https://www.sunstar.com.ph/

---

• Mga anak nabulit sa dugo sa amahan
• Nograles: Sugbo di angay mabalaka, minilyong doses sa bakuna mangabot
• Duterte gihangyong mag VP sa 2022
• Pick-up truck motor nagbangga, 1 patay diha-diha
• Show cause order sa 9 ka establisemento
• Martin: Julia Barretto hot topic na sad
• Pusher patay sa buy-bust sa San Fernando
• Baha tungod sa baradong drainage
• Lapu moabaga sa pagbakuna sa taga Peza
• Hubog naligo sa dagat, nalumos
• Buhawi miigo sa Medellin
• Medical mission gipahigayon sa 2 ka bukirang brgy. sa Cebu City
• Community vegies, farms sa Peking duck sa NegOcc
• 'Pagtulis sa bangko nga legal'
• Kai wa pa’y kaseguroan nga makaduwa sa Gilas
• PBA players, coaches, staff bakunahan na
• Gwen, Dino uban sa DOH, IATF officials nakigtagbo ni Duterte
• P21M nga shabu sunugon
• Nagmotor mi-overtake, nabangga, patay
• 2 patay sa kilat
• Hubog gisumbag hangtod namatay
• Dugang sites sa vaccination sa Cebu City
• Birthday Ride gilusad para ni Sara
• Community pantry sa Liga ng mga Barangay Cebu City malampuson
• Menor gipusil sa nagmotor, patay
• Bana nasikop sa buy-bust, asawa mitahan sa druga
• Basketball court gi-turnover
• Basil: China Roces nakahilak
• Editoryal: Mobalik sa kinaraan?
• Barrita: Mga kapitan magtingkagol sa prisohan?
• Nadela: Ang kalimot way gahum
• Talk to Papa Joe: Mabdos hadlok sa Covid
• Vic misuway pagkumbensir ni Pingris nga di una moretiro
• Marcial mag-training og balik sa US
• Bolts nahuman na sa bubble training sa Laoag

Mga anak nabulit sa dugo sa amahan Posted: 31 May 2021 07:02 AM PDT Gihakop sa tumang kahadlok ang mga bata nga nagpanuigon og 5, 4 ug 3 anyos ingon man ang ilang inahan, human patya sa ilang atubangan ang ilang amahan nga construction worker. Ang mga bata nabulit pa sa dugo sa ilang amahan kay nagdulog sila atol sa pagpusil patay. Gibanusbanusan sa pagpusil sa duha ka mga gunman nga wa magtaptap sa nawong si Arlon Cantay Malirong, 33, construction worker, sa alas 4 sa kaadlawon sa Lunes, Mayo 31, 2021, sa sityo Mag-ube, Barangay Sumon, Lungsod sa Tuburan, Sugbo. Matod ni Police Staff Sergeant Mark Anthony Zamora, imbestigador sa Tuburan Police Station, nangatulog na ang pamilyang Malirong dihang gitindakan sa killer ang pultahan sa ilang balay. Pagsulod, gipusil sa gunman si Malirong dayon nigawas, apan ang kauban nipuli pagsulod, gitiwasan pagpusil si Malirong sa makadaghan. Namatay diha-diha si Malirong tungod sa mga samad pinusilan sa ulo ug lawas. Si Police Staff Sergeant Mark Anthony Zamora, imbestigador sa Tuburan Police Station nga nahinabi sa Superbalita Cebu, nagkanayon nga si Malirong natulog uban sa iyang kapuyo ug tulo ka mga anak, edad og 3 ngadto sa 5 anyos. Duha ka mga maguwang babaye samtang kamanghuran ang lalake. Ang kapuyo nibutyag nga kalit lang niabot ang duha ka mga lalaki, usa nipatid sa pultahan dayon gipusil sa ulo iyang bana. Human niini, ang kapuyo gitiunan og armas dayon gikuha ang iyang cell phone aron di makapanawag og pulis. Nigawas ang unang gunman, apan nibanos sa pagsulod ang kauban niini nga lookout ug gitiwasan pagpusil si Malirong. Nibutyag ang kapuyo nga naglakaw ra ang mga killer human sa krimen. "Nakaligo sa dugo ang tulo ka gamayng bata kay tupad niya katulog. Unya nakasud-ong sab ang ginang sa iyang kapuyo dihang gipusil," dugang ni Zamora. Matod sa kapuyo, ang usa sa mga killer nisulti nga "bayad na kini ninyo sa utang nga walay bayad-bayad." Naglibog ang kapuyo kon unsa nga utang kay wala man nagsulti si Malirong dihang buhi pa nga sila utangan. Nagtuo ang kapulisan nga nagdumot ang mga killer kang Malirong kay naila sab kini nga maldito sa ilang lugar. This posting includes an audio/video/photo media file: Download Now

Nograles: Sugbo di angay mabalaka, minilyong doses sa bakuna mangabot Posted: 31 May 2021 06:56 AM PDT Di angay mabalaka ang mga Sugbuanon nga mahutdan og vaccine sanglit mabakonahan ang tanan batok sa coronavirus disease 2019 (Covid)-19. Kini ang gipasalig ni Secretary Karlo Nograles, co-chairman sa national Inter-Agency Task Force (IATF) for the Management of Emerging Infectious Diseases, kinsa nibisita sa Sugbo sa Lunes, Mayo 21, 2021 alang sa council meeting sa PDP-Laban. Ang AstraZeneca nga maoy gigamit karon sa Cebu City kutob na lang ning semanaha depende sa turnout sa mga tawo. Gitug-an ni Nograles nga karong Hunyo hangtod sa Disyembre 2021, inanay nang mangabot ang minilyon ka doses sa bakuna nga gipalit sa national government. "Ayaw kabalaka kay every month especially karong month sa June, daghan na ang atong makuha nga vaccine doses, dili lamang sa Cebu, Region 7, kon dili tibuok nasod. Midyear naman karon, this is what we have been saying all along nga midyear and onwards, mas daghan pa ang doses nga makuha nato," padayag ni Nograles. Matod niya nga target sa national government nga mabakunahan ang 50 milyones ka mga Pilipino batok sa Covid-19 sa dili pa mahuman ang 2021 para mahingpit ang pagselebrar sa diwa sa Pasko. Gipasalig niya nga di magkuwang ang supply sa bakuna sanglit adunay igo nga gidaghanon nga giandam ang gobyerno hinungdan nga iyang giawhag ang tanan nga nag-edad og 18 anyos pataas nga magpabakuna ug di magduhaduha aron malikay sa virus. "In terms sa supply na secure na nato. And now it depends on the rollout and we are very thankful sa LGU kay sa rollout sa LGU, man na, so far so good na man ang mga LGU," matod ni Nograles. Ang mga bakuna nga gamiton mao ang Sinovac, Sputnik, AstraZeneca, Moderna ug Pfizer nga sugod managabot ang dinaghang supply sa Hunyo 2021. Matod niya nga ang 140 milyones nga doses paigo na sa 70 milyones ka mga tawo nga nag-edad og 18 anyos pataas. (PAC) This posting includes an audio/video/photo media file: Download Now

Duterte gihangyong mag VP sa 2022 Posted: 31 May 2021 06:29 AM PDT Mihangyo ang mga miyembro sa Partido Demokratiko Pilipino Lakas ng Bayan (PDP Laban) ngadto kang Presidente Rodrigo Duterte nga modagan isip bise presidente karong umaabot eleksyon sa 2022. Gawas sa paghangyo nga modagan isip Bise Presidente, gihatagan sab nila og gahom si Duterte nga mopili kon kinsa ang iyang buot nga modagan pagka presidente. Gipaagi ang hangyo pinaagi sa pagpalabang sa usa ka resolusyon sa Mayo 31, 2021 sa unang meeting sa PDP Laban National Council sukad sa 2016 sa Montebello Villa Resort samtang ang uban mitambong pinaagi sa Zoom. Ang tanang pisikal nga mitambong sa meeting ningpirma sa resolusyon samtang ang mga ning-apil pinaagi sa Zoom padad-an og kopya sa resolusyon sa ilang opisina aron makapirma. Una nga mipirma ang vice chairman sa PDP Laban, Secretary Alfonso Cusi, acting secretary general Melvin Matibag ug vice president for international affairs Raul Lambino. Apan kon dili mosugot si Duterte, niingon si Lambino nga mopahigayon sila og national convention alang sa mga miyembro sa PDP Laban. Kini ipahigayon human sa ilang National Council Meeting sa Hulyo 16 ug sa ilang National Assembly sa Hulyo 17 diin mahitabo ang ilang eleksyon sa officers Sa press conference, nisulti sa Lambino nga nagrespeto sila ug dako ang ilang pagsalig kang Duterte nga mupili og bisan kinsa nga kandidato nga modagan isip presidente. Sigon sab niya nga wa gibutang sa ilang resolusyon kon gikinahanglan nga anaa sa PDP Laban ang iyang gustong padaganon isip presidente tungod kay daghan sab sila og kaalyado nga mga partido. Ang kinahanglan lang nga makapasar ang kandidato sa prinsipyo sa PDP-Laban. Gisiguro nila nga sa di pa ang Oktubre, mamahimo nang maka-file og candidacy ug mahibaw-an na nila kon kinsa sa ilang partido ang modagan. This posting includes an audio/video/photo media file: Download Now

Pick-up truck motor nagbangga, 1 patay diha-diha Posted: 31 May 2021 06:11 AM PDT Lalakeng nagmotorsiklo nga nisuway pag-overtake sa laing sakyanan ug nisubay sa pikas lane namatay human iyang gikabangga ang usa ka pick-up truck alas 5:10 sa hapon sa Dominggo, Mayo 31, 2021 sa may Camella Homes, Private Road, Brgy. Perrelos, Dakbayan sa Carcar. Si Ronel Gujelde, 31, ulitawo, taga Sitio Camagayan, Brgy Perrelos, Dakbayan sa Carcar namatay diha-diha tungod sa kakusog sa impact. Samtang gitanggong pa ning pagsuwat sa taho si Kevin Satorre, 34, minyo, taga Sitio San Roque, Brgy Liburon, dakbayan sa Carcar. Si Police Master Sergeant Von Tecson sa Carcar Police Station nga nahinabi sa Superbalita Cebu nagkanayon nga si Guijelde sakay sa iyang Suzuki Smash motorcycle. Sa pag-abot sa nahisgutang lugar, ni-overtake kini sa laing sakyanan. Nikawat na si Gujelde sa pikas lane sa karsada alang sa kasugat nga mga sakyanan. Akto sab nga gikasugat niya ang gray 2016 Mitsubishi Strada (KAB 6335) nga gimaniho ni Satorre. (GPL) This posting includes an audio/video/photo media file: Download Now

Show cause order sa 9 ka establisemento Posted: 31 May 2021 06:09 AM PDT Nakaisyu na ang Business Permit and Licensing Office (BPLO) og 240 ka mga special permit ngadto sa mga establisemento aron makapamaligya og ilimnong makahubog. Sa 240, adunay siyam ka establisemento ang nakalapas sa guidelines ug naisyuhan og show cause order. Ang liquor ban sa dakbayan sa Sugbo gilibkas niadtong Mayo 6, 2021. Si Cebu City BPLO head Jared Limquiaco nibutyag nga ang mga tag-iya sa siyam ka mga establisemento kay gipa-esplikar kon nganong di sila angay tangtangan og special permit. Gawas sa siyam ka mga establisemento, adunay daghan sad nga establisemento ang wa nakaimplementar sa mga protocol, apan dili kini grabe ug gibadlong ra ang mga tag-iya nga iimplementar ang guidelines. Kasagaran sa mga kalapasan kay wa pagtuman sa social distancing ug pag-videoke. Sa mga niaging semana sab, adunay restobar sa may Gen. Maxilom Ave. ang gipatawag sa Emergency Operations Center (EOC) human adunay mura og disco sa sud niini. Matod ni Limquiaco nga daghan na kaayo ang siyam ka establisemento. "Daghan na ang nine kay gamay ra'y kailangan ni Covid para mo-spread nasad," segun ni Limquiaco. Gipahimangnuan niya ang mga tag-iya nga magbantay bisan pa og wa nilapas ang mga tawo sa sulod sa maximum capacity. (JJL) This posting includes an audio/video/photo media file: Download Now

Martin: Julia Barretto hot topic na sad Posted: 31 May 2021 06:08 AM PDT Unsa kahay reaksyon ni Julia Barretto nga hot topic na man sad siya sa social media? Kini human nitumaw kining iyang karaang video nga makitang nagkaon ni og "isaw" kauban ang iyang kanhi onscreen partner nga si Ronnie Alonte. Kini sukwahi sa iyang gipasiatab sa vlog ni Gerald Anderson niadtong Abril nga wa pa siya kakaon og "isaw" o kana bang tinai sa manok. "Never, ever...only for you," matod pa sa aktres dihang gipangutana siya sa iyang boyfriend nga si Gerald kon nakakaon na ba siya aning matanga sa streetfood. Siyempre nagpista na sad ang mga netizen. Duna pay niingon nga dunay scene si Julia sa teleserye niyang "Ngayon at Kailanman" nga nikaon sad ni og "isaw" kauban si Jameson Blake. Pareho ra gud ni sa giingon ni Julia niadto nga wala kuno silay relasyon ni Gerald apan karon sila gyud diay. Hahaay maayo gyung pagkaliwat. Haha! 'BAKUNA' Daghan sa mga taga-showbiz sa Manila ang nabakunahan na sama nilang Coco Martin, John Lloyd Cruz, Willie Revillame, Nora Aunor, Sharon Cuneta, Gab Valenciano, Tim Yap, Gretchen Barretto, Ogie Diaz ug Angel Locsin. Apan base sa uwahing survey sa Social Weather Stations (SWS) nga 32 percent ra sa mga Pinoy ang andam magpabakuna. Ang 35% nagduhaduha pa kuno gihapon samtang ang laing 33% dili lang gyud ganahan magpaturok. Sige lang wa bitaw pugsanay. Ilaha sad nang katungod. SAN MIGUEL BEER Hunyo 1 na man diay karon... ug isip paghandum sa umaabot nga Father's Day celebration sa June 20 ang SMB dunay ipanghatag nga espesyal nga regalo nga gitawag nilag "Unusually usual Father's day Beer gifts." Ang inyo rang buhaton mao ang pagpalit og two (2) cases of San Miguel Pale Pilsen in bottle or in can via online: www.SMBDelivers.com or www.Boozy.ph aron maangkon ninyo for free ang Beer Frame or the Beer Trophy nga makita ninyo sa hulagway. Ang promo modagan gikan Mayo 1 hangtod December 31, 2021. Available ra ni sa mga area nga walay liquor ban sama sa Metro Manila, Cebu, ug Cagayan De Oro. FEARLESS FORECAST Unsa kunoy akong fearless forecast sa NBA. Sa tinuod lang, bisan sa una pa, die hard fan gyud kong Lebron James. Kon asa siya nga team tua sad ko laban. Apan sa akong hunahuna sa karon nga season maglisud ang Lakers. Ang mo-champion ron, basta di lang ma-injure silang Durant, Irving o Harden, way lain kundi ang Brooklyn Nets. Klarex kaayo. This posting includes an audio/video/photo media file: Download Now

Pusher patay sa buy-bust sa San Fernando Posted: 31 May 2021 06:07 AM PDT Usa ka pusher ang patay ug ang iyang kauban nasikop human giingong nisukol sa buy-bust sa Purok Santan Petrapael, Barangay North Poblacion, lungsod sa San Fernando, habagatan sa lalawigan sa Sugbo, alas 10:30 sa buntag kagahapon, Mayo 31, 2021. Si Joseph Esbra Ubanan, hingkod, ulitawo, giilang high value individual (HVI) sa drugas ug molupyo sa dapit, ang namatay. Nasikop Si Nilo Valera Manacpu, 35, biyudo ug nagpuyo sa dapit. Nakuha gikan nila matod pa ang 4.8 gramos nga shabu nga mobalor sa P27,880 base sa Dangerous Drugs Board (DDB) value, armas, bala, buy bust money ug ihalin sa drugas nga druga. Si Major Janus Giangan, hepe sa San Fernando Police Station nga nahinabi sa Superbalita Cebu, nagkanayon nga HVI sa ilang lugar si Ubanan. Matod pa niini nga atol sa transaksyon, nakabantay ang drug pusher nga pulis iyang gitunolan sa drugas. Nibunot sa armas, namusil apan mikagar hinungdan nga daling nakapalipod ang iyang mga sakop napusilan si Ubanan. (GPL) This posting includes an audio/video/photo media file: Download Now

Baha tungod sa baradong drainage Posted: 31 May 2021 06:04 AM PDT Naproblema sa baha ang gatusan ka mga residente sa Purok 6, Sityo San Miguel, Barangay Apas, dakbayan sa Sugbo gumikan sa barado nga drainage system. Gumikan niini, ang Cebu City Government nipadala na sa ilang ekipo aron mabanhaw ang ilang drainage nga natam-okan na og mga yuta ug ang pagsirado sa private lot owner nga nahimutang sab duol sa ilang mga balay. Si Konsehal Jerry Guardo, chairman sa Committee on Infrastracture kinsa personal nga nibisita sa maong sityo, nagkanayon nga 5 na ka tuig nga giantos sa mga molupyo sa kapin o kulang 200 ka mga balay ang baha matag bundak sa kusog nga uwan. Ang konsehal nagkanayon nga posible sunod semana, makompleto na ang 70 metros nga drainage para dili ma mobaha ang maong area. Si Alice Pelayo, residente sa maong dapit nagpasalamat sa Cebu City Government gumikan sa pag-aksyon sa kagamhanan aron mahatagan og solusyon ang ilang problema. Matod ni Pelayo nga lapas sa tuhod ang tubig nga mosulod sa ilang mga balay sa higayon nga mobundak ang kusog nga uwan sanglit magbi-aw ang tubig kay barado na ang ilang drainage. Nagpasalamat ang mga residente sa Purok 6 sa San Miguel sa Apas sanglit mahatagan na og solusyon ang problema nga dugay na nilang gihambin. Ang konsehal sa north district nga si Guardo niingon nga ilang ibalik ang kanhi drainage nga natabunan na og yuta didto sa private lot nga gikoral aron di na magpundo ang tubig panahon sa ting- uwan. (PAC) This posting includes an audio/video/photo media file: Download Now

Lapu moabaga sa pagbakuna sa taga Peza Posted: 31 May 2021 06:04 AM PDT Gikalipay sa mga kadagkuan sa Phillipne Export Zone Authority (Peza) ang pag-abaga sa kagamhanan sa dakbayan sa Lapu-Lapu sa pagbakuna sa empleyado sa locators sa Mactan Export Processing Zone (MEPZ). Nasayran nga moabot sa 120,000 ka mga empleyado ang anaa karon ang nagtrabaho sa nagkadaiyang locators sa MEPZ sa dakbayan. Matod ni Brigadier General Charito Plaza, ang Director General sa PEZA, nga pinaagi unya niini makahunahuna ang locators nga gipangga sa gobyerno ang ilang pagbubo og puhonan sa dakbayan ug sa nasod. Si Plaza mibisita ni Chan aron personal kining pasalamatan sa inisyatiba sa kagamhanan. Nabalaka si Plaza nga kun ugaling ang mga locators pa ang mopalit og bakuna sa ilang mga empleyado hayan dili usab masiguro nga adunay pipila kanila ang modesider nga manira na lang sa hingpit ning panahon sa pandemiya. Mapasigarbuhon si Plaza nga ang tanang locator sa MEPZ kun ang nag-operate niining panahon sa pandemya kun 100 porsyento gayud. Sa kinatibuk-an anaa sa 96 porsyento ang nag-operate usab nga mga locator sa Kabisay-an. Mas taas kini itandi sa kaulohan nga anaa lang sa 60 to 80 porsyento niining panahon sa pandemya. Sa Luzon usab gibutyag ni Plaza nga ang locators giawhag nga maoy mopalit ug bakuna alang sa ilang mga empleyado. "Time to payback especially in this pandemic this the time we have to assist and support the need of our investors aron di sila mag close di sila mo transfer kay ang tendency pag walay support sa operations ang atong government is for them to stop operation or transfer," matod ni Plaza. Si Lapu-Lapu City Mayor Junard Chan, sa iyang bahin, mibutyag nga 70 porsyento lang sa 120,000 ka mga empleyado sa MEPZ ang matagaan ug bakuna. Prayoridad unya niini ang mga adunay gihambing mga balatian o katong risgo sa coronavirus disease 2019 (Covid 19). Ang maong mga bakuna gikan sa Office of the Presidential Assistance for the Visayas OPAV Project Balik Buhay PBB nga gitagana alang unta sa dakbayan. Apan nadesisyonan ni Chan nga ihatag sa taga MEPZ sanglit maisip sila nga essential workers niining panahon sa pandemya. Gihulagway ni Chan nga ang export processing nga maoy nagpabiling gisaligan sa ekonomiya sa dakbayan taliwala niining pandemya sa Covid-19. (GCM) This posting includes an audio/video/photo media file: Download Now

Hubog naligo sa dagat, nalumos Posted: 31 May 2021 06:04 AM PDT Usa ka birthday party nahimong trahedya human usa ka hubog naligo sa dagat nalumos sa Brgy. Candugay, Lungsod sa Barili, Cebu alas 3:00 sa hapon niadtong Dominggo, Mayo 29, 2021. Si Miguelito Ybañez, 28, nagpuyo sa dapit, namatay. Si Police Staff Sgt. Jeffrey Alpas, sa Barili Police Station nga nahinabi sa Superbalita Cebu, nagkanayon nga si Ybañez uban kini nga nangaligo sa dagat kay dunay nag-birthday sa iyang mga paryente. Malingaw sab kini sa pagtagaytagay dihang nisawom si Ybañez. Nakugang nalang iyang mga kabanay, higala nga nalumos. Matod pa ni Police Staff Sgt. Alpas, nga basin sa kahubog nalamba ug nalumos. Ang gibutyag sab sa mga higala nga taga hawak lang ang tubig sa dagat dihang naligo ang biktima. Wala isalikway sa kapulisan ang posibilidad nga giatake si Ybañez ug wala mabantaye dayon sa mga kauban hinungdan nga nalumos. (GPL) This posting includes an audio/video/photo media file: Download Now

Buhawi miigo sa Medellin Posted: 31 May 2021 06:00 AM PDT Bisan og wala direktang moigo si bagyong Dante sa Sugbo, apan nasinati ang pag-uwan sa pipila ka bahin sa amihanang Sugbo ilabi na sa Lungsod sa Medellin nga niresulta sa pagkaporma sa usa ka buhawi o alimpos nga niigo sa Sitio Conception, Purok Mahigalaon, Barangay Panugnawan kagahapon, Mayo 31, 2021. Sa maong hitabo, naguba ang usa ka balay samtang nagub-an usab ang bahin sa laing tulo ka mga panimalay lakip na ang ad sa mga baboy. Gawas sa mga balay nagatumba usab ang mga kahoy ug pananom sa palibot. Gipahibalo sa Medellin Disaster Risk Reduction and Management Office (DRRMO) nga lima ka mga pamilya ang na apektahan sa hitabo apan luwas na sila. Gipadalhan og hinabang sa kagamhanan ang mga biktima sama sa pagkaon ug mga materyals sa pag panday sa panimalay. (ANV) This posting includes an audio/video/photo media file: Download Now

Medical mission gipahigayon sa 2 ka bukirang brgy. sa Cebu City Posted: 31 May 2021 05:42 AM PDT Duha ka mga bukirang barangay sa Dakbayan sa Sugbo ang gibisita sa libreng medical mission sa Association of Barangay Councils (ABC) sa siyudad nga gipangulohan ni Kapitan Franklyn Ong. Gibanabanang dul-an sa 200 ka mga indibidwal lakip na ang hamtong ug mga bata ang nakaapil sa maong kalikuhan nga nidalit og libreng BP consultation, blood sugar testing, ug checkup. Nanghatag si Ong og libreng maintenance medicines alang sa hypertension ug diabetes. Aduna sab tambal sama sa antibiotics, vitamins, ug alang sa sakit nga ubo, sip-on, allergies, ug uban pa. "Nasayod ta unsa kalisud ang kinabuhi sa atong mga kaigsuonan sa kabukiran, kadaghanan nila pila ka buwan o tuig na nga wala nakapa check up sa doktor tungod sa kawad-on," matod ni Ong. Ang mga bata nga nitambong sa medical mission gitudloan og saktong paghugas sa kamot ug pag-toothbrush. Gihatab sab sila og libreng hygiene kits nga adunay sulod nga sabon, toothpaste, toothbrush, ug labakara. Gawas sa mga tambal ug hygiene kits nga gipanghatag, aduna sab libre nga mga mask, face shield, ug t-shirt alang sa mga benepisyaryo. Gibutyag ni Ong nga padayon sila nga mubisita sa mga barangay sa kabukiran aron maghatod sa maong libreng medical mission. "Matag Sabado ta mubisita sa mountain barangays sa Cebu City sa tinguha nga makahatag ta og kahupay sa kalisud nga nasinati sa atong kaigsuonang Sugboanon," matod ni Ong. (PR) This posting includes an audio/video/photo media file: Download Now

Community vegies, farms sa Peking duck sa NegOcc Posted: 31 May 2021 05:36 AM PDT Uban sa pag-uso sa community pantries sa tibuok nasod, ang National Anti-Poverty Commission's Kasambayanihan volunteers sa coastal municipality sa Valladolid, Negros Occidental hilom lang nga nag-atiman sa ilang communal vegetable gardens ug Peking duck farms sa pagtabang sa gigutom ug paghatag og panginabuhi sa kabus nga pamilya. Usa sa mga kugihan mao si Ernesto Araneta, coordinator sa Communal Vegetable Farm Project sa Barangay Paloma nga natukod ubos sa Poverty Reduction through Rural Development (PRRD) program sa National Anti-Poverty Commission (NAPC) ug Philippine Amusement and Gaming Corp. (Pagcor). Isip NAPC Ka-Sambayanihan volunteer, si Ernesto nangulo sa komunidad sa pagpananom og utaon sama sa lettuce, pechay, string beans, ug alugbati gikan sa binhi sa Commission uban sa pag-abag sa Department of Agriculture (DA). Ang tanom gipatubo pinaagi sa organic fertilizers ug pesticides gikan sa NAPC. Gawas sa pag-ani alang sa ilang personal nga panginahangpan, ang team nakahalin og dili mominos sa P3,000 matag semana. "Malaking tulong sa amin ang pagkakaroon ng communal garden. Nakakapag-harvest kami ng dalawang beses sa isang linggo. Pinamahagi namin ito sa mga kasamahan namin sa Ka-sambayanihan para magkaroon sila ng kabuhayan," matod ni Araneta. Sama ni Ernesto, si David Rigonel, NAPC municipal focal person, nitabang sa Barangay Bayabas apan ning higayona, ang Peking duck production. "Itong Peking duck ay nakita natin na hindi lamang itlog ang mapapakinabangan pati na rin ang karne. Simple itong alagaan. Pabayaan lang silang umikot-ikot sa bakuran ng bawat benepisyaryo at bigyan ng tirang pagkain. Siguradong mangingitlog na kaya walang masyadong gastos. Pwede ring ipagbili ang karne dahil mahal ito," matod ni David. Ang NAPC nihatag sa barangay og pasiunang 100 Peking ducks nga gibuhi sa team. Ang target mao ang paghatag sa matag pamilya nga benepisaryo sa dili mominos 15 ka ducks aron ilang buhion. "We are pleased to see these community efforts taking off and this inspires us more to work harder in order to bring down the country's poverty incidence, enhance food security, and strengthen rural-urban agro-economic value chains," matod ni NAPC Secretary and Lead Convenor Noel K. Felongco. Sa 2019, si Felongco ug Valladolid Mayor Enrique Miravalles nilagda og memorandum of agreement (MOA) alang sa pagpatuman sa P3-million poverty alleviation project sa lungsod. Ang budget sa Integrated Community-Based Agricultural Production and Processing Facility naa sa P2 milyunes sa pagtukod sa physical infrastructures ug pagpamalit sa mga ekipo, nt, P500,000 sa hauling support ug provision for vehicles, ug PHP500,000 sa capital infusion sa proyekto. (PR) This posting includes an audio/video/photo media file: Download Now

'Pagtulis sa bangko nga legal' Posted: 31 May 2021 05:35 AM PDT Gihulagway ni American boxing legend Floyd Mayweather Jr. nga ang iyang pagpakig-away kang YouTube sensation Logan Paul sa usa ka exhibition bout karong Hunyo 6, 2021 sa Miami Gardens, Florida nga sama sa usa ka pagpanulis sa bangko nga legal. Buot ipasabot, yano kini nga tahas alang kang Mayweather, kinsa miangkon nga yanong pagpanguwarta ang iyang tuyo ug tumong ning awaya nga nahaom sa iyang angga nga "Money." Gipasabot ni Mayweather nga kining maong mga pamaagi sa pagpanguwarta nagsilbeng bunga sa iyang grabe nga paningkamot dihang aktibo pa siya nga boksidor. "My nickname is 'Money' for a reason. I worked extremely hard for years and years to get to a certain level. A level where we can start calling everything an event," matod ni Mayweather sa intebyu sa programang "Inside Mayweather vs. Paul" sa Showtime nga napatik sa boxingscene.com. "I believe in working smarter, not harder. So if it's something easy like [the Paul fight], a legalized bank robbery, I gotta do it. I have to do it." Si Mayweather, kinsa miretiro sa boksing nga wala'y pilde ug adunay rekord nga 50-0, 27KOs, mitataw nga nisugot siyang makig-away kang Paul gumikan kay mokita siya og dako nga dili siya mahago og maayo. Gihulagway ni Mayweather ang iyang pagpakig-away kang mixed martial arts (MMA) superstar Conor McGregor kaniadto nga "a quick bank robbery, a quick heist." Yano na sab nga nanguwarta si Mayweather pinaagi sa pagpakigharong kang Japanese Tenshin Nasukawa, kinsa gipaundang niya sulod lang sa 1st round. Gumikan kay sikat si Logan sa YouTube hasta ang igsuon niining si Jake, nalantawan ni Mayweather nga mokita og dako ang iyang pagpakig-away kang Logan nga alang kaniya, anugon kon dili niya mapahimuslan. "[Logan and Jake Paul] are making some pretty good money from YouTube. He's made a lot of money from YouTube, but it's not Floyd Mayweather-type of money. When it comes to Floyd Mayweather, it's a different level. Believe me," dugang ni Mayweather. "It's fame at different levels. Fame changes the person. Like people say, 'fame changed me.' It did. It made me more cautious. It made me want to better myself and become a better person and surround myself with better people." (ESL) This posting includes an audio/video/photo media file: Download Now

Kai wa pa’y kaseguroan nga makaduwa sa Gilas Posted: 31 May 2021 05:30 AM PDT Kon wala'y nausab sa eskedyul, nakabalik na kagabii, Mayo 31, 2021, ang batan-ong Pinoy nga higante nga si Kai Sotto. Mao kini ang maayong balita alang sa Philippine basketball. Ang dili maayong balita, wala'y kaseguroan kon makaduwa ba si Sotto sa Gilas Pilipinas alang sa ikatulong ug katapusang tipik sa 2021 Fiba Asia Cup qualifiers nga gikatakda karong Hunyo 16-20 sa Clark, Pampanga. Si Ryan Gregorio, Samahang Basketbol ng Pilipinas (SBP) special assistant to the president, nibutyag nga maghatag og kahasol sa pagduwa ni Sotto sa Gilas Pilipinas mao ang quarantine protocols kalabot sa padayong pagpakigbatok sa nasod sa COVID-19. "We have to play it by ear," pasabot ni Gregorio. "He has to go through quarantine as mandated by government." sa iyang paghiabot, si Sotto kinahanglan pang magparehistro sa negative RT-PCR test ug motuman sa mandato sa gobiyerno nga 14 ka mga adlaw nga quarantine period. Nagpasabot kini nga karon pang Hunyo 14, 2021 makaduwa si Sotto sa Gilas, duha ka mga adlaw human sa tahas sa nationals batok sa Korea. (ESL) This posting includes an audio/video/photo media file: Download Now

PBA players, coaches, staff bakunahan na Posted: 31 May 2021 05:27 AM PDT Sugod karong adlawa, Hunyo 1, 2021, hinayhinay nang bakunahan batok sa COVID-19 ang mga magduduwa, coaches ug mga empleyado sa Philippine Basketball Association (PBA) alang sa tinguha sa liga nga masugdan ang Season 46 sa hulahing bahin ning buwana o sayong bahin sa sunod buwan. Wala na mohatag og dugang mga detalye ang PBA lakip na ang brand sa bakuna nga gamiton kabahin ning maong lakang. "That's right, we'll start by June 1," asoy ni PBA chairman Ricky Vargas sa interbyu sa GMA News Online. "We have to start as soon as possible with the vaccination of everyone so that we can also start soon." Sa pagtuo ni Vargas, makatabang kini og dako aron mohayag ang poruhan nga masugdan na nila ang bag-o nilang season. "I'm not sure I'm able to tell further details but tomorrow, players will be vaccinated," dugang ni Vargas. Subay niini, nagkanayon si Alaska Aces head coach Jeffrey Cariaso nga 10 sa ilang mga sakop ang nabakunahan pinaagi sa ilang tagsatagsa ka local government units. "I'd say 10 people from the team have already been vaccinated. We are all trying to get it on our own in our local barangays," pasabot ni Cariaso. (ESL) This posting includes an audio/video/photo media file: Download Now

Gwen, Dino uban sa DOH, IATF officials nakigtagbo ni Duterte Posted: 31 May 2021 04:54 AM PDT Sila Cebu Governor Gwendolyn Garcia (ikaduha gikan sa tuo) ug Presidential Assistant for the Visayas Secretary Michael Dino (tuo) naglakaw padulong sa abyon nga ilang gisakyan paingon sa Manila sa Lunes sa hapon, Mayo 31, 2021 aron makigtagbo kang Presidente Rodrigo Duterte sa Malacanang. Kuyog nilang duha sila si (gikan sa wala) Edmund Liu, chairman sa Project Balik Buhay (PBB); Dr. Mary Jean Loreche, spokesperson ug chief pathologist sa Department of Health (DOH) 7 ug ang magtiayong Mia ug retired Major General Melquiades Feliciano, Visayas chief implementer sa Inter-Agency Task Force (IATF). Tumong nila ang pagpasabot kang Duterte sa sitwasyon sa coronavirus disease 2019 (Covid-19) sa Sugbo nunot sa Executive Order 17 (EO) ni Garcia ug ordinansa sa Lalawigan kalabot sa quarantine protocol sa mga overseas Filipino workers (OFW) ug returning overseas Filipinos (ROF)./hulagway gikan sa Capitol PIO This posting includes an audio/video/photo media file: Download Now

P21M nga shabu sunugon Posted: 30 May 2021 06:57 PM PDT Mokabat sa P21 million nga balor sa illegal nga drugas nga nasakmit sa Philippine Drug Enforcement Agency 7 ug kapulisan sa Central Visayas sa anti drug operations sunogon karong adlawa (Mayo 31) sa pasilidad sa Cosmopolitan Funeral Homes sa dalan Junquera, Dakbayan sa Sugbo. Ang pagsunog sa shabu nga gihimong mga ebidensya dunay pagtugot sa korte. (AYB) This posting includes an audio/video/photo media file: Download Now

Nagmotor mi-overtake, nabangga, patay Posted: 30 May 2021 06:39 PM PDT Lalakeng nagmotorsiklo namatay human mabangga sa usa ka pick-up truck alas 5:10 sa hapon sa Dominggo, Mayo 30, 2021 sa Camella Homes, Private Road, Barangay Perrelos, Dakbayan sa Carcar. Ang biktima giila sa kapulisan nga si Ronel Gujelde, 31, ulitawo, taga sityo Camagayan, Barangay Perrelos samtang ang suspek mao si Kevin Satorre, 34, minyo, taga sityo San Roque, Liboron sa mao nga siyudad. Matod ni Police Lieutenant Colonel Allan Rosario, hepe sa kapulisan sa dakbayan, nga si Gujelde nagmaneho sa iyang motorsiklo, nisuway pag-overtake sa laing sakyanan. Sa iyang pagsulod sa pikas lane, iyang gikasugat si Satorre, kinsa nagmaneho sa iyang Mitsubishi Strada pick-up truck. Nagkabangga ang duha ka mga sakyanan nga niresulta sa grabeng pagkaangol ni Gujelde hinungdan sa hinanaling kamatayon. Si Satorre naa sa kustodiya sa kapulisan samtang gihikay ang kasong reckless imprudence resulting to homicide and damage to properties. (GPL) This posting includes an audio/video/photo media file: Download Now

2 patay sa kilat Posted: 30 May 2021 06:46 AM PDT Duha ka mga tawo ang patay human naigo sa kilat atol sa pagbunok sa uwan sa Purok Caimito, Barangay Poblacion, lungsod sa Liloan kagahapon, Mayo 30, sa 1:30 sa hapon. Ang mga biktima mao sila si Nisa Comendador Momo, 70, ug Roselio Cañete, 50, pulos mga molupyo sa Purok Tambis, Barangay Poblacion, Liloan. Si Momo maoy nanag-iya sa RC Garden nga gitamnan og ornamental plants sa dapit nga diin niigo ang kilat. Si Police Msgt. Kenneth Perocho sa Liloan Police Station nagkanayon nga sa ilang pasiunang imbestigasyon nasayran nga ang duha namasilong sa payag dihang nagbunok ang uwan ug nagpangilat. Dugang nasayran nga ang duha gidala sa Eversley Child Sanitarium Hospital sa Barangay Jagobiao sa dakbayan sa Mandaue apan pulos gideklarar nga dead-on-arrival (DOA). This posting includes an audio/video/photo media file: Download Now

Hubog gisumbag hangtod namatay Posted: 30 May 2021 06:46 AM PDT Hubog nga lalake ang gigapos ug gisumbag hangtod namatay sa Purok Saging, Barangay Poblacion, lungsod sa San Remigio kagahapon, Mayo 30, alas 12:20 sa kaadlawon. Si Tiago Santa Ana Garde, 58, minyo, ug mag-uuma sa naasoy nga dapit, patay nga napalgan sa mga silingan ug kapulisan nianang alas 8:00 sa buntag sa samang adlaw. Nitahan sa kapulisan si Artemio Tamayo Mesa, 59, dunay kapuyo, mag-uuma ug silingan sa biktima. Si Police Staff Sgt. Felipe Cabage, imbestigador sa San Remegio Police Station nga nahinabi sa Superbalita Cebu, nagkanayon nga miangkon ang suspek sa krimen. Gibutyag sa suspek nga iyang nahinaykan ang iyang higala dihang nagmaoy sa kahubog sa alas 12:20 sa kaadlawon sa Dominggo. Matod niini, ang biktima pwerting sabaa ug sila nagkalalis apan gikalitan siya og hapak sa botelya hinungdan nga nagkasinumbagay sila. Pagka-alas 7:00 sa buntag, nakurat ang ilang mga silingan kay ang biktima nakit-an nga nag-ubo, gigapos, nga wala nay kinabuhi diha sa gawas sa panimalay sa suspek. Kasong murder ang ipasaka batok sa suspek karon, Mayo 31. (GPL) This posting includes an audio/video/photo media file: Download Now

Dugang sites sa vaccination sa Cebu City Posted: 30 May 2021 06:41 AM PDT Dili mominos unom ka dugang vaccination sites ang ablihan sa kagamhanan sa dakbayan sa Sugbo alang sa mga molupyo sa mga bukirang barangay. Si Cebu City Vice Mayor Michael Rama niingon nga ang dugang sentro sa Barangay Bonbon, Tisa, Cebu City Sports Complex alang sa mountain barangays sa habagatan, Cebu City Resource Management and Development Center (Cremdec), Guba Hospital, multi-purpose school sa Talamban alang sa mga taga amihanan. Ang kasamtangang vaccination site sa University of Cebu (UC) Banilad moatiman usab og mga residente gikan sa mountain barangays. Ang Vaccine Advisory Board sa dakbayan sa Sugbo ni-schedule sa vaccination alang sa mga molupyo sa mountain barangays karong Hunyo 4 ngadto sa Hunyo 6 ug Hunyo 18 ngadto sa Hunyo 20. (JJL) This posting includes an audio/video/photo media file: Download Now

Birthday Ride gilusad para ni Sara Posted: 30 May 2021 06:39 AM PDT Mikabat og 200 ka mga motorista ang nisalmot sa 'birthday ride' o motorcade alang sa kasaulogan sa adlawng natawhan ni Davao City Mayor Sara Duterte niadtong Dominggo, Mayo 30, 2021. Nagsugod ang motorkada sa Plaza Independencia paingon sa Hoopsdome sa Lapu-Lapu City nga maoy katapusang stop sa maong mga motorista. Pag-abot nila sa Hoopsdome, mikanta pa sila og happy birthday song alang kang Mayor Duterte. Sigon ni Toto Lacro, lead organizer sa maong kasaulogan, nga gipasiugdahan ang maong aktibidades sa ilang organization nga Sara Duterte for President Movement Cebu Chapter. Ang mga misalmot sa maong birthday ride boluntaryo nga mitambong sa maong aktibades, matod ni Lacro. Dugang sab niya nga ang adlawng natawhan ni Mayor Duterte karong Lunes, Mayo 31 ug gipahigayon lang nila ang maong kalihokan sa bisperas ug gitumong nga Dominggo aron paglikay nga makamugna og paghuot sa kadalanan. Sigon niya nga nagpadala sab sa ilang mga birthday message ang ubang mga lokal nga kagamhanan sa probinsya sa Sugbo diin ila unyang i-post sa ilang Facebook page. Gawas sa motorkada, ang ubang supporters nagpahigayon sab og ilang mga aktibidades sama sa community pantries ug feeding program sa nagkalainlaing mga lungsod sama sa Catmon, Tabuelan, Bantayan Island, Daanbantayan, Tabogon, ug Borbon. Matod ni RJ Bayon-on, tigpamaba sa Sara Duterte for President Movement Cebu Chapter, nga usa sab sa ilang katuyoan sa maong motorkada aron pag-awhag ni Sara Duterte nga modagan pagka presidente karong umaabot eleksyon sa 2022. Buot nila nga ipadayon ni Sara Duterte ang nasugdang mga proyekto ug programa ni Presidente Duterte. (KFD) This posting includes an audio/video/photo media file: Download Now

Community pantry sa Liga ng mga Barangay Cebu City malampuson Posted: 30 May 2021 06:39 AM PDT Malampuson ang unang semana o kataposang semana sa Mayo nga pag-arangkada sa Mobile Community Pantry sa Liga ng mga Barangay sa Cebu City nga gipangulohan ni Kapitan Franklyn Ong. Moabot sa 300 ka mga indibiduwal sa Barangay Apas, Mabolo, ug Inayawan ang nakadawat og usa ka kilong bugas, itlog, instant noodles, ug pack sa soy sauce, suka, ug mantika nga gikan sa kaugalingong panudlanan ni Ong. "Nindot kaayo kay nakita gayud nato ang atong pagka Pilipino. Sa kaning panahon nga naglisod ang tanan sa pandemiya, nakita gayud nato ang bayanihan sa atong mga kaigsuonan pinaagi aning community pantry," matod ni Ong. Gibutyag ni Ong nga sukad sa pagkahimugso sa nagkadaiyang community pantry, nakadawat siya og mga request gikan sa kabarangayan ug ubang pundok kalabot niini. Kini maoy rason sa iyang paghimo og kaugalingong mobile community pantry. Tumong sa konsehal nga mahatagan og pagtagad ang nagkalainlaing sektor nga nanginahanglan niini. Mosuroy ang mobile community pantry ni Ong upat ka adlaw sa usa ka semana gikan Martes hangtod Biyernes ug buot sa konsehal nga ilang matuyok ang 80 ka mga barangay sa dakbayan aron daghan silang matabangan. "Atong paningkamutan nga makaabot ta nila. Ang atong target gayud ani nga tanang barangay dinhi sa Cebu City atong matuyok," matod ni Ong. (PR) This posting includes an audio/video/photo media file: Download Now

Menor gipusil sa nagmotor, patay Posted: 30 May 2021 06:26 AM PDT Patay ang usa ka 14 anyos nga lalake nga angkas sa usa ka motorsiko human gipusil sa tulo ka mga mamumuno nga nagsakay usab og motorsiklo sa Sitio San Pedro, Barangay Taytay, dakbayan sa Danao niadtong Sabado, Mayo 29, alas 11:40 sa gabii. Ang biktima mao si Niño Anthony Roble, 14, taga Rizal street, Barangay Suba, Danao, kinsa nadala sa ospital apan nakabsan sa kinabuhi pagka Dominggo sa buntag, Mayo 30. Si Police Staff Sgt. Allan Vertucio sa Danao Police Station nga nahinabi sa SunStar Superbalita Cebu nagkanayon nga wala pa nila mailhi ang tulo ka mga mamumuno. Matod ni Vertucio, ang higala sa biktima nga si Ian Joshua Magan Regis, 16, silingan ug kauban sa biktima nga ning-angkas, nibutyag nga padulong na mopauli ang biktima sa ilang panimalay sakay sa motorsiklo nga gimaneho ni Basiliso Alvaro Beduya, 52, taga Pulang Yuta, Barangay Looc, Danao. Sa pag-abot sa nahisutang lugar, asoy ni Beduya sa kapulisan, kalit nga dunay usa ka motorsiklo ang ni-overtake kanila ug nakita niya nga ang ikatulo nga angkas sa motorsiklo maoy nagdalag armas ug gipusil ang likod sa ulo sa iyang kauban nga biktima. Human sa pagpamusil, nilahos sa norte nga bahin ang mga mamumuno, samtang ang motorsiklo nga gisakyan sa biktima nalamba sa dan. Si Police Staff Sgt. Vertucio nagkanayon nga nagpadayon pa ang ilang imbestigasyon sa kaso ug pagkuha sa motibo sa pagpatay. Ang Danao naila sa industriya sa paghimo og armas apan daghang ang nagpadayon sa ilang illegal nga pagpanghimo ug pagbaligya niini. Gituohan pang daghan loose firearms sa dakbayan. (GPL) This posting includes an audio/video/photo media file: Download Now

Bana nasikop sa buy-bust, asawa mitahan sa druga Posted: 30 May 2021 06:20 AM PDT Ormoc City - Gitahan sa asawa sa usa ka drug suspect ang lima ka dagkong pakete sa shabu ngadto sa Ormoc City Police Office (OCPO) niadtong Biyernes, Mayo 28, 2021. Base sa resulta sa quantitative test, 22 gramos ang timbang sa lima ka pakete ug matag usa ka gramo, naa sa P6,000 kapin base sa Dangerous Drugs Board (DDB) value. Matod sa asawa, iyang nakit-an ang mga druga sa dihang nag-arrange siya sa mga sinina sa iyang bana. Niduol dayon siya sa barangay ug gikuyogan sa OCPO. Nagpasalamat si Police Colonel Ramil Ramirez sa gibuhat sa asawa kay daghan nga kinabuhi ang nasalbar. Giangkon sa asawa nga nalambigit na kaniadto sa illegal nga drugas ang iyang bana apan niundang kini paglingkod ni Presidente Rodrigo Duterte. Nakurat na lang siya nga nadakpan ang iyang bana sa buy-bust. Matod sa Ormoc City Drug Enforcement Unit (CDEU), gikan sa Cebu ang supply sa bana niini ug sugaton ra kini gawas sa Ormoc. Nahimo nga area of operation sa iyang bana ang Ormoc ug usahay maabot siya sa 3rd district ug 5th district sa Leyte. Sa miaging Miyerkules, Mayo 26, 2021, nadakpan sa kapulisan ang bana niini nga si Dante Leoveras, 47, truck driver, taga Margen, Ormoc City ug bayaw sa usa ka kanhi pulitiko sa Ormoc. Nakuhaan og 19 ka pakete sa shabu ang suspek ug nagpositibo sa druga gihang gipaubos sa drug test. Gikasohan na og kalapasan sa Republic Act 9165 ang suspek. (JKDP) This posting includes an audio/video/photo media file: Download Now

Basketball court gi-turnover Posted: 30 May 2021 06:16 AM PDT Bag-o nga basketball court alang sa taga Purok Yellowbell, Barangay Looc sa dakbayan sa Lapu-Lapu, ang bag-o nga gi-turnover ngadto mga molupyo sa dapit human nga kini nahuman pinaagi sa bayanihan sa mga tawo niadtong Biyernes, Mayo 28, 2021. Malipayon ang taga Purok Yellowbell sa ilang bag-o ug sementado na nga basketbolan atol sa pag-turnover ni Kongresista Paz Radaza. Si Radaza migahin sa iyang personal nga pundo alang sa pagsemento sa ilang basketbolan aron adunay magamit ang mga lumulupyo sa maong purok panahon nga tugotan na pagbalik ang pagduwa og basketball. Lakip sa makagamit unya sa basketball court ang nagkalainlain nga activities sa maong purok ug ang kasikbit niining mga purok. Si Looc Barangay Captain Regina Ybañez mihulagway sa malampusong pagpanindot sa ilang basketbolan bunga sa bayanihan sa mga tawo diin ang tanan gayod ang mihatag sa ilang kakugi ug pakigtambayong. Mapasalamaton usab siya sa tabang pinansyal ni Radaza gumikan kay natuman na ang dugay na nga pangandoy sa iyang mga konstituwente. Si Radaza sa iyang bahin mibutyag nga dili mamahimong manindot ang mao nga proyekto kon dili tungod pa sa mga residente. Nagpasalamat usab amg kongresista sa dakong tampo sa mga barangay opisyales ug purok leaders nga nahimong posible nga manindot ang ilang basketball court. "Kamo ang angay nakong pasalamatan kay kon dili tungod sa inyong pagtinabangay ug pagtambayayong, wala kini ang inyong bag-o ug sementado nga basketbolan" matod ni Radaza. Ang pasilidad sa paugnag-sa-kusog sama sa basketball court gipatunhay aron malingaw ang mga batan-ong ug malikay sa druga. (GCM) This posting includes an audio/video/photo media file: Download Now

Basil: China Roces nakahilak Posted: 30 May 2021 06:14 AM PDT Manila – Sa programang "Sikat Noon, Sikat Ngayon" sa EuroTV kauban sila si Throy Catan og Lito de Guzman, nakahilak ang kontrobersiyal nga vlogger nga si China Roces. Kini tungod kay napakyas ang kapulisan sa pagsikop ug pag-serve sa warrant of arrest batok sa iyang kanhi live in partner nga si Tim Sawyer nga amahan sa iyang anak nga si Timothy. Kini kabahin sa iyang gipasakang kasong physical abuse batok kang Tim. Matod ni China, dili lang kini ang iyang gipasakang kaso batok kang Tim, daghan pa kuno. Nakatsikahan ko si China after her program og maong gipasakaan niya og kaso si Tim og physical abuse tungod kay gikulata kuno siya niini. Daghang common friends nila ni Tim ang nagsasabi nga pasayloun na niya kini for the sake sa ilang anak nga si Timothy. Pero gahi ang kasingkasing ni China gusto jud kuno niya nga hatagan og leksiyon si Tim ug mapriso kini. "Oo maraming nagsasabi na patawarin ko na raw alang-alang kang Tim. Pero ano naman ang sasabihin ni Timothy paglaki niya na ang kanyang nanay, kahit masyado nang inagrabyado, walang ginawa at di ipinaglaban ang kanyang sarili? Ilalaban ko ito hanggang dulo," isplikar ni China. Sa nahisgutang episode, guest ni China ang iyang mga friendship nga si Lai Austria nga kaubanan niya kanhi as model og todo suporta kaniya. "Nandito lang kaming mga kaibigan niya kung kinakailangan niya kami, nandito kami anytime for China," sey ni Lai nga kontrobersiyal sad. Nganong kontrobersiyal? Tungod kay siya lang naman ang gipasanginlan as third party sa hiwalayan sa sikat nga mga vloggers nga sila si Toni Fowler og Rob Moya. Sa interview ko kang Lai, niangkon siya nga nangulitawo kaniya kaniadto pa si Rob pero wa niya sugta ug sa dihang na-link kini sa uban, iya kining gi-block. Pero niangkon si Lai (nga matan-aw sa akong Youtube Channel (Timmy Basil) og Dear Tito Timmy Page nga sa kasamtangan, nagde-date kuno sila ni Rob. "Nagde-date lang pero hindi kami," matud niya nga nakakutaw sa akong utok. Pero boyfriend material kuno si Rob. "Pareho kami niyan, pareho kaming madaldal at bastos ang bunganga hahahaha," pag-angkon pa ni Lai. Pero in fairness kay Lai, di naman siya naging bastos sa short interview ko kaniya in fact, she's polite naman. This posting includes an audio/video/photo media file: Download Now

Editoryal: Mobalik sa kinaraan? Posted: 30 May 2021 05:40 AM PDT Hunyo 1 na ugma. Ug ning Lunes nga hinapos sa Mayo, alegre na ang mga tunghaan sa mga tinun-an gikan sa elementarya ngadto sa kolehiyo kaniadto. Apan pag-abot sa pandemiya sa Covid-19 sa 2019, nahitabo ang wa damha nga dakong kausaban ug apektado kaayo ang school year (SY) 2020-2021. Gipatuman ang distance o remote learning ug modular system. Nagkapakapa ang edukasyon human way tino nga pagpangandam labi na sa koneksiyon sa internet. Karong SY 2021-2022, unsay nagpaabot sa edukasyon? Mabalik na kaha sa tradisyonal nga klase? Daghang isyu ang nitumaw. Si Commission on Higher Education (Ched) chair Prospero de Vera III niingon nga ang pagbalik sa karaan dakong usik sa napundar nang sistema, pagtuon, ug kalamboan sa teknolohiya. Matod ni de Vera, ang Ched nisagop na sa 'flexible learning' system diin kombinasyon sa digital ug non-digital technology. Gipasabot ni de Vera nga ang tunghaan mas gawasnon sa pagpili sa ilang pamaagi subay sa ilang kapasidad sa paghatag sa kalidad nga edukasyon. Apan ang National Union of Students of the Philippines Cebu (NUSP) Cebu niinsister nga ang 'distance learning is against the interest of the Filipino youth." Nagduso ang NUSP-Cebu sa hinayhinay nga pagbalik sa karaang matang sa klase nga ilang gitawag nga mas epektibo sa pagtuon ug dili mahal sa mga tinun-an. Ang Department of Education (DepEd) unang namahayag nga ang pag-abli sa klase sa elementarya ug sekondarya ning tuiga gikatakda karong Agusto 23. Gilauman nga mabalik ang face to face classes labi na sa mga dapit nga walay grabe nga transmisyon sa kaso sa Covid-19. Hunyo na apan sa pamahayag sa mga opisyal, wala pay tino kon ang sistema ang atong sagupon sa edukasyon. Daghang maayong ideya ang mitumaw. Ikaw, unsay imong panahom? Apan kon unsa man ang sagupon sa awtoridad sa edukasyon, ato kini sagupon alang sa kahiusahan sa nasod. This posting includes an audio/video/photo media file: Download Now

Barrita: Mga kapitan magtingkagol sa prisohan? Posted: 30 May 2021 05:40 AM PDT Sumala sa ulahing survey sa Social Weather Stations (SWS), 79 porsiyento sa mga Pilipino nagtuo nga kadtong nakalapas sa health protocols maoy hinungdan sa pagkatap sa Covid-19. Apan onse porsiyento niingon nga ang hinungdan mao ang kakuwang sa pangandam sa gobyerno. Apan kinsay mabuthan niining paglapas sa health protocols? Si Presidente Rodrigo Duterte nimando sa kapulisan nga dakpon kadtong mga barangay kapitan nga wa makapatuman sa health protocols ug wa makabadlong sa mass gatherings sa ilang barangay. Ipakiha ang mga barangay kapitan sa kasong dereliction of duty. Ang tibuok Pilipinas adunay 42,046 ka barangays. Pila kaha ka mga kapitan ang magtingkagol sa bilangguan? * * * Ang League of Barangays in the Philippines (LBP) niawhag sa gobyerno nasyonal nga hatagan og due process ang mga kapitan nga masikop tungod sa kapakyas sa pagpugong sa mass gatherings sa ilang mga barangay. Si LBP president ug Barangay Poblacion, Tacloban City chair Eden Chua niingon nga nipaluyo siya sa direktiba sa pangulo apan nihangyo siya sa mga tinugyanan sa balaod nga hatagan sa "fair treatment" ang ilang mga sakop. Mahimo silang sikupon kon nitambong sila sa mass gathering nga nahimong usa ka "super spreader event," matod ni Chua. Masikop gyud kay matawag man nga "caught in the act" kon maaktohan sa kapulisan. Unsoan pagka-caught in the act kon wa sila diha? * * * Nipasalig hinuon ang Philippine National Police (PNP) nga ipatigbabaw nila ang katungod sa katawhan, lakip na sa mga barangay kapitan, nga masikop tungod sa quarantine violations. Gipasalig kini ni Gen. Guillermo Eleazar, hepe sa PNP, human mopahimangno ang Commission on Human Rights (CHR) sa kapulisan nga tahuron ang tawhanong katungod ug ipatigbabaw ang balaod. Bisan girepaso pa sa Department of the Interior and Local Government (DILG) ang lagda nga gisuwat sa Department of Justice (DOJ) sa pagpatuman sa mando sa pangulo, ang PNP adunay internal mechanism nga gisubay sa pagpanalipod sa katungod. This posting includes an audio/video/photo media file: Download Now

Nadela: Ang kalimot way gahum Posted: 30 May 2021 05:37 AM PDT Ang akong higala nga manglitsonay nagkarakara kay iyang cellphone nalimtan. Si Jimmy Duhaylungsod na-busy sa daghang order sa miaging adlaw. Iyang cellphone nagpakapaka sa daghang tawag samtang nagputos siya sa litson nga i-deliver. Naunsa bang pagka unsaa nga sa dihang nag-deliver na siya, diha pa siya mahinumdum nga iyang nabiyaan ang iyang cellphone didto sa litsonan. Labihan ang iyang kabalaka kay halos tanan niyang transaksiyon sa negosyong litson tua sa nahabilin nga cellphone wa pay labot sa mga numero sa supplier og baboy, uling, karton, manila paper ug lamas. Labaw sa tanan ang numero sa mga utangan naka phonebook didto. Salamat kay sa iyang pagbalik didto ra gihapon ang cellphone sa lingkoranan sa motorsiklo nga giparada kilid sa iyang litsonan. Daw nahuwasan siya sa grabing hilanat. Pag-abli pa gyud niya sa cellphone, nag-ung ong didto ang tulo ka order gikan sa iyang mga suki. Dili ni bag-o alang kang Jimmy kay nahitabo na ni kaniadto. Sa uban apil nako, makadaghan na sab makalimot. Ang pait kay nadayon wa na igkita ang nahabilin nga cellphone. Ang rason sama sa nahitabo ni Jimmy, nakalimot, kay matod pa ang kalimot way gahum. May paagi ba nga matambalan kining pagkalimtanon sa tawo? Kon ibase sa siyensiya, duna. Naay gipangtumar ang uban labi na sa mga edad edaran aron malikayan ang pagkalimtanon. Ambot og tinuod ba ni. Pero kon kabahin na gyud sa kinabuhi sa tawo nga makalimot, aw di na ta mahibulong. Posibling nakalimot nga wa gyud tuyoa. Apan tinuyo na gani, ang paghikalimot sama sa ubang politiko, nga dali kaayong makalimot sa ilang gipangsaad panahon sa kampaniya, lain na dab na nga estorya. Kon atong balihon, kay ang mga botante maoy nakalimot labaw nga makapaduda. Ang akong buot ipasabot nga bahala na og makalimot ang mga politiko, basta kitang katawhan di makalimot sa mga bati nilang binuhatan. Gihisgutan ko ni kay di na gyud kapugngan. Hilabihan nang bukala ang kaldero sa politika. Unya ang mga pangalan ra ba nga nitumaw, ang uban nila mga limtanon. Sama sa mga ayuda ning panahon sa pandemiya. Samot na sa pagsugod ning kalibutanon nga problema sa panglawas sa miaging tuig. Ang mga ayuda hilabihang danguga. Ang ubang politiko nakalimot sa ilang mga saad nga sa kanunay sila magbaton sa pagka makiangayon. Apan ang resulta duna silay mga pinalabi. Manghatag man gani, ang bugas puwerte sab nga abhonga. Sa ayudang pinansiyal, gahi pa sa kahoy nga magkuno. Apan padiskursuha panahon sa kampanya, magbuwa ang baba sa mga pasalig nga andam lagi nga motabang sa panahon sa kalisdanan. Puwera lang sa mga politiko nga nagtuman gyud sa ilang trabaho. Mga saad panahon sa kampanya wala ilubong sa kalimot. Apan kon ang katawhan magpabiling limtanon panahon sa eleksiyon, ang mga politiko nga nanapi, namintaha ug nagpabaya sa ilang obligasyon. This posting includes an audio/video/photo media file: Download Now

Talk to Papa Joe: Mabdos hadlok sa Covid Posted: 30 May 2021 05:32 AM PDT Dear Papa Joe, Maayong adlaw nimo ug sa tanang nagsunod sa imong column. Ako diay si Caroline, 35 years old, usa ka minyo. Dugay na kaayo ming gusto magkaanak sa akong bana apan nganong karon pa ko namabdos, giatol pa gyud nga pandemic. Daghan kaayo kog gikabalak-an. Nahadlok ko sa Covid, what if simbako matakdan ko samtang nagbalikbalik sa clinic para magpa-check-up. Daghan pa gyud kaayog laboratory tests. Nakabalita ra ba ko nga dako kuno kaayog gasto ang manganak karon labina og mag-positive. Simbako ipalayo lang tawn matakdan ko anang Covid! Nahadlok kaayo ko. Usahay dili na gani ko makatulog, stress kaayo ko karon, Papa Joe. Tambagi ko palihug. CAROLINE Dear Caroline, Dili raman kay ikaw ray nagmabdos rong panahon sa pandemic. Daghan man kaayong nanganak sa panahon pa gani nga kusog pa kaayo ang takod. Maayo gani karon kay gamay na man lang ang gibalita nga infected ug nagsige na man og pahigayon ang gobyerno nato og pamakuna sa Covid vaccines. Karon ang time nga dili ka angay maghadlok-hadlok. Dili ka angay mag stress-stress kay duna kay bata sa tiyan nga maoy unang maapektohan. Natural lang mahadlok apan unsa may mahimo nimo naa naman na. Mao nay giingon nga laban lang. Ang usa sa pinakamaayo nimong buhaton mao ang pag-ampo, tawag sa Ginuo ug isalig niya ang tanan kay way imposibe Niya. Siya lang ang bugtong kadaganan nato karong panahona. Be happy tungod kay naa na kay umaabot nga blessing. Ampingi ang imong kaugalingon ug tumana ang gisulti sa imong doctor. PAPA JOE (Alang sa mga gustong magpadala sa ilang problema, pls. email it to papajoesuperb@gmail.com) This posting includes an audio/video/photo media file: Download Now

Vic misuway pagkumbensir ni Pingris nga di una moretiro Posted: 30 May 2021 05:32 AM PDT Gibutyag ni Marc Pingris nga adunay higayon nga nagduhaduha siya pagretiro gumikan sa sugyot sa iyang father-in-law nga mao ang sikat nga komedyanteng si Vic Sotto. Matod ni Pingris nga gikumbensir siya sa gitawag og "Bossing" sa showbiz nga dili una moretiro gumikan sa rason nga kaya pa niining mokombati og insakto bisan nag-edad na siya og 39. "Actually nung sinabi ko 'Dad, baka mag-retire na ako kasi kailangan kong asikasuhin yung business namin ni Danica, sabi niya, 'No, huwag pa. Kaya mo pa," batbat ni Pingris sa interbyu sa Spin.ph. Hinuon gitataw ni Pingris nga gituman lang gihapon niya kon unsa'y naa sa iyang kasingkasing. "Sabi ko, 'Dad, kailangan ko kasing mamili. Short term or long term. Alam ninyo naman ang panahon ngayon, kailangan kong mag-focus sa isang bagay," pasabot ni Pingris. "Pero sabi niya, 'basta ako, gusto ko maglaro ka pa." (ESL) This posting includes an audio/video/photo media file: Download Now

Marcial mag-training og balik sa US Posted: 30 May 2021 05:32 AM PDT Human siya nakabira og bronze medal sa ASBC Asian Elite Men's and Women's Boxing Championships sa Dubai, ang Olympic-bound Pinoy boxer nga si Eumir Marcial mobalik sa Amerika aron ipadayon ang iyang hugot nga pagbansaybansay. Ning higayuna, si Marcial mag-training sa United States Olympic Boxing Training Center sa Colorado Springs alang sa katapusang tipik sa iyang pagpangandam alang sa umaabot nga Tokyo Olympics. Ang iyang pagsalmot sa kompetisyon sa Dubai maoy labing unang amateur event nga naapilan ni Marcial gikan sa Asia-Oceania Olympic qualifiers niadtong Marso, 2020. Niadtong Disyembre, 2020, nasubhan si Marcial isip professional boxer diin midaog siya pinaagi sa desisyon batok kang American Andrew Whitfield. Sa Dubai event, si Marcial gisiruhan sa Uzbekistan fighter nga si Saidjamshid Jafarov,5-0, sa semi-finals. Nanghinaot si Ricky Vargas, presidente sa Association of Boxing Alliances of the Philippines (ABAP), ang kapakyasan ni Marcial paglangkat og gold medal sa Dubai magsilbe unta niyang leksyon. "We are of course saddened by the loss of Eumir Marcial, but that's boxing. Adjustments will have to be made and there is some time left," pamahayag ni Vargas nga napatik sa www.abs-cbnnews.com. "That said, I think this should be a wake up call for all concerned, not just to Marcial." Malaumon si Vargas nga mapahimsulan ni Marcial ang iyang pag-training sa Amerika hilabi na kay wala kini nakaapil sa training sa Philippine national team sa Thailand. "We are happy that Marcial participated in this tournament under the aegis of ABAP and has committed to train under our coaches' mentorship in this crucial period. This will address the kind of challenge he will face in Tokyo," dugang ni Vargas. "We have arranged for Marcial to participate in a multi-nation training camp in Colorado Springs, the home of Olympic boxing in the USA. This is the milieu that he needs to be training under." (ESL) This posting includes an audio/video/photo media file: Download Now

Bolts nahuman na sa bubble training sa Laoag Posted: 30 May 2021 04:49 AM PDT Ang Meralco Bolts maoy labing unang nakahuman sa ilang bubble training sa Laoag, Ilocos Norte sa tanang teams sa Philippine Basketball Association (PBA) ug sila sab ang labing unang nakahuman. Kagahapon, Mayo 30, 2021, nitiklop na ang training sa Bolts alang sa ilang kampanya sa umaabot nga 46th season sa PBA. "We head home stronger and more prepared for the return of the PBA," pamahayag sa Bolts sa ilang official Facebook page. Ang Bolts motiwas og training sa Metro Manila. Nahilakip sila sa tulo ka teams nga nagpahigayon og bubble training sa Ilocos Norte. (ESL) This posting includes an audio/video/photo media file: Download Now

You are subscribed to email updates from https://www.sunstar.com.ph/. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States