubag si Baldwin sa pangutana kon sayop ba o dili nga nibiya una si Sotto sa Team Ignite aron mouli sa Pilipinas alang sa iyang tinguha nga makaduwa sa Gilas Pilipinas sa 3rd window sa FIBA Asia Cup qualifiers.

Wala nadayon ang FIBA Asia Cup qualifiers hinungdan nga nibalik dayon si Sotto sa Amerika apan wala na siya gidawat sa Team Ignite.

"There's a lot of mystery on what happened with Kai and Ignite and the G League, and I don't have the answers. I don't know if he had a genuine role or part-time player and get minutes when he could. Without knowing that, it's very harsh to judge his decision if it's right or wrong," pasabot ni Baldwin nga napatik sa Spin.ph.

Hinuon sa tan-aw ni Baldwin, malipayon ra ang 18 anyos ug 7'2" nga higante sa iyang desisyon. (ESL)

This posting includes an audio/video/photo media file: Download Now

Training sa Gilas giundang

Posted: 29 Mar 2021 08:19 AM PDT

GIPABUHAGAY sa Samahang Basketbol ng Pilipinas (SBP) nga motuman sila sa kamanduan sa Philippine Sports Commission (PSC) sa pag-undang sa tanang training sa national teams tungod sa pagsaka sa mga kaso sa COVID-19 sa nasod hilabi na sa Metro Manila.

Sa paggawas sa memorandum sa PSC kabahin niini, ang SBP nakadesisyon dayon nga undangon una ang bubble training sa Gilas Pilipinas sa Inspire Sports Academy sa Calamba, Laguna.

"As always, we will remain supportive of the decisions coming from the PSC, and will also strictly follow the relevant precautionary measures from the Department of Health and the IATF," batbat ni SBP President Al S. Panlilio nga napatik sa Spin.ph. "The timing is unfortunate because our Gilas Pilipinas pool has been putting a lot of work to prepare for the FIBA competitions in the coming months. It's bee a difficult stretch for the SBP and the team as COVID-19 has affected so many of our plans, but we have no other choice but to adjust and move forward."

Nagsugod ang bubble training camp sa Gilas niadtong Marso 15, 2021 alang sa ilang kampanya sa umaabot nga FIBA Asia Cup Qualifiers ug FIBA Olympic Qualifiers.

Ang PSC nimando nga undangon una ang training sa national teams human gipaubos og balik sa Enhanced Community Quarantine (ECQ) alang sa National Capital Region Plus sugod kagahapon hangtod karong Abril 4, 2021. (ESL)

This posting includes an audio/video/photo media file: Download Now

De la Hoya, McGregor mag-away?

Posted: 29 Mar 2021 08:19 AM PDT

Sa pag-anunsyo ni boxing legend Oscar De La Hoya nga mobalik siya'g away karong Hulyo 3, 2021, nanglupad dayon ang daghang mga pangutana.

Kinsa kaha ang kontrahan sa gitawag og Golden Boy? Kini maoy pangutana nga nasulod dayon sa mga mahiligon og boksing.

Sa taho sa www.boxingscene.com, nag-una sa listahan mao si mixed martial arts (MMA) superstar Conor McGregor.

Taodtaod na sab nga nagbinatohay og mainit nga mga pulong sila si De La Hoya ug McGregor nga puwede kaayo nilang ipahungaw ang tanan nilang kaligutgot sa usa'g usa kon magtagbo sila ibabaw sa boxing ring.

Si De La Hoya miretiro niadtong 2008 human siya nakatilaw og grabeng kastigo batok kang Filipino boxing legend Manny Pacquiao, kinsa nahilambigit sab sa pangalan ni McGregor.

Si De La Hoya nagtinguhang mahilakip sa boxing legends nga sila si Mike Tyson, Roy Jones Jr., Evander Holyfield ug Floyd Mayweather Jr. nga ninglugnot gikan sa pagretiro ug misagubang og exhibition fights.

Sa habig ni De La Hoya, 48, wala pa'y klaro kon usa ka exhibition fight o prefessional bout ang iyang sagubangon sa iyang pagbalik.

Sa miaging buwan, si De La Hoya nakakuha na og bag-ong boxing license sa California nga nagpasabot lang nga taodtaod na siyang nagplanong mobalik og away.

"I have been training. I seriously feel incredible. I feel amazing. With me, I always fought the very best, and why not?" matod pa ni De La Hoya sa usa ka interbyu niadto pang Oktubre sa miaging tuig.

"None of this ducking fighters like the way fighters duck everyone today. They make it impossible because they price themselves out. It's a huge problem... George Foreman did it, and I think I can do it as well... I feel like a million, million bucks. It's crazy."

Ang pagbalik ni De La Hoya gipun-an og dugang detalye ni Marc Raimondi sa ESPN .

Matod ni Raimondi nga ang kanhi six-division world champion mipirma og kontrata sa Triller Fight Club.

Nakasaad sa kontrata nga makigharong si De La Hoya og usa ka dekalidad nga MMM fighter ug posibleng ipahigayon kini sa AT&T Stadium sa Dallas, Texas. (ESL)

This posting includes an audio/video/photo media file: Download Now

2 patay sa engkwentro sa SAF, NPA sa Negros

Posted: 29 Mar 2021 05:40 AM PDT

LAING kapildehan ang nasugamakan sa mga rebeldeng New People's Army (NPA) sa Central Visayas atol pa sa ilang anibersaryo sa Marso 29, 2021.

Duha ka gikatahapang mga rebeldeng NPA ang nangamatay sa engkwentro tali sa PNP Special Action Force (SAF) sa alas 6 sa Lunes sa buntag sa Marso 29, 2021 sa Barangay Nagbinlod, Santa Catalina, Negros Oriental.

Duha ka teams sa PNP-SAF ang nagpatrolya dihang ilang nasugatan ang wa matinong gidaghanon sa mga rebeldeng komunista nga nisangko sa kamatayon sa duha ka mga rebelde nga wa pa mailhi sa pagsuwat ning taho.

Nakasakmit usab ang kapulisan og mga pusil nga naglakip sa usa ka M-16 Armalite rile, revolver, mga bala ug subersibong dokumento.

Ang duha ka mga lawas gikarga sa helicopter sa SAF alang sa maayong pagpahimutang ug paghipos samtang padayon ang pag-ila kanila.

Sa pagsuwat ning taho, nagpadayon ang pursuit operations.

Niadtong miaging semana, 10 ka mga rebeldeng NPA ang napatay ug duha ang nadakpan atol sa engkwentro tali sa kasundaluhan sa bukiran sa Guihulngan City, Negros Oriental. (REV)

This posting includes an audio/video/photo media file: Download Now

Langyaw naapil pagkasunog sa balay

Posted: 28 Mar 2021 05:47 PM PDT

Laptop ang posibleng hinungdan sa pagkasunog sa usa ka balay sa Pacific Grand Villas sa arangay Marigondon, Dakbayan sa Lapu-Lapu sa Dominggo sa 8:00 sa gabii, Marso 28, 2021.

Usa ka British national nga masakiton namatay atol sa sunog. Si SFO1 James Masan, imbestigador sa Lapu-Lapu City Fire Department, niila sa namatay nga si Ian Mackenzie, 69, minyo.

Si Mackenzie giingong nag-inu-ara kay ang iyang asawa nigawas sa ilang balay aron isuroy ang ilang iro.

Samtang wa ang iyang asawa, usa nila ka silingan ang nakadungog og lugapak ug pagkataudtaud nisunod gilayon ang pagdilaab sa kayo.

Gituohan nga si Mackenzie naninguha nga makagawas sa balay, apan nawad-an sa panimuot. Gituohang nalumos sa aso si Mackenzie, kinsa masakiton na.

Gisuwayan sa pag-apply og cardio pulmonary resuscitation (CPR) sa mga emergency responsder, apan patay na si Mackenzie nga wa nay magginhawa ug wa nay pulso dihang gitabang sa mga guwardiya ug bombero.

Si Rowena, asawa sa langyaw, niingon nga naandan na niya nga isuroy ang ilang binuhi nga iro nga mao sab ang gusto sa iyang bana.

Nihapit siya sa ilang silingan ug sa iya nang pag-uli, nagdilaab na ang ilang balay.

Si Rowena niingon nga masakiton na ang iyang bana. Matod ni Masan nga sa ilang pag-imbestigar, si Rowena nitug-an nga posibleng laptop sa iyang bana ang hinungdan sa sunog.

Ang laptop maapektuhan kon ibton gikan sa kuryente, busa kanunay lang kining nakasaksak sa outlet.

Nagtuo si Masan nga mao kini ang sinugdanan sa kayo nga nidanyos og P50,000.

Apan mopahigayon pa sila og dugang imbestigasyon.

Ang alarma nadawat sa kabomberohan sa mga alas 8:01 ug nakontrolar ang kayo mga alas 8:15 sa gabii. (REV)

This posting includes an audio/video/photo media file: Download Now

62 anyos nanigbas kay gilibak?

Posted: 28 Mar 2021 06:14 AM PDT

USA ka senior citizen ang nasuko ug nanigbas tungod sa iyang pagtuo nga gilibak sa ilang silingan alas 11:00 sa buntag niadtong Sabado, Marso 26, sa Purok Manga, Barangay Bagacay, lungsod sa Sogod.

Si Romeo Montebon, 33, dunay kapuyo, manghimoay og basket ug nagpuyo sa nahisgutang lugar ang samdan sa ulo ug nakaangkog mga bun-og sa lawas.

Ang biktima gibalhin sa Vicente Sotto Memorial Medical Center (VSMMC) human grabe ang kadaot sa iyang ulo human naigo sa sundang.

Nasikop si Benito Pable, 62, minyo construction worker, nagpuyo sa nahisgutang lugar, ug anak nga si Roylan Pable, 37, dunay kapuyo ug construction worker, ug pag-umangkon nga si Albin Pable Mahinay, 24, ulitawo ug usa ka mag-uuma.

Si Police Staff Sgt. Kenneth Pepito sa Sogod Police Station nga nahinabi sa Superbalita Cebu nagkanayon nga ang biktima naglingkod diha sa gawas sa iyang panimalay ug kalit nga niabot ang suspek ug giataki ang biktima.

Si Romeo nagdalag sundang ug dayon tigbas sa biktima.

Ang biktima nakadagan kini apan gipauwanag dagkong mga bato nga gilabay nila ni Alvin ug Roylan.

Bisan kon samaran na ang biktima kay naigo sa daghang bato, nakasulod kini sa ilang panimalay.

Apan nasundan gihapon siya kay si Romeo, nakasulod ug giusban sa pagtigbas ang ulo hinungdan sa pagkasiak.

Ang mga suspetsado misibat human sa krimen apan nasikop sa kapulisan.

"Suko kaayo si Lolo kay nakadungog siyag estorya, libaklibak ba, baba-on daw ning biktima," dugang ni Pepito.

Gumikan sa kalagot ni Lolo, iyang giatake ang biktima, milaban niya iyang anak ug pag-umangkon.

Wala na maestablisar kon unsay mga pagpanglibak o estorya sa biktima sa mga silingan nga gikalagutan.

Ang suspetsado mibutyag nga wa sila makauyon sa sinultihan sa biktima nga sakit kaayo manulti.

Unya mialegar sila nga nakainom kini ug mibuhig batig pulong hinungdan nga iyahang gitigbas.(GPL)

This posting includes an audio/video/photo media file: Download Now

Palma miawhag sa hugot nga pag-ampo batok sa Covid-19

Posted: 28 Mar 2021 06:14 AM PDT

GIAWHAG ni Cebu Arsobispo Jose Palma ang mga parokyano nga itagana ang Semana Santa sa buhat pag-ampo ug debosyon sa pagtuo.

Sa iyang wali atol sa selebrasyon sa misa alang sa Dominggo sa Palma kun Bendita sa Lukay kagahapon, Dominggo, Marso 28, 2021, sa Cebu Metropolitan Cathedral, giawhag ni Palma ang mga Sugbuanong Katoliko nga mohatag higayon sa pag pamalandong sa tinuod nga hinungdan sa Semana Santa.

"I hope that we give time to be united in reflecting in his solemn words," matod niya.

Dugang ni Palma ang paghinumdom sa Semana Santa nagpresentar og nagkadaiyang sambingay sama sa himaya ug pag-antos sa dihang gisugid niya kini sa mga panghitabo karon sama sa Covid-19 nga giatubang sa kalibutan.

Inubanan sa grasya sa Ginoo, si Palma nagkanayon nga nagmalaumon ang simbahan nga kining tanang mga pagsulay nga gisagubang sa kalibutan malampasan ra ug may katapusan.

Iya usab gihinunduman ang sitwasyon sa nasod sa Myanmar karon kon asa daghang mga tawo, matod niya, ang nahadlok alang sa ilang seguridad tungod sa nagpadayon nga civil war sa maong nasod.

"As we enter the Holy Week, we, too, may be Holy and focus our gaze on the Crucified Christ, who is our hope, strength, and consolation," tipik sa dugang pag-ambit ni Palma.

Gihangyo usab ni Palma ang mga Sugbuanong Katoliko nga mag masinabton sa mga kabag-uhan nga gipatuman sa pagselebrar sa Semana Santa tungod sa Covid-19.

"Normally, inig ka human sa misa duna'y Visita Iglesia, karon, we ask of you, tungod sa spike sa Covid, please understand wala ta og Visita Iglesia," matod niya.

"Nasiguro ko unta gusto nato, pero gilikayan nato ang pagpundok sa daghang mga tawo," dugang niya.

Iya usab gidapit ang mga debotos sa pagsaksi sa virtual na repleksiyon sa Seven Last Words ni Hesus atol sa Good Friday, April 2.

Iya usab gipasalamatan ang mga lokal nga gobiyerno sa Sugbo sa pagtugot sa mga simbahan nga makapadayon pagselebrar sa mga kalihukan sa Semana Santa.

Dason ni Palma, bisan pa man og 50 porsiyento lang sa kapasidad sa mga simbahan ang gitugot niini. (WBS)

This posting includes an audio/video/photo media file: Download Now

Drayber patay, angkas angol

Posted: 28 Mar 2021 06:14 AM PDT

USA ka motorsiklo ang naaksidente tungod sa dakong iro nga kalit nilabang sa national highway sa Barangay Kalubihan, lungsod sa Barili kagahapon, Marso 28, sa alas 9:00 sa buntag, hinungdan sa kamatayon sa drayber ug pagkaangol sa iyang anggkas.

Si Gerard Baclayon, 23, drayber, taga Barangay Canduman, ug taga dakbayan sa Mandaue, dead on arrival (DOA) sa tambalanan sa Barili.

Samtang, naangol ang angkas nga si Eva Mae Alindajao Gimarangan, 24, dalaga ug taga Sitio Cabacungan, Barangay Japitan, lungsod sa Barili.

Ang mga biktima gikan sa dakbayan sa Mandaue ug padulong sa dapit sa babaye nga angkas sa Japitan, Barili.

Apan sa pag-abot nila sa nahisgutang lugar, wala damha nga kalit nilabang ang usa ka libud-suroy nga iro hinungdan nga kalit nga niprino ang drayber.

Wala makontrolar ni Baclayon ang manobela sa motorsiklo hinungdan sa ilang pagkatumba sa dan. Tungod sa kakusog sa pagka-impact, grabe ang naangkon nga samad ug bali ang drayber hinungdan sa iyang hinanaling kamatayon.

Wala masubay sa kapulisan kon si kinsa ang tag-iya sa iro. Wala usab masuta sa blotter kon unsay relasyon sa duha ka mga biktima nga gikan sa Mandaue.

PASIDAAN

Daan nang miluwat og pasidaan ang kapulisan sa pagbantay kanunay sa kaluwasan sa pagmaneho sa motorsiklo labi na kon layo ang biyahe.

Ang kapulisan ug Land Transportaton Office kanunay usab mohimo og espesyal nga operasyon ning taas nga bakasyon sa Semana Santa diin gipaabot nga daghang mobiyahe pauli sa kalungsoran sa lalawigan,

Lakip sa pasidaan mao ang pagsusi sa kaluwasan sa sakyanan sa dili pa mobiyahe, igong pahuway sa drayber ug walay bisyo sa gidiling druga ug uban pa.

This posting includes an audio/video/photo media file: Download Now

200 miapil sa Cycling for Climate Change

Posted: 28 Mar 2021 06:14 AM PDT

KAPIN sa duha ka gatus ka mga siklista ang niapil sa Cycling for Climate Change sa Mandaue isip lakip sa kalihokan sa Earth Hour sa alas 7:30 sa gabii niadtong Sabado, Marso 27, 2021.

Si Edwin Anthony Jumao-as, executive director sa Traffic Enforcement Agency of Mandaue (Team), miingon nga ang Cycling for Climate Change usa sa mga kalihokan sa Earth hour aron magkonserba og enerhiya.

Matod ni Jumao-as, wala silay nasugatan nga problema sa panahon sa Cycling for Climate Change.

Sigon niya nga ang maong kalihokan wala nakamugna og kahuot sa dagan sa trapiko tungod anaa ra sa sulod sa bike lane ug sa plastic bollards ang mga siklesta nga niapil sa maong kalihokan.

Niabag sab ang pipila ka mga traffic enforcer sa maong kalihokan aron masiguro nga luwas ang mga siklesta.

Tungod kay palong ang sagad nga suga niana, nagdala og kaugalingon nga mga suga ang mga siklista. Ang kalihokan dili lumba ug alang ra sa kalingawan ug pagsuporta sa Earth Hour, sigon ni Jumao-as.

Gidugang niya kadaghanan sa mga partisipante gikan sa mga organisasyon sa bikers sa Cebu nga gikan sa Cebu City, Mandaue City, Talisay City, ug Lapu-Lapu City.

Gani, 20 sa ilang mga traffic enforcer nga mga siklista ning-apil sab sa maong kalihokan, sigon ni Jumao-as.

Sumala niya ang kalihokan milungtad og usa ka oras.

Pagkahuman sa kalihokan, gipasiugdahan sab sa kagamhanan sa Mandaue ang pagpalong sa elektrisidad aron pagsalmot sa Earth Hour gikan alas 8:30 sa gabii, diin gisalmotan sa pipila ka mga residente sa dakbayan. (KFD)

This posting includes an audio/video/photo media file: Download Now

Groundbreaking sa bag-ong Ormoc City Convention Center

Posted: 28 Mar 2021 06:14 AM PDT

GIPAHIGAYON niadtong Marso 24, Miyerkules, ang groundbreaking ceremony sa Ormoc City Convention Center sa Barangay Juaton.

Gawas sa convention center, daghan usab nga pasilidad ang itukod sa lokal nga kagamhanan sa Ormoc uban sa tabang ni Cong. Lucy Torres-Gomez.

Matod ni Mayor Richard Gomez, nagsugod ang maong proyekto sa dihang nakita usab ni Cong. Gomez ang potensyal sa dakbayan nga modawat og dagkong meeting ug mga bisita.

"We were expecting that more tourists will come inside Ormoc City and we were preparing for MICE (Meetings, Incentives, Conference Exhibition)," matod sa mayor

Sa 11 ektaryang yuta nga napalit sa LGU-Ormoc, naghatag usab og pundo si Cong. Gomez alang sa pagpasemento sa karsada gikan sa highway padung sa convention center.

Duna usab dugang pundo si Cong. Gomez alang sa paghimo og BMX Race Track ug Badminton Court.

Giplanohan usab sa LGU-Ormoc ang paghimo og radial roads aron mas mapadali ang pagtabok sa laing barangay.

Pinaagi sa radial roads, ang mga tao gikan sa Brgy. Juaton dali na nga makalahos sa Brgy. Dolores.

Ang gikan sa Dayhagan makatabok na sa Luna, ang gikan sa Milagro makatabok na dayon sa Hibunaon.

Gipasigarbo usab ni Mayor Gomez nga nagsugod na ang dugang kalambuan sa Ormoc gikan sa San Pablo padung sa Valencia.

"Definitely, the progress of Ormoc will begin from Brgy. San Pablo lahos na sa Valencia," matod sa Mayor

Nagpadayon karon ang pagtukod sa bag-o nga Valencia Public Market.

Nagpasalamat si Mayor Gomez sa mga miyembro sa konseho nga gipangulohan ni Vice Mayor Toto Locsin Jr sa way duha duha nga pag aprobar sa budget. (JKDP)

This posting includes an audio/video/photo media file: Download Now

Traffic enforcer sa Ormoc nga drug pusher nasikop sa kapulisan

Posted: 28 Mar 2021 05:57 AM PDT

NASIKOP sa kapulisan sa dakbayan sa Ormoc ang usa ka traffic enforcer tungod sa pagbaligya og ilegal nga drugas.

Ang buy-bust gilusad alas 3:05 sa hapon, Sabado, Marso 27, 2021 sa Barangay Licuma, Ormoc City.

Giila ang nadakpan nga si Edmond Lumangtad, 48, nagpuyo sa NHA sa Barangay Margen ug nalista nga usa ka high value individual.

Ang maong operasyon gipangulohan ni Police Major Alex Echon sa Ormoc City Drug Enforcement Unit (CDEU).

Base sa report sa kapulisan, usa ka nagpailang mamalitay og shabu ang nakigtransaksyon sa suspek.

Napalitan ang suspek og usa ka pakete sa gituohang shabu sa kantidad nga P1,000.

Gideklara sa kapulisan ang pagsikop kaniya ug gikapkapan atubangan sa mga testigos.

Nakuha sa iyang posisyon ang laing duha ka pakete sa gituohang shabu, P1,000 nga marked money, sling bag nga dunay sud nga salapi.

Gidala sa Police Station 3 ang suspek ug pasakaan og kasong kalapasan sa Republic Act 9165.

Matod ni Mayor Richard Gomez, dili i-tolerate sa kagamhanan ang ingon niini nga mga binuhatan sa usa ka kawani.

Dugang sa mayor nga di siya magduhaduha sa pagtangtang sa usa ka kawani kon mamatud-an nga nalambigit kini sa pagpayuhot sa ilegal nga drugas.

Gusto sa mayor nga limpyo ang City Hall sa Ormoc sa mga kawani nga mogamit ug nagbaligya og ilegal nga drugas ug mahimong ehemplo sa publiko. (JKDP)

This posting includes an audio/video/photo media file: Download Now

Talk to Papa Joe: Tagam

Posted: 28 Mar 2021 05:57 AM PDT

Dear Papa Joe,

Tagua lang ko sa ngalan nga Miss Failure, 26 years old, usa ka secretary. Ang akong suliran kabahin sa akong lovelife.

Well, common nga mahitabo nagkarelasyon mi ni Boss ug kadaghan nga naay nahitabo namo. Wa masayod ang akong uyab ani kay maayo kaayo namo pagkatago ang among relasyon. Sa iya sad nga part, wa gyuy nahibaw-an iyang pamilya kay kita man sila nga sweet mi sa akong uyab bisan sa atubangan ni Sir. Si Sir sad kay for pleasure ra gyud iyaha sa ako, plus dunol og budget. For short abanganan ko niya.

Pero karon lang akong problema kay mabdos ko ug naglibog ko kinsa nilang duha ang amahan kay naay mga adlaw nga nakama o nakadulog nako sila nga lahi lahi sad nga oras. Akong kuyawan ang hitsura sa akong anak. Di gyud ko gwapa, retukada ko. Tisoy akong boyfriend ug bisdak kaayo akong boss. Kon di maliwat sa akong BF, ang bata klaro na kaayo kong piti. Unsa may buhaton ko?

MISS FAILURE

Miss Failure,

Matod pa sa uban, karma is real. Di man gud maayo ang imong gibuhat. Daghan kang tawo nga gilingla, imong boyfriend ug pamilya sa imong boss.

About sa bata mao nay giingon nga huwaton lang gyud na nimo ug kon di maliwat sa imong boyfriend, mao nay giingon na sulti na lang sa tinuod ug ayaw nasad siya bakaki. Kon maliwat man sa imong boyfriend, pasabot ana undangi nana imong kalaki.

Papa Joe

(para sa inyong tampo ipadala lang sa papajoesuperb@gmail.com)

This posting includes an audio/video/photo media file: Download Now

Barrita: Kalipay sa mga Pinoy apektado sa lockdown

Posted: 28 Mar 2021 05:49 AM PDT

ASA ka mangita'g mga tawo nga mopahiyom bisan motanyag og pahasubo ngadto sa higala nga namatyan og suod sa kinabuhi? Ang mga magbilar sa namatyan magsugal, magtagay ug magbinayloay sa mga estoryang binutbot. Bahakhak, diri, bahakhak didto.

Dinhi ra tingali kini hikaplagi sa Pilipinas. Gani sa unang panahon, duna pay gitawag nga "Kulilising Hari" sa mga magbilar sa namatay. Magtigi sila sa pagpakatawa ug kadtong mokatawa, silotan, paludhon ug paampoon.

Kadto rang mga pangag ug daotan og ngipon ang magpugong-pugong sa pagkatawa. Apan kon di na gyud kapugngan, mopahiyom ug mokatawa gihapon, pero tabunan sa kamot ang baba. Bisan sa kaguol, mokatawa lang gihapon.

Apan apektado ang kalipay sa mga Pilipino sa mga lockdown, sa pagkabalda sa inadlaw nga lakat sa kinabuhi ug sa mga nangamatay tungod sa Covid-19 pandemic, sumala pa sa 2021 World Happiness Report sa United Nations Sustainable Development Solutions Network.

Gikan sa ika-52 nga malipayon nga nasod sa 149 ka mga nasod nga naapil sa ranking, nahagsa ang Pilipinas ngadto sa ika- 61. Gibasihan ang tulo ka tuig nga datos sa Gallup World Poll. Gikomparar ang datos sa survey sa tuig 2020 sa datos gikan sa 2017 hangtod 2019 aron masayran ang epekto sa pandemic.

Apan samtang apektado kita sa ranking, way epekto ang pandemic sa "well-being," sa maayong panglawas ug kamaya sa mga Pilipino. Si John Helliwell, usa sa mga authors sa maong report, niingon nga usa sa mga rason mao nga nisamot ang panagsuod sa mga tawo tungod sa pandemic.

Sama sa pasiaw sa usa ka tiguwang babaye nga bag-o lang nakadawat og usa ka sakong bugas humay ug mga linata nga pagkaon. Gi-interview siya sa usa ka reporter.

Matod niya, "Sa wa pa ning Covid-19, wa gyud ko kadawat ani gikan sa gobyerno. Busa, nagpasalamat sa Covid-19. Hinaut nga kini magpadayon."

Bisan sa tumang kalisod, ang mga tawo manikaysikay gihapon, sama sa kanta nga "Ginhawa Delfin."

This posting includes an audio/video/photo media file: Download Now

Nadela: Binignit sa tiyan manggunit

Posted: 28 Mar 2021 05:49 AM PDT

TING binignit na sab. Mao ni akong nadunggan sa akong higala nga nagwarawara sa pahina sa pamantalaan nga naghisgut sa kontrobersiya sa binignit sa miaging semana santa. Kinsa bay makalimot sa maong isyu, nga human gidumog sa daghang mamalitay og sagul sa binignit ang Carbon Market sa miaging tuig, nagsugod man sab dayon ang tinakdanay sa Covid-19 dinhi sa ato.

Usa sa labing importanting sagul sa binignit mao ang landang.

Gi-unsa ba kini pag-andam? Ug diin ba ni gikan?

Pagtubag sa maong pangutana, nituyo ko og biyahe padung sa usa ka bukirang barangay sa siyudad sa Carcar. Sa sitio Mabugnaw sakop sa Barangay Guadalupe, ko nangalap og tubag sa daghan nakong pangutana mahitungod sa landang. Sa panimalay sa pamilyang Sari ko nahapunta kay mao man sab ang gitudlo sa akong inpormante.

Ang magtiayong Richard ug Joan maoy niabi abi nako kauban ang ilang duha ka ulitawo nga sila si Richard Jr. ug Jhon Rey. Sigun sa ilang asoy mamalit diay sila og punoan sa buli sa laing dapit. Human maputol, anhi na dinhi magsugod ang hilabihan ka kuti nga proseso paghimo og landang. Una, i-gong og tagsa ka metro ang pinutol nga punoan. Dayon panitan. Human og panit, salisi-on dayon ibulad. Siguradohon nga dili maulanan.

Unyag kauga, panggangon unya lukbon sa lusong. Kon nalug-a na o nadugmok, ayagon. Human masyag isunod ang pag-ugpak ginamit ang fish net o muskitero. Pagkahuman on-onon gamit ang nipis nga panapton. Kini nga proseso maoy magbahin sa powder nga para landang ug ang nahabilin nga gitawag og lobo lobo mahimong ipakaon sa baka.

Ang powder isagul sa giandam nga tubig sa ulan dayon kutawon. Matunaw na gani isulod ni sa nipis nga sako, pug-an og maayo. Unyag kauga kini bagnason, dayon linginon adto sa nigo ug pasagdan sulod sa usa ka oras ug tunga. Kutas kaayo ni nga paagi, pero sagdi lang kay padung nata sa katapusan nga bahin nga mao ang pagluto sa gilingin nga pinaugang powder. Mag-andam og kawali dayon hidhiran og mantika human matak-ang aron dili mopilit ang ilunod nga nilinging powder. Padayon ang pagluto hangtod nga maporma og landang.

Ka lisod ba diay ning pagluto og landang basi sa daghang paagi nga tamdan ug timanon. Ingon ana ka kuti ang pagbuhat og landang. Apan kon gamiton na ni isip sangkap sa binignit, tinuod gyud nga ang binignit sa tiyan manggunit. Ambot kon ngano nga bisan sa kadaghan og sagul sa binignit, unya dili maapil ang landang, way lami ang binignit.

Gawas sa buli, ang punoan sa tanom nga saksak mahimo sab nga himuong landang. Didto sa sitio Mabugnaw, daghan ang namaligya og landang. Sigon sa estorya, ang maong dapit abunda kaayo kaniadto sa punoan sa buli, mao nga nahimong inila ang maong dapit sa landang hangtod karon. Usa na sila si Richard ug Joan, kansang panginabuhi nahasandig ra gyud sa halin sa landang.

This posting includes an audio/video/photo media file: Download Now

Editoryal: Gahom sa pag-ampo

Posted: 28 Mar 2021 05:49 AM PDT

LAING pag-obserbar sa Semana Santa ubos sa pandemiya sa coronavirus disease 2019 (Covid-19). Seguro, mas naka-adjust na kita karon kon itandi sa miaging tuig 2020, diin ang tanan nakurat ug wala nakapangandam sa kalit nga pagkatap sa virus. Gipatuman ang hingpit nga lockdown sa tibuok kapupud-an.

Magpasalamat kita nga nakalabang sa unang tuig sa pandemiya. Apan nagpadayon pa ang hulga. Mibalik sa pagsaka ang kaso taliwala sa pag-abot sa bakuna sa nasod batok sa Covid-19. Sa pagkakaron, ang frontliners ug essential workers ang giuna sa pag-atiman. Ang baga nga masa wala pa masugdi sa pagpamakuna busa, dili kita mokompiyansa bisan sa relihiyusong panagtapok.

Si Cebu Archbishop Jose Palma, puno sa iyang pagbati atol sa iyang wali sa Cebu Metropolitan Cathedral kagahapon, Marso 28, nga nanawagan sa mga deboto sa lawom nga pagpamalandong ug hugot nga pag-ampo isip labing gamhanan nga hinagiban batok sa mga katalagman ug pagsuway sa kinabuhi.

Si Palma nipaambit sa daghang istorya sa balaang Bibliya nga mapanig-ing-nan sa atong kinabuhi sa kasamtangan ug nagpamatuod nga ang pagsagop sa Kahitas-an maoy mahukmanon diha sa pag-ampo uban sa paglihok, hinungdan nga wala magdumili ang simbahan sa pagkooperar sa kagamhanan sa pagpatuman sa health protocol.

Nangayo siya og dispensa nga daghang kalihokan sa simbahan ning semanaha ang puno sa limitasyon aron pagsunod sa protocol. Hingpit usab nga dili una pagpahigayon sa ubang relihiyusong kalihokan sama sa Visita Iglesia ug uban pang tradisyonal nga panagtapok sa mga debotong Katoliko.

Busa moduyog kita sa hiniusang pag-ampo, nga walay katugbang nga kalibotanong bili, ug ang luwas nga panaghiusa mohatag og kalig-on ug paglaum nga makalabang kita sa laing hagit sa pagpakabuhi ning kalibotan. Motunhay ang bag-ong normal sa dili madugay.

This posting includes an audio/video/photo media file: Download Now

Basil: Korona sa Ms. Grand International idlas

Posted: 28 Mar 2021 05:49 AM PDT

MANILA – Pinaagi sa social media nasundan nato ang performances sa atong pambato sa Miss Grand International nga si Samantha Bernardo.

Sa tanang kategorya, wa siya magpalupig ug paborito sad siyang interbyuhon sa mga pageant vlogger sa Thailand.

Bisan og mubo lang ang preparasyon nasayod ta nga andam nang makigtigi si Sam sa 63 nga mga kandidata sa Miss Grand International.

Gipabilib ni Sam ang mga Thai ug netizens sa tibuok kalibutan pinaagi sa iyang "granada walk' nga ambot kung nakasabot ba sa organizer ng MGI nga ang granada is tantamount to grand.

Anyway, gipahigayon na ang finals ng MGI, "may nanalo na" sa Tagalog pa og ang grand winner mao si Miss USA, Abena Appiah ug si Samantha ang first runner-up.

Segundo lang human makoronahan ang winner og ang runner-ups that includes Sam, daghan nang mga reklamo sa social media.

Di jud kuno feel ng Miss Grand International organizer ang Pinay for the crown kay sa tinuoray lang nadag-an na sa Pinay ang uban pang major international beauty titles, pabalik-balik pa nga, pero kining Miss Grand International idlas kaayo, wa pa jud mag-title ang Pilipinas, puro runner ups lang.

Anyway, deserving naman si Miss USA kay bisan og sa prelims wa kaayo siya mapansin pero sa finals naman talagang umeksena siya nang todo.

Ang mga Pinoy pageant vloggers kanya-kanya nang pagawas og mga hulagway ni Abena moments after she was crowned.

Kilala nila si Abena kay mingsalmot siya kaniadtong 2019, siya ang representative sa Ghana for Miss Earth 2019 nga gipahigayon sa Pilipinas (as always naman).

Pero daghan ang nagtataka kon nganong kaniadto Ghana ang iyang girepresentar pero karon, USA man?

Naku ambot, pero alam ko may mga ganyang scenario.

PRODUKTO SA KF

Ang pageant guru nga si Rodgil Flores proud na proud tungod kay sa dihang silang duha na lang ni Samantha ug Abena sa stage nag-post siya nga happy siya tungod kay ang duha, produkto sa Kagandahang Flores.

Ngano? Tungod lagi kay sa dihang misalmot si Abena og Miss Earth, ang KF ang nag-trained kaniya og si Samantha naman, KF na eversince so nakita nyo naman kung gaano ka happy si Sam sa dihang si Miss USA na ang gitawag as grand winner.

Siguro kung pananglit si Samantha ang mingdaog ganun din siguro ang gagawin ni Miss USA, ang halugon og i-congratulate si Sam nang bonggang-bonggga kay sisters diay sila sa Kagandang Flores.

May mga nagko-comment nga dapat stop na ang Pinas sa pagpadala og kandidata sa Miss Grand International kay bisan og unsa ka banggiitan ang atong ipada, di jud padag-on og runner-ups na lang sige.

Well, di siguro puwede kay bongga ang MGI og nakita nyo naman sa ilahang mga activites, ang bo-bongga ng venue.

Ang atong angayng buhaton, i-congratulate na lang nato si Sam first runner-up is first runner-up.

Simbakong may mahitabong dautan kang Miss USA, siya baya ang mopuli, hehehehehe.

This posting includes an audio/video/photo media file: Download Now

NQC misubo sa 2 ka historical markers

Posted: 28 Mar 2021 05:49 AM PDT

ANG National Quincentennial Committee (NQC) dungan nga nisubo niadtong Huwebes, Marso 25, sa duha ka Quincentennial historical markers sa managlahing dapit sa Southern Leyte ug Dinagat Islands sa Mindanao.

Si Undersecretary Anthony Gerard 'Jonji' Gonzales sa Office of the Presidential Assistant for the Visayas maoy nirepresentar sa NQC sa pag-abli sa historical marker sa lungsod sa Hinunangan, Southern Leyte.

Sa samang adlaw, laing historical marker ang gisubhan sa Gibusong sa lalawigan sa Dinagat islands.

"People of Hinunangan, you are fortunate, for your very town was mentioned as early as 1521 through the story of the first circumnavigation of the world by Antonio Pigafetta, chronicler of the expedition," matod ni Undersecretary Gonzales atol sa pagsubo.

Dungan sa Gibusong, Hinunangan naggiya sa Magellan-Elcano expedition sa kadagatan sa nasod, dugang ni Gonzales.

Ang maong paglawig walay kabangkaagan sa maong mga dapit nga dili makita kaniadto sa mga mapa sa kalibotan nga naa sa Uropa, dugang niya.

"But don't be confused—this deficiency of European maps is not tantamount to non-existence of the territories of our ancestors, like Gibusong and Hinunangan. It does not also follow that the unfamiliarity of Magellan to these places meant our ancestors were nothing but savages before 1521," matod ni Gonzales.

Apan pipila ka siglo sa wala pa moabot si Magellan, ang mga dapit sa Surigao Strait maoy unang sibilisasyon nga nagtutok sa Butuan.

Kini nakompirmar sa mga nasuwat sa Insek ug ang mga naugkat nga bililhong butang sama sa bulawan ug karaang sakyanan sa kadagatan nga gitawag og balangay, pasabot ni Usec. Gonzales.

Dugang niya nga ang Laguna Copperplate Inscription dated AD 900 maoy pruweba sa Butuan-Surigao region nga dunay koneksiyon sa Tondo, Manila ug Medang sa karong nga Java, Indonesia.

"Hinunangan and Gibusong may belong to different political units now but they share common historic space with Butuan which we need to imagine when we revisit the world of our ancestors before the Spaniards," dugang niya.

Ang kasaysayan maoy nagpasabot sa hinungdan kon ngano nga ang duha ka dapit gidungan sa pagsubo.

Si Magellan ug mga kauban nihapit sa Suluan ug Homonhon, Guian, Eastern Samar, niadtong Marso 16, 1521.

Sa Mayo 27, ang grupo nibalik sa paglawig sa pagpangita sa Maluku Archipelago, kanhi naila nga Spice Islands.

"Because the area was not on their maps, they became to Gibusong, which is visible from Suluan and Homonhon, which from there they tracked the southward route and followed the coastline of Hinunangan," pasabot ni Gonzales.

Samtang naglawig sa kadagatan sa Kabisay-an padung sa amihanang Mindanao, nadani ang ilang pagtan-aw sa sunog sa usa ka isla niadtong gabii sa Marso 27, 1521. Kini ang isla sa Limasawa.

Ang pagsubo sa historical markers kabahin sa 34 ka dapit sa Pilipinas nga kabahin sa rota sa Magellan-Elcano expedition ug ang 2021 Quincentennial Commemorations sa nasod.

"In reading the history of the first circumnavigation of the world, it is necessary for one to familiarize himself and herself with Philippine geography," dugang ni Usec. Gonzales.

"It helps one imagine well how interconnected what seems to be divided. And do not forget: water connects us more than dividing us," dason ni Usec Gonzales. (PR)

This posting includes an audio/video/photo media file: Download Now

Omega boxers midugdog

Posted: 28 Mar 2021 05:49 AM PDT

GIPAMATUD-AN nila ni Mark "Thunder" Vicelles ug Peter "Thunder" Apolinar ang ilang monicker name sa dihang miposte sila og makapaukyab nga kadaugan batok sa lainlaing kontra sa Kumbati series niadtong Sabado, Marso 27, 2021 sa IPI Compound dakbayan sa Mandaue.

Sama sa usa ka dugdog mipakalit og igog solido nga kumo si Vicelles aron tumbahon si Richard Rosales sa fourth round sa ilang away sa main event sa Kumbati 8 nga gi-organisar sa Omega Sports Promotions sulod sa usa ka bubble set-up.

Nagpabiling walay pilde ang 25-anyos nga si Vicelles nga adunay 13 wins, 1 draw, 7KOs nga baraha samtang ang late replacement nga si Rosales milugapak ngadto sa 14-15-2 with 8 KOs nga rekord.

Samtang si Apolinar (14-1 with 8KOs) milupig kang Juanito Paredes (8-7-1 with 3KOs) pinaagi sa unanimous decision sa main event sa Kumbati 9.

Ang judges mi-iskor sa away og 99-91, 99-91, 98-92, pabor tanan sa lumad nga taga San Pablo, Laguna nga si Apolinar.

Si Vicelles ug Apolinar mao ang pambato karon sa Omega Boxing Gym.

Gikalipay ni Omega chief trainer Julius Erving Junco ang gipakita sa iyang mga batos nga mipakita og maayong offense ug defense.

"Sulit kaayo mi-gain sila'g experience," batbat ni Junco.

Sa laing bahin, ang Olympian ug kanhi world-title challenger nga si Mark Barriga (10-1,2KOs) mipilde ni Junuel Lucar (8-7-3, 6 KOs) sa Kumbati 9 pinaagi sa 4th TKO.

Laing kanhi world title challenger nga si Arthur Villanueva (33-4-1, 18 KOs) ang midaog pinaagi sa unanimous decision batok kang Bryan Tamayo (6-2-2, 2 KOs).

Sa ubang mga away, minglampos sila si Carlo Bacaro (8-0, 6 KOs) batok Allan Villanueva (11-1, 8 KOs), Benny Cañete batok Reycar Auxilo, Tomjune Mangubat (13-2-1, 11 KOs) batok Ryan Maano (5-11-2, 1 KO), ug Regie Suganob (6-0, 2 KOS) batok Paolo Sy (6-6-1, 3 KOs) samtang nagtabla ang away nila ni Rodel Suganob batok Luis Borje.

This posting includes an audio/video/photo media file: Download Now

De La Hoya mobalik sa pag-away

Posted: 28 Mar 2021 05:49 AM PDT

SA edad nga 48 anyos, mobalik og away ang boxing legend nga si Oscar de la Hoya nga maoy mobuak sa iyang 13 ka mga tuig nga pagretiro sa boksing.

Gi-anunsiyo kini ni De La Hoya sa press conference sa away ni Jake Paul ug Ben Askren nga gidumala sa Triller Fight Club.

Misulod ang multi-millionaire nga si De La Hoya sa stage uban ang promoter ug rap artist nga si Snopp Dogg ug didto niya gipahibalo ang pagbalik og away.

"July 3rd, I'm making my comeback," batbat ni De La Hoya, kinsa miretiro niadtong 2008 human siya nakatilaw og grabeng kulata ni Filipino boxing icon Manny Pacquiao.

Human sa iyang anunsiyo, gibuhian ni De La Hoya ang microphone ug migawas kini sa stage nga wala hinganli ang iyang ikakontra.

Si De la Hoya adunay 39-6, 30KOs nga rekord.

Ang gitawag nga Golden Boy nga si De La Hoya usa sa labing adunahang mga boksidor. Human sa iyang pro career, nahimo siyang boxing promoter.

Ang pagbalik ni De La Hoya posibleng naimpluwensyan sa boxing greats ug kanhi world champions nga sila si Mike Tyson ug Roy Jones nga parehong ningbalik og away diin nagsangka sila sa usa ka exhibition fight alang sa charity. (RSC)

This posting includes an audio/video/photo media file: Download Now

at

No comments:

Post a Comment

Subscribe to: Post Comments (Atom)

End of Summer Sale ☀️😎

20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...