Tuesday, May 25, 2021

https://www.sunstar.com.ph/

https://www.sunstar.com.ph/

Libreng sakay alang sa Apor

Posted: 25 May 2021 06:08 AM PDT

Ang SMB Tourist Transport (SMB-TT) nipadagan og 15 ka mga bus para sa libreng sakay sa authorized persons outside residence (Apor) sa duha ka rota sugod Mayo 24, 2021.

Si Mark Anthony Boyo, 37, tag-iya sa SMB-TT, nagkanayon nga pito ka bus ang manukad gikan sa Talisay City paingon sa Lapu-Lapu City agi sa Cebu City ug vice versa.

Adunay walo ka bus maoy gitagana sa Cebu City paingon sa Lungsod sa Carmen, Sugbo.

Ang matag bus adunay 45 nga kapasidad apan 30 ra ang maximum capacity sa pasahero gumikan sa social distancing.

Ang pagpadagan sa SMB-TT ubos sa programa sa Department of Transportation (DOTr) nga gipatuman sa Land Transportation Franchising and Regulatory Board (LTFRB) 7 sa tuyo nga dili maglisod sa pagbiyahe ang mga Apor nga nag-edad og 15 anyos ngadto na 65 anyos.

Si LTFRB 7 Assistant Regional Director Reynaldo Elnar nagkanayon nga ang SMB-TT pipila lang sa mga tourist bus company ang ni-avail sa service contracting sa LTFRB kansang programa molungtad hangtod sa Hunyo 30.

Apan matod pa ni Elnar nga posible kining molapas pa sa maong petsa labi kon dili pa mahurot ang P170 milyones nga gigahin ubos sa P5 bilyones nga programa sa DOTr nga magsilbing ayuda ngadto sa mga pasahero, driver ug operator niining panahon sa pandemiya.

Ang rota sa Talisay manukad habig sa Mananga, Barangay Tabunok subay sa Natalio Bacalso Ave. lahos sa Cebu City paingon sa Mandaue ngadto na sa Marcelo Fernan Bridge ug paingon sa Lapu-Lapu City Hall ug vice versa.

Sa laing rota manukad gikan sa Ayala Center Cebu paingon sa Mandaue, Consolacion, Lilo-an, Danao ug hunong sa public plaza sa Lungsod sa Carmen ug vice versa. (PAC)

This posting includes an audio/video/photo media file: Download Now

Olango adunay 24/7 responder

Posted: 25 May 2021 06:08 AM PDT

Dili na problema ang pagresponde sa mga emerhensiya sa island barangays sa Dakbayan sa Lapu-Lapu.

Human nga moabot sa 20 ka residente sa isla ang nakatapos isip mga responder niadtong Mayo 22, 2021 human sa duha ka buwan nga training.

Ang mga responder maoy motubag sa tanang emehensiya sa isla 24/7 hinungdan nga gihulawgay kini ni Lapu-Lapu City Mayor Junard Chan nga usa ka mahinungdanong kalamboan sa isla.

Gipahigayon ang graduation ceremony sa Mini Hoops Dome sa Barangay Talima.

Mibansay-bansay sa maong mga responder mao ang City Disaster Risk Reduction and Management Office CDRRMO ubos sa pagdumala ni Nagiel Bañacia.

Matod niya nga ang mayor maoy nihangyo kaniya alang sa maong training aron aduna nay kapabilidad ang mga taga isla sa pagresponde panahon sa emerhensiya.

Malaumon siya nga unta pinaagi niini mamenosan na unya ang mamatay gumikan sa kakulang ug responder sa isla panahon sa emerhensiya.

"Wa ni mahitabo kaniadto nga there is first responder, karon pa lang," matod ni Chan. (GCM)

This posting includes an audio/video/photo media file: Download Now

Libreng medikal misyon sa bukirang brgy.

Posted: 25 May 2021 06:05 AM PDT

Gatusan ka mga indibidwal sa bukirang barangay sa Dakbayan sa Sugbo ang nakapahimulos sa libreng blood pressure consultation, blood sugar testing, ug pa-check up sa doktor.

Gisagunsonan ang gihimong medical mission nga gipaluyohan sa Liga ng mga Barangay-Cebu City President Franklyn Ong ngadto sa Barangay sa Babag ug Malubog sayo ning semanaha.

Gawas pa adunay libreng tambal ang gipang apod-apod alang sa sakit nga diabetes, hypertension, ubo, inpeksiyon ug uban pa.

Ingon man libreng vitamins, masks ug face shields.

"Nasayod ta unsa kalisud ang kinabuhi sa atong mga kaigsuonan sa kabukiran diin kadaghan nila dugay na nga wala nakapa-check up sa mga doktor mao nga kita na mismo ang naghatod sa libreng serbisyo sa ilang tugkaran," matod ni Ong.

Samtang amg nga bata nga mitambong ang gitudloan sa hustong paagi sa paghugas sa kamot ug pag-toothbrush, gihatagan sab og libreng hygiene kits ug libre tupi sa buhok.

Ang maong kalihokan gikan sa kaugalingong panudlanan ni Ong ug misaad nga moduaw sa uban pang barangays. (PR)

This posting includes an audio/video/photo media file: Download Now

Basil: Cogie Domingo 3 tuig uyab si Krista Ranillo

Posted: 25 May 2021 04:37 AM PDT

Manila--Guest ang gwapong aktor nga si Cogie Domingo sa show ni Keanna Reeves sa K5 nga giulohan og "Let's Talk About K."

Gwapo gihapon si Cogie, oozing with sex appeal although medyo ningtambok siya pero konting diet ug gym lang, I'm sure mobalik ang iyang pagka-slim.

Ang gusto ko kang Cogie mao ang iyang mga ngipon. Samtang giinterview namo siya ni Direk Benny Andaya, sa iyang mga ngipon ako nakatutok kay pearly white kini, nindot ang tubo ug pang toothpaste commercial jud siya.

Medyo hinay lang ang tingog ni Cogie, I don't know why.

Sa dihang gipangutana siya kung kinsa ang naging girlfriend niya sa showbiz, dali kining gibungat ang pangan ni Krista Ranillo.

"Si Krista, 3 years kami nun," pag-angkon ni Cogie.

Samtang nagpadayon ang among tsikahan/interbyuhan nasundot ko kang Cogie kung kinsa ang na-miss niya sa showbiz?

Ug nakita ko si Keanna Reeves (nga nasa duol lang ug may gikuri-kuri pero namati sa among interbyuhan) ug kalit lang kining niisa sa iyang kamot.

Maong kang Keanna na napunta ang among topic.

Dugay na silang magkakilala ug naloka kami tungod kay kalit lang nga may gibulgar si Keanna.

"Daks yan, certified daks," way birada nga bungat ni Keanna.

Di naman na-offend si Cogie ug mas lalong nilami pa ang iyang pahiyom.

Matod ni Cogie, sana dire-diretso na ang iyang pagbabalik sa showbiz ug nanghinaot siya nga moundang na ang pandemic.

Last nga nakita si Cogie sa "Ang Probinsyano".

This time, palaban na kuno si Cogie, kung may mga daring scenes man nga ihatag sa iyaha, iya kining dawaton.

"Gusto ko ngayon yung mga challenging roles at isa yan sa mga challenging role for me," asoy ni Cogie.

Well, good luck sa pagbabalik showbiz mo, Cogie.

Ang maong video, akong gipatik sa Dear Tito Timmy Page nga sa kasamtangan aduna na'y 52K views and still counting.

Sa comment section, daghan ang na-miss kang Cogie ug happy sila nga nibalik na siya ug daghan ang nag-agree nga daks jud kuno si Cogie.

Kaya lang may doubt ako tubag ni Cogie sa dihang gipangutana ko siya kung pila na ang iyang edad.

Twenty six pa lang kuno siya. Halos kasing edad lang sila ni Morisette Amon? Parang ang tagal-tagal kasi niyang nawala sa showbiz, di ba?

Si Art Halili ang iyang bag-ong manager karon.

This posting includes an audio/video/photo media file: Download Now

Pagtrabaho sa condo di pa mapadayon

Posted: 25 May 2021 04:33 AM PDT

Di pa makabalik sa ilang pagtrabaho ang developer sa usa ka condominium building sa Barangay Apas, Dakbayan sa Sugbo human nahugno ang yuta nga niresulta sa pagkamatay sa construction worker ug pagkaangol sa iyang kauban niadtong Mayo 22, 2021.

Si Florante Catalan, pangulo sa Office of the Building Official (OBO), nagkanayon nga nipadala og request letter ang developer aron sila makabalik og trabaho apan wa gitugotan ni Catalan.

"Karon ang ilang request nga ma-lift, di pa na nato mahatag. Karon (gahapon) they promised kay diri man ang representative sa developer nga ilang i submit today or ASAP ang kadtong kulang nga gipangayo nako para mapadayon nila ang ilang trabaho," padayag ni Catalan.

Matod ni Catalan, wa pa makumpleto sa developer ang tanang safety measures nga maoy ilang gipatrabaho aron malikayan ang susamang insidente.

Kini sama sa pagsiguro nga luwas ang ilang duha ka tower nga kuwang sa safety nets ug mapalig-on ang koral buyon sa nahitaboan niadtong Mayo 22 sanglit nakita sa inspeksyon sa OBO nga nangliki na usab kini ug delikado sa laing disgrasya.

Matod ni Catalan, nihumok ang yuta sa maong dapit gumikan sa septic tank sa duol nga establisemento.

Siya nagduda nga mao kini ang hinungdan sa disgrasya ug angay hatagan og kasulbaran.

Si Catalan nagkanayon nga nisaad ang developer nga ilang buhaton sa labing dali nga panahon ang safety measures aron usab sila makabalik og trabaho sama sa pagpalig-on sa yuta aron dili ma mo-cave in sanglit nagpadayon pa sila sa pagpalig-on sa pundasyon.

Gipadayag ni Catalan nga kon makumpleto na sa developer ang mga safety measures, diha dayon ilang ilibkas ang suspension order para makabalik na sila og trabaho.

This posting includes an audio/video/photo media file: Download Now

Lalake gipusil patay sa Mactan

Posted: 25 May 2021 04:33 AM PDT

Nagpadayon ang Mactan Police Station sa Lapu-Lapu City Police Office (LCPO) sa ilang imbestigasyon kalabot sa pagpusil patay sa usa ka 36-anyos nga lalake sa Sitio Dapdap Soong, Brgy. Mactan, Dakbayan sa Lapu-Lapu sa alas 6:40 sa gabii sa Mayo 24, 2021.

Mao kini ang gibutyag ni Police Master Sergeant Erwin Sinadjan sa Mactan Police Station dihang nahinabi sa Superbalita Cebu.Ang biktima nailhang si Henry Malingin, 36, taga Sitio Dapdap, way trabaho.

Base sa imbestigasyon sa kapulisan, si Malingin naglakaw lang haduol sa ilang balay dihang kalit nga gipusil sa wala mailhing lalake. Patay diha-diha si Malingin samtang ang mamumuno yano nga nisibat.

Di na maestablisar kon nagsakay ba kini og motorsiklo o naglakaw base sa estorya sa mga tawo sa dapit.

Usa ka kabhang sa wala pa matinong kalibre sa armas de fuego nakuha sa kapulisan sa crime scene. Susihon pa sa kapulisan duna bay CCTV nga gimontar sa dapit nahitaboan.

Wa pa usab matino sa kapulisan ang background ni Malingin sanglit wa pa makighinabi ang mga kabanay sa kapulisan gumikan usab sa kakalit sa hitabo.

Giawhag usab nila ang adunay kasayuran sa pakig-alayon sa ilang buhatan aron matagaan og katin-awan ang pagpusil patay sa biktima.

Mao na kini ang ikaduhang insidente sa pagpamusil sa area of responsibility sa Mactan Police Station sulod lang sa usa ka semana.

Niadtong Mayo 18, usa usab ka imam sa Muslim community gipusil patay sa wa mailhing mamumuno sa St Michael, Barangay Pajac, Dakbayan sa Lapu-Lapu. (GCM)

This posting includes an audio/video/photo media file: Download Now

40 ka Bike Patrollers nakahuman sa training

Posted: 25 May 2021 04:32 AM PDT

Padayong nagpailawom sa training ang Bike Patrollers nga i-deputize sa Sugbo Bike Lanes Board sa pag-monitor ug pagdumala sa mga bike lane sa Dakbayan sa Sugbo.

Matod ni Gerry Carillo, chairman sa Sugbo Bike Lanes Board, nga ang unang duha ka batches sa 60 ka Bike Patrollers nahuman na sa ilang pagbansay.

Gibahin sila sa tulo ka batches, sa tag 20 kada batch.

Ang nipahigayon sa training mao ang Base Camp Emergency Response Team Inc. (BCERT) Cycle Response Unit (CRU).

"Two batches have already done the training, 20 per batch," matod ni Carillo sa iyang text message sa Superbalita Cebu.

Ang mga patroller nipailawom sa 11 ka adlaw nga six-stage process nga naglangkob sa physical fitness test, traffic regulations, apprehension process, bike safety, bike skills training, slow speed maneuver, basic bike mechanics, CRU equipment standard orientation, group formation, crowd control management, basic first aid, basic life support, public interaction training, radio basics, team dynamics ug operational management.

Kini nga programa giabagan sa Sugbo Bike Lanes Board, Mayor's Office, Cebu City Transportation Office (CCTO) ug Rotary Club Mandaue East.

Matod sa Facebook post sa BCERT, nga ilang tumong nga mamahimo kining tipik sa International Police Mountain Biking Association.

"We are working to be part of the International Police Mountain Biking Association. The sole purpose is to form a dedicated bike patrol unit to to enforce the bike lanes, and educate the public for a safer cycling community," matod sa organisasyon.

NAG-AGAD

Si Carillo, sa iyang bahin, niingon nga nag-agad sila sa Konseho kon kanus-a mapasar ang ilang gipangayong P20 milyunes nga budget, tipik niini alang sa Bike Patrol.

Ning buwana unta ang ilang target sa pagsugod. "We are waiting for the approval sa Council. If ila ma-approve ang budget this week, we can start early June," nagkanayon si Carillo.

Ang budget gibahin alang sa pagpalit ug pagtaud sa plastic bollards alang sa bike lanes sa interior nga mga karsada, signage, pintal, uniforms ug honorarium sa patrollers.

Ang Cebu City nag-atubang og dakong problema sa bike lanes kay kadaghanan niini gihimong parking area sa mga sakyanan ug gihimong padestrian lane sa mga tawo. (REV)

This posting includes an audio/video/photo media file: Download Now

Retired nga sakop sa US Navy gipatay sa 2 ka mga tulisan

Posted: 25 May 2021 04:30 AM PDT

Retirado nga sakop sa United States Navy gitulis ug gipatay sa alas 4:30 sa kaadlawon sa Lunes, Mayo 24, 2021 sa Zamora St., Barangay 7, Tacloban City.

Duha ka menor de edad nga suspek nadakpan sa kapulisan. Tinuod nga mga ngan sa mga suspek gipugngan ning mantalaan kay puro mga menor. Ang biktima giila nga si Thomas Mate, 62, Filipino citizen, dunay kapuyo.

Sa Lunes sa kaadlawon, ang kapulisan sa Police Station 2 nakadawat og report sa giingon nga pagpanulis sa lugar.

Ang Mobile Patrol Unit kauban ang tawo nga nireport miresponde sa lugar.

Base sa inisyal nga imbestigasyon sa kapulisan, si Mate nakabantay nga gisulod og kawatan ang iyang giabangan nga establismento. Sa dihang gisusi ni Mate ang sitwasyon sud sa establismento, dali nga nanago sa usa ka stall ang mga killer.

Sa dihang nasakpan ni Mate ang duha, nahitabo ang komusyon ug gidunggab sa usa ka suspek ang biktima.

Dali nga gidala sa tambalanan si Mate, apan gideklarar kini nga dead on arrival ni Dr. Jay Stephen Cantay gumikan sa mga samad sa nagkadaiyang bahin sa lawas.

Gumikan sa gihimo nga follow-up investigation ug hot pursuit operation, nadakpan ang duha ka mga suspek.

Giila sa kapulisan ang duha nga sila si alyas Jobert, 16, way trabaho, nagpuyo sa Barangay 49, Young Field ug si Robin, 17, nagpuyo sa samang lugar.

Sa paghimo ning balita, padayun pa nga gitigom sa kapulisan ang tanan nga pamahayag sa mga saksi ug mga ebidensya.

Naa na karon sa kustodiya sa Police Station 2 ang duha ka dinakpan.

This posting includes an audio/video/photo media file: Download Now

Nabakunahan og Sinovac pasudlon sa Saudi, i-quarantine

Posted: 25 May 2021 04:28 AM PDT

Si Foreign Affairs Undersecretary for Civilian Security and Consular Affairs Brigido J. Dulay niklaro sa Martes, Mayo 25, 2021 nga ang overseas Filipino workers (OFWs) nga nabakunahan og Sinovac Covid-19 vaccine mahimo rang makasulod sa Saudi Arabia, apan kinahanglan silang i-quarantine og pito ka mga adlaw.

Sa usa ka social media sa Mayo 25, 2021, si Dulay niingon nga ang wa mabakunahing OFW mopailawom sa polymerase chain reaction (PCR) test alang sa Sars-CoV-2 sa pag-abot ug sa paglabay sa pito ka mga adlaw. Mga bata ubos sa 8 anyos way labot.

"We are working with Saudi authorities to mitigate the impact of these new guidelines on our OFWs," matod ni Dulay.

Naghisgot siya kabahin sa guidelines nga giluwatan sa General Authority of Civil Aviation (Gaca) sa Saudi Arabia sa Mayo 24.

Ubos sa Gaca guidelines, ang di Saudi gikinahanglan mopailawom sa quarantine sud sa pito ka mga adlaw sa pasilidad nga gidumala sa Ministry of Health (MOH) sa nasod.

Ang galastuhan ning pito ka adlaw nga quarantine iapil sa presyo sa ticket sa eroplano.

Ang way labot sa mandatory quarantine mao ang mga tawo nga nakadawat sa kompletong bakuna sa Covid-19 gikan sa Pfizer-BioNTech, Oxford-AstraZeneca, Moderna, ug Johnson & Johnson. (MVI, SunStar Philippines)

This posting includes an audio/video/photo media file: Download Now

Balay-Balay, Tubig-Tubig: Children’s Community Pantry

Posted: 25 May 2021 04:28 AM PDT

Padayon gihapon ang operasyon sa Children's Community Pantry nga gisugdan sa Children's Legal Bureau (CLB) dul-an usa ka buwan na ang milabay.

Naagni ang CLB sa paghimo sa maong inisyatiba human nga midaghan ang mga gitukod nga community pantries sa tibuok nasod lakip na diri sa Sugbo. Pipila lang sab ka mga pantry ang dunay interes nga mosentro sa panginahanglan sa mga bata.

Si Ana Patricia Non maoy mipasiugda sa konsepto sa community pantry diri sa Pilipinas. Iyang gitukod ang Maginhawa Community Pantry sa Quezon City didto sa kaulohan.

Human makita nga nagmalampuson ang iyang proyekto, misunod pod ang mga nagkalain-laing organisasyon ug mga indibidwal nga nakita ang panginahanglan nga makatabang sa mga nanginahanglan og hinabang labaw na nga padayon gihapon ang pag-atubang nato sa mga epekto sa Covid-19 pandemic.

Susama sa ubang mga community pantry, simple lang ang prinsipyo sa maong proyekto: "Mokuha subay sa panginahanglan, mokuha sigon sa kakayahan".

Kini nagpasabot nga gipahinumduman ang mga gustong makadawat sa mga hinabang nga mokuha lang igo sa ilang kinahanglan.

Wala sab pugsa ang mga donors ug sila sab ang magbuot kon pila ang ilang ihatag sa Children's Community Pantry.

Sukad nagsugod ang Children's Community Pantry sa CLB niadtong Abril 29, 2021, daghang donors gikan sa nagkadaiyang sektor ang mi-supply sa mga pagkaon ug duwaan. Gatusan na sab ang mga tawo nga nakadawat og hinabang gikan sa maong inisyatiba.

Aron masigurong luwas ang mga musulod sa Children's Community Pantry, gipatuman ang minimum public health standards sama sa pagpasul-ob og masks ug pag-social distancing. Duna poy gihatag nga priority numbers sa mga gustong mukuha og hinabang aron mahimong hapsay ang pagpang-apod apod.

Daghang salamat sa donors sa among Children's Community Pantry nga silang Pearl Campbell, Susie Borromeo Milne, Atty. Euvic Ferrer, Mae Batad-Dura, Elizabeth Rojos, Jamaica Chan, Ann Marie Murillo, Nemie Albay, Rocelyn Zosa, Therese Amigo, Aima Marie Labra Makk, Connie Sta Ana Cimafranca, Brigitte Novabos, Atty. Mia Paras, Velman Property Management, Inc., Atty. Francisco Amit, Asia Brewery- Pascual Foods. Inc., Atty. Stephanie Tan, AGRIKO, Ramon Aboitiz Foundation Inc. (RAFI), ug ang staff ug Board of Trustees sa CLB.

Abli ang Children's Community Pantry sa CLB matag Miyerkules ug Biyernes. Mag-agad ang pagpadayon sa among community pantry sa mga donasyon.

Alang sa dugang impormasyon, mahimo kamo nga mumessage sa among Facebook page o mo-email sa clbphilscebu@gmail.com. Mahimo sab ninyo kaming bisitahon sa among opisina sa 10-Queen's Road, Brgy. Kamputhaw, Cebu City o mutawag sa (032) 255 8016

[Lindog sinuwat ni Atty. King Anthony Perez, usa sa mga abogado sa CLB. Mahimo kamo nga mupadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa Facebook Messenger: m.me/ChildrensLegalBureauInc]

This posting includes an audio/video/photo media file: Download Now

Migallen: Makaduda nganong wa masuspenso si LeBron

Posted: 25 May 2021 04:24 AM PDT

Karong buntag, sa alas diyes ang takna dinhi sa Pilipinas, si LeBron James ug ang defending champions Los Angeles Lakers mosuway pagbawos sa host Phoenix Suns sa Game 2 sa Western Conference best-of-seven playoffs series sa National Basketball Association (NBA).

Napildi man gud ni sila sa Game One, 100-109, sa duwa nga niagi og gamayng tensiyon.

Kini bisan pa man og diha si James, kinsa sa sayo pa gihugonhugon nga posibling dili makaduwa sa unang bahin sa playoffs tungod kay naka-violate kini sa health and safety protocols nga gilagda sa NBA.

Unya og makalapas ka sa maong protocol kinahanglan tanggungon ka o ikwarantina ka sulod sa 10 ngadto sa 14 ka mga adlaw una pa makabalik sa pagpakita og aksiyon.

Pipila na ka players ang nasilutan sa susamang kalapasan ug usa na niini ang kauban mismo ni James nga si Dennis Schroder, kinsa giingon nga nitambong usab og party nga wa pa indeksiyoni.

Ubos sa kasamtangang lagda sa NBA, kadto lang players nga na-indeksiyonan na og bakuna sa Covid-19 o kaha kadtong dunay dokumento nga nagpamatuod nga negative siya sa test ang tugotan lang makatambong og kalihukan nga anaa sa gawas ipahigayon.

Pero sa bahin ni James, daghan ang nahibulong kon nganong nakaduwa gihapon ang superstar sa Lakers.

Gani usa sa mipalag niini ang kanhi NBA star nga si Charles Barkley, kinsa usa na karon ka TV panelist.

Si James, nasuta nga sa sayong bahin sa niaging semana, mitambong sa usa kalihukan nga nag-promote sa tequila brand nga iyang gisuportahan.

Kini nahitabo sa wala pa ang ilang duwa batok sa Golden State Warriors sa play-in tournament.

Sa ato pa, di gyud unta diay siya makaduwa sa maong panag-engkuwentro. Taliwala sa mga reklamo, ang NBA hugot nga mibarog sa ilang desisyon. Ilang gipasabot nga ang gitambungan ni James nga kalihukan, usa lang ka outdoor event ug sigon sa ilang konsultasyon sa mga medical experts nga dili kuno kini risgo kay di kini makapakatap sa Covid-19. Kini maoy rason nganong wala na kinahanglana nga ikwarantina si James.

Sa nasayran, wa motug-an o mokompirmar ang kanhi four-time MVP kon na-indeksiyonan na ba siya.

Sa niagi usab nga semana, ang coach sa Lakers nga si Frank Vogel mibutyag nga sa 17 niya ka players, 15 ra ang nabakunahan. Sa ato pa, gawas ni Schroder duna pay usa nga wa sab ma indeksiyoni. Dili kaha si James ni? Ug siya man tuod, aw di naka-violate siya ug angay gyud unta silotan. Pero wala man.

Ato man tuod girespetohan ang baruganan sa NBA, pero dili kaha nga mas gusto sa NBA nga makasulod og balik sa finals si James ug ang Los Angeles Lakers kay mao kini sentro sa atraksiyon karon? Just asking. (jun.migallen22@gmail.com)

This posting includes an audio/video/photo media file: Download Now

SBP mapasigarbuon sa naabot ni Clarkson

Posted: 25 May 2021 04:24 AM PDT

Mapasigarbuon ug malipayon ang Samahang Basketbol ng Pilipinas (SBP) nga ang kanhi sakop sa Gilas Pilipinas nga si Fil-Am Jordan Clarkson maoy napiling Sixth Man of the Year awardee sa 2021 National Basketball Association (NBA).

Si Clarkson, 28, maoy labing unang magduduwa sa Utah Jazz nga nakadaog ning maong pasidungog.

"In his short and sweet stint with Gilas Pilipinas, Jordan Clarkson showed us not only his world-class talent but also gave us a glimpse of the hard work and dedication necessary to get to that level," pamahayag ni SBP president Al Panlilio nga napatik sa Spin.ph.

"Getting a front-row look at Jordan during Asian Games made us all believe that he will accomplish great things in the NBA."

Gipasabot ni Panlilio ang tibuok basketball community sa Pilipinas nagmalipayon sa nakab-ot ni Clarkson.

"Congratulations on winning the NBA's Sixth Man of the Year award, Jordan. The SBP and the entire Philippine basketball community is proud of you. Once Gilas, always Gilas," dugang ni Panlilio.

Si Clarkson, kansang lola lumad nga taga Pampanga, nakaduwa sa Gilas sa 2018 Asian Games sa Jakarta, Indonesia diin nag-average siya og 26 puntos, 6.5 rebounds, 5.5 assists, ug 1.0 steals per game.

Nipadayag nang daan si Clarkson nga makaduwa og balik sa Gilas alang sa 2023 Fiba Basketball World Cup diin co-host ang Pilipinas kauban ang Japan ug Indonesia.

Hinuon wala pa'y kaseguroan kon makaduwa si Clarkson niini gumikan sa eligibility rule sa matag upat ka tuig nga kompetisyon. (ESL)

This posting includes an audio/video/photo media file: Download Now

SBP mipasidungog, midayeg ni Clarkson

Posted: 25 May 2021 03:53 AM PDT

ANG Samahang Basketball ng Pilipinas (SBP) misupot sa ilang pagdayeg ug pasidungog ni Jordan Clarkson, ang Fil-Am nga guard sa Utah Jazz nga maoy napiling Sixth Man of the Year sa NBA.

Ang 28 anyos nga Clarkson, kinsa nakaduwa usab sa Gilas Pilipinas maoy unang Jazz player nga nakalabni sa maong award diin iyang nalupig ang iya ra pud nga kauban nga si Joe Ingles ug New York Knicks Derrick Rose.

"In his short and sweet stint with Gilas Pilipinas, Jordan Clarkson showed us not only his world-class talent but also gave us a glimpse of the hard work and dedication necessary to get to that level," matod ni SBP president Al Panlilio sa ilang giluwatan nga pamahayag.

"Getting a front-row look at Jordan during Asian Games made us all believe that he will accomplish great things in the NBA," dugang niini.

"Congratulations on winning the NBA's Sixth Man of the Year award, Jordan. The SBP and the entire Philippine basketball community is proud of you," nagkanayon si Panlilio uban sa pagpadayag nga "once Gilas, always Gilas."

Si Clarkson kansang kagikan sa ginikanan nasubay sa iyang apohan sa Pampanga, nakaduwa sa Gilas niadtong 2018 Asian Games sa Jakarta, Indonesia.

Iyang natabangan ang Gilas ngadto sa ikalimang puwesto diin siya nag-average og 26.0 points, 6.5 rebounds, 5.5 assists ug1.0 steals.

Ning bag-ohay lang, si Clarkson mipadayag nga gusto gihapon siyang moduwa sa Gilas, bisan sa 2023 FIBA Basketball World Cup diin ang nasod maoy co-host sa Japan ug Indonesia.

"Hopefully, everything lines up and I'm free that time and that moment and I'll put that Gilas jersey back on and go win us something," ni Clarkson pa. "That's definitely something I want to do."

Hinuon, si Clarkson aduna pay husayonon kalabot sa iyang FIBA eligibility aron siya hingpit nga makaduwa isip lokal ug dili naturalized player. (JBM)

This posting includes an audio/video/photo media file: Download Now

Denver mibawos sa Game Two; Portland gilubong, 128-109

Posted: 24 May 2021 11:44 PM PDT

Human pakauwawi diha mismo sa ilang tugkaran sa Game One, ang Denver Nuggets bangis nga mibawos sa Portland Trailblazers, 128-109, sa Game Two sa Western Conference best-of-seven playoff series sa National Basketball Association (NBA).

Si Nikola Jokic mipahagsa og 38 puntos nga igo na kaayong nakapabaliwala sa nagpungasi nga tres ni Damian Lillard. Sa kadaugan, natabla na sa Nuggets ang series, 1-1, ug motapon ang Game 3 didto korte sa Portland karong Biyernes (Huwebes sa America).

Gawas sa iyang puntos, ang lig-ong kandidato sa pagka most valuable player milangkat usab og walo ka rebounds ug lima ka assists nga dako kaayong kalahian sa iyang performance sa Game One.

Sa sayong bahin, wa makatugbang ang Nuggets sa pagpanginit sa kamot ni Lillard kinsa mitapos sa duwa nga may 42 puntos, 32 niini diha niya pusgaya sa first half.

Ang iyang walo ka tres sa wa pa ang halftime nakatabla sas playoff record sa NBA. Siya mipasulod og unom sa 16 niya ka itsa sa three point area.

Pisikal ang maong panag-engkuwentro nga gidayandayanan og upat ka technical foul, tulo niini sa Denver lakip sa usa ni Jokic ug duha ka flagrant-1 foul nga gitawag ngadto nila ni CJ McCollum ug Carmelo Anthony.

Misamot ang kainit sa dihang si Carmelo Anthony mitukmod ni Jokic kinsa natumba sa sawog. Niini natawagan si Anthony og flagrant-1 foul.

Sa dihang nahusay na, wa lang usab magdugay napahamtangan usab dayon og technical foul.

Sama sa niaging season, ang Blazers mao usab ang nakauna sa series, 1-0, batok sa defending champion Los Angeles Lakers. Apan gipukan kini og upat ka sunodsunod nga duwa.

Alang ni Trail Blazers coach Terry Stotts nga dili na kini mahitabo pa kanila.

"We really don't make any comparisons to last year," matod ni Blazers coach Terry Stotts. "Denver's a different team than the Lakers." (JBM)

This posting includes an audio/video/photo media file: Download Now

Bucks midabodabo sa Heat; nag-una na sa series, 2-0

Posted: 24 May 2021 08:42 PM PDT

Way kaluoy nga gikastigo sa Milwaukee Bucks ang Miami Heat, 132-98 sa Game Two sa Eastern Conference best-of-seven playoffs sa National Basketball Association (NBA).

Ang star player sa Bucks nga si Giannis Antetokounmpo mipaulbo og 31 puntos samtang mitusak-tusak usab og tres si Bryn Forbes aron pangulohan ang saktong dominasyon batok sa team nga maoy mipalagpot kanila sa finals sa niaging season.

Human mabiyai sa first half, wa na gyud makainit pa ang Heat hangtod nga gibiyaan kini og kapin sa 30 puntos ug ang no.3 nga Bucks yanong mipabukad sa ilang bintaha sa series, 2-0.

Sa kinatibuk-an, ang Milwaukee mipakatap og 22 ka triples nga maoy ilang pinakadaghan sukad masukad sa playoffs. Unom niini gikan ni Forbes kinsa mitapos sa duwa nga may 22 puntos.

Ang Game 3 motapon didto sa korte sa Miami karong Biyernes (Huwebes sa US).

Sukwahi sa nahitabo sa Game One diin nagkinahanglan pa ang Bucks og overtime aron pagpukan sa Heat, 109-107, pinaagi sa jumper ni Khris Middleton, ning higayona saktong dominasyon ang gipakita sa Bucks.

Sa first quarter pa lang gani, ang Bucks nakaposte na og 46-20 nga labaw ug 78-51 sa first half. Gikan niadto padayon nisutoy paingon didto sa yanong kadaugan ang Bucks.

Si Middleton mikutlo og 17 puntos midugang og 15 si Pat Connaughton.

Si Dewayne Dedmon maoy nangulo sa napawong nga Heat nga may 19 puntos, midugang og 18 ang pointguard nga si Goran Dragic. Nakatampo usab og 16 si Bam Abedayo. (JBM)

This posting includes an audio/video/photo media file: Download Now

Fil-Am Clarkson napiling Sixth man of the Year

Posted: 24 May 2021 08:03 PM PDT

Ang Filipino-American nga si Jordan Clarkson sa Utah Jazz, ang bugtong player nga dili starting five apan naka-score og 40 puntos, maoy napiling Sixth Man of the Year sa NBA.

Napildi niya ang iya ra usab nga kauban nga si Joe Ingles kinsa maoy hugot nga nagsunod kaniya sa ikaduhang puwesto.

Kini maoy unang higayon sa kasaysayan nga managkauban sa usa ka team ang hugot nga nag-ilog sa maong individual award.

Si Clarkson mao usab ang unang Jazz player nga misakmit sa nahisgutang pasidungog.

Sa piniliay, si Clarkson mihagpat og 65 sa 100 ka mga botos gikan mga reporters nga nag-cover sa lega.

"I tried to get him the ball as much as possible so he could win sixth man of the year," matod ni Ingles sa TNT nga maoy nagsibya sa pasidungog. "No, I think his impact off the bench is something he's embraced and taken pride in."

Si Ingles nakakuha og 34 sa nahabiling 35 botos.

"Joe is a playmaker. He really runs our second unit," padayag usab ni Clarkson.

Ikatulo si Derrick Rose sa New York, ikaupat ug ikalima sila si Jalen Brunson ug Tim Hardaway sa Dallas Mavericks.

Si Clarkson nag-average og 18.4 pointss sa karon nga season ug duha ka higayon nga siya naka-score og 40 puntos - una batok sa Philadelphia niadtong Pebrero 15 ug naka-41 usab siya batok sa Golden State Warriors sa Mayo 10.

"I just really accepted it and kept rolling," dugang ni Clarkson. (JBM)

This posting includes an audio/video/photo media file: Download Now

5 ka NPA patay sa engkwentro

Posted: 24 May 2021 06:24 PM PDT

Lima ka mga rebeldeng New People's Army ang patay samtang usa ka sundawo ang samdan sa engkwentro sa alas 5:30 sa buntag sa Martes, Mayo 25, 2021 sa Cabacnitan, Bilar, Bohol.

Si Lt. Grace Remonde, information officer sa 47th Infantry Batallion, nikompirmar sa interbyu sa DYHP-RMN Cebu, nga lima ka mga NPA ang nangamatay samtang usa ang samdan sa habig sa Armed Forces of the Philippines.

Samtang nagpatrolya ang mga sundawo sa sityo Langob, ilang nasugatan ang gibana-banang 11 ka mga rebelde.

Ang Barangay Cabacnitan maoy nag-utlan tali sa mga lungsod sa Bilar ug Batuan. (ANV)

This posting includes an audio/video/photo media file: Download Now

Tigbakay gipa-raid sa mga misis

Posted: 24 May 2021 06:23 AM PDT

Mga asawa ang gipangdudahan sa kapulisan sa Dakbayan sa Sugbo nga maoy nagparonda sa usa ka tigbakayan sa Barangay Talamban sa Dominggo, Mayo 23, 2021.

Mga babaye ang nagbalikbalik sa pagpanawag sa Cebu City Police Office (CCPO) nga nagsige og report nga sila gisabaan sa mga masyada sa tigbakay.

Busa nagtuo si Police Lt. Col. Randy Caballes, hepe sa City Intelligence Unit (CIU), nga ang nagpailang mga concerned citizen mga asawa nga wa na makauyon sa pagpanugal sa ilang mga bana.

Dunay pay ubang mga sugarol nga mas pinangga pa ang mga manok kay sa asawa, matod ni Caballes.

Si Caballes nagkanayon nga daghang mga reklamo ang ilang nadawat gikan sa concerned citizens nga matag Sabado ug Dominggo kusog ang tigbakay sa lugar.

Tungod niini, ilang gihimoan og operasyon niadtong Dominggo sa alas 12:20 sa udto sa Saint Anthony, Barangay Talamban.

Sa ilang pag-abot daghan ang nanugal, apan nagkatibuwaag sa pagpanagan, siyam rang ilang nasikop.

"Sige na ni panawag last week pa. Babaye posible asawa ang nanawag. Napuno na sa iyang bana," dugang ni Caballes.

"Inig adto namo sa area kay nagtibakay daw kalit nga mawala mamingaw man, naa diay silay nga mobantay, kato nga time napuno na guro ang asawa, o silingan kay saba, gisumbong nato ato nadakpan," sumala ni Caballes.

Ang mga nasikop giilang sila si Erwin Penafort, 42; Ruel Lascuna; Hernani Ayunting, 58; Ernie Paray, 38; Ramil Oporto, 42; Ramil Tagupa, 47; Ruel Satorre, 47, Heracleo Carulasan, 51; ug Antonio Canoy, 52.

Unang siyam ka sugarol nasikop sa mga sakop sa City Intelligence Unit's sa Cebu City Police Office (CIU-CCPO) alas 12:20 sa udto Dominggo didto sa Saint Anthony, Barangay Talambam, Dakbayan sa Sugbo.

Nakuha gikan nila ang manok igtatari nga duna pay buwang ug pusta nga P660.

MGA RAID

Moabot sa lima ka mga tawo sa Dakbayan sa Lapu-Lapu nasikop atol sa pagpangronda sa kapulisan niadtong Dominggo, Mayo 23.

Unang nipahigayon og ronda ang kapulisan sa may Sitio Kamansi, Brgy Pajo dakbayan sa Lapu-Lapu alas 10:15 sa buntag.

Nangasikop sila si Adalberto Ermonte Coca, 66, ug Edgardo Vendesola Oriel, 53, pulos lumolupyo sa dapit.

Nakuha gikan nila ang duha ka patay nga manok nga gitari ug salaping gituohang pusta.

Giingong atol sa operasyon daghan ang nakadagan human nakamatikod sa pagpangronda sa kapulisan.

Sunod nga pagpangronda gipahigayon alas 2 sa hapon sa may Sitio Bayabas Brgy Canjulao diin upat ka tawo ang nasikop.

Ang nasikop nailhan nga sila si Florencio Laquida, 26; Leoncio Gonzales, 41; Moises Manigos, 28; ug Niel Sovenario, 25.

Nakuha atol sa pagpangronda ang lain usab manok igtatari ug salapi nga gituohang pusta.

Matod ni Police Master Sergeant Mer Acebron sa Gun-ob Police Station sa Lapu-Lapu City Police Office, nga mga concerned citizen ang misumbong kanila kalabot sa tigbakay.

Sa Dakbayan sa Mandaue, laing tigbakay gironda sa kapulisan sa Purok Boongan, Brgy. Cabancalan alas 2:30 sa hapon diin usa ka tawo ang nasikop.

Ang nadakpan nailhan nga si Arman Gabuda Heruela, 38.

Sa Lungsod sa Pinamungahan, pito ka mga sugarol nasikop sa tigbakayan alas 2:30 sa hapon sa Lunes sa Brgy. Guimbawian.

Si Major Vincent Zozobrado, hepe sa Pinamungahan Police Station nga nahinabi sa Superbalita Cebu, nagkanayon kanunay silang makadawat og report kabahin sa tigbakayan.

Matod pa ni Zozobrado nga sagad sa ilang nangadakpan mga construction worker ug habal-habal driver.

Samtang usa ka pastor ang nalakip nga nasikop sa 25 ka mga sugarol sa tigbakayan niadtong Dominggo sa alas 3:20 sa hapon sa Brgy. Tayud, Lungsod sa Liloan.

This posting includes an audio/video/photo media file: Download Now

Humba nakahilo sa 26 ka performers?

Posted: 24 May 2021 06:03 AM PDT

Moabot sa 26 ka mga performer sa Pentecost Charismatic celebration ang giingon nga nangalanag sa ilang gikaon nga humba.

Ang Pentecost celebration gipahigayon sa International Eucharistic Congress (IEC) Convention Center sa Barangay Mabolo, Dakbayan sa Sugbo niadtong Mayo 23, 2021.

Ang 26 ka mga performer, 16 nila ang gidala sa tambalanan, nakasinati og pagsakit sa tiyan, matod ni Msgr. Joseph Tan, spokesperson sa Archdiocese of Cebu.

Ang laing 10 kabuok gipapauli ra kay mild ra ang nasinati, matod ni Cebu City Disaster Risk Reduction and Management Office (CDRRMO) officer-in-charge Ramil Ayuman.

Matod ni Ayuman nga ang food packs nga gipanghatag atol sa selebrasyon adunay kan-on ug humba nga gisulod og plastik.

Ang nagpreparar sa food packs usa ka caterer nga taga Dakbayan sa Lapu-Lapu.

Anaa na sa Department of Health (DOH) Regional Surveillance Unit ang humba aron masusi.

Buntag sa Lunes, Mayo 24, nianunsyo ang Cebu Archdiocese nga tanan nga pasyente nakagawas na sa ospital. (JJL)

This posting includes an audio/video/photo media file: Download Now

A4 sunod bakunahan; kinsa sila?

Posted: 24 May 2021 05:53 AM PDT

GIHANGYO sa Cebu City Government ang mga tawo nga naglangkob sa A4 priority nga maghinayhinay na og rehistro online isip preparasyon sa sunod nga pagpamakuna batok sa coronavirus disease 2019 (Covid)-19.

Si Mayor Edgardo Labella, kinsa nagpabakuna na sa iyang first dose, nanawagan sa mga lumolupyo sa siyudad sanglit sila na ang sunod bakunahan.

Ang mga sektor nga apil sa A4 priority mao ang mga commuter transport (land, air, sea) ug logistics ug gisundan sa market vendors, workers sa supermarkets, groceries ug delivery services.

Apil sab ang government ug private financial services, hotels and accomodation establishments, food, beverages, pharma ug medical manufacturing, frontline food retail ug food delivery service.

Anaa sab ang frontline nga mga kawani sa mga basic higher education sector, overseas foreign workers (OFW) ilabi na sa mga molarga sa sunod duha ka mga buwan, pari, rabbi, imam ug religious leaders.

Security personnel sa mga priority sectors ug piniling industriya.

Ang mga news media frontline workers, mga kawani nga moatubang og kustomer sa utility companies.

Gituyo kini sa Siyudad sanglit hapit na mahurot og bakuna kadtong mga nagparehistro sa A1, A2, A3 priorities.

Ang gustong magparehistro, i-type lang ang PaBakuna.com nga gi-manage sa Cebu City Government ug i-fill up ang mga bakanteng espasyo para opisyal nga marehistro sanglit ang mga vaccination sites nga nahimutang sa UC Banilad, UC-Sambag-1, Robinsons Galleria ug SM Seaside City dili na modawat og walk-in beneficiaries.

Padayon pa nga nag-bakuna ang maong mga sites gamit ang Pfizer ug AstraZeneca.

This posting includes an audio/video/photo media file: Download Now

Kita sa Carbon market pil-on na unya og katulo

Posted: 24 May 2021 05:52 AM PDT

Ang pagpalambo sa karaang Carbon Public Market di lang makatabang sa mga manindahay ug mga konsumidor kon dili lapas pa sa triple ang kitaon sa Cebu City Government.

Kini ang gihulagway ni Mayor Edgardo Labella sanglit makadawat og P70 milyones ang Siyudad nga garantiya matag tuig sugod sa 2025 sa higayon nga mo-operate na ang bag-o ug modernong merkado.

"Hamugaway, limpyo ug nindot nga merkado ang atong tinguha sa pag-modernize sa Carbon Public Market. Ubos sa atong kasabutan, modawat og minilyon isip bahin sa proyekto ang Cebu City Government. Dako kining tabang aron atong mapadayon ang pagpatuman sa atong mga proyekto ug mapalapdan pa atong mga serbisyo," padayag ni Labella sa iyang Facebook post.

Sa mosunod usab nga upat ka tuig, gikan 2021, ang City Hall makadawat usa og P100 milyones gikan sa Cebu2World Development, Inc.(C2W) isip Annual Guaranteed Payment (AGP). (PAC)

This posting includes an audio/video/photo media file: Download Now

Libreng kurso sa doktor sa medisina gitanyag

Posted: 24 May 2021 05:51 AM PDT

Libre nga edukasyon alang sa mga gustong mag doktor gitanyag sa Cebu Normal University ug Vicente Sotto Memorial Medical Center (VSMMC) pinaagi sa pagtukod og College of Medicine nga muabli sa unang semester sa school year 2021-2022.

Kini gianunsyo sa kadagkoan sa duha ka institusyon lakip na ang Commission on Higher Education (Ched) sa Mayo 24, 2021.

Matod ni VSMMC chief Gerardo Aquino Jr., nagsugod ang programa sa dihang gisugyot nila sa kadagkoan sa CNU nga maghimo og College of Medicine pinaagi sa usa ka consortium.

Kini human nakita nila nga daghang mga estudyante sa medikal nga di na ipadayon ang damgo nga mahimong doktor tungod kay mahal ang pag-eskwela labi na nga pribado nga mga eskwelahan lang ang anaa niini.

Matod ni Aquino nga isip usa sab ka doctor, gusto siya nga magbilin og legasiya sa healthcare sa nasod diin maghatag og pribilihiyo ngadto sa mga kabus.

Ang College of Medicine gisubay sa programa sa RA 11509 o ang "Doctor para sa Bayan" diin i-subsidize sa gobyerno ang pag-eskwela sa mga estudyante.

Human nila mo-graduate kinahanglan sila mohatag og serbisyo sa nasod sulod sa upat ka tuig.

Karon sa panahon sa pademya, nakita sab nilang Aquino nga nagkuwang ang mga doktor sa nasod labi na sa probinsya.

Pinaagi sa maong programa, makamugna sila og mga doctor nga muserbisyo sa mga probinsya aron mahatagan og maayong serbisyo sa panglawas ang tanang Filipino, sigon ni Aquino.

Sigon ni Dr. Prosperos De Vera III, chairman sa Ched nga ang CNU-VSMMC College of Medicine ang unang publikong unibersidad nga ilang giaprobahan ilawm sa "Doctor Para Sa Bayan" Act.

Gani aron masugdan na ug andam ang maong eskwelahan, mohatag og P25 million ngadto sa P30 million ang Ched alang sa kinahanglanon nga mga ekipo sa maong tunghaan.

Sa pag-abli sa klase karong Agusto, temporaryong ipahigayon ang ilang klase sa ikatulong andana sa laboratory building sa VSMMC compound.

Karong tuiga, usa lang una ka seksyon ang ilang ablihan diin adunay 40 ka mga estudyante, sigon ni Dr. Filomena Dayagbil, officer-in-charge sa Office of the State University President.

Mikompirma siya nga nagsugod na sila sa pagpanawat og mga aplikante pinaagi sa ilang website sa www.cnu.edu.ph.

Sigon niya ang dean sa College of Medicine nagsugod na sab og pakatap og mga impormasyon kabahin sa ilang enrollment.

Ang pamaagi sa ilang klase sagol sa face-to-face ug modular.

Giawhag sab ni Dayagbil ang mga medikal nga estudyante nga buot mupadayon sa pag-eskwela aron mahimong doctor ug interesdao nga mahimong doctor sa probinsya, ang maong programa alang kanila. (KFD)

This posting includes an audio/video/photo media file: Download Now

Vincoy: ASF monitoring mas gipahugtan

Posted: 24 May 2021 05:49 AM PDT

Mas gipahugtan pa sa kagamhanan sa Lalawigan sa Sugbo ang surveillance ug monitoring niini batok African Swine Fever (ASF) sa tibuok probinsya.

Kini pinaagi sa bag-ong mga sistema nga gipatuman sa mga pantalan og sa Provincial Veterinary office (PVO) aron malikayan ang pagkuyanap sa kagaw ilabi na sa mga mo abot nga deliveries sa mga produkto sa baboy o buhing baboy sa ubang lugar.

Ang Department of Agriculture (DA) 7 una na nga nanawagan sa mga kalungsoran nga magbinantayon tungod giingong nagkaduol na ang ASF outbreak sa Rehiyon 7.

Apan si Dr. Mary Rose Vincoy, pangulo sa PVO, niingon nga nagpabiling ASF-free ang Lalawigan sa Sugbo sukad pa sa pagsulbong sa maong sakit sa ubang mga rehiyon òg lugar sa miaging tuig.

Giluwat ang Executive Order No. 8 ni Garcia niadtong Enero 2021 nga nagpugong sa pag-export sa mga buhing baboy nga gigam sa farms ug tugkaran sulod sa unom ka buwan aron makasustiner ang supply sa karneng baboy sa Sugbo.

Ingon man ang pagpanalipod sa P11 bilyunes nga hog industry sa Sugbo.

Tungod niini, dugang lakang ang gihimo sa probinsya sama sa pag-disinfect sa mga sakyanan nga mga mosulod sa hurisdiksyon sa Probinsya, pito ka adlaw nga downtime aron ma hinlo ang sakyanan, ingon man ang pag-download sa WeTrace app nga motabang sa Kapitolyo nga ma-monitor ug masusi ang impormasyon ug destinasyon sa matag delivery.

Sa Hulyo gikatakda nga mapupos na ang maong kamandoan, apan gi-panglantawan ni Vincoy ang posibleng pang ma-extend o paglibkas na niini depende pa sa resulta sa surveillance ug monitoring sa mga veterinary offices sa mga kalungsoran.

Nanawagan si Vincoy sa mga Sugboanon nga motabang usab nga mapugngan ang pagsulod o pagkatap sa kagaw sa lalawigan.

Kini pinaagi sa pagsumbong sa LGU o sa PVO kon dunay mabantayan nga dili maayong hitabo sa mga gigam nga hayop ilabi na sa mga baboy. (ANV)

This posting includes an audio/video/photo media file: Download Now

Kapin sa P250K alahas gikawat sa Akyat Bahay

Posted: 24 May 2021 05:49 AM PDT

Kapin sa P250,000 nga balor sa mga mahalong alahas gisakiyo sa wala mailhing mga sakop sa Akyat Bahay gang niadtong Dominggo sa alas 8:00 sa gabii sa sua ka balay sa Gawad Kalinga, Barangay Tubod, Dakbayan sa Toledo.

Si Juditha Bawing Rabagom, 35, minyo, molupyo sa dapit, nangayo og abag sa kapulisan sa Toledo human nadiskubrihan niya nga nangawala ang iyang mahalong mga alahas.

Si Rabagom nibutyag sa kapulisan nga duna siyay gilakaw buntag sa samang adlaw.

Gabii na siyang nabalik sa ilang panimalay, nakugang siya kay guba na ang lock sa main gate.

Sa pagsulod niya sa ilang lawak dihang nag-ilis siya sa iyang mga alahas aron hipuson.

Nakugang sab siya kay nawala na ang jewelry box nga didto tanan ang nagkadaiyang mahalong alahas.

Nasuta sa imbestigasyon nga didto miagi sa sliding window ang kawatan ug giguba sab nila ang lock sa purtahan.

Si Police Lt. Col. Junnel Caadlawon, Hepe sa Toledo Police Station nga nahinabi sa Sunstar Superbalita Cebu nagkanayon nga ang lugar walay security guard, ingon man walay CCTV camera.

Ang mga alahas naglangkob sa 3 ka gold bangles worth P60,000, usa ka 1 gold Lady bracelet nga tag P22,000, 1 ka child gold bracelet worth 6,000, 1 ka gold chain necklace without pendant (pang lalake) worth 36,000, ug uban pa.

Sumala sa kapulisan, ang tanang nawala nga alahas mobalor og P273,200.

Si Police Lt. Col. Caadlawon, niingon nga naa silay gisubay human dunay nakakita nga dunay tawo gawas sa gate sa panimalay ni Rabagom. (GPL)

This posting includes an audio/video/photo media file: Download Now

Mayor sa Toledo, bana nataptan og Covid-19

Posted: 24 May 2021 05:42 AM PDT

Padayon nga nagpaalim si Toledo City Mayor Marjorie Perales human nga kompirmadong nag positibo sa coronavirus disease 2019 (Covid-19) niadtong Mayo 21, 2021.

Gipahibalo sa mayor nga gawas kaniya, nag positibo usab sa sakit ang iyang bana nga si Konsehal Amiboy Perales.

"I just received a call from Dr. Clyde Bequilla that me and my husband Councilor Amiboy Perales have tested positive for Covid. Despite being extra careful and with religious observance of health protocol, we got infected," matod ni Perales pinaagi sa social media.

Hinuon, anaa na sa stable nga kondisyon ang magtiayon human nga nakasinati sa simtomas sa covid-19.

Gisaysay ni Perales nga naglain na iyang paminaw niadto pang Lunes sa miaging semana human siya maniudto.

Nakasinati usab siya og "flu-like symptoms" hinungdan nga dali kining nipauli sa iyang panimalay human nga nakasinati og taas nga temperatura sa hilanat hinungdan nga mipaubos na siya sa swab test.

Tungod niini, gipasira una ang Mayor's office hangtod sa Mayo 26 alang sa paghinlo ug pag-disinfect sa palibot.

"Disinfection has been done with our offices and CMO will be temporarily closed until Wednesday (May 26, 2021). As of this writing, our condition is stable and we are currently coping up with the signs and symptoms of Covid," dugang sa mayor.

Bisan pa niini, nanawagan si Perales nga mag monitor o ba kaha mag-isolate usab sa kaugalingon ang tanan nga nakahimamat kanila pagsiguro nga luwas sa sakit.

"With this unfortunate turn of events, let me remind everyone to continue being vigilant and observe necessary health protocol," dason niya.

Si Perales maoy ika-12 nga mayor sa lalawigan sa Sugbo nga nataptan sa maong sakit.

Gawas kaniya, lakip usab sa mga nakaagi sa samang sakit mao sila si Mandaue City Mayor Jonas Cortes, Talisay City Mayor Gerald Anthony Gullas, Daanbantayan Mayor Sun Shimura, Lapu-Lapu City mayor Junard Chan, Tuburan Mayor Danilo Diamante, Asturias Mayor Antonio Pintor, San Fernando Mayor Lakambini Reluya, Alcoy Mayor Michael Angelo Sestoso. Ginatilan Mayor Dean Michael Singco, Oslob Mayor Jose Tumulak, ug Dalaguete Mayor Jeffrey Belciña. (ANV)

This posting includes an audio/video/photo media file: Download Now

Grader nagpusil sa iyang kaugalingon, namatay

Posted: 24 May 2021 05:40 AM PDT

Ormoc City--Nagpusil sa iyang kaugalingon ang usa ka grade 11 student sulod sa iyang kuwarto sa ilang panimalay sa Barangay Soro-Soro, Maasin City, Southern Leyte, Dominggo, Mayo 23, 2021.

Giila ang biktima nga si Vince Lloyd Neri Labastida, 18, senior high school student.

Pasado ala 1:00 sa hapon sa naasoy nga adlaw, nadawat sa kapulisan ang impormasyon gikan ni Police Master Sergeant Arvin Gahol nga dunay nahitabong paghikog sa ilang lugar.

Dali nga girespondehan sa kapulisan ang maong report ug gipakordon ang area sa ilang pag-abot.

Base sa imbestigasyon sa kapulisan, alas 9:30 sa buntag sa samang adlaw, samtang nag-istorya ang iyang mga ginikanan kauban sa usa ka Mario Lolo sa ilang terrace, gisigehan nila og tawag si Vince kay suguon og lamas sa ilang sud-an paniudto.

Atol sa ilang storya, kalit sila nga nakabati og kusog nga buto.

Gitinawag nila ang ilang anak apan wala'y nabati nga tubag. Nahibong usab ang ginikanan kung nganong sirado ug naka-lock ang pultahan sa kwarto ug wa nila makita ang yawe.

Nakadesisyon ang amahan nga usa ka retired army nga moagi sa likod ug gibuak ang bentana sa kwarto.

Nibalandra sa amahan ang lawas sa iyang anak nga naligo na sa iyang kaugalingong dugo gumikan sa naangkon nga samad sa dughan nga resulta sa hinanali nga kamatayon.

Nakit-an sa amahan ang kalibre .45 nga pistola nga giisyu sa lokal nga kagamhanan sa Maasin kay nagsilbi kini nga bodyguard ni Vice Mayor Maloney Samaco.

Nakita usab sa kapulisan sa crime scene ang usa ka basiyo sa kalibre .45 ug suicide notes.

Padayun karon nga gisusi sa kapulisan ang mga ebidensya aron maestablisar ang hinungdan sa kamatayon niini.

Wala' nakita nga foul play ang kapulisan sa kamatayon ni Vince. (JKDP)

This posting includes an audio/video/photo media file: Download Now

Martin: ‘Ang Probinsyano’ layo pa sa ending?

Posted: 24 May 2021 05:22 AM PDT

Sa mga nangutana kon tinuod bang matapos na ang "FPJ's Ang Probinsyano" sama sa giingon ni Angel Aquino nga naa na sila sa "ending mode"?

Apan sa akong tan-aw murag dili pa gihapon.

Si Angel sa interbyu sa vlogger nga si G3 San Diego nitug-an nga naka-skedyul na sila sa "ultimate last lock-in taping" apan posible sad kunong ma-extend pa kon dili mausab ang hunahuna sa ABS-CBN.

Di ba taudtaud na ning gihugonhugon nga tapuson na ni karong tuiga kay molansar si Coco sa pagka-senador? Apan sa dagan sa ilang estorya murag di pa gyud.

Karong semanaha ipakita nga naka-eskapo si Ramil (Michael de Mesa) gikan sa pundok nilang Lito Valmoria (Richard Gutierrez) ug kusog kaayo ning nipadagan sa iyang sakyanan aron maunhan niya ang grupo nilang Renato Hipolito (John Arcilla) ug Jacob Serrano (Marc Abaya) nga padung nang mosung sa gitagoan sa Task Force Agila.

Nagdali si Ramil aron maingnan niya silang Coco nga dunay padung nga kontra. Samtang mao say pagbalik ni Coco niadtong higayona sa Task Force Agila bitbit ang bihag niyang si Police Captain Lia Mante (Jane de Leon).

Apan naka-eskapo gihapon silang Coco gikan nilang Hipolito ug nakakita na sad sila og bag-ong lungga nga kataguan. Plus ma-in love ang karakter ni Jane kang Coco. Sa akong tan-aw modagan pa gyud nig pila ka buwan. Ang FPJ's Ang Probinsyano mag-6 na katuig karong September 28.

MISS U 2021

Di ba sakto ang akong fearless forecast ni Rabiya Mateo nga maglisud siya og sud sa Top 10?

Pero kon madayon ang Cebuanang si Steffi Aberasturi nga moapil sa Miss Universe Philippines karong tuiga nan dako kaayog tsansa nga siya ang modaug.

Si Steffi ang undefeated beauty queen from Cebu. Siya ang Bb. Cebu 2018, Miss Beauche International 2015, Reyna ng Aliwan 2014, Miss Mandaue 2013, Miss Campus Femme 2012, Miss IPI 2012 ug Sinulog Festival Queen 2011.

GISAWAY

Gibahaan og saway sa mga netizen ang community pantry ni Aida Patana kauban si Claudine Barretto niadtong Sabado tungod sa wa nila pagsul-ob og mask.

Daghan ang nagduda nga dunay bulok pulitika ang maong kalihukan ug gihulagway ni nga fake public service. Duna sad hinuoy mga nilaban ni Aida apan maihap ra.

This posting includes an audio/video/photo media file: Download Now

Editoryal: Mas makalilisang

Posted: 24 May 2021 05:19 AM PDT

Mokabat sa 2,161 ka mga negusyo ang wa na mo-renew sa ilang business permit sa Dakbayan sa Sugbo sa 2021. Nagpasabot nga wa na sila mobalik sa pag-operate, nanirado sa hingpit. Kada establisemento dunay mga trabahante busa, apil usab silang nangawad-an sa trabaho.

Kini sa Dakbayan sa Sugbo lang. Unsa kaha sa ubang mga dapit sa Sugbo, pila kaha ang nanirado ug nangawad-an og trabaho? Seguradong liboan pud.

Sakto ang hukom ni Gobernador Gwendolyn Garcia sa pagbukas na sa turismo sugod sa uwahing bahin sa 2020. Daghan sa tour sites kasamtangang nanira, apil na ang resorts, kay wa na may mga. Sa pagbukas, nabalik sab ang panginabuhi.

Nakita usab nga bisan sa pagbukas sa tour destinations, wa mosaka ang kaso sa mga nangasakit og coronavirus disease (Covid-19). Gani, ang gibasol sa pagsaka niadtong Enero mao ang holidays. Sa uwahing bahin sa Marso nagsugod na sab kini og kanaug human usab nga way puas ang pagdili sa mga awtoridad sa mga tapok.

Ang pagbukas sa mga establisemento dako og gikatabang sa pagpabalik og hinayhinay sa ekonomiya. Sa mas dako nga hulagway, mas dako kini og gikatabang sa ordinaryong mga tawo nga nakulban sa panginabuhi sulod sa daghang mga buwan.

Tungod niini, pila kaha ka mga anak ang hingpit nga nakaundang sa pagtungha kay bisan sa pagpalit og yanong galamiton wa nay mahikap, o kaha mibalhin og tunghaan kay wa nay hapit ikagasto ang mga ginikanan? Ilang prayoridad ang pagkaon ug uban pang inadlaw nga panginahanglan.

Makalilisang tuod tan-awon ang mga numero sa nangatakdan sa Covid-19 nga kada adlaw gipagawas sa kagamhanan isip updates, labina sa nangamatay. Apan ang wa makitang numero nga epekto sa mga lockdown, seguradong mas makalilisang ug mas daghan ang mga makaluluoy bisan wa mangasakit sa Covid. Kini ang numero nga wa makita.

This posting includes an audio/video/photo media file: Download Now

Nalzaro: Dili magpili og bakuna

Posted: 24 May 2021 05:19 AM PDT

Gumikan kay daghan ang mipabor nga matusukan og Pfizer nga bakuna, nakadesidir ang kagamhanan nga dili na ipahibalo ang brand sa vaccination sites. Daghan man ang maglinya sa Pfizer kay sa Sinovac sa China ug AstraZeneca sa United Kingdom. Apan gikinahanglan usab nga pahibaw-on ang vaccinee o magpabakuna kon unsang matang sa bakuna ang itusok kaniya. Usa kini sa mga katungod sa pasyente nga pahibaw-on sila kon unsa ang medisina nga idapat. Ang Department of the Interior and Local Government (DILG) mimando na sa local government units (LGUs) nga di ipahibawo ang brand.

Dili kalikayan nga mopili ang mga tawo sa hinimo sa Amerika kay sa China-made o UK-made. Naa pa man kining atong "Western mentality" nga pulido ug kasaligan ang mga produkto gikan sa Estados Unidos itandi sa mga produkto nga gikan sa laing, nasud labi pa gikan sa China.

Pero matod pa sa experts sa medisina, ang tanang bakuna pareho ra. Hinuon, nagdepende lang sa marketing strategy sa manufacturer o advertisements sa kompaniya nga naghimo. Nagkalain-laing efficacy o effectivity rate ang gipasiatab sa manufacturers. Ang importante mabakunahan ta.

NAGDUHA-DUHA

Adunay pagtuon sa 2010 nga nagkanayon: "Too much choice can produce paralyzing uncertainty, depression and selfishness." Kon daghan kag kapilian mosangpot sa pagka-wala kasiguruan, depresyon ug kahakog. Sama niini karong paglumbaanay sa pagdawat sa bakuna nga ngilngig og brand itandi sa "pipitsugin" o "wala ilhi." Bisan asa kita molingi, ang atong kahiladman mopili sa mahalon nga brand gikan sa Amerika nga gipublikar nga labing taas og efficacy o kaepektibo.

Bisan pa sa pasalig sa mga eksperto nga kining 'dili ilado ug mahalon' nga brand makatabang gihapon aron malikay kita sa balatian. Sa ato nang giingon, duha ra ka klase ang vaccine hesitante. Kadtong dad-unon ug pugsonon, pero magpabakuna ra gihapon ug kadtong dili magpabakuna nga bisag bitayon pa. Way brand sa bakuna nga makakumbensir kanila pag-usab sa ilang huna-huna. Samtang kadtong nagpanagana anha na tingali moadto sa vaccination sites kon wa nay bakuna. (bobbygnalzaro@gmail.com)

This posting includes an audio/video/photo media file: Download Now

Espinoza: Hinungdan sa kahadlok?

Posted: 24 May 2021 05:19 AM PDT

Akong pasalamat sa atong nasudnon nga kagamhanan ingon man sa dakbayan sa Mandaue sa libre nga bakuna ug labina sa atong Diyos Makagagahum nga nakahoman na ko sa ikaduha nga tupok sa bakuna batok sa Covid-19 sa miaging semana. Kalooy sa Diyos walay grabe nga reaksyon nga akong gibati bisan og hubakon ko gawas sa mora'g bug-at akong ulo upat ka oras gikan sa paginjection. Apan nawala ra sa pagtomar nako og paracetamol.

Mga higala pabakuna namo samtang naa pay libre nga bakuna karon.

Kaniadto sa elementarya pa ko sa among lungsod sa Cagwait, Surigao del Sur, ang taga Provincial Health Office moadto sa kalungsoran aron mobakuna sa mga estudyante batok sa tipdas ug uban pa. Ako ug ang akong mga klasmeyt sa Grade One isog nga nagpabakuna.

Dunay reaksyon ang atong panglawas sa bakuna. Ako gihilantan ko og tolo ka adlaw human ko gibakunahan sa batok sa tipdas. Apan basi sa akong mahinumdum, walay mga bata o akong klasmeyt sa among lungsod nga nahospital o namatay tungod sa bakuna. Dunay pagtuon nga dili epektibo ang bakuna kon walay bation ang tawo sa iyang panglawas human sa bakuna.

Didto sa among dapit kaniadto, makahibawo ra mi sa dagko nga storya o balita gikan radyo sa among silingan, nga sipa kaayo ang tingog. Apan ang katawhan kaniadto, labina sa among lungsod nga mosakay pa og pumpboat aron makaadto sa Kapitolyo sa Tandag kay wala pa may karsada, way kahadlok ug dili magduda sa ka epektibo sa libre nga tambal sama sa bakuna nga ihatag sa kagamhanan.

Usa ka posibilidad nga dunay nagrabehan sa bakuna kaniadto apan wala mahibaw-i niadtong panahona tungod sa kakuwang sa impormasyon. Apan sa atong panahon karon nga gitawag nga "IT Age", ang kadaghanan sa mga tawo, lakip na ang mga bata, dunay cellphone ug internet connection. Tungod niini, dali ra ang kadaghanan kanato makahibawo sa panghitabo dinhi sa atong nasud ug tibuok kalibutan.

Ang social media sama sa Facebook, Twitter, What's app ug uban pa, dunay kaayohan nga ikahatag sa katawhan apan dunay dili usab maayo nga epekto tungod kay dili man kontrolado sa social media ang mga storya nga mogawas dili sama sa balita sa mainstream media sama mantalaan, radyo ug television, nga ang mga storya o balita moagi sa editor usa mapublikar, nga ang husto ug tinuod ra nga balita ang atong mabasahan o mahibaw-an.

Sa akong pangagpas, usa sa mga rason nganong daghan pa gihapon sa atong mga higala ug kaigsoonan nga nitalaw pa o kabalaka nga magpabakuna batok sa Covid-19 kini tungod sa nanggawas nga mga storya sa social media nga dili maayo sama sa mga tumo-tumo, o di ba mga komedya lang apan nakahatag og kahadlok sa ubang' tawo.

This posting includes an audio/video/photo media file: Download Now

Mongaya: Di mamili og bakuna?

Posted: 24 May 2021 05:18 AM PDT

Nangusog karon ang kagamhanan nga ang publiko dili mamili og bakuna. Gibuhat kini karon human mas daghan ang nagpunsisok nga magpabakuna og Pfizer didto sa kaulohan. Mingaw man gud kon Sinovac ang itusok.

Sa akong tan-aw, ang mga lakang nga ingon niini makapasamot hinuon sa kakulang sa kumpyansa sa katawhan niining pagbakuna. Makahibulong man gud nganong ipamugos gyud nang Sinovac, ang bakuna nga gikan sa China ug grabing pasalamat ni Presidente Rodrigo Duterte.

Apan, sa ngadto ngadto, lain diay nga bakuna nga gikan og China ang iyang gipa-inject sa iyang kaugalingon. Niadtong tungora, wa pa gyuy pagtugot sa atong Food and Drug Administration (FDA) ang Sinopharm.

Karon, naay balita nga pipila ka nasud di mopasulod sa ilaha kon nabakunahan og Sinovac. Buot ipasabot, looy kaayo ang mga OFW nga naturokan og Sinovac kay dili sila makasulod sa Saudi Arabia pananglit.

Di mahimong dili makahibawo ang mga molarga sa gawas kon unsay klase sa bakuna ang anaa inig pabakuna niya.

Hinuon, alang kanako, alang sa walay planong molarga sa gawas, ok ra kanang Sinovac. Sa akong pangagpas, pareho lang kini ka epektibo sa ubang mga bakuna.

Apan alang sa nanagana batok sa usa ka klase sa variant sa virus sa Covid-19, mas epektibo kuno ang Pfizer ug Astrazeneca.

Matod pa, basi kini sa pagtuon sa mga bag-ong variant sa gawas.

Sa miaging Huwebes, nagpabakuna ko sa Lagtang Gym diri sa Syudad sa Talisay. Tayming nga AstraZeneca ang bakuna nga naa.

Matod pa, usa kini sa isog nga bakuna. Apan buhi pa man ko karong nagsulat niining lindog. Wa say nabalita nga naigo sa grabing side effects. Mura lang gyud noon og nabun-og ang akong tuo nga abaga hangtod karon. Hehehe.

Usbon lang nako og asoy dinhi ang gihisgot sa akong amigo.

Matod pa niya, daghan daw ang nanghadlok dihang nakadesisyon siya og pabakuna labi na nga senior citizen ug daghang mga sakit-sakit.

Bisan pa man, niadto siya sa Lagtang Gym aron mosud-ong lang ug maniid sa pagpamakuna diri sa Syudad sa Talisay.

Apan, dihang nakita niya ang gatusan sa mga senior citizens nga nagpatusok, niingon siya nga kadaghan diay nilang mangasakit kon tinuod ang mga pagpanghadlok. Daw mahurot ang mga tiguwang sa Talisay. Nidiritso siyag linya oi. (DM nako sa @anol_cebu)

This posting includes an audio/video/photo media file: Download Now

Tambagi ko Noy Kulas: Silahis

Posted: 24 May 2021 04:57 AM PDT

Dear Noy Kulas,

Tagua lang ko sa ngan nga Zandro. Ang akong problema kay kini akong gibati. Sukad pagka bata, murag na kog naay pagka bayoton. Ma attract kog babaye ug ma attract pud kog lalake. Pero mas labaw akong attract sa lalake.

Kini akong padayonan akong gibati, nga mahimo ko isip homosexual, maluoy kong maghuna-huna sa akong mga ginikanan kay kami kompleto na. Naay babaye, lalake ug tomboy nga igsuon. Sa karon, naa gihapon tay gender discrimination. Need ko sa imong advise. Tambagi ko.

Daghang Salamat. More power and God bless!

ZANDRO

Zandro,

Angay bang ikauwaw kon ipakita mo nga bayot ka? Daghan sa mga bayot nga nagpakita sa ilang pagkatinuod girespeto man. Ang imong buhaton, sama anang mangabuso og bata kay pedophile, mao nay angay ikauwaw. Di ang pagkabayot ang ikauwaw.

Kadaghan sa mga bayot nga inila ug girespeto sa lainlaing field. Kadaghan sa mga bayot nga maoy nahimong breadwinner sa pamilya ug maoy nakahaw-as sa kalisod tungod sa mga diskarte. Gitahod ug gipangga sila sa pamilya ug komunidad.

Sa ato pa, di ang pagkabayot maoy isyu, kon di ang action o buhat. If you are doing okay, nganong ikauwaw mo man ang pagkasilahis?

Kon makigrelasyon ka usab og lalake, hayan di na ka masilahis, padung na ka sa hingpit nga pagkabayot. I know some cases nga maoy nahitabo nila. Sila mismo akong naestorya personal. Busa, kon mahimo, babaye ang himoang karelasyon.

NOY KULAS

This posting includes an audio/video/photo media file: Download Now

Aboitiz Group mipalit og bakuna, misuporta sa post-Covid recovery

Posted: 24 May 2021 04:57 AM PDT

Ang Aboitiz Group miapil sa Asia-Pacific Economic Cooperation (Apec) Business Advisory Council Philippines (Abac) sa kampanya alang sa mas hugot nga regional cooperation sa pagpalambo sa business environment nga nakatutok sa pagpahiuli sa ekonomiya ug pagpaangat niini.

Si Aboitiz Group president and CEO Sabin Aboitiz namalandong sa pamahayag ni Abac Chair Rachel Taulelei alang sa ikakuhang tigom sa Apec senior officials kon unsay nahimo sa World Trade Organization (WTO) samtang ang rehiyon nagsugod na sa pagsubay ngadto sa pagpanday sa iyang ekonomiya sa post-Covid nga kalibotan.

"Drawing on our own experience, we believe partnerships between government and business leaders of Apec economies will lead to a more equitable and inclusive system that will fill gaps in resources..." matod ni Aboitiz.

Si Aboitiz nisubli sa panaad sa iyang grupo sa kompaniya sa pagpatabang sa mga komunidad ug pagseguro sa kaluwasan sa katawhan samtang mamahimong kabahin sa pagpatuyok sa ekonomiya..

"The important lesson from 2020 is all about our great responsibility as a business to the communities we serve," matod niya.

Ang WTO kanunay nahimong kabahin sa rehiyonal ug global nga paglambo, si Taulelei nipasabot nga kinahanglan nga 'lig-on ug updated' sa ilang papel aron mas makahuluganon ug motubag sa panginahanglan sa stakeholders.

Pinasubay sa baroganan sa Abac bahin sa pagbakuna isip nag-unang lakang sa pagpahiuli sa ekonomiya, ang Aboitiz Group nakisabot sa ubang private companies sa pagdala og Covid-19 vaccine sa Pilipinas.

Katunga sa mga bakuna gihatag sa kagamhanan alang sa identified priority sectors, ug ang laing katunga alang sa paggamit sa private companies kansang mga kawani nalinya sa economic frontliners.

"It will take a little while for our economy to regain momentum but we will do our part to ensure that we remain on the right course," matod ni Aboitiz.

"In keeping with our brand promise of advancing business and communities, we will work closely with our stakeholders in the government and private sector as we strive to be a key player for economic recovery in a better normal," dason niya. (PR)

This posting includes an audio/video/photo media file: Download Now

Spence inilog sa pustaanay batok Pacquiao

Posted: 24 May 2021 04:57 AM PDT

Ning sayo pa lang nga bahin, gitan-aw nga biya si Manny Pacquiao nga mosaka ibabaw sa ring sa dihang iyang ikasangka ang wala pay pildi nga si Errol Spence karong Agusto 21, 2021 sa Las Vegas.

Taho gikan sa Las Vegas, ang gitawag og Sin City, nga si Spence, kinsa modepensa sa iyang World Boxing Council (WBC) ug International Boxing Federation (IBF) welterweight titles, inilog sa pustaanay og -450 samtang ang kang Pacquiao +350.

Sa ato pa, ang mopusta ni Pacquiao og $100 modaog og $350 samtang ang motaya ni Spence og $450 makakobra lang og $100 kon modaog.

Mao kini ang senaryo karon sa pustaanay sa Las Vegas. Hinuon, sama sa nanglabay mga away ni Pacquiao, posibling mausab pa ang dagan niini.

Si Chris Algieri, kinsa nakatilaw na usab og kapildihan ni Pacquiao, miingon nga dili makompiyansaan ang fighting senator tungod sa kusog, abtik ug depensa niini.

Iyang gihulagway nga nindot kining maong panagsangka tungod sa tagsatagsa ka abilidad nga gihuptan sa duha ka mga boksidor.

Si Algieri, kinsa nagbase sa New York, napildi ni Pacquiao pinaagi sa unanimous decision niadtong 2014 sa Macau.

Apan ang 37-anyos nga si Algiere, bisan tuod og atoa ni Pacquiao ang iyang sempatiya, adto siya mopusta ni Spence, kinsa mi-knockout kaniya sa ikalima nga round niadtong Abril, 2016.

Kini tungod sa edad, gidak-on ug lig-on usab kaayo nga iyang gihulagway nga all-around fighter.

"My heart's with Pacquiao but my betting line is on Spence," ni Algieri pa sa usa ka interbyu.

Sulod sa hapit duha ka mga tuig, kini maoy unang away ni Pacquiao samtang si Spence nakaaway niadtong Disyembre, 2020 diin iyang gipildi sa desisyon ang Mexicanong si Danny Garcia. (JBM)

This posting includes an audio/video/photo media file: Download Now

Fajardo nagpanikad nang mobalik og duwa

Posted: 24 May 2021 04:48 AM PDT

Gipabuhagay sa San Miguel Beermen nga anaa na maayong kondisyon ang higanteng Sugboanon nga si JuneMar Fajardo human sa pipila ka mga adlaw sa pag-apil niini sa ilang bubble training sa Batangas City Coliseum.

Hinuon giklaro ni San Miguel team manager Gee Abanilla nga gibantayan pa og maayo sa ilang physical therapist ang kondisyon sa produkto sa University of Cebu (UC) Webmasters.

Naangol ang tuo nga bitiis ni Fajardo niadtong Pebrero, 2020 atol sa praktis sa Beermen nga maoy hinungdan nga wala siya nakaduwa sa tibuok bubble event sa miaging season sa Philippine Basketball Association (PBA).

Nagpanikad na og maayo si Fajardo nga makaduwa'g balik apan gipasabot ni Abanilla nga dili nila ahaton ang pagbalik ni Fajardo kon sa ilang tan-aw dili pa hingpit ang pagkaalim sa angol niini.

"June Mar is getting better and stronger by the day. Yet we are still taking it one day at a time. He is still closely monitored by our PT but he looks fine," pasabot ni Abanilla nga napatik sa www.pba.ph.

Sa sayong bahin ning buwana, niapil na si Fajardo sa online training sa Beermen una kini misalmot sa aktuwal nga praktis sa 1989 Grandslam winner squad. (ESL)

This posting includes an audio/video/photo media file: Download Now

Donaire aduna pa’y dakong pangandoy

Posted: 24 May 2021 04:48 AM PDT

Gibutyag ni Nonito "Filipino Flash" Donaire nga taliwala sa iyang pangidaron, aduna gihapon siya'y dakong pangandoy sa boksing nga sa iyang tan-aw kaya niyang maabot.

Sa edad nga 38, si Donaire nakalangkat na og world titles sa upat ka managlahing weight divisions unya nahimo siyang Fighter of the Year niadtong 2012.

Apan giklaro ni Donaire nga dili pa siya kuntento niini ug aduna pa siya'y gustong makab-ot sa dili pa siya moretiro.

"I have a dream which is to be the undisputed bantamweight champion," matod ni Donaire sa interbyu sa www.boxingscene.com.

"At 38 years old, I think I am capable of doing it."

Ang unang lakang nga pagabuhaton ni Donaire mao ang pag-ilog sa korona ni World Boxing Council (WBC) bantamweight champion Nordine Oubaali sa ilang away sa Mayo 29, 2021 sa Carson, California.

Human niini, mahimo na siyang manuktok alang sa laing mayorihiyang mga titulo.

Ang World Boxing Association (WBA) ug International Boxing Federation (IBF) bantamweight titles nga gigunitan ni Naoya "Japanese Monster" Inoue samtang ang World Boxing Organization (WBO) nga bersyon gihuptan sa laing Pinoy nga si Johnriel Casimero.

"I feel good," matod ni Donaire kabahin sa ilang away ni Oubaali.

"At 38 years old, I have had to change some things, take good care of my diet, train much better, but if I continue to feel this way, I will be able to fight for 5 or 10 more years."

Giangkon ni Donaire nga dili bastabasta nga boksidor si Oubaali hinungdan nga nangandam siya'g maayo alang ning awaya.

"We are ready to give a great fight and show that I am better than Oubaali. Without a doubt I believe that I am capable of knocking him out," dugang ni Donaire.

Gipasabot ni Donaire nga wala pa nakakontra si Oubaali og sama niya'g abilidad.

Si Donaire naggunit og 40-6, 26KOs nga rekord samtang si Oubaali, kinsa lumad nga taga France, naghupot og 17-0, 12KOs nga baraha. (ESL)

This posting includes an audio/video/photo media file: Download Now

at

No comments:

Post a Comment

Subscribe to: Post Comments (Atom)

End of Summer Sale ☀️😎

20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...