https://www.sunstar.com.ph/ |
- Mga pasahero sa Beep nagbarog, driver gidakop CCTO
- Memphis mipakaging sa top seeded Jazz sa Game 1
- Suns mipildi sa Lakers sa Game One; Philadelphia, Atlanta midaog sab
- Nangita og kandidato alang sa Outstanding Oponganon 2021
- Pagbakuna sa Mandaue magsugod na sab karon
- Vice Mayor nahagba sa dance floor, naospital
- Basil: Awit nga ‘Shine’ napahimuslan ni Morissette
- Editoryal: Kita sa Cebu City
- Barrita: Pagpili sa bakuna
- Nadela: Dili sayon ang pagpanamilit
- Talk to Papa Joe: Gipalayas
- Didal napakyas sa Dew Tour; morumbo sa Europe alang sa laing kompetisyon
- Mayor Gomez gibakunahan
- SB No. 2 sa Lapu wa gilangay
- Spence ma-knockout ni Pacquiao: Peñalosa
- NLEX nagkinahanglan og pambatong sentro
| Mga pasahero sa Beep nagbarog, driver gidakop CCTO Posted: 24 May 2021 01:54 AM PDT Ang Cebu City Transportation Office (CCTO) nipahimangno sa mga driver ug konduktor sa pampublikong mga sakyanan nga di mag-overloading. Ang pahimangno giluwatan sa CCTO human nila paraha ug dakpa ang driver ug konfdutor sa usa ka Beep nga dunay rotang 01K kay nakita sa enforcers nga dunay mga pasahero nga nagbarog samtang ngasakay sa Lunes, Mayo 24, 2021. Matod sa CCTO nga nalapas sa driver ug kondutktor ang overloading kay higpit karong gidili ang pagdasok sa mga pasahero sa publikong mga sakyanan samtang naa ang Dakbayan sa Sugbo sa modified general community quarantine (MGCQ). Ang overloading kalapasan sa City Ordinance 2491 nga napasar niadtong 2018. "Bisan anaa sa modified enhanced community quarantine (MGCQ) ang Syudad sa Sugbo, apan gidili gihapon ang pagpabarog sa mga pasahero sa pampublikong sakyanan gumikan sa paglapas sa minimum health protocol," matod sa CCTO sa ilang Facebook post. Aron mabantayan kining buhat sa mga driver ug konduktor sa pagpatuyang sa pagpasakay og pasahero, giawhag sa CCTO ang publiko sa pagtaho kon dunay overloading sa publikong mga sakyanan nga ilang makita. Itaho kini sa buhatan sa CCTO ug labing duol nga traffic enforcer kay kalapasan sa minium health protocol. Mahimo kining kuhaan og hulagway ug uban pang mga detalye kon diin mahitabo aron ilang maaksyunan. Gawas sa pagdili sa pagpabarog, gikinahanglan usab nga maka facemask ug naka face shield ang mga pasahero. (REV)  This posting includes an audio/video/photo media file: Download Now |
| Memphis mipakaging sa top seeded Jazz sa Game 1 Posted: 23 May 2021 10:39 PM PDT Pipila lang ka adlaw gikan sa makutas nilang kadaugan sa play-in tournament, wa moawop ang kainit sa batan-ong Memphis Grizzlies sa pagsugod sa ilang kampanya sa Western Conference best-of-seven playoff series sa NBA. Lab-as pa sa ilang pagpalagpot sa San Antonio Spurs ug sa Golden State Warriors, ang Memphis mibuntog sa top-seed Utah Jazz, 112-109, aron pagsakmit sa bintaha sa ilang serya, 1-0. Ang panaghugpong nila ni Dillon Brooks ug Ja Morant maoy nahimong haligi sa kadaugan batok sa Jazz kinsa miduwa nga wala ang ilang star player nga si Donovan Mitchell. Si Dillon mipahagsa og 31 puntos ug pito ka rebounds sasmtang si Morant mikadlit og 26, apil na niini ang iyang mga puntos sa himatyong segundos. Nakaamot usab og 15, si Jonas Valanciunas nga may 12 ka rebounds samtang 14 ang nadugang ni Kyle Anderson. Perming naglabaw ang Memphis gikan pa sa second quarter ug wa gyud kini mobuhi pa sa manubela bisan pa man sa mga pagpanghudlat nga gihimo sa host Jazz. Sa napakgang nga Jazz, si Bojan Bogdanovic mitapos sa duwa nga may 29 puntos, 20 niini iyang gimugna sa fourth quarter nga maoy nakapa-rally sa Utah. Nagsugod na unta og luta ang momentum diha sa ilang kiliran, 109-110, human sa tulo ka free throws ni Bogdanovic apan ang lusot ni Brooks maoy nagtigbak sa ilang paglaom. Si Mike Conley mitipig og 22 puntos, 11 ka assists, ug unom ka rebounds samtang si Rudy Gobert milangkat og 15 ka rebounds ug 11 puntos. (JBM)  This posting includes an audio/video/photo media file: Download Now |
| Suns mipildi sa Lakers sa Game One; Philadelphia, Atlanta midaog sab Posted: 23 May 2021 07:38 PM PDT Gipukan sa host Phoenix Suns ang defending champion Los Angeles Lakers, 99-90, sa Game One sa ilang best-of-seven playoff series sa Western Conference, Lunes, Mayo 24, 2021 (Dominggo sa Estados Unidos)sa National Basketball Association (NBA). Si Devin Booker mikulit og 34 puntos, Deandre Ayton mipuga og 21 puntos ug 16 ka rebounds aron pangulohan ang Suns kinsa maoy nakauna sa series, 1-0. Kini maoy unang kadaugan sa Suns sa playoffs series sulod sa 11 ka tuig diin. Sagad sa ilang mga players lakip na sila si Booker, Ayton ug Mikal Bridges mao pay unang higayon nga nakaduwa sa post season round apan sa ilang gipakita daw og dili sila rookies nga nakigbatok sa mga beteranong Lakers nga gipangulohan ni LeBron James. Maayo kaayo silang nakasuporta sa All-Star pointguard nga si Chris Paul, kansang abaga na-injured sa second quarter. Ang Suns nga nakaposte og 53-45 sa halftime, nakabingat sa ilang labaw as fourth quarter, 86-70, sa wa pa kini mapahaki sa katapusang 9:02 sa duwa, 86-87, Ning higayona nitumaw ang tensiyon sa panag-engkwentro sa dihang nagkainitay si Alex Caruso sa Lakers ug Cameron Payne sa Suns haduol sa sideline diin si Caruso nahagba sa sawog. Si Montreal Harrel sa Lakers daling milaban ni Caruso ug niapil sa konprontahi ug maayo na lang kay napakgang ang kagubot sa mga opisyal. Si Caruso ug Harrell pulos gipahamtangan og technical foul matag usa kanila samtang si Payne gitawagan usab og duha ka technical fouls ug gipagawas sa korte. Apan ang kagubot wala makapahupas sa kainit sa mga kamot ni Booker samtang si Ayton padayon nga midominar sa ilawom nga bahin diin nakamugna kini og walo ka offensive rebounds ug nakapasulod og napulo sa onse niya ka field goal. Gikan niadto wala na makabuylo pa ang Lakers. Si LeBron James mitali og 18 puntos ug pito ka rebounds, Anthony Davis mitapos sa duwa nga may 13 puntos. Ang Game Two ipahigayon sa Miyerkules (Martes sa US) sa sama gihapong korte. Sa laing duwa, gidagit sa Atlanta Hawks ang New York Knicks, 107-105, sa ilang kaugalingong Eastern Conference series. Si Trae Young kinsa milanit og 32 puntos, 10 ka assists ug pito ka rebounds maoy nahimong bayani alang sa Hawks sa dihang nakaipsot kini sa depensa sa Knicks sa katapusang nuebe segundos nga maoy nakapahilom sa mabagang dumadapig as Knicks sulod sa Madison Square Garden. Midugang og 18 puntos si Bogdan Bogdanovic alang sa unang duwa sa Hawks sa playoffs sukad niadtong 2017. Si Alex Burks mipakli og 27 puntos alang sa Knicks nga mao pa usay pagkasulod sa playoffs sukad niadtong 2013. Mitapos usab sa duwa si Derrick Rose og 17 puntos, samtang 15 ang natampo ni Julius Randle. Ang Philadelphia Sixers milupig sa Washington Wizards, 125-118. (JBM)  This posting includes an audio/video/photo media file: Download Now |
| Nangita og kandidato alang sa Outstanding Oponganon 2021 Posted: 23 May 2021 07:18 AM PDT MAY nasayran ba kamo? Ituboy dayon ninyo. Sa tuyo nga mapasidunggan ang usa ka indibiduwal o institusiyon nga dako og natampo sa dakbayan hilabi na niining panahon sa pandemiya, ang kagamhanan sa Lapu-Lapu adunay pasiugdahan nga Search for Outstanding Oponganons 2021 alang sa ika-60 ka tuig nga Charter Day celebration sa Lapu-Lapu sa Hunyo 17. Apan gumikan kay wala pay napilian ang kagamhanan og kinsa kining maong mga indibiduwal o institusiyon, giawhag karon ni Lapu-Lapu City Mayor Junard 'Ahong Chan ang tanan sa pag-nominate og indibiduwal o institusiyon ngadto sa kagamhanan. Mahimong ma-nominate ang mga indibiduwal o institusiyon nga adunay mga bayanihong nabuhat ning panahon sa pandemiya sama sa pagpangalagad ug serbisyo. Giawhag ang tanan sa pag-download lang sa form sa FB page ni Chan diin ang entries adto mopaingon sa Lapu-Lapu City Tourism Historical and Cultural Affairs Commission (THCAC) nga gipangulohan ni Cindi King-Chan. Si Chan maoy mopahigayon sa screening ug assessment unya sa entries apan ang mga Oponganon unya ang tagaan og katungod sa pagpili kon kinsa ang mahatagan og pasidungog. Ang pagsumiter sa entries nagsugod niadtong Mayo 21 ug matapos sa Hunyo 2. "Gusto nako kini ipahinungod sa mga Oponganon nga mao gayuy mitabang sa pagpanday og usa ka siyudad nga malinawon ug puno sa maayong mga tawo," matod ni Chan. (GCM)  This posting includes an audio/video/photo media file: Download Now |
| Pagbakuna sa Mandaue magsugod na sab karon Posted: 23 May 2021 06:52 AM PDT MAGSUGOD karon, Mayo 24, ang pagbakuna sa mga A3 priority subgroup (person with comorbidities) sa dakbayan sa Mandaue, sumala sa pahibalo sa Mandaue City Vaccine Operations Center (VOC). Si Ernie Manatad, chairman sa Mandaue City Vaccine Board, nikompirmar sa Superbalita Cebu nga magsugod na sila sa pagbakuna sa A3, dungan sa A2 (senior citizens). Giklaro niya nga modawat gihapon sila og medical frontliners kon adunay moapas. Gisulti ni Manatad sa Superbalita Cebu nga duol sa 5,000 na ka medical frontliners sa dakbayan sa Mandaue ang nabakunahan na. Bisan pa man wala pa nagsugod og pamakuna sa senior citizens, gisugdan na nila og rehistro ang mga indibiduwal nga lakip sa A3 pinaagi sa house-to-house. Wala pay numero si Manatad kon pila na ang narehistro nga A3 sa dakbayan sa Sugbo apan base sa iyang datos niadtong Mayo 14, nakarehistro sila og 447 ka indibiduwal pinaagi sa house-to-house. Sa miaging semana, gilusad sa Mandaue City VOC ang ilang online registration alang sa A3. Sa ilang unang adlaw sa online registration kaniadtong Mayo 19, matod ni Manatad, nakarehistro sila og 1,400 ka mga indibiduwal ubos sa A3 priority subgroup. Gikan sa Mayo 17 hangtod Mayo 21, human makadawat sa duol 25,000 ka doses sa Covid-19 vaccine duha ka semana ang milabay, miingon si Manatad nga nakabakuna na sila og 1,559 ka mga senior citizen alang sa first dose ug 1,030 ka mga senior citizen ug healthcare workers alang sa second dose. Giasoy ni Manatad sa Superbalita Cebu nga aduna silay target nga 600 hangtod 800 ka indibiduwal ang mabakunahan sa usa ka adlaw, apan sa ilang naobserbahan 300 lang ang ilang mabakunahan matag adlaw. Karon, ang Mandaue City adunay tulo ka vaccination sites: ang Mandaue City Cultural and Sports Complex, University of Cebu Lapu-Lapu Mandaue branch ug Chong Hua Hospital (alang sa mga senior citizen nga adunay gipamati). Tungod magsugod na ang Dakbayan sa Mandaue sa pagbakuna sa A3, gipahibalo usab sa VOC ang ilang online registration alang sa A4 priority subgroup o ang mga frontline personnel sa mga essential sector lakip na ang uniformed personnel. Ang online registration QR code o online forms makit-an sa official page sa Facebook sa Mandaue VOC. (KFD)  This posting includes an audio/video/photo media file: Download Now |
| Vice Mayor nahagba sa dance floor, naospital Posted: 23 May 2021 06:52 AM PDT NAPUTOL ang kaalegre nga pagsayawsayaw sa nanambong sa 10th anniversary sa Ako Bisaya Partylist nga gipahigayon sa Tambuli Resort sa Maribago sa siyudad sa Lapu-Lapu niadtong Sabado sa gabii, Mayo 22, dihang nahagba sa dance floor si Consolacion Vice Mayor Teresa 'Nene' Alegado. Naglingaw ang grupo uban sa bise mayor sa pagsayaw nga nagsunod sa pagtuyoktuyok sa dance floor ug pagkahuman, nagtinagsa sa pagsud sa sirkulo aron masentro sa pagsayaw. Ug sa turno ni Alegado, maayo kini nakakimbutkimbot apan, kalit lang nawad-an siya sa balanse ug nahagba sa dance floor. Daling niduol aron pagluwas ang iyang anak nga si Consolacion Mayor Joannes Alegado, kinsa usa ka doktor ug apil usab sa nitambong sa salosalo nga kasagaran mga opisyal sa kagamhanan ug mga personahe sa pulitika sa Sugbo, ug ilang gidali pagdala sa ospital. Nasayran ning tagsuwat nga nadat-ogan sa bukobuko sa bise mayor ang iyang walang kamot ug bukton dihang natumba hinungdan nga wala dayon kini makabangon. Dugang nasayran nga luwas ra ang kahimtang sa mayor. Atol sa selebrasyon, nipahibawo si Kong. Sonny Lagon sa iyang pagluwat sa katungdanan sa Ako Bisaya ug nanumpa nga bag-ong sakop sa One Cebu Party. Si Gobernador Gwendolyn 'Gwen' Garcia maoy nipapanumpa kang Kong. Lagon ug uban pa nga nagpasilong sa One Cebu Party. Nipadayag siya sa iyang interes sa pagdagan isip representante sa Ubos Balay-Balauranan alang sa 6th district sa Sugbo. Ang iyang kapikas nga si Daphne Lagon maoy mihulip sa katungdanan sa Ako Bisaya ug gitudlo nga first nominee sa Ako Bisaya Partylist samtang si Consolacion Mayor Joannes Alegado maoy 2nd nominee sa partylist. Nakasaksi sa hitabo si Kong. Pablo John "PJ" Garcia, Provincial Board Members Glenn Soco ug Jose Mari "Tata" Salvador, Cordova Mayor Techie Sitoy-Chu ug mga kapitan sa lungsod sa Cordova. Si Gobernador Garcia nakapauli na dihang nagsadya sa pagsayaw ang nanambong sa party ug wala na makasaksi sa pagkahagba ni Bise Mayor Alegado. Ang Ako Bisaya maoy nagdala sa tingog ug interes sa mga Bisaya sa kongreso isip sectoral representative human nakakuha og 20 porsiyento sa botos sa miaging nasudnong eleksiyon.  This posting includes an audio/video/photo media file: Download Now |
| Basil: Awit nga ‘Shine’ napahimuslan ni Morissette Posted: 23 May 2021 06:48 AM PDT Manila – Usa ka masanagong Morisette Amon ang among naka-Zoomcon sa miaging adlaw mahitungod sa launching niya alang sa kanta nga "Shine." To date, ikatulo na si Morissette sa mga recording artist nga nag-record sa award-winning song na ito composed by Trina Belamide nga unang giawit ni Emma Castro, sunod si Regine Velasquez, ug karon ang atong pinanggang "Asia's Phoenix" nga si Morissette Amon ang latest nga nag-record niini. Matod pa ni Trina (nga batan-on pa gihapon ang hitsura), ika-25th year na sa maong kanta nga mingdaog sa Metropop Music Festival. Nagpasalamat siya kang Emma Castro ilabi na kang Regine Velasquez nga mao gyuy nagpasikat sa maong kanta pero niangkon si Trina nga sa version ni Regine nga maoy nahipatik sa karaoke, may words nga gipulihan kay intended sa usa ka commercial ang version na iyon ni Regine. "Gusto kong maitama ang lyrics sa mga karaoke kaya itong version ni Morisette, ito talaga ang tama," matod pa ni Trina. Niangkon si Morisette nga dako ang natabang kaniya sa kantang "Shine." "Naging piyesa ko siya sa mga amateur singing contest na sinalihan ko dati, palagi akong nananalo sa kantang yan," matud pa ni Morisette. Bongga sad ang views sa dihang nag-guest si Morisette sa Wish Bus diin iyang gikanta ang "Shine" naka 7.9 million views na kini and still counting. "Isa pa, kasing-edad ko ang kantang "Shine" pagbulgar ni Morissette, so 25 years na diay siya karon. Available na ang "Shine" ni Morisette sa digital flatforms. Ilado si Morisette sa iyang whistle nga mala-Mariah Carey pero sa kantang Shine parang di ko nadungog nga nag-whistle siya. Gihatagan niya kini og ibang tunog nga parang gospel waltz. Madunggan ang official version ni Morissette sa "Shine" sa iba't ibang music streaming services sugod niadtong Biyernes (May 21). Adunay TV launch naman sa "ASAP Natin 'To" ang music video nito sa May 30 (Linggo) ug makita sa YouTube channel ni Morissette. Para sa uban pang detalye, i-like ang Star Music sa Facebook (www.facebook.com/starmusicph) at sundan ito sa Twitter at Instagram (@StarMusicPH).  This posting includes an audio/video/photo media file: Download Now |
| Posted: 23 May 2021 06:18 AM PDT Ang ekonomiya sa Lalawigan sa Sugbo nahibalik nga numero uno nga probinsiya sa tibuok nasod apan ang panudlanan sa sentrong dakbayan sa Sugbo, medyo dili maayo sa mga mosunod nga buwan o tuig. Segurado nga makaapekto kini sa mga plano sa lokal nga kagamhanan. Posible nga usa kini sa mga dakong isyu sa nagsingabot nga eleksiyon sa mosunod tuig. Kon walay tino nga lakang nga himuon, ang isyu mahimong balido nga usa sa mga basihanan sa pagpadayon o pagtapos na sa kasamtangang administrasyon sa dakbayan ubos sa liderato ni Mayor Edgardo Labella. Mas paborable sa kontra ug matawag nato nga kini ang 'first ug last term' ni Labella? Mga hugonhugon lang kini sa kilidkilid. Makita sa data sa City Treasurer Office (CTO) nga mas daghang nanirado nga estabilisemento human sa kapin sa tuig sa coronavirus disease 2019 (Covid-19) ug minus karon ang nag-renew sa ilang business. Dunay 720 ka business establishments nag-apply og retirement o closure gikan sa Enero ngadto sa Marso ning tuiga kon itande sa samang panahon sa 2020 nga 646 lang. Busa, dul-an sa 2,000 ka estabilisemento nga wala mo-renew sa ilang business permits ning tuiga. Sa 2020, dunay 33,405 ka business establishments ang nag-renew. Sa 2021, ang CTO nitala lang og 31,244 ka estabilisemento nga nag-renew sa ilang business permits. Si Acting City Treasurer Mare Vae Reyes nitaho nga wala sila makakuha sa gibanabana nga koleksiyon sa business tax collection nga P1.7 billion, apan ang actual collection gikan sa Enero ngadto sa Marso ning tuiga nikabat lang P1.5 billion. Naapektohan kini sa pandemiya, dason niya. Apan dili lang ang dakbayan sa Sugbo ang apektado sa Covid-19. Nganong nahimo sa lalawigan nga mahibalik sa pagka numero uno sa nasod taliwala sa pandemiya? Klaro nga nagdepende sa liderato. Ang balanse ug way usab-usab nga iyang polisiya sa panglawas ug ekonomiya ubos sa kuwarentina.  This posting includes an audio/video/photo media file: Download Now |
| Posted: 23 May 2021 06:17 AM PDT Dunay panultion sa Iningles nga nag-ingon, "Beggars can't be choosers." Ang mga makililimos di makapili. Dawaton kon unsay ihatag. Mag-agad lang sa kaaghop ug kabubut-on niadtong nanglimos. Dunay higayon nga bisan kon papilion ka pa, wa kay kapilian. Sama sa usa ka tawo nga gikan sa trabaho ug nangutana sa asawa kon unsay sud-an. Tubag sa asawa, "Pili lang, naa sa lamesa akong gitakuban." Niingon ang bana, "Buwad ra man lagi ni?" Banghag sa asawa, "Pili lang, mokaon ka o dili." Apan pananglit duna kay kapilian, sama sa klase sa bakuna batok sa Covid-19, sayop ba nga magpili ka sa bakuna nga imong gusto? Di ba kita makaingon nga bright kadtong magpili sa bakuna nga sumala sa mga taho maoy labing epektibo? * * * Ang kagamhanang nasyonal nimando sa mga lokal nga kagamhanan nga di na ipahibawo kon unsa ang matang sa bakuna ang gamiton sa vaccination centers aron malikayan ang paghugop sa mga tawo. Sama sa pagtampunsisok sa mga tawo sa usa ka vaccination center sa kaulohan nga nigamit sa bakuna sa Pfizer gikan sa Estados Unidos. Ang ubang mga mayor niingon nga ilang papilion ang mga tawo kon unsa ang bakuna nga ilang gustong ibakuna kanila. Kadtong wa makagusto sa bakuna nga gamiton, di lang una magpabakuna. Total, di man compulsory ang pagbakuna. Sigon sa mga taho, ang mga bakuna batok sa Covid-19 lain-lain og efficacy rate. Di kaha mas maayo nga kadtong mga bakuna nga gusto sa mga tawo, kay nagtuo silang mas epektibo, maoy komprahon sa gobyerno? * * * Sumala sa ulahing non-commissioned survey sa Social Weather Stations (SWS), tulo lang sa matag 10 ka Pilipino ang gustong magpabakuna batok sa Covid-19. Sa survey nga gihimo gikan sa Abril 28 hangtod sa Mayo 2, 2021 ug gipagawas sa Mayo 20, 32 porsiyento lang sa mga hamtong nga Pilipino ang andam nga magpabakuna. Kana kon duna silay kahigayonan nga mahatagan sa libreng bakuna nga aprobado sa Food and Drug Administration. Samtang 35 porsiyento ang di gustong magpabakuna. Laing 35 porsiyento wa pa makaseguro kon magpabakuna o dili. Gikinahanglan nga mabakunahan ang kinabag-an sa katawhan aron makuha sa Pilipinas ang gitawag nga herd immunity. Sumala sa vaccine tracker sa cnn.com, 3,718,308 ka doses ang nabakuna sa Pilipinas. Matod sa mga eksperto, ang labing maayong bakuna mao kadtong natusok sa imong bukton.  This posting includes an audio/video/photo media file: Download Now |
| Nadela: Dili sayon ang pagpanamilit Posted: 23 May 2021 06:17 AM PDT Sa sayong bahin ning bulana, ang Department of Education (DepEd) Toledo City Division nangandam alang sa ipatuman nga lahugay sa ilang pipila ka principal. Usa sa nalakip sa lahugay mao si Renester Suralta, ang principal sa Makatol Elementary School sa Barangay Biga. Ang ingon niini nga kalihukan sa DepEd dili bag-o alang kang Sir Renester. Kabahin na ni sa ilang trabaho. Isip usa ka maayong sundalo, ang pagtuman sa kamanduan maoy labing importante, kay sa ubang butang nga gusto pa nimong mahitabo sa dili pa ka mobiya. Ang buot ipasabot, duna pay daghang tiwasonon nga gimbuhaton nga gusto niyang tapuson alang sa iyang gimahal nga Makatol Elementary School. Bisan kinsa naman siguro, ang usa ka tuig ug siyam ka bulan niya nga pangalagad sa eskwelahan sa Makatol, nahimo na nga kabahin sa iyang pagka magtutudlo. Kay isip amahan sa gamay nga eskwelahan, dili lang edukasyon sa mga bata ang iyang gihunahuna matag adlaw. Apil na ang panginabuhi sa mga molupyo. Bitaw, sayop nang magpaka buta bungol lang ang usa ka principal sa kahimtang sa mga ginikanan sa mga bata. Ilabi na ning panahon sa pandemiya. Pananglit ang ilang panginabuhian nga apektado kaayo sa daghang isyu nga naglambigit sa minahan sa maong dapit. Apil si Sir Renester nga nagpakabana niini kini subay sa mga kalihukan nga gipasiugdahan sa barangay. Iyang gihisgutan kadtong trahediya sa miaging Disyembre nga nikalas og daghang kinabuhi pinaagi sa iyang opinion isip tampo sa pamantalaang SunStar. Daghang isyu ang iyang gituki, nga para nako seryuso kaayo ug nagkinahanglan og dinaliang pagtagad sa mga ahensiya sa gobyerno. Ug sa iyang hingpit na gyud nga pagbiya, haw-ang kaayo ang iyang galamhan kay pakyas ang iyang gipakigbisogan nga makakuha og deed of donation ang maong eskwelahan diha sa iyang kasamtangan nga nahimutangan. Magpabilin o mabalhin kini og laing lokasyon, panahon nalang ang agdon. Kon ingon niini ka aktibo si Sir Renester sa iyang pagka principal, dili gyud tuod sayon ang pagpanamilit. Hinuon sayod siya nga isip usa ka educator, duna pay daghan nga nanginahanglan sa iyang serbisyo. Sa bag-o niya nga assignment isip principal sa Canlumampao Elementary School sa mao gihapon nga dakbayan, mahimong lahi nga matang sa pakigbisog ang iyang apilan. Hinuon sigurado na ang kabataan ug ilang ginikanan nga sama sa Makatol, ang iyang pasyon sa pagpakabana ug pagtabang, dakong buhi ug dili malimtan. Kining estoryaha nagpahinumdum nako sa nakalabayng katuigan, diin nakit-an nako ang akong kaugalingon sa bisan asang eskwelahan, mapubliko o pribado. Kini tungod ug alang sa serbisyo publiko nga gisangon kanako isip tigbalita. Diha toy coverage sa usa ka eskwelahan nga giabandonar gumikan sa problema sa insureksiyon niadtong dekada 80. Ang akong gipasabot mao ang Baksan Elementary School sa Barangay Sapangdaku sa dakbayan sa Sugbo. Sakay sa helicopter sa militar, nitugpa mi sa nagkayamukat nga kahimtang sa publikong tunghaan sa Sitio Iba sa Barangay Lagtang sa Talisay City nga niadtong panahona usa pa ka lungsod. Insurgency gihapon ang hinungdan. Sa Barangay Gaas, Balamban nasaksihan sab nako ang daghang pulis nga nanghakot sa mga lingkoranan ug ubang gamit sa eskwelahan kay gibalhin ang klase sa ilang merkado pinaagi sa Mines and Geosciences Bureau human mapalgi ang nangliki nga bahin sa ilang eskwelahan. Parehas sab sa pagka balhin sa eskwelahan sa Sirao sa dakbayan sa Sugbo, tungod sa paglihok sa yuta. Niagi pa gani ni og grabing pagsupak sa mga molupyo. Naka-cover sab ko og mga eskwelahan nga gilamoy sa kayo. Pipila ka bulan sa wala pa ko mobiya sa broadcasting, nasaksihan sab nako ang mga tinun-an nga niubog sa suba aron maka-report sa klase sa Lusaran Elementary ug National High School sa dakbayan sa Sugbo, tungod sa grabing baha. Ang mga classroom sa Mangabon Elementary School sa Barangay Tagba-o, Cebu City nga gitugaw sa grabing gabon tungod sa dautang panahon. Wala pa ni labot sa mga eskwelahan nga gihasi sa ilang giingon nga mga estudyante nga nasudlan og dautang espiritu. Nag-una niini kadtong nahitabo sa Jaclupan National High School kaniadto sa siyudad sa Talisay. Pipila lang ni sa mga news coverage nga dili nako makalimtan isip tigbalita kon maghisgut ta edukasyon sa kabataan.  This posting includes an audio/video/photo media file: Download Now |
| Posted: 23 May 2021 06:14 AM PDT Dear Papa Joe, Ako diay si Rocky, 26 years old, taga south sa Cebu. Magpatambag unta ko nimo bahin sa akong mama nga iya kong gipalayas sa amo pagkamatay sa akong papa. Unsaon nga diri man gibilin ni Papa nako ang iyang properties. Nakasuwat gyud sa iyang last will nga sa ako gipangan halos tanan niyang mga kabilin. Gihatag man unta nako kang mama ang uban, pero dili gyud tanan. Ang problema kay gusto niyang kuhaon tanang properties nga nakabutang sa akong ngan kay lagi kuno siya ang asawa ug siya ang dunay dakong katungod sa tanang kabtangan ni Papa. Nasuko siya nako kay wala man nako ihatag ang tanan, naglalis mi ug iya kong gipalayas. Para way gubot, nihawa ko sa amo bisag diri pa nako nakapangan ang bay. Sakto kaha akong gibuhat? Unsa may akong angay buhaton aron magka peace na mi, unya maka move forward nako? ROCKY Dear Rocky, Wala gyud ta masayud kon nganong ikaw ang gibinlan ni Papa nimo sa iyang properties. Siguro duna siyay rason nga sila ra gyud si Mama nimo ang nasayud. Ang imo segurong buhaton mao nga magpaubos ka sa imong mama. Dili kinahanglan nga ihatag nimo niya ang tanan kay ikaw may gibinlan sa imong amahan. Pasabta siya ug ingna nga dili angay mabalaka kay og molambo ka, makatabang man pod ka niya, which is mao dapat imong buhaton isip anak. Dili ka makaako nga maghinan-aw lang. Angay nimong buhaton nga mopauli ka sa inyo ug mangayog pasaylo sa imong mama. Siguro dili pa siya makadawat dayon, dili ka pa niya mapasaylo sa pagkakaron pero moabot ang panahon nga ma okay ramo. Matod pa sa panultihon nga 'time heals.' Paabota lang na ug sa pagkakaron taronga ang imong kinabuhi labina nga walay ginikanan nga naggiya nimo. 26 anyos ka pa lang ug daghan pa kaayo kag angay makat-onan ning kalibutana. Daghang salamat ug hinaut pang nakatabang kog gamay sa imong problema. Papa Joe  This posting includes an audio/video/photo media file: Download Now |
| Didal napakyas sa Dew Tour; morumbo sa Europe alang sa laing kompetisyon Posted: 23 May 2021 06:13 AM PDT HUMAN napakyas sa paglabni og otomatikong lingkuranan alang sa Tokyo Olympics, ang Sugboanong skateboarder nga si Margie Didal mobiyahe paingon sa Europe aron ipadayon ang iyang tinguha nga maka-qualify gyud sa matag upat ka tuig nga kompetisyon. Ang Southeast Asian ug Asian Games gold medalist igo ra milandig sa ika-12 nga puwesto sa semifinals round sa score nga 12.06 sa bag-ong natapos nga Dew Tour Des Moines 2021 nga gipahigayon didto sa Estados Unidos. Sa maong kompetisyon, ang malakip sa top eight maoy otomatikong mo-qualify sa Olympics. Hinuon, ang 21-anyos nga garbo sa Sugbo, kansang biyahe giabaga sa Philippine Sports Commission (PSC), nakakuha og dugang nga puntos alang sa iyang Olympic qualifying points nga maoy makapahugot sa iyang paghupot sa ika-14 nga luna sa world street skateboard rankings. Dako ang tsansa sa lumad nga taga Lahug, Dakbayan sa Sugbo, nga madala tungod kay adto na man usab siya sa Rome, Italy morumbo ug mosalmot sa Street World Championships 2021 nga gikatakda karong Mayo 30 ngadto sa Hunyo 6. Kon masulod siya sa top three ning kombatiha, diretso na siyang mo-qualify sa Olympics uban nila ni pole-vaulter EJ Obiena, gymnast Caloy Yulo, mga boksidor nga sila si Carlo Paalam, Nesthy Petecio, Irish Magno ug Eumir Marcial, weightlifter nga si Hidilyn Diaz, rower Cris Nievarez ug ning bag-o lang si Kurt Barbosa. Laing paagi nga mo-qualify si Didal mao nga kinahanglan motapos siya sa top 16 sa world rankings sa di pa moabot ang Hunyo 29. (JBM)  This posting includes an audio/video/photo media file: Download Now |
| Posted: 23 May 2021 05:56 AM PDT ORMOC City - Nabakunahan na batok sa coronavirus disease 2019 (Covid-19) si Ormoc City Mayor Richard Gomez niadtong Biyernes, Mayo 21, 2021. Ang pagbakuna ni Gomez gipahigayon sa 3rd floor sa Robinsons Place Ormoc diin kauban niya nga gibakunahan si City Councilor Vince Rama. Mao kini ang first dose nga bakuna sa AstraZeneca nga gi-inject kang Gomez ug Rama. Kauban usab nila nga gibakunahan ang medical students sa Western Leyte College ug San Lorenzo Ruiz College. Apil usab ang uban nga frontliners nga nagbantay sa isolation units ug mga nagtrabaho sa punerarya nga maoy modawat sa mga namatay sa Covid. Mapasalamaton si Gomez sa Inter-Agency Task Force against Covid-19 sa mando nga apil sa prayoridad nga bakunahan ang mga mayor. Matod sa IATF, pryoridad nga bakunahan ang mga mayor gumikan kay makonsidera sila nga frontliners nga maoy naghimo sa mga lakang ug estratehiya batok Covid-19. "I'm thankful to the IATF for understanding and realizing that the Mayor's in this country are also frontliners," matod ni Gomez. Sa paghimo ning balita, kapin na sa 5 mil ka mga tawo sa Ormoc ang nabakunahan kontra Covid-19. Sa Kananga, Leyte, nabakunahan na sab sa first dose sa AstraZeneca ang bayaw ni Gomez nga si Mayor Matt Torres ug Municipal Administrator Atty. Adelito Solibaga Jr. Matod sa mga nahisgutang opisyal, wala silay laing gibati human nabakunahan ug paabuton nalang nila ang tawag alang sa ikaduha nga dose. Gihangyo sa mga mayor ang tanan nga magpabakuna kontra Covid-19 alang sa dugang proteksyon. (JKDP)  This posting includes an audio/video/photo media file: Download Now |
| Posted: 23 May 2021 05:56 AM PDT GIHIMAKAK sa konseho sa dakbayan sa Lapu-Lapu ang pasangil ni Lapu-Lapu City Mayor Junard 'Ahong' Chan nga gilangaylangay na usab ang iyang gipangayong Supplemental Budget (SB) No. 2 nga mokantidad og P266 milyunes. Si Chan mireklamo usab sa SB No. 1 nga gidugay usab, apan naaprobar lang niadtong Mayo 6. Si Association of Barangay Councils (ABC) President Eduardo 'Eddie' Cuizon nibutyag nga wala gayuy kamatuoran ang pasangil nga siya maoy usa sa mga konsehal nga nagbabag sa pag-aprobar sa SB No. 2 tungod kay anaa dinhi ang gahin alang sa senior citizens. Iyang giawhag ang kampo ni Chan sa paglili o ba kaha pagpakita sa minutes sa ilang session aron makita kon duna bay nakabutang nga siya ang mibabag niini ug ubang mga konsehal nga dili kaalyado sa mayor. "Pulos bakak ug walay kamatuoran. Wala lang gyud silay laing mahimo..," matod ni Cuizon. Si Konsehal Flaviano 'Bobit' Hiyas, vice chairman sa Committee on Finance sa konseho, nipasabot nga niadtong miaging Mayo 20 mao pa ang pag-aprobar sa Annual Investment Program (AIP) sa SB no. 2 nga mao usay proseso. Dili mahimong iaprobar dihadiha ang SB sanglit kwarta kini sa panudlanan sa kagamhanan hinungdan nga kinahanglan moagi og proseso. Sunod nilang tukion mao na ang SB No.2 ug kon way kakulian, mapasar kini sa mosunod duha o tulo ka semana nga alang kaniya on time lang gihapon. (GCM)  This posting includes an audio/video/photo media file: Download Now |
| Spence ma-knockout ni Pacquiao: Peñalosa Posted: 23 May 2021 05:56 AM PDT Ma-knockout ni eight-division champion Manny Pacquiao ang undefeated boxer nga si Errol Spence Jr. sa uwahing mga round sa panag-abot sa duha ibabaw sa ring karong Agusto 21, 2021 sa Las Vegas, Nevada. Kini maoy pangagpas ni kanhi two-time world champion Gerry Peñalosa atol sa online interview sa Superbalita Cebu. Gihulagway ni Peñalosa nga nakabintaha si Pacquiao sa kaabtik batok ni Spence. Hinuon iyang gipasumbingay nga moagi gyud og saktong kombati ang matag habig. "Pacquiao by late round knockout, but hard fight for both. Ang kaabtik maoy advantage ni Manny," matod ni Peñalosa. "Pareho ra sila sa kusog, pero ang experience ug speed atoa pabor ni Manny." Si Peñalosa, kinsa usa na ka international boxing promoter karon, nagtuo nga mas lisod si Terence Crawford nga ikontra ni Pacquiao. Ingon niya nga mas may pagkadanghag si Spence kon itandi ni Crawford. Siya midugang nga mas sayon ni Pacquiao kon si Mikey Garcia pa ang nakontra niini. Iyang gibutyag nga bisan pa sa pangidaron ni Pacquiao nga 42-anyos nagpabilin gihapon ang kusog niini. "Naa gihapon iyang kusog, pero kung iya gamiton ang speed, ma-sacrifice ang iyang power," ni Peñalosa pa. Sa iyang bahin, gawas sa edad, ang 31-anyos nga Spence nakabintaha usab sa gitas-on nga 5-10 batok kang Pacquiao nga 5-6 lang. Sama kang Peñalosa, si Sean Gibbons, ang presidente sa MP Promotions, masaligon nga modaog ang fighting senator ning awaya tungod sa speed ug power. Si Pacquiao (62-7-2, 39KOs) wala na makaaway sukad sa iyang split decision nga kadaugan batok ni Keith Thurnman niadtong Hulyo 2019. Samtang si Spence (27-0, 21KOs) katapusang nakasaka sa ring niadtong Disyembre 2020 diin gipildi niya pinaagi sa unanimous decision si Danny Garcia. Ang away nila ni Pacquiao ug Spence posibling adto ipahigayon sa MGM Grand o sa Allegiant Stadium nga moakupar og 72,000 ka mga lingkuranan.  This posting includes an audio/video/photo media file: Download Now |
| NLEX nagkinahanglan og pambatong sentro Posted: 23 May 2021 05:56 AM PDT ALANG kang Kiefer Ravena, usa ka lehitimong big man ang kuwang sa puwersa sa NLEX Road Warriors aron makakombati og maayo sa umaabot nga 46th season sa Philippine Basketball Association (PBA). Nagtuo si Ravena nga kon makakuha sila og kasaligong sentro, hayan nakaparang na sila sa labing lig-ong mga puwersa sa liga sama San Miguel Beermen ug Ginebra Gin Kings, nga pulos adunay dekalibreng mga poste sa ilawom. Ang Beermen adunay lig-ong haligi sa ilawom nga si JuneMar Fajardo samtang ang Gin Kings adunay twin towers nga sila si Japeth Aguilar ug Fil-German Christian Standhardinger. Sa ninglabay'ng pipila ka mga semana, ang Road Warriors ningsuway sa pagpakignegusasyon aron makuha si Beau Belga gikan sa Rain or Shine Elasto Painters pinaagi sa trade. Apan ning bag-uhay lang, mismong si Road Warriors coach Yeng Guiao ang nipahibalo nga nahagsa ang ilang pagpakignegusasyon kang Belga. "Basta anytime you get a quality veteran na who has been in the ropes for quite some time especially in a system that he was built to play in with coach Yeng, lamang talaga sa amin 'yan," pasabot ni Ravena sa interbyu sa Spin.ph. Sa kasamtangan, ang mga nakapuwesto sa ilawom alang sa Road Warriors mao sila si Michael Miranda, Raoul Soyud, JR Quinahan, ug Asi Taulava apan alang kang Ravena, nagkinahanglan pa sila og dugang hailigi nga makatabang sa mga nangahisgutan. (ESL)  This posting includes an audio/video/photo media file: Download Now |
| You are subscribed to email updates from https://www.sunstar.com.ph/. To stop receiving these emails, you may unsubscribe now. | Email delivery powered by Google |
| Google, 1600 Amphitheatre Parkway, Mountain View, CA 94043, United States | |
No comments:
Post a Comment