Tuesday, June 8, 2021

https://www.sunstar.com.ph/

https://www.sunstar.com.ph/

Liquor permit kanselahon kon molapas sa protocol

Posted: 08 Jun 2021 06:41 AM PDT

Pagkanselar sa special liquor permit maoy isilot ngadto sa mga restaurant bar owners nga mapamatud-an nga nagpabaya sa ilang obligasyon sa pagsunod sa minimum health requirement batok sa coronavirus disease (Covid-19).

Si Mayor Edgardo Labella nibutyag nga angay sundon sa mga tag-iya ang mga health protocol aron malikayan ang pagkatap sa virus sa dakbayan sa Sugbo.

Sa kasamtangan, adunay di mominos 10 ka mga establisemento ang gipaubos sa imbestigasyon sa Business Permit and Licensing Office (BPLO).

"Atong giimbistigar ug makita nato nga kon aduna gyuy kalapasan, then we might cancel the liquor permit nga atong gihatag," padayag ni Labella.

Samtang gihulagway sa mayor nga adunay posibilidad nga ibalik ang liquor ban kon di na mopatuo ang mga bar owner ug kustomer sa mga health protocol nga gipatuman subay sa kamanduan Inter-Agency Task Force (IATF).

"If there is a massive violation, possibility is not remote," dugang ni Labella.

Ang mayor nilibkas sa liquor ban sa Mayo human sa hangyo sa mga negusyante aron makabalik na og negusyo kadtong mga restaurant bar owner nga nagtanyag og ilimnon nga makahubog. (PAC)

This posting includes an audio/video/photo media file: Download Now

Dunay NPA sa Sugbo? Hayan nia lang namahuway, naglunglinghayaw

Posted: 08 Jun 2021 06:40 AM PDT

Hepe sa kapulisan sa Probinsya sa Sugbo nitug-an nga wala nila wad-a ang posibilidad nga naay presensya sa mga sakop sa New People's Army (NPA) sa lalawigan bisan kon giila ang tibuok Sugbo nga "white area."

Tungod niini, hugot nga pagbantay ang gihimo karon sa mga police station sa kalungsuran ug unom ka mga siyudad.

Una nang giila ang tibuok isla sa Sugbo nga white area sa walhong grupo, apan wa wad-a ang posibilidad sa kapulisan sa probinsya nga adunay mga miyembro sa NPA dinhi nga namahuway lang ug naglulinghayaw.

Matod ni Police Colonel Engelbert Soriano, hepe sa Cebu Provincial Police Office (CPPO), nga dili malimod nga adunay mga propaganda ang political wing sa mga NPA sa mga lungsod hinungdan nga sila hugot nga nag-monitor.

Dugang ni Soriano nga tungod sa kadako sa isla sa Sugbo, hayan dunay mga rebelde nga nagpahulay ug naglingaw-lingaw sanglit duol ra ang isla sa Negros ug dali ang pagtabok.

"While we categorized Cebu province as a white area, hindi namin dini-discount ang presence nila dito sa probinsya natin. Alam din po natin na may propaganda agitation and mobilization ang hanay nila dito po sa ibang municipalities dito sa ating probinsya. So, we are very much in monitoring the situation," matod ni Soriano.

Apan dako ug matabang niini ang pag mugna sa Kabataan Kontra Droga at Terorismo (KKDAT) sa Dakbayan sa Toledo niadtong miaging semana.

Nalipay si Soriano sa gipakitang suporta sa kabataan sa gobyerno ilabi na ang pagbatok sa illegal nga drugas ug terorismo sa ilang tagsa-tagsa ka mga dapit.

Usa sa mga hinungdan nga gilusad sa kapulisan ang KKDAT aron malikay ang mga batan-on nga malambigit sa walhong grupo nga makaguba na hinuon sa ilang kaugmaon.

"Kasi ang unang una ang purpose nito is to take them away from possible involvement sa drugs at saka sa terrorism. Yung ang unang purpose, pag na recruit mo sa KKDAT medyo malayo na yan malinlang ng kalaban ng gobyerno," dugang ni Soriano. (AYB)

This posting includes an audio/video/photo media file: Download Now

Misis, mga ugangan gikihag pagpatay sa NBI 7

Posted: 08 Jun 2021 06:36 AM PDT

Asawa, mga ugangan ug uban pa gilambigit sa pagpatay sa usa ka 31 anyos nga lalake nga taga Barangay Manglagtang, lungsod sa Tabogon nga napalgang patay sa 2020.

Ang asawa nga si Gerlaine Deligero Potot gipasakaan og kasong murder apan usbon kini sa parricide sa National Bureau of Investigation (NBI-7) sa Hulyo 7 sa kamatayon sa iyang bana nga si Romneck "Pak-an" Potot.

Si NBI 7 agent Aga Gierran nibutyag nga lakip sa gikihag murder mao ang mga ungan nga sila si Fausto Gerry "Tatay" Deligro, Emilda "Emmy" Deligro.

Giapil pagikiha sila si Willin "Willie" Sopsop, Zalde "Uncle Titing" Sopsop, Jose "Otik" Bandojo, Arlene "Em-Em" Deligro, Alyas "Digoy" ug usa nga wala pa mailhi.

Niadtong Hulyo 2020, si Romneck nakit-ang patay 20 ngadto sa 30 metros gikan sa panimalay sa iyang mga ugangan kon diin sila nag-ipon pagpuyo sa iyang asawa.

Subay sa imbestigasyon sa NBI 7, di heart attack ang namatyan ni Romneck apan bayolenteng gipatay tungod sa mga nakitang samad sa liog niini.

Giingong niadtong Hulyo 17, 2020, sa wa pa ang duguong hitabo, si Romneck dunay gilakaw sa tunghaan sa Manglagtang.

Sa gabii na niana, nakadungog na ang mga silingan og tinubagay, diin nadunggan na nga nagpakitabang si Romneck samtang nakig komprontase ang asawa niini nga nisyagit og "Husto na, husto na."

Human niini, wala na madunggi sa mga silingan ang siyagit ni Romneck.

Nawala si Romneck, apan nahibawo ang iyang pamilya niadto lang Hulyo 19, 2020. (ANV)

This posting includes an audio/video/photo media file: Download Now

Editoryal: Gwen gisanta na sad

Posted: 08 Jun 2021 06:33 AM PDT

Nabalik na unta ang direct flights gikan sa gawas sa nasod sa Mactan Cebu International Airport (MCIA). Naunsa man ang Malacañang nga miluwat og laing memorandum nga nag-divert na sa susamang flights ngadto sa Mactan Cebu International Airport (MCIA) sugod niadtong Hunyo 2 ngadto sa Hunyo 12, 2021.

Nganong kahagapon, Hunyo 8, lang gipagawas ang memo sa Malacañang? Gihuwat kaha nila ang pamahayag ni Governor Gwendolyn Garcia sa sundon nga protocol sa MCIA?

Sa unang memo sa pagpa-divert sa flights wala tino nga pagpasabot. Apan ning ikaduha, gipaklaro nga ang polisiya nga gilatid sa Inter Agency Task Force (IATF) alang sa moabot nga overseas Filipino workers (OFWs) ug returning overseas Filipino (ROFs).

Human nibarog si Garcia sa iyang Executive Order 17 nga dunay enobasyon sa mando sa IATF ug ang pagpatunhay sa gobernador sa iyang gahom nga nakalatid sa Local Government Code (LGC).

Ang IATF nagmando sa pag-quarantine sa OFWs ug ROFs ug sa ika-pito ka adlaw na kini i-swab kon dunay simtomas sa Covid-19.

Subay sa EO ni Garcia, ang OFWs.ROFs i-swab ining abot sa MCIA ug magpaabot og tulo ka adlaw sud sa usa ka hotel sa resulta sa test. Kon negative, pwede na makapauli ug mag-home quarantine sa pagkompleto sa 14-day quarantine.

Walo ka mga kongresista sa Sugbo ug mga mayor sa dakbayan sa Sugbo, Mandaue ug Lapu-Lapu ang ninglagda og manifesto niadtong Hunyo 7, 2021 nga nagsuporta sa baroganan ni Garcia.

Dili ba masiip nga insulto ang paglangay sa pagpagawas sa ikaduhang memo sa Malacañang? Nakamugna kini og kalibog sa direktang moagi sa airport sa Sugbo gikan sa gawas nasod.

Ug seguradong nga kini makaapekto sa alyansa sa administrasyon sa nasod ug liderato sa Sugbo kon dili kini mahilot dayon.

This posting includes an audio/video/photo media file: Download Now

Lonzon: Mopahuway una ang mayor

Posted: 08 Jun 2021 06:33 AM PDT

Dugang tulo ka semana ang pagpahuway ni Cebu City Mayor Edgardo Labella, base sa tambag sa iyang mga doktor qpan unsang pagkabutanga, lain naman ang timpla sa mga tigsaway ni Labella. Mitukar naman sab ang kagaw sa ilang utok.

Di man delikado ang kahimtang sa panglawas sa mayor ug normal sa iyang edad nga adunay sakit.

Sa pagkakaron, wa intawon naglisod si Labella. Nakagawas na gani gikan sa ospital ug mi-report na opisina sa City Hall ug didto atubangan sa media gipahibawo ni Labella kagahapon, Hunyo 8, nga mopahuway siya og tulo ka semana gikan sa Hunyo 9 ngadto sa 31, 2021.

Iampo nato ang mayor nga makasugakod sa gibati sa iyang panglawas. Ug wagtangon ang yawan-ong estorya sa pagpanungo og tawo.

Samtang nagpahuway si Labella, si Vice Mayor Mike Rama maoy molingkod isip acting mayor sa siyudad.

TUBIG SA DAGAT

Usa ka maayong desisyon ang nakab-ot sa Metropolitan Cebu Water Dictrict (MCWD) kini human gipahibawo ni MCWD Board of Director chairman Joey Daluz, nga mosagop sila sa water desalination kon ang tubig nga parat himuong tab-ang.

Dako kini og ikatabang alang sa pagsulbad sa probema sa tubig sa Sugbo tungod sa kakuwang sa supply. Gawas niini, makatabang og dako ang MCWD sa paghinayhinay ug balik ang ka himsog sa underground water.

Sa interview sa Agila ni Atty. Totol Batuhan, usa ka economist ug nanalipod sa kalikopan ang paggamit sa surface water, nagkanayon nga kini maoy gikinahanglan karong panahuna aron malikay nga moabot na unya sa punto nga ang tubig nga tab-ang sa ilawom sa yuta sagulan na sa tubig sa dapat.

Samtang gisaway ni Batuhan ang way klaro nga pagtuon sa pagbarog sa underpass sa Mambaling Cebu City nga nasudlan og tubig sa panahon nga mag-uwan.

Kini maoy proyekto ni Kongresista Bebot Abellanosa sa South District nga gi-implementar sa Department of Public Works and Highways( DPWH) nga gi-kontrata sa pribadong kontraktor. (Email: efrenlonzon71@gmail.com / Text: 09235562777)

This posting includes an audio/video/photo media file: Download Now

Diputado: Ang Sugbusog

Posted: 08 Jun 2021 06:32 AM PDT

Hilabihan ang pagdayeg ni Secretary William Dar sa mga gipakita ni Governor Gwen Garcia sa iyang programa nga Sugbusog.

Nakita ni Sec. Dar ang mga bunga sa paningkamot nga gihimo ni Gov. Garcia sa pag-awhag sa mga katawhan sa pagpananom sa mga lain-laing pagkaon samtang gihasi ang nasod sa Covid.

Misamot ang pagdayeg ni Dar sa dihang nakita niya ang "home garden" ni Jesus Cortes sa Canduman, Mandaue, diin napuno kini sa mga lain-laing utanon ginamit ang mga sudlanan nga wala na gamita. Nakita sab niya ang bani sa saging nga gitamnan ni Cortes og mga utanon sama sa pechay ug tangkong, imbes ilabay na lang kini sa basorahan.

Samtang ang ubang mga gobernador nag-plano pa sa ilang buhaton, nakita ni Sec. Dar nga gihimo na kini ni Gov. Gwen Garcia.

Tungod niini, adunay plano si Dar nga himoong ehemplo sa ubang mga probinsiya ang Sugbusog program ni Gov. Gwen Garcia.

* * *

Gisubli ni Dar ang iyang saad ngadto kang Garcia nga dugangan pa ang gihatag nga tabang ngadto sa probinsiya, labi na gayod kay nakita niya nga malamposon kini nga programa.

Gawas sa mga semilya ug ubang mga gamit sa pananom, gipasaligan sab ni Dar si Gov. Gwen nga hatagan niya og top priority ang probinsiya sa Cebu sa mga proyekto ubos sa Philippine Rural Development Program (PRDP).

Dungan sa pagbisita ni Dar, gihatag usab ni Dar ang mosobra sa 57 ka milyon ka pesos nga mga lain-laing ayuda sa panguma sa mga lain-laing lungsod ug siyudad sa Cebu.

Gisugo sab ni Dar nga dugangan pa ang mga premyo nga nadawat sa mga manananaog sa contest nga gihimo sa Sugbusog program.

* * *

Bibo ang suklianay sa mga pulong sa mga lumalaban ni Mayor Sara Duterte-Carpio ug ni Senador Manny Pacquiao.

Nagkadaiya lang ang mga isyo ug mga batikos nga nang-gawas sa social media, apil na ang paghimo sa mga memes sa masig ka panig.

Walay daotan niini sanglit apil kini sa dula sa politika.

Gani, moabot na man sa punto nga magsabliganay na og lapok ang mga dumadapig. Mao kini ang resulta sa demokrasya sanglit gihatagan man og katungod ang usag-usa sa pagpadayag sa iyang hunahuna.

This posting includes an audio/video/photo media file: Download Now

Talk to Papa Joe: Gustong mag DH

Posted: 08 Jun 2021 06:32 AM PDT

Dear Papa Joe,

Maayong adlaw nimo. Ako diay si Cali, 24, nagpuyo sa Cebu City. Nagdako ko sa pobre nga pamilya pero bisan pa sa kawad-on, naningkamot kog eskwela kay duna koy ambisyon sa kinabuhi. Gusto kaayo nakong makahuman og eskwela labina sa college.

Nagtrabaho ko ma adlaw ug moeskwela sa gabii. Hangtod nga niabot ang pandemic ug igo ra ko sa first year college nakatungtong. Nisamot ang kalisod sa kinabuhi tungod sa crisis, wala nako makapadayon og eskwela kay nag-close naman akong gi trabahoan.

Nangaplay kog laing trabaho ug nadawat ko isip receptionist sa usa ka hotel nga nag-open. 8k akong monthly plus duna pay mga benefits. Nalipay na kaayo ko. Pasalamat na kog dako sa Ginuo, pero ngano kaha nga magdungan mag abot ang swerte?

Duna man gud ni offer nako nga mag DH sa Hong Kong unya P29,000 ang monthly. Akong trabaho magbantay og tiguwang. Gusto kaayo sa akong pamilya nga e grab nako ang oppoutunity pero nagduha-duha ko kay basin mapalpak unya. What if dili nako makaya ang kinabuhi didto, mobalik nasad ko diri nga jobless. Naglibog kaayo ko. Please tambagi ko.

CALI

Dear Cali,

Daghang salamat sa imong pagsalig sa atong column diri sa Superbalita. Ang akong ikatambag nimo nga klaroha una sa nag recommend nimo unsa ka sure and safe imong trabaho sa Hongkong. Legal ba gyud ni? Kinsay mogasto sa pag process sa papeles? Kinsay mo plete nimo? Daghan pa kag angay siguradohon para inkaso og tua kana didto, unya dili ka kauyon pwede ra man kang mopauli ug dili kaayo sakit sa bulsa kay dili man imong gasto. Anyway, daghan pa man kag masudlan nga laing trabaho sa Cebu basta magkugi lang ka.

Sa panahon karon nga daghan ang naglisod hasta mga datu ron na problema sa ilang negosyo, kapit sa patalim ang atong buhaton ron. Diskarte, way dautan kon mag DH ka sa Hong Kong kay daghan man kog kaila didto nga okay raman ilang mga amo. Pero mao lagi, klaroha sa ug labaw sa tanan, pag-ampo sa Ginuo. Pangayoa ang iyang guidance nga unta sakto ang imong desisyon.

PAPA JOE

(Sa inyong mga problema, ipadala sa papajoesuperb@gmail.com)

This posting includes an audio/video/photo media file: Download Now

Labella 3 ka semanang mag-leave

Posted: 08 Jun 2021 05:50 AM PDT

Tulo ka semana nga mag-medical leave si Cebu City Mayor Edgardo Labella aron nga hingpit nga makapahuway sa iyang gihambin nga balati-an base sa rekomendasyon sa iyang doktor.

Sugod karong adlawa, Hunyo 9, 2021, ang leave sa mayor.

Post sa Facebook page ni Labella, gibutyag nga aduna siyay sepsis kon blood infection nga diriyot niyang ikamatay.

"I will take this opportunity to pay greater attention to my recovery. During the next three weeks, I will be undergoing a medical workup to make sure there are no more infections sa akong lawas. Through this, I will just be in the City of Cebu," tipik sa pamahayag sa mayor.

Gumikan niini, si Bise Mayor Michael Rama ang magsilbing acting mayor ug acting Vice Mayor si Dondon Hontiveros hangtod nga makabalik na ang mayor.

Gitahasan usab ni Labella si City Administrator Floro Casas Jr., nga sigurohon nga dili magpabaya ang mga departamento atol sa tulo ka semana niyang leave.

Matod pa ni Labella nga niabot na ang hustong higayon para siya mo-relax sanglit ni-ubos na usab ang kaso sa Covid-19 sa Cebu City.

"Considering nga manageable na ang atong Covid cases sa siyudad karon ug nagpadayon ang atong pagpabakuna sa atong mga constituent, I am finally heeding the advice of my doctors," matod ni Labella.

Niadtong Mayo 31 ngadto na sa Hunyo 2, 2021 nadangat sa tambalanan ang mayor gumikan sa "slight pneumonia."

Nadiskobrehan ang sakit ni Labella niadtong Enero 2021 sa dihang adunay ear infection apan nagpadayon siya sa pagpanarbaho sa pagsiguro nga luwas ang mga Sugbuanon sa Covid-19, taliwa sa kahimtang sa iyang panglawas. (PAC)

This posting includes an audio/video/photo media file: Download Now

Bana sa ‘chop-chop lady’ gitumbok nga responsable

Posted: 08 Jun 2021 05:50 AM PDT

Gipasakaan sa Mandaue City Prosecutor's Office og kasong parricide ang bana sa babayeng gi-chop-chop, mga parte sa lawas nakaplagan sa mga dakbayan sa Sugbo ug Mandaue niadtong Oktubre 2020.

Sa upat ka pahina nga complaint nga gisuwat ni Assistant City Prosecutor Russel D. Busico ug gipirmahan ni Mandaue City Prosecutor Mary Francis Daquipil sa Mayo 14, 2021, nakaplagan sa imbestigasyon nga dunay probable cause aron mapasakaan og parricide si Harold C. Kintanar sa kamatayon sa iyang asawa nga si Angelie Lopez-Kintanar.

Si Busico, sa iyang gisuwat nga complaint, nitataw nga way "direct evidence" nga maglambigit kang Harold sa kamatayon sa iyang asawa. Apan ang mga sirkumstansya nagtudlo kaniya.

"However, the circumstances surrounding the disappearance of Angelie points at no other person responsible therefore but him," matod sa complaint.

Usa sa gibasehan sa kaso mao ang giingong pagpanugon ni Angelie ngadto sa iyang mga higala nga "ug naa gani mahitabo nako, usa ra inyong pangitaan, akong bana."

Ang magtiayong Kintanar nagpuyo sa Deca Homes, Tipolo, Dakbayan sa Mandaue.

Si Angelie gikauban sa mga magtiayong Guardo, Combista ug anak sa magtiayong Kintanar sa balay sa mga Guardo niadtong Oktubre 2020.

Ang duha ka mga magtiayon ninghatod sa inahan ug anak ngadto sa Deca Homes sa gabii sa Oktubre 18, 2020 nga maoy katapusang higayon nga nakit-an si Angelie.

Usa sa nakuhaan og pamahayag sa prosecutor si Mark Daniel Trapsi, silingan sa mga Kintanar ug "fraternal brother" ni Harold.

Matod ni Trapsi nga iyang na-obserbahan nga kanunay mag-away ang magtiayon.

Giingon nga nisulti kaniya si Harold nga makausa iyang nasakpan si Angelie nga dunay kuyog nga lalake sulod sa ilang balay "and this made him very mad at her."

Si Trapsi niingon nga iyang katapusang nakit-an si Angelie sa Oktubre 12, 2020 nga naglakaw kauban ang anak sa magtiayon.

Usa ka semana human niadto, gidapit siya og inom ni Harold, apan nakabantay siya nga ang mga tudlo sa iyang higala dunay tapes. "Para walang fingerprint at walang ebidensya makuha," giingong tubag ni Harold sa pangutana ni Trapsi.

"The answer the respondent gave prompted Trapsi to refuse the invitation," suwat ni Busico.

Si Harold, sa iyang counter affidavit, niingon nga nasobraan ra sab nga tungod lang sa obserbasyon ni Trapsi, siya na ang responsable sa pagpatay sa iyang asawa.

Si Harold nidugang nga ang pamahayag sa iyang asawa nga "ug naa gani mahitabo nako, usa ra inyong pangitaan, akong bana" nagpasabot nga "in case of emergency, please notify my husband."

"The literal translation is 'If something happens to me, there is only one person you should look for, my husband," matod sa prosecutor.

Gibilin usab ni Harold ang ilang anak ni Angelie sa iyang higalang Indian national sud sa upat ka mga adlaw, sukad na missing si Angelie.

"Leaving her to the custody of another person, an Indian national for four days, is highly irregular," dugang sa complaint.

Gitataw sa prosecutor nga ang pagpasaka sa kaso wa magpasabot nga guilty na si Harold sa pagpatay sa iyang asawa kay mapamatud-an lang kini atol sa mga husay atubangan sa korte.

Ang lawas ni Angelie nga wa nay ulo, mga kamot ug paa nakaplagan niadtong Oktubre 24, 2020 sa sapa sa Kalubihan, Talamban, Cebu City.

Sa Oktubre 23, unang nakit-an ang mga kamot ug mga tiil sa usa ka tawo sa Ouano Wharf sa Barangay Looc, Mandaue City.

Usa usab ka ulo sa tawo nga gituohang babaye nakaplagan niadtong Oktubre 31 sa Cabahug Wharf sa Looc, Mandaue.

Niadtong Disyembre 2020, nigawas ang DNA test, diin nakompirmar nga ang parte sa mga lawas nga nakaplagan sa managlahing mga dapit, iya ni Angelie. (REV)

This posting includes an audio/video/photo media file: Download Now

‘Human CCTV' gilusad batok krimen

Posted: 08 Jun 2021 05:49 AM PDT

Kapulisan sa Siyudad sa Toledo miumol og "human CCTV" nga nagkahulogan og community against criminality terrorism and violence.

Ang mga sakop niini maoy motaho sa mga awtoridad kon adunay mamatikdan nga krimen sa ilang dapit.

Dakog ikatabang sa pagsulbad sa krimen ang kuha sa closed circuit television (CCTV) camera sa kadalanan tungod kay makita niini kon kinsa ang nipusil o kaha naghimo sa usa ka krimen sa usa ka lugar.

Ang kapulisan sa Dakbayan sa Toledo adunay pinalahi nga pamaagi sa pagsulbad sa krimen ug terorismo pinaagi sa pag-umol sa human CCTV.

Matod ni Police Lieutenant Colonel Junnel Caadlawon, hepe sa Toledo City Police Station, nga ang ilang gipang-agni nga mosalmot sa human CCTV mao kadtong security guards ug ubang mga tawo diin mohatag sila og situationer report (sitrep) sa ilang gialagaran nga establisamento o sa ilang lugar diin sila nahimutang.

Ilang ipadala sa group chat nga gi monitor usab ni Caadlawon aron mas molapad ang ilang kasayuran sa mga panghitabo.

"Atong gi-encourage ang atong katawhan through social media nga mo sitrep sila nato. Kaning sitrep man gud, Sir, terminology ni sa miltary ba nga situationer report ba nga within their premises, ilang picturan nya i-send sa atong chat group or atong platform sa social monitoring. Nya i monitor na sa tactical operation center, para diha dapita real time makahibawo ta unsay nahitabo sa mga area nga atong gi-monitor," matod ni Caadlawon.

Si Police Colonel Engelbert Soriano, hepe sa kapulisan sa Lalawigan sa Sugbo, nihangop sa gihimo ni Caadlawon sanglit iya na usab kini nga gihimo sa dihang hepe siya sa usa ka police station sa Luzon.

Matod ni Soriano, iyang gigamit ang mga tricycle operator sa ilang lugar nga mag silbing tig report kon adunay mga panghitabo sa ilang dapit sama sa pagpadala og impormasyon sa mga kalihukan.

"Natuwa naman ako dito kay Lieutenant Colonel Caadlawon and he took the initiative to copy the said best practice. Kaya nasabi ni COP Toledo, tinitingnan ko din lang kung papaano kumilos ang mga chief of police natin. I appreciate the effort of COP Toledo sa pag-duplicate nung effort na ganun," sigun ni Soriano.

Gipasalig niya nga ang ma-recruit nga human CCTV mapaubos sa background investigation aron dili maabusohan ug magamit sa ilang personal nga interes.

Aduna siyay gitahasan nga personnel nga mohimo sa subsub nga recruitment una hingpit nga mapatuman sa sunod nga mga semana.

Gidasig usab ni Soriano ang ubang police stations nga mohimog susama nga programa aron makatabang sa pagsulbad o pagpakgang sa krimen sa ilang tagsa-tagsa ka mga dapit.

This posting includes an audio/video/photo media file: Download Now

Basil: Maymay tunog Baby Rexha

Posted: 08 Jun 2021 05:48 AM PDT

Manila-Aduna karo'y bag-ong single si Maymay Entrata nga giuolohan og "Di Kawalan."

Mainit-init pa jud kini pero almost 1 million views na kini sa YouTube.

Ang lyrics obvious, kabahin sa break-up sa manag-uyab ug para di totally ma-devastated si girl, sasabihin niyang "Di Kawalan" pero deep inside sakit baya jud.

Okay ang melody sa song ug ang nagustuhan ko pa mao ang official video niini.

Pipila ka higayon nga nag-change costume si Maymay.

Ug ang mga gown nga iyang gisul-ob, pang avant-garde pero keri kaayo ni Maymay bisan og nagsayaw siya.

Para nako, may pagka-Baby Rexha ang tunog sa "Di Kawalan."

Of course, si Baby Rexha ang sikat nga foreign singer nga nagpasikat sa kantang "Rockabye" nga ang lyrics nag-sentro sa usa ka single mom ug sa nahiagumang kalisod sa pagpadako sa iyang anak.

Opinion ko lang kini pero I'm sure dili intention ni Maymay nga gayahin ang style ni Baby Rexha. Medyo nasulama lang og gamay. Sayang tungod kay pandemic pa, kung normal lang unta, basin og naikot na ni Maymay ang mga inilang malls sa kapuluan para i-promote ang iyang "Di Kawalan" nga sure ako, mapapansin siya sa mga music award bodies.

NAKA-SCHEDULE NA

Sa dihang may mga taga-barangay nga nag-survey sa ako kung magpa-vaccine ba ako or hindi, "dili" ang akong tubag pero nagbago ang isip ko. Naka-schedule na akong magpa-vaccine sa Mowelfund sa June 11.

Ako man gung nakita nga mamahimong big deal sa sunod nga mga adlaw kung may hawak kang card nga "vaccinated ko." Feeling ko, moabot ang oras nga mao na kini ang unang pangitaon when you travel abroad even locally.

Giingon sa uban nga mao na kuno kini ang katumanan sa 666 pero dili naman siguro oi. Magpa-vaccine para panagang sa Covid-19 ug dili ako magiging anti-Kristo! Itigbas nyo na sa bato, hahahaha!

This posting includes an audio/video/photo media file: Download Now

Balay-Balay, Tubig-Tubig: Lihok na, child labor ihunong!

Posted: 08 Jun 2021 05:35 AM PDT

Atol sa pagsaulog sa Independence Day sa atong nasod karong Hunyo 12 mao ang pagselebrar sa World Day Against Child Labor.

Susama sa milabay nga tuig, saulogon ang matag tuig nga selebrasyon samtang padayon kita sa pag-atubang sa pandemiya nga matod pa nga makahulga sa kalampusan sa mga nasugdang aksyon batok sa pagpanghimulos sa mga bata pinaagi sa pagpatrabaho.

Dugang pa niini ang hagit sa krisis sa ekonomiya sa matag nasod nga posibleng makatukmod sa pagpaubos sa mga kaso child labor.

Dunay himuong Week of Action sugod Hunyo 12 isip pagsaulog sa World Day. Lakip sa mga kalihukan mao ang pagpahibalo sa datos sa child labour sa tibuok kalibutan. Kini maoy unod sa i-release unya nga report sa International Labour Organization (ILO) ug United Nations International Children's Emergency Fund (Unicef).

Sa kasamtangan, gibana-bana sa United Nations (UN) nga usa sa matag napulo ka mga bata ang nabiktima sa child labor.

Sa mga rehiyon sa kalibutan, ang Africa maoy dunay labing daghang kaso sa child labor ug gisundan kini sa Asya ug Pasipiko nga anaa sa 62 milyones ka mga bata ang nakasinati sa maong problema.

Suliran sa Pilipinas ang hingpit nga pagwagtang sa child labor isip usa sa mga nasod nga misaad sa pagsugpo sa maong problema pinaagi sa international agreements.Gawas na lang kini sa obligasyon sa estado nga masiguro nga tarong ang paglambo sa kabataan sa atong nasod.

Mao nga duna tay mga balaod nga namugna sa tumong ug tinguha nga masugdan ang pagmenos sa maong mga kaso.

Apan duna gihapoy mga limitasyon ang kampanya batok sa child labor. Dakong porsyento sa atong populasyon nagpabiling kabus, dili tanang mga kaso batok sa mga akusado mga nagkalainlaing porma sa pagpangabuso sa mga bata magmalampuson didto sa mga korte, ug nagpabilin gihapon ang hagit sa pagpasabot sa katawhan ang importansya sa pagpangilabot sa interes sa mga bata.

Padayon ang Children's Legal Bureau (CLB) sa paghimo og mga inisyatiba sa pagwagtang sa child labor sa atong nasod. Gawas sa pagpahibalo sa mga katungod ug mga proteksyon sa mga bata, andam ang maong organisasyon nga mutabang sa mga gisuspetsahang kaso sa child labor ug uban pang klase sa pagpangabuso.

Lakip sa maong mga kalihukan mao ang pag-organisa ug discussion events kabahin sa child labor ug pagtubag sa mga pangatuna sa concerned citizens ug mga biktima pinaagi sa Children's Legal Assistance Form.

Aktibo pod ang CLB sa pagpangampanya sa pagpalig-on sa atong mga balaod batok child labor lakip na ang gisugyot nga mga kabag-uhan sa Anti-Trafficking Law sa Pilipinas.

Tungod kay nagpabilin gihapon nga problema sa tibuok kalibutan ang child labor, kinahanglan nga mulihok na kita nga hunungon ang maong problema. Magkahiusa unta ang tanang sektor ilabi na ang gobiyerno ug mga hingtungdang ahensya sa empleyo nga matuldokan na ang child labor sa Pilipinas!

This posting includes an audio/video/photo media file: Download Now

VisMin Cup Mindanao leg sugdan karong Hunyo 22

Posted: 08 Jun 2021 05:35 AM PDT

Human sa taodtaod nga pagpaabot, gikatakda nga sa na Hunyo 22, 2021 sugdan ang Chooks-to-Go VisMin Super Cup Mindanao leg.

Kini maoy gibutyag ni Chelito Caro, ang basketball operation chief, sa interview sa Superbalita Cebu.

Matod ni Caro nga ang ikaduhang hut-ong sa liga ipahigayon sa Dakbayan sa Pagadi-an.

"Actually, ang teams nagsugod na sa ilang isolation. Mosulod sila sa bubble sa June 16, one week before sa opening," matod ni Caro.

Siyam ka teams ang magkombati alang sa ikaduhang division title sa VisMin Cup, ang bag-ong professional basketball league sa nasod.

Ang kompirmadong mga mosalmot sa Mindanao leg mao ang host Pagadian Explorers, Roxas Vanguards, Cagayan de Oro Rafters, Sindangan Saints, Zamboanga City, Zamboanga del Sur, Iligan ug Basilan Peace Riders.

Dugang ni Caro nga ang torneyo mosunod sa single elimination round diin ang top four maoy makaangkon sa twice-to-beat advantage batok sa no. 5-8 teams alang sa quarterfinals round.

Ang no.1 team makigbatok sa no. 8; no.2 batok no. 7; no. 3 batok no. 6; no. 4 batok no. 5.

Ang mga modaog niini mao ang masulod sa best-of-three semifinals round nga maoy modeterminar sa mag-abot sa best-of-three finals series.

Ang Visayas leg gisugdan niadtong Abril 9, 2021 ug nahuman niadtong Mayo 10, 2021 diin ang KCS Computer Specialists mao ang nakampiyon human mapukan ang MJAS Zenith Talisay City Aquastars sa finals series, 2-1.

Ang KCS, nga gipanag-iya ni Ricky Verdida, magpaabot sa makampiyon sa Mindanao leg alang sa best-of-five National Finals series.

This posting includes an audio/video/photo media file: Download Now

Tyson gustong mag-rematch sila Pacquiao, Mayweather Jr.

Posted: 08 Jun 2021 05:34 AM PDT

Kon si boxing heavyweight legend Mike Tyson lang ang matuman, gusto niyang molugnot gikan sa pagretiro si American Floyd Mayweather Jr. aron makig-away og balik kang Filipino icon Manny Pacquiao.

Si Tyson misaway sa pagpakig-away ni Mayweather batok kang YouTube sensation Logan Paul sa usa ka exhibition bout ning bag-uhay lang.

Kaduha pa lang nakaaway si Paul sa boksing apan gumikan sa dako niyang bintaha sa gibug-aton ug gitas-on, nakahuman siya sa ilang away ni Mayweather, kinsa miretiro nga adunay 50-0, 27KOs nga rekord.

"I think he should continue fighting guys his own weight. What the fuck is he doing?" matod ni Tyson sa interbyu sa Fighthub.com.

"Fight Pacquiao again and keep in shape. He should have had Paul lose a lot of weight. It was harder than Floyd anticipated, I believe."

Sa premirong panag-away nila ni Mayweather ug Pacquiuao, midaog si Mayweather pinaagi sa unanimous decision.

Ang maong away mibuak og daghang mga rekord sa kalibutan sa boksing hilabi na sa pinansyal nga aspeto. (ESL)

This posting includes an audio/video/photo media file: Download Now

ARQ mihan-ay'g 'engkuwentro'

Posted: 08 Jun 2021 05:34 AM PDT

Grabeng binukbokay ang gilaumang masaksihan sa labing unang promosyon nga pasiugdahan sa bag-ong natukod nga ARQ Boxing Promotion nga giulohan og "Engkuwentro Uno."

Ang promosyon, nga ipaagi og bubble set-up, gikatakda sa Hunyo 19, 2021 sa Gate 2 sa Cosonsa Manufacturing Compound sa Barangay Ibabao, Dakbayan sa Mandaue.

Sa opisyal nga paglusad sa promosyon kagahapon, Hunyo 8, 2021, sa Vienna Kaffehaus sa Bonifacio District, Brgy. Kasambagan, Dakbayan sa Sugbo, gipasabot ni ARQ stable conditioning coach Roger Potot nga gumikan sa gisagubang nga pandemya sa kalibutan nga hatod sa Covid-19, nagpanikad og maayo ang ilang mga boksidor tungod sa taas nga panahon nga wala kini makaaway.

"Hungry kaayo nga moaway ang atong boxers kay dugay man wa nakaaway tungod aning pandemic," matod ni Potot.

"Aggressive gyud ni mangaway ang atong boxers."

Ang sports director sa ARQ nga si Chelito Caro miklaro nga bisan wala pa'y nakaeskedyul nga away, hugot na nga nagbansaybansay ang ilang mga boksidor pinaagi sa bubble training.

"Dugay na ni silang nag-training. Pag-start pa lang sa planning last year, sige na sila og training maong sakto gyud ni sila sa kondisyon," pasabot ni Caro.

Sa main event sa promosyon, ang pambatong boksidor sa ARQ nga si April Jay "Astroboy" Abne makigbatok kang Royder Lloyd Borbon.

Gilauman sa ARQ nga makakulit og dakong pangalan sa ugma damlag si Abne, kinsa adunay 5-0, 2KOs nga rekord.

Ang igsoon ni April Jay nga si Ian Abne ug ubang mga sakop sa ARQ stable nga sila si Berland Robles, Zandro Librador, John Paul Gabunillas, Yerrodge Gura, Arniel Canete, ug Rodex Pala mopakita sab og aksiyon sa promosyon batok sa lainlaing kontra.

Sa laing bahin, gipasabot ni Caro nga ang magtiayong tag-iya sa ARQ Boxing Promotion nga sila si Jason ug Eva Mari Arquisola nagplano nang daan nga motukod og boxing stable sa wala pa nanghasol ang Covid-19 sa miaging tuig.

Sa pagkuyanap sa Covid-19, asoy ni Caro nga mas nangusog ang magtiayong Arquisola nga motukod og boxing stable aron makatabang sa batan-ong mga boksidor nga nangandoy nga makalingkawas sa kalisod pinaagi sa boksing.

"Long term program na gyud ni," pagtataw ni Caro. (ESL)

This posting includes an audio/video/photo media file: Download Now

Nets milubong na sab sa Bucks

Posted: 08 Jun 2021 12:45 AM PDT

Sa ikaduhang sunodsunod nga higayon, giusban na usab paglubong sa Brooklyn Nets ang Milwaukee Bucks, 125-86, sa Game Two sa ilang Eastern Conference semifinals.

Ubos sa pagpangulo ni Kevin Durant nga may 32 puntos sulod sa tulo lang ka quarters, ang Nets sayo kaayong nakakontrolar sa duwa bisan og wala ang usa as Big 3 nga si James Harden.

Si Harden nga naglingkod sa bench nga nakasibilyan lang tungod sa dili maayong gipamati niini sa iyang paa.

Bisan pa niini, nagpungasi ang opensa sa Brooklyn nga wa kapugngi sa Bucks og gani niabot pa og 49 puntos. Midugang si Kyrie Irving og 22 ug laing 13 puntos ug unom ka rebounds gikan ni Bruce Brown.

Ang Nets miguba sa depensa sa Bucks nga wala mahatagi og kasulbaran sa Milwaukee nga miresulta sa daghang mga libre nga itsa. Sa 42 ka itsa gikan sa three-point area, ang Nets mipasulod og ka 21 ka shot nga maoy hinungdan sa pagbukad og maayo sa ilang labaw.

Motapon ang Game Three sa korte sa Milwaukee karong Biyernes (Huwebes sa US) diin suwayan sa Bucks nga makabawos aron paglihay nga maharos sila sa series.

Si Giannis Antetokounmpo nalimitahan ngadto sa 18 puntos ug 11 rebounds alang sa Bucks. Ang two-time most valuable player sayong gipalingkod sa fourth quarter sa dihang naklaro na ang ilang kapildihan.

Si Khris Middleton midugang og 17 puntos. (JBM)

This posting includes an audio/video/photo media file: Download Now

Suns mipakaging sa Nuggets sa Game One sa Western Condeference semifinals

Posted: 08 Jun 2021 12:09 AM PDT

Bisan pa man og dunay gipamati sa iyang tuo nga abaga, sa gihapon, ang beteranong pointguard nga si Chris Paul miyagyag og 21 puntos nga giparisan og 11 ka assists ang giyahan ang Phoenix Suns ngadto sa 122-105 nga kadaugan batok sa Denver Nuggets sa Game One sa Western Conference semifinals.

Midugang si Mikal Bridges og 23 puntos alang sa Suns kinsa perming naggukod sa first half. Pabilin naglabaw ang Nuggets og 10 puntos sa sayong bahin sa third quarter.

Apan nihinayhinay og bali ang dagan sa panagsangka human mipahagsa og dakong rally ang Phoenix nga dinuslitan sa tres ni Booker ug sa layup ni Bridges aron sakmiton ang labaw, 79-72.

Ilang nabingat ang bintaha ngadto sa 88-79 paingon na sa fourth quarter ug ang mid-range jumpers ni Paul maoy mihatag og 94-79 nga labaw sa Suns, 10:25 segundos ang nahabilin sa duwa

Ang kahingawa sa mga dumadapig maoy mopatigbabaw sulod sa arena nga may 16,319 ka mga misaksi sa matag higayon nga si Paul mao na ang magdala sa bola.

Ang sentro sa Phoenix nga si Deandre Ayton mitapos sa duwa nga may 21 puntos ug 10 ka rebounds.

Sulagma ang maong panag-engkuwentro nga natapos nga dili sikit ang score. Sa tulo nila ka duwa sa regular-season ang tanan miagi gyud og kulbahinam diin magligas lang og tres puntos, usa ka overtime ug diha usay kaduha gyud mag-overtime.

Ang Game Two adto gihapon sa Phoenix karong Huwebes (Miyerkules sa US).

Sa naandan, si Nikola Jokic, ang leading contender sa pagka most valuable player (MVP), nangulo sa Nuggets nga may 22 puntos. (JBM)

This posting includes an audio/video/photo media file: Download Now

Garcia, officials motuon sa buhaton tungod sa pagpatipas na sab sa int'l flights

Posted: 07 Jun 2021 11:55 PM PDT

Tun-an pag-usab ni Cebu Governor Gwendolyn Garcia ug mga concerned agencies ug officials ang dugang kahimoan sa Sugbo subay sa gimandong pagpatipas sa mga international flights paingon sa Ninoy Aquino International Airport (NAIA).

Kini maoy tubag ni Garcia subay na sab sa kamandoan ni Executive Secretary Salvador Midealdea alang sa mga mopauli gikan sa abroad nga motugpa sa Mactan Cebu International Airport (MCIA).

"We will study our position, as duly elected and accountable officials of the Province of Cebu. We all must adhere to the rule of law,"matod ni Garcia pinaagi sa text sa Hunyo 8, 2021

Sa Hunyo 6, nakatugpa na ang flights gikan sa Doha, Quatar ug Singapore sa Mactan Cebu International Airport (MCIA). Apan gipatipas na sab ni Medialdea ang tanang international flights sa Sugbo paingon sa Ninoy Aquino International Airport (NAIA) kutob sa alas 11:59 sa gabii sa Hunyo 12, 2021. (ANV)

This posting includes an audio/video/photo media file: Download Now

Intl. flights gitipas og balik sa NAIA

Posted: 07 Jun 2021 10:52 PM PDT

Nahibalik lang og pipila ka mga adlaw ang mga international flight sa Mactan Cebu International Airport (MCIA), duna na say kamandoan ang Malacañang sa paglugway sa flights diversion.

Bisan kon gipetsahan og Hunyo 5, 2021 ang memorandum gikan ni Executive Secretary Salvador Medialdea alang sa "diversion extension" sa international flights padung sa MCIA ngadto sa Ninoy Aquino International Airport (Naia), gibutyag lang kini usa ka adlaw human nipahibawo si Gobernador Gwendolyn Garcia nga ang tumanon sa tugpahanan mao ang ordinansa sa Lalawigan alang sa swabbing sa mga overseas Filipino workers (OFW) ug returning overseas Filipinos (ROF).

Kini dunay kalainanan sa direktiba sa Inter-Agency Task Force for the Management of Emerging Infectious Diseases (IATF).

Ang unang memorandum ni Medialdea nagpatipas sa international flights gikan sa MCIA ngadto sa Naia gikan sa Mayo 29 ngadto sa Hunyo 5. Sa mao nga petsa, way memo nga nadawat ang hingtungdang mga buhatan alang sa paglugway.

Busa, sa Dominggo, Hunyo 6, nibalik pagtugpa ang international flights gikan sa Doha, Qatar ug Singapore.

Sa ikaduhang memorandum ni Medialdea alang sa extension, gitumbok niini ang pagpasunod sa tugpahanan sa protocol sa IATF.

"To ensure that, upon resumption of international flights to the Mactan Cebu International Airport (MCIA), the travel and testing protocols approved by the Inter-Agency Task Force for the Management of Emerging Infectious Diseases (IATF) will be fully and seamlessly implemented, this Office hereby extends the diversion of international flights bound for MCIA to the Ninoy Aquino International Airport, until 2359 of June 12, 2021," matod sa kamandoan.

Si Presidential Spokesperson Harry Roque nipahibawo usab niini sa Martes, Hunyo 8, 2021.

Ilang gilauman nga human niini, mosunod ang MCIA sa guidelines sa IATF sa mangabot nga OFW ug ROF.

"Inaasahan po natin na on the 13th of June, the IATF protocols on arriving OFWs and ROFs will be implemented in Cebu," matod ni Roque.

Ang pagpagawas sa memorandum ug pagpahibawo sa Malacañang nahitabo human sa tigom tali nila ni Garcia, mga opisyal sa mga ahensya sa kagamhanan, apil na ang MCIA sa Hunyo 7, 2021.

Atol sa tigom, klaro nga ang memorandum ni Medialdea wa pa moabot sa tugpahanan kay bisan mismo si Andrew Harrison, GMCAC chief executive adviser, nipahibaw nga gibalik na ang international flights sa Sugbo hinungdan nga mahimo na nga makadiretso ang mga Sugboanon subay gihapon sa swab-upon arrival policy sa Probinsya sa Sugbo.

Si Garcia namahayag atol sa press conference human sa tigom, nga ang tumanon sa MCIA mao ang ordinansa sa Lalawigan kay maoy "recognized law of the land."

"Unless it is otherwise declared ultra vires by a proper court. So, they all agreed that they would have to follow the Provincial Board ordinance because they do not want to break the law or violate the law," nagkanayon si Garcia sa Hunyo 7, 2021 nga press conference.

Sa ordinansa sa Lalawigan nga gipalabang ug giaprobahan human moluwat sa iyang Executive Order (EO) 17 si Garcia, ang tanang OFW ug ROF nga motugpa sa Mactan i-swab gilayon.

Papuy-on sila sa mga accredited hotel samtang maghuwat sulod sa duha ngadto sa tulo ka mga adlaw sa resulta sa swab text.

Kon magnegatibo, papaulion gilayon sila sa ilang dapit, apan sa ikapitong adlaw subli nga i-swab.

Samtang sa IATF directive, ang mga OFW ug ROF di I-swab, diretso silang I-quarantine ug sa ikapito ka adlaw, diha pa sila I-swab test.

TUN-AN

Tun-an pag-usab ni Garcia ug mga concerned agencies ug officials ang dugang kahimoan sa Sugbo subay sa gimandong pagpatipas sa mga international flights.

Kini maoy tubag ni Garcia subay sa laing kamandoan ni Medialdea.

"We will study our position, as duly elected and accountable officials of the Province of Cebu. We all must adhere to the rule of law," matod ni Garcia pinaagi sa text sa Hunyo 8.

Samtang, katapusang international flight nga mitugpa sa Mactan mao ang Qatar Airways nanukad sa Doha, Qatar niadtong Lunes, Hunyo 7 sa 4:46 sa hapon nga giluwanan og 237 ka mga pasahero.

This posting includes an audio/video/photo media file: Download Now

10 ka bars 'milapas' sa EO

Posted: 07 Jun 2021 06:29 AM PDT

Kapin na sa 10 ka mga imnanan ang gi-report sa Cebu City Police Office (CCPO) ngadto Emergency Operations Center (EOC) nga nakalapas sa minimum health standard ug executive order ni Mayor Edgardo Labella.

Matod ni Police Lieutenant Colonel Wilbert Parilla, deputy city director for operations sa CCPO, nga gipanghatagan na usab sila og show cause order gikan sa Business Permit and Licensing Office (BPLO) aron mopasabot sa ilang kalapasan.

Niadtong Mayo, usa ka imnanan sa General Maxilom Avenue nasakpan nga nagpa-disco kasamtangan nga gipaundang sa operation tungod kay hugot pa nga gidili ang mao nga matang sa kalingawan.

"More than 10 na ang atoang na reported base sa atoang monitoring. First katong sa Gen. Maxilom Avenue and then diri na sad sa Banilad area. So, daghan nang mga establishment nga gi report," matod ni Parilla.

Dugang ni Parilla nga padayon ang ilang pag-monitor niining mga imnanan nga gitugotan nga maka-operate sa ilang negosyo.

Wa na sila magtutok sa mga customer tungod kay ila nang gibantayan ang mga tag-iya og imnanan nga maoy ilang pasakaan og kaso kon makalapas ang ilang establisemento sa lagda sa Kagamhanan sa Siyudad sa Sugbo.

Apan iyang giklaro nga kon molapas na sa curfew, kon naa pa sa gawas sa imnanan ang mga kustomer niini, diha na nila dakpon ang mga tawo.

WA PA MASILUTI

Way preventive suspension sa unom ka mga restaurant bar (restobar) nga giingong nakalapas sa safety and health protocol sa Inter-Agency Task Force.

Si Atty. Jared Limquiaco sa Cebu City Business Permit and Licensing Office (BPLO) nagkanayon nga makapadayon pa og operate ang maong mga establisemento samtang wa pay resolution nga giluwatan ang EOC sanglit nagpadayon pa ang imbestigasyon.

Ang pangulo sa BPLO nagkanayon nga samtang wa pay final nga hukom, ang maong mga restobar gipabantayan og mga personnel sa City Hall aron malista ang ilang dugang violation kon aduna man.

Matod niya nga niabot na og sobra 10 ka business establishments ang gialegahan nga adunay violation sa health protocol human gitugot og balik ang inom.

"Wala tay preventive suspension. So, pending resolution sa issue, pwede pa sila maka operate. Same adtong sa Clubholic. But gipa bantayan na sad na namo sila para ma note if naay violations while gahuwat sa resolution," padayag ni Limquiaco.

Si Konsehal Joel Garganera, deputy chief impelementer sa EOC, nagkanayon nga ilang gisubay ang proseso.

Kon mapamatud-an nga adunay pagpabaya nga gihimo ang maong mga establishment ug nibaliwala sa gipatumang mga health protocol, hayan mo-rekomendar sila ngadto kang Mayor Edgardo Labella nga ikanselar ang special permit nga gihatag kanila.

Matod sa konsehal nga kon dili estrikto nga masunod ang mga health protocol, peligro unya sa kalit nga pagsaka sa mga kaso sa Covid-19 ug mobalik na usab ka estrikto ang dakbayan nga moresulta sa pagsirado sa mga business establishment.

This posting includes an audio/video/photo media file: Download Now

Ordinansa sa Lalawigan sundon sa MCIA

Posted: 07 Jun 2021 05:59 AM PDT

Bisan kon ang Department of Health (DOH) head office niinister nga ang direktiba sa National Inter-Agency Task Force (NIATF) ang sundon kalabot sa swabbing sa overseas Filipino workers (OFW) ug returning overseas Filipinos (ROF), ang Mactan Cebu International Airport (MCIA) mosunod sa Executive Order 17 ni Gobernador Gwendolyn Garcia.

Si Garcia, sa iyang press conference sa Lunes sa hapon, Hunyo 7, 2021, niingon nga ang iyang EO nga duna nay katugbang nga ordinansa nga gipalabang sa Provincial Board (PB) maoy tumanon.

"They were all in agreement that the Provincial Board ordinance is the recognized local law of the land. Unless it is otherwise declared ultra vires by a proper court. So, they all agreed that they would have to follow the Provincial Board ordinance because they do not want to break the law or violate the law," nagkanayon si Garcia.

Giluwatan kini ni Garcia human mahibalik sa Hunyo 6 ang international flights sa Mactan Cebu International Airport (MCIA). Apan naa pa gihapon ang limit sa mga pasahero nga 300 lang ka buok matag adlaw.

Niadtong Hunyo 4, 2021, ang DOH Manila nitataw nga ang IATF guidelines sa swabbbing ug quarantine sa mga OFFW ug ROF kinahanglan sundon sa MCIA.

NAHIBALIK NA

Gipahibaw ni Andrew Harrison, GMCAC chief executive adviser, nga pasiunang duha ka mga flight gikan sa Doha, Quatar ug Singapore ang niabot sa Sugbo sa Hunyo 6.

Padayon pa ang pag-limit hangtod lang sa 300 ang gidaghanon sa mga pasahero nga makatugpa aron masiguro nga matugbangan ang available nga accredited hotels ug quarantine facilities.

"We're very happy that we had our first flight yesterday... and the number of passengers arriving will be in line with the current cap which is also tied to the number of hotel rooms. We will seek to have that limit increased because we don't want that situation that they don't have hotel rooms," matod ni Harrison sa Hunyo 7.

Sa ordinansa sa PB, ang mga OFW ug ROF i-swab test gilayon pag-abot sa airport.

Human niini, sila i-quarantine sa mga hotel dinhi sa Sugbo ug kon magnegatibo sa test, makauli gilayon sila.

Apan kadtong di mga taga Sugbo, apan dinhi mangagi, kon magnegatibo, mahimo rang mopadayon pagpuyo dinhi kon di pa sila dawaton sa ilang dapit.

Tungod niini, matod ni Garcia nga iyang gipaimbentaryo ang mga lawak sa mga hotel aron pag-accommodate kanila.

Si Garcia nimando sa Department of Tourism (DOT) ug Department of Health (DOH) sa pagsusi sa mga kwarto nga mahimong kapasilongan sa mga mopauli. "Upon proper inspection of both DOT and DOH within the week, might expand to over 5,000 rooms." (ANV)

This posting includes an audio/video/photo media file: Download Now

Motorcycle dealers gikiha og cyber libel ni Caindec

Posted: 07 Jun 2021 05:55 AM PDT

Gipasakaan og tag duha ka kasong cyberlibel ni Regional Director Victor Caindec sa Land Transportation Office (LTO)7 ang mga tag-iya sa lima ka dealers og motorsiklo sa Central Visayas.

Si Caindec, inubanan sa iyang mga abogado nga silang Benjamin Cabrido ug Majed Ungab, niduso sa kaso ngadto sa Office of the City Prosecutor sa Mandaue City sa Lunes sa buntag, Hunyo 7, 2021.

Nahimong tagduha ka count sanglit ang usa para sa personal nga kapasidad ni Caindec ug ang laing usa isip opisyal sa LTO-7.

Naglangkob sa lima ka korporasyon mao ang Desmark Corp., Du Ek Sam Inc., Des Strong Motors Inc., Des Marketing Inc. ug Premio Corp.

Sa reklamo ni Caindec, iyang gipasakaan og kaso ang mga opisyal sa Desmark Corp. nga gilangkuban nilang Gilbert Du, Fe Socorro Du, Mark Allen Du, Marvin Ken Du, Jeanine Du, ug Maricris Lopez.

Sa Du Ek Sam Inc., apil silang Carl Ryan Lim, Cassandra Alexis Du, Iwih Jane Du, Marvin Ken Du, Louise Camille Lumapas, George Du, Wilson Du ug Melecia Du.

Alang sa Des Strong Motors Inc., gikiha sila si Silvestre Lumapas Jr., Marolou Du-Lumapas, Louise Camille Lumapas, Tom Joshua Lumapas ug Edgardo Lumapas.

Ang Des Marketing Inc., naapil silang Carl Ryan Lim, Cassandra Alexis Du, Iwih Jane Du, Marvin Ken Du, Louise Camille Lumapas, George Du, Wilson Du ug Melecia Du.

Sa Premio Corp. mao sila si Mark Allen Du, Jeanine Du, Maricris Lopez, Gilbert Du, Fe Socorro Du ug Marvin Ken Du.

Kini may kalambigitan sa pasangil sa lima ka korporasyon nga gipanag-iya sa usa ka prominenteng pamilya nga nagbase sa Cagayan de Oro City nga giingong nangayo og P500 nga padangog si Caindec matag motorsiklo sa ilang korporasyon nga gi-publish sa social media.

Gihulagway ni Cabrido nga wala sila nitagad sa nanggawas nga balita diin gipasanginlan ang iyang kliyente sanglit nagagikan ang maong impormasyon sa gipatawag nga hearing sa Senate Blue Ribbon Committee diin gikuha ang ilang mga habig.

Sa maong hearing nilutaw ang maong akusasyon.

"We did not react because we considered that news is privilege. Meaning it is protected. But when these five corporations published official statement re-producing and reiterating their principal argument during the hearing, then we found it to have violated the law," dugang ni Cabrido. Ang gipasabot ni Cabrido mao ang kalapasan sa Cybercrime Prevention Act of 2012 sanglit iyang gihulagway nga adunay malisya ang pamahayag nga ilang gisubli pagmantala pinaagi sa social media niadtong Pebrero 15, 2021.

Si Caindec, sa iyang bahin, nipasabot nga igo lang siya nga nagsunod sa RA 11235, apan ang mga nahisgutang dealers giingong nibaliwala, ni-falsify pa sa mga dokumento ug nahikawan ang gatusan ka libo ka mga Pilipino nga nagpalit og motorsiklo sa ilang mga branch.

"I don't warn, I fight. Ilang gusto matangtang ko, akong gusto mapriso sila. Mobayad sila sa sakto nilang utang sa gobyerno ug hatagan og hustisya ang tanan nilang giabusaran nga mga nakapalit og motor nga ila rang gipanamastamasan," matod ni Caindec.

" Am I fighting the five dealers? No I am fighting for the right of every Filipino nga naay motor nga wala kakuha sa saktong katungod nila," matod niya. (PAC)

This posting includes an audio/video/photo media file: Download Now

Kuyme gidunggab gamit ang buwang, kritikal

Posted: 07 Jun 2021 05:55 AM PDT

Nahabwa ang tinai sa kuyme sa tigbakay human gidunggab og buwang sa pilderong sugarol alas 5:00 sa hapon sa Dominggo, Hunyo 6, 2021 sa Sitio Mohon, Brgy. Bateria, Lungsod sa Daanbantayan, Cebu.

Si Aldeser Cataluña, 40, minyo, taga Sitio Suba, Brgy. Malbago, Daanbantayan, naa sa kritikal nga kahimtang nga gidala sa tambalanan sa Dakbayan sa Sugbo tungod sa dakong samad sa tiyan.

Wa pa igkita ang suspek nga si Marjon Ruta, 29, dunay kapuyo, lumad nga taga Albuera, Leyte, kasamtangang nagpuyo sa Sitio Caimito, Brgy. Pajo, Daanbantayan.

Si Police Staff Sgt. Roberto Dapat, Jr., imbestigador sa Daanbantayan Police Station nga nahinabi sa Superbalita Cebu, nagkanayon nga nagtigbakay sa maong dapit.

Si Cataluña maoy kuyme sa tigbakayan dihang nasuko si Ruta kay napilde ang iyang gipustahan nga manok.

Nipasangil si Ruta nga di patas ang desisyon ni Cataluña hinungdan nga sila nagkalalis.

Niinit ang ilang lalis nga nisangko sa pagsinukmagay sa duha. Nalupig ni Cataluna si Ruta, apan nikuha og buwang ang suspek.

Wa makabantay si Cataluna, gihansakan siya og diretso ni Ruta sa buwang sa tiyan.

"Naglagot ang suspetsado kay nagtuo man siya nga gipaburan sa kuyme ang pikas. Unya nalupig pa sa sumbagay. Wala makadawat nga napilde, nanunggab," dugang ni Dapat.

Matod ni Dapat nga kritikal si Cataluna dihang gidala sa tambalanan sa dakbayan sa Sugbo. Gibutyag niya nga naglisod sila pagkuha og saksi ingon man dugang mga detalye kay sagad sa mga saksi nahadlok nga dakpon kay nanigbakay. (GPL)

This posting includes an audio/video/photo media file: Download Now

Shabu sa Lapu-Lapu mas mahal

Posted: 07 Jun 2021 05:48 AM PDT

Gibutyag sa kadagkuan sa Lapu-Lapu City Police Office (LCPO) nga modoble ang presyo sa ilegal nga drugas nga mosulod sa dakbayan itandi sa ubang mga lugar.

Hinungdan nga kadaghanan sa mga masikop sa operasyon sa illegal nga drugas sa kapulisan sa dakbayan mga taga laing lugar ug motuyo ra og hatod sa illegal nga drugas sa dakbayan gumikan sa dakong porsyento.

Base sa pakighinabi sa Superbalita sa nadakpang durugista sa usa ka operasyon sa Sitio Pool, Brgy Bankal, sa Hunyo 4, 2021, siya nibutyag nga ang P150 nga usa ka putos nga illegal nga drugas sa ilang lugar (gawas sa Lapu-Lapu), ibaligya nila og P500 sa dakbayan.

Dako na nilang tabang ang dugang ginansiya sa ilang paglabang sa dakbayan hilabi na niiining panahon sa pandemya. Kasagaran kanila mga sinugo ra usab nga nangiyawat gumikan sa kalisod.

Matod ni Police Colonel Arnel Banzon, director sa LCPO, nga ang pamahayag sa mga durugista nagpakita lang nga wa na kaayoy mamaligya og ginadiling drugas sa dakbayan.

Kon aduna man, pulos na lang kini ginagmay.

Pasabot ni Banzon nga kon ugaling modoble o triple ang presyo sa usa ka pakete sa gituohang shabu, dili na ikahibulong nganong matag karon ug unya adunay mosuway og payuhot og ginadiling drugas sa dakbayan nga minilyon ang kantidad.

Nipahimangno si Banzon ngadto sa nagpadayon pa sa pagpayuhot og ginadiling drugas sa dakbayan nga madakpan ra gihapon sila sa kapulisan gumikan kay wala sila molugak sa ilang kampanya.

"Pasabot ana ni-hit ang namaligya diri kay ug didto sa ilang lugar, steep ang competition. Kuwang na lang imo na ihagad diri, mao ari sila diri mosuway bisag risgo," pagpasabot ni Banzon. (GCM)

This posting includes an audio/video/photo media file: Download Now

‘Fake’ nga police officials, mga sundawo nasikop

Posted: 07 Jun 2021 05:47 AM PDT

Napu ka mga tawo nga nagpailang mga opisyal sa kapulisan ug kasundalohan nasikop sa mga pulis sa checkpoint sa San Jorge, Samar, pasado alas 6 sa gabii, Sabado, Hunyo 5, 2021.

Giila sa kapulisan ang mga nasikop base sa ilang gipailang mga ngalan nga sila si Major General Jose Suarez; General Galma Arcilla; Master Sergeant Jomar Borja; Captain Edwin Gumarang; Brigadier General Errole Enverga; Private Robin Siso; Lieutenant General Albert Verba; Major General Francis Sagum; General Jovencio Valera ug usa ka James Patrick Reyes.

Ang nahisgutang mga tawo dunay address nga Quezon City samtang ang uban taga Taguig ug Muntinlupa.

Base sa report sa kapulisan, nakadawat sila og impormasyon nga dunay duha ka mga sakyanan nga Nissan Patrol color dark blue nga dunay plakang WJH 715 ug Toyota Innova nga silver nga may plakang DAT 5370 nga moagi sa ilang lugar.

Matod sa impormasyon, ang mga sakay sa duha ka mga sakyanan dunay dala nga mga armas nga way lisensya.

Dali nga nag establisar og checkpoint ang kapulisan ug ilang naharang ang mga sakyanan. Gipangitaan sa kapulisan og travel authority ang mga sakay.

Ninghatag og travel authority ang mga sakay apan tungod sa pagduda sa kapulisan, ila kining gi-verify ug nahibaw-an nga fake ang maong mga dokumento ug nagpakita sab og kadudahan nga mga identification (ID) card.

Sa pag-search, narekober sa mga pulis ang nagkadaiyang mga armas, mga radio, fake police, military uniform ug mga fake document. / JKDP

"I commend the personnel of San Jorge Police for a job well done. You did a great job by exercising your authority to conduct thorough and vigilant checking at Police Checkpoints which resulted to the detection of the malicious activity of these personalities," matod ni Police Colonel Glen Oliver Cinco, direktor sa Samar Provincial Police Office

Padayon pa ang imbestigasyon sa kapulisan. Gipasakaan na og kaso ang mga suspek sa pag peke sa mga dokumento ug usurpation of authority. (JKDP)

This posting includes an audio/video/photo media file: Download Now

Ched 7 mihatag og 6 ka excellence awards sa USC

Posted: 07 Jun 2021 05:47 AM PDT

Gipasidunggan sa Commission on Higher Education (Ched) sa Central Visayas ang University of San Carlos (USC) og unom ka pag-ila atol sa kasaulogan sa First National Higher Education Day niadtong Mayo 22, 2021.

Giila sa Ched ang USC tungod sa Exemplary Leadership, Institutional Performance sa Quacquarelli Symonds (QS) Asia University Rankings, ug sa Program Excellence sa Centers of Excellence (COEs) ug Centers of Development (COD) niini.

Sa pagsaulog sab niini sa ika-27 nga anibersaryo sa pagkamugna, gipasidunggan sab sa Ched ang USC tungod sa Institutional Excellence niini isip Autonomous Higher Educational Institution (HEI) ug isip Partner for Quality Assurance in Higher Education.

Gidawat ni Fr. Jesuraj Anthoniappen, SVD, luyoluyong pangulo alang sa Academic Affairs, ang awards sa USC gikan nilang Ched Chairman Dr. Prospero E. de Vera III ug Ched 7 Director Dr. Maximo C. Aljibe atol sa sinagol (inatubangay ug birtuwal) nga awarding ceremony sa Cebu Normal University (CNU).

Kay limitado ra sa 50 ka tawo ang pwedeng makatambong sa CNU activity center, pipila lang ka mga pangulo sa nga higher educational institutions ang personal nga nakatambong, samtang ang uban ug kadtong sa ubang dapit sa rehiyon mitambong sa video conferencing.

Sa iyang mensahe, giila ni Anthoniappen ang "kanunay nga pag-abag" sa Ched ug sa ubang nga ahensya sa kagamhanan nga "nakakita ang among kahimuan nga mo-usbaw pataas" ug sa ilang "pagka-manggihatagon nga mitunol sa pag-abag," ug sa pagtanyag og mga scholarship ug research grant.

Siya miingon nga ang giya, panugon ug suporta sa Ched atol sa pandemya nga nakabatyag sa pakigbisog sa mga tulunghaan nga mipahiangay sa pa-usab-usab nga mga hagit sa pagpanudlo "nakapakita namo og kahayag sa paglaum ni'ng mga mangitngit nga mga adlaw."

"(Wala gyud ang USC mo-) kompromiso sa among dekalidad nga edukasyon bisan niining nagkaguliyang nga panahon," miingon si Anthoniappen, ug midugang nga "dili gyud mi mokompromiso kung susamang pagkabalda magitabo na usab."

Giambit ni Fr. Narciso A. Cellan Jr., SVD, D.Comm., pangulo sa USC nga milingkod sa katungdanan tunga-tunga sa pandemya, sa mga pasidungog sa tanang mga magtutudlo, tinunan ug kawani, ingon man sa ilang mga mission partners. (PR)

This posting includes an audio/video/photo media file: Download Now

Panawagan sa publiko

Posted: 07 Jun 2021 05:38 AM PDT

Ang Department of Social Welfare and Development (DSWD) Field Office VII, Cebu City nangayo og tabang sa publiko sa pagpangita sa mga ginikanan ug kaparyentihan sa niining bata.

Usa ka batang babaye nga gitagaan og pangalan Alexandra Yule Denise Rivera nga gibanabana nga usa ka adlaw sa dihang gibilin sa usa ka inahan nga ginganlan og Abegail niadtong Agusto 6, 2004 sa North General Hospital, Barangay Talamban, Siyudad sa Sugbo.

Kung mapakyas ang mga ginikanan ug kaparyentihan sa pagpatim-aw ug pagkuha sa bata sulod sa usa ka buwan, mamahimo na nga mapasang-at ang administrative abandonment sa bata sa buhatan sa DSWD Central Office.

Mamahimo nga makigkita sa social worker nga si Joafe Astaca-an sa buhatan sa DSWD, Field Office VII, M.J Cuenco Avenue Corner Gen. Maxilom Avenue, Barangay. Carreta, Cebu City o motawag sa (032) 412-9908 ug 232-9505 ug mobile phone no. 09066566199. (PR)

This posting includes an audio/video/photo media file: Download Now

Editoryal: Kon dunay kooperasyon

Posted: 07 Jun 2021 05:37 AM PDT

Ang panagtapok sa mga kustomer sa mga resto bar nga nagkompromiso sa social distancing ug naglapas sa health protocol ug executive order ni Mayor Edgardo Labella, nangahitabo na sa miagi samtang ubos ang Sugbo sa modified enhanced community quarantine (MECQ).

Ang pagkasakop sa 88th Avenue, usa ka restobar sa Cebu City, di unang higayon nga dunay establisemento sa dapit nga naaktuhang nakalapas sa mga health protocol ug executive order ni Labella.

Kaniadto, dunay bar nga nagpainom og sobra sa duha ka botelya nga limit sumala sa nalatid sa EO ni Labella. Mismo ang kapulisan maoy nakasakop.

Niadtong katapusang semana sa Mayo, duna say gikataho nga nagpa disco gamit ang live band sa usa ka restobar sa uptown sa Dakbayan sa Sugbo. Makatambong lang kadtong nakaparehistro sa online. Hayan tumong niini mao ang pag-limit sa gidaghanon sa mga tawo nga makasulod. Ang kapulisan maoy nakadawat ani nga taho.

Maglisod ang Business Permit and Licensing Office (BPLO) pagpatuman sa mga lagda sa mayor ug health protocol kay seguradong kuwang sila sa mga tawo.

Gikinahanglan ang transparency sa mga buhatan sa kagamhanan nga nagpatuman sa mga polisiya kalabot sa panglawas samtang naa pa sa MGCQ ang Sugbo.

Kon sihag ang pagpadagan sa mga buhatan sa ilang pagpatuman sa mga polisiya ug lagda, makakuha sila sa pagsalig sa katawhan. Kon dunay pagsalig, dunay kooperasyon. Kay di man maato sa kagamhanan ang pagbantay sa tanang mga establisemento, ang abag sa publiko gikinahanglan kaayo.

Di sa tanang higayon naay personnel sa kagamhanan nga magbantay sa mga establisemento. Apan kon ang publiko nasayod nga di maanugon ang ilang kahago kay aksyunan ang ilang impormasyon, madasig ang katawhan sa pag-report sa kagamhanan sa mga kalapasan. Way kalapasan nga matago.

This posting includes an audio/video/photo media file: Download Now

Nalzaro: Pakulo sa bakuna

Posted: 07 Jun 2021 05:35 AM PDT

Mihimo na og pipila ka mga pakulo ang mga local governments unit (LGU) aron maenggangyo ang mga lumolupyo sa pagpabakuna. Daghan pa man god ang nagduha-duha pagpabakuna gumikan sa kabalaka sa epekto niini ug mga negatibong balita kabahin sa bakuna. Labi pa nga adunay mga balita nga natakbuyan gihapon sa Covid-19 ug aduna gihapoy namatay sa Covid bisan nabakunahan.

Sa Estados Unidos, ang kagamhanan mihatag og incentives o discounts sa mga tawo nga fully vaccinated. Sama sa discounts sa shopping malls, supermarkets, sa mga transportasyon, NBA tickets ug stimulus package o financial assistance gikan sa kagamhanan. Sa Las Pinas, Metro Manila, nagpa-raffle ang mga opisyal og mga in kind sama sa mga sinakong bugas.

Si Lapu-Lapu City Mayor Junard Chan mitanyag nga mohatag og P1,000 ngadto sa taga Opon nga mo-post sa ilang hulagway nga nabakunahan na ug mohimo og testimony sa Facebook o social media. Matod sa mayor nga kini maoy pang-alkontra sa nikatap nga fake news kabahin sa vaccination program. Gikan sa bulsa sa mayor ang iyang ihatag nga reward. Ang Cebu City ug Mandaue City mohangyo sa mga tag-iya sa mga commercial establishment nga mohatag og discount sa mga nabakunahan na. Pero makadani kaha kini sa katawhan?

SENIOR CITIZEN

Samtang ang grupo sa mga senior citizen nihangyo usab sa Inter-Agency Task Force nga tugutan na silang fully vaccinated na nga makagawas sa ilang mga balay. Hangtod god karon, ang mga nag-edad og 65 anyos pataas, wala pa tuguti nga makagawas gumikan kay sila maoy daling matakbuyan sa virus. Makagawas lang sila kon essential o importante kaayo ang tuyo sama sa pagkonsulta sa doktor, moadto sa hospital ug mopalit og mga tambal.

Apan ang hangyo gisupak sa health authorities kay delikado gihapon sa mga senior citizen nga mogawas kay bisan kon fully vaccinated na ang usa ka tawo, matakbuyan gihapon sa Covid-19. Hinuon, dili lang magrabihan. Gawas pa, daghan ang magselos nga senior citizens labi pa kadtong wala pa mabakunahi kon dili sila tugutan nga makagawas kay aduna man pod silay rason nganong dili magpabakuna.

This posting includes an audio/video/photo media file: Download Now

Espinoza: Sara Duterte na!

Posted: 07 Jun 2021 05:35 AM PDT

Klaro na ang bahig kon kinsa ang modagan pagka presidente sa piliay sa Mayo 9, 2022. Niadtong Dominggo, Hunyo 6, gilusad ang "DU30 Parin" nga kampanya sa Visayas apan gipahigayon sa usa ka hotel dinhi sa Dakbayan sa Sugbo. Ang hulagway ni Davao City Mayor Sara Duterte-Carpio ang napatik sa tarpaulin. Wa pa gibutyag kinsa ang kandidato o kandidata ni Mayor Sara Duterte pagka bise presidente. Modagan ba gyud pagka bise presidente si Presidente Duterte?

Di na malalis nga ang kandidato ni Presidente Duterte nga mohulip sa iyang dapit mao ang iyang iha unika, si Mayor Sara. Sa ato pa, drama lang diay ang pagkyutkyut kaniadto ni Mayor Sara nga dili siya modagan ug ang makusganong pagdumili sa iyang amahan sa rason nga daghan ang problema sa pagpadagan sa Pilipinas. Hinuon, ang mga suod ni Duterte nakahibawo na nga si Mayor Sara modagan.

Apan, tungod kay ako natawo ug nagdako sa Mindanao sa lungsod sa Cagwait, Surigao del Sur, usa ka garbo alang kanako nga ang sunod nga presidente, kon dunay swerto, taga Mindanao gihapon. Sori, Torni Frank ug Sir Cheking, sa akong bias sa Mindanawanon. Pero, saon man nga di man malalis nga didto gilubong ang kaputol sa akong pusod sa yuta ilawom sa among payag.

Sa mga kritiko ni Presidente Duterte, ang dakong katuyoan sa pagdagan ni Mayor Sara pagka presidente ug kon madayon nga siya ang kandidato pagka bise presidente mao ang proteksyon sa iyang kaugalingon kon wala na siya sa poder tungod sa posibilidad nga daghang kaso unya ang iyang atubangon sama sa giingon nga EJK (extrajudicial killing) sa mga nahilambigit o di ba gidudahan lang nga dunay kasayuran sa ilegal nga drogas ug kining gihimong' dakong isyu karon sa oposisyon sa West Philippine Sea nga gipanag-iya na sa Tsina.

Atong hisgotan kon kinsa ang kandidato o kandidata ni Mayor Sara pagka bise presidente. Si Presidente Digong, si Senador Imee Marcos, o si kanhi senador Bongbong Marcos (BBM) ba? Sa miagi, ang PDP-Laban sa ilang national convention sa dakbayan sa Sugbo nagpasar og resolution nga padaganon pagka bise presidente si Presidente Digong apan hangtud karon wa pa gyud siya mohatag og reaksyon. Karon bag-o gibaniog nga si kanhi defense secretary Gibo Teodoro modagan pagka bise presidente ni Mayor Sara. Unsa ni ka tinuod? Huwat lang nya ko sa hunghung ni Choy Torralba.

Apan kon modayon og dagan pagka presidente si Senador Manny Pacquiao, taga Sarangani Island, Mindanao, ug interim president sa PDP-Laban, morag mabahin ang mga botante sa Mindanao ug Visayas. Sa ato pa, duna unyay buhaton ang PDP-Laban nga di modagan pagka presidente si Senador Pacquiao. Ang plano sa PDP-Laban nga palagputon si Pacquiao mosamot kagubot ang ilang partido unya di na mapugngan nga modagan siya pagka presidente.

Ang oposisyon karon wa pay klaro nga kandidato pagka presidente. Ang piliay unya sa Mayo 9, 2022 kulba-hinam tungod kay si Mayor Sara Duterte ang kandidata sa administrasyon ug iyang amahan ang posible nga kandidato pagka bise presidente.

This posting includes an audio/video/photo media file: Download Now

Tambagi ko Noy Kulas: Sex buddy

Posted: 07 Jun 2021 05:35 AM PDT

Dear Noy Kulas,

Tawga lang ko sa ngalan nga Amihan.

Akong problema bahin sa akong gibati nga wala ko kasabot. Nahigugma ba kaha ko? Kanang dugay na mi aning tawhana, but wala mi formal nga I love you here and there. In short, magkita ra mi ug mag sex mi. Akong nahibaw-an niya iya rang name but wa ko kahibawo taga diin siya.

Karon niabot sa punto nga ako nang tapuson ang among pagduwa pero magsige man gihapon siya og paramdam. Dili na unta ko ganahan makigkita niya kay naa koy ganahan nga manghud pa nako og six years pero dili na minor.

Noy ni-chat to si BB Boy nako. Ganahan ko ani niya kay naay goal sa kinabuhi, may plano bitaw, dili latagaw. Pero akong problema lagi kay kani laging akog buddy, unta di n ani magpa kita para di ko ma luya.

Unsa man akong angay buhaton? Kani man gud siya, Noy, kaning akong buddy, mura ni siyag it's complicated. Basig naa ba ni asawa o kapuyo, maeskandalo unya ko. Maayo ning BB Boy kay ulitawo. Unsa ang akong angay buhaton?

AMIHAN

Amihan,

Ang tanan naa ra nimo. Di ka makapiog sa iyang pagpanintal nimo. Mao na ang rason nga maglisod ka sa pagbalibad anang imong buddy kay maglisod ka pagpiog sa sexual desire uban niya. Kon imong paundayunan, bisan pag pila pa na ka Bb Boy imong mauyab, modailos ra gihapon ka ni Buddy nimo.

First, putla ang inyong communication. Pag ilis og number and I delete ang numero. I block siya sa social media. Mao ni ang labing importante nimo nga buhaton aron di ka mabitad ngadto sa tentasyon. Gusto ka na man kaha nga mag serious sa imong relasyon ug kinabuhi? Sakto ka, invest og time ug emotion sa tawo nga nag value nimo.

NOY KULAS

rojval69@yahoo.com

This posting includes an audio/video/photo media file: Download Now

Mongaya: Hatagag pusil mga bombero?

Posted: 07 Jun 2021 05:32 AM PDT

Bag-o lang ko nakasulat kabahin sa mga giingong abusadong bombero nga ningkiha hinuon og arson sa tag-iya sa trak nga nasunog diha sa Liloan. Nakalitan ko dihang nakabasa sa tuyo ni Sen. Bato dela Rosa nga hatagan og armas kining mga sakop sa kabomberohan.

Matod pa sa senador, ang mga bombero kuno wa kahadloki. Kon naa silay armas, wa nay mga buang nga motinunto nila.

Apan lahi man ang taho nga akong nadawat sa nahitabo sa Liloan. Ang nasunogan man ang gitinuntohan.

In fairness, nanawag ang usa ka bombero nga sakop sa Bureau of Fire (BFP) sa Liloan kay nisaysay sa ilang habig diha sa programang Tira Brigada ni Atty. Juril Patiño ug Jun Arellano. Lakip sa pamahayag mao ang paghimakak nga wala sila mangayo og padangog o pahalipay gikan sa nasunogan.

Gusto unta ko makabasa sa ilang investigation report kabahin sa sunog sa maong trak kay, matod pa, wala sila mohatag og kopya sa tag-iya niini.

Dili man sekreto kining resulta sa imbestigasyon sa usa ka sunog. Kon gusto ang kabomberohan sa Liloan nga moguwa ang tinuod sa maong isyu, mahimo ra mang ipahatod nila sa opisina sa Superbalita ang kopya.

O mas sayon para kanila mao ang pag-email sa kopya sa anol_cebu@yahoo.com. Atong hisgutan dayon kini karong umaabot nga Dominggo.

Hinuon, ako sab nga gihangyo ang tag-iya nga padad-an kog kopya sa reklamo nga gisang-at sa kabomberohan diha sa fiscal's office. Nag-atang sab ko og kopya unya sa kiha nga isang-at sa tag-iya.

Samtang nagpadayon kining maong kaso, makaingon ko nga angayan gyud tukion ni Sen. Bato dela Rosa ang iyang tinguha nga hatagan og armas ang kabomberohan. Kay unsa man say depensa unya sa mga masunogan batok sa mga hanggaw nga bombero. Wa ko moingon nga ang tanang bombero hanggaw. Apan kon naa, unsa may depensa sa mabiktimang nasunogan?

This posting includes an audio/video/photo media file: Download Now

at

No comments:

Post a Comment

Subscribe to: Post Comments (Atom)

End of Summer Sale ☀️😎

20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...