https://www.sunstar.com.ph/

---

• Rose, Knicks mipatugpa sa Hawks sa Game Two
• Jazz mipakurat sa Grizzlies sa Game Two; series tabla na
• P70 milyunes tinuig nga income sa Cebu City sa Carbon gikan sa C2W
• Westbrook na-injured, gilabay og pop corn; Wizards giusaban sa Sixers
• Pag-apply pagkapulis online na
• German national namatay sa bangga; misis angol
• Officials: EO ni Gwen way sayop
• PLD mibayad sa Dole sa multang P100K
• Editoryal: Unsay sayop?
• Nalzaro: Daghan ang dili
• Barrita: Teritoryo sa Pilipinas
• Tambagi ko Noy Kulas: Kagahapon
• 1M ka pirma pagkombinser ni Garcia pagka senador
• Pagpasabot sa COA nakalangay sa ganti
• Dan sa Sambag 1, 2 palapdan na
• Pfizer vaccines sa Cebu City mahurot karon
• Nanglimpiyo nakuryentihan, DOA sa ospital
• Jazz nagpanikad nga mobawos sa Grizzlies; Mitchell paduwaon na
• Sugilanon: Tawag sa yutang gimahal
• Balak: Tukaw
• Balak: Sa bukid sa Boljoon
• 'Tol, maraming salamat talaga'

Rose, Knicks mipatugpa sa Hawks sa Game Two Posted: 27 May 2021 12:04 AM PDT Mipupo og 27 puntos si Derrick Rose aron pangulohan ang New York Knicks, 101-92, batok sa Atlanta Hawks aron tablahon ang ilang playoff series, 1-1, kaganihang buntag, Huwebes, Mayo 27, 2021. Si Julius Randle kinsa uga kaayo nga nakasugod sa duwa, nanginit nagsugod og panginit sa third quarter aron ayudahan si Rose sa opensa. Ang most improve player awardee igo ang mitali dos puntos sa first half sa dihang ang Knicks nabiyaan og 13 puntos sa halftime. Apan sa third quarter mipugnit siya og 11 puntos ug ang Knicks mao nay nagdala sa manubela. Siya mitapos sa duwa nga may 15 puntos nga gilamasan og 12 ka rebounds bisan tuod di maayo kaniya ang kagabhion. Ang Game 3 adto na duwaon sa Atlanta diin tugotan na mga mapuno ang arena sa mga motan-aw. (JBM) This posting includes an audio/video/photo media file: Download Now

Jazz mipakurat sa Grizzlies sa Game Two; series tabla na Posted: 26 May 2021 11:46 PM PDT Gipamatuod ni Donovan Mitchell nga hingpit nang naalim ang iyang angol sa tikod pinaagi sa pagpangulo sa Utah Jazz ngadto sa 141-129 nga kadaugan batok sa Memphis Grizzlies sa Game Two sa Western Conference playoffs. Si Mitchell kansang playing time gilimitahan lang ngadto sa 26 minutos, mipupo og 25 puntos nga may lima ka tres samtang si Rudy Gobert midugang og 21 puntos, 13 ka rebounds ug upat ka blocks alang sa Jazz kinsa mitabla sa serya, 1-1. Ang kadaugan nagtabon sa makasaysayon nga performance ni Ja Morant kinsa mipakatap og 47 puntos alang sa Grizzlies. Si Morant maoy unang player sa NBA nga naka-score og 71 puntos sa iyang unang duha ka playoff games. Duha ka hansak ni Gobert sa iyang pick-and-roll maoy midayandayan sa 10-0 run sa third quarter nga maoy nagbingat og balik sa ilang labaw, 110-97 nga giduslitan sa tres ni Mitchell. Sa Game One diin napildi ang Jazz, si Mitchell andam na gyud unta nga moduwa, apan sa kalit lang, gidid-an kini sa iyang doktor sa tinguha nga mahingpit ang pagpaalim niini. Motapon ang serya sa korte sa Memphis alang sa Game 3. (JBM) This posting includes an audio/video/photo media file: Download Now

P70 milyunes tinuig nga income sa Cebu City sa Carbon gikan sa C2W Posted: 26 May 2021 11:25 PM PDT SUGOD karong tuiga, ang Siyudad sa Sugbo magdawatan na og Annual Guaranteed Payments gikan sa Cebu2World Development, Inc. ("C2W"), subsidiary sa Megawide Construction Corporation, nga mopalambo sa merkado publiko sa Carbon. Ang AGP tipik sa gisaad sa C2W ngadto sa Cebu City ubos sa joint-venture agreement. Niini, seguradong ang Siyudad sa Sugbo magdawatan og mas taas nga kita gikan sa Carbon Public Market nga moabot og P70 milyunes. "Through the AGP, the city will receive a guaranteed annual net income of P50 million from C2W, subject to 10% escalation every five years - significantly more than what it has previously received from Carbon Market," matod ni Louie Ferrer, chairman sa C2W. Dugang P20 milyunes gikan sa business ug propety taxes ang madawat sa Siyudad bisan padayon pang gitrabaho ang modernisasyon sa merkado publiko. "Apart from the AGP, the LGU will also receive an estimated P20 million in business and property taxes yearly. This brings the city's annual guaranteed income to about P70 million from the project," dugang niya. Niini, gitriple na ang tinuig nga kita sa Siyudad sa Sugbo gikan sa Carbon market. Base sa labing uwahi nga data gikan sa Siyudad, ug gihiusang data sa merkado sa siyudad gikan sa Commission on Audit (COA), ang Cebu City dunay limpyong kita nga P21 milyunes gikan sa Carbon market sa 2019, labing dako sa iyang kasaysayan. Sa nangaging unom ka mga tuig, ang Carbon nikita og average gross revenue nga P27 milyunes matag tuig, apan kuhaan pa kini sa operating expenses. Karong tuiga, ang Siyudad sa Sugbo padayong direktang mangolekta sa market fees, wa pay labot sa unang AGP nga P5 milyunes gikan sa C2W. Niini, ang Siyudad nagsugod na sa iyang kita gikan sa C2W bisan kon ang Phase 1 sa proyekto sa Carbon ilusad pa. Ang AGP magtubo matag tuig tukma sa gidak-on sa luna nga nga gipalambo sa C2W kansang tibuok kantidad bayran gikan sa ikalimang tuig ngadto sa umaabot. "It was during the term of Mayor Labella that Carbon reached its highest contributions to date of P21 million in 2019. With these guaranteed annual payments, Cebu City will be earning more than three times its highest previous earnings from Carbon. This is a big win for the City and the people of Cebu," dugang ni Ferrer. Matod ni Ferrer nga kini nagpakita nga ang proyekto naghatag og benipisyo sa Siyudad. Siya niingon nga bisan ang labing yano nga tigkurmata sa Carbon makabenipisyo pa niini. "On top of the income, the project will also provide much sought-after infrastructure improvements in the district, which will further boost the business not just of existing vendors, business owners, even the karumateros, but the city as a whole. This investment in Carbon – its people, its infrastructure, will have a multiplier effect on the city's economy after this pandemic and beyond," matod ni Ferrer. Ang kompaniya mobubo og kinatibuk-ang P5.5 bilyunes nga puhonan alang sa 50-ka tuig nga concession. (REV, gikan sa PR) This posting includes an audio/video/photo media file: Download Now

Westbrook na-injured, gilabay og pop corn; Wizards giusaban sa Sixers Posted: 26 May 2021 11:23 PM PDT Pildi na, na-injured pa, gilabay pa gyud og pop corn. Kini maoy nahitabo ni Russel Westbrook sa Game Two sa Eastern Conference best-of-seven playoffs batok sa host Philadelphia Sixers kaganiha Huwebes, Mayo 27, 2021. Sa sayong bahin sa fourth quarter, si Westbrook maayong pagkatumba sa sawog human gikabangga niini si Furkan Korkmaz. Naantimanohan sa hitabo, ang hari sa triple-double mibarog ug nagtakingking nga naglakaw samtang giayudahan sa security personnel paingon sa dugout. Apan samtang naglakaw kini, usa ka dumadapig ang milabay kaniya og popcorn nga gikasagmuyo usab sa pipila ka mga players, usa na niini si LeBron James. "I wouldn't come up to me on the street and throw popcorn on my head, because you know what happens. ... In these arenas, you gotta start protecting the players. We'll see what the NBA does,"matod ni Westbrook. Si James miawhag sa mga opisyal sa Philadelphia sa pag-ila kon si kinsa kadtong milabay og pop corn ni Westbrook. Sa iyang Twitter account, si James nagkanayon "By the way WE AS THE PLAYERS wanna see who threw that popcorn on Russ while he was leaving the game tonight with a injury!! There's cameras all over arenas so there's no excuse!" Ang presidente sa business operation sa Wells Fargo Center nga si Valerie Camillo mikondinar sa nahitabo. "This was classless, unacceptable behavior, and we're not going to tolerate it at Wells Fargo Center," matod ni Camillo. Sa maong duwa, ang Sixers mipukan sa Washington Wizards, 120-95, aron sakmiton ang 2-0 nga bintaha sa series. Ang serya motapon sa korte sa Washington alang sa Game 3. Giduhaduhaan pa kon makaduwa ba si Westbrook kinsa nagpingkit sa kasakit sa iyang tikod. "We'll see," ni Westbrook pa. "Hurt it twice in a short amount of time. We'll see what happens." Si Ben Simmons ug Joel Embiid mitali og 22 puntos matag usa samtang midugang si Tobia Harris ug 19 alang sa top-seeded Sixers. Gawas sa iyang puntos, si Simons milangkat usab og siyam ka rebounds ug walo ka assists. Si Bradley Beal nangulo sa Washington nga may 33 puntos samtang 10 puntos ug 11 ka assists ra ang nahimo ni Westbrook. (JBM) This posting includes an audio/video/photo media file: Download Now

Pag-apply pagkapulis online na Posted: 26 May 2021 10:18 PM PDT PAG-APPLY pagka pulis gipaagi na sa PNP sa online. Tumong niini mao ang pagwagtang sa padrino system ug wa nay face-to-face sa pasiunang tikang sa pag-apply ug di na mahago pa ang mga aplikante sa laing lugar sa pagduaw sa Police Regional Office (PRO) 7 sa Dakbayan sa Sugbo taliwa sa hulga sa coronavirus pandemic. Mao kini ang gipasabot ni PRO 7 Chief Brigadier General Ronnie Montejo atol sa usa ka press conference sa Huwebes, Mayo 27, 2021, kalabot sa bag-ong sistema. Matod ni Montejo nga ang aplikante mosulod lang sa website sa Philippine National Police, diin human og fill-up sa aplikante sa online application form, hatagan siya og QR code. "Way pangan, way nawong, QR code lang para ang mahitabo wala na tong padrino padrino," matod ni Montejo. Si Montejo niingon nga kon makapasar ang usa ka aplikante sa gitakdang body mass index (BMI), pahibaw-on siya. Maghuwat ang aplikante alang sa usa ka e-mail nga magtakda na usab sa sunod nga tikang sa proseso. Si Montejo niingon nga karong tuiga, mga 600-650 ang quota sa PRO 7 sa pagdawat og mga aplikante, diin duna nay labing minos 200 na ka mga kwalipikadong aplikante ang nakapasar. Laing 400 ka mga aplikante ang gihuwat pa karon sa PRO 7. Si Montejo niingon nga ning bag-ong mga pamaagi sa PNP sa pagdawat og aplikante sa pagkapulis, kadto rang labing kwalipikado ug labing takus ang madawat. (REV) This posting includes an audio/video/photo media file: Download Now

German national namatay sa bangga; misis angol Posted: 26 May 2021 07:47 PM PDT German national namatay samtang naangol ang iyang asawa human nabangga makatulo ang ilang awto sa Miyerkules sa alas 6:20 sa gabii sa Barangay Malingin, Daanbantayan, amihanang Sugbo. Patay nang niabot sa Daanbantayan District Hospital si Albert Faessler, 52, taga sityo Tabok, Barangay Tapilon Daanbantayan samtang angol si Verona Gay Lobitos Faessler, 38. Ang duha pulos mga online nga magtutudlo. Sa imbestigasyon sa Daanbantayan police, ang magtiayong Faessler gikan sa Giuwanon, Tabogon ug padung na manguli. Matod sa saksing si Rodrigo Pepito, 63, nasaylo sa lane ang Mercedes Benz nga awtong gimaneho ni Albert. Nabangga kini sa duha ka mga puthaw nga poste sa sugang dagitabnon dayon ngadto sa kongkretong haligi sa Malingin Health Unit. Ang magtiayong Faessler nakaangkon og grabeng mga samad sa kalawasan ug daling gidala sa Municipal Disaster Risk Reduction and Management Office (MDRRMO) Rescue Unit sa Daanbantayan District Hospital. Apan patay na si Albert pag-abot sa ospital samtang si Verona Gay gibalhin sa tambalanan sa lungsod sa Medellin. (GPL) This posting includes an audio/video/photo media file: Download Now

Officials: EO ni Gwen way sayop Posted: 26 May 2021 06:28 AM PDT Gipaluyohan sa Cebu City, Lapu-Lapu City ug health officials sa tulo ka mga lalawigan sa Central Visayas ang executive order ni Cebu Governor Gwendolyn Garcia nga nagpasayon sa pagpauli sa overseas Filipino workers (OFW) taliwa sa pagsaway sa pipila ka national officials. Kini human sa gipahigayon nga meeting tali sa mga representante sa Department of Health (DOH) gikan sa Negros Oriental, Bohol ug Siquijor nga gipahigayon sa Cebu City Emergency Operations Center sa Miyerkules, Mayo 26, 2021. Si Konsehal Joel Garganera, deputy chief implementer sa EOC, nagkanayon nga ang mga OFW gikan sa laing nasod kasagaran nakakumpleto na sa ilang duha ka dose sa bakuna. Sa ilang pag-abot sa Mactan Cebu International Airport aduna pa silay ipakita nga negative result sa RT-PCR test. Di pa ni mao. Dugang sa konsehal nga inig abot nila sa airport, ipaubos na usab sila sa laing swab test ug papuy-on og hotel. Kadtong negative ang resulta paglabay sa usa o duha ka adlaw makapauli sa ilang tagsa-tagsa ka dapit, apan paglabay sa pito ka adlaw, i-swab na usab sila sa ilang LGU. "Most of these arriving passengers na innoculated na, na vaccinated na. Then 72 hours before departure, naa na silay negative PCR test results and upon arrival, mag swab test pa gyud then stay in an accredited hotel. Then out if negative and further isolate if positive. Dili pa gyud na mao, after 5-7 days i-swab og balik sa respective LGU's. Asa man dapita naka violate ang EO sa governor. This is not just practical, but medically compliant," padayag ni Garganera. Ang ipaubos sa quarantine sulod sa 14 ka adlaw kadto rang masuta nga nagpositibo sa virus. Kini nga mga protocol nga gihisgutan ni Garcia nalatid sa iyang Executive Order No. 17. Gawas nga maluagan ang mga OFW ug ROF, di sab madak-an sa gasto ang kagamhanan. "Moingon sila didto sa Manila maka-infect gihapon na. Aw, di nalang diay ta motuo sa resulta kon negative? Then why are we testing di man diay ta motuo? You asked us to trust the RT-PCR. You must also trust the RT-PCR nga kon negative na siya paulion na nimo. That is good for the next 72 hours, isn't it? Pauli-on largo sa ilang probinsya. Maka-infect diay na?" padayag ni Garcia. Ang suporta sa mga health official nitumaw human masayri ni Garcia nga duha ka national officials nagplano nga mopasaka og kaso kang Garcia gumikan sa giingong wala pagsunod sa guidelines sa Inter-Agency Task Force (IATF) nga maoy gipatuman SA tibuok nasod. DI USBON Pabiling suportado ni Lapu-Lapu City Mayor Junard Chan ang EO ni Garcia kalabot sa swab testing sa mga OFW ug ROF. Matod ni Chan nga sa iyang bahin wala gitawag ang iyang atensyon kalabot sa iyang protocol nga gipatuman sa dakbayan nga susama sa Probinsya sa Sugbo. Wa usab siya makadawat og mensahe sa bisan kinsa nga opisyal kalabot sa nasayran ni Garcia. Alang sa mayor, insakto ra ang maong protocol sanglit mag-isolate man gihapon sa panimalay ang usa ka ROF o OFW sulod sa pito ka adlaw sa higayon nga mag negatibo sila sa swab test inig abot sa tugpahanan. Aron dili mahitabo nga adunay maglakawlakaw nga mga OFW ug ROF, ipasiguro niya nga ipang check up sila sa mga barangay health workers. This posting includes an audio/video/photo media file: Download Now

PLD mibayad sa Dole sa multang P100K Posted: 26 May 2021 06:27 AM PDT Gibayran na sa PLD Construction ang P100,000 nga penalty nga gipahamtang sa Department of Labor and Employment (Dole) kanila human malusno ang usa ka bahin sa yuta sa ilang construction site sa Barangay Apas, Dakbayan sa Sugbo niadtong Sabado, Mayo 22, 2021. Usa ka trabahante ang namatay samtang laing usa ang naangol. Motuman usab ang PLD sa tanang mga polisiya ug rekisitos nga ipatuman sa Dole ug Office of the Building Official (OBO) sa Dakbayan sa Sugbo alang sa pagpadayon unya sa construction. "We have already settled the P100,000 penalty imposed by Dole as we share their concern for the plight of our other workers who rely on their daily income from our present project. We fervently hope that we can resume operations soon," matod sa PLD Construction sa ilang opisyal nga pamahayag. Nisaad usab sila nga di nila pakyason ang ilang saad sa pagtabang sa apektadong mga pamilya sa ilang duha ka mga trabahante. Ang PLD niluwat ning pamahayag human si Dole 7 Director Salome Siaton nikompirmar nga nisaad ang kompaniya sa pag-abag sa apektadong mga pamilya. Gitataw usab ni Siaton nga ang kompaniya di makapadayon sa pagkawot kon di sila maka-submit sa departamento og comprehensive excavation plan, job hazard analysis ug signature alang sa soil protection design. (JOB, REV) This posting includes an audio/video/photo media file: Download Now

Editoryal: Unsay sayop? Posted: 26 May 2021 05:43 AM PDT Hapit na mag-usa ka tuig sukad ang Probinsya sa Sugbo, gawas sa mga lungsod sa Consolacion ug Minglanilla ingon man Dakbayan sa Talisay, nga gipaubos sa modified general community quarantine. Niadtong Hulyo 2020 dihang ang Probinsya nagsugod sa modified general community quarantine (MGCQ). Bisan tuod nag-anam kadaghan ang mga lungsod ug siyudad ubos sa Lalawigan nga naigo sa coronavirus disease (Covid-19), napugngan ang pagsulbong sa mga kaso hinungdan nga nagpabilin ang MGCQ status sa Lalawigan. Samtang ang mga Siyudad sa Sugbo, Lapu-Lapu ug Mandaue nagkapuliki og panagang sa mga kaso sa Covid-19, gilusad ni Gobernador Gwendolyn Garcia ang pagbukas sa turismo sa pipila ka mga dapit sa southern Cebu. Sunodsunod na niya kining gihimo sa ubang mga tourism spot sa lalawigan. Ning nakalabay nga mga buwan, ang Metro Manila ug kanait nga mga lalawigan nakasinati og grabeng pagsulbong sa mga kaso sa Covid-19. Mao kini ang nahitabo sa tri-cities sa Sugbo, apan napugngan ra. Ang mga desisyon ni Garcia nagpakita nga epektibo sa paghinayhinay og balik sa pagbangon sa ekonomiya taliwa gihapon sa hulga sa Covid-19. Siya niingon nga magkat-on ang mga Sugboanon sa pagpuyo ug manginabuhi taliwa sa hulga sa kagaw. Tuod man, daghan nang resorts sa lalawigan ang namukas ug hinayhinay nang mibaha ang lokal nga mga turista nga nagpahimus sa barato kaayong presyo. Ning bag-ohay lang, si Garcia mipatuman sa polisiya nga ipailawom sa RT-PCR test ang manguli nga overseas Filipino worker ug returning overseas Filipinos. Human makagawas ang negative test result, makauli na, apan mopailawom gihapon sa swab test human sa ikapitong adlaw sa home quarantine. Tumong ani nga di mahurot ang mga lawak sa hotels ug di madak-an sa gasto ang nasudnong kagamhanan. Karon, unsay diay nakasayop aning polisiya ni Garcia nga giplano mang ikiha siya? This posting includes an audio/video/photo media file: Download Now

Nalzaro: Daghan ang dili Posted: 26 May 2021 05:43 AM PDT Basin pa sa subsob karon nga vaccination program sa nagkalain-laing lugar sa nasud, daghan diay gihapon ang nagdumili sa pagpabakuna batok sa Covid-19. Base kini sa survey sa Social Weather Station (SWS) nga gipahigayon niadtong Abril 28 hangtod sa May 2, 2021 nga gipagawas lang niadtong Mayo 20. Sa maong survey, nasuta nga 32 porsiyento lang ang gustong magpabakuna bisan kon libre nga ihatag ngadto kanila. Buot ipasabot nga tulo lang sa napulo ka mga Filipino ang gustong magpabakuna. Daghang hamtong nga mga Filipino, mga 33 porsiyento ang dili gustong magpabakuna ug 35 per cent ang way klarong baruganan. Ang survey gipahigayon pinaagi sa 1,200 ka mga respondents o ang mga tawo nga gipangutana sa tibuok nasud. Ang percentage niadtong gustong magpabakuna, taas sa Metro Manila nga adunay 41 per cent, dayon sa Mindanao nga adunay 34 per cent ug sa Visayas adunay 32 percent samtang 28 percent sa ubang bahin sa Luzon. Ang kasagaran nga rason nganong dili sila magpabakuna mao nga nahadlok sila sa epekto ug dili epektibo ang mga bakuna; mahadlok sila nga mamatay kay nakadungog silang adunay nangamatay; wala silay salig sa bakuna; aduna silay sakit ug tiguwang na sila; wala kuno silay sakit ug himsog sila; dili lang gyud sila gusto ug ang uban wala mohatag og rason. Kasagaran sa magpabakuna mao ang mga college graduate, dayon high school graduate ug kadtong wala makagraduwar. Siguro kining mga tawhana nga nagdumili kuwang lang sa pagpasabot ug impormasyon kabahin sa mga benipisyo nga makuha sa pagpabakuna. Sila maoy angay nga kampanyahan sa kagamhanan aron pagkombensir sa mga tawo nga magpabakuna. Ang kahadlok ug kabalaka mao ang nag-unang rason nga magdumili ang ubang mga tawo nga magpabakuna. Bisan sa mga gamhanan ug datung mga nasud, mao gihapon kini ang problema sama sa Estados Unidos. Mao kini ang hinungdan nga ang ilang kagamhanan mihatag og bisan unsang insentibo ngadto sa katawhan aron maengganyo ang katawhan sa pagpabakuna. Mao nang dinhi sa ato, angay nga tratahon natog maayo ang mga tawo nga gustong magpabakuna. Dili nato balibaran kon naa sa vaccination centers ug kon puwede, hakuton. This posting includes an audio/video/photo media file: Download Now

Barrita: Teritoryo sa Pilipinas Posted: 26 May 2021 05:43 AM PDT Sa Miss Universe pageant nga gipahigayon sa Manila niadtong 1994, ang host nangutana sa kandidata sa Pilipinas, si Charlene Gonzales, kon pila gyud ka mga isla ang naglangkob sa Pilipinas. Gitubag ni Gonzales ang maong pangutana sa laing pangutana, "High tide or low tide?" Ang kantalita nga tubag ni Gonzales nakapakatawa sa mga nanan-aw ug napagya sa tibuok Pilipinas. Kinsa ba tuod ang nag-ihap sa mga isla sa Pilipinas? Ang atong nahibaw-an managlahi. Dunay moingon nga 7,100 ka mga isla. Duna say moingon nga moabot sa 7,640 ka mga isla. Sakto ang pangutana ni Gonzales kon taub ba o hunas. Kay dunay mga isla nga makita lang kon mohunas apan di na makita kon motaub. Ang uban gikuykoy pa gyud ang bas maong nawagtang. Wa sab ipha ang mga isla sa Pilipinas sa nagsuwat sa 1987 Constitution. Ang Article I (National Territory) niini nagkanayon, "The national territory comprises the Philippine archipelago, with all the islands and waters embraced therein, and all other territories over which the Philippines has sovereignty or jurisdiction, consisting of its terrestrial, fluvial and aerial domains, including its territorial sea, the seabed, the subsoil, the insular shelves, and other submarine areas. The waters around, between, and connecting the islands of the archipelago, regardless of their breadth and dimensions, form part of the internal waters of the Philippines." Niingon lang nga ang atong teritoryo gilangkuban sa tibuok archipelago sa Pilipinas, sa tanang mga isla ug kadagatan sud niini ug sa ubang mga teritoryo nga dunay soberanya ug hurisdiksyon ang Pilipinas. Apil sa teritoryo ang kadagatan nga nagliyok sa mga isla, kayutaan, kadagatan, kahanginan sa ibabaw ug uban pang dapit ilawom sa dagat. Apil usab ang kadagatan nga nagpalibot, sa taliwa ug nagdugtong sa mga isla, bisan unsa pay gitas-on ug sukod. Adunay internal waters. Ug subay sa international law, dunay territorial waters nga 12 ka nautical miles gikan sa baybayon ug 200 ka nautical miles nga exclusive economic zone (EEZ) gikan sa kinalay-an nga isla. Mao kini karon ang isyu mahitungod sa West Philippine Sea nga giangkon sa pipila ka mga nasod lakip ang Pilipinas ug gustong hakpon tanan sa China. Apan managlahi ang mga pamahayag sa lain-laing mga opisyal sa gobyerno bahin niini. Busa mi-warning si Foreign Affairs Secretary Teodoro Locsin Jr. nga ang iyang buhatan ra, ang Department of Foreign Affairs (DFA), mao da ang eksklusibong mopagawas og pamahayag bahin sa international relations sa Pilipinas. "This is my last warning. When it comes to foreign affairs the Department of Foreign Affairs has the exclusive remit," matod pa ni Locsin. Nunot kini sa pamahayag ni Presidential Spokesman Harry Roque nga ang Julian Felipe (Whitsun) Reef wa masud sa EEZ sa Pilipinas. Sukwahi kini sa pamahayag nga giluwatan sa DFA niadtong Abril nga nag-ingon nga ang Julian Felipe Reef sakop sa Kalayaan Island Group sud sa EEZ sa Pilipinas. (edbarrita@gmail.com) This posting includes an audio/video/photo media file: Download Now

Tambagi ko Noy Kulas: Kagahapon Posted: 26 May 2021 05:40 AM PDT Dear Noy Kulas, Maayong adlaw diha nimo ug sa imong readers. Tagoa lang ko sa alyas nga Tessie. Forty plus na ko karon ug dunay duha ka anak. Ang usa sa akong ex nga Pinoy nga gidala nako diri ug sa akong bana nga foreigner. Karon, ang amahan aning akong anak nga eldest ni contact nako. Biyudo na kuno siya karon kay namatay ang iyang asawa late last year and gusto siya makigbalik nako. Na shock ko pagsulti niya kay that was 20 years ago nga nakigbuwag ko niya kay wa siyay klaro nga mopakasal nako dihang namabdos ko. Sa pagkatinuod lang, Noy Kulas, love pa gihapon nako siya kay siya ang akong first love. Nibiya ko niya kaniadto kay kahibawo ko di pa siya ready adtong panahuna. Karon lahi na kaayo siya. Naa siyay stable nga negusyo ug duha ka mga anak nga iyang inatiman kaayo. Noy, makigbalik kaha ko niya? Ready siya moari sa America aron iya kong kuhaon. Galibog na ko unsay akong buhaton. Please tambagi ko. Daghang salamat. TESSIE Tes, Kani bang gugma, mawad-an ka sa paminsar nga sakto kay emosyon ang magpasuwabi ug maghari. Makalibog ug di ta makakita sa sitwasyon sa tin-aw ug klarong paglantaw. Dihang nibiya ka niya ug nakigminyo sa foreigner, imo nang gisunod ang inyong taytayan sa kagahapon, busa wa nay angay pa pang balikan. Forver na unta ni. Di sab maayong mobalik. Kani lay huna-hunaa, ang imong bana nidawat nimo ug sa imong anak. Kana dako na kaayo na nga isyu unta, but ang iyang gugma nimo ni-prevail. Busa, nganong samukon mo pa man ang imong kaugalingon. Kon gusto ka, just be friends but don't be so stupid nga mopuyo kag balik sa imong kagahapon. NOY KULAS rojval69@yahoo.com This posting includes an audio/video/photo media file: Download Now

1M ka pirma pagkombinser ni Garcia pagka senador Posted: 26 May 2021 05:30 AM PDT Bisan sa hugot nga pagbalibad ni Cebu Governor Gwendolyn Garcia sa pagdagan sa pagka senador sa 2022 elections, ang multi-sectoral group mokuha og one million ka pirma sugod sunod semana aron pagkombinser kaniya. Naglaum ang grupo nga mausab pa ang huna-huna ni Garcia. Nalipay usab sila sa maayong pagtagad sa katawhan sa lalawigan sa ilang pagpamutang og tarpaulin alang sa pagpadagan sa gobernador. Gitataw usab ni Ligas nga di ulog-ulog o laang ang ilang gihimo kay si Garcia "too smart" kon ulo-ulog pa ang ilang gibuhat. Wa usab sila maghimo niini aron manguwarta ug gani, mga campaign material ra ang ilang gipangayo niadtong gustong modonar kay ang tarpaulin nila hapit na mahurot. Si Garcia niingon nga di niya matallikdan ang Sugbo labina nga naa pa ang coronavirus pandemic ug nag-antos pa ang katawhan sa epekto. Apan si Ligas niingon nga basin mausab pa ang huna-huna sa gobernador kon mabakunahan na ang mayoriya sa mga Sugboanon. "What if before October, makab-ot na ang atong gipangbakunahan," nagkanayon si Ligas sa ilang gipatawag nga press conference sa Mayo 26, 2021. GARCIA: DI LAGI KO Gisubli ni Garcia nga dili siya magpapili pagka senador sa umaabot 2022 elections. Matod ni Garcia nga magpapili gihapon siya isip gobernador sa lalawigan sa Sugbo ug mipadayag nga wala siya'y interes sa pagpapili alang sa nasudnong posisyon. "I am not running for senator. Repeat, I am not running for senator. In other words, I am running for governor again. Repeat. I am running for governor again," matod ni Garcia. "I thought I had made myself clear that I am not interested in any national position... kaning grupo nagpasiugda abi nako giklaro na nako og tubag nga di ko modagan ug senador... ayaw tawun usik-usiki inyong kwarta kay way mahitabo sa inyong tinguha," matod ni Garcia sa Mayo 25. Dugang pa sa goberandor nga daghan pa ang mga Sugboanon nga angay tabangon ilabi ning panahon sa krisis tungod sa pandemya. KINSAY IPULI? Kon ilang makombinser si Garcia, matod ni Ligas nga sila si Kongresista Pablo Garcia ug Liloan Mayor Christine Garcia-Frasco dunay igong katakos sa paghulip sa biyaan sa gobernador. Si Pablo John manghod sa gobernador samtang si Frasco, anak. Matod ni Ligas nga si Christina maayo nga nakadumala sa Liloan busa dunay katakos. Alang kaniya, si Bise Gobernador Hilario Davide III wa nay ganang modagan pa. Si Ligas niingon nga karong panahuna gikinahanglan ang Sugboanon og dugo sa Senado ug wa silay laing nakita nga takos niini mao lang ang gobernador. Matod niya nga wa nay takos sa mga Osmeña nga modagan sa Senado, bisan si kanhi senador Serge Osmena kay tiguwang na. (ANV, REV) This posting includes an audio/video/photo media file: Download Now

Pagpasabot sa COA nakalangay sa ganti Posted: 26 May 2021 05:26 AM PDT Ang pagpasabot ngadto sa Commission on Audit (COA) maoy nakalangan sa Cebu City Government sa pag-release sa mga premyo atol sa selebrasyon sa Sinulog 2021 nga gipaagi sa online. Kini ang gipahibawo ni Cebu City Administrator Floro Casas Jr. hilabi na nga niadtong higayona, nimando ang Inter-Agency Task Force (IATF) nga kanselahon ang mga kalihokan gumikan sa coronavirus pandemic. Si Casas nagkanayon nga nakigtambayayong na sila karon sa buhatan ni Bise Mayor Michael Rama kinsa maoy gitugyanan ni Mayor Edgardoj Labella sa pagdumala sa kalihukan inabagan sa Sinulog Foundation Incorporated (SFI). Sila nagplano nga ang mga premyo sa miaging Sinulog adto kuhaon sa City sponsored activities. Naugkat ang maong isyu human sa ni-post sa iyang social media account ang show host nga si Sam Costanilla, nga wa pa madawat ni Melody Hodgson ang iyang premyo isip All Star grand champion sa Sinulog nga adunay P50,000 nga premyo. Ang kompetisyon gipahigayon sa Enero 2021 nga maoy usa sa mga kalihokan sa Sinulog festival, kansang street dancing, dance showdown ug uban pa gikansela sa IATF. Si Rama, sa iyang bahin, niingon nga mag-meeting ang mga opisyal sa SFI ug City Hall aron mahatagan og solusyon ang problema. Iyang gipaniguro nga dili talikdan sa City Hall ang ilang katungdanan. Ang City Government nigahin og P22 milyones alang sa Sinulog Festival 2021. This posting includes an audio/video/photo media file: Download Now

Dan sa Sambag 1, 2 palapdan na Posted: 26 May 2021 05:25 AM PDT Ang Cebu City Government nagtinguha nga mapalapdan ang karsada nga maoy nagsumpay sa Barangay Sambag-I ug II para hamugaway ang pag-agi sa mga sakyanan hilabi na kon adunay motumaw nga emerhensiya. Kini ang tinguha ni Konsehal Jerry Guardo, chairman sa committee on infrastructure sa Cebu City Council aron ang karsada sa duha ka mga barangay dili apiki sa panagtagbabo sa sakyanan. Sila si barangay Kapitan Ailien Guardo sa Sambag I ug Kapitan Ryan Aznar sa Sambag II mopahigayon og public consultation sa mosunod nga mga adlaw sa ilang mga molupyo labi na sa mga pamilya kansang propiedad maapektohan sa proyekto. Ilang tinguhaon nga mahangyo ang Choachuy family diin motadlas ang karsada nga maoy nagkutay sa nagdikit nga barangay nga pulos sakop sa north district. (PAC) This posting includes an audio/video/photo media file: Download Now

Pfizer vaccines sa Cebu City mahurot karon Posted: 26 May 2021 05:25 AM PDT Gibanabana nga kutob lang karon, Mayo 27, ang supply sa Pfizer vaccines sa Cebu City. Si Jeffrey Ibones, officer-in-charge sa Cebu City Health Department (CHD), nitaho nga niadtong Mayo 25, naa ray 1,700 doses ang nabiling doses sa Pfizer. Matod ni Ibones, 1,300 individuals ang na-schedule sa inoculation sa Miyerkules, Mayo 26. gamit ang Pfizer-BioNTech vaccines. Sa maong kalamboan, dason ni Ibones, posible nga mahurot na kini karon. Wala pa makasayod si Ibones kon ang Department of Health (DOH) Central Visayas dunay dugang vaccines sa Pfizer alang sa Cebu City. "Only the DOH (7) can answer that if we still have allocations," matod ni Ibones. Giklaro ni Ibones nga ang pagpuili sa mahatag sa Pfizer vaccine gipaagi og random. "We're not actually the one selecting that, it's through the computer," matod niya. Samtang ang Pfizer vaccines mahurot na, ang gahin sa dakbayan sa AstraZeneca vaccines makaabot pa sa sunod semana o unang semana sa Hunyo. Sa Mayo 25, si Ibones nibutyag nga ang dunay 15,000 doses sa AstraZeneca vaccines ang nabilin. Ang vaccination site sa University of Cebu (UC) Senior High School Private Campus gitagana sa bakunahan og Pfizer vaccines, iapan temporaryong mogamit na kini og AstraZeneca vaccine. Sa Mayo 26, si Ibones nagkanayon nga ang vaccination site sa UC Banilad nanawat na sa magpabakuna sa second dose, samtang ang Robinsons Galleria ug SM Seaside City, lakip ang UC Senior High School Private Campus, nanawat og first shot pa sa ilang pagpabakuna. Dul-an sa 142,000 individuals ang nakarehistro sa vaccination program sa dakbayan. Ug niini, 17,000 ang nasakop sa Priority Code A4 o kadtong giila nga essential ug economic workers. Dugang ni Ibones, ang City mo-accommodate sa mga trabahante nga dili molupyo sa dakbayan apan nagtrabaho dinhi. (JJL) This posting includes an audio/video/photo media file: Download Now

Nanglimpiyo nakuryentihan, DOA sa ospital Posted: 26 May 2021 05:15 AM PDT Usa ka trabahante ang patay human makuryentihan sa iyang trabahoan sa Barangay Manguiao, Lungsod sa Asturias niadtong buntag sa Dominggo, Mayo 23, apan gi-report sa kapulisan buntag na sa Lunes, Mayo 24. Ang biktima mao si Gadsem Rey Horbito, 25, minyo ug trabahante sa Hitchi SRL Agri Industrial Corporation. Matod ni Police Master Sergeant Bendie Nuñez, desk officer sa Asturias Police Station, nga sa ilang imbistigasyon, si Horbito nanglimpyo sulod sa tindahan ug wa damha, nakuryentihan. "Basa ni Siya, sir, kay nang limpyo gikan ba unya naigo ni niya ang pasklakanan sa kuryente ug nakuryentehan," matod ni Nuñez sa Superbalita Cebu. Daling gidala sa duol nga tambalanan si Horbito apan gideklarar kining dead-on-arrival sa doktor. Niining pagsulat, walay nadawat nga reklamo ang kapulisan gikan sa banay ni Horbito kon nganong nadugay na-report ang panghitabo sa awtoridad. (JDS) This posting includes an audio/video/photo media file: Download Now

Jazz nagpanikad nga mobawos sa Grizzlies; Mitchell paduwaon na Posted: 26 May 2021 04:53 AM PDT HUMAN ilogi sa homecourt advantage, ang pagbawos maoy anaa karon sa alimpatakan sa top-seeded Utah Jazz batok sa no.8 nga Memphis Grizzlies sa Game Two sa ilang Western Conference playoffs best-of-seven series. Sa Game One gipakuratan sa Memphis ang Jazz, 112-109, aron pagsignit sa bintaha sa serya. Sa maong duwa, wala ang star player sa Jazz nga si Donovan Mitchell human kini wa tugoti sa doctor. "I was definitely frustrated and upset that I wasn't able to play," matod ni Mitchell. "I'm a competitor. I felt I was ready to go, and unfortunately, that wasn't the case." Ang Grizzlies-Jazz Game Two match sugdan sa alas diyes sa buntag sa adlawng Martes, Mayo 27 didto gihapon sa korte sa Utah. Sa kasaysayan sa NBA, kaduha ra mahitabo nga ang no. 8 naka 2-0 sa series batok sa no.1 seed. Kini nahitabo niadtong 2017 diin ang Chicago Bulls maoy nakauna batok sa Boston. Ang ikaduha mao ang Los Angeles Lakers nga naka 2-0 batok sa Phoenix sa 1993 sa ilang best-of-five series. (JBM) This posting includes an audio/video/photo media file: Download Now

Sugilanon: Tawag sa yutang gimahal Posted: 26 May 2021 04:30 AM PDT CARMELO D. LARIOSA Panadtaran, San Fernando, Cebu Ania karon si Silverio sa taluktok sa bungtod ning sayong takna sa kabuntagon. Ingon niini ang iyang buhaton basta may gumonhap nga magpasulabi sa iyang hunahuna, modalikyat siya dinhi sa tumoy sa bungtod nga nag-umbaw sa ilang balangay. Gikan dinhi makita niya ang ilang dakong balay nga daw gantuong sa usa ka palasyo. Usa ka mansiyon ang ilang balay nga gitukod sa iyang apohan nga taudtaod nang mitaliwan sa laing kalibutan. Apo siya ni kanhi-Kongresista Nyor Panyong nga gimahal ug gipangga nga pulitiko dinhi sa ilang lungsod sa San Agustin. Nahimong mayor sa ilang lungsod si lolo niya Panyong ug way mansa ang pangalan sa pag-alagad sa lungsod kay matinud-anon nga mialagad sa katawhan. Giugmad sa iyang Lolo ang lungsod sa San Agustin ug nahimo kining mauswagon kay daghang mga proyekto ang natukod nga nakapalambo sa ekonomiya sa lungsod. Dihang lain na ang mipuli pagkupot sa renda sa pangagamhanan sa lungsod mipasulabi ang pangurakot sa salapi sa lungsod ug nahisama sa sulad ang pagpadagan sa lungsod sa mayor ug sa ubang mga opisyal nga dapig niya. Mialma ug midaghong na ang mga mabuot nga mga lumulupyo. Nagkinahanglan sila og maayong lider sa katawhan ug si Silverio ang ilang nahunahunaan nga isakbang kang Mayor Eusebio nga wala hiayuni sa mga lungsuranon tungod sa kakurakot niini. "Ikaw ang paglaom sa atong lungsod, Silverio, kay sama unya sa imong apohan nga nahimong mayor sa atong lungsod, si Nyor Panyong, nagtuo ang atong katagi-lungsod nga mobalik da ang kahusay ug paglambo sa San Agustin." Nahinumdom si Silverio sa gipadayag ni Ador, lider ni Mayor Eusebio, nga mibaliktad kay wala sab makaayon sa dinad-an sa kasamtangang mayor nga kurakot. "Si Lolo Panyong ug ako dunay managlahing gawi. Si Lolo nahigugma sa yuta niyang natawhan, samtang ako dunay batasan nga estrikto. Basin dili makauyon ang atong mga katagi-lungsod niini. Apan sama kang Lolo gimahal ko sab ang atong lungsod," gidaygan niya si Ador. "Busa, Ador, sa tanang higayon gihigugma ko ang atong lungsod, apan dili pa ako andam nga modagan pagka Mayor." "Way problema, Silverio. Kay ang atong mga katagilungsod andam na sa ilang pagsuportar sa imong kandidatura karong umaabot nga bugnong lugaynon sa Mayo," ni Ador. "Karong Sabado ubanan ka namo nga makigtagbo sa mga tawo didto sa merkado. Inigka Lunes kuyogan ka gihapon namo inig-payl mo sa COC didto sa opisina sa Comelec." Gipig-it ni Ador ang tuong palad ni Silverio kinsa mibawos usab pagpig-it sa palad ni Ador. Karon ning pag-anhi ni Silverio sa taluktok sa bungtod gipasarap niya ang iyang panan-aw ngadto sa ubos ug unya iyang gilabog ang iyang tinan-awan ngadto sa kampanaryo sa simbahan sa lungsod ug dayon mitugdon kini sa Balay-Lungsod. Dihay pagbati nga midugkal sa iyang galamhan, nag-agni nga modagan siya batok kang Mayor Eusebio. Ug sama kang Lolo niya Panyong, iyang luwason ang lungsod ug ipabarog niya ang kausaban sa pangagamhanan. Ugma, sugdan niya ang unang lakang, mo-payl siya sa iyang Certificate of Candidacy sa Comelec kuyog ni Ador ug sa iyang mga dumadapig. HUMAN sa eleksiyon nagmaya ang mga lumulupyo sa San Agustin. Midaog si Silverio sa dakong bentaha sa mga boto batok kang Mayor Eusebio. Nalipay si Silverio nga wa niya pakyasa ang tawag kaniya sa yuta niyang gimahal. (KATAPUSAN) This posting includes an audio/video/photo media file: Download Now

Balak: Tukaw Posted: 26 May 2021 04:29 AM PDT LAMBERTO G. CEBALLOS Ilaya, Cawayan, Dalaguete, Cebu Ning gabhiona nagtukaw ang akong hunahuna milanat hangtod sa pagsawop sa buwan. Gipangita ko ang wagas nga kahayag ug sa akong mga mata nanagduwa ang lapyong bidlisiw sa banagbanag sa bag-ong kabuntagon. Buot kong hawiran ang nanamilit nga mga takna. Buot kong ang kaadlawon magpabilin gihapong usa ka damgo kay di ko buot nga ang mga yamog mamiya sa nagkalarag nga kabulakan ning akong tanaman. This posting includes an audio/video/photo media file: Download Now

Balak: Sa bukid sa Boljoon Posted: 26 May 2021 04:29 AM PDT JESSABELE G. BENTAZAL Boljoon, Cebu Ang kahayag sa suga nga nag-inusarang nagdan-ag sa payag nilang Jose-Felisa mikatag sa kalikupan, mikuyanap sa kabungtoran dihang milingkod ang Bulan sa tumoy sa bukid ug mikanaog ang mga bituon gikan sa kalangitan. This posting includes an audio/video/photo media file: Download Now

'Tol, maraming salamat talaga' Posted: 26 May 2021 04:27 AM PDT Gipadayag sa Sugboanong higante nga si JuneMar Fajardo ang iyang utang kabutbut-on ug pasalamat ngadto kang Marc Pingris human gianunsyo sa gitawag og "Pinoy Sakuragi" ang pagretiro niadtong Mayo 25 2021. Gipasabot sa pambatong sentro sa San Miguel Beermen nga daghan siya'g nakat-unan gikan kang Pingris dili lang sa basketball kon dili hasta sa dagan sa kinabuhi. "Tol, maraming salamat talaga sa lahat ng tinuro mo sa kin, di lang sa basketball pati na din sa buhay. Salamat lalo sa friendship mo at sa mga bondings at memories natin sa Gilas," mensahe ni Fajardo sa iyang AHOSgaming page nga napatik sa Spin.ph. Nagkasuod og maayo sila si Fajardo ug Pingris gumikan sa duwa sa online nga Dota nga pareho nilang gikahiligan. Nagbalik lantaw si Fajardo sa labing unang higayon nga nagkauban sila sa pagduwa og Dota. "Tol @jeanmarc15 di ko makalimutan unang kita natin sa Metrowalk. ABL pa lang ako, naglalaro kami ng Dota tapos magkalikod lang tayo. Di mo pa ako pinapansin noon," batbat ni ni Fajardo. Gisundan kini ni Fajardo og mensahe nga pampatay nga punchline - "Pinansin mo lang ako nung gusto mo makipaglaro kasi kelangan mo nang magbubuhat sa yo kasi lagi kang talo!" Ang duha ka dekalidad nga big men sa Philippine Basketball Association (PBA) pulos mga probinsyano. Si Fajardo, kinsa produkto sa University of Cebu (UC) Webmasters, lumad nga taga lungsod sa Pinamungajan, Cebu samtang si Pingris lumad nga taga Pozorrubio, Pangasinan. Managribal sila sa basketball apan kauban sa Dota ug personal nga kinabuhi. "Di ko din makalimutan first finals ko sa PBA, magkalaban tayo at nag-champion kayo. First heartbreak ko yun sa finals pero masaya ako kasi marami ako natutunan sa match up natin at masaya ako at nag-Finals MVP ka nun!," paghinumdom ni Fajardo, kinsa usa ka six-time MVP sa PBA. Si Pingris nakadesisyon nga moretiro human sa 16 ka mga tuig niyang pagduwa sa PBA. "Sixteen years na din ako sa PBA pero alam ko na ngayon na din ang tamang panahon para umpisahan ang bagong chapter ng buhay ko," mensahe ni Pingris sa iyang Instagram account. Ang 15-time All-Star nakahakot og siyam ka PBA titles, duha ka PBA Finals MVP, All-Star MVP, ug PBA Most Improved Player awards. Sulod sab sa pipila ka mga higayon nga nakarepresentar siya sa Pilipinas sa nagkadaiyang international competitions. (ESL) This posting includes an audio/video/photo media file: Download Now

You are subscribed to email updates from https://www.sunstar.com.ph/. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States