https://www.sunstar.com.ph/

---

• Kanhi pari, NDFP negotiator gipusil patay sa Camotes
• ASBC: Marcial, laing duha gipalagpot sa semis round
• Pulis nga taga Cebu City gipusil, patay
• Gwen, Dino makigkita ni Duterte
• Pildero sa ML ‘nanulong,’ maoy nasamdan
• Editoryal: Nanimalos?
• Kolektor gidagit, gitulis
• 10K nabakunahan sa Cebu City gikan sa Mayo 24-28 sa 4 ka vaccination sites
• Pako sa owl nabali kay gitirador
• 20 miparehistro sa balik pasada
• 4 ka tawo sa Asturias nakuhaan og mga armas sa CIDG
• Simbahan gitugtan sa Santacruzan
• Binghay: Binayrang pagsabak
• Nadela: Pagpanggukod di makalimtan
• Albor: Saludo kang Diony Cañete
• Tambagi ko, Noy Kulas: Lisod nga silingan
• Basil: Kristof wa husgahi ang kaubanang bidaman
• Donaire motali'g history
• 2 fans gi-ban sa 2 ka NBA venues
• ONE batok UFC fighters posible magkasangka

Kanhi pari, NDFP negotiator gipusil patay sa Camotes Posted: 29 May 2021 12:10 AM PDT PATAY ang kanhi pari ug nailang kanhi lider ug negotiator sa Communist Party of the Philippines human pusila sa makadaghan sa wa pa mailhing gunman alas 8:20 sa gabii sa Biyernes, Mayo 28, 2021 sa Purok Caimeto, Barangay Upper Poblacion, lungsod sa Pilar, mga Isla sa Camotes, Sugbo. Si Rustico Luna Tan, 80, minyo, namatay diha-diha human nakaangkog samad pinusilan sa nawong, liog ug uban pang bahin sa lawas. Si Police Lt. Renerio Mejeas, hepe sa Pilar Police Station nga nahinabi sa Superbalita Cebu, nagkanayon nga si Tan nag-inurasa sa iyang balay nga way koral nga daplin sa karsada, natulog sa duyan nga nahimutang sa terrace. Ang mga silingan ningbutyag nga sila nakadungog og sunod-sunod nga mga buto sa pusil. Ilang nabantayan nga human sa mga buto, dunay tawo nga nagmotorsiklo nga daling nipalayo, apan way bisan usa nakakita sa gunman. Sa pagsusi nila, si Tan diha sa duyan ug dunay daghang mga samad pinusilan sa lawas. Matod ni Mejeas nga ilang gipaabot ang kabanay ni Tan aron makakuha silag dugang mga impormasyon, gawas sa ilang nakuhang background niini. Tanang anggulo ilang gisubay karon, apan giklaro ni Mejeas nga wa kaayo siya makaila kang Tan kay bag-o pa siyang nahimong hepe sa kapulisan sa lungsod. Sa ilang pagsukitsukti sa mga silingan, maayong tawo si Tan. Si Kapitan Rodrigo Heramis sa Barangay Upper Poblacion nga nahinabi sa dySS Super Radyo nagkanayon wa siyay nabantayan nga kadudahan ang panglihok sa kanhi pari. Giangkon niya nga nakaila siya kang Tan nga kanhi aktibo sa walhong pundok. Nagkaestorya sab sila niini dihang iyang gibisita niya kay dunay daghnag mga menor nga diha sa balay ni Tan. Nitug-an kini kaniya nga iyaha lang gitudluan ang mga batan-on sa pagpananom. "Ako gisusi kay naila ni siya nga naa sa wa, pikas pero nakita nako nag-gardening ra man, unya wala koy nakita nga laing kalihukan," dugang ni Heramis. Wa sab kini mobiya sa ilang lugar sukad niadtong Enero ning tuiga. Bisan sa pangidaron, magmotorsiklo kini nga mosuroy sa mga barangay. Nahibaw-an nila nga duna kini duha ka mga anak sa iyang asawa. NEGUSYADOR SA NDFP Si Tan kanhi political detainee ug chief peace negotiator niadtong 1986-1987 sa habig sa National Democratic Front of the Philippines (NDFP) sa lalawigan sa Sugbo tali sa kagamhanan atol sa administrasyon ni kanhi Presidente Corazon Aquino. Gidakop si Tan niadtong Nobiyembre 9, 2017 ug gibilanggo sa Bohol District Jail tungod sa 14 ka counts sa kasong murder. Gibasura kini sa Tagbilaran City Regional Trial Court Branch 42 sa Oktubre 2019. Human siya makagawas, gidakop na usab siya niadtong Disyembre 2019 sa kasong murder nga gipasaka sa Bacolod City Regional Trial Court Branch 46 sa Negros Occidental. Paglabay sa tulo ka mga buwan, gipagawas siya sa bilanggoan "on recognizance." Ang katapusang hearing sa iyang kaso niadtong Mayo 27, 2021. (GPL/REV) This posting includes an audio/video/photo media file: Download Now

ASBC: Marcial, laing duha gipalagpot sa semis round Posted: 28 May 2021 11:04 PM PDT TAGSATAGSANG gipangpukan ang mga Pinoy boxers, lakip na ang Tokyo Olympic qualifier nga si Eumir Marcial, sa semifinal round sa ASBC Elite Men's and Women's Boxing Championships sa Dubai, niadtong Biyernes sa gabii, Mayo 28, 2021. Ang 25-anyos nga Marcial gipildi, 5-0, ni Jafarov Saidjamshid sa Uzbekistan sa 75 kg. division sa away nga gipahigayon sa grandballroon sa Le Meridiean Hotel. Si Marcial maoy top-seeded sa middleweight division sa kompetisyon nga nagsilbing pre-olympic tournament. Ang kapildihan maoy una niyang naangkon sa maong torneyo ug mouli na lang kini nga dala ang bronze medal. Nagsugod og kisdom ang paglaom sa Pilipinas sa dihang unang nahagsa si Mark Lester Durens ug Junmilardo Ogayre sa ilang tagsatabsa ka mga away sa light-flyweight ug sa bantamweight division. Si Durens miyukbo batOK ni Daniyal Sabi sa Kazakhstan, 5-0, samtang si Ogayre gipalagpot ni Mirazizbek Mirzahalilov sa Uzbekistan, 5-0. Ang team nga ubos sa pagdumala ni olympic gold medalist coach Roel Velasco, Joegin Ladon ug Asian Women's Boxing Championships gold winner Mitchel Martinez, mouli nga dala ng upat ka bronze medal lakip sa kang kanhi world champion Josie Gabuco. (JBM) This posting includes an audio/video/photo media file: Download Now

Pulis nga taga Cebu City gipusil, patay Posted: 28 May 2021 08:39 PM PDT Pulis nga kuyog sa usa ka babaye samtang nag-angkasay sa motorsiklo patay human pusila sa wa mailhing gunman mga alas 9 sa buntag sa Sabado, Mayo 29, 2021 sa national highway sa Barangay Dakit, lungsod sa Barili, Sugbo. Ang namatay diha-diha giila ni Police Major Romeo Caacoy Jr. nga si Police Master Sergeant Raymund Zozobrado, 40, nadestino sa Guihulngan, Negros Oriental, taga Mambaling, Dakbayan sa Sugbo. Si Caacoy niingon nga nagsakay sa iyang Nmax nga motorsiklo si Zozobrado, angkas niya si Vanessa Go Tura, 30, taga Mohon, Talisay. Matod ni Caacoy nga samtang nagsubay sa karsada sila si Zozobrado, ang gunman nagsunod kanila nagsakay sa usa ka Toyota Innova (plate no. 8735) dihang gipusil si Zozobrado. Ang duha ka mga sakyanan pulos padung sa Dakbayan sa Carcar. Human matumba ang motorsiklo, nisirit pagdagan ang Innova padung sa Dakbayan sa Carcar. Nanawag dayon sa ubang mga police station sila si Caacoy alang sa blocking force, apan sa pagsuwat ning taho, wa pay kalamboan. Niadtong Abril 29, 2018, si Zozobrado ni-survive sa usa ka ambush sa Barangay Mambaling, Dakbayan sa Sugbo. Niadtong higayuna, gikan siya sa bilar sa laing pulis nga gipatay usab. Si Zozobrado nadestino kaniadto sa City Intelligence Branch sa Cebu City Police Office. (GPL) This posting includes an audio/video/photo media file: Download Now

Gwen, Dino makigkita ni Duterte Posted: 28 May 2021 05:39 AM PDT Makigtagbo sila si Cebu Governor Gwendolyn Garcia ug Presidential Assistant for the Visayas Secretary Michael Dino kang Presidente Rodrigo Duterte sa Malacañang sa Lunes, Mayo 31, 2021. llang tumong nga pasabton ug depensahan nila ang lakang sa Lalawigan sa Sugbo base sa mga datos ug kasamtangan nga sitwasyon sa Probinsya taliwa sa coronavirus disease 2019 (Covid-19) pandemic. "We will be presenting also what we may say is an evolving success story of Cebu where with our protocols we have been able to balanced both safety and health, as well as the economy," matod ni Garcia sa Mayo 28 nga interbyu sa sibyanang dySS Super Radyo. Giluwatan kini ni Garcia human sa kamandoan sa Malacañang nga i-divert ang tanan nga flights nga padulong unta sa Mactan Cebu International Airport (MCIA) paingon sa Ninoy Aquino International Airport (NAIA) sugod sa Sabado sa kaadlawon, Mayo 29, 2021. Dunay mga pagtuo nga kining lakang gitumong kang Garcia aron bakwion ang iyang Executive Order (EO) 17 nga nagpasayon sa quarantine protocol sa overseas Filipino workers (OFW) ug returnining overseas Filipinos (ROF). Sa EO, ang tanang OFW ug ROF ipailawom og swab test pag-abot sa Mactan airport ug papuy-on og duha ngadto sa tulo ka adlaw sa hotel samtang maghuwat sa resulta. Kon negative, mopauli dayon sa iyang dapit, apan subling ipailawom sa swab test sa ikapito ka adlaw. Apan sa Inter-Agency Task Force (IATF) Resolution 114, kinahanglan nga tiwason ang 14 ka adlaw, bisan kon negative ang OFW ug ROF. Ang 10 ka adlaw sa ipuyo sa hotel samtang ang upat sa balay. Matod ni Garcia nga nag set-up si Dino og tigum alang sa mga kauban niining mga opisyal sa Sugbo ug Presidente aron kini tukion. "We are going together with Secretary Michael Dino to the President so we may be able to present how our processes do not necessarily defy IATF guidelines. However, we are innovating it, to quote USec Densing. And I hope he does not take it back in order to custom fit our situation here. And also to understand that these OFWs and returning Filipinos are humans just like us," matod ni Garcia sa samang interbyu. Si Garcia nabalaka sa dautang epekto sa diversion sa flights. "Ako wa na koy power over Manila. Kon gusto mo nga inyo nang ipada inyong flights didto, wa koy mahimo ana. Pero kon padugayon ninyo ang pag-divert sa flights, motingog na pud ko kay mawadan na pud og revenue ang airport," matod sa gobernador. "In the meantime, please do not ask me to suspend my EO or the provincial ordinance. Ang ako pud nga diri sa Cebu, napakita nato nga mas epektibo ni atong pamaagi," dugang sa gobernador. WAY KIHA Gipaneguro usab ni Dino nga way plano sa pagkiha kang Garcia taliwa sa mga estorya nga ikiha ang gobernador tungod kay ang iyang EO 17 wa matukma sa IATF Resolution No. 114. "I know for a fact that there are no plans of filing a case against the governor. I sat in a meeting together with President Duterte, ES Salvador Medialdea and Sen. Bong Go discussing this issue last night, and I personally confirmed from them that Secretaries Año, Guevarra and Roque had no intentions of filing suit," matod ni Dino. Iyang gikompirmar nga siya ug si Garcia makigtagbo kang Duterte sa Lunes, Mayo 31, 2021 aron ipresentar ngadto sa Presidente ang maayong sitwasyon sa Sugbo. "In fact, on Monday, Gov. Gwen and I will have an audience with President Duterte himself to present the situation in Cebu: our current process and protocols, as well as our best practices such as the EOC, Project Balik Buhay and VVOC, to name a few. This is to find a win-win situation that would work for both the National Government and the Province of Cebu," dugang niya. Samtang si Mandaue City Mayor Jonas Cortes nagsuporta sa testing ug quarantine policy ni Garcia. "Yes (I support Garcia's E017), the bottomline is to simplify things not to complicate. The people has been suffering for almost two years," sigon ni Cortes. (dugang ni KFD, REV pinaagi sa PR) This posting includes an audio/video/photo media file: Download Now

Pildero sa ML ‘nanulong,’ maoy nasamdan Posted: 28 May 2021 05:39 AM PDT Pildero sa Mobile Legends (ML) wa kadawat, nanulong og away apan apan maoy nasamdan sa karambola sa alas 8:10 sa buntag sa Biyernes, Mayo 28, 2021 sa Sitio Magsaysay, Brgy. Tabunok, Lungsod sa Tabuelan, Cebu. Si Glendon Carretero, 23, dunay kapuyo, samdan sa duha ka mga kamot, nalandig sa tambalanan. Nasikop sa hot pursuit operations sila si Joel Dabalos, 27, dunay kapuyo, puto vendor; bayaw nga si Jose Enriquez Heyrosa, 18, 1st year college; ug manghud nga 16 anyos, tinun-an sa high school. Si Police Staff Sgt. John Mark Asendiente, sa Tabuelan Police Station nga nahinabi sa Superbalita Cebu nagkanayon nga si Carretero nangayog abag sa ilang buhatan uban sa kapuyo human siya gitabangan og away sa tulo. (GPL) This posting includes an audio/video/photo media file: Download Now

Editoryal: Nanimalos? Posted: 28 May 2021 05:39 AM PDT Wala makatarog ang Inter Agency Task force (IATF) sa baroganan ni Cebu Governor Gwendolyn Garica nga 'nag-innovate' sa ilang mapaantusong protocol alang sa mga mamauli nga Filipino citizen ug mga overseas Filipino wokers (OFWs). Ug mao kini hinungdan nga nanimalos sa Sugbo pinaagi sa pag-impluwensiya sa Malacañang sa pag-isyu og kwestiyonable nga memorandum nga way igong rason? Huwebes, Mayo 27, ang Malacañang miluwat og memorandum sa pag-divert o paliko sa tanang international flights nga para sa r Mactan-Cebu International Airport (MCIA) ngadto sa Ninoy Aquino International Airport (NAIA) sugod sa alas 12:01 kaganinang buntag, Mayo 29, 2021, hangtod sa alas 11:59 sa gabii sa Hunyo 5, 2021. Gimandoan ang tanang ahensiya sa pagsunod sa kasamtangang testing ug quarantine protocols sa IATF. Sumala sa IATF guidelines ang maamuli nga Filipinos ipaubos sa swab test sa ikapito ka adlaw gikan sa pag-abot samtamg gipasulod sa quarantine facility. Negative o positive ang resulta, mopundo gihapon sa pasilidad og dugang pito ka adlaw sa pagkompleto sa 14-day quarantine. Apan gi-innovate kini ni Gwen sa tumong nga mahatagan og igong panahon sa OFWs ug namauli nga Pinoy og mas taas nga panahon sa pamilya labi na ang kadaghanan kanila limitado ang bakasyon sa trabaho o ang uban dunay emerhensiya. Sumala sa gobernador, ang moabot sa MCIA ipaubos a swab test ug magpaabot sa resutla sud usa ka hotel sud sa tulo ka adlaw. Kon positive, una ipadayon sa isolation facility. Kon negative ang resulta, papaulion na sa ilang balay apan dito na mopadayon sa kuwarentina. Kinsa moabaga sa plite sa OFWs inig pauli nila sa Cebu? Hinaut nga isalikway na ang maong memo o moresulta kini sa umaabot nasudnong eleksiyon. Way sukod sa bawos. This posting includes an audio/video/photo media file: Download Now

Kolektor gidagit, gitulis Posted: 28 May 2021 05:22 AM PDT Kolektor sa usa ka kompaniya sa Siyudad sa Sugbo ni-report sa director sa Philippine Drug Enforcement Agency 7 (PDEA) 7 nga siya gidagit sa armadong mga lalake sakay sa usa ka sakyanan nga nagpailang mga anti-drug agent. Wa na mohingan si Director Levi Ortiz kon kinsa ang biktima sanglit mihangyo usab nga di nganlan tungod sa kahadlok sa iyang siguridad. Apan giangkon ni Ortiz nga higala niya ang amo sa kolektor ug mao usab kini ang nanawag kaniya labot sa insidente. Giingong gisakay siya sa usa sakyanan niadtong Huwebes, Mayo 27, 2021 ug gidala sa wa matino nga dapit. Gikuha ang iyang mga butang ug kwarta ug gibuhian ra usab siya. Nakakuha ang biktima sa plate number nga ila nang gipasusi ni Ortiz sa Land Transportation Office 7 (LTO) aron masayran kinsa ang nanag-iya ug kinsa usab ang nagmaneho sa adlaw nga gidagit ang kolektor. "Naay nisumbong, nitawag sa ako nga ang iyang collector sa iyang kompanya gi kidnap gi harass ug gitulis unya nagpailang PDEA," matod ni Ortiz sa Superbalita Cebu. Kon tinuod ang pasangil sa kolektor, matod ni Ortiz nga maka alarma na kini sanglit dili lang makausa ka higayon makadawat og report ang iyang ahensya labot sa nagpailang PDEA agents nga nanakop og drug personalities. Nakig alayon na usab sila sa kapulisan sa siyudad sa Sugbo alang sa himuon nga imbestigasyon aron mailhan kinsa ang maong grupo. "Alarming na kaayo mao nang sama sa gihimo sa collector, moreport dayon sa police station kay kon dili man gani, mahibaw-an dayon at least naa na tay record kay basig naa tay madakpan puhon. Atong ipatawag tong nagreklamo ug ipakita kon mao ba ning mga tawhana gihapon," dugang ni Ortiz. Gihimakak ni Ortiz nga iyang mga tawo ang naghimo sanglit ang ilang mga operation nagsunod sa legal nga paagi sama sa pag pakig alayon sa kapulisan. / AYB This posting includes an audio/video/photo media file: Download Now

10K nabakunahan sa Cebu City gikan sa Mayo 24-28 sa 4 ka vaccination sites Posted: 28 May 2021 05:18 AM PDT Ang Cebu City Government nakabakuna og 10,000 ka mga individual gikan sa Mayo 24 hangtod kagahapon, Mayo 28 sa upat ka vaccination sites sa Dakbayan sa Sugbo. Si Dr. Jeffrey Ibones, pangulo sa Cebu City Health Department, nagkanayon nga gumikan sa kakusog sa turnout sa mga magpabakuna, nahurot na ang 5, 800 doses sa Pfizer nga maoy gigamit sa vaccination site sa UC-Sambag-I. Gumikan niini, ang AstraZeneca mao na lay gigamit sa mga doctor ug nurses sa City Health aron sa pagpamakuna sa A1,A2 ug A3 kun medical frontliners, senior citizens ug mga tawo nga dunay comorbidities. Ang isunod sa pagbakuna mao ang A4, kasagaran kanila essential workers. Hayan sa Hunyo sugdan na ang pagpamakuna kay ang Siyudad sa Sugbo padayong nanglista sa mao nga sektor pinaagi sa online. Si Ibones nitug-an nga gikan sa 28,000 doses, karon aduna nalay 12,000 doses nga nahabilin nga maoy gamiton sa sunod semana sa vaccination sites sa dakbayan. Matod sa pangulo sa City Health nga kon mahurot na ang AstraZeneca ug wa pay maabot nga suplay sa bakuna gikan sa national government, ilang ihunong ang vaccination. Si Mayor Edgardo Labella nagkanayon nga gipasaligan siya sa kadagkuan sa Malacañang nga prayoridad ang dakbayan sa bakuna hinungdan nga di angay mabalaka ang mga Sugbuanon. "Time and time again, I have been reassured by vaccine czar Secretary Carlito Galvez, Jr. that Cebu City is part of the national government's priority in the vaccination program. So, padayon gyud nga moabot kanato ang atong bahin from the nationwide rollout," padayag ni Labella sa iyang Facebook post. "Bisan niini, dili usa nato gamiton or i-realign sa laing budget ang P500 million that the City Government has allocated for the purchase of our own vaccine supply. We are doing this to ensure that there will be no oversupply and waste of vaccine doses. Kon i-realign man gud nato karon dayon, naay possibility nga wala na hinuon ta'y magamit when the intended need arises," dugang ni Labella. Sa kasamtangan, anaa na sa kapin o kulang 50,000 ka mga lumolupyo sa Cebu City ang nabakunahan sa vaccines batok sa Covid-19. / PAC This posting includes an audio/video/photo media file: Download Now

Pako sa owl nabali kay gitirador Posted: 28 May 2021 05:18 AM PDT Nabalian sa iyang tuo nga pako ang Philippine Grass Owl nga na rescue niadtong Miyerkules sa hapon, Mayo 26, 2021 sa Brgy. Bahay, lungod sa Sibonga, habagatang bahin sa Sugbo. Mao kini ang gibutyag ni Samuel Daugdaug, forest ranger sa Community Environment and Natura Resources Office (CENRO) Argao. Matod ni Daugdaug nga klaro kaayong gitirado ang owl nga anaa karun sa ilang pasilidad nga padayong gi-monitor ang kahimtang. "Sa pagkakaron, Sir, okay ra man nuon siya (owl). Mokaon ra inig pakaon namo ug mo inom ra sab og tubig. Apan kailangan gyud ni i-check og veterinarian iyang bali sa pako kay naigo gyud nig tirador," butyag ni Daugdaug. Dad-on ang owl ngadto sa Wildlife Rescue Center sa Department of Environment and Natural Resources (DENR) 7 office sa Lunes, Mayo 31, aron mahatagan og medical nga attention. Si Victorino Lañojan, meat inspector/artificial insemination technician sa lungsod sa Sibonga ug residente sa dapit, naka-rescue sa owl. Matod ni Lañojan nga ang owl iyang nakit-an duol sa iyang balay samtang nanguha siya og bani sa saging. Kalit nga nigawas ang owl sa punuan sa saging ug nidagan kay di na makalupad sanglit may samad ang pako. Daling gi-turn over ni Lañojan ang owl sa Sibonga Municipal Environment and Natural Resources Officer (MENRO) ug dayon gidala sa CENRO Argao. Matod ni Dr. Louie Maestrado, chief I sa Animal Health and Veterinary Public Health sa Provincial Veterinary Office, nga ang Philippine Grass Owl usa ka "threatened" species mao nga kinihanglang ipreserbar ug ampingan. / JDS This posting includes an audio/video/photo media file: Download Now

20 miparehistro sa balik pasada Posted: 28 May 2021 05:18 AM PDT Nagsugod na og proseso ang Cebu City Jeepney Task Force (CCJTF) aron makabalik na og pamasahero ang tradisyonal nga public utility jeepney (TPUJ) human nitugot si Mayor Edgardo Labella nga ablihan ang mga karaang rota. Si Konsehal James Cuenco, chairman sa CCJT, nagkanayon nga adunay 20 ka drivers ang nagparehistro sa iyang opisina ug 34 na ka mga unit sa TPUJ ang gikatakdang ipaubos sa inspeksyon sa roadworthiness ug safety sa mga pasahero batok sa Covid-19. Si Labella nitugot nga makabalik og pamasahero ang mga TPUJ sa ilang naandan nga rota gumikan usab sa panawagan sa katawhan gumikan sa kalisod pagsakay paingon ug gikan sa ilang trabahoan. Ang unang lakang sa mga drivers o operators nga mopadagan sa ilang mga unit mao ang pag-adto sa buhatan ni Cuenco sa Cebu City Hall legislative building para pag-verify sa official receipt, certificate of registration, insurance sa ilang mga unit aron sila mahatagan og acknowlegment receipt. Para kini maoy ilang dad-on sa Cebu City Transportation Office para sa smoke belching test ug sa travel line, sa Land tranportation Office para sa motor vehicle inspection service (MVIS) aron masuta ang road worthiness sa TPUJ. Human mobalik sila sa buhatan ni Cuenco para sa pagkuha sa Balik Pasada permit dayon adto na sila sa Land Transportation Franchising and Regulatory Board para pag-check kon pasado ba ang ilang set-up para masunod ang minimum health protocol. Human isyuhan dayon sila og special permit, QR code ug taripa para makakolekta sila sa hustong pletihan. Si Cuenco nagkanayon nga modawat ang iyang buhatan sa mga aplikasyon sa drivers ug operators aron matabangan nga mabalik ang ilang panginabuhian. Sa Disyembre 2021 nal ang kutob ang paggamit sa mga TPUJ sanglit ipatuman na sa national government ang PUV Modernization Law nga nadelatar na og kapin usa ka tuig gumikan sa pandemiya. / PAC This posting includes an audio/video/photo media file: Download Now

4 ka tawo sa Asturias nakuhaan og mga armas sa CIDG Posted: 28 May 2021 05:18 AM PDT Upat ka mga tawo nadakpan sa mga sakop sa Criminal Investigation and Detection Group (CIDG) Cebu Provincial Field Unit atol sa pag-serve sa search warrant sa usa ka panimay sa lungsod sa Asturias niadtong Huwebes, Mayo 27, sa alas 3:00 sa kaadlawon tungod sa pagtener og mga armas nga walay lisensya, ang duha kanila konsehal sa barangay. Ang search warrant giluwatan ni Judge Judilyn Tapia-Menchavez, acting presiding judge sa Regional Trial Court branch 59 sa Dakbayan sa Toledo, batok ni Elorde Pacquiao Jayme 56, sa Barangay Tag-amakan, Asturias. Matod ni Police Lieutenant Colonel Hector Amancia, CIDG provincial chief, nga sa wala pa sila makaabot sa balay sa subject sa search warrant ilang naagian ang tulo ka mga tawo sa usa ka payag apan kalit kini nga nanagan. Dihang ilang gipangsignit, nakuhaan usab kinig mga armas gikan sa ilang posisyon. Ang mga dinakpan giila nga silang Jonathan Alfeche, 42, ug Peejay Tautjo, 37, pulos konsehal sa Barangay Cabagdalan sa susamang lungsod ug Ismael Jayme. Dugang ni Amancia nga nakadawat silag reklamo gikan sa mga residente sa maong barangay labot sa kanunay nga pagpabuto sa armas ni Elorde Pacquiao Jayme nga maoy hinungdan nga ilang gipaubos sa surveillance. Sa dihang nasuta nga tinuod ang maong report, ila dayon kining giaplayan og search warrant sa korte nga gi aprobahan usab dayon kini sa huwes human maka pakitag ebedensya labot sa pag hupot niinig armas. Ang mga armas nga nasakmit naglangkob sa duha ka KG9 riffle, upat ka kalibre 45 ug usa ka 357 lakip na mga bala niini. Gituohan ni Amancia nga gikan sa dakbayan sa Danao gipahimo ang maong matang sa mga armas. Giangkon sa mga dinakpan nga ilaha ang maong armas apan wala nila kini gamita sa krimen tungod kay alang lang a ilang proteksyon. "According to them that is their protection sa ilang negosyo because of the reports.." dugang ni Amancia. Gihingusgan pa karon sa CIDGG 7 ang kampanya batok sa loose firearms nunot sa nag singabot nga national election lakip na ang pagpugong sa mga kaso sa pusil sa lalawigan sa Sugbo. / AYB This posting includes an audio/video/photo media file: Download Now

Simbahan gitugtan sa Santacruzan Posted: 28 May 2021 04:20 AM PDT Gitugutan ang mga simbahan sa Dakbayan sa Sugbo sa pagselebrar sa Santacruzan o Sagala sa Mayo 31, 2021. Sa anunsyo nga gipakatap ngadto sa mga parokya, ang Cebu City Emergency Operations Center (EOC) nitugot sa mga simbahan nga muselebrar sa mga kalihokan sa Flores de Mayo, pero pagabuhaton lang kini sud sa mga simbahan. Ang EOC ug Cebu Archdiocese dili sad magtugot nga adunay prusisyon sa mga kadalanan. Tungod sad nga adunay lagda ang Inter-Agency Task Force (IATF) nga wa nagtugot sa mga menor de edad nga adunay pangedaron 15 anyos paubos nga mugawas sa ilang mga panimalay, di sad sila tugotan nga makasulod sa simbahan. Nipahibawo ang Archdiocese of Cebu niini niadtong Mayo 28. Ang Flores de Mayo giselebrar sa Simbahang Roamano Katoliko matag Mayo isip halad sa mahal nga Birhen. (JJL) This posting includes an audio/video/photo media file: Download Now

Binghay: Binayrang pagsabak Posted: 28 May 2021 04:20 AM PDT Ang akong hisgutan karon mahitungod sa surrogate pregnancy (ang pagpaturok, pagpabuhi ug pagpadako sa bata gamit ang balay-bata (uteros) sa laing babaye hangtod kini ipanganak. Kumon kini sa mga tubig-tubigan o mga artista nga di maka-anak kay masakiton, dunay depresnya sa uteros o di ganahan madaot ilang figure maong mobayad na lang sa mosabak sa ilang anak. Duna sab koy Italiano nga amigo sa una, ato lang itago sa ngalan nga Pepe, ang nagpakitabang kung unsay iyang angay buhaton kay human siya mibayad og mahal para ipakatawo iyang pusosong anak, gi-hostage naman hinuon kini sa babaye ug gipangwartahan kay nagmagahi naman kining ihatag ang puya human nahimugso kay lagi nahigugma na kuno siya sa amahan sa iyang gisabak. Gilisudlisod ug gihadlok pa siya nga patyon ang bata kung ipugos kini niya pagkuha. Ang ka-alaot kay way klarong papeles o dokumento nga napakita si Pepe nga nagmatuod nga iyaha ang binhi nga gisabak. Matod niya way pakighilawas nga nahitabo kay igo ra mang gi-inject sa balay bata ang embryo gikan niya isip sperm donor unya na fertilized sa itlog sa babaye nga egg donor sab. Matod ni Pepe, maayo ilang sabot sa pirmiro. Gani iya mang napatukuran og balay, gipamalitan og mga appliances og gipa-eskwela ang ubang mga anak sa babaye nga napa-angkan na sab ka 2 ka beses. Human sa makuting DNA (Deoxyribonucleic acid) test nahibaw-an ang tinu-oray nga ginikanan sa bata. Atubangan sa abogado gipasabot ang babaye ug iyang ginikanan sa sitwasyon, nga wa say kalibutan aning surrogate pregnancy, unya di motu-o nga way pakighilawas nga nahitabo sa langyaw ug sa ilang anak. Tungod kay na depressed human kini nanganak, naabtan sab sa akto nga ilabay unta sa babaye ang puya mismo sa bintana sa ospital. Kini nakatabang sa paghatag og pabor nga desisyon ngadto ni Pepe. Human sa pipila ka beses nga pagsabot-sabot apil ang puno nga dakodakong kantidad sa iyang pagsabak, nakuha ni Pepe sa dayon iyang anak og nadala sa Italya. This posting includes an audio/video/photo media file: Download Now

Nadela: Pagpanggukod di makalimtan Posted: 28 May 2021 04:20 AM PDT Dunay mga lakang karon nga mabalik ang pagpaninda sa mga piniling lugar sa dakbayan sa Sugbo. Kini taliwala sa road clearing nga programa sa nasudnong gobyerno. Pero sa dili pa ta maghunahuna tugoti nga lilion nato ang nangagi labot ning maong programa. Kinsay nakahinumdom niadtong nangakatag sa karsada nga mga baligya kay gipugos gyud og bira sa usa ka tighawan sa sidewalk niadtong panahon nga wala pay pandemya? Gawas niini duna pay daghang away, lalis ug kalanrakas nga nahitabo sa dihang gipatuman ang road clearing niadtong tuig 2019. Bisan asang suok sa Pilipinas kini gipatuman. Sa dakbayan sa Sugbo pananglitan, napuhag ang liboan ka manindahay sa sidewalk ug ubang dapit nga sentro sa road clearing operation. Dunay relocation site nga gipabalhinan. Apan tungod sa katuyuon sa dapit, ang uban niundang sa pagpaninda. Ang uban hinuon nagpaugat. Maglukdo, sapwang ug pas-an sa ilang baligya diha sa aseras. Unyag abot sa manakopay mokaratil lang sab og dagan. Hangtod karon naa pa ni. Nobiyembre ngadto sa pagkahuman sa Sinulog, maisip ni nga harvest season kong sa humayan o kamaisan pa, alang sa mga gigukod nga manindahay. Di ikaglimod mao sab ning mga panahona nga magbaha ang mga tawo dinhi sa ato.Pero tungod sa clearing dili merry ang pasko sa sidewalk vendors niadtong 2019. Samot na sa pag Sinulog 2020. Kung imong sumadahon kining mga bulana mosapi bisan dili dako ang mga gigukod nga manindahay. Pagkahuman sa Sinulog 2020 pabiling hamugaway ang mga sidewalk. Mahimong kabaylihan kay napapas ang mga pobre sa aseras. Dihay nagtikaw tikaw sama sa dalan Colon eskina Osmeña Blvd. magpaso paso ning mga tawo nga nagbitbit og karatula nga mo-ayo sila og sapatos, bag ug cellphone. Sa hinapos sa bulan sa Marso 2020, hilabihan na kasibaw ang estorya mahitungod sa makamatay nga coronavirus. Ug nahitabo ang lockdown. Ang mga sidewalk vendors ug mananakop kalit lang nawagtang sa panan-aw. Ang ubang mananakop gisangunan og laing trabaho nga mao ang pag gukod sa quarantine violators. Ang ubang manindahay nahimobg volunteer sa mga checkpoint ang road clearing operation nahanaw daw aso. Unsa pa may hawanan nga puwerte namang mingawa sa karsada. Sakto gyud tong gisulti sa katigulangan. Magtigom og kuwarta aron sa panahon sa kalisod may makuot ka pa. Pero sa habig sa liboan ka manindahay nga gisantako sa road clearing ning gobernoha, unsa may makuot nga pipila ka bulan sa wa pa manghasi ang pandemya, daan naman silang gipiangan sa panguwarta. Mao nga sa ayuda apil sila nga nanimpalad, nagpalista ug nilinya aron makadawat og bugas, sardinas, noodles ug ubang pagkaon. Hilabihang apikiha kay daan nang giapiki. Kadto untang kita nila sa pasko ug Sinulog may makuot pa apan sa pag-abot sa pandemiya, misamot. This posting includes an audio/video/photo media file: Download Now

Albor: Saludo kang Diony Cañete Posted: 28 May 2021 04:20 AM PDT Angay sa pagdayg, pasidungog ug pagsaludo ang Sugboanong nakabatog sa talagsaong kaalam sa paugnat sa kusog. Gibuhos ang panahon pagpalambo sa Filipino Martial Arts of Arnis sa mga tunghaan ubos sa koordinasyon sa Department of Education. Si Dionisio 'Diony' Cañete maoy chairman/founder sa World Eskrima Kali Arnis Federation (WEKAF) nga gilangkoban sa 55-member countries. Nabantog sa Doce Pares. Ang arnis nahimong kabahin sa Division Meet, Central Visayas Athletic Association (CVIRAA), Private Schools Athletic Association (PRISAA), Cebu Schools Athletic Foundation Inc. (CESAFI), Philppine National Games (PNG), Olympics, FIVA World Cup ug South East Asian (SEA) Games diin kampyon ang Pilipinas nga nakalangkat sa daghang bulawang medalya. Mga tinun-an ni Cañete sa arnis mogimaw gyod sa lokal ug kalibotanong panagtigi nga kanunayng makahakot og mga bulawang medalya ilabina sa world championships garbo sa pagkayab sa nasudnong bandila. Si Cañete usa ka hait ug lantip nga abogado. Valedictorian sa pre-law liberal arts ug college of law. Kanhi presidente sa Integrated Bar of the Philippine (IBP) Cebu Province Chapter. Kahinumdoman mipadangat og petisyon sa Supreme Court nga papason ang iyang ngalan sa Rolls of Attorney human mapuno sa dili ikabutyag nga inhustisya. Gibasi sa kasagmuyo, kahiubos ug wala matagbaw sa iyang mga igsuon sa legal profession nga naa sa prosekyusyon ug hudikatura sa pasangil nga nalambigit sa kurapsyon. Dili makatugot sa inhustisya nga iyang nahiagoman samtang nagpraktis sa iyang pagka abogado sulod sa 56 ka tuig. This posting includes an audio/video/photo media file: Download Now

Tambagi ko, Noy Kulas: Lisod nga silingan Posted: 28 May 2021 04:20 AM PDT Dear Noy Kulas, Tagoa lang ko sa ngan nga Ed, 28, taga Cebu City ra. Akong problema mao ang among silingan nga labad kaayo. Ang estorya ani. Nagsugba sila atubangan sa among tugkaran ug agianan pud nila kon sila mogawas. Sa ilang pagsugba sa among tugkaran, ang tibuok aso sa ilang gisugba nasulod na sa among balay kay tungod ra sa among purtahan ang ilang gisugbaan. Naay gate gate ilang balay pero wala sila nagsugba sa ilang tugkaran. Kana among yuta way naka tag-iya ana kay kaming tanan igo ra nag-abang kada semana. Katong napuno amh among balay sa aso, nabalaka ko sa akong papa kay gikan pa giatake. Mahadlok na pud mi og mausban balik simbako lang palayo. Pobre ra baya intawn mi. Nakigsikit pa ni silag balay sa among balay. Nakibungbong pud siya sa among bongbong. Sa akong kalagot, akung gi-post akong sa Facebook. Wala ko nag mention sa ilang ngan. Pero sila ang akong gipaigo ato. Nibawos pud iyang mga anak nag post pud sa Facebook.Wala ko nakaisturya nila kay basin lainon nila og sabot kay kadaghan nani siya nakakita og away sa among silingan. Magpadala dayon og summon sa barangay. Need ko sa imong tambag kay mag-atubang mi sa barangay sunod semana. Tambagi ko unsay buhaton nako. Daghang salamat. God bless and more power. ED Ed, Naa gyud diay nay laing batasan ang inyong silingan kay pirme diay na kakitag lalis sa mga silingan. Ayaw kahadlok kay naa man ka sa saktong side. Balido kaayo ang imong reklamo kay naa man moy masakiton. Nakapwehisyo man sila. Pasaara sila nga di na nila usbon ang ilang gibuhat kay kon dunay mahitabo sa imong amahan sila ang manubag kay tinuod, ang aso mo trigger na og kalisod sa pagginhawa. It can cause death. Sa mga sunog, ang mga biktima nangamatay sa pagkalumos sa aso. Kana maoy angay nilang masayran. Papirmaha sila nga di na kadto nila usbon. NOY KULAS rojval69@yahoo.com This posting includes an audio/video/photo media file: Download Now

Basil: Kristof wa husgahi ang kaubanang bidaman Posted: 28 May 2021 04:20 AM PDT Manila--Human sa guesting ni "It's Showtime" Bidaman Kristof Garcia sa "All About K", show ni Keanna Reeves sa K5 Studio, amo siyang nakatsikahan ug in fairness kang Kristof, mas gwapo siya in person. Medyo may pagka-naughty ang among interbyu kaniya ug gipangutana namo siya kung nanonood pa rin ba siya ng porn. Aba, iyang gibungat ang mga porn sites nga paborito niyang puntahan. "Oo, di ako nahihiya, hanggang sa umabot ako ng last page, kapag may hinahanap ako na eksena," pag-angkon ni Kristof. Sa laing bahin, may kauban siya sa Bidaman nga minglawod sa BL series ug matod pa niya, siya sad dunay BL series. "Pero hindi pa siya pinapalabas," matod ni Kristof. Unsa ka daring siya sa maong BL series? "Ayokong magsalita, panoorin nyo na lang," pa-suspense ni Kristof. May usa sad ka Bidaman nga minglihis ang linya. Si Jervy delos Reyes nga may premium account na karon sa Twitter. Kung miyembro ka ani, puwede mong ma-access ang mga videos ni Jervy. Pero matod ni Kristof, wa niya husgahi si Jervy kung mingsimang man kini og raket. Well, karong pandemic, daghan jud ang nagkalisod. Naintindihan ko si Jervy kung nahaylo man siya sa ingon aning matang sa trabaho. At least, wala siya'y naagrabyado. Actually, si Jervy pa gani ang naagrabyado kay may mga Jervy delos Reyes fake account nga gigamit ang iyang name para makapang-raket. Back to Kristof, before siya napunta sa Bidaman, miyembro diay siya sa "Walang Tulugan" ni Kuya Germs. "Yes po, kasama po ako sa last batch, kasama ko sina Ken Chan at Chealsea Starling. Napakabuting tao ni Kuya Germs, nami-miss ko siya," maluhaluhang bungat ni Kristof. Daghan na sad siyang nahimong projects sa GMA 7. "Mas marami po akong nagawang project sa GMA kaysa sa ABS-CBN." Yun na! Babushka! This posting includes an audio/video/photo media file: Download Now

Donaire motali'g history Posted: 28 May 2021 04:20 AM PDT Mosuway pagposte og kasaysayan si Nonito "Filipino Flash" Donaire sa iyang pag-challenge kang World Boxing Council (WBC) bantamweight champion Nordine Oubaali ugma, Mayo 30, 2021 (RP time) sa Carson, California. Kon modaog si Donaire ning awaya, hayan siya ang labing edaran nga mahimong world champion ning maong weight division sa edad nga 38. "It would be great to win the title at 38 years old and become the oldest champion at 118 pounds, but let's keep it going. Let's make it 40. Let's make it 42. There ain't no stopping me. Mentally, I'm very grateful but at the same time I'm just very ready," matod ni Donaire sa usa ka press conference kagahapon nga napatik sa www.philboxing.com. Gitataw ni Donaire, kinsa kanhi 4-division world champion, nga kon molampos siya ning awaya, aduna pa siya'y mas dako nga pangandoy–ang mahimong undisputed world champion. Gipasabot ni Donaire nga mahinungdanon kining maong away alang kaniya gumikan kay mao kini ang unang lakang alang sa iyang tinguha nga makuha ang ubang world titles sa iyang timbang nga kasamtangang gihuptan ni Naoya "Japanese Monster" Inoue. Gikaharong na ni Donaire si Inoue niadtong Nobiyembre, 2019 diin napilde siya pinaagi sa decision. Ang maong kulbahinam nga away maoy napiling 2019 Fight of the Year sa Ring Magazine, ang gikonsiderar nga bibleya sa boksing. "That's the only thing I haven't accomplished in boxing, being undisputed. I've done everything else, multiple champions, 4 division champions, you name it. That is my main goal, main objective," dugang ni Donaire. Si Oubaali, kinsa usa ka French-Moroccan fighter, andam mopakgang sa tanang ambisyon ni Donaire ug tinguha niining isaka sa mas taas nga andana ang iyang sugilanon. "I want to make a great fight, a great show. I want to continue to make my story," Oubaali. Si Oubaali adunay 17-0, 12KOs nga rekord samtang si Donaire naghupot og 40-6, 26KOs nga baraha. Giangkon ni Oubaali nga mas taas og kasinatian si Donaire apan sa iyang tan-aw, mas kusog ang iyang kumo ug mao kini ang maghatod kaniya sa kadaugan. "Yes, he's had an outstanding career and he has power but I believe I have more power than him. I know I have the power," asoy ni Oubaali. / ESL This posting includes an audio/video/photo media file: Download Now

2 fans gi-ban sa 2 ka NBA venues Posted: 28 May 2021 04:20 AM PDT Gipang-ban ang duha ka fans sa National Basketball Association (NBA) nga makasulod sa duha ka venues gumikan sa salawayong nabuhat niini ngadto sa mga magduduwa sa liga. Gipangtumbok mao ang fan nga miluwa kang Atlanta Hawks guard Trae Young ug ang fan nga naglabay og popcorn ngadto kang Washington Wizards guard Russell Westbrook nga nahitabo niadtong Mayo 27, 2021sa nahitabo sa managlahing insidente. Ang pagluwa kang Young nahitabo dihang miasdanga ang Hawks sa balwarte sa New York Knicks nga mao ang Madison Square Garden sa Game 2 sa Eastern Conference 1st round playoff series. Samtang ang paglabay og pop corn ngadto kang Westbrook nahitabo dihang miatak ang Wizards sa korte sa Phidelpahia 76ers nga mao ang Wells Fargo Center sa Game 2 sa laing 1st round series sa East. "This was completely unacceptable and will not be tolerated in our venue. We have turned the information over to the appropriate authorities," pamahayag sa Knicks. "We apologize to Russell Westbrook and the Washington Wizards for being subjected to this type of unacceptable and disrespectful behavior. There is no place for it in our sport or arena," pamahayag sab sa 76ers. / AP This posting includes an audio/video/photo media file: Download Now

ONE batok UFC fighters posible magkasangka Posted: 28 May 2021 04:20 AM PDT Kuli nga mahitabo nga magtambayayong ang duha ka mayorihiyang mixed martial arts (MMA) promotions alang sa pagpahigayon og promosyon diin magparang ang ilang fighters. Apan dakong uyon si ONE Championship chairman ug CEO Chatri Sityodtong ning maong ideya ug gusto niyang iparang ang iyang fighters kontra sa mga pambato sa Ultimate Fighting Championship (UFC). "I would definitely welcome a ONE vs UFC mega event," pamahayag ni Sityodtong sa iyang social media account nga napatik sa www.philboxing.com. Ang UFC maoy labing dakong MMA promotion sa North American samtang ang ONE Championship sa Asya. Taodtaod na sab nga nipadayag si Sityodtong nga kulbahinam ang panagbangga sa labing dagkong MMA promotions sa tibuok kalibutan. Sa pagtuo ni Sityodtong, manghawod ang fighters sa ONE Championship batok sa fighters sa UFC. "I would definitely like to see the best of the East vs. the best of the West," dugang ni Sityodtong. "UFC vs. ONE Championship I think would be phenomenal. I think the whole entire world would watch it. And I'd love to see world champions vs. world champions. So definitely, for sure, I'm open to it." Ang ONE Championships adunay kapin sa 500 fighters apan sukad pa kaniadto, ubos ra ang pagtan-aw sa mga eksperto sa organisasyon kumpara sa kalidad sa fighters sa UFC. Hinuon sa hinayhinay, adunay fighters ang One Championship nga nakakulit na sab og dakong pangalan sa kalibutan sa MMA. / ESL This posting includes an audio/video/photo media file: Download Now

You are subscribed to email updates from https://www.sunstar.com.ph/. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States